Gaidumu
5Mese Vaivei Esi Mena Vavine
1Netungu mwera go rorontagi na nogu lolorani me gon ronghuri na nogu leoi gaidumu. 2Huri nigo gon leohuri na dorimu me a singomu vin wiribibi na iloiloi. 3Huri a singoi vavine, gaihora i tangaloi dolue u lulumu mwere na tovu me a nona leo u minu dena vurei. 4Nge lo tagugi a vavine u gogona mwere na ngoli sala u magegeni mwere na buei vuro hogogi gairue. 5Nge vin tomuegi nigo talo ingwei mateana me nge mo dige lo turegi mateana. 6Nge u geluvegi na turegi mwasoana siu, nge a turegine rau tatagi he iloe tea ve u beragi dena turegi vovohoi.
7Siu renetugu mwera, siserigi ngaha nein rorontagi eu; nein mese beragi nge nen lado bibi na nogu leo. 8Nei huri na turegi vagahao dena vavine ngehi, nei mese vano gangarani lobei matai turegi valena. 9Tarave goin vei mwere ngaha, vatevai gom bete na nom huireana lawe na tangaloi wagineu me nom mwasoana lawe na tangaloi esi. 10Vatevai a tangaloi wagineu ram lai vohogi na nom hagogineu me ram ratahigi lo valera lo nom gagarasi. 11Tavohe gom sesea goi eno lo heremu gom rave, betumu vin soi a huimu vin eno vurogi. 12?Goi tugutugu, huri havai nau leo masi vena ran tau vovohoigi eu? Siu goi veve, “?Huri havai nam rao ve tangaloi na vovohoigi eu? 13Tuei nai ronghuri na nogu huhui tea, na he taran tea tamwere vena rongohurire. 14Me siserigi ngaha, nai hili lai tea huri a sinobu rau iloau beno, siu mo vaieu nam maemae lawuagi lo nagoi sinobu.”
15Go inu na wai dena nom tungu sibomu, a wai meuri mo hale dena loloi nom tungu. 16Tareve a vavine dolue vin bamba netumu varea, a roromu mena henamu vinhe garea tea. 17Siu, he garea tea huri ve goi teu na maresu sao lo turegi, nge go tau na maresu na sao lo valemu sibomu, huri rain gogo gorogo me rain bului go. 18Nomu bubugiana mei gaihoramu na roroa, me vataha tarogi goin hevuhevu huri gom bulu meie lolo mwalagelo. 19Ngeie a memu tovu lulumu mwere na bebe mo vaihuri na waigarea u rerega; nona vaigarea vin vei gareagi nigo vin tuei me a domine vin veuhi bibigo tuqaravu. 20Netungu mwera, go mese lenga hurie dolue, siu go mese lado ve a vavine wagineu u garea liu deni gaihoramu.
21A Huqe mo leo bibi vataha na gineu gom vaie, me mo mata bibigo lo turegi doluegi gom dige lune. 22Tavohe a tangaloi mo galegaleasi, nge u mwerehi mo siegi na vune mo vidie sibona. 23Nge vin mate huri na nona domi wiriwiri, me a nona lengana me doridori esi doluegi vin leie talolo dalona.
16Lalangai Gaidumu
1Tangaloi mo domigi na havai vin vei laie, nge i Huqe hogosie vin vevea huri ve u garea sige hatie.
2Bagataha tangaloi mo lado ve mo vai na gineu doluegi rau vovohoi, nge i Huqe vin dumure ve rau vovohoi sige hatie.
3Go bete lawe na Huqe hava gineu gom vaire, a nom tabana rai maraga vin garea.
4I Huqe u teu na gineu doluegi mo huri na nona lengagi sibona, siu a tangaloi esi a nona rani vagasigi i Huqe u veie mo vai asisigi nie sibona.
5I Huqe u leo masi na garigeri. Nge vin siregi nire tea, nge vin arahire.
6Gena vaigarea, a garohuri i Huqe mo lado vohogi na asiana. Gena matagute lui Huqe a tangaloi mo begi dena gineu esi.
7Tavohe a doridori nona tangaloi mo vai Huqe mo hahavusi, nge mo vai na nona tavalui vuro ram toga meie lo tamwata.
8Biti nge u garea mena vovohoiana, denie hi mo laie u lawua, mena matahala hi he vovohoi tea.
9A tangaloi mo domigi na turegine, nge i Huqe mo tomuegi na taigerune.