Filipai

Filipai

¹Ạami ạPol nꞌaTimoti ạrubana bho tạJizos Kraist nọge mọbhereer obhobho notuom enyina arōoy ibha netugh taFilipai, ibha itul ọnu nꞌạJizos Kraist obho, nꞌaruvẹmụ nꞌobo bho ụson useeri mọlogh ạvo ọpam ạsosi obho.

²Ẹnaan Ọde bhꞌezira nꞌạJizos Kraist Obạmọogh obho ẹnogho ni enyina lịsebh nꞌekima.

Oḍigh ologhi olo arōoy aFilipai iḍigh tologhi tạPol

³Ạami nạsebh ghạ ni mẸnaan ạmi magey kamen kamen olo ạami ụutua enyina. ⁴Nꞌọḅaal ologhi mobho ạami ubhin naakpulughu ghạ mẸnaan ạnogho enyina, ⁵tebum ẹzo bho enyina ibhin ịlogh ạvo ịnogho ạami mi toḍighi ọgba ooḅi adōm obho, kọḅel aḍuma bho ezira ulōghōmuan obho ninii kaadon. ⁶Tebum iibha bẹleni, ạami nạakar alōghōm mobho Ẹnaan obo bho ạke moḍighi obhobho mi tenyina bho taḍighi ni nạ mẹzo bho ninii asi tikunughi aḍuma bho ạJizos Kraist tamula bọ atu obho. ⁷Ạami nạatua ghạ kua zenyina tebum oḍigh ologhi obho enyina iḍigh tologhi ạmi obho, nꞌebum obho oomo enyina nꞌạami nopin bin aluunwo ạlisebh obho Ẹnaan nạanogho ezira bho, tạkar amen obhobho ạami odi tikoli obho, nꞌamen olo ubhin ạami ụmarami mọnogho ịigbaay ạmi mọgba omutiom ạkar agey oghōrōkō ooḅi adōm bho. ⁸Ạami nạgba magey ạnogho enyina, Ẹnaan be kalōghōm mobho oḍighi ologhi obho oomo enyina iḍigh tologhi ạmi obho ịḍua tetulan obho tạJizos Kraist kiru.

⁹Tiikpulughu ạmi, ạami naakpulughu ghạ mẸnaan molo etulan obhꞌenyina apōbh ạki taghisigh magey, nꞌolo enyina kẹteeny molōghōm ạar olōghōm ịkarabh nꞌiiḅi, ¹⁰molo enyina elōghōm, ẹson ẹseghe mibha ịneghe bọ ipu obho, molo enyina emuzaan tịkarabh, ẹmara ẹpam makẹel mi taghisigh tẸnaan mi taḍuma bho aKraist tamula atu obho. ¹¹Tiibha bho, peḍighiom ạar enyina oru ọmaar ọneghe ogbẹbh ọman mi toḍigh aghuḍum obho itẹn mạJizos Kraist ọnon olo tatue ạnogho olo bho, mọnogho Ẹnaan meghuan obuom odi.

Aghuḍum ạmi paKraist

¹²Iiḅi aburumōr ạmi, ologhi ạmi nạḅaal magey mọgba ọnogho enyina mobho ọkpo bho nemutenaan ạami obho nẹekar nẹpel magey mọnuekpete ooḅi adōm obho ẹkiom taghisigh. ¹³Iibha bho neeḍighi molo oomo obo iḅōrō otu ọolema bho nꞌoomo arōoy ipedi obho neeru ilōghōm mobho ạami odi mikoli obho mi tebum aKraist. ¹⁴Tebum obho ạami odi nạ mikoli obho, iloghi ọlogh aburumōr obho ẹkona nẹeghua nạ magey mi tObạmọogh obho, molo bọbon aruugu ilo idi teedi mobhin ọgbaam ọnuekpete bho tẸnaan ilo nolo.

