1 THESSALONIANS

¹ Sàlà màlà Paul, Silas, molopai Timothy tawonnan winàpaino. Kappon yamùk Thessalonica pon so’chi tawon kon Kaatù Kùkàipùnù molopai Itepulu Christ Jesus ponalok kon piyak imenukasak. Tàwà wakù pe Kaatù wettok molopai echitonpa pe we’nàtok [Kaatù kùkàipùnù molopai Jesus Christ winàpaino] àponalok kon pe nechii. ² Tenki tawonnan ina tàwàlà Kaatù pàk ina wàpùlema yau, eyekama kon pe. ³ Masapùla ina nùttuyan, Kaatù Kùkàipùnù kon yemlotopo ailon tetok auya’nokon yai ewe’wotokoma kon sa’man pe uchi’nùnmantok ke. Molopai enpen ewettok kon Kùyepulu Jesus Christ pàk wechi meluntà pe ittuyan ina. ⁴ Ina tonpa yamùk, ina nùttuyan, Kaatù uya à’nùnma kon molopai ayanùnsak kon ya tùponalok kon pe. ⁵ Masapùla wakù itekale nepùppù ina uya màlà apyakù’nokon, imaimuppù lùppù pe neken nà pùla. Tùse tùmeluntàlù ke Wakù Akkwalù pokonpe nàlà molopai tamù’nawàlà ikasa eyewan yelupatok ya pokonpe. Mùttuyatàik ina wemapùppù apyau’nokon tùwechi kon yau àponalok kon pe. ⁶ Ina yeselu molopai Itepulu Jesus yeselu kasa ewelaikasak kon màlà. Ina wemapù kasa ewemapù kon ke, eke pe ewettalumattài’ma’nokon, wakù itekale manùntantàu tùutauchinpaik, Wakù Akkwalù winàpai iyàssak lùppù. ⁷ Màlàpàk ailon tawonnan Jesus pàk Macedonia molopai Achaia pon kon uya yentok ipàkàlà pe menatantàu. ⁸ Masapùla Itepulu yekale utàsak man mailàlà ewinà’nokon Macedonia molopai Achaia yau neken pùla, tùse ailon tetok auya’nokon Kaatù pàk yekale utàppù man mailàlà. Yà’làlà àpàkù’nokon ina nekama woton pùla man. ⁹ Akaklanpasak kon ina uya yattaino lùppù pàk tamù’nawàlà kappon yamùk tùuselupasan tùutauchinpaik, ina yanùmùppù auya’nokon pàk. Molopai tùutauchinpaik ewelattàsak kon ailon pen kaatù winàpai ailon molopai tàwàlàlà tùwemassen Kaatù winàkàik itapyoto pe pàk tùuselupasan mùkyamlo. ¹⁰ Molopai Imu, Jesus Christ uyàpù epùn poi màmuku pàk ewechi kon, inwuluukappù lùppù weli’nàtok yapai, molopai pùikattànài Kaatù we’naikatok tùuyàpù woton winàpai pàk tùuselupasan.

¹ Amyamlo pe’nokon mùttuyatàik, utonpa yamùk, akaklanpatok kon ina uya wechippù iwoton pe pùla là pùla. ² Mùttuyatàik ina talumattàkapùppù molopai ina mottùnpapàtùppù Philippi po, ina uyàpù Thessalonica pona apyakù’nokon wapiya. Tùse ku Kaatù uya meluntà pe tùwettalipaik pùla uselupantok wakù itekale yekama pe yapàikketù ke ina lepappù, eke pe lànen iwakkà’nài nan tùse. ³ Màlàpàk apawanattàyatài’nùk ina wakù itekale yai wechi màlà ennakantok pokonpe là pùla, molopai àli pe là iteselu pùla, wapùla ànù’là yennakai’che ina wechi pùla man. ⁴ Tùse làkku ina uselupa nai’nùk Kaatù wettok i’che kasa, masapùla ina yanùnsak ya nai’nùk molopai wakù itekale tùsak ya ina yemyak ina nekama pe. Kappon yamùk yauchinpai’che là ina wechi pen sàlà. Tùse Kaatù làkku anauchinpapai ina wechi, mùkkàlà ina yeselu ina yewan yau nai’nùk ittunài. ⁵ Mùttuyatàik nàlà nen wakù ton nà mayin ke kappon yapulà pe tukaik là ina usennaka pùn Kaatù wechi màlà ina yekamanài pe molopai ina yennài pe tùuseka’nonkaik là ina wettok wapu