EPHESIANS

EPHESIANS

¹ Sàlà kaleta màlà Paul, Kaatù wettok i’che yawàlà Christ Jesus neunokoppù winàpaino, Kaatù ponalok kon [Ephesus po] tùwemassan piyak, mùkyamlo ailon ton tùwemattok kon Christ Jesus yau piyak inmenukappù. ² Tàwàichi Kaatù Kùkàipùnù kon molopai Itepulu Jesus Christ elepai’nokon wakù pe we’nàtok tùwinàpaino molopai echitonpa pe là we’nàtok ke. ³ Tenki tepai’nokon man Kaatù pàk, Kùyepulu Jesus Christ Kàipùnù pàk! Wakù pe kulu iwessak man kùpàkù’nokon, tamù’nawolon wakù lepantok epùn pon ke kùlepa kon tùuya yawàlà, masapùla Christ ponalok pe we’nà’nokon pàk. ⁴ Kaatù uya kùyanùnkassak kon wechippù màlà tùponalok pe Christ yau, wakù pe esuken we’nàtok kon pe temloto po. Pena wolù wessepolo wapiya pùnùnmantok tùuya pàkàlà, ⁵ Kaatù wekkussak wechippù màlà tùmunkà pe Jesus Christ yai kùnepù kon tùuya tùpyak pàk. Sàlà wechippù màlà iitauchinpa toppe molopai i’che iwettoppe. ⁶ Kaatù yapulàpai’nokon uchi man wakù kulu usentuppantok Kaatù winàpaino tenumenkaik, Tùmu tù’nùn pe tùnkupù ke lepantok ya tense! ⁷ Masapùla Christ yau, imùnù yai, wepùikattànsakù’nokon màlà, kùmakuyi kon pàk usentuppansak màlà eke kulu Kaatù wettok wakù pe yawàlà, ⁸ Eke pe kulu kùlepasak kon ya nai’nùk ike wechi màlà! ⁹ Tamù’nawolon tùpukketù ke molopai ittutok tùuya ke i’che tùwettok yawà, Kaatù uya ikupù pàk tùwekkupùppù kupùppù, molopai ànù’là nùttu pe pùla nai’nùk tùusenumenkatok yekamappù ya kùpàkù’nokon, tùnkupù yenuka’nùpù pàk man Christ yai. ¹⁰ Kaatù uya ikupù màlà yenuka’nùpù ya iwalai iweyu yattai, tamù’nawolon kon tùnkonekassan nepù ya tamùkke, tamù’nawolon kon epùn pon kon molopai non pon kon, màlàyau Christ wechi nen uchi màlà tamù’nawolon yepoi. ¹¹ Kaatù mùkkàlà ikupù tùuya teppù tùuya ku’nài màlàpàk Christ yapyontàppù ya màlà ina yanùntoppe ya. ¹² Sàlà kupùppù ya màlà ina Jew yamùk uya Kaatù namatok nettoppe iponalok pe molopai wapiya kulu enpen we’nàtok yeponnan nùssan pe Christ pàkànsau! ¹³ Molopai amyamlo nàlà uya ailon teppù màlà Christ pàk, ailon itekale yetasak auya’nokon yau. Wakù Itekale wepùikattàntok ne’nàippù apyakù’nokon, molopai Kaatù uya tùponalok pe ewechi kon yentok ipàkàlà tùlùppù màlà àpàkù’nokon Wakù Akkwalù tùlù tùuya apyakù’nokon winà, itùlù tùuya teppù lùppù tùuya. ¹⁴ Wakù Akkwalù màlà Kaatù uya wakù ton kùnepolo kon, itùlù tùuya tùponalok kon piyak teppù yanùmù kùuya’nokon yentok ipàkàlà, Kaatù uya tùne’mappù yanùmù tùponalok pe weyu ponalà, wakù pe iwettok yapulà toppe. ¹⁵ Sàlà wenai, ailon tetok auya’nokon Itepulu Jesus pàk molopai tamù’nawolon kon Kaatù ponalok kon pùnùnmatok auya’nokon yetasak uya motapai, ¹⁶ àpona’nokon wàpùlematok yeleutanùssak uya pùla man Kaatù pàk tenki te uya yau. Eyittunài’nokon iulà wàpùlema yau, ¹⁷ Kùyepulu Jesus Christ Kaatùyi Kùkàipùnù wakù pe tùwessen tapulàtok yau, yekamapponài iulà Wakù Akkwalù uya pukkek pe àkonekatok kon pe molopai Kaatù ittu kon pa yekama toppe ya àpàkù’nokon. ¹⁸ Eusenumenkatok kon ike utakkoka toppe itakkwayi yene kon pa yekamapponài iulà, màlà enpen we’nàtok yak àkà’masak kon ya nai’nùk ittu kon pa. Eke kulu màlà wakù kuttok ya itùlù tùuya teppù