1 PÉTERUS

¹ Surat iteu’ jin Péterus, Lawah Yésus Kristus surat iteu’ nena’ ngan kelunan éh kevéléé’ Allah éh lepah piso jin tana’ réh tengéé’, éh purat ngan mokoo’ tong tana’ Pontus, Galatia, Kapadokia, Asia ngan Bitinia. ² Dalem kekat pengeloo’ Allah éh Tamen uleu’, ka’ah pu’un kevéléé’ Néh, dokoo’ keh omok kelunan éh anah Nah éh ni’ai naneu’ Sahéé’ Ni’ai, dokoo’ ka’ah tigéh tong Yésus Kristus ngan pu’un ni’ai neu’ dahaa’ Néh. Jian Allah mena’ ngan keh pengejian ngan pengepawah ngan mutaa’ kepéh. ³ Jian lu’ bara’ jian kenin ngan Allah, Tamen Tuhan lu’ Yésus Kristus! Uban Iah pika uleu’ mu’un, Iah mena’ urip maréng ngan lu’, neu’ Néh pebetéé’ Yésus Kristus jin patai Néh. Iteu’ omok mena’ pengepelum éh reken ngan lu’. ⁴ Uban kenat uleu juk alaa’ kekat pengejian éh pu’un petenup neu’ Allah tulat irah éh anah Nah. Kekat pengejian inah pu’un nodoo’ Néh tong seruga tong retek éh bé’ omok tasa’, borok ngan béé péh. ⁵ Kekat pengejian inah anah ka’ah uban keh ngelan tong Allah. Uban kenat ka’ah pu’un nihau neu’ penyukat Allah dokoo’ ka’ah omok alaa’ jalan alaa’ urip éh petenup Néh ke’ Néh pepoléng éh tovoo’ ga’ dau. ⁶ Uban kenat jian ka’ah murung kenin, na’ péh ka’ah teneng keta neu’ penusah éh pinaa’ arong hun iteu’, kekat penusah inah pu’un éh metok awah. ⁷ Kekat inah dokoo’ pepoléng hun keh ngelan mu’un tong Tuhan hun néh bé’ péh. Mas éh omok tasa’ péh, penarem palaa’ luten. Uban kenat pengelan keh éh pelapah jian jin Mas péh tekep penarem, dokoo’ néh makin reken. Hun néh kenat, hun mah Yésus Kristus tuai kepéh, ka’ah omok alaa’ kenajung, kemaren ngan penyepah jin Allah. ⁸ Ka’ah pika Iah na’ péh ka’ah bé’ jak na’at Iah. Pu’un keh ngelan tong Néh na’ péh hun iteu’ ka’ah bé’ na’at Iah. Uban kenat kemurung keh inah matek Ja’au, maren ngan bé’ omok benara’. ⁹ Éh ke’ néh kenat uban Iah lepah purip sahéé’ keh, inah sin pengelan keh tong Kristus. ¹⁰ Jalan urip iteu’ éh teneteng ngan éh kelenaa’ irah nabi ngan pu’un réh bara’ tong penika éh nena’ Allah ngan keh. ¹¹ Sahéé’ Kristus pu’un dalem irah nabi ngan sahéé’ inah pu’un bara’ tong pengeketa éh tekep teneng tong Kristus ngan tong Allah pu’un ngajung Iah kepéh. Irah nabi gahang kenin tatek hun néh pu’un kenat da’. ¹² Allah pu’un bara’ ngan irah nabi tong kekat éh naneu’ réh nah bé’ éh tulat usah réh tengéé’, bang pu’un éh tulat ka’ah. Kekat éh benara’ irah nabi inah, hun iteu’ lepah keh menéng éh jin irah éh bara’ tong Rengah jian inah. Irah perengah éh ngan keh palaa’ penyukat Sahéé’ Ni’ai, éh nena’ jin seruga pah avéé’ irah meliket péh keloo’ jam tong kekat inah. ¹³ Uban néh kenat jian keh ngelayau petenup, mavaa’ mu’un-mu’un ngan pu’un pengepelum penoo’ tong pengejian éh juk nena’ ngan keh