¹⁵Toomo ipa ẹkona, kir ẹde arōoy ilo ibhin mibōbhan nꞌologhi ạruruan kụ nẹgbaam dōm obho igboloman nꞌaKraist obho, keḍio kir ẹde ilo ibhin moomo ologhi eedi kụ nẹgbaam. ¹⁶Iibha bho ibhin tologhi etulan nẹgbaam, tebum obho eedi neelōghōm mobho Ẹnaan abhin ạami aru suo mọmaranuan arōoy ọgba ooḅi adōm obho omutiom. ¹⁷Arōoy ipedi obho ibhinom io mooḅi ologhi kụ nẹgba milo igboloman nꞌaKraist. Eedi nẹva mẹzo olo opu ạmi, keḍio nẹetua mobho eedi eḍighi kua peedi ọnogho ạmi mịkanya ọmiinom suo ạami odi tikoli obho.

¹⁸Ọkpe olo. Ughōl nạ ẹko eedi ibhin nꞌooḅi ologhi bolobolo ọkarabh ologhi kụ nẹgbaam ẹkona, ologhi ạmi nạḅaal ni, ebum obho, kẹzo kẹzo ilo ịrol, eedi nẹgba milo igboloman nꞌaKraist obho. Ọkpe olo, ologhi ạmi ạbalala, ¹⁹tebum obho ạami naalōghōm mobho tiikpulughu obhꞌenyina nꞌọlogh ạvo bho tạḍua tịnyaam Ẹmugh obho tạJizos Kraist ketu obho, teḍighi ni ẹmu ạmi amute. ²⁰Ạkar ẹzo ilo idi tologhi ạmi magey, nꞌibha ạami naanon taghisigh obho, pẹzo olo ạami upin rẹgheer ạlogha talōor, nꞌobhin ọoghuanaan ologhi moomo amen nꞌạkar esiibha bho ạami odi mikoli obho, ọseghe oomo aghuḍum ạmi oobhughumiom aKraist tọbho nꞌaghuḍum.

²¹Aghuḍum keeghe? Tạmi, aKraist. Ọbho ọghi ọrolan odi ạneghe apu ghuḍum. ²²Kerumolo oḍum aghuḍum obhobho ọghi taghisigh taḍighi molo ạami kamina kaḍighi mọoghuanaan oḍighi, pu tịzal obho, olo ạami ulōghōm mọson ọseghe olo. ²³Ạami nạmughi tịzal ibꞌạrubhiiny. Ọḅele aghuḍum obhobho ọghi ọrolan aKraist ạneghe apu, ²⁴keḍio ọḅele oḍum ọghi taghisigh mebum enyina ịla mạar epu ạni ni kua. ²⁵Ạami nạakar alōghōm miibha bho, molo ạami naalōghōm nạ mobho ạami taḍum ni ạtolan oomo enyina moḍighi enyina kebhōbh kẹghi taghisigh nꞌolo enyina kẹteeny magey ọḅaal ologhi mi tomōruōm obhꞌenyina, ²⁶molo amen ạami tamina atu asi tenyina, enyina tẹteeny ni mạar obhin taḍien tạJizos Kraist obuom ạmi mi tibha odi aḍighi ạnogho ạami obho.

²⁷Kẹzo kẹzo ilo ịrol, eḍighiom ạar aghuḍum enyina eezuan ibhꞌoghōrōkō ooḅi adōm obho taKraist, molo erumolo ạami urue uru, nꞌerumolo ạami utue ḍio moru ọmiinan enyina ẹkona, ạami tạmoghon ni mobho enyina nẹemara ịghua itul ọnu neḅianaan mooḅi adōm obho enyina imōruōm obho, ²⁸nꞌobho enyina ikiil io noghiil ruugu mobo ọlogh aḍien enyina. Tiibha bho pẸnaan nịvo nịvo oḍeeriom eedi mobho eedi tepẹ ni, nꞌobho odi tạpel ni enyina. ²⁹Odi naḍighiiy miibha bho tebum obho nọonogho zenyina mịnyaam mi tebum aKraist mọmiinom, ³⁰pitul nꞌạami siibha bho meḅe moḍigh elebhir obho enyina ịmiin, nẹmoghon nạ siibha mobho ạami naḅe bho.

