TITUS

¹ Sàlà màlà Paul, Kaatù yapyoto, Jesus Christ neunokoppù winàpaino. Uyanùmùppù màlà molopai uyeunokoppù Kaatù nanùmùssan yennài pe, molopai tok yenupase yà’là kasa ailon pe kulu Kaatù ponalok pe wema’nàtok pàk. ² Màlà enpen we’nàtok, tàwàlàlà wema’nàtok po iwekkussak. Kaatù, kasei pe tùwessen pen uya, kùlepa kon tùuya teppù lùppù sàlà wema’nàtok, sàlà non molopai yawon kon wepyattà wapiya. ³ Molopai iwalai iweyu yattai màlà yenpoikappù ya wakù itekale tekale yau. Sàlà tùlùppù màlà uyemyak, molopai yekamanài iulà, Kaatù kùpùikattànài’nokon uya enupantok yawàlà. ⁴ Kaleta tùmenukayaik Titus piyak, umu kasa kulu unkupù ailon tetok ipùkkù pe we’nà nai’nùk yau. Tàwà Kaatù Kùkàipùnù kon molopai Christ Jesus kùpùikattànàippù elepai wakù pe we’nàtok molopai echitonpa pe we’nàtok tùwinàpaino ke. ⁵ Ànàmàppù uya Crete po yà’làlà kupù pa ikasa, màlà yamùk tùkussen pe lùppù nai’nùk, molopai so’chi yennài nan woton kon yanùmù pa tamù’nawolon pata yamùk yau. Enupantok uya lùppù mùttuik. ⁶ Pùsàlà kappon so’chi yennài wechi màlà wakù pe itekale, tewin neken inoppù, molopai imunkà wechi màlà ailon tawonnan pe molopai àli pe là itekale pùla, wapùla mayin yawolon pe pùla là tùwessen pe pùla. ⁷ Masapùla Kaatù wotokoyi yesak pe iwechi pàk, so’chi yennài wechi màlà ikasa pùla là tùwemassen pe pùla. Yà’làlà ànkuppaino tiyiwalà teselu yau pe pùla iwechi màlà, wapùla asse’ne tùwe’naikasen pe pùla, wapùla tùwetùnsen pe pùla, wapùla àsà pe pùla, wapùla pùlayatta pàk tùuseka’nonkasen pe pùla. ⁸ Tùutauchinpaik kappon yamùk yanùnnài pe tùwùk tak molopai màlà wakù pe nai’nùk pùnùnmanài pe. Tesak yepulu pe tùwemassen pe yà’làlà àli ànkuppai tùwettok winàpai, ikasa, wakù pe Kaatù yenu yau, molopai tùttuik tùwemassen pe. ⁹ Wakù Itekale pàk meluntà pe tùwemassen pe, ailon tetok ipàk pe enupantok uya panamantok yawàlà. Sàlà kasa tùulon kon meluntàtanpù ya màlà ailon enupantok ke, molopai nàlà iwalai pen yekama ya mùkyamlo ailon yeya’noma yai’nannùk pàk. ¹⁰ Masapùla molo tok man tukke, mùkyamlo, Kaatù Maimu yawolon kon pen molopai tùulon kon yennakannan tùusennakatok kon tùpantomù kon ke, mùkyamlo kulu Jew yamùk usattàtok pàk enupantok yawolon kon. ¹¹ Tok uselupa yeleutanùpù pe lànen iwechi màlà, masapùla kappon yamùk yaimelunpayan tok, tok munkà pàk màlà enupantok tùuya’nokon yekama tùuya’nokon ke, màlà kappon yenupatok yek pen ke, àli pàkànsau pùlayatta yepotoppe tùuya’nokon. ¹² Crete pon kàyik, tok maimu yenpoikannan tonpa, mùkkàlà uya, “Crete pon kon mùkyamlo kasei ton tàwàlàlà, molopai àsà ton kamo yamùk walainon, molopai emya’nek ton tùse eke pe tùuta’lettàsan,” teppù. ¹³ Molopai wateppù ya lùppù màlà ailon. Sàlà kasa iwechi pàkànsau tok yàulàma auya màlà àsà pe, iwalai meluntà ailon tetok wettoppe tok piyau. ¹⁴ Molopai Jew yamùk pantomù ailon pen kupù pàk tok wechi tukaik molopai enupantok mùkyamlo kappon yamùk ailon nulunpannan nùssan nekamappù pàk ailon te tok uya tukaik. ¹⁵ Tamù’nawolon màlà wakù esukenan, mùkyamlo esukenan kon pona, tùse yà’làlà wechi màlà esuken pùla mùkyamlo àli pe iwenasak kon pona molopai ailon tawonnan pen pona, masapùla tok usenumenkatok wenasak màlà àli pe molopai tok usenumenkatok yaimelunpa àli, tok nùkupùppù uya pàk. ¹⁶ Tok uya, “Kaatù ittunài iulà,” te màlà, tùse tok welaikatok uya là yenpoika pùla iwechi màlà. Akùlù ton mùkyamlo, mayin yawolon kon pen, molopai wakù ku’nài nan pen.

