Jọn

Jọn

Ekpo-ọnuekpete aghuḍum obho

¹Tọḅel egbiom obho, Ekpo-ọnuekpete bho ạrol; odi ạrolan nꞌẸnaan, keḍio odi pẸnaan obho. ²Odi ạrolan nꞌẸnaan kọḅel egbiom obho. ³Kạar kạar mi tọlem obho ịḍua todi keru; bọbon ạar olo ụlem olo ịḍua ḍio todi keru ilo. ⁴Todi pesi aghuḍum idi, keḍio odi aghuḍum obho pẹḅaal arōoy. ⁵Ẹḅaal obho nạmu tọkinim obho, keḍio ọkinim obho orue ḍio moḍime.

⁶Ẹnaan arōm mọony adōm odi aru olo ughōl ạJon. ⁷Odi aru mọgba ẹḅaal obho omutiom, molo tịigbaay odi kōoy kōoy ạmoghon amōruōm. ⁸Odi nịvo nịvo ẹḅaal obho ḍio; odi aru mọgba ẹḅaal obho omutiom. ⁹Ẹḅaal obho tatu bọ ạmu toomo arōoy obho, pạkar odi ẹḅaal obho.

¹⁰Odi Ekpo-ọnuekpete bho ạrol tẹmar-arōoy obho. Ịḍua todi eru kọlem ẹmar-arōoy obho, keḍio ẹmar-arōoy obho ilōghōm io zodi. ¹¹Odi aru tạkar arōoy odi, keḍio arōoy bhꞌodi ibhinom io zodi. ¹²Keḍio kōoy kōoy olo abhinom odi, pobo odi ạnogho mịikpo motẹn ạnwuny tẸnaan, nꞌobo bho imōruōm bọ ḍien odi obho. ¹³Eedi iru ḍio mạnwuny tẸnaan mi tẹmara, tebum ạburude eedi bolobolo tebum ịto ọony ōoy. Ẹnaan nịvo nịvo pọkar Ọde eedi.

¹⁴Keḍio odi Ekpo-ọnuekpete bho atẹn mōoy arughan ezōor. Ezōor ọmiin meghuan obhꞌodi, eghuan ilo idi kibhꞌOgini Ọony Ọde bho, ilo ọsu ạghusan aḍien nꞌagey obho igbẹbh ni ịman.

¹⁵ẠJon ạgba zodi amutiom, namulughu, “Oobho odi obo bho ạami ụḍeghe ghạ ughōl, ‘Odi natu tạman ạmi keḍio odi apu ạami, tebum obho odi odi keḍio ugbi mọmar ạami obho.’ ”

¹⁶Tegbẹbhom obho odi agbẹbh ni ạman obho, odi nạaḅaraghi mạlisebh, ạseghe monyiin apumom monyiin ạnogho zezira. ¹⁷Ẹnaan ạnogho maMozis maraalōgh obho, keḍio ọsu ạghusan aḍien nꞌagey obho ịḍua tạJizos Kraist eru. ¹⁸Bọbon ōoy olo nạamiin ghạ mẸnaan olo. Onyiin odi be, obho aru bọ mẸnaan obho, obho odi tọtu Ọde bho, odi naaḍighi olōghōm zodi.

Ịigbaay adōm tạJon ozuughiom rụmuum obho

¹⁹Tamen olo ạruula arōoy aJu obhꞌaJerusạlẹm irōm marōoy iḅo miiḅua nꞌibhꞌaLivai obho iru tạJon mopuruan odi kua, “Ạna kokōr ōoy?”, iibha ịigbaay tạJon. ²⁰Odi ọbharanaan io. Ạgba ni magey obho aghōl kua, “Ạami aKraist bho ḍio.” ²¹Keḍio eedi ịmaar ipuruan zodi, “Kạna kokōr ōoy? Ạna Ilaija bẹle?” Keḍio odi ạbhagharana kua, “Eenyi, ạami odi ḍio.” Eedi imina ipuruan, “Kạna ozil obho bẹle?” Podi ạbhagharana mu, “Eenyi.” ²²Keḍio eedi imina ipuruan kua, “Ạna kokōr ōoy? Gbạ mạnogho ezōor milo ezōor ọteeny mạar olo ọgba ọnogho obo bho irōm ezōor obho. Ạna kạkar okōr ōoy?” ²³Keḍio odi ạbhagharana kua,

“Ạami odi oghōrōkō bho naleghe amulughu mi tobꞌeekpu eḍum obho,

‘Iselemi mebōom obho tObạmọogh obho,’ ”

(kẹzo bho Ạizaya ozil obho ạkpete bho.)

²⁴Arōoy aFarisi obho pobo bho irōm bọ obho. ²⁵Keḍio eedi ipuruan kua, “Eru kạar olo ạna otu ḍio maKraist obho, bolobolo Ilaija, bolobolo ozil obho, ebum eeghe kạna nazuughiom rōoy mụum?” ²⁶PạJon ạbhagharana kua, “Ạami ụseghe mụum ku nazuughiom zenyina. Teesoḍia enyina kir onyiin olo enyina ilōghōm io. ²⁷Odi natu tạman ạmi, keḍio ạami ugbẹbh io nạ mọkporion arakōrō odi.”

²⁸Oomo abaabha bho imute mi tạBetani, tẹḅeenyom ọbhiiny obhꞌạJodan, tesi obho ạJon nazuoghom rōoy rụmuum obho.

Ọony ẹena bho tẸnaan

²⁹Aḍio ạḅaal, ạJon nạamiin mạJizos natu todi, keḍio odi ạkpete kua, “Oobho Ọony Ẹena bho tẸnaan, obho tạseghe atughuneen mịkarabh ẹmar-arōoy obho. ³⁰Odi pobo bho ạami ụrol ụgba bọ ughōl, ‘Kir ōoy olo natu tạman ạmi olo apu ạami, tẹzo bho keḍio tọotua mọmar ạmi odi odi nạ.’ ³¹Ạami ulōghōm io zodi, keḍio ạami uru nazuoghom rōoy rụmuum moḍighi olo arōoy Izirẹl kelōghōm zodi.”

³²Iibha pịigbaay olo ạJon ạgba, “Ạami ụmiin mẸmugh Iigbia bho mobho ạḍua tạnyu obho nasōor keekumude aru ạrolan nꞌodi. ³³Ẹkona ạami ulōghōm io zodi, keḍio Ẹnaan obho arōm ạami moru ozuughiom ạrumuum obho ạkpete kua ạnogho ạami, ‘Ạna tạmiin ni mibha Ẹmugh obho tasōor atu ạtolom mōoy. Odi pōoy obho tạseghe mẸmugh Iigbia bho azuughiom rōoy obho.’ ³⁴Ạami nạamiin kạami nạgba ạnogho enyina nakōl odi Ọony tẸnaan.”

Ịḅel iteledōm obho tạJizos

³⁵Amina ạḅaal, pạJon nꞌịzal iteledōm odi idi tonyiin esi obho ³⁶nẹmiin mobho ạJizos arele natẹn obho, keḍio odi ạkpete kua, “Oobho odi Ọony Ẹena bho tẸnaan.” ³⁷Ịzal iteledōm obho ịmoghon miibha bho, piḅetunu ịtuonuman mạJizos. ³⁸Keḍio ạJizos aghiraan, pạmiin mibha eedi nẹtuonom zodi, keḍio apuruan kua zeedi, “Enyina nẹva meeghe?” Keḍio eedi ịbhagharana kua, “Rạbay, (obho amōrō kua ‘Ọtughumiom ịtughumiom,’) ạna natugh teḍighen?” ³⁹Keḍio ạJizos ạbhagharana zeedi aghōl kua, “Itu mẹmiin.” Peedi ịtuonuman zodi ịghi ịmiin mesi obho odi natugh obho, keḍio ịrolan odi moomo aḍuma bho. (Nạkian inya asuo zodi aḍuma bho.)

⁴⁰Onyiin obo bho ạmoghon ạni mạJon kạghi ạtuonom mạJizos obho, pẠndru umōr tạSaimon Pita. ⁴¹Ạndru ạmiin mumōr odi ạSaimon be pạgba aghōl maa, “Ezōor nọomiin mạMesaya bho.” (Obho amōrō kua “AKraist”.) ⁴²Keḍio odi abhin mạSaimon ạghi tạJizos. ẠJizos aanon odi ạsiine asōorẹ, paghōl maa, “Ạna ạSaimon ọony tạJon. Aḍien onuma tokōl maKifas.” (Aḍien opopo pughōl aPita, azin obho pọbharakpar.)

ẠJizos abheleghi maPita nꞌạNataniel

⁴³Aḍio ạḅaal, pạJizos natu mọghi taGalili. Podi ạmiin maFilip, ạkpete kua ạnogho zodi, “Tụonom ạami!” ⁴⁴(AFilip olꞌaBetsaida, ẹma tẠndru nꞌaPita.) ⁴⁵AFilip ạmiin mạNataniel pạgba ạnogho zodi, “Ezōor nọomiin mōoy obho aMozis ạge ạgba mi taraalōgh obho, nꞌobho arizil obho ẹkona ịge ịgba nạ bho, ạJizos ọony taJosef obhꞌạNazaret.” ⁴⁶ẠNataniel apuruan kua, “Nọomiin ghạ mooḅi ạar mi tạNazaret?” Keḍio aFilip ạbhagharana kua, “Tue ọghi mạmiin.”

⁴⁷Amen ạJizos ạmiin ạNataniel natu todi, podi aghōl maa, “Oobho agey ōoy olo Izirẹl. Bọbon iben ilo tọnu odi.” ⁴⁸Keḍio ạNataniel apuruan zodi, “Ạna uḍighi ẹko kalōghōm ạami?” Keḍio ạJizos ạbhagharana kua, “Keḍio aFilip tapeleghi ạna, men obho ạna ụrol tẹeḍian oorẹeny ạfig obho, ạami ạmiin ạna.” ⁴⁹PạNataniel ạbhagharana kua, “Obo ịtughumiom, ạna Ọony obho tẸnaan! Ạna Ọolema bhꞌIzirẹl!” ⁵⁰Keḍio ạJizos ạkpete kua ạnogho zodi, “Ạna naamōruōm nạ ni siibha be mebum obho ạami ughōl mạami ạmiin ạna mi tẹeḍian oorẹeny ạfig obho? Ạna tạmiin ni mịnon ọkpo ilo ipu miibha.” ⁵¹Keḍio odi ạkpete kua ạnogho zeedi, “Ạami nạgba magey obho ạnogho zenyina: enyina tẹmiin ni mạnyu obho naaghuurunu nꞌobho itelema tẸnaan netele mi tỌony Oōy obho nẹsiin esōor.”

Ipina mi tạKena

¹Ịzal aḍuma iru itẹn pu nopin ipina mi tẹma ạKena mi tebhugh obhꞌaGalili. Oniin tạJizos odi ạni tipina bho. ²Odi ạJizos nꞌobo bho nẹtuonom zodi obho obheleghi nạ mọghi tipina bho. ³Amen ụbhoghol mamiim obho ụman, poniin tạJizos ạkpete kua ạnogho zodi, “Amiim obho teedi neemuneen.” ⁴ẠJizos ạbhagharana kua, “Ạni obho, ịgbaan eeghe zezira mipa bho? Amen ạami dọteeny io.” ⁵Keḍio oniin tạJizos aghiraan ạkpete kua ạnogho mạnwuny-otu obho, “Kạar kạar olo odi ạkpete ạnogho enyina moḍighi, piḍighi.”

⁶Tebum eḍighiom ạar ootōla ạravo arōoy aJu obho, kir odiin ịinu ạmuum mi tesi obho, ilo onyiin taḍigh ni mōogh ạtini ạmuum. ⁷Keḍio ạJizos ạkpete kua ạnogho mạnwuny-otu obho, “Ịloki rụmuum mebhule mịinu obho,” peedi iru ịloki ịmaar ibhule. ⁸Keḍio odi ạkpete ạnogho zeedi, “Gụa, ikōr mẹghiom ọola ẹzaal obho.” Keḍio eedi ikōr ibhin ịghiom. ⁹Amen odi aru ạnam mụum obho neetẹn miim obho, odi olōghōm io mesi amiim obho ịḍua iru, tughuneen mạnwuny-otu obho ḍio. Podi abheleghi mopina bho, ¹⁰ạkpete kua ạnogho zodi, “Ịnon arōoy nepira ghạ ẹkiom mamiim obho ịneghe bho. Amen amiim obho nẹebher ịneghiom, keḍio eedi tegbi momutiom ibhꞌeesoḍia bho. Ibhꞌonuma akẹrẹ, ạna useeri miiḅi obho ninii ẹteeny siibha keḍio ạna ubhin natu!”

¹¹TạKena obhꞌaGalili pesi obho ạJizos abhira aḍighi moḍighi ibꞌaruugu obho todi; pesi odi amutiom eghuan todi, molo obo bho nẹtuonuman zodi obho imōruōm zodi.

¹²Iibha iru itẹn, pạJizos nꞌoniin odi nꞌaburumōr odi nꞌobo bho nẹtuonuman zodi obho ịghi tạKapaniom, ịrol epa mịbam aruḍuma.

ẠJizos ạghi totu iikpulughu obho

¹³Tamen olo naatuan mẹzaal Opẹl-Otẹn obhꞌaJu obho, pạJizos ạghi taJerusạlẹm. ¹⁴Totu iikpulughu obho pạJizos ạmiin miḅo maḅo neḅoḍi rạnam nꞌạraana nꞌịnun ạbadi, nꞌobo bho nenweeghi ghạ mikpoki nẹerologhu mi taruzebele eedi. ¹⁵Keḍio odi aru ạseghe miiḍigh aḍighi mạsunu abhirighanom ịnam obho mi totu iikpulughu obho, ạraana bho nꞌạranam obho, akpululeni maruzebele obo bho nenweeghi ghạ mikpoki obho, ạazarami mikpoki obhꞌeedi. ¹⁶Keḍio odi ạbhooruom mobo bho neḅoḍi mịnun ạbadi obho aghōl kua, “Ịḅirogh memutiom tesuo! Íḍighi ghạ motu tỌde ạmi metẹnẹ mesi aḅo.” ¹⁷Keḍio obo bho nẹtuonuman zodi obho ịitua mibha ụkpete tẹegia bho, “Ẹzo bho otu obho tonuma aḍigh tologhi ạmi obho naamōr tạmi kạnyan.”

¹⁸Keḍio ạruula arōoy aJu obho iru mopuruan odi mạar, “Okōr oḍigh elẹgh mobho ạna taḍighi aḍeeriom ezōor molo ezōor olōghōm okōl ạna ạteeny mịnyaam obhirighan eedi mẹzo bho?” ¹⁹Keḍio ạJizos ạbhagharana kua, “Ịikpo motu obhobho tẸnaan, ịraar aḍuma neetẹn, pạami omina oḅōgh ọmarami.” ²⁰Peedi ipuruan kua zodi, “Ạna taḅōgh motu obhobho mịraar aḍuma, meru kạar olo ụukpo, motu iikpulughu obho ubhin erubal nꞌodiin ạsia uḅōgh obho!”

²¹Otu iikpulughu obho odi nakōl obho palōor obho todi. ²²Molo tamen obho odi aḅetunu tọbho bho, pobo bho ịtuonuman ghạ zodi obho ịitua ilōghōm mibha odi aghōl miibha, keḍio eedi imōruōm ẹegia bho nꞌibha ạJizos ạgba bho.

ẠJizos alōghōm miloghi arōoy

²³Suo odi odi taJerusạlẹm mi tẹzaal Opẹl-Otẹn obho, ọlogh arōoy imōruōm odi mamen eedi ịmiin moḍighi nꞌọkpo ibꞌaruugu obho odi aḍighi obho. ²⁴Odi ạJizos nịvo nịvo oḍuom io zeedi mologhi, tẹzo bho odi naalōghōm magey miloghi arōoy. ²⁵Bọbon ōoy olo amina ghạ ạgba ạnogho zodi miloghi arōoy olo. Odi naalōghōm kạar kạar ilo idi mi tiloghi eedi.

