Jesua
1Leohora noi Huqe lawe Jesua
1Lo tagui mateana noi Mosis tangaloi tabana noi Huqe, siu Huqe mo veve lawe Jesua netui Nun gaihango noi Mosis vena: 2“Mosis nogu tangaloi tabana u mate. Siserigi lehe i nigo me tangaloi doluegi hi, ne maraga nem vano liu na wai meuri Jodan, sulo vanue ngehi nam bete lawera tau Israel. 3Tano doluegi ngehi goin dige lune nau bete beno lawe gimiu, mwere hi nau waratau lawe Mosis. 4A tanomiu mo tavuigi lo vanue vurogi mo vano dadari lolo vusi lalawua Lebenon, siu dena wai meuri lawua Iveretis: vanue tau Hiti doluegi, me mo dadari Tahi Medeterenian lo matainaho sasaroro. 5Hate gategale ve vin labe lai vovohoigo lolo rani doluegi na nom mwasoana. Siu neu meigo mwerehi neu mei Mosis. Neu nain siregi nigo tea me nain teu vohogi nigo tea. 6Labe siaga me mese matagu, huri nigo goin tomuegi na tangaloi rain lei na vanue vin vuragi na hango gineu ngehi, nau haharigi lawe retubure hurive nai bete lawera. 7Labe siaga hogosie siu mese matagu. Goin leohuri ve goin tabe na huhuiana doluegi ngehi nogu tangaloi tabana Mosis u veve lawego; mese begi denie sulo matue sige sulo mawiri, huri nigo goin roroa logo hi nigo goin vano. 8Wiribibi na Bugui Huhuiana lo singomu me goi ladolado lune lolo rani, lolo bongi huri siu goi leohuri ve goi tabe na gineu doluegi u uliana lolona. Siu goin maraga lo gineu doluegi me goin roroa. 9Neu nau veve be lawego huri ve goi labe siaga me mese matagu. Mese rurururu, me mese wiriwiri huri nomu Huqe Mauri lo gineu doluegi ngeie meigo logo nigo gom vano.”
23Jesua mo Laqa Ragasire Tomtomuegi
1Me lo tagui rani sao, i Huqe mo bete na mangana lawera Israel dena nora tavalui vuro dalire. Siu tavohe hi Jesua u tamaragai lawuagi. 2Siu Jesua mo warera Israel doluegi, nora sesea me mo ware na nora tomtomuegi, nora tangaloi vevegi, me mo ware na nora tangaloi gaihango siu mo veve lawera:
“Neu nau sesea a nogu rani u rovo hi. 3Gimiu neu leo sibomu gineu doluegi hi i nomiu Huqe Mauri u vei lawe na buri sinobu huri gimiu, huri nge nomiu Huqe Mauri u qalo huri gimiu. 4Nein leo! Nau betegi na vanue lawe reduvimiu a vanue nora buri sinobu ngerehi ram toga tau meire hi nau qaragi nire. Vanue hi mo tavuigi Jodan mo vano mo dadari lo Tahi Medeterenian lo matainaho sasaroro. 5Siu a nomiu Huqe Mauri, nge vin livusire den gimiu. Nge vin lei vohogi nire dena vanue ba siu huri nein lei na vanue vin vuragi nomiu, mwere hi nomiu Huqe Mauri u waratau lawe gimiu. 6Me gimiu nein labe vin siaga, nein leohuri ve nein tabe doluegi na leo lolo Bugui Huhuiana noi Mosis. Siu mese begi denie sulo matue sige sulo mawiri. 7Siu nein mese bulu meire buri sinobu ngerehi ram toga tau mei gimiu. Mese wareware lo henai nora huqe sao. Me mese haharigi lure, mese tabana nora, sige huduhudu lawera. 8Nge gimiu nei bulu siaga lo nomiu Huqe Mauri mwere hi gu vei beno mo dadari bagataha.
9Huqe u livu vohogi nire buri sinobu ngerehi den gimiu rau lawua me rau huire. Lo taro hi, a tangaloi he labe lai tea suvohi gimiu. 10A tangaloi gategale den gimiu vin livusire tangaloi teri, huri nomiu Huqe Mauri mo qalo huri gimiu mwerehi nge u waratau lawe gimiu. 11Siu gimiu nei leohuri vurugegi hurive, nei leogareagi na nomiu Huqe Mauri.
12Tarevena nein tudori me nei bulu meire buri sinobu ngerehi ram toga tau mei gimiu, me nein lagi meire, me nein toga meire, 13siu gimiu nein ilo hurive a nomiu Huqe Mauri hateve vin livusi na buri sinobu ngerehi taligu den gimiu. Nein ilo vurugegi hurive rain vuragi nomiu vune mena mata, rain mwere gai gagavo lo gangaumiu me rain mwere ginei volae lolo matamiu. Nge vin mwerehi vin dadari nein sala dena tano garea ngehi nomiu Huqe Mauri u bete lawe gimiu. 14Me bagataha neu nogu taro u rovo. Me, gimiu nein landobimbi me nein ilo vurugegi vena a leo garea ngehi nomiu Huqe Mauri u warataugi lawe gimiu, doluegi rau veiana. Hateve leo gategale ngeie u soi lune. Doluegi rau veiana. 15Mwere hi leo garea doluegi noi nomiu Huqe Mauri rau veiana lawe gimiu. Siu nge vin vei na leo huire doluegi vin dadari lune vin vei vohogi gimiu dena tano garea ngehi, nge u bete lawe gimiu. 16Tavohe gimiu nei dige vagasile lo waratau siaga noi nomiu Huqe Mauri ngehi u veve lawe gimiu, huri gimiu nein tabana noi huqe wagineu me nein huduhudu lawera. Siu a nona meroana vin gao lumiu me gimiu nein sala siserigi dena vanue garea ngehi u bete lawe gimiu.”