1 TIMOTHY

¹ Sàlà màlà kaleta Paul winàpaino. Kaatù Kùpùikattànài molopai Christ Jesus napyontàppù iulà, Christ Jesus enpen we’nàtok ke lepanài neunoko pe. ² Timothy, ailon tetok yau umu kulu kasa tùwessen piyak unmenukappù. Wàpùlemayaik Kaatù Kùkàipùnù molopai Jesus Christ Kùyepulu uya elepa toppe wakù pe we’nàtok ke, usentuppantok ke, molopai echitonpa pe we’nàtok ke. ³ Ephesus po ewechi i’che wessaik, eyekamappoppù uya kasa Macedonia pona utà yau. Tùulon kon kappon yamùk ailon pen enupantok ke kappon yamùk yenupayan molo, molopai tok yeleutanùpù auya i’che wessaik. ⁴ Ailon pen panton yamùk molopai tukkan tùtamo kon yesek yamùk pàkànsau tùusàulàmatok kon nonka toppe tok uya yekamakà, masapùla sàlà uya neken usàulàmantok nepù màlà. Kaatù wotokoyi ailon tetok yau tùkussen kupù yentai. ⁵ Ailon uchi’nùnmantok pàk tok menupaik esukenan ewan yapai tùuyàssen molopai tùwanmùla we’nàtok ewan yau yapai, molopai ailon tetok i’napailon kulu yapai. ⁶ Tùulon kon welattàsak man sàlà yamùk winàpai molopai tok utassak man pakko pe uselupantok yak. ⁷ Law pàk enupannan pe eppai tok man, tùse tùuselupatok kon ipàk ittu tok uya pùla man wapùla tùuselupatok kon ipàk wechi kulu là yà’là kasa ittu tok uya pùla ikupù tùuya’nokon kasa tok uchittu tùse. ⁸ Ittu’nokon man Law wechi wakù pe, ikasa yapulà yau. ⁹ Sàlà ittutàk kon, Law wekkussak màlà wakù ton nà kappon yamùk ponalok pe pùla. Tùse Law yawolon kon pen ponalok pe, àli ku’nài nan, Kaatù yapulànnan pen, molopai àsà pe tùwessan ponalok pe, Kaatù pùnon, kappon yamùk tùkàipùnù kon wapùla tùsan kon wànnan ponalok pe, molopai kappon yamùk tùkkannan ponalok pe. ¹⁰ Law menukappù nàlà màlà tùnoppù kon pen pokonpe tùwessan ponalok pe, kàyik pokonpe kàyik wechi ponalok pe, kappon yonannài nan pùlayatta yepotok kon pe tùuya’nokon ipàk pe ponalok pe, kasei pe tùwessan molopai ailon kasa tùukaseitasan kottù motau ponalok pe tùpatalà yà’làlà ku’nài nan ailon enupantok winàpai. ¹¹ Màlàichi màlà enupantok yeposak itekale yau, uyemyak intùlùppù yekama toppe uya, Wakù kulu Itekale Eke Kaatù winàpaino. ¹² Tenki ukayaik Christ Jesus Kùyepulu kon pàk, ulepanàippù meluntà ke uwotokoyi kuttoppe uya. Tenki ukayaik uyensak ya tùwe’wotokomasen yek pe pàk molopai uyanùnsak ya tùwotokoyi yak pàk, ¹³ àli pe lànen uselupasak tùpàk tùse, tùtalumattà uya molopai tùmottùnpa uya tùse. Kaatù usentuppappù màlà upàk, masapùla unkupù ittui’ma pùla welaika ikasa kasa pàk molopai ailon te uya pùla lùppù lànen tùse. ¹⁴ Kùyepulu kon wessak wakù pe man upàk, upùlemasak ya man eke pe kulu ailon tetok molopai uchi’nùnmantok Christ Jesus yau nai’nùk ke. ¹⁵ Sàlà màlà ailon watetok, tanùnsen pe kulu iwechi, Christ Jesus uyàpùppù sàlà wolù yak àli ton pùikattàse, iulà mùkkàlà tok yentai eke pe kulu àli ku’nàippù. ¹⁶ Tùse ànù’là yentai àli pe kulu wechi pàk Kaatù usentuppappù màlà upàk tùwenukassen pen Christ Jesus wettok pàlikanài pe yentok ipàkàlà pe. Sàlà kupùppù ya màlà