1 Ratahigi

1 Ratahigi

Ngere tau Israel ram Mawahe Huri na Ratahigi Gairue

¹Rehobom u vano Sekem, huri ngere Israel doluegi rau vano taie vena ran taue na vuragi ratahigi. ‬ ²Tavohe Jerobom mo rongoe ngeie tau mosigei Ijib huri u toa dei ratahigi Solomon dena vanue Israel. Mo siregi Ijib mo tudori mo vano lo vanue Israel. ³Ngere tau Israel ram hora hurie ram vomai doluegi bubugi ram veve lawe Rehobom vena: ⁴“I tamamu Solomon u teu na tabana mava lumei, nge siserigi hi nigo go vaie na tabana siaga hi na mamarae. Siu gamai gain tabana nomu.” ⁵Rehobom mo duvi, “Nen vano a rani gai gaitolu vin liliu nemo vomai taligu lombegu.” Me a tangaloi ram mule taligu. ⁶Siu ratahigi Rehobom meire sesea ngerehi rau tamba mei tamana Solomon tavohe mo toga mwaso. Mo hui vena, “?Gimiu nei veve vena nai duvi na tangaloi ngere ngaha wuraha?” ⁷Ramo duvie, “Tareve bagataha goin vuragi nora tangaloi tabanagi me goin gato garea meire, me gom duvi vurugegi nire, rain vuragi nom tangaloi tabanagi tuqaravu.” ⁸Nge i Rehobom u rahagi na tovotovo nora sesea me mo hingehinge dena mwalagelo mwera ngere rau sesea bubugi, ram vuragi na nona tangaloi tovotovo. ⁹Mo huire vena, “?Nomiu tovotovo a havai? ?Dai duvi na tangaloi ngerelehe wuraha? Huri rau veve laweau vena, ‘Gon vai na tabana mava tamamu u teue lumei na mamarae.’” ¹⁰Ngere mwalagelo mwera hi rau sesea bubugi meie ram duvi, “Goi veve lawe na tangaloi ngerehi rau veve lawego vena, ‘Tamamu teu na tabana mava lumei, nge go vai na nomai tabana na mamarae,’ veve lawera vena, ‘A bisungu bisu biti u matolu dena tanoi wesi tamangu. ¹¹Tamangu u teu lumiu tabana mava; Neu nain veie vin mava liue. Tamangu u gavogo gena gaiteli tangaloi; Neu, nain gavogo gena ginei garo volae.’” ¹²Lo rani gai toligi, Jerobom mena tangaloi doluegi rau tudori lobei Rehobom mwerei ratahigi u veve, “Nein vumai taligu lombegu lo rani gaitoligi.” ¹³I ratahigi u duvi gagarasigi na leogi lawera tangaloi. U rahagi na tovotovo mo beteana lawea dena sesea. ¹⁴Me mo huri na tovotovo nora mwalagelo me move, “Tamangu u vei na nomiu tabana u mava; Neu nain veie vin mava liue. Tamangu u gavo gimiu gena gaiteli tangaloi; Neu nain gavo gimiu gena kinei garo volae.” ¹⁵I ratahigi he rorontagi nire tangaloi tea, huri a taroi kineu lehe mo vai u vumai deni Huqe, huri ve a leoi Huqe na woro mwere hi Huqe u veve lawe Ahisa tau Silo me i Ahisa mo veve lawe Jerobom netui Nebat. ¹⁶Tavohe ngere Israel doluegi ram leo ve i ratahigi he rorontagi nire tea, ram duvi na ratahigi, “I Devet gamai gai taranie tea. Netui Jesi gamai gai iloe tea. Vagabui Devet go leohuri na nom babagi lui tubumu! Ginde tau Israel da mule lolo noda siusiu!” Siu ngere tau Israel ram mawahe ram mule vano lo nora siusiu. ¹⁷Nge i ngere tau Israel hi ram toga lolo vanue renge sao noi Juda, lo taro hi ram toga lo tanoi leogoro noi Rehobom mosigei.