ẠJizos nꞌaNikodimos

¹Tamen opopo, kir onyiin ōoy olꞌaFarisi obho olo ughōl aNikodimos, onyiin ọola arōoy aJu obho. ²Odi ōoy obhobho aru muḍugul mi tạJizos keḍio ạkpete kua ạnogho zodi, “Obo ịtughumiom, ezōor noolōghōm mibha ạna uru mōoy ịtughumiom olo ạḍua tẸnaan karu. Oōy olo arue ghạ aḍighi mọkpo ibꞌaruugu bhibha tonuma olo, tughuneen molo Ẹnaan odi nꞌodi ḍio.” ³PạJizos ạbhagharana kua, “Ạami nạgba magey obho ạnogho ạna. Bọbon ōoy olo tatue ạmiin mAde-Ọolema tẸnaan olo tughuneen molo noomina ụmar odi ḍio.” ⁴Odi aNikodimos apuruan kua, “Toḍighi ẹko komina ọmaar okenya ōoy olo odi kạmi. Odi sorue mu aḍigh mogbẹbhiōm ịzal amen mi tọobhe oniin odi molo komina kọmar odi!” ⁵ẠJizos amulumian kua zodi, “Agey nạ ni, mibha ạami nạgba ạnogho ạna bho, bọbon ōoy olo tatue aḍigh tAde-Ọolema tẸnaan olo, tughuneen molo nọomaram zodi mụum nꞌẸmugh Iigbia bho ḍio. ⁶Ibha ụmaram bọ miikpōogh obho ilꞌiikpōogh obho. Ibha ạruumugh obho, ilꞌạruumugh obho. ⁷Uumōogh ghạ mebum obho ạami ụkpete ụnogho ạna ughōl, ‘Digha tomina ni ọmar enyina bho.’ ⁸Ọpibha bho nạpibh ghạ ạki tesi olo ologhi odi aḍigh aḍigh; ạna nạmoghon ẹzo bho nạpibh obho, keḍio ạna olōghōm io mesi ạbhibh natu nꞌesi nạki. Pẹzo idi nạ mi tōoy olo Ẹmugh obho ạmar.” ⁹ANikodimos apuruan kua zodi, “Iibha bho ku temute ẹko?” ¹⁰Keḍio ạJizos ạbhagharana kua, “Pạna ạkar obꞌōoy ịtughumiom olꞌIzirẹl olo olōghōm io miibha bho? ¹¹Agey nạ ni, ạami nạgba ạnogho ạna: Ezōor nọḍeghe ghạ mibha ezōor ulōghōm obho, nọgba mibha ezōor ụmiin obho, keḍio bọbon ōoy olꞌenyina olo namōrō momōruōm adōm ezōor olo. ¹²Enyina imōruōm io zạmi mamen ạami ụgba mọkpo ẹmar-arōoy obho ụnogho enyina, tọteko oḍighi kenyina emōruōm ạami mamen ạami tạgba mọkpo tẸnaan ạnogho enyina? ¹³Keḍio bọbon ōoy olo nạaghi ghạ tẸnaan olo, tughuneen mỌony Oōy obho ạḍua tẸnaan karu obho ḍio.”

¹⁴Ẹzo bho aMozis aabhaghami ạḅam tạnyu ạlugua mooḍigh obho ụlemom bọ rukurōgh obho mi tobꞌeekpu eḍum obho, pẹzo tọseghe nạ mỌony Oōy obho ọḅam tạnyu, ¹⁵molo kōoy kōoy olo amōruōm zodi tạteeny ni maghuḍum obho ikunughi olo bho. ¹⁶Ẹnaan atulan ni mẹmar-arōoy obho apu molo odi ạnogho mogini Ọony odi molo kōoy kōoy olo amōruōm odi ọpo mu, keḍio tạteeny maghuḍum olo kamen kamen. ¹⁷Ẹnaan orōm io mỌony obhꞌodi aru tẹmar-arōoy obho mọru ịiruan obhumeni ẹmar-arōoy obho, odi aru mọbhel.

¹⁸Ụru mụ mịiruan obhumeni kōoy kōoy olo amōruōm mỌony obho; obo bho omōruōm io obho, ịiruan apum ibhꞌodi noolegheri osōbh, tebum obho odi omōruōm io mogini Ọony tẸnaan obho. ¹⁹Iibha ẹmu ịiruan obho: tibha ẹḅaal obho naaru tẹmar-arōoy obho, keḍio arōoy obho itulan mọkinim obho ipu mẹḅaal obho. Ạar obho aḍighi obho keeghe? Eḍighiom ạar eedi ịkarabh. ²⁰Kōoy kōoy olo naḍighi mịkarabh ọkpo nạlogh ḍien mẹḅaal obho, molo oru ḍio tẹḅaal obho tebum obho odi ọva ḍio mịkarabh eḍighiom ạar odi kemute tẹḅaal obho. ²¹Keḍio kōoy kōoy olo naḍighi mibha ịneghe bho, odi odi tẹḅaal obho, molo ẹḅaal obho tẹgba eḍeeriom mobho eḍighiom ạar odi iru mibha odi nakiilaan mẸnaan.

ẠJizos nꞌạJon

²²Ipa iru itẹn, pạJizos nꞌobo bho nẹtuonom odi obho ịghi tebhugh obhꞌaJudia. Odi ạrol ịbam amen tepa, azuughiom rōoy mụum. ²³ẠJon ẹkona ạrol azuughiom rōoy rụmuum mi tẠinon, esi olo ogbeenyan io mạSalim, tebum obho ịkanya ạmuum idi tepa bho. Arōoy iru ghạ todi, keḍio odi azuughiom ghạ nạ zeedi rụmuum. ²⁴(Amen opopo dọloghom io mạJon mikoli obho.)

²⁵Ẹtede iteledōm tạJon nꞌonyiin ōoy aJu ịrol ịghanan mi tọpaḍi eḍighiom ạar eedi obho igboloman nꞌọḅaaleni alōor. ²⁶Keḍio eedi ịghi tạJon ịgba ịnogho zodi, “Obo ịtughumiom, ạna nạatua ni mōoy obho ạrol bọ nꞌạna tẹḅeenyom ọbhiiny obhꞌạJodan, obho ạna ụgba ghạ bọ bho? Nonon, odi nazuughiom rōoy rụmuum siibha bho, molo kōoy kōoy nạki todi!” ²⁷Keḍio ạJon ạbhagharana kua, “Bọbon ōoy olo tạteeny mạar olo Ẹnaan ọnogho ḍio zodi olo. ²⁸Enyina nịvo nịvo ịmoghon ạni men obho ạami ughōl, ‘Ạami aKraist obho ḍio, urōm ạami motẹnōm odi taghisigh.’ ²⁹Kạni kạni olꞌolom obho; ọbulol olom obho ạmara tọtu nạmoghon ghạ, keḍio ologhi odi tạḅaal ni mamen odi tạmoghon moghōrōkō olom obho. Pẹzo ọḅaal ologhi ạmi naagbẹbh nạ asi. ³⁰Ịimogho odi tẹbugh ni, ibhꞌạmi esōor.”

Odi obo bho ạḍua tẸnaan aru obho

³¹Odi obo bho ạḍua tạnyu obho aru obho apu kōoy kōoy; odi obho ạḍua tade bho karu obho olꞌade bho, keḍio tạgbaay mọkpo ade bho. Odi obho ạḍua tẸnaan aru obho apu kōoy kōoy. ³²Odi ạgba mibha odi nạamiin ạmoghon obho, keḍio ōoy olo napinom oghōrōkō odi olo. ³³Kōoy kōoy olo abhinom oghōrōkō odi nạgba aḍeeriom mibha Ẹnaan aru magey. ³⁴Odi obho Ẹnaan arōm obho tạgba moghōrōkō tẸnaan, tebum obho Ẹnaan ạnogho zodi mẸmugh Iigbia bho moḍighi omuzeni taghuḍum odi. ³⁵Ọde bho atulan magey mỌony obho, keḍio ạlogh tạvo odi moomo ẹmorokpo bho. ³⁶Kōoy kōoy olo amōruōm mỌony obho nạateeny maghuḍum olo kamen kamen; kōoy kōoy olo okiilaan io mỌony obho ọteeny io maghuḍum, keḍio ọkarabh ologhi tẸnaan tạtolan zodi moomo amen.

ẠJizos nꞌạni obhꞌaSameria

¹Arōoy aFarisi obho ịmoghon mạJizos nạanyaghagh mọlogh arōoy nazuoghom rụmuum zeedi molo odi nạateeny miteledōm napu mạJon. ²(Ạkar ạJizos nịvo nịvo ozuom io mōoy mụum; iteledōm odi be izuoghom.) ³Amen ạJizos ạmoghon mibha arōoy nẹḍeghe obho podi ạḅele maJudia amula ạghi taGalili. ⁴Odi nạki, podi ạḅol tebōom obho ạḅol atẹn taSameria bho.

⁵Keḍio odi aru asi tonyiin ẹma aSameria olo ughōl Saikar, olo ogbeenyan io made bho ạJekob ạnogho maJosef ọony odi obho. ⁶Aghuḍia bho tạJekob odi epa, molo suo nẹebher mạJizos merele bho, pạghi ạrol delede mi tọtu aghuḍia bho. Aḍio nạaḍi ịzal abin men opopo.

⁷Keḍio onyiin ạni olꞌaSameria aru mokōr ạmuum, keḍio ạJizos ạkpete kua ạnogho zodi, “Ạni obho, nọgho ạami mụum ạami ụpoghol.” ⁸(Iteledōm obhꞌodi nẹeghi tẹma bho moghō eḍian.) ⁹Ạni obhꞌaSameria ạbhagharana zodi kua, “Ạna olꞌaJu, ạami olꞌaSameria — ibhꞌeeghe kạna nagbẹel ạami mụum?” (Arōoy aJu obho ịteeny io mạar oḍighiom marōoy aSameria bho.) ¹⁰PạJizos ạbhagharana zodi kua, “Ughōl ạna naalōghōm mẹnogho bho tẸnaan, nꞌobo bho nagbẹel ạna mụum ọbhoghol obho bọ, pạna kugbẹel zodi mọnogho onuma mạmuum aghuḍum.” ¹¹Pạni obho ạkpete kua, “Obo apu ạami, ạna ạgbugba olo, keḍio aghuḍia obho ẹkona akuḍum magey. Ạna tạteeny teḍighen mạmuum aghuḍum obho? ¹²ẠJekob ogbōgh ọde ezōor ạnogho zezōor maghuḍia bhobho. Odi nꞌạnwuny odi nꞌịnam odi ịbhoghol tesuo. Ạna upu mạJekob gạ?” ¹³PạJizos aghōl kua, “Kōoy kōoy olo ạbhoghol mụum ibhibha, ạmuum digha tẹtal ni zodi. ¹⁴Kōoy kōoy olo ạbhoghol mụum obho ạami tạnogho bho, ạmuum ịral mu zodi. Ạmuum obho ạami tạnogho bho tẹtol todi kozi ọbhiiny olo tạnogho zodi mạmuum aghuḍum, molo tạnogho zodi moḍum aghuḍum olo kamen kamen.” ¹⁵Ạni obho agbẹel, “Obo apu ạami, nọgho ạni ạami mạmuum ibhibha, molo ạmuum ịtal mu zạmi, ạami ẹkona utu mu suo mokōr ạmuum.” ¹⁶Keḍio ạJizos ạkpete kua ạnogho zodi, “Kịa mabheleghi molom onuma maru.” ¹⁷Odi ạbhagharana kua, “Ạami olom olo.” ẠJizos aghōl maa, “Agey mẹzo bho ạna ughōl bọ mạna olom olo bho. ¹⁸Oōgh arōoy mobho ạna nạaḅal, keḍio obho nꞌạna netughan siibha bho olom onuma ḍio. Ạna nạakar ạgba magey obho.” ¹⁹Pạni obho ạbhagharana kua, “Hụu! Ạna ozil tẸnaan. ²⁰Ạburude ạmi ibhꞌaSameria iikpulughu mẸnaan tesuo obꞌeegum obho, keḍio enyina arōoy aJu obho ighōl maJerusạlẹm pesi obho ezira kuukpulughu ghạ mẸnaan.” ²¹ẠJizos ạkpete kua ạnogho zodi, “Nonon ni, ạni obho, amen natu mobho arōoy iikpulughu mu mỌde bho mi tobꞌeegum obhobho bolobolo taJerusạlẹm. ²²Enyina arōoy aSameria ịkar io elōghōm zodi obo bho enyina neekpulughu obho; ezōor aJu obho noolōghōm zodi obo bho ezōor nookpulughu obho. Ịbhelegha bho ịḍua tarōoy aJu obho keru. ²³Amen natu, esiibha podi amen obho, obho ạkar obo iikpulughu obho teekpulughu mỌde bho mi tạruumugh nꞌagey obho. Iibha pobo iikpulughu obho Ọde bho nạva molo keekpulughu zodi obho. ²⁴Ẹnaan Ẹmugh. Obo bho neekpulughu zodi obho teekpulughu nạ zodi mi tạruumugh nꞌagey obho.”

²⁵Keḍio ạni obho ạkpete kua ạnogho zodi, “Ạami naalōghōm mobho aKraist obho tatu ni. Amen odi naaru, odi tạgba ni kạar kạar ạnogho ezōor.” ²⁶ẠJizos ạbhagharana kua, “Ạami podi, ạami obo bho nạḍeghe nꞌạna bho.”

²⁷Tamen opopo, piteledōm obho tạJizos iru isi, keḍio neemōogh magey mọmiin odi nꞌạni aSameria nẹḍeghe rạḍeghe, molo bọbon onyiin eedi olo apuruan zodi ạni obho aghōl, “Ạna naḍighi mẹkaraan suo?” bolobolo apuruan zodi, “Ibhꞌeeghe kạna nꞌodi nẹḍeghe rạḍeghe?” olo.

²⁸Ạni obho nạaḅele mọonu ạmuum obho todi amula tẹma bho, ạkpete kua ạnogho marōoy obho tepa, ²⁹“Itu mẹmiin mōoy olo nạgba kạar kạar olo ạami naaḍighi. Odi aKraist obho ḍio gạ?” ³⁰Peedi ịḅele mẹma bho ịghi mọmiin ạJizos.

³¹Tamen opopo, piteledōm obho neesen ghạ mạJizos, “Obo ịtughumiom, oobho ạar ole!” ³²Podi ạbhagharana kua, “Ạami ụteeny meḍian olo ole enyina ilōghōm io bọbon ạar.” ³³Keḍio iteledōm obho onyiin napuruan monyiin, “Oōy naaru ạnogho zodi meḍian gạ?” ³⁴PạJizos ạkpete kua ạnogho zeedi, “Eḍian ạmi poḍighi ibhꞌologhi obo bho arōm ạami obho, nꞌoḍighi ọman oḍighi obho odi ạnogho ạami moḍighi obho.

³⁵“Enyina ẹteeny mọnuekpete bhobho, ‘Inya ụvanyu isughō miiḅua.’ Ạami nạgba kua ạnogho zenyina: ịmaar eenon mi tariḍighi obho. Ariḍian obho nẹeghuaay ẹneghe moḅuuy! ³⁶Obo bho naḅu moḍighi obho nọkpe zodi, keḍio naakōbhōghi mariḍian ilo ịteeny aghuḍum olo ikunughi olo, molo obo bho aḅẹbh obho nꞌobo bho aḅu obho tẹḅaal ni mologhi eeleeny. ³⁷Agey mọnuekpete bhobho, ‘Onyiin obo oḅẹbh, ọnon obo oḅu.’ ³⁸Ạami naarōm zenyina moḅu iiḅua mi toḍighi olo enyina iḍighi ḍio. Ịnon arōoy iḅẹbh keḍio enyina neliom epinom ạsuo mi toḍighi obhꞌeedi.”

³⁹Ọlogh arōoy aSameria mi tẹma bho imōruōm mạJizos, tebum ibha ạni obho ạgba aghōl maa, “Odi ạgba ạnogho ạami kạar kạar olo ạami naaḍighi.” ⁴⁰Molo amen arōoy aSameria bho iru piisen odi mọrolan eedi; keḍio ạJizos ạrolan eedi mịzal aḍuma.

⁴¹Tebum ịigbaay odi, pọlogh arōoy imina imōruōm, ⁴²ịkpete kua ịnogho mạni obho, “Ezōor noomōruōm siibha bho, tebum ibha ạna ụgba bho be ḍio, ezōor nịvo nịvo nọomoghon ạni tọnu odi, keḍio ezōor noolōghōm mibha odi ạkar aru mỌpela ẹmar-arōoy obho.”

ẠJizos aakō mọony ogbōgh ōoy ạgomet

⁴³ẠJizos ạrolan eedi ịzal aḍuma itẹn podi ạghi taGalili, ⁴⁴tebum obho ạJizos nịvo nịvo nạakpete kua, “Ozil tẸnaan eghuan olo mi tẹma odi.” ⁴⁵Amen odi ạghi asi taGalili, arōoy ibhin ni zodi magey. Eedi nẹeghi ạni mi taJerusạlẹm mole ẹzaal Opẹl-Otẹn obho ẹmiin nạ moomo ọkpo bho odi aḍighi mi tẹzaal obho.

⁴⁶Suo keḍio ạJizos amula ạghi tạKena obhꞌaGalili, esi obho odi aḍighi mụum atẹnẹ miim obho. Tesuo kir onyiin ogbōgh ōoy ạgomet olo ọony odi alōor ọneghe ḍio mi tạKapaniom. ⁴⁷Amen odi ạmoghon mạJizos nạaḍua taJudia atu taGalili, podi ạghi todi ạkpete ạnogho zodi moru ookō ọony odi obho natu mọbho bho. ⁴⁸Keḍio ạJizos ạkpete kua ạnogho zodi, “Bọbon onyiin enyina olo tamōruōm tughuneen olo odi ạmiin melẹgh olo.” ⁴⁹Pōoy obho ạbhagharana kua, “Obo apu ạami, tue, sesen ni, kọony ạmi agbi mọbho.” ⁵⁰PạJizos ạkpete kua ạnogho zodi, “Kịa ọony onuma taḍum ni.” Podi ōoy obho amōruōm oghōrōkō tạJizos ạghi. ⁵¹Odi natẹn nakẹel, itelema odi nebhir zodi mọgba ekua, “Ọony onuma naaḍum!” ⁵²Keḍio odi apuruan mamen obho ọony todi aḍum obho, keḍio eedi ịbhagharana kua, “Aḅetunu mọsilaan eḍienaan mi tonyiin asuo.” ⁵³Pọde bho aru ạatua alōghōm mobho amen opopo aru mamen obho ạJizos ạkpete ạnogho zodi aghōl maa, “Ọony onuma taḍum ni” obho. Podi nꞌotu odi imōruōm.

