1 TESALONIKA
11 Surat iteu’ jin Paulus, Silas ngan Timotius, surat iteu’ nena’ ngan Sidang Tesalonika, éh anah Allah éh Tamen ngan Tuhan Yésus Kristus. Jian Allah mena’ penika ngan pengepawah Néh ngan keh. 2 Améé’ ngelayau bara’ jian kenin ngan Allah uban ka’ah béé. Siget koléé mé’ sebayang, améé’ ngelayau sebayang tong keh. 3 Hun mah améé’ sebayang tong jumen Allah éh Tamen lu’, ngelayau améé’ seruh tong kekat kereja’ keh ngan pengelan keh tong Tuhan, ngan tong keh kereja’ muruh naneu’ penika keh ngan Tuhan, ngan tong keh ngelan mu’un adang Tuhan Yésus Kristus juk tuai kepéh. 4 O kekat padéé’ ké’ améé’ jam Allah pu’un ka’ah ngan lepah ngevéléé’ keh dokoo’ keh omok anah nah. 5 Uban Rengah Jian éh benara’ mé’ ngan keh rai, bé’ améé’ bara’ éh pekua’ ha’ tosok éh kemalai kelunan awah, bang pu’un éh neu’ penyukat Sahéé’ Ni’ai, pah avéé’ ka’ah péh jam kekat éh benara’ mé’ inah pu’un éh teneng mu’un. La’ah ka’ah jam tong pengurip améé’ hun mé’ pu’un mokoo’ ngan ka’ah rai, pu’un urip mé’ kenat uban mé’ nolong ka’ah. 6 Pu’un keh kivu pengurip améé’ dalem Tuhan ngan kivu pengurip Tuhan Yésus péh. Na’ péh ka’ah pinaa’ arong penusah, pu’un keh alaa’ ha’ tebaraa’ mé’ ngan murung kenin, kemurung éh jin Sahéé’ Ni’ai. 7 Uban kenat ka’ah jah telana’ ngan kekat kelunan Kristén tong Makedonia ngan Akhaya. 8 Rengah tong Tuhan purat avéé’ tong Makedonia ngan Akhaya, jin ka’ah. Kelunan tong semah-semah péh Menéng rengah tong pengelan keh tong Allah. Uban kenat améé’ bé’ tusah bara’ ineu’-ineu’ kepéh. 9 Kekat kelunan bara’ ka’ah alaa’ améé’ ngan jian hun mé’ tavin keh rai, irah bara’ ka’ah bé’ keloo’ seva’ butun kepéh, bang tuai tavin jah awah Allah éh murip dokoo’ kivuu ngan Seva’ Iah. 10 Irah péh bara’ ka’ah mena penyavéé’ Anak Allah jin seruga, inah éh Yésus éh lepah pebetéé’ Allah jin patai Néh. Yésus nah éh ngelepu uleu’ jin kemerek Allah éh juk avéé’.
21 O kekat padéé’ ké’, ka’ah tengéé’ jam hun mé’ tai tavin keh rai, bé’ éh tuyah-tuyah awah. 2 La’ah ka’ah jam tong jalan kelunan peketa mé’ ngan pekenyaa’ mé’ hun mé’ mokoo’ keto tong tana’ Pilipi rai, bé’ jak mé’ tai tavin ka’ah tong Tesalonika rai. Na’ péh irah tong tana’ Pilipi peketa mé’, ngan irah Tesalonika ngelawan mé’ mu’un, Tuhan ngegahang kenin mé’ dokoo’ mé’ tai bara’ Rengah Jian Néh ngan keh kepéh. 3 Uban hun mé’ bara’ ha’ tebaraa’ Tuhan ngan keh, bé’ éh ha’ mé’ lavo’ awah ngan bé’ éh uban mé’ juk ngelayoo’ maneu’ jian ke’ mé’ pekelih keh. 4 Bé’ améé’ pané dokoo’ ngepayoo’ kenin kelunan, bang barei’ Tuhan ngevéléé’ améé’ ngan mena’ tebaraa’ Néh ngan mé’ ngan Iah ngelan mé’ bara’ éh ngan kelunan ngan teneng mu’un, kenat péh améé’ pané, bé’ makat dokoo’ ngepayoo’ kenin kelunan bang améé’ ngepayoo’ kenin Allah éh jam petuneng kenin mé’. 