¹⁸Ratahigi Rehobom u hora Adoram, a tangaloi hi mo vai na tangaloi ve ran tabana siaga, nge i ngere Israel doluegi rau buguri vagamatea. Ratahigi Rehobom, mo galo lo bulana sariot mo toa vano mo toga Jerusalem. ¹⁹Siu ngere tau Israel ramo qalo vohivohi na babagi lui Devet mo vumai mo dadari bagataha. ²⁰Tavohe ngere Israel doluegi ram rongo huri ve i Jerobom u mule, ram hora warea vumai lo nora kalo bubugi, me ram taue mo ratahigi goro na Israel doluegi. A lulugi hogosie lui Juda rau huri rorongogi na babagi lui ratahigi Devet. ²¹Tavohe Rehobom u dadari Jerusalem, mo ware bubugi nire doluegi lo babagi lui Juda me a babagi lui Benseman. Ngere u teri vaga vudolue vagategale avigi ngavulu gaiwelu12.21 180,000 hogo tangaloi vuro huri ve ngere rain vai na vuro mei retuara tau Israel. Siu ngere rain lai tuguhi na tanoi ratahigi Rehobom i netui Solomon. ²²Nge a leo lehe noi Huqe Mauri u vumai lawe Semaia a tangaloi ligoligogi noi Huqe Mauri: ²³“Go veve lawe Rehobom netui Solomon, ratahigi tau Juda, lo babagi lui Juda doluegi, mei Benseman, me lawe na sinobu lavasigi vage, vena, ²⁴‘Nge lehe a havai i Huqe u veve: Mese hage ve go vai vuro vohivohi retuemiu, tau Israel. Gimiu doluegi ne mule lo tano miu, huri ngaha a nogu dedegi.’” Siu ram tabe na leo noi Huqe ram mule taligu, mwerehi i Huqe u veve.

²⁵Siu i Jerobom mo hagovi na ute Sekem lolo vusi vanuei Evrem me mo toga taie. U maraga taie mo vano mo hangovi na ute Benuel vage. ²⁶Jerobom mo ladolado gahea move, “Siserigi lehe a tanoi leogoro vi tudori taligu lo bambagi lui ratahigi Devet. ²⁷Tareve tangaloi ngerelehe rai hage tamwere ve ran vai na nora hure bonboni lo sara gogona noi Huqe lolo Jerusalem taligu, a domire vin huri na nora huqegi, Rehobom ratahigi tau Juda. Rain ue vagamate au me rain tudori lobei ratahigi Rehobom.” ²⁸Lo tagui nona hingehinge lo leogi, i ratahigi u vei na nunui bulugi mwalagelo gairue gena vatu homu. Mo veve lawera tangaloi, “Gimiu neu hage Jerusalem u tatarise beno, O Israel, a nomiu huqe ngere, ru lei gimiu dena vanue Ijib.” ²⁹U teue tuegi lo ute hi Betel, me u teue tuegi lo ute hi Dan. ³⁰Siu a gineu lehe u vuragi na asiana; a tangaloi rau vumai ram galohagi nie hi Betel, me ram vano Dan ram galohagi nie hi tuegi.

