PHILIPPIANS

PHILIPPIANS

¹ Sàlà màlà kaleta Paul molopai Timothy tawonnan, Christ Jesus yapyoto ton winàpaino. Tamù’nawolon kon Christ Jesus ponalok kon pe tùwemassan Philippi po piyak imenukasak, tamùkke so’chi yennài nan molopai tok pùikattànnan ponalok. ² Tàwà Kaatù Kùkàipùnù molopai Kùyepulu Jesus Christ elepai’nokon wakù pe we’nàtok molopai echitonpa pe we’nàtok ke. ³ Tenki ukayaik Kaatù pàk tamù’nawàlà àpàkù’nokon, tàwàlàlà àpàkù’nokon usenumenka yau. ⁴ Molopai tamù’nawàlà àpona’nokon wàpùlema yau tùwàpùlemasen iulà tùutauchinpaik tàwàlàlà. ⁵ Masapùla upatùnayi pe ewessak kon Itekale yekama uya yau, wepyattà motapai sàlà tepose pàk. ⁶ Màlàpàk sàlà tùttuyaik kulu. Kaatù, sàlà wakù wotoko piyattànàippù ayau’nokon, wechi màlà ikupù pàk iwenukapù tepose Christ Jesus Weyu ponalà. ⁷ Tàwàlà uyewan pe tùwessan amyamlo! Màlàpàk ikasa iwechi màlà sàlà kasa usenumenka tamù’nawàlà àpàkù’nokon yau. Masapùla Kaatù uya ulepatok wakù pe we’nàtok pùkkù pe ewessak kon pàk. Sàlàpe patiki’chi tau wechi yau wapùla polopo iwenai wechi pe wakù itekale wechi ailon pe yekama pàk wechi yau. ⁸ Kaatù mùkkàlà ittunài wate uya wechi ailon pe, eke pe kulu tamù’nawàlà à’nùnmatok kon uya tùuyàssen Christ Jesus winàpai te uya yau. ⁹ Molopai sàlà màlà wàpùlematok, echi’nùn pe ewettok kon wena toppe eke peiwa màlà yentak ittutok ke molopai miya lùiwa i’napailà yentok ke. ¹⁰ Wakù pe kulu neken nai’nùk yanùmù kon pa. Molopai nen uchi esuken ewemattok kon wettoppe, wakù pe eyekale kon wettoppe Christ wennappo sàlà motak ponalà. ¹¹ Jesus Christ uya àkupù kon màlà wakù eselu kupù pàk ewechi kon pa. Sàlà uya Kaatù yapulàtok molopai inamatok nepù màlà. ¹² Ittu auya’nokon i’che wessaik, utonpa yamùk, màlà yamùk iwekkussak kon uwinàkàik uya kulu wakù itekale utà toppe miyaiwa upùikattàsak pàk. ¹³ Màlàpàk tamù’nawolon kon potolù pata yelasu ton molopai tamù’nawolon kon talonkonnà Christ yapyoto pe wechi pàk patiki’chi tau wechi ittuyan. ¹⁴ Molopai patiki’chi tau wettok uya tamù’nawolon kon nùiwa ailon tawonnan utonpa yamùk kussak man ailon tetok tùuya’nokon tùtoppe tok uya Christ yak. Meluntà peiwa Kaatù Maimu yekamatok tùuya’nokon yau tùwenatok kon pe tàwàlà tùusenalippaik pùla. ¹⁵ Ewaik, tùulon kon mùkyamlo Christ pàk tùuselupasan masapùla kùlùmàk pe tùwechi kon pàk, tewanma kon pe ukupù tùuya’nokon pàk. Tùse tùulon kon tùuselupasan ipàk tamù’nawàlà wakù pe iteselu. ¹⁶ Pùsamlo mùkyamlo Christ yekale pàk tùuselupasan, wakù pe iteselu uchi’nùnmantok yapai. Masapùla Kaatù uya