1 YOHANES
11 La’ah pu’un mé’ maneu’ surat iteu’ ngan keh uban mé’ juk bara’ tong Ateng Ha’ éh mena’ urip, inah éh Ateng Ha’ éh lepah pu’un jin bu’un-bu’un sahau. Améé’ lepah menéng éh, ngan maten mé’ tengéé’ lepah na’at éh. Améé lepah na’at éh ngan améé’ lepah ngamit éh palaa’ ojoo mé’. 2 Urip inah lepah poléng tenéh, pu’un mé’ na’at éh, inah ke’ mé’ bara’ tong néh. Améé bara’ ngan Keh tong urip éh pelinguh éh pu’un pemung ngan Tamen, ngan éh lepah pepoléng Néh ngan améé’. 3 Améé péh bara’ ngan Keh tong éh ta’an ngan nenéng mé’ dokoo’ ka’ah pekua’ kenin ngan améé’ lem urip mé’ éh pu’un pemung ngan Tamen ngan Anak Néh Yésus Kristus. 4 Améé’ nyurat éh kenat dokoo’ mé’ pesukup kemurung mé’. 5 La’ah iteu’, néh rengah éh lepah nenéng mé’ jin Anak Néh ngan éh benara’ mé’ ngan keh: Allah Iah éh rema ngan bé’ pu’un merem ineu’-ineu’ tong Néh. 6 Hun néh kenat hun uleu’ bara’ uleu’ pu’un alaa’ urip Néh, bang uleu’ mokoo’ keto dalem merem, adang lu’ kenyo awah, kenat péh neu’ ha’ lu’ pané kenat, kenat péh neu’ kekat penganeu’ lu’ kepéh. 7 Bang hun uleu’ murip dalem rema, pekua’ Allah pu’un dalem rema, adang uleu’ béé pu’un Pekua’ kenin, ngan dahaa’ Yésus Anak Néh, mohéé’ uleu jin kekat penyala’. 8 Hun lu’ bara’ Uleu’ bé’ pu’un penyala’, inah uleu’ ngelavo’ Usah lu’ tengéé’; ngan bé’ pu’un ineu’-ineu’ éh teneng dalem lu’. 9 Bang hun lu’ ngakun kekat penyala’ lu’ ngan Allah, adang Iah pu’un tigéh ngan maneu kekat éh teneng. Adang Iah omok mega’ kekat penyala’ lu’ ngan mohéé’ uleu jin kekat penganeu’ éh sala’. 10 Hun lu’ bara’ uleu’ bé’ pu’un maneu’ penyala’, inah seleket lu’ bara’ Allah nah kenyo awah, ngan ha’ tebaraa’ Néh bé’ pu’un nodoo’ lu’ lem kenin lu’.
21 O kekat anak ké’, akeu’ nyurat ngan keh dai ka’ah maneu’ penyala’, pu’un kelunan maneu’ penyala’, pu’un jah Usah éh nolong lu’, inah éh Yésus Kristus éh teneng. Adang Iah omok menyat Tamen Néh pika lu’. 2 Uban Kristus awah éh jalan mega’ kekat penyala’ lu’, bé’ éh kekat penyala’ uleu’ iteu’ awah, bang jalan mega’ penyala’ kekat kelunan pah tipo tana’. 3 Telana’ lu’ jam Allah inah éh hun lu’ kivu kekat sohoo’ Néh. 4 Hun pu’un kelunan bara’, Akeu’ jam Allah, bang bé’ iah kivu sohoo’ Néh, kelunan inah kenyo awah, ngan Allah bé’ pu’un dalem kenin néh. 5 Bang séé séé’ éh tigéh kivu sohoo’ Néh, kelunan inah pika Allah mu’un, inah néh tada’ uleu’ murip petem dalem Allah. 6 Séé’ séé’ éh bara’ iah murip petem dalem Allah kelunan inah tekep murip kivu Pengurip Kristus. 7 O kekat padéé’ ké’ éh penika ké’, ha’ sohoo’ éh senurat ké’ iteu’, bé’ makat éh ha’ sohoo’ éh maréng, Ha’ sohoo’ iteu’ ha’ sohoo’ éh lepah kejam keh jin bu’un keh ngelan tong Kristus. Ha’ sohoo’ iteu’ Rengah jin Allah éh lepah nenéng keh. 8 Na’ péh kenat ha’ sohoo’ éh senurat ké’ iteu’ pu’un éh maréng uban pengeteneng néh pu’un poléng tong usah Kristus ngan tong usah ka’ah kepéh. Nah ke’ néh kenat uban merem juk pajau, ngan rema éh mu’un lepah avéé’. 