5 Uban ka’ah jam bé’ améé’ pané mejing ngan ngajung ka’ah, ngan bé’ mé’ pané ngelayoo’ uban mé’ magat tong ineu’-ineu’ éh anah keh, Allah jam améé’ bé’ pu’un maneu’ kenat. 6 La’ah bé’ améé’ juk kenajung kelunan, kenat péh jin ka’ah, kenat péh jin irah éh jah péh. 7 Na’ péh améé’ omok nyohoo’ keh maneu’ iteu’ ngan maneu’ inah uban améé’ éh lawah Kristus, bé’ améé’ nyohoo’ keh kenat. Bang kelebéé’ améé’ mokoo’ ngan ka’ah rai, dawai kenin mé’, améé’ barei’ jah tinen éh ngaboo’ anak néh. 8 Uban améé’ pika ka’ah kenat, améé’ keloo’ bara’ Rengah Jian éh jin Allah ngan keh, bang bé’ éh kenat awah, bang pah avéé’ laset mé’ péh, uban mé’ murung ka’ah mu’un-mu’un. 9 O kekat padéé’ ké’, adang keh jam tong kemutau ngan penusah mé’ kereja’ belah ka’ah. Putung dau ngan putung merem mé’ kereja’ dai améé’ petusah ka’ah kelebéé’ mé’ bara’ Rengah Jian éh jin Allah ngan keh. 10 Ka’ah éh jam améé’ kenat péh Allah. Barék mé’ ni’ai, teneng ngan bé’ pu’un sala’ ineu’-ineu’ belah ka’ah éh ngelan tong Kristus. 11 Ka’ah jam améé’ nebaraa’ ka’ah rai barei’-okoo’ jah tamen nebaraa’ anak usah néh. 12 Pu’un mé’ ngegahang kenin keh ngan papung keh, ngan nyohoo’ keh murip ngan barék éh payoo’ tong jumen Allah éh tebai ka’ah tai lem nihau Néh ngan pengaren Néh. 13 La’ah jah jalan kepéh améé’ ngelayau bara’ jian kenin ngan Allah. Uban hun mé’ tuai bara’ ha’ tebaraa’ Allah ngan keh rai, pelapah ka’ah alaa’ ha’ tebaraa’ mé’, bé’ ka’ah seruh éh barei’ ha’ éh jin kelunan awah, ka’ah jam éh matek ha’ Allah mu’un. Teneng kenin keh seruh éh kenat. Uban Allah ngelayau kereja’ lem kenin ka’ah éh ngelan. 14 O kekat padéé’ ké’, ka’ah iteu’ teneng penusah pekua’ éh pu’un tong irah sidang Allah tong tana’ Yudea, ngan irah éh anah Kristus Yésus. Irah pohoo’ ka’ah ke’ éh peketa keh pekua’ barei’ irah Yahudi peketa irah éh pohoo’ irah ke’ éh ngelan tong Tuhan. 15 Uban irah Yahudi nah pu’un réh lepah mematai Tuhan Yésus ngan mematai kuraa’-kuraa’ nabi Tuhan, ngan pu’un réh peketa pah avéé’ améé’ péh kepéh. Bé’ réh pu’un ngepayoo’ kenin Allah, luvaa’ mu’un réh tong kekat kelunan. 16 Irah meta’ améé’ bara’ rengah urip ngan kelunan éh tengéé’ pohoo’, rengah éh omok purip réh. La’ah irah Yahudi nah ngelayau pepit-pepit dalem penyala’, ngan hun iteu’ rek Allah pu’un tong réh. 17 O kekat padéé’ ké’, hun lu’ petat rai, usah lu’ pejuu’ bang lem kenin mé’, améé’ barei’ keto pemung ngan keh, pu’un mé’ tawai keh mu’un-mu’un. Mekat mu’un mé’ pitah jalan ke’ mé’ omok tai tavin ka’ah kepéh. 18 Gahang kenin mé’ juk tai tavin keh lepah rai, pinaa’ koléé’ akeu’ Paulus juk tai, bé’ makat kenat jah duah koléé’ awah, bang Sitan éh magen améé’. 19 Améé’ jam ka’ah pu’un tigéh, jian kenin mé’ seruh ka’ah, ka’ah éh jalan kenajung mé’ tong kemenang mé’ hun uleu’ pu’un tong jumen Tuhan Yésus sioo’ penyavéé’ Néh kepéh vam. Ka’ah néh éh, bé’ éh kelunan éh jah. 20 Adang ka’ah éh kenajung ngan kemurung mé’.
