GALATIANS

GALATIANS

¹ Sàlà màlà Paul molopai tamù’nawolon kon kùtonpa kon yamùk ailon tawonnan winàpaino. Paul teunossen, yeunottok uyàpùppù màlà kappon winàpai wapùla kappon winà pùla. Tùse Jesus Christ molopai Kaatù kùkàipùnù kon winàpai, mùkkàlà iweli’chak yau iwuluukanàippù. ³ Tàwà Kaatù kùkàipùnù molopai Itepulu Jesus Christ elepai’nokon wakù pe we’nàtok molopai echitonpa pe we’nàtok ke. ⁴ Christ wettùlùppù màlà tùmàlà pe kùmakuyi kon ponalok pe kùpùikattà toppe tùuya sàlà italumayippù pata weyu winàpai, Kùkaatùyi kon molopai kùkàipùnù kon wettok i’che yawàlà. ⁵ Tàwà Kaatù piyau apulàntok nechii tàwàlàlà molopai tàwàlàlà! Emen. ⁶ Uyenumenkasak kulu auya’nokon man! Masapùla tachin pe pùla mùkkàlà Christ wettok wakù pe winà àkà’manàippù’nokon nonka auya’nokon pàk, molopai ewelattà kon pàk tùulon itekale pàkàlà. ⁷ Itekale pen kulu màlà. Tùse tùulon kon kappon yamùk utaimelunpantok yak àtùyatàu molopai Christ yekale mùyakanmai’che tok man. ⁸ Tùse ina là, wapùla epùn poino là inchelù uya itekale yekama tùpatalà, ina nekamappù àpàkù’nokon kasa pùla yau tàwà ipa’nùssak pe nechii tàwàlàlà. ⁹ Wapiya ina uya wateppù molopai sàlàpe tu’ma waukayaik. Ànù’là uya tùpatalon itekale ananùmùppù kon walai pen yekama yau, tàwà ipa’nùssak pe nechii tàwàlàlà. ¹⁰ Kappon yamùk yapulàtok nepùi’che na’ wechi sàlà, wapùla Kaatù? Wapùla kappon yamùk yauchinpai’che na’ wechi sàlà? Kappon yamùk yauchinpai’che lùppù wechi yau, Christ yapyoto pe wechi pen màlà. ¹¹ Ittu auya’nokon i’che wessaik utonpa yamùk, wakù itekale tekamatainùk àpàkù’nokon màlà kappon nùkonekappù pen. ¹² Ànù’là kappon winàpai yepolo uya pùn, wapùla ànù’là uya ipàk uyenupa pùn. Tùse, Jesus Christ uya yenpoikasak yanùmùppù uya. ¹³ Wapiya yà’là kasa là wemapùppù yetappù auya’nokon man Jew yamùk uya enupantok yawàlà wechi yau, tùusentuppaik pùla Kaatù so’chiyi talumattàppù uya molopai imattanùpùi’che wechippù. ¹⁴ Jew yamùk uya enupantok yawàlà wechippù tukkan kon uwalainon yentai. Ina tamo yamùk yeselu lùppù kupùppù uya eke pe. ¹⁵ Tùse Kaatù uya, wakù pe tùwettok yau, uyanùmùppù màlà wentu wapiya, molopai iitauchinpasak wechippù ¹⁶ Tùmu yenpoika pàk uyau, tekale yekama toppe uya Jew yamùk pen pàk, ànù’là yekamapposak uya pùla man sàlà pàk. ¹⁷ Wapùla utà pùn Jerusalem pona mùkyamlo yeunossak kon uwapiya yense. Tùse utàppù asse’ne Arabia pona, molopai nen uchi wennappoppù Damascus pona. ¹⁸ Àsolùwau kili’chimo’chi tùpo utàppù màlà Jerusalem pona, Cephas, Peter tukaik tesassen pokonpe essepose, molopai uko’mamùppù ipyau 15 pe wei. ¹⁹ Tùulon kon yeunossak kon yene uya pùn tùse James neken, Itepulu yakon. ²⁰ Sàlà tùmenukayai’nùk màlà ailon. Kaatù yemlotopo kasei pe wechi pen màlà. ²¹ Màlà tùpo utàppù Syria molopai Cilicia pona. ²² Christ yawon kon Judea pon so’chi yamùk tawon kon uya uyittu pùla iwechippù. ²³ Tok uya neken yekama yetappù, “Kàyik kùtalumattànàippù’nokon nen uchi ailon tetok itekale yekamayan, màlà imattanùpùi’che tùwechippù lùppù!” tukaik. ²⁴ Màlàpàk tok uya Kaatù yapulàppù upàkànsau.

