Luk
1Ạar obho aḍighi bọ kụge mọbhereer obhobho bho
1Ooḅi ạTiofilos, ọlogh arōoy nẹelogh mẹmu mọge omutiom ọkpo ibha imute bọ teesoḍia ezira bho.
2Eedi ịge mibha obo bho ịmiin ạni bọ mọkpo bhibha kọḅel egbiom obho ịgba ịnogho ezōor ibhin nạ nẹgba eelelemi toomo ẹmar-arōoy obho. 3Tebum iibha bẹleni, ooḅi ạTiofilos, ōoy oḍigh eghuan, imina ni ẹneghe nạ tạmi, tibha ạami nạamaar ạtuugha ạmoghonyan moomo ọkpo bho imute bọ kọḅel egbiom obho, mọge ọnogho onuma men onyiin onyiin mẹzo ọkpo bho imute. 4Ạami nạge miibha bho molo ạna ạmaar alōghōm tagey obho tilo igboloman nꞌoomo ibha nọotughumiom ạna bho.
Ạghiiny ẹmara tạJon
5Taruḍuma tạHerod ọolema bhꞌaJudia, kir onyiin ōoy oḅu miiḅua olo ughōl ạZekaraya. Odi olo ẹku tAbaija. Ạni odi, Ẹlizabet, olo eghun otu tEron. 6Ịzal eedi iiḅi arōoy mi taghisigh tẸnaan, olo neerele izueni toomo iilōgh obho nꞌoomo ịto tObạmọogh obho mi tẹzo olo ịghor ạman ilo nolo. 7Eedi ịteeny io mọony, tebum obho Ẹlizabet aru mẹmar ạni obho. Ịzal eedi ẹkona nẹemar ẹkpo nạ magey.
8Ạteeny monyiin aḍuma, podi ạZekaraya naḍighi moḍighi oḅu iiḅua bho mi taghisigh tẸnaan tebum obho nạateeny maruḍuma oḍighi ẹku obhꞌodi obho. 9Tẹzo eḍighiom ạar arōoy iḅu miiḅua bho, peedi ịsa mẹlel keḍio ẹlel obho ameelom odi mọsu ạnyan mọkpo ooḅi eḍu alōor tẹede iiḅua bho. 10Ạteeny mamen ọsu ọkpo bho, podi ạZekaraya aḍigh tẹkpe iigbia bho, obꞌọlogh arōoy ipedi obho ịrol totu iikpulughu obho neekpulughu ghạ. 11Potelema tObạmọogh obho aru amutenaan zodi ạmara toḍiom ạvo ẹede iiḅua bho. 12Tamen obho ạZekaraya ạmiin bọ zodi obho, palōor obhꞌodi amuugh, aruugu imina nạ isibh zodi. 13Keḍio otelema bho ạkpete ạnogho zodi aghōl kua, “Ughiil ghạ ruugu. Nọomoghon miikpulughu obhꞌonuma. Ẹlizabet ạni obhꞌonuma tạmaranaan ạna monyiin olobhir-ọony. ẠJon paḍien obho ạna takōl zodi ọony obho. 14Ạna tabo ni nꞌọḅaal ologhi. Eruom arōoy tẹḅaal nạ ni mologhi tebum ẹmara ọony obhobho. 15Odi tatu mobꞌogbōgh ōoy mi taghisigh tObạmọogh obho. Odi ọbhoghol io miim bolobolo ịighuanaan amiim ilo tekigh odi. Ẹmugh Iigbia bho tamuzō ni talōor odi ạseghe zodi tamen olo odi odi ni tọbaraka oniin odi. 16Eruom arōoy Izirẹl mobho odi takireni atuom mObạmọogh obho, Ẹnaan obhꞌeedi. 17Odi tapin tịnyaam ẹmugh tIlaija atẹnōm taghisigh Obạmọogh obho, aḍighi miloghi eedi obo bho iru bụrude bho mokiton tạrunwuny obho, akireni mobo bho neḅom ghạ mẹmu obho ạnogho molōghōm ạar oḍighi iiḅi arōoy. Odi tạpam miloghi arōoy tObạmọogh obho aseerian zodi.”
18PạZekaraya ạkpete kua ạnogho motelema bho, “Toḍighi ẹko kạami alōghōm miibha bho? Ạami sōoy olo mạakpo, ạni ạmi ẹkona nạakpo nạ.” 19Potelema bho ạḅooranaan kua zodi, “Ạami paGebriel obo bho nạmara ghạ bọ taghisigh tẸnaan obho. Urōm ạami moru ọgba ọnogho onuma nꞌoḍeeriom onuma mooḅi adōm obhobho. 20Tebum obho ạna omōruōm io bho bẹleni, ạna tatẹn mokpom ụka ninii abaabha bho tetu emute.”
21Tamen obhobho, arōoy obho neḅōrō ghạ mạZekaraya, keḍio neemōogh tibha iḍighi bọ kodi nabia mẹzo bho mi tologhi ẹkpe iigbia bho. 22Tamen obho odi amute aru bọ bho, odi orue mu mọkpete ạar, peedi ilōghōm mobho odi nạamiin ghịiny tologhi ẹkpe iigbia bho. Odi ạnwaaghi rạvo bhꞌodi be, ọkpete ḍio mạar.
23Ipa iru itẹn tamen obho aruḍuma ibhꞌiiḅua bhꞌodi neegbẹbh obho, podi atẹn aghẹel totu odi. 24Ịbam aruḍuma itẹn pẸlizabet ạni obhꞌodi aamōr ạḅoki meghun aḍien obhꞌodi moomo ōogh ụvanyu, 25keḍio aghōl kua, “Iibha pẹzo Obạmọogh obho naaḍighi ạami taruḍuma bho odi aanon bọ zạmi obho, mọseghe otughuneen ạregheer alōor obhꞌạmi teesoḍia arōoy.”
Ạghiiny ẹmara tạJizos
26Togbẹbhiōm odiin ụvanyu teghun obhꞌodi, pẸnaan arōm motelema bhꞌodi aGebriel mọghi tonyiin obꞌẹma mi taGalili olo ughōl ạNazaret, 27mọghi tonyiin ọkpur ọnyani olo ōoy olo ughōl aJosef olo eghun otu taDevid naatuḅeen mọkala. Aḍien odi ọnyani obho ughōl aMeri. 28Keḍio otelema bho ạghi aḍighanaan zodi ọnyani obho aghōl kua, “Ologhi onuma ạḅaal! Ạna nạateeny mẹneghe ẹmugh, Obạmọogh obho odi nꞌạna.” 29Tamen obho odi ọnyani obho ạmiin zodi obho, pologhi obhꞌodi agu mi tebum ọnuekpete bho, podi ạlogh aseeri tologhi odi mẹmu oḍigh ipeleghian bhibha. 30Keḍio otelema bho ạkpete kua ạnogho zodi ọnyani obho, “AMeri, ughiil gha ruugu. Ạna nạateeny mẹneghe ẹmugh tạvo tẸnaan. 31Keḍio nonon ni, ạna taamōr tọbaraka onuma, ạmar molobhir ọony, keḍio ạna takōl ḍien obhꞌodi ạJizos. 32Tọbughe ni zodi. Ighōlaan aḍien odi, Ọony tẸnaan obho ạbugh bọ apu obho, keḍio Ẹnaan Obạmọogh obho tạnogho zodi mẹtolom emuna ẹma bho taDevid ọde bhꞌodi. 33Odi tạda motu tạJekob kamen kamen. Ẹdaam ẹma bhꞌodi ikunughi olo.”
34Keḍio aMeri ạkpete kua ạnogho motelema bho, “Iibha bho teḍighi ẹko kemute tamen olo ạami dolōghōm io molobhir ọony?” 35Potelema bho ạbhagharana kua zodi, “Ẹmugh Iigbia bho tatuanaan ạna keḍio ịnyaam tẸnaan obho ạbugh bọ apu obho tasōorōm ạna, molo odi Ọony obho ạna tạmar bọ bho tokōl zodi Ọony Iigbia nꞌỌony tẸnaan. 36Nonon ni, Ẹlizabet ọzaamani obhꞌonuma obho ughōl bọ mẹmar obho, toomo iibha odi nạakpo bho ẹkona naamōr monyiin olobhir ọony. Oobho pogbẹbhiōm odiin ụvanyu mi teghun obhꞌodi. 37Tịto tẸnaan bọbon ạar olo tạkparanaan zodi moḍighi olo.” 38Keḍio aMeri ạkpete kua, “Emutenaan ni zạmi, ọnyani ẹbana tObạmọogh obho, kẹzo ọnuekpete bhꞌonuma.” Podi otelema bho ạḅele zodi ạḍua.
AMeri ạghi abheleghian Ẹlizabet
39PaMeri aḅetunu taruuḍuma bhibha abhin nꞌeghiil ạghi tẹma olo odi taruugum obho mi tebhugh obhꞌaJuda, 40ạghi aḍigh totu tạZekaraya abheleghian mẸlizabet. 41Tamen obho Ẹlizabet ạmoghon oghōrōkō ipeleghian obho taMeri obho, pọony obho apẹl tologhi ọbaraka bhꞌodi, keḍio Ẹmugh Iigbia bho aru amuzō talōor tẸlizabet. 42Keḍio odi Ẹlizabet abhin nꞌogbōgh oghōrōkō ạkpete kua amutiom, “Ạlisebh ẹrolan ạna tesooḍia ạraani, ạlisebh ẹrolan nạ mọony obho ọbaraka onuma. 43Eeghe kiibha bho nemutenaan ạmi molo ạna oniin tObạmọogh ạami obho ku tamina atu mọmiinan ạmi? 44Mịin, onyiin amen obho oghōrōkō ipeleghian obhꞌonuma iru iḍigh taraḅeri ạmi obho, pọony obho abhin tọḅaal ologhi ạrol tọbaraka bhꞌạmi apẹl. 45Ạlisebh ẹrolan ạna obo bho umōruōm mobho ibha Obạmọogh obho abhin tọnu odi ạkpete amutiom ạnogho ạna bho tẹtuugh ni nạ mẹzo bho emutenaan ạna bho.”
Ạsōor obho aMeri ạmoor abuom mẸnaan
46Keḍio aMeri ạkpete kua,
“Ẹmugh obhꞌạmi nakueni mObạmọogh obho,
47Ologhi ạmi nạḅaal nạ magey tebum Ẹnaan Ọpela bhꞌạmi.
48Odi nạasuanaan zạmi, ọnyani ẹbana bhꞌodi, ghụsan aḍien, molo ạseghe dodon ạghi taghisigh oomo arōoy tẹnogho ni zạmi lịsebh,
49tebum ibꞌọkpo bho Ẹnaan oomo ẹmiriikpo bho naaḍighi ạnogho ạami obho. Iigbia paḍien obhꞌodi.
50Odi nạsuanaan ghạ ghụsan aḍien moomo obo bho ighiilaan odi obho ạseghe tọoke asi tọoke.
51Odi naabhaghami mạvo ịnyaam obhꞌodi, ạazaramiom mịbughia lōor arōoy obho nꞌoomo ịitua bhꞌeedi.
52Odi naasōrōghi moomo ibꞌạruula bho mi tẹtolom ọda ẹma bhꞌeedi, apōbhe mobo bho isōoriōm lōor obho.
53Odi nạaḅirogh miiḅi ọkpo ạperiom mobo bho nẹpozu mọkoony obho, apirighanogh mạruula bho moobho ạravo.
54Odi nạalogh mạvo ạpel marōoy Izirẹl ạnwuny obhꞌodi, ạpam oguan obhꞌodi kẹzo bho odi aguanaan bọ mạburude bhꞌezira obho.
55Odi nạatua ạsuanaan mEbrạhạm nꞌoomo ạnwuny ọobhe bhꞌodi ghụsan aḍien kamen kamen.”
56AMeri ạrolan mẸlizabet milo tegbẹbh ni ịraar ụvanyu keḍio agbi moghẹel.
Ẹzo bho ụmar bọ mạJon ozuughiom rụmuum obho
57Iru igbẹbh men obho Ẹlizabet tạmar obho, podi aru ạmar molobhir ọony. 58Arōoy okōol odi nꞌaburumōr odi iru ịmoghon mobꞌọsu ạghusan aḍien obho Obạmọogh obho nạasuanaan zodi obho, peedi iru itul nꞌodi nẹḅaal mologhi.
59Ọony obho agbẹbh mạbhenya aḍuma, peedi iru iḍun mọony bho, nẹva ghạ maḍien olo oghōl odi, keḍio iru moghōlōm odi maḍien ọde odi, ạZekaraya, 60poniin obhꞌodi agin aghōl maḍien odi tokōl mạJon. 61Keḍio eedi ịkpete kua ịnogho zodi, “Toomo eghun enyina bọbon onyiin ōoy olo ughōl ạJon olo.” 62Peedi ịtuoghom rạvo ịnogho mọde bho ipuruan maḍien obho tokōl mọony obho, 63podi ạnwaaghi rạvo agbẹel moobolom, ụnogho zodi, podi ạge aghōl maḍien ọony obho ughōl ạJon. 64Tamen opopo, pọnu obhꞌodi ạkpatanu, keḍio odi ạke mọkpete ạar nꞌobuom Ẹnaan. 65Keḍio aruugu isibh moomo obo bho ịrol bọ ikuōm zeedi obho, molo oomo ọnuekpete bhibha ilela ni toomo ebhugh obhꞌaJudia. 66Oomo obo bho ịmoghon bọ miibha bho ibhin ịlogh tiloghi eedi ighōl kua, “Okōr oḍigh ōoy mobho odi ọony obhobho tamute atu ạtol?”, ebum obho ạvo tObạmọogh obho odi nꞌodi obho.
Ạghiiny obho ạZekaraya ạmiin ạgba bho
67PẸmugh Iigbia bho aru amuzō talōor tạZekaraya ọde bhꞌodi, molo odi ạmiin mạghiiny bhibha ạkpete kua,
68“Ạlisebh ẹrol ẹnogho mẸnaan, obo bho ạmoogh bọ mIzirẹl obho. Odi naaru apeleghian ạta marōoy odi.
69Odi naamutiom mi totu taDevid oteledōm obhꞌodi ạnogho zezira mọoghuanaan ọpela,
70kẹzo bho arizil iigbia bho ibhin tọnu obhꞌodi ịkpete imutiom kooḍuul ageedi obho,
71modi tạpel ni zezira atughuneen tobo ọlogh aḍien ezira, ạlogh ạvo ạnogho ezira mi toomo obo bho nẹlogh ezira ḍien obho.
72Odi tạsuanaan ni ghụsan aḍien kẹzo bho odi aguanaan migbaany ạburude bhꞌezira bho, ạatua nạ mịzo iigbia bhꞌodi.
73-74Ịzo bho odi aghiran bọ ạnogho mEbrạhạm ọde bhꞌezira, ạmara bọ mọbhel ezira otẹnẹ mi tạravo obo ọlogh aḍien ezira bho molo ezira olōghōm odi tẹzo olo aruugu ilo,
75molo ezira otu miiḅi arōoy ilo ịkarabh ilo taghisigh odi mi toomo aghuḍum ezira.
76Keḍio ạna, ọony obhꞌạmi, Ẹnaan takōl ạna ozil tẸnaan obho ạbugh bọ apu obho. Ạna pobo taḍionom taghisigh mObạmọogh obho moselemi ebōom obhꞌodi,
77nꞌọgba ọnogho arōoy obhꞌodi mobho tọpel ni zeedi mi tọḅelemaan ịkarabh obhꞌeedi,
78ebum obho Ẹnaan obhꞌezira ạteeny magey mọsu ạghusan aḍien. Amen odi Obạmọogh obho tatu, podi oḍighi ẹḅaal obhꞌodi kasōorōm ezira kaghōzōgh obun ụḍirogh obho
79mọnogho ẹḅaal mobo bho ọkinim ọbho naakpiom obho nꞌoreliom ọlogh ezira taraabōom ekima.”
80Keḍio ọony obho abhōbh ạbugh molo ẹmugh obhꞌodi ạghua nạ magey, keḍio odi arugh ghạ tobꞌeekpu eḍum ọosaar obho ninii aru ạteeny ḍuma bho odi tamutiom lōor odi ạnogho marōoy Izirẹl obho.
2Ẹmara tạJizos
1Taruḍuma bhibha, aSiza Ọgostos mạlogh molōgh, molo oomo arōoy obho odi ạda bọ bho kẹghi kẹgian riḍien eedi molōghōm ọnu arōoy obho. 2Ọḅel ọḅalagh arōoy obho, ụke tamen obho aKuirinios ạda bọ maruubhugh aSiria bho. 3Tebum ipa bẹleni, pu kōoy kōoy aghẹel tẹma eedi. 4Keḍio aJosef ạḍua tạNazaret obhꞌaGalili aghẹel tạBetilihem ẹma bho ụmar bọ maDevid obho, tebhugh obhꞌaJudia, ebum obho odi aru molo eghun otu taDevid. 5Keḍio odi ạbhamam aMeri, obho odi atuḅeen bọ mọkala bho, ạghi mọgian ariḍien obho. Amen opopo aMeri odi nꞌeghun. 6,7Eedi isi tạBetilihem otu olo eedi keḍigh ạni mi tarutu isoloman obho olo mu. Keḍio nạateeny migun eghun obhꞌodi, podi aru ạmar mọḅel ọony obhꞌodi ạseghe marukpe abhurughiom mọony obho ạmuneen tesi olo nookō ghạ mịnam.
Itelema tẸnaan imutenaan miikō rạana
8Tebughotu ẹma bho, kir iikō rạana ilo neekō rạana eedi muḍughul obho, mi tọtu aruugum. 9Keḍio otelema tObạmọogh obho aru ạteeny miikō rạana bho. Molo ẹḅaal eghuan tObạmọogh obho asōorōm zeedi akō akitonom. Aruugu esibh zeedi magey, 10keḍio otelema bho ạkpete kua ạnogho zeedi, “Ighiil ghạ ruugu. Ạami uru mọgba ọnogho enyina mooḅi adōm olo tạnogho moomo arōoy mọḅaal ologhi. 11Uḍugul obho aadon, nọomar ọnogho zenyina mi tẹma bho taDevid mọony olo tatu mỌpela bhꞌenyina, aKraist Obạmọogh obho. 12Ẹzo olo oḍighi oḍeeriom enyina, enyina tẹmiin ni mọbumoony olo ubhurughiom ukpe uuta, ụmuneen tesi olo nookō ghạ mịnam.”
13Tonyiin amen obho, pọlogh itelema tẸnaan iru ikō ikitonom mọḅel otelema bho nebuom Ẹnaan, nekōl kua,
14“Eghuan ẹrol ẹnogho mẸnaan tạnyu obho.
Ekima ẹrol ẹnogho marōoy ibhꞌade bho, obo bho iḍigh tologhi odi obho.”
15Amen itelema bho ịḅele eedi ịḍua ịsiin tạnyu obho, piikō rạana bho, onyiin ạkpete kua ạnogho monyiin, “Itu ọghi tạBetilihem ọmiin ạni mibha neemute bho, ibha Obạmọogh obho nạagba ạnogho ezira bho.” 16Peedi ibhin nꞌeghiil ịghi ịmiin maMeri nꞌaJosef nꞌọony obho nọomuneen tesi obho nookō ghạ mịnam obho. 17Amen eedi ịmiin mọony obho, peedi ibhin mọnuekpete bho ụgba bọ ụnogho zeedi obho milo igboloman nꞌodi ọony obho ilelemi toomo ariisi. 18Ọnuekpete iikō rạana bho ịnogho ni mobꞌeemōogh moomo obo bho ịmoghon obho. 19Keḍio aMeri abhin moomo iibha bho aseeri tologhi odi nạatua ghạ. 20Keḍio iikō rạana bho imula nẹnogho meghuan nꞌiibhughumi mẸnaan nebuom zodi mi toomo ibha eedi nẹemoghon ịmiin nạ kẹzo bho itelema bhꞌodi ịgba ịnogho zeedi obho.
Aḍuma oghōl aḍien tạJizos
21Igbẹbh mạbhenya aḍuma, puru uḍun mọony obho keḍio ughōl ḍien obhꞌodi ạJizos, aḍien obho otelema bho tẸnaan ạnogho bọ zodi kamen obho domōr io zodi obho.
Aḍuma ụlogh mạJizos tạvo tObạmọogh obho mi tobꞌotu iikpulughu obho
22Ạteeny mamen oḍighi ạar ẹmu aghuḍum ọony obho kẹzo bho iilōgh obho taMozis ịtughumiom bho, paJosef nꞌaMeri ibhin mạJizos ịghi taJerusạlẹm ịlogh zodi tạvo tObạmọogh obho, 23kẹzo bho nọoge bọ tiilōgh obho tObạmọogh ughōl mu, “Kọkpana kọkpana ọony obhin ghạ oru mọkool ụkool Obạmọogh obho.” 24Eedi ịghi nạ mọtunom ạar “mịzal aruukumude bolobolo ịzal aruukumude ạbadi,” ọnogho Ẹnaan kẹzo bho ịto bhꞌodi.
25Tamen opopo kir ōoy olo odi taJerusạlẹm olo ughōl ạSimion. Odi ooḅi ōoy olo eḍighiom ạar odi isel ni taghisigh tObạmọogh obho keḍio naḅōrō nạ mamen tọta mIzirẹl. 26Ẹmugh Iigbia bho odi nꞌodi molo aguanaan zodi modi ọmiin io mọbho ninii odi ạmiin maKraist obho Obạmọogh obho aguan mIzirẹl obho. 27Ẹmugh Iigbia bho areliom ni zodi ạghi tobꞌotu iikpulughu obho tamen obho ọde nꞌoniin tạJizos ibhin zodi iru ịloghom moḍighinaan odi kẹzo bho iilōgh obho ịtughumiom obho, 28podi abhin zodi ạlogh tạravo odi nạsebh mẸnaan nakōl kua,
29“Esiibha bho, Obumọogh, ibha ạna uguan obho nẹetuugh emute.
Ḅẹlemaan ọony ẹbana bhꞌonuma aghẹel nꞌekima,
30ebum obho ạami nạamiinom nꞌikpo ariḍien ạmi mịbhelegha bhꞌonuma,
31ibha ạna naaḍighi umutiom taghisigh arōoy oomo aruubhugh obho.
32Odi pẹḅaal obho tasōorōm moomo arōoy ịnon aruubhugh obho,
obho tạnogho meghuan marōoy obhꞌonuma Izirẹl.”
33Ọnuekpete bhibha tạSimion, ibha igboloman nꞌọony obho, ẹnogho meemōogh magey mọde nꞌoniin obho. 34Keḍio ạSimion aru ạnogho zeedi lịsebh ạkpete kua ạnogho maMeri oniin obhꞌodi, “Mọghon. Ọony obhobho Ẹnaan ạson ạseghe mọbhel nꞌobhiẹmi ọlogh arōoy mi tIzirẹl. Odi tatu mạmagh olo ạḍua tẸnaan aru olo ọlogh arōoy tẹkpete ni zodi ẹpue, 35keḍio odi tatubhughiom miloghi arōoy aseeri mozōol. Ịitu tegimogh ni nạ mekpom onuma eveleghi kilo ụseghe mobꞌạmugem ẹgham ịzal ạman nogimoghom.”
36Onyiin ozil-ạni olo ughōl Ạna ạrol nạ suo. Odi ọnyani tạFanuel obho eghun otu obho tẠsa. Odi ạḅal ilom moḍual ạsia be, polom odi ạbho, 37keḍio odi aḍum aghuḍum ekpukele ạraani mịzal ạraala nꞌinya ạsia ạkpo. Odi omute ghạ ḍio totu iikpulughu obho, naakpulughu ghạ mẸnaan suo muḍugul nꞌootaany ạtol ghạ nạ mọkoony mebum iikpulughu. 38Tonyiin odi amen obho aMeri nꞌaJosef ibhin mọony obho iru obho, podi aru nạ nạnogho lịsebh mẸnaan keḍio nạgbaay mọkpo ilo igboloman nꞌọony obho nạnogho moomo obo bho neḅōrō mamen Ẹnaan tatu ạta maJerusạlẹm obho.
Erughẹlaan eedi mi tạNazaret
39Eedi iḍighi ịḅele moomo ibha Obạmọogh obho ạto ạnogho eedi moḍighi obho, peedi imula irughẹel tạNazaret ẹma bhꞌeedi mi tebhugh obhꞌaGalili. 40Keḍio ọony obho abhōbh ạghua magey, ạteeny nạ magey molōghōm ạar, tebum obho ạlisebh tẸnaan idi nꞌodi obho.
Ọony ẹbhurukpu ọbumoony ạJizos mi tobꞌotu iikpulughu obho
41Ạla ạgba atẹn mạla, ọde nꞌoniin tạJizos ịḅele ghạ ḍio mọghi taJerusạlẹm ole ẹzaal Opẹl-Otẹn obho. 42ẠJizos aru agbẹbh maḍiōbh nꞌịzal ạsia peedi ịbhamam odi ịghi tẹzaal obho kẹzo bho eedi nẹki ghạ bho. 43Aruḍuma ẹzaal obho iru igbẹbh, peedi itẹn nekẹel, ạJizos ạrol tạman mi taJerusạlẹm, ọde nꞌoniin odi ilōghōm io mobho odi odi tạman. 44Eedi nẹetua ghạ ekōl modi odi ạni togbo arōoy obho. Eedi neerele moomo okpom aḍuma keḍio eedi igbi mọotua ọva odi mi taburumōr nꞌạburubulol eedi. 45Eedi ịva eedi ịmiin io, peedi imula taJerusạlẹm mọva odi. 46Ịraar aḍuma itẹn, peedi iru ịmiin odi tobꞌotu iikpulughu obho mạarol delede nꞌobo ịtughumiom arōoy aJu obho nạmoghonyan apuruanagh eedi miipuruan. 47Molo oomo obo bho nẹnaghanyan zodi obho iimōogh ni mi tẹzo bho odi ạmaar nạmoghonyan ạpagharanaay miipuruan arōoy obho. 48Amen ọde nꞌoniin odi iru ịmiin odi peedi iimōogh keḍio oniin odi ạkpete kua ạnogho zodi, “Ọony, ebum eeghe kạna aḍighi kua zezōor? Ọde onuma nꞌạami nọova ạna ninii nꞌịitu.” 49Keḍio odi ạbhagharana kua “Ebum eeghe kenyina nẹva zạmi, enyina ilōghōm io mobho ạami tạtol ni totu Ọde bhꞌạmi gạ?” 50Eedi ịmoghonyan io mọnuekpete bho odi ạkpete ạnogho zeedi obho. 51Podi ạJizos ạtuonuman zeedi aghẹel tạNazaret ẹma bhꞌeedi, aghiilaan ghạ nạ zeedi magey, keḍio oniin odi ạminogh aseeri moomo ọkpo bhibha mi tekpom obhꞌodi. 52Keḍio ạJizos abhōbh ạbugh magey mi tozu alōor obho nꞌolōghōm ạar ẹmu, molo odi aru aḍigh tologhi tẸnaan nꞌarōoy magey.
3Ịigbaay adōm tạJon ozuughiom rụmuum obho
1Tạla bho agbẹbhiōm bọ ḍiōbh nꞌōogh ạsia, obho aTaibirios ạda bọ maRom obho, ạPontios Pailet nạda nạ maJudia, ạHerod nạda maGalili, aFilip umōr odi ạHerod nạda mebhugh Ituria nꞌaTrakonitis, aLisanias nạda mebhugh Abilini, 2keḍio Ạnas nꞌạKayafas paruvẹmụ arōoy iiḅua bho; tamen obhobho pamen ọnuekpete bho tẸnaan aru tạJon ọony obho tạZekaraya mi tobꞌeekpu eḍum ọosaar obho. 3Odi ạJon akiton ghạ toomo aruubhugh obho idi bọ tọbhiiny obhꞌạJodan nạkpete ghạ kua, “Ikiraan toḍighi ịkarabh enyina meru mezua mụum molo Ẹnaan ạḅelemaan enyina mịkarabh enyina.” 4Iibha bho iḍighi imuzeni tọnuekpete tẠizaya ozil obho, ibha odi ạge bọ tọbhereer obhꞌodi aghōl kua,
“Oōy odi tobꞌeekpu eḍum ọosaar obho namulughu akōl kua,
‘Iselemi mebōom obho tObạmọogh obho meseerian zodi.
Iḍighi ebōom obhꞌodi ạmaar asel.
5Iḅologh moomo ariisi ilo isōor megbo meelelemi mibꞌaruugum nꞌaruuḅum obho,
meseleey moomo ạrugul obho,
meelelemi moomo ariisi olo idi tạghala tạghala,
6molo oomo arōoy ẹmar-arōoy obho ẹmiin mịbhelegha bho tẸnaan.’ ”
7Pọlogh arōoy iru tạJon molo odi kazuughiom eedi mụum, podi ạkpete kua ạnogho zeedi, “Sọo, ịikpolodu, okōr ōoy ạkpete ạnogho enyina moru molo enyina emuzōnaan mi tạlile bho tẸnaan obho natu obho. 8Iḍighi mọkpo lo tẹgba emutiom mobho enyina neeghiraan tịkarabh araabōom enyina. Íbo ghạ mebum obho Ebrạhạm aru mobꞌọde ezira. Ạami nạgba kua ạnogho enyina, Ẹnaan tatue ni aḅẹriōn rụbharakpar bhibha aḍighi atẹnẹ nwụny tEbrạhạm. 9Nooseeri makubu tamen obhobho molo olẹrẹghiom iirẹeny obho ki taruutu obhꞌeedi. Koorẹeny koorẹeny olo ọloki ḍio miiḅi itu tolẹr ni otōbh ọlogh nyạn.”
10Parōoy obho ipuruan kua zodi, “Ezōor oḍighi ẹko siibha bho?” 11Podi ạbhagharana aghōl kua, “Kōoy kōoy olo ạteeny ịzal ạrusuoma ạseghe monyiin ạnogho mọnon ōoy olo ọteeny io mạsuoma. Kōoy kōoy olo ạteeny eḍien ole ạḍian mịnon arōoy.” 12Pẹtede igunogh raasōgh arōoy ilo iru nạ todi mozua ạmuum ipuruan kua zodi, “Obo ịtughumiom, ezōor oḍighi ạni ẹko?” 13Podi ạbhagharana kua, “Ígun ghạ mepuom mibha urōm enyina mogun obho.” 14Ẹde iḅe rạagham obho ipuruan nạ kua zodi, “Ezōor ạni kẹko?” Podi ạkpete kua ạnogho zeedi, “Íḅum ghạ mẹḅoor ikpoki arōoy, bolobolo mẹgbaam rōoy miben ọkpe. Ibha nọkpe enyina bho ẹgbeghan talōor enyina.”
15Parōoy ịrol iḍuom ologhi. Eedi nẹetua ghạ ekōl mụmaar suo odi ạJon paKraist obho, 16podi ạJon ạkpete ạnogho oomo eedi aghōl kua, “Ạami ubhin mụum nazuughiom zenyina keḍio kir ōoy olo natu olo apu ạami, ạami ugbẹbhan io todi mozuman ọkporion arōkōrō odi. Odi tapin mẸmugh Iigbia bho nꞌạnyan azuughiom enyina mụum. 17Ọosuom ale odi odi tạvo odi mọosuom ale bho. Odi taḅunyogh ni aakōbhōghi moomo ikpo ale bho akubh totu ighuale odi, azu mirumutum ale bho ạsu tạnyan olo neemōr kamen kamen.”
18Odi ạJon abhin oḍigh kẹrekere ẹzo ạgbaam mọnuekpete ooḅi adōm obho ạnogho liiki marōoy aJu obho, 19keḍio odi ạgba ghạ nạ amutiom mịkarabh tạHerod, ebum obho odi ạghi abhin mạHerodias, ạni umōr odi, nꞌịnon ịkarabh ilo odi naḍighiiy. 20Tilo ipuom suo, odi ạHerod aḅol mạJon ạloghom mikoli.
Ozua ạmuum tạJizos
21Oomo arōoy obho iru izua mụum ịḅele, pạJizos aru ạni azua mụum. 22Odi naakpulughu, pạnyu obho akpẹerunu keḍio Ẹmugh Iigbia bho ạbheebh keekumude asōorōm odi. Keḍio oghōrōkō ạḍua nạ tạnyu obho aru ạkpete kua, “Ạna pogini Ọony oḍigh ologhi ạmi. Eḍighiom ạar onuma eḍigh tologhi ạmi.”
