Jud

Jud

¹Ạami aJud, ẹbana bho tạJizos Kraist, umōr taJems, ụge natuom moomo obo bho Ẹnaan naabheleghi ạseghe bho, ibha netugh tetulan tẸnaan Ọde bho, ibha idi teḍigh otu tạJizos Kraist obho.

²Ọsu ạghusan aḍien nꞌekima nꞌetulan ẹmaraghia ẹrolan enyina.

Iben arōoy ịtughumiom

³Iiḅi aburumōr ạmi, ẹrol tologhi ạmi magey mokenya men mọge oruom enyina milo igboloman nꞌịbhelegha bho oomo ezira utul ọnu ụteeny obho, keḍio esiibha neesugh mologhi ạmi mọge ọghuemi iloghi obhꞌenyina molo enyina kẹmaranuan keḅianaan momōruōm obho Ẹnaan nạanogho marōoy odi tonyiin amen be bho. ⁴Ạami nạge miibha bho tebum obho ẹtede arōoy nẹeḅokia iḍigh togbo bhꞌezira nenweeghi madōm ọḅelemaan ịkarabh obho tẸnaan mọgba ọḍua oḍigh tạdol ọva ạraani nꞌilobhir eedi, nꞌogin ạJizos Kraist, obho odi be mỌde otu nꞌObạmọogh ezira bho. Ẹegia iigbia bho nạagba kageedi mapum obho eedi neebhin obho.

⁵Toomo ibha enyina nẹemaar ilōghōm miibha bho ẹkona, ạami nạva ni momina ọotuemi enyina mẹzo Obạmọogh obho ạbhel marōoy obhꞌIzirẹl mi tebhugh obhꞌIzipt, nꞌẹzo odi amina aghiraan ạze abhiẹmi mobo bho imōruōm io obho. ⁶Ịmaar ẹetua ghạ nạ mitelema bho tẸnaan, ibha ipẹl mọota ịto bhꞌeedi obho ịḍua tesi amarugh obho ụnogho bọ zeedi obho. Ẹnaan nạaseghe magbirigbiri olo oḅu ghạ ḍio ạkasioghom zeedi ạlogh zeedi toonu obꞌọkinim naḅōruōm mogbōgh aḍuma bho tọtu mịiruan ọnogho zeedi obho. ⁷Ịmaar ẹetua ghạ nạ mạSodom nꞌaGomora nꞌoomo ạraama bho ikuōm bọ zeedi obho. Arōoy eedi iḍighi nạ kitelema bhibha tẸnaan, esōor olōgh, ọdioghom aruutu nꞌịnon oḍigh kẹrekere ipesi. Ubhin mạnyan olo oḍim ghạ ḍio kamen kamen ọkpiom eedi ọnogho eedi mọmiinom, mọnogho aliiki moomo arōoy.

⁸Onyiin ẹzo bho nạ arōoy bhibha ịmiin ghịiny ilo iḍighi eedi iḍighi lōor eedi mịkarabh, eedi ịgba ịpue mịnyaam ịto bho tẸnaan. Eedi ịipu mitelema eghuan ibha ạnyu obho. ⁹Ạkar aMaikiel uvẹmụ itelema bho tẸnaan ẹkona doḍighi ghạ nạ ḍio miibha bho. Tạruruan obhꞌodi nꞌEru obho, obho eedi ịrol ịghanan mobo tạteeny moḍim obho taMozis ẹkona, aMaikiel ọkpete nạ ḍio ạpue mEru obho, odi ạkpete kua, “Obạmọogh obho ạliom ạna!” ¹⁰Keḍio arōoy bhibha nẹkpete ghạ ẹpue mọkpo ilo eedi ịmoghonyan io. Molo eedi ọkpo bho eedi ibhin mologhi ịnam eḍum ịmoghonyan obho, pibha ibhin nepiẹmi zeedi obho. ¹¹Mịin obꞌọmiinom olo tẹtolaan eedi. Eedi nẹetuonom mebōom taKen. Eedi nẹetuan ebum ikpoki ikōrōnuan taraabōom obho mi toḍighi ịkarabh kẹzo bho aBelam aḍighi obho. Noobhiẹmi zeedi tọmaranuan obhꞌeedi kẹzo bho ubhiẹmi maKora mi tọmaranuan obho odi ạmaranuan maMozis obho. ¹²Amen olo enyina iikōbhōghian mole eḍian ạruumugh obho, eedi ibhin ghạ ḍio rẹgheer mosughaay eḍian obho molo eedi nẹerol togbo enyina kiikuneen mọpue ookōbhōghian obho. Eedi nẹetua ghạ lōor eedi be. Eedi ịgbaanan mọbhurubuur olo ọpibha nạpibhoghom olo osōorẹ ḍio mẹlebhe. Eedi idi kiirẹeny ilo ịloki ghạ ḍio mitu mi tạkar ogbo omuluan, ilo neeḍinyighu imeleghu ịbhozu ịman. ¹³Eedi idi kopōkō ạmuum obꞌọbhiiny, nꞌeḍighiom ạar ạregheer obhꞌeedi neemute nepōobh koobha. Eedi idi kitōbh ịsobh ịinaany, ibha Ẹnaan naaseeri zeedi mesi obꞌọkinim olo kamen kamen.