ya lùppù tùponalok kon pàk. ¹⁹ Eke kulu màlà ne’wotokomayai’nùk kùmyamlo ailon tawonnan ponalok pe. Sàlà meluntà kùyau’nokon nai’nùk màlà eke kulu tùwe’wotokomasen imeluntàlù walai ²⁰ màlà yapàikketù inapulàppù Christ wuluuka tùuya weli’nàtok yapai yau, molopai yeleutanùpùppù ya kamik pen temyatù winà epùn po. ²¹ Christ Itepulu wechi màlà molo tamù’nawolon kon epùn pon kon itepulu yamùk yepoi, apàikkek ton, meluntà ton, molopai tamù’nawolon kon tùulon kon itepulu yamùk yepoi. Tamù’nawolon eke ton esek yamùk wolù yawon kon yepoino mùkkàlà molopai ewanawolok tùuyàssen pata yepoino. ²² Kaatù mùkkàlà tamù’nawolon tùnài Christ pùta yokkoik molopai itùnài so’chi yepulu pe tamù’nawolon yepoi. ²³ Sàlà So’chi wechi màlà Christ pun pùkkù pe, tamù’nawàlà iku’nài pe tamù’nawolon yanùkkanài pe i’nai yekkwa yawàlà là.

¹ Pena eweli’chak kon wechippù màlà, Kaatù Maimu yawàlà pùla ewettok kon molopai amakuyi kon yau. ² Màlà yattai wolù yawon kon yeselu kupùppù auya’nokon màlà, kawon kon yepulu, àli maimu yawàlà ewechippù kon, Kaatù Maimu yawàlà pùla tùwessan yepulu mùkkàlà. ³ Tamù’nawolon kon kùmyamlo wechippù tok kasa màlà, àli pe usenumenkantok kon wettok i’che kupùppù’nokon kùwakùli kon pe. Tùulon kon kasa, tamù’nawàlà kùmyamlo nàlà wechippù màlà Kaatù we’naikatok yo’no. ⁴ Tùse Kaatù usentuppatok molopai pùnùnmantok ya màlà eke kulu. ⁵ Weli’nàsak wechippù mayin yawàlà pùla we’nàtok yau tùse kùnepùppù ya màlà nulà we’nàtok yak Christ wuluuka tùuya winà. Kaatù wettok wakù pe winà ewepùikattàsak kon man. ⁶ Molopai Christ Jesus yau kùwuluukasak kon Kaatù uya màlà Itepulu pe iwettok pùkkù pe we’nàtok kon pe chichiu pe ipyau epùn po. ⁷ Sàlà kupùppù Kaatù uya màlà ewanawolok yattai eke kulu wakù pe tùwettok, pùnùnmantok tùuya yau tùnekamappù kùpàkù’nokon Christ Jesus yau yekama toppe tùuya. ⁸ Masapùla Kaatù wettok wakù pe winà ewepùikattàsak kon màlà ailon tetok auya’nokon yai. Eyiwalà’nokon ànkupùppù kon pen màlà tùse Kaatù uya lepantok. ⁹ Yà’làlà ipàkàlà autapulàtok ipàk woton pùla iwechi màlà, ewe’wotokomatok yepeppù pe pùla iwechi. ¹⁰ Kaatù mùkkàlà kùkonekanàippù’nokon. Molopai Christ Jesus yau emennak pe we’nà toppe kùkonekappù kon ya màlà, wakù kùnkupù kon woton pe inkupùppù pena, kuttok kon pe wema’nà yawà. ¹¹ Amyamlo Jew yamùk pen ewentutok kon winà, Jew yamùk yattàtok yawà yattàsak kon pen tukaik Jew yamùk nesatù ton. Mùkyamlo Jew yattàtok yawà yattàsak kon tukaik tùusesassan, màlà esak pàk tùkussen kappon yamùk yemyatù ke. Yà’là kasaichi ewechippù kon wapiya ittutàk kon. ¹² Màlà yattai mei Christ pàk ewechippù kon màlà. Toto yamùk pe, Israel yamùk tonpa pe pùla. Itùlù tùuya teppù Kaatù uya lùppù tùponalok kon pàk pùkkù pe ewechippù kon pen. Sàlà non po ewemapùppù kon enpen we’nàtok pùla, molopai Kaatù pùla. ¹³ Tùse sàlàpe, Christ tonpa pe ewechi kon màlà, amyamlo mei iwessak kon nùssan nessak man mei pùla Christ Jesus mùnù winà. ¹⁴ Masapùla Christ uya màlà echitonpa pe we’nàtok nepùppù kùpyakù’nokon, Jew yamùk molopai Jew yamùk pen kupù tùuya tewin winà. Tùke là tok pantakanài molopai tok ku’nài esseyaton pe ikkwàtùppù ya. ¹⁵ Law, Moses winàpaino yeleutanùpùppù ya, inenupa molopai sà ikukkà tetok ya pokonpe, tùpatalon kon kappon yamùk konekappù ya tau tewin tok wettoppe echitonpa pe. ¹⁶ Tùwelikù pulusuk po winà Christ uya esseyaton pàk we’nàtok yeleutanùpùppù màlà. Tùwelikù pulusuk po winà nàlà asa’lon kon tùpatalo’nan kon kappon yamùk kupùppù ya tewin molopai tok mùnappoppù ya Kaatù piyak. ¹⁷ Màlàpàk Christ uyàpùppù màlà. Wakù Itekale echitonpa pe we’nàtok yekamaik tamù’nawolon kon pàk. Amyamlo Jew yamùk pen Kaatù winàpai mei iwessak kon pàk molopai Jew yamùk mei pùla tùpàk iwessak kon pàk. ¹⁸ Christ yai màlà tamù’nawolon kon kùmyamlo, asaklàma, Jew yamùk molopai Jew yamùk pen uyàttok wechi màlà tewinan Wakù Akkwalù yai Kùkàipùnù kon yemlotopona. ¹⁹ Màlàpàk uchi amyamlo wechi toto yamùk pe pùla nen uchi màlà meyon kon pe pùla. Tùse Kaatù ponalok kon tonpa pe nen uchi ewechi kon molopai Kaatù munkà yamùk tonpa pe ewechi kon. ²⁰ Amyamlo nàlà yamùsak màlà yeunossak kon molopai Kaatù Maimu yenpoikannan nùssan nùnonkappù po, Christ Jesus ipana’mu yawon iwakapuli pe. ²¹ Mùkkàlàichi mùkkàlà tamùsen yamùk ya’chinài tamùkke, wakù esukenan Kaatù yùwùk pe itùsak, Itepulu yapulàtok iwinà pe. ²² Christ yau itonpa pe ewechi kon màlà. Amyamlo nàlà yamù màlà tamùkke tamù’nawolon kon tùulon kon pokonpe Wakù Akkwalù winà tapùi Kaatù wemattok itau pe.

¹ Sàlà kasa iwechi pàk iulà Paul, wechi nai’nùk ya’chichak pe, amyamlo Jew yamùk pen pàkànsau. ² Ewaik yetappù auya’nokon wakù pe tùwettok yau Kaatù uya, sàlà wotoko tùsak uyemyak ikuttoppe uya, àponalok kon pe. ³ Kaatù uya tùttusen pen tùnkupù yenpoikappù molopai yekamappù ya upàk. Sàlà pàk uselupappù mala là emenuka kon uya wapiya. ⁴ Molopai unmenukappù yene auya’nokon yau Christ yekale tùttusen pe pùla nai’nùk ittu auya’nokon màlà. ⁵ Pena kappon yamùk pàk sàlà tùttusen pen yekamappù pen màlà, tùse Kaatù uya yenpoikasak man sàlàpe Wakù Akkwalù winà wakù ton esukenan kon tùneunokossan molopai tùmaimu yenpoikannan nùssan pàk. ⁶ Sàlàichi màlà tùttusen pen, wakù itekale winà Jew yamùk pen wechi màlà Jew yamùk pùkkù pe Kaatù uya pùlemantok yau. Tewin ipun tok wechi màlà molopai Kaatù uya itùlù tùuya teppù lùppù pùkkù pe tok wettoppe màlà ikussak Christ Jesus yau. ⁷ Wakù Itekale yapyoto pe wenappù màlà Kaatù uya lepantok winà, intùlùppù uyemyak tùmeluntàlù we’wotokoma winà. ⁸ Iulà mùkkàlà tamù’nawolon kon Kaatù ponalok kon kappon yamùk ma’lan kulu. Tùse Kaatù uya ulepappù sàlà wakù wotoko ke wakù itekale yatoppe uya Jew yamùk pen piyak tùwenukapù woton pen wakù ton Christ piyawon kon mamin yekamase. ⁹ Molopai tamù’nawolon kon pàk tùttusen pe pùla nai’nùk yeselu Kaatù piyawon yekama toppe uya tok uya yentoppe. Kaatù, tamù’nawolon yà’làlà konekanàippù uya màlà kappon yamùk wapiyalok kon winàpai tùttusen pen kupùppù mailà tonantau, ¹⁰ sàlàpe, so’chi tawon kon yai, Kaatù pukketù tùpatalo’nan yekama toppe inchelù yamùk pàk itepulu ton molopai apàikkek ton epùn yawolon kon pàk. ¹¹ Jesus Christ Kùyepulu kon yai sàlà kupùppù màlà Kaatù uya, pena iwepyattà pe ikupù pàk tùwekkupùppù yawàlà. ¹² Mùkkàlà yai nen uchi Kaatù yemlotopona