9 Séé-séé’ éh bara’ iah murip lem rema, bang hun néh leko padéé’ néh, kelunan inah to ke’ murip dalem merem avéé’ hun iteu’. 10 Séé-séé éh pika padéé’ néh iah murip dalem rema ngan bé’ pu’un ineu’-ineu’ lem Iah éh omok mihin kelunan éh jah maneu’ penyala’. 11 Bang séé-séé éh leko padéé’ néh kelunan inah murip dalem merem. Iah lakau dalem merem, ngan bé’ éh jam kemah éh tai, uban merem inah lepah memeseu’ maten néh. 12 O kekat anak ké’ akeu’ nyurat ngan keh uban penyala’ keh lepah pega’ dalem ngaran Kristus. 13 O kekat tamen, akeu’ nyurat ngan keh uban keh jam Iah éh pu’un jin bu’un-bu’un. O kekat lemanai, akeu’ nyurat ngan keh uban keh lepah nyopéé’ Iah éh Sa’at. 14 O kekat anak, akeu’ nyurat uban keh lepah jam tong Allah Tamen. O kekat tamen, akeu’ nyurat ngan keh uban keh jam Iah éh pu’un jin bu’un-bu’un sahau. O kekat lemanai, akeu’ nyurat ngan keh uban keh pu’un gahang, ngan ha’ tebaraa’ Allah pu’un petem dalem keh, ngan pu’un keh lepah nyopéé’ Iah éh Sa’at. 15 Mai keh murung tana’ iteu’ ngan murung ineu’-ineu’ éh pu’un tong tana’ iteu’. Hun keh murung tana’ iteu’ bé’ keh pu’un murung Allah Tamen. 16 Uban kekat éh jin tana’ iteu’, inah éh pengagat lem kenin kelunan éh penyala’, éh pekelih maten kelunan, ngan kekat éh benara’ kelunan pu’un jian, bé’ éh tuai jin Tamen, bang jin tana’ iteu’ awah. 17 Tana’ iteu’ ngan kekat éh pu’un tong tana’ iteu’, éh kenelih kelunan bé’ éh pelinguh. Bang kelunan éh maneu’ pengeloo’ Allah, omok murip pelinguh-linguh. 18 O kekat anak ké’ sioo’ pengega’ dau lepah danii’. Pu’un keh lepah menéng rengah ayau Kristus juk tuai, hun iteu’ pinaa’ kelunan éh ayau Kristus lepah musit, inah jalan uleu’ omok jam sioo’ pengega’ dau lepah danii’. 19 Kekat kelunan inah bé’ réh pekua’ kenin ngan lu’, kenat péh irah piso jin uleu’. Hun réh pu’un pekua’ kenin ngan lu’, adang irah petem pemung ngan lu’. Irah nelana’ réh tengéé’ mu’un kenin ngan uleu’ uban réh piso jin uleu’. 20 La’ah pu’un Kristus mena’ Sahéé’ Ni’ai ngan keh, kenat péh jalan keh jam tong tebaraa’ éh teneng. 21 La’ah akeu’ nyurat ngan keh bé’ makat uban keh bé’ jam ha’ tebaraa’ éh teneng, bang uban keh jam éh ngan inah kepéh kejam keh bé’ pu’un ha’ éh kenyo jin lem kekat ha’ tebaraa’ éh teneng inah. 22 Hun néh kenat séé’ éh kenyo? Séé-séé bara’ Yésus bé’ éh Iah éh Kristus éh pejajii’ Allah, kelunan inah kenyo. Kelunan inah néh ayau Kristus, kelunan inah bé’ ngelan tong Tamen kenat péh Anak Néh. 23 Uban hun néh bé’ ngelan tong Anak Néh adang néh bé’ ngelan tong Tamen Néh péh. La’ah kelunan éh alaa’ Anak Néh, iah péh alaa’ Tamen Néh kepéh. 