woton pùla iwechi. ⁶ Apulàntok kulu là i’che ina wechi pùn ànù’là winàpai, ewinàpai’nokon nà wapùla tùulon kon nà winàpai. ⁷ Màlà kasa kan Christ neunokoppù lùssan pe ina uya ikupùppù sàlà eppaino. Tùse ten pe ina nettai apyau’nokon, wakù pe àsà pe pùla amai uya tùmunkà mainanpa kasa. ⁸ Masapùla ina pùnùn pe kulu mettantàu màlàpàk nen uchi ina utauchinpasak nettai wakù itekale ke neken nà elepa kon pàk pùla. Tùse àklottau’nokon nàlà emappai ina nettai à’nùnma kon ina uya pàk. ⁹ Ewaik, mùttuyatàik, ina tonpa yamùk, sa’man pe ina we’wotokomappù. Ina we’wotokomappù wei kaichalà molopai ewalupàttawàlà, awanittàpa kon nà ina uya tukaik wakù itekale Kaatù winàpaino yekama tùuya’nokon yawàlà. ¹⁰ Amyamlo mùkyamlo ina yennài nan nùssan molopai Kaatù nàlà mùkkàlà ina yennài, ina yeselu molopai ina welaikatok wechi wakù pe esuken molopai ikasa, amyamlo ailon tawonnan winàkàik molopai yà’làlà iwalai pen woton pùla nettai. ¹¹ Mùttuyatàik wakù pe ina wechippù tamù’nawàlà àpàkù’nokon papai wechi wakù pe tùmunkà yamùk pàk kasa. ¹² Eyelupatantàu ina emeluntàpa kon pe, eyewan kon ipik pe ina nettai molopai apawanattàtantàu ina, màlà Kaatù yauchinpanài pe wema’nàtok kasa ewemapù kon pa, Kaatù àkà’manàippù’nokon itepulu pe tùwettok molopai apulàntok tùuya ponalok pe ewechi kon pa. ¹³ Molopai sàlà pàkànsau tàwàlàlà, tenki te màlà ina uya Kaatù pàk. Kaatù Maimu nessak ina uya apyakù’nokon yau, metatantàu molopai manùntantàu, kappon yamùk winàpaino pe là tùkusse pùla tùse Kaatù Maimu pe nen tùkusse itekale manùntantàu. Kaatù Maimu nen nai’nùk. Masapùla Kaatù we’wotokoma nai’nùk amyamlo ailon tawonnan tùpàk kùlottau. ¹⁴ Utonpa yamùk, amyamlo winàkàik màlà lùppù nekkuttai, Kaatù ponalok kon Judea pon kon, Christ Jesus ponalok kon winàkàik iwekkussak lùppù walai. Màlà lùppù talumattàntok Jew yamùk uya ailon tawonnan talumattàppù kasa mettalumattàtantàu apata yawon kon winà là kan. ¹⁵ Mùkyamlo, Jew yamùk uya màlà Itepulu Jesus molopai Kaatù Maimu yenpoikannan nùssan wànàppù molopai ina yenpakkappù tok uya. Kaatù yewanma pe màlà tok nùkupùppù wechi molopai tamù’nawolon kon pàk àsà pe Jew yamùk wechi. ¹⁶ Tok wechippù nàlà ina yeleutanùpùi’che wakù itekale yekama ina uya kappon yamùk Jew yamùk pen pàk tukaik, tok wepùikattà tukaik. Sàlà kasa màlà tamù’nawàlà eke pe tok makuyi wepilipù tok pona. Màlàpàk nen uchi Kaatù we’naikatok wepukakassak man tok pona. ¹⁷ Utonpa yamùk, ina wepantakasak ewinàpai’nokon yau mala làichi, usenumenkantok kon yau pùla tùse kappon pe echipyau we’nàtok yau, àli pe kulu apatappù kon wechippù ina pona molopai eyenpai’nokon ina tùse. ¹⁸ Apyakù’nokon ennappotu’mapai ina wechippù iulà, Paul, wechippù wennappo i’che kulu tewin itekkwa neken nà pùla, tùse Settan uya ina utà toppe ina kupù pùn. ¹⁹ Amyamlo nen mùkyamlo, enpen ina wettok kon, ina utauchinpatok ipàkànsau, molopai ina utapulàtok ipàkàlà ina uselupatok yau, itepulu Jesus yemlotopo iyàpù yattai. ²⁰ Ewaik, ina utapulàtok kon amyamlo molopai ina yewan yapon ton amyamlo.