uyà’nà sàlà tùwettalipaik pùla kùyanùmù kon ya ittui’ma ailon tetok kùuya’nokon ipàk yau. ¹³ Apawanattàyatàu uchi iulà kesewankono’matàu wettalumattà pàk. Àpàkànsau’nokon iwechi nai’nùk. Eumeluntàtatok kon pe iwinà. ¹⁴ Màlàpàk uchi uyese’mu yok tùwenasen iulà Kùkàipùnù kon yemlotopo. ¹⁵ Tamù’nawolon epùn pon kon molopai non pon kon konekanàippù mùkkàlà molopai tesek kon yepotok tok uya iwinàpai. ¹⁶ Kaatù yekamapponài iulà, tukkan wakù ton epùn pon ke elepatok kon pe ya meluntà Wakù Akkwalù yai, meluntà pe ewechi kon pa ayakkwalù kon yau. ¹⁷ Molopai Christ wemattoppe eyewan kon yau ailon tetok auya’nokon yai. Wàpùlemayaik i’nak aukalata kon pa uchi’nùnmantok yai. ¹⁸ Molopai amyamlo tamùkke tamù’nawolon kon Kaatù ponalok kon kappon yamùk pokonpe, pukkek pe ewechi kon pa eke pe, kusan pe, kau, molopai i’nau Christ uya pùnùnmantok wechi ittu kon pa. ¹⁹ Christ uya pùnùnmantok ittu auya’nokon i’che wessaik tamù’nawàlà. Ittu yentai lànen eke pe kulu là iwechi tùse awanùpù kon pa tamù’nawolon Kaatù yeselu ke. ²⁰ Kaatù yapulàpai’nokon uchi, eke pe kulu yennatok kùuya’nokon yentai yà’làlà ke lepanài, wapùla usenumenkantok kon yentai iku’nài tùmeluntàlù ne’wotokomayai’nùk kùyau’nokon winà. ²¹ Tàwàichi Kaatù yapulài so’chi, Christ Jesus yau, tachin pe, tàwàlàlà molopai tàwàlàlà. Emen.

¹ Eyekamappoyatàu uchi iulà, iulà ya’chichak nai’nùk masapùla Itepulu Jesus ponalok pe we’wotokoma pàk. Àkà’ma kon tùuya yau Kaatù nùkupùppù yawàlà we’nàtok pe, pàkàlà ayakkwalù kon yemakkwatàk kon. ² Àssà’mùla ettàk kon, àsà pe pùla, molopai pàlikanài pe tàwàlà. Pùnùnmantok auya’nokon yenpoikatàk kon àtonpa kon yeselu pàlika auya’nokon winà. ³ Ànùttu kon ikuttàk kon tewin ewettok kon Wakù Akkwalù nùtùlù kupù kon pa echitonpa pe we’nàtok aya’chinài’nokon tamùkke winà. ⁴ Tewinan màlà esak molopai tewinan Akkwalù, tewinan enpen we’nàtok Kaatù uya àkà’mappù kon yak walai. ⁵ Tewinan Itepulu molo man, tewinan ailon tetok, tewinan usenpataukantok. ⁶ Tewinan Kaatù molo man molopai tamù’nawolon kon kappon yamùk Kàipùnù mùkkàlà. Tamù’nawolon kon Yepulu mùkkàlà, tamù’nawolon kon yai tùwe’wotokomasen molopai tamù’nawolon yawon. ⁷ Tùse Christ uya tamù’nawolon kon lepappù tùpatalo’nan lepantok ke, yà’làlà itesak pe we’nà i’che tùwettok yawà. ⁸ Màlàpàk Kaatù Maimu uya, “Iwenukuppù kakàik tukkan kon ya’chichak kon yalàppù ya tùpokonpe. Lepantok tùlùppù ya kappon yamùk yemyak,” te kasa. ⁹ Yà’là te ken màlà iwenukuppù te uya? Iwuttàppù màlà i’nawon non ya’mu yak. ¹⁰ Màlàpàk mùkkàlà iwuttàsak lùppù mùkkàlà iwenussak lùppù kakàik kak yepoi molopai miya itentak, tamù’nawolon yanùkkase molo tùwechi ke. ¹¹ Mùkkàlàichi mùkkàlà “kappon yamùk lepanàippù lepantok yamùk ke” tùulon kon kappon yamùk yanùmùppù ya teunossan pe, tùulon kon Kaatù maimuppù yenpoikannan pe, tùulon kon wakù itekale yekamannan pe, tùulon kon so’chi yesan pe, molopai tùulon kon enupannan pe. ¹² Sàlà kupùppù Christ uya màlà tamù’nawolon kon Kaatù ponalok kon kappon yamùk koneka toppe tùuya, tùwotokoyi kuttoppe tok uya. Molopai ailon tawonnan tùpàk yamù toppe tùuya. ¹³ Màlàpàk tamùkke tewin we’nàtok yak