⁵⁴Oobho pogbẹbhiōm ịzal oḍighi ibꞌaruugu obho ạJizos aḍighi suo odi ạḍua taJudia aru taGalili obho.

ẠJizos aakō mōoy teegho

¹Iibha iru itẹn, pạteeny monyiin ẹzaal arōoy aJu obho, pạJizos ạghi taJerusạlẹm. ²TaJerusạlẹm, mi tọnu-otu obho ughōl bọ “Ọnu-otu ạraana” bho, kir eghō olo ạteeny ōogh ariisi obhooghia, olo tọnu-ẹma aHibru pughōl Bẹtzata. ³Ọlogh arōoy ilo asilōor ịneghe ḍio nẹmaghanan ghạ teedi ariisi obhooghia bho — arōoy ikpom ariḍien, nꞌạsukugha, nꞌobo asilōor obho meemughughu kua be. [Eedi neḅōrō molo ạmuum obho keezighinian, ⁴tẹzo bho otelema tObạmọogh obho nasōor ghạ moomo amen azighe mạmuum obho. Ọḅel ōoy obho tapira ạpel asōor teghō bho mamen olo noozighe mụum obho, podi oḍum mi toḍigh ẹzegh obho odi nạnwe bho.] ⁵Tesi obhobho, ōoy olo nạnwe, nạarol aḍisibh ḍiōbh nꞌạbhenya ạsia mi tẹzegh obhꞌodi odi. ⁶ẠJizos ạmiin odi nạamaghanan, keḍio odi naalōghōm mobho odi ōoy obho nạarol tẹzegh mọnu ạsia olo ịteeny mẹzo bho, podi apuruan kua zodi, “Ạna nạva moḍum gạ?” ⁷Odi ōoy obho ạbhagharana kua, “Obo apu ạmi, ạami ụteeny io mōoy mi tesuo mọbham ạmi otuḅeen mi teghō bho mamen uzighe mụum obho. Kamen ạami tạkogha mosōor, ọnon ōoy nạakem apel asōor.” ⁸Keḍio ạJizos ạkpete kua ạnogho zodi, “Ḅetunu makpōr ọtagara onuma marele.” ⁹Tonyiin odi amen obho, pōoy obho aḍum. Odi akpōr mọtagara odi arele.

Iibha bho imute mi taḍuma obhooghia bho, ¹⁰pạruula arōoy aJu obho ịkpete ịnogho mōoy obho uukō bọ bho ighōl kua, “Aadon aḍuma obhooghia ạna naasōor olōgh morōol ọtagara.” ¹¹Podi ạbhagharana kua, “Obo bho aakō zạmi obho ạkpete kua ạnogho zạmi, ‘Kpōr mọtagara onuma marele.’ ” ¹²Keḍio eedi ipuruan kua zodi, “Okōr ōoy mobho ạkpete ạnogho zịna mokpōr ọtagara onuma orele bho?” ¹³Odi obo bho uukō bho olōghōm io mobo aakō zodi; tẹzo bho ọlogh arōoy idi todi esi obho, ạJizos ẹkona nạaḍua.

¹⁴Ịbam amen itẹn, pạJizos ạmiin odi mi totu iikpulughu obho, keḍio ạkpete kua, “Nonon, siibha bho nookō zịna. Ḍụa tịkarabh onuma molo ịnon ibꞌịkarabh ẹzegh imina ẹteeny ạna.” ¹⁵Keḍio odi ōoy obho tạḍua ạki ạgba ạnogho mạruula aJu obho mạJizos aakō zodi. ¹⁶Tebum ipa bẹleni, peedi ịke mọva ạraakpe mạJizos, tibha odi aakō mōoy mi taḍuma obhooghia bho.

¹⁷Keḍio ạJizos ạbhagharana kua zeedi, “Ọde ạmi naḍighi ghạ moḍighi moomo amen. Ạami ẹkona taḍighi nạ ni.” ¹⁸Tọnuekpete bhobho paḍighi molo ạruula aJu obho ilegheri ịitua magey moghigh odi. Odi opẹl io molōgh aḍuma obhooghia bho be, keḍio odi aghōl mẸnaan Ọde odi, tiibha bho odi naaḍighi molo Ẹnaan nꞌodi neeleeny.

Ịnyaam tỌony obho

¹⁹Keḍio ạJizos ạbhagharana zeedi, “Ạami nạgba magey obho nạnogho zenyina: Ọony obho ọkar io aḍighi mọkpo ilꞌodi. Ibha odi ạmiin bho Ọde bhꞌodi naḍighi obho be pibha odi naḍighi. Ibha Ọde bho naḍighi obho pibha Ọony obho naḍighi nạ. ²⁰Ọde bho atulan mỌony obho, molo naḍeeriom zodi kạar kạar olo odi nịvo nịvo naḍighi. Odi taḍeeriom nạ ni zodi mọkpo ilo ipu suo moḍighi, molo enyina keemōogh. ²¹Tẹzo bho Ọde bho naḅẹriōn miḍim nạnogho ghuḍum obho, onyiin ẹzo bho nạ pibha Ọony obho tạnogho ghuḍum mobo bho iḍigh tologhi odi obho. ²²Ọde bho ẹkona ọru ḍio mịiruan ạnogho mōoy. Oomo ịnyaam ịiruan obho, odi nạaseghe ạnogho mỌony obho, ²³molo kōoy kōoy aabhughumi mỌony obho, kẹzo bho eedi iibhughumi mỌde bho. Kōoy kōoy olo oobhughumi ḍio mỌony obho, oobhughumi nạ ḍio mỌde bho arōm zodi obho.

²⁴“Agey nạ ni bho ạami nạgba ạnogho zenyina: kōoy kōoy olo ạmoghon ọnuekpete ạmi, kamōruōm zodi obo bho arōm ạami obho, nạateeny maghuḍum olo tẹtol kamen kamen. Ụru mu mịiruan ọnogho zodi, keḍio odi naapẹl mọbho aḍigh taghuḍum. ²⁵Ạami nạgba magey obho ạnogho zenyina: amen natu — esiibha podi amen obho — mobho obo bho nẹebho bho tẹmoghon ni moghōrōkō Ọony obho tẸnaan, molo eedi obo bho ịmoghon obho tẹteeny ni ghuḍum. ²⁶Ẹzo bho aghuḍum obho iru milꞌỌde bho, pẹzo odi naaḍighi nạ maghuḍum obho iru milꞌỌony obho. ²⁷Odi nạanogho mỌony obho mịnyaam olo ọru ịiruan obho, tebum obho odi aru mỌony Oōy obho. ²⁸Iímōogh ghạ mi tabaabha bho: amen natu molo oomo obo bho nẹebho bọ idi taruugu obho tẹmoghon ni moghōrōkō odi. ²⁹Keḍio eedi temuteghu taruugu obhꞌeedi, obo bho iḍighi miiḅi obho teḅerenu ni eḍum ghuḍum, keḍio obo bho iḍighi mịkarabh obho teḅerenu ni ẹnogho mapum.”

Ibha nẹgba mạJizos emutiom

³⁰“Ạami be utue ḍio aḍighi mạar. Ạami usōbh rạakpe bho tẹzo bho Ẹnaan ạkpete ạnogho ạami obho, molo ịiruan tạmi iru magey, tebum obho ạami ụva ḍio moḍighi ilꞌạmi obho, naḍighi mibha todi obo bho arōm ạami obho be.

³¹“Eru kạar olo ịigbaay obhꞌạmi iru milꞌạmi be, ịigbaay ibhꞌạmi irue ḍio eru magey obho. ³²Kir ọnon ōoy olo nạgba ạni nạ milꞌạmi, molo ạami naalōghōm mobho ibha odi nạgbaam ạami obho iru magey obho. ³³Enyina irōm aritelema enyina ẹghi tạJon, keḍio odi ạgba mebum agey obho. ³⁴Ughōl io ạami tapin mịigbaay ōoy. Ạami nạgba kua be molo ọpel enyina. ³⁵ẠJon ạrol kọtodi olo naamōr ạmua, keḍio enyina imōruōm ịrol mịbam amen nebo mibo mi tẹḅaal todi. ³⁶Ịigbaay ilo ipu mibha tạJon nẹgbaam ạmi. Ariḍighi obho ạami naḍighi obho, ariḍighi obho Ọde ạmi ạnogho ạami moḍighi obho, iibha nẹgbaam ạami, nẹgba eḍeeriom mobho Ọde bho arōm ạami aru. ³⁷Odi Ọde bho arōm ạami obho nạgba nạ zạmi amutiom. Enyina dẹmoghon io moghōrōkō odi, dẹmiin nạ ḍio maghisigh odi. ³⁸Enyina deseeri ḍio mọnuekpete odi mi tiloghi enyina, tebum obho enyina imōruōm io zodi obho odi arōm aru obho. ³⁹Enyina nẹtuugha mẹegia iigbia bho mebum obho enyina ịitua ighōl teedi pesi enyina tẹmiin maghuḍum olo ikunughi olo. Keḍio eedi nịvo nịvo nẹgba zạmi. ⁴⁰Keḍio enyina imōrō ḍio moru tạmi molo enyina kẹteeny ghuḍum.

⁴¹“Ạami ụva ḍio molo arōoy kebuom ạami. ⁴²Ạami naalōghōm enyina. Ạami naalōghōm mobho enyina itulan io mẸnaan mi tiloghi enyina. ⁴³Ạami uru nꞌịnyaam tỌde ạmi, keḍio enyina ibhin io ạami. Amen ọnon ōoy tatu nꞌịnyaam odi, penyina obhin odi. ⁴⁴Enyina negbẹel ghạ molo onyiin kabuom monyiin, keḍio enyina ịva ḍio mọteeny ibha tobuom enyina mi todi onyiin Ẹnaan be: tediaka siibha bho kenyina emōruōm. ⁴⁵Ịítua ghạ meghōl ạami tạkpete ni zenyina ạpue ạnogho mỌde ạmi. AMozis pobo tạgba mịkarabh enyina — aMozis obho enyina neḍuom ologhi obho. ⁴⁶Eru kạar olo enyina nẹekar emōruōm maMozis, kōl enyina neemōruōm ạami, ebum obho odi ạge milꞌạmi obho. ⁴⁷Kenyina imōruōm io mibha odi ạge bho, enyina tetue emōruōm mibha ạami nạgba bho?”

ẠJizos abhin ịbam eḍian ạbheremiom maḍiōbh nꞌịzal nꞌạmaḍian ọonir arōoy

¹Iibha iru itẹn, pạJizos amula ạghi ạḅeeny mọbhiiny aGalili (obho ughōl nạ ọbhiiny aTaibirias obho). ²Keḍio obꞌọlogh arōoy ịtuonom odi, suo eedi nẹemiin moḍighi ibꞌaruugu obho odi aḍighi mi tookōoy ạrazegh obho. ³Keḍio ạJizos ạghi ạsiin teegum, odi nꞌobo bho nẹtuonom odi obho ịrol delede. ⁴Ẹzaal Opẹl-Otẹn obhꞌaJu obho naatuan. ⁵ẠJizos nạamiin mibha obꞌọlogh arōoy netu todi, podi ạkpete kua ạnogho maFilip, “Ezira tọmiin teḍighen mạbred olo oghō ọnogho oomo arōoy bhibha kele?” ⁶(Odi apuruan kua mọdegh aFilip; odi ni dụgh, odi naalōghōm milo odi taḍighi.) ⁷Keḍio aFilip ạbhagharana kua, “Keḍio tọteeny nạ milo ōoy ịbam ịbam kale, toliom ni mạbred ilo tẹkian ni mọonir anaira.” ⁸Keḍio Ạndru, onyiin oteledōm obhꞌodi, umōr taPita, ạkpete kua, ⁹“Kir ọony olo odi suo olo ạteeny ōogh eḅol ạbred nꞌịzal ina. Keedi abaabha bho tesi teḍighen tobꞌọlogh arōoy ilo ileeny mẹzo bho?” ¹⁰PạJizos ạkpete ạnogho eedi, “Iḍighi arōoy obho ẹrologhu delede.” (Ịkanya ịigho idi todi esi obho.) Parōoy obho ịrologhu delede; arōoy ilo neepu maḍiōbh nꞌịzal nꞌạmaḍian ọonir arōoy. ¹¹Keḍio ạJizos ạseghe mạbred obho, ạnogho lịsebh mẸnaan, keḍio ụḍi ụnogho marōoy obho ịrologhu delede bho. Odi ạseghe nạ mena bho aḍighi nạ monyiin ẹzo bho, keḍio oomo eedi iru ile kẹzo kẹzo olo eedi ịva mole. ¹²Amen oomo arōoy obho neele ịbherogh, podi ạkpete ạnogho miteledōm odi, “Iikpo moomo ịpaḍi obho isughō bho, utōbh io bọbon ọpaḍi.” ¹³Peedi iikpooy moomo eedi, keḍio imuza maḍiōbh nꞌịzal ạrukpaagh ịpaḍi ạbred ibha isughō mi tōogh eḅol ạbred obho arōoy obho ile bho.

¹⁴Amen arōoy obho ịmiin oḍighi ibꞌaruugu obho odi aḍighi obho, pịkpete kua, “Oobho ạkar odi ozil obho tatu bọ tẹmar-arōoy obho!” ¹⁵ẠJizos naalōghōm mobho eedi nẹva moḅum odi otẹnẹ ọolema; podi be ạḍua ạghi taruugum obho.

ẠJizos arele tạnyu ạmuum

¹⁶Nạteeny mudule piteledōm odi isōor tọbhiiny obho ¹⁷iḍigh moghuugh, keḍio ịzoghi nẹḅeeny momula tạKapaniom. Aḍio naakpereghi, keḍio ạJizos doru nạ ḍio teedi. ¹⁸Tamen opopo obꞌogim naasōor molo ọbhiiny obho nạle. ¹⁹Iteledōm obho nẹezoghi mịraar nꞌinya ịidoony aratobi keḍio tẹmiin mạJizos natele tạmuum obho natuan toghuugh obho, molo aruugu isibh eedi. ²⁰Keḍio ạJizos ạkpete kua ạnogho zeedi, “Ạami. Ighiil ghạ ruugu!” ²¹Keḍio eedi ịloghom zodi mi toghuugh obho, tonyiin odi amen opopo poghuugh obhꞌeedi ạghi asul tesiḍia bho eedi nẹki mosul obho.

Arōoy ịrol ịva mạJizos

²²Aḍio ạḅaal arōoy obho ịrol tẹḅeenyom ọbhiiny obho ịmiin mobho onyiin oghuugh be bho asughō bho. Peedi ilōghōm mobho ạJizos oḍigh ạni ḍio nꞌiteledōm odi toghuugh obho eedi be ịzoghi ịḍua. ²³Ịnon arughuugh ilo ịḍua taTaibirias iru neesul tesiḍia obho Obạmọogh obho abhin ạbred ạnogho lịsebh ạnogho rōoy obho mole bho. ²⁴Amen obho eedi ịmiin io mạJizos nꞌiteledōm obhꞌodi peedi iḍiku rughuugh ịghi tạKapaniom nẹva zodi.

ẠJizos ạbred aghuḍum obho

²⁵Amen arōoy obho iru ịmiin mạJizos mi tẹḅeenyom obho, peedi ịkpete kua ịnogho zodi, “Obo ịtughumiom, ạna usi suo mokōr amen?” ²⁶Keḍio ạJizos ạbhagharana kua, “Ạami nạgba kua magey obho ạnogho enyina: enyina nẹva ạami mebum ạbred obho enyina ile bho, enyina ịtuan io mebum obho enyina nẹemoghonyan moḍighi ibꞌaruugu bhꞌạami obho. ²⁷Íḍighi ghạ moḍighi olo tẹnogho enyina mịḅure ariḍian; kpẹlen nꞌipa, iḍighi moḍighi olo tẹnogho enyina meḍian olo tẹtol kamen kamen mi taghuḍum obho ikunughi olo bho. Eḍian bhibha Ọony Oōy obho tạnogho enyina, tebum obho Ẹnaan Ọde bho nạalogh odi melẹgh obho.” ²⁸Peedi ipuruan kua zodi, “Ezōor toḍighi meeghe koḍighi moḍighi tẸnaan?” ²⁹Keḍio ạJizos ạbhagharana kua, “Oobho poḍighi obho Ẹnaan nạva molo enyina keḍighi: imōruōm obo bho odi arōm aru obho.” ³⁰Peedi ịbhagharana kua, “Okōr oḍigh ọkpo ịiḍaany elẹgh mobho ạna taḍighi molo ezōor tọmiin omōruōm ạna? Okōr oḍighi mobho ạna taḍighi? ³¹Igbōgh ạburude ezōor ile mạbred mi tobꞌeekpu eḍum obho, kẹzo bho ẹegia iigbia bho ịgba bho,

‘Odi ạnogho zeedi mạbred olo ạḍua tẸnaan asōor mole.’ ”

³²Keḍio ạJizos ạkpete kua, “Ạkar agey nạ ni, ạbred obho aMozis ạnogho zenyina bho ọḍua ḍio tẸnaan aru; Ọde ạmi pobo bho tạnogho zenyina magey ạbred obho ạḍua tẸnaan aru obho. ³³Ạbred obho Ẹnaan ạnogho bho, podi obo bho ạḍua tẸnaan aru nạnogho ghuḍum mẹmar-arōoy obho.” ³⁴Peedi ịkpete kua, “Ẹhe! Obo apu ezōor, nọgho ghạ zezōor mạbred bhobho.” ³⁵ẠJizos ạbhagharana kua zeedi, “Ạami pạbred aghuḍum obho. Kōoy kōoy olo aru tạmi, ọkoony osibh mu; obo bho amōruōm ạami obho, ạmuum ịral mu zodi.