Osōoriōm alōor nꞌạlibugh taKraist

¹Ẹzo bho enyina neelōghōm mobho otul ọnu obhꞌenyina nꞌaKraist nạkuemi miloghi enyina bho, nꞌobho etulan obhꞌodi nạnwanami lōor enyina bho, nꞌobho Ẹmugh Iigbia bho odi nạ nꞌenyina bho, nꞌobho onyiin motulan onyiin ọsu ạghusan aḍien monyiin ạneghe ni obho, ²pịmaar eekōbhōghian, sesen ni, mẹteeny monyiin ịitua nꞌonyiin ologhi, onyiin atulan monyiin molo enyina ẹḅaaleni mologhi ạmi. ³Kạar kạar olo enyina neḍighi ibhin ghạ mologhi ạaku nꞌọbughia alōor meḍighiom. Kpẹlen nꞌipa, isōoriōm lōor enyina, merōbh ologhi enyina toghōl, “Oōy olo aaleeny ạami olo.” ⁴Ịva ghạ moḍighi oomo amen mibha tẹnogho enyina mạsuo bho be ḍio. ⁵Ipin moḍigh ịitua bho tạJizos Kraist meḍumom taghuḍum enyina.

⁶Toomo ibha odi nꞌẸnaan akẹrẹkẹrẹ olo bho ẹkona,

odi oḅumian io moghōl odi nꞌẸnaan iileeny ni.

⁷Kpẹlen nꞌipa, odi azuuruna meghōony odi atẹn mẹbana,

suo ụmar odi, odi ạgbaaniom lōor odi mạnwuny arōoy molo akẹrẹkẹrẹ olo bho.

⁸Tẹmar-arōoy obho odi asōoriōm lōor odi aghiilaan mẸnaan ninii odi aru ạbho mọbho, ạkar ọbho oorẹeny ẹmigheri obho.

⁹Tebum iibha bẹleni, pẸnaan aabhughumi odi,

ạnogho odi ḍien olo apu moomo ẹmar-ariḍien,

¹⁰molo kamen kamen olo arōoy ịmoghon ḍien obho tạJizos,

pu kōoy kōoy, mi tạnyu obho nꞌade bho, nꞌibha ẹeḍiani ade bho,

ogbuluman ookpulughu odi,

¹¹obhin oomo ịnu obhꞌeedi ọgba omutiom mobho odi ạJizos Kraist aru mObạmọogh

obho mọnogho eghuan mẸnaan Ọde bho.

Ịmu kẹḅaal tẹmar-arōoy obho

¹²Tebum iibha bẹleni, iiḅi aburumōr ạmi, ẹzo bho enyina ighiilaan ghạ zạmi moomo amen olo ạami odi nꞌenyina bho, ipin nạ tonyiin odi oghiilaan obho nꞌilo ipuom nạ suo, siibha bho ạami olo nꞌenyina bho, meghiilaan mẸnaan nꞌaruugu aḍien, meḍighi megbẹbhẹghiōm tịbhelegha bhꞌenyina. ¹³Ẹnaan mobho odi tenyina nạnogho enyina moghiilaan nꞌịnyaam moḍighi ibha idi tologhi odi obho.

¹⁴Ibhin ghạ mologhi ịghunughun nꞌịgbanian meḍighiom kạar kạar olo enyina neḍighi, ¹⁵molo enyina ịteeny mọghor ạman, nꞌolo enyina ẹneghe ẹman kigey ạnwuny tẸnaan mi teesoḍia ịkarabh ạnwuny ọoke bhobho, ibha enyina idi kẹḅaal togbo eedi mi tesuo ẹmar-arōoy obho, ¹⁶suo enyina neebhin nẹgba emutiom eḍeeriom rōoy madōm aghuḍum obho. Tiibha bho pạami obhiigha taḍuma bho ạJizos Kraist tamula atu obho, mobho oomo oḍighi obhꞌạmi uzu ḍio tạkpabh.