¹ 14 pe kili’chimo’chi tùpo utàtu’mappù màlà Jerusalem pona, sàlà yattai Barnabas pokonpe. Titus yalàppù uya nàlà uya’là. ² Utàppù màlà masapùla Kaatù uya utà toppe yenpoikasak pàk. Molopai itekale unekamappù lùppù Jew yamùk pen pàk yekamappù uya màlà tok pàk. Tùse sàlà kupùppù uya màlà amak yai tok yennài nan pe tukaik tùwessan pokonpe. Masapùla pena wapùla sàlàpe unkupùppù uwotokoyi wechi yà’là woton pe pùla i’che pùla wechi pàk. ³ Uya’lonnà Titus, yeka’nonkappù Jew yamùk yeselu yawà yattà toppe pen màlà, Greek pe lànen tùse. ⁴ Sàlà kasa iwechippù màlà masapùla tùulon kon ina tonpa yamùk pe tukaik tùusennakasan uyàpùppù màlà ina kùlottak tùwanmùla Christ Jesus yau ina wemapù yense amak yai, molopai apyoto pe ina kusse. ⁵ Ina wettùlùppù mala là tok yemyak pen màlà, ailon pe itekale wettok wettoppe apyau’nokon. ⁶ Mùkyamlo nàlà eke ton ennài nan pe tukaik tùwessan, ànùk pe là tok wessak uya tùpatalà tok kussak pùla iwechi màlà upona. Masapùla Kaatù mùkkàlà polopo usennàtok pàk ittunài pen. Mùkyamlo là kàyik yamùk uya uselupatok tonpattàpàssak pùla man. ⁷ Tùse làkku Kaatù uya màlà ulepasak sàlà wotoko ke yeneppù tok uya. Itekale yekama pàk wettoppe Jew yamùk pen pàk. Màlà Itekale Peter lepappù tùuya lùppù ike Jew yamùk ponalok pe kasa. ⁸ Màlàpàk Kaatù yapàikketù winà yeunossak pe ukupùppù màlà Jew yamùk pen winàkàik, Peter kupùppù Jew yamùk piyak yeunossak pe kasa. ⁹ James, Cephas Peter tukaik tesassen molopai John tawonnan eke ton itepulu pe tùwessan nùttutai, Kaatù uya sàlà wotoko ke ulepasak. Màlàpàk ina yemyatù ya’chitai tok, Barnabas molopai iulà tawonnan. Echitonpa pe tamùkke tùwe’wotokomatok kon pe, Jew yamùk pen kùlottak ina utà toppe, molopai mùkyamlo Jew yamùk kùlottak. ¹⁰ Entuppa’no kon puttàka’nùpù ina uya tukaik neken tok uya ina yekamappoppù, màlà kulu ànkuppai wechippù. ¹¹ Peter uyàssak Antioch pona yau, yàulàmappù uya itenpatak, masapùla ikasa pùla kulu iwechi pàk. ¹² Kàyik yamùk uyàpù James piyapai wapiya, Peter wechippù tùuta’lettàsen pe Jew yamùk pen pokonpe. Tùse tok welepansak yau, iitamappù tok winàpai molopai Jew yamùk pen pokonpe pùla iwechippù, masapùla iichenalippappù màlà Jew yamùk usattà yeselu yawàlà Jew yamùk pen anattàpai tùwessan pàk. ¹³ Tùulon kon Jew yamùk wenappù iichennaka tonpa pe. Màlà tok usennakatok winà Barnabas nàlà wechippù tok kasa! ¹⁴ Tok utà ailon Itekale yeselu yawàlà pùla yene uya pàk, Peter pàk, tamù’nawolon kon yemlotopo, “Jew àmàlà, tùse Jew yamùk pen kasa memassaik, Jew kasa pùla. Yà’là kasa ken uchi Jew yamùk pen yeka’nonka auya màlà Jew yamùk yeselu yawàlà tok wemattoppe?” teppù uya. ¹⁵ Kùmyamlo mùkyamlo Jew yamùk wentu’nàppà winà, makui yawon kon Jew yamùk pen kùlottapaino kon pen. ¹⁶ Ina nùttuyan kappon yanùnsak ikasa Kaatù pokonpe ailon tetok ya Jesus Christ pàk yai neken, Law