2 PETER

¹ Sàlà màlà kaleta Simon Peter, Jesus Christ yapyoto molopai ineunokoppù winàpaino. Mùkyamlo wakù pe Kùkaatùyi wettok molopai pùikattànài Jesus Christ yai ilepasak kon wakù kulu ailon tetok, ina uya ailon tetok walai ke piyak inmenukappù. ² Tàwà wakù pe we’nàtok Kaatù winàpaino molopai echitonpa pe we’nàtok apyau’nokon nechii eke pe kulu, ipùkkù lùppù pe pùla tamù’nawàlà Kaatù molopai Jesus Kùyepulu kon ittutok auya’nokon yai. ³ Kaatù yapàikketù uya tamù’nawolon i’che kulu we’nàtok ke lepansakù’nokon màlà wema’nà toppe molopai imaimu yawàlà we’nà toppe. Sàlà yeposak màlà kùuya’nokon masapùla ittu kùuya’nokon pàk mùkkàlà kùkà’manàippù kon tapulà toppe molopai wakù pe tùwettok pùkkù pe we’nà toppe ittutok kùuya’nokon yai. ⁴ Sàlà kasa lepansakù’nokon ya màlà Kaatù yeselu wakù molopai eke ton kulu wakù pe we’nàtok itùlù tùuya teppù lùppù tùuya ke, màlà yanùmù auya’nokon winà mattanù’nài àli ànkuppai we’nàtok molo nai’nùk non po winàpai ewepe kon pa, molopai àuyàpù kon pa Kaatù yeselu pùkkù pe esse. ⁵ Sàlà kasaichi iwechi pàk, ànùttu kon mùkuttàik kulu ailon tetok auya’nokon tonpattà kon pa wakù pe we’nàtok ke molopai wakù pe ewettok kon pona ittunài pe we’nàtok ke, ⁶ ittunài pe ewettok kon pona eyesak kon pe ewettok kon, eyesak kon pe ewettok kon pona pàlikantok, pàlikantok auya’nokon pona wakù pe esuken we’nàtok, ⁷ wakù pe esuken ewettok kon pona tonpa pàk usentuppantok, molopai tonpa pàk usentuppan pona pùnùnmantok. ⁸ Sàlà yamùk wechi ayau’nokon molopai iwekatù yau, ewepeta kon pa àkupù kon ya màlà tapulàsen pe Kùyepulu Jesus Christ tùttuik we’nàtok yau. ⁹ Tùse sàlà yamùk pùla nai’nùk wechi màlà enpùla mei yene ya pen, molopai àli pena tùnkupùssan kukappù puttàka’nùssak ya màlà. ¹⁰ Màlàpàk uchi, utonpa yamùk, ànùttu kon ikuttàk kon Kaatù uya kà’mantok molopai ayanùntok kon ya ittu kon pa, masapùla sàlà kupù auya’nokon yau meluntà pe ewechi kon màlà ewekkawai’ma kon pen. ¹¹ Molopai Kaatù uya epùn mùlatta yakkoka màlà eke pe, ewewomù kon pa tàwàlàlà itepulu pe Kùyepulu, Kùpùikattànài Christ Jesus wettok yak. ¹² Sàlà kasa iwechi pàk eyenu kon yappontà pàk wechi màlà tàwàlà sàlà yamùk pàk, ittukassak lànen auya’nokon tùse, molopai ewekonekasak kon meluntà pe ailon ananùmùppù kon yau tùse. ¹³ Ailon ukayaik ikasa emeluntàpa kon uya eyenu kon yappontà uya sàlà yamùk pàk winà pàk, nulà wechi kùlottau. ¹⁴ Tùttuyaik tachin pe tùpo pùla sàlà tùukàtasen esak nonka uya miya Kùyepulu kon Jesus Christ uya yekamappù upàk kasa. ¹⁵ Tamù’nawàlà unùttu kupù uya kulu màlà welikùppù ye’mappùtak sàlà yamùk ittutok auya’nokon tàwàlà yawàlà woton koneka pe. ¹⁶ Ikuppàssak kon nà panton yekama ina uya pùn Kùyepulu kon Jesus Christ uyàpù meluntà pe yekama ina uya àpàkù’nokon yau. Tùse tenu kon ke ina uya itakkwayi yeneppù. ¹⁷ Molo ina wechippù wùk po namantok molopai itakkwayi ke ilepasak Kaatù Ikàipùnù uya yattai, mayin uyàpù ipyak eke itakkwayi yau epùn poi yattai, “Pùsàlà mùkkàlà u’nùn kulu Umu, uyauchinpanài kulu!” tukaik. ¹⁸ Ina uya tùmyamlo’nokon pe neken echii’ma sàlà mayin uyàpù epùn poi yetappù, ipokonpe ina wechi wakù wùk po yau. ¹⁹ Màlàpàk kulu ina nùttuyan Kaatù Maimu yenpoikannan nùssan yekale wechi ailon pe. Màlàpàk uchi wakù ikuttàk kon mei pùla tok nekamappù yene auya’nokon yau, akkwa yene auya’nokon ewalupàttau kasa, yene pàk mettàik pata wemapù yene auya’nokon kaiwonok uyàpù ewalupàttau pata wemapù ponalà kasa. ²⁰ Tamù’nawolon yepoi, sàlà ittutàk kon, Kaatù yekale Kaatù Maimu yawon yenpoika ànù’là uya tiyiwalà pùla iwechi màlà. ²¹ Masapùla Kaatù yekale yekamasak lùppù uyàpùppù kappon yeselu neken winàpai pùla, tùse Kaatù Maimu yekamannan nùssan yau Wakù Akkwalù wechippù, màlàpàk tok uya itekale Kaatù winàpai iyàssak lùppù yekamappù.

