Leo Noi Mosis Taligu
5Leohora noi Huqe lawe Mosis
1Mosis mo warera Israel doluegi me mo veve vena, “Ei Israel, ne rongo na leoi tamwata mena leo vevegi nam veve sere lawe gimiu bagataha. Nein huhuire me siu nein huri vurugegi nire. 2Noda Huqe Mauri u teu na waratau siaga mei ginde lo vusi Saenai5.2 Vusi Saenai henagi tuegi Horeb. 3I Huqe hi teu na waratau siaga ngaha tea lawe retamada, nge lawe ginde, ginde doluegi hano dam mwaso bagataha. 4Huqe u gato mei go lo nagomu lo vusi dena livugei avi. 5Lo taro ngehi neu nau labe lo livugei Huqe me lo livuge miu ve nain matamwasaragi na leo noi Huqe lawe gimiu, ba huri gimiu neu matagu gena avi me nein hage tea lo vusi. Me mo veve vena:
6‘Neu nom nomu Huqe Mauri, nau lei vohogi niko dena vanue Ijib, a vanuei tangaloi gimiu neu tabana gagarasi lune.
7Goin mese huduhudu goro na huqe wagineu. Neu Huqe gategale.
8Goin mese vai na nunui huqe tau eulu lolo taetae, sige nunui gineu mwaso talo tano me lo vavai tano, me lo buloi tahi vuine.
9Goin mese huduhudu goro na huqe vurogi huri neu nomu Huqe Mauri, neu a domi gagarasi. Nain vevegi na maresu huri na bugui tamara vin dadari lo bambai maresu gaitolu, gaivesigi ngere hi rau leo masi eu. 10Nge a noku vaigarea lawe na sinobu teriteri ngere hi rau leogareagi eu me ram wiribibi na noku leohora.
11Goin mese ware vurogi na henai nomu Huqe Mauri, huri Huqe vin vevegi nire ram ware vurogi na henana.
12Goin wiribibi na rani gaibitugi vin gogona, a rani mangana mwere hi nomu Huqe Mauri u veve lawego. 13Lolo rani gaiono goin tabana me goin vei na tabanagi doluegi lolona. 14Nge a rani gaibitugi a rani mangana noi nomu Huqe Mauri. Goin mese vai na tabana lune, niko mei renetumu, sige a nomu tangaloi tabanagi doluegi sige a bulugi sige a donki, sige hala. Sige hine bulemu gangarue, me hala lolo nomu ara, huri a nomu tangaloi tabanagi rain manga mwereigo. 15Huri goin lado bibi ve niko a tangaloi tabana vurogi, lolo Ijib, nge a nomu Huqe Mauri u lei vohogi niko dena Ijib gena nona huireana. Siu nomu Huqe Mauri mo veve lawego huri ve goin wiribibi na rani gaibitugi.
16Goin lado mavagi tamamu mei retahimu mwerei nomu Huqe Mauri u veve lawego, huri nein mwaso vin tuei, me nein toga vurugegi vin qaravu lolo vanue nomu Huqe Mauri vin betea lawego.
17Goin mese ue vagamate na tangaloi.
18Goin mese maturu mena vavine dolue nge hate i horamu sige a mwera hate tamainetumu.
19Goin mese balubelu.
20Goin mese gaivutugi retuemu gena leo kalikeli.
21Goin mese vai huri gaihorai tuemu, a valena, a nona tano, a nona tangaloi tabanagi, a bulana gangarue, sige a nona gineu doluegi.’”
Havahava tau Israel ram matagu
22Me taligu, Mosis mo veve vena, “Ngere ngaha a leohora i Huqe u veve lawe gimiu, tavohe neu kalo bubugi lo vusi Saenai. Me mo gato gena dilo lawua dena tailengi mena dodo gena avi. Siu hate gineu vage. Mo reve na leo lo tavisei vatu tatavola gairue, me mo betera lawe au.
