Маркы Евангели
1Аргъауӕг Иоанн
1 Хуыцауы Фырт Йесо Чырыстийы фарны уацы райдайӕн.
2 Исай-пехуымпармӕ фыст у: «Мӕнӕ Мӕ фидиуӕджы ӕрвитын Дӕ разӕй, ӕмӕ Дын уый ӕрцӕттӕ кӕндзӕни Дӕ фӕндаг».1:2 Мф. 11:10; Лк. 7:27.
3 «Ӕдзӕрӕг ран хъуысы фидиуӕджы хъӕлӕс: „Ӕрцӕттӕ кӕнут Хицауӕн фӕндаг, ӕмраст Ын скӕнут Йӕ цӕуӕнтӕ"».1:3 Мф. 3:3; Лк. 3:4; Ин. 1:23.
4 Афтӕ ӕдзӕрӕг бӕстӕйы фӕзынд Иоанн, аргъуыдта донӕй ӕмӕ амыдта, зӕгъгӕ, цӕмӕй тӕригъӕдтӕ хатыргонд уой, уый тыххӕй сыл хъӕуы ӕрфӕсмон кӕнын ӕмӕ аргъуыд райсын.1:4 Мф. 3:1; Лк. 3:3; Ин. 1:31.
5 Цыдысты йӕм ӕппӕт иудейаг бӕстӕйы адӕм ӕмӕ ӕппӕт иерусалимӕгтӕ, ӕргом кодтой сӕ тӕригъӕдтӕ, ӕмӕ сыл Иоанн аргъуыдта Иорданы цӕугӕдоны.
6 Иоанн дардта теуайы хъуынӕй дарӕс, йӕ астӕуыл та уыди гӕрзӕй рон; хордта мӕтыхтӕ ӕмӕ хъӕддаг мыд.1:6 Мф. 3:4.
7 Адӕмӕн дзырдта: «Мӕ фӕдыл ӕрбацӕуы мӕнӕй Тыхджындӕр. Ӕз ӕргуыбыр кӕнон ӕмӕ Йын Йӕ дзабыры бос райхалон, уый аккаг дӕр нӕ дӕн.1:7 Лк. 3:16; Ин. 1:27.
8 Ӕз сымахыл донӕй аргъуыдтон, Уый та уыл аргъаудзӕни Сыгъдӕг Удӕй».1:8 Ап. хъ. 1:5; 2:4; 1 Кор. 12:13.
Иоанн саргъуыдта Йесойыл
9 Уыцы рӕстӕг Йесо ӕрцыди галилейаг Назаретӕй, ӕмӕ Йыл Иоанн саргъуыдта Иорданы цӕугӕдоны.1:9 Мф. 3:13; Лк. 3:21.
10 Йесо донӕй куы рацӕйхызт, уӕд уайтӕккӕ федта, арвы дуар куыд фегом, уый, ӕмӕ Хуыцауы Уды бӕлонау Уымӕ ӕрцӕйцӕугӕ.1:10 Мф. 3:16; Лк. 3:21; Ин. 1:32.
11 Ӕмӕ уӕлӕрвтӕй ӕрыхъуысти хъӕлӕс: «Ды Мӕ уарзон Фырт дӕ, Ӕз Дӕуыл аудын».
Хӕйрӕг къахы Йесойы
12 Уыйадыл Сыгъдӕг Уд Йесойы акодта ӕдзӕрӕг бӕстӕмӕ.1:12 Мф. 4:1; Лк. 4:1.
13 Ӕдзӕрӕг бӕстӕйы Йесо фӕци дыууиссӕдз боны, ӕмӕ Йӕ къахта хӕйрӕг. Йесо уыди сырдты ӕхсӕн, зӕдтӕ Йын лӕггад кодтой.
Йесо хъусын кӕны фарны уац
14 Иоанны куы ӕрцахстой, уӕд Йесо ӕрцыди Галилеймӕ ӕмӕ хъусын кодта Хуыцауы фарны уац:1:14 Мф. 4:12; Лк. 4:14; Ин. 4:43.
15 «Ӕрцыд афон ӕмӕ ӕрхӕстӕг Хуыцауы Паддзахад! Ӕрфӕсмон кӕнут уӕ тӕригъӕдтыл ӕмӕ ӕууӕндут фарны уацыл».1:15 Мф. 4:17.
Фыццаг ахуыргӕнинӕгтӕ
16 Йесо Галилейы денджызы былгӕрӕтты куы фӕцӕйцыди, уӕд федта Симоны йе ’фсымӕр Андреимӕ. Уыдон сӕ хызтӕ ӕппӕрстой денджызмӕ, уымӕн ӕмӕ кӕсагахсджытӕ уыдысты.1:16 Мф. 4:18.
17 Йесо сын загъта: «Рацӕут Мӕ фӕдыл, ӕмӕ уӕ скӕндзынӕн адӕмахсджытӕ».
18 Уыдон уайтӕккӕ ныууагътой сӕ хызтӕ ӕмӕ ацыдысты Йӕ фӕдыл.
19 Йесо уырдыгӕй иуцасдӕр куы ауад, уӕд федта Зеведейы фырт Иаковы йе ’фсымӕр Иоаннимӕ сӕ хызтӕ бӕлӕгъы ӕмпъузгӕйӕ.
20 Йесо сӕм уайтӕккӕ басидт. Уыдон сӕ фыд Зеведейы ӕмӕ ӕххуырст кусджыты ныууагътой бӕлӕгъы ӕмӕ ацыдысты Йӕ фӕдыл.
Хӕйрӕджджын сдзӕбӕх синагогӕйы
21 Ӕрцыдысты Капернауммӕ. Куыддӕр сабат ралӕууыд, афтӕ Йесо бацыди синагогӕмӕ ӕмӕ ахуыр кодта адӕмы.1:21 Мф. 4:13; Лк. 4:31.
22 Ӕмӕ сӕ дисы ӕфтыдта Йӕ ахуырад, уымӕн ӕмӕ сын амыдта динамонджытау нӕ, фӕлӕ барджынӕй.1:22 Мф. 7:28; Лк. 4:32.
23 Сӕ синагогӕйы уыди хӕйрӕджджын адӕймаг. Уый ныхъхъӕр кодта:1:23 Лк. 4:33.
24 «Цы Дӕ хъӕуы махӕй, Назаретаг Йесо? Ды нӕ фесафынмӕ ӕрцыдтӕ! Ӕз зонын, Чи дӕ, уый – Ды Хуыцауы Сыгъдӕг дӕ».1:24 Мф. 8:29; Иак. 2:19.
25 Йесо ӕнӕзӕгъинагӕн бардзырд радта: «Банцай ӕмӕ дзы рацу».
26 Ӕнӕзӕгъинаг ныууыгъта уыцы адӕймаджы, ныхъхъӕр кодта ӕмӕ дзы рацыд.
27 Ӕппӕт адӕм дӕр дисы бафтыдысты ӕмӕ кӕрӕдзи фарстой: «Уый цы уа? Уый цавӕр ног ахуырад у? Барджынӕй куы дзуры. Ӕнӕзӕгъинӕгтӕн дӕр дӕтты бардзырд, ӕмӕ кӕсынц Йӕ коммӕ».
28 Ӕппӕт Галилейыл уайтагъд айхъуыст Йесойы кой.
Йесо сдзӕбӕх кодта Петры усы мады ӕмӕ иннӕты
29 Уыйадыл рацыдысты синагогӕйӕ. Ӕмӕ Йесо Иаков ӕмӕ Иоаннимӕ бацыди Симон ӕмӕ Андрейы хӕдзармӕ.1:29 Мф. 8:14; Лк. 4:38.
30 Симоны усы мад тӕвднизӕй сади. Ӕмӕ сылгоймаджы тыххӕй уайтӕккӕ загътой Йесойӕн.
31 Йесо йӕм бацыди, рахӕцыд ын йӕ къухыл ӕмӕ йӕ сыстын кодта. Сылгоймагӕн ӕрхауд йӕ тӕвд, ӕмӕ сын райдыдта кӕстӕриуӕг кӕнын.
32 Хур куы аныгуылд ӕмӕ куы баизӕр, уӕд Ӕм хӕссын райдыдтой ӕппӕт рынчынты ӕмӕ хӕйрӕджджынты.1:32 Мф. 8:16; Лк. 4:40.
33 Ӕмӕ ӕгас сахар ӕрӕмбырд дуары цурмӕ.
34 Йесо сдзӕбӕх кодта, алыхуызон низтӕй чи сади, бирӕ ахӕмты, ӕмӕ адӕмӕй расырдта бирӕ дӕлимонтӕ. Дӕлимонтӕн нӕ лӕвӕрдта дзурыны бар, уымӕн ӕмӕ Йӕ зонгӕ кодтой.1:34 Мк. 3:12; Лк. 4:41; Ап. хъ. 16:17; 19:15.
Йесо хъусын кӕны фарны уац
35 Сӕударӕй Йесо сыстад ӕмӕ рацыд, араст хибар ранмӕ ӕмӕ уым куывта.
36 Симон йе ’мбӕлттимӕ ацыди Йӕ агурӕг.
37 Ӕмӕ Йӕ куы ссардтой, уӕд Ын загътой: «Адӕм иууылдӕр Дӕу агурынц».
38 Йесо сын загъта: «Цом хӕстӕг хъӕутӕ ӕмӕ сахартӕм, ӕмӕ уым дӕр хъусын кӕнон фарны уац, уымӕн ӕмӕ Ӕз уый тыххӕй ӕрцыдтӕн».1:38 Лк. 4:43.
39 Ӕмӕ ӕппӕт Галилейы синагогӕты хъусын кодта фарны уац, адӕмӕй сырдта дӕлимонты.
Хъотырджын сдзӕбӕх
40 Йесомӕ ӕрцыди хъотырджын, Йӕ разы ӕрхауди зонгуытыл ӕмӕ Йын лӕгъстӕ кодта: «Кӕд Дӕ фӕнды, уӕд Дӕ бон у, ӕмӕ мӕ ссыгъдӕг кӕнай».1:40 Мф. 8:2; Лк. 5:12.
41 Йесо йын фӕтӕригъӕд кодта, Йӕ къух радардта, бандзӕвыд ыл ӕмӕ йын загъта: «Фӕнды Мӕ, ссыгъдӕг у».
42 Хъотыр ӕй уыйадыл ныууагъта, ӕмӕ ссыгъдӕг.
43 Уыйадыл ӕй Йесо уырдыгӕй арвыста. Карз ын бафӕдзӕхста:
44 «Хъусыс, макӕмӕн мацы зӕгъ, фӕлӕ ацу, дӕхи фенын кӕн сауджынӕн, ӕмӕ кӕй ссыгъдӕг дӕ, уый тыххӕй ӕрхӕсс нывонд, Моисей куыд бафӕдзӕхста, афтӕ – кӕй сдзӕбӕх дӕ, уымӕн ӕвдисӕйнагӕн».1:44 Мф. 8:4; Лк. 5:14.
45 Уый та ацыд, ӕмӕ йыл цы ӕрцыд, уый тыххӕй дзурын райдыдта алы ран дӕр. Уӕд Йесойӕн ӕргомӕй сахартӕм бацӕуӕн нал уыд, ӕмӕ-иу баззад фӕссахар, адӕм кӕм нӕ уыд, уым. Фӕлӕ Йӕм уӕддӕр цыдысты алырдыгӕй.
2Уӕнгмард сдзӕбӕх
1 Цалдӕр боны фӕстӕ Йесо ногӕй ӕрцыди Капернауммӕ ӕмӕ, хӕдзары кӕй ис, уый айхъуыст адӕмыл.
2 Уыйбӕрц адӕм ӕрӕмбырд, ӕмӕ суанг дуӕртты цур дӕр бынат нал уыд. Ӕмӕ сӕ Йесо ахуыр кодта.
3 Ӕрцыдысты Йӕм уӕнгмардимӕ, хастой йӕ цыппарӕй.2:3 Мф. 9:2; Лк. 5:18.
4 Адӕм уыйас бирӕ уыдысты, ӕмӕ Йӕм рынчыны бахӕссын сӕ бон нӕ уыд. Уӕд байгом кодтой, Йесо кӕм уыди, уыцы хӕдзары сӕр, ныххуынкъ кодтой цар ӕмӕ дзы хуыссӕныл уӕнгмарды ӕруагътой.
5 Йесо сын федта сӕ уырнындзинад ӕмӕ уӕнгмардӕн загъта: «Мӕ хъӕбул, хатыр дын сты дӕ тӕригъӕдтӕ».
6 Уым бадтысты динамонджытӕ цалдӕрӕй ӕмӕ хинымӕр дзырдтой:
7 «Уый цытӕ дзуры? Хуыцауы куы фауы. Иунӕг Хуыцауы йеддӕмӕ тӕригъӕдтӕ хатыр кӕнын кӕй бон у?»
8 Йесо сын уайтӕккӕ базыдта сӕ хъуыдытӕ, ӕмӕ загъта: «Цӕмӕн афтӕ хъуыды кӕнут?2:8 Ин. 2:24; 6:64.
9 Цы ӕнцондӕр у – зӕгъын уӕнгмардӕн: „Хатыр дын сты дӕ тӕригъӕдтӕ", ӕви: „Рабад, сис дӕ хуыссӕн ӕмӕ райдай цӕуын"?2:9 Мф. 9:5; Лк. 5:23.
10 Фӕлӕ сымах хъуамӕ зонат, Адӕймаджы Фыртӕн кӕй ис зӕххыл тӕригъӕдтӕ хатыр кӕныны бар». Ӕмӕ загъта уӕнгмардӕн:
11 «Дӕумӕ дзурын: рабад, сис дӕ хуыссӕн ӕмӕ цу дӕ хӕдзармӕ».
12 Уӕнгмард рабадт, уайтӕккӕ систа йӕ хуыссӕн, ӕмӕ йӕ сеппӕт дӕр федтой рацӕугӕ. Адӕм иууылдӕр дисы бафтыдысты, кад кодтой Хуыцауӕн ӕмӕ дзырдтой: «Ахӕмӕй никуыма ницы федтам».
Левий ацыди Йесоимӕ
13 Йесо та ногӕй рацыди денджызы былмӕ. Уырдӕм Ӕм ӕрцыди бирӕ адӕм ӕмӕ сӕ ахуыр кодта.
14 Куы фӕцӕйцыди, уӕд хъалонисӕн бынаты бадгӕ федта Алфейы фырт Левийы, ӕмӕ йын загъта: «Рацу Мӕ фӕдыл». Уый сыстад ӕмӕ ацыд Йӕ фӕдыл.2:14 Мф. 9:9; Лк. 5:27.
15 Йесо Йӕ ахуыргӕнинӕгтимӕ Левийы хӕдзары фынгыл куы бадти, уӕд семӕ уыдысты бирӕ хъалонисджытӕ ӕмӕ тӕригъӕдджынтӕ – Йесойы фӕдыл бирӕ ахӕм адӕм цыди.
16 Динамонджытӕ ӕмӕ Йӕ фарисейтӕ фынгыл хъалонисджытӕ ӕмӕ тӕригъӕдджынтимӕ бадгӕ куы федтой, уӕд Ын Йӕ ахуыргӕнинӕгтӕн дзырдтой: «Уый хъалонисджытӕ ӕмӕ тӕригъӕдджынтимӕ куыд хӕры?»
17 Йесо уый куы фехъуыста, уӕд сын загъта: «Дохтыр ӕнӕнизты нӕ, фӕлӕ рынчынты хъӕуы. Ӕз ӕрцыдтӕн рӕстыты нӕ, фӕлӕ тӕригъӕдджынты ӕрхонынмӕ».2:17 Мф. 9:13; Лк. 5:32; 1 Тим. 1:15.
Ком дарыны тыххӕй
18 Иоанны ахуыргӕнинӕгтӕ ӕмӕ фарисейтӕ ком дардтой. Уӕд чидӕртӕ ӕрцыдысты Йесомӕ ӕмӕ Йын загътой: «Иоанны ахуыргӕнинӕгтӕ ӕмӕ фарисейты ахуыргӕнинӕгтӕ ком куы дарынц, уӕд Дӕ ахуыргӕнинӕгтӕ та цӕуылнӕ дарынц ком?»2:18 Мф. 9:14; Лк. 5:33.
19 Йесо сын загъта: «Чындзхӕсджытимӕ сиахсаг цалынмӕ вӕййы, уӕдмӕ ком фӕдарынц, мыййаг? Сиахсаг цалынмӕ семӕ вӕййы, уӕдмӕ ком нӕ фӕдарынц.
20 Фӕлӕ ралӕудзӕни, сиахсаджы сын куы байсой, уыцы афон, ӕмӕ уӕд дардзысты ком.
21 Ног хъуымацӕй зӕронд дарӕсыл ничи ӕвӕры ӕмпъузӕн, науӕд ӕмпъузӕн ратондзӕн дарӕсӕй – ног ратондзӕн зӕрондӕй, ӕмӕ скъуыд фестырдӕр уыдзӕн.2:21 Мф. 9:16; Лк. 5:36.
22 Ногдыгъд сӕн дӕр зӕронд лалымты ничи ныккӕны, науӕд ногдыгъд сӕн арӕмудздзӕни зӕронд лалымтӕ, ӕмӕ сӕн дӕр акӕлдзӕни, лалымтӕ дӕр фесӕфдзысты. Ногдыгъд сӕн ног лалымты ныккӕнын хъӕуы».
Йесо ӕмӕ сабат
23 Йесо сабаты фӕцӕйцыд ӕфсирджын хуымты. Йӕ ахуыргӕнинӕгтӕ фӕндагыл райдыдтой ӕфсиртӕ тонын.2:23 Мф. 12:1; Лк. 6:1.
24 Ӕмӕ Йын фарисейтӕ загътой: «Кӕс-ма! Сабаты цы нӕ фӕччы, уый цӕмӕн кӕнынц?»
25 Йесо сын дзуапп радта: «Давид йе ’мбӕлттимӕ куы сыстонг ӕмӕ сӕм хойраг куы нӕ уыд, уӕд цы бакодта, уый тыххӕй нӕ кастыстут, ӕви?
26 Авиафар алчер куы уыд, уыцы рӕстӕг Давид бацыди Хуыцауы хӕдзармӕ ӕмӕ бахордта, ӕрмӕст сауджынтӕн хӕрын кӕй ӕмбӕлд, уыцы нывонд дзултӕ, ӕмӕ ма дзы йе ’мбӕлттӕн дӕр радта».2:26 Мф. 12:4; Лк. 6:4.
27 Йесо ма сын загъта: «Сабат адӕймагӕн у, адӕймаджы сабатӕн не сфӕлдыстӕуыд.
28 Уымӕ гӕсгӕ Адӕймаджы Фырт сабатӕн дӕр хицау у».
3Цӕнкуыл сдзӕбӕх
1 Йесо ногӕй бацыди синагогӕмӕ. Уыди дзы, йӕ къух хуыскъ кӕмӕн уыд, ахӕм адӕймаг.3:1 Мф. 12:9; Лк. 6:6.
2 Йесомӕ сӕ цӕст дардтой, кӕд ӕй сабаты сдзӕбӕх кӕнид, зӕгъгӕ, цӕмӕй Йӕ фӕзылын кӕной.
3 Йӕ къух хуыскъ кӕмӕн уыди, уыцы адӕймагӕн Йесо загъта: «Рацу адӕмы размӕ».
4 Ӕмӕ сӕ бафарста: «Сабаты хорз кӕнын ӕмбӕлы ӕви ӕвзӕр? Уд фервӕзын кӕнын ӕви йӕ фесафын?» Ӕмӕ ницы дзырдтой.
5 Йесо сыл тызмӕгӕй ахаста Йӕ цӕст, сӕ зӕрдӕтӕ кӕй ныддур сты, ууыл хъыг кӕнгӕйӕ. Ӕмӕ загъта цӕнкуылӕн: «Радар-ма дӕ къух». Уый радардта йӕ къух, ӕмӕ йын сдзӕбӕх.
6 Фарисейтӕ рацыдысты, ӕмӕ уыйадыл Ироды фарсдарджытимӕ уынаффӕ кӕнын райдыдтой, Йесойы цы амалӕй амарой, ууыл.3:6 Ин. 10:39.
Адӕм цӕуынц Йесойы фӕдыл
7 Йесо Йӕ ахуыргӕнинӕгтимӕ араст денджызмӕ. Йӕ фӕдыл бирӕ адӕм ацыди Галилейӕ, Иудейӕйӕ,3:7 Мф. 4:25.
8 Иерусалимӕй, Идумейӕ, Иорданы фаллаг фарсӕй, Тир ӕмӕ Сидоны алфамбылайӕ – ӕрцыд Ӕм бирӕ адӕм, цы хъуыддӕгтӕ аразы, уыдоны тыххӕй куы фехъуыстой, уӕд.
9 Ӕмӕ Йӕ ахуыргӕнинӕгтӕн бафӕдзӕхста бӕлӕгъ Ын цӕттӕйӕ дарын, утӕппӕт адӕм Ӕй куыд нӕ ныцъцъист кӕной, афтӕ.