ulepasak sàlà wakù itekale wenai wettoppe. ¹⁷ Tùulon kon mùkyamlo Christ yekale pàk tùuselupasan, ailon pe wakù pe itewan pùla, amlek peiwa, enekamapai pùla lùiwa echii’ma, eke peiwa utaimelunpantok koneka tùuya’nokon kasa tùttuse patiki’chi tau wechi tùse. ¹⁸ Yà’là pe pùla iwechi màlà! Màlà kasa iwechi pàk utauchinpayaik walà tùse Christ yekale usekama toppe i’nai kasa là, iwalai pen wapùla iwalai là iteselu pe. Ewaik, utauchinpa pàk lùppù wechi màlà. ¹⁹ Masapùla àwàpùlematok kon molopai pùikattàntok Jesus Christ Yakkwalù nùtùlùppù winà sàlà yau wessai’nùk yapai wemokka pe tùttuyaik. ²⁰ Masapùla i’napailà uyewan wettok i’che molopai enpen wettok màlà yà’làlà unkupù yau wekkuli’ma tukaik uku’nài. Tùse tàwàlà molopai sàlàpe kulu umeluntàta màlà, tamù’nawàlà uke, Christ yapulàtok nettoppe uya, wemapù pe iwechi yau wapùla welikù pe là iwechi yau. ²¹ Masapùla yà’là ken màlà wema’nàtok? Christ mùkkàlà wema’nàtok upona. Weli’nàtok nen uchi màlà wakùiwa ne’nài. ²² Tùse wemapù yau wotoko kupù uya màlà eke peiwa, màlàpàk i’nai kulu là yanùmù uya ittu uya pùla man. ²³ Asaklàma sàlà yamùk yakletau wessaik, tùulon yattai emappai wechi, tùulon yattai emappai pùla. Masapùla Christ piyak kulu itàpai uchittu utauchinpa kulu màlà eke pe talà wechi yentai. ²⁴ Tùse pàli’yau wechi, wechi màlà wakù peiwa kulu, àpàkànsau’nokon kan. ²⁵ Ewaik, uyi’che lùppù we’nàtok talà man. Sàlà non po wemapù pe lùppùiwa tùttuyaik, àpùikattà kon pàk, eumeluntàta kon pa molopai tùutauchinpaik ewechi kon pa, ailon tetok auya’nokon yau. ²⁶ Màlàyau akaklanpa tukkasak kon uya yau autauchinpa kon màlà molopai Jesus Christ yapulà auya’nokon pàli’yau ukussak ya pàk. ²⁷ Tùse yà’là pe là wechi pe iwechi yau, Christ yekale nekama yawà memattàik tàwàlà. Màlàyau nen uchi eyense’nokon utà wapùla utà pùla là iwechi tùse eyekale kon neken nà yeta toppe uya, tamùkke tewin itewan, tewin iichenumenkatok, molopai meluntà pe ewechi kon wakù itekale ponalok pe yeta toppe uya. ²⁸ Kesenalippatàu eyeyaton kon pàk. Molopai sàlà uya yekama màlà tok pàk tok uya eyentaika kon pen, molopai tok yentaika auya’nokon. Masapùla Kaatù mùkkàlà entaikantok ke elepayatài’nùk! ²⁹ Masapùla elepasak kon màlà Christ Jesus yapyoto pe ewettok kon ke, ailon tetok neken auya’nokon ipàk winà pùla, tùse nàlà ewettalumattàtok kon iponalok pe winà. ³⁰ Màlàpàk uchi sàlà wepanta’mantok yau we’nàpai man tamùkke. Sàlà màlà màlà lùppù ipanta’ma uya mentantàunùk pena, molopai màlà lùppù ipanta’ma pàk wessai’nùk, yeta auya’nokon kasa.

