1 PETER

¹ Sàlà màlà kaleta Peter, yeunossak lùppù Jesus Christ ponalok winàpaino, Kaatù nanùmùssan kaklan pe tùwemassan iwetta’nùssak kon pata yamùk yawàlà, Pontus, Galatia, Cappadocia, Asia, molopai Bithynia yawolon kon piyak inmenukappù. ² Ayanùnsak kon màlà Kaatù yeselu yawàlà, Kaatù ponalok pe àkonekatok kon pe Wakù Akkwalù winà, molopai Jesus Christ maimu yawàlà ewechi kon pa molopai esuken ewena kon pa Jesus Christ mùnù winà. Tàwà wakù pe we’nàtok molopai echitonpa pe we’nàtok Kaatù winàpaino àponalok kon pe nenai eke pe. ³ Kaatù yapulàpai’nokon man Kùyepulu Jesus Christ Kàipùnù! Eke pe tùusentuppatok yawàlà, kùlepappù kon ya wentutukkan toppe Jesus Christ wuluuka tùuya winà. Sàlà uya kùlepa kon màlà wema’nàtok pàk eke pe enpen we’nàtok ke. ⁴ Màlàpàk enpen we’nà’nokon sàlà wakù yepolo pàk Kaatù nùkupù tùponalok kon ponalok pe. Iku’nài mùkkàlà àponalok kon pe epùn po, iwemyakanma pùla iwettok wapùla inmatta pùla iwettok yau wapùla iwaliwomù pen màlà molo. ⁵ Ailon tetok Kaatù pàk yesak ton amyamlo, mùkkàlà meluntàlù màlà inotau ewettok kon pata weyu wenukapù ponalà. Kaatù uya tamù’nawolon kon kappon yamùk ittu yattai. Màlà yattai nen uchi àpùikattà kon ya màlà ikupù tùuya teppù tùuya kasa. ⁶ Atauchinpatàk kon sàlà pàk, mala là eusewankono’ma kon màlà, yattai pùla là tukkan ittuntok yau ewettalumattà kon yau. ⁷ Sàlà màlà meluntà pe ailon tetok auya’nokon wechi ittunài. Kolù tùumattasen pe lànen nai’nùk màlà ittusak lùppù apok ke, màlàpàk uchi ailon tetok auya’nokon kolù yentai nai’nùk wakù, ittu nàlà màlà meluntà pe iwettoppe. Màlàyau apulàntok wakù pe itekale we’nàtok molopai namantok yepolo auya’nokon màlà màlà Wei yattai Jesus Christ usenpoikasak yau. ⁸ À’nùn pe iku’nài nan amyamlo, yensak auya’nokon pùla lànen iwechi tùse, ailon tawonnan amyamlo ipàk sàlàpe yene auya’nokon pùla lànen tùse, màlàpàk eke pe autauchinpa kon màlà yekama yentai wakù utauchinpantok ke. ⁹ Masapùla ailon tetok auya’nokon yepeppù pe ayakkwalù kon wepùikattàtok yepolo auya’nokon màlà. ¹⁰ Sàlà wepùikattàntok uchi màlà Kaatù Maimu yenpoikannan usenupappù ipàk eke pe molopai tok nùwappù tok nekamappopàtùppù. Tok uya yekamappù màlà lepantok Kaatù uya elepatokù’nokon ike. ¹¹ Tok wechippù yà’là yattai là iweyu wechi ittui’che molopai atta là iyàpù ittui’che. Masapùla Wakù Akkwalù Christ winàpaino wechi tok yau uya sàlà yekamappù, wettalumattàntok Christ nùpàlika woton yekama tùuya’nokon yau, molopai