Eghun otu tạJizos
23ẠJizos ạke moḍighi odi tamen olo odi naagbẹbh maḍisibh ḍiōbh ạsia. Odi ọony taJosef, kẹzo bho arōoy negbiom ghạ mologhi obho. Odi aJosef, ọony taHilai, 24ọony tạMatat, ọony taLivai, ọony taMelki, ọony taJanai, ọony taJosef, 25ọony tạMatatias, ọony tẸmos, ọony tạNehum, ọony tẸsili, ọony taNagai, 26ọony tạMaat, ọony tạMatatias, ọony taSemein, ọony tạJosek, ọony tạJoda, 27ọony tạJoanan, ọony taRisa, ọony tạZerubabel, ọony tạSealtiel, ọony taNeri, 28ọony taMelki, ọony tẠdi, ọony tạKosam, ọony tẸlmadan, ọony tẸr, 29ọony taJosua, ọony tEliezer, ọony taJorim, ọony tạMatat, ọony taLivai, 30ọony tạSimion, ọony taJuda, ọony taJosef, ọony tạJonam, ọony tẸliakim, 31ọony taMelea, ọony tạMena, ọony tạMatata, ọony taNetan, ọony taDevid, 32ọony tạJesi, ọony tObed, ọony tạBoaz, ọony tạSalmon, ọony taNason, 33ọony tẠminadab, ọony tẠdmin, ọony tAni, ọony tạHezron, ọony tạPerez, ọony taJuda, 34ọony tạJekob, ọony tẠizik, ọony tEbrạhạm, ọony taTera, ọony taNahor, 35ọony taSerug, ọony taRiu, ọony tạPeleg, ọony tEber, ọony tạSala, 36ọony tạKainan, ọony tẠrfaksad, ọony taSem, ọony taNoa, ọony tạLamek, 37ọony taMetusela, ọony tỊnok, ọony tạJared, ọony taMahalaleel, ọony tạKainan, 38ọony tẸnos, ọony taSet, ọony tẠdam, ọony tẸnaan.
4Ọdegh oonon tạJizos
1Keḍio ạJizos ạḍua tạJodan natughẹel, Ẹmugh Iigbia bho naamuzō agbẹbh talōor odi, keḍio odi Ẹmugh Iigbia bho areliom odi ạloghom tobꞌeekpu eḍum ọosaar. 2Odi ạrol merubal aḍuma, molo Eru obho ạdegh nạ zodi. Oomo aruḍuma bhibha odi ole ḍio meḍian, molo tikunughi obho ọkoony asibh odi magey.
3PEru obho aru ạkpete kua ạnogho zodi, “Erumolo ạna uru mỌony tẸnaan, puḍighi mọpaḍi ọbharakpar bhobho matẹnẹ mạbred.” 4PạJizos ạbhagharana kua zodi, “Ẹegia bho ạkpete kua, ‘Eḍian be ḍio mobho ōoy taḍumom.’ ”
5PEru obho abhin zodi ạsiinom tạnyu. Nꞌokpereghi ọkpaton be, odi naaḍeriom zodi moomo aruubhugh ẹmar-arōoy obho. 6Keḍio ạkpete kua ạnogho zodi, “Ạami tạnogho ạna mịnyaam mọda oomo iibha bho, nꞌoomo ẹela bhꞌeedi. Nọologh tạvo ạmi moomo iibha bho molo kōoy kōoy olo ologhi ạmi aḍigh pobo ạami tạnogho. 7Oomo iibha bho tetu milꞌonuma siibha, erumolo ạna ugbuluman uukpulughu ạami.” 8Keḍio ạJizos ạbhagharana kua zodi, “Ẹegia iigbia bho ạkpete kua, ‘Kpukpulughu mẸnaan Obạmọogh ạna bho be, odi nạ be mobho ạna taḍighian moḍighi.’ ”
9Podi Eru obho abhin zodi ạghi taJerusạlẹm, ạsiine zodi mi tesi obho ạsiinom bọ apu mi tobꞌotu iikpulughu obho ạkpete kua ạnogho zodi, “Erumolo ạna uru mọony tẸnaan, pụpel suo masōor. 10Mịin, nọoge kua tẹegia bho, ‘Ẹnaan tạnogho ni mịnyaam mitelema bhꞌodi moru okōbh onuma.’ 11Keḍio amina ạkpete nạ kua, ‘Eedi tekōbh ẹpam ạna tạravo eedi molo ạna oḍighia malẹkẹ onuma tạrubharakpar obho.’ ” 12Keḍio ạJizos ạbhagharana kua zodi, “Ẹegia bho ạkpete kua, ‘Ụdegh ghạ mẸnaan Obạmọogh ạna bho.’ ” 13Amen Eru obho akunughiom moḍigh kẹrekere ọdegh oonon obhꞌodi, podi ạḅele zodi ạḍua mọbam amen.
Egbiom oḍighi tạJizos mi taGalili
14Keḍio ạJizos amula taGalili nꞌịnyaam Ẹmugh Iigbia bho, molo ọdu odi ilela ni mi toomo ebhugh obhobho. 15Odi ạrol ạtughumiom ghạ nạ mi tarutu iikpulughu obhꞌeedi molo oomo arōoy obho ibuom ni zodi magey.
Arōoy ạNazaret igin ni mạJizos
16Keḍio ạJizos ạghi tạNazaret ẹma bho uukō bọ zodi obho. Taḍuma obhooghia bho podi ạghi totu iikpulughu obho kẹzo bho odi naḍighi ghạ bho. Odi aḅetunu moghōl ọbhereer iigbia bho, 17pụnogho zodi mọbhereer tẠizaya ozil obho. Odi aabhurion podi ạmiin mesi olo ụge kua,
18“Ẹmugh obho tObạmọogh obho odi nꞌạami.
Odi nạanogho ạami mịikpo mọgba ọnuekpete ooḅi adōm obho ọnogho aruvekulom obho,
nꞌobho obo bho idiighu mikoli obho tomutioghom ni,
nꞌọkparion ariḍien obo ikpom ariḍien obho,
nꞌọnogho omuzōnaan mobo bho idi tọoḅaghami obho,
19nꞌọgba oolelemi aḍuma bho Obạmọogh obho tatu mọbhel arōoy odi obho.”
20PạJizos abhurughi mọbhereer obho amulumi ạnogho mobo bho naakō miikpulughu otu iikpulughu obho, keḍio ạghi ạrol delede. Oomo arōoy otu iikpulughu obho igbiom riḍien eedi zodi. 21Keḍio odi ạke mọḍeghe ọnogho eedi oghōl ekua, “Moḍighi opulughi taraḅeri enyina dodon mọnuekpete ẹegia bho enyina ịmoghon obho.” 22Oomo eedi ịgba zodi miiḅi, keḍio eedi iimōogh nạ magey mi tobꞌooḅi ọnuekpete bho odi ạkpete bho. Keḍio eedi ịkpete kua, “Odi ḍio mọony obho taJosef gạ?” 23Keḍio odi ạkpete kua ạnogho zeedi, “Ạami naalōghōm mobho enyina netu modōgh asidōgh obhobho ọnogho ạmi, oghōl, ‘Ạna ozil obho pira maakua lōor onuma ku,’ nꞌọkpete ekua, ‘Ḍighi ạni tesuo ẹma bhꞌonuma mibha ezōor ụmoghon bhꞌạna uḍighi tạKapaniom obho.’ 24Ạami nạgba kua ạnogho enyina: ozil oḍigh ghạ ḍio meghuan mi tarōoy ẹma odi. 25Ịmaar ẹmiin, tọkar ọgba agey obho, tIzirẹl ọlogh arukpukele ạraani ẹrologhu mi tamen tIlaija obho ẹlebhe ọlobh io moomo ịraar nꞌạmaḍian ạsia bho, molo obꞌoḅẹer asōor toomo ade bho. 26Toomo ipa ẹko nạ, urōm io zodi Ilaija mọghi tonyiin eedi. Urōm ku zodi ọghiom mekpukele ạni obhꞌạZarefat obhꞌebhugh obhꞌaSaidon. 27Ọlogh arōoy olo nẹnwe mẹzegh ịpueghi riiḅi ẹrol nạ mi tIzirẹl mi tamen obho tIlaisa ozil obho, keḍio bọbon onyiin eedi olo uukō olo. Ukiton ku ookō mạNaaman obhꞌaSiria be.” 28Oomo arōoy obho idi bọ totu iikpulughu obho ịmoghon miibha bho pologhi eedi aḅẹebh. 29Peedi iḅerenu, ịghogh mạJizos imutiom tẹma bho, ibhin zodi ịsiinom tạnyu obꞌeegum obho uḅōgh bọ mẹma bhꞌeedi obho morōbh odi odi kaakila kameel. 30Idi tipa bho, podi arele togbo oomo eedi ạḍua.
Onyiin ōoy olo ạteeny ọkarabh ẹmugh
31Keḍio odi ạghi tạKapaniom onyiin ogbōgh ẹma mi tebhugh obhꞌaGalili, ạrol ạtughumiom rōoy obho mi taḍuma obhooghia obho. 32Oomo arōoy obho iimōogh ni mi tẹzo bho odi abhin nạtughumiom obho, ebum obho odi abhin toghōrōkō ẹmu ịto nạtughumiom rōoy obho. 33Totu iikpulughu obho kir onyiin ōoy olo ạteeny mọkarabh ẹmugh eru obho, namulughu tạruumu arōoy obho nạkpete kua, 34“Ạna ạJizos obhꞌạNazaret, ạna ụkar nạva zezōor mẹkaraan? Ạna naaru mobhiẹmi ezōor bẹle? Ạami naalōghōm ạna. Ạna ōoy olo ạḍua tẸnaan aru olo ịkarabh ilo.” 35PạJizos ạbhooruom odi aghōl kua, “Kpereghi mọnu onuma, mamute tẹmu ōoy obho.” Podi ọkarabh ẹmugh obho ạgurom mōoy obho tade mi taghisigh oomo eedi, keḍio ạḍua tẹmu ōoy obho molo bọbon esi alōor odi ōoy obho olo aḅẹebh olo. 36Poomo arōoy obho iimōogh, molo onyiin ạkpete kua ạnogho monyiin, “Iibha kikōr oḍigh ọnuekpete? Odi abhin toghōrōkō ịnyaam nꞌịto ạkpetiom ạnogho mịkarabh ạruumugh obho, peedi nẹḍuaghu nạ.” 37Pọdu odi ạJizos alela toomo ebhugh obho.
ẠJizos aakō mobꞌọlogh arōoy
38ẠJizos ạḍua totu iikpulughu obho, pạghi aḍigh totu tạSaimon. Oniin ọnyani tạSaimon ạkom naakuugh. Peedi iru ịgba ịnogho mạJizos. 39Podi ạghi ạmara tọtu ạni obho, ạbhooruom mạkom obho, pạkom obho ạḍua, odi ạke tonyiin amen obho mọkiom eedi.
40Udule, poomo obo bho ịteeny mạburubulol olo nẹnweeny moḍigh kẹrekere ạrazegh ibhin eedi iruom mạJizos, keḍio odi ạḅamaghi rạvo odi toomo eedi, aakō moomo eedi. 41Ịkarabh ạruumugh ẹḍuaghu nạ tạruumu ọlogh arōoy, molo nemulughuuy ekōl kua, “Ạna Ọony tẸnaan.” PạJizos ạbham mịnu obhꞌeedi. Omōrō ḍio nꞌomōrō molo eedi kẹkpete mạar, ebum obho eedi neelōghōm mobho odi aru maKraist obho.
ẠJizos ạghi taJudia ạgba mọnuekpete adōm obho
42Aḍio ạḅaal pạJizos aḅetunu ạḍua tẹma bho ạghi tesi olo ẹḅokia ạrol. Parōoy obho ịke mọva odi. Eedi iru ịmiin odi peedi ịva mọpuenaan odi mọḅele ọḍua. 43Podi ạkpete kua ạnogho zeedi, “Ạami tạki nị ạgba ạni tịnon ạraama mọnuekpete ooḅi adōm obho Ade-Ọolema bho tẸnaan. Oobho poḍighi obho Ẹnaan arōm ạami moru oḍighi obho.” 44Podi ạghi taJudia ạgba dōm obho mi tarutu iikpulughu obho.
5Ịḅel iteledōm ibha ạJizos abheleghi
1Onyiin amen olo ạJizos ạmara tọtu obꞌegha ọbhiiny obhꞌạGenesaret parōoy iru nenyuughian mọmoghon ọnuekpete bho tẸnaan. 2Podi ạmiin mịzal arughuugh ilo usuloghom. Ịze mina bho neebhun tegbolom neetōlōgh mịzuguru obhꞌeedi. 3Podi aḍigh monyiin obho. Odi opo bho, olo tạSaimon. Keḍio ạkpete ạnogho zodi monyu omutiom ịbam. Keḍio odi ạrol toghuugh obho nạtughumiom mobꞌọlogh arōoy obho.
4Odi ạtughumiom ạḅele, podi ạkpete kua ạnogho mạSaimon, “Nyu moghuugh obho mamutiom togbo bho mazu mọzuguru obhꞌenyina.” 5PạSaimon ạbhagharana kua zodi, “Obo ịtughumiom, nonon nini, oomo uḍugul obho ezōor ụrol ukumuan suo, keḍio bọbon ena olo ezōor ughigh olo. Tebum oghōrōkō bhꞌonuma, ạami tạki nị azu kẹzo bho ạna ụkpete bho.” 6Eedi ịghi izu mọzuguru obho peedi iru ịze mobꞌọlogh ina olo ịto nị mọbaay ọzuguru obho. 7Peedi ịnwaaghi rạvo ibheleghi mạburude eedi mi toghuugh opedi obho moru ọlogh ạni ạvo. Peedi iru ibhulughi mịzal arughuugh obho mina mina molo eedi ịva ni moḅi. 8Amen ạSaimon Pita ạmiin miibha bho, podi ạghi agbuluman taghisigh tạJizos ạkpete kua, “Eey Obumọogh, ḍụa talōor ạmi. Ạami obꞌoḍighi mịkarabh ōoy.” 9Odi nꞌoomo arōoy ipedi obho ịmara kua be neemōogh tebum ina bho eedi ịze bho. 10Onyiin ẹzo bho nạ pẹzo ịrol mi taJems nꞌạJon ạnwuny obho taZebidi obo bho nꞌaPita neḍighi monyiin oḍighi obho. Keḍio ạJizos ạkpete kua ạnogho mạSaimon, “Ughiil ghạ ruugu. Ạseghe dodon ạghi taghisigh, ạami taḍighi ạna akughi ghạ rōoy, ina ḍio.” 11Peedi iḍurogh marughuugh obhꞌeedi ibhune tegbolom, ịḅeleey kạar kạar ịghi ịtuonom mạJizos.
ẠJizos aakō mōoy olo nạnwe mịpueghi riiḅi
12Onyiin amen olo ạJizos odi tonyiin ẹma ponyiin ōoy olo nạnwe magey mẹzegh ịpueghi riiḅi aru todi aasen odi ạkpete kua ạnogho zodi, “Oōy, eḍigh tologhi onuma, ạna tatue ni aakō ạami.” 13PạJizos asele mạvo odi akulaan odi keḍio ạkpete kua, “Eḍigh tologhi ạmi, ḍum.” Tonyiin odi amen opopo pẹzegh ịpueghi riiḅi obho ạḍua talōor ōoy obho. 14PạJizos aakiom odi aghōl kua. “Ụgba ghạ miibha mạnogho bọbon onyiin ōoy, keḍio tẹn monyen onyen mạghi toḅo iiḅua bho odi aanon lōor onuma, kụ mạghi mạtun mạar mạnogho mẸnaan kẹzo bho aMozis ạto bho, molo kōoy kōoy alōghōm mobho ạna naaḍum.” 15Keḍio ọdu obho tạJizos alōghōm molela olela opu ịḅel, molo obꞌọlogh arōoy iru ghạ mọmoghon ịtughumiom odi nꞌookua asilōor eedi. 16Keḍio odi ọgba ghạ ḍio nọgba men mọḍua ghạ ọghi tobꞌeekpu eḍum ọosaar obho nꞌalōor odi be mookpulughu ghạ.
ẠJizos aakō mōoy olo alōor obho nạabho ạman
17Tonyiin aḍuma olo ạJizos nạtughumiom, pẹde arōoy aFarisi obho nꞌobo ịtughumiom iilōgh obho iru ịrol delede. Eedi ịḍuaghu taJerusạlẹm nꞌoomo ạraama ebhugh aGalili nꞌaJudia eruughu. Ịnyaam tObạmọogh obho idi nꞌodi ạJizos mookō ạrazegh. 18Tesi opopo parōoy irōol tẹmuna mōoy olo oomo alōor obho nạabho ạman ibhin iru, nẹva ghạ mebōom olo ọḅolom ọghiom ạJizos. 19Tebum obꞌọlogh arōoy obho eedi irue ḍio mọḅolom odi oḍighom totu obho. Peedi irōol odi ịsiinom tạnyu otu obho, ikpẹerōn, ịloghom odi, isōorẹ zodi togbo arōoy obho mi taghisigh tạJizos. 20Amen ạJizos ạmiin mologhi omōruōm obho eedi ịteeny obho, podi ạkpete kua ạnogho zodi ōoy obho, “Oōy, nọoḅelemaan ạna mịkarabh onuma.” 21Pobo ịtughumiom iilōgh obho nꞌarōoy aFarisi obho ịke mọghunughun tiloghi eedi oghōl ekua, “Odi oobho bho kokōr oḍigh ōoy olo nạkpete kua aḍighanaan mẸnaan. Tughuneen Ẹnaan be ḍio, okōr ōoy mobo tatue ạḅelemaan mịkarabh ōoy?” 22ẠJizos naalōghōm mịitua eedi, podi apuruan kua zeedi, “Eeghe aḍighi kenyina nẹetua mịitua ilo idi kua? 23Iḍighen idugh epu mọkpete, oghōl ekua ‘Nọoḅelemaan ạna mịkarabh onuma,’ nꞌoghōl ekua, ‘Ḅetunu marele.’ 24Ạami naḍighi moḍeeriom enyina mobho Ọony Oōy obho ạteeny ni mịikpo tade bho mọḅelemaan ịkarabh.” Podi amula ạkpete kua ạnogho mōoy obho, “Ạami nạkpete ạnogho ạna, ḅetunu makpōr mẹmuna onuma, maghẹel.” 25Onyiin amen obho pōoy obho aḅetunu teesoḍia bhꞌeedi, aḅẹtōn mẹmuna bho odi ạmunuom ghạ bho, atẹn aghẹel, nabuom Ẹnaan. 26Oomo arōoy obho iimōogh ni ẹman. Keḍio eedi ịrol nebuom Ẹnaan, ibhin nꞌibꞌaruugu nẹkpete kua, “Sọo! Iibha ọkpo ibꞌaruugu ilo ezōor nọmiinogh dodon.”
ẠJizos abheleghi maLivai ạseghe
27Iibha iru itẹn, ạJizos amute tetẹrẹ, podi ạmiin mogunogh raasōgh ōoy olo ughōl aLivai, odi delede tesi oḍighi odi. PạJizos ạkpete kua ạnogho zodi, “Tụonom ạami.” 28Podi aLivai aḅetunu, ạḅele kạar kạar, ạtuonuman zodi.
29Podi aLivai asōorẹ mẹzaal ạnogho mạJizos totu odi. Eḅunyom igunogh raasōgh obho nꞌịnon arōoy ịrol ạni delede nꞌeedi. 30Parōoy aFarisi nꞌobo ịtughumiom iilōgh ibha ogbo eedi iru nẹgozaay ẹnogho miteledōm obhꞌodi nepuruan kua, “Ebum eeghe kenyina etul migunogh raasōgh obho nꞌiḍighi mịkarabh obho nele ẹpoghol nꞌeedi?” 31PạJizos ạbhagharana kua zeedi, “Obo bho asilōor obho ịghuay obho ịva ghạ ḍio mozil, obo bho nẹnweey obho be. 32Ạami uru mobheleghi ạsukarabh obho, aruuḅi obho ḍio.”
Iipuruan ilo igboloman nꞌọrologhu ọkoony tebum iikpulughu
33Pẹtede arōoy iru ịkpete kua ịnogho mạJizos, “Iteledōm tạJon aḍuugh ịtol mọkoony, eekpulughu ghạ moomo amen. Onyiin ẹzo bho nạ miteledōm arōoy aFarisi obho, keḍio iteledōm onuma nẹemaar nele nẹpoghol,” 34PạJizos ạbhagharana kua zeedi, “Enyina tetue ni gạ, mi tipina, eseeri mọkoony mobo bho ipina bho tamen olo opina bho odi nꞌeedi? 35Aḍuma natu molo tọseghe mopina bho mi teedi, keḍio eedi tegbi mọrologhu ọkoony.”
36Keḍio ạJizos amina nạ adōgh sidōgh obhobho ạnogho zeedi. “Bọbon ōoy olo tạkooron momoom ukpe mopuom ugbaany olo. Odi aḍighi nạ kua, podi tạbaay ni momoom ukpe bho, keḍio omoom obho orue ḍio ạneghiom tugbaany obho. 37Oōy olo tạseghe nạ mimoom amiim ạloki tigbaany izu ịnam ạsikarama amiim olo. Ibha odi ạloki pimoom amiim obho orubhughi igbaany izu ạsikarama obho, amiim obho kezuughian, izu ạsikarama bho ẹkona kerubhughu keḅẹebh. 38Imoom amiim nọloki ghạ timoom izu ạsikarama. 39Bọbon ōoy olo nạva ghạ nạ momina ọbhoghol imoom amiim tamen olo odi nạabhoghol migbaany obho olo. Eedi nekōl ghạ kua, ‘Igbaany obho ịneghe epu.’ ”
6Iipuruan ilo igboloman nꞌaḍuma obhooghia bho
1Tonyiin aḍuma obhooghia bho olo ạJizos arele natẹn tookua ịbiakpa, pobo bho nẹtuonom odi obho iḅuni mẹde ịbiakpa, ịbholobhool tạravo eedi, ile. 2Pẹtede arōoy aFarisi obho ịkpete kua, “Enyina neesōor molōgh. Ebum eeghe kenyina neḍighi mọkpo olōgh taḍuma obhooghia bho?” 3Keḍio ạJizos aru ạbhagharana kua zeedi, “Enyina deghōl ghạ ḍio ẹmiin mibha aDevid aḍighi tamen obho odi nꞌarōoy odi ọkoony nesibhogh mi taḍuma obhooghia bho gạ? 4Odi ạghi aḍigh totu obho tẸnaan ạseghe mạbred obho ụtunom mạar ụnogho mẸnaan obho, ale ạnogho ạni rōoy odi, obho tughuneen arōoy iiḅua bho ḍio ọnon ōoy ole ghạ ḍio kẹzo bho iilōgh obhꞌezira ịto bho.” 5Keḍio odi ạJizos amina ạkpete kua ạḅaram, “Ọony Oōy obho pObạmọogh maḍuma obhooghia bho.”
Ilo imutenaan ōoy olo ạvo bho naamuugh
6Tọnon aḍuma obhooghia bho, pạJizos ạghi totu iikpulughu obho nạtughumiom. Tesuo, kir ōoy olo oḍiom ạvo bho naamuugh. 7Ẹde obo ịtughumiom iilōgh obho nꞌarōoy aFarisi obho nẹva ghạ mịkarabh olo ọbhamam ạJizos, peedi ịmaar negon odi mọmiin erumolo odi taakō ni mōoy taḍuma obhooghia bho. 8ẠJizos maalōghōm mịitua eedi, podi ạkpete kua ạnogho mōoy obho, “Ḅetunu maru mạmara teebha ogbo bho.” Podi ōoy obho aḅetunu ạghi ạmara togbo bho. 9Keḍio ạJizos apuruan kua zeedi, “Iḍighen mibha iizuan, olo olōgh olo, moḍighi taḍuma obhooghia bho? Oḍighi iiḅi ọlogh ạvo ọnogho ōoy nꞌoḍighi odi mịkarabh? Ọbhel ookō aghuḍum ōoy nꞌotẹnẹmi aghuḍum odi?” 10Keḍio odi aanon moomo eedi akin akiton, keḍio ạkpete kua ạnogho mōoy obho, “Sele mạvo onuma.” Keḍio odi aru asele mạvo bhꞌodi, pạvo bhꞌodi aru ạneghe. 11Pologhi oomo eedi napul kaguugh, molo eedi ịrol ịḍeghian nꞌalōor eedi mẹzo eedi tekōl eḍighi zodi.
ẠJizos aru ạson maḍiōbh nꞌịzal iteledōm obho
12Togbo amen opopo, pạJizos ạsiin tạnyu eegum mookpulughu, molo odi ạrol suo aakpulughu mẸnaan moomo uḍugul obho. 13Aḍio aru ạḅaal, podi abheleghi mobo bho nẹtuonom zodi obho iru talōor odi, keḍio odi aru ạson maḍiōbh nꞌịzal ibha ughōl bọ iteledōm obho. 14Eedi, ạSaimon (obho aḍien odi ughōl nạ aPita bho), nꞌẠndru umōr odi, nꞌaJems, nꞌạJon, aFilip nꞌaBatolomiu, 15aMatiu nꞌạTomos, aJems ọony tẠlifios, nꞌạSaimon obho ughōl bọ aZelot obho, 16nꞌaJudas ọony taJems, nꞌaJudas Ịskariot obho atẹn moḅoḍi rōoy obho.
Ịtughumiom nꞌalaakō tạJizos
17ẠJizos asōor nꞌoomo eedi mi teegum obho, podi aru ạmaranuan nꞌọlogh obo bho nẹtuonom odi obho mi tạḅarabh eegum obho. Eruom arōoy nẹeḍua taJerusạlẹm, nꞌoomo ebhugh aJudia, nꞌạraama aTaya nꞌaSaidon ibha idi tọtu ọbhiiny obho, etu todi. 18Eedi iru mọmoghon ịtughumiom odi nꞌookuaay asilōor eedi. Oomo obo bho ịkarabh ạruumugh nẹeḅaghami obho ẹkona eru nạ eekuaay nạ. 19Kōoy kōoy aḅe ghạ mokulaan odi be, ebum obho ịnyaam aluukua bho nẹeḍua todi neekōoy oomo eedi.
Ọḅaal ologhi nꞌịitu
20Keḍio ạJizos akiton tobo bho nẹtuonom odi obho ạkpete kua,
“Ọḅaal ologhi ilꞌenyina aruvekulom obho, ebum obho Ade-Ọolema bho tẸnaan aru milꞌenyina bho.
21Ọḅaal ologhi ilꞌenyina obo bho idi mọkoony siibha bho, ebum obho tọpere ni zenyina.
Ọḅaal ologhi ilꞌenyina obo bho nelegheey siibha bho, enyina tẹmologh ni.
22“Ọḅaal ologhi ilꞌenyina, tamen olo arōoy ịlogh enyina ḍien, igin enyina, irōnyōgh nạ enyina, ịkpeteey nạ enyina moḍigh kẹrekere ịkarabh tebum Ọony Oōy obho. 23Amen iibha bho nemutenaan enyina, pibo, mẹgher, mẹḅaal ologhi. Ibꞌigbōgh inwo mibha nookōbhōghi useerian enyina mi tạnyu obho. Pẹzo nạ ạburude eedi iḍighi nạ marizil obho tẸnaan.
24“Itōnyōgh ilꞌenyina obo bho iru rụula siibha bho, ebum obho enyina neele mẹela ibhꞌenyina bho.
25Itōnyōgh ilꞌenyina obo bho ạrubaraka enyina neemuzō siibha bho, ọkoony tạgurogh ni enyina.
Itōnyōgh ilꞌenyina obo bho nẹmologh siibha bho, ebum obho enyina nẹemologh ịman. Enyina teḍigh tịitu nꞌeḍi.
26Itōnyōgh ilꞌenyina tamen olo oomo arōoy tẹgba zenyina miiḅi, ebum obho ạburude eedi ịgba nạ miiḅi miben arizil obho.
Ẹzo ọrolom obo ọlogh aḍien ezira
27“Keḍio ạami nạgba kua ạnogho zenyina obo bho nẹmoghon obho, itulan mobo ọlogh ḍien enyina, memulumian ghạ miiḅi mobo bho ịlogh enyina ḍien obho. 28Ịnogho ghạ lịsebh mobo bho nẹkorogh enyina bho, meekpulughu ghạ mẹnogho mobo bho nẹgba ghạ zenyina mịkarabh obho. 29Oōy kaḅōr ạna tạgba onuma, pukiraan mạnogho zodi mopedi obho odi aḅōr nạ. Erumolo onyiin ōoy aru ạkporion mạsuoma onuma ạseghe, pụḅelemaan odi ạkporion nạ ạseghe mạforoko onuma. 30Kōoy kōoy olo agbẹel ạna mạar pụnogho. Kamen kamen olo ōoy ạseghe mạar onuma, ugbẹel ghạ mamina mabhin. 31Ḍighi mạnogho mịnon kẹzo bho ạna nạva molo eedi keḍighi kẹnogho ạna bho.
32“Okōr oḍigh ạlisebh mobho enyina tepin, erumolo enyina itulan mobo bho itulan enyina bho be. Mịin, pẹzo iḍighi mịkarabh obho neḍighi ghạ nạ. 33Okōr oḍigh ạlisebh nạ mibha enyina tepin, erumolo enyina iḍighi miiḅi ịnogho mobo bho iḍighi enyina miiḅi obho be. Iibha bho pibha iḍigh mịkarabh obho neḍighi ghạ nạ. 34Okōr oḍigh ạlisebh mobho enyina tepin, erumolo enyina ịnogho mạḅoole mobo bho enyina neḍuom ologhi momulumian enyina bho be. Pẹzo iḍighi mịkarabh obho neelian ghạ mobhin ibꞌạsuo. 35Íḍighi ghạ kua, itulan obꞌọlogh aḍien enyina, meḍighi ghạ miiḅi, mẹnogho ghạ mạḅoole tesi olo enyina ịteeny io mịitua olo omina omulumian enyina. Igbōgh ạlisebh tẹtol ni ẹnogho enyina molo enyina tetu mạnwuny tẸnaan obho ạbugh bọ apu obho. Odi omulumian ghạ ḍio mịkarabh mobo bho ilōghōm io moghōl ạlua bho nꞌobo bho ịteeny mọkarabh ẹmu obho. 36Ịsu ghụsan aḍien kẹzo bho Ọde enyina nạsu ghạ ghụsan aḍien obho.
Ọru ịiruan ọnogho ịnon
37“Ị́ru ghạ mịiruan mẹnogho mịnon molo Ẹnaan ọtu mịiruan ạnogho enyina. Ị́nogho ghạ mapum mịnon molo Ẹnaan ọnogho enyina mapum. Ịḅelemaan mịkarabh ịnon molo Ẹnaan ạḅelemaan enyina mịkarabh enyina. 38Ịnogho ạni mịnon pẸnaan ọnogho ạni enyina. Obꞌooḅi ọtuom, olo nọomaar uzighe, ụvimighi, imuzō nezuughian, pibha Ẹnaan tazu ạlogh tạravo enyina. Keḍio ọtuom obho enyina ibhin ịtuom ịnogho mịnon obho, pibha Ẹnaan tapin ạtuom ạnogho enyina nạ.”
39Keḍio ạJizos adōgh sidōgh obhobho ạnogho zeedi. “Oōy ikpom ariḍien orue ḍio areliom mọdo odi. Ibha odi ạghi mọkparam, pịzal eedi omeleghu oḍigh toonu. 40Ọony-otu ịtuugha olo apu mobo bho nạtughumiom odi obho olo. Keḍio amen odi nạaman mịtuugha bhꞌodi, podi oru ooleeny obo bho ạtughumiom odi obho.
41“Eeghe aḍighi kạna nạmiin ghạ meekuneen aḍien tumōr onuma keḍio obꞌọbhalakpa bho aḍien onuma ạna ọmiina ghạ ḍio? 42Ịkar ilegheri imute ẹko molo ạna obo bho dọmiina ḍio mobꞌọbhalakpa obho odi taḍien onuma bho ku tạki ạkpete ạnogho mumōr onuma akōl, ‘Umōr, tue ạami ụseghe meekuneen obho odi taḍien onuma bho?’ Sọo, obo olōghōma lōor, nalōghōm ghạ milo ịnon, pira mạseghia mobꞌọbhalakpa bhꞌaḍien onuma ku pạna orue ọmaar ọmiin ọseghe eekuneen obhꞌaḍien umōr onuma.
Tikpo oorẹeny obho polōghōm oḍigh oorẹeny obho
43“Oorẹeny olo aḍum amute magey ọloki ghạ ḍio mịbhuagh itu, bolobolo ẹkpagh oorẹeny ạloki miiḅi itu. 44Koorẹeny koorẹeny nolōghōm ghạ toḍigh itu obho odi ạloki obho. Ạkarara ọlogh ghạ ḍio male bolobolo izin oḍu ẹloki mitu ịleleezu. 45Ooḅi ōoy tapin tẹela iiḅi ọkpo bho idi tekpom odi obho aḍighiom miiḅi ọkpo amutiom, ọkarabh ōoy tamutiom mịkarabh ọkpo. Anem ōoy nasi ghạ amutiom mibha imuzō tekpom odi obho.
Ịzal oḍigh eḅōghōm otu
46“Ebum eeghe kenyina nepeleghi ghạ zạmi, ‘Obumọogh, Obumọogh,’ keḍio enyina ịtuugh ghạ ḍio eḍighi mibha ạami ụkpete ụnogho enyina bho? 47Ạami natu mọgba oḍeeriom enyina moḍigh ōoy olo aru tạmi, ạmoghon moghōrōkō ạmi, kạtuugh aḍighi mibhꞌoghōrōkō bhꞌạmi. 48Odi odi kōoy olo aḅōgh motu odi tọbharakpar ade, ạmaar agbo made bho akuḍumeni keḍio agbi mogimogh ikpiti otu obho, molo aḍigho nꞌogim iru inyuughi motu obho, keḍio otu obho oozighina ḍio. Ạmaar ni ạmara tebum obho ụmaar ni uḅōgh motu obho. 49Odi obo bho ạmoghon moghōrōkō ạmi kọtuugh io aḍighi bho, odi odi kōoy olo ạleleghiom ni be tade bho mikpiti otu obhꞌodi. Odi aḅōgh ạman, paḍigho nꞌogim iru inyuughi motu obho; otu obho ameel, molo, oghur emeel odi otu obho, ẹzo ọgba olo nolo.”
