JAMES

JAMES

¹ Sàlà kaleta màlà James, Kaatù molopai Itepulu Jesus Christ yapyoto winàpaino. “Wakù pe na’ messatàu?” tetok tamù’nawolon kon 12 pan kon ikkok Kaatù ponalok kon kappon yamùk, iwetta’nùssak kon piyak inmenukappù. ² Utonpa yamùk! Atauchinpatàk kon yà’là yekkwa là ittuntok uyàpù ewinàkài’nokon yau. ³ Masapùla mùttuyatàik ailon tetok auya’nokon uya màlà yekkwa ton ittuntok yawà àutà kon yau, ipàlikatok imeluntàlù pe we’nàtok wechi itepeppù pe. ⁴ Tamù’nawolon tùpàlikaik ettàk, meluntà pe ewena kon pa, appù pe, ikasa tamù’nawàlà. ⁵ Tùse ànù’là àklottau’nokon nai’nùk wechi pukkek pùla yau, iwàpùlema màlà, itùnài tùpyak yekamappo ya, masapùla Kaatù mùkkàlà tamù’nawolon kon lepanài tùusetakkaik pùla molopai tùusàulàmaik pùla. ⁶ Tùse yekamappo tùuya yau ailon te ya màlà iwekkupù na’màichi lù tukaik pùla, masapùla ànù’là na’màichi lù tawon wechi màlà chipa’chipa palau pon kasa, màlà tùutàsen pe nai’nùk molopai tùutasse’masen assetun winà. ⁷ Ànù’là mùkkàlà yekkwa kappon yà’làlà yepolo tùuya Itepulu winàpai pe kùsekamatak. ⁸ Masapùla asa’là iichenumenkatok wechi màlà tamù’nawolon tùnkupù yau. ⁹ Tàwà yà’là pùn ailon tawon nùtauchinpai, masapùla Kaatù uya tanùnsak pàk, eke kulu mùkkàlà Kaatù yenu yau. ¹⁰ Tàwà temamin kenan ailon tawon kappon tùutauchinpaik nechii masapùla Kaatù uya tùnuttàsak pàk, àssà’mùla tùmasak ya pàk. Masapùla temamin kenan wena ipla màlà wanak yùpùlù kasa. ¹¹ Wei tùwepakkasen molopai tùwa’mintasen a’nek pe molopai tùwattasen yaipùtanù’nài, itùpùlù tùwessolokasen molopai wakù pe iwettok tùumattasen. Màlà kasa làma temamin kenan kappon umatta màlà tùusemaminnùttà pe yekama ya tùse. ¹² Tùutauchinpasen mùkkàlà kappon ailon pe tùwessen ittuntok kùlottawàlà. Masapùla ittuntok yentaikasak ya yau ilepa màlà wema’nà yalùko ke, e’mantok Kaatù uya itùlù tùuya tù’nùnmannan piyak teppù lùppù ke. ¹³ Tùttusak yau ànù’là “Kaatù uya uyamùipasak nai’nùk,” kùkkatak. Masapùla àli uya Kaatù yamùipa pen màlà molopai Kaatù mùkkàlà ànù’là yamùipanài àli ke pen. ¹⁴ Tùse kappon mùkkàlà tùttutok ke tùutamùipasen, molopai màlà uya imalentàsak àli ànkuppai iwettoppe. ¹⁵ Màlàyau àli ànkuppai iwettok màlà àli yak yanài, molopai àli kuttok ya màlà iwenukapù pe weli’nàtok yak yanài. ¹⁶ Màlàpàk kesenkuttàtàu, utonpa yamùk u’nùn ton! ¹⁷ Tamù’nawolon wakù iwalai lepantok màlà tùuyàssen epùn poi Kaatù winàpai, tamù’nawolon pata weyu yamùk kau nai’nùk màlà inkonekappù. Tùwemyakammasen pen, molopai tùwelattà yau ewalupà ne’nài pen. ¹⁸ Teselu winà Kaatù uya kùnepùppù kon màlà ailon tùmaimu yai emennak wema’nàtok