yapulàtok ite’mappù pàk tùuyàssen. ¹² Kaatù uya yenpoikappù màlà pùsamlo pàk tok wotokoyi wechi tok ponalok pe pùla, tùse àponalok kon pe, tok uselupappù ailon pàk màlà enetappù kon kasa. Wakù Itekale yekamannan iichelupasak kon Wakù Akkwalù meluntàlù yeunossak lùppù epùn poi winà uya, sàlà yamùk ailon ton yekamappù àpàkù’nokon. Sàlà yamùk uchi màlà inchelù yamùk lànen wettok ànùttupai. ¹³ Màlàpàk uchi eusenumenkatok kon tùwekonekaik nechiik. Elannek pe kulu ettàk kon, molopai enpen ewettok kon ittutàk kon tamù’nawàlà wakù Kaatù winàpaino pàk elepatok ike woton Jesus Christ usenpoikasak yau. ¹⁴ Mule yamùk mayin yawolon kon kasa ettàk kon, molopai kennappotàu pena ewechippù kon yak ittu auya’nokon pùla ewechi kon yau ànkupù kon lùppù yak. ¹⁵ Tùse làkku emattàk kon tamù’nawolon ànkupù kon yau, Kaatù àkà’manàippù’nokon wechi wakù pe esuken kasa làma wakù pe. ¹⁶ Masapùla Kaatù Maimu yau iwe’menukasak pàk, “Esuken ettàk kon, masapùla esukenan iulà,” tukaik. ¹⁷ “Ina Kàipùnù,” tawonnan pe ewechi kon, tok nùkupùppù yawàlà ekkaichalà tamù’nawolon kon kappon pàk “suwa messaik,” tawon pàk, emattàk kon uchi talà sàlà non po inamatok molopai yapulàtok auya’nokon yau. ¹⁸ Masapùla mùttuyatàik àpùikattàppù kon, italumayippù là ke pùla àli iteselu pe we’nàtok ananùmùppù kon atamo kon winàpai yapai. Yà’làlà tùumattasen chilùpa wapùla kolù kasa pùla iwechippù màlà. ¹⁹ Àpùikattàppù kon kulu màlà Christ uya epekkek tùmùnù ikkwansak àponalok kon pe yau, imattakù pùn kaalinilu mule wechippù kasa. ²⁰ Kaatù nanùmùppù mùkkàlà wolù wekoneka wapiya, molopai iichenpoikappù sàlà yamùk iwenukattok weyu yattai àpàkànsau’nokon. ²¹ Mùkkàlà yai ailon tawonnan amyamlo Kaatù pàk, iwuluukanàippù weli’nàtok yapai molopai ilepanàippù apulàntok ke pàk, màlàpàk ailon tetok auya’nokon molopai enpen ewettok kon Kaatù yau man. ²² Masapùla esuken nen uchi ewenasak kon màlà ailon yawàlà ewechi kon winà, ailon uchi’nùnmantok yesak pe ewechi kon pàk, echi’nùnmatàk kon eke pe tamù’nawàlà eyewan kon ke. ²³ Masapùla nulànan molopai tàwàlàlà tùwemassen Kaatù Maimu yai ewentu tu’masak kon màlà, tàwàlàlà tùwemassen tùweli’chen pen munkà pe. ²⁴ Masapùla, “Tamù’nawolon kon kappon yamùk mùkyamlo wanak walainon. Molopai tamù’nawolon tok yapulàtok màlà wanak yùpùlù walai. Wanak tùweli’chen molopai itùpùlù tùwessolokasen. ²⁵ Tùse Kaatù Maimu tùwemassen tàwàlàlà,” tesak kasa. Molopai sàlàichi màlà mayin àpàkù’nokon yekamasak lùppù.

