REVELATION

REVELATION

¹ Sàlà màlà Jesus Christ nenpoikassan. Sàlà yamùk tùlùppù màlà Kaatù uya itemyak, tapyoto ton pàk tùwekkupù woton tachin pe kulu tùpo pùla yenpoika toppe ya. Christ uya tiyinchelùyi yeunokoppù màlà tapyoto John piyak, sàlà yamùk yenpoikase ipàk. ² John uya tamù’nawolon tùneneppù yekamasak man. Sàlàichi màlà inekamappù itekale Kaatù winàpaino, yenpoikasak Jesus Christ winà. ³ Tùutauchinpasen mùkkàlà sàlà kaleta yennài, molopai tùutauchinpasan nàlà mùkyamlo iwekkupù wapiya yekamasak itekale maimu yetannan. Molopai sàlà kaleta yau imenukasak maimu yawolon kon. Masapùla sàlà yamùk wekkuttok yattai weyu mei pùla man. ⁴ John winàpaino 7 pan so’chi yamùk pata Asia yawolon kon piyak: Tàwà wakù Kaatù nùkupù molopai echitonpa pe we’nàtok Kaatù winàpaino apyau’nokon nechii. Mùkkàlà sàlàpe nai’nùk, iwechippù nai’nùk molopai tùuyàpù woton pe nai’nùk winàpaino apyau’nokon nechii, molopai 7 pan kon akkwalù yamùk Kaatù yapon yemlotopo tùwessan winàpaino. ⁵ Molopai màlà wechi màlà Jesus Christ winàpaino pe. Ailon pe tùuselupasen Kaatù pàk, mùkkàlà wapiya iwuluukasak lùppù weli’nàtok yapai. Non po kin pe tùwessan yepulu pe nàlà nai’nùk. Kù’nùnmanài’nokon mùkkàlà, molopai tùmùnù winà kùpùikattàsak kon ya màlà kùmakuyi kon yapai. ⁶ Molopai kùkonekasak kon ya màlà pata yepulu pe tùkàipùnù ponalok pe, molopai tùkaatùyi ponalok pe molopai paatele yamùk pe nàlà. Jesus Christ ponalok peichi namantok molopai apulàntok molopai meluntà nechii tàwàlàlà, tàwàlàlà. Emen. ⁷ Yentàk, nùyàssan katupluk yau! Tamù’nawolon kon uya yene màlà. Mùkyamlo ipukapà’nài nan nùssan uya là. Tamù’nawolon kon kappon yamùk sàlà non pon kon usewankono’ma màlà iwenai. Ewaik, màlà kasa iwettok woton! Emen. ⁸ “Alpha iulà molopai Omega iwepyattàtok molopai iwenukattok,” tawon mùkkàlà Itepulu Kaatù, sàlàpe nai’nùk, iwechippù nai’nùk, molopai tùuyàpù woton, Mùkkàlà neken Meluntà. ⁹ Iulà mùkkàlà John, àtonpa kon molopai Jesus ponalok àpokonpan’nokon, wettalumattàntok yau molopai pàlikantok yau itepulu pe iwettok yau. Pata lùkkwà tuna iwoino Patmos po wechippù màlà masapùla Kaatù Maimu molopai ailon Jesus nenpoikappù yekamasak uya pàk. ¹⁰ Itepulu Weyu yattai Wakù Akkwalù wenappù uyesak pe màlà molopai, eke mayin yetappù uya màlà iichelupa unpoi winà wai tàwù kasa. ¹¹ “Enene imenukakà, molopai kaleta yeunokkà 7 pan pata yamùk yawon kon so’chi yamùk piyak, Ephesus, Smyrna, Pergamum, Thyatira, Sardis, Philadelphia molopai Laodicea pon kon yemyak,” teppù ya. ¹² Welattàppù màlà ànù’là uya uyelupa yense. Màlàyau yeneppù uya 7 pan kolù yapai ikonekasak lanppu yapon yamùk. ¹³ Sàlà yamùk kùlottau kàyik mumu walai wechippù satik pe, iwepontàsak kusan pon yak tùtta tepoik, molopai kolù pùlopo mùk wechippù iplopo woi. ¹⁴ Ippai wechippù aimu’ne kàtàkkwak yentai molopai itenu ulenpansak wechippù apok kasa. ¹⁵ Itta ulenpamùppù kalukuli uyatù waweitasak kasa, molopai ikalapaimasak kasa, molopai imaimu usetappù eke tuna melu kasa. ¹⁶ 7 pan chilùkà yamùk ya’chippù ya kamik pen temyatù yau, molopai yàkek asa’lon yà kasupala wepakkappù intapai. Itenpata wechippù màlà akkwa pe inakattapailà wei wechi yakkwayi kasa. ¹⁷ Yensak uya yau, wekkawai’mappù itta piyau iweli’chak kasa. Kamik pen temyatù tùlùppù ya upona molopai, “Kettalipai! Iwepyattàtok iulà, molopai iwenukattok,” teppù ya. ¹⁸ “Nulànan iulà! Welikùppù màlà, tùse yenkà, nulà wessaik tàwàlàlà molopai tàwàlàlà. Tapàikketù ke wechi nai’nùk weli’nàtok yepoi molopai iweli’chak kon patassek yepoi. ¹⁹ Enene yamùk uchi imenukakà, asaklàma sàlàpe nai’nùk molopai màlà yamùk tùwekkupù woton kon àkàmlàk,” teppù ya nàlà. ²⁰ “7 pan chilùkà yamùk kamik pen uyemyatù yau menyai’nùk molopai 7 pan kolù yapai ikonekasak lanppu yapon nekama màlà sà tonantau nai’nùk. 7 pan kon chilùkà yamùk mùkyamlo inchelù yamùk 7 pan so’chi yamùk inchelùyi yamùk, molopai 7 pan kolù yapai ikonekasak lanppu yapon yamùk màlà 7 pan so’chi yamùk,” teppù ya nàlà.

¹ “Ephesus pon So’chi inchelùyi piyak sàlà imenukakà. Sàlàichi màlà mùkkàlà 7 pan chilùkà yamùk ya’chinài kamik pen temyatù yau winàpaino itekale, mùkkàlà 7 pan kolù yapai ikonekasak lanppu yapon kùlottawà tùusasen. ² Ànkupùppù tùttuyaik sa’man pe ewe’wotokomappù molopai pàlikanài pe ewechippù. Àli ton kappon yamùk pàlika auya pùla iwechi tùttuyaik. Molopai mùkyamlo tùusesassan yeunossak kon pe yeunossak kon pe pùla echii’ma ittuppù auya. Kasei pe tok wechi ittuppù auya. ³ Pàlikanài àmàlà. Ewettalumattàppù man uyesek pàkànsau, molopai ewe’nonkasak pùla man. ⁴ Tùse sàlàichi màlà wakù pe pùla ewechi pàk usenumenkatok ewinàkàik, wapiya u’nùnmappù auya kasa u’nùnma auya pùla man. ⁵ I’nai yekkwa motapai ewennapposak ittukà! Molopai amakuyi winàpai elattàk Kaatù winàkàik, molopai wapiya ànkupùppù ikukkà. Ewelattà pùla iwechi yau, apyak uyàpù màlà molopai alanppuyi yapon mokka uya màlà ipatassek yapai. ⁶ Tùse sàlà yesak pe messaik, Nicolaitan yamùk nùkupù màlà eyewanma, uyewanma pe nàlà ikupù uya kasa. ⁷ Tàwà tùpana ke nai’nùk Wakù Akkwalù uya So’chi yamùk yelupatok yetai. Mùkyamlo entaikannan nùssan uya, nulà ku’nài kùyali yepelu nattoppe ikupù uya màlà, màlà iwattasak Kaatù tumà yau,” teppù ya. ⁸ “Smyrna pon So’chi inchelùyi piyak sàlà imenukakà. Sàlàichi màlà itekale mùkkàlà wapiyalok molopai iwenukattok, iweli’chak lùppù molopai nulà tu’ma nai’nùk winàpaino. ⁹ Atalumattàtok molopai entuppak ewechi tùttuyaik. Tùse itemaminkek kulu àmàlà. Àli ton uselupantok kon ewinàkàik tùttuyaik Jew yamùk pe tùusesassan winà tùse Jew yamùk pe pùla echii’ma. Settan ponalok kon mùkyamlo. ¹⁰ Yà’làlà ewettalumattàtok ike woton pàk kesenalippai! Masa yetakà! Makui uya eyittu màlà àtonpa yamùk tùlù tùuya patiki’chi tak winà 10 pe wei màlà ewettalumattà. Ailon pe mechiik, ewelikù ponalà, molopai wema’nàtok yalùko ke elepa uya màlà. ¹¹ Tàwà tùpana ke nai’nùk netai, Wakù Akkwalù uya so’chi yamùk yelupatok. Mùkyamlo entaikannan nùssan umatta yakon itekkwa pe weli’nàtok ke pen màlà.” ¹² “Pergamum pon so’chi inchelùyi piyak sàlà imenukakà. Sàlàichi màlà itekale, mùkkàlà, yàkek asa’lon yà kasupala yesak winàpaino. ¹³ Ewemattok yau tùttuyaik, molo Settan yapon wettok imotau. Ailon pe lùppù messaik uyesek pàk, molopai ailon tetok auya upàk nonka auya pùn, Antipas yattai, ailon kulu upàk tùuselupasen iwàsak lùppù apata yau, molo Settan wemattok motau. ¹⁴ Tùse molo man tukkan pen nà ikasa pùla ewechi pàk ewinàkàik usenumenkatok. Tùulon kon àklottau’nokon man Balaam uya enupantok ku’nài nan. Balak yenupappù ya màlà Israel payan wemakuima toppe ikuttoppe ya Kaatù pen yemyak itùsak lùppù kùyali nattoppe tok uya. Molopai tok uya nàkàlunnàtok kuttoppe. ¹⁵ Màlà kasa làma, tùulon kon molo man apyau Nicolaitan yamùk uya enupantok ku’nài nan. ¹⁶ Amakuyi winàpai uchi elattàkà! Ewelattà pùla iwechi yau, asse’ne apyak uyàpù màlà molopai mùkyamlo panta’ma uya màlà asa’lon yà kasupala unta yapai tùwepakkasen ke. ¹⁷ Tàwà tùpana ke nai’nùk, Wakù Akkwalù uya so’chi yamùk yelupatok yetai. Mùkyamlo entaikannan nùssan lepa uya màlà tonantau tùwessen kùyali mana ke. Aimu’nan tàk ke nàlà tok lepa uya màlà. Sàlà wechi màlà emennak esek menukasak ipàk, ànù’là nùttu pen tùse yeponàippù neken nùttu.” ¹⁸ “Thyatira pon so’chi inchelùyi piyak sàlà imenukakà. Sàlàichi màlà itekale Kaatù Mumu winàpaino. Itenu tùulenpansen apok kasa, itta tùulenpansen kalukuli kalapaimasak kasa. ¹⁹ Ànkupù tùttuyaik. Pùnùnmantok auya, ailon tetok auya, ewe’wotokomatok molopai pàlikanài pe ewettok. Wakù peiwa ikupù auya tùttuyaik sàlàpe wapiya ikupùppù auya yentai lùiwa. ²⁰ Tùse sàlàichi màlà usenumenkatok ewinàkàik. Mùkkàlà nossan Jezebel pàlikanài àmàlà, mùkkàlà Kaatù Maimu yenpoikanài pe tukaik tùusesassen. Enupantok tùuya ke uyapyoto yamùk lattànài mùkkàlà nàkàlunnàtok yak molopai Kaatù pen yemyak itùsak kùyali nattoppe tok uya. ²¹ Tùmakuyi winàpai iwelattàtok yattai ke ilepasak uya man, tùse elattàpai pùla man tùnàkàluntok winàpai. ²² Màlàpàk uchi yenu’ma uya màlà yapon po. Molo eke pe iwettalumattà màlà mùkyamlo tùtayappù ton pen tùpokonpe àli ku’nài nan nùssan pokonpe. Sàlà kupù uya màlà, tok welattà imakuyi yeselu winàpai pùla iwechi yau. ²³ Imunkà yamùk tùkka uya nàlà màlà, màlàyau nen uchi tamù’nawolon so’chi yamùk uya iulà pe iwechi ittu màlà, kappon yamùk yewan molopai tok usenumenkatok ittunài pe. Tamù’nawàlà amyamlo ye’ma uya màlà ànkupùppù yawàlà tewin pàk. ²⁴ Tùse amyamlo nàlà tok tonpa yamùk Thyatira pon kon uya àli enupantok ya kupùppù pùla man, Settan nùkupù tonantawon tukaik tùulon kon nesatù pàk eusenupasak kon pùla man. Tùulon tùpàlikasen tùlù uya tu’ma àpona’nokon pen màlà. ²⁵ Tùse eyenupatok kon itesak pe messatài’nùk kù’nonkatàu kulu uyàpù ponalà. ²⁶ Mùkyamlo entaikannan nùssan molopai uwotokoyi ku’nài nan nùssan iwenukapù ponalà, yemyak itepulu pe we’nàtok pata yamùk yepoi yapàikketù tùlù uya màlà. ²⁷ Màlà apàikkek yepoloppù uya màlà Ukàipùnù winàpai unepoloppù lùppù. Màlà kasa ‘meluntà tekessen ke tok yepulu pe tok wechi màlà. Molopai tok yamoklopù tok uya màlà echikili pe àinà yamoklossak kasa.’ ²⁸ Molopai ko’làmalok kaiwonok ke nàlà tok lepa uya. ²⁹ Tàwà tùpana ke nai’nùk Wakù Akkwalù uya so’chi yamùk yelupatok yetai!”