yawà we’nà winà pùla. Kùmyamlo uya nàlà ailon tesak man Christ Jesus pàk Kaatù pokonpe ikasa anùnnà toppe Christ yai, Law yawàlà we’nà winà pùla. Masapùla ànù’là yanùntok ikasa Kaatù pokonpe Law yawàlà iwechi winà pùla iwechi màlà. ¹⁷ Tùse kappon yanùntok ikasa Kaatù pokonpe iwa’nokon Christ yai yau, kùmakuyi kon usenpoika yau, Jesus uya ken na’ wemakuiman toppe ikupù màlà? Kanekku! ¹⁸ Masapùla màlà yamùk unnonkappù kuttu’ma uya yau, makui yau wechi pe iwechi yekama uya màlà. ¹⁹ Màlàpàk Law winà weli’chak man. Law uya uwàsak, Kaatù ponalok pe wemattoppe. ²⁰ Upukapàtùppù màlà Christ pokonpe nulà wechi tukaik, tùse Christ nemassan uyau. Sàlà esak yau wema’nàtok yau wemassaik ailon tetok uya Kaatù Mumu pàk yau, mùkkàlà u’nùnmanàippù molopai iwettùsak lùppù uponalok pe. ²¹ Wakù pe Kaatù wettok nonka uya pen sàlà. Masapùla kappon yanùntok ikasa Kaatù pokonpe Law yai pe iwechi yau, yà’là woton pe pùla Christ welittoppan.

¹ Pakko ton Galatia pon kon! Ànùk uya ken ayayaupasak kon màlà? Eyemloto kon po ku yene kon pa Jesus Christ pukapàtùppù pulusuk pona yekamappù uya àpàkù’nokon? ² Sàlà tewinan nà ànùttupai wessaik ewinàpai’nokon. Wakù Akkwalù uchi mepotantàu Law yawàlà ewechi kon winà, wapùla ka’ Itekale yeta molopai ailon te auya’nokon winà lù? ³ Atta ken uchi pakko pe kulu ewechi kon màlà! Akkwalù pokonpe ewepyattà kon tùpo na’ eyiwalà’nokon kappon yeselu yau yenuka’nùpùi’che ewechi kon màlà? ⁴ Iwoton pe pùla na’ ewettalumattàppù kon kulu màlà, iwoton pe pùla kulu iwechi yau? ⁵ Kaatù na’ mùkkàlà elepanài’nokon Takkwalù ke molopai tensan yekkwa ton pen ku’nài àklottau’nokon. Masapùla Law yawàlà ewechi kon pàk, wapùla ka’ Itekale yetasak auya’nokon pàk ailon tesak auya’nokon pàk lù? ⁶ Masa Abraham wechippù yenkà “Ailon teppù ya Kaatù pàk molopai màlà yanùmùppù ikasa tùwessen pe.” ⁷ Màlàpàk ittutàk kon, mùkyamlo ailon nùkayai’nannùk mùkyamlo Abraham munkà yamùk. ⁸ Kaatù Maimu uya yekamappù pena iwekkupù wapiya Kaatù uya Jew yamùk pen yanùntok woton ikasa tùpokonpe, ailon tetok tok uya winà. Molopai Itekale yekamappù ya màlà Abraham pàk pena, “Tamù’nawolon kon kappon yamùk pùlema màlà ayai,” tukaik. ⁹ Màlàpàk mùkyamlo ailon tawonnan pùlemasak màlà kàyik, ailon tawon Abraham pokonpe. ¹⁰ Mùkyamlo Law winà tùwepùikattài’che tùwessan wechi màlà pa’nù’nàtok yo’no. Masapùla Kaatù Maimu yau iwe’menukasak uya, “Ànù’là tamù’nawàlà iwe’menukasak nai’nùk Law yapon kaleta pàk, yawàlà tùwessen pen wechi màlà ipa’nùssak pe,” tesak màlà. ¹¹ Ailon màlà ànù’là kappon yanùmù ikasa Kaatù pokonpe pen, Law yawà iwechi winà. Masapùla Kaatù Maimu uya, “Mùkkàlà ikasa tùwessen wemapù màlà ailon tetok tùuya winà,” tesak pàk. ¹² Ailon tetok pokonpan pen màlà Law. Tùse kappon Law yawàlà tùwessen wemapù màlà ipàk. ¹³ Tùse Christ uya kùpùikattàsak kon sàlà