¹ Màlàpàk uchi tamù’nawolon àli ton inonkatàk kon, kasei pe kettàu, tùulon kon kùsennakatàu, kùlùmàk pe kettàu, wapùla mottùnpan pe keselupatàu! ² Entusanon mule yamùk, manak i’che tùwe’naklipasan tàwàlà, màlà kasa wakù esukenan manak kappon winàpaino pen i’che ettàk kon tàwàlà meluntà pe ewena kon pa iwinà molopai ewepùikattà kon pa, ³ Itepulu Kaatù wettok wakù pe ittusak auya’nokon pàk. ⁴ Jesus Christ piyak àittàk kon, mùkkàlà nulànan tàk kappon yamùk nùnulunpappù, tùse yanùnsak lùppù Kaatù winà epekkek pe. ⁵ Amyamlo nàlà wechi màlà nulànan tàk kasa, tapulàsan pe Kaatù yùwùk kappon namùppù pen tensen pen yamù yau, màlà motau wakù pe tùwe’wotokomasan pe ewechi kon pa, wakù ton Kaatù lepatok i’che iwettok tùlù pàk Jesus Christ yai. ⁶ Masapùla Kaatù Maimu yau, “Epekkek tàk yanùnsak uya man, màlà tùtùyai’nùk ipana’mu yawon wakapu pe pata Zion yau, Molopai ànù’là ailon tawon ipàk usenkuttà pen màlà,” tawon. ⁷ Sàlà màlà wakù kulu tàk amyamlo ailon tawonnan Kaatù pàk pona, tùse mùkyamlo ailon tawonnan pen pona, “Màlà tàk wechippù tapùi yamùnnan nenpàttùppù pe. Màlà lùppù wenasak man i’che kulu we’nàtok pe tùulon kon tàk yentai,” teppù nàlà. ⁸ Molopai, “Sàlà màlà tàk kappon yamùk wettatai’matok iwinà woton, tàk tok kawai’ma woton,” teppù. Tok wettatai’ma màlà masapùla ailon tesak tok uya Kaatù Maimu pàk pùla iwechi pàk, màlàichi Kaatù yeselu tok ponalok. ⁹ Tùse amyamlo mùkyamlo yanùnsak kon paatele yamùk pe, kin ponalok kon, wakù ton kappon yamùk Kaatù ponalok kon, yanùnsak kon Kaatù yeselu wakù ton kulu yekama kon pa. Mùkkàlà àkà’manàippù’nokon ewalupàttapai wakù kulu takkwayi yak. ¹⁰ Pena Kaatù ponalok kon pe pùla ewechippù kon tùse sàlàpe nen uchi iponalok kon pe messatàik, pena Kaatù usentuppatok ittu auya’nokon pùla iwechippù tùse sàlàpe iichentuppatok yanùnsak auya’nokon man. ¹¹ Apawanattàyatàu iulà, utonpa yamùk, kaklan yamùk pe echii’ma sàlà non po, àli ànkuppai we’nàtok yemyak kettùtàu, màlà tùwepanta’ma pàk nai’nùk tàwàlà ayakkwalù kon winàkàik. ¹² Eyeselu kon wakù pe nechiik Kaatù ittunnan pen kùlottau, àmottùnpa kon tok uya yau, àli kussan tok te tok uya yau, wakù eyeselu kon yentoppe tok uya, molopai nen uchi Kaatù yapulà toppe tok uya iyàpù Weyu yattai. ¹³ Itepulu ponalok pe tamù’nawolon kon potolù yamùk wettok itepulu pe yo’no ettàk kon, kin yo’no. Mùkkàlà wechi màlà yo’no kulu we’nà toppe, imaimu yawàlà. ¹⁴ Molopai kopùna yamùk, inanùmùssan àli ku’nài nan talumattànnan pe molopai mùkyamlo wakù ku’nài nan yapulànnan pe. ¹⁵ Masapùla sàlà màlà Kaatù yeselu, wakù kupù auya’noko winà, pakko ton uselupatok ittunài uselupatok kasa pùla yeppaka’nùpù auya’nokon i’che iwechi màlà. ¹⁶ Ya’chinài pùn kasa emattàk kon, molopai imokkasak pe ewettok kùsapulàtàu yà’làlà àli waputtàtok auya’nokon ike pe, tùse Kaatù yapyoto ton pe emattàk kon. ¹⁷ Tamù’nawolon kon kappon yamùk inamatàk