Jona

Ahi

¹Gareana lawe na tangaloi nge hilogo hi

dige tea lo tovotovo nora tangaloi esi,

me he labe tea lo nora turegi rau esi,

siu he toga tea lo herera tangaloi vaivei lolohaga Huqe.

²Nge mo havusie gena leo noi Huqe

me mo ladolado lolo nona tamwata vataha na rani me lolo bongi.

³Nge mwere na gai ram rivuana lo mwararai matamata

nge hilogo lo tarona mo mwasigi a raune rain soi tea,

me nge mo maraga lo gineu doluegi nge mo vaire.

⁴Hate mwere na tangaloi esi

mwere na bembei tovu ngere hilogo a langi mo heregi vohoginire.

⁵Siu i Huqe vin veveginire tangaloi esi rain vurogi

me vin vile wahera tangaloi galegale asi dena bubugiana nora tangaloi vovohoi.

⁶Huri Huqe u ilo na turegire tangaloi vovohoi,

nge a tangaloi esi mo huri na turegi mateana.

¹?Huri havagi a vanue dolue ram lalangogi huri vena ra vai gineu esi?

?Huri havagi tangaloi a nora lalangogi mo toa vurogi?

²Ratahigi tau lo ure ram labe ram rarai ve ra qalo mei Huqe.

Ngere ram vile bubugi ram tovotovo asi vovoi Huqe mena na nona tangaloi vagatai.

³Ngere ram veve vena, “Ginde da lai vohogi na garovauveu

me da tuli vohogi na garo ngere denire.”

⁴Nge mo toga lolo taetae mo mana,

me i Huqe mo vaivei lolohaga meire.

⁵Siu nge mo veve vohoginire me na nona loloasi,

mena nona lolobute mo vaire ram matagu.

⁶Siu nau teu na Nongu ratahigi me lui Saeon

a Nongu vusi gogona.

⁷Ratahigi move, “Neu nain toregi na leo noi Huqe.

Nge mo veve laweau move,

‘Nigo i netungu mwere!

Bagataha nam voragi tamamu.

⁸Tareve goin hui deni eu, me neu nain bete lawego a nomu vanue,

mena nom sinobu vin dadari lo duvin ureure.

⁹Goin vei vurivurire, gena ruqi aean

me goin momogagi nire mwere na sosovene tano.’”

¹⁰Siu i gimiu ratahigi nein iloe.

Nein leohuri, gimiu tangaloi leogoro talo ure.

¹¹Go tabana nona Huqe mena londo mava,

rongarea mena matagute.

¹²Go lai tabe tabegi na maresu mwera vaiteu

mo mero mo vai asisigi nigo huri mo mero u siseri.

Gareana lawera hi ramo betubetu lune.

Tomtomuei Ahi. Mena bue gerigeri mena bue gerigeri garo gai welu. Ahi noi Devet.

¹Huqe lolo nomu lolobute go mese veve vohogi eu sige

lolo nom meroana go mese haharau.

²Huqe go haharagi na gareana lawe au huri neu nam wiriwiri,

Huqe go vaga vagamwasoi eu huri a hui gu ram rurururu.

³Me neu gaheau, nam romasi liu.

?Nge nigo Huqe goin bului eu tagaha?

⁴Huqe gon tudori gon bului eu.

Me lo nom hahagavi vagitue gon vaga vagamwasoi eu.

⁵Huri lolo mateana a tangaloi vin lado bibigo tea.

?Me hine lolo qaru vin ware hagegi nigo?

⁶Neu nam wiriwiri gena nongu ngarana;

Mena nongu tinengi nam vaga bibilugi na heregu

mena qanagu lolo bongi gena nongu tingeni.

⁷Mataku mo dodo gena romasi,

Me a matagu mo asi gena nongu tavului vuro.

⁸Nen vano den eu gimiu doluegi nem vai gineu rau esi vohogi,

huri Huqe mo rongo na nongu ngarana.

⁹A Huqe nge u rongo na nongu ngarana huri na hahagavi,

siu i Huqe vin duvi na nongu tataro.

¹⁰Nongu tavalui vuro doluegi rain matagu lawuagi,

me rain maemae rain toa dori siseri deni eu siu rain maemae.

Ahi noi Devet.

¹A Huqe nge a nongu leo goro garea,

neu nain he mahogi tea.

²Mo vai eu nam eno lolo ute lombu,

me mo tomuegi eu lo mwararai wai matamata.

³Mo vurugegi na nongu mwasoana,

me mo tomuegi eu sulo turegi vovohoiana huri na henana.

⁴Hate huri nain dige turu na dodo,

a waluwelui asiana nain matagu tea gena gineu esi,

huri nigo mei eu;

a nom ruqi mena gaitigo ngere a gai turegu.

⁵Gom rarai na hinaga

lo nagoi nongu tavului vuro,

gom lai gogogi eu

me a nongu laha mo horo mwalinglingi.

⁶A hogo liu, a nom gareana me nom vaigarea vin huri eu vataha

na rani nongu mwasoana

me neu nain toga lolo valei Huqe

vagituei.

Ahi noi Devet huri na vai gogonagi na Sara Gogona.

¹Nain tabe hagegi nigo gena roroa, Huqe,

huri gu ragasi eu dena walu,

me gohi mesingegi tea ve nongu tavalui vuro ve rain rongarea gieu.

²Nongu Huqe Mauri,

nam warego huri na buluiana,

siu nigo gu vagamwasoi eu.

³Huqe, gu ragasi eu dena qarui mateana.