tùulon kon uya ailon te toppe Christ pàk molopai tàwàlàlà wema’nàtok yepotoppe tok uya. ¹⁷ Tàwàlàlà Kin pe tùwessen, tùumatta woton pen molopai yensak pen, tewinan Kaatù piyak, namantok molopai apulàntok tùlù màlà tàwàlà molopai tàwàlàlà! Emen. ¹⁸ Umu Timothy, sàlà enupantok tùlù uya sàlà eyemyak. Kaatù Maimu uya Wakù Akkwalù yai yekamappù àpàk tùuselupa yau lùppù yawàlà iwechi màlà. Tàwà màlà mayin ewepanta’matok ike pe nechii, wakù ponalok pe ewepanta’ma yawà, ¹⁹ ailon tetok auya eyewan yau nechii molopai tùwanmùla eyewan yau ewettok molo nechii. Tùulon kon wechippù ailon tetok tùuya’nokon maimu yawàlà pùla man molopai ailon tetok tùuya’nokon mattanùssak tok uya. ²⁰ Tok kùlottau Hymenaeus man molopai Alexander, mùkyamlo untùlùssan Settan meluntàlù yemyak tok usenupa toppe, àli pe Kaatù pàk tùuselupa kon yeleutanùttoppe tok uya.

¹ Wapiya kulu, tok ponalà’ne kappon yamùk pona àwàpùlema pa eyekamappoyan iulà. Tamù’nawàlà tok pùikattà toppe Kaatù uya màpùlemaik molopai tenki tetok auya tok pàk mekamaik Kaatù pàk. ² Kin yamùk, molopai tamù’nawolon kon potolù yamùk ponalok pe, wema’nà toppe eppana àsà pùla molopai echitonpa pe, wakù pe Kaatù Kùpùikattànài tauchinpaik molopai iwalai iteselu pe tùwelaikaik we’nà toppe. ³ Sàlà màlà wakù molopai Kaatù Kùpùikattànài yauchinpa ya màlà, ⁴ Tamù’nawolon kon wepùikattà i’chelok mùkkàlà molopai ailon ittu tok uya i’che tùwessen. ⁵ Masapùla Kaatù mùkkàlà tewinan, molopai tewinan nàlà molo man Kaatù molopai kappon yamùk tawonnan yakletawon, mùkkàlà kàyik Christ Jesus. ⁶ Iwettùsak lùppù tamù’nawolon kon kappon yamùk pùikattà toppe tùuya. Sàlàichi màlà Kaatù nenpoikappù wolù yawon kon nùttu pe iwekkuttok yattai tok wepùikattà toppe. ⁷ Màlàpàk uchi sàlà uyeunossak kappon yamùk Jew yamùk pen yenupanài pe molopai ailon yekale yekamase. Ailon pe uselupa sàlà, kasei pe wechi pen! ⁸ Mailàlà so’chi pàk we’nà yattai’ne kàyik yamùk Kaatù yemyak iwettùsak kon wàpùlema i’che wessaik temyatù kon tenkaik kakàik, tùwe’naikaik pùla wapùla tùusàulàmaik pùla. ⁹ Uli’chami’chi wepontà nàlà wakù pe, tùttuik, tipippà kon tùwaputtàse i’che wessaik, tùusema’nonpaik kolù ke wapùla pearl ke pùla, teseluttàpàsse tùppai tùkappàsse pùla, molopai epekkek kulu là pon ke tùwepontàik pùla, ¹⁰ tùse wakù pe iwelaikatok, Kaatù ittunnan welaikatok kasa. ¹¹ Uli’chami’chi usenupa nen màlà eppana echii’ma molopai tamù’nawàlà àssà’mùla entuppak tiuchittuse. ¹² Enupan toppe tok uya tok ku’nài pen iulà wapùla kàyik yamùk yentai tok wettoppe ikupù uya pùla man. Tàwà eppana tok nechii. ¹³ Masapùla Adam konekappù màlà wapiya, molopai màlà tùpo nen uchi Eve konekappù màlà. ¹⁴ Molopai Adam pen mùkkàlà yennakasak lùppù, uli’chan làkku mùkkàlà yennakasak lùppù molopai Kaatù Maimu ikkwà’nàippù. ¹⁵ Tùse uli’chan wepùikattà màlà tùumunkàta winà, ailon tetok, uchi’nùnmantok, esuken we’nàtok molopai tùttuik wema’nàtok, wakù pe tipippà tùwaputtàik tùwepontàsen pe tùwechi yau tàwàlà.