kon, ànù’là kappon ailon tawonnan i’nùnmatàk, Kaatù tùnamase ettàk, molopai eke kulu itepulu inamatàk kon. ¹⁸ Apyoto yamùk, eyepotolù kon yemyau ettàk kon molopai tùwe’namaik kulu tamù’nawolon yau, mùkyamlo tùusentuppaik nai’nannùk molopai tùusenumenkaik nai’nannùk pàk neken pùla, tùse mùkyamlo àsà pe nai’nannùk pàk nàlà. ¹⁹ Kaatù uya wakù uyàttok iwinà kupù màlà àponalok kon pe sàlà pàkànsau, wettalumattàntok yà’là wenai pùla pàlika auya’nokon yau, masapùla teselu ittu auya’nokon pàk. ²⁰ Masapùla yà’là yekkwa ken e’mantok molo nai wettalumattàntok iwalai pen ànkupùppù kon pàkàlà ànpàlika kon yau? Tùse wettalumattàntok pàlika auya’nokon wakù kussak lànen auya’nokon tùse yau, Kaatù uya wakù kupù màlà àponalok kon pe màlà pàkànsau. ²¹ Sàlà màlà Kaatù uya àkà’mappù kon yak, masapùla Christ wettalumattàppù àponalok kon pe pàk. Iwettalumattàtok winà eusenupa kon pa molopai itta ye’mappù yawàlà àutà kon pa. ²² “Àli kussak ya pùla iwechi màlà. Ànù’là uya kasei wepakka intapai yetappù pen.” ²³ Tùmottùnpa yau mottùnpan pe yeikuppù ya pen, tùwettalumattà yau, “Atalumattà kon uya,” te ya pùn, tùse enpen tùwettok tùlùppù ya Kaatù ikasa Ittunài winàkàik. ²⁴ Jesus Christ uya kùmakuyi kon yalàppù tùmàlà pe pulusuk pona, weli’nàtok kon pe àli kuttok pàk wema’nàtok kon pe wakù pe we’nàtok ponalok pe. Ippoppàtù winà euchipittàsak kon màlà. ²⁵ Masapùla kaalinilu yamùk utatù kasa ewechippù kon, tùse sàlàpe ewennapposak kon man Kaalinilu Yesak walai molopai ayakkwalù kon Mainanpanài wenaima kon pa.

¹ Màlà kasa làmaichi amyamlo uli’chami’chi, tùtayappù kenan kon atayappù kon yentai kettàu, ailon te tok uya Kaatù Maimu pàk pùla iwechi yau, ailon te toppe tok uya wakù eyeselu kon pàkàlà, euselupa pàkàlà kulu pùla, ² masapùla tok uya wakù pe molopai namanài pe ewechi kon yene màlà. ³ Polopon yà’làlà kùsapulàtàu ema’non pe àku’nài’nokon pe, appai kon yayanka auya’nokon yau, wapùla yà’là yekkwa là ikonekasak kolù yapai wapùla yà’làlà epekkek tàk yapai ikonekasak yau kettàu, wapùla teselu kenan pon yau. ⁴ Tùse tàwà ema’non pe ewettok kon nùyàpùi eyewan kon yapai tùumattasen pen màlà àssà’mùla we’nàtok, àsà pe pùla molopai eppana tùwessen pe we’nà màlà wakù kulu Kaatù yenu yau. ⁵ Masapùla sàlà kasa penalok kon wakù ton nossan yamùk, enpen tùwessan Kaatù pàk wechippù ema’non pe, tùtayappù kon maimu yawàlà. ⁶ Sarah wechippù màlà kasa, Abraham maimu yawàlà iwechippù molopai yesatùppù ya “Uyepulu,” tukaik. Amyamloichi mùkyamlo imunkà yamùk iwalai kupù auya’nokon yau molopai eusenalippa kon pùla iwechi yau. ⁷ Amyamlo nàlà tùnoppù kenan kon walawoti’chi yamùk, ànoppù kon piyau ewemapù kon yau, mùttutàik tok wechi attu’mùnon peiwa. Màlàpàk tok kùttalumattàtàu namantok yenpoikatàk kon tok pàk, masapùla tok uya nàlà tamùkke àpokonpe’nokon Kaatù uya lepantok ike wema’nàtok yanùmù màlà. Sàlàichi ikuttàk kon àwàpùlematok