7ẠJizos aakō mẹbana ōoy oḅe rạagham olꞌaRom
1Amen ạJizos ạḍegheey moomo ạraḍeghe bhꞌodi ạnogho rōoy obho ạḅele, podi ạḍua atẹn ạghi tạKapaniom. 2Onyiin uvẹmụ oḅe rạagham ōoy olꞌaRom ạteeny monyiin ẹbana olo aḍigh magey tologhi odi. Odi ẹbana bho nạanwe natu mọbho. 3Odi ạmoghon mibha ạJizos natu obho, podi arōm mẹde arukenya arōoy aJu obho mobheleghi odi odi karu kaakō mẹbana bhꞌodi. 4Peedi iru tạJizos iisen odi magey moru, keḍio ịkpete kua ịnogho zodi, “Tue, ōoy obhobho nạkar ạva magey molo ạna kạbhel odi. 5Odi atulan magey rōoy ezira, molo odi aḅōgh monyiin otu iikpulughu ạnogho ezira.” 6PạJizos ạtuonom eedi ạghi. Odi natuan totu obho podi arōm bụrubulol odi mọkpete ọnogho ạJizos oghōl ekua, “Obo apu ạami, ụuḅaghami ghạ lōor onuma. Ạami ugbẹbh io molo ạna kaaku kaḍigh totu ạmi. 7Ạami ẹkona ugbẹbh io nạ moru ọmiin aghisigh onuma. Kpẹte mạar be pẹbana bhꞌạmi oḍum. 8Ạami ẹkona ōoy olo nọonogho mịnyaam ọto ịto, olo iḅe rạagham idi tẹeḍiani ạmi. Ibha ạami ụkpete ụnogho monyiin ughōl, ‘Kịa,’ podi ọghi, ụkpete ụnogho mọnon ughōl, ‘Tue,’ podi oru. Kạami ạkpete ạnogho mẹbana ạmi aghōl ‘Ḍighi miibha,’ podi ọtuugh oḍighi.” 9ẠJizos ạkar aamōogh magey mọmoghon ọnuekpete bhibha. Keḍio odi aghiraan tarōoy obho nẹtuonom zodi obho ạkpete kua, “Ạami nạgba kua ạnogho enyina, tạkar Izirẹl ẹkona, ạami dọmiin io moḍigh ologhi omōruōm obhobho.” 10Obo bho iru ịgba dōm obho imula isi totu, ẹbana bho naaḍum.
ẠJizos aḅẹtōn tọbho mọony ekpukele ạni
11Ịbam amen iru itẹn ạJizos ạghi tẹma olo ughōl aNen, odi nꞌiteledōm odi nꞌobꞌọlogh arōoy ịghi. 12Odi naḍigh kua be podi ạmiin mobꞌọlogh arōoy nꞌoḍim nemute tẹma bho. Oḍim obho ogini ọony ekpukele ạni, molo obꞌọlogh arōoy obho iḍigh ịkunu nꞌodi. 13Amen Obạmọogh obho ạmiin mạni obho, palōor odi azuum nꞌọsu ạghusan aḍien, keḍio odi ạkpete kua ạnogho mạni obho, “Uleghe ghạ.” 14Keḍio odi arele ạghi akulaan meḅina bho keḍio eedi obo bho irōol obho iru isōrōna. Keḍio ạJizos ạkpete kua, “Ọony, ạami nạkpete ạnogho ạna, ḅetunu.” 15Pōoy obho nạabho bho aḅetunu ạrol delede nạkpete mạar. Keḍio ạJizos aru ạseghe zodi ōoy obho ạlogh tạvo oniin obho. 16Kōoy kōoy aruugu isibh ni, keḍio ịrol nạ nebuom Ẹnaan nakōl kua, “Agey ozil tẸnaan naaru tezira. Ẹnaan naaru mọbhel arōoy odi.” 17Pịigbaay ọdu obho tạJizos ilela toomo ebhugh obhꞌaJudia nꞌoomo aruubhugh obho idi tọgbagi aJudia bho.
Ạnwuny adōm tạJon ozuughiom rụmuum obho
18Piteledōm tạJon ịghi ịgba ịnogho zodi moomo iibha bho. Keḍio odi ạJon abheleghi mịzal iteledōm odi, 19arōm eedi mọghi opuruan ekua mObạmọogh obho, “Gbạ mạnogho ezōor, ạna obo bho ạJon ạgba aghōl mu natu obho bẹlee kezōor oḅōrō mọnon?” 20Amen eedi iru tạJizos, peedi ịgba kua ịnogho odi, “ẠJon ozuughiom rụmuum obho arōm ezōor moru opuruan onuma kua, ‘Ạna pobo bho noonon obho bẹlee kezōor oonon mọnon?’ ” 21Tamen opopo ạJizos naakōoy moḍigh kẹrekere ạrazegh arōoy, apirighanogh mịkarabh ạruumugh, ạkparion nạ mariḍien ọlogh obo ikpom ariḍien obho. 22Keḍio odi ạbhagharana kua mạnwuny adōm obho tạJon, “Imula mẹghi mẹgba mẹnogho zodi ạJon mibha enyina nẹemiin ịmoghon obho. Obo ikpom ariḍien obho nẹmiin mạar, arukula bho neteleey, obo bho nẹnweey mạrazegh ịpueghi riiḅi obho neḍumogh, obo bho ịḅaaghabh obho nẹmoghon mạar, noḅẹriōn iḍim nạ tọbho bho, keḍio nọogba mọnuekpete ooḅi adōm obho nọnogho maruvekulom obho. 23Keḍio ạlisebh tẹtol ni ẹnogho mobo bho igonan io ạami obho.”
24Tamen olo ạnwuny adōm obho nẹeḍua, pạJizos ạke mọkpete ilo igboloman nꞌạJon ạnogho egi arōoy obho oghōl ekua, “Amen obho enyina ịghi tạJon mi tobꞌeekpu eḍum ọosaar obho kenyina ịitua mọmiin ẹkaraan? Enyina ịghi ghạ mobhōgha ịigho bho ọpibha nạpibhoghom obho? 25Enyina ịkar ịghi ghạ mọmiin eeghe? Enyina ịghi ghạ mọmiin ōoy olo abura mạravelvet? Obo bho neburaay ghạ miibha bho, sụ nẹtol ghạ tarutu ạruula. 26Ịkar ẹgba magey obho, enyina ịkar ịghi gha mọmiin eeghe? Ozil tẸnaan gạ? Ạkar agey nạni, mibha ạami nạgba ạnogho enyina bho, enyina ịmiin molo apu mozil. 27Odi ạJon pobo bho ẹegia bho ạgba bọ aghōl, ‘Nonon, ạami naarōm moteledōm ạmi moḍionom onuma taghisigh. Odi taḍionom taghisigh moselemi ebōom obho ọnogho onuma.’ 28Ạami nạgba kua ạnogho enyina, ạJon apu kōoy kōoy olo nọomar tesuo ẹmar-arōoy obho, keḍio oomo ipa ẹkona, obo bho asōoriōm bọ apu mi tAde-Ọolema bho tẸnaan apu zodi.”
29Oomo arōoy obho nꞌigunogh raasōgh obho, ibha ịmoghonyan bọ mạJon obho pobo ighiilaan mịto ebōom ọḅol otẹn obho tẸnaan, ịghi tạJon izua mụum. 30Arōoy aFarisi obho nꞌobo ịtughumiom iilōgh obho igin ni mịto bho tẸnaan, egin nạ mọghi ạJon kazuom eedi mụum.
31“Ạami tạkar apin ẹkaraan siibha bho ạtuom mạnwuny ọoke bhobho? Eedi kịkar ịgbaanan mẹkaraan? 32Eedi idi kạnwuny ilo idi delede mi taḍighi. Onyiin ẹku temulughu ẹkiom monyiin ekōl kua, ‘Ezōor uti miitia ipina ọnogho enyina enyina ịgher io. Ụmoor sọor ọbum ọnogho enyina, enyina ilegheey io.’ 33ẠJon ozuughiom rụmuum obho aru, ạrol mọkoony eḍien tebum iikpulughu agin miim, enyina ighōlōm odi mẹeraala. 34Ọony Oōy obho aru nale nạpoghol, enyina iinon zodi ẹpue eghōl kua, ‘Ịmiin obꞌẹḍogh ōoy obhobho nꞌọpoghoḍia rimiim. Odi ọbulol igunogh raasōgh nꞌiḍighi mịkarabh.’ 35Oomo ipa ẹkona, obo bho ibhinom obho neeḍighi nemutiom mobho olōghōm ạar tẸnaan iru magey.”
ẠJizos mi totu tạSaimon, onyiin ōoy aFarisi obho
36Onyiin ōoy olo aFarisi obho abheleghi mạJizos mole eḍian totu odi. PạJizos ạtuonuman odi ạghi totu ōoy obho, ạrol delede mole eḍian obho. 37Kir onyiin ạni olo naḍum ịkarabh aghuḍum tẹma odi ōoy obho. Odi ạmoghon mobho ạJizos naaru nale meḍian totu ōoy aFarisi obho, podi ạseghe monyiin okōtō elo olo nạkunu magey, 38ạghi ạmara tạman tạJizos mi tasike odi naleghe ạḅurughiom izin odi masike tạJizos. Keḍio odi aru ạseghe mạsilaan obhꞌodi agbulolom masike tạJizos, agbuluman ạapiibh, keḍio ạseghe mokōtō elo bho azuom. 39Amen ōoy aFarisi obho abheleghi bọ zodi obho ạmiin mibha ạni obho naḍighi obho, pạkpete kua tologhi odi, “Oōy obhobho ạkar aru mozil bọ, odi kulōghōm ni moḍigh ạni obho nakulughaan odi obho. Odi kulōghōm ni mịkarabh ạdol olo ạni obhobho naḍum.” 40PạJizos ạḅooranaan kua zodi, “Sạimon, kir ạar olo ạami ụteeny mọkpete ọnogho onuma.” Podi ạSaimon aghōl mụ “Gụa, Obo ịtughumiom, ḍẹghe.” 41Keḍio ạJizos ạke mọḍeghe. “Ịzal arōoy ịḅoole mạḅoole tạvo onyiin ōoy. Onyiin ạḅoole maḍiōbh ọonir anaira, opedi obho ạḅoole mọonir anaira. 42Ịzal eedi olo arue mọkpe olo. Pobo bho ạḅoolian eedi obho ạḅelemaan mịzal eedi. Tịzal eedi, ạna ụutua, oḍighen tatulan odi apu?” 43PạSaimon ạbhagharana kua, “Ạami nakōl obho ụḅelemaan bọ mịkanya bho.” PạJizos ạkpete kua, “Ạna ụmaar ịni ạḍeghe.” 44Keḍio odi aghiraan tạni obho, ạkpete kua ạnogho mạSaimon, “Ạna nạmiin mạni obhobho? Ạami uru totu onuma, bọbon ạmuum ạna ọnogho ḍio ạami mootōla asike ạmi. Keḍio ạni obhobho naatōlōm mizin odi masike ạmi, ạseghe mạsilaan odi agbulom. 45Ạna oḅolom io ạami ạloghom totu obhꞌonuma, keḍio oomo ạami uru, ạni obhobho dọḅele ḍio mọopiibh asike bhꞌạmi tetulan. 46Ạmunu olo ạna usigh tẹmu ạmi olo, keḍio odi ạni obhobho naasigh moomo asike ạmi melo ạlikunu. 47Ạami nạgba kua ạnogho ạna siibha bho, tibꞌetulan obhꞌodi nẹgba emutiom mobho nọoḅelemaan mịkarabh odi. Keḍio obo bho ụḅelemaan ịbam obho atulan nạ mịbam be.” 48Keḍio ạJizos ạkpete kua ạnogho mạni obho, “Nọoḅelemaan ạna mịkarabh onuma.” 49Pipedi obho idi ạni nele meḍian obho ịrol ịghunughun tiloghi eedi nekōl kua, “Odi oobho bho kokōr ōoy, olo nạḅelemaan nạ mịkarabh arōoy?” 50Keḍio ạJizos amula ạkpete kua ạnogho mạni obho, “Kẹel nꞌekima, ologhi omōruōm onuma nạabhel ạna atẹnẹ.”
8Ạraani ilo ịtuonuman mạJizos
1Ịbam amen itẹn pạJizos ạḍua mẹma atẹn mẹma, tigbōgh nꞌịbam ạraama bho, nạgbaay ghạ mọnuekpete ooḅi adōm obhꞌAde-Ọolema tẸnaan. Aḍiōbh nꞌịzal iteledōm obhꞌodi ịghi ạni, 2nꞌẹde ạraani ilo ạJizos abhirighanogh mịkarabh ạruumugh tẹmu eedi nꞌilo odi aakōoy rạzegh ịghi ạni nạ. Ạraani bhibha paMeri obho ạMagdala, obho ạJizos abhirighanogh moḍual ịkarabh ạruumugh tẹmu obho, 3nꞌaJoạnạ, ạni taSiuza, obho aru muvẹmụ oḍighi otu tạHerod obho, nꞌạSuzana, nꞌọlogh ịnon ạraani. Eedi pobo ịnoghooy ghạ mạJizos nꞌiteledōm obhꞌodi kạar kạar olo nẹeḅaghami zeedi.
Asidōgh oḅẹbh miḅẹbh obho
4Tamen olo obꞌọlogh arōoy ịḍua toomo oḍigh kẹrekere ạraama bho iru tạJizos, podi adōgh sidōgh obhobho, 5“Onyiin amen keḍio onyiin oḅẹbh miḅẹbh ạghi moḅẹbh iḅẹbh ịbiakpa. Ẹzo bho odi aḅẹbh naadu obho, pẹtede imeleghu tebōom keḍio ụuzeghi, ịnun iru nạ ikpologh ile. 6Ẹtede imeleghu tọbharakpar ade. Ịke kua be mosi, pịnyurughan ịikaraghan ịbhozu ebum obho ạmuum ilo tade bho. 7Imina ẹde imeleghu tade iiḅulom olo iiḅulom obho isiom igimogh eedi, keḍio eedi iru ịnyurughan. 8Ipedi obho imeleghu tooḅi ade keḍio iru ịmaar isi ịloki nạ magey molo uru uḅun mịzal ạraala nꞌaḍisibh itu.” Keḍio odi amina ạkpete miibha bho ạḅaram, aghōl kua, “Kōoy kōoy olo ạteeny raḅeri mọmoghon ạmoghon!”
Ạar obho aḍighi kudōgh sidōgh obho
9Pobo bho, nẹtuonom odi obho ipuruan zodi mẹmu asidōgh obho, 10keḍio odi ạbhagharana kua, “Nọonogho enyina mịikpo molōghōm ẹmu ọkpo ẹḅokia ibhꞌAde-Ọolema bho tẸnaan, keḍio ipedi obho todōgh sidōgh kọnogho, molo eedi neenonom nꞌariḍien eedi keḍio ịmiin io, nẹmoghon keḍio ịmoghonyan io.”
Ẹmu asidōgh oḅẹbh miḅẹbh obho
11“Oobho pẹmu asidōgh obho. Ikpo ịbiakpa bho, pọnuekpete bho tẸnaan. 12Ibha imeleghu bọ tebōom obho, parōoy ilo ịmoghon ni be, pEru obho aru ạḅirogh dōm obho mi tiloghi obhꞌeedi, molo eedi ị́moghonyan ẹteeny ạni mịbhelegha bho tẸnaan. 13Ibha imeleghu bọ tọbharakpar ade bho parōoy ilo ịmoghon dōm obho pibhinom nꞌooḅi ologhi keḍio adōm obho osi ḍio agbeeny tiloghi obhꞌeedi molo eedi imōruōm mọbam amen be. Ọdegh oonon aru be peedi imeleghu. 14Ibha imeleghu bọ tade iiḅulom obho pobo bho ịmoghon bọ dōm obho keḍio ịiḅaghami nꞌẹela nꞌẹmel aghuḍum obhobho iru igimogh zeedi molo itu obhꞌeedi ịkua ḍio nọghua. 15Ibha imeleghu bọ tooḅi ade bho pobo bho ịmoghon dōm obho iseeri tiloghi eedi nꞌoghiilaan ninii iru ịteeny mamen eedi tẹlokiiy.”
Asidōgh ọtodi olo ụsu ụlogh tạgbugba
16“Bọbon ōoy olo tạsu mọtodi ạlogh tạgbugba akpereghi bolobolo ạlogh tẹeḍiani ẹmuna olo. Nọḅam ghạ tạnyu ạbebe molo obo bho teḍigh totu obho ẹmiin mạar. 17Kạar kạar olo ụḅoki, nꞌaḍuma nꞌaḍuma tomutiom togbo etẹrẹ. Ibha ukpereghi obho tokpẹerōn ni omutiom tẹḅaal.
18“Igona lōor enyina mi tibha enyina nẹmoghon obho. Obo bho aḍigh ạteeny obho, tomina ni ọnogho zodi ọḅaram tibha odi ạteeny obho, keḍio obo bho ọteeny io bho, ịbam obho odi ạteeny obho tọḅoor ni zodi.”
ẠJizos nꞌoniin nꞌaburumōr odi
19Onyiin amen olo oniin nꞌaburumōr tạJizos iru todi, irue ḍio mọmiinan odi tebum obꞌọlogh arōoy obho. 20Pụgba ụnogho zodi moniin onuma nꞌaburumōr onuma idi tetẹrẹ, nẹva mọmiin onuma. 21PạJizos ạkpete kua ạnogho moomo eedi, “Oniin ạmi nꞌaburumōr ạmi pobo bho ịmoghon bọ madōm tẸnaan kighiilaan obho.”
ẠJizos adenyemi mogim ọbhiiny
22Onyiin aḍuma olo ạJizos nꞌiteledōm odi iḍigh toghuugh, podi ạkpete kua ạnogho zeedi, “Itu ọḅeeny ọghi tẹḅeenyom obꞌegha ọbhiiny bho,” peedi imutiom. 23Ẹzo bho eedi ịzoghi nẹki obho, pạJizos ạmaghanan nakoḍi. Keḍio obꞌogim asōor nagim, molo oghuugh obhꞌeedi natu moḅi. 24Tẹzo bho ogim obho naḅōrōghom moghuugh obho, piteledōm obho ịghi ịsumeen zodi ịkpete kua, “Ọde-otu, ọde otu, ḅetunu ezira nope.” Keḍio odi aḅetunu ạkpete kua ạnogho mogim obho, “Deny,” pogim obho ọbhiiny obho aru adeny. 25Keḍio ạJizos apuruan kua zeedi, “Oḍighen ologhi omōruōm obhꞌenyina?” Emōogh nꞌaruugu esibh eedi magey, molo onyiin ạrol apuruan kua monyiin, “Odi ōoy obhobho kokōor ōoy? Ibha odi ạto ạnogho mogim obho nꞌopōkō ạmuum obho, peedi ighiilaan nạ zodi.”
ẠJizos aakō mōoy olo ạteeny mịkarabh ạruumugh
26Peedi ịzoghi ịḍua taGalili ịghi tẹḅeenyom obꞌegha bho mi tebhugh obhꞌaGerasin. 27Ẹzo bho ạJizos napun kua be, podi ạmiinan mōoy olo ạteeny mịkarabh ạruumugh tẹmu odi, bho ạḍua tẹma bho natu. Kọkanya amen ukpe nꞌodi ạar oḍighiom olo, orugh ghạ nạ ḍio totu, natugh ghạ taruugu ọkarabh eḍum obho. 28,29Ọlogh amen mobho ọkarabh ẹmugh obho napum ghạ zodi, molo nọpaḍiom ghạ sike nꞌạravo odi magbirigbiri ọkpuom toorẹeny keḍio odi taagbo ni magbirigbiri obho, aḅuni moorẹeny obho akiil aḍigh tobꞌeekpu eḍum ọosaar obho. Amen odi ạmiin mạJizos podi amuughu ameel taghisigh tạJizos ạkpetiom nꞌobꞌoghōrōkō aghōl kua, “ẠJizos, ọony tẸnaan obho ạbugh bọ apu obho, ạna nạva moḍighi ẹko zạmi? Sesen ni, ụliom ghạ zạmi.” Odi ạkpete miibha bho tamen olo ạJizos ạkpete ạnogho mọkarabh ẹmugh obho momute tẹmu odi ōoy obho. 30PạJizos apuruan kua zodi, “Aḍien onuma kughōl ẹko?” Podi ạbhagharana aghōl kua, “Ọlogh,” — ebum obho ịkanya ịkarabh ạruumugh neeḍigh tẹmu odi ōoy obho. 31Peedi ịkarabh ạruumugh obho iikpulughu mạJizos molo odi opirighan eedi ạlokioghom tobꞌoonu obho ikunughi olo bho.
32Atuan nꞌodi esi obho eedi idi obho, kir obꞌọlogh arabhōrōpō ilo nẹḅal mịḅal tọtu aruugum obho. Peedi ịkarabh ạruumugh obho iisen mạJizos igbẹel odi molo odi kabhirighan eedi eedi keḍiku tarabhōrōpō bho, podi ạḅelemaan eedi mọghi oḍigh. 33Pịkarabh ạruumugh obho ịḍua tẹmu ōoy obho ịghi iḍiku tarabhōrōpō bho. Poomo eedi arabhōrōpō bho iikilaay tạḅarabh aruugum obho ịghi imeleghu tobꞌegha ọbhiiny obho ịguḅaay.
34Arōoy obho neteliom marabhōrōpō bho ịmiin miibha bho, peedi ighiil ịghi tẹma bho nꞌoomo obo bho idiighu taruuḍum obho ịgba iilelemi mibha imute bho. 35Parōoy obho iruughu mọmiin ạni ibha imute bho. Eedi iru peedi ịmiin mạJizos nꞌodi ōoy obho ịkarabh ạruumugh obho nẹeḅele ịḍua bho, bho odi delede tasike tạJizos naamina mukpe, nạmoghonyan nạ rōoy, molo aruugu isibh moomo eedi. 36Keḍio obo bho ịmiin ạni obho ịgba ịnogho rōoy obho mẹzo ạJizos aakō mōoy obho. 37Poomo arōoy ibha ịḍua tebhugh obhꞌaGerasin iru obho, iikpulughu mạJizos mọḅele ebhugh eedi ọḍua, tebum ibꞌaruugu obho nesibh eedi obho. Podi ạJizos aḍigh moghuugh obho momula oghẹel. 38Pōoy obho ịkarabh ạruumugh obho ịrol ịiḅaghami obho aasen odi aghōl kua, “Sesen ni, ạami ụtuonuman ạni ạna.” PạJizos ạkpete kua ạnogho zodi, 39“Mula maghẹel totu enyina mạgba miiḅi ọkpo bho Ẹnaan naaḍighi ạnogho ạna bho.” Podi aghẹel ạgba moomo ibha ạJizos aḍighi ạnogho zodi obho aalelemi toomo ẹma bho.
ẠJizos nꞌọnyani obho taJairos, nꞌạni obho akulaan bọ mọdu ukpe odi obho
40Amen ạJizos amula aghẹel mi tẹḅeenyom obꞌegha bho, ọlogh arōoy ilo neḅōrō zodi ebuom odi magey. 41Ponyiin ōoy olo ughōl aJairos, uvẹmụ onyiin otu iikpulughu obho, aru agbuluman taghisigh tạJizos, aasen odi mọtuonom odi ọghi totu odi. 42Ogini ọnyani odi olo naagbẹbh maḍiōbh nꞌịzal ạsia nạanwe natu mọbho. Ẹzo bho ạJizos nạki obho, arōoy obho nẹeninighian tekẹeny nꞌoḍiom odi. 43Togbo arōoy obho, kir onyiin ạni olo nạanwe mẹzegh ạraani moomo aḍiōbh nꞌịzal ạsia. Odi naarōḅōḍi moomo ikpoki odi mi tarizil, keḍio olo arue mookō odi olo. 44Podi ạniiran rōoy obho mi tạman tạJizos, ạghi akulaan mọdu ukpe bho tạJizos. Palōor obhꞌodi aru ạneghe tonyiin amen obho. 45PạJizos ạmara apuruan kua, “Okōr ōoy akulaan ạmi?” Bọbon ōoy olo aru aatuma olo, keḍio aPita ạkpete kua, “Obo ịtughumiom, tobꞌọlogh arōoy bhibha ịniiran ạna kua bho, keḍio ạna napuruan mobo akulaan ạna?” 46Keḍio ạJizos ạbhagharana kua, “Onyiin ōoy naakulaan ạmi. Ạami naalōghōma ịnyaam nẹeḍua talōor ạmi.” 47Amen ạni obho ạmiin mobho odi otue mu ạḅokia bho, podi ạghi agbuluman taghisigh tạJizos. Alōor odi napiigha, keḍio odi ạrol taghisigh ogbo arōoy obho aatuma mobho odi akulaan mạJizos nꞌẹzo odi aakua lōor odi tamen obho odi akulaan mọdu ukpe tạJizos obho. 48PạJizos ạkpete kua ạnogho zodi, “Ọnyani ạmi kẹel nꞌekima. Ologhi omōruōm onuma naakō ạna.”
49Odi odi nini nạkpete miibha bho, men ọony adōm ạḍua totu uvẹmụ ōoy otu iikpulughu obho aru ạkpete kua ạnogho maJairos, “Umina ghạ mạga mạaḅaghami mọtughumiom ịtughumiom obho. Ọnyani onuma nạabho.” 50PạJizos ạmoghon keḍio ạkpete kua ạnogho maJairos, “Ughiil ghạ ruugu. Mōruōm be, pọnyani obhꞌonuma oḍum.” 51Amen odi ạJizos ạghi asi totu obho, odi umōrō ḍio nomōrō molo arōoy keḍigh totu obho, keḍio odi abhirighanogh rōoy obho. APita nꞌaJems nꞌạJon, nꞌọde nꞌoniin ọnyani obho be mobo ịrol ạni. 52Oomo arōoy obho neeḍigh tịitu nelegheey mebum odi ọnyani obho, keḍio odi ạkpete kua, “Íleghe ghạ. Ọnyani obhobho ọbho ḍio, odi nakoḍi ni.” 53Oomo eedi ịmologh ịiḅaghami odi tebum obho eedi neelōghōm mobho ọnyani obho mạabho. 54Keḍio odi ạJizos ạbham mạvo ọnyani obho ạkpete kua, “Ọnyani obho, ḅetunu.” 55Pọnyani obho amula tonyiin amen obho keḍio odi ạJizos ạkpete ạnogho zeedi mọnogho odi meḍian, odi kale. 56Ọde nꞌoniin obhꞌodi iimōogh ni keḍio ạJizos ạkpete ạnogho eedi meedi ịgba ḍio ẹnogho mōoy mibha imute bho.
9ẠJizos arōm maḍiōbh nꞌịzal obho mọghi ọgba adōm obho
1Keḍio ạJizos abheleghi aakōbhōghi monyiin esi maḍiōbh nꞌịzal iteledōm obho ạnogho eedi mịikpo nꞌịnyaam mobhirighan oomo ịkarabh ạruumugh tạruumu arōoy nꞌookōoy oḍigh kẹrekere ạrazegh. 2Keḍio odi arōm zeedi mọghi ọgba adōm Ade-Ọolema bho tẸnaan nꞌookōoy arōoy ilo nẹnweey. 3Keḍio odi ạkpete kua ạnogho zeedi, “Terele bhꞌenyina, ịbham ghạ bọbon onyiin ạar, ịbham ghạ mẹḅu bolobolo ẹḅa bolobolo eḍian bolobolo ikpoki, ịbham ghạ nạ mịzal ạrusuoma. 4Kotu kotu olo ibhin enyina ịloghom, ịtol todi otu obho ninii ạteeny mamen enyina tẹḍua tẹma bho. 5Kẹma kẹma olo enyina ịghi karōoy obho ibhin io enyina ẹloghom, amen enyina nẹḍua, pigunugun mobhugh asike enyina metuḅeḍi mookiom eedi.” 6Piteledōm obho iḅerenu ịghi toomo ạraama bho ịgbaay mọnuekpete ooḅi adōm obho iikōoy nạ rōoy kesi kesi olo eedi ịghi.
ẠHerod orue ḍio mọmoghonyan ịitua odi
7Amen ạHerod ọolema bhꞌaGalili aru ạmoghon moomo ibha nemuteey obho, odi orue ḍio mọmoghonyan ebum obho oomo arōoy obho ōoy ọnu ọnu nạgba. Ẹde arōoy nẹgba kua, “ẠJon ozuughiom rụmuum obho naaḅetunu tọbho bho.” 8Ẹde nẹgba kua, “Ilaija naaru.” Imina ẹde monyiin ozil ooḍuul obho naaḅetunu tọbho bho. 9Keḍio odi ạHerod ạkpete kua, “Sạami usōbh mẹmu tạJon, kōoy obhobho ạami digha ạmoghon obho kokōr ōoy?” Keḍio odi nạva ghạ mọmiin odi ạJizos.
ẠJizos abhin ịbam eḍian ạbheremiom maḍiōbh nꞌịzal nꞌạmaḍian ọonir arōoy
10Amen iteledōm obho imula irughẹel, peedi ịgba kạar kạar ilo eedi iḍighi ịnogho mạJizos, podi abhin eedi be ạghi tẹma olo ughōl aBetsaida. 11Amen arōoy obho ịva ilōghōm mesi obho odi odi obho, peedi ịtuonom odi. Odi obhirighan io zeedi keḍio ạgba ạnogho zeedi mọnuekpete adōm Ade-Ọolema bho tẸnaan, aakōoy nạ mobo bho nẹnweey rạzegh obho.
12Natu moghul, piteledōm obho ịghi todi ịkpete kua ịnogho zodi, “Kpẹte mạnogho rōoy obho eedi ẹghi tạraama bho nꞌaruuḍum ariḍighi ibha ituan obho ẹva mạar olo eedi tele nꞌesi olo eedi tẹmanaghonogh, ebum obho esi obho ezira idi obho otu ḍio mẹma.” 13Podi ạkpete kua ạnogho zeedi, “Enyina ịnogho zeedi mạar olo eedi kele.” Peedi ịbhagharana kua, “Oomo ạar obho ezōor ụteeny suo, pōogh eḅol ạbred nꞌịzal ina. Ạna nạva molo ezōor kọghi koghō mariḍian kookuōm mobo ọlogh arōoy bhibha bẹle?” 14Keḍio arōoy obho idi obho tegbẹbh ni maḍiōbh nꞌịzal nꞌạmaḍian ọonir arōoy. Keḍio ạJizos ạkpete kua ạnogho miteledōm obho, “Iḍighi arōoy obho ẹḍianogh rụuku ẹrologhu delede, ẹku esuo erubal ḍiōbh, erubal ḍiōbh arōoy.” 15Peedi ịtuugh nạ mẹzo bho iḍighi arōoy obho ịrologhu delede. 16PạJizos ạseghe mōogh eḅol ạbred obho nꞌịzal ina bho, ạbham tạvo, aanon tạnyu, keḍio ạnogho lịsebh mẸnaan, aḅigi ạnogho miteledōm obhꞌodi mọḍiiy ọnogho arōoy obho. 17Poomo eedi iru ile ạrubaraka eedi imuteey, molo iteledōm obho imina iru iikōbhōghi maḍiōbh nꞌịzal ạrukpaagh tibha arōoy obho ile isugheeny obho.
APita ạgba mạJizos amutiom
18Tonyiin aḍuma olo ạJizos be odi mesi naakpulughu, piteledōm obhꞌodi iru todi. Podi apuruan kua zeedi, “Arōoy obho ku nekōl ghạ mạami kokōr ōoy?” 19Peedi ịbhagharana kua, “Ẹtede nekōl ghạ mạna ạJon ozuughiom rụmuum obho, ẹde mạna Ilaija, imina ẹde mạna onyiin ozil ooḍuul obho olo aḅetunu tọbho bho.” 20Keḍio odi apuruan kua zeedi, “Tenyina, kenyina nekōl ạni mạami kokōr ōoy?” PaPita ạbhagharana kua, “Ạna ạMesaya bho Ẹnaan aguanaan obho.”