¹ Sàlà màlà ailon mayin. Kàyik wechi so’chi yennài pe kulu eppai yau, iwalai wakù wotoko i’che iwechi màlà. ² So’chi yennài wechi màlà àli pe là ipantomù pùla, tewin neken inoppù, tùttuik tùwemassen pe, wakù pe itesek, wakù pe kaklan yamùk pàk tùwessen pe tùwùk tau, enupanài yek pe nàlà. ³ Tùwetùnsen pe pùla, wapùla àsà pe tùwessen pe pùla, tùse yà’làlà pàlikanài pe molopai echitonpa pe, pùlayatta pùnùnmanài pe pùla. ⁴ Tùwùk tawon kon yesak pe molopai wakù pe tùmunkà yamùk ku’nài pe tùmaimu yawàlà, tùnamasen pe tùwettoppe. ⁵ Masapùla ànù’là kàyik, tùmunkà molopai tùnoppù yesak pen molopai tok mainanpa tùuya ittunài pen wechi yau, yà’là kasa ken Kaatù so’chiyi yesak pe iwechi? ⁶ Emennak pe là Kaatù yemyak iwettùsak pe pùla, wakù pe tùwechi tùtonpa yentai pàk tùusenumenkasen pe iwechi tukaik, molopai tùtalumattàtok yepolo ya tukaik, Makui wechippù kasa. ⁷ Tùnamasen pe iwechi màlà so’chi tawon kon pen winà, iwekkuli’ma tukaik molopai iwekkawai’ma Makui uya tùplantok yak tukaik. ⁸ So’chi Tau pùikattànnan wechi màlà wakù pe iwemattok molopai ailon pe, eke pe wain inchinài pe pùla wapùla pùlayatta pàk tùuseka’nonkasen pe pùla. ⁹ I’napailon ailon, Kaatù nekamappù lùppù kùpàk yawàlà tok nechii molopai iwalai kupùi tok tùwanmùla tùwettok kon pe. ¹⁰ Tok ittu màlà wapiya molopai tùttutok yentakasak tok uya wakù pe yau, tok we’wotokoma màlà Kaatù wotokoyi yau. ¹¹ Tok noppù yamùk wechi nàlà màlà wakù pe, àli pe tùuselupasen tùtonpa pàk pe pùla, wakù pe tùttuik tùwemassen pe, ailon pe tamù’nawolon yau tùwessen pe. ¹² So’chi tau pùikattànài wechi màlà tewin inoppù molopai tùnoppù, tùmunkà tawonnan yesak pe molopai tok mainanpanài pe tùwessen pe wakù pe. ¹³ Mùkyamlo wakù pe wotoko ku’nài nan wechi màlà wakù pe ipantomù, molopai ailon tetok ya Christ Jesus pàk yau tùnamasen pe iwechi. ¹⁴ Sàlà menukai’ma, enpen wessaik uyàpù eyense pàk tachin pe kulu tùpo pùla. ¹⁵ Tùse uko’mamù yau, sàlà kaleta uya atta we’nàtok Kaatù munkà yamùk pe yekama màlà, màlà nulànan Kaatù so’chiyi tau, ailon wakapuli molopai itessek yekama uya. ¹⁶ Ewaik lù’na’mà lù tetok pùn màlà ailon tetok kùuya’nokon eke kulu. Iichenpoikappù kappon pun yau. Ailon pe iwechi yenpoikappù Wakù Akkwalù uya. Molopai inchelù yamùk uya yeneppù. Tukkan kon kappon yamùk kùlottau Jesus yekale yekamappù màlà. Wolù yawolon kon uya ailon teppù ipàk. Molopai yanùmùppù epùn pona.