¹ “Sardis pon So’chi inchelùyi piyak sàlà imenukakà. Sàlàichi màlà itekale mùkkàlà 7 pan akkwalù yamùk Kaatù winàpaino molopai 7 pan chilùkà yamùk yesak winàpaino. Ànkupù tùttuyaik, nulà kappon yamùk uya eyittu tùse, eweli’chak man. ² Màlàpàk uchi apakakà molopai iwà’nànsak lùppù ayau imeluntàtanùkkà iwelikkapù wapiya. Masapùla yeposak uya man ànkupùppù wechi wakù pe kulu pùla Ukaatùyi yenu yau. ³ Ittukàichi eyenupappù lùppù molopai enetappù lùppù, imaimu yawàlà ekkà, amakuyi winàpai elattàkà. Aupaka pùla ewechi yau, amak kasa uyàpù màlà apyak, molopai yà’là yattai là uyàpù ittu auya pen. ⁴ Tùse tukkan kon pen Sardis pon kon uya tùpon kon kussak man wakù pe. Upokonpe tok usalà màlà, tùwepontàse aimu’nan yak, masapùla ikasa tùwessan yek pe tok wechi màlà. ⁵ Mùkyamlo entaikannan nùssan wepontà màlà tok kasa aimu’nan yak, molopai tok yesek yama uya pen màlà wema’nàtok kaletayi yapai. Ukàipùnù molopai itinchelùyi yamùk yemlotopo uponalok kon mùkyamlo te uya màlà. ⁶ Tàwà tùpana ke nai’nùk Wakù Akkwalù uya So’chi yamùk yelupatok yetai.” ⁷ “Philadelphia pon So’chi inchelùyi piyak sàlà imenukakà. Sàlàichi màlà itekale mùkkàlà wakù esukenan molopai ailon winàpaino. Mùkkàlà David ponalok ki ya’chinài, yakkokanài mùkkàlà ànù’là uya inakkokappù yakkolo pen. Yakkonài mùkkàlà, ànù’là uya inakkoloppù yakkoka pen. ⁸ Ànkupù tùttuyaik. Manatta yakkokasak uya man eyemlotopo, ànù’là uya yakkolo yentai. Emeluntàlù wechi mala lùkkwà tùse enupantok uya kupùppù auya molopai ailon pe ewechippù upàk. ⁹ Yetakà, mùkyamlo Settan ponalok kon mùkyamlo kasei ton, Jew yamùk pe tukaik tùwekkussan Jew yamùk pe pùla echii’ma. Tok kupù uya màlà tok uyàttoppe eyemlotopona, tok wepeima toppe ayapulà pe. Tamù’nawàlà à’nùnma kon uya ittu toppe tok uya. ¹⁰ Umaimu yawàlà ewessak man pàlikanài pe. Màlàpàk wakù pe nàlà àkupù uya màlà talumattàntok yattai. Nùyàssai’nùk tamù’nawolon non pona tamù’nawà kappon yamùk sàlà non pon kon ittuse. ¹¹ Asse’ne uyàpù màlà. Itesak pe ewettok kon ikuttàk wakù pe, ànù’là uya wakù entaikantok auya yepeppù alok mokka tukaik. ¹² Mùkkàlà entaikanàippù kupù uya màlà wakapu pe Ukaatùyi yùwùk tau, molopai inàntu’ma ya pen màlà. Ukaatùyi yesek menuka uya màlà ipàk, molopai Ukaatùyi patassek yesek emennak Jerusalem. Màlà nùyàssai’nùk epùn yapai Ukaatùyi winàpai. Emennak uyesek menuka uya nàlà màlà ipàk. ¹³ Tàwà tùpana ke nai’nùk, Wakù Akkwalù uya So’chi yamùk yelupatok yetai.” ¹⁴ “Laodicea pon So’chi inchelùyi piyak sàlà imenukakà. Sàlàichi màlà itekale mùkkàlà Emen winàpaino. Ailon molopai ailon yekamanài, tamù’nawolon Kaatù nùkonekassan wepyattàtok. ¹⁵ Ànkupùppù tùttuyaik. A’nek pe pùla molopai i’nàkken pùla ewechi. A’nek pe wapùla i’nàkken eyi’che wechi eppai tùse! ¹⁶ Tùse masapùla tùkuile, a’nek pe pùla wapùla i’nàkken pùla ewechi pàk, untapai eyikkwamù pàk wekkussaik. ¹⁷ ‘Tukkan itemamin iulà molopai italumayippù pen, tamù’nawàlà i’che wettok yesak,’ te là auya. Tùse entuppak sa’ne ewechi ittu auya pùla man! Yà’là pùla italumayippù pe messaik, ipon pùla molopai enpùla. ¹⁸ Eyekamappoyan iulà, kolù ye’mapa uwinàpai, apok ke tùpottàik ikonekasak kolù, temamin ke ewechi pa. Aimu’nan pon nàlà ye’makà yak ewepontà pa, molopai eyesak iwapu pùn kuli’mak nai’nùk waputtàpa. En ipik nàlà ye’makà eyenu ipik pe, wakù pe pata yenepa. ¹⁹ Tamù’nawolon kon u’nùn pe unkupù yekamapponài iulà molopai tok talumattànài nàlà. Amayintakà molopai amakuyi winàpai elattàkà. ²⁰ Yetakà! Satik pe wessaik manatta po molopai tei’tei ukayaik. Ànù’là uya umaimu yeta molopai manatta yakkokasak yau, itùwùk tak wewomù màlà. Uta’lettà màlà ipokonpe molopai iita’lettà màlà upokonpe. ²¹ Mùkyamlo àli yentaikannan nùssan kupù uya màlà upyau tok weleuta toppe uyapon po. Àli yentaikasak uya molopai sàlàpe weleutasak Ukàipùnù piyau yapon po kasa làma. ²² Tàwà tùpana ke nai’nùk, Wakù Akkwalù uya so’chi yamùk yelupatok yetai.”

¹ Sàlà yamùk tùpo tùulon we’neppà’nàtok walai yeneppù uya, manatta utakkokasak epùn po. Molopai mayin, paaka letù walai wai tàwù kasa wapiya uyelupa ya unetappù uya, “Àikkà, enukkà upyak sàlà motak molopai sàlà ye’mappùtak tùwekkupù woton yekama uya màlà àpàk,” teppù. ² Màlà yattai là Wakù Akkwalù yau wechippù. Molo epùn po aponnok wechippù. Molopai ànùk lànan wechippù ipo chichiu pe. ³ Itenpata ulenpansak wechippù wakù tàk jasper kasa molopai tùulon wakù tàk carnelian kasa. Aponnok woi melemleik wechippù lola pe imenu emerald menu kasa. ⁴ Sàlà aponnok woi 24 pe tùulon kon aponnok yamùk wechippù. Màlà yamùk po 24 pan kon eke ton tùnamasan wechippù chichiu pe. Tok wepontàsak aimu’nan yak, molopai kolù alok yau’ne tok wechippù. ⁵ Aponnok winàpai pata wekamlipù yakkwayi uyàpùppù màlà, wala’napi wettoippàtùppù, molopai mayin yamùk usetappù. 7 pan lanppu yamùk pottàsak uyatùppù aponnok yemlotopo, sàlà wechippù màlà 7 pan kon akkwalù yamùk Kaatù winàpaino kon pe. ⁶ Aponnok yemlotopo wanamali walai palau useneppù awai’ne crystal kasa. Aponnok woi ilatoi winà’ne, asakùlà’nan kon nulànan kon ànùkyan nànan wechippù en yamùk ipolon kon tok yemlotopolo molopai tok mùpoi polo. ⁷ Wapiyalok nulànan ànùk lànan useneppù palauya kasa, yakon useneppù paaka kasa, icholùwano wechippù kappon yenpata kasa itenpata, molopai ichakùlà’no useneppù umuchimà wainùnsak kasa. ⁸ Tamù’nawàlà asakùlà’nan kon nulànan kon ànùkyan nànan wechippù 6 pe’ne yapàli, molopai en yamùk wechippù tok polo, tok yapàli yo’nolo nàlà. Tùuselenpatok kon yeleutanùpùppù tok uya pen weinai wapùla ewalupàttau. “Wakù esukenan, Wakù esukenan, Wakù esukenan Itepulu Kaatù. Mùkkàlà neken Meluntà, iwechippù nai’nùk, sàlàpe nai’nùk, molopai tùuyàpù woton,” tukaik. ⁹ Mùkkàlà chichiu pe tùwessen, tùwemassen tàwàlàlà molopai tàwàlàlà, ponalok pe asakùlà’nan kon nulànan kon ànùkyan nànan uya apulàntok, namantok molopai tenki tetok yelenka ipàk kaichalà, ¹⁰ Kaatù ponalok kon 24 pan kon eke ton wepeimappù non pona mùkkàlà aponnok po chichiu pe tùwessen yemlotopona. Tok uya yapulàppù molopai inamappù mùkkàlà tùwemassen tàwàlàlà molopai tàwàlàlà. Tok uya talùko kon nonkappù aponnok yemlotopona. Molopai, ¹¹ “Ina Yepulu molopai ina Kaatùyi! Àmàlà mùkkàlà wakù. Àponalok màlà apulàntok, namantok molopai apàikkek. Masapùla tamù’nawolon yà’làlà konekappù auya, molopai eyeselu winà tamù’nawolon wechi màlà molo,” tei’ma.

¹ Kaleta yeneppù uya màlà mùkkàlà aponnok po chichiu pe tùwessen yemyatù kamik pen yau, imenukasak wechippù ese’latoi pàk, molopai iki’nàmasak wechippù màlà 7 pan ya’chittok ke. ² Molopai meluntà inchelù yeneppù uya màlà, Eke pe tùwentaimese yekamappù ya “Ànùk ken kaleta ya’chittok ikkwà’nài yek pe nai, molopai kaleta yakkokanài yek pe?” tukaik. ³ Tùse ànù’là wessepolo pùla iwechippù màlà epùn po, wapùla non po, wapùla non yo’non yau. Sàlà kaleta yakkoka woton molopai yau yene woton pùla iwechippù. ⁴ Ukalawùppù kulu màlà masapùla ànù’là kaleta yakkoka woton wessepolo pùla iwessak pàk wapùla yau yene woton pùla iwessak pàk. ⁵ Màlàyau eke ton tùnamasan tonpa uya upàk, “Kakalawùi, yenkà! Palauya Judah pa, David pa, eke kulu uya entaikansak man molopai mùkkàlà 7 pan ya’chittok ikkwà’nài yek pe man molopai kaleta yakkokanài yek pe,” teppù. ⁶ Màlàyau kaalinilu mule yeneppù uya màlà satik pe aponnok yakletau, asakùlà’nan kon nulànan kon ànùkyan nànan molopai eke ton tùnamasan wechippù iwoi. Kaalinilu mule useneppù iwàsak lùppù kasa. 7 pe iletù wechippù molopai 7 pe itenu, sàlà yamùk wechippù màlà 7 pan kon akkwalù yamùk Kaatù winàpaino pe, yeunossak kon nùssan tamù’nawolon non pona. ⁷ Kaalinilu mule uyàpùppù molopai kaleta yekkwatùppù ya mùkkàlà chichiu pe tùwessen aponnok po yemyatù kamik pen yapai. ⁸ Kaleta yekkwassak ya yau, asakùlà’nan kon nulànan kon ànùkyan nànan molopai 24 pan kon eke ton tùnamasan wepeimappù kaalinilu mule yemlotopo. Tùkaichalà’ne’nokon tùwayike’ne tok wechippù. Molopai kolù pe iwechi pùsau yamùk yanùkkasak appoi’nan tùpottàsen ke yesak pe’ne. Sàlà yamùk màlà Kaatù munkà yamùk wàpùlematok. ⁹ Tok uselenpappù emennak elen pàk, “Wakù pe messaik sàlà kaleta yekkwa’nài yek pe, molopai ya’chittok yamùk ikkwà’nài pe. Masapùla àwànàppù màlà. Molopai àmùnù ke kappon yamùk ye’mappù auya man Kaatù ponalok pe, tamù’nawolon kon kappon yamùk kùlottapai, tùpatalo’nan kon imaimu, tùpatalo’nan kon ikkok, molopai tùpatalo’nan kon kappon yamùk. ¹⁰ Kaatù wettok itepulu pe yau, paatele yamùk pe tok kussak auya man, Kaatù ponalok pe tok we’wotokoma toppe. Molopai non po itepulu pe tok wechi màlà,” tukaik. ¹¹ Uyenu tùtukkappù uya molopai tukkan kon inchelù yamùk yetappù uya. Tukke kulu tok wechippù tok ittu yentai. Aponnok woi satik pe, molopai nulànan kon ànùkyan nànan, molopai eke ton tùnamasan woi, 1000s molopai 1000s molopai 10,000 x 10,000. ¹² Tok uselenpappù eke pe, “Mùkkàlà kaalinilu mule iwàsak lùppù wakù pe man, apàikkek, mamin, pukkek pe we’nàtok, meluntà yanùnnài yek pe, apulàntok molopai namantok yanùnnài yek pe nàlà!” tukaik. ¹³ Molopai tamù’nawolon kon epùn pon kon, non pon kon, non yo’non kon, tamù’nawolon palau pon kon. Tamù’nawàlà nulànan kon uselenpa yetappù uya, “Tàwà mùkkàlà chichiu pe tùwessen aponnok po molopai kaalinilu mule piyak apulàntok, namantok, molopai meluntà pe we’nàtok nechii, tàwàlàlà molopai tàwàlàlà!” tukaik. ¹⁴ Asakùlà’nan kon nulànan kon ànùkyan nànan uya yeikuppù, “Emen,” tukaik. Molopai eke ton tùnamasan wepeimappù molopai yapulàppù tok uya.

