1 KORINTUS
11 Akeu’ Paulus éh tenebai Allah ké’ omok lawah Kristus Yésus, kivu pengeloo’ kenin Allah awah, amo Sostenes éh padéé’ keh dalem Tuhan. 2 Maneu’ surat iteu’ ngan kekat sidang Allah éh tong leboo’ ja’au Korintus, inah éh ngan kekat kelunan éh tenebai Tuhan ke’ néh anah Nah, neu’ urip réh pemung ngan Kristus Yésus, pemung ngan kekat kelunan semah-semah péh éh tebai tong ngaran Tuhan Yésus Kristus. Iah éh Tuhan lu’, ngan Tuhan irah péh. 3 Jian Allah éh Tamen lu’ ngan Tuhan Yésus Kristus, mena’ penika Néh ngan pengepawah Néh ngan keh. 4 La’ah ngelayau akeu’ sebayang bara’ jian kenin ngan Allah uban penika Néh ngan ka’ah dalem Kristus. 5 Uban neu’ keh petem dalem Tuhan, ka’ah kaya’ lem kekat urip keh, inah ka’ah pu’un penoo’ neu’ pengejam, kenat péh lem pengané keh, kenat péh lem ha’ tebaraa’ keh. 6 Ha’ tebaraa’ tong Kristus pu’un éh petem reken lem ka’ah, 7 avéé’ ka’ah bé’ pu’un kurang dalem ineu’-ineu’ pengena’ Néh kelebéé’ keh mena Tuhan Yésus Kristus tuai kepéh. 8 La’ah Iah omok ngereken keh pah avéé’ tong ga’, dokoo’ ka’ah bé’ pu’un teneng kenukum Néh, tovoo’ savéé’ Néh. 9 La’ah omok uleu’ ngelan Allah, Iah éh Allah éh tebai keh dokoo’ keh omok pebakéh ngan Anak Néh Yésus Kristus éh Tuhan lu’. 10 O kekat padéé’ ké’, dalem ngaran Tuhan Yésus Kristus, akeu’ nyohoo’ ka’ah pekua’ kenin béé-béé dalem kekat ha’ ané keh, mai ka’ah tengéé’ kenin, jian ka’ah pekua’ kenin ngan pekua’ penyeruh. 11 Uban pu’un kuraa’ kelunan jin lamin lakei’ Kloe lepah bara’ ngan ké’, jelua’ ka’ah pu’un paneu’. 12 Barei’ iteu’ éh, jelua’ ka’ah pu’un bara’, Akeu’ kivu Paulus, jelua’ kepéh bara’, Akeu’ kivu Apolos, jelua’ kepéh bara’, Akeu’ kivu Péterus, ha’ jelua’ kepéh, Akeu’ kivu Kristus. 13 Mai keh petengéé’ kenin uban Kristus Iah jah awah. Kineu’, Paulus éh matai tong kayeu’ salib ngeliwah keh kei? Kineu’, pu’un keh benatis réh dalem ngaran Paulus kei? 14 Akeu’ bara’ jian kenin ngan Allah uban bé’ ku’ pu’un ngebatis séé’-séé’ péh jin belah ka’ah, bang Krispus ngan Gayus awah éh benatis ké’ rai. 15 Bé’ pu’un séé’-séé’ péh éh omok bara’ iah benatis réh dalem ngaran ké’. 16 Oo’, pu’un jah usah kepéh éh benatis ké’, inah éh Stépanus ngan irah tong lamin néh kepéh, bang kioo’ ké’ bé’ pu’un éh jah kepéh éh benatis ké’. 17 Uban Kristus bé’ éh nyohoo’ akeu’ tai ngebatis kelunan bang Iah nyohoo’ akeu’ tai bara’ Rengah Jian ngan réh, ngan bara’ éh lenaa’ mu’un ngan bé’ éh kivu pengejam kenin kelunan dai pematai Kristus tong kayeu’ salib seleket bé’ pu’un penyukat kepéh. 18 La’ah tebaraa’ tong pematai Kristus tong salib, bé’ pu’un gunah néh ngan kekat kelunan éh tawang, bang ngan uleu’ éh pu’un alaa’ urip, inah éh penyukat Allah. 19 Uban pu’un ha’ lem Surat Allah éh bara’ ka’, La’ah Akeu’ juk kebéé kenin kelunan tong jalan réh seruh réh omok alaa’ urip. Na’ péh réh kelunan éh jam seruh mu’un ngan pekalai mu’un, adang Akeu’ kebéé kekat pengejam réh. 20 Hun néh kenat, kineu’ irah kelunan éh jam seruh? Ngan kineu’ irah éh lepah pekalai mu’un, ngan irah éh jam pané tong kuraa’-kuraa’ arong pengejam? Allah pu’un maneu’ réh barei’ kelunan éh bé’ jam seruh ineu’-ineu’ péh, kekat pengejam réh palui awah. 21 Dalem kekat pengejam Allah éh teneng mu’un, bé’ Iah kejeraa’ kelunan omok jam iah neu’ Allah murip kelunan éh ngelan tong ha’ tebaraa’ éh benara mé’ éh seneruh kelunan éh jah, tebaraa’ éh palui awah. 22 Kelunan Yahudi nyohoo’ kelunan éh bara’ ha’ Tuhan maneu’ kuraa’ telana’ éh omok pepoléng ha’ tebaraa’ réh inah pu’un teneng mu’un, ke’ réh omok ngelan éh, ngan irah Yunani juk alaa’ ha’ tebaraa’ jin pengejam kenin kelunan awah. 23 Bang pu’un mé’ bara’ ngan kekat kelunan, Kristus matai tong kayeu’ salib. Ha’ tebaraa’ inah keleko irah Yahudi, ngan irah éh tengéé’ pohoo’ bara’ éh ha’ éh palui awah. 24 Bang ngan kelunan éh tenebai Allah, irah Yahudi péh kenat péh irah éh tengéé’ pohoo’, tebaraa’ inah, inah éh Kristus, éh penyukat Allah ngan éh pengejam Allah mu’un. 25 Uban éh seneruh kelunan pengepalui Allah, éh mu’un néh, inah éh pelapah jam mu’un jin pengejam kelunan, ngan éh seneruh kelunan pengelemoo’ Allah, éh ke’ Kristus matai tong salib, inah éh pelapah gahang mu’un jin pengegahang kelunan. 26 O kekat padéé’ ké’, jian keh seruh, kineu’ ka’ah hun Allah tebai keh lepah rai. Bé’ ka’ah pinaa’ barei’ kelunan éh jam seruh mu’un, ngan bé’ ka’ah pinaa’ pu’un penyukat, ngan bé’ ka’ah pinaa’ kelunan éh maren. 27 Bang na’ péh kenat, Allah ngevéléé’ éh seneruh kelunan éh jah, palui awah, dokoo’ pekenyaa’ kelunan éh jam seruh tong kuraa’ arong éh tong tana’ iteu’. Éh seneruh kelunan pu’un lemoo’, inah éh kevéléé’ Allah dokoo’ pekenyaa’ kelunan éh ja’au penyukat. 28 Iah ngevéléé’ éh keleko kelunan éh jah, ngan éh nebet réh, dokoo’ Néh ngebéé kekat-kekat éh seneruh kelunan pu’un gunah. 29 Uban Iah ngevéléé’ réh kenat, bé’ pu’un jah-jah usah péh éh omok ngajung usah néh tong jumen Tuhan Allah. 30 Bang Allah éh maneu’ keh petem dalem Kristus Yésus. La’ah jin Kristus Allah maneu’ uleu’ pu’un pengejam. Kenat kepéh naneu’ Kristus, inah uleu’ pu’un teneng kenin tong jumen Allah ngan paléu anak Néh mu’un, ngan pelepu jin kekat penyala’. 31 Hun néh kenat barei’ ha’ lem surat Allah bara’ ka’, séé’-séé’ éh bahuu’, tekep iah bahuu’ tong kekat jalan Tuhan pika éh, ha’ Néh.
21 La’ah hun ké’ tai tavin keh lepah rai dokoo’ ké’ bara’ ha’ tebaraa’ Allah éh bé’ kejam kelunan sahau, bang hun iteu’ pu’un éh pepoléng Néh, bé’ akeu’ pané dalem kuraa’-kuraa’ ha’ éh ma’an éh bé’ omok kejam keh, ngan bé’ akeu’ pané barei’ kelunan éh pinaa’ arong pengejam. 2 Kelebéé’ ké’ pu’un ngan keh, jah awah kenin ké’, inah éh juk bara’ Yésus Kristus matai ngan keh, ngan bara’ tong pematai Néh tong kayeu’ salib. 3 Kenat péh hun ké’ tai tavin keh, lemoo’ usah ké’ ngan medai ku’, pah avéé’ ké’ riyet mu’un péh. 4 La’ah ha’ tosok ké’ ngan ha’ tebaraa’ ké’ inah rai, bé’ éh barei’ ha’ tebaraa’ kelunan éh jam seruh, éh pinaa’ arong pengejam, bang pu’un éh neu’ penyukat Sahéé’ Allah. ke’ ka’ah omok ngelan. 5 La’ah tong pengejam Tuhan Allah, bé’ éh jin pengejam kenin kelunan éh ngepaléu kenin keh, bang neu’ penyukat Allah. 6 Bang hun ké’ nebaraa’ kelunan éh lepah sukup pengejam réh tong ha’ tebaraa’ Tuhan, pu’un ku’ nebaraa’ réh palaa’ kuraa’-kuraa’ ha’ tebaraa’ éh ma’an éh pu’un ngan pengejam, bang pengejam ké’ iteu’, bé’ éh pengejam jin tana’ iteu’ awah, bé’ éh barei’ pengejam irah éh pengeja’au kelunan éh jin tana’ iteu’ awah, uban kekat penyukat pengeja’au kelunan inah juk béé. 7 Kekat ha’ tebaraa’ éh benara’ ké’ pu’un éh bara’ tong pengeloo’ kenin Allah éh pelim jin kelunan lepah rai. Uban hun tana’ iteu’ to bé’ jak pesuai neu’ Néh sahau, pengeloo’ kenin Néh tengéé’ juk mihin lu’ tong pengaren Néh. 8 Hun réh jam tong pengeloo’ kenin Tuhan kenat sahau rai, adang réh bé’ mematai Tuhan éh matek maren tong kayeu’ salib. 9 Inah éh sin tong ha’ lem surat Allah éh bara’ ka’, Éh bé’ ta’an ngan éh bé’ nenéng kelunan, ngan éh seneruh réh bé’ omok pu’un, inah éh petenup Allah ngan kelunan éh pika Iah, ha’ néh. 10 Bang uleu’ jam éh, uban neu’ penyukat Sahéé’ Néh Allah pepoléng éh ngan lu’, uban Sahéé’ Néh éh pekelenaa’ kekat ineu’-ineu’ péh, pah avéé’ tong éh dilem mu’un éh dalem pengeloo’ Allah. 11 Uban bé’ pu’un séé’-séé’ péh éh omok jam tong ineu’ éh penyeruh kelunan éh jah, usah nah tengéé’ awah éh jam éh, kenat péh Sahéé’ Allah, Iah awah éh jam tong kenin Allah. 12 Bé’ Tuhan mena’ pengejam éh jin tana’ iteu’ ngan lu’, bang Iah mena’ Sahéé’ Allah nah ngan lu’, dokoo’ lu’ omok nesen tong kekat pengena’ Allah ngan lu’. 13 Bé’ améé’ nebaraa’ kelunan neu’ pengejam mé’ tengéé’, bang améé’ nebaraa’ réh neu’ pengejam Sahéé’ Allah. Kekat éh benara’ Sahéé’ Allah lem kenin mé’, inah ke’ éh benara’ mé’ ngan kelunan éh pu’un Sahéé’ Allah. 14 Bang kelunan éh bé’ pu’un Sahéé’ Allah bé’ éh omok alaa’ ha’ tebaraa’ jin Sahéé’ Allah, adang néh bé’ omok nesen éh, uban kekat ha’ tebaraa’ inah palui awah tong iah, matek bé’ éh omok jam tong néh, uban kekat inah Sahéé’ Allah awah éh omok pekelenaa’ éh. 15 La’ah kelunan éh bé’ pu’un Sahéé’ Allah, bé’ iah omok petuneng kelunan éh pu’un Sahéé’ Allah uban Sahéé’ Allah awah éh jam pengeloo’ kenin Tuhan. 16 Barei’ ha’ lem surat Allah bara’, séé’ omok jam tong kenin Tuhan? Séé’ omok nebaraa’ Iah, ha’ Néh. Bang uleu’ éh ngelan tong Tuhan omok lu’ jam tong pengeloo’ Néh ngan tong kenin Néh.