23Me tavohe a avi mo gao na vusi gam rongo na leo mo vomai dena dodo lawua, me ira sesea meire ira tomtomuegi doluegi ramo vomai ram lehi eu. 24Me go ve, ‘Wo! Noda Huqe Mauri, u haharagi na varavarai nona muremure mena lawuana lawe ginde lo dilo lawua gau rongoe lo livugei avi. Bagataha dambei ilo huri ve Huqe Mauri u gato me tangaloi he mate tea. 25Siserigi ngaha gamai gam rao huri ve gain kakarani lobei mateana taligu. A avi lawua vin gao gamai me vin ngehigi gamai. Tareve gamai gain rongo na diloi noda Huqe Mauri taligu gamai gain mate. 26Gu ilo beno! Hate tangaloi tangaha huri ve Huqe vomai lobena lolo avi vena gato mwere u gato mei ginde siu lo tagugi dahe mate tea. 27Ko vano kakarani ko rorongtagi na leo doluegi noda Huqe Mauri vin veve lawego me lo tagugi goin vomai gom vevesere lawe gamai. Gamai gai rongora me gain tabera.’ 28Me i Huqe u rongo na diloi nomu leo tavohe gu gato mei eu me i Huqe mo veve vena, ‘Nau rongo na diloi leo noi sinobu me havai ngere rau veve doluegi rau hogo. 29Neu nam tarani ve rain lado mavagieu, me rain tabe na noku lehora tamwere, me lo nora mwasoana, noi reneture me i reneture rain vomai lo tagure vin garea vin tuei, 30siserigi ngaha goin veve lawera, rain mule taligu lo nora vale siusiu. 31Niko hogosie goin toga mei eu hano. Neu nain bete na noku leohora mena noku leo tamwata, me leo vevegi, lo tagugi goin vano goin huhui na tangaloi ngere hi ginie, me lo tagugi rain toga lolo vanue nain bete lawera, rain tabe na noku tamwata.’”
32Me taligu, Mosis mo veve vena, “Nein dige lo turegi hi a nomiu Huqe Mauri u veve lawe gimiu. Nein lehuri ve nein vei na havagi a Huqe Mauri u veve lawe gimiu. Mese begi sulo matue sige sulo mawiri. 33Nein dige lo turegi hi a nomiu Huqe Mauri u veve lawe gimiu. Tareve nein vei mwere hi, nomiu mwasoana vin garea me nein mwaso vurugegi siu nein toga vin qaravu lolo vanue ngere hi nein leie vin vuragi nomiu.”
6Tamwata lawua noi Huqe
1“Ngere ngaha a leohora, leo tamwata mena leo vevegi ngere hi a nomiu Huqe Mauri u betea laweau huri ve nein huhui gimiu nein vei lune lolo vanue nge hilogo nein dige utu liu vano lolo vanue nein leie vin vuragi nomiu. 2Me gimiu mei renetumiu mei reneture lo tagure rain lado mavagi gina nomiu Huqe Mauri, huri lune nein mwaso vin qaravu me nein hako bibi na nona leo tamwata mena nona leohora neu nau bete lawego. 3Ei Israel! Goin ronghuri me goin tabetabe, huri vin garea mei go siu huri nein sao lawuagi; ko lolo tano mo hale wai lulumu, mena hinaga lulumu, mwere hi Huqe Mauri noi tamamiu Huqe u warataugi lawe gimiu.
4Ei Israel! Nein rongo! Huqe i nge noda Huqe Mauri, Huqe ngeie gategale hogosie. 5Goin leogareagi na nomu Huqe Mauri mena dingmwangomu doluegi, mena nomu mwasoana doluegi me gena huimu doluegi. 6Leohora ngere ngaha nam bete lawego bagataha goin lado bibi lolo dingmwangomu. 7Goin uluire lawe renetumu me goin laqagi lawera tavohe gom toga lolo valemu, me tavohe gom dige lo turegi, tavohe gom eno, tavohe gom maraga. 8Me nein veu gigilegi nie lo lime mu gagategalegi, mena rae mu gagategalegi. 9Me goin ulire lo matai vale mu me lo matai nomu ara.
