1 JOHN

¹ Ina emenukayatàu wema’nàtok Maimu pàk. Molo iwessak lùppù iwepyattàppù motapai. Ina uya yetappù màlà molopai ina uya yeneppù tenu kon ke, ewaik, ina uya yeneppù molopai ina yemyatù uya yappàtùppù. ² Sàlà wema’nàtok wenasak tensen pe yau, ina uya yeneppù, màlàpàk ina uselupa sàlà ipàk, molopai tàwàlà wema’nàtok Kùkàipùnù winàpaino yekama ina uya àpàkù’nokon sàlà, ina pàk yekamasak lùppù. ³ Màlà ina neneppù lùppù molopai ina netappù yekama nàlà ina uya àpàkù’nokon, ina kùlottau echitonpa pe we’nàtok yau ewechi kon pa Kùkàipùnù molopai Imu Jesus Christ pokonpe. ⁴ Ina uya sàlà menuka sàlà utauchinpantok wettoppe tamù’nawàlà. ⁵ Sàlàichi màlà Itekale ina netappù iwinàpai molopai ina nekamayan àpàkù’nokon. Kaatù mùkkàlà akkwa molopai ewalupà là pùla kulu iwechi màlà yau. ⁶ Echitonpa pe ipokonpe ina man tei’ma’nokon nàlà wema’nà ewalupàttau yau, kasei pe we’nà màlà asaklàma kùmaimu kon yau molopai welaikannàtok kon yau. ⁷ Tùse wema’nà akkwa yau, akkwa yau iwechi nai’nùk kasa yau, echitonpa pe we’nà màlà kùtonpa pokonpe, molopai Jesus Christ, Imu mùnù uya kùkuka kon màlà tamù’nawàlà kùmakuyi kon winàpai. ⁸ “Imakuyi pùn nen iulà,” te kùuya’nokon yau, usennakan’nokon màlà molopai ailon pùla iwechi màlà kùyau’nokon. ⁹ Tùse Kaatù pàk kùmakuyi kon yekama yau, ailon mùkkàlà molopai iwalai ku’nài. Màlàpàk kùmakuyi kon pàk iichentuppa màlà kùpàkù’nokon molopai wakù pe kùma kon ya màlà tamù’nawolon àli winàpai. ¹⁰ “Wemakuimasak pùla iwechi màlà,” te kùuya’nokon yau, kasei pe tùwessen pe Kaatù kupù’nokon màlà molopai imaimu wechi kùyau’nokon pen.

¹ Umunkà yamùk, sàlà tùmenukayaik apyakù’nokon, ewemakuima kon tukaik. Tùse ànù’là wemakuimasak yau, Jesus Christ molo man ikasa tùwemassen. Kaatù pawanattà pàk tùwessen kùponalok kon pe iichentuppa toppe. ² Masapùla Christ wettùlùppù tùwelittok yak pàkànsau nen nai’nùk kùmakuyi kon pàk usentuppansak. Molopai kùmakuyi kon neken nà pàk pùla, tùse tamù’nawolon kon kappon yamùk makuyi pàk nàlà. ³ Kaatù uya suwa ekkà tetok maimu yawàlà we’nà yau, Kaatù ittu kulu kùuya’nokon ittu màlà sàlà winà. ⁴ “Kaatù ittunài iulà,” tawon, tùse suwa ekkà tetok ya maimu yawàlà pùla echii’ma, wechi màlà kasei pe, molopai ailon pùla yau iwechi. ⁵ Tùse ànù’là imaimu yawàlà tùwessen konekasak màlà Kaatù pùnùnmatok ya uya, wakù pe kulu imasak ya. Sàlà kasa màlà Kaatù yau wema’nà ittu’nokon. ⁶ “Kaatù yau wemassaik” te kùuya’nokon yau, Jesus wemapùppù kasa tùwemassan pe we’nà’nokon màlà. ⁷ Utonpa yamùk tàwà, sàlà suwa ekkà tetok tùmenukayai’nùk apyakù’nokon sàlà emennak pen, penalok, itesak pe ewettok kon iwepyattàppù motapai. Màlà penalok enupantok lùppù. ⁸ Walà tùse sàlà emennak suwa ekkà tetok tùmenukayai’nùk apyakù’nokon, molopai ailon pe iwettok usene màlà Christ yau molopai ayau’nokon nàlà. Masapùla ewalupà nùtàyan, molopai ailon kulu Akkwa ulenpansak man. ⁹ Mùkkàlà “Akkwa yau tùwemassen iulà,” tawon tùse tùtonpa yeya’nomanài wechi màlà ewalupàttau sàlà tepose. ¹⁰ Mùkkàlà tùtonpa ku’nài tù’nùn pe wemapù màlà Akkwa yau tàwàlà, molopai yà’làlà pùla iwechi màlà yau ànù’là uya àli kuttoppe iku’nài. ¹¹ Mùkkàlà tùtonpa yeya’nomanài wechi màlà ewalupàttau molopai ewalupàttau iichalà. I’nai yailà là tùutà ittu ya pen masapùla ewalupà uya enpùla ikussak màlà. ¹² Emenuka kon uya sàlà, umunkà yamùk, masapùla amakuyi kon pàk usentuppantok yeposak auya’nokon Christ yesek pàkànsau pàk. ¹³ Emenuka kon uya sàlà papai yamùk, masapùla mùkkàlà iwepyattà motapai iwessak lùppù ittusak auya’nokon pàk. Emenuka kon uya sàlà, umoine ton, masapùla Ene Makui yentaikasak auya’nokon pàk. ¹⁴ Emenuka kon uya sàlà, umunkà yamùk lùkkwà, masapùla Kùkàipùnù kon ittusak auya’nokon pàk. Emenuka kon uya sàlà papai yamùk, masapùla mùkkàlà iwepyattà motapai iwessak lùppù ittusak auya’nokon pàk. Emenuka kon uya sàlà umoine ton, masapùla meluntà pe ewechi kon pàk, Kaatù Maimu wechi ayau’nokon pàk molopai Ene Makui yentaikasak auya’nokon man. ¹⁵ Wolù yeselu kichi’nùnmatàu wapùla yà’làlà wolù yau nai’nùk, masapùla wolù yeselu kupù auya’nokon à’nùn kon pe yau, Kùkàipùnù kon pùnùnmatok auya’nokon pùla ewechi màlà ayau’nokon. ¹⁶ Masapùla tamù’nawolon wolù yau tùwessan àli ànkuppai kappon wettok, inene molopai yà’làlà i’che iwettok. Molopai tamù’nawolon sàlà wolù yau nai’nùk yà’làlà i’che we’nàtok, itekkwa pe tukaik wekku’nàtok, wechi màlà Kùkàipùnù kon winàpaino pe pùla, wolù yapaino pe. ¹⁷ Wolù molopai tamù’nawolon yawon kon kappon wettok i’che màlà tùutàsen molopai ipla tùwenasen, tùse mùkkàlà Kaatù wettok i’che ku’nài wemapù màlà tàwàlàlà. ¹⁸ Umunkà yamùk kulu tàwà, pata weyu wenukattok mei pùla man molopai mùkkàlà Christ Yeyaton uyàttok woton yekamappù màlà àpàkù’nokon. Sàlàpe tukke Christ yeyatonnon usenpoikakassak man, màlàpàk ittu’nokon man pata weyu wenukattok wechi mei pùla. ¹⁹ Pùsamlo kappon yamùk wechippù kùklottawon kon pe kulu pùla màlà, màlàpàk màlà tok uya kùnàmàppù kon. Kùklottawon kon pe tok wessak yau, tok wechippù kùpyau’nokon eppaino sàlà. Tùse tok uya kùnàmàppù kon tok wechi kùklottawon kon pe kulu pùla ittu toppe. ²⁰ Tùse Wakù Akkwalù tùsak wechippù àpona’nokon màlà Christ winà, màlàpàk tamù’nawolon kon amyamlo uya ailon ittu màlà. ²¹ Emenuka kon uyaichi sàlà, ailon ittu auya’nokon pùla iwechi pàk pùla, tùse ittu auya’nokon pàk làkku molopai