³⁶“Esiibha, ạami nạagba ạnogho enyina mobho enyina nẹemiin ạami keḍio enyina imōruōm io. ³⁷Kōoy kōoy olo Ọde ạmi ạnogho ạami tatu ni tạmi. Ạar olo taḍighi ạami apirighan mōoy olo aru tạmi olo nolo. ³⁸Tebum obho ạami naasōor uru mi tẸnaan moḍighi ibha odi obo bho arōm ạami obho ạto bho, ịto ilꞌạmi ḍio. ³⁹Iibha pibha odi obo bho arōm ạami obho nạva molo ạami kaḍighi: molo ạami upiẹmi ḍio bọbon onyiin obo bho odi nạanogho ạami obho, nꞌolo ạami taḅẹriōn ni zeedi mi taghuḍum mi tikunughi aḍuma bho. ⁴⁰Ọde ạmi nạva miibha: molo kōoy kōoy olo ạmiin mỌony obho amōruōm odi taḍum aghuḍum olo ikunughi olo; keḍio ạami taḅẹriōn zeedi taghuḍum mi tikunughi aḍuma bho.”

⁴¹Parōoy aJu obho ịke mọghunughun mebum obho odi aghōl kua, “Ạami pạbred obho ạḍua tẸnaan aru obho.” ⁴²Peedi ịkpete kua, “Oōy obhobho ạJizos ọony taJosef odi ḍio bẹle? Ezira noolōghōm mọde nꞌoniin odi. Eeghe aḍighi kodi nakōl modi ạḍua tẸnaan karu?” ⁴³Keḍio ạJizos ạbhagharana, “Ímina ghạ mẹrol ẹghunughun kua nꞌasilōor enyina. ⁴⁴Bọbon ōoy olo tatu tạmi olo, tughuneen nꞌolo Ọde bho arōm ạami aru obho ạnyagh zodi aru tạmi ḍio; keḍio ạami taḅẹtōn zodi mi taghuḍum mi tikunughi aḍuma bho. ⁴⁵Arizil obho ịge kua, ‘Ẹnaan tạtughumiom moomo arōoy obho.’ Kōoy kōoy olo ạtuugha mi tỌde bho, ạmoghonyan zodi, poru tạmi. ⁴⁶Iibha bho ịgba ḍio kua eghōl kir ōoy olo nạamiin ghạ mỌde bho; odi obo bho ạḍua tẸnaan karu obho, odi be mobo nạamiin ghạ mẸnaan.

⁴⁷“Ạami nạgba magey obho ạnogho zenyina: odi obo bho amōruōm obho taḍum aghuḍum olo ikunughi olo. ⁴⁸Ạami pạbred aghuḍum obho. ⁴⁹Ạburude enyina ile mạbred bho mi tobꞌeekpu eḍum obho, pịbhozu. ⁵⁰Keḍio ạbred obho ạḍua bọ tẸnaan aru obho, ōoy olo ale ọbho mu. ⁵¹Ạami pạbred aghuḍum obho ạḍua tẸnaan aru obho. Oōy olo ale zodi ạbred obhobho taḍum aghuḍum olo kamen kamen. Ạbred obho ạami tạnogho zodi obho, iikpōogh alōor ạmi, obho ạami ụnogho molo ẹmar-arōoy obho eḍum.”

⁵²Iibha bho iḍighi molo iloghi arōoy aJu obho iḅẹebh ịrol ịghanan ipuruan kua. “Odi ōoy obhobho taḍighi ẹko kạnogho zezira miikpōogh odi mọḅa?” ⁵³ẠJizos ạkpete kua ạnogho zeedi, “Ạami nạgba magey obho nạnogho zenyina: eru kạar olo enyina ịḅa ḍio miikpōogh Ọony Oōy obho, egu mịḅaal odi, enyina irue ḍio ẹteeny maghuḍum olo ikunughi olo mi talōor enyina. ⁵⁴Kōoy kōoy olo ạḅa miikpōogh obhꞌạmi, amina agu mịḅaal obhꞌạmi nạateeny aghuḍum olo ikunughi olo, keḍio ạami taḅẹtōn zodi mi tọbho bho mi taḍuma ikunughi obho. ⁵⁵Iikpōogh ạmi ạkar agey iiḅi eḍian, ịḅaal ạmi ạkar agey ạmuum alideny. ⁵⁶Obo ạḅa miikpōogh obhꞌạmi, agu mịḅaal obhꞌạmi, natugh tạmi, ạami natugh nạ todi. ⁵⁷Ọde bho aḍum ni ạman obho arōm ạami aru, molo tebum odi keḍio ạami naḍum nạ. Onyiin ẹzo bho nạ, kōoy kōoy olo ạḅa miikpōogh ạmi taḍum ni mebum ạmi. ⁵⁸Odi oobho bho bẹleni, pạkar ạbred obho ạḍua tẸnaan aru obho; olo kạbred obho ạburude enyina ile, ịbhozu obho. Obo bho ale mạbred obhobho bho taḍum ni kamen kamen.” ⁵⁹ẠJizos ạḍeghe miibha mamen olo odi ạtughumiom totu ịtughumiom mi tạKapaniom.

Ọnuekpete olo nạnogho ghuḍum olo kamen kamen

⁶⁰Ọlogh obo bho nẹtuonom zodi obho ịmoghon miibha bho pighōl kua, “Hụu! Ẹzo ịtughumiom bhibha ịghua. Okōr ōoy tatue ạtol ạmoghon miibha bho?” ⁶¹Ụgba ḍio ọnogho zodi, keḍio odi ạJizos naalōghōm mobho obo bho nẹtuonuman zodi obho nẹghunughun miibha bho; podi ạkpete kua ạnogho zeedi, “Iibha bho be neeḍighi molo enyina nẹva mọḍua? ⁶²Eeghe temute, erumolo enyina ịmiin mỌony Oōy obho namula ạki tesi obho odi ạḍua aru obho? ⁶³Ẹmugh tẸnaan pobho nạnogho maghuḍum obho; iikpōogh alōor ōoy ạar oḍighiom olo nolo. Ọnuekpete obho ạami nạakpete ạnogho zenyina obho, Ẹmugh nꞌaghuḍum. ⁶⁴Oomo ipa ẹkona, ẹde enyina imōruōm io.” (ẠJizos naalōghōm kọḅel egbiom obho mobo bho imōruōm io bho, nꞌodi obo bho taḅool odi obho.) ⁶⁵Podi amina ạkpete kua ạḅaram, “Iibha pạar obho ạami ụkpete ụnogho zenyina ughōl bọbon ōoy olo tatu tạmi olo tughuneen nꞌolo Ọde bho aḍighi molo kẹrol kua ḍio.”

⁶⁶Tebum iibha, pọlogh obo bho nẹtuonuman zodi obho iḍionom zodi mạman, imina ḍio eru ẹtuonom zodi. ⁶⁷PạJizos ạkpete kua ạnogho maḍiōbh nꞌịzal iteledōm obhꞌodi, “Enyina kẹko, enyina tẹḍua nạ ni?” ⁶⁸Keḍio ạSaimon Pita ạbhagharana kua zodi, “Obumọogh, ezōor tọki tokōr ōoy? Ạna pobo ụteeny mọnuekpete bho nẹnogho maghuḍum olo ikunughi olo bho. ⁶⁹Keḍio esiibha bho ezōor noomōruōm mobho ạna uru zodi Oōy obho ịkarabh ilo bho, obho ạḍua tẸnaan aru obho.” ⁷⁰Keḍio ạJizos ạbhagharana kua zeedi, “Ạami obo bho ạson bọ maḍiōbh nꞌịzal obho enyina bho ḍio gạ? Keḍio onyiin enyina ọboghoma!” ⁷¹Odi nạgba milo igboloman nꞌaJudas ọony tạSaimon Ịskariot. AJudas, toomo ibha odi aru monyiin aḍiōbh nꞌịzal obho, obo taḅool mạJizos.

ẠJizos nꞌaburumōr odi

¹Iibha iru itẹn pạJizos akin akiton moomo aGalili; odi ọva ḍio mọghi orele mi taJudia, tebum obho ạruula arōoy aJu obho nẹva moghigh odi obho. ²Ẹzaal ọotua arutu ạgalaga arukpe arōoy aJu obho naatuan, ³paburumōr tạJizos iru ịkpete kua ịnogho zodi, “Ḍụa suo mamina mạghi taJudia, molo obo bho nẹtuonom ạna bho ẹmiin ạni moḍighi obho ạna naḍighi obho. ⁴Oōy olo nạva molo arōoy kelōghōm zodi ọḅoki ghạ ḍio moḍighi obho odi naḍighi obho. Ẹzo bho ạna naḍighi mọkpo bhibha bho, ḍighi oomo ẹmar-arōoy obho elōghōm ạna!” ⁵(Ạkar aburumōr obhꞌodi ẹkona imōruōm io zodi.) ⁶Keḍio ạJizos ạkpete kua ạnogho zeedi, “Amen olo ạami kạghi dọteeny io. Oomo amen obho aazuan zenyina. ⁷Ẹmar-arōoy obho irue ḍio ẹlogh enyina ḍien, keḍio eedi nẹlogh ạami ḍien, mebum obho ạami nạgba ạnogho zeedi mobho araabōom eedi ịneghe ḍio bho. ⁸Enyina ịki tẹzaal obho. Ạami ụki ḍio. Ạkar amen ạmi dọteeny io.” ⁹Odi ạkpete kua ạḅele, podi ạrol bịrim mi taGalili.

ẠJizos ale mẹzaal ọotua arutu ạgalaga arukpe

¹⁰Suo aburumōr odi neetẹn ịghi tẹzaal obho, keḍio odi ạJizos atẹn ạghi ạni; odi omutiom io lōor odi togbo arōoy obho, odi ạghi tẹḅokia. ¹¹Ạruula aJu obho nẹva ghạ zodi mi tẹzaal obho, nepuruan ghạ kua, “Oḍighen odi?” ¹²Obꞌọlogh arōoy obho neebhala ghạ mebum odi. Ẹtede arōoy nekōl ghạ kua, “Odi ooḅi ōoy.” Ẹtede imōruōm io kua, ịnon nekōl kua, “Odi naabiōghōm rōoy.” ¹³Tebum ạruula arōoy aJu obho, ōoy olo ane mọkpete ạar omutiom olo.

¹⁴Noole mẹzaal obho ọḍiemi ịzal abin keḍio ạJizos tạki totu iikpulughu obho ạtughumiom. ¹⁵Ạruula aJu obho eemōogh magey, keḍio ịkpete kua, “Oōy obhobho aḍighi ẹko kalōghōm oomo iibha bho? Odi ọghi ghạ ḍio otu ịtughumiom obho?” ¹⁶Keḍio ạJizos ạbhagharana kua, “Ibha ạami nạtughumiom obho, ịtughumiom ạmi ḍio. Ịḍua tẸnaan obo bho arōm ạami obho keru. ¹⁷Oōy olo nạva moḍighi ibha Ẹnaan nạva bho talōghōm ni meru kạar olo ịtughumiom obhꞌạmi ịḍua tẸnaan kiru nꞌeru kạar olo ọnuekpete bhꞌạmi iru milꞌịnyaam ạmi. ¹⁸Oōy olo nạgba milꞌologhi odi, nạva mọghueni aḍien odi. Obo bho nạva bọ mọghueni aḍien obo bho arōm odi obho pobo nạgba magey, molo bọbon ịbam iben ilo todi. ¹⁹AMozis ạnogho zenyina maraalōgh obho enyina neekō? Bọbon ōoy enyina olo naakō maraalōgh obho olo. Ebum eeghe kenyina nẹva moghigh ạmi?” ²⁰Keḍio obꞌọlogh arōoy obho ịbhagharana kua, “Eru odi tẹmu onuma! Okōr ōoy nạva moghigh onuma?” ²¹Keḍio ạJizos ạbhagharana kua, “Ạami uḍighi monyiin obꞌoḍighi, poomo enyina iimōogh. ²²Tebum obho aMozis ạkpete ạnogho enyina moḍunogh ạnwuny enyina bho (aMozis nạ ḍio, igbōgh ạburude enyina ibhira ẹke), enyina iḍun ghạ ni mọony maḍuma obhooghia bho. ²³Eru kạar olo noḍun ghạ ni mọony maḍuma obhooghia bho molo ookō araalōgh obho taMozis, ebum eeghe kenyina nẹle mibha ạami uukō mōoy uḍume taḍuma obhooghia bho? ²⁴Ímina ghạ meenon mi tozu alōor mesōbh rạakpe, iinon tagey eḍighiom ạar obho ku mesōbh.”

Odi paKraist obho

²⁵Pẹde arōoy obhꞌaJerusạlẹm ịkpete kua, “Oobho ōoy obho eedi nẹva moghigh obho ḍio gạ? ²⁶Iinon! Odi nạḍeghe togbo arōoy obho, keḍio bọbon ōoy olo natue mọgba odi ọpue taghisigh odi olo. Enyina nekōl ạruula bho dẹkar io elōghōm mobho odi aru maKraist obho gạ? ²⁷Amen aKraist obho tatu, bọbon ōoy olo talōghōm mesi odi ạḍua aru olo. Oomo ezira noolōghōm mesi ōoy obhobho ạḍua aru.”

²⁸Ẹzo bho ạJizos nạtughumiom totu iikpulughu obho podi ạkpete kua amulughu amutiom, “Enyina ẹkar elōghōm ạami, elōghōm nạ mesi ạami ụḍua uru? Ạami upin io tịnyaam ạmi aru. Odi obo bho arōm ạami uru obho iben ilo todi. Enyina ilōghōm io zodi. ²⁹Ạami naalōghōm zodi, ạami ụḍua todi karu, keḍio odi arōm nạ zạmi moru.” ³⁰Tipa peedi ịva moḅol odi, keḍio ōoy olo ane olo, tebum obho amen odi dọteeny io bho. ³¹Ẹtede arōoy mi tobꞌọlogh arōoy obho emōruōm zodi, keḍio ịkpete kua, “Amen aKraist obho tatu, tatue ni aḍighi mobꞌoḍighi ilo tepu mibha ōoy obhobho naaḍighi obho bẹle?”

Urōm arōoy iḅōrō moru oḅol ạJizos

³²Arōoy aFarisi obho nẹemoghon mobho arōoy obho neebhala miibha bho zodi, peedi nꞌaruvẹmụ arōoy iḅo miiḅua bho irōm rōoy iḅōrō bho mọghi oḅol ạJizos. ³³Keḍio ạJizos ạkpete kua, “Ạami tạtolan enyina mịbam amen be, pạami omula ọghi todi obo bho arōm ạami moru obho. ³⁴Enyina tẹva ni zạmi, keḍio enyina irue ḍio ẹmiin ạami. Esi obho ạami tạtol obho enyina irue ḍio ẹghi.” ³⁵Parōoy aJu obho ipuruan kua silōor eedi, “Odi tạki tebhugh aGris obho, tạraama bho arōoy aJu obho idi obho, ạtughumiom marōoy aGris obho gạ? ³⁶Odi nakōl kua, ‘Enyina tẹva zạmi keḍio enyina irue ḍio ẹmiin ạami,’ nꞌobho, ‘Enyina itue ḍio ẹghi tesi obho ạami tạtol obho.’ Odi ạḍeghe ẹko kua bho?”

Ariizi ạmuum aghuḍum

³⁷Ikunughi aḍuma ẹzaal obho ạla mạar apu. Odi aḍuma popo pạJizos aḅetunu ạkpete kua amutiom nꞌobꞌoghōrōkō, “Kōoy kōoy olo ạmuum nẹtal aru tạmi ạbhoghol! ³⁸Kẹzo bho ẹegia bho ạkpete bho, ‘Oōy olo amōruōm ạami, ariizi ạmuum aghuḍum tegbōr ni emute tekpom odi.’ ” ³⁹(ẠJizos ạgba miibha bho mibha Ẹmugh Iigbia bho obho obo bho imōruōm odi obho tepin obho. Tamen opopo, Ẹnaan dọnogho ḍio rōoy mẸmugh Iigbia bho tebum obho doḅẹtōn io mạJizos ọnogho meghuan obho.)

Ịkanan olo iḍighi arōoy obho ịḍian

⁴⁰Ịkanya arōoy mi tobꞌọlogh arōoy obho ịmoghon mibha odi nạkpete bho, pighōl kua, “Oōy obhobho ạkar agey ozil obho tẸnaan.” ⁴¹Ẹtede nekōl kua, “Odi aKraist obho!” Keḍio imina ịnon ighōl kua, “AKraist obho orue ḍio ạḍua taGalili aru. ⁴²Ụge kua tẹegia bho, ‘AKraist obho tạḍua teghun otu taDevid atu, keḍio tọmar zodi mi tạBetilihem, tẹma bho aDevid arugh obho.’ ” ⁴³Ịkanan bhibha iḍighi molo arōoy obho ịḍianogh mebum odi. ⁴⁴Ẹtede ẹva moḅol odi, keḍio ōoy olo ane mokulaan odi olo.