¹⁷Keru nạ kạar olo uzu nạ mịḅaal ạmi ụḅaram tomōruōm obhꞌenyina, ibha enyina nẹtunom mạar ẹnogho mẸnaan obho ẹkona, ạami tạḅaal ni mologhi, atul nạ nꞌoomo enyina ạḅaal ologhi. ¹⁸Ẹkar ẹgbaan magey molo enyina kẹḅaal mologhi, otul nạ nꞌạami ọḅaal ologhi.

ATimoti nꞌẸpafraditos

¹⁹ẠJizos Obạmọogh obho ạlogh ạvo pạami orōm aTimoti karu tenyina siibha siibha molo ạami ạmoghon miiḅi ọkpo ilo igboloman nꞌenyina molo ologhi ạmi ạḅaal. ²⁰Odi be mōoy olo ạami ụteeny olo odi kạmi, olo nạatua ghạ zenyina moomo amen. ²¹Oomo ipedi obho neḅe mọkpo ilo alōor eedi be, iḅe ḍio milo tạJizos Kraist. ²²Enyina nịvo nịvo neelōghōm mẹzo odi ạla mạar tạmi, ẹzo odi nꞌạami idi kọde nꞌọony utul noḍighi moḍighi ọgba ooḅi adōm obho. ²³Ạami nạatua, ạami ubiemi ḍio morōm odi karu tenyina kamen kamen olo ạami ụmiin ẹzo ọkpo idi nꞌạami. ²⁴Obạmọogh obho ạlogh ạvo, ạami nịvo nịvo tatu ni nạ tenyina siibha siibha.

²⁵Idi tologhi ạmi magey molo Ẹpafraditos ooḅi umōr obhꞌạmi, obho atul nꞌạami naḅe aḍighi moḍighi obho tObạmọogh obho, obho enyina irōm mọlogh ạvo ọnogho ạmi obho, kamula karu tenyina. ²⁶Ologhi odi naasi magey mi tenyina, molo ipooghu odi ikima ḍio, ebum obho enyina nẹemoghon mobho alōor odi ọneghe ḍio bho. ²⁷Agey nạ, odi ạnwe molo ịbam isughō kụmuneen zodi toogu, molo Ẹnaan ạsuanaan zodi ghụsan aḍien. Odi be ḍio, ạami ẹkona, molo ịnon ịitu ikul ologhi ạami siibha bho ịiḅaghami idi tekẹeny nꞌoḍiom ạmi obho. ²⁸Tebum iibha bẹleni, ạami nạkar ạva magey molo odi kamula karu tenyina molo ologhi enyina ạḅaal men odi aru asi, nꞌolo ịiḅaghami ologhi obhꞌạmi epōoru. ²⁹Tebum iibha nạ bẹleni, ipin ebheleghian odi nꞌoomo ọḅaal ologhi mi taḍien tObạmọogh obho. Ịnogho moghiilaan moḍigh arōoy ilo idi kodi. ³⁰Odi ạkar abhin taḍien enyina ạmaranuan ạnogho lōor odi mọbho mi toḍighi obho taKraist mẹlogh ạvo ọnogho ạmi ogbẹbheghiōm toḍighi ọlogh ạvo bhꞌenyina.

Ẹzo ọmara ọneghe taghisigh tẸnaan

¹Tẹzo olo ọkpete okunughiom, iiḅi aburumōr ạmi, ịḅaal ghạ mologhi mi tObạmọogh obho be. Ịikaany io ạami momina ọge oruom enyina monyiin odi oghōrōkō bho molo ịkarabh ikul ologhi enyina.