uyà’nàtok kon pe ailon tetok kùuya’nokon yau molopai Kaatù Mumu ittutok kùuya’nokon yau. Christ walainon kappon yamùk pe wenan’nokon màlà, sàlà kasa iwechi màlà Christ kasa kulu usemokkan ponalà. ¹⁴ Màlàyau mule yamùk kasa welaikan kùsettakù’nokon. Kappon yamùk ennakantakù’nokon ailon pen pàk enupan tùuya’nokon ke, yà’là yekkwa ton nà enupantok tùuya’nokon ke aimelunpantak tok, meluntà assetun uya tàntànman kasa. ¹⁵ Tùse làkku ailon pe uselupan uchi’nùnmantok winà, usemokkanpai’nokon tamù’nawolon yawà Christ kasa, mùkkàlà tesak ippai pe nai’nùk. ¹⁶ Itepulu pe iwettok yo’no tamù’nawolon tùpatalo’nan esak pùkkù yamùk tùwessen tùpatassek kon yau tamùkke, molopai tamù’nawolon esak ya’chichak màlà iichese’muttàpàttok uya, màlà yamùk uya ipùikattànài pe ikussak. Màlàpàk tamù’nawolon ipùkkù uya tùwotokoyi kupù wakù pe, tamù’nawolon esak tùwekassen molopai tùusemokkasen uchi’nùnmantok yai. ¹⁷ Itepulu Jesus yesek yau uchi waukayaik. Molopai yekama tu’ma uya sàlà, Jew yamùk pen kasaichi kemattàu, iichenumenkatok pùnon ¹⁸ molopai iichenumenkatok ewalupàttau nai’nannùk kasa. Kaatù nùtùlù wema’nàtok pùkkù pe pùla tok wechi màlà, masapùla ittunài pe pùla tok wechi molopai sa’man pe tok yewan wechi pàk. ¹⁹ Tok uya tamù’nawàlà wekkuli’man ittutok la’chimappù màlà. Àli ànkuppai we’nàtok yak tok wettùsak màlà. Molopai yà’là yekkwa ton nà akùlùmannan kupù tok uya tùweleutaik pùla. ²⁰ Màlà yekkwa pen màlà Christ pàk eusenupappù kon! ²¹ Yetappù auya’nokon molopai eyenupappù kon ipàk ailon, Jesus yau nai’nùk, yawà inenupa ton pe messatài’nùk pàk. ²² Apanamappù kon màlà penalok eyeselu kon nonka kon pa, ikasa pùla ewemapù kon pa àku’nàippù kon. Amattanù’nàippù kon lùppù enkuttànài ànkuppai we’nàtok kon winà. ²³ Eyewan kon molopai eusenumenkatok kon wena toppe emennak pe kulu. ²⁴ Emennak eyeselu kon pe yepotàk kon, Kaatù kasa ikonekasak lùppù, molopai tùusenpoikasen ailon wema’nàtok yau màlà iwalai molopai wakù esukenan. ²⁵ Tàwàichi kasei pe we’nàtok pùla nechii! Tàwà tùtonpa kon pàk tamù’nawolon kon uselupatok ailon pe nechii, masapùla tamù’nawolon kon kùmyamlo mùkyamlo tewinan itesak. ²⁶ Tùwemakuimaik ke’naikatàu. Molopai tùwe’naikase kasapontàtàu. ²⁷ Makui, kù’lepatàu yà’làlà kuttok ya yattai ke. ²⁸ Amak pe tùwessen pe ewechi yau amak pe ewettok yeleutanùkkà. Ailon pe ekkà molopai sa’man pe e’wotokomakà yà’là pùnon kappon yamùk yemyak àntùlù woton wettoppe molo. ²⁹ Àli mayin kùsapulàtàu euselupatok kon yau. Pùikattànài neken mayin yapulàtàk kon, i’che kulu we’nàtok ne’nài, molopai ewan ipittànài eyetannan pùikattà toppe euselupatok uya. ³⁰ Molopai Wakù Kaatù Yakkwalù kùsewankono’matàu. Masapùla Wakù Akkwalù mùkkàlà Kaatù wettok eyesak kon pe yentok ipàkàlà, Kaatù uya eyepeppù kon tùlù Weyu ponalà. ³¹ Tamù’nawolon àli pe usàulàmantok, molopai we’naikantok inonkatàk kon. Wentaimepà’nàtok wapùla wemottùnpantok nàlà inonkatàk kon! Esseyaton pàk we’nàtok pùla nechii àklottau’nokon. ³² Tùse làkku tùusentuppaik ettàk kon molopai sa’man pe pùla itewan echiwinàkàik, molopai esentuppatàk kon àpàkù’nokon Kaatù usentuppasak àpàkù’nokon Christ yau kasa.