10 Уымӕн ӕмӕ Йесо сдзӕбӕх кодта бирӕты, ӕмӕ Йыл ӕппӕт рынчынтӕ ӕппӕрстой сӕхи, цӕмӕй Йыл бандзӕвой.
11 Ӕнӕзӕгъинӕгтӕ-иу Ӕй куы федтой, уӕд-иу Йӕ разы сӕхи аппӕрстой дӕлгоммӕ, ӕмӕ хъӕр кодтой: «Ды Хуыцауы Фырт дӕ!»3:11 Мф. 16:16.
12 Фӕлӕ-иу сын Йесо бардзырд радта, цӕмӕй ма дзурой, Чи у, уый тыххӕй.
Дыууадӕс апостолы
13 Уый фӕстӕ Йесо ссыди хохмӕ ӕмӕ басидти, Йӕхи кӕй фӕндыд, уыдонмӕ. Ӕмӕ Йӕм ӕрбацыдысты.
14 Сӕ дыууадӕсы дӕр сӕвӕрдта апостолтӕй, цӕмӕй уой Йемӕ, ӕрвита сӕ Хуыцауы ныхас хъусын кӕнынмӕ,3:14 Мф. 10:1; Лк. 9:1.
15 Уа сӕм адӕмӕй дӕлимонтӕ сурыны тых.
16 Сӕвӕрдта Симоны ӕмӕ йӕ схуыдта Петр;3:16 Мф. 16:18.
17 Зеведейы фырт Иаковы ӕмӕ уый ӕфсымӕр Иоанны, ӕмӕ сӕ схуыдта Воанергес (ома, Ӕрвнӕрды фырттӕ);
18 Андрейы, Филиппы, Варфоломейы, Матфейы, Фомайы, Алфейы фырт Иаковы, Фаддейы, Симон Кананиты
19 Ӕмӕ Йесойыл гадзрахатӕй рацӕуӕг Иудӕ Искариоты.
Кӕй хъаруйӕ сырдӕуы дӕлимонты
20 Йесо бацыд хӕдзармӕ. Уыйбӕрц адӕм та ӕрӕмбырд, ӕмӕ Йесойӕн Йӕ ахуыргӕнинӕгтимӕ бахӕрыны фадат дӕр нал уыди.
21 Йӕ хӕстӕджытӕ уыдӕттӕ куы фехъуыстой, уӕд Ӕм ацыдысты ӕркӕнынмӕ, уымӕн ӕмӕ айхъуыст, Йӕ зонд фӕцыди, зӕгъгӕ.3:21 Ин. 10:20.
22 Иерусалимӕй ӕрцӕуӕг динамонджытӕ дзырдтой, веелзевулы дӕлбар у, зӕгъгӕ, ӕмӕ дӕлимонты суры дӕлимонты ӕлдары хъаруйӕ.3:22 Мф. 9:34; Лк. 11:15.
23 Йесо сӕм басидт ӕмӕ сын райдыдта фӕсномыг ныхӕстӕй дзурын: «Хӕйрӕг йӕхӕдӕг йӕхи куыд хъуамӕ расура?
24 Паддзахад куы ныддихтӕ уа ӕмӕ йӕ адӕм кӕрӕдзи ныхмӕ куы фӕуой, уӕд уыцы паддзахад нӕ фӕлӕудзӕн.3:24 Мф. 12:25; Лк. 11:17.
25 Хӕдзар дӕр куы ныддихтӕ уа ӕмӕ хӕдзаронтӕ кӕрӕдзи ныхмӕ куы фӕуой, уӕд уыцы хӕдзар дӕр нӕ фӕлӕудзӕн.
26 Уӕдӕ кӕд хӕйрӕг йӕхи ныхмӕ тох кӕны, уӕд ӕрцыд йӕ кӕрон.
27 Никӕй бон бауыдзӕн тыхджыны хӕдзармӕ бацӕуын ӕмӕ йын йӕ дзауматӕ рахӕссын, раздӕр уал тыхджыны куы нӕ сбӕтта, уӕд. Ӕрмӕст ын уӕд фӕкъахдзӕн йӕ хӕдзар.
28 Ӕцӕг уын зӕгъын: адӕмӕн хатыргонд уыдзысты ӕппӕт тӕригъӕдтӕ ӕмӕ алы хуызы фауӕнтӕ,3:28 Мф. 12:31; Лк. 12:10; 1 Ин. 5:16; Дзут. 10:26.
29 Фӕлӕ Сыгъдӕг Уды чи рафауа, уымӕн мыггагмӕ дӕр нӕ уыдзӕни хатыр – уыцы тӕригъӕды тыххӕй азымджын уыдзӕни мыггагмӕ».
30 Йесо афтӕ уый тыххӕй загъта, ӕмӕ Дзы дзырдтой, ӕнӕзӕгъинаджы дӕлбар у, зӕгъгӕ.
Йесойы Мад ӕмӕ ӕфсымӕртӕ
31 Ӕрцыдысты Йесойы Мад ӕмӕ ӕфсымӕртӕ. Лӕууыдысты ӕдде ӕмӕ Йӕм фӕдзурын кодтой.3:31 Мф. 12:46; Лк. 8:19.
32 Йӕ алыварс бирӕ адӕм бадти. Йесойӕн загътой: «Дӕ Мад, Де ’фсымӕртӕ, Дӕ хотӕ лӕууынц ӕдде ӕмӕ Дӕ агурынц».
33 Йесо сын дзуапп радта: «Чи сты Мӕ мад ӕмӕ Ме ’фсымӕртӕ?»
34 Ӕмӕ, Йӕ алыварс бадджытыл Йӕ цӕст ахӕсгӕйӕ, загъта: «Мӕнӕ Мӕ мад ӕмӕ Ме ’фсымӕртӕ.
35 Уымӕн ӕмӕ Хуыцауы фӕндон чи ӕххӕст кӕны, уый у Ме ’фсымӕр, Мӕ хо ӕмӕ Мӕ мад».
4Фӕсномыг ныхас тауӕджы тыххӕй
1 Йесо ногӕй амонын райдыдта денджызы былыл. Уыйас бирӕ адӕм ӕрӕмбырд, ӕмӕ Уый бахызти бӕлӕгъмӕ ӕмӕ дзы ӕрбадт; адӕм та иууылдӕр денджызы былгӕрон уыдысты.4:1 Мф. 13:1; Лк. 8:4.
2 Бирӕ сын амыдта фӕсномыг ныхӕстӕй ӕмӕ сӕ ахуыр кодта:
3 «Байхъусут: мӕнӕ тауӕг рацыди тауынмӕ.
4 Таугӕ-тауын иугай нӕмгуытӕ ӕрхаудысты фӕндаггӕрон, ӕртахтысты мӕргътӕ ӕмӕ сӕ рауыгътой.
5 Иуӕй-иутӕ дзы ӕрхаудысты, сыджыт бирӕ кӕм нӕ уыд, ахӕм дурджын ран, ӕмӕ уайтагъд сӕвзӕрдысты, уымӕн ӕмӕ зӕхх арф нӕ уыд.
6 Ӕмӕ хур куы скаст, уӕд сӕ басыгъта ӕмӕ бахус сты, уымӕн ӕмӕ сын уидаг нӕ уыд.
7 Иуӕй-иутӕ дзы ӕрхаудысты сындзыты ӕхсӕн, сындзытӕ сзадысты, ныххурх сӕ кодтой, ӕмӕ нӕмгуытӕ тыллӕг нӕ радтой.
8 Иуӕй-иутӕ та дзы ӕрхаудысты бӕзнаг мӕрыл, схӕцыдысты сӕхиуыл, сырӕзыдысты ӕмӕ радтой: иу – дӕс ӕмӕ ссӕдз хатты, иннӕ – ӕртиссӕдз хатты, ӕртыккаг – фондзыссӕдз хатты фылдӕр тыллӕг».
9 Ӕмӕ сын ноджы загъта: «Хъустӕ кӕуыл ис, уый хъусӕд!»
10 Адӕм куы ацыдысты, уӕд дыууадӕс ахуыргӕнинаджы, стӕй ма уым чи баззади, уыдон дӕр Ӕй фӕсномыг ныхӕсты тыххӕй бафарстой.
11 Йесо сын загъта: «Сымахӕн Хуыцауы Паддзахады сусӕгдзинад зонын лӕвӕрд у, уыдонӕн та, ӕддагӕттӕн, ӕппӕт дӕр фӕсномыг ныхӕстӕй амындӕуы,4:11 Мф. 11:25; 16:17; 1 Кор. 2:10.
12 Цӕмӕй „цӕстӕй кӕсой, фӕлӕ ма уыной, хъусӕй хъусой, фӕлӕ ма ӕмбарой, ӕмӕ ма раздӕхой Хуыцаумӕ ӕмӕ сын барст ма уой сӕ тӕригъӕдтӕ"».4:12 Мф. 13:14; Лк. 8:10; Ин. 12:40.
13 Загъта ма сын: «Ацы фӕсномыг ныхас не ’мбарут, ӕви? Уӕд иннӕ фӕсномыг ныхӕстӕ та куыд бамбардзыстут?
14 Тауӕг ныхас тауы.4:14 Мф. 13:18; Лк. 8:11.
15 Мӕнӕ фӕндаггӕрон чи ӕрхауд, уыдон: куыддӕр ныхас фехъусынц, афтӕ ӕрцӕуы хӕйрӕг ӕмӕ сын ахӕссы сӕ зӕрдӕйы тыд ныхас.
16 Мӕнӕ дурджын ран кӕй байтыдӕуыд, уыдон дӕр: ныхас куы фехъусынц, уӕд ӕй уыйадыл цингӕнгӕ айсынц сӕ зӕрдӕмӕ,4:16 Ин. 5:35.
17 Фӕлӕ ӕнӕуидаг сты ӕмӕ бирӕ нӕ бафӕразынц. Тыхст рӕстӕг куы ралӕууы, кӕнӕ Хуыцауы ныхасы тыххӕй ӕфхӕрын куы райдайынц, уӕд уайтагъд ныууадзынц сӕ уырнындзинад.
18 Иннӕтӕ та сты, сындзыты ӕхсӕн кӕй байтыдӕуыд, уыдон: ныхас фехъусынц,
19 Фӕлӕ сын зӕххон царды мӕт, мулчы бӕллиц ӕмӕ ӕндӕр мондӕгтӕ бацахсынц сӕ зӕрдӕ, ныххурх кӕнынц ныхас, ӕмӕ пайда нӕ ратты.
20 Мӕнӕ бӕзнаг мӕрыл кӕй байтыдӕуыд, уыдон дӕр: фехъусынц ныхас ӕмӕ йӕ айсынц сӕ зӕрдӕмӕ; ӕмӕ сӕ иу ратты дӕс ӕмӕ ссӕдз хатты, иннӕ – ӕртиссӕдз хатты, аннӕ та – фондзыссӕдз хатты фылдӕр пайда».
Фӕсномыг ныхас цырагъы тыххӕй
21 Йесо сын загъта: «Цырагъ агъуыстмӕ уый тыххӕй, мыййаг, бахӕссынц, цӕмӕй йӕ дурыны кӕнӕ сынтӕджы бын бавӕрой? Цырагъдарӕныл ӕй нӕ сӕвӕрынц, ӕви?4:21 Мф. 5:15; Лк. 8:16.
22 Цы нӕ раргом уа, ахӕм сусӕггаг нӕй, ӕмӕ цы нӕ рахъӕр уа, ахӕм сусӕгдзинад нӕ вӕййы.4:22 Мф. 10:26; Лк. 8:17; 12:2.
23 Хъустӕ кӕуыл ис, уый хъусӕд!»
24 Ӕмӕ сын загъта: «Цы хъусут, ууыл-иу ахъуыды кӕнут. Цы барӕнӕй барут, ахӕмӕй сымахӕн дӕр сбарстӕуыдзӕн ӕмӕ ма уын ноджыдӕр рардӕуыдзӕн.4:24 Мф. 7:2; Лк. 6:38.
25 Уымӕн ӕмӕ кӕмӕ ис, уымӕн рардӕуыдзӕн; кӕмӕ нӕй, уымӕй та ист ӕрцӕудзӕн, цы йӕм ис, уый дӕр».4:25 Мф. 13:12; 25:29; Лк. 8:18; 19:26.
Фӕсномыг ныхас тауинаг ӕмӕ ӕвзарты тыххӕй
26 Йесо загъта: «Уӕларвон Паддзахад ахӕм у. Адӕймаг зӕххы байтауы йӕ тауинаг,
27 Ӕхсӕвыгон вӕййы фынӕй, бонӕй та сысты; уӕдмӕ мыггаг суадзы ӕвзар ӕмӕ рӕзы. Куыд рӕзы, уый та адӕймаг нӕ зоны.
28 Уымӕн ӕмӕ зӕхх йӕхӕдӕг ратты тыллӕг: фыццаг ӕвзар, стӕй ӕфсир, уый фӕстӕ та – нарст нӕмыг ӕфсирыл.
29 Ӕмӕ хуым куы фӕбур вӕййы, уӕд адӕймаг уайтагъд рауадзы йе ’хсырф, уымӕн ӕмӕ ралӕууыд кӕрдыны афон».
Фӕсномыг ныхас хъыцъыйы нӕмыджы тыххӕй
30 Йесо дарддӕр дзырдта: «Цӕуыл абарӕм Хуыцауы Паддзахад? Кӕнӕ йӕ цавӕр фӕсномыг ныхасӕй равдисӕм?4:30 Мф. 13:31; Лк. 13:18.
31 Уый хъыцъыйы нӕмыгау у. Таугӕ йӕ куы фӕкӕнынц, уӕд зӕххыл цы мыггӕгтӕ ис, ӕппӕт уыдонӕн сӕ къаддӕр вӕййы.
32 Фӕлӕ йӕ куы байтауынц, уӕд сзайы ӕмӕ цӕхӕрадоны ӕппӕт зайӕгойтӕй дӕр фӕбӕрзонддӕр вӕййы, рауадзы стыр къалиутӕ, ӕмӕ йӕ аууоны уӕларвон мӕргътӕн сӕ бон вӕййы ахстӕттӕ аразын».
33 Ахӕм фӕсномыг ныхӕстӕй сын Йесо амыдта бирӕ, сӕ бон бамбарын цас уыд, уыйас.4:33 Мф. 13:34.
34 Ӕнӕ фӕсномыг ныхасӕй сын ницы дзырдта, Йӕ ахуыргӕнинӕгтӕн та хибарӕй ӕмбарын кодта ӕппӕт дӕр.
Уад байхъуыста Йесомӕ
35 Уыцы бон изӕрӕй Йесо Йӕ ахуыргӕнинӕгтӕн загъта: «Ахизӕм денджызы фаллаг фарсмӕ».4:35 Мф. 8:23; Лк. 8:22.
36 Ахуыргӕнинӕгтӕ ауагътой адӕмы ӕмӕ, Йесо цы бӕлӕгъы уыди, уым араст сты Йемӕ. Йесоимӕ ма рацыд ӕндӕр бӕлӕгътӕ дӕр.
37 Сыстади тыхджын уад, уылӕнтӕ бӕлӕгъыл афтӕ тынг цавтой сӕхи, ӕмӕ бӕлӕгъ фӕцӕйдзаг кодта донӕй.
38 Йесо та фӕстаг къуымы кодта фынӕй, Йӕ сӕр базыл ӕрӕвӕргӕйӕ. Райхъал Ӕй кодтой ӕмӕ Йын загътой: «Ахуыргӕнӕг, сӕфгӕ кӕй кӕнӕм, уый Дӕм нӕ хъары, ӕви?»
39 Йесо сыстади, бардзырд радта уадӕн ӕмӕ загъта денджызӕн: «Банцай, ныссабыр у». Уад банцад, ӕмӕ бӕстӕ ныссабыр.
40 Йесо Йӕ ахуыргӕнинӕгтӕн загъта: «Цӕмӕн афтӕ тӕппуд стут? Нырма дӕр уӕм уырнындзинад нӕма ис?»
41 Уыдон тынг фӕтарстысты, ӕмӕ кӕрӕдзийӕн дзырдтой: «Уый Чи уа, уад ӕмӕ денджыз Кӕй коммӕ кӕсынц?»
5Йесо сдзӕбӕх кодта хӕйрӕджджыны
1 Бахӕццӕ сты денджызы иннӕ фарсмӕ, Гадарӕйы бӕстӕмӕ.5:1 Мф. 8:28; Лк. 8:26.
2 Йесо бӕлӕгъӕй куыддӕр рахызт, афтӕ зӕппӕдзтӕй Йӕ размӕ рацыди хӕйрӕджджын лӕг.
3 Уый царди зӕппӕдзты. Суанг ӕй рӕхыстӕй сбӕттын дӕр ничиуал фӕрӕзта –
4 Бирӕ хӕттыты-иу баст ӕрцыди хъадамантӕ ӕмӕ рӕхыстӕй, фӕлӕ-иу арӕдывта йӕ рӕхыстӕ ӕмӕ-иу ныссаста йӕ хъадамантӕ. Уый басӕттыны хъару никӕмӕ уыд.
5 Иудадзыг, ӕхсӕвӕй-бонӕй, хъӕр кодта зӕппӕдзты ӕмӕ хӕхты, йӕхи хоста дуртыл.
6 Йесойы дардмӕ куы ауыдта, уӕд Ӕм ӕрбазгъордта, ӕрзоныгыл
7 Ӕмӕ ныхъхъӕр кодта: «Цы Дӕ хъӕуы мӕнӕй, Йесо, Дунедарӕг Хуыцауы Фырт? Хуыцауы хатыр бакӕн, хъизӕмарӕй мӕ ма мар!»
8 Уымӕн ӕмӕ йын Йесо афтӕ загъта: «Ӕнӕзӕгъинаг, рацу ацы адӕймагӕй».
9 Йесо йӕ бафарста: «Дӕ ном куыд у?» Уый Йын загъта: «Мӕ ном – легион, уымӕн ӕмӕ мах бирӕ стӕм».
10 Ӕмӕ лӕгъстӕ кодта Йесойӕн, цӕмӕй сӕ уыцы бӕстӕйӕ ма арвита.
11 Уым уӕлхох хызти хуыты стыр дзуг,
12 Ӕмӕ дӕлимонтӕ куырдтой Йесойӕ: «Хуытӕм нӕ барвит, цӕмӕй сӕ мидӕг бацӕуӕм».
13 Йесо сын бар радта. Ӕнӕзӕгъинӕгтӕ рацыдысты уыцы лӕгӕй, ӕмӕ бацыдысты хуыты. Ӕмӕ уыцы дзуг (уыдаид дзы иу дыууӕ мины бӕрц) къардиуӕй денджызмӕ фехста йӕхи, ӕмӕ фӕдӕлдон.
14 Хуыгӕстӕ азгъордтой, ӕмӕ хабар радзырдтой сахар ӕмӕ хъӕуты. Ӕмӕ цы ӕрцыд, уый фенынмӕ рацыдысты адӕм.
15 Ӕрбацыдысты Йесомӕ, ӕмӕ дӕлимонты легион кӕй мидӕг уыд, уыцы хӕйрӕджджыны федтой йӕ дарӕсы бадгӕ, йӕ зонд йӕхимӕ уыд, афтӕмӕй. Ӕмӕ старстысты.
16 Цы ӕрцыд, уый фенӕг адӕм сын ракодтой хӕйрӕджджыны ӕмӕ хуыты хабар.
17 Уӕд Йесомӕ райдыдтой хатын, цӕмӕй ацӕуа сӕ зӕххӕй.
18 Йесо бӕлӕгъмӕ куы бацӕйхызт, уӕд Дзы раздӕры хӕйрӕджджын куырдта, цӕмӕй йӕ уадза Йемӕ.
19 Фӕлӕ Йесо не сразы ӕмӕ йын загъта: «Ацу дӕ хӕдзармӕ ӕмӕ дӕ бинонтӕн радзур, Хуыцау дын цы сарӕзта ӕмӕ дӕм Йӕ хорзӕх куыд равдыста, уый тыххӕй».
20 Уый ацыд, ӕмӕ Дӕссахары райдыдта дзурын, Йесо йын цы сарӕзта, уый тыххӕй. Ӕмӕ иууылдӕр дисы ӕфтыдысты.
Чызг райгас, сылгоймаг сдзӕбӕх
21 Йесо бӕлӕгъы денджызы иннӕ фарсмӕ куы ӕрбаздӕхт, уӕд Ӕм ӕрӕмбырд бирӕ адӕм. Денджызы былгӕрон ма куы уыд,
22 Уӕд Ӕм ӕрцыди синагогӕйы хицӕуттӕй иу, йӕ ном Иаир. Йесойы куы федта, уӕд Ын Йӕ къӕхтӕм йӕхи ӕрӕппӕрста,
23 Ӕмӕ Йын тынг лӕгъстӕ кодта: «Мӕ чызг мӕлгӕ кӕны; ӕрцу ӕмӕ йыл ӕрӕвӕр Дӕ къухтӕ, цӕмӕй сдзӕбӕх уа ӕмӕ цӕра».
