2 JOHN

¹ Sàlà màlà kaleta iulà so’chi yepulu nùmenukayai’nùk. Kaatù nanùmùppù nossan molopai imunkà yamùk piyak imenukasak nai’nùk, u’nùn pe kulu unkupù ton amyamlo. Iulà pe neken nà pùla, tùse tamù’nawolon kon ailon ittunnan tù’nùn kon pe àkussatàu, ² masapùla ailon wechi kùyau’nokon pàk molopai tàwàlàlà kùpyau’nokon iwechi màlà. ³ Tàwà Kaatù Kùkàipùnù kon molopai Jesus Christ Kùkàipùnù kon Mumu kùlepai’nokon wakù pe we’nàtok ke, usentuppantok ke, molopai echitonpa pe we’nàtok ke, tàwà màlà yamùk kùponalok kon pe nechii ailon molopai uchi’nùnmantok yau. ⁴ Utauchinpatai kulu àmunkà tonpa yamùk wemapù ailon yau yeposak uya pàk, suwa ettàk kon tetok Kùkàipùnù kon uya kasa. ⁵ Màlàpàk eyekamappo uya sàlà, tù’nùnmasen nossan, uchi’nùnmanpai’nokon. Sàlà tùmenukayai’nùk apyak màlà emennak pen suwa mettàik tetok, itesak pe we’nàtokù’nokon sàlà iwepyattà motapai. ⁶ Sàlà uchi’nùnmantok uya màlà Kaatù Maimu yawàlà wema’nà’nokon yekama. Sàlà màlà enupantok, enetappù kon iwepyattà motapai, “Tamù’nawàlà emattàk kon tiuchi’nùnmaik,” tawon. ⁷ Tukke enkuttànnan utàppù man sàlà wolù yau, Jesus Christ uyàpùppù màlà kappon pe tawonnan pen mùkyamlo. Mùkkàlà yekkwa mùkkàlà enkuttànài, Christ pen mùkkàlà. ⁸ Elannek pe ettàk, tùttuik, màlà itepek pe ewe’wotokomappù kon la’chima auya’nokon tukaik, tùse eyepeppù kon yepolo kon pa tamù’nawàlà itonpappù pe là pùla. ⁹ Ànù’là Christ maimu yawà tùwessen pen, tùse tentaikase yawàlà pùla nemassai’nùk wechi màlà Kaatù pùla. Ànù’là Christ maimu yawà tùwessen wechi màlà Kaatù Kùkàipùnù molopai Imu tawonnan yesak pe. ¹⁰ Ànù’là uyàssak apyak sàlà enupantok ne’nài pen wechi yau, kùsewonnùpùi àwùk tak, wapùla echitonpa pe là ipokonpe kechii. ¹¹ Masapùla ànù’là “Ewonkà,” tawon wena màlà ipatùnayi pe, àli kuttok ya yau. ¹² Tukke unekama molo man àpàkù’nokon, tùse enmenukapai pùla wessaik sàlà kaleta pàk, tùse akaklanpa kon uya pàk enpen wessaik, eyelupase’nokon iulà pe, i’napailà tùutauchinpaik we’nà toppe. ¹³ Apachi yanùnsak lùppù, munkà yamùk “Wakù pe na’ messatàu?” nùkayan.