31 O kekat padéé’ ké’, éh mu’un hun ké’ tai tavin keh lepah rai, bé’ akeu’ omok pané ngan keh barei’ ké’ pané ngan kelunan éh pu’un Sahéé’ Allah, bang akeu’ pané ngan keh barei’ ké’ pané ngan kelunan éh murip pekua’ kemalai kelunan éh bé’ pu’un Sahéé’ Allah, barei’ anak si’ik awah. 2 Akeu’ pu’un barei’ pétéé’ keh awah, uban keh bé’ omok kuman sin ka’an, kenat péh pah avéé’ hun iteu’ bé’ ka’ah omok kuman éh, 3 uban ka’ah murip keto pekua’ kelunan éh bé’ jam Allah. Uban hun keh pu’un pekeleko ngan pepaneu’ belah ka’ah, kineu’ éh kenat, bé’ iteu’ pekua’ barei’ kemalai kelunan éh bé’ pu’un Sahéé’ Allah kei? 4 Uban hun pu’un jah usah bara’, Akeu’ kivu Paulus, ngan éh jah bara’, Akeu’ kivu Apolos, kineu’ hun néh kenat, bé’ ka’ah murip pekua’ kelunan éh bé’ jam Allah kei? 5 Séé’ Apolos, ngan Paulus? Amo kelunan sohoo’ awah, éh mihin keh ngelan tong Tuhan. Siget usah améé’ maneu’ kereja’ éh sohoo’ Tuhan ngan mé’. 6 Akeu’ éh mulah ha’ tebaraa’ Tuhan rai, Apolos éh mesup éh, bang Allah éh maneu’ éh nyekaa’. 7 Kelunan éh mulah éh ngan kelunan éh mesup éh péh, bé’ makat uleu’ ngeja’au réh, bang uleu’ ngeja’au Allah, uban Iah éh maneu’ éh nyekaa’. 8 Kelunan éh mulah éh ngan kelunan éh mesup éh péh, bé’ kereja’ roh pelapah jian jin anah jah nah, bang adang Allah mena’ oléé’ ngan roh, kivu pekua’ kereja’ roh. 9 Uban améé’ béé pekua’ kenin kereja’ ngan Allah, ka’ah éh barei’ térék Néh. La’ah ka’ah péh barei’ lamin Allah. 10 La’ah kivu pekua’ pengena’ Allah ngan ké’, akeu’ éh barei’ pengeja’au tukeng lamin, akeu’ éh mejek lihei’, la’ah kelunan éh jah maneu’ lamin tong néh. Bang tekep kelunan éh maneu’ lamin tong néh seruh mu’un tong penganeu’ néh tong néh. 11 Uban Allah lepah mena’ Yésus Kristus barei’ lihei’ éh reken, bé’ uleu’ omok mejek lihei’ éh tengéé’ jin inah. 12 Tong lihei’ inah pu’un jelua’ kelunan éh maneu’ balun néh palaa’ mas ngan pirek péh, kenat péh palaa’ bateu’ talem éh ma’an. Pu’un jelua’ kepéh éh maneu’ balun néh kayeu’ ngan ureu’ éh mapeu’ péh ngan pungun parai. 13 Tong dau Kristus pu’un tuai kepéh, boh éh poléng mu’un kineu’ kekat éh penganeu’ réh inah. Uban luten éh pu’un tovoo’ dau inah, inah éh juk pepoléng éh. Luten inah éh memarem hun kereja’ siget-siget usah pu’un jian ngan bé’ péh. 14 Hun kekat balun éh pebalun réh iri’ pu’un petem keto, boh réh pu’un utung néh kepéh. 15 Bang hun kekat balun néh potong awah, bé’ éh pu’un utung. Usah néh awah omok alaa’ urip, pekua’ kelunan éh kelap jin lamin néh éh potong. 16 Kineu’, bé’ keh jam ka’ah éh lamin Allah ngan Sahéé’ Allah mokoo’ lem kenin keh? 17 Séé’-séé’ éh kebéé Umaa’ Allah, Allah kebéé iah kepéh, uban Umaa’ Allah pu’un éh ni’ai, inah éh ka’ah. 18 Mai jah usah ngelavo’ usah néh. Hun pu’un jah usah éh seruh iah kelunan éh jam seruh, tekep iah paléu palui awah, boh éh omok alaa’ pengejam mu’un kepéh. 19 Uban éh seneruh kelunan tong tana’ pu’un jian, paléu pengepalui awah tong ta’an Allah. Barei’ ha’ lem surat Allah bara’, La’ah kelunan éh pu’un pengejam jin tana’ iteu’ awah, Tuhan maneu’ kekat pengejam réh inah barei’ viheu’ ngan irah ke’ kepéh, ha’ Néh. 20 Ngan jah ha’ kepéh, Tuhan jam kekat seneruh kelunan éh pu’un pengejam jin tana’ barei’suwok awah, ha’ néh. 21 Uban néh kenat mai jah usah ngajung kelunan uban na’at kekat penganeu’ réh awah. Bé’ ka’ah anah Paulus ngan Apolos. Uban kekat ineu’-ineu’ péh ka’ah éh pu’un éh. 22 Kenat péh Paulus, ngan Apolos, ngan Péterus ngan kekat éh tong tana’ siteu’, urip ngan matai péh, kenat péh éh pu’un hun iteu’, ngan éh juk pu’un kepéh vam, kekat néh béé anah ka’ah éh, 23 ngan ka’ah kepéh anah Kristus ngan Kristus éh anah Allah.
41 Tekep ka’ah seruh amo Apolos, kelunan éh kivu sohoo’ Kristus awah. Kristus éh mena’ ha’ tebaraa’ Néh ngan amo. Ha’ tebaraa’ iteu’ pelim éh tong kelunan sahau rai, amo mihau éh ngan bara’ éh ngan kelunan éh jah kepéh. 2 Adang tekep kelunan éh mihau éh pu’un tigéh lem kekat sohoo’ pengeja’au néh. 3 Bé’ akeu’ tusah kenin seruh kineu’-kineu’ éh seneruh keh tong akeu’, kenat péh seneruh kelunan séé’-séé’ péh. Akeu’ tengéé’ péh bé’ akeu’ petuneng kenin ké’. 4 Bé’ akeu’ nesen ineu’-ineu’ kesa’at lem kenin ké’, na’ péh kenat bé’ akeu’ bara’ akeu’ bé’ pu’un sala’, bang Tuhan awah éh jam petuneng kenin ké’. 5 Uban néh kenat mai ka’ah petuneng ngan maneu’ kelunan pah avéé’ jaka’ éh kevéléé’ Tuhan hun sioo’ Néh tuai kepéh. Adang Iah omok pepoléng kekat penyeruh réh éh merem ngan éh pelim rai, ngan Iah pepoléng kekat pengeloo’ kenin kelunan éh pelim rai. Tovoo’ inah Tuhan pu’un mejing kelunan kivu pekua’ penganeu’ réh. 6 O kekat padéé’ ké’, tong kekat éh benara’ ké’ iteu’, akeu’ maneu’ ha’ tapan tong amo Apolos, dokoo’ keh omok nesen éh. Pu’un ku’ tapan éh kenat dokoo’ ka’ah omok jam, bé’ tekep keh petuneng kelunan ngan ngajung jah usah ngan tengéé’ kenin ngan leko tong jah usah kepéh. 7 Séé’ maneu’ keh pelapah jian jin irah éh jah? Kineu’, bé’ éh Tuhan éh mena’ kekat-kekat pengena’ lem kenin keh kei? Hun néh kenat uban ineu’ keh bau kenin ngajung usah keh, barei’ keh seruh bé’ éh pengena’ Tuhan? 8 Bé’ makat uban keh kurang pengejam. Pengejam keh nah sukup mu’un éh. Ka’ah seruh ka’ah éh kelunan jian. Ka’ah seruh ka’ah éh raja’. Amo iteu’ bé’ amo kelunan jian. Jian ka’ah raja’ mu’un dokoo’ amo omok raja’ pemung ngan ka’ah kepéh. 9 Uban akeu’ seruh, Allah maneu’ améé’ éh lawah Néh barei’ saa’ likot kekat kelunan béé, pekua’ kelunan éh teneng kenukum réh éh juk penatai réh tong jumen réh béé, dokoo’ mé’ omok ta’an kekat kelunan ngan kekat meliket péh. 10 Uban mé’ maneu’ kereja’ Kristus, inah mé’ barei’ okoo’ kelunan éh palui awah, bang ka’ah kelunan éh jam seruh tong urip keh lem Kristus. Améé’ kelunan éh lemoo’ awah, bang ka’ah éh gahang, ka’ah éh kenajung kelunan, améé’ éh keleko réh awah. 11 Avéé’ hun iteu’ améé’ pu’un la’au’ ngan mapeu’ batok, ngan bé’ pu’un sukup pakai, pu’un réh mipok mé’, ngan pu’un mé’ lakau-lakau bé’ pu’un jalan mokoo’ petem. 12 Mutau mé’ kereja’ dokoo’ tagong usah mé’. Hun kelunan maneu’ mé’ pu’un mé’ mipa réh ngan jian, hun réh peketa mé’, améé’ ngerera’ ngan ngeretep awah. 13 Hun réh ngesa’at ngaran mé’, améé’ mipa ha’ réh ngan ha’ éh dawai. La’ah améé’ pekua’ moo’ ngan dek awah tong ta’an kekat kelunan, pah avéé’ hun iteu’. 14 La’ah akeu’ nyurat kenat bé’ éh uban ké’ juk pekenyaa’ keh, akeu’ nyurat éh kenat uban ké’ juk nebaraa’ keh, pekua’ anak usah ké’ éh penika ké’. 15 Uban na’ péh ka’ah pu’un ibu-ibu guru éh nebaraa’ keh tong urip keh dalem Kristus, bé’ tamen keh pinaa’. Uban dalem Kristus Yésus akeu’ éh tamen keh, uban akeu’ éh bu’un bara’ Rengah Jian ngan keh. 16 Uban néh kenat akeu’ nyohoo’ ka’ah kivu uban ké’ kepéh. 17 La’ah kenat péh akeu’ nyohoo’ Timotius tai tavin ka’ah kepéh. Iah seleket anak ké’ éh penika ké’ ngan éh tigéh dalem kereja’ néh. Iah omok petesen keh tong kekat jalan ké’ dalem Kristus Yésus, pekua’ éh benara’ ké’ tong siget-siget sidang semah-semah péh. 18 Bang pu’un jelua’ ka’ah éh bau kenin, uban keh seruh bé’ akeu’ makang tuai nepah keh. 19 Bang hun néh lem pengeloo’ Allah, adang akeu’ juk tuai ngan keh ngan laho, boh akeu’ omok jam kenin irah éh bau-bau kenin kenat ngan jam tong penganeu’ réh kepéh, bé’ makat tong kekat ha’ éh nané réh awah. 20 Uban tong kelunan éh pu’un lem nihau Allah, bé’ éh neu’ ha’ tosok réh awah bang neu’ penyukat Tuhan. 21 Kineu’ éh pengeloo’ keh? Keloo’ akeu’ tuai mihin perah, kineu’, keloo’ akeu’ tuai ngan dawai kenin ngan penoo’ neu’ penika Tuhan kei?
51 Pu’un ku’ menéng ha’ réh bara’ rengah jin ka’ah. Tusah kenin ké’ menéng éh. Éh benara’ réh, pu’un kelunan sidang éh petuyang. Éh mu’un néh pelapah sa’at jin barék kelunan éh bé’ ngelan tong Tuhan, uban néh petuyang ngan tinen keruwah néh. 2 Kineu’ ka’ah ngajung usah keh hun kelunan pu’un maneu’ kenat? Jian keh besau kenin, ngan kelunan éh maneu’ kenat tekep keh pepiso éh jin sidang keh. 3 Na’ péh usah ké’ pu’un juu’, bang kenin ké’ pu’un pemung ngan keh, ngan dalem ngaran Tuhan Yésus, akeu’ ngukum kelunan inah, pekua’ barei’ hun usah ké’ pu’un ngan keh sinah. 4 Na’ péh usah ké’ bé’ pu’un sinah, dalem kenin ké’ akeu’ pu’un pemung ngan keh sinah, ngan hun ka’ah petipun, neu’ penyukat Tuhan Yésus éh pu’un pemung ngan uleu’, 5 jian keh pepusit éh jin sidang keh, mena’ éh ngan Sitan, boh éh jihah. Hun keh maneu’ kenat, na’ péh usah néh jam matai, bang sahéé’ néh omok éh murip tovoo’ Tuhan Yésus tuai kepéh. 6 Bé’ tekep keh ngajung usah keh kenat. Kineu’ keh, bé’ keh jam tawan-pekevat tepong, na’ péh éh si’ik awah, omok éh pekevat kekat lugung tepong? 7 Jian keh bet tawan-pekevat, éh lepah lebéé’ tenéh, inah éh penyala’, dokoo’ keh omok jah lugung tepong éh maréng kepéh, éh bé’ pu’un vat neu’ tawan pekevat. Jian keh maneu’ penguman éh sohoo’ Tuhan ngan kenin éh ni’ai ngan jian. Uban Dau Ja’au Paska uleu’ lepah petenup, uban Kristus éh Domba Paska uleu’ lepah penatai réh. 8 Mai lu’ ngeja’au Dau Ja’au Paska lu’ palaa’ roti éh pu’un tawan-pekevat, inah éh penyala’ ngan kekat kesa’at. Bang maneu’ éh ngan kekat éh jian ngan teneng. 9 Lem surat éh senurat ké’ lepah rai, pu’un ku’ meta’ keh pebakéh ngan kelunan éh sa’at barék ngan petuyang. 10 Tong ha’ ké’ kenat, bé’ akeu’ pané tong irah éh bé’ jak ngelan tong Tuhan éh petuyang, ngan éh magat juk alaa’ mekum, ngan éh nekau ngan éh pakai butun. Hun akeu’ meta’ keh pebakéh ngan kelunan kenat, seleket ké’ nyohoo’ keh piso jin tana’ iteu’ mu’un. 11 Bang tong ha’ ké’ rai, akeu’ nyurat meta’ keh pebakéh ngan kelunan éh bara’ iah jah padéé’ dalem Tuhan, bang barék néh sa’at ngan petuyang, ngan magat juk alaa’ mekum, ngan pakai butun, ngan ngesa’at ngaran irah éh jah, ngan mavuk ngan nekau péh. Éh mu’un néh bé’ tekep keh kuman ngan kelunan éh kenat. 12 - 13 Bé’ akeu’ petuneng barék kelunan éh to bé’ jak ngelan Tuhan. Allah omok petuneng ngan ngukum réh. Bang tekep ka’ah petuneng barék kelunan tong sidang. Barei’ ha’ lem Surat Allah, Pepusit kelunan éh sa’at barék jin belah keh, ha’ Néh.