¹ Màlàyau Kaalinilu Mule uya wapiyalok 7 pan kaleta ya’chittok tonpa ikkwàtù takkokase yeneppù uya. Màlàyau yetappù uya asakùlà’nan kon nulànan kon ànùkyan nànan tonpa uya, “Àikkà!” te, wala’napi kasa imaimu usetappù. ² Uyenu tùlùppù uya, màlàyau aimu’nan kawale wechippù molo. Ipo tùwessen uya ulapa ya’chippù, molopai alok ke ilepasak wechippù. Entaikantok yau iitàppù màlà entaikanse tùmeluntàlù ke. ³ Màlàyau Kaalinilu Mule uya yakon ya’chittok ikkwàtùppù takkokase. Molopai yakon nulànan kamo uya, “Àikkà,” te, yetappù uya. ⁴ Tùulon kawale wepakkappù, ichuweyu pe iwechippù. Ipo tùwessen lepasak wechippù meluntà ke, wepanta’mantok nettoppe ya sàlà non pona, kappon yamùk we’wàtoppe essentak. Màlàpàk ilepasak wechippù asa’lon yà eke kasupala ke. ⁵ Màlà tùpo Kaalinilu Mule uya icholùwano ya’chittok ikkwàtùppù takkokase, molopai icholùwano nulànan ànùk lànan uya, “Àikkà!” te, yetappù uya. Uyenu tùlùppù uya, màlàyau iklùn kawale wechippù molo. Ipo tùwessen wechippù wemantok ike itemyau. ⁶ Mayin uyàpù yetappù uya asakùlà’nan kon nulànan kon ànùkyan nànan winàpai kasa. Màlàyau mayin uya, “Tewinan pùsau paali, wechi màlà tewin wei we’wotokomantok yepeppù pe, molopai àsolùwawon pùsau wheat, wechi màlà tewin wei we’wotokomantok yepeppù pe. Tùse kaiwan palu molopai wain tawon kù’mattanùpùi,” teppù. ⁷ Màlàyau Kaalinilu Mule uya ichakùlà’no ya’chittok ikkwàtùppù takkokase, ichakùlà’no nulànan ànùk lànan uya, “Àikkà!” te yetappù uya. ⁸ Uyenu tùlùppù uya, màlàyau tenkoloimu’nan kawale wechippù molo. Ipo tùwessen yesettàsak wechippù Weli’nàtok tukaik, molopai iweli’chak kon patassek wechippù màlà ite’mappù pàk mei pùla. Apàikkek ke tok lepasak wechippù màlà ipùkkù pe là (1/4 pe) non yepoi, wàntoppe wepanta’mantok yai, iwan ke, palan ke, molopai àsà ton kamo yamùk non pon kon ke. ⁹ Màlàyau Kaalinilu Mule uya 5 pe iku’nài ya’chittok ikkwàtùppù takkokase. Kaatù ponalok pe tùtùsen yapon yo’no mùkyamlo iwàsak kon nùssan yakkwalù yeneppù uya, masapùla Kaatù Maimu yekamasak tok uya pàk, molopai ailon pe tok wessak yekamatok tùuya’nokon yau pàk. ¹⁰ Eke pe tok wentaimeppù, “Meluntà Itepulu Kaatù, wakù kulu esukenan molopai ailon! Yà’là yattai ken kappon yamùk sàlà non pon kon ittu auya molopai tok talumattà auya ina wàsak tok uya pàk?” tukaik. ¹¹ Tamù’nawà tok lepappù màlà aimu’nan pon ke. Molopai tok pàk yekamappù tok wàlàkkattoppe tu’ma mala là, tamù’nawolon kon tok tonpa lùssan molopai apyoto ton nùssan tùwàsan pe tùwessan, tùkka tok tùkkappù kasa ponalà. ¹² Molopai Kaalinilu Mule uya 6 pe iku’nài ikkwàtùppù takkokase. Àsà pe kulu tùlùpùnù wechippù molo, molopai wei wenappù iklùn pe, i’chin kuyalikku kasa, kapùi wenappù tamù’nawà ichuweyu pe mùn kasa. ¹³ Chilùkà yamùk wessolokappù non pona kak poi, akla ton fig yepelu wessoloka tek poi meluntà assetun uya talo’ma yau kasa. ¹⁴ Kak utamoko’mappù, kaleta utamoko’ma kasa, tamù’nawolon wùk molopai tuna iwoino pata utamappù màlà tùpatassek yapai. ¹⁵ Màlàyau kin yamùk non pon kon, eke ton kappon yamùk, soicha yamùk yepoino kon, temamin kenan kon, meluntà ton, molopai tamù’nawolon kon tùulon kon kappon yamùk apyoto yamùk wapùla apyoto yamùk pen, uso’namùppù màlà tàk yeuta yak molopai wùk pon kon tàk yamùk kùlottak. ¹⁶ Wùk yamùk molopai tàk yamùk pàk tok uya, “Ina pona ettùlùkkwakà, molopai ina yonankà aponnok po chichiu pe nai’nùk yenu winàpai, molopai Kaalinilu Mule we’naikatok winàpai! ¹⁷ Masapùla eke tok we’naikatok weyu talà man, ànùk uya ken ipàlika?” teppù tok uya.

¹ Sàlà ye’mappùtak asakùlà’nan kon inchelù yamùk yeneppù uya satik pe asakùlà’nan non pana’mu yau. Tok uya asakùlà’nan assetun non pon yeleutanùpùppù, yà’là yekkwa là assetun utasse’ma non po, wapùla tuna po, wapùla yà’là yekkwa là yei pàk tukaik. ² Molopai tùulon inchelù uyàpù yeneppù uya wei wepakka winàpai tàwàlà tùwemassen Kaatù winàpaino itapyoto ton pattàtok pokonpe. Iwentaimeppù eke pe asakùlà’nan kon inchelù yamùk yekamappo pe, mùkyamlo Kaatù nùlepassan meluntà ke non molopai tuna mattanùttoppe tok uya. ³ Inchelù uya, “Non wapùla tuna, wapùla yei yamùk kù’mattanùttàu, Kùkaatùyi yapyoto ton pàk tok yentok ipàkàlà Kaatù winàpaino tùlù tok peyeppà pàk ponalà,” teppù. ⁴ Yà’là kaichalà là mùkyamlo Kaatù winàpaino ke ipattàsak kon, wechi yekamappù màlà upàk, 144,000 pe, Israel payan yamùk yapai. ⁵ Judah payan yamùk 12,000 pe, Reuben payan yamùk 12,000 pe. Gad payan yamùk 12,000 pe, ⁶ Asher payan yamùk 12,000 pe, Naphtali payan yamùk 12,000 pe, Manasseh payan yamùk 12,000 pe, ⁷ Simeon payan yamùk 12,000 pe. Levi payan yamùk 12,000 pe, Issachar payan yamùk 12,000 pe, ⁸ Zebulun payan yamùk 12,000 pe, Joseph payan yamùk 12,000 pe, molopai Benjamin payan yamùk 12,000 pe. ⁹ Sàlà tùpo uyenu tùlùppù uya molopai tukkan kon kulu kappon yamùk yeneppù uya. Ànù’là uya yà’là kaichalà là tok wechi ittu yentaino kon. Pùsamlo wechippù màlà tamù’nawolon pata yawon kon pe, tùpatalo’nan kon ikkok yamùk, tùpatalo’nan kon kappon yamùk molopai tùpatalo’nan kon imaimu ton. Satik pe aponnok yemlotopo tok wechippù molopai kaalinilu mule yemlotopo. Tok wepontàsak wechippù aimu’nan pon yak, molopai kumya yale ya’chippù tok uya temyau’nokon. ¹⁰ Tok wentaimeppù eke pe. “Ina wepùikattàtok màlà tùuyàssen Ina Kaatùyi winàpai. Mùkkàlà aponnok po chichiu pe tùwessen, molopai kaalinilu mule winàpai,” tukaik. ¹¹ Tamù’nawà inchelù yamùk wechippù màlà aponnok woi, 24 pan kon eke ton tùnamasan woi, molopai asakùlà’nan kon nulànan kon ànùkyan nànan woi satik pe. Tok wepeimappù tenpata kon po aponnok yemlotopona molopai Kaatù yapulàppù tok uya, ¹² “Emen! Apulàntok molopai eke pe we’nàtok, pukkek pe we’nàtok, tenki tetok, namantok, meluntà, molopai apàikkek wechi màlà Kùkaatùyi kon ponalok pe tàwàlàlà molopai tàwàlàlà! Emen!” tukaik. ¹³ Eke ton tùnamasan tonpa uya uyekamappoppù, “Ànùkyan ken mùkyamlo kappon yamùk, iwepontàsak nai’nannùk aimu’nan pon yak, molopai i’nailàpai ken iyàssak kon mùkyamlo?” tukaik. ¹⁴ “Ewai’nan, tùse mùttuyaik nen,” tukaik imaimu yeikuppù uya. Molopai umaimu yeikuppù ya. “Pùsamlo kappon yamùk mùkyamlo eke talumattàntok yawàlà iyàssak kon. Tùpon kon kukasak tok uya màlà nai’nùk, molopai aimu’ne tok uya imasak kaalinilu mule mùnù ke. ¹⁵ Màlàpàk Kaatù yapon yemlotopo satik pe tok wechi màlà nai’nùk molopai iponalok pe tok we’wotokoma weinai molopai ewalupàttau tukaik itùwùk tau. Mùkkàlà tapon po nai’nùk chichiu pe wechi màlà tok yelasu pe molo tùwechi ke. ¹⁶ Tok wapàkkapù là wapùla tok we’naklipa tu’ma là pen nen uchi màlà. Wei wapùla yà’làlà a’nek uya tok pottà pen. ¹⁷ Masapùla kaalinilu mule aponnok yakletau nai’nùk, wechi nen uchi màlà màlà yesak pe. Molopai tuna tàwàlàlà tùwemassen, tùwa’munasen pen motak tok yalà ya màlà. Molopai Kaatù uya tamù’nawàlà tok yenu palu ya’munakka màlà tok yenu poi,” tukaik.

¹ Kaalinilu mule uya 7 pe iku’nài ya’chittok ikkwàssak takkokase yau, eppana iwechippù epùn po tachin pe kulu pùla. ² Màlàyau 7 pan kon inchelù yamùk Kaatù yemlotopo satik pe tùwessan yeneppù uya, tok lepasak wechippù 7 pan paaka letù lùppù walai wai yamùk ke. ³ Tùulon inchelù uyàpùppù màlà kolù pe iwechi appoi’nan tùpottàsen yen yesak molopai satik pe iweleutappù tùpottàsen yapon piyak. Eke pe appoi’nan tùpottàsen ke ilepappù, ipottà toppe ya tamù’nawolon kon Kaatù ponalok kon kappon yamùk wàpùlematok pokonpe, tùpottàsen yapon kolù pe iwechi po, aponnok yemlotopo. ⁴ Appoi’nan tùpottàsen kelechin wenukuppù màlà Kaatù ponalok kon kappon yamùk wàpùlematok pokonpe, inchelù Kaatù yemlotopo tùwessen yemyapai. ⁵ Molopai nen uchi inchelù uya appoi’nan tùpottàsen yen kolù pe iwechi yanùmùppù molopai yanùkkappù ya apok ke tùpottàsen pottàtok yapon pon ke, molopai yenu’mappù ya non pona. Molo wala’napi wettoippàtùppù màlà, pata wekamlippàtùppù àsà pe molopai tùlùpùnù utàppù. ⁶ Màlàyau 7 pan kon inchelù yamùk wekonekappù 7 pan paaka letù walainon wai yamùk tàulùnpa pàk. ⁷ Wapiyalok inchelù uya tùwayi tàulùnpappù. Tuna pun molopai apok, mùn ke yoi’masak, uyàpùppù tùwekkwamù pe non pona. Non pùkkù uyassak wechippù 1/3 pe, yuk pùkkù uyassak wechippù 1/3 pe, molopai tamù’nawàlà lola wanak uyassak wechippù. ⁸ Molopai ite’mappù pokon inchelù uya tùwayi tàulùnpappù. Eke wùk kasa tùusensen uyatù apok ke yenu’mappù màlà palau kak. Palau pùkkù wenasak wechippù mùn pe 1/3 pe. ⁹ Molopai tamù’nawolon kon nulànan kon ànùkyan nànan palau kawon kon tonpa yamùk welikùppù màlà 1/3 pe, molopai itonpa pe 1/3 pe kanau yamùk umattappù. ¹⁰ Màlàyau icholùwano inchelù uya tùwayi tàulùnpappù. Eke chilùkà ulenpansak apok uyatù kasa wepukappù kaupai, molopai iwepukappù tuna yamùk pùkkù molopai non yapai tùwepakkasan tuna kak 1/3 pe. ¹¹ Chilùkà yesek màlà Maik. Tuna yamùk pùkkù wenappù màlà maik pe 1/3 pe molopai tukke kappon yamùk u’matùppù tuna tinchise. Tok wemaipasak ike, masapùla maik pe iwenasak pàk. ¹² Màlàyau ichakùlà’no inchelù uya tùwayi tàulùnpappù. Wei pùkkù wànàppù 1/3 pe molopai kapùi pùkkù 1/3 pe, molopai chilùkà yamùk tonpa yamùk nàlà 1/3 pe, màlàpàk ipùkkù pe tok yakkwayi usà’nùpùppù, akkwa pe pùla iwechippù weinai 1/3 pe, molopai ewalupà pe kulu nàlà ewalupàttau 1/3 pe. ¹³ Màlàyau uyenu tùlùppù uya, molopai umuchimà wainùnsak kau, màlà wentaime yetappù uya eke pe, “Entuppak man! Entuppak talumattàntok wechi màlà molo! Àsà pe kulu iwechi kupù pe man mùkyamlo tamù’nawolon kon tùwemassan non po pona, mùkyamlo tùulon kon àsolùwawon kon inchelù yamùk uya paaka letù walai tùwayi kon tàulùnpa yau!” tukaik.

¹ Màlàyau 5 pe tok ku’nài uya tùwayi tàulùnpappù. Chilùkà iwepukasak kak poi non pona yeneppù uya, ilepasak wechippù i’nawon iteuta kiyikkatok ke. ² Chilùkà uya i’nawon iteuta kiyikkasak yau ikelechin wepakkappù màlà yapai, eke apok patassek yapai apok kelechin kasa. Wei yakkwayi molopai kak wewalumamùppù ewalupà pe apok kelechin i’nawon iteuta yapaino ke. ³ Kailawaimà yamùk wepakkappù apok kelechin yapai non pona, molopai tok meluntàlù ke tok lepasak wechippù malità yamùk non pon kon kasa tok wettoppe. ⁴ Wanak mattanùpù tok uya tukaik yekamappù màlà, wapùla yuk, wapùla yà’là yekkwa là yei molopai yà’là yek là. Mùkyamlo kappon yamùk ipattàsak kon Kaatù winàpaino tok yentok ipàkàlà ke tok peyeppà pàk pùnon neken mattanùttoppe tok uya. ⁵ Kailawaimà yamùk kupùppù màlà pùsamlo kappon yamùk wànà tok uya tukaik, tùse tok talumattà toppe neken tok uya 5 pe kapùi. Talumattàntok tok uya wechippù màlà malità uya chipponsak kasa. ⁶ Màlà yattai mùkyamlo kappon yamùk uya weli’nàtok iwa màlà, tùse tok uya yepolo pen. Elippai tok wechi màlà, tùse weli’nàtok wepe màlà tok winàpai. ⁷ Kailawaimà yamùk useneppù màlà kawale yamùk wekonekasak wepanta’mantok ponalok pe kasa, tok ippai po alok kolù yapai ikonekasak yeselùkan ton wechippù, molopai tok yenpata wechippù kappon yamùk yenpata kasa. ⁸ Tok mùsek wechippù uli’chami’chi mùsek kasa, tok yà wechippù palauya yà kasa. ⁹ Tok pùlopo waputtàsak wechippù sa’man ayan konekasak pùlopo wapu ke, molopai tok yapàli tàwùppù tukkan kanau kawale yamùk molopai talalan yamùk usemittàpasak wepanta’mantok yak tàwù kasa. ¹⁰ Taukù ke tok wechippù molopai chipponài pe, malità uya chippontok yekkwa. 5 pe kapùi taukù kon ke kappon yamùk talumattàtok meluntàlù yesak pe tok wechippù. ¹¹ Eke kin yesak pe tok wechippù tepoi’nokon, mùkkàlà inchelù i’nawon iteuta yennài. Hebrew maimu yau itesek màlà Abaddon, Greek maimu yau Apollyon, Mattanù’nài te ya pe iwechi. ¹² Wapiyalok àsà talumattàntok wenukapùppù, sàlà ye’mappùtak asa’lon nùppù àsà talumattàntok molo man tùuyàpù woton. ¹³ Màlàyau 6 pe iku’nài inchelù uya tùwayi tàulùnpappù. Mayin uyàpù yetappù uya Kaatù ponalok pe tùtùsen pottà yapon kolù pe iwechi winàpai, Kaatù yemlotopon pana’mu winàpai. ¹⁴ Mayin uya 6 pe iku’nài inchelù paaka letù walai yesak pàk, “Asakùlà’nan kon inchelù yamùk inonkakà eke tuna Euphrates motau ya’chichak kon!” teppù. ¹⁵ Asakùlà’nan kon inchelù yamùk nonkappù màlà, tok wekonekasak wechippù màlà sàlà ponalok pe, sàlà pata weyu yattai, sàlà kapùi yattai, molopai sàlà kili’chimo’chi pàk, itonpa pe kappon yamùk wàtoppe tùuya’nokon 1/3 pe tamù’nawolon kon kùlottapai. ¹⁶ Yà’là kaichalà là kawale pon kon tùwepanta’masan wechi yekamappù màlà upàk, 200,000,000 pe tok wechippù. ¹⁷ Molopai we’neppàttok walai unene yau kawale yamùk molopai tok pon kon yeneppù uya. Tok pùlopo wapu wechippù ichuweyu pe apok kasa, tùtalilen tàk epekkek sapphire kasa, molopai kalakkwak pe sulfur kasa. Kawale yamùk ippai wechippù màlà palauya ippai kasa. Tok mùta yapai apok wepakkappù, ikelechin, molopai sulfur. ¹⁸ Tamù’nawolon kon kappon yamùk kùlottapai (1/3) pe tok tonpa yamùk tùkkappù màlà, àsolùwawon mattanù’nàtok ke, apok, ikelechin molopai kulupala walai ikà’nùnsak tawon wepakka kawale yamùk mùta yapai ke. ¹⁹ Masapùla kawale yamùk meluntàlù wechippù màlà tok mùta yau molopai tok yaukù yau nàlà. Tok yaukù yamùk wechippù àkài yamùk kasa, tùppai ke’ne, molopai màlà yamùk yapulàppù tok uya kappon yamùk mattanùttoppe tùuya’nokon. ²⁰ Tok tonpassan apok kelechin molopai sulfur nùwànàssan pen, welattàppù pen màlà tùnkonekappù kon winàpai. Àli akkwalù molopai kolù yapai ikonekasak kon kaatù yamùk, chilùpa yapai, kalukuli yapai, tàk molopai yei yapai ikonekasak pàk tùwàpùlema kon yeleutanùpùppù tok uya pen. Yà’làlà yennài nan pen, wapùla yà’làlà yetannan pen, wapùla tùusasan pen pàk tùwepeimatok kon yeleutanùpùppù tok uya pen. ²¹ Wàntok tùuya’nokon nonkappù tok uya pen, tipiyassanù kon nà, tùnàkàluntok kon nà wapùla amak pe là tùwettok kon.