Ahisa mo Veve na Leo noi Huqe vohivohi Jerobom

¹Lo taro hi Abisa netui Jerobom mo sege. ²Me i Jerobom mo veve lawe tubui lo valena, “Go maraga go tau goro na nagomu huri a tangaloi rain mese ilogo huri ve i nigo i tubui lo valengu. Siu goi vano Saelo, taie hi tangaloi ligoligogi i Ahisa u veve lawea au hurive nain ratahigi goro na tangaloi ngere. ³Me lo limemu goin lei na bereti hangavulu mena kek te gaivihe me a lahai hani, me gom vano lobena. Ngeie vin veve na havagi vin vei lawe na maresu mwera lehe.” ⁴Me nge mo vai mwere hi Jerobom u horae, mo maraga me mo vano Saelo mo vano lo valei Ahisa. I Ahisa hi vei lei tea vena lehi na vavine hi ba matana ru dodo huri u sesea. ⁵Me Huqe mo veve lawe Ahisa, “I tubui lo valei Jerobom mo vomai ve na hinke leo denigo huri netune mo sege, me nigo goin duvie mwere. Tavohe mo dadari, vin vei huri ve nge a tangaloi dolue.” ⁶Tavohe i Ahisa mo rongo na dumi garune lo matai turegi, move, “?Tubui lo valei Jerobom go soro. Huri havai gom vaie huri ve nigo a tangaloi dolue? U horau mena roro asi lawego. ⁷Go vano gom veve lawe Jerobom, ‘Nge lehe a havai i Huqe, a Huqe Mauri noi Israel, u veve: “Nau ragasigo dena sinobu me nau rivugo gom tomue goro na nogu tangaloi Israel. ⁸Nau heve vohogi na tanoi ratahigi dena babagi lui ratahigi Devet me nau betea lawego, nge hateve gu mwerei na nogu tangaloi tabanagi i Devet, ngeie u wiribibi na nogu leohora. Me u huri eu gena loloi domine, mo vai na havai u vovohoi hogosie lolo mataku. ⁹Nigo gu vei na gineu esi u liure rau toga tomue. Gu bolo na nom huqe wagineu, a nunui huqe gairue lo vatu homu; gu vutu na merongu me gu labe dorigi eu. ¹⁰Huri hi, neu nain hora na tatuana vin hivo lure lo babagi lui Jerobom. Nain tei vohogi na mwera doluegi dena babagi lui Jerobom: ngerehi tangaloi lalawua me ngere tangaloi vurogi. Nain hure vohogi na babagi lui Jerobom ngere mwera doluegi vin mwerehi a tangaloi mo hure vohogi na qatuisongo. ¹¹Wiriu rain genire hi lui Jerobom ram mate lolo vanue renge, me a manu rai genire hi ram mate lolo vanue.” I Huqe u vevea beno!’ ¹²Nge i nigo go mule taligu. Nge tavohe goi dadari lolo nom vanue renge, a maresu mwera hi vin mate. ¹³Israel doluegi rain ngara hie siu rain tulegi nie. Ngeie gategale hogosie lui Jerobom rain tulegi nie, huri nge hogosie lo babagi lui Jerobom i Huqe i Huqe Mauri noi Israel u haqe na gineu garea lune. ¹⁴I Huqe vin rivu na nona ratahigi goro na Israel, ngeie vin tei vohogi na babagi lui Jerobom. U tevuigi beno lo rani bagataha. ¹⁵Me I Huqe vin wehire tau Israel me ngere rain rurururu. Me ngere rain ruru mwere na ere mo ruru lolo wai. Nge vin sara vohogi na tangaloi tau Israel dena tano garea ngehi u betea lawe retamara, siu vin geburegi nire rain gagaliu na wai meuri Evaretes, huri rau vutu na meroana noi Huqe gena nora beru noi huqe vurogi Asera. ¹⁶Huqe vin siregi nire Israel huri na asiana noi Jerobom. Huri u vagasile tau mo vai na Israel ram vagasile.” ¹⁷I tubui lo valei Jerobom mo maraga mo mule taligu vano Tisa. Tavohe mo dadari lo mataituregi valena maresu mwera hi mo mate. ¹⁸Mwerehi i Huqe u veve lawe na nona gaihora tangaloi ligoligogi Ahisa, Israel ram tangihie siu ram tulegi nie.

Ratahigi Ehab Tau Juda

²⁹Lo higaoi Asa ratahigi tau Juda, mo dadari ngavulu gaitolu domwa gaiwelu, Ehab netui Omri, mo vuragi na ratahigi tau Israel, me ngeie u leogoro na Israel higao ngavulu gairue domwa gairue lolo vanue renge Samaria. ³⁰I Ehab netui Omri u vei na gineu sao rau esi lolo matai Huqe denire ngere rau toga tomue siu mobei ngeie. ³¹Ngeie u vei na asiana rau sao mwerei Jerobom netui Nebat, nge u veie u liue, mo lagi mei Jesebel netui Etbal ratahigi tau Sidon, me ngeie mo tavuigi mo tabana noi Tagaro vurogi me mo huduhudu lawea. ³²Nge u tabe na vondai hure bonboni lawe Tagaro vurogi lolo valei Tagaro vurogi, ngehi u tabea lolo Samaria. ³³I Ehab u vei na berui huqe vurogi Asera vage me u vei na gineu u sao mo vai ragasi na meroana noi Huqe, i Huqe Mauri nora tau Israel, denire ratahigi rau toga tomuegi nie.

³⁴Lolo taro noi Ehab, i Hiel tau Betel mo vei huri na Jerigo taligu. Tavohe mo tavuigi na tabana, i netune mwera togagi i Abiram mo mate. Tavohe nge mo vagasigi na tabana i netune tahigi i Segub mo mate, mo eno lo leo noi Huqe mwerehi Jesua netui Nun u veve.