¹ Ewemattok kon na’ Christ yau meluntà pe àkussatàu? Pùnùnmantok ya na’ eyewan kon ipittàyan? Wakù Akkwalù pokonpe na’ echitonpa pe we’nàtok yesak pe messatàu? Usentuppantok molopai ànù’là kappon pùnùnmatok auya’nokon yesak pe na’ messatàu? ² Màlà kasa iwechi yau apawanattàyatàu iulà, kùyauchinpatàk kon kulu nen uchi ekkaichalà usenumenkantok yesak pe ewechi kon winà, pùnùnmantok winà molopai tùwe’wotokomaik tamùkke tewin itewan ewechi kon winà. ³ Amlek pe kettàu. Tùulon kon yentai pe tukaik kekkuttàu. Àssà’mùla ettàk kon tùulon kon yentai tiuchittuik pùla. ⁴ Àponalok kon pe neken ànkupù kon pàk kesenumenkatàu, tùse alikyek pe ettàk kon tùulon kon pùikattà pàk eusenumenka kon pàk. ⁵ Eusenumenkatok kon yau Jesus Christ kasa ettàk. ⁶ Kaatù là mùkkàlà tàwàlà. Tùse Kaatù pokonpe ekkaichalà tùwenai’che iwechippù pen. ⁷ Tùse làkku, tiyiwalà tamù’nawolon nonkappù ya. Molopai apyoto pe iwenappù kappon pe kùkasa. ⁸ Kappon pe là iwechippù. Àssà’mùla iwenappù màlà. Molopai mayin yawàlà weli’nàtok yanùmùppù ya, pulusuk po weli’nàtok. ⁹ Sàlà wenai Kaatù uya iwuluukappù kawon pata yak, namantok patassek yak. Molopai ilepappù ya tùulon kon esek yamùk yentaino esek ke. ¹⁰ Tamù’nawolon kon epùn pon kon, molopai non pon kon, molopai non yo’non kon wena toppe tese’mu kon yok. ¹¹ Molopai tamù’nawolon kon uya ayupo yekama màlà, Jesus Christ wechi Itepulu pe, Kaatù Kùkàipùnù yapulà toppe. ¹² Màlàpàk uchi, utonpa yamùk, tàwàlà mayin yawàlà ewechippù kon apyau’nokon wechi yau. Tùse sàlàpe apyau’nokon pùla là wechi tùse màlà yentak lùiwa yawàlà ewechi kon màlà. Màlàpàk e’wotokomatàk kon, tùwe’namaik molopai kùkùkù pe Kaatù ponalok pe ewechi kon yekama pe. ¹³ Masapùla Kaatù mùkkàlà tùwe’wotokomasen ayau’nokon tàwàlà, alikyek pe molopai meluntà pe amatok kon pe tùuya, teselu yawàlà ewechi kon pa. ¹⁴ Tamù’nawolon ikuttàk kon, tùusàulàmaik pùla wapùla tùwesseippàsse pùla. ¹⁵ Àli ku’nài nan pe pùla esuken Kaatù munkà pe, wakù pe tùwemassan pe ewechi kon pa. Molopai ikasa pùla àli pe kulu tùwemassan kappon yamùk wolù yawon kon kùlottau elenpantàk kon. Chilùkà yamùk ulenpansak kak yau kasa. ¹⁶ Wema’nàtok yekale yekamai’ma tok pàk. Màlà pàkànsau àpàkù’nokon utauchinpatok yesak pe wechi màlà Christ Weyu yattai, màlà uya yekama màlà yà’là woton pe pùla là we’wotokomappù pe pùla iwechi. ¹⁷ Ailon tetok auya Itepulu yau molopai ewe’wotokomatok màlà lepantok walai Kaatù pona. Molopai umùnù wekkwamù sàlà lepantok pona. Sàlà wekkupù yau utauchinpa màlà, molopai tamù’nawàlà àpokonpe’nokon utauchinpa. ¹⁸ Màlà kasa làma atauchinpatàk kon, molopai utauchinpanpai’nokon upokonpe. ¹⁹ Ailon ukayaik Itepulu Jesus pàk sàlàpe’ne là Timothy yeunoko uya apyakù’nokon pe iwechi pàk, umeluntàta toppe eyekale kon winà. ²⁰ Mùkkàlà neken mùkkàlà uyewan kaichalon itewan àpùikattà kon pàk alikyek pe kulu tùwessen. ²¹ Masapùla tamù’nawolon kon mùkyamlo tùnkupù kon pàk neken tùusenumenkasan, Jesus