61 Hun pu’un kelunan éh pepadéé’ dalem Tuhan, éh tengéé’ kenin ngan pepaneu’, kineu’ éh makang tai besara’ tong jumen kelunan éh bé’ ngelan tong Tuhan? Kineu’ éh bé’ kejeraa’ irah éh ngelan tong Allah seruh tong kekat penusah néh inah? 2 Kineu’, bé’ keh jam irah éh anah Allah juk petuneng kekat kelunan tong tana’ iteu’! Hun néh kenat, hun keh pu’un petuneng tana’ iteu’ kepéh vam, kineu’, bé’ keh omok petuneng tong kekat rungen éh si’ik awah éh pu’un hun iteu’ kei? 3 Kineu’, bé’ keh jam uleu’ péh juk petuneng meliket? Hun néh kenat makin péh tong kekat éh pu’un dalem pengurip lu’ hun iteu’. 4 Hun néh kenat hun pu’un penusah belah ka’ah, kineu’ keh, tekep keh mihin éh tai tong jumen kelunan éh bé’ pu’un dalem sidang ke’ réh omok seruh éh kei? 5 Tekep ka’ah menyaa’. Kineu’, bé’ pu’un jah usah belah ka’ah éh jam seruh éh omok memekat ha’ belah irah padéé’ inah kei? 6 Bang inah éh jah kelunan éh padéé’ dalem Tuhan besara’ maneu’ jah padéé’ néh kepéh, ngan inah kepéh, pu’un iah kejeraa’ kelunan éh bé’ ngelan tong Tuhan petuneng roh. 7 Sala’ mu’un ka’ah, uban keh pu’un tusah éh juk mihin keh tai besara’, inah éh pepoléng keh sala’ mu’un. Pelapah jian hun keh kejeraa’ réh ngerugii’ keh awah. Pelapah jian keh kejeraa’ réh nekau, jin keh pu’un tai besara’ ngan irah éh bé’ ngelan tong Tuhan. 8 Bang ka’ah tengéé’ ngerugii’ ka’ah ke’, ngan nekau jin belah ka’ah ke’, ngan inah éh jin irah éh pata padéé’ dalem Tuhan. Béé kenin ké’. 9 Adang keh jam kelunan éh sa’at barék bé’ omok tai tong nihau Allah. Mai keh tawang, kelunan éh sa’at barék ngan petuyang, ngan kelunan éh pakai butun, ngan lakei’ éh petuyang ngan lakei’, 10 ngan kelunan nekau, ngan kelunan éh magat juk alaa’ mekum, ngan kelunan mavuk, ngan kelunan éh pesala’ kelunan éh jah, ngan kelunan éh ngelapah sohoo’, kekat irah éh maneu’ kenat bé’ omok alaa’ Allah pengeja’au réh ngan tai lem nihau Néh. 11 Hun lepah rai pu’un jelua’ ka’ah kenat, bang pu’un Tuhan mohéé’ keh jin penyala’ keh, ngan hun iteu’ ka’ah anah Allah, ngan pu’un teneng tong jumen Néh neu’ ngaran Tuhan Yésus Kristus ngan neu’ Sahéé’ Allah. 12 Barang pu’un jah usah éh bara’, Omok akeu’ maneu’ ineu’-ineu’ kivu pengeloo’ kenin ké’ tengéé’, bé’ pu’un ineu’ éh meta’ akeu’ kenat. Oo’, omok, bang bé’ éh kekat inah omok ngejian kenin keh. Akeu’ péh, omok akeu’ bara’, omok akeu’ maneu’ ineu’-ineu’ kivu pengeloo’ kenin ké’ tengéé’, bé’ pu’un ineu’ éh meta’ akeu’ kenat, bang bé’ akeu’ juk maneu’ éh, uban bé’ akeu’ keloo’ tai lem penyukat néh ke’ néh ngeripen akeu’. 13 Barang pu’un jah usah kepéh éh bara’, Ka’an pu’un dokoo’ lu’ omok beso betuken, ngan betuken lu’ pu’un dokoo’ lu’ omok kuman ka’an. Oo’ mu’un, bang ka’an ngan betuken lu’ péh juk kenebéé Allah. Usah kelunan bé’ éh pu’un ke’ néh maneu’ barék sa’at ngan petuyang, bang pu’un éh ke’ néh anah Tuhan, ngan Tuhan pu’un ke’ Néh purip usah uleu’. 14 La’ah pu’un Allah pebetéé’ Tuhan Yésus jin patai Néh ngan Iah omok pebetéé’ uleu’ kepéh naneu’ penyukat Néh. 15 Ka’ah jam usah keh iteu’ usah Kristus. Kineu’, tekep ku’ alaa’ jebila’ usah Kristus ngan maneu’ éh usah redo éh petuyang? Bé’. Bé’ omok. 16 Kineu’, bé’ keh jam kelunan éh tai pemung ngan redo bavah, rawah seleket jah usah awah? Uban pu’un jah ha’ lem surat Allah éh bara’ lenaa’ mu’un, Kelunan éh pemung, inah rawah seleket jah usah awah, ha’ Néh. 17 Kenat péh kelunan éh pemung ngan Tuhan pu’un éh jah awah neu’ Sahéé’. 18 Kelap keh jin petuyang. La’ah kekat arong penyala’ éh jah éh naneu’ kelunan, bé’ éh ngesa’at usah néh mu’un, bang kelunan éh petuyang, pu’un éh maneu’ penyala’ ngan ngesa’at avéé’ usah néh mu’un. 19 Kineu’, bé’ keh jam usah keh iteu’ lamin Sahéé’ Allah éh pu’un dalem keh, éh nena’ Allah ngan keh? Bé’ ka’ah anah ka’ah ke’, bang ka’ah anah Allah. 20 Pu’un Iah melih ka’ah palaa’ éh ma’an. Uban néh kenat tekep ka’ah peparen Allah dalem usah keh.
71 La’ah tong kekat peneteng keh dalem surat keh rai, inah akeu’ juk mipa éh. Jian éh hun pu’un lakei’ éh bé’ kawin. 2 bang uban pinaa’ kelunan éh petuyang, tekep siget-siget lakei’ kawin ngan siget-siget redo pu’un lakei’ néh. 3 Jian lakei’ maneu’ éh tekep ngan redo néh, kenat péh redo ngan lakei’ néh, mai rawah pekeleko. 4 La’ah redo éh lepah kawin, bé’ usah néh anah nah tengéé’, bang anah lakei’ néh. Kenat péh lakei’, bé’ usah néh anah nah tengéé’, bang anah redo néh. 5 Mai rawah pekeleko. Bang hun rawah juk posot metok omok kenat hun rawah pané tenah ngan pekua’ kenin keloo’ kenat metok awah, dokoo’ rawah omok sebayang. La’o inah jian rawah pemung kepéh barei’ malai, dai rawah teneng tenupat Sitan uban roh bé’ omok ngeretep. 6 La’ah akeu’ bara’ éh seneruh ké’ awah, bé’ makat nyohoo’ keh kenat. 7 La’ah kenin ké’ mu’un keloo’ ku’ hun kekat kelunan omok pekua’ akeu’, bang siget-siget kelunan alaa’ pengena’ éh jin Allah, jah barei’ iteu’ ngan jah barei’ inah. 8 La’ah ha’ ké’ kepéh ngan irah lemanai ngan irah redo baleu’, pelapah jian hun keh murip tengéé’ pekua’ akeu’ iteu’. 9 Bang hun keh bé’ omok ngeretep, jian keh kawin, pelapah jian keh kawin jin keh kelih ngan magat juk tavin réh. 10 La’ah ngan kelunan éh lepah kawin, inah sohoo’ ké’, bé’ éh sohoo’ ké’ awah bang sohoo’ Tuhan éh. Redo éh pu’un lakei’ bé’ éh omok petat jin lakei’ néh. 11 Bang hun néh pu’un petat, jian iah murip tengéé’ jah usah awah, barang moléé’ kepéh ngan lakei’ néh. La’ah lakei’ éh pu’un redo bé’ éh omok petat jin redo néh. 12 La’ah ha’ ké’ ngan kelunan éh jah kepéh, bé’ éh ha’ Tuhan, ha’ ké’ awah inah. Hun pu’un jah kelunan éh ngelan tong Tuhan éh pu’un redo éh bé’ ngelan, ngan hun redo inah keloo’ mokoo’ pemung ngan néh, mai lakei’ inah bet éh. 13 Kenat péh hun pu’un redo éh pu’un lakei’ éh bé’ ngelan, ngan lakei’ néh keloo’ mokoo’ ngan néh, mai redo inah bet éh. 14 Na’ péh lakei’ néh bé’ ngelan, hun néh mokoo’ ngan redo néh éh ngelan, kenat éh lem pengeloo’ Tuhan. Kenat péh barang éh redo bé’ ngelan hun lakei’ néh éh ngelan hun redo néh keloo’ mokoo’ ngan lakei’ néh, kenat éh lem pengeloo’ Tuhan. Hun rawah petat anak roh barei’ anak irah éh bé’ ngelan tong Tuhan. 15 Hun néh éh lakei’ péh barang éh redo péh éh bé’ ngelan ngan juk piso jin keruwah néh éh ngelan, turut ke’ iah piso awah. Bé’ lu’ omok nyohoo’ roh pemung awah de’ ke’ uban Allah tebai keh murip ngan pawah. 16 O redo éh ngelan tong Kristus, bé’ ke’ jam, barang ka’au’ omok mihin lakei’ ko’ ngelan tong Tuhan hun ko’ mokoo’ petem ngan néh. Kenat péh lakei’ éh ngelan, bé’ ke’ jam, barang ka’au’ omok mihin redo ko’ ngelan tong Tuhan. 17 Jian siget-siget usah murip pekua’ pengena’ Tuhan ngan néh, barei’ bu’un hun Tuhan tebai éh rai. Kenat éh sohoo’ ké’ dalem kekat sidang. 18 Hun irah Yahudi tenebai Allah hun néh to kivu adet Yahudi ngan pesunat, mai iah juk barei’ kelunan éh bé’ pesunat. Kenat péh hun néh pu’un kelunan éh tengéé’ pohoo’ éh bé’ kivu adet Yahudi ngan bé’ pesunat, hun Allah tebai éh mai iah juk kivu adet irah ngan nyohoo’ réh pesunat éh. 19 Uban kelunan éh pesunat ngan éh bé’ pesunat péh, bé’ éh ineu’, bang éh tekep mu’un, inah éh hun lu’ kivu kekat sohoo’ Allah. 20 Jian siget usah ngepohoo’ tong jalan néh pu’un hun Allah tebai éh rai. 21 Kelunan éh ripen hun Allah tebai éh rai, mai éh tusah kenin hun néh kenat, bang hun pengeja’au keh éh ngamit keh juk ngelepu keh, jian keh pelepu. 22 Uban kelunan ripen éh ngelan tong Kristus ngan jam penebai Tuhan, na’ péh éh ripen keto, iah péh pu’un pelepu tong jumen Kristus. Kenat péh hun kelunan éh pelepu hun Tuhan tebai éh rai, iah pu’un ripen ngan Kristus kepéh. 23 Pu’un Allah melih keh palaa’ éh ma’an, hun néh kenat mai keh keripen kelunan. 24 O kekat padéé’ ké’, jian siget usah petem dalem Allah pekua’ éh pu’un hun Allah tebai éh rai. 25 La’ah tong redo éh bé’ jak kawin, bé’ pu’un sohoo’ Tuhan ngan néh, bang akeu’ bara’ éh seneruh ké’ tengéé’ pekua’ kelunan éh omok kenelan keh neu’ pengasi Tuhan. 26 La’ah hun lu’ seruh tong kekat penusah éh pu’un hun iteu’, inah akeu’ seruh pelapah jian hun kelunan mokoo’ barei’ éh pu’un hun iteu’. 27 Hun keh pu’un redo, mai keh juk petat jin iah. Hun keh to bé’ jak kawin, mai keh juk kawin. 28 Bang hun keh pu’un kawin, bé’ éh sala’ kenat. Ngan hun redo éh bé’ jak kawin pu’un kawin, bé’ éh sala’ kenat. Bang akeu’ keloo’ mai keh pelohoo’ lem kekat penusah irah éh kawin. 29 La’ah inah éh benara’ ké’, O kekat padéé’ ké’. Bé’ lu’ murip lebéé’ la’ah tong tana’ iteu’, uban néh kenat jin hun iteu’, tekep kelunan éh pu’un redo mai éh telalau seruh tong redo néh awah. 30 Kelunan éh mangaa’ ngan besau kenin, mai éh ngelinguh lem kebesau néh kenat, bang jian éh barei’ hun néh bé’ besau. Kenat péh kelunan éh mala’, mai éh telalau ngan ngida awah. Kenat péh kelunan éh melih livah, mai éh telalau seruh tong livah inah awah. 31 La’ah kelunan éh pebelih, mai éh telalau seruh pebelih awah. Uban tana’ iteu’ bé’ pu’un barei’ hun iteu’ lebéé’ la’ah. 32 Bang kenin ké’ mu’un keloo’ ka’ah bé’ pu’un tusah ineu’-ineu’. La’ah kelunan éh bé’ pu’un redo, iah seruh mu’un tong kekat kereja’ Tuhan, uban iah juk ngepayoo’ kenin Tuhan. 33 Bang kelunan éh pu’un redo iah seruh mu’un tong kekat éh pu’un tong tana’ iteu’, uban néh juk ngepayoo’ kenin redo néh, 34 kenat éh duah kenin. La’ah redo éh bé’ kawin, iah seruh mu’un tong kekat kereja’ Tuhan, dokoo’ usah néh ngan kenin néh omok anah Tuhan. Bang redo éh pu’un lakei’, iah seruh tong kekat éh tong tana’ iteu’, uban néh juk ngepayoo’ kenin lakei’ néh 35 Akeu’ pané kenat uban ké’ juk nolong keh, bé’ akeu’ juk mena’ éh bahat ngan keh, bang akeu’ keloo’ ka’ah maneu’ kekat éh jian ngan teneng ngan mena’ kekat kenin ngan usah keh ngan Tuhan maneu’ kereja’ Néh. 36 Bang tong kelunan éh lepah petunang, bang rawah seruh bé’ juk pemung kepéh, hun lakei’ inah bé’ omok ngeretep tong redo inah, jian rawah kawin, bé’ éh sala’ kenat. 37 Bang hun pu’un jah lakei’ éh bé’ keloo’ kawin, bé’ makat uban sohoo’ kelunan bang neu’ kenin néh tengéé’ bé’ iah keloo’ kawin, hun iah jam mihau kenin néh ngan omok ngeretep, pelapah jian hun néh bé’ kawin. 38 Kenat péh kelunan éh kawin, jian éh, ngan kelunan éh bé’ kawin, iah pelapah jian kepéh. 39 La’ah redo éh lepah kawin, bé’ éh omok alaa’ lakei’ maréng kelebéé’ lakei’ néh murip keto, bang hun lakei’ néh lepah matai, omok éh kawin kepéh ngan séé’-séé’ éh keneloo’ néh, sokoh néh éh kelunan éh ngelan tong Tuhan. 40 Bang kioo’ ké’ barang iah pelapah jian kenin hun néh bé’ kawin kepéh. Inah éh kenin ké’ awah, bang kioo’ ké’ akeu’ péh pu’un Sahéé’ Allah.