yak, wapiyalok pata yau we’nà toppe tùponalok kon kappon yamùk kùlottau. ¹⁹ Sàlà ittutàk kon, utonpa yamùk kulu! Tàwà tamù’nawolon kon asse’ne yetannan pe nechii, tùse tànànpàk tùuselupasan pe, molopai asse’ne tùwe’naikasen pe pùla. ²⁰ Masapùla wakù Kaatù yeselu wekkuttok pùikattànài pen màlà kappon we’naikatok. ²¹ Màlàpàk uchi tamù’nawolon àli ton eyeselu kon inonkatàk kon Kaatù Maimu yawàlà ettàk kon àssà’mùla, àsà pe pùla molopai màlà imaimu inpàmàppù eyewan kon yak yanùntàk kon, màlà àpùikattànài’nokon pe nai’nùk. ²² Kaatù Maimu yetannan pe neken kettàu, eyiwalà’nokon kesennakatàu. Tùse iku’nài nan pe làkku ettàk kon. ²³ Masapùla ànù’là imaimu yetanài tùse iku’nài pen wechi màlà kappon wanamali yak tenpata yennài kasa. ²⁴ Tùusensen mùkkàlà molopai tùutàsen molopai asse’ne ànùk kasa là tùuseneppù puttàka’nù’nài. ²⁵ Tùse mùkkàlà, Law Kaatù winàpaino yennài echipalà, kappon yamùk pùikattànài àli kuttok yapai yennài molopai yene pàk tùwessen, tùnetappù tùputtàka’nùsse pùla tùse iku’nài, mùkkàlà pùlema màlà inkupù yawàlà. ²⁶ Ànù’là àklottau’nokon nai’nùk, Kaatù ya’lon pe tiuchittusen tùse tani yesak pe tùwessen pen wechi màlà yà’làlà wakù pùla, molopai iichennaka Kaatù ya’lon pe iwechi wechi iwoton pe pùla. ²⁷ Sàlà màlà wakù pe esuken we’nàtok Kaatù Kùkàipùnù yemlotopo, ichan pùnon molopai ikàipùnù pùnon mainanpa molopai itayappù iweli’chak kon mainanpatok wettalumattàntok yau, molopai mattanù’nài àli yeselu winàpai we’nà màlà wakù.

¹ Utonpa yamùk! Atta ken ewemapù kon ailon tawonnan pe Christ Jesus tùnamasen Itepulu yau, temamin kenan kon yanùmù auya’nokon molopai entuppa’no, yà’là pùn nulunpa auya’nokon yau? ² Yattai pùla kappon uyàpù epekkek pon yak tùwepontàse wepili’nàtok itak tak, molopai epekkek kolù lin itemyatù pàk, molopai màlà yattai làma tùulon kappon uyàpù iichàpùttùmùnkasak pon yak iwepontàsak. ³ Molopai inama pe wakù pe ewechi kon mùkkàlà wakù pe iwepontàsak pàk molopai, “Sàlà wakù aponnok pona eleutakà sàlà motau,” te auya’nokon ipàk, tùse entuppa’no, yà’là pùn pàk, “Satik pe ekkà wapùla chichiu pe ekkà non po utta piyau,” te auya’nokon. ⁴ Sàlà kupùichi auya’nokon yau tùpatalà’ne we’nàtok mùkussatàik àklottau’nokon molopai àli pe eusenumenkatok kon winà messatàik. ⁵ Yetatàk kon, utonpa yamùk! Kaatù uya entuppa’no kon, yà’là pùnon kappon yamùk sàlà wolù yawon kon yanùnsak màlà eke pe ailon tetok yesak pe tùwessan pe molopai Kaatù wettok itepulu pe yesak pe tok wettoppe itùlù tùuya tù’nùnmannan yemyak teppù ya lùppù. ⁶ Tùse entuppa’no kon nulunpannan amyamlo! Ànùk ken atalumattànnan