ẠJizos ạgba amutiom mọmiinom nꞌọbho bhꞌodi
21PạJizos ạmaar aakiom eedi meedi ịgba ḍio miibha bho ẹnogho mọnon ōoy, 22keḍio odi amina ạkpete kua, “Ọony Oōy obho tạmiinom ni magey, keḍio arukenya bho nꞌarōoy iiḅua bho nꞌobo ịtughumiom iilōgh obho tegin nạ zodi, tokigh ni zodi, keḍio togbẹbhiōm ịraar aḍuma bho poḅẹtōn odi tọbho bho.” 23Keḍio odi amina ạkpete kua ạnogho moomo eedi, “Kōoy kōoy olo nạva mọtuonuman ạmi, odi taḅulo ni ghuḍum odi aḅẹtōn atōol moorẹeny ẹmigheri obhꞌodi moomo aḍuma ạtuonuman ạami. 24Kōoy kōoy olo nạva moḍume aghuḍum obhꞌodi tapiẹmi ni, keḍio odi obo bho napiẹmi ghuḍum odi mebum ạmi obho taḍume ni. 25Okōr oḍigh ạsuo mobho ōoy tạteeny erumolo odi agbo mẹela oomo ẹmar-arōoy obho; keḍio abhiẹmi ghuḍum obho Ẹnaan ạnogho zodi obho? 26Kōoy kōoy olo nakiil zạmi nꞌịtughumiom obhꞌạmi rẹgheer; odi pobo Ọony Oōy obho takiil nạ rẹgheer tamen olo odi tatu mi teghuan obhꞌodi nꞌeghuan Ọde bho nꞌoomo iiḅi itelema bho tẸnaan. 27Ịitua miibha bho ạami nạgba kua ạnogho enyina, ẹde enyina obo bho idi suo siibha bho ịbho ḍio ninii eedi tẹmiin mAde-Ọolema bho tẸnaan.”
Aḍuma olo alōor tạJizos anweeghian
28Tesi olo oḍual aḍuma neetẹn tamen obho odi ạḍegheey mọkpo bhibha bho, pạJizos abhin maPita nꞌạJon nꞌaJems ịghi ịsiin tạnyu eegum mookpulughu. 29Tiikpulughu obhꞌodi, paghisigh odi anwian, nꞌibura bhꞌodi iru nẹmua kaghōzōgh obho. 30Tekperenom pịzal arōoy iru nẹḍeghian nꞌodi. Eedi ịzal arōoy bhibha paMozis nꞌIlaija. 31Eedi ịḍua tạnyu eghuan obho eru ẹgba nẹnogho mạJizos mẹzo odi tạpo taJerusạlẹm moḍighi obhulughiom ibhꞌọnuekpete bho tẸnaan. 32APita nꞌịzal ipedi obho nẹemaar ẹmanaghonogh nekoḍiiy, eedi ịsuma tạrala bho, peedi ịmiin mạJizos nꞌeghuan obhꞌodi nꞌịzal arōoy obho ịmaranuan odi obho. 33Ẹzo bho arōoy obho ịḅele mạJizos nẹḍua, paPita ạkpete kua ạnogho zodi, “Obo ịtughumiom, ịkar ni ẹneghe magey mẹzo bho ezira idi suo bho. Ezōor togim ịraar arutu suo, onyiin olꞌonuma, onyiin olo taMozis, onyiin olo tIlaija.” Odi nịvo nịvo ọkar io alōghōm mạar olo odi nạkpete. 34Odi odi nini nạḍeghe miibha bho, pọbhurubuur aru akpiom eedi molo aruugu isibh miteledōm obho. 35Keḍio eedi ịmoghon moghōrōkō tọbhurubuur obho ạkpete kua, “Oobho ọony ạmi obho ạami nạason ụseghe bho, ịmoghonyan zodi.” 36Amen eedi ịḅele mọmoghon oghōrōkō bho, piru isughōnōm mạJizos be. Iteledōm obho ipua ni mịnu eedi, ịgba ḍio nọgba bọbon onyiin ibha eedi ịmiin obho ẹnogho mōoy tamen opopo.
ẠJizos aakō mọony olo ọkarabh ẹmugh nạaḅaghami
37Aḍio ạḅaal eedi ịḍua tạnyu eegum obho isōor, pobꞌọlogh arōoy iru itulom odi ạJizos. 38Ponyiin ōoy togbo obꞌọlogh arōoy obho amulughu amutiom aghōl kua, “Obo ịtughumiom, sesen ni, sụanaan ghụsan aḍien mọony ạmi. Odi be mogini ọony ạmi. 39Mịin. Ọkarabh ẹmugh naaḍigh tẹmu odi nazighe zodi molo namulughu ghạ motoḍigh imulughu keḍio tatōbh nạ zodi toonu molo oobha nefugh ghạ nạ tọnu obhꞌodi, naḍighi ghạ nạ kua zodi moomo amen, molo ọva ghạ nạ ḍio momina ọḅele odi. 40Keḍio ạami ubhin odi uru uusenom miteledōm obhꞌonuma mobhirighan ọkarabh ẹmugh obho tẹmu odi, keḍio eedi irue ḍio.” 41PạJizos ạbhagharana kua, “Sey, oobho kokōr oḍigh ọkarabh ạmuum arōoy ilo iloghi omōruōm ilo! Enyina nꞌạami tomina ọtolan ẹko? Ạami tạkurughiom enyina ninii kokōr amen? Pin mọony obho mōruōm ạami.” 42Ẹzo bho ọony obho natu obho, pọkarabh ẹmugh obho akuugh mọony obho ạgurom tade bho kagbam, molo alōor obhꞌodi napiigha. Keḍio ạJizos ạbhooruom mọkarabh ẹmugh obho, aakō mọony obho, abhin zodi amulumi ạnogho mọde bhꞌodi. 43Oomo arōoy obho iimōogh ni teghuan ịnyaam obho tẸnaan.
ẠJizos amina ạgba milo igboloman nꞌọbho bhꞌodi
Arōoy obho idi nini teemōogh mi toomo ọkpo bho ạJizos naḍighi obho, podi ạJizos ạkpete kua ạnogho mobo bho nẹtuonom odi obho, 44“Ịmaar ẹbhamaghiom mibha ạami natu mọkpete ọnogho enyina bho: tokuugh ni mỌony Oōy obho ọlogh tạravo arōoy ịnyaam ẹmar-arōoy obhobho.” 45Keḍio iteledōm obho irue nạ ḍio mọmoghonyan odi. Ụḅoki ni zeedi molo eedi ịmoghonyan, keḍio eedi ẹkona ine nạ ḍio mopuruan odi mẹmu ọnuekpete bho.
Ịkanan iteledōm obho mobo tapu moomo eedi
46Onyiin amen piteledōm obho nẹkanan nꞌalōor eedi mobo tapu moomo eedi, 47ạJizos naalōghōm mịitua bhꞌeedi podi abhin monyiin ọbumoony ạmarami talōor odi, 48keḍio ạkpete kua ạnogho zeedi, “Kōoy kōoy olo tapin mọbumoony obhobho ạloghom talōor odi mi tebum aḍien ạmi, pu naabhin nạ zạmi ạloghom, keḍio kōoy kōoy olo abhin ạami ạloghom, pu naabhin nạ ạloghom zodi obo bho arōm ạami obho. Obo bho ọtuom io lōor odi mōoy togbo bhꞌenyina bho pobo tapu moomo enyina.”
Kōoy kōoy olo ọgbaghan io enyina paḍigh nꞌenyina
49PạJon ạkpete kua amutiom, “Ọde otu, ezōor ụmiin monyiin amen mōoy olo abhin taḍien onuma napirighanogh mịkarabh ạruumugh, keḍio ezōor ụpuenaan odi ebum obho odi olo ạni tẹku ezōor obho.” 50Keḍio ạJizos ạbhagharana ạkpete kua ạnogho zodi, nꞌiteledōm ipedi obho, “Ị́puenaan ghạ zodi ebum obho kōoy kōoy olo ọgbaghan io enyina paḍigh nꞌenyina.”
Onyiin ẹma aSameria igin ni mạJizos
51Aruḍuma bho ạJizos tạsiin bọ tạnyu obho netuan, podi ạto ạnogho lōor odi monyeneni taJerusạlẹm. 52Podi arōm mạnwuny adōm moḍionom ghạ taghisigh ọghi tonyiin ẹma aSameria ookōbhōghia kạar kạar oḅōruōm odi. 53Odi aru asi arōoy ẹma bho igin ni mobhin odi ọloghom, ebum obho neemute ịman talōor odi mobho odi nạki taJerusạlẹm. 54Amen aJems nꞌạJon iteledōm obho ịmiin miibha bho, peedi ịkpete kua, “Obumọogh, ezōor obheleghi nyạn tạnyu obho asōor aru akunu zeedi?” 55PạJizos aghiraan asi zeedi. 56Keḍio eedi ịḍua tẹma popo ịghi tọnon ẹma.
Ọnuekpete olo igboloman nꞌobo bho nẹva mọtuonom ạJizos obho
57Eedi iḍigh tebōom, ponyiin ōoy aru ạkpete kua ạnogho mạJizos, “Ạami tạtuonuman ạni ni ạna kesi kesi olo ạna nạki.” 58PạJizos ạkpete kua ạnogho zodi, “Ạraakpa nꞌaraapōgh eedi, ịnun nꞌarutu eedi, keḍio Ọony Oōy obho bọbon esi otuḅeen ẹmu odi obhooghia olo.” 59Keḍio odi ạkpete kua ạnogho mọnon, “Tụonuman ạami”, podi ōoy obho amulumian kua zodi, “Oōy, ạami tatu ni keḍio ḅẹle ạami upira ụki ụḍi mọde ạmi kụ.” 60PạJizos ạbhagharana kua zodi, “Ḅẹlemaan obo bho nẹebhozu obho eḍi miḍim eedi, keḍio ạna kịa mạgba ọnuekpete adōm Ade-Ọolema bho tẸnaan.” 61Pọnon ōoy ạkpete kua ạnogho zodi, “Oōy, ạami tạtuonuman ạni ni ạna, keḍio ḅẹle ạami ụki totu ukōl ‘Ịmaar ẹrol’ motu ezōor ku.” 62PạJizos amulumian kua zodi, “Kōoy kōoy olo nạsiin mogbo ale kaanon tade ogbẹbh io moḍigh ạni tAde-Ọolema bho tẸnaan.”
10ẠJizos arōm ạbhenya ilo mịzal ạraala arōoy amutiom
1Iibha iru itẹn, pObạmọogh obho ạson mịnon ạbhenya ilo mịzal ạraala arōoy amutiom zạl zạl esi moḍionom odi taghisigh ọghi toomo ạraama nꞌariisi ilo odi nạva mọghi. 2Keḍio odi ạkpete kua ạnogho zeedi, “Oḍighi iḅua oḍighi obho ạbugh magey, keḍio obo oḍighi oḍighi obho igbẹbhan io. Iikpulughu mẹnogho mobo bho oḍighi obho molo odi atōm mịnon arōoy moru oḅuuy ạni eḍian oḍighi obho. 3Ịki, ạami natōm enyina kạnwuny ạraana mi tesooḍia ạrukurunuma. 4Ịbham ghạ mikpoki nꞌẹḅa bolobolo arakōrō. Ị́mara ghạ mebheleghian mipeleghian mebhiẹmi men enyina mi tebōom. 5Kamen kamen olo enyina iḍigh totu ōoy, ipira ghạ meghōl kua, ‘Ekima ẹrol totu obhobho!’ 6Erumolo ōoy olo tapin mekima bhꞌenyina natugh totu obho, pịḅelemaan ekima bhꞌenyina ẹrolan odi. Kerumolo ōoy olo odi kua olo, pịseghe mekima bhꞌenyina mẹḍuonom. 7Ịtol tonyiin otu mele mẹbhoghol kilo kilo eedi ịnogho enyina. Ịkpe ni molo obo bho naḍighi moḍighi obho kabhin mạmukpe oḍighi odi. Ị́ḍua ghạ motu metẹn otu. 8Kẹma kẹma olo enyina ịghi kebhin enyina ẹloghom, pile kạar kạar olo eedi ịnogho enyina, 9iikōoy mobo bho nẹnweey rạzegh obho, mẹkpete kua mẹnogho marōoy ẹma bho mAde-Ọolema bho tẸnaan odi tẹeḅa ạvo. 10Kenyina ẹghi tẹma olo ipin io enyina ẹloghom, pimute tetẹrẹ ẹma bho mẹkpete kua, 11‘Obhugh ẹma bhꞌenyina ibha idi tasike ezōor obho ẹkona, ezōor noogunugun umulumian enyina, keḍio ịitua miibha bho. Ade-Ọolema bho tẸnaan odi tẹeḅa ạvo.’ 12Ạami nạkar ạgba kua ạnogho enyina taḍuma ịiruan bho ọsu ghụsan aḍien olo Ẹnaan tạsuanaan mạSodom tepu mibhꞌẹma popo.”
Ilo temutenaan mạraama bho imōruōm io bho
13“Itōnyōgh tẹtol ni ẹnogho zenyina arōoy ibhꞌaKorazin. Itōnyōgh tẹtol ni ẹnogho zenyina nạ arōoy ibhꞌaBetsaida. Ughōl ọkpo ịiḍaany obho nooḍighi tenyina bho, kuḍighi taTaya nꞌaSaidon, kōl eedi neeḍigh tịitu ekiraan tịkarabh eedi kọkanya amen. 14Taḍuma ịiruan obho, ilo Ẹnaan tạsuanaan ghụsan aḍien marōoy aTaya nꞌaSaidon tepu ni enyina. 15Enyina arōoy ibhꞌạKapaniom, enyina ịva ghạ mọbheebh osi tẸnaan gạ? Tonyuughi ni zenyina ọloki tobꞌoonu obho ikunughi olo bho.”
16Keḍio odi ạkpete kua ạnogho mobo bho nẹtuonom odi obho, “Kōoy kōoy olo ạmoghon moghōrōkō enyina, pụ nạamoghon nạ moghōrōkō ạmi. Kōoy kōoy olo agin enyina, pagin nạ zạmi, keḍio kōoy kōoy olo agin ạmi pụ naagin nạ zodi obo bho arōm ạmi obho.”
Erughẹelaan ạbhenya ilo mịzal ạraala arōoy ibha ịghi dōm obho
17Ạbhenya ilo mịzal ạraala arōoy obho imula irughẹel nꞌogbōgh ọḅaal ologhi, ịkpete kua ẹnogho mạJizos, “Obumọogh, ịkarabh ạruumugh obho ẹkona eghiilaan ezōor tamen olo ezōor ubhirighan eedi mi taḍien onuma.” 18PạJizos ạkpete kua ạnogho eedi, “Ạami ạmiin maSetan mobho ạḍua tạnyu obho nameel kẹḅaal ọkarabh aḍio obho naḍighi ghạ meghenem obho. 19Ịmoghon, ạami nạanogho enyina mịikpo molo enyina tetele ni ẹezeghi rịriaar nꞌịikpolodu molo ạar olo teḍighi enyina olo. Ạami nạanogho nạ zenyina mịnyaam mopuom obo ọlogh aḍien enyina. 20Oomo ibha bho ẹkona, íbo ghạ tebum ịkarabh ạruumugh obho nekiilaan moghōrōkō enyina bho, ibo tebum obho Ẹnaan nạage riḍien enyina mi tạnyu obho.”
Ọḅaal ologhi tạJizos
21Tonyiin odi amen opopo, pẸmugh Iigbia bho aḍigh amuzō tạJizos ạnogho zodi mọḅaal ologhi molo odi ạkpete kua, “Ạda, Obạmọogh mạnyu obho nꞌade bho, ạami nạsebh ni ạna magey tebum obho ạna naaḍeeriom mobo bho ilōghōm io mạar obho mọkpo bho ạna ụḅoki milōghōm ạar arōoy obho. Ạda, ẹzo bho nạ, ạna kụto moomo iibha bho tẹzo bho iḍigh bọ tologhi onuma bho nꞌẹzo ịitua bhꞌonuma.”
22Keḍio odi amina ạkpete kua, “Ọde ạmi nạalogh tạvo ạmi kạar kạar. Tughuneen mỌde bho ḍio bọbon ōoy olo alōghōm mỌony obho olo. Tughuneen nạ mỌony obho ḍio, bọbon ōoy olo alōghōm nạ mỌde bho olo.”
23Keḍio odi aghiraan ạkpete kua mi tẹḅokia ạnogho mobo bho nẹtuonom odi obho, “Ạlisebh ilo obo bho nẹmiin miibha bho enyina nẹmiin obho. 24Ọlogh arizil nꞌạruula ẹva magey mọmiin ạni ibha enyina nẹmiin obho keḍio irue ḍio mọmiin ạni, ẹva nạ magey mọmoghon ạni ibha enyina nẹmoghon obho keḍio irue nạ ḍio mọmoghon ạni.”
Asidōgh obꞌooḅi ōoy obhꞌaSameria
25Onyiin amen ponyiin ọgba miilōgh aru ạmara mọḍa ạJizos oonon, keḍio abheleghi apuruan kua zodi, “Obo ịtughumiom, ạami taḍighi ẹko kạami ạteeny ạni maghuḍum olo ikunughi olo?” 26Keḍio ạJizos amulumian kua zodi, “Ụge ẹko tiilōgh obho taMozis? Ibha ạna ughōl obho kạna ụmoghonyan ghạ ẹko?” 27Podi ōoy obho ạbhagharana kua, “Ụge ughōl, ‘Tulan mẸnaan Obạmọogh ạna bho nꞌoomo ologhi onuma nꞌoomo aghuḍum ẹmugh onuma nꞌoomo ịnyaam onuma nꞌoomo ịitua onuma matulan nạ mobo okōol onuma kẹzo bho ạna utulan lōor onuma bho.’ ” 28PạJizos ạbhagharana kua zodi, “Ạna ụbhagharana ni ạseghe. Tụugh aḍighi miibha bho, pạna oḍum ạni.”
29Odi ọgba miilōgh obho nạva momutiom alōor mobho odi aru mooḅi ōoy, podi apuruan kua mạJizos, “Okōr ōoy mobo okōol ạmi?” 30Keḍio ạJizos ạbhagharana kua, “Onyiin ōoy ạḍua taJerusạlẹm nạki taJeriko podi ameel aḍigh tạravo ạruḅa ilo ịbaay rụsuoma odi, iḍul odi ịḅelemaan zodi teesoḍia ọbho nꞌaghuḍum. 31Tamaazuan ponyiin ōoy iiḅua bho arele natẹn tonyiin odi ebōom obho. Amen odi ạmiin mōoy obho mobho nạakeḍian, podi ạgbaaron ạḅol tọtu ạḍua. 32Onyiin ẹzo bho nạ, monyiin ōoy olꞌaLivai olo naḍighi moḍighi tobꞌotu iikpulughu obho, odi aru ạmiin podi ạgbaaron nạ ạḅol tọtu ạḍua. 33Keḍio onyiin ōoy olo aSameria olo natele merele ạḅol tonyiin odi ebōom obho aru ạmiin mōoy obho. Amen odi ạmiin mōoy obho, podi ạsuanaan odi ghụsan aḍien. 34Podi ạseghe mụnu nꞌamiim ạghi asighogh tariisi ōoy obho, ạghoroghiiy keḍio akpagh zodi ạḅam tạsu obhꞌodi abhin odi ạghi tonyiin otu obhooghia, aakō zodi. 35Ạḅaal, podi ạseghe mikpoki ịzal aḍuma oḍighi ạnogho mobo bho naanon ghạ motu obho, ạkpete kua ạnogho zodi, ‘Pin miibha bho maakuōm mōoy obho. Amen ạami umula uru, kọnu kọnu olo ạna uliom tẹmu odi pạami omulumian onuma.’ 36Tịraar arōoy bhibha, koḍighen mobo okōol ōoy obho ameel aḍigh tạravo ạruḅa bho?” 37Pọgba miilōgh obho ạbhagharana kua, “Obo bho ạsuanaan bọ zodi ghụsan obho.” Keḍio ạJizos ạkpete kua ạnogho zodi, “Kịa mạtuugh aḍighi ạni ghạ miibha bho.”
ẠJizos aḍighanaan mạMata nꞌaMeri
38Ẹzo bho ạJizos nꞌobo bho nẹtuonom odi obho itẹn nẹki tebōom obho, peedi isul tonyiin ẹma, pạni olo ughōl ạMata abhin mạJizos ạloghom totu odi. 39Ụmarani odi olo ughōl aMeri odi delede tọtu asike tObạmọogh obho nạmoghon ạni mibha odi nạtughumiom obho. 40Ẹbhirima otu obho neepu mạMata be mọbhirima molo ologhi odi naḅẹebh, keḍio odi ạghi ạkpete kua ạnogho mạJizos, “Obumọogh, ạar io tonuma gạ mẹzo bho ụmarani ạmi nạaḅelemaan ạami be moomo ẹbhirima bho. Kpẹte mạnogho zodi odi aru ạḅar ạni ạami.” 41Keḍio Obạmọogh obho amulumian kua zodi, “ẠMata, ạMata, ịkanya ọkpo nẹeḅaghami ạna. 42Keḍio onyiin be mobho ạneghe ni. AMeri nạarolom zodi opo bho molo urue mu ọseghe talōor odi.”
11Ịtughumiom tạJizos ilo igboloman nꞌiikpulughu
1Onyiin amen olo ạJizos odi tiikpulughu monyiin esi, piteledōm obhꞌodi iru todi tamen olo odi naakpulughu ạḅele, keḍio ịkpete kua ịnogho zodi, “Obumọogh, tụghumiom ezōor mẹzo ookpulughu, kẹzo bho ạJon ạtughumiom miteledōm odi obho.” 2PạJizos ạkpete kua ạnogho eedi, “Iikpulughu ghạ kua,
‘Ạda,
iigbia ẹrol ẹnogho ḍien obhꞌonuma.
Ade-Ọolema bhꞌonuma aru!
3Eḍian oomo aruḍuma bho, nọgho ezōor mibhꞌaadon.
4Ḅẹlemaan ezōor mịkarabh ezōor,
kẹzo bho ezōor nọḅelemaan mobo bho iḍighi ezōor mịkarabh obho.
Ubhin ghạ zezōor mạlogh tesi ịdereghi.’ ”
5Keḍio ạJizos amina ạkpete kua ạnogho zeedi, “Eru kạar olo onyiin enyina ạghi totu ọbulol odi mogbo uḍugul ạkpete kua, ‘Ọbulol, ḅọolian ạami mịraar eḅol ạbred. 6Ọbulol ạmi olo odi merele asul totu ạmi keḍio ạar ọnogho odi olo.’ 7Kodi ạrol tẹkpe odi ạbhagharana kua, ‘Ụuḅaghami ghạ zạmi. Ạnwuny ạmi nꞌạami nọomanaghonogh. Ezōor nọodu motu obho. Ạami utue mu aḅetunu mọnogho onuma mạar.’ 8Ạna taḍighi ẹko? Ạami nạgba kua ạnogho enyina: erumolo odi oḅetunu nạ ḍio ạnogho ạna mạbred obho tebum obho odi aru mọbulol onuma bho ẹkona, odi taḅetunu ni ạnogho ạna kạar kạar olo ạna nagbẹel tebum obho ạregheer isibh io ạna mọrol ogbẹel osi tikunughi obho. 9Tebum iibha bẹleni, igbẹel, pọnogho enyina. Ịva, penyina ọmiin. Iikpu, poghuuron ọnogho enyina, 10ebum obho kōoy kōoy olo agbẹel, tọnogho ni zodi. Kōoy kōoy olo ạva, tạmiin ni. Kōoy kōoy olo aakpu, tokuuron ni ọnogho zodi. 11Eru kạar olo ọony onyiin enyina ạburude bho agbẹel enyina mena, enyina tẹnogho ni zodi mooḍigh gạ? 12Bolobolo odi agbẹel enyina mọga ạkenegh, enyina tẹnogho ni zodi mọokpolodu? 13Enyina ạsukarabh obho kilōghōm mọnogho iiḅi ọkpo mạnwuny enyina, kịitua mẹzo. Ọde bho odi bọ tạnyu obho tạnogho mẸmugh Iigbia bhꞌodi mobo bho igbẹel odi obho.”
ẠJizos nꞌaBielzebul
14Onyiin amen ạJizos abhirighan mokpom-ụka ọkarabh ẹmugh tẹmu onyiin ōoy. Ọkarabh ẹmugh obho ạḍua, pōoy obho ạke mọkpete ạar. Poomo arōoy obho iimōogh. 15Pẹde obo bho idi ạni suo bho ịkpete kua, “ABielzebul uvẹmụ aruru obho ạnogho zodi mịikpo mobhirighanogh ịkarabh ạruumugh obho.” 16Kir ẹde ilo nẹva mọdegh odi peedi igbẹel odi moḍighi ọkpo ịiḍaany oḍeeriom eedi mobho odi aru maKraist obho. 17ẠJizos naalōghōm mịitua bhꞌeedi keḍio ạkpete kua ạnogho zeedi, “Bọbon onyiin ebhugh olo ịḍianogh rụuku onyiin naḅe monyiin olo ịrolan ghạ ibia olo. Keghun otu keghun otu olo nẹeḍianogh olo itul ile ghạ monyiin ẹkpa eḍian olo. 18Kerumolo aSetan nꞌotu odi nẹeḍianogh rụuku onyiin naḅe monyiin, odi tatue ni amina ạmara? Ẹzo bho enyina nekōl maBielzebul ạnogho ạami mịikpo mobhirighanogh ịkarabh ạruumugh obho, 19kokōr ōoy ạni ạnogho mobo bho nẹtuonom enyina bho mịikpo mobhirighan ịkarabh ạruumugh obho? Obo bho nẹtuonom enyina bho nẹegba emutiom mobho enyina neekōrōnuan. 20Ạami ụkar ubhin tịikpo tẸnaan kạami napirighanogh mịkarabh ạruumugh obho moḍeeriom enyina mobho Ade-Ọolema bho tẸnaan naaru ạteenyom enyina.
21“Kamen kamen olo ọoghuanaan ōoy ạnya mọkpo ẹgham ku naḅōrō motu odi, bọbon onyiin ạar olo tapẹ olo. 22Kōoy olo ạghua apu zodi karu ạmaranuan apuom odi, podi ọḅirogh oomo ọkpo ẹgham obho obo bhꞌotu obho naḍuom ologhi mobho tẹpel ni odi obho, ọḍian nꞌarōoy odi.
23“Kōoy kōoy olo oḍigh io nꞌạami, odi nꞌạami obo ạruruan. Kōoy kōoy olo ọḅar io ạami aakōbhōghi rạana bho, nạazarami ni.
Ọkarabh ẹmugh olo ubhirighan kamina amula
24“Kamen kamen olo ọkarabh ẹmugh amute tẹmu ōoy, odi nateleey ghạ tariisi olo ạmuum ilo, ạva mesi oḍigh obhooghia. Erumolo odi ọmiin io mesi obhooghia, podi ọkpete ekua ọnogho alōor odi, ‘Ạami tamula ni ạki tugbaany amarugh ạmi.’ 25Odi amula aru kạmiin mobho nọomaar uḅẹer motu obho, ụmaar uukōbhōghi useeri, 26podi oghiil omula ọghi obhin ịnon oḍual ịkarabh ạruumugh ilo iḅẹebh ipu zodi, oru ọloghom molo aghuḍum ōoy obho taḅẹebh ni apu mịḅel.”
Agey ọḅaal ologhi
27ẠJizos ạḍeghe miibha bho ạḅele, pạni olo odi ạni suo ạkpete kua, “Ạlisebh ilꞌodi ạni obho ạmar ạna bho, obho aakuom ạna mạraamaam odi obho.” 28Keḍio ạJizos aghiraan ạkpete kua, “Ạlisebh ilꞌobo bho ạmoghon bọ moghōrōkō tẸnaan kaghiilaan obho.”
Arōoy ilo igbẹel mọmiin ọkpo ịiḍaany
29Ẹzo bho egi arōoy iru imuzō tesi obho ạJizos odi obho, podi ạkpete kua, “Pẹzo arōoy ọoke bhobho iḅẹebh isi. Eedi nẹva ghạ mọmiin ịiḍaany mi tẸnaan, keḍio, tughuneen mịiḍaany ibha tạJona, ịnon ilo toḍighi oḍeeriom eedi ilo. 30Onyiin ẹzo bho Ẹnaan abhin maJona aru aḍighiom mịiḍaany ạnogho marōoy aNineve bho pẹzo topin nạ mỌony Oōy obho oḍighiom mịiḍaany ọnogho mạnwuny ọoke bhobho. 31Taḍuma ịiruan obho, ạni obho ạda bọ maruubhugh Arebia bho tạmaranuan ni ạgbaaghian mạnwuny ọoke bhobho ạtu mịiruan ạnogho eedi ebum obho odi ạḍua tegbeeny esi aru mọmoghon ạni ịtughumiom olōghōm ạar tạSolomon obho. Keḍio iinon, ogbōgh olo apu mạSolomon odi suo. 32Taḍuma ịiruan obho, arōoy aNineve tẹmaranuan ni enyina ạnwuny ọoke bhobho ẹtu mịiruan ẹnogho, tebum obho eedi ighiraan ni tịkarabh obhꞌeedi tamen obho eedi ịmoghon mịigbaay tạJona bho, keḍio tesuo ạami nạgba ạnogho enyina, kir olo apu maJona.”
Ọtodi obho odi talōor ōoy obho
33“Bọbon ōoy olo tạsu mọtodi kạḅoki bolobolo ạseghe mạar akpereghiom olo. Nọosu, nọḅam ghạ tạnyu ạbebe molo kōoy kōoy olo aḍigh totu obho ạmiin mạar. 34Ikpo-ariḍien onuma pọtodi alōor onuma. Erumolo ariḍien onuma ịneghe ni ịman, poomo alōor onuma ẹḅaal ẹḅaal. Kerumolo ạna ụteeny mọkarabh ekpaḍien poomo alōor onuma ọkinim ọkinim. 35Tebum iibha bẹleni, gona lōor onuma molo ẹḅaal alōor obhꞌonuma otu mọkinim. 36Keru kạar olo oomo alōor onuma aru mẹḅaal mẹḅaal, molo bọbon esi alōor onuma olo odi tọkinim olo, palōor onuma ọmua agey, kẹzo bho ọtodi nạmua ghạ ạnogho ạna mẹḅaal obho.”
Aliiki olo ạJizos aakiom marōoy aFarisi obho nꞌobo ịtughumiom iilōgh obho
37ẠJizos ạḍeghe mipe bho ạḅele, ponyiin ōoy aFarisi obho abheleghi zodi mọghi otul odi ole eḍian. Podi ạtuonuman odi ạghi ạrol delede nale. 38Odi ōoy aFarisi obho akperenom ni mọmiin obho ạJizos ootōla ḍio rạvo kẹzo eḍighiom ạar obhꞌeedi kagbi mole eḍian obho. 39PObạmọogh obho ạkpete kua ạnogho zodi, “Nonon, enyina arōoy aFarisi obho neetōlōgh ghạ mạrafa nꞌạrukpa enyina ẹḅaaleni tạman obho keḍio tiloghi obhꞌenyina ạrakpany nꞌiduguludany imuzō ni. 40Sọo, ibꞌaraama, Ẹnaan obo bho ạlem bọ mạnyu bho, obo bho ạlem bọ mologhi obho nạ ḍio gạ? 41Ịḅar mạman obho nꞌologhi obho meetōlōgh, penyina ọḅaal ọman taghisigh tẸnaan.
42“Itōnyōgh tẹtol ni ẹnogho zenyina arōoy aFarisi obho, ebum obho enyina nẹseghe ghạ bin mi taḍiōbh abin ịigho asumabōbh ẹnogho mẸnaan obho, keḍio enyina nẹesar etuḅeen miiḅi eḍighiom ạar nꞌetulan obho tẸnaan. Enyina kiḍighi ghạ miibha bho kegbi mọḅaram ipedi obho.
43“Itōnyōgh tẹtol ni ẹnogho zenyina arōoy aFarisi obho, ebum obho enyina ibhin irōol tẹmu mọrologhu ghạ tibꞌiiḅi ẹtolom mi tarutu iikpulughu obho, nꞌolo arōoy kebheleghian ghạ zenyina kẹlogh enyina meghuan mi tariḍighi obho. 44Itōnyōgh tẹtol ni ẹnogho zenyina, ebum obho enyina idi karuugu arōoy ilo iileeny nꞌade bho molo arōoy ilōghōm io ịghi nepẹlōgh.”
45Ponyiin ọgba miilōgh obho ạkpete kua ạnogho zodi, “Obo ịtughumiom, iibha bho ạna nạkpete obho, ạna nạkorogh ezōor nạ.” 46PạJizos ạbhagharana kua, “Itōnyōgh tẹtol ni ẹnogho zenyina ịgba miilōgh obho. Enyina neeti ghạ dōol mịnon arōoy eḅuni marurum eedi keḍio enyina ịḅar ghạ ḍio zeedi erōol ạni dōol obho. 47Itōnyōgh tẹtol ni ẹnogho zenyina ebum obho enyina iḅōghōm rutu eḍighi ẹneghemi maruugu arizil obho, ạkar eedi arizil obho ạburude enyina ịzeey obho. 48Iibha bho nẹgba emutiom mobho enyina iḍigh nꞌạburude bhꞌenyina mibha eedi ịzeey rizil obho, ebum obho enyina iḅōghōghōm rutu maruugu arizil obho. 49Iibha kiḍighi kẸnaan ạkpete kua mi tọbhereer olōghōm ạar obhꞌodi aghōl, ‘Ạami tatōm rizil nꞌiteledōm aakiom eedi, ẹde eedi tẹze ni, ẹnogho mọmiinom mẹde.’ 50Tebum iibha bẹleni, tọkpiom ni mạnwuny ọoke bhobho tebum arizil obho ụzeey bọ kamen idi ẹmar-arōoy obho, 51ạḍua tamen obho ughigh bọ mEbẹl ninii aru asi tamen obho ughigh bọ mạZekaraya bho, mi tesooḍia ẹede ọtun ạar obho nꞌesi iigbia obꞌotu iikpulughu obho. Ạkar agey nạ ni, ạnwuny ọoke bhobho tẹmiinom ni tebum oomo ọkpo bhibha.