Christ pàkànsau pùla. ²² Tùse Timothy mùttuyatàik. Tùwe’wotokoma pàk iwessak man upokonpe, tùkàipùnù pokonpe imu we’wotokoma kasa. Ina we’wotokomasak man tamùkke, wakù itekale pàkànsau. ²³ Apyakù’nokon kan yeunoko uya ukayaik, yà’là kasa là talà tamù’nawolon wechi uwinàkàik ittusak uya yau. ²⁴ Molopai Itepulu Jesus pàk ailon te uya sàlà, iulà nàlà uyàpù pe tiuchittuik apyakù’nokon tachin pe tùpo pùla là. ²⁵ Kùtonpa kon, Epaphroditus yeunoko uya kulu apyakù’nokon pàk usenumenkasak man. Iwe’wotokomasak lùppù ukaichalà molopai iwepanta’masak lùppù upyau, amaimuppù kon yekamanài nàlà eneunokoppù lùppù upùikattà toppe ya. ²⁶ Eyenpai’nokon kulu man tamù’nawàlà molopai iichewankono’masak man e’nek pe tùwechi yekale yetasak auya’nokon pàk. ²⁷ Ewaik e’nek pe kulu iwechippù, iwelikùiwappù. Tùse Kaatù usentuppappù ipàk. Molopai mùkkàlà pàk neken pùla, tùse upàk nàlà. Molopai upùikattàppù ya màlà yentak usewankono’matok yapai. ²⁸ Eneunoppai kulu wessaik apyakù’nokon, autauchinpa kon pa tu’ma yene auya’nokon yau. Molopai usewankono’matok pùla iwena toppe. ²⁹ Manùntàik uchi, tamù’nawàlà tùutauchinpaik, àtonpa kon pe Itepulu yau. Tamù’nawolon kon pùsàlà yekkwa ton kappon yamùk mùnamatàik. ³⁰ Masapùla iwelikùiwappù Christ wotokoyi pàkànsau, alikyek pe tùwemattok tùlù tùuya yau ànkupù kon yentaino pàk upùikattà tùuya yau.

¹ Molopai we’nonka pe nen uchi, utonpa yamùk, tàwàichi Itepulu elepai’nokon eke pe utauchinpantok ke. Tùusetakkasen pen iulà màlà lùppù wapiya unmenukappù lùppù menuka tu’ma uya pàk. Àpùikattà kon ya màlà ittu kon pa kulu. ² Elannek pe ettàk kon mùkyamlo àli ton ku’nài nan pàk, mùkyamlo a’a yamùk walainon kappon yamùk, Jew yamùk yeselu yawà esak yattà màlà tawonnan. ³ Masapùla kùmyamlo mùkyamlo ipùkkù yattàsak kon kulu, Kaatù ponalok pe we’nà yekamanài pe Yakkwalù winà yapulànnan molopai tùutauchinpasan Christ Jesus yau. Molopai kiyiwalà’nokon tùutapulàsan pen kùmyamlo kùnkupùppù kon pàk, molopai kappon yeselu pàk. ⁴ Màlà yekkwa pàk lànen utapulà eppaino. Ànù’là uchittu tùutapulàtok ipàkànsau yesak pe tùse itentai upyau iwechi màlà. ⁵ Law yeselu yawà uyattàppù màlà 8 pe iku’nài wei yattai. Israel pa iulà utamo winà, Benjamin kok, esukenan Hebrew. Màlàpàk Law winà Pharisee iulà. ⁶ Law yawàlà kulu eppai wechippù màlà. Màlàyau ailon tawonnan Christ pàk talumattàppù uya màlà eke pe kulu. Tamù’nawolon Law kupùppù uya, màlàpàk iwalai pen pùla wechippù. ⁷ Tùse tamù’nawàlà màlà yamùk unepoloppù kasa unkupù tùkussaik yenu’masak kasa sàlàpe Christ pàkànsau. ⁸ Yà’làlà wakù, Christ Jesus Uyepulu tùttuyai’nùk walai pùn. Tamù’nawolon nonkasak uya sàlà. Molopai tenu’masen àlitta kasa ikupù uya, Christ neken nen uchi i’che wechi. ⁹ Molopai iponalok pe wechi ittu uya. Law winà wakù pe ikasa wettok pàkànsau Kaatù uya uyanùmùppù pen màlà. Sàlàpe nen uchi wakù pe we’nàtok, ikasa, Kaatù winàpai teposen ailon tetok Christ pàk yai yesak pe wessaik. ¹⁰ Christ neken ànùttupai wessaik molopai iwe’wuluukatok meluntàlù. Iwettalumattàppù pùkkù pe eppai wessaik molopai ikasa enapai iwelittok yau. ¹¹ Enpen echii’ma, iulà nàlà, uwuluuka toppe ya weli’nàtok yapai wema’nàtok yak. ¹² Sàlà yau yenuka’nùssak uya man te uya pùla man, wapùla wakù pe kulu wenakassak pùla man, tùse unepolo lùppù molo man masapùla Christ Jesus uya uya’chichak man. ¹³ Ewaik, utonpa yamùk, yepokassak uya pe uchittu pùla man. Tùse tewinan nà ku’nài iulà, màlà unpoi winà nai’nùk puttàka’nùpù uya molopai tamù’nawolon unùttu kupù uya uyemlotopon yepotoppe uya. ¹⁴ Màlàpàk tossalà aitun pe utàyaik teposen winàkàik. Kaatù uya kà’mantok Christ Jesus yai wema’nàtok epùn po, yepotoppe uya uyepeppù pe. ¹⁵ Tamù’nawolon kon uchi kùmyamlo iichemokkasak kon nùsenumenkaik tàwàlà sàlà kasa. Molopai yà’là yekkwa yau là tùpatalà eusenumenka kon yau, Kaatù uya yekama màlà àpàkù’nokon. ¹⁶ Tùse utànpai’nokon, màlà yepose utàn nai’nùk ye’ma tawàlà. ¹⁷ Utonpa yamùk, yentok ipàkàlà pe unkupùppù yawàlà ewechi kon i’che wessaik. Molopai mùkyamlo màlà yentok ipàkàlà pe ina nùkupùppù àponalok kon pe yawàlà kulu nai’nannùk winàpai esenupatàk. ¹⁸ Wapiya sàlà yekamapàtùppù uya àpàkù’nokon echipalà, molopai sàlàpe tekamatu’mayaik uyenu palu kùlottawàlà. Tukkan kon nemassan Christ welikùppù pulusuk po yeyaton pe. ¹⁹ Tok utà màlà mattantok yak. Masapùla eke pe ata’lettàpai tok wettok màlà tok kaatùyi. Tùwekkuli’matok kon yek làkku pàk tùutapulàsan mùkyamlo. Molopai sàlà non pon neken yà’là yamùk là, pàk tùusenumenkasan. ²⁰ Tùse kùmyamlo mùkyamlo epùn pon ipata ton. Molopai Kùpùikattànài uyàpù miyàlàpai màmuku pàk kulu we’nà’nokon man, Itepulu Jesus Christ. ²¹ Attu’mùnon sa’ne kùyesak kon mùyakanma ya màlà. Molopai kùkoneka kon ya wakù pe tesak kasa, meluntà yapulà pe tamù’nawolon nettok tùuya iwinà pe nai’nùk itepulu pe tùwettok yo’nokoik.

¹ Màlàpàk nen uchi utonpa yamùk, u’nùn pe kulu messatàik. Molopai eyenpai’nokon wessaik, masapùla utauchinpatok pe ewechi kon màlà, utapulàtok iwinà pe. Uwechiyakonnon, ailon pe ettàk kon Itepulu pàk. ² Amyamlo asa’lon kon nossan yamùk Euodia molopai Syntyche tàwà ekkaichalà tùusenumenkaik ettàk kon Itepulu Jesus pàkànsau. ³ Molopai àmàlà nàlà ailon we’wotokoma yakon, pùsamlo nossan yamùk pùikattà auya i’che wessaik. Masapùla tok we’wotokomasak man sa’man pe upokonpe wakù itekale yekama pàk Clement pokonpe tamùkke molopai tamù’nawolon kon tùulon kon we’wotokoma yakonnon, wema’nàtok yapon Kaatù kaletayi yau itesek nai’nannùk. ⁴ Tàwàlàlàichi tùutauchinpaik ettàk kon Itepulu Jesus ponalok pe ewemapù kon yawàlà. Wate uya tu’ma, tùutauchinpaik ettàk kon! ⁵ Wakù pe, àsà pe pùla mettàik tamù’nawolon kon pàk, Itepulu uyàpù màlà sàlàpe’ne là. ⁶ Tùutaimelunpaik kettàu yà’làlà pàk, tùse àwàpùlematok kon yau. Kaatù yekamappotàk kon, i’che kulu ewettok kon yennatàk ipàk, tenki tetok itewan pe tàwàlà. ⁷ Molopai Kaatù winàpaino echitonpa