¹ Kaatù munkà yamùk i’nùn ton pe kulu ewechi kon pàk, ikasa ettàk kon ² uchi’nùnmantok ewemattok yau nechii, Christ uya kù’nùnmappù kon molopai iwettùlùppù kùponalok kon pe kasa, wakù pe tùkà’nùnsen tùtùsen Kaatù yauchinpanài pe kasa. ³ Tùse esukenan kon Kaatù ponalok kon pe ewechi kon pàk, nàkàlunnàtok molopai tamù’nawolon àli, ànù’là yemamin i’che we’nàtok kùsettak àklottau’nokon. Sàlà yekkwa ton winàpai mettàik. Màlà yekkwa pe là uselupan kùsettak. ⁴ Ikasa pùla nàlà àli pe uselupantok, pakko pe àli mayin yapulàtok, àli pe wo’mattantok wechi màlà, màlàpàk kùsapulàtàu. Tùse làkku tenki katàk kon Kaatù pàk. ⁵ Sàlà ittu auya’nokon màlà, masapùla ànù’là tùnàkàlunsen, esukenan pen wapùla tùuseka’nonkasen uya yà’làlà yepolo pen màlà Christ molopai Kaatù patassek yau, masapùla ànù’là yemamin i’che we’nàtok wechi màlà wepeiman màlà yamùk yemlotopo kasa. ⁶ Ànù’là eyenkuttàtakù’nokon suwalai là ailon pen mayin ke. Sàlà yamùk pàkànsau uchi màlà Kaatù we’naikatok uyàpù mùkyamlo imaimu yawàlà pùla nai’nannùk pona. ⁷ Màlàpàk mùkyamlo yekkwa pokonpe kettàu. ⁸ Amyamlo wechippù ewalupàttau màlà, tùse Itepulu Kaatù ponalok kon kappon yamùk pe ewenasak kon pàk akkwa yau ewechi kon màlà. Màlàpàk uchi emattàk kon kappon yamùk akkwa yau tùwemassan kasa. ⁹ Masapùla akkwa màlà eke pe kulu tamù’nawolon yà’là yekkwa là ku’nài, wakù pe we’nàtok, ikasa we’nàtok molopai ailon. ¹⁰ Màlà Itepulu Kaatù yauchinpanài iwakùli ittui’che ettàk kon. ¹¹ Àli ku’nài nan kappon yamùk pùkkù pe kettàu, màlà yamùk ewalupà ponalok kon. Tùse làkku pùsamlo pàk ikasa pùla tok wechi yekamatàk kon. ¹² Sàlà yamùk tok nùkussai’nùk amak yai kuli’mak man yekama yentai kulu. ¹³ Tùse tamù’nawolon akkwa nùweyuttàppù màlà yà’là kasa là iwechi tensen. ¹⁴ Masapùla akkwa màlà tamù’nawolon yà’làlà weyuttànài yentoppe. Màlàpàk, “Apakakà tùwe’nùnsen, e’wuluukakà weli’nàtok yapai! Molopai Christ uya màlà eweyuttà,” tesak màlà. ¹⁵ Màlàpàk tùttuik kulu emattàk kon. Ittunnan pen kappon yamùk kasa kemattàu, tùse làkku pukkek ton kasa emattàk kon. ¹⁶ Tamù’nawolon eweyu kon yapulàtàk kon tùttuik pukkek pe, masapùla sàlà wei yamùk màlà àli ton. ¹⁷ Pakko peichi