kon wakkàtù yà’làlà uya tukaik. ⁸ Màlàyau sàlà yekama uya àpàkù’nokon, tamù’nawàlà tewin usenumenkantok yesak pe mettàik. Molopai ekkaichalà usentuppantok tùulon kon pàk, ànù’là kappon i’nùnmatàk kon àtonpa kon kulu pùnùnma auya’nokon kasa, molopai tùusentuppasen pe ettàk kon molopai àssà’mùla, àsà pe pùla ànù’là kappon pokonpe. ⁹ Àli kùsentakanmatàu àli ke, wapùla pa’nù’nàtok pa’nù’nàtok ke. Tùse wakù ke làkku yentakanmatàk kon, masapùla wakù pe we’nàtok màlà Kaatù uya elepa kon tùuya tetok lùppù àkà’masak kon tùuya yau. ¹⁰ Masapùla, “Ànù’là tùutauchinpaik emappaino molopai wakù pe tùwemattok weyu i’che tùwessen, kùsselupatak àli pe, molopai kasei pe kùsettak. ¹¹ Tàwà nelattài àli winàpai molopai wakù kupùi, tàwà echitonpa pe we’nàtok iwai molopai nùwenaimai yepose. ¹² Masapùla Itepulu Kaatù mùkkàlà wakù ton yennài molopai tok yetanài tàwàlàlà tok wàpùlema yau, tùse àli ku’nài nan winàpai tenpata lattànài mùkkàlà.” ¹³ Ànùk uya ken ewettalumattà toppe àkupù kon wakù ànkuppai kulu ewechi kon yau? ¹⁴ Iwalai kupù lànen auya’nokon tùse ewettalumattà kon yau, atauchinpatàk kon! Kappon yamùk pàk kesenalippatàu molopai kataimelunpatàu. ¹⁵ Tùse Christ namatok auya’nokon yesak pe ettàk kon eyewan kon yau molopai Eyepulu kon pe ikuttàk kon. Tùwekonekaik ettàk i’nai yattai là enpen we’nàtok ayau’nokon nai’nùk wenai ewettok kon yekama kon pa eyekamappo kon ànù’là uya yau. ¹⁶ Tùse àssà’mùla àsà pe pùla mùkuttàik molopai namantok yesak pe. Wakù pe, tùwanmùla eusenumenkatok kon ikuttàk kon, àmottùnpasak kon yau, mùkyamlo àli pe wakù eyeselu kon Christ nenupa ton yeselu walai pàk tùuselupasan wekkuli’ma toppe tùuselupatok kon winà. ¹⁷ Masapùla wakù peiwa wettalumattàn wakù kupù pàkànsau wechi màlà, Kaatù yeselu pe iwechi yau, àli kupù yentai lùiwa. ¹⁸ Masapùla Christ welikùppù màlà tewin itekkwa, iwelikùppù màlà tamù’nawolon kon wettok àli pe pàkànsau, wakù kàyik welikùppù àli ton kappon yamùk ponalok pe, Kaatù piyak ayatok kon pe tùuya. Iwàtoppe ikupùppù màlà kappon welikù kasa molopai iwuluukappù màlà kappon pe pùla yakkwalù itesak pe. ¹⁹ Molopai takkwalù yau iitàppù molopai ya’chichak kon akkwalùppà yamùk pàk itekale yekamappù ya. ²⁰ Pùsamloichi wechippù màlà akkwalùppà yamùk lùssan pe Kaatù Maimu yawàlà iwessak kon pen pe, tùusetakkaik pùla inmàmukussan Noah uya kanau koneka weyu yamùk yattai yau pe. Tukkan kon pen kappon yamùk wechippù kanau yau, 8 pan kon neken. Mùkyamlo wepùikattàppù màlà tuna winà. ²¹ Sàlàichi màlà tuna ke usenpataukantok walai, àpùikattàyatài’nùk, esak kuka winà pùla, tùse “Kaatù piyak welattà sàlà” tei’ma wakù pe tùwanmùla usenumenkantok pokonpe Jesus Christ we’wuluukatok yai. ²² Iitàppù nai’nùk epùn pona, molopai Kaatù yemyatù kamik pen winà nai’nùk. Tamù’nawolon kon inchelù yamùk yepulu mùkkàlà, tamù’nawolon kon apàikkek ton molopai tamù’nawolon kon meluntà ton yepulu.