81 La’ah tong ha’ peneteng keh tong ka’an éh peliwa réh ngan butun. Na’ péh uleu’ béé jam seruh, bang pengejam éh bé’ jam pika kelunan mihin éh bau kenin awah, bang hun néh jam pika inah éh ngereken éh. 2 Kelunan éh seruh iah pu’un pengejam, bé’ jak iah jam barei’ éh tekep éh kejam néh mu’un. 3 Bang kelunan éh pika Allah, kelunan inah éh kejam Allah. 4 La’ah ka’an éh peliwa réh ngan butun, tong irah éh neteng hun omok kuman ngan bé’ péh, butun inah bé’ pu’un urip ineu’-ineu’ lem néh, inah éh telana’ tong éh bé’ pu’un awah. Uleu’ jam allah jah awah. 5 Na’ péh kelunan bara’ pu’un kuraa’-kuraa’ Allah éh jah, kenat péh tong langit kenat péh tong tana’, na’ péh pinaa’ arong balei’ ngan pinaa’ ungap, 6 bang ngan uleu’ éh ngelan tong Tuhan, Allah jah awah, inah éh Tamen uleu’, éh suai kekat-kekat arong ineu’-ineu’ péh, ngan uleu’ murip neu’ Néh, kenat péh jah awah Tuhan lu’, inah éh Yésus Kristus, Iah éh suai kekat ineu’-ineu’ ke’ néh pu’un pesuai, ngan uleu’ péh murip neu’ Néh. 7 Bang bé’ éh kekat kelunan éh jam éh kenat. Pu’un kuraa’ kelunan éh malai mu’un tong butun, pah avéé’ hun iteu’ hun irah kuman ka’an inah, inah irah seruh éh anah butun, bé’ réh jam seruh mu’un, irah seruh irah sa’at uban réh kuman ka’an inah. 8 La’ah éh mu’un néh bé’ lu’ omok pelapah danii’ tong Allah neu’ lu’ kuman ka’an. Kenat péh hun lu’ bé’ kuman éh bé’ lu’ sala’, ngan hun lu’ kuman éh, bé’ lu’ alaa’ jian neu’ inah. 9 Na’ péh usah ko’ tengéé’ omok kuman ineu’-ineu’, jian keh seruh jian-jian, dai barék ko’ inah mihin kelunan éh kurang pengelan petat ngan maneu’ penyala’. 10 Hun kelunan éh lemoo’ kenin na’at keh tai kuman ka’an éh peliwa réh tong lamin butun, adang iah péh kivu penganeu’ ko’ kenat, inah keh ngelavo’ kenin néh uban néh seruh éh anah butun mu’un. 11 Hun keh tai kuman kenat, ngan bé’ seruh tong kelunan éh kurang pengelan éh padéé’ keh dalem Tuhan uban Kristus lepah matai ngeliwah iah, pu’un éh tawang naneu’ pengejam kelunan seruh omok kuman éh. 12 Hun keh petawang padéé’ keh kenat, inah ka’ah maneu’ penyala’ tong jumen Kristus uban keh sala’ ngan petawang padéé’ keh neu’ keh petusah kenin néh éh lemoo’, bé’ jak jam seruh mu’un. 13 Uban néh kenat hun néh neu’ ka’an kinan ké’ inah mihin padéé’ ké’ petat, bé’ mu’un akeu’ keloo’ kuman ka’an inah kepéh, dai akeu’ mihin padéé’ ké’ petat maneu’ penyala’.
91 Bé’ akeu’ ripen tong adet sebayang ineu’-ineu’. Adang keh jam akeu’ éh kelunan éh pelepu. Akeu’ jah lawah Tuhan. Pu’un ku’ na’at Yésus éh Tuhan lu’. Ka’ah péh pu’un ngelan tong Tuhan neu’ kereja’ ké’ iteu’. 2 Na’ péh kelunan éh jah bé’ alaa’ akeu’ barei’ lawah Tuhan, adang ka’ah pu’un alaa’ akeu’. Uban ka’ah pu’un ngelan tong Tuhan, inah éh pepoléng kereja’ ké’ lawah Tuhan. 3 La’ah inah éh ha’ ké’ ngan kelunan éh maneu’ akeu’. 4 Kineu’, bé’ tekep kelunan mena’ ka’an kinan ngan baa’ nesep ngan ké’ hun ké’ kereja’ belah réh kei? 5 Kineu’, pu’un keh seruh irah lawah éh jah awah éh tekep kawin ngan mihin redo néh lakau, hun réh tai lakau perengah Tuhan barei’ éh neu’ Yakub, éh padéé’ usah Tuhan Yésus, rawah Péterus nah. 6 Kineu’, amo Barnabas tengéé’ éh tekep kereja’ dokoo’ tagong usah mo? 7 Mah seradu éh tagong usah néh tengéé’ hun néh tai pekayau? Mah kelunan pu’un maneu’ pulah agun éh bé’ kuman buaa’ néh? Mah kelunan mihau sapé’ éh bé’ alaa’ baa’ étéé’ néh? 8 Bé’ makat akeu’ bara’ tong éh kemalai keh awah. 9 Bang ha’ lem Surat Musa pu’un éh bara’, kelunan éh maneu’ kereja’ Tuhan tekep réh tagong éh. Uban ka’ ha’ néh, Mai keh ngejeret ujun sapé’ tovoo’ néh meték nah. Kineu’, Allah seruh tong sapé’ inah awah. 10 Kineu’, bé’ Iah seruh tong uleu’ kepéh hun néh pané kenat? Adang ha’ inah senurat néh ngan uleu’ kepéh. La’ah kelunan éh nyakun tana’ ngan kelunan éh alaa’ buaa’ jin pulah inah, tekep rawah maneu’ kereja’ roh ngan ngelan hun buaa’ néh pu’un omok roh pekua’ petulat éh. 11 Pu’un mé’ mulah tulin jin Sahéé’ lem kenin keh, kineu’ améé’ sala’ hun mé’ alaa’ éh jin ka’ah éh tekep tong urip mé’ kepéh? 12 Hun kelunan éh jah omok alaa’ éh jin ka’ah, makin péh améé’ kepéh. Bang na’ péh tekep keh tagong améé’, bé’ mé’ nyohoo’ keh. Bang améé’ ngeretep awah dalem kekat inah, dai améé’ mapat Rengah Jian Kristus. 13 Kineu’, bé’ keh jam kelunan éh kereja’ tong umaa’ Allah sahau, irah alaa’ penguman réh jin umaa’ Allah inah, kenat péh tong kelunan éh mematai ka’an ngan motong éh tong jalan réh mena’ éh ngan Tuhan, pu’un réh alaa’ tulat ka’an inah kepéh. 14 Kenat péh Tuhan bara’, kelunan éh bara’ Rengah Jian tekep éh alaa’ tulat jin kereja’ néh perengah Rengah Jian inah. 15 Bang na’ péh éh tekep keh tagong akeu’, bé’ akeu’ nyohoo’ keh, ngan bé’ akeu’ nyurat hun iteu’ dokoo’ nyohoo’ keh maneu’ éh kenat. Pelapah jian akeu’ matai jin ké’ nyohoo’ keh maneu’ éh kenat. Ha’ ké’ inah bé’ éh ha’ ké’ kenyo, bé’ omok kelunan tuyah-tuyah éh. 16 Bé’ akeu’ omok ngajung usah ké’ tengéé’ uban akeu’ perengah Rengah Jian. Allah éh nyohoo’ ku’ perengah éh, bé’ ku’ omok bé’. Éh mu’un, tusah mu’un-mu’un tong akeu’ hun akeu’ bé’ perengah Rengah Jian inah. 17 Hun akeu’ maneu’ kereja’ Tuhan kivu pengeloo’ kenin ké’ tengéé’, boh éh tekep akeu’ alaa’ oléé’ néh jin kelunan kepéh, bang hun néh neu’ sohoo’ Allah, inah akeu’ kivu sohoo’ Néh awah. 18 Hun néh kenat, ineu’ éh oléé’ néh tong akeu’ kepéh? Inah éh, kemurung neu’ Tuhan ngevéléé’ akeu’ bara’ Rengah Jian Néh ngan bé’ menyat ineu’-ineu’ jin kelunan, ngan bé’ nyohoo’ kelunan maneu’ ineu’-ineu’ tagong akeu’. 19 Na’ péh akeu’ kelunan éh pelepu ngan bé’ keripen kelunan, bang akeu’ barei’ ripen ngan kekat kelunan, dokoo’ ké’ omok mihin kuraa’-kuraa’ usah réh ngelan tong Kristus. 20 Hun ké’ kereja’ belah irah Yahudi, pu’un ku’ murip barei’ urip irah, dokoo’ ké’ omok mihin réh ngelan tong Tuhan. Malai irah Yahudi kivu kekat adet lem Surat Musa, bé’ akeu’ pu’un maneu’ kenat. Bang hun ké’ pu’un ngan irah, akeu’ péh kivu éh, dokoo’ ké’ omok mihin réh ngelan tong Kristus. 21 Kenat kepéh hun ké’ pu’un tai ngan irah éh tengéé’ pohoo’ éh bé’ kivu adet lem Surat Musa nah, akeu’ péh bé’ kivu éh. Akeu’ murip pekua’ kemalai irah, dokoo’ ké’ omok mihin réh ngelan tong Tuhan. Hun akeu’ maneu’ kenat, bé’ akeu’ ngelapah sohoo’ Tuhan, uban pu’un ku’ kivu kekat sohoo’ Kristus. 22 Hun ké’ pu’un ngan kelunan éh kurang pengelan, akeu’ péh pu’un pekua’ barei’ kelunan inah, dokoo’ ké’ omok mihin réh ngelan tong Tuhan. La’ah tong kekat kelunan béé, akeu’ péh pekua’ barei’ irah péh, dokoo’ neu’ kekat jalan ineu’-ineu’ omok akeu’ mihin réh ngelan tong Kristus. 23 Bang akeu’ maneu’ kenat dokoo’ réh omok jam tong Rengah Jian, dokoo’ ké’ omok alaa’ jian kenin neu’ réh ngelan tong Tuhan. 24 Adang keh jam, hun keh petakéé’ dalem réh petesi, kekat kelunan éh juk nakéé’ réh pu’un réh pata nekedeu’, bang jah usah awah éh menang. Jian ka’ah kepéh nekedeu’ barei’ kelunan éh juk menang inah. 25 La’ah siget-siget kelunan éh juk pekelawan, adang iah mihau usah néh dalem kekat éh naneu’ néh, iah maneu’ kenat uban néh juk menang ngan alaa’ jah tapong, tapong éh omok melayeu’ awah. Bang uleu’ kepéh mihau kenin lu’ dokoo’ lu’ omok alaa’ jah tapong éh bé’ omok melayeu’ kepéh. 26 Uban néh kenat akeu’ nekedeu’ mu’un-mu’un, bé’ ku’ tedau. Barei’ kelunan éh memukut, bé’ éh memukut sawang awah, 27 bang akeu’ ngegahang usah ké’ ngan ngeripen éh, dokoo’ la’o ké’ nebaraa’ kelunan éh jah, mai usah ké’ tengéé’ nebet Tuhan.