tovoo’ Yésus Kristus tuai kepéh. ¹⁴ Jian keh kivu sohoo’ Allah, mai keh kivu kekat pengagat dalem kenin keh barei’ éh neu’ keh sahau hun keh bé’ jak jam Allah. ¹⁵ Bang barei’ Allah éh tebai ka’ah pu’un ni’ai, jian ka’ah péh ni’ai dalem kekat ineu’-ineu’ penganeu’ keh. ¹⁶ Uban pu’un jah ha’ lem surat Allah, ka’ éh, Jian ka’ah ni’ai uban Akeu’ éh ni’ai, ha’ Tuhan. ¹⁷ Pu’un keh sebayang ngan Tamen keh tong seruga, bang mai keh seruh Allah tengéé’ kenin petuneng kelunan, adang Iah pekua’ kenin petuneng siget-siget penganeu’ réh. Hun néh kenat kelebéé’ keh murip keto tong tana’, jian keh seva’ Iah ngan mai maneu’ sa’at. ¹⁸ Kejam ka’ah jalan Tuhan ngelepu ka’ah jin urip keh sahau, éh urip tepun keh. Bé’ éh ngelepu keh palaa’ pirek ngan mas éh omok béé. ¹⁹ Ka’ah iteu’ kelepu Néh neu’ penyukat dahaa’ Kristus. Iah mena’ urip Néh barei’ domba éh penatai réh éh pengena’ réh ngan Tuhan éh jalan réh omok tavin Tuhan sahau, domba éh matek jian mu’un. ²⁰ Iah pu’un kevéléé’ Allah hun tana’ iteu’ bé’ jak pu’un, ngan pu’un Iah poléng kepéh sioo’ tai ga’ tana’ dokoo’ ka’ah omok alaa’ urip. ²¹ Jin Iah ka’ah ngelan tong Allah, Éh lepah pebetéé’ Éh jin pematai ngan peparen Éh. Uban néh kenat hun iteu’ ka’ah ngelan tong Allah ngan ngepelum tong Néh ngan kenin keh mu’un. ²² Uban ka’ah kivu ha’ tebaraa’ éh teneng jin Allah, ka’ah pu’un ni’ai ngan ka’ah murung padéé’ keh dalem Tuhan ngan semu’un kenin. Uban kenat jian keh kua’ pepika ngan kekat kenin keh. ²³ Naneu’ ha’ tebaraa’ Allah éh murip ngan pelinguh. Ka’ah lepah kenanak maréng, bé’ éh jin kelunan bang jin tamen keh éh pelinguh. ²⁴ Barei’ ha’ dalem Surat Allah, Kekat kelunan pu’un barei’ ureu’ awah, ngan kekat kejian néh barei’ busak awah, barei’ ureu’ éh melayeu’ ngan busak éh peleraa’. ²⁵ Bang ha’ tebaraa’ Tuhan pu’un pelinguh. Ngan ha’ tebaraa’ néh inah, inah éh Rengah Jian éh benara’ réh ngan keh rai.

¹ Uban kenat, Jian ka’ah bet kekat arong pengesa’at jin usah keh. Mai keh pané’ kenyo la’ah, mai keh ngelayoo’ maneu’ jian, mai keh sakit kenin ngan kelunan ngan mai keh ngesa’at ngaran réh. ² Bang barei’ anak bala mangaa’ juk météé’ nah, kenat péh jian ka’ah ngelayau juk mesep baa’ jin Sahéé’ Ni’ai, inah éh ha’ tebaraa’ Tuhan éh jian mu’un. Neu’ ha’ tebaraa’ inah ka’ah omok pepit gahang ngan alaa’ urip Tuhan. ³ Uban pu’un jah ha’ lem surat Allah éh bara’ ka’, Usah ka’ah péh jam tong penika ngan pengejian Tuhan. ⁴ Jian keh tuai tavin Tuhan, Iah bateu’ éh murip, Bateu’ inah nebet kelunan uban réh seruh éh bé’ jian, bang Allah éh ngevéléé’ Iah ngan ngajung Éh. ⁵ La’ah ka’ah kepéh seleket bateu’ éh murip, éh penakai dokoo’ maneu’ lamin Allah éh ni’ai. Uban néh kenat ka’ah barei imam éh kevéléé’ Allah