24 Uban néh kenat, ha’ tebaraa’ éh nenéng keh jin bu’un-bu’un keh ngelan tong Kristus tekep nodoo’ keh dalem kenin keh. Hun keh petem dalem ha’ tebaraa’ inah. Adang ka’ah ngelayau murip pemung ngan Anak Néh ngan Tamen Néh péh. 25 La’ah pu’un Kristus jajii’ mena’ urip pelinguh ngan lu’. 26 Pu’un ku’ nyurat kenat ngan keh bara’ tong irah éh juk ngelavo’ keh. 27 Bang pu’un Kristus mena’ Sahéé’ Néh ngan keh ngan hun Sahéé’ Ni’ai nah pu’un petem dalem keh, bé’ tiken ke’ kelunan éh jah nebaraa’ keh kepéh uban Sahéé’ nah nebaraa’ keh tong kekat ineu’-ineu’ péh. La’ah kekat ha’ tebaraa’ Néh teneng éh, bé’ éh ngelavo’ keh. Jian keh kivu kekat ha’ tebaraa’ éh jin Sahéé’ Néh ngan petem murip pemung ngan Kristus. 28 O kekat anak ké’, jian keh murip petem dalem Kristus, dokoo’ tovoo’ Iah pu’un tuai kepéh, uleu’ omok makang kenin temeu’ ngan Néh ngan bé’ pu’un medai ngan menyaa’. 29 La’ah ka’ah jam Kristus maneu’ pengeloo Allah. Uban néh kenat ka’ah jam siget-siget usah éh maneu’ pengeloo’ Allah Iah néh anak Allah.
31 Jian keh nesen Allah matek pika lu’ mu’un, avéé’ lu’ nateng anak Allah, adang uleu’ anak Allah, bang kelunan éh tong tana’ iteu’ bé’ réh jam lu’ anak Allah. Uban kelunan tong tana’ bé’ réh jam Allah. 2 O kekat padéé’ éh kemurung ké’, hun iteu’ uleu’ lepah paléu anak Allah, bang pengepaléu lu’ kepéh vam, bé’ lu’ omok jam éh. Bang éh kejam lu’ mu’un, inah éh, hun Kristus pu’un tuai kepéh uleu’ omok paléu pekua’ Iah, hun inah boh lu’ na’at Iah ngan lenaa’ mu’un. 3 Siget-siget usah éh ngelan tong Kristus tekep iah mavaa’ kenin néh ke’ néh ni’ai, pekua’ Kristus pu’un ni’ai. 4 Kelunan éh maneu’ penyala’ ngelapah ha’ tebaraa’ Tuhan, uban penyala’ nah inah éh ngelapah tong ha’ tebaraa’ Tuhan. 5 La’ah ka’ah jam Kristus lepah tuai dokoo’ Néh mega’ penyala’ kelunan, ngan usah Néh tengéé’ bé’ pu’un penyala’ lem Iah. 6 Bang kelunan éh petem lem Kristus, bé’ iah petem maneu’ penyala’, bang kelunan éh petem maneu’ penyala’, Iah bé’ jak jam Kristus ngan urip Kristus bé’ pu’un lem néh. 7 O kekat anak ké’, mai keh lavo’, kelunan éh kivu pengeloo’ Tuhan iah éh anak Allah barei’ Kristus. 8 Kelunan éh petem maneu’ penyala’, iah anah Sitan, uban jin bu’un sahau Sitan nah maneu’ penyala’. Inah maneu’ Anak Allah tuai ke’ Néh kebéé kekat penganeu’ Sitan. 9 Séé’-séé’ éh paléu anak Allah, bé’ éh petem maneu’ penyala’, uban urip Allah pu’un éh dalem néh, Allah éh Tamen néh kepéh, bé’ éh omok petem maneu’ penyala’. 10 Kenat péh jalan uleu’ jam irah éh anak Allah ngan irah éh anak Sitan péh. Kelunan éh bé’ maneu’ pengeloo’ Allah ngan éh bé’ pika padéé’ néh bé’ iah anak Allah. 11 Uban tebaraa’ éh nenéng keh jin sahau, inah éh, jian uleu’ kua’ pepika. 