Elaeja mo veve vena, a Aho huru lawoa vin vumai

¹Siseri lehe i Elaeja, tau Tisbi lolo vanue Kiliad, mo veve lawe Ehab vena, “Namo haharigi lo henai Huqe, i Huqe Mauri nora tau Israel hi mo mwaso, ngehi neu nam tabana lawea, a endano vin hatie sige a uhe lolo higao ram vumai mosigei teu vin dadari lune i neu nain veve.” ²Siu a leo noi Huqe mo vomai lawe Elaeja vena, ³“Goin siregi hano, goin liliu sulo matenaho mo galo me goin hili lolo halai wai Kerit, lo tavalui Jodan suvohi na matenaho mo galo. ⁴Goin inuinu dena halai wai matamata, me neu nain hora na manu revin hurive rain bete na hinaga lawe go taie.” ⁵Siu mo vai mwerehi i Huqe u vevea lawea. Ngeie mo vano sulo halai wai Kerit, lobei Jodan lune matenaho mo galo. Me mo toga taie. ⁶A revin ram wali na hinaga mena gabigigi lolo rombongi me hinaga mena gabigigi lolo revirevi lawea, me mo inuinu dena halai wai matamata. ⁷Lo tagugi he rimbi tea a halai matamata hi mo mamaha huri he uhe tea lolo vanue.

Elaeja mo toga lo vanue Sidon dena vanue Israel

⁸Siu a leo noi Huqe mo vumai lawea vena, ⁹“Go vano siseri Sarevat lolo vanue Sidon me gom toga taie. Neu nau hora na vavine mandue tau lo ute hi ve vin bete na hinaga lawego.” ¹⁰Siu nge mo vano Sarevat. Tavohe nge mo vomai lo mataituregi vanue renge, a vavine mandue mo vile avi. Nge mo ware su vano lawea me mo hui, “?Huri ve gon lai na wai biti lolo laha i nan inue?” ¹¹Tavohe vavine hi mo vano ve na laie, nge mo ware, “Etue, me goin lei na tavisei bereti te biti lawe au.” ¹²Ngeie mo duvi vena, “Namo haharigi lo henai nomuHuqe Mauri mo mwaso, gangu hinaga hatie nge a vulaoa biti u tatarise mena qaqai lime lolo laha me a vureigi biti lolo laha. Neu nam vile bubugi na avi hogosire, ve na laire talo valengu me nai vei na hinaga huri eu mei netungu mwera, huri ve gori genie, siu gorom mate.” ¹³Elaeja mo veve lawea move, “Go mese matagu. Go mule me gom vai na havai mwere gu vevea. Nge tomuegi goin vei na hinaga biti huri eu dena gamu hinaga mo eno. Me gom laie su vomai lawe au. Siu gom vai na hinaga huri go mei netumu. ¹⁴Huri lehe havai i Huqe, i Huqe Mauri nora tau Israel u veve: ‘A lahai vulaoa vin he rovo te lai me a lahai vurei vin he mamaha tea, vin dadari lo rani hi a Huqe vin bete na uhe lolo vanue.’” ¹⁵Nge mo vano me mo vai na havagi hi i Elaeja u vevea lawea. Siu a hinaga mo eno vataha rani huri Elaeja me huri na vavine hi mei netune. ¹⁶Huri a lahai vulaoa he rovo tea me a lahai vurei he mamaha tea, mo huri na leo noi Huqe i Elaeja u vevea.

Elaeja mo ragasi netui mandue

¹⁷Lo tagugi he rimbi tea a vavine hi mo leogoro na vale, i netune maresu mwera hi mo sege. Nge mo sege mo asi lawagi, me mo asi vohogi, me a mabuhine mo vano. ¹⁸Nge mo veve lawe Elaeja, “?Tangaloi noi Huqe Mauri, a nomu havagi vohivohi eu? ?Ve gu vomai huri ve goin veve raga na nongu asiana laweau me gom ue vaga mate netungu?” ¹⁹I Elaeja mo duvi, “Go bete netumu laweau.” Nge mo laie dena limana, me mo walie su hage eulu lolo loloi vale hi lune ngeie mo toga, me mo guroe lo qeana. ²⁰Siu ngeie mo ngara hage lawe na Huqevena, “?O nongu Huqe Mauri, ve gu lei na romasi lawe na mandue ngaha neu nam toga meie, mo vai netune mo mate?” ²¹Siu nge mo eno bimbi na maresu mwera hi vaga tolu me mo ngara lawe na Huqe vena, “O nongu Huqe Mauri, go hagavi gamai, go siregi na mwasoana noi maresu mwera ngaha na mule taligu lawea!” ²²A Huqe mo rongo na ngarana noi Elaeja, me a mwasoana noi maresu mwera hi mo mule lawea taligu, me ngeie mo mwaso. ²³Elaeja mo ragasi na maresu hi taulu me mo walie su hivo vuine dena loloi vale hi eulu tau lolo vale vurugegi. Nge mo betea lawe retahine me move, “Gon lehe, i netumu u mwaso!” ²⁴Siu a vavine hi mo veve lawe Elaeja vena, “Siseri lehe i neu nam ilo huri ve i nigo a tangaloi noi Huqe Mauri me a leo noi Huqe dena singomu a hogo.”