¹ Tùse màlà iwalai enupantok ke kappon yamùk yenupakà. ² Amoko ton nùiwa kàyik yamùk yelupakà, elannek pe, wakù pe itekale, wakù pe tùttuse tùwessan pe tok wettoppe, meluntà pe ailon tetok tùuya’nokon yau, tiuchi’nùnmasan pe molopai yà’là yekkwa là pàlikannan pe. ³ Màlà kasa làma nossan yamùk lùiwa wettoppe tok yelupakà, wakù pe Kaatù tùnamaik tùwemassan pe. Eimipponnan pe pùla nàlà, wapùla wain ke tùwetùnsan pe pùla. Wakù pàk làkku enupannan pe tok nechiik. ⁴ Ema’nomi’chi yamùk panama toppe tok uya tùtayappù kon pùnùnmannan pe molopai tùmunkà kon nàlà, ⁵ tesak kon pe, wakù pe esuken, wakù pe alikyek pe tùwe’wotokomasan pe tùwùk kon tau, tùtayappù kon yentai pùla, àli pe ànù’là uselupa Kaatù yekale winàkàik tukaik. ⁶ Màlà kasa làma umoine ton yekamappokà tùttuik tùwemassan pe tok wettoppe. ⁷ Àmàlà nàlà, tamù’nawolon yau wakù pe yentok ipàkàlà pe ekkà wakù kupù auya yawà. Ailon pe ekkà molopai tùumayintaik enupantok auya yau, eusennaka pe pùla. ⁸ Wakù ailon mayin yapulàkà, imottùnpa yentaino, eyeyaton kon wettùtoppe tùwekkuli’matok kon yak yà’làlà àli pe tùuselupatok kon kùpàkù’nokon pùla iwechi pàk. ⁹ Tepulu kenan kon, tàwà tepulu kon maimu yawàlà nechiik, molopai tamù’nawolon yau tok yauchinpai’che, àli pe tok winàkàik tùuselupaik pùla. ¹⁰ Wapùla amak pe tok kùsettak tok winàpai. Tùse làkku tàwàlà wakù pe, ailon pe tùwettok kon yenpoikaik tok, kùpùikattànài’nokon Kaatù pàk enupantok yapulàtok nettoppe tamù’nawolon yau. ¹¹ Masapùla Kaatù uya wakù pe tùwettok yenpoikasak man tamù’nawolon kon kappon yamùk wepùikattàtok ponalok pe. ¹² Màlà wakù pe we’nàtok màlà enupanài àli pe Kaatù winàkàik wema’nàtok nonka toppe, molopai wolù yeselu ànkuppai we’nàtok nonka toppe, molopai tùttuik tùwemassen pe, ikasa, wakù pe wema’nàtok Kaatù tùnamaik molopai tapulàik iwemattoppe sàlà non po, ¹³ màlà Wakù kulu Wei màmuku pàk echii’ma enpen we’nàtok ipàk. Eke Kaatù molopai Pùikattànài Jesus Christ yakkwayi usenpoika yau. ¹⁴ Iwettùlùppù màlà kùponalok kon pe, kùpùikattàse tamù’nawolon àli winàpai molopai kùkonekase esuken tùponalok kon pe kulu molopai wakù ànkuppaino kon pe kulu tùwessan pe. ¹⁵ Sàlà yamùk ke kappon yamùk yenupakà. Ayapàikketù yau tok imeluntàpakà molopai tok yàulàmakà. Ànù’là tùma’le eyentak.