101 O kekat padéé’ ké’, akeu’ keloo’ ka’ah seruh kepéh tong kekat tepun uleu’ éh kivu Musa musit jin tana’ Mesir rai, Tuhan mihau kekat réh béé, avun éh telana’ penyukat Néh pu’un ngan réh, ngan Iah majak réh palaa’ avun inah. Kekat réh béé papit baa’ Kelosom. 2 Iteu’ barei’ réh pu’un batis ke’ réh kivu Musa. 3 Seruh keh jian-jian, na’ péh kekat réh béé piso jin tana’ Mesir ngan pu’un kuman penguman éh nena’ Tuhan nah, 4 ngan mesep baa’ éh musit jin bateu’ éh nipok Musa rai, bé’ Tuhan jian kenin ngan réh. Bateu’ éh jalan baa’ musit nah, ha’ tapan tong Kristus. 5 Na’ péh irah kuman ngan mesep kenat bé’ réh ngepayoo’ kenin Allah. Uban néh kenat pinaa’ réh matai ngan purat-purat awah tong tana’ pegawa nah. 6 Seruh jian-jian, iteu’ barei’ jah tena’ ngan uleu’ kepéh. Jian uleu’ mavaa’ mu’un-mu’un dai uleu’ pu’un barei’ irah inah ngan magat tong kekat éh sa’at. 7 Pu’un réh seva’ ngan pakai butun. Bé’ réh seva’ Tuhan. Barei’ éh benara’ Tuhan lem Surat Allah nah, ka’ ha’ Néh, pu’un réh mokoo’ kuman ngan mesep, ngan betéé’ tai sayau éh sa’at seva’ butun inah, ha’ Néh. 8 Mai lu’ maneu’ barei’ irah. Jelua’ réh petuyang, ngan dalem jah dau awah, duah poloo’ teleu’ ibu réh matai kenukum Tuhan. Mai uleu’ petuyang barei’ irah inah. 9 Mai uleu’ tupat Tuhan barei’ irah, éh teneng kenukum Tuhan éh matai ga’at torok. 10 Mai lu’ pané selem barei’ jelua’ irah inah éh penatai meliket. 11 Kekat inah pu’un tong irah Israel ke’ néh omok jah telana’ ngan kelunan éh jah, ngan pu’un éh senurat dokoo’ lu’ jam mavaa’ kepéh, uban uleu’ murip sioo’ tai ga’ tana’. 12 Uban néh kenat kelunan éh seruh iah jam nekedéng tengéé’, jian iah mavaa’ dai néh pelohoo’ kepéh. 13 Kekat penupat éh teneng tong keh, bé’ éh tengéé’ jin éh teneng tong kelunan éh jah. Bé’ Tuhan piso kenin jin kekat jajii’ Néh, ngan bé’ Iah kejeraa’ keh teneng tong tenupat éh maneu’ keh bé’ omok ngeretep. Bang tovoo’ keh teneng tenupat kenat, Iah pu’un ngegahang kenin keh dokoo’ keh omok ngeretep, ngan Iah maneu’ jalan ngan keh dokoo’ keh omok kelap. 14 O kekat bakéh ké’ éh penika ké’, uban néh kenat jian keh ngejuu’ usah keh jin kekat butun, mai keh pakai éh kepéh. 15 Akeu’ pané ngan keh barei’ ngan kelunan éh jam seruh, ka’ah tengéé’ seruh tong ha’ ké’ inah. 16 Baa’ éh nesep lu’ tong penguman éh sohoo’ Tuhan éh jalan Tuhan mena’ pengejian Néh tong néh ngan éh nalaa’ lu’, uleu’ mesep éh ngan bara’ jian kenin ngan Néh. Neu’ lu’ mesep éh, inah lu’ pepoléng lu’ pu’un pemung ngan Kristus lem pengematai Néh. Kenat péh tong roti éh nutip lu’, hun lu’ kuman éh, inah lu’ pepoléng lu’ pu’un pemung ngan Kristus lem usah Néh. 17 La’ah roti inah jah lugung awah, la’ah na’ péh uleu’ pinaa’, uleu’ jah usah awah, uban uleu’ béé pu’un kuman jin roti éh jah lugung inah. 18 Seruh keh tong irah Yahudi. Kelunan éh kuman sin ka’an éh nena’ réh ngan Tuhan tong jalan réh motong ka’an nah, kelunan inah pu’un seva’ Tuhan neu’ kekat penganeu’ réh tong jalan inah. 19 Kineu’ sin tong ha’ ké’ kenat? Kineu’ butun ngan ka’an éh nena’ réh ngan butun inah, pu’un gunah réh maneu’ éh kenat kei? 20 Bé’ Bang inah ha’ ké’, ka’an éh peliwa kelunan éh ngebalei’, irah peliwa éh ngan balei’, bé’ éh ngan Allah. Ngan bé’ akeu’ keloo’ ka’ah pekua’ kenin ngan balei’. 21 Ka’ah bé’ omok mesep baa’ jin sawan Tuhan pemung ngan sawan balei’. Ka’ah bé’ omok kuman roti éh nena’ Tuhan pemung ngan anah balei’ kepéh. 22 Kineu’, pu’un keh juk metéé’ kemerek Tuhan? Kejam uleu’ Tuhan pelapah gahang jin uleu’. 23 Pu’un kelunan éh bara’, Omok mé’ maneu’ ineu’-ineu’ péh, bé’ pu’un ineu’ éh meta’ améé’ kenat, ha’ irah jelua’. Oo’, mu’un, bang bé’ éh kekat néh béé éh pu’un jian. Omok lu’ maneu’ ineu’-ineu’ bang bé’ éh kekat néh béé éh ngereken kenin lu’. 24 Bé’ tekep kelunan kivu pengeloo’ kenin néh tengéé’, tekep éh kivu pengeloo’ kelunan éh jah. 25 Omok keh kuman ka’an ineu’-ineu’ éh nelih réh tong kedai, bang mai keh neteng kineu’ penganeu’ réh tong néh dai keh tusah kenin seruh éh. 26 Uban pu’un jah ha’ lem surat Allah éh bara’, Tuhan éh pu’un tana’ iteu’ ngan kekat éh dalem néh, ha’ Néh. 27 Hun pu’un kelunan éh bé’ ngelan tong Tuhan tebai ka’ah kuman, jian keh tai ngan kuman ineu’-ineu’ éh nena’ néh ngan keh, bang mai keh neteng kineu’ penganeu’ néh tong néh dai keh tusah kenin seruh éh. 28 Bang hun néh pu’un bara’, Pu’un mé’ peliwa ka’an inah ngan butun, mai keh kuman éh dai keh petawang kelunan éh pané kenat ngan keh, ngan tusah kenin keh seruh éh kepéh. 29 Éh mu’un bé’ makat ka’ah éh tusah kenin, bang irah éh jah pu’un tusah kenin kepéh. Barang pu’un kelunan éh bara’, Hun néh bé’ pu’un ineu’ éh meta’ ku’ kuman éh, kineu’ ku’ bé’ omok kuman éh hun néh kelunan éh jah éh tusah kenin. 30 Hun akeu’ bara’ jian kenin ngan Tuhan tong ka’an éh nena’ Néh ngan ké’, kineu’ kelunan pesala’ akeu’ tong ké’ kuman ka’an hun ké’ bara’ jian kenin ngan Tuhan, ha’ néh. 31 Uban néh kenat dalem kekat penganeu’ keh, hun keh kuman hun keh mesep péh, maneu’ éh béé-béé dokoo’ peparen Allah. 32 Dalem kekat pengurip keh, mai keh maneu’ ineu’-ineu’ éh omok petusah kenin irah Yahudi kenat péh petusah kenin irah éh tengéé’ pohoo’, kenat péh petusah sidang Allah péh. 33 Jian keh maneu’ barei’ akeu’. Akeu’ tupat ngepayoo’ kenin kekat kelunan dalem kekat kereja’ ké’, bé’ ku’ pitah jalan dokoo’ ngepayoo’ kenin ké’ tengéé’, dokoo’ ké’ omok mihin réh alaa’ urip jin Tuhan.
111 Jian keh kivu uban ké’ pekua’ akeu’ kivu uban Kristus. 2 Akeu’ mejing ka’ah uban keh ngelayau nesen akeu’ ngan kivu kekat tebaraa’ éh benara’ ké’ ngan keh. 3 Bang akeu’ keloo’ ka’ah jam, Kristus éh ja’au jin kekat lakei’, ngan irah lakei’ éh ja’au jin kekat redo, ngan Allah éh ja’au jin Kristus. 4 Kenat péh hun pu’un lakei’ sebayang tong petipun ngan bara’ tong ha’ tebaraa’ Tuhan ketem tavun ulun néh, iah ngesa’at ngaran Kristus. 5 Kenat péh siget redo éh sebayang tong petipun ngan bara’ tong ha’ tebaraa’ Tuhan hun néh bé’ petavun ulun néh, iah ngesa’at ngaran lakei’ uban iah barei’ irah redo éh memerit bok néh. 6 Hun redo bé’ petavun ulun néh, jian memerit bok néh awah. Bang uban irah redo menyaa’ memerit bok réh, jian éh petavun ulun néh. 7 Bé’ makat irah lakei’ tusah petavun ulun, uban irah pepoléng layan ngan pengaren Allah, bang irah redo nah barei’ pepoléng pengaren irah lakei’. 8 Uban irah lakei’ bé’ réh senuai Tuhan jin redo, bang redo éh senuai Néh jin lakei’. 9 Ngan lakei’ bé’ éh senuai Tuhan uban redo pu’un, bang redo senuai Néh uban lakei’ pu’un. 10 Uban néh kenat tekep irah redo petavun ulun réh telana’ réh ngerera’ tong lakei’ réh dokoo’ kekat meliket omok jam éh. 11 Uban lem pengeloo’ Tuhan, bé’ irah lakei’ omok pelaya lakei’ awah, kenat péh redo, bé’ réh omok pelaya redo awah. 12 Uban pekua’ redo senuai Néh jin lakei’, kenat péh lakei’ pu’un alaa’ urip jin redo, bang kekat néh béé pu’un jin Allah. 13 Ka’ah tengéé’ seruh éh kepéh. Kineu’, tekep redo sebayang ngan Allah tong petipun ngan bé’ petavun ulun néh? 14 Uban pohoo’ irah lakei’ bé’ éh omok kebit bok, hun néh kenat adang ka’ah jam bé’ éh tekep irah lakei’ kebit bok, menyaa’ réh hun réh kebit bok. 15 Bang hun redo kebit bok, inah éh ngejian layan néh. Uban bok néh inah nena’ Tuhan ngan néh ke’ néh petavun éh. 16 Bang hun pu’un kelunan nyakat tong ha’ ké’ inah, bé’ améé’ ngan bé’ sidang Allah kivu adet éh tengéé’ jin éh benara’ ké’ inah. 17 Bang tong kekat ha’ tebaraa’ ké’ iteu’ kepéh, bé’ akeu’ mejing ka’ah, uban hun ka’ah petipun sebayang, bé’ éh pesavéé’ pengejian, bang néh pesavéé’ kesa’at awah. 18 Uban éh bu’un néh inah éh nenéng ké’, hun ka’ah petipun sebayang pu’un kelunan éh tengéé’ kenin, ngan kioo’ ké’ adang éh pu’un pekua’ éh benara’ réh kenat mu’un. 19 Adang néh tekep jelua’ jin belah ka’ah pu’un tengéé’ kenin dokoo’ pepoléng séé’ kelunan éh tigéh. 20 Uban hun ka’ah petipun, bé’ ka’ah petipun dokoo’ keh kuman ka’an éh sohoo’ Tuhan. 21 Uban hun ka’ah petipun kuman, siget-siget usah tioo kuman penguman néh tenah, kenat péh pu’un jelua’ éh la’au’ ngan pu’un jelua’ kepéh éh mavuk. 22 Kineu’, bé’ keh pu’un lamin keh tengéé’ éh jalan keh kuman ngan mesep kenat kei? Kineu’, pu’un keh juk ngesa’at sidang Allah, ngan juk pekenyaa’ kelunan éh bé’ pu’un penguman kei? Kineu’ ha’ ké’ ngan keh kepéh? Kineu’, tekep ku’ mejing keh? Bé’ akeu’ mejing keh. 23 Uban tebaraa’ éh nalaa’ ké’ jin Tuhan, inah éh benara’ ké’ ngan ka’ah kepéh. Ka’ éh, Sioo’ merem tovoo’ Tuhan Yésus penalo, Iah alaa’ roti 24 ngan sebayang bara’ jian kenin ngan Allah, boh éh memila’ éh. Ha’ Néh, Iteu’ néh seleket usah ké’ éh nena’ ké’ ngeliwah ka’ah. Jian keh maneu’ kenat dokoo’ petesen kenin keh tong Akeu’, ha’ Néh. 25 Kenat péh la’o réh kuman, Iah alaa’ sawan baa’ kepéh, ha’ Néh, Baa’ iteu’ néh seleket dahaa’ ké’, uban neu’ dahaa’ ké’ pega’, inah éh maneu’ jajii’ Allah pu’un petem. Siget koléé’ keh mesep éh, jian keh mesep petesen kenin keh tong Akeu’, ha’ Néh. 26 Uban siget koléé’ keh kuman roti inah ngan mesep baa’ inah, inah néh keh bara’ Tuhan Yésus matai ngeliwah keh, pah avéé’ Néh tuai kepéh. 27 Hun néh kenat séé’-séé’ éh kuman roti éh nena’ Tuhan inah, ngan mesep baa’ inah ngan bé’ teneng kenin seruh éh, iah pu’un penyala’ ngan ngeluén dahaa’ Tuhan awah. 28 Hun néh kenat jian siget-siget usah seruh tong kenin néh tengéé’ tenah, boh éh kuman ngan mesep baa’ inah. 29 Uban kelunan éh kuman ngan mesep baa’ inah ngan bé’ nesen tong pematai Tuhan, inah iah alaa’ ukum tong usah néh tengéé’. 30 Kenat péh pu’un kelunan belah ka’ah éh sakit ngan lemoo’ ngan pu’un éh matai péh. 31 Bang hun lu’ seruh mu’un tong kenin lu’ tengéé’ tenah, bé’ lu’ teneng kenukum Allah. 32 Bang Tuhan éh petuneng uleu’ ngan ngukum lu’ dai uleu’ sioo’ kenukum Néh kepéh, pemung ngan kelunan éh bé’ ngelan tong Iah. 33 O kekat padéé’ ké’, uban néh kenat hun keh petipun juk kuman penguman éh sohoo’ Tuhan, jian keh mena jah usah ngan jah usah. 34 Hun pu’un kelunan éh la’au’, jian iah kuman tong lamin néh tengéé’ tenah, dokoo’ hun keh petipun, ka’ah bé’ teneng kenukum Allah kepéh. La’ah tong kekat rungen éh jah kepéh, hun mah akeu’ tuai tavin keh, boh akeu’ bara’ éh ngan keh kepéh.