¹ Molopai nen uchi ipàlika ina uya yentai iwechi yau ina usenumenkappù pata Athens motau tùwemattok kon pe tùmàlà’nokon pe neken, tewincha. ² Ina uya Timothy yeunokoppù apyakù’nokon, ina tonpa molopai Kaatù poitolù molopai Wakù Christ yekale yekamanài. Ina neunottai emeluntàlùttàtok kon pe ya molopai ailon tetok auya’nokon pùikattà toppe ya, ³ Sàlà yamùk talumattàntok pe nai’nùk winà ewennappo kon tukaik. Ittu auya’nokon màlà màlà yekkwa ton wettalumattàntok wechi molo Kaatù yeselu pùkkù pe kùponalok kon pe. ⁴ Masapùla apyau’nokon ina wechi yattai ina uya yekamappù iwekkupù wapiya, “Talumattàn màichi tà,” teppù ku ina uya, molopai mùttuyatàik wateppù ina uya yawàlà iwekkussak tùplei’che pùla. ⁵ Màlàpàk, màlà yentak ipàlika uya yentai iwechi pàk Timothy teunottai, ailon tetok auya’nokon wechi atta là yense. Yattai pùla Makui uya eyittusak kon tei’ma, molopai tamù’nawàlà ina wotokoyi wechi yà’là woton pe pùla là pe tei’ma. ⁶ Tùse sàlàpe Timothy wennapposak man ina piyak apyapai’nokon molopai wakù pe ailon tetok auya’nokon yekale nessak ya man, molopai tiuchi’nùnmaik ewettok kon yekale. Wakù pe eusenumenkatok kon wechi ina winàkàik yekamatai ina pàk molopai ina enenpai ewettok kon, ina wettok eyenpai’nokon kasa làma kulu. ⁷ Màlàpàk tamù’nawàlà ina wettalumattàtok yau ina umeluntàtasak man wakù pe eyekale kon tetase, ina tonpa yamùk. Ailon tetok auya’nokon màlà ina yauchinpanài ina yewan meluntàpanài. ⁸ Màlàpàk nen uchi ina wemapù kulu sàlà, meluntà pe ewemattok kon wechi Itepulu yau pàk. ⁹ Màlàpàk nen uchi, Tenki te ina uya sàlà Kaatù pàk eyekale kon winà. Àpàkànsau’nokon, ina utauchinpa sàlà Kaatù ina Yepulu yemlotopo. ¹⁰ Wei kaichalà molopai ewalupà kaichalà tamù’nawàlà tewan kon ke tùwàpùlemasan ina, tùmàlà’nokon pe nàlà ina uya eyentok kon pe molopai yà’làlà i’che ewettok kon ailon tetok auya’nokon yau tùtoppe ina uya. ¹¹ Masaichi tàwà Kùkaatùyi kon, Kùkàipùnù kon tùmàlà pe molopai Kùyepulu kon Jesus asanta konekai ina uyàttoppe apyakù’nokon. ¹² Tàwà Itepulu àtonpa kon pùnùnmatok auya’nokon molopai tamù’nawolon kon pùnùnmatok auya’nokon konekai iichemokka toppe eke pe molopai eke peiwa molopai tàwà eke pe ina uya à’nùnmatok kon kasa kulu nenai. ¹³ Sàlà kasa eyewan kon koneka ya màlà meluntà pe, wakù pe, Kaatù namanài pe, esuken ewechi kon màlà Kùkaatùyi kon molopai Kùkàipùnù kon yemlotopo, Kùyepulu kon Jesus uyàpù tamù’nawolon kon tùponalok kon pokonpe yau.