10Tavohe nomu Huqe Mauri vin lei go vano lolo vanue ngere hi nge u warataugi lawe retubumiu, i Ebraham, i Aesak, me lawe Jekob ve vin bete lawego, a tano mena vanue rege lalawua ngere hi nehi bulure tea. 11Me vale sao rau medi doluegi gena gineu gagarea ngehi hogoni tea, walui wai gohi keli tea, talui waen mena talui oliv nehi rivu tea. Siu tavohe gom gani goin guqe, 12goin leohuri huri ve goin mese galuvegi na Huqe. Ngeie u lei go dena vanue Ijib, dena vanuei tangaloi gimiu neu tabana gagarasi lune. 13Goin lado mavagi gena nomu Huqe Mauri goin tabana lawea hogosie me go goin waratau lohenana. 14Nein mese huri na huqe vurogi doluegi, me dena huqe vurogi nora tangaloi dolue mo dali gimiu. 15Huri nomu Huqe Mauri nge lo livuge miu nge a nomu Huqe Mauri domi gagarasi mo mata bibi gimiu me a merona vin gao huri gimiu me vin lei vohogi gimiu dena nagoi tano.
16Nein mese vai lehi na nomu Huqe Mauri mwere neu vei lehie lo vanue Masa. 17Nein lado bibi ve nein hako bibi na leohora noi nomu Huqe Mauri mena nona na leo raga hui me leo tamwata goro nge u teu lawe gimiu. 18Goin vei havai u vovohoi me u garea lo nagoi Huqe, huri vi garea mei go me goin vano goin lei na tano garea i Huqe u waratau lawe retubumiu. 19Me goin godo vohogi na tavalui vuro dena vanue hi, mwerei Huqe u veve.
20Lo taro vin vomai renetumiu rain hui go ve, ‘?Noda Huqe Mauri, nge huri havagi mo veve siaga lawe ginde huri ve dan tabe siagagi na leo raga hui me leo tamwata, me leo vevegi ngaha?’ 21Nein veve lawera huri vena, ‘Tuei noda tamaragai rau tabana gagarasi noi ratahigi tau Ijib, nge Huqe u vomai mo lai vohogi ginde gena nona huireana. 22Lo tarogi hi i Huqe u vei na gineu lalawua vaigivui me gineu vai vutugegi lawua, rau huire vovohi na vanue Ijib, vovohi na ratahigi tau Ijib, me vovohi na valera doluegi. Dau lehire lolo matada. 23Nge u lei vohogi ginde dena vanue Ijib, mo vai ginde dam toga masuri me mo lai ginde talo vanue hano mwere nge u warataugi lawe retubumiu. 24I Huqe mo veve lawe ginde ve dain tabe na nona tamwata me dain lado mavagi na noda Huqe Mauri, huri a gineu vin garea me dain mwaso mwere bagataha. 25Me ve dain tabe vurugegi na nona leohora doluegi ngere ngaha lo nagoi noda Huqe Mauri mwere nge u veve lawe ginde dain toga vovohoi lo nagona.’”
7Israel na mwasara
1“Tavohe nomu Huqe Mauri vin lei nigo tau lolo tano goi ehu lolona vin vuragi nomu me vin livusi vohogi na buri sinobu sao denigo, vanuara tau Hiti, me ngere tau Gikas, me ngere tau Amoro, me ngere tau Kenan, me ngere tau Beris, me ngere tau Hivi, me ngere tau Jebus. Vanuara buri sinobu gaibitu rau lawua me rau huire denigo. 2Me tavohe nomu Huqe Mauri mo betera lawego, me gom qaragi nire me gom wehi vagamatera doluegi vi rovo. Mese waratau siaga lawera. Mese hagavire. 3Mese lagi meire. Mese bete netumiu vavine lawe neture mwera, sige lai neture vavine lawe netumiu mwera, 4huri rain dori netumiu den eu rain huri na nora huqe dolue me a meroi Huqe vin gao huri gimiu me vin wehi gimiu siseri. 5Nein vei vahavagi lawera: Vai vurivuri na nora vonda gogona mena vatu gogona, nein tei suri na berui gogona, me nein bule na nora nunui huqe vurogi lolo avi.
