2 THESSALONIANS

¹ Sàlà màlà Paul, Silas molopai Timothy tawonnan winàpaino, kappon yamùk Thessalonica pon kon so’chi tawon kon, Kaatù Kùkàipùnù kon molopai Itepulu Jesus Christ ponalok kon piyak imenukasak. ² Tàwà Kaatù, Kùkàipùnù kon molopai Itepulu Jesus Christ elepai’nokon wakù pe we’nàtok molopai echitonpa pe we’nàtok ke. ³ Tenki te kulu sàlà ina uya Kaatù pàk àpàkànsau’nokon tàwàlà, utonpa yamùk! Sàlà wechi màlà ikasa, masapùla ailon tetok auya’nokon Christ pàk yawàlà ewettok kon nenayan meluntà pe, molopai eke pe, molopai euchi’nùnmatok kon nenayan tense eke peiwa. ⁴ Màlà kasaichi iwechi pàk ayapulà kon pe ina tùuselupasan àpàkù’nokon Kaatù so’chiyi yamùk tau, ailon tetok auya’nokon yau tamù’nawolon nà ewettalumattàtok kon yau molopai màlà yamùk yawà mùtàyatài’nùk pàlika pàk ewechi kon pàk. ⁵ Sàlàichi màlà ikasa Kaatù uya ittuntok wechi yekamanài. Itepeppù màlà, àkoneka kon ya wakù pe itepulu pe tùwettok yau tùwessan pe ewechi kon pa, màlà iponalok pe mettalumattàyatài’nùk. ⁶ Masapùla Kaatù uya iwalai kupù màlà, wettalumattàntok nepù ya màlà mùkyamlo atalumattànnan’nokon pona. ⁷ Molopai ewettalumattàtok kon yapai ewepùikattàtok kon ke elepa kon ya màlà, molopai ina lepa ya nàlà màlà. Sàlà kupù ya màlà Itepulu Jesus usenpoika epùn poi yau. Iyàpù màlà apok ulenpansak yau meluntà ton inchelù yamùk pokonpe, Kaatù ittunnan pen talumattàik, molopai mùkyamlo wakù itekale Kùyepulu kon Jesus maimu yawolon kon pen talumattàik. ⁹ Tok wettalumattà màlà tàwàlàlà, Itepulu Kaatù yemlotopoi iwepantakasak pe tok wechi màlà molopai eke kulu imeluntàlù winàpai. ¹⁰ Iyàpùichi màlà, màlà Wei yattai apulàntok yanùnse tamù’nawàlà esukenan kon winàpai. Tamù’nawolon kon ailon tawonnan nùssan tùpàk winàpai tapulàtok molopai tùnamatok yanùnse. Amyamlo nàlà wechi màlà tok kùlottau, masapùla ailon tesak auya’nokon pàk, wakù itekale ina nekamappù pàk. ¹¹ Sàlà kasaichi tùusenumenkaik tàwàlà àpona’nokon ina tùwàpùlemasan. Kaatù uya àkà’mappù kon yak lùppù yawà tùwemassan pe ewechi kon pa. Tàwà tùmeluntàlù yai, wakù ànkupù pe tùwessen kupùik molopai àpùikattài ailon tetok auya yawà ewelaika pa. ¹² Sàlà kasa tùwàpùlemasan ina Itepulu Jesus yesek yapulàtok usentoppe ayau’nokon, molopai ayapulàtok kon yepolo kon pa iwinàpai, Kùkaatùyi kon molopai Itepulu Jesus Christ winàpaino wakù pe we’nàtok winà.