ngan éh mena’ pengena’ éh ni’ai éh ngepayoo’ kenin Allah, neu’ Yésus Kristus. ⁶ Barei’ ha’ lem Surat Allah bara’, ka’ éh, Pu’un Ku’ ngevéléé’ jah bateu’ éh pelapah jian mu’un. Bateu’ inah nepei’ Ké’ tong Yérusalem, ke’ néh omok bateu’ pengereken, dokoo’ séé’ éh ngelan tong bateu’ inah, bé’ iah teneng menyaa’. ⁷ La’ah bateu’ inah jian mu’un éh ngan ka’ah éh ngelan, bang tong kelunan éh bé’ ngelan inah éh barei’ ha’ lem surat Allah bara’ Bateu’ éh nebet irah tukeng lamin uban réh seruh éh bé’ pu’un gunah, Bateu’ inah néh éh jian mu’un, ha’ Néh. ⁸ La’ah pu’un jah ha’ kepéh lem surat Allah La’ah inah éh bateu’ éh mihin kelunan tekaleu’, Neu’ bateu’ inah pinaa’ réh tekaleu’ avéé’ réh pegup, kenat ha’ Néh. Éh ke’ réh tekaleu’ kenat, uban réh bé’ ngelan tong ha’ tebaraa’ Allah, uban kenat éh pengeloo’ Allah ngan réh. ⁹ Bang ka’ah jah pohoo’ éh kevéléé’ Allah, imam-imam éh mena’ urip néh maneu’ kereja’ Allah, pohoo’ éh ni’ai, kelunan éh anah Allah mu’un. Allah ngevéléé’ keh dokoo’ keh omok perengah penganeu’ Néh éh ngebéé kenin kelunan Allah lepah tebai ka’ah musit jin merem dokoo’ masek lem rema Néh éh jian mu’un. ¹⁰ Sahau bé’ ka’ah kelunan éh anah Allah, bang hun iteu’ ka’ah éh anah Nah. Sahau bé’ ka’ah jam penika Allah, bang hun iteu’ ka’ah jam tong penika Néh kepéh. ¹¹ O kekat bakéh ké’, ka’ah barei’ kelunan nyakai ngan kelunan tejeu’ tong tana’ iteu’. Uban kenat akeu’ nyohoo’ ka’ah dokoo’ mai keh kivu kemagat éh sa’at lem kenin kelunan, éh ngelayau pekayau ngan sahéé’. ¹² Jian keh jian barék lem pengurip keh belah kekat kelunan éh bé’ jak sakui ngelan Tuhan, kenat péh hun réh pesala’ keh tong ineu’-ineu’ péh, naneu’ réh na’at barék keh éh jian inah, irah éh bé’ ngelan Tuhan péh, omok réh seva’ Allah tovoo’ Dau Néh tuai kepéh petuneng kelunan. ¹³ Dalem ngaran Tuhan jian keh ngerera’ tong peritah, jian péh tong pengeja’au raja’ Rum éh bau kekat réh béé. ¹⁴ Kenat péh ngan gabenor éh kevéléé’ pengeja’au Raja’ Rum ke’ néh ngukum kelunan sa’at ngan ke’ néh sepah kelunan éh maneu’ jian. ¹⁵ Uban inah éh pengeloo’ Allah hun keh maneu’ kekat barék éh jian, inah jalan keh mapat kelunan éh pané éh pesala’ keh awah. ¹⁶ Jian keh murip barei’ kelunan éh pohoo’ pelepu, na’ péh kenat mai keh pakai pengelepu keh inah dokoo’ petavun pengesa’at, Bang jian keh murip barei’ kelunan éh kivu sohoo’ Allah. ¹⁷ Jian keh ngerera’ tong kekat kelunan béé murung tong kekat padéé’ keh dalem Tuhan, Jian keh medai tong Allah ngan ngerera’ tong raja’. ¹⁸ Jian kekat kelunan sohoo’ petem kivu sohoo’ pengeja’au néh ngan ngerera’ tong réh, bé’ makat ngan kelunan éh jian ngan éh pika keh awah, bang ngan irah éh mahéng kenin ngan éh bé’ jam pika péh. ¹⁹ Adang Allah omok mena’ pengejian ngan keh hun keh ngan kebit kenin ngeretep lem kekat pengeketa, éh semu’un néh bé’ tekep teneng tong keh uban keh kivu pengeloo’ Allah. ²⁰ Hun keh ngeretep tovoo’ réh mipok keh uban keh pu’un maneu’ sala’, bé’ iteu’ omok ngegahang kenin keh ngan nolong keh. Bang hun keh ngeretep ngan kebit kenin tovoo’ réh peketa keh uban keh maneu’ kekat éh teneng, adang Allah omok pengejian ngan keh. ²¹ Kenat péh Allah tebai keh, dokoo’ keh omok ngeretep ngan kebit kenin lem kekat pengeketa keh, uban Kristus péh lepah keta uban Néh purip keh, ngan Iah bara’ jalan ngan keh dokoo’ keh omok kivu uban Néh. ²² Bé’ Iah maneu’ penyala’ ineu’-ineu’, ngan bé’ pu’un séé’-séé’ péh menéng ha’ Néh pané kenyo. ²³ Hun réh menoo’ Éh bé’ Iah nyakat menoo’ réh kepéh, hun réh peketa Éh bé’ Iah nyulei’ kesa’at inah kepéh ngan réh, bang Iah ngelan Allah éh petuneng ngan teneng inah. ²⁴ Kristus tengéé’ tagong penyala’ uleu’ usah Néh tong kayeu’ salib, dokoo’ uleu’ pelepu jin penyukat penyala’, ngan murip kivu pengeloo’ Allah. Kekat suhat Kristus nah éh peka’o keh. ²⁵ Sahau ka’ah barei’ domba éh tawang, bang hun iteu’ ka’ah lepah nihin moléé’ dokoo’ kivu gembala, éh mihau urip keh.

¹ Barei’ ha’ ké’ ngan kelunan sohoo’ kenat kepéh kekat ka’ah redo éh pu’un lakei’ petem kivu sohoo’ lakei’ néh. Hun pu’un irah lakei’ éh bé’ ngelan tong ha’ tebaraa’ Tuhan, hun néh na’at barék redo néh jian, boh iah keloo’ ngelan Tuhan kepéh na’ péh redo néh bé’ pu’un bara’ ineu’-ineu’ ngan néh. ² adang irah keloo’ ngelan hun néh na’at barék redo néh ni’ai ngan murip ngerera’ tong Tuhan. ³ Mai keh alaa’ kuraa’-kuraa’ arong pakai dokoo’ ngejian usah keh awah, mai keh maneu’ bok keh tengéé’ jin éh pohoo’ penganeu’ keh éh malai, ngan pakai jong mas ngan pakai talem pinaa’, jalan keh no’é’ kelunan awah. ⁴ Bang jian keh alaa’ layan éh jian neu’ kenin keh éh pu’un ni’ai. Layan omok mukun uban néh neu’ kenin éh dawai ngan kenin éh diva’, kenin éh kenat jian mu’un éh tong Allah. ⁵ Kenat péh irah redo sahau éh anah Allah ngan ngelan tong Tuhan, inah jalan irah ngejian usah réh, irah petem kivu sohoo’ lakei’ réh. ⁶ Kenat péh redo Abraham Sara sahau, iah kivu sohoo’ lakei’ néh, iah mateng lakei’ néh pengeja’au néh. Hun ka’ah maneu’ jian ngan bé’ pu’un medai, ka’ah péh seleket anak néh. ⁷ Kenat péh kekat ka’ah lakei’ éh pu’un redo, jian keh ngerera’ tong redo keh ngan pika éh, uban iah éh lemoo’ usah. Jian keh seva’ éh uban lakei’ ngan redo pekua’ alaa’ pengena’ urip éh mu’un ngan pelinguh jin Allah. Jian keh maneu’ kenat dai pu’un ineu’-ineu’ péh mapat ha’ sebayang keh. ⁸ Inah éh ga’ ha’ ké’, jian kekat ka’ah béé jah awah ha’ ngan jah awah penyeruh. Jian keh pekua’ pepika barei irah éh pepadéé’ mu’un. Ngan jian keh pekua’ tolong, petolong belah ka’ah ke’ ngan diva kenin. ⁹ Mai keh mipa kesa’at ngan kesa’at kenat péh mai keh menoo’ hun réh menoo’ keh; bang jian keh mipa kesa’at palaa’ pengejian éh jin Allah. Ka’ah tekep maneu’ kenat uban Allah pu’un pejajii’ mena’ pengejian, tovoo’ Néh tebai keh. ¹⁰ Barei’ ha’ lem surat Allah bara’, ka’ éh, Kelunan éh keloo’ murip jian ngan ngida, mai éh pané ngesa’at kelunan, ngan mai éh kenyo. ¹¹ Jian iah piso jin kekat éh sa’at ke’ néh maneu’ jian kepéh. Jian iah mekat pitah jalan ke’ néh omok alaa’ pengepawah. ¹² Jian keh maneu’ kenat uban Tuhan ngelayau mihau kelunan éh maneu’ pengeloo’ Néh, Iah ngelayau menéng ha’ sebayang réh, Bang Tuhan ngelawan kelunan éh maneu’ kesa’at. ¹³ Séé’ éh juk maneu’ sa’at tong keh hun keh mekat mu’un maneu’ jian. ¹⁴ Na’ péh réh peketa keh uban keh maneu’ jian, jian keh murung kenin, mai keh medai ngan mapah kenin. ¹⁵ Jian keh ngerera’ tong Kristus ngan alaa’ Iah pengeja’au keh mu’un. Jian keh ngelayau petenup kenin keh dokoo’ keh jam mipa ha’ irah éh neteng keh tong pengelan keh. ¹⁶ Jian keh mipa ha’ réh ngan dawai kenin ngan ngerera’ tong réh. Mai keh kejeraa’ ineu’-ineu’ masek lem kenin keh éh omok ngesa’at kenin keh, dokoo’ tong kekat jalan réh pesala’ keh, uban neu’ keh kivu Kristus, hun réh na’at barék keh jian inah, irah péh jam menyaa’ kepéh uban réh ulak pesala’ keh awah. ¹⁷ Pelapah jian ka’ah teneng pengeketa hun keh maneu’ jian hun néh kenat éh keneloo’ Allah, jin hun keh teneng pengeketa uban keh maneu’ kesa’at. ¹⁸ Éh ke’ néh kenat uban Kristus tengéé’ matai jah koléé’ awah ngan avéé’ pelinguh-linguh, dokoo’ penyala’ lu’ omok pega’. Iah bé’ pu’un sala’ bang matai ngeliwah kelunan éh penyala’, dokoo’ Iah omok mihin ka’ah tavin Allah. Irah mematai usah Néh bang Iah murip kepéh lem sahéé’ Néh. ¹⁹ Dalem sahéé’ Néh Iah tai Perengah Rengah éh jin Allah ngan kekat sahéé’ éh pu’un lem lamin tutup, ²⁰ Inah éh kekat sahéé’ kelunan éh ngelapah sohoo’ Allah tovoo’ Allah mena réh ngan kebit kenin sioo’ Noh maneu’ kapen. Ayah usah éh pu’un dalem kapen inah, ngan irah omok murip jin labuu inah. ²¹ Labuu inah tapan tong baa’ éh jalan kelunan ngebatis keh éh purip keh hun iteu’. Pengebatis inah bé’ éh mohéé’ nong jin usah keh bang neu’ kekat éh kenakun keh ngan Allah jin kenin keh mu’un éh jian. Pengebatis iteu’ purip keh uban Yésus Kristus lepah betéé’ jin pematai ngan lepah moléé’ tai seruga. Hun iteu’ Iah saa’ na’au’ Allah ngan pengeja’au kekat meliket, ngan kekat éh pu’un penyukat ngan éh ja’au tong seruga. ²² éh lepah moléé’ tai seruga ngan kenajung saa’ na’au’ Allah, ngan pengeja’au kekat meliket ngan kekat éh pu’un penyukat ngan éh ja’au tong seruga.