²Igona lōor enyina mi tịkarabh asighōghō arōoy obo bho nẹnogho rōoy mọoḅaghami, nẹva molo kōoy kōoy kaḍuna bho. ³Ezira, eedi ḍio, mobo nẹekar iḍunaay magey oḍuna bho, ebum obho ezira nookpulughu ghạ mẸnaan tạruumugh obho, nomina nạ oobhughumi mạJizos Kraist tebum ibha odi aḍighi obho, useeriom io moomo ologhi ezira mi toḍighi ạravo ezira bho. ⁴Ughōl ipa bho tetue ni ẹpel bọ, kōl bọbon ōoy olo aaleeny ạami tipa bho olo. ⁵Tẹzo eḍighiom ạar arōoy aJu obho, uḍun ạami men ạami ugbẹbh mạbhenya aḍuma. Ạami olꞌebhugh Izirẹl mi toghōol otu taBenjamin. Ạami ẹkona Ọony ạkar ogbo eghun aHibru. Tilo igboloman nꞌaraalōgh arōoy aJu obho, ạami olꞌẹku arōoy aFarisi obho. ⁶Ạami ụkar kua ạmara taraalōgh obho molo ạami ụnogho mịiḅaghami marōoy ạsosi obho. Tilo igboloman nꞌaraalōgh arōoy aJu obho, bọbon olōgh olo ạami usōor olo molo ạami ụteeny io nọteeny mọghor ạman. ⁷Keḍio ibha ạami kụḅal mobho iru mạsuo bho, ạami nạḅalam mobho iru mapẹ mebum aKraist. ⁸Tọkar ọgba agey obho, kạar kạar ạmi, ạami naanon aseeri kamapẹ mebum olōghōm ạJizos Kraist Obạmọogh ạami obho. Oobho pạkar odi ogbogbo ẹmu ạsuo bho. Tebum odi, kạami abōor kạar kạar azu tạkpabh, naanon moomo eedi katōbha molo aKraist be atu mạsuo ạmi, ⁹nꞌolo ạami atu molo odi ạman. Ẹnaan tapin ni ạami aseeri taghisigh odi kooḅi ōoy tebum omōruōm ạmi mi todi aKraist, tebum oḍighi ạravo ạmi mi tookō araalōgh obho ḍio. Ịḍua tẸnaan keru, keḍio tughuneen tomōruōm io ọnon ebōom olo. ¹⁰Oomo ạar obho ạami nạva, polōghōm odi aKraist nꞌịnyaam obho ịḍua iru toḅetunu tọbho bhꞌodi obho, nꞌọtuonom odi ọmiinom molo ạami ạpo ạni moḍigh ọbho bhꞌodi, ¹¹molo, Ẹnaan ạlogh ạvo, ạami aḅetunu ạni tọbho bho.

Oghiil osi tikunughi obho

¹²Ịitua ilo oghōl ạami nạateeny ạman bolobolo agbẹbh ạman tiibha bho olo nolo. Ạami naḅe ni be ạki taghisigh molo ạami akuonom mọkpo pipa, kẹzo bho ạJizos Kraist naakuonom ạami, molo ạami ụḍua talōor odi obho. ¹³Ịmaar elōghōm, iiḅi aburumōr, mobho tịitua ạmi ạami ukōl io ạami nạateeny mipa bho ạman. Onyiin ạar be mobho odi tologhi ạmi ạami ụtuugh nạ naḍighi, ạami uunon mu mọkpo ibha idi tạman obho, ạami uunon uḅe nạki taghisigh tọkpo bho idi taghisigh obho. ¹⁴Ạami nakiil ghạ ni be ạki taghisigh mosi tikunughi obho molo ạami apin luunwo eghiil obho Ẹnaan napeleghi ạami mi tạJizos Kraist mọghi obhin obho, obho aru bọ maghuḍum obhꞌạnyu obho.

¹⁵Ịkpe ni molo oomo ezira obo bho noogbẹbh mọghuur ale otuḅeen mi tọkpo ạruumugh obho kọteeny monyiin odi oḍigh ịitua bhibha. Mạar io suo ẹde enyina ịmiin ạni ḍio kua, eru nạ kua, Ẹnaan tạkparion ni riḍien bhꞌenyina. ¹⁶Kẹzo kẹzo ilo ịrol, ezira ụsar io otuḅeen mibha ezira nookughumuom obho.