¹ Molopai uselupa wenukapù pe, te uya utonpa yamùk, mesenupatantàu ina winà yà’là kasa là wema’nàtok Kaatù yauchinpanài pe wechi mùttutantàu. Sàlà kasa làkku ewemapù kon màlà. Màlàpàk nen uchi sàlà ina uya kulu apawanattà kon, Itepulu Jesus yesek yau, wakù peiwa i’napailà ewemapù kon pa. ² Masapùla eyenupappù kon ina uya mùttuyatàik Itepulu Jesus yapàikketù yai. ³ Sàlàichi màlà Kaatù wettok i’che ewinàpai’nokon. Wakù pe esuken molopai nàkàlunnàtok pùla ewemattok kon yau ewechi kon pa. ⁴ Wakù pe noppùtantok yeselu tùttuik ekkà, wakù molopai tùnamaik nai’nùk yawàlà. ⁵ I’che ewettok yapyoto pe kechii wapùla kemapùi, Kaatù ittunài nan pen yeselu kasa là iteselu kettàu. ⁶ Màlàpàk uchi ànù’là iwalai pen nà kuttak tùtonpa kon winàkàik, wapùla wakù pe là iwemattok mattanùttak. Sàlà yekamappù ku ina uya àpàkù’nokon, ina eyekamappotantàu tùuseka’nonkaik, Itepulu Jesus uya màlà yekkwa ton àli ku’nài nan nùssan talumattà màlà. ⁷ Àli yau là wema’nàtok kon pe Kaatù uya kùkà’ma kon pùn tùse wakù pe, esuken Kaatù tùnamaik we’nàtok kon pe kùkà’masak kon ya màlà. ⁸ Màlàpàk uchi ànù’là sàlà enupantok nulunpanài uya, kappon pen nulunpa màlà, tùse Kaatù nulunpa ya, mùkkàlà elepanài’nokon Wakù Akkwalù ke. ⁹ Suwa kuluichi àtonpa kon mù’nùnmatàik tukaik emenukatok kon uya iwenai woton pùla man. Masapùla Kaatù uya apanamappù kon màlà yà’là kasa là tiuchi’nùnmaik ewemattok kon pàk. ¹⁰ Molopai sàlà kasa ewessak kon man tamù’nawolon kon ailon tawonnan, àtonpa kon yamùk, Macedonia pon kon pàk. Màlàpàk miyaiwa eke peiwa ikupù kon pa ina apawanattàyatàu, ina tonpa yamùk. ¹¹ Intakek pe pùla emattàk kon echitonpa pe, mùklà nùkupù tense pùla eyiwalà’nokon molopai e’wotokomatàk kon ewemattok ipàk yepolo kon pa. ¹² Sàlà kasa ailon tawonnan pen uya anamatok kon yepolo auya’nokon màlà, molopai enpen ànù’là pàk ewechi kon pen nen uchi. ¹³ Ina tonpa yamùk, iweli’chak kon yekale, ailon kulu, ittu sa’ auya’nokon i’che kulu ina man, eusewankono’ma kon tukaik, mùkyamlo enpen iwettok ipàk pùnon kasa là. ¹⁴ Ailon tawonnan ku kùmyamlo Jesus welikùppù pàk molopai iwe’wuluuka tu’mappù pàk. Màlàpàk nàlà nen uchi ailon te’nokon man mùkyamlo iweli’chak kon ailon tei’ma Jesus pàk nepù Kaatù uya Jesus ya’là pàk. ¹⁵ Masapùla sàlà màlà Itepulu uya enupantok ina nekamayai’nùk àpàkù’nokon. Kùmyamlo nulà nai’nannùk utà Itepulu Jesus uyàpù weyu yattai iweli’chak kon wapiya pen màlà. ¹⁶ Eke wentaimentok wechi màlà molo meluntà pe kan, inchelù yepotolù maimu useta màlà, Kaatù wayi tàwù màlà molopai nen uchi Itepulu wuttà màlà epùn poi! Mùkyamlo iweli’chak kon ailon tei’ma Christ pàk we’wuluuka màlà wapiya. ¹⁷ Màlàyau nen uchi kùmyamlo pàli’yawon kon màlà yattai wepilipù màlà tok pokonpe katupluk yau Itepulu wakkàsse kau. Molopai nen uchi màlà Itepulu piyau we’nà tàwàlà. ¹⁸ Màlàpàk meluntà pe ettàk kon eyewan kon ipittàtàk kon sàlà mayin ke.