52“Itōnyōgh tẹtol ni ẹnogho zenyina ịgba miilōgh obho, ebum obho enyina neeḅol ịbham mịsabi eguugh otu olōghōm ạar obho. Enyina nịvo nịvo iḍigh io keḍio enyina ịmara tọnu otu obho nẹpuenaan mịnon moḍigh.”
53Amen ạJizos amute totu ōoy aFarisi obho, pobo ịtughumiom iilōgh obho nꞌarōoy aFarisi obho ịke mọgbaghan odi magey nꞌopuruanōgh odi moḍigh kẹrekere iipuruan ọkpo 54mọdegh odi molo eedi ẹpamam odi, erumolo odi ạkpete akōrōnuan monyiin esi.
12Aliikiom tạJizos ilo igboloman nꞌarōoy aFarisi obho
1Tamen obhobho, ạsumuunir arōoy neeru neekōbhōghian molo onyiin nạazeghi monyiin, pạJizos abhira ạkpete kua ạnogho miteledōm obhꞌodi, “Igona lōor enyina tiben eḍighiom ạar aghuḍum arōoy aFarisi obho ibha idi kayist obho neebhugheni ghạ mạbred obho. 2Kạar kạar olo ukpereghi tokpẹerōn ni. Oomo ọkpo ẹḅokia tomutiom ni tẹḅaal ogbo etẹrẹ. 3Ilōghōm mobho kọnuekpete kọnuekpete olo enyina ịḅokia tọkinim ịkpete tomutiom ni tẹḅaal. Kilo kilo enyina ịḍua tẹkpe iibhōlaay tọlaalom ni toomo ẹma bho.”
Obo bho ịgbaan bọ moghiil aruugu obho
4“Ạami nạgba kua ạnogho enyina ạburubulol ibhꞌạmi, íghiil ghạ ruugu mobo bho tekigh iikpōogh alōor obho be, itue ḍio eḍighi mọnon ạar olo aḅẹebh apu suo bho. 5Ạami natu moḍeeriom enyina mobo bho enyina tekiil obho. Ikiil mẸnaan obho amen odi naaghigh miikpōogh obho ạteeny nạ mịnyaam morōbh ẹmugh obho ọlogh tobꞌoonu obho ikunughi olo bho. Agey nạ ni, ạami nạkpete nạ ạnogho enyina, ikiil odi.
6“Oōgh ạriwiriri-wịriri ḍio gạ mibha noḅool mịzal ạkobo? Keḍio bọbon onyiin eedi olo Ẹnaan naaḅulo olo. 7Ạkar ạsilaan ibhꞌẹmu enyina Ẹnaan nạaḅal alōghōm mọnu obho. Tebum iibha bẹleni, ighiil ghạ ruugu. Enyina ịla mạar epu ạni ni kua mọlogh ạriwiriri-wịriri.”
Ilo temutenaan mobo bho iitumuom, nꞌobo bho ịbharanaan maKraist obho
8“Ạami nạgba kua ạnogho enyina: kōoy kōoy olo aatumuom ạami mi togbo arōoy, onyiin ẹzo bho nạ mobho Ọony Oōy obho tamulumian odi mi taghisigh itelema bho tẸnaan. 9Keḍio kōoy kōoy olo ạbharanaan ạami mi togbo arōoy, pẹzo Ọony Oōy obho tạparanaan nạ zodi mi taghisigh itelema bho tẸnaan.
10“Kōoy kōoy olo ạkpete mịkarabh aḍighanaan mỌony Oōy obho tọḅelemaan ni, keḍio obo bho ạkpete mịkarabh aḍighanaan mẸmugh Iigbia bho ọḅelemaan olo.
11“Kamen kamen olo ubhin enyina ụmarami tarutu iikpulughu obho, bolobolo taghisigh ạruula, nꞌisōbh rạakpe bho, mọnogho ịigbaay enyina, ịíḅaghami ghạ lōor enyina, ịítu ghạ nạ milo enyina tekōl ẹgba mọḍua. 12Ẹmugh Iigbia bho pobo tạnogho zenyina mi tamen opopo mịigbaay enyina.”
Asidōgh obꞌeema ọola bho
13Togbo arōoy obho, ponyiin ōoy ạkpete kua ạnogho mạJizos, “Obo ịtughumiom, tue mạkpete mạnogho mumōr ạmi odi ạḍian nꞌạami mịga ibha ọde ezōor aseerian ezōor obho.” 14PạJizos ạbhagharana kua zodi, “Oōy, okōr ōoy atẹnẹ ạami mọtu mịiruan nꞌọḍi mạḍi ạnogho enyina?” 15Keḍio odi ạkpete kua ạnogho moomo arōoy obho, “Igona lōor enyina mẹkporion rạvo enyina toomo oḍigh kẹrekere ẹḍogh okpoki, ebum obho aghuḍum ōoy olo toomo ọkpo ibha odi ạteeny obho, kẹzo kẹzo olo odi agbo mẹela asi.” 16Keḍio odi aru adōgh sidōgh obhobho ạnogho zeedi, “Onyiin obꞌọola ạteeny moḍighi olo amute magey. 17Podi ạatua tologhi odi aghōl maa, ‘Ạami taḍighi ẹko? Otu olo ạami kakubh mariḍian obhꞌạmi olo. 18Ạami naalōghōm mẹzo ạami taḍighi. Ạami tạakpo motu obhꞌạmi aḅōgh mọnon ogbōgh, keḍio ạami taḅu moomo ariḍian obhꞌạmi, ạseghe moomo ọkpo bhꞌạmi ạloki todi otu obho aseeri. 19Keḍio ạami tạkpete kua ạnogho lōor obhꞌạmi: “Oobho pẹmugh olo ạami ụteeny. Ạna nạateeny kạar kạar olo ạna nạva ilo tẹtolom ni ạna mọlogh ạsumusia. Kibheri lōor onuma, male mạbhoghol, mạḅaal ologhi.” ’ 20Tipa bho, keḍio Ẹnaan ạkpete kua ạnogho zodi, ‘Sọo, obꞌeema, uḍugul aadon, pạami obheleghi ọseghe aghuḍum onuma, keḍio ọkpo bhibha ạna naakōbhōghi obho tetu milꞌokōr ōoy?’ 21Iibha pẹzo temutenaan kōoy kōoy olo agbo mẹela akubhughi ạnogho lōor odi, keḍio taghisigh tẸnaan odi aru muvekulom.”
Iḅeleriom moomo ologhi enyina mẸnaan be
22Keḍio ạJizos ạkpete kua ạnogho mobo bho nẹtuonom odi obho, “Iibha kiḍighi kạami nạkpete kua ạnogho enyina: ịíḅaghami ghạ lōor enyina mi tariḍian ilo ole ọnogho enyina ghuḍum bolobolo ibura ilo oburuom iikpōogh alōor obho, 23ebum obho aghuḍum obho ạla mạar apu meḍian, iikpōogh alōor obho ipu mibura. 24Ịmiin maghuḍum ạsumubhaabh obho. Eedi iḅẹbh ghạ ḍio eḅu riḍian. Eedi iḅōghi ghạ ḍio rutu ẹloki rạkpe mokubhogh ariḍian. Ẹnaan pobo naakō zeedi. Enyina iḍigh io nꞌeghuan epu zeedi gạ? 25Okōr ōoy mi tenyina tatue ạlogh sụmusia taghuḍum odi mi tịitu? 26Ẹzo bho enyina itue ḍio eḍighi mọkpo ilo idugh kua bho, ebum eeghe kenyina nẹeḅaghami lōor enyina mi tịnon ọkpo? 27Iinon mạrafalawa eḍum obho. Eedi ikumuan ghạ ḍio mọteeny ibura, ilo oburuom alōor eedi, keḍio ạami nạgba kua ạnogho enyina, toomo ẹela bho tạSolomon odi obura ḍio mibura ilo ịneghe iileeny mạrafalawa bhibha. 28Ẹnaan obo ạseghe mạrafalawa bho aburom mịigho eḍum obho, ibha ụmiin dodon eḍie nọosu nyạn, ụmiin mu obho. Sọo arōoy obo ologhi omōruōm obho igbẹbhan io, enyina ilōghōm io mobho odi tabur ni enyina apu miibha bho gạ? 29Tebum iibha bẹleni, ịítu ghạ mẹeḅaghami lōor enyina mọva ọkpo ole nꞌọbhoghol. 30Oḍigh ọkpo bhibha pibha obo bho ilōghōm io mẸnaan obho nekilighuan ghạ tẹmar-arōoy obho. Ọde enyina obho odi tạnyu obho naalōghōm mobho ịgbaan ni molo enyina kẹteeny miibha bho. 31Kpẹlen nꞌipa, ikilighuan maghuḍum Ade-Ọolema bho tẸnaan, podi ọnoghuom enyina moomo iibha bho.”
Ẹzo ogbo ẹela mi tẸnaan
32“Ighiil ghạ ruugu toomo ẹzo bho enyina ikio bho. Ẹkar eḍigh tologhi Ọde bhꞌenyina obho odi tạnyu obho mọnogho enyina mAde-Ọolema bhꞌodi. 33Iḅool kạar kạar olo enyina ịteeny mẹseghe mikpoki obho mẹnoghooy ruvekulom obho. Ịkologh mạruḅa ikpoki ilo itue ḍio eḅu, mẹloki mesereghi mẹela bhꞌenyina mi tẸnaan, tesi obho eghuan ikpoki obhꞌenyina tẹtol ni kamen kamen obho, ạruḅa itue nạ ḍio eḍigh emiinyogh bolobolo ọoghara eḍigh ele. 34Kesi kesi olo enyina ikubh mẹela enyina, pesi ologhi enyina tẹtol nạ.”
Igon eḅōrō ghạ men obho kiiḅi ạrubana
35-36“Ịkpamaghia mẹmaar ẹkpua mukpe enyina mẹghuemi ku mẹsuuy mịtodi enyina mẹbham tạvo kiiḅi ạrubana ilo neḅōrō mọde otu eedi morughẹel tẹzaal ipina, molo, amen odi asi totu aakpu, eedi tekẹm ni ekuurōn meguugh obho. 37Ọḅaal ologhi tẹtol ni ẹnogho mạrubana bho ọde otu eedi tatughẹel tatulom eedi mibha eedi nemori momori neḅōruōm odi. Ạami nạgba kua ạnogho enyina: odi tazuurōna ni meghōony odi ạkpete ạnogho eedi mọrol adelede keḍio odi tạseghe meḍian ạnogho zeedi. 38Ọḅaal ologhi tẹtol ni ẹnogho zeedi, erumolo odi aru mogbo uḍugul bolobolo ọḅel ọnu ạkenegh keḍio ạmiin ni zeedi mobho eedi idi mimoom neḅōrō zodi. 39Ilōghōm mobho obo bho otu obho olōghōm ghạ ḍio mamen ọḅa natu totu odi. Odi alōghōm ni bọ, odi kụḅelemaan io rụḅa bho moḅom oḍigh totu odi ọḅirogh ọkpo ọḍuonom. 40Enyina ẹkona ịmaar egon nạ, ebum obho Ọony Oōy obho tatu mọmiin enyina tamen olo enyina ịitua ḍio.”
Ịzal oḍigh ạrubana
41PaPita ạkpete kua ạnogho mạJizos, “Obumọogh, asidōgh obhobho ạna udōgh nạnogho ezōor be bẹlee koomo arōoy.” 42PObạmọogh obho ạbhagharana kua, “Okōr ōoy siibha bho mẹbana olōghōm ạar olo ạteeny nạ mooḅi eḍighiom ạar? Odi pobo bho ọde otu odi tạlogh tạvo odi moomo ịikpo amarugh-otu odi mọnogho ghạ ạrubana ipedi obho maribin eḍian eedi tamen olo iizuan mọnogho. 43Ọḅaal ologhi tạtol ni ạnogho mẹbana bho ọde otu odi tatughẹel tạmiin ni zodi mobho odi ạtuugh mibha ụkpete ụnogho odi obho. 44Agey nạ ni, ạami nạgba ạnogho enyina, ọde otu obho tạlogh ni tạvo ẹbana popo moomo ọkpo odi. 45Kerumolo odi ẹbana popo ạatua tologhi odi aghōl kua, ‘Ọde-otu ạmi nabia morughẹel,’ keḍio ạke moḍulogh ạnwuny nꞌạsunwunyaan ạrubana ipedi obho tọde otu obho, nꞌole ọbhoghol, ọbhoghol keghigh, 46ọde-otu obho tatughẹel maḍuma olo odi ọotua ḍio, nꞌamen olo odi olōghōm io. Ọde-otu obhꞌodi tạliom ni zodi, aseeri zodi kobo bho imōruōm io mẸnaan obho.
47“Ẹbana olo alōghōm mibha iḍigh tologhi tọde-otu odi kookōbhōghia ḍio ạtuugh aḍighi mibha iḍigh tologhi tọde-otu odi obho, tọliom ni ọmaar ọgurogh. 48Ẹbana bho olōghōm io mibha iḍigh tologhi ọde-otu odi obho kaḍighi mạar olo ịgbaan ni mọgurogh odi, tọliom zodi nꞌịbam ạligur. Obo bho ụnogho bọ mịkanya bho, ịkanya mobho togbẹel nạ tạvo odi. Obo bho ụnogho bọ mibꞌịkanya bho, ibꞌịkanya nạ mobho togbẹel tạvo odi.
Ạmaḍian tẹtol ni tebum aḍien tạJizos
49“Ạami uru mọsu ạnyan de bho. Mịin milo ạami nạva molo koghōl nọoke ogbonoghi. 50Ạami ạteeny mozua ạmuum olo ạami kazua, pịitu ilo tẹtolaan ạami ninii kamen olo temuneen! 51Enyina ịkar nẹetua mobho ạami ubhin mekima uru tẹmar-arōoy obho gạ? Eenyi-o, ạami nạgba ạnogho enyina, ekima ḍio, ạmaḍian. 52Ạseghe siibha ạghi taghisigh, otu ōogh arōoy tẹḍianogh ni, ịraar tẹtuan ni mịzal, ịzal ẹtuan mịraar. 53Ạburude tẹtuan rụnwuny eedi, ạnwuny obho nꞌạburude eedi; aburuniin tẹtuan sụnwunyaan eedi, ạsunwunyaan obho nꞌaburuniin eedi; oniin olom tạtuan ni mạni ọony odi, ạni ọony obho nꞌoniin olom odi.”
Arōoy irue ḍio mọmoghonyan ọkpo bho nemuteey bho
54ẠJizos ạkpete kua nạ ạnogho rōoy obho, “Amen enyina ịmiin mobho aḍio aḅil natu tọpaḍi obho ọbhiiny obho, penyina okẹm oghōl maa, ‘Tạlobh ni,’ pọlobh nạ. 55Amen ạbhibhom enyina mọpibha bho ạbhibh tegbolom obho natu, penyina oghōl maa, ‘Obhulo tạtol ni,’ pọrol nạ. 56Sọo, arōoy ibꞌilōghōm ạar! Enyina tetue ni eenon made bho nꞌạnyu obho ẹgba mẹzo idi. Eeghe kesiibha bho enyina irue ḍio molōghōm ẹmu ọkpo bho nemute siibha bho?
Ịkpetian rạakpe enyina metẹnẹ totu
57“Ebum eeghe kenyina nịvo nịvo ịru ḍio mịiruan mi tọkpo bho ịneghe bọ moḍighi obho? 58Erumolo ōoy ạva ạna rạakpe, kabhin ạna ạghi tạkoti, kẹm mẹkpetian metẹnẹ suo amen obho enyina idi nini tebōom obho, molo odi opin ạna ạghiom mobo bho nesōbh rạakpe bho, keḍio eedi tepin ạna ẹnogho mapolisi, keḍio apolisi obho tạloghom ạna mikoli. 59Ạami nạgba ạnogho ạna, ạna orue ḍio amute ninii ạna tatu ạkpe mạkobo obho asughō obho mi tibha umuul ạna bho.”
13Ikiraan tịkarabh enyina
1Tamen opopo, kir arōoy ilo ịrol nạ lo ịgba ịnogho mạJizos marōoy ibhꞌaGalili ibha aPailet ạze tamen obho eedi nẹtun mọkpo mọnogho Ẹnaan obho. 2ẠJizos ạbhagharana kua ạnogho zeedi, “Enyina nekōl ebum obho eedi arōoy aGalili obho ịbho moḍigh ọbho olo odi kua bho, pi nẹgba neḍeeriom mobho eedi iru mibꞌiḍighi mịkarabh ilo ipu moomo ịnon arōoy obho idi mi taGalili obho gạ? 3Eenyi! Ạami nạgba ạnogho zenyina, erumolo enyina ikiraan io mi tịkarabh enyina, enyina tẹpo ạni ni kẹzo bho eedi ịbho bho. 4Ḅōrō ku. Aḍiōbh nꞌạbhenya arōoy ibhꞌaSailoam obho obo otu-ạnyu ameelom ạze bho ạni keeghe? Enyina nẹetua ekōl iibha bho nẹgba eḍeeriom mobho eedi iru mibꞌiḍighi mịkarabh ilo ipu moomo ịnon arōoy ilo idi mi taJerusạlẹm gạ? 5Ekua ḍio! Ạami nạgba ạnogho zenyina, erumolo enyina ikiraan io mi tịkarabh enyina, enyina tẹpo ạni ni kẹzo bho eedi ịbho bho.”
Asidōgh oorẹeny obho iimuuma ilo bho
6Keḍio odi ạJizos adōgh sidōgh obhobho ạnogho zeedi, “Onyiin ōoy ạteeny meetu ẹleleezu mi tade odi olo odi ạnogho mōoy moonon ghạ. Odi nạki ghạ moomo amen mọku itu, keḍio odi ọmiin ghạ ḍio motu. 7Podi ạkpete kua ạnogho mobo bho naanon ghạ made bho aghōl kua, ‘Nonon ni, neegbẹbh ịraar ạsia mobho ạami naaru mọku itu, keḍio bọbon otu olo ạami nạmiin ghạ olo. Lẹer atuḅeen! Odi napiẹmi de be.’ 8Keḍio odi obo bho naanon ghạ made bho ạbhagharana aghōl kua, ‘Oōy obho, ḅẹlemaan, ạla bhobho amina atẹn ku, ạami tagbo ni akitonom, ạlogh mobile ọomi mọnuumeni ade bho. 9Erumolo odi ạloki mitu mạla bho natu obho siiḅi, kọloki nạ ḍio kọleer.’ ”
ẠJizos aakō mạni olo aḅenene, taḍuma obhooghia bho
10Tonyiin aḍuma obhooghia bho, pạJizos ạghi totu iikpulughu obhꞌeedi nạtughumiom. 11Tesi bhopo kir ạni olo ạteeny mọkarabh ẹmugh olo aḍighi molo odi nạarol mi tẹzegh maḍiōbh nꞌạbhenya ạsia. Odi aḅenene ni, orue ḍio mosel orele. 12Amen ạJizos ạmiin zodi, podi abheleghi zodi, “Ạni obho, nọobhel ạna mi tẹzegh obhꞌonuma!” 13Ẹzo bho ạJizos ạḅam rạvo odi mi tạni obho, podi asel, keḍio odi abuom Ẹnaan. 14Pologhi onyiin obo bho neekō ghạ motu iikpulughu obho aḅẹebh mebum obho ạJizos aakō mōoy mi taḍuma obhooghia bho. Podi ạkpete amutiom ạnogho marōoy obho aghōl kua, “Ezira ụteeny modiin aḍuma mi tawiki obho molo oḍighiom oḍighi, itu taruḍuma bhibha meekua silōor enyina, iru ghạ mi taḍuma obhooghia bho.” 15Keḍio Obạmọogh obho ạbhagharana kua zodi, “Enyina nẹmiin ghạ milo ịnon be! Onyiin enyina tạkoton ni mẹnam odi mọghi ọnogho ạmuum mi taḍuma obhooghia bho. 16Keḍio tesuo ponyiin ọnyani tEbrạhạm olo Eru obho naaḅol ạbham moomo aḍiōbh nꞌạbhenya ạsia, ịkpe ḍio gạ mọbhel odi mi taḍuma obhooghia bho?” 17Oomo obo bho ịlogh odi ḍien obho ịlokia ni rẹgheer mi tẹzo bho odi ạbhagharana bho. Oomo arōoy obho ịḅaal ni mologhi mi toomo ọkpo ibꞌaruugu obho odi aḍighi obho.
Asidōgh ekpo oorẹeny amiim ẹker
18Tebum ipa, pạJizos ạkpete kua, “Ade-Ọolema bho tẸnaan kodi ẹko? Ạami tapin ạtuom ẹkaraan? 19Odi kekpo amiim ẹker, olo ōoy ạseghe aḅẹbh mi toḍighi odi, keḍio asi atẹn moorẹeny, olo ịnun iru iḅōghi rutu mi tịgha bhꞌodi.”
Asidōgh ạar obho noḍighiom ghạ mạbred, obho ughōl bọ ayist obho
20Keḍio odi amina ạkpete kua, “Ạami tạtuom mẹkaraan mAde-Ọolema bho tẸnaan? 21Odi kạar obho noḍighiom gha mạbred obho, obho ughōl bọ ayist obho olo ạni-ebhōbh ạseghe ạguonom ịraar ẹḅa ạfalawa, olo ịrol suo iḍighi molo oomo eedi iibhuugh.”
Ịkparam eḍigh ạni tẹḍiibh ọnu otu bho
22Keḍio ạJizos ạḍua tesuo atẹn nạki tọpaḍi aJerusạlẹm, ạḍua mẹma atẹn mẹma nạtughumiom tigbōgh nꞌịbam ạraama bho. 23Ponyiin ōoy apuruan kua zodi, “Obumọogh, ịbam arōoy be gạ mobo tọpel otẹnẹmi tịkarabh obho?” Keḍio ạJizos ạbhagharana kua zeedi, 24“Iḅe magey mẹkparam ẹḅol eḍigh mi tẹḍiibh ọnu otu obho. Ạami nạkpete kua ạnogho zenyina mebum obho ọlogh arōoy tẹkparam ni mọḅol ạni keḍio irue ḍio.
25“Tamen olo uvotu obho naaḅetunu aghuughi meguugh obho, keḍio enyina tetu ẹmara tetẹrẹ ẹke mookpu eguugh obho oghōl ekua, ‘Obumọogh, kuurōn mạnogho ezōor!’ 26Keḍio enyina temulumian zodi kua, ‘Ạna nꞌezōor sule ghạ monyiin esi, ọbhoghol monyiin esi. Sạna ụtughumiom mi tẹma ezōor!’ 27Keḍio odi tamina ạpagharana kua, ‘Ạami ulōghōm io mesi enyina ịḍua iru sọo. Oomo enyina iḍighi mịkarabh obho, ịḍua taghisigh ạmi.’ 28Kụ ịmiin mobꞌeḍi olo enyina teleghe nꞌọghiir ạralaay olo enyina tẹkiir men enyina tẹmiin mEbrạhạm nꞌẠizik, nꞌạJekob nꞌoomo arizil obho tẸnaan mi tAde-Ọolema bhꞌodi tamen olo nonyuughi zenyina momutioghom tetẹrẹ! 29Arōoy tẹḍua ni etu mi toomo ạruukul ọpaḍi ẹmar-arōoy obho ẹtol delede mi tẹtolom ẹzaal Ade-Ọolema bho tẸnaan. 30Keḍio obo bho ịrol tạman obho tetu mịḅel, obo bho uru bọ mịḅel obho tẹtol tạman.”
Etulan olo ạJizos abhin atulan maJerusạlẹm
31Tamen opopo, pẹtede arōoy aFarisi obho iru tạJizos ịkpete kua ịnogho zodi, “Kẹm siibha siibha maghiil ạḍua tesuo mạghi tọnon esi. ẠHerod nạva moghigh onuma.” 32PạJizos ạbhagharana zeedi kua, “Ịki mẹkpete mẹnogho mẹnam opopo meghōl kua, ‘Ạami napirighan mịkarabh ạruumugh, naakōoy mạrazegh arōoy dodon nꞌeḍie, togbẹbhiōm ịraar aḍuma bho, pạami ọman oḍighi obhꞌạmi.’ 33Oomo ipa ẹkona, ạami tạki ni moḍighi oḍighi ạmi dodon, nꞌeḍie, nꞌạmaa-ḍie. Ịneghe ḍio molo ozil kạbho mi tọnon esi, tughuneen taJerusạlẹm io.
34“Sey aJerusạlẹm, aJerusạlẹm! Ạna obo bho nạze ghạ marizil obho tẸnaan, atoḅol miteledōm obho Ẹnaan arōm aruom ạna bho! Ịni amen mobho ạami nạava mọseghe ạravo ạmi oghuruom oomo arōoy onuma, kẹzo bho ạkenegh nakuruom ghạ mạnwuny odi obho, keḍio ạna omōrō ḍio nomōrō. 35Esiibha eghun otu obhꞌonuma noogin ọman. Ạami nạgba kua ạnogho enyina, enyina ịmiin mụ ạami ninii tạteeny mamen obho enyina tẹkpaton mọnu enyina ekōl kua, ‘Ẹnaan ạsebh ni zodi obo bho natu bọ mi taḍien tObạmọogh obho.’ ”
14Alaakō ōoy olo nạnwe mọobuum asike
1ẠJizos, mi tonyiin aḍuma obhooghia bho, ạghi mole eḍian mi totu onyiin uvẹmụ arōoy aFarisi obho, parōoy obho ịmaar negon ghạ zodi. 2Tesuo kir ōoy olo nạnwe mọobuum asike nꞌạravo olo aru todi. 3Keḍio odi ạJizos ạkpete amutiom apuruan eedi obo bho nẹtughumiom ghạ miilōgh obho taMozis nꞌarōoy aFarisi obho aghōl kua, “Kir olōgh gạ mookō ẹzegh mi taḍuma obhooghia obho?” 4Poomo eedi ịrol ḅaḅam. PạJizos abhin mōoy obho aakō ạkpete ạnogho zodi moghẹel. 5Keḍio odi ạkpete kua ạnogho zeedi, “Erumolo onyiin enyina ạteeny mọony ạnam bolobolo ekpe olo ameel aḍigh taghuḍia mi taḍuma obhooghia bho olo tạḅele mọghi obhune mi taḍuma obhooghia bho odi gạ?” 6Bọbon ōoy olo arue mọbhagharana odi olo.
Aliiki osōoriōm alōor
7Ẹzo bho ạJizos ạmiin mẹzo bho isoloman obho nẹsonogh mibꞌiiḅi ariisi ọrol adelede mi totu obo bho eedi iḍighanaan obho, podi adōgh sidōgh obhobho ạnogho zeedi: 8“Kamen kamen olo ubheleghi ạna mi tẹzaal ipina, ụrol ghạ delede mi tẹtolom obho ạla bọ mạar apu obho. Ụmaar io suo noobheleghi nạ mōoy olo aḍigh eghuan apu ạna. 9Poḍighi olo amen odi uvotu obho abheleghi mịzal enyina bho tatu, tạkpete kua ạnogho ạna, ‘Ḅetunu, ōoy obhobho ạrol suo.’ Pạregheer osibh onuma mamen topin ạna ọki ọtolomi mi tẹtolom olo oḍigh io meghuan. 10Kpẹlen nꞌipa, amen ạna ụghi tesi olo ubheleghi ạna, tọl tesi obho oḍigh io meghuan obho, molo amen olo uvotu obho tatu, pọkpete ekua ọnogho onuma, ‘Ọbulol, ḅetunu maru mạrol teebhakele eghuan obho.’ Iibha bho tẹnogho ạna miibhughumi mi taḍien arōoy ipedi obho. 11Kōoy kōoy olo ạbughia lōor tosōorẹ ni. Kōoy kōoy olo asōoriōm lōor, odi pobo tọbughe.”
12Keḍio ạJizos ạkpete ạnogho mobo bho abheleghi zodi obho aghōl kua, “Kamen kamen olo ạna ụsa meḍian mobheleghi arōoy, ubheleghi ghạ mạburubulol onuma nꞌaburumōr onuma nꞌeghun otu onuma nꞌạruula oghōol otu onuma — molo eedi ipeleghi ạna ẹkpe emulumian. 13Kamen kamen olo ạna ụsa meḍian mobheleghi arōoy, peleghi marukula bho nꞌobo ikpom ariḍien obho, 14pạlisebh ọrol ọnogho onuma, tebum obho eedi itue ḍio ẹkpe emulumian ạna. Ẹnaan tạkpe amulumian ạna mi taḍuma bho iiḅi arōoy obho teḅerenu tọbho bho.”
Asidōgh aḍuma obꞌẹzaal obho
15Onyiin ōoy olo odi ạni nale meḍian obho ạmoghon mibha ạJizos ạḍeghe bho, podi ạkpete kua ạnogho zodi, “Ạlisebh tẹtol ni ẹnogho mobo bho tạtol ạni mole eḍian mi tAde-Ọolema tẸnaan obho!” 16Keḍio ạJizos aghiraan ạkpete kua ạnogho zodi, “Onyiin amen kir ōoy olo natu mole ogbōgh ẹzaal, molo odi abheleghi mọlogh arōoy. 17Taḍuma ẹzaal obho podi arōm mẹbana odi mọghi obheleghi arōoy obho oghōl ekua, ‘Itu, ẹzaal obho nạateeny o!’ 18Poomo eedi, ōoy ilo ọno ilo ọno, ịgba ịḍua. Ọḅel obho ạkpete kua ạnogho mẹbana bho, ‘Ạami naaghō made oḍighi. Ạami natu mọghi ọmiin ẹzo odi. Gbạ mạnogho zodi mu, “sesen ni, ạami utue ḍio aru.” ’ 19Ọnon aghōl kua, ‘Ạami naaghō mōogh ạranam oḍighiom oḍighi olo ạami nạki mọḍa eedi oonon. Gbạ mạnogho zodi mu, “sesen ni, ạami utue ḍio aru.” ’ 20Omina ọnon ạkpete kua, ‘Eede amen ạami ubhin mạni, tebum ipa bẹleni, ạami utue ḍio aru.’ 21Pẹbana bho aghẹel ạgba mẹzo bho ạnogho mọde-otu odi. Keḍio ologhi ọde-otu odi aḅẹebh, keḍio odi ạkpete kua ạnogho mẹbana bhꞌodi aghōl kua, ‘Kẹm siibha siibha mạghi taraabōom nꞌarubughotu ẹma bho mabheleghi maruvekulom obho nꞌạsukugha bho nꞌobo ikpom ariḍien obho nꞌarukula bho.’ 22Obia ḍio pẹbana bho amula aru aghōl kua, ‘Oōy, ibha ạna urōm ạami obho, ạami nạatuugh aḍighi, keḍio eepōogh odi ni.’ 23Pọde-otu obhꞌodi ạkpete kua ạnogho zodi, ‘Kịa taraabōom ạraama bho mabheleghi rōoy eedi eru molo otu obho amuzō agbẹbh. 24Ạami nạgba kua ạnogho ạna, bọbon onyiin eedi obo bho igin moru obho olo takulaan ale meḍian ẹzaal bhobho olo.’ ”
Ẹzo oru onyiin obo nạtuonuman maKraist ạla asi
25Ipa iru itẹn, piḅir arōoy iru nẹtuonuman mạJizos. Keḍio odi aghiraan ạkpete kua ạnogho zeedi. 26“Kōoy kōoy olo tatu tạmi orue ḍio aru monyiin obo nạtuonuman ạami, erumolo odi ọlogh io ḍien mọde odi nꞌoniin odi nꞌạni nꞌạnwuny odi nꞌaburumōr odi nꞌạburumarani odi nꞌạkar alōor obhꞌodi. 27Kōoy kōoy olo ọseghe ḍio moorẹeny ẹmigheri obhꞌodi ạtuonuman ạami, odi orue ḍio aru monyiin obo nạtuonuman ạami. 28Erumolo onyiin enyina natu moḅōgh otu ạnyu, odi tapira ni aanon mẹḅa odi mọmiin erumolo tegbẹbhōm ni moḅōghōm. 29Odi obhira ḍio aḍighi kua, odi orue ḍio aḅōgh ạman. Tasiemi tegum be. Kōoy kōoy olo tatele atẹn ạmiin, pọmologh ghạ be, oghōl ekua, 30‘Oōy obhobho aru moḅōgh otu keḍio orue ḍio mọman.’ 31Erumolo ọolema akpo mọlogh ẹgham mọghi oḅe ọnon ọolema, olo ọlogh ẹgham ibhꞌodi iru mạmaḍian ibha obo bho odi nạki moḅe bho, odi tapira ni ạtol delede ạmaar aanon merumolo ạmaḍian ibhꞌodi tetue ni eḅe mipedi obho. 32Erumolo odi otue ḍio, podi orōm adōm ọghiom opedi obho tamen olo odi odi nini tegbeeny moosen olo eedi kẹrol tekima. 33Onyiin ẹzo bho, ōoy olo ọḅele ḍio kạar kạar olo odi ạteeny, odi orue ḍio aru monyiin obo nạtuonuman ạami.