¹ La’ah uban Kristus lepah tagong pengeketa tong usah Néh, jian ka’ah ngegahang kenin keh palaa’ penyeruh éh pekua’ kenin Kristus. Éh ke’ néh kenat uban séé’-séé’ éh tagong pengeketa tong usah néh, bé’ iah maneu’ penyala’ kepéh. ² Kelebéé’ keh murip keto tong tana’, jian keh murip kivu pengeloo’ Allah, mai keh murip kivu pengagat usah keh awah. ³ Hun sahau rai, lepah lebéé’ tenéh keh maneu’ ineu’ éh keloo’ naneu’ kelunan éh bé’ jam Allah. Ka’ah murip maneu’ barék éh sa’at. Ka’ah murip mavuk, kuman nyahan mesep baa’ maneu’ mavuk, ngan seva’ butun éh ngejelemih nah. ⁴ Bang hun iteu’ irah éh bé’ ngelan tong Allah, béé kenin réh ngan sa’at kenin réh, uban keh bé’ pu’un pemung ngan réh maneu’ barék éh sa’at pekua’ sahau nah, uban néh kenat nah ke’ réh muau keh awah. ⁵ Bang irah tekep bara’ tong urip réh ngan Allah éh sedia petuneng kelunan éh murip ngan éh matai péh. ⁶ Uban néh kenat, inah néh ke’ réh bara’ Rengah Jian nah, jian péh éh ngan kelunan éh lepah matai rai, dokoo’ na’ péh réh teneng ukum éh kemalai teneng tong kelunan, sahéé’ réh éh omok murip pekua’ pengeloo’ kenin Allah. Éh ke’ réh kenukum kenat, uban penyala’ neu’ réh kelebéé’ réh murip tong tana’ iteu’ rai, bang Allah mena’ bi’en ngan réh dokoo’ réh omok alaa’ urip éh pelinguh. ⁷ La’ah sioo’ pengega’ tana’ lepah danii’, jian keh mihau kenin keh ngan seruh jian-jian, dokoo’ keh omok sebayang. ⁸ Éh pelapah gunah éh tekep ka’ah maneu’, inah éh pika ngan pepika ngan kekat kenin keh uban neu’ keh jam pepika kenat pinaa’ penyala’ omok pega’. ⁹ Jian ka’ah alaa’ kelunan éh nyakai tong lamin keh ngan jian kenin, mai keh leko alaa’ réh. ¹⁰ Jian siget usah tigéh maneu’ kereja’ Tuhan uban pinaa’ arong pengena’ Allah dalem kenin kelunan dokoo’ lu’ nolong kelunan éh jah. Jian keh tigéh dalem kekat pengena’ Néh inah. ¹¹ Séé’-séé’ éh juk nebaraa’ kelunan, jian iah bara’ ha’ éh jin Allah. Hun keh pu’un pengena’ dokoo’ nolong kelunan éh jah, jian keh nolong réh neu’ pengegahang éh nena’ Allah ngan keh. Dokoo’ dalem kekat-kekat néh béé, Allah pu’un kenajung lem Yésus Kristus. Kristus éh pu’un pengaren ngan penyukat pah avéé’ pelinguh. Amin. ¹² O kekat bakéh ké’, mai ka’ah béé kenin dalem pengeketa iteu’, pengeketa inah pekua’ luten éh palaa’ réh memarem mas, mai keh barei’ kelunan éh tejeu’ tong pengeketa ngan mujah kenin seruh. ¹³ Bang jian ka’ah murung kenin uban keh pu’un pemung ngan Kristus dalem pengeketa Néh. Uban barei’ ka’ah pu’un pemung ngan Néh dalem pengeketa Néh hun iteu’, kenat péh ka’ah omok murung hun Néh tuai lem kekat pengaren kepéh. ¹⁴ Murung kenin ka’ah hun réh pekenyaa’ keh uban keh kivu Kristus, uban hun néh pu’un kenat, inah pepoléng Sahéé’ éh maren, inah éh Sahéé’ Ni’ai pu’un dalem keh. ¹⁵ Mai éh uban keh maneu’ barék éh sa’at barei’ kelunan éh mematai kelunan kenat péh nekau, kenat maneu’ kekat arong éh sa’at, kenat péh uban néh kasau kereja’ kelunan éh jah. ¹⁶ Uban hun keh teneng pengeketa uban ngaran keh Kristén, mai keh menyaa’, bang jian keh mejing Allah, uban keh anah Kristus. ¹⁷ Uban avéé’ lah jaka’ Allah petuneng kekat kelunan, bu’un-bu’un Iah juk petuneng irah éh anah Nah. Hun uleu’ éh ngelan saa’ tenah petuneng Néh, matek tusah mu’un tong ga’ néh ngan kelunan éh bé’ ngelan tong Rengah jian éh jin Allah pu’un kenat tong uleu’ éh ngelan, kineu’ kepéh tong kelunan éh pohoo’ néh bé’ ngelan tong Rengah Jian éh jin Allah? ¹⁸ Uban pu’un éh barei’ ha’ dalem surat Allah, ka’ éh, Hun kelunan éh ngelan ma’an alaa’ urip, kineu’ éh tong kelunan éh bé’ ngelan ngan éh maneu’ penyala’ péh? ¹⁹ Hun néh kenat kelunan éh pu’un keta uban pengelan réh tong Allah, jian irah petem maneu’ jian ngan mena’ usah réh ngan Allah éh bu’un-bu’un suai réh kelunan ke’ Néh mihau réh uban Tuhan éh tigéh.