¹ Christ wettalumattàppù màlà talà non po. Màlàpàk uchi iwettalumattàppù kasa ewettalumattà kon pa ekonekatàk kon, tùwettalumattàtok pàlikasak ya àponalok kon pe pàk. Masapùla ànù’là tùtalumattàtok yanùnnài weleutasak màlà àli kupù tùuya winàpai. ² Sàlà motapai uchi ewemattok kon talà non po yemakkwatàk kon Kaatù yeselu yawàlà, i’che kappon wettok yawàlà pùla. ³ Masapùla eweyu kon yapulàppù auya’nokon pena ailon tawonnan pen nùkupù kupù pàk. Tùwe’namaik pùla àli pe ewemapùppù kon man, tùuseka’nonkaik eyewan kon wechippù i’che ewettok kon kupù pàk, wetùnnàtok, tamùkke wepili’nàtok ata’lettàse àli kuttok itenu yau, molopai akùlù pe ailon pen tùulon kaatù yemlotopo wepeimantok yau. ⁴ Molopai sàlàpe ailon tawonnan pen usenumenkasak man tùpùkkù pe ewechi kon àli pe màttawà tùwettok kon molopai àsà pe tùwemattok kon yau pùla nen uchi ewechi kon pàk, màlàpàk tok àmottùnpayatàu. ⁵ Tùse tok uya yeittok tùuya’nokon tùlù màlà Kaatù piyak, iwekonekasak nai’nùk nulànan kon molopai iweli’chak kon ittu toppe tùuya. ⁶ Sàlà kasaichi iwechi pàk wakù itekale yekamappù màlà iweli’chak kon pàk nàlà, tok ittu toppe tamù’nawolon kon kappon yamùk ittu kasa, tùse nulà tok wettoppe takkwalù kon yau Kaatù wemapù kasa tàwàlàlà. ⁷ Tamù’nawolon yà’làlà wenukattok yattai mei pùla man. Eyesak kon pe ettàk kon, molopai enpen ettàk kon, àwàpùlema kon pe. ⁸ Wapiya kulu kappon yamùk tù’nùnmaik ettàk kon eke pe kulu, masapùla uchi’nùnmantok màlà tukkan àli waputtànài. ⁹ Àtonpa kon mewonnùttàik àwùk kon tak tùusàulàmaik pùla. ¹⁰ Tàwà tamù’nawolon kon tùlepatok tùnepoloppù kon Kaatù winàpai yapulài tùtonpa kon pùikattàtok tùuya’nokon iwinà pe, wakù ton Kaatù uya lepantok tùpatalà’ne nai’nùk yesak pe. ¹¹ Ànù’là itekale yekamanài, tàwà Kaatù Maimu yekamai. Ànù’là tùulon kon pùikattànài tàwà tok pùikattài, meluntà màlà Kaatù uya tùlepatok ke, tamù’nawolon yau apulàntok tùtoppe Kaatù piyak Jesus Christ yai. Apulàntok molopai apàikkek pe we’nàtok iponalok tàwàlàlà molopai tàwàlàlà. Emen. ¹² Utonpa yamùk, kesenumenkatàu àsà ittuntok mettalumattàyatài’nùk ipàkànsau pàk, yà’làlà tùwekkussen pen wekkupù kasa àpàkù’nokon. ¹³ Tùse làkku atauchinpatàk kon masapùla Christ wettalumattàppù kasa ewettalumattà kon pàk, autauchinpa kon pa eke pe kulu itakkwayi usenpoikasak yau. ¹⁴ Tùutauchinpasan pe ewechi kon màlà, àmottùnpasak kon yau Christ ponalok kon pe ewechi kon pàk, masapùla sàlà uya yekama màlà, màlà tùnamasen Akkwalù Kaatù winàpaino wuttàsak àpona’nokon. ¹⁵ Ewettalumattà kon yau, kappon wànài pe là ewechi kon pàk ewettalumattà kon pe kùsettak, wapùla amak pe ewechi kon pàk, wapùla àli ku’nài pe ewechi kon pàk, wapùla tùulon kon nùkupù ittui’che ewechi kon pàk. ¹⁶ Tùse ànù’là wettalumattà Christ ponalok pe yau, kùsekuli’matak, tùse tàwà tenki nùkai Kaatù pàk Christ ponalok pe tùwechi pàk. ¹⁷ Masapùla Ittuntok yattai weyu uyàssak man, ittuntok wepyattà toppe molopai Kaatù ponalok kon mùkyamlo wapiya ittu woton kon. Kùpàkù’nokon iwepyattà yau, atta ken iwenukapù mùkyamlo wakù itekale Kaatù winàpaino pàk ailon tawonnan pen pàk? ¹⁸ Molopai, “Sa’man pe kulu wakù ton kappon yamùk wepùikattà wechi yau, yà’là kasa ken Kaatù pùnon molopai àli ton kappon yamùk wechi?” ¹⁹ Màlàpàk uchi tàwà nettalumattàyai’nannùk Kaatù yeselu yawàlà ikasa nai’nùk kupùi molopai takkwalù kon tùlùi Mùkkàlà tùkonekanàippù kon yemyak, masapùla ikupù tùuya teppù tùuya lùppù ku’nài mùkkàlà tàwàlà.