Abōbh olo ẹmel olo
34“Abōbh iiḅi, keḍio ạar olo oḍighiom olo mu erumolo ẹmel abōbh obho ilo mu. 35Ọneghe mụ nạ mi tade bho molo iḅẹbh. Isughōnōm molo kozu korōbh be. Oōy olo ạteeny raḅeri ạmaar ạmoghon!”
15Ọbhienaan ẹena bho
1Onyiin amen olo igunogh miisōgh nꞌiḍighi mịkarabh iru mọmoghon ạni ịtughumiom tạJizos, 2parōoy aFarisi nꞌobo ịtughumiom iilōgh obho ịke mọghunughun ọkpete ekua, “Oōy obhobho abhin iḍighi mịkarabh ạloghom atul nꞌeedi nale meḍian.” 3PạJizos adōgh sidōgh obhobho ạnogho zeedi, 4“Erumolo onyiin enyina ạteeny mịzal ạraala nꞌaḍisibh ạraana konyiin abhẹ, ạna ụutua odi taḍighi ẹko? Odi tạḅele ni monyiin olo mịzal ạraala nꞌaḍisibh ipedi obho tesi obho eedi nele mịigho bho ạki teḍum obho mọva onyiin obho abhẹ bho.
5“Amen odi tạmiin, odi tabo ni, nꞌọḅaal ologhi odi tatōol tọbha odi apin akẹel. 6Keḍio odi tapeleghi mạburubulol nꞌobo okōol odi monyiin esi, ạkpete kua ạnogho zeedi, ‘Ologhi ạmi nạḅaal mịkanya mibha ạami nạamiin mẹena bhꞌạmi abhẹ bọ bho. Itu metul ạami mẹḅaal ologhi ole mẹzaal.’ 7Onyiin ẹzo bho, ạami nạgba ạnogho enyina, kir ogbōgh ọḅaal ologhi mi tạnyu obho mi tebum onyiin oḍighi mịkarabh olo aghiraan tịkarabh odi, ilo tepu ni mibha onyiin olo mịzal ạraala nꞌaḍisibh ịbughia lōor arōoy ilo ịva ḍio moghiraan tịkarabh eedi.
Obhienaan okpoki bho
8“Bolobolo, erumolo ạni-ebhōbh olo ạteeny maḍiōbh ikpoki keḍio onyiin abhẹ, ạna ụutua odi taḍighi ẹko? Odi tạsu ni mọtodi, aḅẹer motu obhꞌodi, ạmaar ạva moomo otu obho ninii odi tạva ạmiin. 9Amen odi ạmiin, podi obheleghi ạburubulol odi nꞌobo okōol odi ookōbhōghi ọkpete ekua ọnogho eedi, ‘Ologhi ạmi nạḅaal magey mibha ạami nạamiin mokpoki obhꞌạmi abhẹ bọ bho. Itu metul ạami mẹḅaal ologhi olo mẹzaal!’ 10Onyiin ẹzo bho, ạami nạgba ạnogho enyina, itelema bho tẸnaan tẹḅaal ni mologhi mi tebum onyiin oḍighi mịkarabh olo aghiraan tịkarabh odi.”
Obhienaan ọony obho
11Keḍio ạJizos ạḍeghe rạḍeghe bhobho ạnogho zeedi aghōl kua, “Onyiin amen kir ōoy olo ạteeny ịzal ạnwuny. 12Ạteeny monyiin aḍuma, pọbam obho ạkpete ạnogho mọde bhꞌeedi aghōl kua, ‘Ạda, ḍị mabin arutu ibhꞌạmi mạnogho ạami siibha.’ Podi ọde bho ạḍi motu obhꞌodi mịzal abin ạnogho mạrunwuny obhꞌodi. 13Ịbam aruḍuma itẹn podi ọbam ọony obho aḅool mabin ibhꞌodi ạseghe mikpoki obho ạḍua totu, ạghi tegbeeny ẹma, abhẹeny aliom ikpoki obhꞌodi ạman. 14Suo odi naaliom mikpoki obhꞌodi ạman obho, pobo oḅẹer asōor mi tebhugh obho odi odi obho, molo bọbon ạar olo odi ạteeny olo mu. 15Molo odi ạghi moḍighian oḍighi mōoy olo odi tẹma bho, olo ạnogho zodi mookō ghạ arōbhōrōpō mi tologhi eḍum. 16Odi agbẹel ghạ ni nạ mole ịpaḍi eḍian arōbhōrōpō bho, keḍio obo ọnogho odi olo nạ. 17Tọmiinom obhꞌodi, podi alōghōma lōor ạatua aghōl kua, ‘Oomo ạrubana bho tọde ạmi bọbon olo natue ghạ mole ọman eḍian ibhꞌodi olo, keḍio ạami odi suo nạmiinom mọkoony. 18Ạami taḅetunu ni ạki tọde ạmi ạkpete kua ạnogho zodi, “Ạda, ạami naaḍighi mịkarabh mẸnaan nꞌạna. 19Ịgbaan mụ molo koghōl ạami ọony onuma. Sẹghe zạmi matẹnẹ konyiin ẹbana bhꞌonuma.” ’ 20Podi aḅetunu amula tọde bhꞌodi.
“Odi odi nini mi tegbeeny pọde bhꞌodi ạrol totu ạmiin zodi. Ọsu ạghusan aḍien ẹrol mịkanya molo odi aghiil ạghi aḅolom mọony obho, akpagh aḅẹtōn. 21Keḍio ọony obho ạkpete kua, ‘Ạda, ạami naaḍighi mịkarabh mẸnaan nꞌạna. Ịgbaan mụ molo koghōl ạami ọony onuma.’ 22Pọde bho abheleghi mạrubana bhꞌodi ạkpete kua, ‘Ikẹm mẹghi mebhin eru mobo ạdoni obhꞌạmi mẹloki zodi. Ịloki nạ zodi magul nꞌarakōrō, 23kụ mẹghi meghigh monyiin obhōghaan ạnam obho mẹsa, molo ezira kole mẹzaal. 24Ọony obhobho tạmi ạbho ni, keḍio odi naamula siibha taghuḍum. Odi abhẹ ni, keḍio esiibha naamute.’ Peedi ịke mẹzaal obho.
25“Tamen obhobho okenya umōr obhꞌodi odi ni teḍum. Suo odi natughẹel natuan totu obho, podi ạmoghon moghur ọḍe nꞌịḅa. 26Podi abheleghi monyiin ẹbana bho apuruan kua, ‘Ẹkaraan nemute suo?’ 27Ẹbana bho ạgba ạnogho zodi maa, ‘Umōr onuma maarughẹel, keḍio ọde onuma aghigh monyiin obhōghaan ạnam obho tebum ẹzo bho odi arughẹel nꞌomoon alōor obho!’ 28Pologhi okenya umōr obho aḅẹebh molo odi agin moḍigh totu molo ọde bhꞌodi aḍigh maasen lo odi kaḍigh totu. 29Podi ạkpete kua ạnogho mọde bhꞌodi aghōl kua, ‘Nonon ni. Pẹzo noḍighi ghạ mōoy. Oomo ạsumusia bhibha bho ạami nạarolan ạna uḍighian ạna moḍighi konyiin ẹbana onuma, ạami dopẹl io mọnu onuma. Ạna naaḍighi meeghe ạnogho ạami? Bọbon evel sạna dọnogho ḍio ạmi moliom ạni ẹzaal nꞌạburubulol ạmi. 30Ọony obhobho tonuma obho ạbasi ạna ạseghe mikpoki obhꞌonuma ạghi tile mẹma bho, suo odi amula aru obho, sạna naaghigh moghōbhaan ạnam obho ạnogho.’ 31Keḍio ọde bhꞌodi ạbhagharana zodi aghōl kua, ‘Ọony ạmi, ạna sodi nꞌạami moomo amen. Kạar kạar olo ạami ụteeny suo ilꞌonuma. 32Ịkpe ni molo ezira kole mẹzaal kọḅaal mologhi, tẹzo bho umōr obhobho tonuma ạbho ni, keḍio odi naamula siibha taghuḍum. Odi abhẹ ni, keḍio esiibha naamute.’ ”
16Ẹbana ōoy aralōghōm
1Keḍio ạJizos ạkpete nạ kua ạnogho miteledōm obhꞌodi aghōl kua, “Onyiin obꞌọola ạteeny monyiin ẹbana olo odi ạloghom toḍighi odi, keḍio ụgba ụnogho zodi mẹbana bhꞌodi naleeyogh mikpoki obhꞌodi. 2Keḍio odi abheleghi zodi ạkpete kua, ‘Agey mibha ạami ụmoghon obho? Tue ọḅaalan mikpoki oḍighi obhꞌonuma. Ạna oḍighi mụ moḍighi ẹbana bho ạnogho ạami.’ 3Keḍio odi ẹbana bho ạkpete kua ạnogho lōor odi, ‘Sey. Ọde-otu ạmi tapirighan ạami toḍighi obhꞌạmi. Ạami taḍighi ẹko? Ạami utue ḍio aḅẹbh miḅẹbh, keḍio ạregheer tesibh ni ạami mogbẹel iigbẹel. 4Ạami naalōghōm mẹzo ạami taḍighi, molo amen noobhirighan ạami toḍighi obho, pạami ọteeny ạburubulol ilo tẹloghom ni ạami totu eedi.’ 5Podi abheleghi moomo arōoy ilo ile mọmugh ọde-otu odi. Keḍio odi apuruan kua mọḅel obho, ‘Ịni mọmugh obho ạna ule mọde-otu ạmi?’ 6Podi ạbhagharana maa, ‘Ịzal ạraala nꞌaḍisibh ạdorom ạmunu.’ Keḍio odi ạkpete kua, ‘Kẹm siibha siibha mạseghe mọbhereer obho enyina ịgian obho manwe mạlogh erubal ḍiōbh.’ 7Keḍio odi amina apuruan mọnon, ‘Ibhꞌonuma kịni?’ Keḍio odi ạbhagharana maa, ‘Ịzal ạraala nꞌaḍisibh ẹḅa ạrusu.’ Pẹbana bho ạkpete kua ạnogho zodi, ‘Nwe mạlogh ịzal ạraala ẹḅa.’ 8Ọde-otu ọkarabh ẹbana bho abuom ni zodi mi tiiniom obhꞌodi, ebum obho tesuo ẹmar-arōoy obho obo iiniom ipu mobo bho idi tẹḅaal obho.”
9Keḍio ạJizos ạkpete kua, “Ạami nạgba ạnogho enyina, ikẹm mẹseghe mikpoki iiniom obhꞌenyina mẹduan bụrubulol, molo erumolo ẹela bhꞌenyina imuneen eedi tẹloghom ni zenyina mi totu aghuḍum olo kamen kamen. 10Kōoy kōoy olo ạmaar ạbham ịbam ạar, pọmaar ọbham mi tịkanya: obo bho otue ḍio mọmaar ọpham mi tịbam obho, orue ḍio mi tigbōgh. 11Erumolo esiibha bho kenyina irue ḍio mọmaar ọbham ẹela ẹmar-arōoy obho, toḍighi ẹko kọnogho zenyina magey ẹela mọbham? 12Erumolo enyina itue ḍio mọbham ọkpo ilꞌọnon; okōr ōoy tạnogho zenyina mọbham ibha iru milꞌenyina bho?
13“Bọbon ẹbana olo tatue ạtolan ịzal ạburude-otu olo; odi tạlogh ni ḍien monyiin atulan mopedi obho; odi takiilaan ni monyiin aanon ạpue mopedi obho. Enyina irue ḍio ẹḅar mẸnaan nꞌikpoki ẹbham ẹrolom.”
Ọkpo olo ạJizos ạkpeteey
14Ẹzo bho arōoy aFarisi obho ịseghe moomo ologhi eedi nẹvaam ikpoki obho ịmoghon ẹzo bho, peedi ịrol ịmologh mạJizos. 15Keḍio ạJizos ạkpete kua ạnogho zeedi, “Enyina arōoy obo bho nẹva moru aruuḅi tasumusigh arōoy obho. Ẹnaan pobo alōghōm miloghi enyina. Ibha arōoy nẹetua mobho iru miiḅi obho, taghisigh tẸnaan ạar olo oḍighiom olo.
16“Iilōgh obho taMozis nꞌẹegia bhꞌarizil obho ẹghua magey ninii ạteeny tamen tạJon ozuughiom mụum obho. Kamen opopo ninii ạteeny siibha, nọgba mooḅi ọnuekpete bho, ibhꞌAde-Ọolema bho tẸnaan, keḍio kōoy kōoy aḅe molo odi be kaḍigh. 17Oomo ipa ẹkona, idugh ni magey molo ạnyu obho nꞌade bho kebhẹ, kpẹlen olo onyiin ọnuekpete iilōgh obho kabhẹ.
18“Oōy olo agbo mạḅam mạni odi kabhin mọnon ạni nale mẹma; obo bho abhin mạni olo ugbo mạḅam umutiom obho nale nạ mẹma.
ẠLazaros nꞌobꞌọola bho
19“Onyiin amen keḍio onyiin obꞌọola amute, olo nabura ghạ mibura ilo ịla mạar magey, nale meḍian ạruula moomo aḍuma. 20Keḍio onyiin uvekulom ōoy olo ughōl ạLazaros amute nạ. Ariisi ịka ni talōor odi. Keḍio nopin ghạ zodi otu tọnu-otu obꞌọola bho. 21Odi ạva mole ạni ghạ ịpaḍi eḍian obho nemeleghu ghạ mi tizebele oliom eḍian ọola bho. Asighōghō bho ẹkona netu ghạ ni ẹlaay mariisi obhꞌodi. 22Odi uvekulom obho ạbho, pitelema tẸnaan iru irōol odi ịghi ịrolomi itueni mEbrạhạm mi tẹzaal obho. Odi ọola bho ạbho nạ, keḍio uru uḍi zodi. 23Odi ạrol togbōgh esi ọmiinom mi tẹmir-iḍim, keḍio odi aanon tạnyu obho, podi ạmiin mEbrạhạm mi tegbeeny nꞌạLazaros tọtu odi. 24Podi abheleghi amutiom aghōl kua, ‘Ạda, Ebrạhạm, sụanaan zạmi ghụsan aḍien marōm ạLazaros ạseghe mạsunu ạravo odi akōrōm mụum aru aḍimiom ẹesu anem obhꞌạmi. Ạami odi togbōgh ọmiinom mi tạnyan obhobho.’ 25Keḍio Ebrạhạm ạkpete kua, ‘Ọony ạmi, tụtua mẹzo, taghuḍum ẹmar-arōoy obho, ụnogho ni ạna moomo kạar kạar olo ịneghe, ạLazaros ạteeny moomo ibha ịneghe ḍio bho. Esiibha odi nale mẹela ibhꞌodi suo, keḍio ạna odi tọmiinom. 26Ipa iru itẹn, kir obꞌoonu olo odi teesoḍia ezira, molo obo bho nẹva mọḅol oru tenyina bho itue ḍio, nꞌolo obo bho idi tenyina bho itue ḍio ẹḅeeny eru tezōor.’ 27Keḍio odi obꞌọola bho ạkpete kua, ‘Gụa siibha, ọde, ạami naasen ni ạna, tōm mạLazaros ạghi totu ọde ạmi 28aakiom ōogh aburumōr ilo ạami ụteeny molo eedi itu ạni tesi ọmiinom obhobho.’
29“Ebrạhạm ạbhagharana kua zodi, ‘Aburumōr onuma ẹteeny mẹegia taMozis nꞌarizil obho molo ookiom eedi. Ḅẹle aburumōr onuma ẹmoghonyan mibha eedi nẹgba bho.’ 30Pobꞌọola bho ạkpete kua, ‘Ọde Ebrạhạm, ipa bho be igbẹbh io. Erumolo ōoy aḅetunu tọbho bho ạghi ạgba ạnogho eedi, mạar io suo, peedi oghiraan tịkarabh eedi.’ 31Keḍio Ebrạhạm ạbhagharana kua, ‘Erumolo eedi ịmoghonyan io mẹegia bho taMozis nꞌarizil obho, eedi irue ḍio emōruōm, eru kạar olo ōoy aḅetunu nạ ni tọbho bho.’ ”
17Esi oḍighi ịkarabh iḅẹebh isi
1PạJizos ạkpete ạnogho mobo bho nẹtuonuman zodi obho aghōl kua, “Ọdegh oonon ọḅele ḍio moru, keḍio ịkanya ọmiinom tẹtol ni ẹnogho tobo bho ọdegh oonon tẹḍua bọ etu obho! 2Ịneghe molo kọseghe mobꞌọbharakpar kọkpuom tẹḍogh odi, korōbh zodi mi tobꞌọbhiiny kpẹlen olo odi kaḍighi monyiin ịbam ạnwuny bhibha moḍighi ịkarabh. 3Igona lōor enyina. Erumolo umōr onuma aḍighi zịna mịkarabh, si zodi, kodi aghiraan, pụḅelemaan zodi. 4Erumolo odi aḍighi zịna mịkarabh moḍual amen mi tonyiin aḍuma, kamen kamen olo odi aru aghōl kua, ‘Ạami naaḍighi ạpue, ḅẹlemaan ạami,’ pụḅelemaan zodi.”
Ologhi omōruōm
5Keḍio obo bho nẹtuonuman zodi obho ịkpete ịnogho mObạmọogh obho ighōl kua, “Mina mạghuemi mologhi omōruōm obhꞌezōor epu suo.” 6Keḍio Obạmọogh obho ạbhagharana kua, “Erumolo enyina ịteeny mologhi omōruōm olo ạbugh aaleeny mokpo amiim ẹker kenyina ẹkpete ẹnogho moorẹeny obhobho, obho ughōl bọ ạsikaman obho, ‘Ḍiirunu suo mạghi mạḅian masi tọbhiiny obho,’ podi oghiilaan enyina.”
Ooghiraan ạrubana
7“Erumolo onyiin enyina ạteeny mẹbana lo naḍighi moḍighi, bolobolo olo naanon ghạ mạraana, amen odi ạḍua teḍum obho aru, ạna tạkpete ni kua ạnogho zodi, ‘Kẹm aru male meḍian onuma’? 8Ị ị, ekua ḍio. Kpẹlen nꞌipa, ạna tạkpete kua ạnogho zodi, ‘Kẹm maḍighi meḍian ạmi, mạghi mạlokia mạsuoma onuma maḅōrō ạami ule ụpoghol ụḅele, kụ maru male mạbhoghol mibhꞌonuma.’ 9Ịgbaan io molo ẹbana bho kabhin mạlua mi toghiilaan obhꞌodi, ekua ḍio? 10Ẹzo bho nạ mi tenyina, amen olo enyina iḍighi mạar olo urōm enyina moḍighi, ikōl kua, ‘Ezōor ạrubana be; ezōor uḍighi mabin oḍighi ibhꞌezōor be.’ ”
Alaakō aḍiōbh arōoy ilo nẹnwe mẹzegh ẹkpabhia
11Ẹzo bho ạJizos nạki taJerusạlẹm obho, podi ạḅol ạghi asi tọkuan aSameria nꞌaGalili. 12Odi nạki tonyiin ọbam ẹma, men aḍiōbh arōoy ilo nẹnwe mẹzegh ẹkpabhia ịmara ki tegbeeny 13ibheleghi imulughu, “Jịzos Obumọogh, sụanaan ezōor ghụsan!” 14Amen ạJizos ạmiin eedi, pạkpete kua ạnogho zeedi, “Ịki meḍeeriom lōor enyina rōoy iiḅua bho.” Tebōom, peedi iḍum. 15Onyiin eedi ạmiin mobho odi naaḍum obho, podi amula aru nạsebh mẸnaan nꞌoghōrōkō imulughu. 16Keḍio odi agbuluman aakpulughu ạsebh mạJizos. Oōy obhobho olꞌaSameria. 17Keḍio ạJizos ạkpete amutiom, “Aḍiōbh arōoy io gạ mobho uukō? Iḍighen esughō ipedi obho? 18Ebum eeghe kisoloman obhobho be mobho amula aru mọnogho ạlisebh mẸnaan?” 19Keḍio ạJizos ạkpete kua ạnogho zodi, “Ḅetunu maghẹel. Ologhi omōruōm onuma naakō ạna.”
Eruom Ade-Ọolema bho tẸnaan
20Ẹtede arōoy aFarisi obho ipuruan mạJizos mamen Ade-Ọolema bho tẸnaan tatu. Odi ạbhagharana kua, “Ade-Ọolema bho tẸnaan oru ḍio mi tẹzo olo tọmiin nini. 21Oōy olo tatue akōl kua, ‘Odi suo!’ bolobolo, ‘Odi teebha!’ olo; Ade-Ọolema bho tẸnaan odi tenyina.”
22Keḍio odi ạkpete kua ạnogho mobo bho nẹtuonuman zodi obho, “Amen natu molo enyina tegbẹel ni mọmiin ạni aruḍuma tỌony Oōy obho, keḍio enyina irue ḍio ẹmiin. 23Kir obo tetu ẹkpete kua ẹnogho zenyina, ‘Nonon ni, odi teebha!’ bolobolo, ‘Nonon ni, odi tepa!’ Ịghi ghạ mọva. 24Ẹzo bho aḍio bho naḍighi ghạ meghenem nọmiin kesi kesi obho, pẹzo tọmiin nạ maḍuma tỌony Oōy obho. 25Keḍio tạteeny, odi tạmiinom ni mịkanya, arōoy ọoke obhobho tegin ni zodi. 26Ẹzo bho ịrol bọ mi tamen obho taNoa, pẹzo tẹtol nạ mi tamen obho Ọony Oōy obho tatu obho. 27Kōoy kōoy nạamaar nale nạpoghol, ạraani nꞌilobhir nẹḅalan ilom, ninii ạteeny maḍuma bho aNoa aḍigh tobꞌoghuugh obho keḍio aḍigho bho aru ạze moomo eedi. 28Tẹtol nạ kamen obho tạLot. Kōoy kōoy nạamaar nale nạpoghol, nakō naḅool, naḅẹebh nabōghi. 29Aḍuma bho ạLot ạḍua tạSodom obho pạnyan nꞌạkabait ịlobh kẹlebhe ịze moomo arōoy obho. 30Pẹzo tẹtol mi taḍuma bho Ọony Oōy obho tamutiom lōor odi obho.
31“Aḍuma bhobho, obo odi tạnyu otu odi osōor io moḍigh ọḅirogh ọkpo odi mi totu obho. Ẹzo bho nạ obo odi teḍum odi otughẹel io mi totu odi. 32Ịitua mạni tạLot. 33Kōoy kōoy olo ạva moḍume aghuḍum odi tapiẹmi ni. Obo bho oḍume ḍio bho, pobo taakō. 34Uḍugul opopo, ạami nạgba ạnogho zenyina, ịzal arōoy tẹmaghanan tonyiin ẹmuna, tọseghe monyiin ọḅele monyiin tạman. 35Ịzal ạraani tẹtol monyiin otu ekum eḍian, tọseghe monyiin ọḅele monyiin tạman. 36Ịzal arōoy tẹtol eḍighi moḍighi mi tonyiin eḍum obho, tọseghe monyiin ọḅele monyiin tạman.” 37Obo bho nẹtuonuman zodi obho ipuruan kua zodi, “Temute teḍighen, Obumọogh?” ẠJizos ạbhagharana kua, “Tesi olo obo ụbho odi olo ạsudele tekōolaan.”
18Asidōgh ekpukele ạni nꞌọtu mịiruan obho
1Keḍio ạJizos adōgh sidōgh obhobho ạnogho zeedi, molo eedi keekpulughu ghạ moomo amen, idughom io lōor. 2“Onyiin amen, kir onyiin ọtu mịiruan ōoy mi tonyiin ẹma, olo okiilaan io mẸnaan bolobolo arōoy. 3Tonyiin odi ẹma bho kir onyiin ekpukele ạni olo natu ghạ moomo amen nạpam makẹel odi mi tọtu mịiruan obho nạkpete ghạ kua, ‘Pẹl ạami mi tạravo obo ọlogh aḍien ạmi!’ 4Kọkanya amen ọtu mịiruan obho omōrō ḍio. Enyemen, podi aghōl maa, ‘Toomo ibha ạami ukiilaan io mẸnaan nꞌarōoy obho, 5tebum oomo ịiḅaghami obho ekpukele ạni obhobho nạnogho ạami obho, ạami tạnogho ni zodi makẹel odi, bolobolo odi tạtol moru moru ọnogho ạami mịiḅaghami moghigh ạmi!’ ” 6Keḍio odi Obạmọogh obho amina ạkpete kua, “Ịmoghon mibha ole-mịgara ọtu mịiruan obhobho ạkpete bho. 7Ẹnaan orue ḍio gạ ạnogho makẹel marōoy ibhꞌodi obo bho neleghe moomo uḍugul nꞌootaany ẹnogho zodi mọbhel eedi obho? Odi okẹm io gạ ạbhel eedi? 8Ạami nạgba kua ạnogho enyina, odi tạnogho ni zeedi makẹel eedi. Takẹm ni nạ. Amen Ọony Oōy obho tatu, odi tạmiin ni marōoy ologhi omōruōm mi tade bho gạ?”
Asidōgh onyiin ōoy aFarisi nꞌogunogh raasōgh obho
9Keḍio ạJizos amina adōgh sidōgh obhobho ạnogho marōoy ibꞌiituma bho, ibha neetuma ghạ mobho eedi iru miḍighi miiḅi, nẹkpete ghạ mịnon ẹpue. 10“Ịzal arōoy ịghi totu iikpulughu mookpulughu. Onyiin obho aFarisi, opedi obho ogunogh raasōgh. 11Keḍio aFarisi obho aḅetunu aakpulughu maa, ‘Ạlua, Ẹnaan, mobho ạami olo kịnon arōoy, ạami uuniom ghạ ḍio miiniom, ạami uḍighi ghạ nạ ḍio mịkarabh, ạami ule ghạ nạ ḍio mẹma. Ạlua mobho ạami olo kogunogh raasōgh ōoy obhobho. 12Ạami nạḅele ghạ mole eḍian tebum miikpulughu mịzal aḍuma moomo awiki, keḍio nạseghe monyiin mi taḍiōbh abin ạsuo ạmi ạnogho totu iikpulughu obho.’ 13Keḍio odi ogunogh raasōgh obho taḅetunu mibhꞌodi mi tegbeeny, one nạ ḍio moonon tạnyu obho, keḍio tạabhola meeku odi akōl kua, ‘Ẹnaan, sụanaan zạmi oḍighi mịkarabh obho mạghusan aḍien!’ ” 14Keḍio ạJizos amina ạkpete kua, “Ạami nạgba kua ạnogho enyina, ōoy obhobho, opedi obho ḍio, aghẹel totu nꞌọḅaal ologhi ọḅelemaan ịkarabh tẸnaan. Pẹzo tẹtol, kōoy kōol olo ạbughia lōor posōoriōm; obo bho asōoriōm lōor odi obho, pobo tọbughe.”
ẠJizos ạnogho mịbam ạnwuny lịsebh
15Ẹtede arōoy ibhin ịbam ạnwuny eedi eruom mạJizos molo odi kạnogho eedi lịsebh. Amen obo bho nẹtuonom zodi obho ịmiin mẹzo bho, peedi ịrol ịbhooruom eedi. 16Keḍio ạJizos abheleghi mạnwuny obho iru todi, keḍio odi ạkpete kua, “Ịḅelemaan ạnwuny obho eru tạmi, ị́puenaan ghạ zeedi. Ade-Ọolema bho tẸnaan ilꞌarōoy ilo idi keedi. 17Ilōghōm kua! Oōy olo opin io mAde-Ọolema bho tẸnaan kọbumoony orue ḍio aḍigh ạni.”
Ạraḍeghe tạJizos nꞌobꞌọola bho
18Keḍio onyiin uvẹmụ arōoy aJu obho apuruan kua mạJizos, “Obꞌooḅi ōoy ịtughumiom, ạami taḍighi meeghe kạami ạteeny ạni maghuḍum olo ikunughi olo?” 19Keḍio ạJizos apuruan kua zodi, “Ebum eeghe kạna abheleghi ạami mooḅi? Tughuneen Ẹnaan io, ọnon ooḅi olo. 20Sạna naalōghōm miilōgh obho: ughigh ghạ mōoy, ule ghạ mẹma, umiigh ghạ viigh, ụgba ghạ miben, kiilaan ọde nꞌoniin onuma.” 21Keḍio odi ōoy obho ạbhagharana kua, “Ạami naakō raalōgh bhibha kamen ịbam ạmi.” 22Amen ạJizos ạmoghon mẹzo bho, podi ạkpete kua ạnogho zodi, “Kir ạar olo asughō molo ạna kaḍighi, kịa maḅool kạar kạar olo ạna ụteeny, mạseghe mikpoki obho mạnogho maruvekulom, pạna ogbo ẹela tẸnaan, maru mạtuonuman ạami.” 23Amen ōoy obho ạmoghon miibha bho palōor odi ạkpoghogho. Odi agbo mẹela magey.
24ẠJizos ạmiin mẹzo bho nesōrōghuōm zodi obho, podi ạkpete kua, “Ẹkar ẹkpar magey nolo ọola kaḍigh tAde-Ọolema bho tẸnaan. 25Uuva mọḅol oḍigh taḍien ạnuga ịkar idugh epu, molo ọola kaḍigh tAde-Ọolema bho tẸnaan.” 26Arōoy obho ịmoghon mẹzo bho, pighōl kua, “Erumolo iru kua, okōr ōoy mobo totue ni ọpel?” 27Keḍio ạJizos ạbhagharana kua, “Ạar olo ịkparanaan ni rōoy, tẸnaan idugh ni.”
28PaPita ạkpete kua, “Mịin! Ezōor nọoḅele meghun otu ezōor nọtuonom ạna.” 29ẠJizos amulumian kua zeedi, “Ilōghōm kua, ōoy olo ạḅele motu, nꞌạni, nꞌaburumōr, nꞌọde nꞌoniin, bolobolo ạnwuny mi tebum Ade-Ọolema tẸnaan 30tapin ni mịkanya ọkpo apuom mibha esuo ẹmar-arōoy obhobho, keḍio taghuḍum obho natu obho, odi tạteeny aghuḍum olo ikunughi olo.”
Ogbẹbhiōm ịraar amen olo ạJizos ạgba milo igboloman nꞌọbho bhꞌodi
31Keḍio ạJizos abhin maḍiōbh nꞌịzal obho ạghi tọtu, ạkpete kua ạnogho zeedi, “Ịmaar ẹmoghon! Ezira nọki taJerusạlẹm, tesi obho kạar kạar olo arizil obho ịge milo igboloman nꞌỌony Oōy obho tẹtuugh nạ mẹzo bho emute. 32Tọseghe ni zodi ọlogh tạravo obo bho ilōghōm io mẸnaan obho, keḍio eedi tẹmologh zodi, etōnyōgh zodi, ẹsiroghom zodi mịghor. 33Keḍio eedi tẹgurogh odi, ekigh odi. Ịraar aḍuma tetẹn, poḅẹtōn odi tọbho bho.” 34Obo bho nẹtuonuman zodi obho irue ḍio mọmoghonyan oomo ạraḍeghe bhibha. Ụḅoki ni zeedi mạkar ekpo ọnuekpete bho, molo eedi ilōghōm io mibha ạJizos nạḍeghe ạnogho zeedi obho.
ẠJizos ạkparion riḍien ōoy ogbẹel iigbẹel
35ẠJizos ạḍua natuan tẹma bhꞌaJeriko, ponyiin ōoy ikpom ariḍien olo odi gha delede tọtu ebōom obho nagbẹel gha miigbẹel, 36ạmoghon moghur arōoy obho netẹn obho, keḍio odi apuruan kua zeedi, “Ẹkaraan nemute tesuo?” 37Keḍio ụgba ụnogho zodi maa, “ẠJizos obhꞌạNazaret natẹn suo.” 38Keḍio odi amulughu amutiom aghōl kua, “Jịzos, ọony taDevid, sụanaan zạmi ghụsan aḍien.” 39Parōoy obho idi bọ taghisigh obho ịbhooruom odi mọrol ạbirim. Keḍio ịrol kilo ụpue ni. Keḍio odi amina ạmaar amulughu, “Ọony taDevid, sụanaan zạmi ghụsan aḍien!” 40PạJizos ạmara, ạkpete ạnogho zeedi mobhin ōoy ikpom ariḍien obho oruom odi. Amen ubhin odi uru, pạJizos apuruan kua zodi, 41“Ạna nạva molo ạami kaḍighi mẹkaraan kạnogho ạna?” Keḍio odi ạbhagharana kua, “Obumọogh, ạami nạva molo ariḍien ạmi kẹkparanu.” 42Keḍio ạJizos tạkpete kua ạnogho zodi, “Ariḍien onuma ẹkparanu! Ologhi omōruōm onuma naakō ạna.” 43Tonyiin odi amen obhobho pariḍien obhꞌodi ịkparanu, keḍio odi ạrol ạtuonuman mạJizos nạsebh Ẹnaan. Amen ọlogh arōoy obho ịmiin mẹzo bho, poomo eedi ịrol ibuom Ẹnaan.