121 O kekat padéé’ ké’, tong kekat pengena’ Sahéé’ Allah lem kenin kelunan, bé’ akeu’ keloo’ ka’ah bé’ nesen éh. 2 La’ah ka’ah jam hun ka’ah to bé’ ngelan tong Tuhan rai, pu’un keh pakai butun, butun inah bé’ éh jam pané, pu’un éh mihin keh tawang awah. Seruh keh jian-jian. 3 Kelunan éh pu’un Sahéé’ Allah, bé’ Sahéé’ inah mihin éh menoo’ Yésus. Ngan bé’ pu’un jah usah éh omok bara’, Yésus éh Tuhan ké’, hun néh bé’ najak Sahéé’ Allah. 4 Pu’un kuraa’-kuraa’ arong pengena’ lem kenin kelunan bang Sahéé’ Allah Iah éh mena’ kekat néh béé. 5 Pinaa’ jalan uleu’ omok maneu’ kereja’ Tuhan, bang lem kekat néh béé uleu’ maneu’ éh ngan Tuhan éh jah awah. 6 Pu’un kuraa’-kuraa’ pengena’ Tuhan ngan kelunan ke’ réh maneu’ kereja’ Tuhan, bang jah awah Tuhan, Iah éh mena’ kekat néh béé lem kenin kelunan. 7 Siget usah pu’un jah pengena’ Sahéé’ ngan néh dokoo’ néh nolong kekat kelunan. 8 Pu’un Sahéé’ mena’ penesen ngan jah kelunan, dokoo’ kelunan inah omok bara’ ha’ Tuhan ngan kelunan éh jah kepéh. Tong kelunan éh jah kepéh, Iah mena’ pengejam ngan néh, ke’ néh omok jam tong ha’ tebaraa’ inah. 9 Sahéé’ inah mena’ pengelan ngan jah kelunan, tong irah éh jah kepéh, Iah mena’ penyukat Néh ke’ Néh omok peka’o kelunan éh sakit. 10 Sahéé’ Allah inah mena’ penyukat ngan jah kelunan dokoo’ kelunan inah omok jam maneu’ telana’ éh ja’au. Ngan tong kelunan éh jah kepéh, Iah mena’ penyukat Néh dokoo’ kelunan inah omok bara’ ha’ Allah ngan kelunan. Ngan tong kelunan éh jah kepéh, Iah mena’ pengejam Néh, dokoo’ kelunan omok jam hun néh pengena’ éh jin Sahéé’ Allah mu’un, ngan hun néh jin pengelavo’ awah péh. Tong jah kelunan kepéh, Iah mena’ penyukat ngan néh dokoo’ kelunan inah omok pané lem jah arong ha’ éh bé’ kejam kelunan. Ngan tong kelunan éh jah kepéh, Iah mena’ penyukat Néh dokoo’ kelunan inah omok jam ha’ ané kelunan inah. 11 Bang Sahéé’ éh maneu’ kekat inah, Iah jah awah, Iah mena’ éh pekua’ pengeloo’ Néh tengéé’ ngan siget-siget kelunan. 12 Uban Kristus inah Iah barei’ jah usah kelunan, bang pinaa’ arong éh tong néh, barei’ maten ngan ojoo’ ngan gem, bang na’ péh éh pinaa’ arong kenat, usah néh jah awah. 13 Kenat péh kekat uleu’ béé pu’un petem jah usah awah. Kenat péh irah Yahudi kenat péh irah éh tengéé’ pohoo’, kenat péh kelunan ripen, kenat péh kelunan éh bé’ ripen. Sahéé’ Allah éh maneu’ uleu’ petem jah awah, uleu’ pu’un petem dalem Kristus neu’ Sahéé’ Allah éh jah awah, ngan Sahéé’ Allah inah pu’un petem dalem kenin uleu’ béé. 14 Uban bé’ éh jah awah arong tong usah, bang pinaa’ éh. 15 Hun gem lu’ bara’, Uban akeu’ bé’ ojoo’ bé’ akeu’ pu’un tong usah, bé’ éh maneu’ gem bé’ pu’un tong usah. 16 Ngan hun kelingen lu’ bara’, Uban akeu’ bé’ maten, bé’ akeu’ pu’un tong usah, bé’ éh maneu’ kelingen bé’ pu’un tong usah. 17 Hun kekat usah barei’ maten awah, kineu’ jalan kelunan menéng? Hun kekat usah barei’ kelingen awah, kineu’ jalan kelunan marek ba’oo’? 18 Bang Allah lepah maneu’ kekat néh béé tong usah, siget-siget arong néh pu’un tong usah, pekua’ éh pengeloo’ Néh. 19 Hun Néh suai kekat tong usah jah arong awah, semah usah néh? 20 Mu’un péh pinaa’ arong éh tong usah, bang usah jah awah. 21 La’ah maten bé’ omok bara’ ngan ojoo’, Akeu’ bé’ pu’un gunah tong ka’au’, ngan ulun bé’ omok pané ngan gem, Akeu’ bé’ pu’un gunah tong ka’au’. 22 Makin péh kekat arong dalem usah éh layan néh pu’un lemoo’, bang gunah mu’un éh. 23 Kekat arong dalem usah éh seneruh uleu’ kurang jian, uleu’ mihau éh mu’un, ngan kekat éh kenenyaa’ lu’ ta’an kelunan éh jah, uleu’ mavaa’ éh mu’un. 24 Bang kekat arong éh tong usah lu’ éh jian layan, bé’ lu’ mavaa’ éh kenat. Bang Allah lepah pepemung éh tong usah, ngan kekat arong dalem usah éh layan néh barei’-okoo’ kurang, Iah maneu’ éh dokoo’ kelunan mihau éh mu’un. 25 Kenat péh bé’ pu’un ineu’-ineu’ éh petengéé’ Néh tong usah, bang kekat arong tong usah nolong ngan petolong kekat-kekat éh jah. 26 Hun jebila’ usah lu’ sakit, ketem lo’ong usah lu’ sakit béé, ngan hun jebila’ usah lu’ pu’un kenajung, ketem lo’ong usah lu’ murung kenin. 27 La’ah kekat ka’ah usah Kristus, ngan siget-siget usah keh barei’ jah arong éh tong usah Néh. 28 La’ah dalem sidang, pu’un Allah lepah mena’ kuraa’ kelunan ke’ réh kereja’ tong sidang inah. Éh bu’un irah lawah Néh, éh keruwah néh, irah nabi, éh keteleu’ néh, irah guru, la’o inah kelunan éh jam maneu’ telana’ éh tejeu’, la’o inah kelunan éh peka’o kesakit kelunan palaa’ penyukat Tuhan, la’o inah irah éh nolong kelunan éh jah, ngan la’o inah kepéh kelunan éh omok pané ngan kuraa’ arong ha’ éh tejeu’. 29 Bé’ éh kekat réh béé éh lawah Tuhan, ngan bé’ éh kekat réh béé nabi, ngan bé’ éh kekat réh béé éh guru. Bé’ makat kekat réh béé éh maneu’ telana’ éh tejeu’, 30 ngan peka’o kelunan éh sakit, ngan pané lem kuraa’ arong ha’ éh tejeu’, ngan bara’ tong ha’ inah kepéh, bang jelua’ réh awah éh omok maneu’ kenat. 31 Bang jian keh mekat pitah kekat pengena’ Néh éh pelapah ja’au. Bang akeu’ juk nojoo’ jah jalan éh mu’un ngan keh, inah éh hun penika inah pu’un dalem keh.
131 Na’ péh akeu’ omok pané palaa’ kuraa’-kuraa’ arong ha’ kelunan ngan ha’ meliket péh uban pengena’ Tuhan ngan ké’, bang hun akeu’ bé’ pika kelunan, adang akeu’ barei’-okoo’ gung éh miha’ awah ngan ha’ atui awah. 2 Na’ péh akeu’ jam nebaraa’ kelunan ngan lenaa’ mu’un uban pengena’ Tuhan ngan ké’, kenat péh na’ péh akeu’ omok jam tong kuraa’-kuraa’ pengeloo’ kenin Tuhan éh pelim jin kelunan lepah rai, ngan na’ péh akeu’ pu’un pengelan tong Tuhan éh sukup mu’un ke’ ké’ omok nyohoo’ tokong piso, bang hun akeu’ bé’ pika kelunan, seleket ké’ bé’ pu’un maneu’ kenat. 3 Na’ péh akeu’ mena’ kekat livah ké’ ngan kelunan kari, ngan kejeraa’ kelunan motong usah ké’, bang hun akeu’ maneu’ kenat awah ngan bé’ pu’un penika, seleket ké’ bé’ pu’un maneu’ kenat ke’ éh. 4 Hun lu’ pika kelunan adang lu’ kebit kenin ngan nolong réh, bé’ lu’ sa’at kenin, ngan ngajung usah lu’ ngan bau kenin. 5 Hun lu’ pika kelunan bé’ lu’ mahéng ha’ ngan réh, bé’ lu’ nyelepéé’ kenin ngan suti’ kenin, bé’ lu’ mihau kesa’at réh hun réh menyat jian ngan lu’. 6 Hun lu’ pika kelunan bé’ lu’ murung hun réh sa’at barék, bang uleu’ murung hun réh pu’un teneng barék. 7 La’ah hun lu’ pika kelunan omok lu’ ngeretep dalem kekat penusah, pu’un lu’ ngelan kelunan inah pu’un teneng, ngan pu’un lu’ kebit kenin dalem kekat ineu’-ineu’ penganeu’ lu’. 8 La’ah penika éh jin Tuhan pu’un pelinguh. Pu’un kelunan éh bara’ tong kuraa’-kuraa’ tebaraa’ uban Tuhan mena’ tebaraa’ inah ngan réh, bang kekat tebaraa’ inah metok awah. Pu’un kelunan pané lem kuraa’-kuraa’ arong ha’ éh bé’ kejam kelunan, uban pengena’ Tuhan ngan réh, bang adang kekat ha’ inah juk béé kepéh. Pu’un kelunan éh jam seruh mu’un, ngan kekat penyeruh réh inah juk béé kepéh. 9 Uban pengejam uleu’ ngan tebaraa’ éh nena’ Tuhan ngan lu’, bé’ éh sukup kejam lu’ mu’un, 10 bang hun Tuhan Yésus tuai kepéh, boh kekat éh bé’ sukup kejam lu’ nah juk béé ngan omok lu’ jam éh mu’un lah. 11 Hun akeu’ anak keto pu’un akeu’ pané pekua’ kemalai irah anak, ngan kekat kenin ké’ ngan penyeruh ké’ pu’un éh pekua’ kemalai irah anak awah, bang hun iteu’ uban akeu’ lepah ja’au, kekat penganeu’ ké’ hun ké’ anak keto rai, bé’ akeu’ maneu’ éh kepéh. 12 Uban hun iteu’ bé’ jak lu’ jam mu’un tong Allah, uleu’ pu’un barei’ hun lu’ na’at usah lu’ lem pengada, bé’ éh poléng mu’un, bang temurei’ kepéh omok lu’ jam éh ngan lenaa’ mu’un. La’ah hun iteu’ pengejam ké’ bé’ éh sukup mu’un, bang temurei’ kepéh omok akeu’ jam éh lenaa’ mu’un, pekua’ Tuhan jam tong kenin ké’ hun iteu’. 13 Bang kekat éh omok petem reken, inah éh, pengelan ngan pengepelum ngan penika Tuhan lem kenin kelunan, bang éh ja’au jin belah néh, iah inah pika.