¹ So’chi yennài nan àklottau’nokon nai’nannùk tùpawanattàyaik, iulà nàlà mùkkàlà so’chi yennài. Christ wettalumattàtok lùppù yekamanài, molopai itakkwayi tùusenpoika woton pùkkù nàlà. Apawanattàyatàu iulà, ² Kaalinilu yesan kasa ettàk kon, mùkyamlo Kaatù uya elepatok kon ike mainanpa kon pa, molopai tok imainanpatàk kon alikyek pe, Kaatù wettok ikupù auya’nokon i’che kasa. Àwotokoyi kon ikuttàk kon e’man toppe neken pùla, tùse pùikak pe eppai we’nàtok yapai. ³ Mùkyamlo anmainanpa kon pe itùsak kon yepulu pe tukaik kettàu, tùse tok uya yentok ipàkàlà pe ettàk kon. ⁴ Molopai Eke Kaalinilu Yesak usenpoika yau enkek alok tàwàlàlà enkek pe molopai akkwa pe tùwessen yanùmù auya’nokon màlà. ⁵ Màlà kasa làma, amyamlo masalok kon umoine ton esenupatàk kon kàyik yamùk lùiwa winàpai. Molopai tamù’nawolon kon pàk àsà pe pùla ettàk kon, ànù’là kappon pùikattà kon pa. Masapùla, “Kaatù yeyaton mùkkàlà ànù’là yentai tùwekkussen, tùse wakù pe we’nàtok tùwinàpaino tùnài àssà’mùnon piyak.” ⁶ Màlàpàk uchi àsà pe pùla enatàk kon, Kaatù yemyatù meluntàlù yo’no, ayanùntok kon pe ya màlà wakù tùweyu yattai. ⁷ Tamù’nawàlà ayaimelunpayatài’nùk inonkatàk kon ipona masapùla amainanpa kon ya màlà. ⁸ Tùttuik molopai enpen ettàk kon! Masapùla eyeyaton kon Makui tùusalà pàk man, tùtàwùi’ma palauya kasa, ànù’là tùneuno’ma woton iwa pàk. ⁹ Ailon tetok auya’nokon yau meluntà pe ettàk kon molopai Makui inulunpatàk kon, masapùla mùttuyatàik àtonpa kon yamùk ailon tawonnan sàlà non po wettalumattà sàlà yekkwa yau akasa’nokon. ¹⁰ Kaatù tamù’nawolon wakù pe we’nàtok yesak, mùkkàlà uya àkà’masak kon màlà tàwàlàlà takkwayi pùkkù pe ewechi kon pa Jesus Christ yau. Mala là ewettalumattàsak kon tùpo, mùkkàlà uya àkoneka kon màlà ikasa, meluntà pe kulu molopai àtùlù kon màlà wakù pata tùutamasen pen pona. ¹¹ Tamù’nawolon apàikkek màlà ipyawon tàwàlàlà. Emen. ¹² Sàlà tokkwenan kaleta menuka uya sàlà Silas uya upùikattà winà, ailon kulu utonpa pe unkupù. Emeluntàpapai’nokon wessaik molopai uselupatok tùlù uya sàlà ailon wakù pe we’nàtok Kaatù winàpaino pàk. Yau ettàk kon. ¹³ Ailon tawonnan Babylon pon kon, Kaatù nanùmùssan nàlà, “Wakù pe na’ messatàu?” tetok tùuya’nokon yeunossan, molopai nàlà umle kasa nai’nùk Mark, itesek. ¹⁴ Itepulu yesek yau uchi tùutauchinpaik ewessepolo kon yau mettàik euchi’nùnma kon yekama pe Christ yai. Tàwà echitonpa pe we’nàtok apyau’nokon nechii amyamlo tamù’nawolon kon Christ ponalok kon.