24 Йесо араст йемӕ. Йӕ фӕдыл цыди бирӕ адӕм, ӕмӕ Йӕ цъист кодтой.
25 Иу сылгоймагӕн дыууадӕс азы дӕргъы йӕ туг цӕуынӕй не ’нцад.5:25 Мф. 9:20.
26 Бирӕ дохтыртӕ йын бирӕ хъизӕмар бавзарын кодтой, цыдӕриддӕр ӕм уыди, уый иууылдӕр бахардз кодта, фӕлӕ йын ницы феххуыс – ӕрцыди фыддӕр уавӕрмӕ.
27 Йесойы тыххӕй куы фехъуыста, уӕд чъылдымырдыгӕй ӕрбацыд адӕмы ӕхсӕнты ӕмӕ Йын бандзӕвыд Йӕ дарӕсыл.
28 Уымӕн ӕмӕ хинымӕр дзырдта: «Ӕрмӕст Йӕ дарӕсыл Ын куы бандзӕвон, уӕд дӕр сдзӕбӕх уыдзынӕн».
29 Туг уайтӕккӕ банцад йӕ цӕуынӕй, ӕмӕ сылгоймаг буарӕй банкъардта, йӕ низӕй кӕй сдзӕбӕх, уый.
30 Тых Дзы кӕй рацыд, уый Йесо уыйадыл банкъардта, разылд адӕммӕ ӕмӕ загъта: «Чи бандзӕвыд Мӕ дарӕсыл?»5:30 Лк. 8:45.
31 Йӕ ахуыргӕнинӕгтӕ Йын загътой: «Адӕм Дӕ куыд цъист кӕнынц, уый уыныс, уӕддӕр ма фӕрсыс: „Чи Мыл бандзӕвыд?"»
32 Фӕлӕ Йыл чи бандзӕвыд, уыцы сылгоймаджы феныны тыххӕй Йесо адӕмыл хаста Йӕ цӕст.
33 Сылгоймаг та, цы йыл ӕрцыд, уый зонгӕйӕ, тӕрсгӕ-ризгӕйӕ бацыд Йесомӕ, Йӕ къӕхтӕм ӕрӕппӕрста йӕхи, ӕмӕ Йын ӕппӕт дӕр радзырдта, куыд уыд, афтӕ.
34 Йесо йын загъта: «Мӕ чызг, дӕ уырнындзинад дӕ фервӕзын кодта. Цу фарнимӕ ӕмӕ ӕнӕниз у».
35 Йесо Йӕ ныхас нӕма фӕци, афтӕ синагогӕйы хицаумӕ ӕрцыдысты йӕ хӕдзарӕй, ӕмӕ йын загътой: «Дӕ чызг амард. Ахуыргӕнӕджы ма цы фӕлмӕцын кӕныс?»5:35 Лк. 8:49.
36 Фӕлӕ Йесо, уыцы ныхӕстӕ ницӕмӕ даргӕйӕ, синагогӕйы хицауӕн загъта: «Ма тӕрс, ӕрмӕст ӕууӕнд».
37 Петр, Иаков ӕмӕ Иаковы ӕфсымӕр Иоанны йеддӕмӕ Йесо никӕй бауагъта Йемӕ ацӕуын.
38 Ӕрцыдысты синагогӕйы хицауы хӕдзармӕ. Йесо адӕмы федта тыхстӕй, кӕугӕйӕ, сӕ хъӕлӕсыдзаг дзыназгӕйӕ.
39 Бацыди мидӕмӕ ӕмӕ сын загъта: «Цы стыхстыстут ӕмӕ цӕуыл кӕут? Саби мард нӕу, фынӕй у».
40 Ӕмӕ Йыл худтысты. Фӕлӕ Йесо сеппӕты дӕр рарвыста ӕддӕмӕ, Йемӕ райста сабийы фыд ӕмӕ мады, стӕй Йе ’мбӕлццӕтты, ӕмӕ бацыди, саби кӕм уыд, уырдӕм.
41 Ныххӕцыд сабийӕн йӕ къухыл, ӕмӕ йын загъта: «Талита, кум». Ома: «Чызгай, дӕумӕ дзурын, рабад».
42 Чызг уайтӕккӕ рабадт ӕмӕ райдыдта цӕуын. Цыдаид ыл иу дыууадӕс азы. Сеппӕт дӕр стыр дисы бафтыдысты.
43 Фӕлӕ сын Йесо тынг бафӕдзӕхста, уый тыххӕй мачи базонӕд, зӕгъгӕ. Стӕй ма сын загъта, цӕмӕй чызгӕн раттой хӕринаг.
6Назареты синагогӕйы
1 Йесо уырдыгӕй араст Йӕ ахуыргӕнинӕгтимӕ ӕмӕ ӕрцыд Йӕ сахармӕ.6:1 Мф. 13:54; Лк. 4:16.
2 Сабат куы ралӕууыд, уӕд райдыдта амонын синагогӕйы, ӕмӕ Йӕм цы бирӕ адӕм хъуыста, уыдон дисы ӕфтыдысты ӕмӕ дзырдтой: «Ӕппӕт адӕттӕ Йын кӕцӕй сты? Уагӕр Ын цавӕр зонд рардӕуыд, ӕмӕ ахӕм диссӕгтӕ аразын Йӕ бон куыд у?6:2 Мф. 7:28; Мк. 1:27.
3 Ай хъӕддӕсны нӕу, мыййаг, Мариайы фырт, Иаковы, Иосифы, Иудӕйы ӕмӕ Симоны ӕфсымӕр? Йӕ хотӕ дӕр ам, не ’хсӕн, не сты, ӕви?» Ӕмӕ Йыл не ’ууӕндыдысты.6:3 Лк. 4:22; Ин. 6:42.
4 Йесо сын загъта: «Пехуымпар йӕ фыдыбӕстӕ, йӕ хӕстӕджытӕ ӕмӕ йӕ хӕдзарӕй дарддӕр ӕгад никуы вӕййы».6:4 Мф. 13:57; Лк. 4:24; Ин. 4:44.
5 Ӕмӕ уым иу диссаг саразын дӕр Йӕ бон нӕ уыд; ӕрмӕст Йӕ къухтӕ ӕрӕвӕрдта цалдӕр рынчыныл ӕмӕ сӕ сдзӕбӕх кодта.
6 Дисы Йӕ ӕфтыдта се ’нӕуырнындзинад. Уый фӕстӕ зылди хӕстӕг хъӕутыл ӕмӕ ахуыр кодта адӕмы.6:6 Мф. 9:35.
Дыууадӕс ахуыргӕнинаджы
7 Йесо басидт Йӕ дыууадӕс ахуыргӕнинагмӕ, арвыста сӕ дыгӕйттӕй, ӕмӕ сын радта тых, цӕмӕй сӕ бар цӕуа ӕнӕзӕгъинӕгтыл.6:7 Мф. 10:1; Лк. 9:1.
8 Ӕмӕ сын бафӕдзӕхста: «Лӕдзӕг йеддӕмӕ фӕндагмӕ уемӕ мацы райсут – нӕдӕр хойраг, нӕдӕр хордзен, нӕдӕр ӕхца уӕ роны.
9 Фӕлӕ дзабыртӕ дарын уӕ бон у, ӕрмӕст-иу уӕ уӕлӕ дыгай хӕдӕттӕ ма скӕнут».
10 Загъта ма сын: «Цы хӕдзармӕ-иу бацӕуат, уым-иу баззайут, цалынмӕ уырдыгӕй рацӕуат, уӕдмӕ.
11 Кӕм уӕ не суазӕг кӕной ӕмӕ уӕм кӕм нӕ байхъусой, уырдыгӕй куы рацӕуат, уӕд та-иу ацӕгъдут уӕ къӕхты рыг – аххосджын кӕй сты, уымӕн ӕвдисӕйнагӕн. [Ӕцӕг уын зӕгъын: Содом ӕмӕ Гоморрӕйӕн тӕрхоны бон уыцы сахарӕй ӕнцондӕр уыдзӕн.]»6:11 Мф. 10:14; Лк. 9:5; Ап. хъ. 13:51; 18:6.
12 Ахуыргӕнинӕгтӕ ацыдысты ӕмӕ адӕмӕн дзырдтой, цӕмӕй ӕрфӕсмон кӕной сӕ тӕригъӕдтыл.
13 Адӕмӕй-иу расырдтой бирӕ дӕлимонты, бирӕ рынчынты сӕрстой зетийӕ ӕмӕ сӕ дзӕбӕх кодтой.6:13 Иак. 5:14.
Аргъауӕг Иоанны мӕлӕт
14 Паддзах Ирод фехъуыста Йесойы тыххӕй, уымӕн ӕмӕ Йӕ кой айхъуыст дардыл. Иутӕ дзырдтой: «Аргъауӕг Иоанн райгас мӕрдтӕй ӕмӕ уый тыххӕй аразы диссӕгтӕ»;6:14 Мф. 14:1; Лк. 9:7.
15 Иннӕтӕ дзырдтой: «Уый Илиа у»; аннӕтӕ та дзырдтой: «Уый раздӕры пехуымпарты хуызӕн пехуымпар у».
16 Фӕлӕ Ирод, уыдӕттӕ фехъусгӕйӕ, загъта: «Ӕз кӕй сӕр акъуырдтон, уыцы Иоанн райгас».
17 Уымӕн ӕмӕ уымӕй размӕ Ирод арвыста Иоаннмӕ, ӕрцахста йӕ, ӕмӕ йӕ бакодта ахӕстоны йе ’фсымӕр Филиппы ус Иродиадӕйы тыххӕй. Ирод ракуырдта Иродиадӕйы,
18 Ӕмӕ йын Иоанн дзырдта: «Де ’фсымӕры усимӕ цӕрын дын не ’мбӕлы».
19 Иродиадӕ йӕм мӕстӕй марди, фӕндыд ӕй йӕ амарын, фӕлӕ ницы йӕ бон уыд.
20 Уымӕн ӕмӕ Ирод тарст Иоаннӕй; раст ӕмӕ сыгъдӕг адӕймаг кӕй у, уый зыдта, ӕмӕ йӕ хъахъхъӕдта. Кӕд-иу ӕй Иоанны ныхӕстӕ фӕкъӕмдзӕстыг кодтой, уӕддӕр ӕм хъуыста зӕрдиагӕй.6:20 Мф. 21:26.
21 Иродиадӕйӕн фӕзынди фадат. Ирод йӕ райгуырӕн боны фӕдыл йе ’лдӕрттӕн, ӕфсӕддон хицӕуттӕн ӕмӕ Галилейы уӕздӕттӕн скодта куывд.
22 Иродиадӕйы чызг сӕм бацыд ӕмӕ кафыд. Уымӕй балхӕдта Ироды ӕмӕ уазджыты зӕрдӕ, ӕмӕ паддзах загъта чызгӕн: «Цы дӕ хъӕуы, уый ракур, ӕмӕ дын ӕй ратдзынӕн».
23 Ирод ын расомы кодта: «Цыдӕриддӕр мӕ ракурай, уый дын ратдзынӕн, суанг мӕ паддзахады ӕмбисы онг».
24 Чызг рацыд ӕмӕ бафарста йӕ мады: «Цы ракурон?» Уый йын загъта: «Аргъауӕг Иоанны сӕр».
25 Чызг уайтагъд бацыди паддзахмӕ ӕмӕ йын загъта: «Фӕнды мӕ, цӕмӕй мын гъертӕккӕ тӕбӕгъы ӕрбахӕссай Аргъауӕг Иоанны сӕр».
26 Паддзах ӕрӕнкъард, фӕлӕ йӕ сомымӕ гӕсгӕ ӕмӕ йемӕ минасгӕнджыты ӕфсӕрмӕй чызгӕн «нӕ» зӕгъын не сфӕрӕзта.
27 Уайтӕккӕ йӕ хъахъхъӕнджытӕй иуы арвыста Иоанны сӕр ӕрбахӕссыны бардзырдимӕ.
28 Хъахъхъӕнӕг ацыд, ахӕстоны Иоаннӕн акъуырдта йӕ сӕр, ӕмӕ йӕ тӕбӕгъы ӕрбахаста чызгӕн, чызг та йӕ радта йӕ мадмӕ.
29 Иоанны ахуыргӕнинӕгтӕ уый куы фехъуыстой, уӕд ӕрцыдысты, йӕ мард ын ахастой ӕмӕ йӕ зӕппадзы бавӕрдтой.
Йесо бафсӕста фондз мин лӕджы
30 Апостолтӕ ӕрӕмбырд сты Йесомӕ ӕмӕ Йын радзырдтой, цы сарӕзтой ӕмӕ адӕмы цӕуыл сахуыр кодтой, ӕппӕт уыдӕттӕ.6:30 Лк. 9:10.
31 Йесо сын загъта: «Хибар ранмӕ иунӕгӕй ацӕут ӕмӕ иучысыл уӕ фӕллад суадзут». Уымӕн ӕмӕ ӕрцӕуӕг ӕмӕ фӕстӕмӕ здӕхӕг адӕм уыйас бирӕ уыдысты, ӕмӕ сӕ суанг хӕрынмӕ дӕр не ’вдӕлд.
32 Йесо ӕмӕ апостолтӕ иунӕгӕй бӕлӕгъы араст сты хибар ранмӕ.6:32 Мф. 14:13; Лк. 9:10.
33 Уӕддӕр сӕ бирӕтӕ федтой фӕцӕйцӕугӕ ӕмӕ сӕ базыдтой. Уӕд ӕппӕт сахартӕй азгъордтой фистӕгӕй ӕмӕ сӕ разӕй фесты.
34 Йесо былмӕ куы рахызт, уӕд федта бирӕ адӕм ӕмӕ сын фӕтӕригъӕд кодта, уымӕн ӕмӕ уыдысты ӕнӕфыййау фыстау. Ӕмӕ сын бирӕ фӕцамыдта.6:34 Мф. 9:36.
35 Бонӕй бирӕ куы нал баззади, уӕд Йесомӕ бацыдысты Йӕ ахуыргӕнинӕгтӕ ӕмӕ Йын загътой: «Ам фӕсвӕд ран у, бон та фӕивгъуыйы.
36 Ауадз адӕмы, ацӕуой хӕстӕг хъӕутӕм ӕмӕ сӕхицӕн хӕринаг балхӕной».
37 Йесо сын дзуапп радта: «Сымах сын раттут хӕринаг». Загътой Йын: «Уӕд та фӕцӕуӕм ӕмӕ дзул дыууӕсӕдӕ динары аргъ балхӕнӕм, утӕппӕт адӕмы бафсадынӕн?»
38 Йесо сӕ бафарста: «Цал дзулы уӕм ис? Ацӕут ӕмӕ фенут». Уыдон федтой ӕмӕ загътой: «Фондз дзулы ӕмӕ дыууӕ кӕсаджы».6:38 Мф. 14:17; Лк. 9:13; Ин. 6:9.
39 Уӕд сын бафӕдзӕхста ӕппӕт адӕмы дӕр цъӕх кӕрдӕгыл къордгай ӕрбадын кӕнын.
40 Адӕм ӕрбадтысты къордгай – фондзыссӕдзгӕйттӕй ӕмӕ дӕс ӕмӕ дыууиссӕдзгӕйттӕй.
41 Йесо райста фондз дзулы ӕмӕ дыууӕ кӕсаджы, скаст уӕларвмӕ, арфӕ ракодта, асаста дзултӕ ӕмӕ сӕ радта Йӕ ахуыргӕнинӕгтӕм адӕмӕн байуарынмӕ. Дыууӕ кӕсаджы дӕр байуӕрста сеппӕтыл дӕр.
42 Сеппӕт дӕр бахордтой ӕмӕ бафсӕстысты.
43 Ӕмӕ ма дзул ӕмӕ кӕсагӕй цы баззад, уыдонӕй байдзаг дыууадӕс чыргъӕды.
44 Хӕргӕ чи кодта, уыдоны ӕхсӕн айдагъ лӕгтӕ уыди фондз мины.
Йесо къахӕй цӕуы денджызыл
45 Йесо Йӕ ахуыргӕнинӕгты уайтагъд сбадын кодта бӕлӕгъы ӕмӕ сӕ арвыста денджызы иннӕ фарсмӕ, Вифсаидӕмӕ; Йӕхӕдӕг уал баззади, цалынмӕ адӕмы ауадза, уӕдмӕ.
46 Ӕмӕ адӕмы куы ауагъта, уӕд хохмӕ ссыди бакувынмӕ.6:46 Мф. 14:23.
47 Изӕрдалынгты бӕлӕгъ бахӕццӕ денджызы хӕдастӕумӕ, Йесо та иунӕгӕй уыди денджызы был.6:47 Ин. 6:16.
48 Ӕмӕ федта, ахуыргӕнинӕгтӕ бӕлӕгъ зынтӕй кӕй тардтой, уый, уымӕн ӕмӕ дымгӕ дымдта сӕ ныхмӕ. Боныцъӕхты размӕ сӕм Йесо денджызыл бацыди къахӕй, ӕмӕ Йӕ фӕндыди сӕ иувӕрсты аивгъуыйын.
49 Уыдон Ӕй денджызыл цӕугӕ куы федтой, уӕд Ын цӕстылуайӕн ӕнхъӕл уыдысты, ӕмӕ хъӕр систой.
50 Уымӕн ӕмӕ Йӕ сеппӕт дӕр федтой ӕмӕ фӕтарстысты. Фӕлӕ сӕм Йесо уайтӕккӕ сдзырдта: «Фидар фӕлӕуут, уый Ӕз дӕн! Ма тӕрсут».
51 Бахызт сӕм бӕлӕгъмӕ, ӕмӕ дымгӕ банцади. Уыдон стыр дисы бафтыдысты,
52 Уымӕн ӕмӕ не ’мбӕрстой, дзултимӕ цы диссаг сарӕзтӕуыд, уый; сӕ зӕрдӕтӕ ӕхгӕд уыдысты.6:52 Мк. 8:18.
Йесо Геннисареты сдзӕбӕх кодта рынчынты
53 Бахӕццӕ сты денджызы иннӕ фарсмӕ, Геннисареты цурмӕ, ӕмӕ уым ӕрлӕууыдысты.6:53 Мф. 14:34.
54 Бӕлӕгъӕй куы рахызтысты, уӕд адӕм уайтагъд базыдтой Йесойы,
55 Рӕвдз ӕрзылдысты ӕппӕт бӕстӕйыл, ӕмӕ-иу Йесо Йӕ коймӕ гӕсгӕ кӕм уыд, уырдӕм хуыссӕнтыл ӕрхастой сӕ рынчынты.
56 Кӕдӕмфӕнды ма ӕрцыдаид Йесо, хъӕутӕм кӕнӕ сахартӕм, рынчынты-иу ӕрӕвӕрдтой фӕзты, хатыдысты Йӕм, цӕмӕй сӕ бауадза уӕд та Йӕ пӕлӕзы коцорайыл бандзӕвын; ӕмӕ-иу Ыл чидӕриддӕр бандзӕвыд, уыдон-иу сдзӕбӕх сты.
7Фыдӕлты ӕгъдӕуттӕ
1 Йесомӕ ӕрӕмбырд сты фарисейтӕ, стӕй ма цалдӕр динамонӕджы, Иерусалимӕй чи рацыд, ахӕмтӕ.
2 Йӕ ахуыргӕнинӕгтӕй Йын иуӕй-иуты федтой чъизи, ома, ӕнӕхсад къухтӕй, хӕринаг хӕргӕ.
3 Фарисейтӕ та, ӕппӕт иудейтау, сӕ фыдӕлты ӕгъдауыл хӕст сты, ӕмӕ сӕ къухтӕ цалынмӕ бӕстон цӕхсой, уӕдмӕ нӕ хӕрынц.
4 Базарӕй куы ӕрцӕуынц, уӕд дӕр нӕ хӕрынц, цалынмӕ сӕхи цӕхсой, уӕдмӕ. Ӕмӕ ма хӕст сты бирӕ ӕндӕр ӕгъдӕуттыл дӕр: ӕхсынц къустӕ, дурынтӕ, ӕгтӕ ӕмӕ бандӕттӕ.
5 Ӕмӕ фарисейтӕ ӕмӕ динамонджытӕ бафарстой Йесойы: «Дӕ ахуыргӕнинӕгтӕ фыдӕлты ӕгъдаумӕ гӕсгӕ цӕуылнӕ цӕрынц, чъизи къухтӕй цӕмӕн хӕрынц?»
6 Йесо сын дзуапп радта: «Цӕстмӕхъустӕ, сымах тыххӕй Исай-пехуымпар Сыгъдӕг Фысты хорз загъта: „Ацы адӕм Мын кад кӕнынц дзыхӕй, сӕ зӕрдӕ та дард у Мӕнӕй.7:6 Мф. 15:8.