Elaeja mo vevegi na Leo noi Huqe lawe Ehab

¹Lo tagui taro qaravu, lo higao gai toligi hi a aho huru u eno, a leoi Huqe mo vomai lawe Elaeja vena, “Go vano gon haharagi nigo sibomu lawe Ehab, me nain hora na uhe ta lolo vanue.” ²Siu Elaeja mo vano vena haharagi nie sibona lawe Ehab. Siseri ngaha a maro u esi garagara lolo Samaria. ³Me i Ehab mo ware Obadia ngeie mo leogoro na valei ratahigi. (Obadia ngeie a tangaloi ladomava siaga lo Huqe. ⁴Tavohe Jesebel mo ue vagamate na tangaloi ligoligogi ngere hi noi Huqe, i Obadia u lei na tangaloi ligoligogi ngere vudolue me mo hiligi nire lolo malanga gairue, a ngavulu geilime lolona tuegi, me a ngavulu geilime lolo na tuegi, me mo bete na hinaga mena wai lawera.) ⁵I Ehab u veve lawe Obadia vena, “Go vano turu na vanue sulo wai meuri mena baha doluegi. Bataha dain haqe na songo huri vin wiribibi na hosi mena miul18.5 Miul ratahine a hosi tamana donki. rain mwaso siu dain mese ue vagamate na bulanda kankarue.” ⁶Siu ngere ram wahegi na vanue ve ngere roin dige doluegi nire, i Ehab mo vano lo turegi dolue me Obadia lune tuegi. ⁷Tavohe i Obadia mo dige mo vano, i Elaeja mo hangwea. Obadia mo leo hogosie, mo siolo suvine lo tano, me mo veve vena, “?Huri ve nigo hogo, nongu huqe Elaeja?” ⁸Ngeie mo duvi vena, “Io. Go vano go veve lawe na nomu ratahigi vena, ‘I Elaeja ngeie talehe.’ ” ⁹I Obadia mo hui vena, “?Nau vei na havagi u esi? Huri nigo gom bete na nomu tangaloi tabanagi vano lawe Ehab vena vin teue lo mateana. ¹⁰A hogo mwerehi nomu Huqe Mauri mo mwaso, hate togagi venue sige a ara noi ratahigi u eno vurogi hurive a nongu ratahigi na higesi go. Me tareve a togagi venue sige a ara noi ratahigi rain veve hurive nigo hate taie, ngeie u veire ram haharigi siaga vena ngere rahi haqego tea. ¹¹Siu siseri ngaha goin veve laweau vena, ‘Nain vano lobei nongu ratahigi me nain veve lawea vena, “I Elaeja ngeie tau.’ ” ¹²I neu nahe iloe tea vena Vui noi Huqe vin weligo su logo tavohe i neu nam siregi nigo. Tare neu nain vano me nain vevea lawe Ehab me i ngeie vin haqego tea, nge vin ue vagamate au. Maraga i neu nomu tangaloi tabanagi nau ladomava lo Huqe u tevuigi lolo nongu mwalagelo. ¹³Ba huri bataha nigo goin rongo tea, havagi nau vei tavohe Jesebel mo ue vagamate na tangaloi ligoligogi noi Huqe. I neu nau hiligi na tangaloi ligoligogi noi Huqe vudolue lolo malanga gairue, ngavulu geilime lolona tuegi siu ngavulu geilime lolona tuegi, me nau bete na hinaga mena wai lawera. ¹⁴Me siseri ngaha i nigo gom veve lawe au vena vano lobei nongu ratahigi me nain veve lawea vena, ‘I Elaeja nge tau.’ I ngeie vin ue vagamate au!” ¹⁵I Elaeja mo veve vena, “Namo haharigi lo henai Huqe Managi hi mo mwaso, ngehi i neu nam tabana lawea, neu nain vosangi eu hogo sibongu lawe Ehab bagataha.” ¹⁶Siu i Obadia mo vano lobei Ehab me mo vevea lawea, me Ehab mo vano lobei Elaeja. ¹⁷Tavohe nge mo lehi Elaeja, nge mo veve lawea vena, “?Ve nigo hingaha, gom vuragi na vui rongesi lolo vanue Israel?” ¹⁸Me Elaeja mo duvi vena, “I neu hateve a vui rongesi lolo Israel. Nge nigo me lo babagi lui tamamu i gimiu neu veie. Gimiu neu siregi na leo hora noi Huqe me nigo gom huri na Tagaro vurogi. ¹⁹Siu siseri ngaha go ware na sinobu dena Israel doluegi ran bulu mei eu lo Vusi Kamel. Me goin lei na tangaloi ligoligogi ngere vudolue vaga vesi avigi ngavulu geilime noi Tagaro vurogi me ngere tangaloi ligoligogi noi Asera ngere vudolue vaga vesi, ngere hi ram gani lo hinaga gai Jesebel.”