¹ Molopai tùulon meluntà inchelù wuttà epùn poi yeneppù uya. Katupluk yak iwepontàsak wechippù, molopai melemleik wechippù ippai woi, itenpata wechippù wei kasa, molopai i’chi yamùk wechippù apok pe, wakapu yamùk kasa. ² Elekkwà lùkkwà kaleta yakkokasak wechippù itemyau. Kamik pen tùtta tùlùppù ya palau pona, molopai kamik tùtta tùlùppù ya paluk pona. ³ Molopai iwentaimeppù eke pe palauya tàwù useta kasa. Iwentaime tùpo, 7 pan kon wala’napi yamùk uya yeikuppù. ⁴ Tok uselupa pe, kaleta menuka pàk wekkupùppù. Tùse mayin uselupa epùn poi yetappù uya, “7 pan kon wala’napi yamùk nekamappù ikukkà tùttusen pe pùla, molopai kù’menukai!” tukaik. ⁵ Màlàyau inchelù uneneppù satik pe palau po molopai non po uya kamik pen temyatù yenkappù epùn winàkàik. ⁶ Molopai suwa wechi màlà teppù ya Kaatù yesek yau, mùkkàlà tàwàlàlà tùwemassen, mùkkàlà epùn, non, palau, molopai tamù’nawolon màlà yamùk yawon kon konekanàippù. Inchelù uya wateppù, “Eichilà man iweyu uyàssak man!” teppù ya. ⁷ “Tùse 7 pe iku’nài inchelù uya tùwayi tàulùnpasak yau nen uchi màlà, Kaatù uya màlà tonantau tùnkupù yenuka’nùpù màlà, tapyoto ton tùmaimu yenpoikannan pàk yekamappù tùuya kasa,” teppù ya nàlà. ⁸ Màlàyau mayin iichelupa unetappù epùn poi uya uyelupa tu’mappù, “Itàkà molopai màlà yakkokasak kaleta yekkwatta inchelù satik pe nai’nùk palau po molopai non po yemyapai,” tukaik. ⁹ Utàppù inchelù piyak molopai yekamappoppù uya elekkwà lùkkwà kaleta tùtoppe ya uyemyak. “Yekkwakkà molopai inakkà, so’li pe iwena màlà àlotta yau, antau assekku pe iwechi màlà wan kasa,” teppù ya upàk. ¹⁰ Elekkwà lùkkwà kaleta yekkwatùppù uya itemyapai molopai inapùppù uya, iwessonpappù assekku pe wan kasa untau. Tùse yeuno’masak uya tùpo, so’li pe iwenappù ulotta yau. ¹¹ “Tewin itekkwalok pe tu’maichi Kaatù Maimu menpoikatukkaik tukkan kon kappon yamùk pàk, pata yamùk non pon yawolon kon pàk, tùpatalo’nan mayin yamùk, molopai kin yamùk pàk,” teppù màlà upàk.

¹ Ittutok ike yei ke ulepappù màlà, tekessen ke, molopai yekamappù upàk, “E’wuluukakà molopai Kaatù yùwùk ittukà molopai Kaatù ponalok pottàtok patassek, molopai yà’là kaichalà là mùkyamlo Kaatù yùwùk tau yapulànnan wechi ittukà,” teppù màlà upàk. ² “Tùse polopo Kaatù yùwùk woi mùnàmàik. Kichittui, masapùla itùsak pe iwechi nai’nùk Jew yamùk pen yemyak. Pùsamlo uya wakù patassek, Jerusalem, wasappàtù màlà 42 pe kapùi. ³ Asa’lon kon uyekamannan yapàikketù ke tok lepa uya màlà. Tok wepontàsak wechi màlà usewankono’man yattaino pon yak, molopai Kaatù yekale yekama tok uya màlà 1260 pe wei,” teppù màlà upàk. ⁴ Asa’lon kon ekamannan màlà asa’lon olive yek yamùk molopai asa’lon lanppu yamùk satik pe non yepulu Kaatù yemlotopo tùwessan. ⁵ Ànù’là wechi tok talumattài’che yau, apok tùwepakkasen tok mùtapai, molopai teyaton kon mattanù’nài nan mùkyamlo, molopai sàlà kasa là ànù’là tok talumattài’che tùwessen wànà màlà. ⁶ Tapàikketù kenan kon mùkyamlo kak yakkotoppe, konok pùla iwettoppe Kaatù Maimu yenpoika tùuya’nokon yawàlà. Tapàikketù kenan kon nàlà mùkyamlo tuna yamùk yepoi, mùn pe iwena toppe. Molopai non pona yà’là yekkwa ton nà palan nettok tok uya ike, ànkuppai tùwettok kon kasa. ⁷ Tùnekama kon yekamakassak tok uya yau, àsà ene tùuyàssen i’nawon iteuta yapai uya tok panta’ma màlà. Tok yentaika ya màlà molopai tok wànà ya. ⁸ Molopai tok yàkàpù wechi màlà eke pata yawon asantau, tok Yepulu pukapàtùppù pulusuk pona motau. Màlà pata yesek màlà Sodom molopai Egypt nekama walai. ⁹ Kappon yamùk ànùk yekkwa ton nà, tamù’nawolon kon pata kok yapaino kon, tùpatalo’nan mayin yapaino kon, molopai kappon yamùk pata yamùk yawolon kon, uya tok yàkàpù yene màlà àsolùwau wei. Molopai iwemassak pe inakattapailà wei wena tepose. Molopai là tok wu’nattà toppe tok uya ikupùppù pen. ¹⁰ Kappon yamùk non pon kon utauchinpa màlà pùsamlo asa’lon kon weli’chak pàk. Panappe tok wechi màlà molopai lepantok yeunoko tok uya màlà, mùklà uya tùulon piyak tukaik, masapùla mùkyamlo Kaatù Maimu yenpoikannan uya eke pe kulu wettalumattàntok nessak non pon kon kappon yamùk pona pàk. ¹¹ Màlà tùpo, àsolùwau wei molopai iwemassak pe inakattapailà wei wenatok yattai we’netukkantok uyàpùppù màlà Kaatù winàpai molopai tok yak iwewomùppù. Molopai tok we’wuluukappù, tamù’nawolon kon tok yennài nan nùssan wettalipappù kulu màlà. ¹² Màlàyau asa’lon kon Kaatù Maimu yenpoikannan uya eke mayin yetappù epùn poi tùpàkù’nokon wate ya, “Enuttàk kon sàlà motak!” te ya. Teyaton kon uya yene tùse tok wenukuppù katupluk yau epùn pona. ¹³ Màlà yattai là àsà pe kulu tùlùpùnù wechippù molo, ipùkkù pe là 1/10 pe pata umattappù màlà, molopai tamù’nawàlà tùlùpùnù nùtùkkassan kappon yamùk wechippù 7000 pe. Tok tonpassan wettalipasak wechippù kulu molopai epùn pon Kaatù wettok eke pe yapulàppù tok uya. ¹⁴ Yakon àsà talumattàntok nenukappàssan, tùse yenkà! Icholùwano àsà talumattàntok uyàpù màlà tachin pe kulu tùpo pùla. ¹⁵ Màlàyau 7 pe iku’nài inchelù uya tùwayi tàulùnpappù, molopai eke pe mayin yamùk uya epùn poi, “Itepulu pe we’nàtok non pon kon yepoi Kùyepulu kon Kaatù molopai ineunokoppù Christ ponalok pe nen uchi man, molopai itepulu pe iwechi màlà tàwàlàlà molopai tàwàlàlà!” teppù. ¹⁶ Molopai nen uchi 24 pan kon eke ton tùnamasan, tapon kon po chichiu pe tùwessan Kaatù yemlotopo wepeimappù tenpata kon po molopai Kaatù yapulàppù tok uya, ¹⁷ “Tenki nùkayan ina àpàk Itepulu Kaatù Meluntà, Mùkkàlà sàlàpe nai’nùk molopai iwechippù nai’nùk! Masapùla eke emeluntàlù yapulàsak auya pàk, molopai ewepyattàsak man itepulu pe ewechi pàk! ¹⁸ Pata yamùk wolù yawon kon wanùssak wechippù we’naikantok ke. Masapùla ewe’naikatok uyàssak man, molopai iweli’chak kon ittutok yattai. E’mantok tùtok auya yattai amaimu yenpoikannan ayapyoto yamùk yemyak. Molopai tamù’nawolon kon kappon yamùk àponalok kon, eke ton molopai echikili ton, tamù’nawolon kon anamannan yemyak. Non mattanù’nài nan mattanùttok yattai man!” tukaik. ¹⁹ Kaatù yùwùk epùn pon utakkokasak wechippù, molopai wakù ikupù tùuya tetok Kaatù uya yen useneppù Kaatù yùwùk tau. Màlàyau pata wekamlipù yakkwayi wechippù molo, yà’là lànan tàwù, wala’napi wettoippàtù, tùlùpùnù molopai tukke eme’nek ton tuna pun.

¹ Molopai nen uchi eke yentok ipàkàlà usenpoikappù epùn poi. Nossan wechippù màlà molo, iwepontàsak wechippù wei ke molopai kapùi wechippù itta yo’no, molopai 12 pan chilùkà yamùk ipokon alok wechippù ippai pàk. ² Monok pe iwechippù iwentu winàkàik molopai iwe’chi’mosak utaimelunpa wentaimeppù. ³ Tùulon yentok ipàkàlà usenpoikappù màlà epùn po. Molo iwechippù Eke, ichuweyu lùmà ulupelu, 7 pe ippai wechippù molopai 10 pe iletù yamùk, molopai alok wechippù ippai yamùk po. ⁴ Taukù ke itonpa pe chilùkà yamùk pàlàkappù ya kak poi 1/3 pe, molopai icholokappù ya non pona. Nossan mule ke iwentu winàkài’no yemlotopo iwechippù, imle yantoppe tùuya iwentukapù pe. ⁵ Màlàyau iwentuppù walawok pe, tamù’nawolon pata yamùk yepoi itepulu pe tùwechi woton ke, sa’man ayan pun tekessen ke. Tùse mule yanùmùppù màlà molopai yalàppù Kaatù piyak molopai yapon piyak. ⁶ Nossan wepeppù wontaik yak, molo Kaatù uya ipatassek woton konekasak wechippù, imainanpatok yau woton 1260 pe wei. ⁷ Màlàyau wepanta’mantok wepyattàppù epùn po. Michael molopai yo’non kon inchelù yamùk uya ulupelu panta’mappù, mùkkàlà uya nàlà tok panta’mappù tiyinchelùyi yamùk pokonpe. ⁸ Tùse ulupelu yentaikappù tok uya, molopai ulupelu molopai itinchelùyi yamùk kupùppù epùn po tok wettoppe pen nen uchi màlà. ⁹ Eke ulupelu lùmà yenu’mappù màlà, mùkkàlà penalok àkài, Makui wapùla Settan itesek, tamù’nawolon kon kappon yamùk non pon kon yennakanàippù. Yenu’mappù màlà non pona tamù’nawàlà itinchelùyi yamùk pokonpe. ¹⁰ Màlàyau nen uchi eke mayin yetappù uya epùn po. “Sàlàpe Kaatù winàpaino wepùikattàntok molopai meluntà uyàssak man! Molopai Kùkaatùyi wettok Itepulu pe! Molopai Christ, ineunokoppù wettok apàikkek pe! Masapùla kùtonpa kon yamùk winàkàik àli pe iichelupasak kon, Kaatù yemlotopo wei kaichalà molopai ewalupà kaichalà, yenu’mappù man epùn yapai,” te ya. ¹¹ “Tok uya yentaikasak man kaalinilu mule mùnù winà, molopai ailon tùnekamappù kon Kaatù yekale winà. Tok uya tùwemattok kon pùnùnmappù pen. Màlàpàk tùwelikù kon pàk tok usenalippa pùla iwechippù. ¹² Màlàpàk uchi atauchinpakà epùn, molopai amyamlo tamù’nawolon kon molo yau tùwemassan! Tùse àsà pe iwechi màlà non molopai palau pona! Masapùla Makui wuttàsak man apyakù’nokon. Molopai iwanùssak man we’naikantok ke. Masapùla mala kulu tùweyu wà’nànsak ittuyan,” teppù ya. ¹³ Non pona tenu’masak ittusak tùuya yau, ulupelu uya mùkkàlà nossan walawok muleppù ke iwentusak lùppù wenaimappù imattanùsse. ¹⁴ Nossan lepappù màlà asa’là eke umuchimà yapàli ke, iwainùntoppe tùpatassek wontaik yawon yak. Molo imainanpa toppe i’nai pàkàlà là molopai màlà yentak miyaiwa molopai màlà yentak mala là ipona, àkài uya yepolo tukaik. ¹⁵ Màlàyau àkài uya tuna ikkwamùppù tùnta yapai tùwu’masen tuna kasa nossan ye’mappù pàk, tuna’ma uya yatoppe. ¹⁶ Tùse non uya nossan pùikattàppù, iwentakali’mappù molopai tuna ulupelu mùta yapai iyàssak lùppù yeuno’mappù ya. ¹⁷ Màlàyau ulupelu we’naikasak kulu wechippù màlà nossan pàk. Molopai iitàppù imle tonpassan panta’mase, tamù’nawolon kon Kaatù uya enupantok maimu yawolon kon, molopai ailon Jesus winà yenpoikasak lùppù pàk ailon pe tùwessan panta’mase. ¹⁸ Molopai ulupelu wechippù satik pe palau yena po.