¹ Akeu’ petesen ka’ah pengeja’au lem sidang, uban akeu’ péh pengeja’au tong sidang. Pu’un ku’ lepah na’at pengeketa Kristus ngan pu’un ku’ tosok éh kepéh. Adang akeu’ omok pemung ngan Néh tovoo’ Iah tuai kepéh lem kekat pengaren Néh. ² Jian ka’ah mihau irah éh domba Allah, éh nena’ Allah ngan keh. Jian keh mihau réh ngan jian kenin, uban kenat éh pengeloo’ Allah, mai keh mihau réh ngan sa’at kenin. Jian keh maneu’ kereja’ keh mu’un, bé’ makat uban juk alaa’ utung awah, bang neu’ kenin keh keloo’ mihau ngan petubo réh mu’un. ³ Mai keh mihau réh ngan mahéng kenin ngan bau kenin, bang jian kekat barék ngan kenin keh pu’un jian ke’ néh omok jah telana’ ngan irah. ⁴ Hun Kristus Gembala éh pengeja’au kekat Gembala inah pu’un tuai kepéh, vam, ka’ah juk alaa’ tapong éh maren ngan pelinguh. ⁵ Kenat péh kepéh kekat ka’ah lemanai, jian ka’ah kivu sohoo’ irah éh ja’au. Jian ka’ah béé-béé diva’ kenin, nolong petolong uban pu’un jah ha’ dalem surat Allah éh bara’ ka’, Allah ngelawan irah éh bau kenin bang Iah pika irah éh diva’ kenin, ha’ Néh. ’ ⁶ Hun néh kenat jian ka’ah ngediva’ kenin keh ra’ ojoo’ Allah éh ja’au penyukat, dokoo’ Iah omok ngebau keh kepéh. ⁷ Jian keh bara’ kekat penusah keh ngan Allah uban Iah éh mihau keh ⁸ Mavaa’ mu’un-mu’un mai keh telalau kenin, uban Sitan éh ayau keh, iah lakau semah-semah pekua’ barei’ tepun éh tiwap pitah ka’ah ke’ néh kon éh kenat péh Sitan. ⁹ Jian keh petem dalem pengelan keh ngan ngelawan iah, uban ka’ah jam kelunan éh jah éh ngelan tong Tuhan, tipo tana’, irah péh teneng pengeketa pekua’ ka’ah iteu’. ¹⁰ Bang La’o keh teneng pengeketa éh metok awah, Allah tengéé’ juk maneu’ ka’ah sukup mu’un. Iah juk petekedéng keh, ngegahang keh ngan ngereken keh, uban Iah Allah éh matek jian kenin ngan éh lepah tebai ka’ah dokoo’ masek lem kemaren Néh éh pelinguh, uban ka’ah murip pemung ngan Kristus. ¹¹ Iah éh pu’un penyukat pelinguh-linguh! Amin. ¹² Pu’un Silas nolong akeu’ éh seneruh ké’ barei’ jah padéé’ dalem Tuhan éh tigéh. Akeu’ nyurat iteu’ suti’ awah, dokoo’ ngegahang ka’ah ngan bara’ tong iteu’ néh pengasi Allah éh mu’un ngan keh. Jian keh petem dalem pengasi Néh. ¹³ La’ah irah padéé’ keh tong sidang tong Babel, kelunan éh kevéléé’ Allah, irah inah bara’ tabi’ ngan ka’ah, kenat péh Markus anak ké’ dalem Tuhan. ¹⁴ Jian ka’ah petabi’ siget usah ka’ah ngan murung kenin. Jian Allah mena’ pengepawah Néh ngan kekat kelunan éh anah Kristus.