12 Mai lu’ barei’ Kain éh kivu Sitan ngan éh mematai padéé’ nah Ke’. Uban ineu’ Kain mematai padéé néh? Uban kekat penganeu’ néh pu’un Sala’ bang kekat penganeu’ padéé néh pu’un teneng. 13 O kekat padéé’ ké’, mai keh béé kenin hun irah tong tana’ iteu’ ngeleko keh. 14 Uleu’ jam uleu’ murip ngan lepah piso jin jalan éh mihin lu’ matai. Uban lu’ pika kekat padéé’ lu’. Séé-séé éh bé’ pika padéé néh, to de’ ke’ éh tong jalan éh mihin éh matai. 15 La’ah kelunan éh leko padéé’ néh, iah péh pekua’ kelunan éh mematai kelunan, ka’ah jam kelunan éh mematai kelunan, bé’ réh pu’un urip pelinguh. 16 Inah jalan lu’ jam kenin lu’ omok pika kelunan éh jah Kristus lepah mena’ urip Néh ngeliwah uleu’. Uban néh kenat uleu’ tekep mena’ urip lu’ dokoo’ pika kekat padéé’ lu’. 17 Hun pu’un kelunan éh pu’un livah na’at padéé’ néh éh kari éh tekep tenolong néh bang bé’ iah keloo’ nolong padéé néh inah, kineu’ jalan iah omok bara’ iah pu’un pika Allah. 18 O kekat anak ké’, mai lu’ bara’ lu’ pika palaa’ ha’ ujun lu’ awah, bang jian lu’ kua’ pepika palaa’ penika éh mu’un éh pepoléng lu’ jin penganeu’ lu’. 19 Inah jalan uleu’ jam uleu’ anak-anak Allah éh teneng ngan kenin lu’ pu’un pawah tong jumen Allah. 20 Hun pu’un éh lem kenin lu’ juk pesala’ lu’, Allah pelapah ja’au jin kenin lu’, ngan Iah jam kekat néh béé. 21 O kekat padéé’ éh kemurung ké’, hun kenin lu’ bé’ pesala’ lu’, adang lu’ pu’un makang kenin tong jumen Allah, 22 ngan ineu’-ineu’ éh pengenyat lu’, adang lu’ omok alaa’ éh uban uleu’ kivu kekat sohoo’ Néh ngan maneu’ kekat éh pengeloo’ Néh kepéh. 23 La’ah iteu’ éh sohoo’ Néh, jian uleu’ ngelan tong Anak Néh Yésus Kristus ngan kua’ pepika, pekua’ sohoo’ Kristus ngan lu’. 24 La’ah séé’-séé’ éh mihau kekat sohoo’ Allah, pu’un éh petem dalem Allah, ngan Allah péh petem dalem néh. La’ah inah jalan uleu’ jam Allah pu’un petem dalem uleu’, uleu’ jam éh neu’ Sahéé’ Néh éh nena’ Néh ngan lu’.
41 O kekat padéé’ ké’ éh kemurung ké’, mai keh ulak ngelan ha’ kelunan éh bara’ iah pu’un Sahéé’ Ni’ai, jian keh ngelenaa’ réh dokoo’ keh omok jam éh hun sahéé’ inah pu’un jin Allah ngan hun néh bé’ péh. Uban pinaa’ kelunan éh ngelavo’ lepah tai semah-semah péh. 2 La’ah inah jalan keh omok jam hun néh Sahéé’ jin Allah ngan hun néh bé’ péh. Siget kelunan éh ngelan Yésus Kristus lepah tuai paléu kelunan, kelunan inah éh pu’un Sahéé’ éh tuai jin Allah. 3 Bang séé’-séé’ éh bara’ Yésus bé’ pu’un tuai jin Allah, kelunan inah bé’ éh pu’un Sahéé’ jin Allah. Sahéé’ inah pu’un jin ayau Kristus. Pu’un keh lepah menéng rengah néh juk tuai, ngan hun iteu’ pu’un éh lepah avéé’ tenéh 4 O kekat anak ké’, ka’ah éh anah Allah pu’un keh lepah nyopéé’ irah éh tuai pané ngelavo’ nah, uban Sahéé’ Tuhan éh pu’un dalem keh, pelapah gahang éh jin sahéé’ éh pu’un dalem irah éh pohoo’ jin tana’ iteu’. 