nàlà kasei uyàpù ailon yapai pùla ittu auya’nokon pàk. ²² Ànùk ken uchi mùkkàlà kasei? Mùkkàlà, Jesus mùkkàlà Christ pen, tawon. Mùkkàlà wechi màlà Christ yeyaton pe. Asaklàma Kùkàipùnù molopai Imu tawonnan nulunpanài mùkkàlà. ²³ Masapùla Imu nulunpanài uya nàlà Ikàipùnù nulunpa màlà, mùkkàlà Imu yanùnnài uya nàlà Ikàipùnù yanùmù màlà. ²⁴ Itekale enetappù kon iwepyattà motapai mùkuttàik eyewan kon yau. Molo eyewan kon yau iwechi yau, ewemapù kon màlà tàwàlà Ikàipùnù molopai Imu pokonpe. ²⁵ Molopai sàlàichi màlà tàwàlàlà wema’nàtok, kùpyakù’nokon itùlù tùuya teppù Christ uya lùppù. ²⁶ Sàlà yamùk pàk emenuka kon uya sàlà mùkyamlo eyennakai’che’nokon nai’nannùk pàk. ²⁷ Tùse amyamlo, Christ uya Takkwalù ikkwansak màlà àpona’nokon. Yakkwalù wemapù ayau’nokon kaichalà, ànù’là eyenupa kon woton i’che ewechi kon pen màlà. Masapùla Yakkwalù uya eyenupa kon tamù’nawolon pàk pàk, molopai màlà enupantok ya ike màlà ailon, kasei pen. Yakkwalù uyaichi enupantok kon yawàlà ettàk kon, molopai Christ yau ettàk. ²⁸ Ewaik, umunkà yamùk, yau ettàk kon, meluntà pe ewechi kon pa iichenpoika yau molopai àuso’namù kon wekkuli’mantok yau iwinàpai iyàttok Weyu yattai tukaik. ²⁹ Mùttuyatàik ku Christ wechi iwalai pe wakù pe tùwessen pe, ittuichi auya’nokon pàk, tamù’nawolon kon iwalai ku’nài nan wechi màlà Kaatù munkà pe.

¹ Yentàk kon eke pe Kùkàipùnù kon uya kù’nùnmappù kon! Pùnùnmantok ya wechi màlà eke pe kulu màlàpàk kùyesatù kon Kaatù munkà yamùk tukaik. Màlàpàk imunkà yamùk kùmyamlo. Sàlà kasa iwechi pàk wolù uya kiyittu kon pùla iwechi màlà, Kaatù ittusak ya pùla iwechi màlà. ² Utonpa yamùk, Kaatù munkà yamùk kùmyamlo sàlàpe, tùse i’nai kasa kulu we’nà ittu kùuya’nokon pùla man. Tùse ittu’nokon man Christ usenpoika yau, ikasa we’nà’nokon màlà, masapùla yene’nokon màlà mùkkàlà pe kulu. ³ Tamù’nawolon kon sàlà màmu’nài nan Christ yau wechi màlà esuken tùwessan pe, Christ wechi esuken kasa. ⁴ Ànù’là tùwemakuimasen wechi màlà Law Kaatù winàpaino yawà pùla, masapùla wemakuiman wechi màlà Kaatù Maimu ikkwàtù pe. ⁵ Mùttuyatàik Christ uyàpùppù kappon yamùk makuyi mokka toppe tùuya, molopai makui pùla iwechi màlà yau. ⁶ Màlàpàk tamù’nawolon kon Christ yau tùwemassan mùkyamlo makui yau lùppù tùwemassan pen, tùse ànù’là makui yau lùppù tùwemassen uya màlà Christ yensak pùla iwechi, molopai ittusak ya yà’là yattai là pùla iwechi. ⁷ Umunkà yamùk, ànù’là eyennakatakù’nokon, mùkkàlà ikasa nai’nùk ku’nài wechi màlà ikasa, Christ wechi ikasa kasa. ⁸ Ànù’là tùmakuyi yau nai’nùk wechi màlà Makui ponalok pe, masapùla Makui wemakuimasak màlà iwepyattà motapai. Kaatù Mumu uyàpùppù màlà sàlà pàkànsau, Makui