kettàu, tùse Itepulu Jesus wettok ikupù auya’nokon i’che ittui’che ettàk kon. ¹⁸ Wain ke ketùntàu, amattanùpù kon ya neken màlà. Tùse làkku Wakù Akkwalù ke anùttàk kon. ¹⁹ Àtonpa kon pokonpe eselupatàk kon David yelemu maimu yau, elen yamùk Wakù Akkwalù winàpaino yekkwa ton pàk eselenpatàk kon Kaatù winàkàik, yapulàtok itewan yau echii’ma. ²⁰ Tàwàlàlà tenki katàk kon tamù’nawolon pàk Kaatù Kùkàipùnù kon pàk, Kùyepulu kon Jesus Christ yesek yau. ²¹ Àtonpa kon yo’no echittutàk kon ànùk yentai pùla, Christ namatok auya’nokon yau. ²² Tùtayappù kenan kon, atayappù kon yentai kettàu, Itepulu yemyawon kon pe messatài’nùk kasa ettàk kon. ²³ Masapùla tùnoppù kenan mùkkàlà tapàikketù kenan tùnoppù yepoi Christ wechi tapàikketù ke so’chi tawon kon yepoi kasa. Molopai so’chi nàlà màlà Christ yesak. ²⁴ Màlàpàk uchi tùtayappù kenan kon nàlà tùtayappù kon yentai kùsettak yà’là yekkwa motau là, so’chi wechi Christ yemyau kasa kulu. ²⁵ Tùnoppù kenan kon, ànoppù kon i’nùnmatàk kon Christ uya so’chi pùnùnmappù molopai iwettùlùppù tok ponalok pe kasa. ²⁶ So’chi konekappù ya màlà wakù pe tùmaimu yapàikettù winà, molopai wakù pe ikonekappù ya ikolùka tùuya tuna ke winà. ²⁷ Christ uya màlà sàlà kupùppù so’chi koneka toppe tùuya tùponalok pe, tamù’nawàlà wakù pe, molopai yà’làlà iwalai pen pùla, ikopposak pùla molopai ikosokkoso’masak pe pùla, tamù’nawàlà wakù pe. ²⁸ Màlà kasa làma tàwà tùnoppù kenan kon tùnoppù kon pùnùnmai tiuchi’nùnma kon kasa. Tùnoppù pùnùnmanài mùkkàlà tiyiwalà tiuchi’nùnmasen. ²⁹ Ànù’là tewanma pe tùpun ku’nài pùn. Tùse tùusewessen làkku mùkkàlà molopai tùwemainanpasen, Christ uya so’chi kupù kasa kulu. ³⁰ Masapùla kùmyamlo wechi màlà itesak pùkkù pe. ³¹ Kaatù Maimu uya wate kasa, “Sàlà wenai kàyik uya tùkàipùnù molopai tùsan nàmà màlà, molopai tùnoppù pùkkù pe iwena, molopai pùsamlo asa’lon kon wena màlà tewin,” te kasa. ³² Sàlà màlà eke kulu ailon ittusak lùppù pen tùse yenpoikasak, uselupayaik Christ molopai so’chi tawon pàk. ³³ Tùse tàwà tamù’nawolon kon tùnoppù kenan kon tùnoppù kon pùnùnmai tiuchi’nùnma kon kasa, molopai tàwà tamù’nawolon kon tùtayappù kenan kon tùtayappù kon namai.