31 La’ah hun améé’ bé’ omok ngeretep uban mé’ bé’ jam rengah keh, améé’ seruh pelapah jian améé’ mokoo’ de ke’ tong Atena, 2 ngan nyohoo’ Timotius tai tavin ka’ah, iah éh padéé’ lu’ dalem Tuhan éh pemung kereja’ ngan mé’ dalem kereja’ Allah perengah Rengah Jian tong Kristus. Améé’ nyohoo’ iah tai ke’ néh ngegahang kenin keh ngan ngereken pengelan keh, 3 dai jah usah péh moléé’ murin naneu’ pengeketa néh neu’ kelunan éh maneu’ éh. Ka’ah tengéé’ péh jam kekat pengeketa inah pu’un éh lem pengeloo’ Tuhan ngan uleu’. 4 Uban hun améé’ pu’un mokoo’ keto ngan keh rai, bé’ jak pu’un penusah inah, pu’un améé’ bara’ adang uleu’ juk jam tusah, ngan ka’ah jam, pu’un éh mu’un kenat pekua’ benara’ mé’ ngan keh rai. 5 Uban kenat akeu’ nyohoo’ Timotius tai tavin keh, dokoo’ ké’ omok jam tong pengelan keh tong Kristus, éh kemapah ké’ dai Sitan pu’un tupat ka’ah ngan kekat kereja’ mé’ belah ka’ah rai pu’un tuyah-tuyah awah. 6 Hun iteu’ Timotius lepah moléé’ ngan iah mihin Rengah Jian tong Ka’ah to ke’ ngelan tong Kristus ngan ka’ah kua’ pepika. Iah bara’ ngan améé’ ka’ah ngelayau murung, siget koléé’ keh seruh améé’ ngan ka’ah tawai kenin juk temeu’ ngan améé’, pekua’ améé’ juk temeu’ ngan ka’ah. 7 Naneu’ inah O kekat padéé’ ké’, améé’ pu’un gahang kenin dalem kekat pengeketa ngan penusah mé’. Pengelan keh tong Kristus inah ngegahang kenin améé’, 8 uban hun iteu’ omok mé’ ngeretep lem kekat penusah mé’ hun ka’ah nekedéng petem dalem Tuhan. 9 La’ah hun iteu’ omok mé’ bara’ jian kenin ngan Allah uban kekat kemurung mé’ tong jumen Néh naneu’ ka’ah. 10 Siget dau ngan siget merem améé’ sebayang menyat Iah mukap jalan ke’ mé’ omok tai tavin ka’ah, dokoo’ mé’ pesukup ineu’-ineu’ éh kurang dalem pengelan keh tong Kristus. 11 La’ah jian Allah éh Tamen uleu’, ngan Tuhan Yésus mukap jalan ke’ mé’ omok tai tavin keh. 12 La’ah jian Tuhan maneu’ ka’ah pepit-pepit dalem penika keh belah ka’ah ke’, kenat péh ngan kekat irah éh jah péh, pah avéé’ keh jam pika mu’un barei’ penika améé’ tong ka’ah nah. 13 Kenat péh jalan Tuhan omok ngereken kenin keh, ngan maneu’ keh ni’ai, bé’ pu’un sa’at ineu’-ineu’ tong jumen Allah éh Tamen uleu’ sioo’ savéé’ Tuhan Yésus pemung ngan kekat kelunan éh anah Nah.