molopai ayanài’nokon ittunài yemlotopona? Mùkyamloichi temamin kenan kon! ⁷ Pùsamloichi mùkyamlo tùuselupasan àli pe wakù eyesek Kaatù uya elepatok kon winàkàik. ⁸ Itepulu maimu iwe’menukasak nai’nùk, “Kappon i’nùnmatàk kon euchi’nùnma kon kasa,” tawon maimu yawàlà ewechi yau, iwalai kupù auya pe iwechi màlà. ⁹ Tùse tùmenkaik neken awakùli pe kappon yamùk kupù auya’nokon yau, ewemakuima kon màlà molopai Law maimu yawàlà pùla ewechi kon yau ikkwàtù auya’nokon. ¹⁰ Masapùla kappon wechi tamù’nawolon Law maimu yawàlà, tùse tewinan itonpa ikkwàtù ya, màlàyau tamù’nawàlà kulu ikkwàssak ya màlà. ¹¹ Masapùla mùkkàlà lùppù, “Anmali’mappù kon pen pokonpe kettàu,” tawon uya, “Kappon wànài pe kettàu,” tesak nàlà màlà. Anmali’mappù pen pokonpe pùla lànen ewechi tùse, Law ikkwà’nài pe ewenasak màlà kappon wànài pe ewechi yau. ¹² Eselupatàk kon molopai elaikatàk kon kappon yamùk pe tùttusan woton kon pe Law maimu winà kappon yamùk nonkanài molopai tok mokkanài winà. ¹³ Masapùla Kaatù uya usentuppantok yenpoika pen màlà kappon iichentuppasak lùppù pen pàk àli pe messaik wapùla wakù pe messaik te tùuya yau, tùse usentuppantok màlà àli pe messaik wapùla wakù pe messaik tawon yentaikanài. ¹⁴ Utonpa yamùk! Yà’là ken wakù molo nai ailon tetok yesak pe kappon wekkupù tùse iwelaikatok uya yekama pùla iwechi yau? Màlà ken na’ ailon tetok uya ipùikattà? ¹⁵ Yattai pùla là ànù’là kàyik wapùla nossan wechi ipon pùla molopai iteipa pùla tùse, ¹⁶ “Tàwà Kaatù wakù kupùi àponalok pe! Kàkàmittai molopai mata’lettàtàik wakù pe!” te auya’nokon tok pàk. Yà’là yekkwa ken wakù molo nai tok lepai’ma pùla pon ke molopai kùyali ke wate auya yau? ¹⁷ Sàlà kasaichi ailon tetok wechi màlà tewincha iwechi yau, yà’làlà tùkusse pùla molopai iwelaikatok pùla iwechi yau iwelikkassak màlà. ¹⁸ Tùse tùulon uya, “Ailon tetok yesak pe messaik molopai welaikantok yesak pe wessaik,” te wakù lùkkwà là kupùi’ma pùla. Yekamakà upàk yà’là kasa ailon tetok yesak pe ewechi iwelaikatok pùla, yekama uya kulu àpàk ailon tetok uya wechi inkupù pokonpe. ¹⁹ Ailon tawonnan amyamlo tewinan neken Kaatù wechi molo pàk. Wakù pe man! Àli yakkwalù yamùk nàlà mùkyamlo ailon tawonnan, molopai ipla kùkùkù pe tùwettalipasan. ²⁰ Pakko kappon! Yekama na’ àpàk i’che messan ailon tetok wechi iwelaikatok pùla là tapulàsen pe pùla? ²¹ Atta ken kùtamo kon Abraham yanùnsak wechippù ikasa Kaatù pokonpe? Iwelaikatok pàkàlà nen iwechippù màlà, tùmu Isaac tùlùppù ya Kaatù ponalok pe tùpottàsen patassek pona. ²² Yene na’ auya’nokon pùla nai? Ailon tetok ya molopai iwelaikatok