Asaea
8Huqe mo gato mei Tangaloi ligoligogi Asaea
11I Huqe nge mo veve laweau, mwere hi a limana huire mo eno lungu, goi mese huri na turegi tangaloi tau Juda. Mo veve vena,
12“Mese bulu mena tangaloi nora lalangogi rau esi
mwere hi a tangaloi ram ladolado he huri na tamwata tea,
siu mese matagu gina havagi hi a tangaloi ram matagu ginie,
me go mese matagu.
13Nge i Huqe Managi nge u vuivuire,
me nein ladomava ginie,
ngeie gategale hogosie nein tabea,
ngeie gategale hogosie nein matagu ginie.
14Ngeie vin vuragi na ute gogona tanoi hilihili;
nge Israel mei Juda
ngeie vin voragi vatu ngehi vin vei na tangaloi ram taturegi me
a vatu ngehi vin veire rain soi.
Me lawera tangaloi tau Jerusalem
ngeie vin vindire rain dule lo vune.
15Sao denire rain teturegi,
ngere rain soi rain mevurivuri,
ngere rain dule lo vune me vin wiribibire.”
16Wesi bimbi na leogarea noi Huqe,
bulu bimbi na huhuiana noi Huqe Mauri lawe na nongu rorong taigi.
17Nain toga rarai na Huqe,
ngehi u hiligi na nagona dena valei Jekob.
Me nain toga raraie gena nongu ladohogo.
18Ngelehe neu
mena maresu ngehi Huqe u betera laweau.
Ginde a gigilegi mena nunui gineu tau lolo Israel,
dein Huqe Managi,
ngehi mo toga rorongo lo Vusi Saeon.
19Tavohe ngere rain veve lawe gimiu gon hui dena tangaloi uviuvi, me ngere hi ram ngutugi nora huihui. ?Nge huri ve a tangaloi rain hui telai dena nora Huqe Mauri? ?Huri havai ram hui dena tangaloi mate lo taraniana nora ram mwaso? 20Gon hui Huqe huri na huhuiana mena nona leogarea mo waregi sere huri na veveraga. Tareve hine tea vin he toretore tea vena huri na leo ngaha, hate nora leleoi robongi.
21Rongo masi mena mwaruruhie vin vano turu na vanue; ngere rain mweruruhi garagara me ngere rain lolobute, me ram danda su eulu rain arahi na nora ratahigi mena nora huqe. 22Siu ngere rain leo suvohi na ureure, me ngere rain lehi na dodo mena romasi rain matagu lawagi me rain tulire ta lolo dodo maeto.
91Nge vin hate na dodo lawera hi rau romasi. Lo taro tomue Huqe u vei hivogi na vanue Sebulun mena Navtali, nge lo taro mo vumai mo sigei ngeie vin tabera mwere na vanue Kalili ngere hate duvi Israel. Taie hi lo hala mo vano lo tahi lo ute ngehi Jodan.
2Tangaloi ngere hi ramo dige lolo dodogi,
ngere rain lehi na leleo lawoa
ngehi mo mwaso lo vanue hi u dodoga garagara,
a leleo vin varavara su lure.
3Nigo goin vagaqaloi na tangaloi lolo vanuara,
lawea goin ragasi na havuhevu ngehinge ve
ngere rain hevuhevu lumiu
mwere na havuhevui taroi hinaga matue,
mwere ve ramo gaganigi
me ram wahegi nora gineu rau qaragi nire lolo vuro.
4Ba huri mwere hi tavohe lolo rani ngehi ngere Midian rahe qaragi na gineu tea,
nigo gu lei vohogi na nora hagohago,
a gai weli mo saro lo siqara,
me a ruqi na nora tabana gagarasi vurogi.
5Ba huri, a butu nora tangaloi vuro doluegi
mena luqe qaravu rau lulugi lolo dai
me u tatarise mena avi
me vin voragi gai vagaoi avi.
6Ba huri a maresu mwera vin vora lawe ginde,
vin beteana lawe ginde
me a lawoagoro9.6 Ngaha huri ve nge a ratahigi. vin eno lo siqana,
me a henana vin waregiana:
Gaiture garea liu, Huqe managi,
me a Tama vagituei, Netui tawmata.