¹ Wakù Akkwalù uya yekamasak man ailon pe, tùulon kon kappon yamùk uya ailon tetok nonka màlà pata weyu wenukapù winàkàik, ennakannan akkwalù yamùk maimu yawàlà tok wechi màlà molopai àli ton akkwalù yamùk uya enupantok maimu yawàlà tok wechi. ² Sàlà enupantok màlà tùuyàssen kappon yamùk ennakannan kasei ton winà, molopai ittutok tok yewan uya weli’chak màlà, a’nek ayan nùpuluppù kasa. ³ Mùkyamlo walainon kappon yamùk uya enupan màlà, wemali’man wechi màlà ikasa pùla molopai yà’là yekkwa là kùyali màlà tùnassen pen, tukaik. Tùse Kaatù uya màlà sàlà yamùk kùyali konekappù ailon tawonnan molopai ailon ittunnan nùnapù pe tenki tukaik. ⁴ Tamù’nawolon Kaatù nùkonekappù màlà wakù, molopai tùnulunpasen pe pùla iwechi, tùse tamù’nawolon wechi màlà tanùnsen pe tenki tei’ma. ⁵ Masapùla Kaatù Maimu molopai àwàpùlematok uya ikussak màlà tùwanmùla inapù pa. ⁶ Sàlà yamùk usenupantok iwinà yekamasak auya ailon tawonnan pàk yau, wakù pe Jesus yapyoto pe tùwessen pe ewechi màlà, ailon itekale yau yemokkasak pe molopai wakù enupantok yawàlà iwessak pe. ⁷ Kappon yamùk mùkyamlo italumayi’chan, ailon ton pen nà panton yekamannan, tùse màlà yamùk uya enupantok yawàlà kechii, Kaatù uya neken enupantok yawàlà ewechi pa esenupakà. ⁸ Ànù’là yenupa aitun pe utàntoppe wapùla wenkalunnà toppe, màlà màlà wakù molopai tepeppù kenan, tùse akkwalù uya enupantok Kaatù wettok i’che kasa màlà wakùiwa tamù’nawolon yau, masapùla wema’nàtok sàlàpe molopai ewanawolok yau tàwàlàlà wema’nàtok ke lepan tùuya tesak ya pàk. ⁹ Sàlà màlà ailon watetok, tanùnsen pe kulu iwechi. ¹⁰ Màlàpàk uchi sàlà, wakù pe wema’nà’nokon molopai sa’man pe we’wotokoman’nokon i’che we’nà, masapùla enpen we’nàtok kon nonkasak nulànan Kaatù pàk pàk tamù’nawolon kon kappon yamùk Pùikattànài, mùkyamlo kulu ailon tawonnan pe nai’nannùk. ¹¹ Sàlà yamùk pàk tok yekamappokà molopai sàlà pàk tok yenupakà. ¹² Ànù’là tùma’le tukai’no eyentak mule pe là ewechi pàk, tùse ailon tawonnan uya yentok ipàkàlà pe ekkà, euselupatok yau, eyeselu yau, euchi’nùnmatok yau, ailon tetok auya yau, molopai esuken àli pùla ewettok yau. ¹³ Tamùkke kappon yamùk tipili’che Kaatù Maimu yenkà, itekale yekamakà, molopai tok yenupakà uyàpù ponalà. ¹⁴ Wakù Akkwalù uya lepantok ayau nai’nùk tapulàse pùla kùkkupùi. Kaatù Maimu yenpoikannan uselupappù ipàk lùppù, so’chi yepulu pe tùwessan uya temyatù kon tùlù àpona yattai elepappù lùppù ike. ¹⁵ Sàlà yamùk kupù pàk uchi ekkà. Ewemapù yawàlà ikukkà, tamù’nawolon kon uya Kaatù wettok i’che kasa ewena yentoppe. ¹⁶ Tùttuik emakkà molopai kappon yamùk yenupatok auya ike yenkà wakù pe. Sàlà yamùk kupù pàk ekkà, masapùla ikupù auya yau ewepùikattà màlà àmàlà molopai eyetannan nàlà.