¹ Mule yamùk, asan kon molopai àkàipùnù kon maimu yawàlà ettàk kon Itepulu ponalok pe, masapùla sàlàichi màlà iwalai ànkupù kon. ² “Àkàipùnù kon molopai asan kon inamatàk kon,” tawon uchi màlà wapiyalok usenupantok, ikupù uya màlà tetok pokonpan. ³ “Tamù’nawolon wettoppe wakù pe apyau’nokon, molopai ewemapù kon pa sàlà pata yau tachin pe,” tawon. ⁴ Papai yamùk, àmunkà kon pàk àsà pe kettàu, tok kùssakolopatàu. Tùse làkku, tok yemokkatàk kon Itepulu ya’lon uya ekamappontok ke molopai enupantok ke. ⁵ Tepotolù kenan kon, eyepotolù kon sàlà non po nai’nannùk maimu yawàlà ettàk kon, nalik pe, tùwe’namaik. Molopai ailon pe itewan ikuttàk kon, Christ ponalok pe ewe’wotokoma kon kasa. ⁶ Sàlàichi ikuttàk kon eyene kon tok uya yattai neken nà pùla, tok yauchinpapa kon pa neken nà pùla. Tùse tamù’nawàlà eyewan kon ke Kaatù wettok i’che ikuttàk kon, Christ yapyoto ton pe. ⁷ Àwotokoyi kon ikuttàk kon kappon tepotolù kenan we’wotokoma kasa tùutauchinpaik, Itepulu yapyoto pe ewe’wotokoma kon kasa, molopai kappon yamùk ponalok pe pùla. ⁸ Ittutàk kon uchi Itepulu uya tamù’nawolon kon ye’ma, ànùk yekkwa là apyoto wapùla apyoto pen, wakù wotoko inkupù yepeppù pe. ⁹ Potolù yamùk, màlà kasa làmaichi ettàk kon ayapyoto kon winàkàik. Tok kùttalipapàttàu. Mùttuyatàik, mùkkàlà epùn pon wechi mùkyamlo molopai amyamlo Yepotolù pe. Tamù’nawolon kon ku’nài mùkkàlà ekkaichalà. ¹⁰ Iwenukapù pe, wate uya sàlà meluntà pe ettàk kon Itepulu yau, molopai itapàikketù eke kulu winà. ¹¹ Tamù’nawolon wepanta’man pon Kaatù uya elepatok kon yak epontàtàk kon, meluntà pe ewechi kon pa, àli, Makui uya enkuttàntok yentaika kon pa. ¹² Masapùla wepanta’man’nokon kappon yamùk pokonpe pen sàlà, tùse àli ton akkwalù meluntàlù kak yawolon kon pokonpe, itepulu yamùk, apàikkek ton, molopai sàlà ewalupà yawon kon itepulu yamùk tensan pen meluntàlù pokonpe. ¹³ Màlàpàk uchi Kaatù winàpaino tamù’nawàlà wepanta’man pon yak epontàtàk kon sàlàpe! Molopai nen uchi àli weyu uyàpù yau, eyeyaton kon uya panta’mantok yentaika kon pa. Molopai ewepanta’ma kon iwenukapù ponalà tùpo, meluntà pe lùppù ewechi kon pa. ¹⁴ Màlàpàk tùwekonekaik ettàk kon. Ailon ke epokùlùyittàtàk kon. Ikasa we’nàtok itùtàk kon àplopo kon wapu pe. ¹⁵ Molopai iwekonekansak pe wakù itekale echitonpa pe we’nàtok yekamatok attassa kon pe. ¹⁶ Tàwàlàlà ailon tetok yatàk kon awapu kon pe. Màlà ke tamù’nawolon pàlàu yamùk ulenpansak, Ene Makui uya pukantok yà’nùpù kon pa. ¹⁷ Molopai wepùikattàntok yanùntàk kon appai kon wapu pe, molopai Kaatù Maimu akasupalayi kon pe Wakù Akkwalù uya elepatok kon. ¹⁸ Àwàpùlema kon yau sàlà yamùk ikuttàk kon tamù’nawàlà Kaatù uya, pùikattàntok yennai’ma. Tàwàlàlà àpùlematàk kon Wakù Akkwalù meluntàlù yau. Màlàpàk tùwekonekaik ettàk kon. Ke’nonkatàu, màpùlematàik tamù’nawolon kon Kaatù ponalok kon kappon yamùk pona. ¹⁹ Molopai upona nàlà màpùlematàik, Kaatù uya ulepa toppe itekale ke, uselupa pàk wekonekasak yau, uselupa toppe meluntà pe tùusenalippaik pùla. Molopai wakù itekale yawon tùttusen pen yekama toppe uya. ²⁰ Sàlà wotoko kuttoppe uya uyeunossak nai’nùk molopai màlà pàkànsau sàlà patiki’chi tau wechi. Àpùlematàk kon meluntà pe tùusenalippaik pùla uselupa toppe wakù itekale yekama uya yau. ²¹ Tychicus, kù’nùn kùtonpa kon molopai ailon kulu apyoto Itepulu wotokoyi yau uya, elepa kon màlà tamù’nawolon uyekale ke, atta wechi molopai yà’là kupù uya ittu kon pa. ²² Màlàpàk uchi yeunoko uya sàlà apyakù’nokon. Atta là tamù’nawolon kon ina wechi yekama toppe ya àpàkù’nokon, molopai màlà kasa eyewan kon meluntàtanùpù kon pa. ²³ Tàwàichi Kaatù Kùkàipùnù kon molopai Itepulu Jesus Christ echitonpa pe we’nàtok molopai uchi’nùnmantok tùlùi ailon tetok pokonpe, tamù’nawolon kon ailon tawonnan piyak. ²⁴ Tàwà wakù pe we’nàtok Kaatù winàpaino tamù’nawolon kon Kùyepulu Jesus Christ pùnùnma pàk nai’nannùk po nechii.