¹ Màlàyau àsà ene usenpo palau kapai yeneppù uya. 10 pe iletù wechippù molopai 7 pe ippai, alok wechippù iletù yamùk pàk ikaichalà. Àli esek Kaatù talumattàtok menukasak wechippù ikaichalà ippai yamùk pàk. ² Mùkkàlà, uneneppù wechippù eke kaikuchi kasa. Itta wechippù bear pùta kasa molopai palauya mùta kasa inta. Ulupelu uya ilepasak wechippù tùmeluntàlù ke, tapon ke molopai eke tapàikketù ke. ³ Molopai ippai tonpa wàsak wechippù telikkase kasa, tùse àsà iwàsak elikkanài yek uchipittàsak wechippù. Tamù’nawolon kon non pon kon kappon yamùk usenumenkasak kulu wechippù molopai iwenaimappù tok uya. ⁴ Kappon yamùk uya ulupelu yapulàppù, masapùla tapàikketù tùsak ya itemyak pàk. Tok uya nàlà yapulàppù, “Ànùk ken pùsàlà àsà ene walai? Ànùk wepanta’ma ken iwinàkàik?” tukaik. ⁵ Àsà ene lepasak wechippù ànùk yentai uselupantok ke, Kaatù pàk àli pe mottùnpan pe iichelupa toppe, molopai 42 pe kapùi tapàikketù yapulà toppe ya ilepappù ya. ⁶ Kaatù pa’nùpù pàk iwepyattàppù, molopai itesek nàlà, molopai patassek iwemattok yau molopai tamù’nawolon kon epùn po tùwemassan. ⁷ Kaatù ponalok kon kappon yamùk pokonpe iwepanta’ma toppe ikussak wechippù molopai tok yentaika toppe ya. Apàikkek ke ilepasak wechippù tamù’nawàlà tùpatalo’nan ikkok yamùk, tùpatalon kon kappon yamùk, tùpatalo’nan mayin molopai kappon yamùk pata non po nai’nannùk yepoi. ⁸ Tamù’nawolon kon non po tùwemassan uya màlà yapulà, mùkyamlo kappon yamùk itesek imenukasak kon wema’nà kaletayi yau pen uya. Màlà kaleta màlà kaalinilu mule iwàsak lùppù non koneka wapiya ponalok. ⁹ “Tùpana ke nai’nùk, tàwà netai. ¹⁰ Ànù’là a’chintok tak tùutàsen yek utà màlà a’chintok yak. Ànù’là asa’lon yà kasupala ke tùwàsen yek pe nai’nùk wànà màlà asa’lon yà kasupala ke. Sàlà màlà pàlikantok molopai ailon tetok i’che tùwessen Kaatù ponalok kon kappon yamùk pona,” teppù ya. ¹¹ Molopai nàlà tùulon àsà ene wepakka non yapai yeneppù uya màlà. Asa’là iletù iwechippù kaalinilu mule letù kasa, molopai iichelupappù ulupelu kasa. ¹² Eke apàikkek wapiyalok àsà ene yapàikketù yapulàppù ya itemlotopo. Non molopai tamù’nawolon kon yau tùwemassan yeka’nonkappù ya wapiyalok àsà ene yemlotopo tok wepeima toppe, mùkkàlà àsà pe elikkanài yek pe iwàsak uchipittàsak lùppù. ¹³ Yakon ene uya eke ton tensen yekkwa pen kupùppù. Apok wuttà toppe kaupai non pona ikupùppù ya, kappon yamùk uya yene tùse. ¹⁴ Tamù’nawolon kon kappon yamùk non po tùwemassan yennakappù ya tensen yekkwa pen kuttok tùuya winà, tùlepatok ikuttoppe tùuya wapiyalok àsà ene yemlotopo. Pùsàlà yakon àsà ene uya tamù’nawolon kon kappon yamùk non pon kon pàk yekamappù, wapiyalok àsà ene kasa ikoneka toppe tok uya, yapulà pe mùkkàlà iwàsak lùppù asa’lon yà kasupala ke tùse iwennasak lùppù. ¹⁵ Yakon àsà ene lepasak wechippù apàikkek ke we’netukkantok tùtoppe ya wapiyalok àsà ene kasa ikonekasak yak iichelupa toppe molopai tamù’nawolon kon tapulànnan pen wàtoppe ya. ¹⁶ Mùkkàlà uya tamù’nawolon kon kappon yamùk yeka’nonkappù, eke ton molopai echikili ton, temamin kenan kon molopai itemamin pùnon, apyoto ton molopai apyoto ton pen, tok pattà toppe kamik pen tok yemyatù pàk wapùla tok peyeppà pàk. ¹⁷ Ànù’là uya yà’làlà ye’ma wapùla ichilanma yentai iwechippù màlà, sàlà pattàntok àsà ene yesek wapùla inonpayi pùla echii’ma. ¹⁸ Sàlà màlà pukkek i’chelok. Ànù’là ittunài pe nai’nùk yà’là tetok là àsà ene uya pe pattàntok ittui, masapùla inonpayi màlà kappon nonpayi pe tùwessen. Inonpayi màlà 666 tawon.

¹ Màlàyau uyenu tùlùppù uya màlà, molopai uyemlotopo iwechippù kaalinilu mule satik pe Zion Tùpù po, ipyau tukkan kon kappon yamùk wechippù, 144,000 pe, itesek yesak ton molopai Ikàipùnù yesek menukasak ipeyeppà pàk ton. ² Yà’là lànan tàwù yetappù uya màlà epùn poi eke tuna melu kasa tùusetasen, molopai wala’napi wettoikkwa kasa. Màlà itàwù uneta usetappù màlà kappon yamùk uya tewa ke’nan tùwayi kon tàulùnpa kasa. ³ Satik pe tok wechippù màlà aponnok yemlotopo, asakùlà’nan kon nulànan kon ànùkyan nànan molopai Kaatù ponalok kon wapiyalok kon kappon yamùk 24 pan kon yemlotopo. Molopai emennak elen yelenpappù tok uya ànù’là usenupappù ipàk pen tùse mùkyamlo 144,000 pan kon neken ye’masak kon non poi nùttu. ⁴ Pùsamlo mùkyamlo kàyik yamùk esuken iwekkussak kon, uli’chan yamùk là pokonpe iwessak kon pen. Tok uya kaalinilu mule wenaima màlà i’nailà là iità yau. Tok ye’masak wechippù màlà kappon yamùk kùlottapai molopai wapiya tùtùsen pe tok wechippù Kaatù yemyak molopai nen uchi kaalinilu mule yemyak. ⁵ Tok mùta yau kasei là pùla kulu iwechippù màlà, iwalai pen nà pùla. ⁶ Màlàyau tùulon inchelù wainùnsak kau kak yau yeneppù uya tàwàlàlà tùwemassen wakù itekale yesak pe. Inekama non pon kon kappon yamùk pàk, tamù’nawolon kappon yamùk pata yamùk yawolon kon, pata kok molopai tùpatalo’nan mayin yamùk molopai kappon yamùk pàk. ⁷ Eke pe wateppù ya, “Kaatù inamatàk kon, molopai eke pe iwettok yapulàtàk kon! Masapùla kappon yamùk ittutok ya yattai uyàssak man. Molopai epùn, kak, non, palau, molopai non yapai tùwepakkasan tuna yamùk konekanàippù yapulàtàk kon!” teppù ya. ⁸ Yakon inchelù uyàpùppù ite’mappù pàk, “Iwekkawai’masak man! Eke Babylon wekkawai’masak man! Wain tùwuku inchi toppe tamù’nawolon pata yamùk yawon kon kappon yamùk uya ikupùppù ya. Sàlàichi wechippù màlà wain àli pe tùtayappù pen pokonpe iwettok yeuku!” tei’ma. ⁹ Icholùwano inchelù uya wapiyalok kon asa’lon kon wenaimappù, “Ànù’là àsà ene molopai mùkkàlà kasa ikonekasak lùppù yapulànài molopai pattàntok ya yanùnnài tùpeyeppà pàk wapùla temyatù pàk wechi molo yau. ¹⁰ Mùkkàlà uya nàlà màlà wain Kaatù we’naikatok yeuku inchi. Tùwe’naikatok kokù yak inmappù meluntà kulu wain esukenan yà’là yekkwa là ke yoi’mappù pùn. Ewaik, mùkkàlà sàlà ku’nàippù talumattà màlà apok molopai kulupala kasa tùkà’nùnsen yau, wakù ton inchelù yamùk molopai kaalinilu mule yemlotopo,” teppù ya eke pe. ¹¹ “Tok talumattàtok apok kelechin wechi màlà tùwenuku pàk tàwàlàlà molopai tàwàlàlà. Wàlàkka’nàtok pùla iwechi màlà weinai wapùla ewalupàttau, mùkyamlo àsà ene molopai mùkkàlà kasa ikonekasak yapulà pàk iwessak kon, molopai ànù’là itesek ke ipattàsak lùppù ponalok pe,” teppù ya nàlà. ¹² Sàlà màlà pàlikantok i’che tùwessen Kaatù ponalok kon kappon yamùk ponalok pe iwechi màlà, mùkyamlo Kaatù uya enupantok maimu yawàlà tùwessan molopai ailon pe tùwessan Jesus pàk. ¹³ Màlàyau mayin yetappù uya epùn poi, “Sàlà imenukakà, Tùutauchinpasan mùkyamlo sàlà motapai tùweli’chan Itepulu Kaatù wotokoyi yau,” te ya. “Ewaik kulu nen,” nùkayan Wakù Akkwalù. “Wàlàkka’nàtok yepolo tok uya màlà sa’man pe tùwe’wotokomatok kon winàpaino, masapùla tùwe’wotokomatok kon yepeppù yalà tok uya màlà ta’là’nokon.” ¹⁴ Màlàyau uyenu tùlùppù uya, molopai aimu’nan katupluk yeneppù uya. Molopai katupluk po chichiu pe Kàyik Mumu kasa tùusensen wechippù, kolù alok ke iitalùkottàsak molopai yàkek kasupala walai woyoi pan itemyau. ¹⁵ Molopai nàlà tùulon inchelù wepakkappù Kaatù yùwùk tapai molopai iwentaimeppù eke pe mùkkàlà katupluk po chichiu pe tùwessen pàk, “Akasupalayi yapulàkà molopai ipànsak ipilikkà, masapùla ipilittok yattai uyàssak man, non wappùsak man ipànsak pilittok pe!” tukaik. ¹⁶ Màlàyau mùkkàlà katupluk po chichiu pe tùwessen uya woyoi pan tùkasupalayi wùuwùumappù non yepoi molopai non po ipànsak pilipùppù ya. ¹⁷ Molopai nàlà tùulon inchelù wepakka Kaatù yùwùk epùn pon tapai yeneppù uya, molopai mùkkàlà tu’ma wechippù màlà yàkek kasupala woyoi pan itemyau. ¹⁸ Molopai tu’ma tùulon inchelù apok yesak uyàpùppù, Kaatù lepatok pottàtok patassek winàpai. Iwentaimeppù màlà eke pe mùkkàlà inchelù yàkek kasupala woyoi pan yesak pàk, “Akasupalayi yapulàkà molopai tamùkke’ne nai’nùk grape yamùk ipilikkà non pon itek poi, masapùla iwappùsak man,” tukaik. ¹⁹ Màlàpàk inchelù uya tùkasupalayi wùuwùumappù non polo, grape yattàppù ya itek poi, molopai yenu’mappù ya eke Kaatù we’naikatok yen yak. ²⁰ Grape polo usanàppà ikaklà pe màlà ikaklàtok yau pata yena po, molopai mùn uyàpùppù iten yapai, iwu’mappù eke pe mei 1600 kaichalon ittutok ike pàkàlà ikusanù molopai ikupai pe kawale pùmù yawàlà.

¹ Màlàyau tùulon eke molopai enumenkanài, tensan yekkwa pen yeneppù uya màlà epùn po, 7 pe inchelù yamùk wechippù màlà, 7 pan talumattàntok pokonpan kon. Sàlà yamùk màlà tewinan nùppù talumattàntok, masapùla màlà yamùk ke Kaatù we’naikatok wenukapù màlà. ² Molopai awai’nan pottolo walai palau yeneppù uya, yoi’masak apok ke. Yeneppù uya tu’ma mùkyamlo àsà ene yentaikannan nùssan molopai mùkkàlà kasa ikonekasak, molopai mùkkàlà itesek nonpayi itùsak lùppù yentaikannan nùssan. Satik pe tok wechippù palau wanamali kasa tùusensen piyau, tewa ke’nan tùwayi kon ya’chi pàk tok wechippù màlà Kaatù uya tùlepatok kon. ³ Moses, Kaatù yapyoto yelemu pàk tok uselenpappù molopai kaalinilu mule yelemu pàk, “Itepulu Kaatù, Mùkkàlà neken Meluntà. Eke molopai wakù kulu kupùppù auya man! Tamù’nawolon pata yamùk Kinù, ikasa molopai ailon pe eyeselu man! ⁴ Ànùk usenalippa pen ken àpàk Itepulu? Molopai ànùk uya ken eyesek yapulàtok nepù? Masapùla àmàlà neken mùkkàlà Wakù esukenan. Tamù’nawolon patassek yamùk yawon kon uyàpù màlà ayapulàse eyemlotopo, masapùla wakù iwalai ànkupù usenpoikasak man,” tukaik. ⁵ Sàlà tùpo epùn pon Kaatù uya ikupù uya màlà tetok yen patassek yeneppù uya màlà. ⁶ 7 pan kon inchelù yamùk 7 pan tewin itekkwalok lùppù talumattàntok pokonpan kon wepakkappù Kaatù yùwùk tapai, tok wepontàsak wechippù esukenan molopai aimu’nan linen pon yak, molopai liuliupan kolù ittawolon pùlopo mùk wechippù tok pùlopo woi. ⁷ Asakùlà’nan kon nulànan kon ànùkyan nànan walai tonpa uya 7 pan kon inchelù yamùk lepappù màlà 7 pan kolù pùsau yanùkkapàssak Kaatù we’naikatok ike, ke. Kaatù tàwàlàlà molopai tàwàlàlà tùwemassen. ⁸ Kaatù yùwùk wanùssak wechippù màlà apok kelechin ke, eke pe Kaatù wettok molopai imeluntàlù winàpaino ke. Ànù’là wewomù Kaatù yùwùk tak pen, 7 pan talumattàntok nessak 7 pan kon inchelù yamùk uya wenukapù ponalà.