7 Дзӕгъӕлы Мӕм кувынц; цӕуыл ахуыр кӕнынц, уыдон адӕймаджы ӕрхъуыдыгонд ӕгъдӕуттӕ сты".
8 Сымах ныууагътат Хуыцауы фӕдзӕхст, ӕмӕ хӕст стут адӕймаджы ӕрхъуыдыгонд ӕгъдӕуттыл».
9 Ноджыдӕр сын загъта: «Уӕхи ӕгъдау ӕххӕст кӕныны сӕраппонд Хуыцауы фӕдзӕхст аивын хорз зонут.
10 Уымӕн ӕмӕ Моисей загъта: „Нымай дӕ фыд ӕмӕ дӕ мады", ӕмӕ: „Йӕ фыды кӕнӕ йӕ мады ӕфхӕрӕг амӕлӕд".7:10 Мф. 15:4.
11 Сымах та куыд дзурут? Йӕ фыдӕн кӕнӕ йӕ мадӕн афтӕ чи зӕгъа, мӕнӕй цы хъуамӕ айстаис, уый корбан (ома, Хуыцауӕн лӕвар) у, зӕгъгӕ,
12 Уымӕн нал дӕттут йӕ фыдӕн кӕнӕ йӕ мадӕн хорз ракӕныны бар.
13 Афтӕмӕй Хуыцауы ныхас баивут, иннӕты дӕр кӕуыл ахуыр кӕнут, уӕ уыцы ӕгъдауӕй. Ноджы ма аразут бирӕ ӕндӕр ахӕм хъуыддӕгтӕ дӕр».
14 Йесо ногӕй басидт адӕммӕ ӕмӕ сын загъта: «Байхъусут Мӕм уеппӕт дӕр ӕмӕ бамбарут!
15 Адӕймаджы ӕддейӕ цы бацӕуы, уый йӕ нӕ чъизи кӕны, фӕлӕ дзы ӕддӕмӕ цы рацӕуы, уый йӕ кӕны чъизи.7:15 Мф. 15:11; Ром. 14:17; Тит. 1:15.
16 [Хъустӕ кӕуыл ис, уый хъусӕд!]»
17 Йесо адӕмы куы ныууагъта ӕмӕ хӕдзармӕ куы бацыд, уӕд Ӕй Йӕ ахуыргӕнинӕгтӕ бафарстой, цы фӕсномыг ныхас загъта, уымӕй.
18 Уый сын дзуапп радта: «Ау, сымах дӕр афтӕ ӕнӕмбаргӕ стут? Ӕви йӕ нӕ зонут, адӕймаджы ӕддейӕ цы бацӕуы, уый йӕ кӕй нӕ чъизи кӕны?
19 Уымӕн ӕмӕ йӕ зӕрдӕмӕ нӕ бацӕуы, фӕлӕ йӕ гуыбынмӕ ныфты, стӕй рацӕуы ӕддӕмӕ». Афтӕмӕй Йесо алы хӕринагӕй дӕр загъта, сыгъдӕг у, зӕгъгӕ.
20 Ноджы ма загъта: «Зӕрдӕйӕ цы рацӕуы, уый чъизи кӕны адӕймаджы.
21 Уымӕн ӕмӕ адӕймагӕн йӕ зӕрдӕйӕ рацӕуынц фыдвӕндтӕ, хӕтын, давын, марын,
22 Кӕрӕф, фыдӕх, фӕлывд, ӕлгъаг хъуыддӕгтӕ, хӕлӕгцӕст, хахуыр, сӕрыстырдзинад, ӕдылы митӕ.
23 Ӕппӕт уыцы хӕрам рацӕуы зӕрдӕйӕ ӕмӕ чъизи кӕны адӕймаджы».
Муртат усы чызг сдзӕбӕх
24 Йесо араст уырдыгӕй, ӕмӕ ӕрцыди Тиры зӕхмӕ. Уым бацыд иу хӕдзармӕ. Фӕндыд Ӕй, уым кӕй ис, уый куыд мачи базона, фӕлӕ Йӕ къухы нӕ бафтыд.7:24 Мф. 15:21.
25 Йесойы тыххӕй уайтӕккӕ фехъуыста, йӕ чызг хӕйрӕджджын кӕмӕн уыд, иу ахӕм сылгоймаг; ӕрцыд ӕмӕ йӕхи Уый къӕхтӕм ӕрӕппӕрста.
26 Уыцы сылгоймаг та уыди муртат, Сириаг Финикийӕ. Ӕмӕ Йесойӕн лӕгъстӕ кодта йӕ чызгӕй йын дӕлимоны расурыны тыххӕй.
27 Йесо йын загъта: «Уадз ӕмӕ уал сывӕллӕттӕ бафсӕдой. Хорз нӕу сывӕллӕтты къӕбӕр райсын ӕмӕ йӕ куыйтӕн аппарын».
28 Сылгоймаг Ын дзуапп радта: «О, Хицау, фӕлӕ куыйтӕ дӕр фынджы бын фӕхӕрынц, сывӕллӕтты фынгӕй цы муртӕ ӕрхауы, уыдон».
29 Уӕд ын Йесо загъта: «Ахӕм дзуаппы фӕстӕ цу, дӕлимон рацыди дӕ чызгӕй».
30 Сылгоймаг хӕдзармӕ куы ӕрцыд, уӕд федта: йӕ хъӕбул хуыссы хуыссӕныл, дӕлимон дзы рацыд.
Гуылӕвзаг къуырма сдзӕбӕх
31 Йесо Тиры зӕххӕй рацыди Сидоныл, ӕмӕ, Дӕссахарыл цӕугӕйӕ, рахызти Галилейаг денджызмӕ.
32 Ӕркодтой Йӕм гуылӕвзаг къуырмайы ӕмӕ Дзы куырдтой, цӕмӕй йыл Йӕ къух ӕрӕвӕра.
33 Йесо йӕ фӕхибар кодта, Йе ’нгуылдзтӕ къуырмайы хъусты фӕтъыста, ӕрту кодта ӕмӕ йын бавнӕлдта йе ’взагмӕ.
34 Стӕй скаст уӕларвмӕ, арф ныуулӕфыд ӕмӕ загъта: «Эффата». Ома: «Байгом у».
35 Ӕмӕ уайтӕккӕ байгом сты къуырмайы хъустӕ, йе ’взаг суӕгъд, ӕмӕ райдыдта сыгъдӕг дзурын.
36 Йесо сын бафӕдзӕхста, цӕмӕй уый тыххӕй макӕмӕн зӕгъой. Фӕлӕ сын цас фылдӕр фӕдзӕхста, уыйас фылдӕр хӕлиу кодтой уыцы хабар.
37 Адӕм стыр дисы ӕфтыдысты ӕмӕ дзырдтой: «Ӕппӕт дӕр хорз кӕны. Къуырматӕн гом кӕны сӕ хъустӕ, ӕгомыгтӕн дӕтты ӕвзаг».
8Йесо бафсӕста цыппар мин адӕймаджы
1 Уыцы рӕстӕг ногӕй ӕрӕмбырд бирӕ адӕм, ӕмӕ цы бахордтаиккой, уый сӕм нӕ уыд. Уӕд Йесо басидт Йӕ ахуыргӕнинӕгтӕм ӕмӕ сын загъта:8:1 Мф. 15:32.
2 «Тӕригъӕд кӕнын ацы адӕмӕн, ныр ӕртӕ боны дӕргъы Мемӕ сты, ӕмӕ цы бахӕрой, уый сӕм нӕй.
3 Сӕ хӕдзӕрттӕм сӕ ӕххормагӕй куы ауадзон, уӕд фӕндагыл бастайдзысты, уымӕн ӕмӕ дзы бирӕтӕ дардӕй ӕрцыдысты».
4 Йӕ ахуыргӕнинӕгтӕ Йын загътой: «Чи самал кӕндзӕн ацы ӕдзӕрӕг ран сӕ бафсадыны фаг дзултӕ?»
5 Йесо сӕ бафарста: «Цал дзулы уӕм ис?» Уыдон Ын загътой: «Авд».
6 Уӕд Йесо адӕмы ӕрбадын кодта зӕххыл, райста авд дзулы, арфӕ ракодта, асаста сӕ ӕмӕ сӕ радта Йӕ ахуыргӕнинӕгтӕм адӕмӕн байуарынмӕ. Уыдон сӕ байуӕрстой.
7 Уыди ма сӕм цалдӕр гыццыл кӕсаджы дӕр. Йесо раарфӕ кодта, ӕмӕ бафӕдзӕхста уыдоны дӕр байуарын.
8 Адӕм бахордтой ӕмӕ бафсӕстысты. Ӕмӕ ма цы уӕлдӕйттӕ баззад, уыдонӕй байдзаг авд чыргъӕды.
9 Хӕргӕ чи кодта, уыдон та уыдысты цыппар мины бӕрц. Йесо сӕ ауагъта,
10 Уайтӕккӕ Йӕ ахуыргӕнинӕгтимӕ бахызт бӕлӕгъмӕ, ӕмӕ ӕрцыди Далмануфаг зӕхмӕ.8:10 Мф. 15:39.
Йесойӕ домынц ӕвдисӕйнаг
11 Ӕрцыдысты фарисейтӕ ӕмӕ Йесоимӕ райдыдтой быцӕу кӕнын. Йӕ бафӕлварыны тыххӕй Дзы домдтой уӕларвӕй ӕвдисӕйнаг равдисын.
12 Йесо арф ныуулӕфыд ӕмӕ загъта: «Ацы фӕлтӕр ӕвдисӕйнаг цӕмӕн домы? Ӕцӕг уын зӕгъын: ацы фӕлтӕрӕн ӕвдисӕйнаг нӕ рардӕуыдзӕн».
13 Уыйадыл сӕ ныууагъта, ногӕй бахызт бӕлӕгъмӕ, ӕмӕ араст иннӕ фарсмӕ.
Фарисейты ӕнхъизӕн ӕмӕ Ироды ӕнхъизӕн
14 Йӕ ахуыргӕнинӕгтӕй ферох семӕ дзултӕ райсын; бӕлӕгъы сӕм иу дзул йеддӕмӕ нӕ уыд.
15 Йесо сын фӕдзӕхста: «Хъусут, уӕхи хизут фарисейты ӕнхъизӕнӕй ӕмӕ Ироды ӕнхъизӕнӕй».8:15 Мф. 16:6; Лк. 12:1.
16 Ӕмӕ ахуыргӕнинӕгтӕ кӕрӕдзийӕн дзырдтой, дзул нӕм нӕй, зӕгъгӕ.
17 Йесо сӕ бамбӕрста, ӕмӕ сын загъта: «Цӕмӕн дзурут, дзул уӕм кӕй нӕй, уый тыххӕй? Ау, нырма дӕр ӕй нӕма зонут ӕмӕ не ’мбарут? Нырма дӕр уӕ зӕрдӕтӕ ӕхгӕд сты?
18 Цӕстытӕ уын куы ис, уӕд нӕ уынут? Хъустӕ уыл куы ис, уӕд нӕ хъусут? Уӕ зӕрдыл нал лӕууы, ӕви:8:18 Мк. 6:38; Ин. 6:9.
19 Ӕз фондз мин лӕгӕн фондз дзулы куы асастон, уӕд уӕлдӕйттӕй цал чыргъӕды байдзаг кодтат?» Загътой Йын: «Дыууадӕс».
20 «Цыппар минӕн авд дзулы куы асастон, уӕд та уӕлдӕйттӕй цал чыргъӕды байдзаг кодтат?» Загътой: «Авд».
21 Уӕд сын загъта: «Ау, ныр дӕр ӕй нӕма ӕмбарут?»
Вифсаидӕйаг куырм цӕстӕй ракаст
22 Ӕрцыдысты Вифсаидӕмӕ. Йесомӕ ӕркодтой куырмы ӕмӕ Дзы куырдтой, цӕмӕй йыл бандзӕва.
23 Йесо ныххӕцыди куырмы къухыл, ракодта йӕ хъӕуӕй, батутӕ йын кодта йӕ цӕстытыл, ӕрӕвӕрдта йыл Йӕ къухтӕ ӕмӕ йӕ бафарста, исты уыны ӕви нӕ.
24 Уый акаст ӕмӕ загъта: «Уынын адӕмы, зынынц мӕм цӕугӕ бӕлӕстау».
25 Йесо йын дыккаг хатт йӕ цӕстытыл ӕрӕвӕрдта Йӕ къухтӕ, куырм ногӕй акаст ӕмӕ сдзӕбӕх, уынын райдыдта хорз.
26 Йесо йӕ арвыста йӕ хӕдзармӕ ӕмӕ йын бафӕдзӕхста: «Хъӕумӕ ма бацу [ӕмӕ ацы хабар хъӕуы макӕмӕн радзур]».
Петр Йесойы схуыдта Чырысти
27 Йесо Йӕ ахуыргӕнинӕгтимӕ ацыди Филиппы Кесарийы алыварс хъӕутӕм. Фӕндагыл бафарста Йӕ ахуыргӕнинӕгты: «Кӕуыл Мӕ нымайынц адӕм?»8:27 Мф. 16:13; Лк. 9:18.
28 Уыдон Ын загътой: «Иутӕ – Аргъауӕг Иоанныл, иннӕтӕ – Илиайыл, аннӕтӕ та – пехуымпартӕй иуыл».
29 Йесо сӕ бафарста: «Сымах та Мӕ кӕуыл нымайут?» Петр Ын дзуапп радта: «Ды Чырысти дӕ».8:29 Ин. 6:69.
30 Ӕмӕ сын Йесо бафӕдзӕхста, цӕмӕй Йӕ макӕмӕн схъӕр кӕной.
Йесо зӕгъы Йӕ мӕлӕт ӕмӕ Йӕ райгасы тыххӕй
31 Йесо сын райдыдта амонын: Адӕймаджы Фырт хъуамӕ бавзара бирӕ хъизӕмӕрттӕ; адӕмы хистӕртӕ, алчертӕ ӕмӕ Йӕ динамонджытӕ бафхӕрдзысты, амардӕйӕуыдзӕн ӕмӕ ӕртыккаг бон райгас уыдзӕн.8:31 Мк. 9:31; 10:33; Лк. 9:22.
32 Уый тыххӕй сын дзырдта ӕргомӕй. Уӕд Ӕй Петр фӕхибар кодта ӕмӕ Йын райдыдта уайдзӕф кӕнын.
33 Йесо разылди, бакаст Йӕ ахуыргӕнинӕгтӕм ӕмӕ тызмӕгӕй загъта Петрӕн: «Фесӕф Мӕ цурӕй, хӕйрӕг! Дӕ хъуыдытӕ, Хуыцауы фӕндон цы у, ууыл нӕ, фӕлӕ адӕймаджы фӕндон цы у, ууыл сты».
Куыд цӕугӕ у Йесойы фӕдыл
34 Йесо басидт адӕммӕ ӕмӕ Йӕ ахуыргӕнинӕгтӕм, ӕмӕ сын загъта: «Мӕ фӕдыл цӕуын кӕй фӕнды, уый йӕхи ферох кӕнӕд, райсӕд йӕ дзуар ӕмӕ рацӕуӕд Мӕ фӕдыл.8:34 Мф. 10:38; 16:24; Лк. 9:23; 14:27.
35 Уымӕн ӕмӕ йӕ цард бахъахъхъӕнын кӕй фӕнды, уый йӕ фесафдзӕн; йӕ цард Мӕ сӕраппонд ӕмӕ фарны уацы сӕраппонд чи фесафа, уый та йӕ бахъахъхъӕндзӕн.
36 Адӕймаг ӕгас дуне йӕхи куы бакӕна, йӕ уд та куы фесафа, уӕд ын уый цы пайда у?
37 Кӕнӕ йӕм цы разындзӕн, йӕ уд цӕмӕй балхӕна, ахӕмӕй?
38 Ацы ӕнӕхуыцау тӕригъӕдджын фӕлтӕры ӕхсӕн Мӕнӕй ӕмӕ Мӕ ныхӕстӕй чи фефсӕрмы уа, уымӕй фефсӕрмы уыдзӕн Адӕймаджы Фырт дӕр, сыгъдӕг зӕдтимӕ Йӕ Фыды намысимӕ куы ӕрцӕуа, уӕд».8:38 Мф. 10:33; Лк. 9:26; 1 Ин. 2:23; Ром. 1:16.
91 Загъта ма сын: «Ӕцӕг уын зӕгъын: ам чи лӕууы, уыдонӕй иуӕй-иутӕ нӕ амӕлдзысты, цалынмӕ Хуыцауы Паддзахад хъомысджынӕй ӕрцӕугӕ феной, уӕдмӕ».9:1 Мф. 16:28; Лк. 9:27.
Йесо Йӕ хуыз аивта
2 Ӕхсӕз боны фӕстӕ Йесо Йемӕ рахуыдта Петры, Иаковы ӕмӕ Иоанны, скодта сӕ бӕрзонд хохмӕ, ӕмӕ уым уыдысты хибарӕй. Сӕ разы Йӕ хуыз аивта;9:2 Мф. 17:1.
3 Йӕ дарӕс сӕрттывта ӕмӕ Йын фестади сӕнтурс – зӕххыл иу адӕймагӕн дӕр хъуымац афтӕ сурс кӕнын йӕ бон нӕ бауыдзӕн.
4 Фӕзындысты сӕм Илиа ӕмӕ Моисей, ӕмӕ ныхас кодтой Йесоимӕ.
5 Уӕд Петр загъта Йесойӕн: «Равви, ам кӕй стӕм, уый цы хорз у! Саразӕм ӕртӕ халагъуды: иу Дӕуӕн, иу Моисейӕн, иу Илиайӕн».
6 Цы загътаид, уый нӕ зыдта, уымӕн ӕмӕ тынг фӕтарстысты.
7 Ӕмӕ фӕзынд ӕврагъ, ӕрӕмбӕрзта сӕ, ӕмӕ ӕврагъӕй райхъуысти хъӕлӕс: «Ай Мӕ уарзон Фырт у. Хъусут Ӕм».
8 Ахуыргӕнинӕгтӕ фӕйнӕрдӕм акастысты ӕмӕ никӕйуал ауыдтой – ӕрмӕст ма Йесо баззади семӕ.
9 Хохӕй куы ӕрцӕйцыдысты, уӕд сын Йесо бафӕдзӕхста, цӕмӕй, цы федтой, уый тыххӕй макӕмӕн радзурой, цалынмӕ Адӕймаджы Фырт мӕрдтӕй раста, уӕдмӕ.
10 Йесойы фӕдзӕхст сӕ зӕрдыл бадардтой, кӕрӕдзи та фарстой, цы амоны «мӕрдтӕй растын», зӕгъгӕ.
11 Ӕмӕ Йӕ бафарстой: «Уӕдӕ динамонджытӕ цӕмӕн дзурынц, Чырыстийы размӕ Илиа хъуамӕ ӕрцӕуа, зӕгъгӕ?»
12 Йесо сын дзуапп радта: «Раст у, раздӕр Илиа хъуамӕ ӕрцӕуа ӕмӕ ӕппӕт дӕр банывыл кӕна. Ӕмӕ уӕдӕ Фыст цӕмӕн афтӕ зӕгъы, Адӕймаджы Фырт хъуамӕ бавзара бирӕ удхар ӕмӕ хынджылӕггаг фӕуа, зӕгъгӕ?
13 Фӕлӕ уын зӕгъын: Илиа ныридӕгӕн ӕрцыд, ӕмӕ сӕ цы фӕндыд, уый йын бакодтой, Фыст дзы куыд зӕгъы, афтӕ».9:13 Мф. 17:12.
Ӕнахъом хӕйрӕджджын сдзӕбӕх
14 Иннӕ ахуыргӕнинӕгтӕм куы ӕрцыдысты, уӕд сын сӕ алыварс федтой бирӕ адӕм, стӕй динамонджыты ахуыргӕнинӕгтимӕ быцӕугӕнгӕ.
15 Адӕм Йесойы куыддӕр федтой, афтӕ сеппӕт дӕр скатай сты, згъордтой Йӕм ӕмӕ Йын салам лӕвӕрдтой.
16 Йесо сӕ бафарста: «Цӕуыл у уӕ быцӕу?»
17 Адӕмӕй Йын иу дзуапп радта: «Ахуыргӕнӕг, ӕз Дӕм ӕркодтон, ӕнӕзӕгъинаг кӕй багомыг кодта, мӕ уыцы лӕппуйы.9:17 Мф. 17:14; Лк. 9:38.
18 Кӕм ӕй ӕрцахсы, уым ӕй зӕххыл ныццӕвы, ӕмӕ лӕппуйӕн йӕ комы фынк скӕлы, йӕ дӕндӕгты хъыс-хъыс ссӕуы, нындзыг вӕййы. Дӕ ахуыргӕнинӕгтӕн загътон, цӕмӕй расурой дӕлимоны, фӕлӕ сӕ бон нӕ баци».
19 Йесо дзуапп радта: «Ӕнӕуырнӕг фӕлтӕр! Кӕдмӕ уыдзынӕн уемӕ? Кӕдмӕ уын быхсдзынӕн? Ӕрбакӕнут Мӕм ӕй».