¹ Kaatù Maimu yenpoikannan pe tukaik tùukaseitasan usenpoikappù ina kùlottau pena, molopai màlà kasa làma tok usenpoika màlà amak yai ittu pùla àklottau’nokon. Mattanù’nài, ailon pen pàk enupantok nepù tok uya màlà, molopai Kùyepulu kùye’manàippù kon Jesus nulunpa tok uya màlà. Sàlà kasa asse’ne mattantok nepù tok uya màlà tùpona’nokon. ² Màlà kasa làma àli ànkuppai tùwettok kon maimu yawàlà tok wechi màlà, molopai tok nùkupù winà kappon yamùk uselupa àli pe ailon pàk. ³ Tùulon yemamin i’che tùwettok kon yau pùsamlo ailon pen pàk enupannan uya ayapulà kon màlà pùlayatta yepotoppe tùuya’nokon enkuttànài panton yekama tùuya’nokon winà. Tùse pena yawà tok yeselu pàkàlà tok talumattàtok wekonekakassak wechippù màlà molopai tok mattanù’nài we’nùnsak pùla iwechi! ⁴ Masapùla inchelù yamùk àli pe iwessak kon yenpàtù Kaatù uya pùn tok wepe toppe Ittuntok winàpai, tùse tok yenu’mappù ya, màlà motau tok wechi màlà yaulonpàssak pe ewalupàttau, Ittuntok Weyu màmuku pàk. ⁵ Kaatù uya wapiyalok kon wolù yawon kon yenpàtù pùn, tok talumattàppù ya molopai tuna’ma nepùppù ya àli ton kappon yamùk pata pona. Noah pùikattàppù ya màlà ikasa we’nàtok yekamanài molopai 7 pan kon kappon yamùk. ⁶ Kaatù uya pata yamùk Sodom molopai Gomorrah tawonnan pottàppù apok ke ipla ulumlàppà pe, molopai màlà yamùk kupùppù ya àli ton uya yentok ipàkàlà pe, tùwekkupù woton àli ton winàkàik. ⁷ Lot pùikattàppù ya, wakù kàyik, àli yeselu i’che pùla iwessak lùppù. ⁸ Mùkkàlà wakù kàyik, tùwemassen tok kùlottau wei kaichalà uya, sàlà yekkwa ton yeneppù molopai yetappù, màlàpàk wakù itewan utaimelunpasak wechippù tùpanama kon yetannan pen yeselu winà. ⁹ Màlàpàk Itepulu Jesus mùkkàlà i’nai kasa Kaatù pùnùnmannan pùikattàtok tùuya tok wettalumattàtok winàpai ittunài, molopai i’nai kasa àli ton kuttok tùuya wettalumattàntok yo’no ittunài Ittuntok Weyu ponalà. ¹⁰ Mùkyamlo kulu akùlù iteselu wakù ke telupa kon yetannan pen molopai Kaatù yapàikketù nulunpannan. Tùusenalippaik pùla molopai meluntà pe àli pe tùuselupasan mùkyamlo kawon kon akkwalù yamùk winàkàik. ¹¹ Inchelù yamùk lànen, meluntà pe lùiwa nai’nannùk molopai apàikkek pe lùiwa, pùsamlo ailon ton pen pàk enupannan yentai, mùkyamlo Itepulu Kaatù yemlotopo là àli pe tùuselupasan mottùnpan pe pen. ¹² Tùse pùsamlo wechi màlà tùusenumenkasan pe pùla tùwelaikasan teselu kon yawà pe, elannek ton kamo yamùk