6Huri gimiu a tangaloi gogona lo nagoi nomu Huqe Mauri. U leo wahe gimiu den tangaloi doluegi lo nagoi ure siu gimiu hogosie Nie leogareagi gimiu lawuagi dena sinobu doluegi. 7Lo tarogi i Huqe u leo wahe ginde, dai sao tea. Vena liure dena garo lalavasigi lo ure ngaha, garoda u biti lawuagi liu den garora lolo ureure. 8Nge ba Huqe u leogareagi ginde me u hako bibi na nona waratau lawe retubumiu. Nge i Huqe u lei vohogi gimiu gena nona huireana me u vagamwasoi gimiu dena vanuei tangaloi gimiu neu tabana gagarasi lune, ko den muremure noi Vero nora ratahigi tau Ijib. 9Me goin ilo huri ve nomu Huqe Mauri nge i Huqe u garohuri siu nge u hango bibi na nona waratau siaga mena vaigareagi lawera, rau leogareagi me lawe na sinobu teriteri ngere ram tabea ko ram wiribibi na nona leohora. 10Me lawe hine ram leomasie lo nagona nge vin duvire gena vevegiana mena mateana. Nge vin sagaribi tea ve vin duvire gena vevegiana mena mateana. 11Siu, goin leohuri ve goin huri na leohora mena tamwata mena leo vevegi nau bete lawe gimiu bagataha. 12Me tareve nein ronghuri na nona leo vevegi nge mo betea, me nein tabea tamwere, nge vin hango bibi na nona waratau siaga, mena nona vaigarea mwere hinge u waratau lawe retubumiu. 13Nge vin leogareagi gimiu, me vin vei gareagi gimiu, me vin ragasi na tovomiu. Nge vin vei gareagi renetumiu, mena bulemiu rivurivu, mena hinaga, mena waen, mena oele, bulemiu bomboroa, mwere hi u warataugi lawe retubumiu huri ve vin bete lawe gimiu. 14Vin vei gareagi gimiu liu na sinobu doluegi; mwera mena vavine doluegi rain hango maresu. Siu bulemiu bomboroa rain vehuhu. 15Me i Huqe vin leogoro gimiu den segeana doluegi. Nge vin lei vohogi na segeana asi tau Ijib dein gimiu, nge vin betera lawera hine ram leo masi gimiu. 16Nein ue vagamate na tangaloi doluegi nomu Huqe Mauri u betera lawe gimiu. Nein mese hagavire, nein mese tabana nora huqe vurogi, huri ngere rain vuragi vune miu.
17Bataha nein lado lolo domi miu huri ve, ‘Buri sinobu ngere ngaha rau huire dein gimiu. ?Nge ginde da gondora vahavagi?’ 18Goin mese matagu ginire, nein lado na havagi i nomu Huqe Mauri u vei lawe Vero mena tangaloi doluegi tau Ijib. 19Neu leo gen matamiu gineu lalawua me gigilegi, me vaigivui, me lo nona huireana nge mo lai gimiu dena Ijib. A nomu Huqe Mauri vin vei mwere hi lawe na tangaloi gimiu nem matagu ginire siserigi ngaha. 20Me vage nomu Huqe Mauri vin hora na onet lawera vin dadari ngere hi rau mwaso rau hili dei gimiu rain mate doluegi. 21Mese matagu ginire. Nomu Huqe Mauri nge lo livuge miu, me u muremure, u garea ve a tangaloi doluegi rain matagu ginie. 22Nomu Huqe Mauri vin veire rain toa denire rorongogi vin dadari doluegi vi rovo, nein mese livu vohoginire vagategale. Huri tareve nein vei mwere hi, a gangarue turu rain sao rain wehi gimiu. 23Me i nomu Huqe Mauri vin betera lawe gimiu. Vin tulire rain dalodaloga vin dadari vin wehire rain mate doluegi. 24Me nge vin teu na nora ratahigi lo lime miu, me gimiu nein hara vohogi na henara lo ure. A tangaloi vin mese labe lo nago miu nein ue vagamatera vin rovo. 25Nunui nora huqe vurogi nein bule lolo avi, mese vai huri vatu renige mena vatu homu ngere hi ram eno lo nunu me mese lai ginomu nein bulara. Nein leohuri ve vin mese vuragi vune miu. Lo nagoi nomu Huqe Mauri rau esi garagara. 26Me goin mese lai na nunui huqe vurogi ta lolo valemu. Tareve goin vei mwere hi Huqe Mauri vin hara vohogi gimiu vage, ba huri ngehi mo tino huri vai vohogi hogosie. Goin lemasie garagara, ba huri ngere rau esi garagara.”