¹ Màlàyau eke mayin uselupa Kaatù yùwùk tapai 7 pan kon inchelù yamùk pokonpe yetappù uya, “Itàtàk kon molopai 7 pan pùsau yawon Kaatù we’naikatok ikkwantantàk non pona!” tukaik. ² Wapiyalok inchelù utàppù molopai tùssawù yawon ikkwamùppù ya non pona. Àsà molopai e’nek sukkwek yamùk usenpoikappù mùkyamlo àsà ene uya pattàntok yesak ton molopai mùkkàlà kasa ikonekasak yapulà pe iwepeimasak kon pàk. ³ Màlà ye’mappùtak yakon inchelù uya tùssawù yawon ikkwamùppù palau kak. Tuna wenappù iweli’chak kappon mùnù kasa, molopai tamù’nawàlà nulà palau kau tùwessan welikùppù màlà. ⁴ Molopai nàlà icholùwano inchelù uya tùssawù yawon ikkwamùppù tuna yamùk kak molopai non yapai tùwepakkasan tuna kak, molopai mùn pe iwenappù. ⁵ Inchelù tuna yesak pe tùwessen uya, “Iwalai àmàlà, sàlà yamùk talumattà pàk, Àmàlà Mùkkàlà wakù esukenan kulu, sàlàpe nai’nùk molopai iwechippù nai’nùk! ⁶ Kaatù ponalok kon kappon yamùk molopai imaimu yenpoikannan mùnù ikkwamùppù tok uya. Màlàpàk tok lepasak auya man mùn ke tok uya inchi toppe. Tepeppù kon yepoyan tok,” teppù ya. ⁷ Màlàyau mayin Kaatù ponalok pottà patassek winàpaino yetappù uya, “Ewaik, Itepulu tewinan Kaatù, Mùkkàlà neken Meluntà! Ailon molopai iwalai màlà talumattàntok auya!” te ya. ⁸ Màlàyau ichakùlà’no inchelù uya tùssawù yawon ikkwamùppù wei pona, molopai meluntà ke wei lepappù màlà kappon yamùk pottà toppe ya a’nek pe kulu tùwettok ke. ⁹ Kappon yamùk pottàppù a’nek pe iwa’mintasak uya, molopai Kaatù yesek pa’nùpùppù tok uya, mùkkàlà sàlà yamùk talumattàntok kon yapàikketù yesak. Tùse tok welattàppù pen tùmakuyi kon winàpai, molopai eke pe iwettok yapulàppù tok uya pen. ¹⁰ Màlàyau 5 pe iku’nài inchelù uya tùssawù yawon ikkwamùppù àsà ene yapon pona. Ewalupà wechippù màlà itepulu pe iwettok patassek po. Molopai kappon yamùk uya tani kon ikkapàtùppù ti’nimù kon pàk. ¹¹ Molopai Kaatù epùn pon pa’nùpùppù tok uya ti’nintok kon molopai sukkwek yamùk pàkànsau. Tùse àli tùnkupùppù kon winàpai tok welattàppù pen. ¹² Màlàyau 6 pe iku’nài inchelù uya tùssawù yawon ikkwamùppù eke tuna Euphrates pona. Tuna wa’munappù màlà, wei wepakkatok winàpaino kon kin yamùk uyàpù ye’ma koneka pe. ¹³ Màlàyau àsolùwawon kon àli ton akkwalù yamùk yeneppù uya, pàlàtuku kasa’ne tok wepakka ulupelu mùta yapai, àsà ene mùta yapai, molopai iwalai pen itekale yekamanài mùta yapai. ¹⁴ Mùkyamlo wechippù màlà makui yakkwalù yamùk tensen pen ku’nài nan pe. Pùsamlo àsolùwawon kon àli akkwalù yamùk mùkyamlo tùutàsan tamù’nawolon kon kin yamùk non pon kon piyak, tok nesse tamùkke wepanta’mantok ponalok pe Eke wei, tewinan Kaatù, Mùkkàlà neken Meluntà weyu yattai. ¹⁵ “Yentàk kon! Uyàssaik amak kasa! Tùutauchinpasen mùkkàlà kappon tùwe’nùnsen pen molopai tùpon mainanpanài, ipon pùla tùusalà molopai tùwekuli’ma ayupo kappon yamùk yemlotopo tukaik!” teppù ya nàlà. ¹⁶ Màlàyau akkwalù yamùk uya kin yamùk nepùppù tamùkke patassek Hebrew Maimu yau tesassen Armageddon tukaik yak. ¹⁷ Màlàyau 7 pe iku’nài uya tùssawù yawon ikkwamùppù kakàik. Eke mayin uyàpùppù aponnok Kaatù yùwùk tawon winàpai, “Nenukappàssan!” tukaik. ¹⁸ Pata wekamlippàtùppù, eke pe wala’napi wettoippàtùppù, molopai àsà pe kulu tùlùpùnù wechippù molo. Màlà yekkwa tùlùpùnù pùla iwechippù màlà kappon konekappù motapai. Sàlà tùlùpùnù wechippù màlà àsà pe kulu. ¹⁹ Màlà Eke kulu pata wessala’moppù màlà àsolùwau, molopai kappon yamùk pata yamùk non pon yawolon kon mattanùpùppù màlà. Kaatù uya eke Babylon yenumenkappù, molopai wain inchi toppe ya ikupùppù ya tùkokù yapai, àsà pe tùwe’naikatok yeuku. ²⁰ Tamù’nawàlà tuna iwoino pata yamùk utamappù tùumattase, tamù’nawolon wùk yamùk waliwomùppù. ²¹ Eke ton tàk tuna usa’mansak, 100 pounds pan iteme’netù, wepukappù kaupai kappon yamùk pona. Molopai kappon yamùk uya Kaatù pa’nùpùppù màlà, tuna usa’mansak ke talumattàntok wenai, masapùla àsà pe kulu talumattàntok wechippù màlà.

¹ Màlàyau 7 pan kon inchelù yamùk tonpa uyàpùppù upyak, mùkkàlà 7 pan pùsau yamùk yesak, molopai, “Àikkà, molopai yà’là kasa là kàyik yamùk yemyak tùwe’chilanmasen nossan talumattàtok yekama uya màlà, mùkkàlà chichiu pe tùwessen tukkan tuna yamùk po. ² Non pon kon kin yamùk uya màlà àli kupùppù tùwekumase mùkkàlà eke nossan kàyik yamùk yemyak tùwe’chilanmasen pokonpe, molopai non pon kon kappon yamùk wetùmùppù, màlà wain kàyik yamùk pokonpe iwettok yeuku tinchise,” teppù ya. ³ Wakù Akkwalù uya uya’chippù màlà, molopai inchelù uya uyalàppù wontaik yak. Molo nossan yeneppù uya chichiu pe, ichuweyu àsà ene po, molopai mùkkàlà wechippù 7 pe ippai molopai 10 pe iletù, àli ton esek yamùk menukasak Kaatù talumattà pe wechippù ipolo. ⁴ Nossan wepontàsak wechippù tùtalilen molopai ichuweyu yak, ipolo kolù wechippù, wakù ton tàk yamùk, molopai pearl yamùk. Temyau kolù kok ya’chichak ya wechippù yanùkkasak àli ton Kaatù yewanma ton ke, kàyik yamùk pokonpe tùwesse àli pe inoi’mappù. ⁵ Ipeyeppà pàk esek menukasak wechippù tùttusen pen, “Eke Babylon, tamù’nawolon kon kàyik yamùk yemyak tùwe’chilanmasan molopai àli ku’nài nan non pon kon yan,” tawon. ⁶ Molopai yeneppù uya nossan wetùnsak Kaatù ponalok kon kappon yamùk mùnù ke. Molopai mùkyamlo iwàsak kon nùssan mùnù ke, masapùla ailon pe tok wessak Jesus pàk wenai. Yensak uya yau usenumenkasak kulu wechippù. ⁷ “Yà’là peichi iwechi pàk eusenumenkasak màlà?” tukaik inchelù uya uyekamappoppù. “Tùttusen pen yekama uya màlà pùsàlà nossan molopai yapon àsà ene walai, 7 pan ippai molopai 10 pan iletù nekama. ⁸ Àsà ene menpàssai’nùk wechippù màlà molo, tùse molo pùla nen uchi iwechi màlà. Iyàpù i’nawon iteuta yapai winàkàik man molopai iità màlà tùmattanùttoppe. Kappon yamùk non po tùwemassan itesek imenukasak kon pen wema’nàtok yapon kaleta yau, non wepyattà motapai, usenumenka kulu màlà tamù’nawàlà, àsà ene yene tùuya’nokon yau. Masapùla nulà iwechippù màlà, tùse nulà pùla nen uchi iwechi, molopai iichenpoika tu’ma màlà. ⁹ “Sàlà màlà pukkek molopai ittutok i’che tùwessen. 7 pan puppà yamùk màlà 7 pan wùk yamùk, wùk yamùk nossan wettok chichiu pe ipo, 7 pan kon nàlà kin yamùk. ¹⁰ 5 pe tok we’nonkasak man, tewinan tok tonpa kin pe lùppù man, molopai tùulon nùppù molo man iyàssak pùla, iyàssak yau tachin pe pùla iiko’mamù màlà. ¹¹ Molopai àsà ene nulà iwessak lùppù, tùse molo pùla nen uchi nai’nùk, mùkkàlà 8 pe iku’nài kin wapiyalok kon 7 pan kon tonpa, molopai tùutàsen woton tùmattanùttok yak. ¹² “10 pan iletù yamùk meneinùk mùkyamlo 10 pan kon kin yamùk itepulu pe tùwettok kon piyattàsak ya pùla nai’nannùk, tùse tok lepa màlà apàikkek ke kin yamùk kaichalà tok wettoppe mala là 1 hour àsà ene pokonpe. ¹³ Pùsamlo 10 pan kon wechi màlà tamù’nawàlà tewin iichenumenkatok, molopai tùmeluntàlù kon molopai tapàikketù kon tùlù màlà tok uya àsà ene yemyak. ¹⁴ Tok wepanta’ma màlà kaalinilu mule winàkàik, tùse kaalinilu mule molopai inkà’massan, inanùmùssan molopai ailon pe iwessak kon inenupa ton uya tok yentaika màlà, masapùla itepulu yamùk Yepulu mùkkàlà molopai kin yamùk Kinù,” teppù ya. ¹⁵ Inchelù uya nàlà wateppù upàk, “Tuna yamùk meneinùk tùwe’chilanmasen wechi chichiu pe ipo, mùkyamlo wechi màlà kappon yamùk pe molopai ilinà ton molopai kappon yamùk pata yamùk non po nai’nannùk yawolon kon pe molopai tùpatalo’nan mayin yamùk. ¹⁶ Àsà ene molopai 10 pan iletù yamùk meneinùk uya, nossan, kàyik yamùk yemyak tùwe’chilanmasen yeya’noma màlà, tok uya tamù’nawà itesak pe iwettok yalà màlà molopai tok uya inàmà ipon pùla, tok uya ipun yanù màlà molopai imattanùpù tok uya apok ke. ¹⁷ Masapùla Kaatù uya tok yewan yak itùsak wechi màlà i’che tùwettok kon kuttoppe tok uya, tewin iichenumenkatok tùwelaikatok kon yau, molopai àsà ene yemyak tùmeluntàlù kon tùlù tùuya’nokon itepulu pe iwettoppe yau, Kaatù uselupatok lùppù wekkupù ponalà. ¹⁸ Nossan meneinùk màlà eke pata non pon kon kin yamùk yepoi tùwessen,” teppù.