¹ Utonpa yamùk, sàlà yamùk wekkuttok yattai weyu pàk emenukatok kon uya ipàkànsau woton pùla man. ² Masapùla amyamlo pe mùttuyatàik Itepulu uyàpù Weyu uyàpù amak uyàpù ewalupàttau kasa. ³ “Tamù’nawolon yà’là pe pùla là man, wakù pe, àsà pùla là” te kappon yamùk uya kùlottau, asse’ne mattantok uya tok yepolo màlà. Tok wepe pen. Nossan we’chi’mosak tùwentu wapiya kasa. ⁴ Tùse amyamlo, utonpa yamùk, mùttuyatàik, ewalupàttau pùla messatàik molopai màlà Wei uya eyepolo kon ittu auya’nokon pùla là amyamlo là tenumenkaik amak kasa là pen màlà. ⁵ Tamù’nawolon kon amyamlo mùkyamlo kappon yamùk akkwa yawon kon, wei yakkwayi yawon kon. Ewalupà ponalok kon pen kùmyamlo. ⁶ Màlàpàk uchi we’nùnnà’nokon kùsettak tùulon kon kasa, tùupakaik, nulà we’nà nechiik molopai tùttuik. ⁷ Kappon yamùk tùwe’nùnsan ewalupàttau, molopai nàlà kappon yamùk tùwetùnsan ewalupàttau. ⁸ Tùse weinaino kon nen kùmyamlo molopai tùttuik, ikasa usenumenkantok yesak pe tùwessan yek kùmyamlo. Ailon tetok molopai uchi’nùnmantok yapulàpai’nokon uchi kùplopo kon wapu pe, molopai kùppai kon wapu pe wepùikattàntok pàk enpen we’nàtok kon itùpai’nokon. ⁹ Masapùla Kaatù uya anùnnà’nokon wettalumattàntok kon pe tùwe’naikatok yau pùn, tùse anùnnàppà ya màlà wepùikattàntok yepotoppe Kùyepulu Jesus Christ yai, ¹⁰ Iweli’chak lùppù mùkkàlà kùponalok kon pe wema’nàtok kon pe tamùkke ipokonpe, weli’nàsak yau wapùla pàli’yau we’nà yau iyàssak yattai. ¹¹ Sàlà kasa iwechi pàk eyewan kon yau emeluntàtatàk kon molopai tùwepùikattàik ettàk kon sàlàpe memassatài’nùk kasa. ¹² Ina apawanattàyatàu, ina tonpa yamùk, mùkyamlo àklottau’nokon tùwe’wotokomasan nama kon pa, mùkyamlo Itepulu Kaatù nanùmùssan eyepotolù kon pe molopai eyenupannan pe tùwessan nama kon pa. ¹³ Tok inamatàk kon eke pe, molopai tok i’nùnmatàk kon tok wotokoyi pàkànsau. Echitonpa pe ettàk kon. ¹⁴ Ina apawanattàyatàu ina tonpa yamùk, tùwe’wotokomasan pen yekamappo kon pa, kuli’nau tùwessan meluntàtanùpù kon pa, attu’mùnon pùikattà kon pa, molopai tamù’nawolon kon kappon yamùk kùlottau ewemapù kon pa, tok pàk tùusetakkaik pùla. ¹⁵ Ànù’là uya àli kussak ewinàkài’nokon yau àli kùkkuttàu itentak. Tùse tàwàlà wakù pe ettàk kon echiwinàkàik molopai tamù’nawolon kon pàk. ¹⁶ Tùutauchinpaik mettàik tàwàlàlà. ¹⁷ Tùwàpùlemaik mettàik tàwàlàlà. ¹⁸ Tenki tukaik mettàik tamù’nawolon yau. Sàlà màlà Kaatù wettok ikupù auya’nokon i’che, Christ Jesus ponalok pe ewemattok kon yau. ¹⁹ Wakù Akkwalù kamattu kùsà’nùttàu ²⁰ Kaatù nenpoikappù yekama toppe tekamaik pùla kettàu. ²¹ Tamù’nawolon yà’làlà yau esenumenkatàk kon ittutok auya’nokon ike ke. Molopai tamù’nawolon yà’làlà yau, “Sà ken àli pe naikko molopai sà wakù pe” tetok auya’nokon ke wakù kupù kon pa. ²² Molopai miyà ettàk yà’là yekkwa là àli winàpai. ²³ Tàwà Kaatù echitonpa pe we’nàtok ke lepanài àkonekai’nokon tamù’nawàlà tùponalok pe, esuken, wakù pe, tamù’nawàlà iwettùsak Kaatù piyak pe, tàwà ayakkwalù kon, eyesak kon, eyewan kon eusenumenkatok kon, nechii iwalai pen nà pùla, Kùyepulu kon Jesus Christ uyàttok yattai. ²⁴ Kaatù, àkà’mayatài’nùk tùpyak uya ikupù màlà, masapùla ailon kulu mùkkàlà. ²⁵ Ina pona nàlàichi, màpùlematàik, ina tonpa yamùk. ²⁶ Itepulu yesek yau uchi tùutauchinpaik messepotàik euchi’nùnma kon yekama pe àtonpa kon ailon tawonnan pokonpe. ²⁷ Apawanattàyatàu iulà, Itepulu yapàikketù winà sàlà kaleta yekama kon pa tamù’nawolon kon kùtonpa yamùk, ailon tawonnan Jesus pàk pàk. ²⁸ Tàwà wakù Kùyepulu Jesus Christ winàpaino nechii apyau’nokon.