18Doridori rau esi liu
9“Tavohe goin ehu lolo vanue ngehi i nomu Huqe Mauri vin bete lawego goin mese vai na gineu esi garagara ram eno lolo tanora buri sinobu ngere hi. 10Lo livuge miu tangaloi vin mese hure netune vena vuragi nona hure bonboni sige rain vei gineu mwere na duruduru, bombore, gaqaleva, 11vangavanga, mateana, me ngere hi ram wade na tamatei tangaloi vena buluire. 12I hine vin vei na gineu esi garagara ngere ngaha vin vuragi na tangaloi esi garagara lo nagoi Huqe, huri a gineu esi garagara ngere ngaha a nomu Huqe Mauri vin godo vohogi na taureure ngere hi denigo. 13A tangaloi rain vevegi niko tea lo nagoi nomu Huqe Mauri.”
Tangaloi ligoligogi
14“A buri sinobu ngere hi i niko goin godo vohoginire rau mwere, ram huri na leora mataduru me ngere ram vai gigilegi gineu. Nge i nomu Huqe Mauri vi siregi ginde tea vena goin vei na doridori mwere hi.
15Nge nomu Huqe Mauri vin teu dein gimiu na tangaloi leo ligoligogi mwerei eu, siu gimiu nein rongo hurie. 16Nge ngaha vevenagi huri hava gineu gu nevu dena nomu Huqe Mauri tavohe neu kalo bubugi lo vusi Saenai. A gimiu neu veve lawe na nomiu Huqe Mauri vena gimiu nem matagu, nem rao huri ve vin gato mei gimiu taligu, siu gimiu nem ram rao nem veve vena, ‘Gamai gam rao rongoe ve vin gato mei gamai taligu, me gam rao vena, gain lehi na avi lawua taligu, mwere hi gain mate.’ 17Me i Huqe mo veve lawe au ve huri hi, mo veve lawe au vena, ‘Havagi ram veve, a leo hi rau vevea rau garea. 18Neu nain labetagi na nora tangaloi leo ligoligogi mwerei ko, nge vin vomai denire. Neu nain veve na noku leo me i nge vin vano vin veve sere na leo hi lawera mwere hi neu nau veve lawea. 19Nge vin gato lo henagu me tareve a tangaloi vin tarani tea vena rongoe, neu nain veveginie. 20Nge tareve a tangaloi leo ligoligogi gategale vin waregi sere na leo lo henagu tavohe neu nain horae tea, huri vena na vai mwere hi, gimiu nein ue vagamatea. Me, a tangaloi leo ligoligogi ngere hi ram gato lo henara huqe wagineu gimiu nein ue vagamatera vage.’ 21Nge bataha gimiu nein lado vena, ‘?Nge i ginde dain ilo vahavagi ve a leo hi u vomai dena Huqe sige hatie?’ 22A turegine lune, tareve a tangaloi leo ligoligogi gategale mo tino mo gato lo henai Huqe, nge a gineu mo vevera rain vomai tea, ngehi mo haharagi nie huri ve a leo hi hate noi Huqe. A tangaloi leo ligoligogi hi mo gato lo nona huireana gahea. Siu huri hi, gimiu nein mese ladomava ginie.”