¹ Àtonpa yamùk yenu yappontàkà itepulu ton yemyak tok wettùtoppe apàikkek ton yemyak, tok maimu yawàlà tok wettoppe, yà’làlà tamù’nawolon wakù kuttoppe tùuya iwekonekasak pe. ² Tok uselupa àli pe ànù’là pàk tukaik tok pàk yekamakà, tùse echitonpa pe molopai echi wechiyakon pe tok wettoppe, molopai tàwàlà ten pan, àsà pen teselu kon yenpoika toppe tok uya tamù’nawolon kon pàk. ³ Masapùla kùmyamlo nàlà wechippù pakko pe, mayin yawolon pe pùla, ennakan yapyoto pe we’nàppà’nokon màlà yà’làlà yau yauchin pe. Esseyaton pàk wema’nàppà’nokon màlà molopai kùlùmàlunnàtok yau, tùulon kon kùyeya’nomatantàu molopai tok yeya’nomappù màlà. ⁴ Tùse usentuppantok, molopai kappon yamùk pùnùnmatok Kaatù Kùpùikattànài winàpaino, usenpoikasak yau, ⁵ kùpùikattàppù kon ya màlà yà’làlà wakù wotoko kussak kùuya’nokon pàk pùla, tùse tùusentuppa pàk. Kaatù uya kùkolùkappù kon màlà Wakù Akkwalù yapàikketù winà. Emennak pe wentuntok ke lepa’nàppà ya molopai emennak pe wema’nà piyattàtok ke nàlà. ⁶ Kaatù uya Jesus Christ kùpùikattànài’nokon yeunokoppù màlà Takkwalù ke lepantoppe tùuya. ⁷ Wakù pe we’nà pen pàk Jesus uya wakù pe anùnnàppà màlà Kaatù nanùmù yek pe koneka’nàppà ya molopai tàwàlàlà wema’nàtok yepolo pàk enpen we’nàtok ke lepa’nàppà ya. ⁸ Sàlà màlà ailon kulu uselupantok. Sàlà yamùk pàk meluntà peiwa euselupa i’che wessaik, mùkyamlo Kaatù pàk ailon tawonnan wettoppe tùweyu kon tùnài nan pe wakù wotoko kuttok yak. Sàlà yamùk màlà wakù, kappon yamùk napulà pe iwechi. ⁹ Tùse pakko pe wesseippà’nàtok usàulàman pe winàpai mechiik, kaleta, penalok kon yesek wenai we’naikantok winàpai, wepanta’mantok Law pàkàlà winàpai. Sàlà yamùk màlà yà’là pen tapulàsen pen italumayippù. ¹⁰ Mùkkàlà wepantakantok pe nùkussai’nùk yekamappokà asak itekkwa là molopai nen uchi yà’làlà kùkai ipàk, tàwà nechii. ¹¹ Masapùla mùttuyaik mùkkàlà yekkwa wechi ikasa pùla molopai iteselu uya àli pe iwechi yekama. ¹² Artemas wapùla Tychicus yeunossak uya apyak yau, màipùik kulu upyak Nicopolis pona, masapùla iko pe pata wettok yattai molo wettoppe wekkussak man. ¹³ Laya Zenas molopai Apollos tawonnan ipùikattàkà kulu tok wessalattà toppe te’ma kon tawà, molopai tamù’nawàlà i’che tùwettok kon yeposak tok uya meneik. ¹⁴ Tonpawannà yamùk uya wakù wotoko kuttok yak tùweyu kon tùlù i’che we’nà man, yà’là pùnon kulu wettok i’che yau pùikattàn pàk tok wettoppe tapulàsen pe tok wemattok wettoppe. ¹⁵ Tamù’nawolon kon upyau nai’nannùk “Wakù pe là na’ messan?” nùkayan. Ina uya “Wakù pe là na’ messatàu?” tetok yekamakà ina tonpa yamùk ailon tetok yawon kon pàk. Tàwà wakù pe we’nàtok Kaatù winàpaino tamù’nawolon kon piyau nechiik.