wotokoyi mattanùsse. ⁹ Kaatù munkà pe nai’nannùk mùkyamlo tùwemakuima pàk lùppù tùwessan pen, masapùla Kaatù yeselu wechi tok yau pàk, molopai Kaatù wechi tok kàipùnù pe pàk tok wemakuima yentai màlà iwechi. ¹⁰ Sàlà màlà tùpatalà kulu Kaatù munkà yamùk molopai Makui munkà yamùk wechi yekamanài, ikasa pùla tùwessan wapùla tùtonpa pùnùnmannan pen wechi màlà Kaatù munkà pe pùla. ¹¹ Masapùla sàlà màlà itekale enetappù kon iwepyattà motapai, “Tiuchi’nùnmaik mettàik,” tawon. ¹² Cain kasa we’nà kùsettak. Ene Makui winàpaino mùkkàlà, molopai takon wànàppù ya màlà. Yà’là peichi iwechi pàk Cain uya takon wànàppù? Masapùla yà’làlà inkupùppù wechippù àli pe, tùse yakon nùkupùppù wechippù ikasa màlàpàk iwànàppù ya. ¹³ Màlàpàk kesenumenkatàu, utonpa yamùk, kappon yamùk wolù yawon kon uya teyaton kon pe àkupù kon yau. ¹⁴ Ittu’nokon man weli’nàtok nànsak kùuya’nokon molopai uyà’nàsakù’nokon wema’nàtok yak, masapùla kùtonpa kon pùnùnma’nokon pàk. Mùkyamlo tùtonpa kon pùnùnmatok ya pùnon wechi lùppù màlà weli’nàtok yau. ¹⁵ Ànù’là tùtonpa ku’nài teyaton pe wechi màlà kappon wànài pe molopai mùttuyatàik mùkkàlà yekkwa yau tàwàlàlà wema’nàtok pùla iwechi. ¹⁶ Sàlà kasaichi màlà uchi’nùnmantok ittu, Christ uya tùwemattok tùlùppù màlà kùponalok kon pe. Màlà kasa nàlà wema’nàtokù’nokon tùnài nan pe we’nà màlà tonpawannà yamùk ponalok pe! ¹⁷ Tukke temamin ke we’nà molopai tonpawannà wettalumattà yà’làlà pùla yene, tùse usentuppantok ipàk pùla we’nà kùyewan kon yau yau, atta ken, “Kaatù pùnùnmatok uya ike molo man uyewan yau,” te kùuya’nokon? ¹⁸ Umunkà yamùk! Pùnùnmantok kùuya’nokon imaimuppù pe neken nà kùsettak molopai uselupantok pe neken nà, tùse i’napailon ailon uchi’nùnmantok pe nechii, welaikantok yau tùusensen pe. ¹⁹ Sàlà kasaichi màlà ailon ponalok pe we’nà’nokon ittu. Sàlà kasa màlà kùyewan kon wàlàkkassak wechi Kaatù yemlotopo ittu. ²⁰ Kùyewan kon uya kùyaimelunpa yau, ittu’nokon man Kaatù wechi eke pe kùyewan kon yentai, molopai tamù’nawolon ittunài mùkkàlà. ²¹ Màlàpàk utonpa yamùk kùyewan kon uya kùyaimelunpa kon pùla iwechi yau, meluntà pe we’nà màlà Kaatù yemlotopo usenalippan pen. ²² Yà’làlà yennasak lùppù yeponài nan kùmyamlo iwinàpai, masapùla suwa ekkà tetok ya yawàlà we’nà’nokon pàk molopai i’che iwettok kupù’nokon pàk. ²³ Sàlàichi màlà Kaatù uya suwa ekkà tetok, ailon te toppe Tùmu Jesus Christ yesek pàk, molopai uchi’nùnman toppe, suwa ekkà tetok ya kùpàkù’nokon kasa. ²⁴ Mùkyamlo Kaatù uya suwa ekkà tetok yawolon kon wemapù màlà Kaatù yau, molopai Kaatù wemapù nàlà tok yau. Sàlà kasaichi màlà Kaatù wemapù kùyau’nokon ittu, ittu màlà masapùla Takkwalù ke lepansak ya pàk.