Elaeja u qaragi na tangaloi ligoligogi nora Tagaro vurogi

²⁰Siu Ehab mo hora na leo mo vano doluiegi na Israel me ram lai bubugi na tangaloi ligoligogi lo Vusi Kamel. ²¹I Elaeja u vano tomuegi na sinobu me mo veve vena, “?Nem labe lo livugei ladolado gairue vin dadari tagaha? Tareve i Huqe ngeie i Huqe Mauri, nen hurie; nge tareve i Tagaro ngeie a huqe mauri hogo, nen hurie.” Nge sinobu rahe gesi dala tea. ²²Siu Elaeja mo veve lawera vena, “I neu tangaloi ligoligogi noi Huqe gategale hogosie nam tino, nge i Tagaro vurogi nona tangaloi ligoligogi vudolue vagavesi avigi ngavulu gailime. ²³Gimiu nen lai na bulugi boegi gairue lawe gamai. Nen siregi nire ran vile wahe na nora gategale sibora, me nen siregi nire ran teve vurivurie me ram taue talo gai nge rain mese tau na avi lune. I neu nain vei rarai na bulugi tuegi me nain teue lo gai nge nain mese tau na avi lune vage. ²⁴Siu nein ware lo henai nomiu huqe, me neu nain ware lo henai Huqe noi Ebraham, Aesak me Israel. A huqe nge vin duvi gena avi; ngeie a Huqe Mauri.” Siu a sinobu doluegi ram veve vena, “Gom veve na havagi hi u garea.” ²⁵I Elaeja mo veve lawe na tangaloi ligoligogi noi Tagaro vurogi vena, “Nen lai na bulugi denie tuegi me nem vagararaie tomue, huri gimiu neu sao. Nein wareware lo henai nomiu huqe, nge nein mese vagao na avi.” ²⁶Siu ngere ram lai na bulugi hi u beteana lawera me ram vagararaie. Siu ngere ram wareware lo henai Tagaro vurogi, u tevuigi lolo robongi mo dadari lo matainaho mo tuvosa qatu. Ngere ram ngaragi, “O Tagaro gon duvi gamai!” Maraga hatie gaiduvigi, a tangaloi he duvi tea. Me ngere ram wetu dali na vonda hi ngere rau veie. ²⁷Lo matainaho mo tu vosa qatu i Elaeja mo tiehire. Ngeie mo veve lawera vena, “Nen ngaragi siaga taligu! Hogo ngeie a huqe. Bataha ngeie mo ladolado lawuagi lolo domine, sige mo dige lategi, sige ngeie mo didige. Bataha ngeie mo maturu me ngeie vin maraga.” ²⁸Siu ngere ram ngarangaragi mo siaga vagevage me ngere ramo gigirire sibora gena buei vuro mena gaimenu, mo huri na nora doridori, mo dadari daire ram hale. ²⁹Lo matainaho mo begi, me ngere ram vai na nora leo waregi sere siaga hi mo dadari lo taroi hure bonboni lolo revirevi. Maraga hate gaiduvigi, a tangaloi he duvi tea, a tangaloi he rongora tea. ³⁰Siu Elaeja mo veve lawe na sinobu doluegi vena, “Nen vomai teu lombegu.” Ngere ram vomai lobena, me ngeie mo vai huri na vondai hure bonboni noi Huqe, ngehi rau vei surisuri. ³¹Elaeja mo wali na vatu hangavulu domwa gairue, hogo gategale mo tatarise mena babagi ngerehi rau hivo dein renetui Jekob, lawea hi a leo noi Huqe u vomai, mo veve vena, “A henamu vin vuragi Israel.” ³²Ngeie mo bulu na vonda lo henai Huqe gena vatu ngere, me mo geli na walu dalie u lawua tatarise mena laqoloi vurugi wai ngavulu gairue huri ve vin horo lolona. ³³Ngeie mo tau tabe tabegi na gai lo vonda, mo teve vurivuri na bulugi me mo taure lo gai hi. Siu nge mo veve lawera vena, “Nen lingi na wai ta lolo bue vatu lalawoa gairue hogo ngadu hangavulu me nem dandae su lo hure bonboni hi, me ta lo gai.” ³⁴Ngeie mo veve vena, “Nen vaie taligu,” me ngere ram vaie taligu. Ngeie mo veve vena, “Nen vaie vagatolu,” me ngere ram vaie vagatoligi. ³⁵A wai hi mo hale mo hivo dali na vonda me vage mo horo lolo walu hi. ³⁶Lo taroi hure bonboni hi, a tangaloi ligoligogi hi Elaeja mo labe me mo tataro vena, “O Huqe Mauri noi Ebraham, Aesek mei Israel, siregi nie na matamwasara lolo rani bagataha hurive i nigo i Huqe Mauri lolo Israel me i neu a nomu tangaloi tabanagi, me nau vei na gineu doluegi lo nomu leohora. ³⁷Go duvi eu, O Huqe, go duvi eu, huri tangaloi ngere ngaha rain iloe hurive nigo, O Huqe, i Huqe Mauri, me i nigo goin dori na domire vin tudori taligu.” ³⁸Siu avi noi Huqe mo soi me mo gao na hure bonboni, a gai, a vatu mena tano, me mo sungu tantau na wai lolo walu hi. ³⁹Tavohe sinobu doluegi ram lehi na gineu lehe, ramo soi suvine me ramo ngara ngaragi, “A Huqe ngeie i Huqe Mauri! A Huqe ngeie i Huqe Mauri!” ⁴⁰Siu Elaeja mo veve vena, “Nen wiribibi na tangaloi ligoligogi noi Tagaro vurogi. Nen mese siregi nie gategale mo vano!” Ngere ram wiribibire, me Elaeja mo vaire ram laire mo hivo su lolo halai wai Kison me mo tai vaga matera taie.