pa’nù’nàtok Law nùnepùppù winàpai, ipa’nùssak pe tùwenaik kùponalok kon pe. Kaatù Maimu yau iwe’menukasak uya, “Ànù’là yei pàk ikaiwattàsak wechi màlà ipa’nùssak pe,” te kasa. ¹⁴ Pùikattànsak ya pùlemantok Abraham piyak itùsak lùppù uyàttoppe Jew yamùk pen piyak Christ Jesus winà, molopai kùmyamlo uya Akkwalù itùlù màlà teppù lùppù yanùntoppe ailon tetok yai. ¹⁵ Utonpa yamùk, kappon yeselu yapulà uya sàlà yentok ipàkàlà pe. Ànù’là uya kappon uya ewaik tàwà wa nechii tetok mùyakanma wapùla itonpattà pen màlà ikukkassak tùse, màlà kasa sàlà wechi màlà. ¹⁶ Kaatù uya, “Ikupù uya,” tetok tùuya kupùppù màlà Abraham pàk molopai ipa pàk. “Molopai ipayan yamùk pàk” te ya pùn, tùse “Molopai apa pàk” tesak ya, tewinan neken kappon Christ pàk. ¹⁷ Suwa te uya màlà nai’nùk, Law 430 pe kili’chimo’chi, Abraham tùpo iichenpoikasak lùppù uya, “Ikupù uya màlà,” teppù Kaatù uya lùppù yama wapùla imyakanma pen màlà ikukkassak ya tùse. ¹⁸ Pùlemantok yesak pe we’nà Law yawàlà we’nà winà yau, enpen we’nà, “Ikupù uya màlà,” teppù Kaatù uya lùppù pàk pen màlà. Tùse wakù pe tùwettok yau Kaatù uya Abraham lepappù màlà, “Ikupù uya màlà” tetok tùuya winà. ¹⁹ Yà’là woton pe ken uchi Law wechippù màlà? Itùlùppù màlà wemakuiman pàk we’nà pàk, mùkkàlà nàlà Abraham pa ikupù uya màlà teppù lùppù ipàk uyàpù ponalà neken tùwessen pe. Law tùlùppù màlà inchelù yamùk uya akletawon yemyak (Moses). ²⁰ Tùse yakletau tùwechi woton i’che we’nà pen màlà tewin kappon wechi yau molopai tewinan mùkkàlà Kaatù. ²¹ Sàlà ken na’ Law wechi màlà Kaatù uya ikupù uya màlà teppù lùssan wakkà’nài pe? Kanekku! Masapùla Law tùsak wema’nàtok tùnài pe yau, ikasa we’nàtok uyàpùppù kulu sàlà eppaino Law winà. ²² Tùse Kaatù Maimu uya tamù’nawolon kon kappon yamùk wechi màlà makui meluntàlù yo’no tesak màlà. Màlàpàk itùlù tùuya teppù Kaatù uya, itùsak lùppù ailon tetok Jesus Christ pàk winà tùlù màlà ailon tawonnan piyak. ²³ Ailon tetok uyàpù wapiya Law yo’no we’nàppà màlà imeluntàlù yo’no, sàlà ailon tetok usenpoika ponalà. ²⁴ Màlàpàk Law wechippù màlà kùyesak kon pe, kùyenupanài’nokon pe Christ uyàpù ponalà, ikasa anùnnà toppe Kaatù pokonpe ailon tetok yai. ²⁵ Sàlàpe nen uchi ailon tetok uyàssak man, Law yo’no làma pùla nen uchi we’nà man. ²⁶ Tamù’nawolon kon amyamlo wechi màlà Kaatù munkà pe Christ Jesus pàk ailon tetok auya’nokon winà. ²⁷ Masapùla tamù’nawolon kon mùkyamlo iichenpataukasak nai’nannùk Christ yak, wepontàsak màlà Christ yak. ²⁸ Màlàpàk tùpatalà we’nàtok pùla iwechi màlà Jew yamùk molopai Jew yamùk pen kùlottau, apyoto ton molopai apyoto ton pen kùlottau, kàyik yamùk molopai nossan yamùk kùlottau, tamù’nawàlà tewin ewechi kon màlà Christ Jesus yau. ²⁹ Christ ponalok pe ewechi kon yau, Abraham payan pe kulu ewechi kon màlà, molopai Kaatù uya itùlù tùuya teppù lùppù yanùmù auya’nokon.