41 O kekat padéé’ ké’, ha’ ké’ kepéh ngan keh, pu’un mé’ lepah bara’ tong barék éh tekep kenivu keh, jalan keh omok ngepayoo’ kenin Allah barei’ éh neu’ keh hun iteu’ nah. La’ah hun iteu’ dalem ngaran Tuhan Yésus améé’ nyohoo’ keh pepit-pepit jian kepéh. 2 Uban ka’ah jam kekat sohoo’ éh benara’ mé’ ngan ka’ah, pu’un éh jin Penyukat Tuhan Yésus. 3 Uban inah éh pengeloo’ Allah ngan keh, Iah keloo’ ka’ah ni’ai ngan mai maneu’ ineu’-ineu’ barék éh sa’at. 4 Kekat irah lakei’ Saa’ belah ka’ah tekep jam kineu’ ayoo’ murip pemung ngan redo néh tong jalan éh omok pesenang kenin Allah ngan kelunan. 5 Mai éh alaa’ éh uban néh magat éh metok awah, barei’ éh naneu’ kelunan éh bé’ jam Allah. 6 Mai jah usah péh ngelapah awah ngan maneu’ penyala’ tong padéé’ néh dalem Tuhan tong jalan iteu’. Uban pu’un mé’ lepah bara’ ngan keh ngan nyohoo’ keh mavaa’ mu’un, adang Tuhan pu’un ngukum kelunan éh sa’at barék kenat. 7 Uban bé’ Allah tebai uleu’ kelu’ maneu’ barék éh jelemih, bang Iah tebai lu’ tong kekat éh ni’ai. 8 Uban kenat séé’-séé’ éh bet ha’ tebaraa’ iteu’, bé’ éh bet ha’ kelunan awah, bang iah bet ha’ Allah éh mena’ Sahéé’ Ni’ai néh ngan ka’ah. 9 La’ah bé’ tiken ke’ ku’ lah nyurat nyohoo’ keh pika irah éh padéé’ keh, éh pekua’ pengelan ngan keh lem Tuhan, uban ka’ah tengéé’ lepah jam jin Allah, tekep pika jah usah ngan jah usah, 10 ngan pu’un keh pika kekat padéé’ keh dalem Tuhan éh tong tana’ Makedonia rai. O kekat padéé’ mé’, uban keh pu’un pika réh kenat, inah améé’ nyohoo’ keh pepit kepéh dalem penika keh. 11 La’ah jian keh mekat pitah jalan dokoo’ keh omok murip ngan pawah ngan dawai kenin, ngan mai petusah kelunan éh jah, bang jian siget usah pata maneu’ kereja’ néh, barei’-okoo’ éh sohoo’ mé’ ngan keh lepah rai. 12 Hun keh maneu’ éh kenat boh kelunan éh bé’ ngelan tong Tuhan omok sepah keh, ngan ka’ah péh omok murip jian bé’ murip ngabit kelunan awah. 13 O kekat padéé’ ké’, améé’ keloo’ ka’ah jam tong irah éh lepah matai, dokoo’ mai ka’ah pelasam kenin barei’ kelunan éh bé’ ngelan. 14 Uleu’ ngelan Yésus lepah matai ngan murip kepéh, kenat péh uleu’ ngelan kelunan éh matai ngan éh ngelan tong Yésus, adang Tuhan Allah juk purip réh kepéh dokoo’ réh murip pemung ngan Yésus. 15 Uban iteu’ éh ha’ tebaraa’ Tuhan éh benara’ mé’ ngan keh rai, uleu’ éh murip keto tovoo’ penyavéé’ Tuhan, bé’ éh uleu’ éh tai tenah jin irah éh lepah matai nah. 16 Tovoo’ inah pu’un ha’ ja’au, ha’ meliket éh pengeja’au kekat meliket, ngan ha’ serupit Allah miha’, tovoo’ inah Tuhan Yésus pu’un tuai jin seruga. La’ah kekat kelunan éh lepah matai ngan éh ngelan tong Kristus, irah omok betéé’ tenah. 17 La’o inah uleu’ éh to murip tong tana’ iteu’, netéé’ Néh pemung ngan irah dalem avun dokoo’ petemeu’ ngan Tuhan tong sawang ngan uleu’ juk pemung ngan Tuhan pelinguh-linguh. 18 Uban kenat Jian ka’ah ngegahang kenin pesiget-siget usah keh naneu’ ha’ tebaraa’ iteu’.