Ạruula arōoy aJu imōruōm io

⁴⁵Obo iḅōrō bho imula ịghi taruvẹmụ arōoy iḅo miiḅua bho nꞌarōoy aFarisi obho, peedi ipuruan kua zeedi, “Eeghe kenyina iḅol io zodi ebhin eru?” ⁴⁶Keḍio obo iḅōrō bho ịbhagharana kua, “Bọbon ōoy olo naarue ghạ mọḍeghe kibhꞌodi olo!” ⁴⁷Parōoy aFarisi obho ipuruan kua zeedi, “Enyina ẹkona, odi naabiōghōm nạ? ⁴⁸Enyina mẹemiin monyiin ọola, bolobolo onyiin olꞌaFarisi obho olo amōruōm zodi? ⁴⁹Ọlogh arōoy obho ilōghōm io maraalōgh obho taMozis, molo eedi neḅughan itōnyōgh tẸnaan!” ⁵⁰Suo keḍio aNikodimos, ōoy olꞌogbo bhꞌeedi olo nạaghi ghạ ạmiinan mạJizos, ạkpete kua, ⁵¹“Tẹzo araalōgh ezira, ezira urue ḍio oghigh mōoy kogbi mọgba ịigbaay ọkpo ilo odi naaḍighi.” ⁵²Peedi ịbhagharana kua zodi, “Ẹhee! Ạna ẹkona olꞌaGalili nạ? Tụugha mibhꞌẹegia bho pạna olōghōm mobho ozil tẸnaan domute ghạ ḍio taGalili.” ⁵³Pu kōoy kōoy aghẹel.

Ạni olo uḅolom mobho naḍighi mịkarabh ole ẹma

¹[Pu kōoy kōoy aghẹel, ạJizos ạghi tobꞌeegum obhꞌỌlivs. ²Ạḅaal, obun ụḍirogh be, podi amula ạghi totu iikpulughu obho. Ọlogh arōoy iru ikō zodi, keḍio odi aru ạrol delede ạke mọtughumiom eedi. ³Obꞌịtughumiom araalōgh obho nꞌaraFarisi obho ibhin mạni olo uḅolom bho nale mẹma iru ịmarami taghisigh oomo eedi. ⁴Keḍio eedi ịkpete kua ịnogho mạJizos, “Oōy ịtughumiom, ạni obhobho uḅolom mobho naḍighi mịkarabh ole ẹma. ⁵Taraalōgh obhꞌezira, aMozis ạkpete kua, mạni olo aḍighi kua mitōḅōl odi meghigh. Tonuma, koḍighi ẹko zodi?” ⁶Eedi ipuruan kua zodi mọdegh odi, molo eedi ẹmiin mạar olo ọgbaam ọbhamam odi. PạJizos azuman ạseghe mạghunu ạvo odi nạge tade bho. ⁷Ẹzo bho eedi ịmara ni nepuruan zodi miipuruan obho, podi aḅẹtōn ẹmu odi ạkpete kua ạnogho zeedi, “Onyiin enyina olo doḍighi ghạ ḍio mịkarabh abhira ạseghe mekpo arōbhōm zodi ạni obho!” ⁸Keḍio odi amina azuman nạge tade bho. ⁹Amen eedi ịmoghon miibha bho, poomo eedi iḍighi sōbh sōbh sōbh, ạseghe tarukenya bho, ōoy amen amen, ịḍuaghu. ẠJizos nꞌodi ạni obho beinaan isughō. Ạni obho ạmara taghisigh odi. ¹⁰Keḍio odi aḅẹtōn ẹmu odi apuruan kua zodi, “Ạni obho, iḍighen eedi? Oōy olo asughō mọnogho onuma mapum olo?” ¹¹Keḍio odi ạbhagharana kua, “Obumọogh, olo.” PạJizos ạkpete kua, “Pạami ẹkona ụnogho ḍio ạna mapum. Kẹel, keḍio umina ghạ maḍighi mịkarabh.”]

ẠJizos ẹḅaal tẹmar-arōoy obho

¹²Keḍio ạJizos amina ạkpete kua ạnogho eedi, “Ạami ẹḅaal ẹmar-arōoy obho. Oōy olo ạtuonom ạami tạteeny ni mẹḅaal aghuḍum molo odi orele mu mi tọkinim.” ¹³Parōoy aFarisi obho ịkpete kua ịnogho zodi, “Ạna naatuma lōor onuma; ibha ạna nạgba bho irue ḍio eru magey obho.” ¹⁴Keḍio ạJizos ạbhagharana kua, “Eenyi, ekua ḍio. Oomo ipa ẹkona, erumolo ạami naatuma lōor, ibha ạami nạḍeghe bho agey, ạami be mobo ulōghōm mesi ạami ụḍua uru nꞌesi ạami nạki. Enyina ilōghōm io. ¹⁵Enyina ibhin ịitua arōoy nesōbh rạakpe; ạami usōbh io rạakpe ạnogho mōoy. ¹⁶Keḍio erumolo ạami usōbh rạakpe, ibha ạami usōbh obho pagey obho. Ạami be ḍio mobho nasōbh; Ọde bho arōm ạami moru obho odi nꞌạami. ¹⁷Nọoge taraalōgh enyina okōl kua, mịigbaay ịzal arōoy ilo iru monyiin, ịigbaay obhꞌeedi agey. ¹⁸Ạami nạgba milꞌạmi, keḍio Ọde bho arōm ạami obho nạgba nạ milꞌạmi.” ¹⁹Keḍio eedi ipuruan kua zodi, “Ọde onuma kodi teḍighen?” ẠJizos ạbhagharana kua, “Enyina ilōghōm io ạami obho, enyina ilōghōm nạ ḍio mỌde ạmi. Erumolo enyina ilōghōm ạami bọ, kōl enyina neelōghōm nạ mỌde bhꞌạmi.”

²⁰ẠJizos ạkpete moomo abaabha bho mamen odi nạtughumiom mi totu iikpulughu obho, mi tẹkpe bho eḅina ookōbhōghiom ikpoki obho odi ghạ bho. Keḍio ōoy olo ane mọbham odi olo, suo amen odi dọteeny io bho.

Enyina irue ḍio ẹghi mesi olo ạami nạki

²¹Keḍio ạJizos amina ạkpete kua ạnogho zeedi, “Ạami tạḍua ni. Enyina tẹva ni zạmi, keḍio enyina tẹpo ni mi tịkarabh enyina. Enyina irue ḍio ẹghi tesi obho ạami nạki obho.” ²²Parōoy aJu obho ịkpete kua, “Odi aghōl kua, ‘Enyina irue ḍio ẹghi tesi obho ạami nạki obho.’ Iibha kodi nạkpete ẹko? Odi tạpo nꞌalōor odi bẹle?” ²³PạJizos ạbhagharana kua, “Enyina ịḍua tesuo ade bho keru, ạami ụḍua tạnyu obho karu. Enyina ilꞌesuo ẹmar-arōoy obho, ạami olꞌẹmar-arōoy obho ḍio. ²⁴Pạar obho ạami ughōl bọ enyina tẹpuom tịkarabh enyina bho. Enyina tẹpo ni tịkarabh enyina erumolo enyina imōruōm io ạami, moru odi ōoy obho ạami nạgba mobho ạami uru zodi obho.” ²⁵Keḍio eedi ipuruan kua zodi, “Ạna kokōr ōoy?” Keḍio ạJizos ạbhagharana kua, “Ibha ạami ụgba ụnogho zenyina kọḅel egbiom obho. ²⁶Ọlogh ọkpo mibha ạami ụteeny mọḍeghe nꞌosōbh ạraakpe ọnogho enyina. Odi obo bho arōm ạami obho, iben ilo todi, keḍio ạami nạgba ạnogho mẹmar-arōoy obho mibha ạami ụmoghon todi obho be.”

²⁷Eedi ịmoghonyan io mibha odi nạḍeghe mibhꞌỌde bho nạnogho zeedi bho. ²⁸Keḍio ạJizos tạkpete kua ạnogho zeedi, “Amen olo enyina neebhaghami mỌony Oōy obho penyina olōghōm mobho ‘Ạami uru zodi’; penyina olōghōm mobho ạami uḍighi ḍio mạar olꞌạmi, molo ạami nạgba ghạ mọkpo bho Ọde bho ạtughumiom ạami obho be. ²⁹Odi obo bho arōm ạami obho, odi nꞌạami; odi ọḅele ḍio zạmi be, tebum obho ạami naḍighi ghạ mọkpo ilo iḍigh tologhi odi obho.” ³⁰Ịkanya obo bho ịmoghon mibha ạJizos ạkpete bho emōruōm zodi.

Ạnwuny ogbotu nꞌạrubana

³¹PạJizos ạkpete kua ạnogho marōoy aJu obho imōruōm odi obho, “Erumolo enyina ịtuugh iḍighi mibha ạami nạtughumiom obho, penyina ạkar arōoy ilo nẹtuonuman ạami; ³²penyina olōghōm agey obho, keḍio agey obho taḍighi zenyina emuzaan tạrubana bho enyina idi obho.” ³³Peedi ịbhagharana kua, “Ezōor ạnwuny eghun otu tEbrạhạm, keḍio oomo ụrol kua, ezōor doru ghạ ḍio rụbana ōoy. Iibha kạna nạkpete ẹko moghōl ekua, ‘Enyina temuzaan ni tạrubana bho enyina idi obho’?” ³⁴Keḍio ạJizos ạkpete kua ạnogho zeedi, “Ạami nạgba magey obho ạnogho zenyina: kōoy kōoy olo naḍighi mịkarabh pẹbana oḍighi ịkarabh. ³⁵Ẹbana olꞌeghun otu obho moomo amen io, ọony obho olꞌeghun otu obho kamen kamen. ³⁶Eru kạar olo Ọony obho taḍighi ni enyina emuzaan, enyina tẹkar ni emuzaan magey. ³⁷Ạami naalōghōm mobho enyina iru mạnwuny eghun otu tEbrạhạm, keḍio enyina nẹva ni moghigh ạmi, mebum obho enyina imōruōm io mịtughumiom ạmi obho. ³⁸Ạami nạgba mibha Ọde ạmi aḍeeriom ạami obho, keḍio enyina neḍighi mibha ọde enyina ạkpete ạnogho enyina bho.”

³⁹Keḍio eedi ịbhagharana kua, “Ebrạhạm pọde ezōor.” PạJizos amulumian kua, “Eru kạar olo enyina ịkar iru mạnwuny tEbrạhạm, enyina kiḍighi ni monyiin odi oḍighi obho odi aḍighi obho. ⁴⁰Oomo ạar olo ạami naaḍighi suo pọgba ọnogho enyina magey obho ạami ụmoghon tọnu tẸnaan obho. Keḍio enyina nẹva ni moghigh ạmi. Ạar olo ạrol kẹzo bho olo Ebrạhạm aḍighi olo! ⁴¹Enyina neḍighi mọkpo bho ọde enyina aḍighi obho.” Peedi ịbhagharana kua, “Ọnon ọde olo ezōor ụteeny olo, tughuneen Ẹnaan be ḍio. Ezōor ạkar agey ạnwuny odi.” ⁴²Keḍio ạJizos ạkpete kua ạnogho zeedi, “Eru kạar olo Ẹnaan ạkar aru mọde enyina, enyina kitulan ni zạmi, tebum obho ạami ụḍua tẸnaan uru obho, keḍio esiibha ạami odi suo. Ạami upin io tịnyaam ạmi be aru, odi karōm ạami moru. ⁴³Kebum eeghe kenyina irue ḍio mọmoghonyan ibha ạami nạgba bho? Ebum obho enyina ideny io ẹmoghonyan ịtughumiom adōm obhꞌạmi obho. ⁴⁴Enyina ạnwuny ọde enyina, Eru obho, molo enyina negbẹel mọtuonom ibha ọde bhꞌenyina nạva bho. Kạkar ọḅel egbiom obho, odi ọokoma. Odi dọtuonom ghạ ḍio magey obho, tebum obho agey obho ilo todi obho. Amen odi ạgba miben, odi naḍighi moḍighi iikpōogh alōor obho be, tebum obho odi aru mọgba miben, nꞌọde oomo ịgba miben obho. ⁴⁵Ạami ụgba magey obho, pạar obho enyina imōruōm io ạami obho. ⁴⁶Okōr ōoy tenyina tatue ạgba amutiom mobho neebhum ạami mebum ịkarabh ilo ạami uḍighi? Erumolo ạami nạgba magey obho, eeghe kenyina imōruōm io ạami? ⁴⁷Obo bho ạḍua tẸnaan aru obho nạmoghon nạ mọnuekpete tẸnaan. Ạkar enyina ịḍua ḍio tẸnaan keru, pạar obho enyina ịmoghon io bho.”

ẠJizos nꞌEbrạhạm

⁴⁸Parōoy aJu obho imulumian kua zodi, “Ezōor ụgba ḍio magey oghōl ạna olꞌaSameria olo eru odi tẹmu onuma?” ⁴⁹Keḍio ạJizos ạbhagharana kua, “Eru olo tẹmu ạmi, ạami naabhughumi mỌde ạmi, enyina neenon ạami nekiemi. ⁵⁰Ạami ụva ḍio moobhughumia alōor. Kir onyiin olo naabhughumeni ạami olo nạgba ạnogho ạami makẹel. ⁵¹Ạami nạgba magey obho ạnogho enyina: kōoy kōoy olo ạtuugh aḍighi mibhꞌadōm obhꞌạmi ọbho mu.” ⁵²Parōoy aJu obho ịkpete kua ịnogho zodi, “Esiibha ezōor nọokar olōghōm mobho aḍuugh odi tẹmu onuma! Ebrạhạm sịnaabho, arizil obho nẹebhozu nạ, keḍio ạna nạgba ni mu, ‘Kōoy kōoy olo ạtuugh aḍighi mibhꞌadōm obhꞌạmi ọbho mu.’ ⁵³Ạna ụbugh apu mEbrạhạm ọde ezōor obho ạbho bho? Arizil obho ẹkona nẹebhozu. Ạna kokōr ōoy?” ⁵⁴Keḍio ạJizos ạbhagharana kua, “Erumolo ạami ku taabhughumia lōor, ạlibugh obhꞌạmi ạar io. Ọde ạmi pobo naabhughumi zạmi — ạkar odi obho enyina ighōl mẸnaan enyina bho. ⁵⁵Enyina delōghōm io zodi; ạami naalōghōm zodi. Erumolo ạami ughōl ạami ulōghōm io zodi bọ, kōl ạami ọgba miben kenyina. Ạami naalōghōm zodi, nakiilaan nạ moghōrōkō odi. ⁵⁶Ọde enyina Ebrạhạm abo magey mọmiin aḍuma ạmi; odi ạmiin pologhi odi ạḅaal.” ⁵⁷Parōoy aJu obho ịkpete kua ịnogho zodi, “Ạsumusia onuma degbẹbh io merubal ḍiōbh ạsia — keḍio ạna nạamiin mEbrạhạm?” ⁵⁸Keḍio ạJizos amulumian kua, “Ạami nạgba magey ạnogho zenyina: keḍio ụmar mEbrạhạm, ‘Ạami odi’.” ⁵⁹Peedi iikpooy mikpo morōḅōl odi; keḍio ạJizos ạḅokia ạḍua totu iikpulughu obho.

ẠJizos aakō mōoy olo ụmaram ikpom ariḍien

¹Ẹzo bho ạJizos arele nạki obho podi ạmiin mōoy olo ụmaram ikpom ariḍien. ²Pobo bho nẹtuonuman zodi obho ipuruan kua zodi, “Obo ịtughumiom, okōr ōoy obo bho aḍighi bọ mịkarabh obho kọmaram mōoy obhobho mikpom ariḍien obho? Ebum ịkarabh odi bẹlee kilo tọde nꞌoniin odi?” ³PạJizos ạbhagharana kua, “Ikpom ariḍien ōoy obhobho, ịkarabh odi bolobolo ibha tọde nꞌoniin odi iḍighi ḍio. Odi ikpom ariḍien molo ọmiin ịnyaam oḍighi tẸnaan mi todi. ⁴Ezira tọtol ni oḍighi moḍighi odi obo bho arōm ạami obho, suo aḍio doghul io obho. Uḍugul natu, amen olo ōoy otue mu aḍighi moḍighi. ⁵Suo ạami odi tesuo ẹmar-arōoy obho, ạami pẹḅaal ẹmar-arōoy obho.” ⁶Odi ạkpete kua ạḅele, podi ạsir mịghor tade bho agbuom mọomi asigh tariḍien ōoy obho, ⁷keḍio ạkpete kua ạnogho zodi, “Kịa teghō bho ughōl bọ Sailoam obho maatōla ghisigh onuma.” (Ẹmu aSailoam pughōl “Ụfirima ni”.) Pōoy obho ạghi aatōla aru nạmiin.

⁸Obo okōol odi, nꞌarōoy obho nẹemiin ghạ mobho odi nagbẹel miigbẹel obho, pịrol ipuruan, “Oobho ōoy obho ạrol ghạ delede agbẹel ghạ miigbẹel obho ḍio gạ?” ⁹Ẹtede meeghōl maa, “Odi,” ịnon ighōl maa, “Odi ḍio, ạgbaanan zodi be.” Podi ōoy obho nịvo nịvo ạgba kua, “Ạami odi.” ¹⁰Keḍio eedi ipuruan kua zodi, “Uḍighi ẹko kariḍien onuma ẹkparanu?” ¹¹Podi ạgba kua, “Oōy obho ughōl bọ ạJizos obho akpo mọomi tade bho asigh tariḍien ạmi, keḍio ạkpete kua ạnogho ạami, ‘Kịa taSailoam maatōla ghisigh onuma.’ Pạami ụghi, uutōla be pạami nạmiin.” ¹²Keḍio eedi ipuruan zodi ighōl kua, “Oḍighen odi?” Odi ạbhagharana kua, “Ạami ulōghōm io.”