we’wotokoma tamùkke asaklàma, ailon tetok ya wekonekappù màlà wakù pe kulu iwelaikatok pàkàlà. ²³ Molopai iwekkupùppù Kaatù Maimu uya wateppù kasa, “Abraham uya ailon teppù Kaatù pàk, ailon tetok ya pàkànsau Kaatù uya yanùmùppù wakù pe iwechi pàk,” tukaik. Molopai Kaatù uya yesatùppù, “Uwechiyakon Abraham,” tukaik. ²⁴ Màlàpàk uchi menyatàik kappon yanùmù ikasa Kaatù pokonpe inkupù pàkànsau molopai ailon tetok ya pàkànsau neken pùla. ²⁵ Màlà kasa nàlà àli nossan Rahab itesek wechippù màlà. Iwotokoyi pàkànsau ikasa yanùmùppù, Israel payan elaik pe tùwessan, mayin yekamannan yanùnsak ya tùutauchinpaik molopai tùulon asanta tawà tok wennappo toppe yekamasak ya pàk. ²⁶ Màlàpàk yakkwalù pùla nai’nùk kappon wechi iweli’chak pe kasa làma nàlà, iwelaikatok pùla nai’nùk ailon tetok wechi màlà iweli’chak pe.

¹ Utonpa yamùk! Elannek pe ettàk kon tukke kulu là enupannan pe eppai kettàu, masapùla mùttuyatàik ina enupannan ittutok wechi màlà àsà pe lùiwa tùulon kon yentai. ² Tamù’nawolon kon kùmyamlo mùkyamlo echipalà’ne ikasa pùla tùwessan. Kappon ikasa pùla tùwessen pen tùuselupatok winà mùkkàlà wakù kulu, molopai ikasa neken tùwessen kappon, molopai tamù’nawàlà tesak yepulu pe tùwessen. ³ Kawale mùta yaulonnài nan kùmyamlo, kùmaimu yawàlà iwettoppe, molopai i’che we’nàtok yak iità toppe iku’nài nan. ⁴ Wapùla masa kanau yentàk kon, eke pe lànen iwechi molopai meluntà assetun winà tùutàsen, tùse elekkwà kanau yuklatok ke yanài mùkkàlà yanài iità toppe i’che tùwettok yak. ⁵ Sàlà yekkwaichi màlà ani, elekkwà pe lànen echii’ma, tùutapulàsen eke pe kulu. Yentàk kon eke pe apok uyatù elekkwà apok yalàn ke iiyassak. ⁶ Molopai ani màlà apok, iwanùssak àli ke molopai maippanài tamù’nawàlà pùnaimanài awàlà molopai tamù’nawolon wema’nàtok pottànài apok tùusà’nùssen pen apok patassek yapai iyàssak tùpona ke. ⁷ Tùpatalo’nan nà kamo yamùk, tolon yamùk, àkài yamùk, molopai tuna kawon kon mùkyamlo tùwesepansan, kappon nesepanka ton mùkyamlo. ⁸ Tùse ànù’là kappon uya ani yesepanka pùla iwechi màlà. Àli màlà, itepulu pe ànù’là wechi yentaino molopai maippanài weli’nà toppe ke iwanùssak màlà! ⁹ Yapulànnan kùmyamlo tenki tetok ike pe Kùyepulu kon molopai Kùkàipùnù pàk, molopai kùtonpa kon pa’nùttok nàlà ike pe, mùkyamlo ikonekasak kon Kaatù kasa. ¹⁰ Tenki tetok molopai pa’nù’nàtok màlà tùwepakkasen màlà lùppù mùta yai. Utonpa yamùk! Sàlà kasa kùsettak! ¹¹ Wakù tuna yeuta yai maik là tuna wepakkasak pùla iwechi màlà. ¹² Utonpa yamùk, fig yek ken na’ tùwepetasen Olive pe? Wapùla chi’nak ken na’ tùwepetasen fig pe? Kanekku! Wapùla