141 Uban pika éh pelapah ja’au jian keh mekat pitah penika Tuhan dokoo’ keh omok pika kelunan, ngan alaa’ pengena’ éh jin Sahéé’ Allah, pengena’ Néh éh jian mu’un, inah éh dokoo’ ka’ah omok bara’ ha’ tebaraa’ Allah ngan kelunan. 2 Kelunan éh omok pané palaa’ kuraa’-kuraa’ arong ha’ éh bé’ omok kejam kelunan, bang inah béé pengena’ Sahéé’ Allah ngan néh, bé’ éh pané ngan kelunan, bang iah pané ngan Allah awah, uban kelunan bé’ réh nesen ha’ inah, uban neu’ pengena’ Sahéé’ Allah pu’un iah bara’ tong kuraa’-kuraa’ rungen éh pelim. 3 Bang kelunan éh bara’ ha’ Tuhan ngan kelunan, jin ha’ Tuhan benara’ réh inah, pu’un éh omok ngereken pengelan réh, ngan papung kenin réh. 4 La’ah kelunan éh pané palaa’ ha’ éh bé’ kejam kelunan uban inah pengena’ Tuhan ngan néh, iah ngereken pengelan néh tengéé’. Bang kelunan éh bara’ ha’ Allah ngan kelunan éh jah, pu’un iah ngereken pengelan kekat kelunan tong sidang inah. 5 Akeu’ keloo’ ka’ah béé pané palaa’ kuraa’-kuraa’ arong ha’ éh bé’ kejam kelunan, bang pelapah jian kepéh, hun ka’ah pu’un pengena’ Tuhan dokoo’ omok bara’ ha’ Allah ngan kelunan. Uban kelunan éh omok bara’ ha’ Allah ngan kelunan, pelapah jian éh jin irah éh omok pané palaa’ ha’ éh bé’ kejam kelunan. Bang hun pu’un kelunan sinah éh omok pekelenaa’ kekat ha’ néh, dokoo’ ngereken sidang, boh éh jian. 6 O kekat padéé’ ké’, hun akeu’ tuai tavin keh ngan pané ngan keh palaa’ kuraa’ arong ha’ éh bé’ kejam keh, ineu’ gunah ké’ pané kenat hun keh bé’ nesen ha’ ké’? Bang hun akeu’ bara’ tong ineu’-ineu’ éh pepoléng Tuhan dalem kenin ké’ tengéé’ ngan bara’ tong pengeloo’ Néh ngan ha’ tebaraa’ Néh, boh éh pu’un gunah. 7 Keringot ngan sapé’ ngan kekat éh jah éh omok miha’ barei’ inah, bé’ kelunan omok jam ha’ néh hun kelunan bé’ jam metit éh mu’un. Kenat péh tong kelunan éh metit sapé. 8 Kenat péh tong kelunan éh metit gung, hun néh bé’ metit éh mu’un, bé’ kelunan jam petenup tai pekayau. 9 Kenat péh tong kelunan, kineu’ jalan réh omok nesen ha’ tebaraa’ keh hun keh nebaraa’ réh palaa’ kuraa’ arong ha’ éh bé’ kejam kelunan. Hun néh kenat adang keh pané ngan sawang awah. 10 Pinaa’ arong ha’ kelunan tong tana’, kekat ha’ néh béé pu’un sin. 11 Bang hun akeu’ bé’ jam tong ha’ kelunan inah, akeu’ péh barei’ kelunan éh tejeu’ ngan néh, iah péh tejeu’ tong akeu’. 12 La’ah uban ka’ah gahang kenin juk alaa’ pengena’ Sahéé’, jian keh pitah kekat pengena’ Néh éh omok ngereken sidang. 13 Uban néh kenat jian kelunan éh pané palaa’ kuraa’ arong ha’ éh bé’ kejam kelunan, jian iah sebayang dokoo’ iah omok alaa’ pengena’ jin Allah kepéh ke’ néh omok jam pekelenaa’ ha’ inah. 14 Uban hun akeu’ sebayang dalem jah arong ha’ éh pengena’ Allah ngan ké’, mu’un akeu’ sebayang palaa’ sahéé’ ké’, bang bé’ akeu’ nesen tong ha’ sebayang ké’ inah. 15 Hun néh kenat kineu’ éh kepéh? Adang akeu’ juk sebayang palaa’ sahéé’ ké’ ngan akeu’ juk sebayang kepéh tong ha’ éh kejam ké’. Akeu’ juk nyanyi palaa’ sahéé’ ké’ ngan akeu’ juk nyanyi tong ha’ éh kejam ké’ kepéh. 16 Hun keh sebayang bara’ jian kenin ngan Allah palaa’ sahéé’ keh awah, kineu’ kelunan éh jah omok bara’ Amin tong ha’ ko’ nah? Bé’ iah nesen ineu’-ineu’ tong ha’ ko’ sebayang nah. 17 Uban na’ péh ha’ sebayang ko’ bara’ jian kenin pu’un jian mu’un, bé’ iah nesen éh, ngan bé’ éh omok ngereken pengelan néh. 18 La’ah akeu’ bara’ jian kenin ngan Allah uban akeu’ jam pané lem kuraa’-kuraa’ arong ha’ éh pengena’ Allah ngan ké’ pelapah pinaa’ jin éh kejam ka’ah. 19 Bang dalem sidang, akeu’ pelapah keloo’ pané palaa’ lemah ateng ha’ awah éh omok kejam keh, dokoo’ ké’ nebaraa’ kelunan, jin jah poloo’ ibu ha’ éh bé’ omok kejam réh. 20 O kekat padéé’ ké’ mai keh barei’ penyeruh irah anak awah. Jian keh barei’ anak éh tejeu’ tong kesa’at, bang dalem kekat penyeruh keh jian keh barei’ kelunan éh jam seruh mu’un. 21 La’ah pu’un jah ha’ lem surat Allah, Ka’ ha’ Tuhan, Akeu’ juk pané ngan irah éh anah ké’, Akeu’ juk pané ngan réh dalem kuraa’ arong ha’ kelunan éh jah ngan neu’ kelunan éh tengéé’ pohoo’. na’ péh kenat irah éh anah Ké’ bé’ réh keloo’ menéng éh. ha’ Néh. 22 Hun néh kenat hun keh omok pané palaa’ kuraa’ arong ha’ éh bé’ kejam kelunan, bé’ éh pu’un kenat dokoo’ nolong kelunan éh ngelan tong Kristus, bang inah éh dokoo’ ngusii’ kenin kelunan éh bé’ ngelan. Bang pengena’ Allah dokoo’ keh omok bara’ ha’ Néh ngan kelunan, inah éh dokoo’ nolong kelunan éh ngelan, bé’ makat éh ngan kelunan éh bé’ ngelan. 23 Hun néh kenat hun kekat kelunan petipun boh kekat réh béé pané dalem kuraa’-kuraa’ arong ha’ éh bé’ kejam kelunan, kelunan éh bé’ pu’un pengena’ inah, ngan kelunan éh bé’ ngelan, hun réh masek kepéh ngan réh, kineu’, bé’ réh bara’ ka’ah kelunan éh palui awah kei? 24 Bang hun kekat kelunan sidang pu’un bara’ ha’ Allah, kelunan éh bé’ ngelan ngan éh bé’ pu’un pengena’ inah, hun néh masek kepéh ngan réh, adang kelunan inah omok nesen tong penyala’ néh neu’ kekat éh nenéng néh nah. Adang kekat éh nenéng néh inah omok éh petuneng kenin néh. 25 Kekat penyeruh néh éh pelim lem kenin néh lepah, pu’un éh poléng kepéh, adang iah ngerera’ ngan seva’ Allah ngan bara’, Adang Tuhan Allah pu’un pemung ngan ka’ah siteu’, ha’ néh. 26 O Kekat padéé’ ké’, kineu’ sin tong ha’ ké’ inah? Hun ka’ah petipun, jian jah usah ngevéléé’ nyanyi ngan jah usah kepéh bara’ ha’ tebaraa’, ngan jah usah kepéh bara’ ineu’-ineu’ éh pepoléng Allah ngan néh, ngan jah usah kepéh bara’ ha’ Allah palaa’ ha’ éh bé’ kejam kelunan, ngan jah usah kepéh bara’ tong sin ha’ kelunan inah. Bang tekep kekat néh béé naneu’ ke’ néh ngereken sidang. 27 Hun pu’un irah éh juk pané palaa’ ha’ éh bé’ kejam kelunan, jian duah teleu’ usah pané, mai éh pinaa’ ngan keliwah-liwah réh. Jian jah usah kepéh bara’ sin ha’ réh inah. 28 Bang hun néh bé’ pu’un kelunan sinah éh jam bara’ tong sin ha’ réh inah, mai réh pané tong petipun, jian réh pané lem kenin réh tengéé’ bara’ éh ngan Allah. 29 Jian duah-teleu’ usah éh alaa’ ha’ tebaraa’ Allah bara’ tong inah, jian irah éh jah seruh tong ha’ réh inah. 30 Bang hun pu’un jah kelunan éh jah éh pu’un petipun sinah alaa’ jah ha’ tebaraa’ jin Allah, tekep kelunan éh pané keto nah ma’o. 31 Kekat ka’ah béé omok bara’ ha’ tebaraa’ Allah ngan keliwah-liwah dokoo’ kekat kelunan omok menéng ngan pekalai ngan ngereken kenin néh. 32 Kelunan éh pu’un pengena’ Sahéé’ Allah ke’ néh omok bara’ ha’ Allah ngan kelunan, kejam néh seruh hun néh tekep néh pané ngan bé’ péh, 33 uban Allah bé’ Iah tebai lu’ dokoo’ lu’ maneu’ kekat éh bé’ tatu’ bang Iah tebai lu’ dokoo’ lu’ maneu’ éh ngan jian. Pekua’ éh pu’un dalem kekat sidang éh anah Allah. 34 jian kekat redo mokoo’ kelem mai kahut tong petipun. Barei’ ha’ lem Surat Musa pu’un bara’, Tekep irah redo ngerera’, mai réh pengeja’au. 35 Hun irah juk neteng ineu’-ineu’ péh, jian irah neteng lakei’ réh tong lamin réh tengéé’, uban bé’ tekep irah redo ulak pané tong petipun 36 Ha’ tebaraa’ Allah bé’ éh tuai jin ka’ah, ngan bé’ éh ka’ah awah éh pu’un alaa’ éh. 37 Hun pu’un jah usah éh seruh iah kelunan éh sohoo’ Tuhan ngan pu’un pengena’ Allah, jian iah nesen kekat éh senurat ké’ inah pu’un éh sohoo’ Tuhan. 38 Bang hun néh bé’ keloo’ mihau tong ha’ ké’ inah, mai keh mihau ha’ nah kepéh. 39 Uban néh kenat jian keh mekat pitah dokoo’ keh omok bara’ ha’ Allah ngan kelunan, bang mai meta’ kelunan pané palaa’ kuraa’ arong ha’ éh bé’ kejam irah. 40 Bang tekep kekat néh béé pu’un naneu’ ngan jian ngan kivu gaya’ éh tatu’.
151 O kekat padéé’ ké’, hun iteu’ akeu’ juk petesen keh kepéh tong Rengah Jian éh benara’ ké’ ngan keh lepah rai, ngan éh nalaa’ keh ngan neu’ inah pengelan keh pu’un petem. 2 La’ah Rengah Jian inah bara’ tong jalan ka’ah alaa’ urip maréng, inah ha’ tebaraa’ éh benara’ ké’ ngan keh rai. Hun keh ngelan éh mu’un adang keh alaa’ urip, inah éh hun pengelan keh rai bé’ tuyah-tuyah awah. 3 La’ah éh nalaa’ ké’ jin Tuhan rai inah éh ha’ tebaraa’ éh pelapah jian jin kekat ineu’-ineu’ éh jah, inah éh benara’ ké’ ngan keh kepéh, inah éh, Kristus matai ke’ Néh mega’ penyala’ uleu’, pekua’ éh senurat tong Iah lem surat Allah. 4 La’ah Iah tenanem réh ngan tong keteleu’ dau Allah pebetéé’ Iah jin patai Néh kepéh, pekua’ éh senurat tong Iah lem surat Allah. 5 La’ah Iah pepoléng usah Néh ngan Péterus, la’o inah Iah pepoléng usah Néh ngan jah poloo’ duah usah irah lawah Néh. 6 La’o inah dalem jah koléé’ kepéh Iah pepoléng usah Néh ngan kelunan éh kivu Éh rai, kekat réh pelapah pinaa’ jin lemah ato usah. La’ah kekat irah inah pu’un réh murip keto avéé’ hun iteu’, jelua’ awah éh lepah matai. 7 La’o inah Iah pepoléng usah Néh kepéh ngan Yakub, la’o inah kepéh Iah pepoléng usah Néh ngan kekat irah lawah Néh. 8 La’ah éh ga’ mu’un Iah pepoléng usah Néh ngan ké’ éh sa’at mu’un, pekua’ anak éh pelohoo’ mengot awah. 9 Uban akeu’ éh ra’ mu’un jin kekat lawah éh jah, éh mu’un, bé’ tekep akeu’ pu’un ngaran lawah uban akeu’ lepah peketa sidang Allah rai. 10 Bang neu’ penika Allah awah akeu’ ngelan tong Iah hun iteu’, tong penika Néh ngan ké’, bé’ akeu’ bet éh awah, bang akeu’ kereja’ mutau mu’un pelapah muruh jin kekat lawah éh jah, éh mu’un bé’ éh akeu’ tengéé’ éh kereja’, bang penika Allah éh kereja’ lem kenin ké’. 11 Hun néh séé’-séé’ péh éh nebaraa’ keh, jian péh akeu’, jian péh irah kelunan éh jah kepéh, kekat néh pu’un pekua’ awah, ngan éh omok mihin keh petem reken. 12 Hun lu’ nebaraa’ kelunan tong Kristus lepah betéé’ jin patai Néh, uban ineu’ jelua’ ka’ah bara’ bé’ kelunan omok betéé’ jin patai néh? 13 Hun kelunan matai bé’ omok betéé’, Kristus péh bé’ pu’un betéé’. 14 Ngan hun Kristus bé’ pu’un betéé’ jin patai Néh, bé’ pu’un ineu’-ineu’ éh ke’ mé’ bara’ ngan bé’ pu’un ineu’-ineu’ ke’ ka’ah omok ngelan. 