19ẠJizos nꞌạZakios
1Keḍio ạJizos arele aḍigh natu motẹn taJeriko. 2TaJeriko kir onyiin ōoy olo ughōl ạZakios. Odi puvẹmụ igunogh raasōgh, keḍio odi agbo nạ mẹela magey. 3Odi ạrol ạva mọmiin ạni ạJizos, keḍio odi orue ḍio, tebum alikper obhꞌodi nꞌobꞌọlogh arōoy obho nẹtuonuman obho. 4Podi aghiil aḍionom taghisigh arōoy obho, ạsiiny moorẹeny olo ạgbaanan mọmir, molo odi kạmiin mạJizos mamen odi tatẹn tebōom ọbho. 5Amen ạJizos aru asi tesi obho odi odi obho, paanon tạnyu obho ạkpete kua ạnogho zodi, “Zạkios, kẹm asōor aru. Ạami taḍigh ni totu onuma dodon.” 6PạZakios akẹm asōor, abhin nꞌogbōgh ọḅaal ologhi ạloghom zodi totu odi. 7Amen arōoy obho ịmiin mẹzo bho, poomo eedi ịghunughun ighōl maa, “Oōy obhobho naasulomaan totu ōoy olo aru moḍighi mịkarabh.” 8Keḍio ạZakios aḅetunu ạkpete ạnogho mObạmọogh obho aghōl kua, “Obumọogh, mịin! Ạami tạḍi moomo ọkpo olo ạami ụteeny ạseghe mạmaḍian ạnogho maruvekulom obho, keḍio kōoy kōoy olo ạami nꞌaaniom, ạami tamulumian zodi inya abin ibha ạami ubhin tạvo odi obho.” 9Keḍio ạJizos ạkpete kua ạnogho zodi, “Ịbhelegha neeḍigh totu obhobho dodon. Oōy obhobho ẹkona olꞌeghun otu tEbrạhạm. 10Ẹzo bho, Ọony Oōy obho aru mọva nꞌọbhel obo bho neebhẹ bho.”
Asidōgh ikpoki agold
11Ẹzo bho arōoy obho nẹnaghanyan miibha bho, pạJizos amina ạke modōgh asidōgh ọnogho eedi, tebum obho eedi nẹetua ekōl mAde-Ọolema bho tẸnaan naatuan nꞌẹzo bho odi naatuan taJerusạlẹm obho. 12Keḍio odi adōgh kua ạnogho zeedi, “Onyiin amen keḍio onyiin ogbōgh ōoy ạghi tegbeeny ẹma, molo koḍighi zodi kotẹnẹ mọolema odi karughẹel. 13Tamen obho odi natu mọghi obho, podi abheleghi maḍiōbh ạrubana odi ạnogho zeedi ōoy esuo okpoki okpoki, ạkpete kua ạnogho zeedi, ‘Ịva mạar olo enyina teḍighiom molo ọteeny ạsuo tamen obho ạami ụtol io suo bho.’ 14Kir arōoy ẹma odi ilo ịlogh odi ḍien, ilo irōm dōm ịghi ighōl kua, ‘Ezōor ụva ḍio molo ōoy obhobho kạda zezōor.’
15“Keḍio uzu nạ zodi ogbōgh ōoy obho meghōony ọolema bho, keḍio odi arughẹel. Osi be, podi abheleghi mạrubana bhꞌodi, obho odi ạnoghooy ikpoki obho mọva ọmiin ạsuo olo eedi nẹeteenyom tibha eedi ibhin obho. 16Ọḅel obho aru, ạkpete kua, ‘Obumọogh, tonyiin obho ạna ụnogho ạami obho, ạami nạateeny mịnon aḍiōbh.’ 17Keḍio odi ạkpete kua, ‘Ạlua, ạna obꞌooḅi ẹbana. Ẹzo bho ạna ụmaar ni ụbham tịbam obho ikio magey obho, ạami tạnogho ạna maḍiōbh ạraama moonon.’ 18Ogbẹbhiōm ịzal ẹbana bho aru, pạkpete kua, ‘Tonyiin obho ạna ụnogho ạami obho, ạami nạateeny mịnon ōogh.’ 19Toobho bho, podi ạkpete kua, ‘Ạna taanon ghạ mōogh ạraama.’ 20Pomina ọnon ẹbana bho aru aghōl kua, ‘Obumọogh, oobho okpoki onuma, ạami ụḅoki tạpoghota. 21Aruugu onuma esibh ạami, mẹzo bho ạna uru mōoy olo ọsu ạghusan aḍien olo. Ạna nạseghe ghạ tesi olo ạna oseeri ḍio, aḅu nạ tesi olo ạna oḅẹbh io.’ 22Keḍio odi ạkpete kua ạnogho zodi, ‘Ạna ọkarabh ẹbana! Apum onuma odi tọnu onuma! Ạna naalōghōm mobho ạami uru mōoy ạlikpar, nạseghe ghạ tesi olo itu ḍio milꞌạmi, aḅu tesi olo ạami uḅẹbh io. 23Ebum eeghe kạna ọlogh io mikpoki obhꞌạmi mi tesi obho nọlokiiy gha mikpoki obho? Kōl suo ạami urughẹel obho, kōl ạami naabhin mạsuo ikpoki bho.’ 24Keḍio odi ạkpete kua ạnogho mobo bho ịmaraay obho aghōl kua, ‘Ịḅoor okpoki obho tạvo odi mẹnogho mobo bho ạteeny maḍiōbh obho.’ 25Keḍio eedi ịkpete kua ịnogho zodi, ‘Obumọogh, sodi nạateeny ghạ moomo aḍiōbh!’ 26Odi ạbhagharana kua, ‘Ạami nạgba kua ạnogho zenyina. Kōoy kōoy olo ạteeny, tomina ni ọnogho zodi mịnon ọḅaram keḍio odi obo bho ạar olo ạteeny olo bho, bọbon ịbam obho odi ạteeny obho, tomina ni ọḅoor. 27Esiibha, eedi obo bho iru mobo ọlogh aḍien ạmi obho, ibha ịva ḍio molo ạami kazua meghōony ọolema bho, ipin eru mẹze zeedi taghisigh ạmi!’ ”
ẠJizos aḍigh taJerusạlẹm kọolema
28ẠJizos ạḍeghe kua be ạḅele, podi aḍionom taghisigh mọghi taJerusạlẹm. 29Ẹzo bho odi natuan mạraama bho ughōl bọ aBetfagi nꞌạBetani, tobꞌeegum obho ughōl bọ Ọlivs obho, podi arōm mịzal obo bho nẹtuonuman zodi obho motẹn ghạ ọghi taghisigh, 30aghōl kua, “Ịki tọbam ẹma bho odi bọ taghisigh enyina bho, penyina ọmiin ọony ẹnam olo nọokpo useeri, olo ọnon ōoy doghiilom ghạ ḍio. Ịkoton mebhin eru. 31Erumolo ōoy apuruan enyina aghōl maa, ‘Ebum eeghe kenyina nẹkoton?’, ịgba kua mẹnogho zodi, ‘Obạmọogh obho nagbẹel,’ ” 32keḍio eedi itẹn ịghi ịmiin nạ mẹzo bho ạJizos ạkpete ạnogho zeedi obho. 33Ẹzo bho eedi nẹkoton mọony ẹnam obho, pobo bho ạteeny obho apuruan kua zeedi, “Enyina nẹkoton molo eeghe?” 34Peedi ịbhagharana kua, “Obạmọogh obho nagbẹel.” 35Peedi ịseghe ịghiomaan mạJizos. Keḍio eedi ịde mạrusuoma bhꞌeedi mi tạnyu ọony ẹnam obho keḍio ịḅam zodi ạJizos tạnyu ẹnam obho. 36Ẹzo bho odi aghiilom nạki obho, peedi ịde marukpe eedi tebōom obho. 37Suo odi natuan taJerusạlẹm obho, mi tebōom obho ạlogh bọ mi tobꞌeegum obhꞌỌlivs amute bho, pobo ọlogh arōoy obho nẹtuonuman zodi obho ịke mọsebh nꞌobuom Ẹnaan nꞌimulughu, tebum oomo ibꞌọkpo aruugu obho eedi nẹemiin obho, nekōl kua, 38“Ẹnaan ạsebh ni mọolema obho natu bọ mi taḍien tObạmọogh obho! Ekima ẹrol ni tạnyu obho, eghuan ẹrol ẹnogho mẸnaan.”
39Pẹtede arōoy aFarisi obho idi ạni tọlogh arōoy obho ịkpete kua ịnogho mạJizos, “Obo ịtughumiom. Kpẹte mạnogho mobo bho nẹtuonuman ạna bho ekpereghi mịnu eedi.” 40Keḍio ạJizos ạbhagharana kua, “Erumolo eedi ịrol bịrim, ạami nạgba kua ạnogho enyina, ịpaḍi ạrubharakpar obho nịvo nịvo temulughu ni emutiom.”
Eḍi olo ạJizos aleghian aJerusạlẹm
41Ẹzo bho odi arele natuan tẹma bho, kạmiin mẹzo ẹma bho odi, podi aleghian, 42ạkpete kua, “Kōl aadon enyina kitue ni ẹmiin mạar olo tepin ekima etu keḍio esiibha bho nọoḅoki enyina, enyina irue ḍio ẹmiin. 43Aruḍuma netu molo obo ọlogh aḍien enyina tetu ekuōm enyina mịita, ekin ekiton eḍue moomo araabōom, etu etuan enyina mi toomo ạruukul. 44Eedi tepiẹmi ni zenyina nꞌẹma bho ẹman. Bọbon ekpughul ọomi olo tọḅele tesi odi olo, tebum obho enyina itue ḍio mọmiin olōghōm amen obho Ẹnaan aru mọbhel enyina bho.”
Eḍighom tạJizos mi tobꞌotu iikpulughu bho
45Keḍio ạJizos aḍigh totu iikpulughu obho mobhirighanogh obo bho neḅo maḅo bho, 46ạkpete kua ạnogho zeedi, “Ụge kua tẹegia iigbia bho oghōl mẸnaan ạkpete kua, ‘Otu ạmi tokōl otu iikpulughu,’ keḍio enyina neeḍighi etẹnẹ motu ạruḅa.”
47Keḍio ạJizos ạtughumiom moomo aḍuma mi totu iikpulughu obho, paruvẹmụ arōoy iiḅua bho nꞌobo bho nẹtughumiom miilōgh obho nꞌeedi obo bho ikpo bọ rōoy obho neḍionom obho ịva mebōom olo oghigh odi, 48keḍio eedi ilōghōm io mebōom olo ọteeny odi, tẹzo bho oomo arōoy obho nẹmoghonyan zodi obho, ịva ḍio molo onyiin oghōrōkō kapẹl zeedi.
20Iipuruan ịnyaam obho ạJizos abhin naḍighiom mọkpo ibꞌaruugu obho
1Onyiin aḍuma olo ạJizos nạtughumiom rōoy totu iikpulughu obho nạgba nạ mooḅi adōm obho, paruvẹmụ arōoy iiḅua bho, nꞌobo ịtughumiom iilōgh obho nꞌarukenya bho iikōbhōghian iru tạJizos, 2ịkpete kua ịnogho zodi, “Gbạ mạnogho ezōor, tịnyaam okōr ōoy mobho ạna ubhin naḍighiom mọkpo bhibha? Okōr ōoy ạnogho ạna mịikpo moḍighi eedi abaabha bho?” 3PạJizos ạbhagharana kua zeedi, “Ạami tapuruan ạni zenyina miipuruan. Ịgba mẹnogho ạami: 4ịnyaam ozu ạmuum obho ạJon ạteeny obho ịḍua tịikpo tẸnaan keru bẹlee kịikpo arōoy?” 5Peedi ịke mọghanan nꞌalōor eedi nẹkpete kua, “Ezira tọpagharana ẹko? Erumolo ezira ughōl ‘Ịḍua tẸnaan keru,’ podi ọkpete ekua, ‘Eeghe aḍighi kenyina imōruōm io mạJon?’ 6Kezira oghōl kua, ‘Ịḍua tarōoy keru,’ poomo arōoy obho idi bọ suo bho orōḅōl ezira. Oomo eedi imōruōm mobho ạJon aru mozil tẸnaan.” 7Peedi ịbhagharana kua, “Ezōor ulōghōm io mesi ịḍua iru.” 8PạJizos amulumian kua zeedi, “Ạami ẹkona ụgba ḍio nạ ạnogho enyina mesi ạami ụteeny mịnyaam obho ạami ubhin naḍighiom mọkpo bhibha bho.”
Asidōgh ookua iirẹeny amiim obho
9Keḍio ạJizos adōgh sidōgh obhobho ạnogho rōoy obho, “Onyiin amen keḍio onyiin ōoy aḅẹbh mookua iirẹeny amiim, keḍio ạseghe ạnogho mịnon arōoy mogu ghạ eedi kẹḍian, keḍio odi atẹn ạghi tọnon ẹma. 10Amen iirẹeny obho ịneghe mogu podi arōm mẹbana odi mọghi obhin abin odi mi tarōoy obho. Arōoy obho odi ạnogho mookua bho iḍul ni mẹbana bho, ibhirighan imulumi moobho ạvo. 11Keḍio odi amina arōm mọnon ẹbana, peedi imina iḍul, ịloki zodi mibꞌạregheer, ibhirighan zodi imulumi moobho ạvo. 12Podi amina arōm ogbẹbhiōm ịraar ẹbana odi. Oobho bho eedi iḍul nạ ni nạ, ẹloki rạnem, erōbh zodi emutiom tetẹrẹ. 13Keḍio odi obo bho ạteeny bọ mookua iirẹeny amiim obho ạkpete kua, ‘Ạami taḍighi ẹko? Ạami tatōm mọony ạmi, obho ạami utulan obho. Mạar io suo, eedi tekiilaan ni zodi.’ 14Amen eedi arōoy obho ịmiin zodi, peedi ịḍeghe kua, ‘Oobho ọkpana ọony obo bho ookua bho, itu oghigh odi molo ezira ole rutu mookua ọde bhꞌodi.’ 15Peedi irōbh zodi imutiom tookua obho ighigh.”
Keḍio ạJizos apuruan kua, “Omina ẹkaraan mobho odi obo bho ookua iirẹeny amiim obho taḍighi zeedi arōoy obho odi ạnogho bọ mookua bho? 16Odi tatu ni ạze rōoy bhibha, ạseghe mookua iirẹeny amiim obho ọnogho mịnon arōoy mogu ọḍian nꞌodi.” Amen arōoy obho ịmoghon mẹzo bho, peedi ighōl kua, “Ẹkpugh! Irue ḍio eru kua.” 17Keḍio ạJizos aanon eedi apuruan kua, “Kiibha ụge bọ tiilōgh obho kimōrō ẹko?
‘Ạkar eekpōogh ọbharakpar obho iḅōghiiy rutu obho igin obho
maaghiraan atu mobho ạneghe bọ apu obho.’
18“Kōoy kōoy olo ameelom todi ọbharakpar obho taḅigian ni mịpaḍi, kerumolo odi ọbharakpar obho ameelom monyiin ōoy podi ọgbe odi otẹnẹ ọomi.”
Iipuruan ilo igboloman nꞌosōgh osōgh
19Pobo ịtughumiom iilōgh obho nꞌaruvẹmụ arōoy iiḅua bho ịva mebōom olo oḅol ạJizos tesi opopo. Eedi neelōghōm mobho ạJizos adōghōm zeedi sidōgh obho. Taruugu arōoy obho, eedi irue ḍio moḅol odi. 20Peedi iḅōrō mamen olo tạneghe ni. Peedi ịghi iḅia marōoy olo teḍighi kir eedi iiḅi arōoy, irōm zeedi mọghi opuruan iipuruan ọdegh ạJizos, molo eedi keḅol zodi kebhin kẹghiom mọola bho ạteeny mịnyaam nꞌịikpo ọliom arōoy obho. 21Keḍio eedi ipuruan kua mạJizos, “Obo ịtughumiom, ezōor noolōghōm mibha ạna nạgba, nạtughumiom magey obho. Ezōor noolōghōm mobho ạna ọoseen ghạ ḍio mōoy, nạtughumiom rōoy mebōom obho tẸnaan mi tagey obho. 22Gbạ mạnogho ezōor tibha ịitua onuma olōgh odi gạ mi taraalōgh obhꞌezira mosōgh osōgh ọnogho ọolema bhꞌaRom?” 23ẠJizos maalōghōm mobho eedi iru mọdegh odi, keḍio ạkpete kua ạnogho zeedi. 24“Iḍeeriom ạami mokpoki. Amusigh nꞌaḍien okōr ōoy mobho ụgiom suo?” Eedi ịbhagharana zodi kua, “Olꞌobꞌọolema bhꞌaRom.” 25PạJizos ạkpete kua, “Isōgh mẹnogho mọolema bho mibha iru bọ milꞌodi obho, mẹnogho mẸnaan mibha tẸnaan.” 26Eedi irue ḍio mọbhamam odi togbo arōoy obho mi tiibha bho. Keḍio eedi ịrol bịrim bịrim ịḍua, neemōogh tọbhagharana bhꞌodi.
Iipuruan ilo igboloman nꞌoḅetunu tọbho bho
27Ẹde arōoy ogbo arōoy aSadusi obho iru tạJizos. (Eedi obo bho imōruōm io mobho oḅetunu tọbho bho odi obho.) Keḍio eedi ipuruan kua zodi, 28“Obo ịtughumiom, aMozis mi tiilōgh obho ạge kua aseerian ezira, ‘Erumolo ōoy abhin mạni kạbho, erumolo odi ọteeny io rụnwuny, pumōr odi ale rutu abhin mạni obho, ạmaraghi rụnwuny ạnogho zodi obo bho nạabho bho.’ 29Onyiin amen keḍio oḍual aburumōr iru imute. Okenya bho aru abhin mạni, ọmar io nọmar mọony, pạbho. 30Pogbẹbhiōm ịzal obho ale rutu abhin mạni obho. 31Ạḍua todi asi togbẹbhiōm ịraar obho. Onyiin ẹzo bhobho imutanaan moomo oḍual eedi — oomo eedi ịbhozu ni ẹman, bọbon ōoy olo ạmar mọony olo. 32Tikunughi obho, podi ạni obho ạbho nạ. 33Esiibha, taḍuma oḅerenu tọbho bho, ọteeny omoom aghuḍum obho, odi tatu mạni okōr ōoy, tẹzo bho oḍual aburumōr obho neerughom zodi ạni obho?”
34Keḍio ạJizos ạbhagharana kua zeedi, “Arōoy ẹmar-arōoy obhobho nẹḅalagh ilom, epinogh rạani. 35Obo bho ịkpe bọ moḅẹriōn tọbho bho morugh tẹmar-arōoy obho natu bọ bho, ịḅalan io milom. 36Eedi tẹtol kitelema tẸnaan, ịbho mu. Tẹzo bho eedi neeḅerenu tọbho bho, peedi ạnwuny tẸnaan. 37AMozis ạmaar ạgba amutiom mobho noḅẹriōn mobo bho nẹebho bho mọteeny omoom aghuḍum. Tịigbaay obhꞌodi mi tesi obho ạnyan ạrol ale mekpu eḍum obho ẹkona, odi ạḍeghe mibha Obạmọogh obho aru mẸnaan tEbrạhạm nꞌẸnaan tẠizik nꞌẸnaan tạJekob. 38Iibha nẹgba eḍeeriom mobho odi otu ḍio mẸnaan obo ụbho, aru mẸnaan obo bho idi nꞌaghuḍum obho, tebum obho oomo eedi iḍum ịnogho zodi.” 39Pẹtede obo ịtughumiom iilōgh obho ịkpete kua imutiom, “Obo ịtughumiom, ạna nạamaar ạpagharana.” 40Eedi imina ḍio eḅom ẹmu momina opuruan odi miipuruan.
Iipuruan ilo igboloman nꞌaKraist obho
41Keḍio ạJizos ạkpete kua ạnogho zeedi, “Uḍighi ẹko kụ nokōl maKraist obho, ọony taDevid? 42ADevid nịvo nịvo aghōl kua mi tọbhereer ạsoor obhꞌodi,
‘Obạmọogh obho ạkpete kua ạnogho mObạmọogh ạami obho:
Tọl suo delede mi toḍiom ạvo ạmi,
43ninii ạami aḍighi mobo ọlogh aḍien onuma etu mẹtolom asike onuma.’
44“Ạna ạmiin, aDevid abheleghi zodi aghōl ‘Obumọogh,’ ụteko oḍighi kaKraist obho amina aru mọony taDevid?”
Iikiom ilo igboloman nꞌobo ịtughumiom iilōgh obho
45Ẹzo bho oomo arōoy obho nẹmoghon zodi obho, podi ạkpete ạnogho mobo bho nẹtuonuman zodi obho aghōl kua, 46“Igona lōor enyina mi tobo ịtughumiom iilōgh obho, obho negbẹel ghạ mọlokia obꞌạdoni kesi kesi, nẹva ghạ molo, tipeleghian eedi, kọlogh ghạ zeedi meghuan mi tariḍighi obho, nẹson ghạ mẹtolom ạruula mi totu ịtughumiom arōoy aJu obho, nꞌibꞌiiḅi ẹtolom mi tariisi ẹzaal, 47neenioghom ghạ marukpukele ạraani mi tarutu eedi, keḍio tẹzo olo oobiōghōm arōoy nẹki ghạ eekpulughu mịidoony iikpulughu. Tebum iibha bẹleni, ilo tọliom enyina teḅẹebh epu milꞌịnon arōoy.”
21Ẹloghom ikpoki ekpukele ạni tẹḅa obꞌotu iikpulughu obho
1Keḍio ạJizos aghiraan aanon ạmiin mạruula bho nẹlokiiy mikpoki eedi mi tẹḅa ikpoki otu iikpulughu obho, 2keḍio odi amina ạmiin monyiin obo uvekulom ekpukele ạni nạlogh mịzal ịbam ikpoki. 3Podi aghōl kua, “Ạami nạgba ạnogho enyina, uvekulom ekpukele ạni obhobho ạlogh apu mibhꞌoomo arōoy ipedi obho. 4Ipedi obho ịseghe mịbam tobꞌọlogh obho eedi ịteeny obho ẹlogh: odi ạni obho tekulom obhꞌodi ạlogh moomo ibha odi ạteeny obho.”
ẠJizos ạgba mẹzo tọokpo mobꞌotu iikpulughu
5Ẹzo bho ẹtede arōoy nẹḍeghe mẹzo otu iikpulughu obho ạneghe, nꞌibꞌiiḅi ạrubharakpar obho uḅōghōm obho, nꞌoomo iiḅi ọkpo bho nookōbhōghi ụnogho mẸnaan obho, 6pạJizos ạkpete kua, “Oomo abaabha bho enyina nẹmiin suo bho — amen natu molo bọbon onyiin ọpaḍi ọbharakpar tạtol tạnyu onyiin molo unyu ḍio orōbh olo. Oomo eedi tonyuughi ni otuḅeḍi.”
Aliiki ọmiinom nꞌịiḅaghami
7Peedi ibheleghi zodi ipuruan kua, “Obo ịtughumiom, okōr amen mobho iibha bho temute? Okōr oḍigh elẹgh mibha tọmiin mamen olo iibha bho netu momute?”
8Keḍio ạJizos ạkpete kua, “Ịmaar egona lōor enyina. Ímōrō ghạ oobiōghōm enyina. Ọlogh arōoy tetu ni mi taḍien ạmi ẹkpete kua, ‘Ạami odi,’ bolobolo, ‘Amen obho nạateeny.’ Ítuonuman ghạ zeedi. 9Aruugu isibh io zenyina tamen olo enyina ịmoghon mọdu ạraagham nꞌạruruan. Ọkpo ilo idi kua tepira ni emute, keḍio ikunughi obho dọteeny io.” 10Keḍio odi amina ạkpete kua, “Ẹma nꞌẹma, nꞌebhugh nꞌebhugh teḅezuan ni. 11Ade bho taazighina ni magey ạdeghenyu, oḅẹer tạtol ni nꞌoḍigh kẹrekere ạrazegh mi toomo ariisi. Ọkpo ibꞌaruugu nꞌelẹgh temute ni tạnyu obho.
12“Keḍio oomo abaabha temute, toḅologh ni zenyina, keḍio eedi tẹnogho zenyina mọoḅaghami nꞌọmiinom: tọloghom nạ ni nạ zenyina mi tarutu ịtughumiom obho mọva apum enyina, keḍio tọloghom enyina mi tikoli; topin ni zenyina ọmarami mi taghisigh ạruula nꞌobo ịto aruubhugh obho tebum aḍien ạmi. 13Oobho pamen obho ịgbaan molo enyina kẹgba mooḅi adōm obho. 14Iibha ẹrol tiloghi enyina kesiibha, mọḅele ọoḅaghami alōor enyina milo enyina tekōl ẹpagharana. 15Ạami kụ tạnogho zenyina mọnuekpete nꞌolōghōm ạar molo bọbon onyiin ōoy obo ọlogh aḍien enyina olo tatue ạmaranuan zenyina mi tịigbaay enyina olo. 16Ạburude nꞌaburuniin enyina, nꞌaburumōr enyina, nꞌarōoy eghunotu enyina nꞌạburubulol enyina ẹkona tepin ni enyina ẹki totu ịiruan obho. Eedi tẹze ni mẹde enyina. 17Kōoy kōoy tạlogh ni zenyina ḍien mebum ạmi. 18Keḍio bọbon ekpo ạsilaan olo tạkar mi tẹmu enyina olo. 19Ízuum ghạ lōor, pẹzo enyina tẹpela lōor enyina.
ẠJizos ạgba mẹzo tọokpo maJerusạlẹm
20“Amen enyina ịmiin mibha arōoy ẹgham neekuōm maJerusạlẹm, penyina olōghōm mobho naatuan mobho tọokpo zodi. 21Pobo bho idi taJudia eghilighu ẹghi tibꞌaruugum obho. Obo bho idi bọ tẹma bho ẹḍuaghu, keḍio eedi obo bho ilo tẹma bho imula ḍio eru. 22Aruḍuma bhibha, paruḍuma omulumian ịkarabh, molo oomo ọnuekpete ẹegia iigbia bho etu magey. 23Opo pọmiinom olo tẹtol ẹnogho mạraani obo bho idi nꞌeghun obho, nꞌaburuniin ilo ạnwuny eedi nẹmaam ni mạmaam. Azuḅa ọkarabh ạdolomaan olo tạtol ạnogho made bhobho, keḍio Ẹnaan tạliom marōoy bhibha. 24Ẹtede arōoy obꞌạmugem tạze, keḍio ipedi obho tetẹnẹghu marōoy ikoli ẹezaranu mi toomo aruubhugh obho, keḍio obo bho ilōghōm io mẸnaan obho tetu ẹezeghi maJerusạlẹm ninii amen eedi tatu atẹn.
Eruom tỌony Oōy obho
25“Araalẹgh temute ni mi taghōzōgh obho, nꞌụvanyu obho, nꞌịinaany obho. Tade bho ịitu tẹtol ni ẹnogho moomo aruubhugh obho. Aruugu tesibh ni rōoy tebum oghur nꞌegbōrōm ạribhiiny obho. 26Arōoy tẹkorom ni mi tebum ọkpo bho netu momutenaan oomo ẹmar-arōoy obho, nꞌebum obho ịnyaam ọkpo bho idi bọ tạnyu obho tekunughiom ni obho. 27Keḍio tọmiin mỌony Oōy obho nạaḍua teḅōghōghaan obho namute natu nꞌịnyaam nꞌogbōgh eghuan odi. 28Amen ọkpo bhibha nẹke momuteghu, pịmara meenon tạnyu obho, ebum obho nạateeny mamen ọbhel enyina ọseghe tade bho.”
Ịtuugha oorẹeny obho ughōl bọ ạfig obho
29Keḍio ạJizos adōgh sidōgh obhobho ạnogho zeedi, “Ịitua moorẹeny obho ughōl ạfig obho nꞌoomo iirẹeny ipedi obho. 30Amen olo odi natughẹel migue, penyina olōghōm mobho unu natuan. 31Onyiin ẹzo bho nạ, amen olo enyina ịmiin mobho ọkpo bhibha nemuteghu, penyina olōghōm mobho Ade-Ọolema bho tẸnaan natuan.
32“Ịitua miibha bho! Oomo ọkpo bhibha temute ni koomo arōoy obho idi tesuo nꞌaghuḍum obho tẹpo ẹman. 33Ạnyu obho nꞌade bho tepẹ ni, keḍio ọnuekpete bhꞌạmi irue ḍio ebhẹ.
Aliiki ogona lōor
34“Tebum ipa bẹleni, ịmaar egona lōor enyina. Íseeri ghạ silōor enyina moleeyogh ẹzaal nꞌọbhoghoḍiaay ịighuanaan arimiim nꞌịiḅaghami aghuḍum obhobho, bolobolo aḍuma popo tatuanaan enyina mi tekperenom. 35Aḍuma popo tatuanaan moomo arōoy tesuo ẹmar-arōoy obho kạwaya olo ụkpaari useerian ịnam. 36Ịmaar megona lōor enyina meḅōrō moomo amen mi tiikpulughu molo enyina kẹteeny mịnyaam olo orue ọrol molo ạar omutenaan io zenyina tamen obho oomo ọkpo bhibha temuteghu obho, molo enyina tetue ni ẹmaranuan Ọony Oōy obho.”
37Toomo aruḍuma bhipa, ạJizos ạrol ạtughumiom ghạ mi tobꞌotu iikpulughu obho. Udule podi ọghi ghạ tobꞌeegum obhꞌỌlivs ọrol epa. 38Keḍio oomo arōoy obho teḅon ẹki tobꞌotu iikpulughu obho mọmoghon ịtughumiom obhꞌodi.
22Ezue olo uḍigh moghigh ạJizos
1Tamen olo natuan maḍuma ẹzaal obho noliom ghạ mạbred obho ạar obho ughōl ayist obho ụlogh ghạ ḍio bho, obho ughōl bọ Opẹl-Otẹn obho, 2paruvẹmụ arōoy iiḅua bho nꞌobo ịtughumiom iilōgh obho nẹva mebōom olo alisian moghigh ạJizos, tẹzo bho eedi nekiil ni rōoy obho.
Ẹzo aJudas amōruōm moḅool ạJizos
3Keḍio Eru obho aru aḍigh tologhi taJudas, obho ughōl bọ Ịskariot obho, obho aru bọ monyiin taḍiōbh nꞌịzal obho. 4Keḍio aJudas ạghi aḅian nꞌaruvẹmụ arōoy iiḅua bho nꞌạruula obo iḅōrō otu iikpulughu obho mẹzo olo ọseghe ạJizos ọlogh tạvo eedi. 5Tọḅaal ologhi obhꞌeedi, peedi iḍumom mọkpe odi mikpoki. 6Keḍio aJudas amōruōm, ạke mọva ebōom olo oḅoolaan eedi mạJizos mi tẹzo olo arōoy ilōghōm io.
Aḍuma iikōbhōghia ole ẹzaal Opẹl-Otẹn obho
7Todi aḍuma ẹzaal Opẹl-Otẹn obho noliom ghạ mạbred obho ayist ilo bho, obho nokigh ghạ mọony ẹena oliom obho, 8pạJizos arōm maPita nꞌạJon ạkpete kua ạnogho zeedi, “Ịki mẹmaar meḍighi meseeri mesi olo ezira kole mẹzaal Opẹl-Otẹn obho.” 9Keḍio eedi ipuruan kua zodi, “Okōr esi mobho ạna nạva molo ezōor kọghi koḍighi koseeri?” 10Keḍio odi ạkpete kua, “Iinon. Ẹzo bho enyina neḍigh kua be mi tẹma bho, penyina ọmiinan ōoy olo arōol mọonu ạmuum. Ịtuonuman zodi mẹghi meḍigh totu obho odi taḍigh obho, 11mẹkpete mẹnogho mobo bho ạteeny motu obho meghōl kua, ‘Obo ịtughumiom obho aghōl mezōor opuruan kua zịna, oḍighen ẹkpe obho ạami nꞌiteledōm ạmi tole mẹzaal Opẹl-Otẹn obho?’ 12Podi oḍeeriom enyina monyiin ẹkpe mi totu ạnyu obho olo nọomaar ubur; tesi opopo pesi enyina teekōbhōghi eḍighi eseeri.” 13Eedi ịghi, peedi ịmiin nạ moomo ẹzo bho ạJizos ạkpete ạnogho zeedi obho, keḍio eedi iḍighi iseeri mesi ole ẹzaal Opẹl-Otẹn obho.