¹ Sàlà tùpo tùulon inchelù wuttà epùn poi yeneppù uya. Eke pe apàikkek yesak pe iwettok, molopai itakkwayi uya tamù’nawolon non polo yakkwakappù. ² Iwentaimeppù eke pe, “Iwekkawai’masak man! Eke Babylon wekkawai’masak man! Imawali yamùk yùwùk pe molopai tamù’nawolon àli ton akkwalù yamùk patassek pe iwenasak man. Molopai tamù’nawà ànùk yekkwa là àli ton molopai ewanma pe tùkussan tolon yamùk wemapù màlà yau. ³ Masapùla tamù’nawolon kon kappon yamùk pata yamùk non polon kon uya tùtayappù pen pokon pe iwettok yeuku inchippù màlà meluntà, àli pe eppai iwettok tesak ke yeuku. Non pon kon kin yamùk uya àli kussak man ipokonpe itayappù pe pùla echii’ma. Molopai kàyik yamùk mamin chilanmannan molopai ye’mannan non pon kon wenasak man eke pe mamin yesak pe, tùuseka’nonkaik àli kuttok ya winà,” tukaik. ⁴ Màlàyau tùulon mayin yetappù uya epùn poi, “Epakkatàk kon yapai, uponalok kon kappon yamùk! Àli ton kuttok ya pùkkù pe kettàu, ipokonpe tùtalumattàsan pe! ⁵ Masapùla àli kuttok ya wepili’chak man kau epùn tepose. Molopai Kaatù nùttuyan àli inkupùppù lùppù. ⁶ Inkupùppù kasa làma ikuttàk kon. Ye’matàk kon asak itekkwa meluntà ke, ikupùppù ya kasa làma. I’chawù yanùkkatàk kon tinchisen ke, asak itekkwa meluntà ke, inkonekappù ke. ⁷ Wakù pe temamin ke tùwechi yawà iitapulàppù. Màlà kaichalà làma ilepatàk kon talumattàntok molopai usewankono’mantok ke. Masapùla, ‘Sà motau chichiu pe wessaik Kuwin iulà! Itayappù iweli’chak pen iulà. Molopai usewankono’ma ittu uya pen màlà!’ te pàk man tewan yau. ⁸ Sàlà wenai tamù’nawàlà italumattàtok uyàpù màlà ipona tewin wei yau, Weli’nàtok, usewankono’mantok, molopai iwan, ipottà màlà apok ke. Masapùla Itepulu Kaatù italumattànài mùkkàlà apàikkek,” teppù ya. ⁹ Kin yamùk non pon kon iwekumasak kon nùssan molopai wakù pe temamin ke iwechi pàk iitapulà tonpa pe iwessak kon nùssan kalawù màlà molopai tok usewankono’ma kulu màlà pata wenai iyatù kelechin yene tùuya’nokon yau. ¹⁰ Mei satik pe tok wechi màlà, masapùla iwettalumattàtok pàk tùusenalippa kon pàk, molopai, “Entuppak! Entuppak man! Sàlà eke molopai meluntà pata Babylon! Tachin pe pùla kulu atalumattàtok uyàssak man,” te tok uya. ¹¹ Mamin ye’mannan molopai ichilanmannan non pon kon kalawù màlà, tok usewankono’ma iwenai, masapùla ànù’là uya temamin kon ye’ma pùla nen uchi iwechi pàk, ¹² tùkolùyi kon, tichilùpayi kon, wakù ton tàk yamùk molopai pearl yamùk. Wakù ton kuyalikku, linen molopai silk, tùtalilen molopai ichuweyu kuyalikku ye’ma pùla nen uchi iwechippù. Molopai yà’là yekkwa là appoi’ne tùkà’nùnsan yei yamùk, yà’là yekkwa ton nà ikonekasak kamo yà yapai molopai epekkek yei yapai, kalukuli walai yapai, ayan pun yapai, molopai ekayu tàk walai, marble ye’ma pùla nen uchi iwechi pàk. ¹³ Molopai yei pippà yamùk cinnamon molopai spice itesek ye’ma pùla iwechi uya tok kalanpa, molopai tùpottàsen appoi’nan, myrrh, frankincense, wain molopai kaiwan palu, molopai eke’ne yasukasak pùlomù, molopai paali walai, paaka yamùk molopai kaalinilu yamùk, kawale yamùk molopai kanau yamùk, apyoto yamùk molopai là kappon yamùk yakkwalù ye’ma pùla. ¹⁴ Tok uya nàlà ipàk, “Tamù’nawolon wakù ton itesak pe eppai ewettok waliwomùppù man, molopai tamù’nawà eyemamin molopai wakù pe temamin ke ewemattok utàppù man, molopai yepotu’ma auya pen màlà,” te. ¹⁵ Sàlà mamin ye’mannan molopai ichilanmannan, temamin ke iwenasak kon màlà pata yau wechi màlà mei satik pe, masapùla italumattàtok pàk tùusenalippa kon pàk. Tok kalawù màlà molopai tok usewankono’ma, ¹⁶ molopai, tok uya, “Entuppak! Entuppak man! Àli pe kulu màlà eke patassek pona man! Tùwepontàsen pe iwechippù wakù linen yak, tùtalilen molopai ichuweyu yak, molopai tùpolo kolù, wakù ton tàk yamùk molopai pearl yamùk tùsak ya wechippù! ¹⁷ Molopai tachin pe pùla kulu tamù’nawàlà sàlà mamin yamùk la’chimapàssan!” te màlà ipàk. Tamù’nawàlà kanau yanài nan molopai kanau yawon kon, kanau yanài nan yo’non kon molopai tamù’nawàlà tùulon kon tùwemattok kon yeponnan palau po wechippù mei satik pe, ¹⁸ Molopai tok wentaimeppù iyatù kelechin yenei’ma’nokon. “Tùulon eke pata pùla nai’nùk iwechippù, sàlà eke pata yekkwa!” tukaik. ¹⁹ Non sululukkappù tok uya tùppai kon pona, tok kalawùppù molopai tok usewankono’mappù. “Entuppak! Entuppak kulu eke pata man! Eke pata màlà tamù’nawàlà mùkyamlo kanau yamùk palau polo tùwessan yesak ton wenappù temamin ke itemamin pàk lùppù! Molopai tachin pe pùla kulu tamù’nawàlà itesak pe tùwettok la’chimapàssan!” tukaik. ²⁰ Atauchinpakà, imattanùttok pàk epùn! Atauchinpatàk kon, Kaatù ponalok kon kappon yamùk, yeunossak kon, molopai Kaatù Maimu yenpoikannan! Masapùla Kaatù uya italumattàsak man ewinàkài’nokon inkupùppù wenai! ²¹ Màlàyau apàikkek inchelù uya eke kulu tàk yanùmùppù molopai yenu’mappù ya palau kak, “Sàlà kasaichi eke pata Babylon yenu’ma màlà àsà ke, molopai iichene tu’ma pen,” tei’ma. ²² “Tùwayi kon tàulùnpannan, yà’là yekkwa là wai tàulùnpannan uya, salakuwa molopai paaka letù walai tàulùnpa useta tu’ma pen nen uchi màlà ayau! Ànù’là tùwe’wotokomasen yà’là yekkwa là yau wessepotukka ayau pen nen uchi màlà, molopai ak tàwù useta pen nen uchi màlà! ²³ Yà’là yattai tu’ma là lanppu yakkwayi usene ayau pen màlà, tùwemali’masan ema’non molopai umoine tawonnan maimu useta ayau pen. Mamin chilanmannan molopai ye’mannan, àponalok kon wechippù kulu màlà eke pe tamù’nawàlà sàlà non po, molopai epiyassanù ke tamù’nawàlà kappon yamùk non pon kon yennakappù auya,” teppù ya nàlà. ²⁴ Kaatù Maimu yenpoikannan mùnù wenai, molopai Kaatù ponalok kon kappon yamùk mùnù yepoloppù màlà, màlà pata yau, ewaik, tamù’nawolon kon kappon yamùk iwàsak kon non po mùnù.

¹ Sàlà yamùk tùpo tukkan kon kappon yamùk uselupa useta eke pe kasa tùusetasen yetappù uya epùn po, “Kaatù yapulà! Wepùikattàntok, apulàntok molopai meluntà màlà Kùkaatùyi kon ponalok!” tukaik. ² “Ailon molopai iwalai màlà ittutok ya! Masapùla eke nossan kàyik yamùk yemyak tùwe’chilanmasen talumattàsak ya man, mùkkàlà non mattanù’nàippù lùppù àli kuttok tùuya kàyik yamùk pokonpe tùwettok ke. Kaatù uya ye’masak man, masapùla tapyoto yamùk wàsak ya pàk,” tukaik. ³ Tok wentaimeppù tu’ma màlà. “Kaatù yapulà! Eke pata uyatù kelechin wenuku màlà tàwàlàlà molopai tàwàlàlà,” tukaik. ⁴ 24 pan kon eke ton tùnamasan kappon yamùk molopai asakùlà’nan kon nulànan kon ànùkyan nànan wepeimappù molopai Kaatù yapulàppù tok uya Mùkkàlà chichiu pe tùwessen aponnok po molopai tok uya, “Emen, Tàwà wa nechii! Tàwà yapulà nechii!” teppù. ⁵ Màlàyau molo mayin uyàpùppù aponnok winàpai, “Kùkaatùyi kon yapulàtàk kon tamù’nawolon kon itapyoto yamùk, molopai tamù’nawolon kon kappon yamùk asaklàma eke ton molopai echikili ton, mùkyamlo inamannan!” tukaik. ⁶ Màlàyau ilinà kappon yamùk uselupa useta eke pe kasa tùusetasen yetappù uya, eke tuna melu tàwù kasa, wala’napi wettoippàtù kasa. “Kaatù yapulàpai. Masapùla Itepulu tewinan, Mùkkàlà neken Meluntà Kùkaatùyi kon mùkkàlà Kin,” te tok uya. ⁷ “Utauchinpanpai’nokon molopai tùutauchinpaik we’nàpai’nokon man. Eke pe iwettok yapulàpai’nokon! Masapùla kaalinilu mule wemali’matok yattai uyàssak man. Molopai inoppù woton wekonekasak man màlà ponalok pe. ⁸ Iwepontà toppe ikupùppù màlà wakù linen pe ewechi kuyalikku yapai ikonekasak, tùulenpansen molopai ikopposak pen pon yak.” Wakù linen pe iwechi kuyalikku wechi màlà Kaatù ponalok kon kappon yamùk nùkupùppù wakù, yekamanài pe. ⁹ Màlàyau inchelù uya upàk, “Sàlà imenukakà, tùutauchinpasan mùkyamlo ikà’masak kon, kaalinilu mule wemali’matok yattai uta’lettàtok yak,” teppù. Molopai inchelù uya tùmaimu pùkkùttàppù, “Sàlà yamùk màlà ailon Kaatù Maimu,” tukaik. ¹⁰ Wekkawai’mappù itta piyau yapulà toppe uya, tùse upàk, “Kùkkupùi! Apyoto iulà àtonpa, molopai àtonpa yamùk tonpa tamù’nawàlà mùkyamlo ailon Jesus nenpoikappù yawàlà tùwemassan tonpa. Kaatù yapulàkà!” teppù ya. Masapùla màlà ailon, Jesus nenpoikappù uya màlà Kaatù Maimu yenpoikannan kupùppù tok uselupa toppe. ¹¹ Màlàyau epùn utakkokasak yeneppù uya, molopai molo iwechippù aimu’nan kawale. Ipo tùwessen yesattok wechippù Tùusetakkasen pen molopai Ailon tukaik. Ikasa we’nàtok ke kappon yamùk ittunài mùkkàlà molopai ikasa tùwepanta’masen. ¹² Itenu wechippù màlà apok ulenpansak kasa, molopai tukkan alok yamùk wechippù ippai po. Itesek menukasak wechippù ipàk, tùse ànù’là uya ittu pùla iwechippù, tùse mùkkàlà uya neken yà’là pe là iwechi ittu. ¹³ Yau iwettok pon wechippù màlà mùn yak iki’chak pe. Esek mùkkàlà yesattok yau wechippù Kaatù Maimu tukaik. ¹⁴ Tùwepanta’masan epùn pon kon utàppù ya’là, aimu’na’nan kon kawale yamùk po molopai tok wepontàsak aimu’nan pon ikopposak pen linen yak. ¹⁵ Yàkek asa’lon yà kasupala wepakkappù intapai, màlà ke eke pata yamùk non pon kon yentaikappù ya. Meluntà ke itepulu pe iwechi màlà tok yepoi. Molopai mùkkàlà neken Meluntà Kaatù we’naikatok àsà pe yeuku kaklàppù ya wain palukatok yai. ¹⁶ Ipon pàk molopai i’chi pàk esek menukasak wechippù, “Kin yamùk Kinù, molopai itepulu yamùk Yepulu,” tukaik. ¹⁷ Màlàyau inchelù wechi satik pe wei yau yeneppù uya. Iwentaimeppù eke pe tolon yamùk tùwainùnsan kau, pàk, “Àittàk kon, molopai epilittàk kon eke Kaatù uta’lettàtok yak! ¹⁸ Àittàk kon, kin yamùk pun yanse, eke ton pun, soicha yamùk yepulu yamùk pun, kawale yamùk molopai tok po tùwessan pun, tamù’nawolon kon kappon yamùk pun, apyoto yamùk molopai apyoto yamùk pen, eke ton molopai echikili ton,” tukaik. ¹⁹ Màlàyau yeneppù uya àsà ene molopai non pon kon kin yamùk molopai tok wepanta’ma tonpa yamùk wepilipùppù epanta’mase kawale pon winàkàik molopai iwepanta’ma tonpa yamùk winàkàik. ²⁰ Àsà ene ya’chippù màlà, tamùkke iwalai pen itekale yekamanàippù pokonpe, mùkkàlà tensan pen yamùk ku’nàippù itemlotopo. Màlà tensan pen yamùk winà màlà mùkyamlo àsà ene uya pattàntok yesak ton yennakappù ya, molopai àsà ene kasa ikonekasak yapulànnan nùssan. Àsà ene molopai iwalai pen itekale yekamanàippù tawonnan yenu’mappù màlà asaklàma, nulà apok yak kulupala kasa tùkà’nùnsen pokonpe tùuyassen yak. ²¹ Tok wepanta’ma tonpa yamùk wànàppù màlà asa’lon yà kasupala tùwepakkasen kawale po tùwessen mùta yapai ke, molopai tamù’nawàlà tolon yamùk uya tok pun yanùppù tùwakkota kon ponalà.

¹ Màlàyau inchelù wuttà epùn poi yeneppù uya, i’nawon iteuta kiyi molopai eme’nek aulonnàtok ayan pun yapai ikonekasak itemyau. ² Ulupelu, mùkkàlà penalok àkài Teepùlù, wapùla Settan ya’chippù ya molopai yaulonsak ya wechippù 1000 pe kili’chimo’chi. ³ Inchelù uya yenu’mappù màlà i’nawon iteuta yak. Yakkoloppù ya molopai ikiyittàppù ya sa’man pe, kappon yamùk pata yamùk non pon yawolon kon yennaka tu’ma ya tukaik 1000 pan kili’chimo’chi wenukapù ponalà. Màlà tùpo inonka màlà mala là. ⁴ Màlàyau aponnok yamùk yeneppù uya, molopai mùkyamlo chichiu pe ipo tùwessan, tok lepasak wechippù meluntà ke ittuntoppe tok uya. I’mùlùkàssak kon yamùk yakkwalùssan yeneppù uya màlà masapùla ailon Jesus nenpoikappù molopai Kaatù Maimu yekamasak tok uya pàk. Àsà ene wapùla mùkkàlà kasa ikonekasak yapulànnan nùssan pe pùla tok wechippù màlà wapùla àsà ene uya pattàntok yeposak tok uya pùla iwechippù tùpeyeppà kon pàk wapùla temyatù kon pàk. Tok wemapùppù molopai kin yamùk pe tok wechippù Christ pokonpe 1000 pe kili’chimo’chi. ⁵ Iweli’chak kon tonpassan uyàpùppù wema’nàtok yak pen 1000 pan kili’chimo’chi wenukapù ponalà. Sàlàichi màlà wapiyalok iweli’chak kon wuluukatok. ⁶ Tùutauchinpasan mùkyamlo molopai esukenan kon mùkyamlo wapiyalok weli’nàsak wuluukatok pùkkù pe tùwessan. Yakon itekkwa pe weli’nàtok meluntàlù pùla iwechi màlà tok yepoi, paatele yamùk pe tok wechi màlà Kaatù ponalok pe molopai Christ ponalok pe nàlà. Molopai tok wechi itepulu pe màlà ipokonpe 1000 pe kili’chimo’chi. ⁷ 1000 pan kili’chimo’chi wenukassak tùpo, Settan yaulonka màlà ya’chitok yapai. ⁸ Molopai iità màlà tamù’nawàlà pata yawon kon non po iwetta’nùssak kon yennakase, Gog molopai Magog tawon. Settan uya màlà tok nepù tamù’nawàlà tamùkke epanta’mase, wepanta’mantok yak, tukke wàssàk palau yena pon kasa. ⁹ Tok wetta’nùpùppù màttawàlà non po molopai Kaatù ponalok kon kappon yamùk patassek woinottàppù tok uya molopai pata tù’nùn pe inkupù, Jerusalem. Tùse apok wuttàppù màlà epùn poi molopai tok mattanùpùppù ya. ¹⁰ Màlàyau Makui tok yennakanàippù, yenu’mappù màlà eke kulu apok molopai kulupala kasa tùkà’nùnsen yak, àsà ene molopai iwalai pen itekale yekamanàippù tawonnan yenu’mappù yak, molopai tok talumattà màlà weinai molopai ewalupàttau tàwàlàlà molopai tàwàlàlà. ¹¹ Màlàyau eke aimu’nan aponnok yeneppù uya molopai chichiu pe ipo tùwessen. Non molopai kak tawon wepeppù iwinàpai molopai iicheneppù tukka pen. ¹² Molopai yeneppù uya iweli’chak kon nùssan eke ton molopai echikili ton, ekkaichalà, satik pe aponnok yemlotopo. Kaleta yamùk yakkokasak wechippù, molopai tùulon kaleta yakkokasak wechippù, wema’nàtok kaletayi. Iweli’chak kon ittuppù màlà tok nùkupùppù yawàlà imenukasak kaleta yamùk yau pàkàlà. ¹³ Màlàyau palau uya iweli’chak kon yenpakkappù tùkapai. Weli’nàtok molopai iweli’chak kon patassek uya iweli’chak kon tùna’chippù kon yenpakkappù. Molopai tamù’nawolon kon ittuppù màlà tewin pàk tok nùkupùppù yawàlà. ¹⁴ Màlàyau weli’nàtok molopai iweli’chak kon patassek yenu’mappù màlà eke kulu apok wettulukasak yak. Sàlà apok tùuyassen yen màlà yakon itekkwa pe weli’nàtok. ¹⁵ Ànù’là itesek imenukasak pen wema’nàtok kaletayi yau, yenu’mappù màlà eke kulu apok wettulukasak yak.