iwentusak kon ta’chitok kon pe molopai tùwàtok kon pe kasa, yà’làlà mottùnpannan mùkyamlo tùnùttu kon pen. Tok mattanùpù màlà elannek ton kamo yamùk kasa. ¹³ Talumattàntok ke tok ye’ma màlà talumattàntok tok nùkupùppù yepeppù pe. Tok yauchinpanài màlà tùke’nokon i’che tùwettok kon yà’làlà kuttok tok uya ayupo weinai. Kuli’mannan mùkyamlo auta’lettà kon tonpa pe tùwechii’ma’nokon, masapùla ennakantok tùuya’nokon yeselu wechi tùwakùli kon pe pàk! ¹⁴ Tok yenu uya uli’chan yene àli ànkuppai tùwesse pùla pen màlà. Àli ànkuppai tok wettok màlà tùweleutasen pen. Attu’mùnon kappon yamùk yamùipannan mùkyamlo àli kuttok yak. Tewan kon yenupasak tok uya màlà tùuseka’nonkasen pe yà’làlà i’che tùwettok kon pe. Kaatù uya pa’nù’nàtok yo’no tok wechi màlà! ¹⁵ Tok uya tossalon asanta nànsak màlà molopai tok utassak, tok uya asanta Balaam, Beor mumu nanùmùppù lùppù yanùnsak màlà. Àli kupù tùuya winà tùnepolo pùlayatta iwakùli mùkkàlà. ¹⁶ Itùkùn Tonki tùuselupasen pen uselupappù yàulàma pe kappon maimu pe molopai Balaam welaikatok Kaatù pùn kasa yeleutanùpùppù ya. ¹⁷ Pùsamlo mùkyamlo itenpù tuna yen walainon, katupluk yasak meluntà assetun uya walainon, Kaatù uya tok patassek kussak man tàwàlàlà ewalupà yau. ¹⁸ Ittu tùuya’nokon kasa kulu tùuselupasan mùkyamlo tùutapulà kon pe, molopai ikasa pùla tùwemassan winàpai iwemokkasak kon emennak pe, yamùipannan mùkyamlo yà’làlà akùlù teselu kon kupù tùuya’nokon yai. ¹⁹ Pùsamlo enupannan uya, “I’che ewettok kon ikuttàk kon, tàwà aya’chinài’nokon pùla nechii!” te tok pàk, tàliyi kon toi’manài’nokon yeselu yapyoto pe echii’ma. Masapùla kappon mùkkàlà yà’làlà tentaikanàippù yapyoto. ²⁰ Masapùla kappon yamùk wepesak akùlù wolù yeselu yapàikketù winàpai Kùyepulu kon molopai Kùpùikattànài Jesus Christ ittutok tùuya’nokon winà yau, molopai ya’chitukkasak akùlù tok yeselu uya yau tok yentaika ya màlà, àsà yau nen uchi tok wechi iwenukapù pe, iwepyattà yau tok wechippù yentai. ²¹ Wakù peiwa iwechippù eppaino tok pona wakù pe we’nàtok ye’ma ittusak tok uya pùla iwechi yau, ittusak tok uya yentai molopai nen uchi tok welattà màlà tùnamasen Law Kaatù winàpaino temyakù’nokon itùsak winàpai. ²² Màlà iwekkussak lùppù tok pàk màlà yekamasak lùppù uya ailon pe iwechi yekama màlà, “A’a mùkkàlà tùwennapposen tùtalùkayi yekalepàk.” Molopai, “Puuluku ipùsak lùppù mùkkàlà tùwennapposen iklo yau ekloimaik,” tawon.