20 Ӕмӕ Йӕм ӕй ӕрбакодтой. Дӕлимон куыддӕр Йесойы ауыдта, афтӕ лӕппуйы йӕ гӕндзӕхтӕ цӕгъдыныл бафтыдта; лӕппу адӕргъ и зӕххыл ӕмӕ, йӕ комы фынк калгӕйӕ, ратул-батул кодта.
21 Йесо йын бафарста йӕ фыды: «Рагӕй афтӕ у?» Уый Йын дзуапп радта: «Сывӕллонӕй нырмӕ.
22 Дӕлимон ӕй бирӕ хӕттыты ӕппӕрста арты ӕмӕ доны, цӕмӕй йӕ фесафа. Кӕд Дӕ бон у, уӕд нын батӕригъӕд кӕн ӕмӕ нын баххуыс кӕн».
23 Йесо йын загъта: «Кӕд Дӕ бон у, зӕгъыс? Уырнӕгӕн ӕппӕт дӕр у йӕ бон».9:23 Мф. 17:20; 21:22.
24 Лӕппуйы фыд [цӕссыгкалгӕ] уайтӕккӕ хъӕрӕй загъта: «Уырны мӕ! Баххуыс кӕн мӕ лӕмӕгъ уырнындзинадӕн».
25 Йесо адӕмы ӕрбацӕйзгъоргӕ куы федта, уӕд ӕнӕзӕгъинагӕн радта бардзырд: «Ӕгомыг ӕмӕ къуырма уд! Ӕз дын зӕгъын: рацу уымӕй ӕмӕ дзы макуыуал бацу».
26 Уӕд дӕлимон ныхъхъӕр кодта, тынг ныууыгъта лӕппуйы, ӕмӕ дзы рацыд. Лӕппу мардау фӕци, ӕмӕ бирӕтӕ дзырдтой, амарди, зӕгъгӕ.
27 Фӕлӕ йын Йесо схӕцыд йӕ къухыл, рабадын ӕй кодта, ӕмӕ лӕппу сыстад.
28 Йесо хӕдзармӕ куы бацыд, уӕд Ӕй Йӕ ахуыргӕнинӕгтӕ хибарӕй бафарстой: «Дӕлимоны расурын нӕ бон цӕуылнӕ баци?»
29 Йесо сын загъта: «Ацы уды мыггагӕн ӕрмӕст кувын ӕмӕ ком дарыны фӕрцы ис фӕсурӕн».
Йесо ногӕй зӕгъы Йӕ мӕлӕт ӕмӕ Йӕ райгасы тыххӕй
30 Рацыдысты уырдыгӕй ӕмӕ сӕ фӕндаг акодтой Галилейыл. Ӕрмӕст Йесойы нӕ фӕндыд, уым кӕй ис, уый исчи базона.
31 Уымӕн ӕмӕ Йӕ ахуыргӕнинӕгтӕн амыдта ӕмӕ сын дзырдта: «Адӕймаджы Фырт лӕвӕрд ӕрцӕудзӕн адӕмы къухтӕм, амардзысты Йӕ, ӕмӕ ӕртыккаг бон райгас уыдзӕн».9:31 Мф. 17:22; Лк. 9:22; 24:7.
32 Фӕлӕ уыдон уыцы ныхӕстӕ не ’мбӕрстой, бафӕрсын та Йӕ нӕ уӕндыдысты.
Чи у уӕлдӕр?
33 Ӕрцыдысты Капернауммӕ. Хӕдзары куы уыдысты, уӕд сӕ Йесо бафарста: «Фӕндагыл цӕй тыххӕй быцӕу кодтат?»
34 Уыдон ныхъхъус сты, уымӕн ӕмӕ фӕндагыл фӕбыцӕу сты, уӕлдӕр сӕ чи у, уый тыххӕй.
35 Йесо ӕрбадти, басидти дыууадӕсмӕ ӕмӕ сын загъта: «Уӕлдӕр уӕвын кӕй фӕнды, уый ӕппӕтӕй дӕлдӕр уӕд ӕмӕ лӕггад кӕнӕд алкӕмӕн дӕр».
36 Стӕй сын сӕ размӕ ӕрбахуыдта сывӕллоны, ӕрбахъӕбыс ӕй кодта, ӕмӕ сын загъта:9:36 Мф. 18:5; Лк. 9:48.
37 «Ахӕм сывӕллӕттӕй иуыл Мӕ номы сӕраппонд зӕрдиаг чи уа, уый Мӕныл у зӕрдиаг; Мӕныл зӕрдиаг чи уа, уый та Мӕныл зӕрдиаг нӕу, фӕлӕ Мӕ Рарвитӕгыл».
38 Уӕд Ын Иоанн загъта: «Ахуыргӕнӕг, мах федтам, Дӕ номӕй дӕлимонты чи суры, ахӕм адӕймаджы, ӕмӕ йын бар нӕ лӕвӕрдтам, уымӕн ӕмӕ нӕ фӕдыл нӕ цӕуы».9:38 Лк. 9:49.
39 Йесо загъта: «Ма йӕ хъыгдарут. Мӕ номӕй диссаг чи равдиса, уымӕн уыйадыл Мӕнӕй ӕвзӕр зӕгъын йӕ бон нӕ бауыдзӕн.
40 Уымӕн ӕмӕ нӕ ныхмӕ чи нӕу, уый нӕ фарс у.
41 Чырыстийы кӕй стут, уый тыххӕй уын Мӕ номы сӕраппонд доны къус чи ратта, уый, ӕцӕг уын зӕгъын, ӕнӕ хӕрзиуӕгӕй нӕ баззайдзӕн.
42 Фӕлӕ ацы кӕстӕртӕй – Мӕныл ӕууӕндджытӕй – иуы дӕр тӕригъӕды чи бафтауа, уымӕн йӕ бӕрзӕйыл куыройыфыд куы ӕрцауындзиккой ӕмӕ йӕ денджызы куы баппариккой, уӕд ын хуыздӕр уаид.9:42 Мф. 18:6; Лк. 17:1.
43 Дӕ къух дын тӕригъӕды хос куы уа, уӕд ӕй акъуыр: хуыздӕр дын у уӕнгхъуагӕй цардмӕ бацӕуын, цӕйнӕфӕлтау дыууӕ къухимӕ зындоны ӕнӕхуысгӕ артмӕ бацӕуай.
44 [Уым сӕ къуыдыркалм нӕ мӕлы ӕмӕ дзы арт нӕ хуыссы.]
45 Ӕмӕ дын дӕ къах тӕригъӕды хос куы уа, уӕд ӕй акъуыр: хуыздӕр дын у уӕнгхъуагӕй цардмӕ бацӕуын, цӕйнӕфӕлтау дӕ дыууӕ къахимӕ зындонмӕ баппӕрстӕуа.
46 [Уым сӕ къуыдыркалм нӕ мӕлы ӕмӕ дзы арт нӕ хуыссы.]
47 Ӕмӕ дын дӕ цӕст тӕригъӕды хос куы уа, уӕд ӕй фелвас: хуыздӕр дын у иу цӕстимӕ Хуыцауы Паддзахадмӕ бацӕуын, цӕйнӕфӕлтау дӕ дыууӕ цӕстимӕ зындонмӕ баппӕрстӕуа.
48 Уым сӕ къуыдыркалм нӕ мӕлы ӕмӕ дзы арт нӕ хуыссы.
49 Уымӕн ӕмӕ алчидӕр фӕлвӕрд ӕрцӕудзӕн артӕй, Хуыцауӕн хаст нывонд цӕххӕй ссыгъдӕггӕнӕгау.
50 Цӕхх хорз у. Фӕлӕ цӕхх цӕхджын куы нӕ уа, уӕд ӕй цӕмӕй сцӕхджын кӕндзынӕ? Ӕдзӕхх ма ут ӕмӕ кӕрӕдзиимӕ цӕрут фидыдӕй».9:50 Мф. 5:13
10Ус ауадзыны тыххӕй
1 Йесо араст уырдыгӕй, ӕрцыд Иудейӕйы зӕхмӕ ӕмӕ ахызт Иорданы иннӕ фарсмӕ. Ӕрӕмбырд та Йыл сты адӕм, ӕмӕ та сын иннӕ хӕттытау ныр дӕр амыдта.10:1 Мф. 19:3.
2 Бацыдысты Йӕм фарисейтӕ ӕмӕ Йӕ ракъахыны охыл бафарстой: «Лӕгӕн йӕ усы ауадзын ӕмбӕлы?»
3 Йесо сын дзуапп радта: «Моисей уын цы бафӕдзӕхста?»
4 Уыдон загътой: «Моисей радта уагъды ӕвдисӕндар ныффыссыны ӕмӕ ус ауадзыны бар».10:4 Мф. 5:31; Лк. 16:18.
5 Йесо сын дзуапп радта: «Хивӕнд кӕй стут, уый тыххӕй уын ныффыста Моисей ацы фӕдзӕхст.
6 Фӕлӕ тӕккӕ райдианӕй, дуне сфӕлдисынӕй, Хуыцау „уыдоны нӕлгоймаг ӕмӕ сылгоймагӕй сфӕлдыста".
7 „Уымӕ гӕсгӕ адӕймаг ныууадздзӕн йӕ фыд ӕмӕ йӕ мады,10:7 1 Кор. 6:16.
8 Баиу уыдзӕн йӕ усимӕ, ӕмӕ дыууӕ уыдзысты иу буар". Афтӕмӕй уыдон дыууӕ нал сты, фӕлӕ сты иу буар.
9 Уӕдӕ Хуыцау цы сиу кодта, уый адӕймаг ма ахицӕн кӕнӕд».
10 Хӕдзары та Йӕ ахуыргӕнинӕгтӕ ногӕй бафарстой уый тыххӕй.
11 Йесо сын загъта: «Йӕ усы чи ауадза ӕмӕ ӕндӕр ус чи ракура, уый хӕтгӕ кӕны ӕмӕ уымӕй цӕуы йӕ усы тӕригъӕды.
12 Йӕ мойы чи ныууадза ӕмӕ ӕндӕрмӕ чи ӕрцӕуа, уый дӕр хӕтгӕ кӕны».
Йесо Йӕ арфӕ ӕфтауы сывӕллӕттыл
13 Йесомӕ хуыдтой сывӕллӕтты, цӕмӕй сыл бандзӕва, фӕлӕ сӕ ахуыргӕнинӕгтӕ нӕ уагътой.10:13 Мф. 19:13; Лк. 18:15.
14 Йесо уый куы федта, уӕд смӕсты ӕмӕ сын загъта: «Ӕрбауадзут Мӕм сывӕллӕтты, ма сӕ хъыгдарут, уымӕн ӕмӕ Хуыцауы Паддзахад уыдоны хуызӕтты у.10:14 Мф. 18:4; 1 Пет. 2:2; 1 Кор. 14:20.
15 Ӕцӕг уын зӕгъын: Хуыцауы Паддзахадыл сывӕллонау чи нӕ баууӕнда, уый йӕм нӕ бацӕудзӕн».
16 Ӕмӕ сывӕллӕтты Йӕ хъӕбысы ӕрбатыхта, ӕрӕвӕрдта сыл Йӕ къухтӕ ӕмӕ сыл Йӕ арфӕ бафтыдта.
Бонджын
17 Йесо Йӕ фӕндагыл куы араст, уӕд ӕрбазгъордта иучидӕр, Йӕ разы ӕрхауд йӕ зонгуытыл ӕмӕ Йӕ бафарста: «Хорз Ахуыргӕнӕг, мыггагмӕйы цард райсынӕн цы саразон?»10:17 Мф. 19:16; Лк. 18:18.
18 Йесо йын дзуапп радта: «Цӕмӕн Мӕ хоныс хорз? Иунӕг Хуыцауы йеддӕмӕ хорз ничи у.
19 Фӕдзӕхстытӕ зоныс: „Ма амар", „Ма хӕт", „Ма дав", „Мӕнгӕвдисӕн ма ныллӕуу", „Макӕй бастигъ", „Нымай дӕ фыд ӕмӕ дӕ мады"».10:19 Мф. 5:21; Лк. 18:20.
20 Уый Йесойӕн загъта: «Ахуыргӕнӕг, ӕппӕт уыдӕттӕ ме ’взонджы бонтӕй нырмӕ ӕххӕст кӕнын».
21 Йесо йӕм бакаст, бауарзта йӕ ӕмӕ йын зӕгъы: «Иу бакӕнинаг дын баззад: ацу, цыдӕриддӕр дӕм ис, уый ауӕй кӕн, ратт ӕй мӕгуыртӕн, ӕмӕ дын уӕларвы уыдзӕни хӕзна. Стӕй-иу раздӕх, [райс дӕ дзуар,] ӕмӕ цу Мӕ фӕдыл».
22 Уыцы ныхӕстӕй уый хорзау нал уыд ӕмӕ ацыд ӕнкъардӕй, уымӕн ӕмӕ йӕм бирӕ мулк уыд.
23 Йесо акаст фӕйнӕрдӕм ӕмӕ загъта Йӕ ахуыргӕнинӕгтӕн: «Ӕвӕдза, бонджынтӕн куыд зын у Хуыцауы Паддзахадмӕ бацӕуын!»10:23 Иак. 2:5; 1 Тим. 6:17.
24 Йӕ ныхӕстӕ дисы бафтыдтой ахуыргӕнинӕгты. Фӕлӕ сын Йесо ноджыдӕр загъта: «Мӕ хъӕбултӕ, ӕвӕдза, [мулкӕй ныфс кӕй ис, уымӕн] куыд зын у Хуыцауы Паддзахадмӕ бацӕуын!
25 Хъӕздыгӕн Хуыцауы Паддзахадмӕ бацӕуынӕй теуайӕн судзины быны иннӕрдӕм ахизын ӕнцондӕр у».
26 Ахуыргӕнинӕгтӕм уый тынг диссаг фӕкаст, ӕмӕ сӕ кӕрӕдзийӕн дзырдтой: «Уӕдӕ чи фервӕздзӕн?»
27 Йесо сӕм бакаст ӕмӕ загъта: «Уый адӕмы бон нӕу, Хуыцауӕн та бантысдзӕн, уымӕн ӕмӕ Хуыцауӕн Йӕ бон ӕппӕт дӕр у».
28 Петр Ын райдыдта дзурын: «Мӕнӕ мах ныууагътам алцыдӕр ӕмӕ рацыдыстӕм Дӕ фӕдыл».10:28 Мф. 19:27; Лк. 18:28.
29 Йесо сын загъта: «Ӕцӕг уын зӕгъын: Мӕ сӕраппонд ӕмӕ фарны уацы сӕраппонд йӕ хӕдзар, кӕнӕ йе ’фсымӕрты, кӕнӕ йӕ хоты, кӕнӕ йӕ мады, кӕнӕ йӕ фыды, [кӕнӕ йӕ усы,] кӕнӕ йӕ сывӕллӕтты, кӕнӕ йӕ зӕххытӕ чи ныууадза, уыдонӕй иунӕг ахӕм дӕр нӕй,
30 Ӕмӕ, кӕд ӕфхӕрд ӕййафдзӕн, уӕддӕр ныридӕгӕн, ацы заманы, фондзыссӕдз хатты фылдӕрӕй чи нӕ райса хӕдзӕрттӕ, ӕфсымӕртӕ, хотӕ, мадӕлтӕ, сывӕллӕттӕ ӕмӕ зӕххытӕ, ӕрцӕуинаг дунейы та – мыггагмӕйы цард.
31 Фӕлӕ фыццӕгтӕй бирӕтӕ уыдзысты фӕстӕгтӕ, фӕстӕгтӕй та бирӕтӕ уыдзысты фыццӕгтӕ».
Йесо ӕртыккаг хатт зӕгъы Йӕ мӕлӕт ӕмӕ Йӕ райгасы тыххӕй
32 Йесо ӕмӕ Йӕ ахуыргӕнинӕгтӕ сӕ фӕндаг дардтой Иерусалиммӕ; Йесо цыди сӕ разӕй. Ахуыргӕнинӕгтӕ дисы ӕфтыдысты, Йӕ фӕдыл цӕуӕг адӕмы та тас бацыд. Йесо ногӕй фӕхибар кодта дыууадӕсы ӕмӕ сын дзурын райдыдта, цы Йыл ӕрцӕудзӕн, уыдӕтты тыххӕй:
33 «Ныр мах цӕуӕм Иерусалиммӕ, ӕмӕ Адӕймаджы Фырт лӕвӕрд ӕрцӕудзӕн алчертӕм ӕмӕ динамонджытӕм. Рахӕсдзысты Йын марыны тӕрхон ӕмӕ Йӕ ратдзысты муртаттӕм.10:33 Мф. 20:18; Лк. 18:31.
34 Уыдон Ӕй ӕфхӕрдзысты, тутӕ Йыл кӕндзысты, нӕмдзысты Йӕ ехсӕй ӕмӕ Йӕ амардзысты, ӕмӕ ӕртӕ боны фӕстӕ райгас уыдзӕн».
Зеведейы фыртты курдиат
35 Йесомӕ бацыдысты Зеведейы фырттӕ Иаков ӕмӕ Иоанн, ӕмӕ Йын загътой: «Ахуыргӕнӕг, фӕнды нӕ, цӕмӕй нын сӕххӕст кӕнай нӕ курдиат».
36 Йесо сӕ бафарста: «Цы уӕ фӕнды, ӕмӕ уын ӕй саразон?»
37 Уыдон Ын дзуапп радтой: «Дӕ намысджын Паддзахады нӕ иуы Дӕ рахиз фарс, иннӕйы та Дӕ галиу фарс сбадын бауадз».
38 Йесо сын загъта: «Цы курут, уый уӕхӕдӕг дӕр не ’мбарут. Ӕз цы хъизӕмӕртты кӕхц нуазын, уый баназын, кӕнӕ Мӕныл цы аргъуыдӕй аргъуыдӕуы, ахӕм аргъуыд райсын суыдзӕн уӕ бон?»
39 Уыдон Ын дзуапп радтой: «Суыдзӕн». Йесо та сын загъта: «Ӕз цы хъизӕмӕртты кӕхц нуазын, уый нуаздзыстут, ӕмӕ Мӕныл цы аргъуыдӕй аргъуыдӕуы, уымӕй уыл саргъуыдӕуыдзӕн.
40 Мӕ рахиз фарс ӕмӕ Мӕ галиу фарс сбадын та Мӕнӕй аразгӕ нӕу, фӕлӕ уыцы бынӕттӕ кӕмӕн ӕрцӕттӕчындӕуыд, уыдон дзы сбаддзысты».
41 Уый дӕс ахуыргӕнинаджы куы фехъуыстой, уӕд смӕсты сты Иаков ӕмӕ Иоаннмӕ.10:41 Мф. 20:24; Лк. 22:24.
42 Йесо басидти сеппӕтмӕ дӕр ӕмӕ сын загъта: «Сымах зонут, ӕлдӕрттӕ кӕй хонынц, уыдон адӕмтӕн кӕй хицауиуӕг кӕнынц, ӕмӕ хицӕуттӕ адӕмтыл барджын кӕй сты, уый.
43 Сымахмӕ та афтӕ ма уӕд. Фӕлӕ уӕ уӕлдӕр уӕвын кӕй фӕнды, уый уын уӕд лӕггадгӕнӕг;
44 Ӕмӕ уӕ фыццаг уӕвын кӕй фӕнды, уый уеппӕтӕн дӕр уӕд цагъар.
45 Адӕймаджы Фырт дӕр уый тыххӕй не ’рцыд, ӕмӕ Йын лӕггад кӕной, фӕлӕ цӕмӕй Йӕхӕдӕг балӕггад кӕна ӕмӕ бирӕты ссӕрибары сӕраппонд ратта Йӕ цард».10:45 Ин. 13:15; 1 Пет. 5:3; Флп. 2:7.
Куырм Вартимей цӕстӕй ракаст
46 Ӕрцыдысты Иерихонмӕ. Йесо Йӕ ахуыргӕнинӕгтӕ ӕмӕ бирӕ адӕмимӕ Иерихонӕй куы рацӕйцыди, уӕд куырм мӕгуыргур Вартимей, Тимейы фырт, бадти фӕндаггӕрон.10:46 Мф. 20:29.
47 Ӕмӕ куы фехъуыста, уый Назаретаг Йесо у, зӕгъгӕ, уӕд райдыдта хъӕр кӕнын: «Йесо, Давиды Фырт, батӕригъӕд мын кӕн!»
48 Бирӕтӕ дзы домдтой, цӕмӕй ныссабыр уа, фӕлӕ уый ноджы тынгдӕр хъӕр кодта: «Давиды Фырт, батӕригъӕд мын кӕн!»
49 Йесо ӕрлӕууыд ӕмӕ загъта: «Фӕдзурут ӕм». Фӕдзырдтой куырммӕ ӕмӕ йын загътой: «Ма тӕрс, сыст, дзуры дӕм».