¹ Tùse sàlà ittutàk kon. Walawok muleppù tùkàipùnù yemamin yanùmù woton tùkussen apyoto kasa mule pe iwechi yau, tamù’nawolon yesak pe lànen iwechi tùse. ² Tennài nan ke iwechi màlà molopai tenupannan ke, ikàipùnù nùkupùppù wei ponalà neken. ³ Màlà kasa làma là we’nàppà’nokon màlà. Sàlà wolù yeselu yapàikketù yapyoto pe. ⁴ Tùse iwalai iweyu uyàssak yattai, Kaatù uya Tùmu yeunokoppù. Iwentuppù màlà nossan yai molopai Law yo’no, ⁵ mùkyamlo Law yo’no tùwessan pùikattàse, Kaatù munkà pe wenantok kon pe. ⁶ Masapùla tùmunkà pe ewechi kon pàk Kaatù uya Tùmu Yakkwalù yeunokoppù màlà kùyewan kon yak, Akkwalù mùkkàlà yekamapponài “Abba, Ukàipùnù,” tukaik. ⁷ Màlàpàk Kaatù yai apyoto pe làma ewechi pen nen uchi màlà tùse imu pe. Molopai imu pe ewechi pàk, àkàipùnù yemamin yanùntok auya woton. ⁸ Pena Kaatù ittu auya’nokon pùla ewechi kon yau, kaatù yamùk iwalainon pen yapyoto pe ewechippù kon màlà. ⁹ Tùse sàlàpe Kaatù mùttuyatàik, wapùla, màlà yentak Kaatù eyittuyatàu, yà’là pe ken uchi iwechi pàk ennappopai ewechi kon màlà attu’mùnon molopai italumayi’chan eselu yamùk yak? Itapyoto pe tu’ma ka’ eppai messatàu miyalà lùppù lù? ¹⁰ Tùpatalo’nan wei yamùk yapulànnan amyamlo, kapùi yamùk, pata weyu yamùk molopai kili’chimo’chi yamùk! ¹¹ Usenalippayaik, yà’là woton pe pùla àpàkù’nokon we’wotokomasak yeselùkek iwechi pàk. ¹² Apawanattàyatàu iulà, utonpa yamùk, ukasa enatàk kon. Akasa’nokon wenasak pàkànsau. Yà’làlà iwalai pen kussak auya’nokon uwinàkàik pùla man. ¹³ Mùttuyatàik e’nek pe wechi pàk itekale yekamappù uya àpàkù’nokon wapiya. ¹⁴ E’nek pe wechi yau uyenpàtù auya’nokon pùn wapùla unulunpa auya’nokon pùn, uye’netù pe tùwessen upun yau pàkàlà wanittà pe wechi tùse. Tùse làkku kùyanùntantàu Kaatù inchelùyi yanùmù auya’nokon kasa, kùyanùntantàu Christ Jesus yanùmù auya’nokon kasa! ¹⁵ Yà’là pe ken autauchinpatok kon wechippù nai? Yekama uya sàlà màlà kasa ikupù auya’nokon yau eyenu kon mokkappù sàlà auya’nokon eppaino, molopai itùlù kon pa uyemyak. ¹⁶ Eyeyaton kon pe na’ wenasak nai ailon yekama uya winà? ¹⁷ Tùulon kon kappon yamùk mùkyamlo tùusennakasan kulu aya’chitok kon pe neken tùuya’nokon tukaik, tùse wakù ponalok pe pùla. Uwinàpai apantakai’che’nokon tok wechi màlà tùponalok kon pe neken ewechi kon pa. ¹⁸ Wakù pe iwechi màlà kappon yamùk wechi kulu eyi’che yau wakù pàkànsau. Tùse tàwàlàlà apyau’nokon neken nà wechi yau pùla. ¹⁹ Mule yamùk u’nùn ton amyamlo, àponalok kon pe sa’ e’nek we’chi’monsak walai yau tu’ma wessaik, Christ yeselu yanùmù auya’nokon eyewan kon yak ponalà. ²⁰ Apyau’nokon kulu eppai wessaik sàlàpe, tùulon pe eyelupatok kon pe uya. Utaimelunpasak kulu man àpàkù’nokon. ²¹ Masa upàk yekamatàk mùkyamlo Law yo’no eppaino kon, yà’là tesak là na’ Law uya