¹ Màlàyau nen uchi emennak epùn molopai emennak non yeneppù uya. Wapiyalok epùn molopai non waliwomùppù molopai palau pùla iwechippù. ² Molopai yeneppù uya wakù esukenan eke Pata, emennak Jerusalem wuttà epùn yapai Kaatù piyapai, ikonekasak pe ema’non wepontàsak wakù pe tùtayappù yepose tùutà toppe kasa. ³ Eke mayin uselupa yetappù uya aponnok winàpai, “Kaatù patassek nen uchi kappon yamùk piyau man! Tok pokonpe iwemapù màlà, molopai iponalok pe tok wechi màlà. Kaatù wechi màlà tùmàlà pe tok piyau, molopai tok Kaatùyi pe iwechi màlà. ⁴ Tamù’nawàlà tok yenu palu ya’munakka ya màlà tok yenu poi. Weli’nàtok pùla nen uchi iwechi màlà, usewankono’mantok pùla iwechi, kalannàtok wapùla i’ninnàtok pùla. Masapùla penalok kon waliwomùppù man,” tukaik. ⁵ Màlàyau mùkkàlà chichiu pe tùwessen aponnok po uya, “Molopai nen uchi sàlàpe tamù’nawolon koneka uya sàlà emennak pe! Sàlà imenukakà, masapùla sàlà mayin màlà ailon molopai ailon tetok ipàk,” teppù nàlà. ⁶ Molopai upàk, “Nenukappàssan! Iulà mùkkàlà Alpha molopai Omega iwepyattàtok molopai iwenukattok. Ànù’là iwe’naklipasak nai’nùk lepa uya màlà epe’mùla wema’nàtok tunakkwa pùkkù ke. ⁷ Ànù’là entaikanàippù uya sàlà yamùk wakù ton yepolo màlà uwinàpai. Ikaatùyi pe wechi màlà molopai umu pe iwechi màlà. ⁸ Tùse tùusenalippasan molopai ailon tawonnan pen, mùkyamlo àli pe tùwessan, wànnan, tùnàkàlunsan, mùkyamlo piyassan yeselu ku’nài nan molopai ikonekasak kaatù yapulànnan, molopai tamù’nawàlà kasei ton uya tùnepolo kon yepolo màlà eke kulu apok tùuyassen patassek molopai kulupala kasa tùkà’nùnsen yau, màlà yakon itekkwa pe weli’nàtok,” teppù ya nàlà. ⁹ 7 pan kon inchelù yamùk tonpa uyàpùppù upyak mùkkàlà 7 pan pùsau yamùk yanùkkasak 7 pan iwenukattok talumattàntok ke yesak. Molopai, “Àikkà, molopai Ema’non kaalinilu mule noppù woton yekama uya màlà àpàk,” teppù ya. ¹⁰ Molopai inchelù uya uyalàppù eke, kawon kulu wùk nakatta pona Wakù Akkwalù yau. Jerusalem, Wakù esukenan eke pata, wuttà epùn poi Kaatù piyapai yenpoikappù ya upàk. ¹¹ Iilenpamùppù Kaatù yakkwayi ke. Pata ulenpamùppù wakù ton tàk jasper molopai akkwa crystal kasa. ¹² Eke pe molopai kau iwe’na wechippù, 12 pe imlatta wechippù, molopai 12 pan kon inchelù yamùk wechippù manatta yamùk yesak pe. Manatta yamùk pàk, 12 pan kon Israel mumu yamùk yesek menukasak wechippù. ¹³ Àsolùwau manatta wechippù wei wepakkatok winà, àsolùwau kamik pen wei wepakkatok winon winà, àsolùwau kamik wei wepakkatok winon winà, molopai àsolùwau wei wewontok winà. ¹⁴ Pata we’na kassak wechippù 12 pan tàk yamùk po, ipàk màlà 12 pan kon kaalinilu mule neunokossan yesek menukasak wechippù. ¹⁵ Inchelù upokonpe iichelupasak lùppù piyau kolù, kusan pe yà’làlà wechi ittutok ike wechippù, pata ittu toppe, imlatta yamùk, molopai iwe’na. ¹⁶ Ekkaichalà iwechippù, kusan pe iwettok wechippù itawenetù kaichalà. Inchelù uya pata ittuppù ittutok tùuya ike ke, kusan pe iwechippù 12,000 pe ikusanù, itawenetù kasa, molopai kakàik kusan pe iwechi kasa. ¹⁷ Inchelù uya nàlà iwe’na ittuppù, molopai kau iwechippù 144 pe’ne lùkkwà, kappon ittusak ittutok ike ke yawàlà, màlà inapulà. ¹⁸ Iwe’na konekasak wechippù wakù tàk jasper yapai, molopai pata konekasak wechippù esuken kolù pe, akkwa pe kulu. ¹⁹ Pata we’na yapon tàk yamùk yùpùlùttàsak wechippù màlà tùpatalo’nan wakù ton tàk ke. Wapiyalok yamùtok ipo tàk wechippù màlà jasper, yakon wechippù sapphire, icholùwano wechippù agate, ichakùlà’no wechippù lola tàk emerald, ²⁰ 5 pe iku’nài wechippù onyx, 6 pe iku’nài wechippù carnelian, 7 pe iku’nài wechippù quartz, 8 pe iku’nài beryl, 9 pe iku’nài topaz, 10 pe iku’nài chalcedony, 11 pe iku’nài turquoise, 12 pe iku’nài amethyst. ²¹ 12 pan manatta yamùk màlà 12 pan pearl yamùk, tewin pàk manatta konekasak wechi màlà tewinan pearl yapai. Pata yawon asanta màlà esukenan kolù, akkwa kulu. ²² Kaatù yùwùk yeneppù uya pata yau pen màlà, masapùla Imàlà là Mùkkàlà Itùwùk, Itepulu Kaatù, Mùkkàlà neken Meluntà, molopai kaalinilu mule. ²³ Pata wechi wei wapùla kapùi i’che pen màlà tùweyuttà toppe ya, masapùla Kaatù yakkwayi là màlà iweyuttànài, molopai kaalinilu mule mùkkàlà ilanppuyi. ²⁴ Kappon yamùk pata yamùk non pon yawolon kon usalà màlà iweyu yau, molopai kin yamùk uya tùnamatok kon nepù màlà yak. ²⁵ Pata mùlatta yamùk wechi màlà takkokase tàwàlà weinai, màlà yamùk yakkolo pen màlà, masapùla ewalupà pùla iwechi màlà molo. ²⁶ Eke pe we’nàtok molopai pata yamùk wettok tùnamasan pe nepù màlà, màlà patassek yak. ²⁷ Tùse yà’làlà àli là wapùla ikopposak là wewomù pen màlà màlà pata yak, wapùla ànù’là, kuli’manài pe nai’nùk Kaatù yewanma ton ku’nài molopai kasei pe tùwessen. Tùse mùkyamlo neken, itesek imenukasak kon kaalinilu mule kaletayi wema’nàtok kaletayi yau wewomù màlà màlà pata yak.

¹ Inchelù uya nàlà yenpoikappù upàk, wema’nàtok tunakkwa crystal ulenpansak kasa tùusensen, Kaatù yapon molopai kaalinilu mule winàpai tùuyàssen. ² Tùwu’masen pata yawon eke asanta yakletawàlà. Asaklàma tuna yena po’ne wema’nàtok yek wechippù tùwepetasen 12 pe itekkwa kili’chimo’chi yau, tewin itekkwa kapùi pàk, molopai yale wechi màlà kappon yamùk pata yamùk yawon kon ipittànài pe. ³ Yà’làlà Kaatù uya pa’nù’nàtok wessepotukka pen nen uchi màlà màlà pata yau. Kaatù yapon molopai kaalinilu mule yapon wechi màlà màlà pata yau, molopai itapyoto yamùk uya yapulà màlà. ⁴ Tok uya màlà itenpata yene, molopai tok peyeppà yamùk pàk itesek menuka màlà. ⁵ Ewalupà pùla nen uchi iwechi màlà, molopai tok wechi lanppu wapùla wei yakkwayi i’che pen màlà, masapùla Itepulu Kaatù wechi màlà tok weyu pe, molopai itepulu pe tok wechi màlà kin yamùk pe, tàwàlàlà molopai tàwàlàlà. ⁶ Màlàyau inchelù uya upàk, “Sàlà mayin yamùk màlà ailon molopai ailon tetok ipàk. Molopai Itepulu Kaatù, mùkkàlà Takkwalù tùnài tùmaimu yenpoikannan piyak uya tiyinchelùyi yeunokoppù tapyoto yamùk pàk sàlàpe’ne là tùwekkupù woton yekamase,” teppù. ⁷ “Yetatàk kon! Uyàpù màlà tachin pe kulu tùpo pùla! Tùutauchinpasan mùkyamlo Kaatù Maimu yenpoikannan nekamappù sàlà kaleta yawon kon maimu yawàlà tùwessan!” nùkayan Jesus. ⁸ Iulà, John, uya màlà tamù’nawàlà sàlà yamùk yetappù molopai yeneppù. Molopai sàlà yamùk yetakassak uya molopai yenkassak uya yau, wepeimappù inchelù pùta piyau yapulà toppe uya, mùkkàlà sàlà yamùk yekamanàippù upàk. ⁹ Tùse upàk, “Kùkkupùi! Apyoto iulà àtonpa molopai àtonpa yamùk Kaatù Maimu yenpoikannan tonpa, molopai tamù’nawàlà mùkyamlo sàlà kaleta yawon mayin yawàlà tùwessan tonpa. Kaatù làkku yapulàkà!” teppù. ¹⁰ Molopai upàk, “Iwekkupù wapiya yenpoikasak mayin sàlà kaleta yawon kùkkupùi tekamaik pùla, masapùla tamù’nawàlà sàlà yamùk wekkuttok yattai mei pùla man. ¹¹ Ànù’là ikasa pùla nai’nùk tàwà ikasa pùla lùppù nechii, molopai ànù’là àli pe nai’nùk tàwà àli pe lùppù nechii, ànù’là wakù pe nai’nùk tàwà wakù pe lùppù nechii, molopai ànù’là wakù pe esuken nai’nùk tàwà wakù pe esuken nùppù nechii,” teppù ya. ¹² “Yetatàk kon! Uyàpù màlà tachin pe kulu tùpo pùla. E’mantok uya nepù uya màlà uya’là, tamù’nawolon kon yemyak untùlù tok nùkupùppù yawàlà. ¹³ Iulà mùkkàlà Alpha molopai Omega, wapiyalok molopai àkàmlà’no, iwepyattàtok molopai iwenukattok,” nùkayan Jesus. ¹⁴ Tùutauchinpasan mùkyamlo tùpon kon kukannan wakù pe, wema’nàtok yek yepelu nattoppe tùuya’nokon, molopai tok wewomù màlà manatta yai pata yak. ¹⁵ Tùse polopo màlà a’a yamùk wechi, mùkyamlo piyassan yeselu ku’nài nan, molopai tùnàkàlunsan, wànnan, Kaatù pen ikonekasak yemlotopo tùwepeimasan, molopai mùkyamlo tamù’nawàlà kasei ton asaklàma tùuselupatok kon yau molopai tùwelaikatok kon yau. ¹⁶ “Iulà Jesus uya, uyinchelùyi yeunossak nai’nùk sàlà yamùk yekamase àpàkù’nokon so’chi yamùk tau. David pa iulà, akkwa Ko’làmalok Kaiwonok, iulà,” teppù Jesus uya. ¹⁷ Wakù Akkwalù molopai Ema’non, inoppù woton, “Àikkà!” nùkayan. Tamù’nawolon kon sàlà yetannan nàlàichi tàwà, “Àikkà!” nùkai. Àikkà, ànù’là iwe’naklipasak nai’nùk, wema’nàtok tunakkwa yanùnkà lepantok kasa, ànù’là i’che tùwessen. ¹⁸ Iulà, John, eyekamappoyatàu tùumayintaik tamù’nawolon kon Kaatù nenpoikappù sàlà kaleta yawon yetannan, ànù’là uya yà’làlà ke itonpattàsak yau, Kaatù uya italumattàtok tonpattà màlà, talumattàntok yekamasak lùppù sàlà kaleta yau ke. ¹⁹ Molopai ànù’là uya yà’làlà mokkasak sàlà Kaatù Maimu yenpoikannan maimu sàlà kaleta yapai yau, Kaatù uya wema’nàtok yek yepelu pùkkù pe iwettok, molopai Wakù Pata pùkkù pe iwettok mokka màlà, yekamasak lùppù sàlà kaleta yau. ²⁰ Mùkkàlà, sàlà yamùk yekamanài, “Ewaik! Uyàssaik tachin pe kulu tùpo pùla!” nùkayan. Emen. Tàwàichi sàlà kasa nechii. Àikkà, Itepulu Jesus! ²¹ Tàwàichi wakù Itepulu Jesus winàpaino Kaatù ponalok kon piyau nechii! Emen.