50 Уый феппӕрста йӕ пӕлӕз, фӕгӕпп ласта ӕмӕ бацыд Йесомӕ.
51 Йесо йӕ бафарста: «Цы дӕ фӕнды? Цы дын саразон?» Куырм Ын дзуапп радта: «Раввуни, мӕн фӕнды мӕ цӕстытӕй ракӕсын».
52 Йесо йын загъта: «Ацу, дӕ уырнындзинад дӕ фервӕзын кодта». Куырм уайтӕккӕ ракаст йӕ цӕстытӕй ӕмӕ ацыд Йесойы фӕдыл.
11Йесо ӕрцыд Иерусалиммӕ
1 Иерусалиммӕ сӕ бирӕ нал хъуыд. Елеоны хохы фахсыл чи ис, уыцы Виффаги ӕмӕ Вифанимӕ куы баввахс сты, уӕд Йесо арвыста Йӕ ахуыргӕнинӕгтӕй дыууӕйы,11:1 Мф. 21:1; Лк. 19:29.
2 Ӕмӕ сын загъта: «Ацӕут, уӕ ныхмӕ цы хъӕу ис, уырдӕм. Куы бацӕуат, уӕд уайтӕккӕ ссардзыстут, адӕймаг кӕуыл нӕма сбадт, ахӕм къӕлӕу бастӕй. Суадзут ӕй ӕмӕ йӕ ракӕнут.
3 Исчи уӕ куы бафӕрса: „Уый цы ми кӕнут?", уӕд дзуапп раттут, Хицауы хъӕуы, зӕгъгӕ, стӕй йӕ, зӕгъ, Хицау уыйадыл рарвитдзӕн фӕстӕмӕ».
4 Ахуыргӕнинӕгтӕ ацыдысты, ӕмӕ уынджы, кулдуармӕ бастӕй, ссардтой къӕлӕу, ӕмӕ йӕ суагътой.
5 Уым чи лӕууыди, уыдонӕй сын чидӕртӕ загътой: «Цы ми кӕнут? Къӕлӕуы цӕмӕн уӕгъд кӕнут?»
6 Уыдон сын дзуапп радтой, Йесо сын куыд бафӕдзӕхста, афтӕ. Ӕмӕ сӕ ауагътой.
7 Ӕркодтой къӕлӕуы Йесомӕ, сӕвӕрдтой йыл сӕ дарӕстӕ, ӕмӕ йыл Йесо сбадт.11:7 Мф. 21:7; Лк. 19:35.
8 Бирӕтӕ сӕ дарӕстӕ байтыдтой фӕндагыл, иннӕтӕ та – быдырты кӕй ралыг кодтой, уыцы къалиутӕ.
9 Йесойӕн Йӕ разӕй ӕмӕ Йӕ фӕстӕ чи цыд, уыдон хъӕр кодтой: «Осаннӕ! Арфӕгонд уӕд Хуыцауы номӕй Ӕрцӕуӕг!
10 Арфӕгонд уӕд нӕ фыдӕл Давиды ӕрцӕуинаг паддзахад! Осаннӕ уӕлӕрвты!»
11 Йесо Иерусалиммӕ куы бахӕццӕ, уӕд бацыди Кувӕндонмӕ, ӕрзылд ыл, ӕмӕ ӕнафон кӕй уыд, уымӕ гӕсгӕ дыууадӕс ахуыргӕнинагимӕ ацыди Вифанимӕ.
Ӕлгъыст легъуибӕлас
12 Дыккаг бон Вифанийӕ куы рацыдысты, уӕд Йесо сыстонг.
13 Дардӕй ауыдта, сыфтӕр чи рафтыдта, ахӕм легъуибӕлас, ӕмӕ йӕм ацыд, кӕд ыл исты ссарид, зӕгъгӕ. Фӕлӕ йӕм куы бацыд, уӕд ыл сыфтӕрты йеддӕмӕ ницы ссардта, уымӕн ӕмӕ йын дыргъафон нӕма уыд.
14 Уӕд ын Йесо загъта: «Нырӕй фӕстӕмӕ дын мыггагмӕ дӕр дӕ гагатӕй мачиуал бахӕрӕд». Ӕмӕ уый фехъуыстой Йӕ ахуыргӕнинӕгтӕ.
Йесо сыгъдӕг кӕны Кувӕндон
15 Ӕрцыдысты Иерусалиммӕ. Йесо Кувӕндонмӕ бацыд ӕмӕ уырдыгӕй тӕрын райдыдта уӕйгӕнджытӕ ӕмӕ ӕлхӕнджыты, ӕхцаивджытӕн афӕлдӕхта сӕ фынгтӕ, бӕлӕттӕ уӕйгӕнджытӕн та – сӕ бандӕттӕ.11:15 Мф. 21:12; Лк. 19:45; Ин. 2:14.
16 Ницы дзаума уагъта Кувӕндоныл хӕссын.
17 Ӕмӕ сӕ ахуыр кодта: «Афтӕ фыст нӕу, ӕви: „Мӕ хӕдзар ӕппӕт адӕмтӕн кувӕн хӕдзар схуындӕуыдзӕн"? Сымах та дзы абырджыты лӕгӕт сарӕзтат».
18 Алчертӕ ӕмӕ динамонджытӕ уый куы фехъуыстой, уӕд агуырдтой Йӕ амарыны фадат. Уымӕн ӕмӕ Дзы тарстысты, Йӕ ахуырад ӕппӕт адӕмы дисы кӕй ӕфтыдта, уый тыххӕй.
19 Куы баизӕр, уӕд Йесо Йӕ ахуыргӕнинӕгтимӕ рацыди сахарӕй.
Легъуибӕлас бахус
20 Райсомӕй легъуийы цурты куы фӕцӕйцыдысты, уӕд федтой, бӕлас йӕ уидӕгтӕм кӕй бахус, уый.
21 Петр ӕрымысыди зноны хабар ӕмӕ загъта Йесойӕн: «Равви, акӕс-ма, Ды кӕй ралгъыстай, уыцы легъуибӕлас бахус».
22 Йесо сын загъта:
23 «Ӕууӕндут Хуыцауыл. Ӕцӕг уын зӕгъын, исчи ацы хохӕн куы зӕгъа: „Фӕхицӕн у зӕххӕй ӕмӕ денджызы дӕхи баппар", ӕмӕ ӕппындӕр куы нӕ фӕгуырысхо уа, фӕлӕ фидарӕй куы ӕууӕнда, уӕд цы зӕгъа, уый ӕрцӕудзӕн.
24 Уый тыххӕй уын зӕгъын: уӕ куывды цыдӕриддӕр ракурат, уый ныридӕгӕн кӕй райстат, ууыл ӕууӕндут, ӕмӕ йӕ райсдзыстут.11:24 Мф. 7:7; Лк. 11:9; Ин. 14:13.
25 Ӕмӕ-иу Хуыцауы раз кувгӕйӕ куы лӕууат, уӕ зӕрдӕ та искӕуыл куы худа, уӕд-иу ын ныббарут, ӕмӕ уын уӕ Уӕларвон Фыд дӕр ныббардзӕн уӕ тӕригъӕдтӕ.11:25 Мф. 6:14; Эф. 4:32; Кол. 3:13.
26 [Кӕд нӕ барут, уӕд уын уӕ Уӕларвон Фыд дӕр нӕ ныббардзӕн уӕ тӕригъӕдтӕ.]»
Йесойӕн ахӕм бар чи радта
27 Йесо Йӕ ахуыргӕнинӕгтимӕ ногӕй ӕрцыд Иерусалиммӕ. Кувӕндоныл куы зылди, уӕд Ӕм бацыдысты алчертӕ, динамонджытӕ ӕмӕ адӕмы хистӕртӕ,11:27 Мф. 21:23; Лк. 20:1.
28 Ӕмӕ Йӕ бафарстой: «Ды цавӕр хъаруйӕ кӕныс ӕппӕт уыдӕттӕ? Афтӕ кӕныны бар Дын чи радта?»
29 Йесо сын загъта: «Ӕз дӕр уӕ бафӕрсдзынӕн цӕмӕйдӕр. Дзуапп Мын раттут, ӕмӕ уын зӕгъдзынӕн, цавӕр хъаруйӕ сӕ кӕнын, уый.
30 Иоанн цы аргъуыдӕй аргъуыдта, уый уӕларвӕй уыд ӕви адӕмӕй? Зӕгъут-ма Мын ӕй».
31 Уыдон кӕрӕдзийӕн дзырдтой: «„Уӕларвӕй" куы зӕгъӕм, уӕд бафӕрсдзӕн: „Уӕдӕ цӕуылнӕ баууӕндыдыстут Иоанныл?"»
32 «Адӕмӕй» зӕгъынӕй та адӕмӕй тарстысты, уымӕн ӕмӕ сеппӕты дӕр уырныдта, Иоанн ӕцӕгӕй пехуымпар кӕй уыд, уый.
33 Ӕмӕ дзуапп радтой Йесойӕн: «Нӕ зонӕм». Уӕд сын Йесо загъта: «Уӕдӕ уын Ӕз дӕр нӕ зӕгъдзынӕн, цавӕр хъаруйӕ сӕ кӕнын, уый».
12Фӕсномыг ныхас фыдзӕрдӕ ӕххуырстыты тыххӕй
1 Йесо адӕмӕн райдыдта фӕсномыг ныхӕстӕй дзурын: «Иу адӕймаг ныссагъта сӕнӕфсирдон, йӕ алыварс ын сарӕзта ӕмбонд, скъахта дзы сӕндуцӕн, самадта дзы мӕсыг, радта йӕ ӕххуырст кусджытӕм ӕмӕ ацыд балцы.
2 Афон куы ралӕууыди, уӕд ӕххуырст кусджытӕм йӕ сӕнӕфсиры хай райсынмӕ арвыста йӕ цагъары.
3 Уыдон ӕй ӕрцахстой, фӕнадтой йӕ ӕмӕ йӕ афтидармӕй раздӕхтой.12:3 Мф. 5:12; 23:34.
4 Арвыста сӕм ӕндӕр цагъары, ӕмӕ уымӕн дӕр асастой йӕ сӕр ӕмӕ дзы фӕхынджылӕг кодтой.
5 Арвыста ма сӕм ӕндӕры дӕр, ӕмӕ йӕ амардтой. Ноджы ма сӕм бирӕты арвыста, ӕмӕ уыдонӕй дӕр кӕй нӕмгӕ фӕкодтой, кӕй та дзы маргӕ акодтой.
6 Иу ма йын баззад – йӕ уарзон фырт; ӕмӕ сӕм ӕппынфӕстаг уый дӕр арвыста, мӕ фыртӕй мын фефсӕрмы уыдзысты, зӕгъгӕ.
7 Фӕлӕ ӕххуырст кусджытӕ загътой кӕрӕдзийӕн: „Уый йӕ бындар у. Цом, амарӕм ӕй, ӕмӕ мах бауыдзысты йӕ бынтӕ".
8 Ӕрцахстой йӕ ӕмӕ йӕ амардтой, ӕмӕ йын йӕ мард сӕнӕфсирдонӕй раппӕрстой.
9 Цы бакӕндзӕни сӕнӕфсирдоны хицау? Ӕрцӕудзӕн, амардзӕн ӕххуырст кусджыты ӕмӕ сӕнӕфсирдон ратдзӕн ӕндӕртӕм.
10 Ау, Сыгъдӕг Фысты нӕ бакастыстут: „Аразджытӕ цы дурыл нӕ барвӕссыдысты, уый сси сӕрӕвӕрӕн.12:10 Мф. 21:42.
11 Уый Хуыцауы фӕндӕй у, ӕмӕ уыцы диссаг мах уынӕм"?»
12 Йесо фӕсномыг ныхас уыдоны тыххӕй кӕй загъта, уый бамбӕрстой, ӕмӕ Йӕ хъавыдысты ӕрцахсынмӕ, фӕлӕ адӕмӕй нӕ бауӕндыдысты. Уӕд Ӕй ныууагътой ӕмӕ ацыдысты.
Хъалон кесӕрӕн
13 Ӕмӕ Йӕм барвыстой фарисейтӕй ӕмӕ Ироды фарсдарджытӕй кӕйдӕрты, цӕмӕй Йӕ ракъахой ӕмӕ Йын Йӕ ныхӕстӕ Йӕхи ныхмӕ фӕцаразой.12:13 Мф. 22:15; Лк. 20:20.
14 Уыдон Ӕм ӕрцыдысты ӕмӕ Йын загътой: «Ахуыргӕнӕг, мах зонӕм, Ды раст кӕй дӕ ӕмӕ искӕй зӕрдӕ балхӕныныл кӕй нӕ архайыс, уымӕн ӕмӕ никӕй хъулон кӕныс, фӕлӕ ӕцӕгадмӕ гӕсгӕ амоныс Хуыцауы фӕндаг. Кесӕрӕн хъалон фидын ӕмбӕлы ӕви нӕ? Фидӕм ын ӕви йын ма фидӕм?»
15 Йесо сын зыдта сӕ цӕстмӕхъусдзинад ӕмӕ сын загъта: «Цы Мӕ къахут? Рахӕссут-ма Мӕм динар ӕмӕ йӕм ӕркӕсон».
16 Ӕрбахастой Йӕм. Ӕмӕ сын загъта: «Кӕй ныв ӕмӕ йыл кӕй ном ис?» Уыдон Ын дзуапп радтой: «Кесӕры».
17 Йесо сын загъта: «Кесӕры цы у, уый дӕттут кесӕрӕн, Хуыцауы цы у, уый та – Хуыцауӕн». Ӕмӕ Йыл дис кодтой.12:17 Мф. 22:21.
Мӕрдты райгасы тыххӕй
18 Уӕд Йесомӕ ӕрбацыдысты саддукейтӕ (саддукейтӕ дзурынц, мӕрдтӕ нӕ райгас уыдзысты, зӕгъгӕ), ӕмӕ Йӕ бафарстой:12:18 Лк. 20:27.
19 «Ахуыргӕнӕг, Моисей махӕн ныффыста: „Искӕмӕн йӕ усджын ӕфсымӕр куы амӕла, зӕнӕг та йын куы нӕ баззайа, уӕд ын йе ’фсымӕр ракурӕд йӕ усы ӕмӕ цот рауадзӕд йе ’фсымӕрӕн".
20 Уыд авд ӕфсымӕры. Хистӕр ӕрхаста ус ӕмӕ ӕнӕзӕнӕгӕй амард.
21 Ракуырдта йӕ дыккаг ӕфсымӕр ӕмӕ уый дӕр амарди, йӕ фӕстӕ зӕнӕг нӕ ныууадзгӕйӕ. Афтӕ рауад ӕртыккаджы хабар дӕр.
22 Авдӕй йӕ алчидӕр ракуырдта, фӕлӕ дзы зӕнӕг ничи ныууагъта. Сеппӕты фӕстӕ ус дӕр амард.
23 Ныр мӕрдтӕ куы райгас уой, уӕд сӕ кӕй ус уыдзӕни? Сӕ авды ус дӕр куы уыд».
24 Йесо сын дзуапп радта: «Нӕдӕр Сыгъдӕг Фыст, нӕдӕр Хуыцауы тых кӕй нӕ зонут, уый уӕ нӕ рӕдийын кӕны, ӕви?
25 Уымӕн ӕмӕ мӕрдтӕ куы райгас уой, уӕд нӕдӕр ус курдзысты, нӕдӕр мой кӕндзысты, фӕлӕ уыдзысты уӕларвон зӕдтау.
26 Мӕрдтӕ райгас уыдзысты, зӕгъгӕ, уый тыххӕй та Моисейы чиныджы нӕ бакастыстут, Хуыцау ӕм сындзкъутӕрӕй цы радзырдта, уый: „Ӕз дӕн Авраамы Хуыцау, Исаакы Хуыцау ӕмӕ Иаковы Хуыцау"?
27 Хуыцау мӕрдты Хуыцау нӕу, удӕгӕсты Хуыцау у. Уӕдӕ сымах тынг рӕдийут».
Тӕккӕ ахсджиагдӕр фӕдзӕхст
28 Динамонджытӕй сын иу фехъуыста сӕ ныхас ӕмӕ бафиппайдта, Йесо уыдонӕн хорз дзуапп кӕй радта, уый. Ӕмӕ бацыд Йесомӕ ӕмӕ Йӕ бафарста: «Ӕппӕт фӕдзӕхстытӕй сӕйрагдӕр кӕцы у?»12:28 Мф. 22:35; Лк. 10:25.
29 Йесо йын дзуапп радта: «Тӕккӕ сӕйрагдӕр мӕнӕ ацы фӕдзӕхст у: „Байхъус, Израил! Нӕ Хицау Хуыцауы йеддӕмӕ ӕндӕр Хуыцау нӕй.
30 Ӕмӕ уарз дӕ Хицау Хуыцауы ӕппӕт зӕрдӕйӕ, ӕппӕт удӕй, ӕппӕт зондӕй ӕмӕ ӕппӕт хъаруйӕ".
31 Дыккаг фӕдзӕхст та ахӕм у: „Уарз хионы, дӕхи куыд уарзыс, афтӕ". Уыдонӕй ахсджиагдӕр фӕдзӕхст нӕй».12:31 Мф. 5:43.
32 Динамонӕг Ын загъта: «Раст зӕгъыс, Ахуыргӕнӕг. Хуыцау иу кӕй у ӕмӕ ӕндӕр Хуыцау кӕй нӕй, уымӕй иттӕг раст зӕгъыс.
33 Ӕмӕ Уый ӕппӕт зӕрдӕйӕ, ӕппӕт зондӕй, ӕппӕт хъаруйӕ уарзын, хионы дӕр, дӕхи куыд уарзыс, афтӕ уарзын у ӕппӕт иууылсудзинаг нывондтӕй ӕмӕ ӕппӕт иннӕ нывондтӕй дӕр ахсджиагдӕр».
34 Йесо йын йӕ раст дзуапп куы фехъуыста, уӕд ын загъта: «Хуыцауы Паддзахадӕй дард нӕ дӕ». Уый фӕстӕ Йесойы бафӕрсынмӕ йӕ ныфс ничиуал хаста.
Кӕй байзӕддаг у Чырысти?
35 Йесо Кувӕндоны дарддӕр ахуыр кодта адӕмы ӕмӕ дзырдта: «Динамонджытӕ куыд зӕгъынц Чырыстийӕ, Давиды байзӕддаг у, зӕгъгӕ?
36 Сыгъдӕг Удӕй разӕнгардӕй Давид йӕхӕдӕг куы дзырдта: „Хуыцау загъта мӕ Хицауӕн: сбад Мӕ рахиз фарс, цалынмӕ Дын Де знӕгты Дӕ къӕхты бын ӕрӕвӕрон, уӕдмӕ".
37 Давид Ӕй кӕд Хицау хоны, уӕд Уый йӕ байзӕддаг куыд у?» Адӕм хъуыстой Йесомӕ зӕрдиагӕй.
38 Ӕмӕ сӕ Йесо ахуыр кодта: «Уӕхи хизут динамонджытӕй. Уыдон уарзынц даргъ дарӕс дарын ӕмӕ сахарты фӕзты адӕмы арфӕтӕм хъусын;
39 Уарзынц синагогӕты раззаг бынӕтты ӕмӕ минасы фынгтыл уӕле бадын;12:39 Мф. 23:6; Лк. 11:43.
40 Хӕрынц идӕдзты хӕдзӕрттӕ, цӕстмӕ кувынц бирӕ. Уыдон баййафдзысты карз ӕфхӕрд».
Идӕдз усы мысайнаг
41 Йесо ӕрбадти Кувӕндоны хӕзнадоны бакомкоммӕ ӕмӕ каст, адӕм дзы ӕхца куыд ӕвӕрдтой, уымӕ. Бирӕ хъӕздгуытӕ дзы ӕвӕрдтой бирӕ ӕхца.12:41 Лк. 21:1.
42 Ӕрцыд иу мӕгуыр идӕдз ус ӕмӕ нывӕрдта дыууӕ лептӕйы – иу кодрант.
43 Йесо басидт Йӕ ахуыргӕнинӕгтӕм ӕмӕ сын загъта: «Ӕцӕг уын зӕгъын, ацы мӕгуыр идӕдз ус, ӕппӕт адӕм цас нывӕрдтой, уымӕй фылдӕр нывӕрдта хӕзнадоны.
44 Иннӕтӕ иууылдӕр сӕ исбоны уӕлдайӕ нывӕрдтой; ацы мӕгуыр сылгоймаг та нывӕрдта, цыдӕриддӕр ӕм уыдис, уый, йӕ хойраджы аргъ».
13Пехуымпар ныхас Кувӕндоны тыххӕй
1 Йесо Кувӕндонӕй куы рацӕйцыд, уӕд Ын Йӕ ахуыргӕнинӕгтӕй иу загъта: «Ахуыргӕнӕг, акӕс-ма, мӕнӕ цы дуртӕ ӕмӕ бӕстыхӕйттӕ ис!»13:1 Мф. 24:1; Лк. 21:5.