yekamappù pùla nai àpàkù’nokon? ²² Kaatù Maimu yau iwe’menukasak màlà Abraham wechippù asa’lon kon imunkà, tewinan apyoto nossan yaino molopai yakon apyoto pen nossan yaino, tukaik. ²³ Apyoto nossan wentuppù màlà imu ke wentunsek kasa là, tùse apyoto pen nossan wentuppù màlà imu ke Kaatù uya ikupù tùuya teppù lùppù winà. ²⁴ Sàlà yamùk wechi màlà yentok ipàkàlà pe, pùsamlo nossan yamùk mùkyamlo asa’lon ikupù tùuya teppù Kaatù uya yekamannan. Tewinan nà mùkkàlà Sinai Tùpù winàpaino, tùumunkàtasen apyoto yamùk pe. Pùsàlà mùkkàlà Hagar. ²⁵ Hagar mùkkàlà Sinai Tùpù Arabia pon yekamanài molopai nàlà Jerusalem sàlàpe nai’nùk. Masapùla apyoto pe man tùmunkà yamùk pokonpe. ²⁶ Tùse Jerusalem epùn po nai’nùk mùkkàlà apyoto pen, molopai kùsan kon mùkkàlà. ²⁷ Masapùla iwe’menukasak màlà, “Mule ke iwentusak lùppù pen nossan, atauchinpakà, Eke pe entaimekà autauchinpa pe, àmàlà wentuntoppe we’chi’monsak ittunàippù pen! Masapùla nossan inonkasak lùppù umunkàta màlà tukke, nossan tùtayappù kenan yentai,” tukaik. ²⁸ Tùse utonpa yamùk, amyamlo mùkyamlo Isaac kasa Kaatù uya ikupù tùuya teppù lùppù munkà. ²⁹ Màlà yattai mùkkàlà mule wentunsek kasa iwentusak lùppù uya, Akkwalù meluntàlù winà iwentusak lùppù talumattàppù, molopai walùppù man sàlàpe. ³⁰ Tùse yà’là tesak ken Kaatù Maimu uya nai? “Apyoto nossan molopai imle yenpakkakà. Masapùla apyoto nossan mule uya tùkàipùnù yemamin pùkkù yepolo pen màlà apyoto pen nossan mule pokonpe,” tesak ya man. ³¹ Màlàpàk nen uchi, utonpa yamùk, apyoto nossan munkà pen kùmyamlo, tùse apyoto pen munkà.

¹ Imokkasak pe we’nà toppe sàlà Christ uya kùmokkasakù’nokon. Meluntà pe à’mùssakkatàk kon molopai apyoto pe tu’ma we’nàtok yak kettùtàu. ² Yetatàk kon, iulà Paul nekamayan àpàkù’nokon, ayattàtok kon pe ewekkupù kon Jew yamùk yattàtok yeselu yawàlà yau, iwoton pe pùla Christ wechi màlà àpona. ³ Wate uya tu’ma sàlà ànù’là kàyik yattàsak Jew yamùk yattàtok yeselu yawàlà pàk, “Tamù’nawolon Law yawàlà nechiik,” te uya. ⁴ Amyamlo Kaatù pokonpe ikasa tùwekkupùi’che’nokon nai’nannùk Law yawàlà tùwechi kon winà wepantakasak màlà Christ winàpai. Wakù pe Kaatù wettok yapai ewemokkasak kon màlà. ⁵ Tùse ailon tetok yai kulu imàmuku sàlà, ikasa we’nàtok Akkwalù winà enpen ipàk we’nà nai’nùk. ⁶ Masapùla Christ Jesus ponalok pe we’nà yau, Jew yamùk yattàtok yeselu yawàlà yattàsak pe we’nà wapùla yattàsak pe pùla we’nà uya tùpatalà’ne ku’nàsak pen màlà. Tùse ailon tetok màlà tùttusen kulu tùusenpoikasen uchi’nùnmantok yai. ⁷ Wakù ye’ma tawàlà ku mettantàu! Ànùk eyeleutanùttantàu molopai àkuttantàu ailon yawàlà ewettok kon pe pùla? ⁸ Kaatù àkà’manài’nokon winà iwekkussak pen màlà. ⁹ “Malalon nùkkwà màlà yapuluwetanùttok tamù’nawàlà pùlomù kùloimasak yau tùwe’wotokomasen.” ¹⁰ Tùttuyaik Itepulu yau tùulon usenumenkantok yanùmù auya’nokon pùla iwechi, molopai mùkkàlà utaimelunpantok yak àtùyatài’nùk talumattà màlà, ànùk pe là iwechi yau. ¹¹ Utonpa yamùk, yà’là pe ken iwechi pàk utalumattà sàlà Jew yamùk yattàtok wechi i’che kulu we’nàtok pe yekama pàk lùppù wechi yau? Màlà wechi ailon pe yau, Christ wettalumattàtok pulusuk po yekama pàk wettok uya tùulon kon utaimelunpatok kupù pen màlà. ¹² Mùkyamlo ayaimelunpanài pe nai’nannùk utà Jew yamùk yattàtok yentak i’che wessaik, tàwà tok nùsattàkapùi. ¹³ Amyamlo utonpa yamùk kà’mappù màlà apyoto pe pùla we’nàtok yak. Tùse sàlà apyoto pe pùla ewettok kon kùsapulàtàu àli ànkuppai ewettok yak ayanài’nokon pe. Tùse làkku tùwepùikattàse ettàk kon uchi’nùnmantok yau. ¹⁴ Masapùla tamù’nawolon Law pili’chak màlà tewinan usenupantok uya, “Ayakontalù i’nùnmakà eyiwalà mechi’nùnmayai’nùk kasa,” tawon. ¹⁵ Ayakontalù pokonpe euchikkapàtù kon pàk, ausanù kon pàk ewechi kon yau, masa yentàk, aumatta kon màlà eyiwalà’nokon. ¹⁶ Màlàpàk uchi wate uya sàlà, Akkwalù yau emattàk kon molopai àli ànkuppai ewettok kon yawàlà ewechi kon pen màlà. ¹⁷ Masapùla àli ànkuppai we’nàtok wechi màlà Akkwalù wettok i’che pe pùla molopai Akkwalù wechi màlà àli ànkuppai we’nàtok wettok i’che pe pùla. Echi’che pùla tok wechi màlà. Màlàpàk i’che ewettok kon kupù auya’nokon pen. ¹⁸ Tùse Akkwalù uya ayalà kon yau, Law yo’no ewechi kon pen màlà. ¹⁹ Àli kùyeselu kon yau welaikantok màlà tensen ayupo, nàkàlunnàtok, esuken pùla we’nàtok, àli neken ànkuppai kulu we’nàtok, ²⁰ ikonekasak kaatù yemlotopo wepeimantok, molopai meluntà àli akkwalù winàpai yeposak yapulàtok, tùulon kon yewanma’làtok, wakù pe tonpa pokonpe we’nà pùla we’nàtok, kùlùmàk pe we’nàtok, we’naikantok, molopai amlek pe we’nàtok, tùusàulàmaik we’nàtok, iwepantapàssak pe’ne, ²¹ tùulon yemamin i’che kùlùmàlunnàtok, [wànnan pe] wetùnnàtok, tamùkke kuli’mak akùlù pe kulu welaikantok molopai tùulon kon sàlà yekkwa ton ku’nài nan. Eyekamappoyatàu iulà wapiya eyekamappoppù kon uya kasa. Mùkyamlo sàlà yamùk ku’nài nan uya Kaatù wettok itepulu pe yepolo pen màlà. ²² Tùse Akkwalù winàpai tùuyàssan màlà wakù ton, pùnùnmantok, utauchinpantok, echitonpa pe we’nàtok, pàlikantok, usentuppantok, wakù pe àsà pe pùla we’nàtok, ailon pe we’nàtok, ²³ ten pe we’nàtok, molopai esak yepulu pe we’nàtok. Sàlà yamùk winàkàik law pùla iwechi màlà. ²⁴ Molopai mùkyamlo Christ Jesus ponalok kon uya tamù’nawolon àli ànkuppai tùwettok kon pukapàssak màlà pulusuk pona iteselu yamùk pokonpe. ²⁵ Akkwalù uya lepansakù’nokon wema’nàtok ke yau, Akkwalù wenaimapai’nokon uchi. ²⁶ Tùulon kon yentai pe tukaik wekku’nà kùsettak, wapùla tonpawannà pàk wessakolopan kùsettak, wapùla kùlùmàk pe we’nà kùsettak.