¹⁷Iiḅi aburumōr, ịtuonom rạaḅa asike ạmi, mẹmaar egbi riḍien enyina tobo bho neḍum oḍigh aghuḍum obhobho bho, molo enyina kẹtuonom rạaḅa asike ezōor. ¹⁸Ạami nạagba ghạ ạnogho enyina mọlogh amen mobho ẹde enyina neḍum aghuḍum ọlokian ariḍien nꞌoorẹeny ẹmigheri ọbho bho taKraist, keḍio ạami kamina digha ạgba aleghiom ạnogho enyina siibha nꞌizin. ¹⁹Ikunughi eedi, ọbho be, ebum obho ạrubaraka eedi iru mẹnaan eedi obho. Ọkpo ạregheer obhꞌeedi pibha eedi ibhin nebuom ẹbughia lōor, neseeriom oomo ologhi eedi mi tọkpo ẹmar-arōoy obho be. ²⁰Ezira nị dụgh, ezira ạnwuny eghun tẸnaan. Ariḍien ezira neenon ghạ eḅōruōm mọmiin amen obho Ọpela bhꞌezira ạJizos Kraist Obạmọogh obho tạḍua tạnyu obho atu obho. ²¹Amen odi tatu podi obhin tịnyaam obho odi napin aḍighi kạar kạar moru ọrol kẹzo ịto bhꞌodi obho, oḍighi onweeghi iikpōogh obhꞌezira eghuan ilo bho keru kẹrol kibhꞌodi ibha ibꞌeghuan obho.

Aliiki

¹Tebum iibha bẹleni, iiḅi aburumōr, oḍigh ologhi ạmi, ibha ạami nạva mọmiin ghạ oomo amen obho, nꞌibha iru nạ mọḅaal ologhi ạmi nꞌaluunwo oḍighi ạmi obho, ịmaar ẹmara, aburumōr oḍigh ologhi ạmi, mẹkpabh mObạmọogh obho.

²Ạami naasen ni maYuodia nꞌaSintike, onyiin mọmoghonyan onyiin kạburumarani tObạmọogh obho. ³Ạna ẹkona, ạna obo bho nạḅar ạami toḍighi obho, lọgh ạvo mạnogho rạani bhibha, ebum obho eedi itul ạami ikumuan magey mi toḍighi ọgba olelemi ooḅi adōm obho. Itul io ạami be, itul ạKlement nꞌạruḅarama ạmi ipedi obho, ibha ariḍien eedi nọogeey mi tọbhereer aghuḍum obho.

⁴Ị́ḅele ghạ nọḅele mọḅaal ghạ ologhi mi tObạmọogh obho, ạami kamina digha ạkpete, ịḅaal ghạ mologhi be.

⁵Ịteeny ologhi ọghurughiom mi toomo arōoy. Obạmọogh obho odi ḅubh. ⁶Ị́nyaghami ghạ lōor enyina mi tọkpo. Kpẹlen nꞌipa, kạar kạar olo enyina nẹva iikpulughu mẹgba mẹnogho mẸnaan, megbẹel odi ạlogh ạvo ạnogho enyina. Íḅulo ghạ nạ mọsebh odi. ⁷Pekima tẸnaan, obho arōoy itue ghạ ḍio mọotua ọmoghonyan obho, ọnogho iloghi nꞌịitua enyina lideny mi tạJizos Kraist.

⁸Tẹzo olo ọkpete okunughiom, iiḅi aburumōr, iseeriom ghạ miloghi enyina mẹetua ghạ miiḅi ọkpo ilo iḍigh eghuan, nꞌilo ịneghe, nꞌilo ịḅaal fịafiafia, nꞌilo teḍigh ni tiloghi arōoy ẹtalaghom eedi, nꞌoomo ọkpo ilo arōoy tebuom ni. ⁹Ịtuugh eḍighi mibha enyina ịtuugha tạmi obho, ibha ạami ukuugh ụlogh tạravo enyina bho, ibha enyina ịmoghon tọnu ạmi, ịmiin nạ taghuḍum ạmi obho, pẸnaan ekima bho ọrolan enyina.