51 O kekat padéé’ ké’, améé’ bé’ makat nyurat bara’ tatek ngan jaka’ néh pu’un kenat. 2 Ke’ néh kenat uban ka’ah tengéé’ jam ngan lenaa’, tong Dau penyavéé’ Tuhan juk avéé’ barei’ savéé’ kelunan nekau sioo’ merem. 3 Hun mah réh seruh, Kekat urip réh pu’un pawah ngan jian, tovoo’ jaka’ inah néh réh teneng tong penusah éh beleka’ avéé’, bé’ pu’un jah usah péh éh omok pelepu, adang néh beleka’ pu’un teneng tong réh barei’ kesakit redo tovoo’ réh juk nganak. 4 Bang ka’ah padéé’-padéé’ ké’, bé’ ka’ah murip dalem merem. Dau inah bé’ éh nekejet ka’ah barei’ savéé’ kelunan nekau. 5 Ka’ah béé kelunan éh murip dalem rema, kelunan keloo’ pemung tong rema éh nawa. Uleu’ bé’ murip dalem merem ngan éh pemung tong merem éh padeng. 6 Hun néh kenat mai uleu’ pegen lem kenin, bang tekep lu’ to’ot ngan mihau kenin lu’. 7 Uban kelunan éh pegen, sioo’ merem éh pegen, ngan hun réh mavuk, sioo’ merem réh mavuk. 8 Bang uban uleu’ pu’un tong rema, jian lu’ mavaa’ kenin lu’, ngan memakai pengelan ngan penika barei’ kerayung daven lu’, ngan tong pengelan lu’ tong Tuhan juk purip lu’, maneu’ éh barei’-okoo’ tupi daven lu’. 9 Uban bé’ Allah ngevéléé’ uleu’ ke’ néh mihin lu’ teneng tong rek néh, bang Iah ngevéléé’ uleu’ dokoo’ lu’ alaa’ urip neu’ Tuhan Yésus Kristus, 10 Yésus matai ngeliwah uleu’, dokoo’ uleu’ omok murip pemung ngan Néh tovoo’ savéé’ Néh kepéh, hun lu’ murip keto kenat péh hun lu’ lepah matai jaka’ inah. 11 Uban néh kenat jian keh pata ngegahang kenin keh, ngan nolong jah usah ngan jah usah barei’ éh naneu’ keh iteu’. 12 O kekat padéé’ ké’, améé’ nyohoo’ ka’ah ngerera’ tong kelunan éh kereja’ belah ka’ah, irah éh kevéléé’ Tuhan ke’ réh mihau ngan nebaraa’ ka’ah. 13 Jian ka’ah ngajung ngan pika irah uban kereja’ réh kenat. Jian ka’ah pawah kenin belah ka’ah ke’. 14 O kekat padéé’ ké’, améé’ nyohoo’ ka’ah petena’ kelunan éh leko kereja’, ngegahang kenin kelunan éh medai, nolong kelunan éh tekep tenolong, kebit kenin ngan kekat kelunan béé. 15 Mai pu’un jah usah péh nyulei’ kesa’at ngan kesa’at, bang jian keh ngelayau pekua’ maneu’ jian ngan nolong kekat kelunan. 16 Jian ka’ah ngelayau murung kenin, 17 ngan ngelayau sebayang, 18 Bang tekep ka’ah bara’ jian kenin dalem kekat ineu’-ineu’ péh, uban inah éh pengeloo’ Allah jin ka’ah kelunan éh murip pemung ngan Kristus Yésus. 19 Mai memata’ Sahéé’ Ni’ai. 20 Mai keh kahéé’ ha’ éh benara’ jin Sahéé’ Ni’ai. 21 Keh petuneng kekat néh béé, Jian keh kivu ineu’ éh jian. 22 Ngan mihau sahéé’, urip ngan usah keh dai pu’un kesa’at ineu’-ineu’ tong jaka’ Tuhan lu’ Yésus Kristus pu’un tuai kepéh. 23 La’ah jian Allah éh mena’ pengepawah Néh ngan uleu’, maneu’ keh anah nah mu’un, ngan mihau sahéé’ keh, ngan kenin keh, ngan usah keh jin kekat éh sa’at, pah avéé’ penyavéé’ Tuhan Yésus Kristus. 24 Allah éh tebai ka’ah adang Néh omok maneu’ éh kenat uban Iah tigéh. 25 O kekat padéé’ ké’, jian keh sebayang tong améé’. 26 Jian keh bara’ tabi’ ngan kekat padéé’ tam dalem Tuhan. 27 Akeu’ nyohoo’ ka’ah dalem ngaran Tuhan purung surat ké’ iteu’ ngan kekat padéé’ lu’. 28 Jian Tuhan lu’ Yésus Kristus mena’ pengejian ngan ka’ah béé.