5 Irah nabi éh ngelavo’ bara’ tong kekat arong éh tong tana’ iteu’, ngan kelunan éh pohoo’ tong tana’ iteu’, kivu ha’ réh uban irah inah anah tana’ iteu’. 6 Bang uleu’ iteu’ éh anah Allah, ngan séé’-séé’ éh jam Allah pu’un iah mihau ha’ lu’, la’ah séé’-séé’ éh bé’ pu’un jin Allah, bé’ iah mihau ha’ lu’. Kenat péh jalan uleu’ omok jam tong Sahéé’ éh teneng ngan tong sahéé’ éh petawang awah. 7 O kekat padéé’ éh kemurung ké’, jian uleu’ pata pepika, uban penika nah jin Allah. Séé’-séé’ éh pika kelunan inah pepoléng éh iah anak Allah ngan pu’un éh jam Allah. 8 La’ah séé’-séé’ éh bé’ jam pika kelunan éh jah, bé’ iah jam Allah, uban Allah inah penika. 9 La’ah inah jalan Allah pepoléng penika Néh ngan lu’, pu’un éh nyohoo’ Anak Néh tuai tong tana’ iteu’ dokoo’ neu’ Anak Néh inah uleu’ alaa’ urip mu’un ngan pelinguh. 10 Inah éh matek penika mu’un, bé’ éh uleu’ éh pika Allah, bang Allah éh pika uleu’ ngan Iah nyohoo’ Anak Néh tuai ke’ Néh mega’ penyala’ lu’. 11 O kekat padéé’ éh kemurung ké’, hun Allah pika lu’ kenat, tekep lu’ pika kekat padéé’ lu’ kepéh. 12 La’ah bé’ pu’un kelunan séé’-séé’ péh éh lepah na’at Allah bang hun uleu’ pika kekat padéé’ lu’, Allah pu’un petem dalem lu’ ngan penika Néh pu’un sukup dalem lu’. 13 Jalan lu’ jam uleu’ pu’un petem dalem Allah ngan Iah pu’un petem dalem uleu’, inah éh neu’ Sahéé’ Néh éh nena’ Néh ngan lu’. 14 Pu’un Allah nyohoo’ Anak Néh tuai tong tana’ iteu’ ke’ Néh purip kelunan. Améé’ tengéé’ péh lepah na’at Iah, ngan pu’un mé’ bara’ éh ngan kelunan éh jah kepéh. 15 Séé’-séé’ éh ngakun Yésus nah adang Néh Anak Allah, Allah pu’un petem dalem néh ngan iah péh petem dalem Allah, 16 uleu’ tengéé’ jam ngan lenaa’ mu’un tong Allah pu’un pika uleu’. Allah inah inan penika ngan séé-séé éh petem pika kelunan éh jah Iah pu’un petem dalem Allah ngan Allah pu’un petem dalem iah. 17 Penika Néh pu’un sukup dalem lu’, dokoo’ lu’ omok makang kenin tovoo’ ga’ dau’ vam. Adang uleu’ pu’un makang kenin uban urip lu’ kelebéé’ lu’ murip tong tana’ iteu’, pu’un éh pekua’ ngan urip Kristus. 18 Kelunan éh lepah jam penika Allah bé’ iah pu’un medai, uban penika éh sukup mu’un maneu’ lu’ bé’ pu’un medai. Uban néh kenat kelunan éh bé’ jak jam tong penika Allah ngan sukup mu’un adang néh medai kenukum tovoo’ ga’ dau vam. 19 Uleu’ pu’un pika kelunan uban Allah éh bu’un-bu’un pika uleu’. 20 Hun kelunan bara’ iah pika Allah, bang iah leko padéé’ néh, kelunan éh kenat kenyo awah, uban bé’ iah omok pika Allah éh bé’ omok ta’an néh, hun néh bé’ pika padéé’ néh éh poléng ta’an néh. 21 Iteu’ ha’ sohoo’ éh nena’ Kristus ngan lu’, hun séé-séé éh pika Allah tekep éh pika padéé’ néh kepéh.