7Me a nona lawoagoro vin lawoa
mena nona tamwata vin eno hate duvigi.
Lo herei ratahigi Devet
me lo tanona mo mamalu goro mena vovohoiana
tasiserigi hi mo vano vin dadari hate duvigi.
A garohuri nona Huqe Managi
vin veiana mwere hi.
52Tangaloi Tabana noi Huqe ngeie a Tangaloi Rongesi
13Go leo, nogu tangaloi tabana vin tabana vin garea liu, siu ngeie vin ragasie me vin tabe hagegi nie siu vin lado mavagi nie siu a henana vin roroa hage liu. 14Mwere hi ngere rau vei asisigi nie a tangaloi ram vutugegi ginie, me tarabehine dau leo samwegi nie u esi garagara liu na tangaloi, me a nagona he mwere na tangaloi tea. 15Siu ngeie vin vagavutugegi na vanue saosao, ba hurie tau ratahigi sao rai gato tea. Havai rai veve tea lawera ngere rain lehe, havagi rahi rongo tea ngere rain rongo hogo.
531?Hine u ladohogo lo nomai leo me lawe hine hi Huqe u haharagi na nona huireana? 2Ngeie u meuri lo nagona mwere na qaloi gei, me mwere na goari dena tano mamaha. Tarabesine he garea tea siu nona varavara vin he revei ginde tea lawea. Hate gineu lune vena dain taranie. 3Ngeie rau leo vurogi ginie, me rau rahagi nie, ngeie a tangaloi rongesi me u ilo na gagarasi. Nge mwere na tangaloi sao ram hiligi na nagora denie nge rau leomasie, me ginde dahe lado tabea tea.
4Nge u lei vohogi na noda gagarasi, me mo wali vohogi na noda rongesi, maraga i ginde dam lado vena i Huqe Mauri mo arahie, me mo vaie mo gagarasi. 5Nge rau qangea huri noda asiana, mo gagarasi huri na bugude. A arahiana hi u eno lune u lei ginde mo tau ginde lo tamwata. Me huri na mataigana ginde dam mwaso. 6Ginde doluegi dau mwere na sibsib rau sala, ginde gagategalegi dau dori lo noda turegi gahe ginde, nge i Huqe u sangatagi na noda galegaleasi doluegi lune.
7Rau veie u garasie me u gagarasi, maraga ngeie hateve u gato mwere na sibsib ram laie vena rain teveroto mwagorona. Me mwere na sibsib hi ramo laie mo vano vena rain bala na vulune ngehi ngara tea. Siu he wowongagi na singona tea. 8Siu dena gagarasi, dena vevegiana rau lei vohogi nie. ?Me i hine vin velu huri na garogi hinge lui renetune? Ngeie rau tei vohogi nie dena vanuei mwasoana; huri na doridori esi noi nongu tangaloi ngeie mo vano lo arahiana.
9Me ngeie rau domiginie vena vin eno mena tangaloi doridori esi, maraga lolo nona mateana ngeie u eno mena ratahigi, ngeie hi vei na galegaleasi tea, me he galigeli tea.
10Maraga a ladolado noi Huqe ve vi momogagi nie me vi veie vi gagarasi, me Huqe mo bete na nona mwasoana mo voragina gaivoli bugu, nge vin lehi netune me vin vei na nona rani vin qaravu, me ladolado noi Huqe vin woro lo limana. 11Lo tagui nona gagarasi nge vin lehi na leleoi mwasoana me mo rongo garea; gena iloilo na nongu tangaloi tabana vovohoi vin veire sao rain vovohoi me vin weli goro na bugure. 12Huri hi neu nain bete lawea mahoi ute meire tangaloi lalawoa me ngeie vin wahegi na vai gineu meire tangaloi huire, bahuri ngeie u siregi na nona mwasoana su lo mateana, me rau velue mena tangaloi doridori esi, huri nge u weli na asiana noi tangaloi sao, me mo vai na tataro huri na tangaloi doridori esi.