Arōoy aFarisi obho ịva molōghōm alaakō

¹³Peedi ibhin mōoy obho ụmaram ikpom ariḍien obho ịghiom marōoy aFarisi obho. ¹⁴Aḍuma bho ạJizos agbu mọomi ạkparion riḍien ōoy obho, paḍuma obhooghia. ¹⁵Parōoy aFarisi obho imina ipuruan zodi mẹzo uḍighi kodi nạmiin mạar siibha bho. Keḍio odi ạgba ạnogho zeedi, “Odi asigh tariḍien ạmi, pạami uru uutōla ghisigh ạmi, molo ạami nạmiin siibha bho.” ¹⁶Ẹde arōoy aFarisi obho ẹkpete kua, “Oōy olo naḍighi mọkpo ilo idi kua orue ḍio ạḍua tẸnaan karu, ebum obho odi ookō ḍio maraalōgh aḍuma obhooghia bho.” Pẹde ịkpete kua, “Oōy olo aru moḍighi mịkarabh tatue ni aḍighi mibꞌariḍighi ilo ileeny kua?” Peedi iru ịḍianogh.

¹⁷Peedi arōoy aFarisi obho imina ipuruan magey zodi ōoy obho, “Ạna nakōl odi ạkar ạkparion riḍien obhꞌonuma kạna nạatua odi kokōr ōoy?” Podi ōoy obho ạbhagharana kua, “Odi ozil tẸnaan.” ¹⁸Pạruula aJu obho irue ḍio momōruōm oghōl odi ōoy obho nạarol ghạ mikpom ariḍien molo nạmiin siibha ninii ịteeny men obho eedi neebheleghi mọde nꞌoniin ōoy obho iru, ¹⁹keḍio eedi ipuruan kua zeedi, “Oobho ọony enyina? Enyina ighōl ụmaram odi mikpom ariḍien, kuḍighi ẹko kodi nạmiin siibha bho?” ²⁰Keḍio ọde nꞌoniin obho ịbhagharana kua, “Oomo ạar obho ezōor ulōghōm, odi ọony ezōor, ụmaram odi mikpom ariḍien. ²¹Ezōor ulōghōm io mạar olo aḍighi siibha kodi nạmiin mạar. Ezōor ulōghōm io nạ mobo ạkparion riḍien odi. Ipuruan odi, odi naagbẹbh mōoy, odi tatue ni ạpagharana nꞌalōor odi!” ²²Ọde nꞌoniin obhꞌodi ịbhagharana kua tebum obho eedi neekiil mạruula aJu obho, eedi nẹelogh molōgh molo kōoy kōoy olo ạgba mesi mạJizos aKraist obho, potughuneen odi tọlogh arōoy otu ịtughumiom obho. ²³Pạar obho ọde nꞌoniin odi ighōl maa, “Odi naagbẹbh mōoy, ipuruan zodi.”

²⁴Keḍio eedi imina ibheleghi mogbẹbhiōm ịzal amen mōoy obho ụmaram ikpom ariḍien obho ịkpete kua ịnogho zodi, “Nonon tạnyu mạgba magey obho. Ezōor noolōghōm mobho ōoy obhobho aru moḍighi mịkarabh.” ²⁵Pōoy obho amulumian kua, “Ạami ulōghōm io merumolo odi aru moḍighi mịkarabh, nꞌerumolo odi otu ḍio moḍighi mịkarabh. Onyiin ạar be bho ạami ulōghōm: ạami ụrol mikpom ariḍien, keḍio esiibha bho ạami nạmiin.” ²⁶Eedi ipuruan zodi, “Odi aḍighi ẹko zịna? Odi ạkparion ẹko riḍien onuma?” ²⁷Odi ạbhagharana kua, “Ạami nạagba ạnogho zenyina, keḍio enyina imōruōm io. Ebum eeghe kenyina digha epuruan zạmi? Enyina nẹva nạ motẹn obo nẹtuonuman zodi gạ?” ²⁸Peedi ịkpete zodi ịpue ighōl kua, “Fịa, ạna obo nạtuonuman mōoy opopo. Ezōor nọtuonuman maMozis. ²⁹Ezōor noolōghōm mobho Ẹnaan kạkpete ạnogho maMozis. Oōy opopo, tạa, ezōor ulōghōm nạ ḍio mesi odi ạḍua aru!” ³⁰Podi ōoy obho ạbhagharana kua, “Ẹhe, iibha pọkpo ilo enyina nẹkpeteey! Enyina ilōghōm io mesi odi ạḍua aru, keḍio odi ạkparion riḍien ạmi! ³¹Ezira noolōghōm mobho Ẹnaan ọmoghon ghạ ḍio moghōrōkō oḍighi mịkarabh. Odi nạmoghon ghạ moghōrōkō arōoy ilo nekiilaan odi, neḍighi nạ mibha odi nạva zeedi moḍighi obho. ³²Oomo ẹmar-arōoy obho amute, dọmoghon io mōoy molo ạkparion riḍien ōoy olo ụmaram ikpom ariḍien. ³³Tughuneen molo odi ōoy opopo ạḍua tẸnaan aru ḍio, odi orue ḍio aḍighi bọbon ạar.” ³⁴Peedi imulumian kua zodi, “Ụmar ạna, uukō ạna mi tịkarabh — keḍio ạna ku natu mọtughumiom ezōor?” Peedi itughuneen zodi tọlogh arōoy ịtughumiom obho.

Ikpom ariḍien ilꞌạruumugh

³⁵ẠJizos nạamoghon mobho eedi neetughuneen zodi. Odi ạmiin zodi, pạkpete kua, “Ạna amōruōm mỌony Oōy obho gạ?” ³⁶Keḍio odi ōoy obho ạbhagharana kua, “Obo upu ạami, odi kokōr ōoy? Gbạ mạnogho zạmi molo ạami amōruōm ạni zodi!” ³⁷Keḍio ạJizos ạbhagharana kua zodi, “Ạna nạamiin zodi atẹnẹ, odi pobo bho nꞌạna nọḍeghe obho.” ³⁸Podi ōoy obho agbuluman taghisigh tạJizos aghōl kua, “Ạami naamōruōm, Obumọogh.”

³⁹PạJizos ạkpete kua ạnogho zodi, “Ạami uru tẹmar-arōoy obho mọru ịiruan, molo arōoy ikpom ariḍien ẹmiin mạar, obo bho nẹmiin obho etu mikpom ariḍien.” ⁴⁰Ẹde arōoy aFarisi obho ịrol ạni obho, ịmoghon mibha odi ạkpete bho, pipuruan kua zodi, “Ariḍien obho tezōor ẹko ikpom?” ⁴¹Keḍio ạJizos tạpagharana kua, “Ariḍien enyina ịkparanu ni bọ, kukōl enyina kilōghōma ḍio mịkarabh enyina: suo enyina meghōl menyina nẹmiin mạar obho, ịkarabh obhꞌenyina idi nꞌenyina.”

Asidōgh otu ạraana bho

¹“Agey nạ ni, ōoy olo ọḅol io tọnu-otu obho aḍigh totu ạraana bho, obho apẹl tọnon esi aḍigh, pạghi momiigh, odi ọḅa. ²Obo bho ạḅol bọ tọnu-otu obho kaḍigh obho, pookō rạana bho. ³Oḅōrō meguugh obho aghuuron ạnogho zodi. Odi abheleghi mạkar ạraana obhꞌodi, pịmoghonyan oghōrōkō odi, nẹtuonuman zodi nemute. ⁴Odi naamutiom zeedi, odi tatẹnom taghisigh, keḍio ạraana bho tẹtuonuman zodi, tibha eedi neelōghōm moghōrōkō odi obho. ⁵Eedi ịtuonuman io mọnon ōoy. Kpẹlen nꞌọtuonuman, eedi tekiil ni ẹḍua mi todi, tẹzo bho eedi ilōghōm io moghōrōkō odi obho.”

⁶ẠJizos adōgh sidōgh obhobho ạnogho zeedi, keḍio eedi irue ḍio mọmoghonyan odi.

ẠJizos obꞌooḅi ookō rạana bho

⁷PạJizos amina ạkpete kua, “Agey nạ ni, ạami ọnu-otu ạraana bho. ⁸Oomo obo bho ibhira iru ạami obho, iru momiigh, eedi ạruḅa. Ạraana bho ẹkona ịmoghonyan io zeedi. ⁹Ạami eguugh obho. Kōoy kōoy olo ạḍua tạmi kaḍigh taḍum ni. ¹⁰Ọḅa bho aru momiigh, nꞌọpueghi, nꞌọze be. Ạami uru molo eedi kẹteeny ghuḍum, aghuḍum olo agbẹbh ni ạman.

¹¹“Ạami obꞌooḅi ookō rạana bho. Obꞌooḅi ookō rạana bho nạamara moomo amen mọbhuanaan ạraana bho. ¹²Oōy obho nọkpe ni obho, odi oru ḍio mookō rạana bho nꞌạraana bho itu ḍio nạ milꞌodi obho nạ, amen ọkurunuma natu, podi ọḅele ạraana bho oghiil ọḍua, molo ọkurunuma bho kabhumogh mạraana bho kạazarami. ¹³Oōy obho nọkpe ni obho takiil ni ạḍua mebum obho nọkpe ni zodi beinaan obho, odi oonon io mạraana bho. ^14,15Ạami obꞌooḅi ookō rạana bho. Ẹzo bho Ọde ạmi alōghōm ạami keḍio ạami ulōghōm nạ mỌde bho, pẹzo ạami ulōghōm ạraana bhꞌạmi, eedi ilōghōm nạ zạmi. Ạami nạamara nạ mọbhuanaan eedi. ¹⁶Ạami ạteeny ịnon ạraana ilo ilo ạni tesuo otu ạraana bho. Ạami tapin nạ ni zeedi atu, eedi tẹmoghonyan ni moghōrōkō ạmi, molo oomo eedi etu monyiin ọlogh ạraana ilꞌonyiin ookō rạana.

¹⁷“Ọde bho atulan ạami kua mebum obho ạami nạamara mosarana aghuḍum ạmi obho, molo ạami kamina kabhin. ¹⁸Oōy olo tạseghe maghuḍum ạmi mi tạvo ạmi olo. Ạami ụutua tologhi ạmi ạnogho kua be mịkpo. Ạami ạteeny ni mịnyaam nꞌẹmoogh olo ọnogho nꞌolo omina ọseghe. Iibha pibha Ọde ạmi ạto ạnogho zạmi moḍighi.”

¹⁹Tiibha bho ẹkona arōoy aJu imina ni ẹḍian mebum ọnuekpete bhibha. ²⁰Ọlogh eedi nẹkpete kua, “Ebum eeghe kenyina nẹmoghonyan odi? Odi nạateeny mọkarabh ẹmugh. Odi nạtaal.” ²¹Ipedi obho nẹkpete kua, “Oōy olo ạteeny mọkarabh ẹmugh ọkpete ḍio miibha. Ọkarabh ẹmugh nạakparion ghạ mikpom ariḍien ōoy?”

Arōoy aJu obho ighel ni mạJizos

²²Amen ẹzaal oḍighi alōor ọneghemi aru ạteeny taJerusạlẹm. Amen opopo ọnuur. ²³ẠJizos odi totu iikpulughu obho natele tạpe ẹtolom tạSolomon, ²⁴parōoy aJu obho iikōbhōghian ikō zodi ikiton ịkpete kua, “Okōr amen kạna ạkar ạgba magey obho ạnogho zezōor? Kạr ạgba magey obho. Ạna podi aKraist obho bẹlee?” ²⁵Keḍio ạJizos ạbhagharana kua, “Ạami nạagba ghạ ạnogho zenyina, keḍio enyina imōruōm io zạmi. Ariḍighi obho ạami ubhinom ịnyaam tỌde ạmi uḍighi obho nẹgba ạami emutiom, ²⁶keḍio enyina imōruōm io tebum obho enyina itu ḍio mạraana ạmi obho. ²⁷Ạraana obhꞌạmi nẹmoghonyan moghōrōkō ạmi. Ạami naalōghōm zeedi, keḍio eedi nẹtuonuman zạmi. ²⁸Ạami nạanogho zeedi maghuḍum olo ikunughi olo, eedi ịbho mu; keḍio ōoy olo tatue aḅum zeedi ạḅirogh tạravo ạmi olo. ²⁹Ibha Ọde ạmi ạnogho ạami obho ipu moomo eedi, keḍio bọbon ōoy olo tatue ni aḅum zeedi ạḅirogh mi talaakō bhꞌỌde bho olo. ³⁰Ọde bho nꞌạami onyiin.”

³¹Parōoy aJu obho imina iikpo mikpo morōḅōl odi. ³²PạJizos ạkpete kua ạnogho zeedi, “Ạami naaḍighi mịkanya oḍighi iiḅi olo Ọde bho ạnogho ạami moḍighi tasumusigh enyina. Tiibha bho koḍighen mobho enyina ịtuan netu morōḅōl ạmi?” ³³Parōoy aJu obho imulumian kua zodi, “Ezōor ụva ḍio morōḅōl onuma tebum oḍighi iiḅi olo ạna uḍighi, ezōor totōḅōl ạna tebum obho ạna ụupu mẸnaan. Ạna ōoy, keḍio ạna nạaseghe lōor onuma nạgbaaneni mẸnaan!” ³⁴Keḍio ạJizos ạbhagharana kua, “Nọokar ọge taraalōgh obhꞌenyina mẸnaan aghōl kua, ‘Enyina Ẹnaan.’ ³⁵Ezōor moolōghōm mobho ibha ẹegia bho ạkpete bho iru magey kamen kamen, keḍio Ẹnaan abheleghi zeedi meedi Ẹnaan, arōoy obho odi ạnogho dōm obho. ³⁶Ạami, Ọde bho kạson ạseghe, keḍio arōm ạami aru tẹmar-arōoy obho. Siibha bho kimute ẹko kenyina nekōl mạami nạapu mẸnaan, mebum obho ạami ughōl ạami Ọony tẸnaan? ³⁷Ímōruōm ghạ zạmi, erumolo ạami uḍighi ḍio moḍighi tỌde bhꞌạmi. ³⁸Kerumolo ạami naḍighi moḍighi obhꞌodi, enyina imōruōm io ạami ẹkona, enyina kimōruōm ni moḍighi obho ạami naḍighi obho, penyina nạ kịkar elōghōm monyiin amen mobho Ọde ạmi odi nꞌạami, ạami odi nꞌỌde ạmi.”

³⁹Peedi imina iru moḅol odi. Odi amuzaan ni ạḍua tạravo eedi.

⁴⁰Keḍio ạJizos amula ạghi ạḅeeny mọbhiiny obhꞌạJodan mi tesi obho ạJon azuoghom ghạ rụmuum rōoy obho, keḍio odi ạrol epa. ⁴¹Ọlogh arōoy iru todi. Eedi nẹekpete kua, “ẠJon oḍighi ḍio moḍighi ibꞌaruugu, keḍio oomo ọkpo bho odi ạgba milꞌōoy obhobho agey.” ⁴²Pịkanya arōoy mi todi esi obho imōruōm zodi.

Ọbho tạLazaros

¹Oōy olo ughōl Lạzaros, olꞌạBetani, nạnwe, alōor ọneghe ḍio. ẠBetani pẹma taMeri nꞌạMata ụmarani odi. ²AMeri obhobho pobo bho azuom asike Obạmọogh obho melo, keḍio ạseghe mạsilaan ẹmu odi agbulom. ẠLazaros umōr odi, obo bho alōor naḍighi obho. ³Ạburumarani obho irōm dōm ịghiom mạJizos, “Obumọogh, alōor naḍighi mọbulol onuma.” ⁴Amen ạJizos ạmoghon, paghōl kua, “Ẹzegh bhibha tạLazaros, ilo odi kạbho ḍio, ilo ọnogho eghuan mẸnaan, molo Ọony obho tẸnaan tapin nạ meghuan.”

⁵ẠJizos atulan mạMata nꞌụmarani odi, nꞌạLazaros. ⁶Amen odi ạmoghon dōm obho malōor tạLazaros ọneghe ḍio, podi ạrol mịnon ịzal aḍuma mi tesi obho odi odi obho. ⁷Keḍio odi ạkpete kua ạnogho mobo bho nẹtuonuman zodi obho, “Itu ọghi taJudia.” ⁸Eedi neeghōl kua, “Obo ịtughumiom, ạna digha atu mọghi taJudia, arōoy aJu obho siru morōḅōl onuma men obho ạna ụrol epa bho?” ⁹PạJizos ạkpete kua, “Aḍiōbh nꞌịzal asuo ḍio mibha idi tẹmu aḍuma? Molo erumolo ōoy arele mi togbo ootaany odi okpetaan io, tebum obho odi nạmiinom mẹḅaal ẹmar-arōoy obho. ¹⁰Kerumolo odi arele tọkinim podi okpetaan, tebum obho ẹḅaal olo todi obho.” ¹¹ẠJizos ạkpete miibha bho, pamina ạḅaram kua, “ẠLazaros ọbulol ezira naameel nakoḍi. Ạami tạki ni ạsumeen zodi.” ¹²Pobo bho nẹtuonuman zodi obho ịbhagharana kua, “Erumolo odi nakoḍi, Obumọogh, sodi taḍum ni.” ¹³ẠJizos ni dụgh pi nạgba mibha ạLazaros nạabho. Eedi ighōdi odi nakōl moobho ạrala. ¹⁴Keḍio ạJizos tạgba amutiom ạnogho zeedi, “ẠLazaros nạabho. ¹⁵Tebum enyina ologhi ạmi nạḅaal magey mobho ạami ụtolan io zodi, ilo enyina kemōruōm. Idia ọghi todi.” ¹⁶ẠTomos (obho ughōl bọ Ụmar Ịzal obho) ạkpete kua ạnogho mipedi iteledōm obho, “Itu oomo ezira ọtuonuman mōoy ịtughumiom obho ọghi, molo erumolo iizuan ezira ọpuom ạni nꞌodi.”