Eḍian ạruumugh tObạmọogh obho
14Amen amen obho aru ạteeny, pạJizos nꞌiteledōm obhꞌodi ịrol delede mole. 15Keḍio odi ạkpete kua ạnogho zeedi, “Ạami nạava magey motul enyina ole ẹzaal Opẹl-Otẹn obhobho keḍio karu kạteeny maḍuma ọmiinom obhꞌạmi. 16Ạami nạgba kua ạnogho zenyina, ạami ule mu ninii tạteeny amen olo toḍighi omutiom mạkar ẹmu ẹzaal obhobho mi tAde-Ọolema bho tẸnaan.”
17Keḍio ạJizos ạseghe mạḅugha amiim obho ạnogho lịsebh mẸnaan, keḍio odi ạkpete kua, “Ipin mẹḍian. 18Ạami ụpoghol mu miim obhobho ninii Ade-Ọolema bho tẸnaan tatu.”
19Keḍio odi ạseghe mạbred obho, ạnogho lịsebh mẸnaan, aḅigh, keḍio ạnogho zeedi, aghōl kua, “Oobho piikpōogh alōor ạmi, obho nọtunom mạar mebum enyina bho. Iḍighi ghạ kua mọotua ghạ ạmi.” 20Onyiin ẹzo bho, bho odi ạseghe ạnogho zeedi mạḅugha amiim obho, men eedi neele ịḅele, podi ạkpete kua, “Oobho pạḅugha amiim omoom ịzo tẸnaan obho ughirom nꞌịḅaal obho tạmi, obho uzu bọ mebum enyina bho.
21“Keḍio iinon. Odi obo bho aḅool ạami obho naatul ạami nale ạni. 22Ẹzo bho uguanaan mỌony Oōy obho pẹzo odi tạtuugh nạ ạpo ạki, keḍio itōnyōgh tẹtol ni ẹnogho zodi obo bho aḅool odi obho.”
23Keḍio eedi ịrol ipuruan lōor eedi mobo bho, mi teesoḍia eedi, taḍighi miibha bho.
Ịkanan obo tạbugh apu
24Keḍio obo bho nẹtuonuman zodi obho ịrol nẹkanan nạ mobo tatu muvẹmụ oomo eedi. 25Keḍio ạJizos ạkpete kua ạnogho zeedi, “Ạruula ẹmar-arōoy obho nẹdaam ghạ nꞌịnyaam marōoy eedi, keḍio ạruula bhꞌeedi pobo nokōl ghạ ạburubulol arōoy obho. 26Ịtol io kua mi tenyina. Kpẹlen nꞌipa, ōoy olo, mi tenyina, tatu muvẹmụ tạtol ni kobho akio apu moomo enyina bho, keḍio obo bho tạkpo bọ aḍionom obho tạtol kọony-otu enyina. 27Obo bho nale bho nꞌobo bho nạsa bọ atōol meḍian obho, tịzal eedi koḍighen apu? Sobo bho nale bho, keḍio ạami odi teesoḍia enyina konyiin olo nạsa atōol.
28“Enyina pobo nẹerolan ạami mi toomo ariisi ọdegh oonon ạmi. 29Tẹzo bho Ọde ạmi nạanogho zạmi mịnyaam ọda bho, pẹzo ạami nạnogho nạ zenyina. 30Enyina tele ni ẹpoghol nạ mi tAde-Ọolema bho tạmi, enyina tẹtolom ẹtolom ịiruan obho esōbh rạakpe ẹnogho maḍiōbh nꞌịzal eghun otu obhꞌIzirẹl.”
ẠJizos ạgba mibha aPita tạparanaan zodi obho
31“ẠSaimon, Sạimon, mọghon! Eru obho naabhin mịikpo moru ọdegh oomo enyina, kẹzo bho oḍighi male bho nạson ghạ mikpo izim obho ạḅirogh mi tịgheneken obho. 32Keḍio ạami nꞌaakpulughu ạnogho ạna ạSaimon molo ologhi omōruōm onuma tạtolaan ni ạna. Amen olo ạna ughiraan uru tạmi, pukuemi miloghi aburumōr onuma.”
33Keḍio aPita ạbhagharana kua, “Obumọogh, ạami taḍigh ạni ni tikoli obhꞌonuma, ạpo ạni nạ nꞌọbho onuma!”
34PạJizos ạbhagharana kua zodi, “Ạami nạgba kua ạnogho ạna aPita, ạkenegh ọlaal io dodon ninii ạna tạparanaan ạami ịraar amen.”
Ooḍigh ikpoki nꞌẹḅa nꞌelōor ẹgham
35Keḍio ạJizos ạkpete ạnogho zeedi, “Amen obho ạami urōm enyina umutiom obho, kạami ughōl menyina ịpam io mikpoki nꞌẹḅa, nꞌarakōrō obho, kir ạar olo enyina ịva olo enyina ịteeny io?”
Keḍio eedi ịbhagharana kua, “Olo nolo.”
36Keḍio ạJizos amina ạkpete kua, “Esiibha bho, kōoy kōoy olo ạteeny mikpoki, bolobolo ẹḅa, ạseghe; keḍio kōoy kōoy olo ọteeny io melōor ẹgham, aḅool akoti odi, ạghi aghuōm monyiin. 37Keḍio ạami nạgba kua ạnogho enyina, ẹegia iigbia obho, obho aghōl bọ kua, ‘Ụḅaram odi mi tibꞌisōor miilōgh obho,’ tẹtuugh nạ ni mẹzo bho ẹtolan ạami, ebum obho ibha nọoge bọ milo igboloman nꞌạami obho nẹetuugh nạ nemute.”
38Keḍio obho bho nẹtuonuman zodi obho ighōl kua, “Nonon, Obumọogh. Iibha ịzal aralōor ẹgham.” Keḍio odi ạbhagharana kua, “Nẹeneghiom!”
ẠJizos aakpulughu mỌde bho
39Keḍio ạJizos ạḍua tẹma bho, kẹzo bho odi naḍighi ghạ bho, ạghi tobꞌeegum obhꞌỌlivs; keḍio obo bho nẹtuonuman zodi obho ịghi ạni. 40Amen eedi ịghi isi todi esi obho, podi ạkpete kua ạnogho zeedi, “Iikpulughu molo enyina imeel eḍigh tọdegh oonon.”
41Keḍio odi ạḅele zeedi ạghi tamusigh mịbam, olo tagbeeny ni aaleeny mobho urōbh ekpo, agbuluman aakpulughu, 42aghōl kua, “Ạda, erumolo iḍigh tologhi onuma, putughuneen mọmiinom obhobho mi tạmi. Oomo ipa ẹkona, ịtol io tịto ạmi, ẹrol ni tịto onuma.” 43Keḍio onyiin otelema tẸnaan tạnyu obho asōor aru ạnogho zodi mịnyaam. 44Tobꞌẹegama alōor, podi amina ạghuemi mologhi odi mi tiikpulughu. Enōman olo idi keekpa ịḅaal ịrol nẹkaraghu talōor obhꞌodi.
45Odi aakpulughu ạḅele, podi aḅetunu amula ạghi tobo bho nẹtuonuman zodi obho; eedi nekoḍiiy, ịitu obho neepu. 46Keḍio odi ạkpete kua ạnogho zeedi, “Eeghe kenyina nekoḍiiy? Iḅerenu meekpulughu molo enyina imeel eḍigh tọdegh oonon.”
47ẠJizos odi nini nạḍeghe, men obꞌọlogh arōoy ịḍua iru. AJudas onyiin taḍiōbh nꞌịzal obo bho nẹtuonuman zodi obho, pobo akpo aḍionom rōoy obho. Eedi ịghi isi tạJizos, podi aJudas ạghi moḅolom odi. 48ẠJizos apuruan kua zodi, “AJudas eḅolom pibha ạna tapin aḅoolom mỌony Oōy obho gạ?”
49Amen obo bho nẹtuonuman zodi obho ịmiin ibha netu momute obho, peedi ipuruan kua, “Obumọogh, ezōor obhin maralōor ẹgham obho obiom?” 50Ponyiin eedi aben asōbh moḍiom aḅeri ẹbana uvẹmụ ōoy iiḅua bho.
51Keḍio ạJizos ạkpete kua, “Iibha nẹeneghiom!” Keḍio odi akulaan maḅeri ōoy obho aakō.
52Keḍio ạJizos ạkpete ạnogho marōoy iiḅua bho, nꞌạruula obo iḅōrō otu iikpulughu obho, obo bho iru bọ moḅol odi obho aghōl kua, “Enyina ịbhamagh maralōor ẹgham nꞌarugule eru moḅol obꞌọba bẹle? 53Amen ạami ụrolan nꞌenyina moomo aḍuma mi totu iikpulughu obho, enyina ibhum io ạami. Keḍio esiibha bho pamen enyina, amen ọola ọkinim tạda bho.”
APita ạbharanaan mạJizos
54Keḍio eedi iḅol mạJizos ibhin zodi ịghi totu uvẹmụ ōoy iiḅua bho, paPita ạtuonuman tegbeeny. 55Amen eedi igbonoghi nyạn tebughotu obho, paPita aḍigh ạni ạrol delede nạanwa nyạn obho. 56Amen onyiin ẹbana ọnyani obho ạmiin odi mobho ạrol delede tạnyan obho, pagbiom riḍien odi zodi ạkpete kua, “Oōy obhobho nạtolan ạni ghạ zodi.”
57PaPita ạbharanaan aghōl kua, “Tạa, ạni obho, ạami ulōghōm io zodi.”
58Ọbam amen atẹn, ponyiin ōoy ạlogh zodi melẹgh aghōl kua, “Ạna ẹkona onyiin eedi!” PaPita ạbhagharana kua, “Oōy, ạami ạni ḍio!”
59Onyiin ạwa aru atẹn, pọnon ōoy amina ạkpete ạkpaariom aghōl kua, “Agey nạ ni, ẹzo olo ọbharanaan olo, ōoy obhobho nạtolan ạni ghạ zodi, odi ẹkona olꞌaGalili!”
60Keḍio aPita tamina ạpagharana, “Oōy, ạami ụmoghonyan io miibha ạna nạkpete bho!” Tamen obho odi nạkpete miibha bho, pạkenegh obho ạlaal. 61Keḍio Obạmọogh obho aghiraan asōmōghi aanon zodi aPita, keḍio odi aPita tạatua mọnuekpete tObạmọogh obho, mẹzo bho odi ạkpete ạnogho zodi aghōl kua, “Keḍio ạkenegh tạlaal dodon, ạna nạabharanaan zạmi ịraar amen.” 62PaPita amute aghẹel, aleghe magey.
Ịimologh ilo ụmologh mạJizos nꞌeḍulom olo uḍul odi
63Arōoy obho neḅōrō bọ mạJizos obho ịrol ịiḅaghami zodi, iḍul nạ zodi. 64Eedi epuughi nạ riḍien odi, keḍio tepuruan kua zodi, “Okōr ōoy ạkpol ạna? Kōl.” 65Keḍio eedi imina ịkpete zodi moḍigh kẹrekere ịkarabh ọnuekpete.
Eedi ịmarami mạJizos taghisigh ookōbhōghian ạruula bho
66Amen aḍio ạḅaal, parukenya ẹma aJu obho, nꞌarōoy iiḅua bho, nꞌobo ịtughumiom iilōgh obho iru iikōbhōghian, keḍio ibhin mạJizos ịghi totu ezue eedi, 67ịkpete kua ịnogho zodi, “Gbạ mạnogho zezōor, ạna pạkar odi aKraist obho?” Keḍio odi ạbhagharana kua, “Ạami ụgba nạ ni ạnogho enyina, enyina ibhinom io ạami, 68kạami apuruan enyina miipuruan, enyina ịbhagharana ḍio ạami. 69Keḍio ạseghe siibha ạghi taghisigh, Ọony Oōy obho tạtol ni toḍiom ạvo ẹtolom obho tẸnaan obo bho ạmoogh oomo ẹmiriikpo bho.”
70Keḍio oomo eedi ipuruan kua, “Ạna podi Ọony obho tẸnaan?” Podi ạbhagharana zeedi “Enyina nekōl mạami.”
71Keḍio eedi ịkpete kua. “Ezira ụva mu mọnon ōoy momina oru ọgba! Ezira nịvo nịvo nọomoghon mibha ọnu ịigbaay obhꞌodi.”
23Eedi ịmarami mạJizos taghisigh taPailet
1Poomo eedi iḅerenu ibhin mạJizos ịghiom maPailet. 2Taghisigh taPailet peedi ịke mọgbaaghiom odi miben, ighōl kua, “Ezōor nọomiin mibha ōoy obhobho naabiōghōm rōoy, nạkpete ạnogho zeedi meedi isōgh io mosōgh ẹnogho mọola bho aRom, keḍio nakōl nạ modi aKraist ọola bho.” 3Keḍio aPailet apuruan odi kua, “Ạna ọola arōoy aJu obho?” PạJizos ạbhagharana zodi kua, “Ạna ku nakōl kua.” 4Keḍio aPailet ạkpete ạnogho marōoy iiḅua bho nꞌọlogh-ọlogh arōoy obho, aghōl kua, “Apum olo ạami ụva ụmiin mi tōoy obhobho molo oghigh odi olo.” 5Peedi ịbhooru imulughu modi naabhin mịtughumiom odi naḅia moomo arōoy aJudia morubhe ẹgham. Odi ạke taGalili, keḍio esiibha odi naarōol asiom suo.
Eedi ịmarami mạJizos taghisigh tạHerod
6Amen aPailet ạmoghon mẹzo bho, podi apuruan kua, “Oōy obhobho olꞌaGalili?” 7Amen odi aru ạmoghon mobho ạJizos aru molo ebhugh tạHerod, podi ạnogho zodi marōoy iḅōrō bho mọghiom ạHerod. Odi odi nạ taJerusạlẹm men opopo. 8Ologhi tạHerod ạḅaal magey mọmiin ạJizos. Kọkanya amen mobho odi nạamoghon mọdu tạJizos, keḍio odi nạva ghạ mọmiin odi. Odi nạva molo ạJizos kaḍighi mọkpo ibꞌaruugu odi kạmiin. 9Podi ạHerod apuruan mạJizos mọlogh iipuruan, keḍio ạJizos ọsir io bọbon ọghor. 10Keḍio arōoy iiḅua bho nꞌarōoy obo ịtughumiom iilōgh obho imute iru nemulughuom ẹgbaaghiom odi miben. 11Keḍio ạHerod nꞌarōoy ẹgham odi ịiḅaghami zodi, ịloki nạ zodi rẹgheer. Keḍio eedi ịseghe mobꞌạdoni ạruula ịḅologhi zodi, ibhin zodi imulumi ịghiom aPailet. 12Todi ạkar aḍuma popo, pạHerod nꞌaPailet iru bụrubulol. Tamen iibha bho demute ḍio bho, eedi obo ọlokian ariḍien.
Usōbh mọkpe bho obhumeni mạJizos moghigh odi
13PaPailet amina abheleghi marōoy iiḅua bho, nꞌạruula bho, nꞌarōoy obho aakōbhōghi monyiin esi, 14ạkpete kua ạnogho zeedi, “Enyina ibhin mōoy obhobho eruom ạami eghōl modi nateliom rōoy mi tịkarabh araabōom. Ạami, mi toomo ịigbaay enyina, ụmiin io mapum obho enyina nẹpamam odi obho. 15Ẹzo bho ạHerod amulumi zodi aru tạmi obho, podi ẹkona ọmiin io mapum odi nạ. Bọbon ạar olo ōoy obhobho naaḍighi molo ịgbaan lo odi kạbho olo. 16Tebum iibha bẹleni, ạami tạgurogh odi, ạḅelemaan.” 17[Toomo aḍuma ẹzaal Opẹl-Otẹn obho, aPailet namutiom ghạ monyiin ōoy ikoli ạnogho zeedi.] 18Oomo arōoy obho imulughu imutiom, “Kigh zodi mamutiom mạBarabas mạnogho ezōor.” 19(ẠBarabas odi mikoli, tebum obho odi aghigh mōoy, tamen olo uḅeey ralebhir tẹma bho.) 20APailet nạva mẹzo olo omutiom ạJizos, podi amina amula aru tarōoy obho ạkpete modeenyemi iloghi eedi. 21Parōoy obho imulughu imulumian odi, “Toorẹeny ẹmigheri obho, kạn zodi toorẹeny ẹmigheri obho!” 22Keḍio aPailet amina ạkpete mogbẹbhiōm ịraar amen ạnogho zeedi, “Okōr oḍigh ịkarabh mibha odi aḍighi? Ạami ụmiin io mapum olo ịgbaan molo odi kạbho. Ạami tạgurogh odi amutiom.” 23Peedi imulughu tạruumu eedi ighōl mụkan mạJizos mi toorẹeny ẹmigheri obho. Imulughu obhꞌeedi neepu molo eedi ipuom aPailet. 24PaPailet asōbh mọkpe bho abhumeni mạJizos kẹzo bho eedi negbẹel obho. 25Keḍio odi amutiom mōoy obho eedi negbẹel obho, odi obo bho aḍigh mikoli tebum obho odi aghigh mōoy tamen olo uḅeey ralebhir obho, keḍio odi ạseghe mạJizos ạnogho zeedi moḍighi kẹzo kẹzo olo iḍigh tologhi eedi.
Eedi ịkan mạJizos toorẹeny ẹmigheri
26Keḍio eedi ịseghe mạJizos ịḍuonom. Ẹzo bho eedi nẹki obho, peedi ịmiinan mōoy olo ughōl ạSaimon, olꞌaSairini, ạḍua nạki tẹma bho. Peedi ịbham zodi, ịnogho moorẹeny ẹmigheri obho morōol ạtuonuman ạJizos.
27Obꞌọlogh arōoy ẹtuonuman zodi. Ẹtede eedi pạraani olo neleghe nepumughu mebum odi. 28Keḍio ạJizos aghiraan teedi ạkpete kua, “Enyina ạraani aJerusạlẹm, íleghe ghạ mebum ạmi, ileghian lōor enyina nꞌebum ạnwuny enyina. 29Aḍuma natu molo arōoy tẹkpete kua, ‘Ạlisebh ilꞌạraani obho ạnwuny ilo bho, obo bho dẹmaraghi ghạ ḍio rụnwuny obho, obo bho ọony dọmaam ghạ ḍio rạamaam eedi obho.’ 30Opo pamen obho arōoy tẹkpete kua ẹnogho mibꞌaruugum ạrubharakpar obho, ‘Imeleghuom ezōor,’ keḍio tẹkpete ẹnogho mịbam obho, ‘Ikpereghiom zezōor!’ 31Erumolo ọkpo olo idi kua nemute siibha imoom iirẹeny obho, tẹtol ẹko tamen olo iirẹeny obho neemughughu?”
32Keḍio eedi ịseghe mịnon ịzal arōoy ịkanam nꞌạJizos, ạruukoma zeedi arōoy obho. 33Amen eedi isi teegum obho ạgbaanan bọ kịikpo ẹmu ōoy obho, peedi ịkan zodi toorẹeny ẹmigheri obho, nꞌịzal ạruukoma bho, mi tekẹeny nꞌoḍiom tạJizos. 34Keḍio ạJizos ạkpete kua, “Ọde, ḅẹlemaan zeedi! Eedi ilōghōm io mạar olo eedi neḍighi.” Keḍio eedi ịsa mẹlel ịḍian marukpe bhꞌodi. 35Arōoy obho nẹemaraay nepōgha; tẹzo bho, paruvẹmụ arōoy aJu obho nẹeḅaghami ghạ zodi, “Hụu! Odi nạpel ghạ mịnon, odi ạbhela lōor odi, erumolo odi aru maKraist obho tẸnaan, ạkar obho odi nạason ạseghe bho!” 36Arōoy ẹgham obho ẹkona ịmologh nạ zodi, keḍio eedi iru ịnogho zodi mạkata, 37keḍio ighōl kua, “Pẹla lōor onuma, erumolo ạna uru mọolema aJu obho!” 38Keḍio nọoge nạ kua mi tạnyu oorẹeny ẹmigheri obho: “Oobho ọolema arōoy aJu obho.”
39Onyiin ọokoma bho mi tẹeghelaan obho ạkpaton nạ mọnu ạkpete zodi mịkarabh, “Ạna aKraist obho ḍio? Pẹla lōor onuma maru mạbhel ạni ezōor!” 40Keḍio ōoy opedi obho asi zodi, “Ạna oghiil io mẸnaan? Odi nꞌezira idi tonyiin ọmiinom obho. 41Ibha tezira ịkar ni ẹgbaan, ezira nọsughō ḍien, keḍio odi bọbon ịkarabh olo odi aḍighi olo.” 42Keḍio odi ạkpete kua ạnogho mạJizos, “Obumọogh tụtua zạmi mamen ạna tatu mọda ẹmar-arōoy obho!” 43PạJizos ạkpete kua ạnogho zodi, “Ạami nạgba kua ạnogho ạna: aadon ạna tạtolan ạami tesi obhooghia obho!”
Ọbho tạJizos
44Tamen olo aḍio natu mọḍian ịzal abin, paghōzōgh obho aḅil, keḍio obꞌọkinim akpe moomo ẹma bho ninii kogbo ọsilaan. 45Keḍio obꞌukpe bho ụkpo bọ totu iikpulughu obho ạbaan ạḍian ịzal abin. 46Tigbōgh imulughu nꞌobꞌoghōrōkō, pạJizos aleghe kua “Ọde, ạami ụseghe mẹmugh obhꞌạmi ạlogh tạravo bhꞌonuma.” Odi ạkpete kua ạḅele, podi ạbho. 47Uvẹmụ arōoy ẹgham obho ạmiin moomo ibha imute bho, podi abuom Ẹnaan aghōl kua, “Tagey obho, ōoy obhobho ooḅi ōoy!” 48Oomo obo bho ịmara nepōgha bho, amen eedi ịmiin moomo ọkpo bho imute bho, peedi ịḅamaghi rạvo tạruumu eedi keḍio igheleghu. 49Oomo obo bho nẹemar ilōghōm mạJizos obho, nꞌạraani obho ịtuonuman zodi ki taGalili obho, ịmaraay tegbeeny ẹrol ẹmiin mibha nemute bho.
Amaḍi tạJizos
50,51Kir ōoy olo ughōl aJosef olo Arimatia, onyiin ẹma arōoy aJu obho. Odi ooḅi ōoy, ogbōgh ōoy nạ, olo naḅōrō mAde-Ọolema bho tẸnaan moru. Odi odi ạni tạruula ibha nẹto mịto bho, keḍio odi omōruōm ạni ḍio mịto bho eedi ịto bọ moghigh ạJizos obho. 52Odi ạghi taPailet agbẹel moḍim obho tạJizos. 53Keḍio odi asōorẹ zodi, ạseghe mạbalala abhurughiom zodi, keḍio ạseghe zodi ạlogh toogu olo odi agbo mi tạrubhurukpar, olo doḍi ghạ ḍio mōoy. 54Iibha bho imute mudule aḍuma iikōbhōghia obho tạḅaal paḍuma obhooghia arōoy aJu obho.
55Ạraani obho ịtuonuman mạJizos ki taGalili obho ịghi ạni, ịrol ạni ịmiin moogu obho aJosef aḍi mạJizos obho, nꞌẹzo bho odi aḍi obho. 56Keḍio eedi imula ighẹel iikōbhōghia maralo nꞌạrumunu milo ooduom toḍim obho tạJizos.
Tebum iilōgh obho, peedi ibhooghia mi taḍuma oobhooghia arōoy aJu obho.
24Aḍuma ạJizos aḅetunu tọbho bho
1Obun ụḍirogh ạSondi, pạraani obho itẹn ịghi toogu obho ịbhamagh nạ maralo bho eedi iikōbhōghia obho. 2Eedi ịghi isi tọnu otu oogu obho nookilimi mobꞌọbharakpar obho otughuneen. 3Keḍio eedi iḍigh. Iḍigh ịghi, oḍim obho tạJizos Obạmọogh obho olo. 4Tẹzo bho eedi idi tesi opopo mi teemōogh obho be, pịzal arōoy nꞌibꞌịḅaal arukpe olo nẹmua ịmaranuan eedi. 5Taruugu, pạraani obho izumeni sumusigh eedi igbuluman tade bho, keḍio arōoy obho ịkpete kua ịnogho zeedi, “Eeghe kenyin nẹva mi tobo bho nẹebho bho mobo bho odi nꞌaghuḍum obho? 6Odi olo suo, odi naaḅetunu. Ịitua mibha odi ạkpete ạnogho enyina bho mi tamen obho odi odi nini mi taGalili obho. 7‘Toḅool ni mỌony Oōy obho ọnogho miḍighi mịkarabh arōoy, keḍio tọkan zodi toorẹeny ẹmigheri obho, ịraar aḍuma neetẹn, podi oḅetunu tọbho bho.’ ” 8Keḍio ạraani obho tẹetua mọnuekpete obhꞌodi, 9imula ighẹel, ịgba moomo ọkpo bhibha ịnogho maḍiōbh nꞌịzal obo bho ịtuonuman ghạ zodi obho nꞌipedi obho. 10Ạraani bhibha paMeri obhꞌạMagdala nꞌaJoạnạ nꞌaMeri oniin taJems. Eedi nꞌạraani ipedi obho, oomo eedi ịgba moomo ẹmorokpo bhibha ịnogho miteledōm obho. 11Iteledōm obho irue ḍio momōruōm ibha ạraani obho ịgba ịnogho zeedi obho. Eedi ịtuom miben be. 12Keḍio aPita aḅetunu aghiil ạghi toogu obho. Odi azuman aanon, podi ạmiin mạbalala oogu obho be, ọnon ạar olo. Keḍio odi aghẹel nꞌeemōogh tọkpo bho neemute bho.
13Odi aḍuma popo, ịzal arōoy eedi nẹeḍua nẹki tẹma olo ughōl Ẹmaos. Tegbẹbh ni mịzal ookōogh erele mọḍua taJerusạlẹm ọghi. 14Tebōom obho eedi nẹḍeghe mibha nemute bho. 15Ẹzo bho eedi ịḍeghe nẹki obho, pạJizos nịvo nịvo ạḍua aru abhir eedi natelian nꞌeedi. 16Eedi nẹmiin odi, keḍio eedi irue ḍio mọlogh odi melẹgh. 17Keḍio ạJizos apuruan kua zeedi, “Enyina irelian nẹki obho, kenyina nẹḍeghe ghạ mikōr oḍigh ạraḍeghe?” Keḍio eedi ịmara iimirigheni ghisigh. 18Keḍio onyiin eedi olo ughōl aKliopas apuruan kua zodi, “Ạna be misoloman mi taJerusạlẹm olo olōghōm io mọkpo bho nemute maruḍuma bhibha bho?” 19Keḍio odi apuruan amulumian, “Ikōr oḍigh ọkpo?” Peedi ịbhagharana, “Ibha imutenaan mạJizos obhꞌạNazaret obho. Odi ozil tẸnaan, keḍio aḍigh nạ tologhi tẸnaan nꞌoomo arōoy tebum iiḅi oḍighi nꞌọnuekpete odi. 20Arōoy iiḅua nꞌạruula ezōor iḅol zodi ẹnogho molo koghigh zodi, keḍio eedi ịkan nạ zodi mi toorẹeny ẹmigheri obho. 21Ezōor nọotua ghạ okōl kua modi pobo bho natu mọta Izirẹl obho. Iibha iru itẹn nꞌaadon sịraar aḍuma mobho ọkpo bhibha ịke momuteghu. 22Ẹde ạraani obho ogbo ezōor nẹgba mọkpo eemōogh. Eedi iḅon ụḍirogh ẹghi toogu obho, 23keḍio eedi ịmiin io moḍim obho. Keḍio eedi imula iru nẹgba mibha eedi ịmiin ghịiny olo itelema tẸnaan ịgba ịnogho zeedi modi odi nꞌaghuḍum. 24Ẹde togbo bhꞌezōor mẹeghi toogu obho ẹmiin nạ mẹzo bho ạraani obho ịgba bho, keḍio eedi ịmiin io zodi.”
25Keḍio ạJizos ạkpete kua ạnogho zeedi, “Ibꞌaraama arōoy, pẹzo ịkparanaan zenyina momōruōm oomo ibha arizil obho ịgba bho! 26Ịkpe ḍio molo aKraist obho kạmiinom moomo iibha bho molo odi kaḍigh mi teghuan obhꞌodi gạ?” 27Keḍio ạJizos ạmaar ạgba aḍeeriom eedi moomo ibha idi bọ tologhi ẹegia bho, ibha igboloman nꞌodi obho, ạke mi tịbhereer obho taMozis ninii aru asi tibha arizil obho tẸnaan ịgeey obho.
28Amen eedi iru netuan tẹma bho eedi nẹki obho, pạJizos aḍighi kilo odi natu ni motẹn, 29keḍio eedi ịkpetian odi, “Tọlan ezōor ạḅaal ku, aḍio bho nakul keḍio ọbam amen asughō, pọkinim osōor.” Podi ạtuonuman eedi ạghi mọrolan eedi. 30Eedi netu mole eḍian, podi ạseghe mạbred ạnogho lịsebh, keḍio aḅigh ạnogho zeedi. 31Tesuo, pariḍien eedi ịkparanu, keḍio eedi ịlogh odi melẹgh. Keḍio odi abhẹ ạḍua. 32Ponyiin ạkpete kua ạnogho monyiin, “Mịin ẹzo ịrol tekpom ạmi kegi ạnyan mamen obho odi nạgba bọ mẹmu oomo ibha idi bọ tẹegia iigbia bho nạnogho ezira mi tebōom obho. Ẹrol ạni kua tonuma gạ?”
33Keḍio eedi ikẹm iḅerenu ighiil imula taJerusạlẹm, tesi obho aḍiōbh nꞌịzal obo bho ịtuonuman gha zodi obho neekōbhōghian nꞌobo bho idi nꞌeedi obho, 34ighōl kua, “Agey nạ ni. Obạmọogh obho naaḅetunu tọbho bho! ẠSaimon nạamiin nạ zodi!” 35Keḍio eedi ịzal obho ịgba moomo ibha imute tebōom obho, nꞌẹzo bho eedi ịlogh odi melẹgh tamen obho odi aḅigh bọ mạbred obho.
ẠJizos amutiom lōor odi ạnogho mobo bho ịtuonuman ghạ zodi obho
36Ẹzo bho eedi nẹgba miibha bho, tekperenom, odi Obạmọogh obho nạamaranuan zeedi, keḍio ạkpete kua ạnogho zeedi, “Ekima ẹrolan nꞌenyina.” 37Tibꞌaruugu, eedi ighōdi eedi nẹmiin mẹmugh. 38Keḍio odi ạkpete kua ạnogho zeedi, “Eeghe kenyina nẹeḅaghami lōor enyina? Eeghe kenyina irue ḍio momōruōm tiloghi obhꞌenyina? 39Iinon tạravo nꞌasike bhꞌạmi, penyina ọmiin olōghōm mobho ạami podi obho. Ikulaan ạami, penyina ọmiin ạmi. Ẹmugh ọteeny io miikpōogh nꞌịikpo alōor, kẹzo bho enyina nẹmiin ạami siibha bho.” 40Odi asi miibha bho ạḅele, paḍeeriom rạvo nꞌasike bhꞌodi zeedi. 41Eedi irue nạ ḍio momōruōm, tẹzo bho eedi idi tọḅaal ologhi nꞌeemōogh ibꞌaruugu obho, podi apuruan kua zeedi, “Enyina ẹteeny suo bọbon ạar ole?” 42Keḍio eedi ịnogho zodi meekpōogh ena olo nọosa, 43keḍio odi ạḅa taghisigh eedi.
44Keḍio odi ạkpete ạnogho zeedi, “Iibha pibha ạami ụgba ụnogho zenyina men obho ạami odi nꞌenyina bho. Kạar kạar olo ụge lo igboloman ạami mi tiilōgh obho taMozis, nꞌarizil obho, nꞌọbhereer ạsoor taDevid tẹtuugh ni nạ emute mẹzo bho.” 45Keḍio odi akpenyogh miloghi obhꞌeedi mọmoghonyan ẹmu ẹegia iigbia bho, 46keḍio ạkpete kua ạnogho zeedi, “Iibha pibha ụge bho: maKraist obho tạmiinom ni, keḍio taḅetunu tọbho bho mi togbẹbhiōm ịraar aḍuma bho, 47molo topin taḍien odi ọgba madōm oghiraan nꞌọḅelemaan ịkarabh obho olelemi toomo aruubhugh obho, keḍio tọkiom taJerusạlẹm. 48Enyina tẹgbaanaan ạami moomo ọkpo bhibha, 49keḍio ạami taḍighi ni molo oguan obho tỌde bho tatu asi tenyina. Keḍio ịtol tẹma bhobho ninii ịnyaam tẹḍua tạnyu obho esōorōm enyina.”
ẠJizos ạḍua ạsiin tạnyu obho
50Keḍio odi abhin eedi amutonom tẹma bho asiemi kạBetani. Tesuo podi aḅẹtōn rạvo odi ạsebh zeedi. 51Ẹzo bho odi nạnogho zeedi lịsebh obho, podi ạḅele zeedi ạḍua ạsiin tạnyu obho. 52Keḍio eedi iikpulughu zodi, imula ịghi taJerusạlẹm nꞌobꞌọḅaal ologhi, 53keḍio ịrol ghạ moomo amen mi totu iikpulughu obho ịsebh ghạ mẸnaan.