¹ Utonpa yamùk, Kùyepulu, Jesus Christ uyàttok molopai wepili’nàtok tamùkke ipyau we’nà toppe pàk, apawanattàyatàu iulà, ² asse’ne kulu là eusenumenkatok kon yau tùutaimelunpasan pe kettàu, wapùla, kettalipatàu Itepulu Weyu uyàssak man te pàk. Yattai pùla là Kaatù Yakkwalù nekamatai tawon pàk, wapùla yà’là yekkwa là panton pàk, wapùla ina nùmenukappù pe tukaik là iichekama pàk. ³ Ànù’là eyennakatakù’nokon yà’là kasa là. Masa màlà Wei uyàpù pen màlà Kaatù yeyatonnon wà’mùssakka molopai Àli Iteselu Kappon usenpoika ponalà, mùkkàlà itùlù woton inmatta toppe. ⁴ Yà’làlà, kappon yamùk wàpùlematok ipàk, i’che pùla iwechi màlà. Molopai wepeiman nà inama pe wechi itewanma pe, tamù’nawolon màlà yamùk yentai iwekkupù màlà, molopai iità Kaatù yùwùk tak chichiu pe esse, eke pe ekkusse, molopai Kaatù pe tukaik iwekkupù màlà, “iulà nen mùkkàlà Kaatù,” te ya màlà. ⁵ Ittu na’ auya’nokon pùla nai? Tamù’nawàlà ku sàlà yamùk tekamatai tà àpàkù’nokon apyau’nokon wechi yau. ⁶ Tùse sàlàpe iwekkuttoppe pùla iwakkà’nài wechi molo mùttuyatàik, iwalai iweyu yattai iichenpoika toppe. ⁷ Masapùla amak yai àli pe we’nàtok yapàikketù tùwe’wotokoma pàk man, tùse tùwekkupù woton wekkupù pen màlà mùkkàlà iwakkà’nài yama ponalà. ⁸ Màlàyau nen uchi Àli Iteselu Kappon usenpoika màlà molopai Itepulu Jesus uya iwànà màlà tùwe’netukka ke, molopai nàlà tùuyàpù yau imattanùkkapù ya màlà tùusenpoika yakkwayi ke. ⁹ Àli Iteselu Kappon uyàpù màlà Settan meluntàlù yau, molopai tamù’nawolon yà’là yekkwa ton nà, tensan yekkwa pen yentok ipàkàlà molopai enumenkannan kupù ya màlà. Tùse, ennakantok pe iwotokoyi wechi màlà. ¹⁰ Molopai yà’là yekkwa ton nà àli pe ennakantok tùuya yapulà ya màlà mùkyamlo tùumatta woton kon yennakatok tùuya ike pe. Tok umatta màlà masapùla tùwepùikattàtok kon iwinàpan ailon itekale yanùnsak tok uya pùla iwechi pàk molopai tù’nùn kon pe ikussak tok uya pùla iwechi pàk. ¹¹ Sàlà kasaichi iwechi wenai Kaatù uya iwalai pen ennakantok meluntàlù yeunoko màlà tok yak, ailon pen pàk ailon te toppe tok uya. ¹² Tamù’nawolon kon ailon tawonnan pen, ailon pàk tùse àli kupù pàk yauchin ton yepeppù pe màlà tok talumattà. ¹³ Ina uya nen tenki te sàlà Kaatù pàk tàwàlà àpàkànsau’nokon, ina tonpa yamùk, amyamlo Itepulu nù’nùnma ton. Masapùla iwepyattà motapai Kaatù uya ayanùnsak kon màlà ewepùikattàtok kon yepolo kon pa, Wakù Akkwalù yapàikketù yai àkonekatok kon pe, molopai ailon tetok auya’nokon ailon itekale pàk winà. ¹⁴ Àkà’mappù kon ya màlà sàlà yak, wakù itekale ina nekamappù yai. Àkà’mappù kon ya màlà Kùyepulu Jesus Christ yapulàtok pùkkù wettoppe àponalok kon pe. ¹⁵ Màlàpàk uchi ina tonpa yamùk ailon pe kulu ettàk kon, eyenupappù kon yawàlà, ina uya apanamappù kon tùnta kon yai, wapùla kaleta ina nùmenukappù yau là. ¹⁶ Tàwà Kùyepulu kon Jesus Christ tùmàlà pe, molopai Kaatù Kùkàipùnù kon, kù’nùnmanàippù’nokon molopai wakù pe tùwettok yau kùlepanàippù’nokon tàwàlàlà meluntà ke molopai wakù enpen we’nàtok ke, ¹⁷ eyewan kon meluntàpai, molopai emeluntàlùttài’nokon wakù kupù kon pa, molopai wakù pe ikasa euselupa kon pa.