ine’nek tuna, molopai ine’nek pen tuna wessepolo màlà lùppù iten yapai pen màlà. ¹³ Pukkek molopai ittunài na’ kappon molo nai àklottau’nokon? Tàwàichi mùkkàlà nekamai wakù pe tùwelaikatok molopai teselu winà, pukkek pe we’nàtok yai àsà pe pùla ikonekasak nai’nùk. ¹⁴ Tùse eyewan kon wechi kùlùmàk pe, àsà pe molopai amlek pe yau, katapulàtàu molopai ailon winàkàik kasei pe kettàu. ¹⁵ Sàlà yekkwa pukkek màlà epùn poino pen, wolù yawon yeselu màlà, iwekkupù màlà àli eyeselu kon winàpai, Makui winàpaino pe iwechi. ¹⁶ Masapùla kùlùmà molopai amlek pe we’nàtok wechi molo yau, utaimelunpantok wechi màlà molo molopai tamù’nawolon àli ton wechi. ¹⁷ Tùse pukkek pe we’nàtok màlà epùn poino, wapiyalok kulu wakù esukenan, ewan wàlàkkattok, àsà pe pùla we’nàtok tùwanmùla, alomùla, molopai echitonpa pe ku’nài, usentuppantok ke iwanùssak màlà molopai wakù eselu ne’nài, tamù’nawolon kon namatok ekkaichalà yenpoikanài molopai ennakanài pùn. ¹⁸ Molopai echitonpa pe we’nàtok konekannan mùkyamlo ikasa we’nàtok pànnài nan echitonpa pe we’nàtok yau.

¹ Yà’là yamùk ken wepanta’mantok molopai we’naikantok salattànài àklottau’nokon? Àli ànkuppai ewettok kon winàpai ku tùuyàssan, eyesak kon yau tùwepanta’ma pàk echipalà nai’nùk winàpai. ² Yà’làlà i’che ewechi kon tùse yepolo auya’nokon pùla iwechi. Màlàpàk e’wàpai ewechi kon molopai tùulon yemamin i’che ewechi kon, tùse yà’làlà i’che ewettok kon yepolo auya’nokon pen. Màlàpàk àusàulàma kon molopai ewepanta’ma kon. Ipla ewechi kon màlà masapùla Kaatù pàk yenna auya’nokon pùla iwechi pàk. ³ Molopai yenna auya’nokon yau yeponnan pen amyamlo masapùla eyeselu kon wechi àli pe pàk, yà’làlà yenna auya’nokon yapulà kon pa àli ànkuppai ewettok kon pona suwalà tùusenumenkaik pùla. ⁴ Ailon ton pen kappon yamùk! Ittuichi auya’nokon pùla nai wolù yawon kon àli ku’nài nan wechiyakon pe we’nà wechi Kaatù yeyaton pe? Ànù’là wolù yeselu ku’nài nan kappon yamùk wechiyakon pe eppaino wekkupù màlà Kaatù yeyaton pe. ⁵ Kaatù Maimu uya yà’là tesak pe mùttuyatàu, “Kaatù uya Akkwalù ke lepansak nai’nùk molopai tùponalok pe neken kulu wema’nà i’che iwechi màlà,” tesak ya yau. ⁶ Tùse wakù pe we’nàtok Kaatù winàpaino màlà meluntà kulu. Masapùla Kaatù Maimu uya, “Kaatù yeyaton mùkkàlà tùtonpa yentai tùwekkussen, tùse wakù pe we’nàtok tùwinàpaino tùnài àssà’mùnon piyak,” te pàk. ⁷ Kaatù yemyak uchi ettùtàk kon. Makui, inulunpatàk kon, molopai iwepe màlà ewinàpai’nokon. ⁸ Àittàk kon Kaatù piyak mei pùla molopai iyàpù màlà mei pùla apyakù’nokon. Eyemyatù kon ikukatàk kon amyamlo makui yawon kon, molopai