Ạlua ikpoki aluunwo bho

¹⁰Ologhi ạmi nạḅaal magey mi tObạmọogh obho, tebum obho, toomo ibha neebia bho ẹkona, enyina neemina ịitua mọlogh ạvo ọnogho ạmi. Bọbon amen olo enyina iḅulo ạami olo, ebōom ọlogh ạvo ọnogho ạmi kobho enyina ịteeny io. ¹¹Ạami ụkpete ḍio miibha bho moghōl ạami nạgbanian mibha ạami ụteeny io bho, ạami nạatuugha alōghōm mọrolom kilo kilo ạami ụteeny. ¹²Ạami nạatuugha alōghōm mẹzo ọbhama alōor ạmi mi taghuḍum ạmi tamen olo ilo nolo, nꞌamen olo ịka ni. Ọkpo ẹḅokia oḍigh aghuḍum obhobho ạami nạatuugha alōghōm, molo kamen kamen olo ạami odi mọkoony bolobolo tẹela, nꞌamen olo ạami ụteeny ịkanya ọkpo bolobolo ilo nolo, ạami naalōghōm mẹzo ọmaranuan. ¹³Ạami tatue ni ạdaanaan kilo kilo imute tiibha bho mi tịnyaam odi obo bho nạnogho ạami mịnyaam obho.

¹⁴Toomo ipa ẹkona, enyina iḍighi miiḅi mọlogh ạvo ọnogho ạmi mi tịiḅaghami obhꞌạmi.

¹⁵Enyina arōoy aFilipai nịvo nịvo neelōghōm nạ mobho ạami ụḍua kua be mi taMasidonia mi tọḅel egbiom obho ạami ụke mọgba ọnuekpete ooḅi adōm obho, enyina be mạsosi obho ịlogh ạvo ịnogho ạami. Ọnon ạsosi olo aḍigh nꞌạami, ịmiinom tamapẹ nꞌạsuo ạmi olo, enyina be. ¹⁶Tamen obho ạami odi tạTesalonika bho ẹkona, enyina ẹlogh nạ mạvo ẹnogho ạami mi tọkpo bho ạami ụteeny io bho. ¹⁷Inwo bhꞌenyina ḍio mibha ạami naanon, ạsuo ilo enyina tepin ẹḅaraghiom tinwo bhꞌenyina mibha nẹḅaaleni mologhi ạmi obho. ¹⁸Enyina nẹekpe mọmugh oḍighi ạmi, epuom nạ. Ọbaraka ạmi naamute, suo inwo bhꞌenyina, ibha enyina ifirima mẸpafraditos obho neeru iḍigh tạvo ạmi obho. Iibha idi koḍigh ọtun ạar obho nọtun ọnogho mẸnaan neḍigh ghạ tologhi odi obho. ¹⁹Keḍio odi Ẹnaan obhꞌạmi tapin toomo ẹela eghuan obhꞌodi ạnogho enyina kạar kạar olo enyina nẹva. Iibha bho tẹḍua tạJizos Kraist ketu. ²⁰Eghuan ẹrol ẹnogho mẸnaan Ọde bhꞌezira kamen kamen. Ẹrol nạ kua.

Iipuruan ikunughi obho

²¹Ipuruanaan ạami moomo arōoy tẸnaan ibha itul ọnu nꞌạJizos Kraist obho. Aburumōr obho idi eebha bho epuruan nạ enyina. ²²Oomo arōoy tẸnaan ibha idi eebha bho epuruan nạ enyina, ạkar obo bho idi totu ọolema bhꞌaRom obho epuruan nạ enyina magey.

²³Ạlisebh tạJizos Kraist Obạmọogh obho ẹrolan enyina.