3 JOHN

¹ Sàlà màlà kaleta iulà so’chi yepulu nùmenukayai’nùk, ailon yau u’nùn pe unkupù Gaius piyak. ² Uwechiyakon kulu, wàpùlemayaik tamù’nawolon wettoppe wakù pe molopai e’nek pùla ewechi pa, wakù pe là ewechi ayakkwalù yau kasa. ³ Utauchinpatai kulu ailon tawonnan Kaatù pàk tonpa yamùk welepansak uya ailon pe ewechi ailon itekale pàk yekamasak pàk, molopai tàwàlàlà ailon yau tùwemassen pe ewechi pàk. ⁴ Yà’làlà uyauchinpanài woton pùla iwechi màlà umunkà yamùk wemapù ailon yau yeta uya pàk utauchinpa yentaino. ⁵ Uwechiyakon kulu, ailon pe messaik màlà wotoko ànkupù yau, mùkyamlo tonpawannà yamùk pàk, kaklan yamùk pe lànen tok wechi tùse. ⁶ Pùnùnman auya yekale yekamasak tok uya man talonnà so’chi tawon kon pàk. Tàwà te’ma kon tawà tok wechi yawà tok ipùikattàkà, Kaatù yauchinpanài pe. ⁷ Masapùla tok wepyattàsak man Christ wotokoyi yau, ailon tawonnan pen winàpai tùwepùikattàtok kon tepose pùla. ⁸ Kùmyamlo nen uchi pùsamlo kappon yamùk pùikattài, tamùkke tùwepùikattàik we’wotokoman toppe, ailon itekale yau. ⁹ Kaleta tùmenukatai so’chi tawon kon piyak, tùse Diotrephes, tok yesak pe eppai tùwessen, ina nulunpayan. ¹⁰ Uyàssak yau nen uchi, màlà tamù’nawolon àli pe iichelupappù kiwinàkài’nokon yekama uya màlà. Tùse màlà neken pen, ailon tawonnan Kaatù pàk tonpawannà yamùk yanùmù ya pùla iwechi màlà tok uyàssak yau, molopai nàlà mùkyamlo ananùnpaino kon yeleutanùpù ya. Tok yenpakkanài mùkkàlà so’chi tapai. ¹¹ Uwechiyakon kulu, àli pe nai’nùk kasa kechii, tùse wakù pe nai’nùk kasa ekkà. Ànù’là wakù ku’nài wechi màlà Kaatù ponalok pe molopai ànù’là àli ku’nài uya Kaatù yensak pùla man. ¹² Tamù’nawolon kon mùkyamlo Demetrius pàk tùuselupasan wakù pe, masapùla ailon pe kulu iwechi pàk. Molopai ina nàlà wakù mùkkàlà nùkayan, molopai ina nùselupayai’nùk wechi ailon pe mùttuyaik. ¹³ Tukke unekama molo man àpàk, tùse ànkuppai pùla wessaik kaleta pàk. ¹⁴ Enpen wessaik, eyene uya màlà sàlàpe’ne là molopai uselupan màlà usennài’ma. ¹⁵ Tàwà wakù pe echitonpa pe we’nàtok apyau nechii. Tamù’nawolon kon ewechiyakonnon talonkonnà, “Wakù pe na’ messan?” nùkayan. Molopai tamù’nawolon kon ina wechiyakonnon pàk, “Wakù pe na’ messatàu?” kakkà ina ponalok pe.