¹ Utonpa yamùk, ailon kùkatàu tamù’nawolon kon Kaatù yakkwalù yesak pe tukaik tùusennakasan pàk, tùse yentàk kon sàlà akkwalù itesak pe tok wettok wechi là Kaatù winàpaino pe. Masapùla tukke Kaatù Maimu yenpoikannan pe tukaik tùukaseitasan utàppù man mailàlà wolù yau. ² Sàlà kasaichi Kaatù Yakkwalù wechi ittu auya’nokon màlà. Tamù’nawolon kon Jesus Christ wenappù kappon pe yekamanài wechi màlà Akkwalù Kaatù winàpaino yesak pe. ³ Tùse ànù’là sàlà nulunpanài molopai Jesus wenappù kappon pe pàk ailon tawon pen wechi Akkwalù Kaatù winàpaino yesak pe pen màlà. Sàlà akkwalù wechi màlà mùkkàlà Christ yeyaton winàpaino pe, iyàpù màlà teppù enetappù kon molopai sàlàpe talà man sàlà wolù yau. ⁴ Tùse Kaatù ponalok kon amyamlo, umunkà yamùk, molopai mùkyamlo ailon ton pen yekamannan yentaikasak auya’nokon man, masapùla màlà Akkwalù ayau’nokon nai’nùk màlà meluntàiwa, màlà akkwalù wolù yawon yentaino. ⁵ Tùuselupasan mùkyamlo wolù yawon kon yà’là yamùk là pàk molopai tok yeta wolù uya. ⁶ Tùse Kaatù ponalok kon kùmyamlo. Ànù’là Kaatù ittunài uya kùyeta kon màlà, ànù’là Kaatù ponalok pen uya kùyeta kon pen màlà. Sàlà kasaichi màlà ailon Akkwalù molopai iwalai pen akkwalù wechi tùpatalà kulu ittu. ⁷ Utonpa yamùk kulu, uchi’nùnmanpai’nokon uchi, masapùla uchi’nùnmantok màlà tùuyàssen Kaatù winàpai. Ànù’là, kappon pùnùnmanài wechi màlà Kaatù mule pe molopai Kaatù ittunài mùkkàlà. ⁸ Ànù’là, kappon pùnùnmanài pen uya Kaatù ittu pùla iwechi màlà, masapùla Kaatù mùkkàlà pùnùnmanài. ⁹ Sàlà kasaichi Kaatù uya pùnùnmantok tùuya yenpoikappù màlà kùklottau’nokon, tewinan Tùmu yeunokoppù ya sàlà non pona wema’nàtok yesak pe we’nà toppe. ¹⁰ Sàlà walai uchi màlà pùnùnmantok, Kaatù pùnùnmappù kùuya’nokon pen màlà, tùse kù’nùnmappù kon ya molopai Tùmu yeunokoppù ya iwelittoppe kùmakuyi kon yepek pe. ¹¹ Utonpa yamùk kulu, sàlà kasaichi Kaatù uya kù’nùnmasak kon pàk, echi’nùn pe we’nàpai’nokon man. ¹² Ànù’là uya Kaatù yensak pùla iwechi màlà, tùse echi’nùn pe we’nà’nokon yau, Kaatù wechi màlà kùyau’nokon molopai tù’nùn tùsak ya màlà kùyakù’nokon tamù’nawàlà. ¹³ Sàlà kasaichi màlà Kaatù yau wema’nà’nokon molopai kùyau iwemapù ittu, masapùla Takkwalù ke lepansak ya pàk. ¹⁴ Molopai yensak kùuya’nokon man molopai yekama man tùulon kon pàk Kùkàipùnù uya Tùmu yeunokoppù sàlà wolù