Huqe mo hora na uhe

⁴¹Me Elaeja mo veve lawe Ehab vena, “Go vano go gagani me gom inuinu, huri a roroi uhe lawua mo vomai.” ⁴²Siu Ehab mo vano vena gagani me mo inuinu, nge Elaeja mo galo ta lo ului Vusi Kamel, mo siolo su vine lo tano me mo tau na nagona lo mahoi qaune. ⁴³Ngeie mo veve lawe na nona tangaloi tabanagi vena, “Go vano me gon leo suvohi lo tahi.” Me nge mo hage aulu me mo veve vena, “Hate gineu taie,” I Elaeja u veve vaga bitu move, “Go vano taligu.” ⁴⁴Vaga bitugi a tangaloi tabanagi mo bete na gaiduvigi vena, “A tailengi u biti mo mwere limei tangaloi mo maraga dena tahi.” Siu Elaeja mo veve vena, “Go vano go veve lawe Ehab vena, ‘Go tagaragi na bulemu jariot18.44 A jariot a hosi mo revea a wiligi gairue. A tangaloi mo toa lune u siseri garagara. me gon hivo vine vaiteu a uhe mo tugoro go.’” ⁴⁵He rimbi tea, a mahava mo tavuigi mo maeto gena dondoi uhe, a langi mo maraga, a uhe mava mo vumai me i Ehab mo siregi mo toa su vano Jeserel. ⁴⁶A huireana noi Huqe mo hivo lui Elaeja, me mo vintegi na luqana ta lolo wasine, me ngeie mo toa tomuegi Ehab su vano Jeserel.