2 Йесо йын дзуапп радта: «Уыныс ацы стыр бӕстыхӕйттӕ? Уыдон афтӕ ныппырх уыдзысты, ӕмӕ дзы ам дур дурыл нал баззайдзӕн».
Бӕллӕхты райдайӕн
3 Йесо Елеоны хохыл Кувӕндоны бакомкоммӕ куы бадт, уӕд Ӕй хибарӕй фарстой Петр, Иаков, Иоанн ӕмӕ Андрей:
4 «Зӕгъ-ма нын, уый кӕд уыдзӕн, ӕмӕ ӕппӕт уыдӕттӕн се ’рцыды афон цӕмӕй бӕрӕг уыдзӕн?»
5 Йесо сын райдыдта дзурын: «Уӕхи хизут, цӕмӕй уӕ мачи фӕсайа.13:5 Мф. 24:4; Лк. 21:8; Эф. 5:6; 2 Фес. 2:3.
6 Бирӕтӕ ӕрцӕудзысты ӕмӕ дзурдзысты: „Ӕз Чырысти дӕн", ӕмӕ бирӕты фӕсайдзысты.
7 Ӕввахс ӕмӕ дард хӕстыты тыххӕй куы фехъусат, уӕд ма фӕтӕрсут – ӕппӕтт уыдӕттӕн ӕнӕрцӕугӕ нӕй, фӕлӕ уый кӕрон нӕма уыдзӕни.
8 Сыстдзысты адӕм адӕмы ныхмӕ ӕмӕ паддзахад паддзахады ныхмӕ, ранӕй-рӕтты уыдзӕни зӕххӕнкъуыстытӕ, скӕндзӕни стонг рӕстӕг. Ӕппӕт уыдӕттӕ арӕг сылгоймаджы хъизӕмӕртты райдайӕнау уыдзысты.
9 Фӕлӕ сымах цӕттӕ дарут уӕхи: дӕтдзысты уӕ тӕрхондӕттӕм ӕмӕ уӕ нӕмдзысты синагогӕты; Мӕн тыххӕй уӕ кӕндзысты хицӕуттӕм ӕмӕ паддзӕхтӕм, цӕмӕй Мын уыдоны раз уат ӕвдисӕнтӕ.
10 Фӕлӕ уал уыдӕтты размӕ ӕппӕт адӕмтӕм хъуамӕ фӕхӕццӕ уа фарны уац.
11 Тӕрхонмӕ уӕ куы кӕной, уӕд цы зӕгъдзыстут, ууыл-иу рагацау ма мӕт кӕнут, фӕлӕ-иу дзурут, уайтӕккӕ уын цы рардӕуа, уый. Уымӕн ӕмӕ сымах нӕ дзурдзыстут, фӕлӕ уӕ дзыхӕй дзурдзӕни Сыгъдӕг Уд.13:11 Мф. 10:19; Лк. 12:11.
12 Ратдзӕн ӕфсымӕр ӕфсымӕры ӕмӕ фыд хъӕбулы мӕлӕтмӕ; сыстдзысты зӕнӕг сӕ ныййарджыты ныхмӕ ӕмӕ сӕ амарын кӕндзысты.
13 Мӕ номы тыххӕй алкӕмӕн дӕр уыдзыстут ӕнӕуынон; фӕлӕ кӕронмӕ чи бафӕраза, уый фервӕздзӕн.
Ӕрцӕуинаг бӕллӕхтӕ
14 Кӕм не ’мбӕлы, уым „ӕлгъаг гӕныстон" куы фенат, – чиныгкӕсӕг ӕй бамбарӕд, – уӕд Иудейӕйы чи уа, уыдон лидзӕнт хӕхтӕм.
15 Уӕлхӕдзар чи уа, уый йӕ хӕдзармӕ ма ӕрхизӕд уырдыгӕй исты рахӕссынмӕ.
16 Быдыры чи уа, уый дӕр ма раздӕхӕд йӕ дарӕс рахӕссынмӕ.
17 Уӕд додоййаг уыдзысты сывӕрджынтӕ ӕмӕ дзидзидарджытӕ.
18 Кувут, цӕмӕй уӕ ма бахъӕуа зымӕджы лидзын.
19 Уымӕн ӕмӕ уыцы бонты уыдзӕни, Хуыцау дуне куы сфӕлдыста, уӕдӕй нырмӕ чи нӕма уыд ӕмӕ нал уыдзӕн, ахӕм стыр бӕллӕх.
20 Ӕмӕ Хицау уыцы бонтӕ куы нӕ фӕцыбыр кодтаид, уӕд иу адӕймаг дӕр нӕ фервӕзтаид. Фӕлӕ Йӕхӕдӕг кӕй сӕвзӕрста, уыдоны сӕраппонд сӕ фӕцыбыр кодта.
21 Уӕд уын исчи куы зӕгъа: „Мӕнӕ ам ис Чырысти", кӕнӕ: „Уым ис", – ма уӕ бауырнӕд.13:21 Мф. 24:23; Лк. 17:23.
22 Уымӕн ӕмӕ фӕзындзысты мӕнгчырыститӕ ӕмӕ мӕнгпехуымпартӕ, равдисдзысты ӕвдисӕйнӕгтӕ ӕмӕ диссӕгтӕ, цӕмӕй, гӕнӕн ӕмӕ амалӕй, асайой ӕвзӕрстыты.
23 Уӕхи хизут – ӕппӕт уыдӕтты тыххӕй уын Ӕз загътон рагацау.
Адӕймаджы Фырты ӕрцыд
24 Уӕд, уыцы бӕллӕхты фӕстӕ, баталынг уыдзӕни хур, мӕй нал ратдзӕн йӕ рухс,13:24 Мф. 24:29; Лк. 21:25.
25 Стъалытӕ хаудзысты арвӕй, ӕмӕ уӕларвон тыхтӕ нынкъуысдзысты.
26 Уӕд Адӕймаджы Фырты фендзысты стыр тых ӕмӕ намысимӕ ӕврӕгътыл ӕрцӕйцӕугӕ.13:26 Мф. 24:30; Ӕрг. 1:7.
27 Рарвитдзӕн зӕдты ӕмӕ Йе ’взӕрстыты ӕрӕмбырд кӕндзӕн алы рӕттӕй – зӕххы кӕронӕй арвы кӕронмӕ.
Фӕсномыг ныхас легъуибӕласы тыххӕй
28 Райсут цӕвиттонӕн легъуибӕлас: йӕ къалиутӕ куы сфӕлмӕн вӕййынц ӕмӕ сыфтӕр куы рафтауынц, уӕд фӕзонут, сӕрд кӕй ӕрӕввахс.
29 Уӕдӕ сымах ӕппӕт уыдӕттӕ ӕххӕстгӕнгӕ куы фенат, уӕд-иу зонут, афон кӕй ӕрӕввахс, ныридӕгӕн къӕсӕрыл кӕй ис, уый.
30 Ӕцӕг уын зӕгъын: ацы фӕлтӕр нӕма аивгъуыйдзӕни, цалынмӕ ӕппӕт уыдӕттӕ ӕрцӕуой.
31 Арв ӕмӕ зӕхх нал уыдзысты, Мӕ ныхӕстӕ та мыггагмӕ дӕр уыдзысты сӕ тыхы.
Хӕдзары хицаумӕ ӕнхъӕлмӕ кӕсгӕйӕ
32 Уыцы боны кӕнӕ сахаты тыххӕй ничи зоны: нӕдӕр уӕларвон зӕдтӕ, нӕдӕр Фырт – ӕрмӕст ӕй Фыд зоны.
33 Цырд лӕуут ӕмӕ фынӕй ма кӕнут, уымӕн ӕмӕ уыцы афон кӕд ӕрцӕудзӕн, уый нӕ зонут.
34 Цӕвиттон, иу лӕг цыди балцы ӕмӕ йӕ хӕдзар ныууагъта йӕ цагъарты ӕвджид, алкӕмӕн дӕр дзы бахӕс кодта бӕлвырд хъуыддаг ӕмӕ дуаргӕсӕн бафӕдзӕхста къӕрцхъусӕй лӕууын.
35 Уӕдӕ сымах дӕр ут къӕрцхъус, уымӕн ӕмӕ нӕ зонут, хӕдзары хицау кӕд ӕрцӕудзӕн, уый: изӕры, ӕмбисӕхсӕв, кӕркуасӕнты ӕви райсомӕй.
36 Ӕваст куы ӕрцӕуа, уӕд уӕ фынӕйӕ цӕмӕй ма ӕрӕййафа.
37 Сымахӕн цы зӕгъын, уый хауы алкӕмӕ дӕр: ут къӕрцхъус».
14Сусӕгвӕнд Йесойы ныхмӕ
1 Дыууӕ боны фӕстӕ хъуамӕ уыдаид Куадзӕны ӕмӕ Донгонд дзулты бӕрӕгбон. Алчертӕ ӕмӕ динамонджытӕ агуырдтой Йесойы хинӕй ӕрцахсыны ӕмӕ Йӕ амарыны фадат.14:1 Мф. 26:2; Лк. 22:1.
2 Ӕмӕ тӕрхӕттӕ кодтой: «Ӕрмӕст бӕрӕгбоны нӕ, науӕд адӕм сызмӕнтдзысты».
Йесойы байсӕрстӕуыди хӕрздӕфгӕнӕнӕй
3 Йесо уыди Вифанийы, хъотырджын Симоны хӕдзары. Ӕмӕ фынгыл куы бадт, уӕд ӕрбацыд иу сылгоймаг, нард цы зайӕгой хонынц, уымӕй ист сыгъдӕг ӕмӕ зынаргъ хӕрздӕфгӕнӕнӕй дзаг дурынимӕ. Сылгоймаг дурыны хъуыр асаста ӕмӕ хӕрздӕфгӕнӕн райдыдта Йесойы сӕрыл уадзын.
4 Иуӕй-иутӕ смӕсты сты ӕмӕ дзырдтой: «Цӕмӕн хъуыди уыйбӕрц хӕрздӕфгӕнӕн хардз кӕнын?
5 Уыди йын ӕртӕсӕдӕ динарӕй фылдӕрыл ауӕйгӕнӕн ӕмӕ ӕхца мӕгуыртӕн раттӕн». Ӕмӕ бустӕ кодтой сылгоймагыл.
6 Фӕлӕ сын Йесо загъта: «Ныууадзут ӕй, цӕмӕн ӕй къӕмдзӕстыг кӕнут? Уый Мын хорз хъуыддаг сарӕзта.
7 Мӕгуыртӕ ӕдзух уӕ фарсмӕ сты, ӕмӕ уӕ куы фӕнда, уӕд сын уӕ бон у баххуыс кӕнын; Ӕз та ӕдзух уемӕ нӕ уыдзынӕн.
8 Сылгоймагӕн йӕ бон цы уыди, уый бакодта: Мӕ баныгӕныны размӕ Мын хӕрздӕфгӕнӕнӕй байсӕрста Мӕ буар.
9 Ӕцӕг уын зӕгъын: фарны уац ӕппӕт дунейы хъуыстгонд кӕмдӕриддӕр уа, уым ацы сылгоймаджы ӕрымысынӕн загъдӕуыдзӕн, цы сарӕзта, уый тыххӕй».
Гадзрахат
10 Уӕд Иудӕ Искариот, дыууадӕс ахуыргӕнинагӕй иу, ацыди алчертӕм, цӕмӕй сын ауӕй кӕна Йесойы.14:10 Мф. 26:14; Лк. 22:4.
11 Куы йӕм байхъуыстой, уӕд бацин кодтой ӕмӕ йын зӕрдӕ бавӕрдтой ӕхцайӕ. Ӕмӕ Иудӕ агуырдта сӕ къухтӕм сын Ӕй раттыны фадат.
Куадзӕны ӕхсӕвӕр
12 Донгонд дзулты бӕрӕгбоны фыццаг бон, Куадзӕны уӕрыкк ӕргӕвдыны бон, Йесойӕн Йӕ ахуыргӕнинӕгтӕ загътой: «Куыд Дӕ фӕнды, кӕдӕм Дын ацӕуӕм Куадзӕны фынг ӕрӕвӕрынмӕ?»14:12 Мф. 26:17; Лк. 22:7.
13 Уый арвыста Йӕ ахуыргӕнинӕгтӕй дыууӕйы ӕмӕ сын загъта: «Ацӕут сахармӕ. Уым уыл сӕмбӕлдзӕн иу адӕймаг доны дурынимӕ, ӕмӕ-иу араст ут йӕ фӕдыл.
14 Кӕдӕм бацӕуа, уыцы хӕдзары хицауӕн-иу зӕгъут: „Ахуыргӕнӕг зӕгъы: Мӕ ахуыргӕнинӕгтимӕ Куадзӕн кӕм бахӕрон, Мӕ уыцы уат кӕм ис?"
15 Ӕмӕ уын уый уӕллаг уӕладзыджы фенын кӕндзӕн стыр ӕфснайд уат; уым-иу нын ӕрӕвӕрут фынг».
16 Ахуыргӕнинӕгтӕ араст сты, бацыдысты сахармӕ ӕмӕ ӕппӕт дӕр ссардтой, Йесо сын куыд загъта, афтӕ; ӕмӕ ӕрӕвӕрдтой Куадзӕны фынг.
17 Куы баизӕр, уӕд Йесо ӕрцыд Йӕ дыууадӕс ахуыргӕнинагимӕ.
18 Ӕмӕ фынгыл куы бадтысты, уӕд Йесо загъта: «Ӕцӕг уын зӕгъын, уӕ иу Мыл рацӕудзӕни гадзрахатӕй – ныртӕккӕ Мемӕ чи хӕры, уый».14:18 Мф. 26:20; Лк. 22:14; Ин. 13:21.
19 Уыдон ӕрӕнкъард сты ӕмӕ Йын иу иннӕйы фӕдыл райдыдтой дзурын: «Уый ӕз уыдзынӕн, мыййаг?»
20 Йесо сын загъта: «Дыууадӕсӕй иу, цӕхдоны Мемӕ йӕ къӕбӕр чи тулы, уый.
21 Адӕймаджы Фырт фӕивгъуыйы, Сыгъдӕг Фыст Дзы куыд зӕгъы, афтӕ. Фӕлӕ сар йӕ сӕр, Адӕймаджы Фыртыл гадзрахатӕй цы адӕймаг рацӕуа, уымӕн. Уыцы адӕймаг фӕлтау куы нӕ райгуырдаид, уӕд ын хуыздӕр уыдаид».
22 Хӕргӕ куы кодтой, уӕд Йесо райста дзул, арфӕ ракодта, асаста йӕ, радта сын ӕй ӕмӕ загъта: «Айсут ӕмӕ хӕрут – уый Мӕ Буар у».14:22 Мф. 26:26; Лк. 22:19; 1 Кор. 11:24.
23 Стӕй райста сӕны кӕхц, арфӕ ракодта, радта сын ӕй, ӕмӕ дзы сеппӕт дӕр банызтой.
24 Ӕмӕ сын загъта: «Уый Мӕ Туг у – уымӕй фидаргонд цӕуы ног фидыд, ӕмӕ акӕлдзӕни бирӕты сӕраппонд.
25 Ӕцӕг уын зӕгъын, нал баназдзынӕн сӕнӕфсиры сӕнӕй, цалынмӕ Хуыцауы Паддзахады ног сӕн баназон, уӕдмӕ».
26 Стӕй азарыдысты арфӕйы зарӕг ӕмӕ ацыдысты Елеоны хохмӕ.
Йесо Петры тыххӕй
27 Йесо сын загъта: «Уеппӕт дӕр Мӕ ныууадздзыстут, уымӕн ӕмӕ Сыгъдӕг Фыст зӕгъы: „Амардзынӕн фыййауы, ӕмӕ фыстӕ ныххӕлиу уыдзысты".14:27 Мф. 26:31; Ин. 16:32.
28 Фӕлӕ Мӕ райгасы фӕстӕ уӕ разӕй ацӕудзынӕн Галилеймӕ».
29 Петр афтӕ бакодта: «Сеппӕт дӕр Дӕ куы ныууадзой, уӕддӕр Дӕ ӕз нӕ ныууадздзынӕн».
30 Йесо йын загъта: «Ӕцӕг дын зӕгъын, ахсӕв уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи».
31 Фӕлӕ Петр ноджы ныфсджындӕрӕй дзырдта: «Демӕ мӕ амӕлын куы бахъӕуа, уӕддӕр Дыл мӕхи нӕ атигъ кӕндзынӕн». Афтӕ дзырдтой иннӕтӕ дӕр.
Йесо кувы Гефсиманийы
32 Уӕд ӕрцыдысты, Гефсимани чи хуынди, уыцы бынатмӕ. Йесо Йӕ ахуыргӕнинӕгтӕн загъта: «Цалынмӕ бакувон, уӕдмӕ уал ам абадут».14:32 Мф. 26:36; Лк. 22:39.
33 Йемӕ ахуыдта Петры, Иаковы ӕмӕ Иоанны, бафтыди мӕлӕтон тасы ӕмӕ райдыдта ӕрхӕндӕг кӕнын.
34 Ӕмӕ сын загъта: «Мӕ уд мӕлӕтон хъынцъым кӕны; фӕлӕуут ам, ма-иу бафынӕй ут».
35 Иучысыл ӕддӕдӕр рацыд, зӕххыл дӕлгоммӕ ӕрхауд ӕмӕ куывта, цӕмӕй, гӕнӕн ӕмӕ амалӕй, ацы тухӕн ма бавзара:
36 «Аввӕ, Мӕ Фыд, ӕппӕт дӕр у Дӕ бон. Ацы хъизӕмӕртты кӕхц Мын ма бадар. Ӕниу, Мӕн куыд фӕнды, афтӕ нӕ, фӕлӕ Дӕу куыд фӕнды, афтӕ фӕуӕд».14:36 Мф. 26:39; Флп. 2:8.
37 Йесо бацыд Йӕ ахуыргӕнинӕгтӕм, ӕмӕ сӕ фынӕйӕ куы баййӕфта, уӕд Петрӕн загъта: «Симон, фынӕй дӕ? Ӕнӕ фынӕйӕ иу сахат нӕ бафӕрӕзтай?
38 Ма ныффынӕй ут ӕмӕ кувут, цӕмӕй фӕлварӕны ма бахауат. Уд цӕрдӕг у, буар та – ӕдых».
39 Ногӕй та фӕхибар ӕмӕ бакуывта, уымӕй размӕ куыд куывта, афтӕ.
40 Бацыди сӕм ӕмӕ та сӕ баййӕфта фынӕйӕ, уымӕн ӕмӕ сӕ цӕстытӕ ӕруӕззау сты, ӕмӕ Йын цы дзуапп раттаиккой, уый нӕ зыдтой.
41 Бацыди сӕм ӕртыккаг хатт дӕр, ӕмӕ сын загъта: «Ныр дӕр ма фынӕй кӕнут ӕмӕ уӕ фӕллад уадзут? Ӕгъгъӕд у, ӕрцыди рӕстӕг. Мӕнӕ Адӕймаджы Фырт лӕвӕрд цӕуы тӕригъӕдджынты къухтӕм.
42 Сыстут ӕмӕ цӕуӕм. Мӕнӕ Мӕ уӕйгӕнӕг ӕрбаввахс».
Йесойы ӕрцахстой
43 Йесо Йӕ ныхас нӕма фӕци, афтӕ ӕрбацыд Иудӕ, дыууадӕс ахуыргӕнинагӕй иу. Алчертӕ, динамонджытӕ ӕмӕ йын адӕмы хистӕртӕ йемӕ рарвыстой бирӕ адӕм кӕрдтӕ ӕмӕ хъилтимӕ.14:43 Мф. 26:47; Лк. 22:47; Ин. 18:3.
44 Йесойы уӕйгӕнӕг сын радта ахӕм нысан: «Кӕмӕн аба кӕнон, Уый у. Ӕрцахсут Ӕй, акӕнут Ӕй ӕмӕ Йӕ уӕгъд ма суадзут».
45 Ӕмӕ куыддӕр ӕрбахӕццӕ, афтӕ бацыд Йесомӕ ӕмӕ Йын загъта: «Равви!» Ӕмӕ Йын аба кодта.
46 Уӕд фӕлӕбурдтой Йесомӕ ӕмӕ Йӕ ӕрцахстой.
47 Йемӕ чи лӕууыд, уыдонӕй иу фелвӕста кард, ныццавта дзы алчеры цагъары ӕмӕ йын йӕ хъус ахауын кодта.
48 Уӕд Йесо адӕмӕн загъта: «Цыма абырӕджы ахсут, уыйау Ме ’рцахсынмӕ кӕрдтӕ ӕмӕ хъилтимӕ куы рацыдыстут.
49 Ӕз ӕрвылбон Кувӕндоны уемӕ уыдтӕн, ахуыр кодтон адӕмы, ӕмӕ Мӕ нӕ ахстат. Фӕлӕ Сыгъдӕг Фыст цы зӕгъы, уый хъуамӕ сӕххӕст уа».