yawon kon pùikattànài pe iwettoppe. ¹⁵ Ànù’là Jesus wechi Kaatù Mumu pe yekamanài wechi yau, Kaatù wemapù màlà yau molopai iwemapù màlà Kaatù yau. ¹⁶ Molopai ittu’nokon man molopai ailon te’nokon Kaatù piyawon pùnùnmantok kùponalok pàk. Kaatù mùkkàlà pùnùnmanài, molopai ànù’là uchi’nùnmantok yau tùwemassen wemapù màlà Kaatù yau, molopai Kaatù wemapù yau. ¹⁷ Sàlà kasaichi iwechi pàk màlà wakù uchi’nùnmantok wechi kùyau’nokon tamù’nawàlà, meluntà pe we’nà toppe ittuntok Kaatù uya Weyu yattai, masapùla sàlà wolù yau wema’nà’nokon Christ kasa pàk. ¹⁸ Nalik pe pùla ku’nài màlà uchi’nùnmantok. Wakù kulu uchi’nùnmantok màlà tamù’nawàlà nalik pe we’nàtok yenpakkanài, masapùla nalik pe we’nàtok màlà wettalumattàntok pokonpan. Màlàpàk mùkkàlà nalik pe tùwessen usemokkasak pùla iwechi màlà wakù kulu uchi’nùnmantok yak. ¹⁹ Uchi’nùnman’nokon tùwessen masapùla Kaatù uya wapiya pùnùnmansakù’nokon pàk. ²⁰ Ànù’là uya, “Kaatù tù’nùnmayaik,” te, tùse tùtonpa yeya’nomanài, mùkkàlà wechi màlà kasei pe. Masapùla Kaatù tùneneppù pen pùnùnmatok ya pùla iwechi màlà tùtonpa tùnene pùnùnmai’ma pùla. ²¹ Sàlàichi màlà Christ uya suwa ekkà tetok tùuya ke lepa’nàppà lùppù, mùkkàlà Kaatù pùnùnmanài uya nàlà tùtonpa pùnùnma màlà.

¹ Ànù’là ailon tawon Jesus wechi Christ pe pàk wechi màlà Kaatù mule pe, molopai ànù’là ikàipùnù pùnùnmanài uya nàlà màlà imle pùnùnma. ² Sàlà kasaichi màlà Kaatù munkà yamùk pùnùnma’nokon ittu. Kaatù pùnùnma molopai suwa ekkà tetok ya maimu yawàlà we’nà’nokon winà ittu màlà. ³ Masapùla sàlà màlà Kaatù pùnùnmatok yekamanài suwa ekkà tetok ya yawàlà we’nà’nokon, molopai enupantok ya yamùk wechi sa’man pe kulu kùpona’nokon pen màlà. ⁴ Masapùla tamù’nawolon kon Kaatù munkà wechi màlà wolù yeselu yentaikannan yek pe. Sàlà kasaichi màlà wolù yentaika’nokon ailon tetok kùuya’nokon ke. ⁵ Ànùk uya ken wolù yeselu yentaika? Mùkkàlà neken, Jesus wechi Kaatù Mumu pe pàk ailon tawon pe nai’nùk uya yentaika màlà. ⁶ Jesus Christ mùkkàlà iyàssak lùppù, tuna molopai mùn yai. Iyàpùppù màlà tuna yai neken pùla, tùse asaklàma tuna molopai mùn tukaik. Molopai Wakù Akkwalù uya tùmàlà pe yekamappù màlà masapùla Akkwalù mùkkàlà ailon. ⁷ Masapùla pùsamlo àsolùwawon kon mùkyamlo yekamannan [epùn po, Ikàipùnù, Imaimu molopai Wakù Akkwalù tawonnan molopai tewin tok wechi. ⁸ Molopai àsolùwawon nàlà yekamanài non po,] Wakù Akkwalù, tuna, molopai mùn tawonnan molopai tamù’nawàlà àsolùwawon kon mùkyamlo tewinan iichenumenkatok. ⁹ Ailon tawonnan kùmyamlo kappon yamùk nekama pàk, tùse Kaatù nekama màlà meluntàiwa ailon te toppe iwechi eke peiwa inekama pàk molopai sàlàichi màlà inekamappù Tùmu pàk. ¹⁰ Màlàpàk ànù’là ailon tawon Kaatù Mumu pàk wechi yekamatok tùuya yesak pe tewan yau màlà, tùse ànù’là ailon tawon pen Kaatù pàk uya, kasei pe ikussak màlà, masapùla Kaatù uselupatok Tùmu pàk pàk ailon tesak ya pùla iwechi pàk. ¹¹ Sàlàichi màlà yekamatok, Kaatù uya lepansakù’nokon màlà tàwàlàlà wema’nàtok ke, molopai sàlà wema’nàtok màlà kùponalok kon Imu Jesus yau. ¹² Ànù’là Kaatù Mumu yesak wechi màlà wema’nàtok yesak pe, molopai ànù’là Kaatù Mumu yesak pen wechi màlà wema’nàtok yesak pe pùla. ¹³ Emenuka kon uya sàlà tàwàlàlà wema’nàtok yesak pe ewechi kon ittu kon pa. Amyamlo ailon nùkayai’nannùk Kaatù Mumu yesek pàk. ¹⁴ Sàlà kasaichi iwechi pàk meluntà pe we’nàtok Kaatù yemlotopo yesak pe we’nà’nokon màlà. Ittu’nokon kulu man kùyeta kon ya yà’làlà yenna tùpàk teselu yawàlà yau. ¹⁵ Kùyeta kon ya màlà yà’là yattai là yekamappo kùuya’nokon yau, ailon pe sàlà wechi ittu man, molopai ittu’nokon nàlà man kùlepa kon ya kùnennappù kon ke. ¹⁶ Ànù’là uya tùtonpa wemakuima weli’nàtok yak anài pen pàk yene yau, tàwà nàpùlemai ipona molopai Kaatù uya màlà wema’nàtok ke ilepa. Mùkyamlo weli’nàtok yak anài pe pùla tùwemakuimasan pàk wate uya nai’nùk. Tùse molo man àli kuttok weli’nàtok yak anài, molopai, “Màpùlematàik màlà pàk,” te uya pùla man. ¹⁷ Tamù’nawolon iwalai pen tùkussan màlà makui, tùse molo man makui weli’nàtok yak anài pen. ¹⁸ Ittu’nokon man ànù’là Kaatù mule wechi tùwemakuima pàk tùwessen pe pùla, masapùla Kaatù Mumu uya ikupù wakù pe pàk, molopai, Mùkkàlà Ene Makui uya yappàtù pen màlà. ¹⁹ Ittu’nokon man Kaatù munkà pe we’nà, tamù’nawàlà lànen wolù wechi Mùkkàlà Ene Makui wettok itepulu pe yo’no tùse. ²⁰ Ittu’nokon nàlà man Kaatù Mumu uyàssak molopai lepansak kon ya ittutok ke ailon pe nai’nùk ittu toppe. Molopai mùkkàlà ailon pe nai’nùk yau we’nà’nokon man, Imu Jesus Christ yau. Pùsàlàichi mùkkàlà ailon Kaatù molopai sàlàichi màlà tàwàlàlà wema’nàtok. ²¹ Umunkà yamùk, mùkyamlo ailon ton pen kaatù yamùk winàpai ettàk kon!