¹ Utonpa yamùk, ànù’là wemakuimasak pe iwechi yattai, amyamlo akkwalù yau nai’nannùk wechi màlà àsà yai pùla innapponnan pe iwalai yak. Molopai elannek pe mettàik, amyamlo nàlà usetaluipa àli ànkuppai tukaik. ² Inalà pe nai’nùk yalà pàk àtonpa kon ipùikattàtàk kon. Molopai sàlà kasa màlà Christ law yawàlà ewechi kon. ³ Ànù’là uchittu ànù’là yentai, ànùk pe pùla echii’ma yau, tiyiwalà iichennaka màlà. ⁴ Tamù’nawolon kon uya màlà tùwelaikatok kon ittu tiyiwalà’nokon. Wakù pe iwechi yau, iitauchinpaichi màlà tùnkupùppù pàk, tùulon kon nùkupùppù pokonpe yà’là kasa là iwechi tense pùla. ⁵ Masapùla tamù’nawolon kon uya tewincha tùnalà kon yalà pàk. ⁶ Ànù’là mayin ke tenupatok yanùnnài pe nai’nùk, tàwà tenupanài lepai wakù ton itesak pe tùwettok tonpa ke. ⁷ Kesennakatàu kesenkuttàtàu, ànù’là uya Kaatù mottùnpa pen màlà. Kappon uya màlà tùnpàmàppù mokka. ⁸ Mùkkàlà àli pe eppai tùwettok ke nàppànyai’nùk uya màlà àli teselu yepeppù pe wettalumattàntok yepolo, tùse mùkkàlà Akkwalù wettok i’che ke nàppànyai’nùk uya màlà Akkwalù winàpai tàwàlàlà wema’nàtok yepolo. ⁹ Màlàpàk wakù kupù pàk usetakkan’nokon kùsettak, masapùla iwalai iweyu yattai ipànsak lùppù mokka màlà usemya’nùnpansak pùla iwechi yau. ¹⁰ Màlàpàk uchi ikuttok yattai wechi molo kùlottau wakù ikuppai’nokon tamù’nawolon kon pàk, mùkyamlo kulu ailon tetok yau nai’nannùk pàk. ¹¹ Yentàk kon eke ton pe lùmà kaleta menuka uya sàlà apyakù’nokon, uyemyatù ke! ¹² Mùkyamlo teselu kon polopon yentoppe enenpoikapai nai’nannùk wechi màlà Jew yamùk yattàtok yeselu yawàlà ayattàtok kon pe eyeka’nonkai’che’nokon. Sàlà kupù tok uya màlà Christ pulusukù pàkànsau tùtalumattà kon tukaik. ¹³ Mùkyamlo nàlà Jew yamùk yattàtok yeselu ku’nài nan lànen mùkyamlo Law yawàlà tùwessan pen. Wa là tùse tok wechi màlà ayattà kon i’che, eyesak kon yattàsak pàk tùutapulàtok kon pe. ¹⁴ Tùse iulà, utauchinpa nen màlà Kùyepulu kon Jesus Christ weli’chak pulusuk pona pàk neken, màlà winà wolù iweli’chak kasa man upona molopai iulà iweli’chak kasa man wolù pona. ¹⁵ Yà’là pe pùla kappon yattàsak Jew yamùk yattà yeselu yawàlà wechi màlà, wapùla yattàsak pùla là iwechi wechi. Tùse làkku emennak pe ikonekasak pe we’nàtok. ¹⁶ Echitonpa pe we’nàtok molopai usentuppantok wechi màlà tamù’nawolon kon sàlà yawàlà tùwemassan po, Kaatù ponalok kon Israel yamùk po. ¹⁷ Uselupa wenukapù pe, ànù’là uwanittàpatak, masapùla uyesak pattàpàssak yàlùppù man upolo Jesus ponalok pe wechi yekamanài pe. ¹⁸ Kùyepulu kon Jesus Christ wettok wakù pe ayakkwalù kon yesak pe nechii, utonpa yamùk. Emen.