51 Séé’-séé’ éh ngelan Kristus éh purip éh pejajii’ Allah, kelunan inah éh anak Allah. Séé’-séé’ éh pika Tamen Néh, pu’un éh pika Anak Néh kepéh. 2 Kenat péh jalan lu’ jam lu’ pu’un pika kekat irah éh anak Allah, inah éh hun lu’ pika Allah ngan kivu kekat sohoo’ Néh. 3 Uban inah éh jalan lu’ pika Allah, hun lu’ kivu kekat sohoo’ Néh. La’ah kekat sohoo’ Néh bé’ éh ma’an maneu’. 4 Uban siget-siget kelunan éh anak Allah, omok éh nyopéé’ tana’ iteu’. Uleu’ omok nyopéé’ tana’ iteu’, neu’ pengelan lu’. 5 Séé’ éh omok nyopéé’ tana’ iteu’? Kelunan éh ngelan tong Yésus Anak Allah awah. 6 Yésus Kristus pu’un tuai tong tana’ ngan baa’ pengebatis Néh ngan dahaa’ pengematai Néh. Iah tuai bé’ éh ngan baa’ awah bang iah tuai ngan baa’ ngan dahaa’. Sahéé’ Ni’ai bé’ éh jam kenyo. 7 Teleu’ telana’ inah pekelenaa’ adang Yésus Anak Allah. 8 Sahéé’ Ni’ai, baa’ ngan dahaa’; teleu’ telana’ iteu’ bara’ tong éh kua’ awah. 9 Pu’un lu’ ngelan éh benara’ kelunan bang éh benara’ Allah pelapah gahang kepéh. Inah néh éh benara’ Allah tong Anak Néh. 10 Kelunan éh ngelan tong Anak Allah kejam néh éh benara’ Allah tong Anak Néh nah lem kenin néh. Bang kelunan éh bé’ ngelan tong Allah, seleket iah bara’ Allah kenyo. Uban bé’ iah ngelan tong éh benara’ Allah tong Anak Néh. 11 Iteu néh éh benara’ inah: Allah lepah mena’ urip mu’un ngan pelinguh ngan urip inah pu’un éh tuai jin Anak Néh. 12 Séé’-séé’ éh alaa’ Anak Allah, iah alaa’ urip inah; ngan séé’-séé’ éh bé’ alaa’ Anak Allah iah bé’ alaa’ urip inah. 13 Akeu’ nyurat surat iteu’ ngan ka’ah éh ngelan tong Anak Allah, dokoo’ ka’ah omok jam ka’ah lepah alaa’ urip mu’un ngan pelinguh. 14 Uleu’ makang kenin tavin Allah uban uleu’ jam Iah mipa ha’ sebayang lu’, hun lu’ menyat ineu’-ineu’ éh lem pengeloo’ Néh. 15 Uleu’ jam iah menéng ha’ lu’. Hun mah awah lu’ nenyat ngan Néh. Uban néh kenat uleu’ péh jam iah mena’ ngan lu’ ineu’ éh menyat lu’ jin Iah. 16 La’ah hun néh séé’-séé’ éh na’at padéé’ néh dalem Tuhan éh bé’ ngepo’ong maneu’ penyala’, kelunan éh kenat tekep keh mihin éh lem sebayang keh bara’ éh ngan Allah dokoo’ Néh purip éh. La’ah kelunan éh lepah jam Tuhan bang ngepo’ong maneu’ penyala’ ngan mahéng kenin néh, bé’ akeu’ nyohoo’ keh sebayang tong néh, uban penyala’ néh inah mihin éh tawang ngan matai. 17 Kekat penganeu’ éh sa’at, inah éh penyala’, bang pu’un penyala’ éh bé’ makat mihin éh tawang mu’un ngan matai. 18 La’ah uleu’ jam kelunan éh paléu anak Allah, bé’ éh petem maneu’ penyala’, uban Anak Allah pu’un mihau éh, Sitan bé’ omok maneu’ éh. 19 La’ah uleu’ jam uleu’ iteu’ anah Allah ngan kekat éh tong tana’ iteu’ pu’un ra’ penyukat Sitan. 20 La’ah uleu’ jam Anak Allah pu’un tuai, Iah mena’ pengejam Néh ngan lu’, dokoo’ lu’ jam Allah éh teneng. Urip lu’ pu’un éh dalem Allah éh teneng ngan dalem Anak Néh Yésus Kristus. Inah éh Allah éh teneng ngan urip éh mu’un ngan pelinguh. 21 O kekat anak ké’, jian keh ngejuu’ usah keh jin butun.