Elaeja Mo Toa Mo Vano Horeb

¹Siseri hi i Ehab u veve lawe Jesebel a gineu doluegi hi i Elaeja u veire me vage ngeie u ue vagamate na tangaloi ligoligogi doluegi hi noi Tagaro vurogi gena buei vuro. ²Siu Jesebel mo hora na nona gaihora lawe Elaeja vena na veve lawea vena, “Lo taro mwere ngaha mavugo, nam veve hogo lawego nain wehigo mwere hi gu wehi na nogu tangaloi ligoligogi, u garea hurive nongu huqe rain ue vagamate au tareve nain veie tae.” ³I Elaeja mo matagu me mo toa huri na nona mwasoana. Tavohe ngeie mo vumai Berseba lolo Juda, mo tau na nona tangaloi tabanagi taie. ⁴Siu ngeie gahea mo vano a rani dolue lo hala hi su lolo vanue vurogi. Ngeie mo vomai sulo vui gai biti, mo toga vuine lo vavagi me mo tataro hurive ngeie na mate. Ngeie mo veve vena, “Neu nau weli na gineu ngaha u tatarise, Huqe. Go lai vohogi na nogu mwasoana; I neu hateve nau garea mwerei reduvingu ngerehi rau mate beno.” ⁵Siu mo eno suvine lo vavai gai hi mo maturu. Tasiserigi hi a gaihora noi HUQE mo singelie me mo veve vena, “Go maraga me go gagani.” ⁶Ngeie mo kileu dali bulu, me kakarani lobei qatune a bereti u quiana lo ului dirigni mwamwavi, mena lahai wai. Ngeie mo gani bereti me mo inu wai siu mo eno suvine taligu. ⁷A gaihora noiHuqe mo vumai taligu vagatuegi me mo singelie me mo veve vena, “Go maraga me go gagani, huri a turegi u qaravu liu huri go.” ⁸Siu ngeie mo maraga mo gani na bereti me mo inu na wai. Hinaga hi u veie mo huire, u lei na turegi rani ngavulu geivesi me bongi ngavulu geivesi me mo dadari Horeb, a vusi noi Huqe Mauri. ⁹Taie hi ngeie mo soro ta lolo malanga me mo manga lolo bongi. Me a leo noi Huqe mo vumai lawea vena, “?Gom vai na havai talehe?” ¹⁰Nge mo duvi mo veve vena, “O Huqe, Huqe Mauri Managi, neu nau romasi huri na Israel. Ngere rau siregi na nomu waratau siaga, rau vei surisuri na nomu vonda, me rau teu na nomu tangaloi ligoligogi sulo mateana gena buei vuro. I neu gategale hogosie nam tino, me siseri ngaha rave rain ue vagamate au vage.” ¹¹A Huqe move, “Go vano varea me gom labe lo vusi lolo ute gogona noi Huqe, huri i Huqe mo gangarani mo dige utu.” Siu a langi lawua u huire mo heregi vurivuri na vusi hi lategi me a vatu ram tavisevise lo nagoi Huqe, nge a Huqe hateve nge lolo langi hi. Lo tagui langi hi a ruru, nge a Huqe hateve ngeie lolo ruru hi. ¹²Lo tagui ruru a avi mo vumai, nge a Huqe ngeie hatie lolona. Me lo tagui avi hi a dilo mo vomai rorongo mo ngutu. ¹³Tavohe Elaeja mo rongoe, ngeie mo reve na luqana goro na nagona me mo mwalue su varea me mo labe lo matai malanga. Siu a dilo mo veve lawea vena, “?Gom vai na havai talehe?” ¹⁴Ngeie mo duvi mo veve vena, “O Huqe, Huqe Mauri Managi, neu nau romasi huri na Israel. Ngere rau siregi na nomu waratau siaga, rau vei surisuri na nomu vonda, me rau teu na nomu tangaloi ligoligogi sulo mateana gena buei vuro. I neu gategale hogosie namo tino, me siseri ngaha ngere rave rain ue vagamate au vage.” ¹⁵A Huqe mo veve lawea vena, “Go tudori lo hala hi gu vumai lune, me goin vano sulo vanue vurogi Damaskas. Tavohe gom dadari taie, goin vurei Hasael na vuragi ratahigi goro Aram. ¹⁶Taligu, goin vurei Jehu netui Nimsi na ratahigi goro Israel, me goin vurei Elisa netui Savat dena ute hi Ebol Mehola na vuragi na tangaloi ligoligogi lo tanomu. ¹⁷Jehu vin teu ra hine hi sulo mateana ngere hi rain toa dena buei vuro noi Hasael, me Elisa vin teu ra hine hi rain toa dena buei vuro noi Jehu. ¹⁸Nge hatie huri nau wiri bimbire ngere teri vagabitu lolo Israel. Ngere qaure rahe sisiqeu tea lawe Tagaro vurogi me ngere a singora he sungunie tea.”