¹ Kàyik eyentaino kùsàulàmai, tùse yekamappokà àkàipùnù yekamappo auya kasa. Umoine ton ikukkà ayakonnon kasa, ² kokko yamùk lùiwa asanon kasa molopai ema’nomi’chi àwàlichi ton kasa, tùwanmùla. ³ Itayappù iweli’chak kon ipùikattàkà iwepùikattàtok iwinà pùnon kulu. ⁴ Tùse tùmunkà ke wapùla tùpayan ke iwechi yau, tàwà mùkyamlo nùmainanpai, sàlà kasa tùsan kon molopai tùkàipùnù kon, tùtamo kon, tùnok kon uya tùmainanpappù kon yepeppù pe, masapùla sàlà uya Kaatù yauchinpa màlà. ⁵ Tewinchalon kulu, ànù’là ipùikattànài woton pùn uya enpen tùwettok nonkasak màlà Kaatù pona molopai tùpùikattàtok yenna pàk iwechi ewalupà kaichalà molopai wei kaichalà. ⁶ Tùse mùkkàlà itayappù iweli’chak lùppù i’che tùwettok kasa tùwemassen, welikkassak màlà, nulà lànen tùse. ⁷ Sàlà enupantok yekamakà tok pàk, ànù’là uya tok pataka àli pe wapùla tok yàulàma tukaik. ⁸ Tùse ànù’là uya tùtonpa mainanpa pùla iwechi yau, tùtonpa kulu, tùsan, tùkàipùnù winàpaino, ailon yawàlà pùla iwessak màlà yetapàssak ya molopai ailon tawon pen yentai kulu àli pe iwechi màlà. ⁹ Ànù’là itayappù iweli’chak lùppù yesek tùlù pen màlà tùulon kon itayappù iweli’chak kon yesek kùlottak 60 yo’no ikili’chimo’chiyi tùse, tùse itepoi iwechi yau itùlù màlà. Molopai nàlà iwemali’masak pe iwechi màlà tewin itekkwa neken. ¹⁰ Molopai nàlà wakù ku’nài pe itekale nechiik, tùmunkà yamùk yemokkanài wakù pe pe, kaklan yamùk yanùnnài tùwùk tak pe, Kaatù ponalok kon pùta kolùkanài pe, tùwettalumattàsan pùikattànài pe, molopai tamù’nawolon yà’là yekkwa là wakù ku’nài pe. ¹¹ Tùse ema’nomi’chi itayappù iweli’chak kon kùttùlùi itayappù iweli’chak kon yesek kùlottak, masapùla ànkuppai tok wettok uya emali’mapai tok kupù yau, tùwelattàsan mùkyamlo Christ winàpai, ¹² molopai wapiyalok ikupù tùuya’nokon teppù tùuya’nokon ikkwàtù tok uya pàk. ¹³ Yà’là pàk pùla tùuko’manse tok usenupasak màlà, yakontawàlà tùusalà kon ke. Tùse nàlà tok uselupa là tùtonpa kon pàk echipalà molopai yauchin pe tok wechi yà’là pen pàk, yà’làlà yekamapaino kulu là pen nànen uchi yekama pàk. ¹⁴ Màlàpàk ema’nomi’chi itayappù iweli’chak kon wemali’ma i’che wechi màlà, tùumunkàtatok kon pe, tùwùk molopai tùmunkà yamùk mainanpa toppe tùuya, kùyeyaton kon uselupatok àli pe kùpàk yattai pùla. ¹⁵ Masapùla tùulon kon itayappù iweli’chak kon nùssan welattàkassak man Settan ya’là. ¹⁶ Tùse ànù’là nossan ailon tawon Kaatù pàk wechi itayappù iweli’chak kon nùppù yesak pe tùtonpa yamùk kùlottau yau, tàwà tok mainanpai, so’chi wotokoyi pe iwechi tukaik, iwepùikattàtok iwinà pùn kulu mainanpa toppe so’chi uya. ¹⁷ So’chi yepulu yamùk wakù pe wotoko yanài nan wechi màlà