50 Уӕд Ӕй ахуыргӕнинӕгтӕ сеппӕт дӕр ныууагътой ӕмӕ фӕлыгъдысты.
51 Иу ӕрыгон лӕппу, йӕ бӕгънӕг буарыл хъуымац тыхт, афтӕмӕй цыд Йӕ фӕдыл, ӕмӕ йӕ ӕфсӕддонтӕ ӕрцахстой.
52 Фӕлӕ сын лӕппу хъуымац сӕ къухы фӕуагъта ӕмӕ бӕгънӕгӕй алыгъд.
Йесо – синедрионы
53 Йесойы акодтой алчермӕ. Уым ӕрӕмбырд сты алчертӕ, адӕмы хистӕртӕ ӕмӕ динамонджытӕ иууылдӕр.
54 Петр дӕрддзӕф цыди Йӕ фӕдыл ӕмӕ бацыд алчеры кӕртмӕ. Уым ӕрбадти хъахъхъӕнджытимӕ ӕмӕ йӕхи тавта артмӕ.
55 Алчертӕ ӕмӕ ӕппӕт синедрион Йесойы ныхмӕ агуырдтой ӕвдисӕйнӕгтӕ, цӕмӕй Йын рахӕссой амарыны тӕрхон, фӕлӕ нӕ ардтой.14:55 Мф. 26:59.
56 Бирӕтӕ лӕууыдысты мӕнгӕвдисӕн Йӕ ныхмӕ, фӕлӕ цы дзырдтой, уый сын кӕрӕдзийыл нӕ бадт.
57 Цалдӕр мӕнгӕвдисӕны сыстадысты ӕмӕ дзырдтой Йӕ ныхмӕ:
58 «Мах фехъуыстам, цы дзырдта, уый: „Ӕз фехалдзынӕн лӕджыкъухӕйконд ацы Кувӕндон ӕмӕ ӕртӕ бонмӕ сараздзынӕн ӕндӕр, лӕджыкъухӕйконд чи нӕу, ахӕм"».
59 Фӕлӕ уыдонӕн дӕр се ’вдисӕйнӕгтӕ кӕрӕдзийыл нӕ бадтысты.
60 Уӕд алчер размӕ ралӕууыд ӕмӕ бафарста Йесойы: «Дӕ ныхмӕ Дын цы ӕвдисӕнтӕ хӕссынц, уыдонӕн ницы дзуапп дӕттыс?»
61 Йесо ныхъхъус ӕмӕ ницы дзуапп лӕвӕрдта. Алчер Ӕй ногӕй бафарста: «Ды дӕ Чырысти, Арфӕгонды Фырт?»
62 Йесо загъта: «Ӕз дӕн. Ӕмӕ Адӕймаджы Фырты уындзыстут Ӕппӕтхъомысы рахиз фарс бадгӕ ӕмӕ уӕларвон ӕврӕгътыл ӕрцӕйцӕугӕ».14:62 Мф. 26:64; 2 Фес. 1:10.
63 Уӕд алчер арӕмыгъта йӕ дарӕс ӕмӕ загъта: «Цӕй ӕвдисӕнтӕ ма нӕ хъӕуы?
64 Сымах фехъуыстат, Хуыцауы куыд фауы, уый. Цы хъуыды уӕм ис?» Сеппӕт дӕр Ӕй банымадтой аххосджыныл ӕмӕ амарыны аккагыл.
65 Уӕд Ыл иуӕй-иутӕ райдыдтой тутӕ кӕнын, бамбӕрзтой-иу Ын Йӕ цӕсгом, цавтой Йӕ ӕмӕ Йын дзырдтой: «Кӕд пехуымпар дӕ, уӕд Дӕ чи ныццавта, уый базон». Дзӕхстытӕ Йӕ кодтой хъахъхъӕнджытӕ дӕр.
Петр йӕхи атигъ кодта Йесойыл
66 Ныр Петр та уыди бынӕй, кӕрты. Уырдӕм ӕрбацыд алчеры лӕггадгӕнӕг сылгоймӕгтӕй иу,14:66 Мф. 26:69; Лк. 22:56; Ин. 18:25.
67 Петры федта йӕхи артмӕ тавгӕ, ӕдзынӕг ӕм ныккаст, ӕмӕ йын загъта: «Ды дӕр Назаретаг Йесоимӕ уыдтӕ».
68 Фӕлӕ Йыл Петр атигъ кодта йӕхи: «Цы дзурыс, уый нӕ зонын ӕмӕ не ’мбарын». Петр рацыд ӕддаг кӕртмӕ, ӕмӕ уасӕг ныууасыд.
69 Лӕггадгӕнӕг сылгоймаг та йӕ федта уым дӕр, ӕмӕ йӕ фарсмӕ лӕуджытӕн дзурын райдыдта: «Ай уыдонӕй у».
70 Петр та Йесойыл атигъ кодта йӕхи. Уым чи лӕууыд, уыдон дӕр чысыл фӕстӕдӕр загътой Петрӕн: «Ӕнӕмӕнг уыдонӕй дӕ, уымӕн ӕмӕ ды дӕр галилейаг дӕ. [Де ’взаджы здӕхт дыл комдзог цӕуы.]»
71 Уый райдыдта ард хӕрын ӕмӕ Хуыцауӕй сомы кӕнын: «Сымах Кӕмӕй зӕгъут, ӕз уыцы Адӕймаджы нӕ зонын».
72 Ӕмӕ уыйадыл уасӕг ныууасыди дыккаг хатт. Ӕмӕ Петр ӕрымысыд, Йесо йын цы загъта, уый: «Уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». Ӕмӕ райдыдта кӕуын.14:72 Мф. 26:75; Мк. 14:30.
15Йесо ӕмӕ Пилат
1 Куыддӕр сбон, афтӕ алчертӕ, адӕмы хистӕртӕ, динамонджытӕ ӕмӕ ӕппӕт синедрион рахастой уынаффӕ. Йесойы сбастой, акодтой Йӕ ӕмӕ Йӕ радтой Пилаты къухтӕм.15:1 Мф. 27:1-2; Лк. 22:66.
2 Пилат Ӕй бафарста: «Ды дӕ иудейаг Паддзах?» Йесо йын дзуапп радта: «Дӕхӕдӕг ӕй куы зӕгъыс».
3 Ӕмӕ Йӕ алчертӕ зылын кодтой бирӕ хъуыддӕгты.
4 Пилат та Йӕ бафарста: «Ницы дзуапп дӕттыс? Уыныс, куыд бирӕ азым Дӕм хӕссынц».
5 Фӕлӕ йын Йесо дзуапп нал радта, ӕмӕ Пилат дисы бафтыд.
Марыны тӕрхон
6 Пилат-иу бӕрӕгбоны рауагъта, адӕм кӕй куырдтой, иу ахӕм ахӕсты.
7 Уӕд ахӕстоны уыд иучидӕр, йӕ ном – Вараввӕ; бадти, змӕсты рӕстӕг туг чи ныккалдта, уыцы змӕнтджытимӕ.
8 Адӕм ӕрӕмбырд сты ӕмӕ Пилатӕй райдыдтой курын, цӕмӕй та ацы хатт дӕр сараза, куыд-иу сын кодта, афтӕ.
9 Уый сын загъта: «Фӕнды уӕ, цӕмӕй уын иудейаг Паддзахы рауадзон?»
10 Пилат зыдта, алчертӕ йын Йесойы йӕ къухтӕм сӕ хӕлӕгӕй кӕй радтой, уый.
11 Фӕлӕ алчертӕ сардыдтой адӕмы, Вараввӕйы сын рауадзыныл куыд дзурой, афтӕ.15:11 Мф. 27:20; Лк. 23:18; Ин. 18:40.
12 Пилат сын ногӕй загъта: «Уӕдӕ сымах иудейаг Паддзах Кӕй хонут, Уымӕн та цы бакӕнон?»
13 Уӕд уыдон ныхъхъӕр кодтой: «Байтындз Ӕй!»
14 Пилат сын загъта: «Уагӕр ӕвзӕрӕй цы ракодта?» Фӕлӕ уыдон ноджы тынгдӕр ныхъхъӕр кодтой: «Байтындз Ӕй!»
15 Пилаты фӕндыд адӕмы зӕрдӕ балхӕнын, ӕмӕ сын рауагъта Вараввӕйы, Йесойы та ехсӕй фӕнӕмын кодта ӕмӕ Йӕ радта дзуарыл байтындзынмӕ.15:15 Мф. 27:26; Ин. 19:1.
Ӕфсӕддонтӕ ӕфхӕрынц Йесойы
16 Ӕфсӕддонтӕ Йесойы акодтой бӕстӕйы хицауы галуаны мидӕггаг кӕртмӕ, ӕмӕ ӕрӕмбырд кодтой ӕгас ӕфсӕддон хай.
17 Скодтой Йыл сӕнтсырх дарӕс, сбыдтой сындзын кадыхуд ӕмӕ Йыл ӕй ӕркодтой.
18 Ӕмӕ Йын райдыдтой арфӕ кӕнын: «Ӕгас цӕуӕд иудейаг Паддзах!»
19 Йӕ сӕр Ын цавтой лӕдзӕгӕй, тутӕ Йыл кодтой, Йӕ разы-иу ӕрлӕууыдысты сӕ зонгуытыл ӕмӕ Йын куывтой.
20 Куы Йӕ бафхӕрдтой, уӕд сӕнтсырх дарӕс раластой, скодтой Йыл Йӕхи дарӕс ӕмӕ Йӕ акодтой байтындзынмӕ.
Йесойы байтыгътой
21 Уыцы рӕстӕг фӕссахарӕй ӕрбацӕйцыд иу кириниаг лӕг Симон, Александр ӕмӕ Руфы фыд; ӕмӕ йын ахӕссын кодтой Йесойы дзуар.15:21 Мф. 27:32; Лк. 23:26.
22 Йесойы ӕркодтой, Голгофӕ (ома, Сӕргӕхцы бынат) чи хуыйны, уырдӕм.
23 Ӕмӕ Йын лӕвӕрдтой сӕн смирнӕимӕ хӕццӕйӕ, фӕлӕ йӕ Йесо нӕ бакуымдта.
24 Дзуарыл Ӕй байтыгътой, ӕмӕ Йын Йӕ дарӕстыл ӕппӕрстой хӕлттӕ, кӕмӕ дзы цы ӕрхауа, ууыл, ӕмӕ сӕ се ’хсӕн байуӕрстой.15:24 Ин. 19:24.
25 Куы Йӕ байтыгътой, уӕд цыди ӕртыккаг сахат+ 15:25 Сахӕттӕ амынд сты рагон нымадӕй (кӕс дзырдуаты). .
26 Йӕ азымы тыххӕй фыст уыди фӕйнӕгыл: «Иудейаг Паддзах».
27 Йемӕ Йын байтыгътой дыууӕ абырӕджы, иуы Йӕ рахиз фарс, иннӕйы та Йӕ галиу фарс.
28 [Ӕмӕ сӕххӕст, Сыгъдӕг Фыст цы зӕгъы, уый: «Фыдгӕнджыты хыгъдмӕ Йӕ бахастӕуыд».]
29 Йӕ цурты чи цыди, уыдон тылдтой сӕ сӕртӕ ӕмӕ Йӕ фаудтой: «Гъей, Кувӕндон халӕг ӕмӕ йӕ ӕртӕ бонмӕ аразӕг!15:29 Мф. 26:61; 27:40; Мк. 14:58; Лк. 22:37; Ин. 2:19.
30 Дӕхи фервӕзын кӕн – дзуарӕй ӕрхиз».
31 Афтӕ Дзы хынджылӕг кодтой алчертӕ дӕр динамонджытимӕ, ӕмӕ кӕрӕдзийӕн дзырдтой: «Иннӕты ирвӕзын кодта, Йӕхи фервӕзын кӕнын та Йӕ бон нӕу!
32 Чырысти, Израилы Паддзах, ныр дзуарӕй ӕрхизӕд, цӕмӕй йӕ фенӕм нӕхи цӕстӕй ӕмӕ Йыл баууӕндӕм». Йемӕ тыгъд чи уыд, уыдон дӕр Ӕй фаудтой.
Йесойы мӕлӕт
33 Ӕхсӕзӕм сахат куы ралӕууыд, уӕд бӕстӕ ӕгасӕй дӕр баталынг, ӕмӕ афтӕ ахаста фарӕстӕм сахаты онг.
34 Фарӕстӕм сахатыл Йесо хъӕрӕй ныууынӕргъыдта: «Элои, Элои, лема сабахтани?» Ома: «Мӕ Хуыцау, Мӕ Хуыцау, цӕмӕн Мӕ ныууагътай?»15:34 Мф. 27:46.
35 Уым чи лӕууыд, уыдонӕй чидӕртӕ уый фехъуыстой ӕмӕ дзырдтой: «Илиамӕ дзуры».
36 Иучидӕр та азгъордта, губкӕ стылдта туаг сӕны ӕмӕ йӕ ӕрсагъта лӕдзӕгыл. Баназынмӕ Йӕм ӕй бадардта ӕмӕ загъта: «Фӕлӕуут-ма, бакӕсӕм, кӕддӕра Илиа ӕрцӕуид дзуарӕй Йӕ ӕрисынмӕ».
37 Йесо та хъӕрӕй ныууынӕргъыдта ӕмӕ Йӕ уд систа.
38 Ӕмӕ Кувӕндоны мидӕг ӕмбӕрзӕн дыууӕ дихы фӕци уӕлейӕ бынмӕ.
39 Йесо хъӕрӕй куыд ныууынӕргъыдта ӕмӕ Йӕ уд куыд систа, уый Йӕ разы лӕууӕг сӕдӕйыхицау куы федта, уӕд загъта: «Ацы Адӕймаг ӕцӕгӕй Хуыцауы Фырт уыди».
40 Уым уыдысты ӕмӕ дӕрддзӕфӕй кастысты сылгоймӕгтӕ дӕр; уыдонимӕ – магдалӕйаг Мариа, кӕстӕр Иаковы ӕмӕ Иосийы мад Мариа, стӕй Саломи.
41 Ацы сылгоймӕгтӕ цыдысты Йӕ фӕдыл ӕмӕ Йын лӕггад кодтой, Йесо ма Галилейы куы уыди, уӕд. Уыди ма дзы, Иерусалиммӕ Йемӕ чи ӕрцыд, бирӕ ахӕм сылгоймӕгтӕ дӕр.
Йесойы баныгӕдтой
42 Ныридӕгӕн баизӕр, ӕмӕ майрӕмбон кӕй уыд – сабатмӕ цӕттӕ кӕныны бон, –
43 Уымӕ гӕсгӕ синедрионы дзырддзӕугӕ уӕнг, аримафейаг Иосиф (уый дӕр Хуыцауы Паддзахадмӕ ӕнхъӕлмӕ каст), йӕ ныфс бахаста Пилатмӕ бацӕуынмӕ ӕмӕ Йесойы мард ракурынмӕ.15:43 Лк. 23:50; Ин. 19:38.
44 Йесо ныридӕгӕн кӕй амарди, уый Пилатмӕ диссаг фӕкаст, басидт сӕдӕйыхицаумӕ ӕмӕ йӕ бафарста: «Раджы амард?»
45 Ӕмӕ сӕдӕйыхицауӕй хабар куы базыдта, уӕд Йесойы мард раттын кодта Иосифӕн.
46 Иосиф балхӕдта уӕздан кӕттаг, ӕриста Йесойы, батыхта Йӕ кӕттаджы ӕмӕ Йӕ бавӕрдта, къӕдзӕхы цы зӕппадз къахт уыди, уым; ӕмӕ йын йӕ бацӕуӕныл бафӕлдӕхта дур.
47 Магдалӕйаг Мариа ӕмӕ Иосийы мад Мариа уыдтой, кӕм Ӕй бавӕрдтой, уый.
16Чырысти райгас
1 Сабат куы аивгъуыдта, уӕд магдалӕйаг Мариа, Иаковы мад Мариа ӕмӕ Саломи балхӕдтой хӕрздӕфгӕнӕнтӕ, цӕмӕй ацӕуой ӕмӕ байсӕрдой Йесойы.16:1 Мф. 28:1; Лк. 24:1; Ин. 20:1.
2 Ӕмӕ къуырийӕн йӕ фыццаг бон, сӕумӕйӕ, хур куыддӕр скаст, афтӕ ӕрцыдысты зӕппадзмӕ.
3 Кӕрӕдзийӕн дзырдтой: «Зӕппадзмӕ бацӕуӕнӕй нын дур чи афӕлдахдзӕн?»
4 Фӕлӕ куы бакастысты, уӕд ӕй федтой фӕлдӕхтӕй; дур тынг стыр уыди.
5 Зӕппадзмӕ куы бацыдысты, уӕд уым федтой урс дарӕсджын лӕппуйы рахизырдыгӕй бадгӕ; ӕмӕ фӕтарстысты.
6 Фӕлӕ сын уый загъта: «Ма тӕрсут. Дзуарыл тыгъд Назаретаг Йесойы агурут сымах – ам нӕй, райгас и. Мӕнӕ, кӕм Ӕй бавӕрдтой, уыцы бынат.
7 Фӕлӕ ацӕут, зӕгъут Ын Йӕ ахуыргӕнинӕгтӕн ӕмӕ Петрӕн, уӕ разӕй цӕуы Галилеймӕ, зӕгъгӕ. Уым Ӕй фендзыстут, куыд уын загъта, афтӕ».16:7 Мф. 26:32; Мк. 14:28.
8 Сылгоймӕгтӕ рацыдысты зӕппадзӕй ӕмӕ згъорынмӕ фесты. Фыртӕссӕй сӕхи дӕр нал ӕмбӕрстой ӕмӕ никӕмӕн ницы загътой, уымӕн ӕмӕ сӕ тас бацыд.
Йесойы фӕзынд ахуыргӕнинӕгтӕм
9 [Къуырийӕн йӕ фыццаг бон, сӕумӕраджы, Йесо куы райгас, уӕд фыццаг фӕзынд, авд дӕлимоны кӕмӕй расырдта, уыцы магдалӕйаг Мариамӕ.16:9 Мф. 28:9; Лк. 8:2; Ин. 20:14.
10 Мариа ацыд ӕмӕ хабар радзырдта, раздӕр Йесоимӕ чи уыд, ныр та кӕугӕ ӕмӕ ӕрдиаг чи кодта, уыдонӕн.
11 Фӕлӕ Йесо кӕй райгас ӕмӕ Йӕ Мариа кӕй федта, уый куы фехъуыстой, уӕд сӕ нӕ бауырныдта.
12 Уый фӕстӕ уыдонӕй дыууӕ хъӕумӕ куы фӕцӕйцыдысты, уӕд сӕм Йесо Йӕхи равдыста ӕндӕр хуызы.
13 Уыдон раздӕхтысты ӕмӕ уый тыххӕй радзырдтой иннӕтӕн дӕр. Фӕлӕ адоныл дӕр нӕ баууӕндыдысты.
14 Ӕппынфӕстаг Йесо фӕзынд иуӕндӕс ахуыргӕнинагмӕ, фынгыл куы бадтысты, уӕд. Ӕмӕ сын уайдзӕф кодта, уырнындзинад сӕм кӕй нӕ уыди, сӕ зӕрдӕтӕ ӕхгӕд кӕй разындысты ӕмӕ, Йӕ райгасы фӕстӕ Йӕ чи федта, уыдоныл кӕй нӕ баууӕндыдысты, уый тыххӕй.
15 Йесо сын загъта: «Ӕрзилут ӕгас дунейыл ӕмӕ хъусын кӕнут фарны уац ӕппӕт адӕмӕн.16:15 Мф. 28:19; Ин. 15:16.
16 Чи баууӕнда ӕмӕ кӕуыл саргъуыдӕуа, уый фервӕздзӕни; чи нӕ баууӕнда, уый та уыдзӕни тӕрхонгонд.
17 Уырнджытӕ та ӕвдисдзысты ахӕм диссӕгтӕ: Мӕ номӕй сурдзысты дӕлимонты, дзурдзысты ног ӕвзӕгтыл,
18 Сӕ къухтӕм исдзысты кӕлмытӕ, марг куы баназой, уӕд сын ницы уыдзӕн; рынчынтыл ӕвӕрдзысты сӕ къухтӕ, ӕмӕ-иу уыдон сдзӕбӕх уыдзысты».16:18 Лк. 10:19; Ап. хъ. 28:8; Иак. 5:14.
19 Семӕ фӕныхас кӕныны фӕстӕ Йесойы систӕуыд уӕларвмӕ, ӕмӕ ӕрбадти Хуыцауы рахиз фарс.16:19 Лк. 24:51.
20 Ахуыргӕнинӕгтӕ ацыдысты ӕмӕ алы ран дӕр хъусын кодтой фарны уац. Хицау сын ӕххуыс кодта ӕмӕ, сӕ ныхас раст кӕй у, уый ӕвдыста, Йӕ фӕрцы кӕй арӕзтӕуыд, уыцы диссӕгтӕй.]