ẠJizos ọbho-oḅetunu obho nꞌaghuḍum obho

¹⁷Amen ạJizos ạghi asi tạBetani, podi ạmoghon mạLazaros nạabho oḍi inya aḍuma etẹn. ¹⁸ẠBetani ogbeeny io mọḍua taJerusạlẹm ọghi, ¹⁹molo ọlogh arōoy aJu obho meeru mọkunu ọnogho ạMata nꞌaMeri obho umōr eedi ạbho bho.

²⁰Amen ạMata ạmoghon mạJizos natu, podi aghiil ạghi mọmiinan odi. AMeri ạrol totu. ²¹Keḍio ạMata ạkpete kua ạnogho mạJizos, “Obumọogh, ạna ụrol suo bọ, umōr obhꞌạmi kụpo ḍio! ²²Keḍio oomo ipa ẹkona, ạami naalōghōm mobho kạar kạar olo ạna ugbẹel mẸnaan, odi tạnogho ni zịna.” ²³Keḍio ạJizos ạgba ạnogho zodi, “Umōr onuma tamula ni aḅetunu taghuḍum.” ²⁴Podi amulumian kua, “Ạami naalōghōm mobho odi taḅetunu ni ạteeny ghuḍum mi tikunughi aḍuma bho.” ²⁵Keḍio ạJizos ạkpete kua ạnogho zodi, “Ạami pọbho-oḅetunu obho nꞌaghuḍum obho. Kōoy kōoy olo amōruōm ạami, odi ạbho nạ ni ẹkona, taḍum ni. ²⁶Obo bho odi ni taghuḍum obho kamōruōm ạami, odi ọbho mu. Ạna amōruōm miibha bho gạ?” ²⁷Podi ạbhagharana kua, “Ii, Obumọogh. Ạami naamōruōm mobho ạna uru maKraist Ọony tẸnaan obho, obho tatu bọ mi tẹmar-arōoy obho.”

ẠJizos aleghe

²⁸Odi ạMata ạkpete kua ạḅele, podi ạghi ạgba kua ạnogho maMeri ụmarani odi, “Obo ịtughumiom obho naaru, napuruan zịna.” ²⁹Amen aMeri ạmoghon kua podi akẹm aghiil ạghi mọmiinan odi. ³⁰(Odi ạJizos dosi ḍio tẹma bho, odi nini tesi obho ạMata aru ạmiinan zodi obho.) ³¹Arōoy aJu obho iru bọ mipeleghian obho idi bọ nꞌaMeri obho ighiil nẹtuonuman men eedi ịmiin mobho odi aghiil namute bho. Eedi ighōdi odi digha ạki toogu obho moleghe.

³²Amen aMeri aru asi tạJizos, pagbuluman tasike odi, ạkpete kua, “Obumọogh, ạna ụrol suo bọ, umōr obhꞌạmi kụpo ḍio!” ³³ẠJizos ạmiin mẹzo bho odi naleghe obho, nꞌarōoy aJu obho ịtuonuman odi iru obho neleghe nạ obho, pikul mologhi odi molo ạghusan isibh odi magey. ³⁴Keḍio odi apuruan kua, “Enyina iḍi zodi teḍighen?” Eedi ịbhagharana kua, “Tue mạmiin, Obumọogh.” ³⁵PạJizos aleghe. ³⁶Parōoy aJu obho ịkpete kua, “Ịmiin ẹzo odi atulan zodi.” ³⁷Pẹde eedi ịkpete kua, “Odi ạkparion mariḍien ōoy ikpom ariḍien obho, iben gạ? Odi kutue ḍio aḍighi molo odi kụpo ḍio gạ?”

Uḅẹtōn ạLazaros tọbho bho

³⁸Ẹzo bho imina ikul mologhi odi obho, podi ạghi toogu obho — oogu obho epōgh teegum ạrubharakpar nꞌọbharakpar tọnu obho. ³⁹PạJizos aghōl kua, “Ịseghe mọbharakpar obho metughuneen.” ẠMata ụmarani ōoy obho ạbho bho aghōl kua, “Obumọogh, tapur ni mịkanya siibha bho. Uḍi zodi inya aḍuma neetẹn.” ⁴⁰Keḍio ạJizos ạkpete kua ạnogho zodi, “Ạami dọgba ḍio ạnogho ạna aghōl ạna tạmiin ni meghuan obho tẸnaan, erumolo ạna umōruōm?” ⁴¹Keḍio eedi iru itughuneen mọbharakpar obho. Keḍio ạJizos aanon tạnyu aakpulughu ạkpete kua, “Ạami nạsebh ạna Ọde bho, mibha ạna nạmoghonyan ạami obho. ⁴²Ạami naalōghōm mobho ạna nạmoghonyan ghạ ni zạmi moomo amen, oomo ipa ẹkona, ạami nạkpete miibha bho mebum arōoy obho idi bọ suo bho, molo eedi kemōruōm mobho ạna kurōm ạami uru.” ⁴³Odi aakpulughu ạḅele kua be podi ạlaal abheleghi maa, “Lạzaros, mute maru!” ⁴⁴Podi obo ạbho bho amute aru, nꞌẹzo bho ụghoroghi mạravo nꞌasike bho mi toogu obho, nꞌọnon ukpe olo ukinighiom taghisigh obho. Keḍio ạJizos ạkpete ạnogho zeedi, “Ịkorion zodi odi aghẹel.”

Ezue olo oghigh ạJizos

⁴⁵Ịkanya arōoy aJu obho iru mobheleghian aMeri obho, ịmiin mibha ạJizos aḍighi obho, pimōruōm zodi. ⁴⁶Pẹtede eedi imula ịghi ịgba mibha ạJizos aḍighi obho ịnogho marōoy aFarisi obho. ⁴⁷Parōoy aFarisi obho nꞌaruvẹmụ iḅo miiḅua bho iikōbhōghian iḍigh mezue ịkpete kua, “Ezira toḍighi ẹko? Oōy obhobho naḍighi mịkanya oḍighi ibꞌaruugu. ⁴⁸Ezira ọḅelemaan kua zodi, poomo arōoy obho oghiraan omōruōm odi, molo ạruula aRom tetu ni ẹeḅaghami zezira, ẹekpo motu iikpulughu obhꞌezira, nꞌoomo ebhugh obhꞌezira!” ⁴⁹Onyiin eedi, ōoy olo ughōl Kạyafas, uvẹmụ iḅo miiḅua bho mạla popo, nạakpete kua, “Bọbon ạar olo enyina ilōghōm olo! ⁵⁰Enyina ilōghōm io mobho onyiin ōoy mọbho ọnogho oomo arōoy obho ịneghe ni ipu molo oomo ebhugh obho kọbhozu?” ⁵¹(Odi ni dụgh, odi nꞌalōor odi kọkar io nạgba miibha bho. Ẹzo bho odi aru muvẹmụ oḅo miiḅua bho mạla popo bho kiḍighi molo odi ạmiin nạgba mibha ạJizos tạpo ni mebum arōoy aJu obho. ⁵²Milo ebum eedi be nạ ḍio, ilo ookōbhōghi nạ oomo ạnwuny obho tẸnaan ibha nẹezaranu obho, obhin oru tonyiin esi.) ⁵³Ạseghe ḍuma popo ạghi taghisigh, pạruula aJu obho ịke moḍigh ezue mọva ẹzo olo oghigh ạJizos. ⁵⁴PạJizos ạḅele momutiom alōor odi mi taJu, ạḍua ạghi tebhugh olo atuan tobꞌeekpu eḍum ọosaar, mi tẹma olo ughōl Ifraim, molo odi nꞌiteledōm odi ịrol tepa.

⁵⁵Aḍuma ẹzaal Opẹl-Otẹn obhꞌaJu obho naatuan, keḍio ọlogh arōoy mi toomo ạraama bho ịghi taJerusạlẹm, eedi neeru moḍighi alōor ọneghemi ku kạteeny maḍuma ẹzaal obho. ⁵⁶Eedi nẹva mạJizos molo, suo eedi iikōbhōghian totu iikpulughu obho, ponyiin napuruan ghạ monyiin, “Ạna nạatua ẹko? Ạna nakōl odi orue ḍio aru tẹzaal obho gạ?” ⁵⁷Aruvẹmụ iḅo miiḅua bho nꞌarōoy aFarisi obho nẹelaal okpokpo, mu kōoy kōoy olo alōghōm mesi olo ạJizos odi paru ạgba molo eedi ẹki eḅol odi.

Usigh elo mạJizos tạBetani

¹Odiin aḍuma isughō maḍuma ẹzaal Opẹl-Otẹn obho, pạJizos ạghi tạBetani, ẹma tạLazaros obho ạJizos aḅẹtōn mi tọbho bho. ²Eedi ịsaanaan zodi meḍian. ẠMata pobo ẹbhirima, ạLazaros nꞌạJizos nele. ³PaMeri ạseghe moomo okōtō elo olo ughōl “ạnad”, olo ạla mạar, azuom tasike tạJizos, ạseghe mạsilaan ẹmu odi agbulom. Eḍu elo bho ịkunu ibhule moomo otu obho. ⁴Ponyiin oteledōm tạJizos, obho ughōl Judas Ịskariot — odi pobo bho aḅool bọ mạJizos obho — ạkpete kua, ⁵“Ebum eeghe ku nopiẹmi melo bhobho kuḅool mịkanya ikpoki, ọseghe mikpoki obho ọnogho maruvekulom obho?” ⁶Odi ọkpete ḍio kua mebum obho odi atulan maruvekulom obho. Odi ọḅa. Odi nạpam mẹḅa ikpoki obho — keḍio odi nạpela ghạ lōor odi suo. ⁷PạJizos ạkpete kua, “Ḅẹlemaan zodi. Ḅẹle odi aseeri mibha odi ạteeny obho milo aḍuma amaḍi obhꞌạmi. ⁸Aruvekulom obho idi nꞌenyina moomo amen. Ạami nꞌenyina ụrolan io moomo amen.”

Ezue olo oghigh ạLazaros

⁹Obꞌọlogh arōoy aJu obho, amen eedi ịmoghon mạJizos odi tạBetani, peedi iḍumaan itẹn ịghi. Eedi ịghi ḍio mọmiin ạJizos be, iru nạ mọmiin ạni ạLazaros obho ạJizos aḅẹtōn tọbho bho. ¹⁰Paruvẹmụ iḅo miiḅua bho iḍikuan mezue olo oghighom ạni ạLazaros, ¹¹tebum obho ọlogh arōoy aJu obho nẹeḍuaghu nemōruōm mạJizos tebum odi.

Ụsaram igiri mạJizos ọloghom taJerusạlẹm

¹²Ạḅaal, peedi obꞌọlogh arōoy obho iru mole ẹzaal Opẹl-Otẹn obho ịmoghon mobho ạJizos natu taJerusạlẹm, ¹³peedi iigbooy masigo arale, ịsar ịghi mọmiinan odi, nẹmoor emulughu,

“Ịsebh Ẹnaan! Ạlisebh ẹrol ẹnogho zodi obo bho natu mi taḍien tẸnaan obho!

Ẹnaan ạsebh ni mỌolema bhꞌIzirẹl.”

¹⁴ẠJizos nạamiin mọony ạsu, podi ạsiin tạnyu odi nakiilom, kẹzo bho ẹegia bho ạgba bho,

¹⁵“Enyina ẹma bhꞌạZayon ighiil ghạ ruugu.

Ọolema enyina natu,

nakiilom mọony ạsu.”

¹⁶Tamen opopo, obo bho nẹtuonuman zodi obho ịmoghonyan io miibha bho. Nọonogho mạJizos meghuan obho keḍio eedi igbi mọotua olōghōm mobho ẹegia bho ịgba miibha bho milꞌodi, nꞌobho eedi iḍighi miibha bho mebum odi.

¹⁷Obꞌọlogh arōoy obho ịrol ạni men obho ạJizos abheleghi mạLazaros mi tologhi oogu obho kaḅẹtōn zodi mi tọbho bho, nẹegba mibha imute obho. ¹⁸Pạar obho ọlogh arōoy obho ịghi ịsaram zodi obho — eedi nẹemoghon mobꞌoḍighi ibꞌaruugu obho odi aḍighi obho. ¹⁹Parōoy aFarisi obho onyiin nạḍeghe ạnogho monyiin, “Enyina nẹmiin, ezira umuzaan io bọbon ịbam. Iinon, oomo ẹmar-arōoy obho nẹtuonuman zodi!”

Ẹde arōoy aGris ịva mạJizos

²⁰Ẹde arōoy aGris ịghi ạni mi taJerusạlẹm mookpulughu tamen ẹzaal obho. ²¹Eedi iru taFilip (odi olꞌaBetsaida, ẹma tebhugh aGalili) keḍio ịkpete kua, “Obo upu ezōor, ezōor nọva mọmiin ạJizos.” ²²PaFilip ạghi ạgba ạnogho mẠndru, keḍio ịzal eedi ịghi tạJizos. ²³PạJizos ạbhagharana kua zeedi, “Amen obho tọnogho migbōgh eghuan mỌony Oōy obho nạateeny. ²⁴Ạami nạgba magey obho nạnogho enyina: ekpo ọbiakpa onyiin odi be tạtol tughuneen molo odi aḍigh tade bho ạbho ḍio. Erumolo odi ạbho, podi omutiom ịnon ịkanya itu ịbiakpa. ²⁵Obo bho atulan ghuḍum odi obho tapiẹmi ni; obo bho ạlogh ḍien ghuḍum obhꞌodi mi tẹmar-arōoy obhobho taakō ni aseeri ạteeny maghuḍum obho ikunughi olo bho. ²⁶Oōy olo nạva moḍighian ạmi moḍighi tạtuonuman ni zạmi molo kesi kesi olo ạami tạtol odi tạtol ạni ni. Ọde ạmi taabhughumi zodi obo bho taḍighian ạami moḍighi obho.”

ẠJizos ạkpete agboloman mọbho odi

²⁷“Esiibha bho ologhi ạmi nakpooy — kạami tạkpete meeghe? Ạami takōl kua, ‘Ọde, umōrō ghạ ọmiinom obhobho aru ạteeny ạami’ gạ? Sạami ụtuan iibha karu, moḍigh tamen ọmiinom obhobho. ²⁸Ọde, kueni ḍien obho tonuma.” Poghōrōkō ạḍua tạnyu obho aru, aghōl kua, “Ạami naaghueni, ạami tamina ni akueni.”

²⁹Ọlogh arōoy obho ịrol ạni tesi obho ịmoghon, pighōl kua, “Aḍio bho nagumughu ni!” Ẹtede ighōl kua, “Otelema tẸnaan ạḍeghe ạnogho zodi.” ³⁰PạJizos ạkpete kua ạnogho zeedi, “Oghōrōkō bhobho ọkpete ḍio mebum ạmi, ạtuan enyina. ³¹Esiibha bho pamen ọru ịiruan ọnogho ẹmar-arōoy obho; esiibha bho notu mosōorẹ ọdaam-ẹma ẹmar-arōoy obho. ³²Amen olo nọosiine zạmi tạnyu mi tesuo ade bho, pạami ọnyagh oomo arōoy keru tạmi.” ³³(Tọnuekpete bhobho odi nạgba moḍigh ọbho obho odi natu mọmiinom obho.) ³⁴Ọlogh arōoy obho ịbhagharana kua, “Araalōgh obho tezōor ịgba kua ẹnogho ezōor maKraist obho taḍum ni ạtol kamen kamen. Eeghe aḍighi siibha bho kạna nakōl mu toḅẹtōn ni mỌony Oōy obho ọsiine tạnyu? Okōr ōoy zodi Ọony Oōy obho?” ³⁵Keḍio ạJizos ạbhagharana kua, “Ẹḅaal obho tạtolan ni zenyina mịbam amen. Ịmaar ẹrol mẹghi taghisigh suo enyina idi ni tẹḅaal obho, molo ọkinim obho otu ḍio ạteeny enyina, tebum obho obo bho natele tọkinim obho olōghōm io mesi odi nạki. ³⁶Imōruōm mẹḅaal obho, siibha bho enyina ịteeny mẹḅaal obho, molo enyina etu marōoy ẹḅaal obho.”

Okunya omōruōm arōoy aJu obho

ẠJizos ạkpete kua ạḅele be podi ạḅele zeedi ạḍua ạghi ạḅokia zeedi. ³⁷Oomꞌibha odi naaḍighi moḍighi ibꞌaruugu ilo ileeny kua mi tasumusigh eedi obho, eedi imōruōm io zodi, ³⁸molo ibha Ạizaya ozil obho ạgba bho iru magey,

“Obumọogh, okōr ōoy obo naamōruōm dōm obho ezōor ụgba bho.