¹ Utonpa yamùk! Sàlà màlà kaleta yakon itekkwa pe apyakù’nokon unmenukappù. Asaklàma ukaletayi yau imenukasak uya man eyenpenatanù’nài’nokon pe eusenumenkatok kon yau sàlà yamùk pàk. ² Pena yekamasak kon wakù ton Kaatù Maimu yenpoikannan nùssan winà ittu auya’nokon i’che wessaik, molopai Pùikattànài, Itepulu Jesus wettok ikupù i’che yeunossak kon nekamappù àpàkù’nokon. ³ Wapiya kulu, mùttutàik pata weyu wenukapù pe talumattàn pe tùwàklàsan kappon yamùk uyàpù màlà. Àli ànkuppai tùwettok kon itepulu pe tùwemassan. ⁴ Molopai “Tùuyàpù teppù ya lùkku, ewaik na’? I’nailà ken uchi nai? Kùtamo kon yamùk welikkapùppù man, tùse tamù’nawolon walùppù man iwechippù kasa wolù wekonekappù motapai!” te tok uya màlà. ⁵ Sàlà puttàka’nùpùppù tok uya ittui’ma, pena Kaatù uselupappù molopai kak molopai non wekonekappù imaimu winà. Non wekonekappù màlà tuna yapai molopai tuna winà. ⁶ Molopai tuna winà nàlà tuna’ma ke penalok non molopai non pon kon kappon yamùk umattappù. ⁷ Tùse màlà lùppù Kaatù Maimu winà kak molopai sàlàpe nai’nùk non kussak màlà inmatta toppe apok ke. Màlà yamùk kupù màlà, àli ton kappon yamùk ittutok yattai ponalà, molopai tok mattanùpù màlà. ⁸ Tùse sàlà tewinan nà kùpputtàka’nùttàu, utonpa yamùk! Tewinan wei màlà 1000 pan kili’chimo’chi yekkwa Itepulu Kaatù yenu yau. Sàlà yamùk wechi màlà ekkaichalà ipona. ⁹ Itepulu mùkkàlà ikupù tùuya teppù tùuya lùppù ko’mankanài tachin pe pen, tùulon kon usenumenka ipàk kasa. Tùse làkku àpàlikanài’nokon mùkkàlà molopai tùusetakkasen pen àpàkù’nokon masapùla ànù’là wettalumattà i’che pùla tùwechi pàk, tùse tamù’nawolon kon welattà makui winàpai i’che tùwechi pàk. ¹⁰ Tùse Itepulu Weyu uyàpù màlà amak uyàpù kasa. Màlà wei yattai kak waliwomù màlà wala’napi wettoikkwa kasa, kak yawon kon uyatù màlà molopai màlà yamùk umatta màlà, molopai non waliwomù màlà tamù’nawolon tawon kon pokonpe. ¹¹ Tamù’nawolon sàlà yamùk umatta sàlà kasa pe iwechi pàk, yà’là yekkwa ton ken kappon yamùk pe ewechi kon? Tàwà ewelaikatok kon wakù pe esuken nechii tamù’nawàlà iwettùsak pe Kaatù piyak, ¹² Kaatù Weyu màmukui’ma’nokon, molopai ànùttu kon ikuttàk kon iyàttoppe yemittàpa pe. Màlà Wei kak uyattok molopai iimattatok yattai, molopai màlà yamùk kawon kon umatta màlà a’nek ke. ¹³ Tùse Kaatù uya emennak kak molopai emennak non tùlù tùuya teppù, wakù pe we’nàtok wechi yau màlà, molopai sàlà yamùk màmuku pàk we’nà’nokon man. ¹⁴ Màlàpàk uchi, utonpa yamùk, màlà wei màmukui’ma’nokon, ànùttu kon ikuttàk kon esuken molopai àli pe pùla ewechi kon pa Kaatù yenu yau, molopai echitonpa pe ewechi kon pa ipokonpe. ¹⁵ Kùyepulu kon Jesus uya pàlikantok yentàk kon ewepùikattàtok kon yattai pe, kùtonpa kon Paul uya imenukappù apyakù’nokon kasa, pukkek Kaatù uya tùlepatok yapulài’ma. ¹⁶ Màlà kasa’ne lùppù tamù’nawolon tùkaletayi yamùk yau imenukasak ya màlà, sà yamùk pàk iichelupasak. Sa’man ton molo man ikaletayi yamùk yau. Màlà yamùk yekamannan mùkyamlo iichenupasak kon pen molopai ittunnài pe tukaik tùusennakasan ailon pe pùla, tùulon kon Kaatù Maimu kupù tùuya’nokon kasa. Màlà kasa tok uya tùumattatok kon nepù màlà. ¹⁷ Tùse amyamlo, utonpa yamùk kulu uya sàlà ittukassak màlà. Elannek peichi ettàk kon, tùpanama kon yawolon kon pen kappon yamùk utattok winà ayalà kon tukaik, molopai ewesselekkwa kon wakù apatassek kon yapai tukaik. ¹⁸ Tùse wakù pe we’nàtok molopai ittunài pe we’nàtok Kùyepulu molopai Kùpùikattànài Jesus Christ winàpaino yau Jesus kasa enatàk kon tamù’nawàlà. Tàwà apulàntok ipyau nechii, sàlàpe molopai tàwàlàlà! Emen.