¹⁴Ịnok ōoy obho agbẹbhiōm bọ oḍual mi tọobhe bho tẠdam obho, pobo ạmiinom eedi mạghiiny obhobho, “Ịmiin, Obạmọogh obho tatu ni nꞌọlogh ạsumuunir itelema iigbia obhꞌodi, ¹⁵mọru ịiruan ọnogho kōoy kōoy, nꞌọnogho apum miḍighi mịkarabh arōoy obho ilōghōm io mẸnaan obho, tebum oomo ịkarabh obho eedi iḍighi obho nꞌoomo ibꞌikpo ọnuekpete bho arōoy ibha ilōghōm io mẸnaan obho ịkpete zodi obho.” ¹⁶Arōoy bhibha nẹghunughun ghạ moomo amen, ẹgba mọkpo ẹḅam tẹmu ịnon arōoy. Eedi nẹtuonuman ghạ mịkarabh ọkpo ẹebhuom alōor obho. Eedi neetumuom ghạ silōor obhꞌeedi, ẹnogho miben eghuan mịnon arōoy molo eedi ẹteeny mibha eedi nẹva bho.

Aliiki nꞌịtughumiom

¹⁷Ịitua, iiḅi aburumōr ạmi, mibha iteledōm tạJizos Kraist Obạmọogh ezira bho ịgba ghạ ịnogho enyina bho mi tamen olo neetẹn obho, ¹⁸mi “Tikunughi aruḍuma bho, arōoy tetu ni ẹtol ẹeḅaghami enyina, arōoy ilo tẹtol ẹtuonuman mịkarabh ọkpo ẹebhuom alōor obhꞌeedi.” ¹⁹Arōoy bhibha obo nẹḍi ghạ mạsosi obho rụuku. Eedi ibhin tịitua iikpōogh alōor obhꞌeedi be ku neḍighiom miibha bho, Ẹmugh Iigbia bho kọnogho ḍio zeedi mịitua bhibha. ²⁰Keḍio enyina, iiḅi aburumōr ạmi, ịkpabh tobꞌooḅi omōruōm obho mebhōbh ẹghi taghisigh ghạ be. Iikpulughu ghạ tịnyaam Ẹmugh Iigbia bho, ²¹meḍuraan eḍigh tetulan obho tẸnaan, suo enyina neḅōrō mạJizos Kraist Obạmọogh ezira bho mobhin tọsu ạghusan aḍien obhꞌodi ọnogho enyina maghuḍum olo ikunughi olo bho.

²²Ịsuanaan ghụsan aḍien mobo bho ịteeny ịzal iloghi obho.

²³Ịpel mebhunughi eedi toonu ạnyan obho. Ịmaar egona lōor enyina mi tọsuanaan ạghusan aḍien mẹtede arōoy ịlogh ḍien marukpe ibha ịkarabh ọkpo ẹebhuom alōor obhꞌeedi nẹeḅibhoghom obho.

Iikpulughu obuom Ẹnaan

^24,25Todi obo bho tatue ni ạpam enyina molo enyina imeel io bho, obho tapin enyina ạmarami kiiḅi arōoy nꞌọḅaal ologhi ọḍe mi taghisigh eghuan obhꞌodi obho, ạkar odi Ẹnaan Ọpela bhꞌezira, obho tughuneen zodi ḍio ọnon olo bho, igbōgh eghuan nꞌịnyaam nꞌịikpo ẹrol ẹnogho zodi kọḅel egbiom obho ninii ạteeny siibha kamen kamen tebum aḍien tạJizos Kraist Obạmọogh ezira bho. Ẹrol ni nạ kua.