Gu dedegi na nongu mwasoana, hi hivo tea lolo walu.

⁴Gimiu nona tangaloi gogona nein galohagi na Huqe,

me nein bete na harigiana lawe na henana u gogona.

⁵Huri a nona meroana mo eno mahogi biti,

nge a nona leogareagi nigo mo eno tuqaravu,

tangiana vin eno lai bongi gategale,

nge lolo robongi a rongarea.

⁶Tavohe nongu tutugoro mo eno, nam veve vena,

“Neu nain he gilu tea.”

⁷O Huqe, tavohe gom leogareagi eu

gom vai na vusigu mo labe siaga;

nge tavohe gom hiligi na nagomu

nau ruru gena matagute.

⁸O Huqe, neu nau warego;

Lawego Huqe, neu nau ngara huri na hahagavi.

⁹?Hava lalaie nge talehe tare vena neu nau mate?

?Neu nam soi silolo walu siu?

?A qie vin galohagi nigo?

?I nge vin toregi na nom garohuri?

¹⁰O Huqe, go rongo au me go hagavi eu,

me O Huqe, go vuragi na buluigu.

¹¹Nigo gu dori na nongu tangiana silo hawana.

Nigo gu lei vohogi na luqegu a luqe asi

siu gom luqegi eu gena hahavusiana.

¹²Huri ve a lologu na huri ehi lawego,

siu neu na mese toga maunegi.

Nongu Huqe Mauri,

neu nain ware hagegi nigo tavagi tuei.

A ahi noi Devet. A tomtomuei buegerigeri. I tangaloi leo ligoligogi Natan, u vumai lobena, lo tagugi i Devet u vei na doridori esi mei Batsiba.

¹Huqe Mauri go hagavi eu na huri na nomu vaigarea lawua

huri na nongu doridori esi.

Lo nomu hahagavi gon lai vohogi

na nongu asiana.

²Gon solo vohogi na nongu asiana doluegi,

me go vagahagi eu dena na bugungu doluegi.

³Ba huri nau ilo na nongu doridori esi mei eu,

siu a bugungu mo eno mei eu vataha na tarogi.

⁴Siu nigo hogosie nau vagasile vovohigo

me nau vei na gineu esi lolo matamu.

Tavohe gom lanqa, u vovohoi,

me tavohe gom vevegi na tangaloi u vovohoi.

⁵A hogo nau vora lolo asiana siu neu

a nongu galegale asi lungu tavohe i retahigu mo tinogi eu

⁶Gu tarave na hogo lolo loloi tangaloi,

me gu huhui eu gena lolorani lolo buloi dimwangogu.

⁷Vagahagi eu gena digugu51.7 Hisob a rivurivu dam vuie lolo dai. Mo tuliana lo gineu sige tangaloi, mo gogonagi nire me mo solo vohogi bugure. me neu nain mwasara,

solo vohogi na nongu asiana me neu nain mevute vin liu na vire hi a wagahiata.

⁸Vai eu na rongarea me na havuhevu.

Siregi na hui gu momogagi nire ra havuhevu.

⁹Vunigi na nagomu dena nongu asiana

me go hara vohogi na nongu doridori esi doluegi.

¹⁰O Huqe Mauri, go vai na lolo lolongu, a dimwango mwasara,

me go vai na tanumwe garaqa huire lolo lolongu.

¹¹Mese tuli vohogi eu denigo,

me go mese lai vohogi na nom Tanumwe Gogona deni eu.

¹²Gon bete muleagi lawe au a hahavusi na nom vaga mwasoana,

me gon bete na nom tanumwei tabetabe na gaiture au.

¹³Siu neu nain huhui na tangaloi esi kena nom leo

me ngere rain tudori su lobemu.

¹⁴O Huqe Mauri, Huqe Mauri nigo nongu vagamwasoi,

go vagamwasoi eu dena dai,

siu neu nain huri na ahi hahavusiana

huri na nomu vovohoiana.

¹⁵Huqe, go tagahi na singogu

siu a wawagu vin ware hagegi na henamu.

¹⁶Huri nigo gom rahagi na bulengu kankarue nam hogohogo lawego,

siu nigo goin hevuhevu tea lo nongu hure bonboni.

¹⁷A hogohogo, O Huqe Mauri, a tanumwegi u mevurivuri

me a dimwangona mo hahagavi.

O Huqe Mauri, go mese tudori denie.

¹⁸Go vai na gineu garea lawe na Saeon; mwerehi gom taranie.

Go hagovi na qetuqetu goro na Jerusalem.

¹⁹Siu a hogohogo rau vovohoi,

a hure bonboni bulugi dodoluegi vin veigo goin hevuhevu,

me a bulugi boegi doluegi rain hureana lo nom vonda gogona.

A ahi na veve garea.

¹Galohagi na Huqe, mena hahavusiana,

dali na ure.

²Galohagi na Huqe, mena hahavusiana;

nein vumai lo nagona mena ahi hahavusiana.

³Nei ilo huri ve i Huqe, nge i Huqe Mauri;

nge u vei ginde

me ginde a nona,

ginde nona tangaloi

me a nona buri sibsib nge vin leohuri ginde lo tanona.

⁴Ahu turu na nona matai ara mena veve garea,

me nen ware roroagi nie lolo sarana.

Nen garea hurie

me nen vaga roroagi na henana.

⁵Huri a Huqe, nge u garea lawuagi

me a nona vaigarea vin eno randu,

a nona garohuri vin eno duruhi

na babagi doluegi vin tuei.