eyewan kon esuken ikuttàk amyamlo asa’lon iichenumenkatok kon! ⁹ Esewankono’matàk kon, àpokoitatàk molopai akalantàk kon. Tàwà àwàklàtok kon nelattài akalantok kon pe molopai autauchinpatok kon pokoitantok pe. ¹⁰ Àssà’mùla enatàk kon Itepulu yemlotopo molopai ayanùmù kon ya màlà. ¹¹ Àtonpa kon kùttalumattàtàu, utonpa yamùk. Ànù’là tùtonpa talumattànài wapùla suwa messaik tawon, uselupa màlà Law Kaatù winàpaino winàkàik molopai italumattà ya. Law Kaatù winàpaino talumattà auya’nokon yau, imaimu yawolon pe ewechi kon pen màlà, tùse imottùnpanài pe ewechi kon. ¹² Kaatù neken mùkkàlà Law ke lepanài molopai ittunài. Mùkkàlà neken mùkkàlà pùikattànài, molopai ittunài. Ànùk pe ken mechittuyatàu àtonpa kon pàk suwa messaik te kon pa? ¹³ Masaichi kùyetatàk kon amyamlo, “Sàlàpe wapùla ewanawà utàn’nokon màlà tùulon pata yak, molo tachin pe ko’mannà tewin kili’chimo’chi, yà’làlà ye’ma màlà wapùla yà’làlà chilanma, molopai pùlayatta yepolo eke pe,” tawonnan. ¹⁴ Ittu auya’nokon pùla iwechi màlà yà’là kasa là ewanawà ewemattok kon wechi! Masapùla chiwou pe nùtàyai’nùk katupluk kasa ewechi kon pàk, tensen pe mala là molopai ipla tùwenasen pe nai’nùk. ¹⁵ Suwa làkku euselupa kon màlà “Itepulu yeselu pe iwechi yau, wema’nà màlà molopai sà kupù màlà wapùla mà kupù’nokon màlà,” tukaik. ¹⁶ Tùse sàlàpe eke pe tukaik tùwekkussan amyamlo molopai tùutapulàsan. Tamù’nawolon màlà yekkwa ton màlà àli iwalai pen. ¹⁷ Màlàpàk kappon wakù tùnùttu ku’nài pen uya àli kupù màlà.

¹ Molopai uchi amyamlo temamin kenan kon kappon yamùk kùyetatàk kon! Àpokoitatàk kon molopai akalantàk kon eke pe talumattàntok nùyàssai’nùk àpona’nokon pàkànsau. ² Eyemamin kon wa’motasak man molopai àpon kon yansak ene yamùk uya man. ³ Kolù molopai chilùpa itesak pe ewettok kon wenasak man iklùn pe, molopai sàlà wechi màlà tùuselupasen pe ewinàkàik molopai àpun kon yanù màlà sàlà yamùk uya apok kasa. Mamin pili’chak auya’nokon man sàlà yattai iwenukapù pe. ⁴ À’mà kon yau tùwe’wotokomasan kappon yamùk ye’mappù auya’nokon pùla man. Tok usàulàmaichi yetatàk kon! Molopai mùkyamlo ànpàmàppù kon pili’nài nan kalantok uya Itepulu, Mùkkàlà neken Meluntà pana yeposak man. ⁵ Talà ewemapùppù kon man wakù pe tukke itemamin molopai i’che ewettok kon kupù pàk. Kaiwan pe ewenasak kon man wàntok weyu yattaino pe. ⁶ Yà’làlà àli ku’nàippù pen kappon talumattàsak auya’nokon man molopai iwàsak auya’nokon, mùkyamlo ewinàkài’nokon là tùwepanta’mai’che tùwessan pen. ⁷ Tùusetakkaik pùlaichi àpàlikatàk kon utonpa yamùk, Itepulu uyàpù ponalà. Masa yentàk kon yà’là kasa là umà