15 Ha’ lu’ kenyo awah éh hun lu’ bara’ Allah pebetéé’ Kristus jin patai Néh hun Néh bé’ pebetéé’ Éh, inah éh hun néh teneng ha’ ka’ah bara’ kelunan matai bé’ omok betéé’ kepéh. 16 Uban hun kelunan matai bé’ pu’un betéé’ jin patai néh, Kristus péh bé’ pu’un betéé’. 17 La’ah hun Kristus bé’ betéé’, tuyah-tuyah awah pengelan keh, ngan ka’ah tawang dalem penyala’ keh. 18 Kenat péh kekat kelunan éh lepah matai, éh ngelan Kristus purip réh, irah péh tawang. 19 Hun lu’ bara’ lu’ ngelan tong Kristus dalem urip lu’ hun iteu’ awah, bang bé’ lu’ nesen éh mu’un, uleu’ darih awah. 20 Bang adang Kristus pu’un betéé’ jin patai Néh, inah éh telana’ kekat kelunan éh lepah matai omok betéé’ kepéh. 21 Uban barei’ pengematai pu’un neu’ jah kelunan, kenat péh pengebetéé’ jin patai pu’un neu’ jah kelunan kepéh. 22 Uban pekua’ kekat kelunan matai uban pohoo’ urip réh jin Adam, kenat kepéh kekat kelunan omok murip kepéh neu’ réh pu’un petem lem Kristus. 23 Siget-siget usah kivu jaka’ néh, bang Kristus éh betéé’ tenah, la’o inah boh kekat kelunan éh anah Néh omok betéé’ kepéh tovoo’ jaka’ Néh tuai kepéh. 24 La’o inah boh éh ga’ néh, ngan la’o Kristus ngebéé kekat ayau Néh éh pu’un penyukat hun iteu’, boh Iah mena’ kekat kelunan éh pu’un lem nihau Néh ngan Tamen Néh Allah. 25 Uban adang Kristus pu’un Pengeja’au pah avéé’ Allah nyopéé’ kekat ayau Néh, ngan maneu’ réh barei’ ra’ gem Néh awah. Inah nelana’ réh bé’ pu’un penyukat ineu’-ineu’. 26 La’ah ayau éh ga’ mu’un éh senalai Néh, inah éh pengematai. 27 Uban pu’un jah ha’ lem surat Allah éh bara’, Allah maneu’ kekat néh béé ra’ gem Néh, ha’ Néh. Bang tong ha’ néh ka’, Kekat néh béé ra’ gem Néh, bé’ éh bara’ Allah pu’un ra’ gem Kristus. 28 Bang hun kekat néh béé ngerera’ tong Kristus, boh Anak Néh ngerera’ kepéh tong Tamen Néh Allah éh lepah mena’ penyukat ngan Néh bau kekat ineu’-ineu’ péh, dokoo’ Allah pu’un bau jin kekat ineu’-ineu’ péh. 29 Kineu’ tong irah kelunan éh benatis uban kelunan matai? Kineu’ réh maneu’ kenat hun néh teneng ha’ réh bara’ kelunan matai bé’ pu’un betéé’, uban ineu’ réh benatis kepéh uban kelunan matai? 30 Ineu’ gunah améé’ ngelayau ngeretep dalem kekat penusah ngan pengeketa? 31 O kekat padéé’ ké’, siget dau akeu’ peserutaa’ ngan kekat arong penusah, bang murung kenin ké’, uban uleu’ pekua’ murip lem Kristus Yésus éh Tuhan lu’, nah ké’ bé’ menyaa’. 32 La’ah ineu’ gunah ké’ ngelawan ka’an éh luvaa’ tong Épesus siteu’ hun néh tong tana’ iteu’ awah éh pu’un oléé’ néh. Ineu’ gunah néh hun kelunan matai ngan bé’ betéé’ kepéh? Pu’un éh barei’ ha’ kelunan éh bara’ ka’, Jian tam kuman ngan mesep ngida mu’un hun iteu’, uban sagam da’, matai lah lu’, ha’ réh. 33 Mai keh tawang. Hun keh pebakéh ngan kelunan éh sa’at barék, adang barék keh sa’at kepéh. 34 To’ot keh, seruh keh, mai keh maneu’ penyala’ kepéh. Pu’un kuraa’ kelunan belah ka’ah éh bé’ jam Allah. Kineu’ ka’ah bé’ menyaa’? 35 Barang pu’un kelunan éh neteng ka’, Bang kineu’ jalan kelunan éh lepah matai omok betéé’ murip kepéh? Ngan kineu’ layan usah réh. 36 O kelunan palui, hun keh mulah tulin buaa’ tong térék keh, bé’ éh tulin néh inah éh murip bang sekaa’ néh éh murip. 37 Éh nulah keh inah, jah tulin awah, barang éh tulin parai péh, barang éh tulin buaa’ éh jah péh, bé’ éh lo’ong néh éh nulah keh. 38 Bang Allah maneu’ layan tulin buaa’ inah pekua’ éh pengeloo’ Néh tengéé’, siget-siget arong tulin néh tengéé’ layan néh. 39 La’ah pengurip kekat arong ka’an ngan kelunan tong tana’ bé’ éh pekua’. Pohoo’ kelunan tengéé’ pengurip néh jin ka’an, ka’an tana’ tengéé’ pengurip néh jin juhit, juhit tengéé’ pengurip néh jin seluang kepéh. 40 La’ah kekat éh pu’un tong langit, tengéé’ pengurip néh jin kekat éh pu’un tong tana’. Kekat éh pu’un tong langit, jian pengurip néh, ngan kekat éh tong tana’, na’ péh éh tengéé’ pengurip, jian ke’ éh. 41 Maten dau péh jian, ngan laséh péh na’ péh éh tengéé’ layan, jian ke’ éh. Kekat kenyuhai tengéé’ kepéh éh bang jian béé-béé éh. Bang jin belah kekat kenyuhai inah, pu’un éh tengéé’ layan kepéh. 42 La’ah kenat péh tong pengebetéé’ kelunan matai. Usah néh éh jin tana’ iteu’, hun néh matai gerah éh, hun néh betéé’ murip kepéh, bé’ éh omok gerah la’ah. 43 Hun néh tenanem réh, sa’at éh ngan lemoo’ éh, hun néh betéé’ kepéh, jian éh ngan gahang éh. 44 Kekat kelunan pu’un usah néh jin tana’ iteu’ awah, usah néh éh jin tana’ iteu’ jam éh matai ngan tenanem réh, bang hun néh betéé’ kepéh, bé’ éh jam matai, bé’ éh barei’ usah éh jin tana’ nah kepéh, pu’un usah réh maréng, éh bé’ omok matai uban néh sahéé’. 45 Barei’ ha’ lem surat Allah pu’un bara’, Adam, kelunan éh bu’un senuai Tuhan, usah néh jin tana’ iteu’, ha’ Néh. Bang Adam éh ga’ iteu’, inah éh Kristus, bé’ éh kelunan barei’ Adam éh bu’un nah, bang inah éh Sahéé’, ngan pu’un éh purip lu’. 46 Bé’ usah lu’ sahéé’ éh tenah, bang usah lu’ éh jin tana’ éh tenah, la’o inah boh éh usah lu’ sahéé’. 47 La’ah Adam éh bu’un, pu’un éh senuai Tuhan jin agaa’ tana’, Adam éh keruwah nah Iah pu’un jin seruga. 48 La’ah siget-siget kelunan tong tana’ pu’un usah néh pekua’ usah Adam éh senuai Tuhan jin agaa’ tana’ nah. Bang siget-siget usah éh ngelan tong Kristus pu’un éh alaa’ usah pekua’ anah Kristus. 49 Usah uleu’ iteu’ pu’un barei’ usah Adam, kenat péh uleu’ juk alaa’ usah kepéh éh pekua’ layan Iah éh jin seruga, inah éh Kristus. 50 O kekat padéé’ ké’, inah ha’ ké’, usah kelunan éh jin tana’ iteu’, bé’ omok tai lem nihau Allah, usah lu’ iteu’ éh matai borok ngan gerah bé’ omok pelinguh. 51 Menéng keh, akeu’ juk bara’ tong iteu’ éh pelim jin kelunan lepah rai. Bé’ éh kekat uleu’ pu’un matai, bang adang kekat uleu omok paléu alaa’ usah éh maréng. 52 Pu’un éh tioo paléu kenat lem jah litep ngan lem jah ki’ep awah sioo’ serupit miha’ tong ga’ dau vam. Uban hun serupit inah miha’, kekat kelunan matai pu’un betéé’ ngan alaa’ usah éh bé’ omok matai kepéh, ngan uleu’ béé pu’un paléu alaa’ usah éh maréng. 53 Uban adang pohoo’ usah lu’ iteu’ éh omok gerah, juk paléu kepéh usah éh bé’ omok gerah, ngan usah lu’ iteu’ éh omok matai, adang juk paléu kepéh usah éh bé’ omok matai. 54 Hun kekat inah pu’un paléu kenat, boh ha’ lem surat Allah pu’un avéé’ éh bara’ ka’, Allah lepah ngalah pengematai, ngan Iah menang mu’un, ha’ Néh. 55 pengematai, mah kemenang ko’? O pengematai, mah kemenang ko’ peketa kepéh, ha’ Néh. 56 La’ah pengematai alaa’ penyukat jin penyala’ ke’ néh peketa kenin kelunan, ngan penyala’ alaa’ penyukat jin Surat Musa, uban Surat Musa éh pepoléng penyala’ uleu’. 57 Bang bara’ jian kenin ngan Allah éh mihin uleu’ menang neu’ Yésus Kristus éh Tuhan lu’. 58 O kekat padéé’ éh penika ké’, uban néh kenat jian keh petem reken, mai kejeraa’ ineu’-ineu’ ngelemoo’ keh. Jian keh ngelayau mekat maneu’ kereja’ Tuhan, uban ka’ah jam kekat kereja’ keh ngan Tuhan pu’un gunah mu’un.
161 La’ah tong jalan tipun rigit dokoo’ nolong kelunan éh anah Tuhan tong Yudea, jian keh kivu pekua’ barei’ sohoo’ ké’ ngan kekat sidang tong tana’ Galatia rai. 2 Siget-siget Dau Migu, jian siget usah modoo’ jelua’ rigit kivu pekua’ éh nalaa’ néh dokoo’ néh pu’un tenéh, uban bé’ akeu’ keloo’ nyohoo’ keh tipun éh hun ké’ tuai kepéh. 3 Hun ké’ tuai kepéh boh akeu’ mena’ surat ngan irah éh kevéléé’ keh nyohoo’ réh patet rigit éh pengena’ keh inah tai Yérusalem. 4 Hun néh tekep usah ké’ péh tai, boh irah omok kivu akeu’. 5 Bang akeu’ juk tuai tavin keh la’o ké’ tai Makedonia, uban akeu’ keloo’ tai Makedonia tenah. 6 Akeu’ juk lebéé’ mokoo’ ngan ka’ah, barang kelebéé’ sioo’ genin péh, boh ka’ah omok nolong patet akeu’ semah-semah éh juk kelakau ké’ la’o inah. 7 Bé’ akeu’ keloo’ tai jam keh metok awah tovoo’ ké’ lapah sinah tai Makedonia. Akeu’ ngelan akeu’ omok mokoo’ lebéé’ ngan ka’ah temurei’ kepéh, hun néh lem pengeloo’ Tuhan kenat. 8 Bang akeu’ juk mokoo’ siteu’ tong Épesus jak, avéé’ Dau Pentakosta 9 uban na’ péh pinaa’ kelunan ngelawan siteu’, pinaa’ jalan ké’ kepéh omok maneu’ kereja’ Tuhan siteu’. 10 Hun mah Timotius avéé’ tong ka’ah, jian keh alaa’ éh ngan jian kenin, uban iah péh maneu’ kereja’ Tuhan pekua’ akeu’. 11 Mai jah usah leko iah. Bang jian ka’ah nolong patet iah lakau ngan jian kenin, dokoo’ iah omok tuai kepéh ngan ké’, uban akeu’ mena iah moléé’ ngan kekat irah padéé’ éh jah. 12 La’ah tong padéé’ uleu’ Apolos, pinaa’ koléé’ ké’ nyohoo’ éh tai ngan keh kivu irah padéé’ éh jah, bang bé’ jak iah jam hun néh tekep éh tai hun iteu’ ngan bé’ péh. Bang hun mah éh pu’un bien adang iah juk angai. 13 Jian keh mavaa’ mu’un, nekedéng petem dalem pengelan keh tong Tuhan, makang kenin mai medai, jian keh gahang. 14 Jian keh maneu’ kekat kereja’ keh neu’ penika Tuhan lem kenin keh. 15 La’ah ka’ah jam tong Stepanus ngan irah panak néh, uban irah éh bu’un ngelan tong Tuhan tong tana’ Akhaya ngan kekat kenin ngan usah réh irah nolong kelunan éh anah Allah. O kekat padéé’ ké’, akeu’ nyohoo’ ka’ah 16 jian keh kivu sohoo’ kelunan éh kenat, kenat péh ngan séé’-séé’ éh pemung kereja’ ngan réh. 17 Murung kenin ké’ uban Stepanus ngan Portunatus ngan Akaikus lepah avéé’ siteu’, réh teleu’ inah papung kenin ké’ uban ka’ah bé’ pu’un. 18 Pu’un réh ngejian kenin ké’ pekua’ barei’ réh teleu’ ngejian kenin ka’ah rai. Kelunan éh kenat tekep lu’ sepah réh. 19 Kekat sidang tong tana’ Asia bara’ tabi’ ngan keh. La’ah Akwila ngan Priska ngan kekat kelunan éh petipun sebayang tong lamin roh bara’ tabi’ dalem Tuhan ngan keh. 20 Kekat padéé’ éh pu’un ngan ké’ siteu’, bara’ tabi’ ngan ka’ah. Jian ka’ah petabi’ jah usah ngan jah usah. 21 Akeu’ tengéé’ éh nyurat ha’ iteu’. Akeu’ Paulus bara’ tabi’ ngan ka’ah. 22 La’ah kelunan éh bé’ pika Tuhan, inah éh kenukum Tuhan. Maranatha, sin néh, Tuhan juk tuai. 23 Jian penika ké’ pu’un ngan ka’ah éh murip pemung ngan Kristus Yésus 24 Penika ké’ dalem Kristus Yésus pu’un pemung ngan ka’ah béé.