¹ Molopai nen uchi wenukapù pe, ina pona màpùlematàik, te uya sàlà àpàkù’nokon ina tonpa yamùk, Itepulu maimu usekama toppe miyaiwa asse’ne molopai yapulàtok wessepotoppe àklottau’nokon iwekkupùppù kasa. ² Àsà ton, molopai àli ton kappon yamùk winàpai Kaatù uya ina kuttoppe màpùlematàik ina pona. Masapùla tamù’nawolon kon kulu là wechi ailon tetok yesak pe pen màlà. ³ Tùse Itepulu mùkkàlà tàwàlàlà ailon pe tùwessen. Meluntà pe amakon ya màlà molopai Ene Makui winàpai àkupù kon ya wakù pe. ⁴ Molopai ina uya kulu Itepulu yau ailon pe ittusak man, eyenupatok kon ina uya maimu yawàlà ewechi kon, molopai imaimu yawàlà lùppù ewechi kon tàwàlà. ⁵ Tàwàichi Itepulu ayalài’nokon, Kaatù pùnùnma kon pa eke pe kulu, molopai Christ yau echii’ma yà’làlà pàlikatok auya’nokon màlà intùlùppù. ⁶ Itepulu Jesus Christ yesek yau meluntà pe eyelupayatàu ina, ina tonpa yamùk, mùkyamlo emya’nek pe nai’nannùk kùtonpa yamùk kùlottau kettàu, eyenupatok kon ina uya yawàlà pùla nai’nannùk kùlottau. ⁷ Amyamlo pe eyiwalà’nokon ànkupù kon mùttuyatàik, màlà yamùk ina nùkupùssan. Emya’nek pe ku ina wechi pùn tà apyau’nokon ina wechi yau. ⁸ Ànù’là winàpai te’maik pùla là kùyali yekkwatù ina uya pùn. Tùse ina we’wotokomappù sa’man pe, weinai molopai ewalupàttawàlà. Ànù’là wotokoma ina uya tukaik. ⁹ Ina uya sàlà kupùppù upùikattàtok auya’nokon yeponài yek pe lànen wechi tùse. Ina uya ikupùppù màlà yentok auya’nokon ipàkàlà pe. ¹⁰ Apyau’nokon tùwechi kon yau ina uya yekamappù àpàkù’nokon, “Ànù’là e’wotokomapaino pen uta’lettà pen màlà,” tawon. ¹¹ Ina uya sàlà wate, masapùla, tùulon kon kappon yamùk emya’nek pe tùwemassan wechi àklottau’nokon yeta tùuya’nokon pàk, mùkyamlo yà’làlà ku’nài nan pen iwotokoyi pùn walainon tùse tùulon kon yeselu yennài nan, tok pantomù pàk tùuselupasan yauchin pe. ¹² Itepulu Jesus Christ yesek yau pùsamlo kappon yamùk yekamappoyan kulu ina tùuseka’nonkaik, meluntà pe, eppana echii’ma tok we’wotokoma toppe, tùwemattok kon iwinà yepotoppe tùuya’nokon. ¹³ Tùse amyamlo, ina tonpa yamùk, wakù kupù pàk kesetakkatàu. ¹⁴ Ànù’là wechi sàlà kaleta yau ina neunossai’nùk itekale maimu yawàlà pùla yau, meneik sàlà kasa iwechi yau. Tàwà nechii ipokonpe kechii, iwekkuli’ma toppe. ¹⁵ Tùse eyeyaton kon pe kùkkuttàu, wapùla làkku, yekamappotàk kon àtonpa kon kasa. ¹⁶ Tàwà Itepulu echitonpa pe we’nàtok ke elepai’nokon tùmàlà pe tàwàlà molopai i’nai yekkwa yawàlà. Itepulu wechi màlà apyau’nokon. ¹⁷ Iulà, Paul, uyemyatù ke sàlà menukayan, “Wakù pe na’ messatàu?” tetok. Sàlà kasaichi tamù’nawolon kaleta menukanài iulà, uyesek ipona. ¹⁸ Tàwà wakù pe we’nàtok Kùyepulu Jesus Christ winàpaino apyau’nokon nechii tamù’nawolon kon.