pe we’nàtok, kappon nùttu yentaino uya eyewan kon molopai eusenumenkatok kon mainanpa màlà wakù pe Christ Jesus yau. ⁸ Wenukapù pe, utonpa yamùk, eusenumenkatok kon pe màlà yamùk ailon pe nai’nannùk nechii. Molopai tapulàsen pe nai’nùk, ikasa nai’nùk, esuken nai’nùk, molùnpak nai’nùk, wakù pe kulu nai’nùk, molopai tapulàsan yek pe nai’nùk molopai tùnamasen pe nai’nùk. ⁹ Màlà eusenupappù kon ipàk molopai ananùmùppù kon uwinàpai ikuttàk kon, asaklàma umaimu molopai uyeselu yapai eneneppù kon. Molopai Kaatù elepanài’nokon echitonpa pe we’nàtok ke wechi apyau’nokon màlà. ¹⁰ Eke pe kulu utauchinpantok yesak pe wessaik wemattok yau Itepulu Jesus yau. Masapùla tachin pe tùpo lùkkwà là upùikattà tu’ma auya’nokon pàk. Tùttuyaik yà’làlà eneunoppai kulu ewechippù kon upyak, tùse mala là ikupù auya’nokon yentai iwechippù. ¹¹ Molopai i’che wechi pàk là wate uya pen sàlà, masapùla ittusak uya man uyewan tàlàkka’nùsse wechi yà’làlà itesak pe wettok pàk. ¹² Tùttuyaik yà’là kasa là yà’làlà pùla we’nà wechi, wapùla tukke là yà’làlà yesak pe we’nà, i’che we’nàtok yentai. Sàlà ittusak uya man i’nai là. Wapùla yà’là yattai là, uyewan tàlàkka’nùsse wettoppe, takkole là wechi yau wapùla iwan pe là, tukke là yà’làlà yesak pe wechi yau, wapùla mala là itesak pe wechi yau. ¹³ Tamù’nawolon kupù uya màlà Christ yai, umeluntàlù ke ulepanài yai. ¹⁴ Tùse wakù pe mettantàu upùikattà pàk wettalumattàtok yau. ¹⁵ Amyamlo Philippi pon kon nùttuyan Macedonia nànsak uya yau, wapiya kulu wakù itekale yekama pàk wechi yau, amyamlo neken so’chiyi tawon kon wechippù upùikkattàn nan pe. Amyamlo neken wechippù ulepannan pe molopai lepantok yeponnan pe uwinàpai. ¹⁶ Thessalonica po echii’ma upùikattà i’che wechi yattai tewin itekkwa neken pùla yeunokoppù auya’nokon upyak. ¹⁷ Lepantok yamùk neken nà enekkwappai wechi pàk pùla. Tùse àntùlùppù kon pàkàlà làkku itepeppù wenasak eke pe enenpai wechi pàk sàlà yamùk lepantok tùsak auya’nokon pàk. ¹⁸ Tamù’nawolon ulepatok auya’nokon yeposak uya man. Molopai i’che wettok yentai kulu nettai. Molopai sàlàpe tamù’nawolon i’che wettok yesak pe wessaik, Epaphroditus uya tamù’nawàlà ulepatok nessak man upyak apyapai’nokon. Sàlà yamùk wechi màlà wakù appoi’nan tùtùsen kasa Kaatù pona, itùsak yau Kaatù nanùmù pe nai’nùk molopai yauchinpanài pe nai’nùk kasa. ¹⁹ Molopai Kaatù Ukàipùnù uya i’che kulu ewettok kon tùlù màlà itesak pe tùwettok yawà tapulàtok yau, Christ Jesus winà. ²⁰ Tàwà Kaatù Kùkàipùnù kon tapulàtok yepoloi tàwàlàlà molopai tàwàlàlà. Emen. ²¹ “Wakù pe na’ messatàu?” tetok uya tamù’nawolon kon Kaatù ponalok kon pàk tùlù uya sàlà, Christ Jesus yai. Utonpa yamùk, talonkonnà upyawon kon kulu “Wakù pe na’ messatàu?” nùkayan àpàkù’nokon. ²² Tamù’nawolon kon Kaatù ponalok kon talonkonnà “Wakù pe na’ messatàu?” nùkayan Kin Caesar, yùwùk tawon kon kulu. ²³ Tàwà wakù pe we’nàtok Itepulu Jesus Christ yau tamù’nawolon kon piyau nechii. [Emen.]