te’masan pe eke peiwa, mùkyamlo kulu tùwe’wotokomasan sa’man pe wakù itekale yekama pàk molopai kappon yamùk yenupa pàk. ¹⁸ Masapùla Kaatù Maimu, “Paaka mùta kùsaulomùi a’naik yeppa ya tùse,” tawon, molopai, “Tùwe’wotokomasen mùkkàlà te’masen,” tawon. ¹⁹ So’chi yepulu winàkàik uselupantok kùsetai asa’lon kon wapùla àsolùwawon kon uya neken ipantomù nessak yau yeta màlà. ²⁰ Tùse àli ku’nài nan nùssan yàulàmakà molopai tok yekamappokà kappon yamùk yemlotopo, amak yai pùla, tok tonpa yamùk yenu yappolù pe. ²¹ Kaatù yemlotopo molopai Christ Jesus yemlotopo, molopai wakù ton inchelù yamùk yemlotopo, eyekamappo uya sàlà tùumayintaik, sàlà enupantok yawàlà ewechi pa, ekkaichalà tùmenkaik pùla ànù’là pàk yà’làlà ànkupù kupù pa. ²² Kesemittàpai eyemyatù tùlù auya ànù’là pona pàk Itepulu Jesus wotokoyi ponalok pe tok tùlù auya pàk. Tùulon kon uya àli kupù tonpa pe kechii. Wakù pe esuken ekkà. ²³ Tuna neken kichinchii, tùse mala lùkkwà wain inchikà eyipik pe àlotta pàkànsau, masapùla echipalà e’nek pe ewechi pàk. ²⁴ Tùulon kon kappon yamùk makuyi màlà tùusensen, molopai tok makuyi utà màlà tok wapiya ittuntok patassek yak, tùse tùulon kon makuyi usene màlà masaiwa. ²⁵ Màlà kasa nàlà wakù eselu usene màlà, molopai màlà yamùk tùusensan kulu pen lànen uso’nantok pùla iwechi màlà.

¹ Tamù’nawolon kon tepotolù ke nai’nannùk tàwà tepotolù kon tùnamaik kulu nechii, ànù’là uselupa àli pe Kaatù yesek molopai ina uya enupantok winàkàik tukaik. ² Ailon tawonnan pe tepotolù kon yamùk wechi yau tok poitolù ton i’nùmla tok kuttak, masapùla ailon tawonnan nàlà mùkyamlo. Watùse, tàwà tepotolù kon yapyoto pe tok nechii wakù peiwa, masapùla mùkyamlo nepùikattàyai’nannùk tok wotokoyi yau mùkyamlo ailon tawonnan molopai tok pùnùn ton. Sàlà pàk kappon yamùk menupaik molopai sàlà yamùk mekamaik. ³ Ànù’là tùpatalon, ailon pen enupantok yekamanài molopai ailon Kùyepulu Jesus Christ Maimu molopai enupantok Kaatù winàpaino pàk ailon tawon pen wechi yau, ⁴ mùkkàlà wechi màlà tùtonpa yentai tùwekkussen pe. Molopai yà’làlà ittu ya pen màlà. Àsàulàmapai molopai e’naikapai iwechi mayin yamùk pàkàlà, molopai sàlà uya màlà kùlùmàlunnàtok nepù, tonpa yewanma’làtok, ànù’là mottùnpatok, àli pe usenumenkantok. ⁵ Molopai mùkyamlo usàulàma echipalà uya tok usenumenkatok mattanùssak màlà, molopai ailon pùnon mùkyamlo. Tukke mamin yesak pe wenantok iwinà pe sàlà enupantok maimu yawàlà we’nà wechi pe yekama tok uya màlà. ⁶ Ewaik, Kaatù ya’là we’nà màlà kappon manài eke pe, itesak pe we’nàtok pàk tenki tawon pe we’nà yau. ⁷ Yà’là nepùppù ken kùuya’nokon wolù yak? Ipla! Yà’là yalà ken kùuya’nokon wolù yapai? Ipla! ⁸ Màlàpàk, teipa ke molopai tùpon ke we’nà’nokon yau, màlà pàk tenki tawon pe we’nà màlà. ⁹ Tùse mùkyamlo tukke mamin i’chelok kon wena màlà tùttutok kon yak molopai tùplantok kon yak molopai suwalai là àsà là ànkuppai we’nàtok, uya màlà kappon yamùk pàlàka mattantok àsà kulu yak. ¹⁰ Masapùla pùlayatta pàk ewan tùtok màlà tamù’nawàlà yà’là yekkwa àli uyàttok iwinà. Tùulon kon wechippù man enepopai kulu màlàyau tok utàppù miya ailon tetok winàpai molopai tok usewankono’mappù, màlà uya tok yewan ikkwàssak. ¹¹ Tùse àmàlà mùkkàlà Kaatù ponalok kàyik, sàlà yekkwa ton winàpai ekkà. E’wotokomakà sàlà yamùk yepolo pa molopai ikasa, wakù pe Kaatù yauchinpanài pe ewechi pa, ailon te toppe, àtonpa tù’nùnmaik, yà’làlà pàlika pa molopai ten pe alomùla ewechi pa. ¹² Wakù pe epanta’makà ailon tetok auya yau meluntà pe ewechi pa, molopai tàwàlà wema’nàtok yepokà àponalok pe, masapùla sàlà wema’nàtok yak màlà Kaatù uya àkà’mappù “Ailon tawon iulà” tesak auya yau, tukkan kon yetannan yemlotopo. ¹³ Kaatù yemlotopo eyekamappo uya sàlà umaimu yawàlà ewechi pa. Mùkkàlà wema’nàtok tùnài tamù’nawolon yak molopai Christ Jesus, Pontius Pilate yemlotopo wakù yekamanàippù yemlotopo. ¹⁴ Sàlà enupantok maimu yawàlà ekkà, molopai esuken ekkà molopai yà’làlà iwalai pen pùla, Kùyepulu Jesus Christ Weyu usenpoika ponalà. ¹⁵ Wakù Kaatù mùkkàlà tewinan kulu Itepulu tamù’nawolon kon kin yamùk Kinù, molopai itepulu yamùk Yepulu. ¹⁶ Mùkkàlà neken tewinan tàwàlàlà tùwemassen. Tùwemassen mùkkàlà akkwa ànù’là nepolo itenpatau pen. Ànù’là uya yensak pùla iwechi màlà, molopai ànù’là uya yene pen màlà. Tàwà mùkkàlà ponalok pe namantok molopai tàwàlàlà apàikkek pe we’nàtok nechii! Emen. ¹⁷ Tukke itemamin nai’nannùk sàlà motau wema’nàtok yau yekamappokkà. Itekkwa pe tok kùsekkuttak molopai enpen tok kùsettak temamin kon sa’man pe pùla tùwe’la’chimasen pe nai’nùk pàk, tùse Kaatù pàk làkku enpen tok nechii, mùkkàlà tùweleutaik pùla tamù’nawolon ke lepanyai’nùk tapulàsen pe nai’nùk ke. ¹⁸ Wakù kuttoppe tok uya yekamakà, eke pe tùutauchinpaik tok wettoppe tùnkupù kon yau, alikyek pe tùwe’lepasan pe tok wettoppe. ¹⁹ Sàlà kasa tok uya màlà temamin kon pilipù ewanawolok woton yapon pe molopai nen uchi tok uya wema’nàtok yepolo màlà ailon kulu wema’nàtok. ²⁰ Timothy, màlà itùsak lùppù eyemyak ikukkà wakù pe. Kaatù pùnon uselupatok yà’là pen nà kùsetai, wakù kasa nùsetayai’nùk tùse iwalai pen enupantok. ²¹ Masapùla tùulon kon kappon yamùk uya, “ittutok yesak pe wessaik,” tesak man, ailon tetok tùuya’nokon ipàkàlà yenu’mappù tok uya màlà màlà pàkànsau. Wakù pe Kaatù wettok wechi tamù’nawàlà apyau’nokon màlà.