pànnài wechi tùusetakkaik pùla tùnpàmàppù umla molopai iwepeta màmuku pàk. Wapiyalok molopai ite’mappù pokon konok màmu’nài mùkkàlà. ⁸ Molopai amyamlo nàlà tùusetakkaik pùla àpàlikatàk kon! I’napailà meluntà pe enpen ewettok kon nechiik, masapùla Itepulu uyàttok wechi mei pùla pàk. ⁹ Kàsàulàmatàu àtonpa kon winàkàik, utonpa yamùk, atalumattà kon tukaik. Talumattànài mei pùla man, iwekonekasak tùusenpoika toppe. ¹⁰ Utonpa yamùk, Kaatù Maimu yenpoikannan nùssan Itepulu yesek yau ittutàk kon. Eyenu kon yappolù pe tok nechii. Tùusetakkaik pùla tok wechippù tùwettalumattàtok kon yawàlà lànen kan. ¹¹ Tùutauchinpasan tukaik tok yesa’nài nan kùmyamlo masapùla tok uya pàlikansak pàk. Pàlikantok Job uya yetappù auya’nokon, molopai mùttuyatàik Itepulu uya Job pùikattàppù iwenukapù pe. Masapùla Itepulu Kaatù mùkkàlà usentuppantok yesak eke pe. ¹² Molopai màlà yamùk yentak, utonpa yamùk, “Ikupù uya màlà,” te auya’nokon yau, wa kùkatàu “epùn yesek là tesasse,” wapùla “non yesek là,” wapùla yà’làlà winà. “Ewaik” mùkatàik, “ewaik” te auya pe iwechi yau, wapùla “Kane” mùkatàik “kane” te auya pe iwechi yau màlà kasa neken iwechi yau, Kaatù uya talumattàntok yo’no ewechi kon tukaik. ¹³ Ànù’là na’ tùwettalumattàsen molo nai àklottau’nokon? Tàwà nàpùlemai. Ànù’là na’ nùtauchinpayan àklottau’nokon? Tàwà nùselenpai Kaatù yapulà pe. ¹⁴ Ànù’là na’ e’nek molo nai àklottau’nokon? Tàwà so’chi yepulu pe tùwessan kà’mai, tùpona tok wàpùlema toppe te’netù uchipittà toppe molopai kalapa ke tùkalapaima toppe tok uya Itepulu yesek yau. ¹⁵ Sàlà wàpùlemantok kussak ailon tetok yau uya e’nek kappon ipittà màlà. Itepulu uya iwuluuka màlà molopai e’nek pe pùla iwechi, molopai iwemakuimasak yau usentuppantok yepolo ya màlà. ¹⁶ Màlàpàk amakuyi kon yekamatàk kon àtonpa kon pàk, molopai àpùlematàk kon àtonpa kon pona, euchipittà kon pa. Masapùla wakù iwalai kappon wàpùlematok màlà meluntà pe apàikkek pe tùwe’wotokomasen. ¹⁷ Elijah wechippù màlà kappon pe kùkasa’nokon. Iwàpùlemappù i’napailà kulu konok pùla iwettoppe, molopai konok utappù pen àsolùwau kili’chimo’chi, molopai 6 pe kapùi ipona. ¹⁸ Molopai iwàpùlemappù tu’ma, molopai kak utakkokappù màlàyau konok utappù, non uya yà’làlà ipànsak lùppù yumlanùpùppù molopai yepetanùpùppù ya. ¹⁹ Utonpa yamùk! Tewin nà àklottau’nokon tùwessen utatù ailon winàpai, molopai tùulon kon uya inettu’ma yau, ²⁰ sàlà mùttutàik. Ànù’là tùmakuyi yawon mùnapponài ikasa pùla iwettok winàpai uya mùkkàlà àli makui ku’nài yakkwalù pùikattà màlà weli’nàtok winàpai, molopai tukkan tok makuyi pàk usentuppan màlà.