Tokōr ōoy mobho Obạmọogh obho naḍeeriom mịnyaam obho todi?”

³⁹Tebum iibha bẹleni, eedi irue ḍio momōruōm, tẹzo Ạizaya ẹkona amina ạkpete kua,

⁴⁰“Ẹnaan naaḍue riḍien obhꞌeedi.

Odi naakpereghi mịitua obhꞌeedi,

molo ariḍien obhꞌeedi ịmiin io mạar,

ịitua eedi irue ḍio mọmoghonyan,

molo eedi ikiraan io eru tạmi,

molo ạami kaakō zeedi.”

⁴¹Ạizaya ạkpete miibha bho tebum obho odi ạmiin meghuan obho tạJizos, keḍio odi ạgba mibhꞌodi.

⁴²Oomo ipa ẹkona, ọlogh ạruula aJu obho emōruōm mạJizos, keḍio ịkpete ḍio emutiom mozōol mebum arōoy aFarisi obho, molo upirighan io zeedi omutiom mi tarutu ịtughumiom obho. ⁴³Eedi nẹva ghạ mạlisebh tarōoy, ibha tẸnaan eedi ịva ḍio.

Ọnuekpete tạJizos tẹtu mịiruan

⁴⁴Keḍio ạJizos ạkpete amutiom nꞌobꞌoghōrōkō, “Kōoy kōoy olo amōruōm zạmi, omōruōm io zạmi be, amōruōm nạ mobo bho arōm zạmi obho. ⁴⁵Kōoy kōoy olo nạamiin ạami, nạamiin nạ zodi obo bho arōm ạami aru obho. ⁴⁶Ạami naaru tẹmar-arōoy obho kẹḅaal, molo kōoy kōoy olo amōruōm ạami orele mu tọkinim. ⁴⁷Obo bho ạmoghon bọ dōm obho tạmi komōrō ḍio moḍighi, ạami ụtu ḍio mịiruan ạnogho zodi. Ạami utu ḍio mọru ịiruan ọnogho ẹmar-arōoy obho, ạami uru mọbhel. ⁴⁸Oōy olo aghel ạami agin dōm obhꞌạmi, odi nạateeny mobo tasōbh rạakpe bho ạnogho zodi. Ọnuekpete obho ạami nạakpete bho tetu mobo bho tasōbh rạakpe bho ạnogho zodi mi taḍuma ikunughi obho. ⁴⁹Ii, tebum obho ạami dọkpete ḍio milꞌalōor ạmi, Ọde bho kạgba ạnogho ạami milo ạami kạkpete nꞌọgba. ⁵⁰Ạami naalōghōm mobho ibha odi ạkpete bho nepin ghạ etu maghuḍum olo kamen kamen. Ibha ạami ụḍeghe bho pibha Ọde bho ạkpete ạnogho ạami mọḍeghe.”

ẠJizos aatōl masike iteledōm odi

¹Siibha bho, ạḅaal paḍuma ẹzaal Opẹl-Otẹn obho. ẠJizos naalōghōm mobho amen obho odi kạḍua tẹmar-arōoy obho kạghi tỌde bho nạateeny. Odi naatulan moomo amen mobo bho iru bọ milꞌodi mi tesuo ẹmar-arōoy obho, keḍio odi atulan nạ zeedi asi tikunughi.

²ẠJizos nꞌiteledōm odi nele meḍian udule. Eru obho kọkanya amen maaḍigh tologhi taJudas ọony tạSaimon Ịskariot molo odi taḅool mạJizos. ³ẠJizos naalōghōm mobho Ẹnaan nạanogho zodi moomo ịnyaam tẹmar-arōoy obho, alōghōm nạ mobho odi ạḍua tẸnaan karu, keḍio odi namula nạ tẸnaan. ⁴PạJizos aḅetunu tizebele bho, ạkporona mạsuoma odi, ạkpua mụnu-ukpe tegum odi, ⁵akōr mụum ạlogh tạbafu, keḍio ạke mootōl asike iteledōm obhꞌodi, ạseghe mụnu-ukpe obho agbulom sike obhꞌeedi. ⁶Amen odi aru tạSaimon Pita, odi naaghōl kua, “Obumọogh, ạna taatōl masike ạmi?” ⁷PạJizos amulumian kua zodi, “Ạna olōghōm io mạar olo ạami naḍighi, enyemen pạna olōghōm.” ⁸APita ạkpete kua, “Tạa, ạna ootōl io masike ạmi!” ẠJizos maa, “Erumolo ạami kuutōl io masike onuma, ạna olꞌạmi mu ḍio.” ⁹APita maa, “Ekua, Obumọogh, puutōl ghạ masike ạmi be, totōlōm nꞌạravo ạmi nꞌẹmu ạmi nạ!” ¹⁰ẠJizos maa, “Odi obo bho naaḅura mụum obho, nạaḅaal ạman, odi ọva mu mootōla tughuneen asike odi ḍio. Oomo enyina nẹeḅaal tughuneen monyiin enyina be.” ¹¹(ẠJizos naalōghōm kọkanya amen mobo bho taḅool zodi obho, pạar obho odi aghōl kua, “Oomo enyina nẹeḅaal, tughuneen monyiin enyina be.”)

¹²Odi aatōl masike obhꞌeedi ạḅele, podi amula ạghi ạseghe mạsuoma odi ạlogha ạrol delede tizebele bho. Keḍio apuruan kua, “Enyina neelōghōm mạar obho ạami ụtuan kuḍighi kua bho? ¹³Enyina ibheleghi zạmi mOōy Ịtughumiom nꞌObạmọogh, keḍio enyina ịpionuman io, pẹzo nạ mobho ạami ụrol. ¹⁴Ạami Obạmọogh nꞌObꞌịtughumiom enyina, keḍio ạami naatōl masike enyina. Enyina ẹkona ịkpe ni molo onyiin kaatōl masike onyiin. ¹⁵Ạami naaḍighi aḍeeriom enyina molo enyina kẹtuugh ẹzo bho nạ keḍighi. ¹⁶Agey nạ ni, ẹbana olo apu mọde otu odi olo; oteledōm olo apu mobo bho arōm zodi dōm obho olo. ¹⁷Esiibha enyina neelōghōm magey obhobho, ọḅaal ologhi tạtol ni ạnogho zenyina magey erumolo enyina ịtuugh iḍighi mẹzo bho.

¹⁸“Ilꞌoomo enyina ḍio mibha ạami nạḍeghe bho. Ạami naalōghōm mobo bho ạami ubheleghi obho. Toḍighi ni omuzeni mibha ẹegia bho ạgba bho,

‘Obo bho ạami ụnogho meḍian obho maakiton akōbh lạagba nạva ạami.’

¹⁹“Ạami nạgba mabaabha bho nạnogho enyina keḍio tegbi momute, molo amen imute enyina emōruōm mobho ‘Ạami uru Zodi.’ ²⁰Agey nạ ni, ōoy olo abhin ạloghom monyiin obo bho ạami urōm obho, pọ naabhin nạ zạmi. Obo bho abhin ạami obho naabhin nạ zodi obo bho arōm ạami obho.”

ẠJizos ạgba aghōl mu toḅool ni zịno

²¹Odi ạkpete kua ạḅele be, pikul mologhi odi, keḍio odi ạkpete kua amutiom, “Agey nạ ni, onyiin enyina nạatua moḅool ạami.” ²²Piteledōm obho iinonan, neemōogh mobo bho odi nakōl obho. ²³Onyiin oteledōm, obho ạJizos atulan obho, ạrol delede atuan mạJizos. ²⁴ẠSaimon Pita nạanwaaghi ạnogho zodi akōl kua, “Puruan zodi mobo bho odi nakōl obho.” ²⁵Podi oteledōm obho atirom atuan mạJizos apuruan kua, “Obumọogh, ạkar okōr ōoy zodi ōoy obho?” ²⁶PạJizos ạbhagharana kua, “Obo bho ạami taḅigh mạbred obho ạtobhori ạnogho bho, podi ōoy obho.” PạJizos aḅigh mạbred ạtobhori ạnogho maJudas, ọony tạSaimon Ịskariot. ²⁷AJudas abhin mạbred obho be, pEru obho aḍigh tẹmu odi. Keḍio ạJizos ạkpete kua ạnogho zodi, “Ibha ạna natu moḍighi obho, kẹm aḍighi!” ²⁸(Bọbon onyiin eedi olo ạmoghonyan mibha ạJizos ạkpete ạnogho zodi moḍighi obho olo. ²⁹Suo aJudas aru mobo bho ạbham bọ mẹḅa ikpoki obho, pẹtede iteledōm obho nẹetua ghạ ekōl mạJizos arōm zodi mọghi oghō ọkpo olo oliom tẹzaal obho, bolobolo ọghi ọnogho ọkpo maruvekulom obho.) ³⁰AJudas naabhin mạbred obho akẹm amute. Aḍio naaghul men obhopo.

Omoon olōgh obho

³¹AJudas amute, pạJizos ạkpete kua, “Esiibha nooḍighi omutiom meghuan Ọony Oōy obho. Todi pesi eghuan tẸnaan nooḍighi nạ umutiom. ³²Erumolo uḍighi meghuan tẸnaan umutiom todi, pẸnaan oḍighi omutiom eghuan Ọony Oōy obho mi todi, odi takẹm ni nạ aḍighi. ³³Ạnwuny ạmi, ạami ụtolan mu zenyina abia. Enyina tẹva ni zạmi, keḍio ạami tạkpete ạnogho enyina kẹzo bho ạami ụkpete ụnogho marōoy aJu obho, ‘Enyina irue ḍio ẹghi tesi obho ạami nạki obho.’ ³⁴Omoom olōgh mobho ạami nạlogh ạnogho zenyina: onyiin atulan monyiin. Ẹzo bho ạami utulan zenyina bho, pẹzo enyina ẹkona onyiin tatulan monyiin. ³⁵Erumolo oomo enyina onyiin atulan monyiin, poomo arōoy olōghōm mobho enyina iru mobo bho nẹtuonuman zạmi obho.”

ẠJizos ạgba aghōl mu aPita tạparanaan ni zịno

³⁶ẠSaimon Pita apuruan kua zodi, “Obumọogh, ạna nạki teḍighen?” PạJizos ạbhagharana kua, “Esiibha ạna orue ḍio ạtuonuman ạami ạghi tesi obho ạami nạki obho, ịbam amen neetẹn pạna orue ọtuonuman ạmi.” ³⁷PaPita apuruan kua, “Obumọogh, ebum eeghe kạami utue ḍio? Ạami nạamara mọbho ebum onuma.” ³⁸PạJizos ạbhagharana kua, “Ạna nạakar ạmara mọbho ebum ạmi? Ạami nạgba kua ạnogho ạna: keḍio ọḅel ọnu ạkenegh tatẹn, ạna nạabharanaan ạami ịraar amen akōl mạna olōghōm io zạmi.”

ẠJizos pebōom ōoy tạḅol ạki tỌde bho

¹ẠJizos ạkpete kua ạnogho zeedi, “Ịítu ghạ, imōruōm mẸnaan, memina memōruōm ạami. ²Ịkanya ạrakpe mobho idi totu Ọde ạmi, molo ạami nạki mookōbhōghia oḅōruōm enyina. Erumolo itu ḍio kua, ạami kụgba ḍio ạnogho enyina. ³Amen ạami nạaghi aḍighi mesi olꞌenyina, pạami tamula ni atu apin enyina ạloghom tạmi, molo esi obho ạmi odi obho pesi enyina tẹtol ạni. ⁴Enyina neelōghōm mebōom esi obho ạami nạḅol nạki obho.” ⁵ẠTomos nạakpete kua ạnogho zodi, “Obumọogh, ezōor ulōghōm io mesi ạna natu mọghi. Ezōor toḍighi ẹko kolōghōm ebōom olo ọghi ạni?” ⁶ẠJizos ạbhagharana kua, “Ạami ebōom nꞌagey nꞌaghuḍum obho. Bọbon ōoy olo tatue asi tỌde bho olo, tughuneen molo odi ạḅol tạmi ḍio. ⁷Suo enyina neelōghōm ạami obho, kōl enyina neelōghōm nạ mỌde ạmi. Siibha bho enyina neelōghōm ạami obho, penyina nẹemiin zodi.”

⁸AFilip aghōl kua, “Obumọogh, ḍeeriom ezōor mỌde bho, pilo mu.” ⁹PạJizos ạbhagharana kua, “Oomo amen obhobho ạami ụrolan enyina bho, keḍio ạna aFilip olōghōm io ạami? Kōoy kōoy olo nạamiin ạami nạamiin mỌde bho nạ. Eeghe kạna digha akōl kua, ‘Ḍeeriom ezōor mỌde bho’? ¹⁰AFilip ạna omōruōm io bẹle mobho ạami odi tỌde bho, nꞌobho Ọde bho odi tạmi? Ọnuekpete obho ạami ụkpete ụnogho enyina bho ịḍua ḍio tạmi kemute. Ọde bho odi tạmi obho naḍighiiy milꞌodi. ¹¹Imōruōm ạami mobho ạami odi tỌde bho, Ọde bho odi tạmi. Ipa ilo, pimōruōm ariḍighi obho tạmi. ¹²Ạami nạgba magey ạnogho zenyina: obo bho amōruōm ạami obho taḍighi ni moḍighi obho ạami naḍighi obho — molo agey, odi taḍighi ni milo tepu miibha, tebum obho ạami nạki tỌde bho. ¹³Ạami taḍighi ni kạar kạar olo enyina igbẹel mi taḍien ạmi, molo okueni mỌde bho mi tỌony obho. ¹⁴Erumolo enyina igbẹel ạami mạar mi taḍien ạmi, ạami taḍighi ni ạnogho zenyina.”

Ẹmugh Iigbia bho Ọde bho tạnogho zenyina

¹⁵“Erumolo enyina itulan ạami, penyina teekō ni maraalōgh obhꞌạmi. ¹⁶Ạami tagbẹel ni mỌde ạmi, molo odi kạnogho zenyina mọnon Ọkuemia, Ẹmugh obho aru bọ magey obho, mọrolan enyina moomo amen. ¹⁷Arōoy ẹmar-arōoy obho irue ḍio ebhin zodi, mebum obho eedi ịmiin io, ilōghōm nạ ḍio zodi obho. Enyina neelōghōm zodi, tebum obho odi odi tenyina, natughan nạ zenyina bho.

¹⁸“Ạami ụḅele ḍio kua zenyina be, ạami tatu ni tenyina. ¹⁹Ịbam amen isughō ẹmar-arōoy obho ịmiin mu zạmi, enyina tẹmiin ni zạmi. Ebum obho ạami odi ni taghuḍum obho, enyina ẹko tẹtol ni taghuḍum. ²⁰Amen tạteeny ḍuma bho, penyina olōghōm oghōl ạami odi tỌde bho, enyina idi tạmi kẹzo bho ạami odi tenyina bho.

²¹“Kōoy kōoy olo abhin maraalōgh obho tạmi kạtuugh aakō zeedi, odi pobo atulan ạami. Ọde bho tạmi tatulan ni zodi obo bho atulan ạami obho. Ạami ẹkona tatulan ni zodi, amutiom lōor ạmi aḍeeriom zodi.” ²²PaJudas (aJudas Ịskariot ḍio) ạkpete kua, “Obumọogh, temute ẹko molo ạna tamutiom lōor onuma aḍeeriom zezōor, omutiom io aḍeeriom marōoy ẹmar-arōoy obho?” ²³ẠJizos ạbhagharana kua, “Kōoy kōoy olo atulan ạami tạtuugh ni aḍighi mibha ạami ụgba tadōm ạmi obho. Ọde ạmi tatulan ni zodi, keḍio Ọde ạmi nꞌạami totu todi ọtolan zodi. ²⁴Obo bho otulan io zạmi obho oghiilaan io moghōrōkō obhꞌạmi. Adōm obho enyina ịmoghon mobho ạami ụgba bho, ilꞌạmi ḍio, ịḍua tỌde bhꞌạmi, obho arōm ạami moru obho.

²⁵“Ạami nạgba mabaabha bho nạnogho zenyina siibha bho ạami odi ni nꞌenyina bho. ²⁶Ọkuemia bho, Ẹmugh Iigbia bho Ọde bho tatōm atu mi taḍien ạmi obho, tạtughumiom zenyina kạar kạar, ạnogho nạ zenyina mologhi ịitua ibha ạami ụgba ụnogho zenyina bho.

²⁷“Ekima pibha ạami nạḅelemaan zenyina. Ạami nạnogho zenyina mekima ibhꞌạmi, ekima ẹmar-arōoy obho ḍio. Ịítu ghạ. Ighiil ghạ nạ ruugu. ²⁸Enyina nẹemoghon mobho ạami ụgba ụnogho zenyina ughōl, ‘Ạami nạḅele zenyina ạḍua, keḍio ạami tamula ni atu tenyina.’ Erumolo enyina itulan ạami bọ, enyina kibo ni mibha ạami nạki tỌde bho, tebum obho odi apu zạmi obho. ²⁹Ạami nạagba mabaabha bho ạnogho zenyina siibha bho demute ḍio bho, molo amen temute enyina emōruōm. ³⁰Ạami usi mu ạdoonyemi siibha bho, tebum obho ọdaam ẹma ẹmar-arōoy obho natu. Ịnyaam ilo odi ạteeny tạmi olo, ³¹keḍio ẹmar-arōoy obho telōghōm ni mobho ạami utulan mỌde bho. Pạar obho ạami nạtuugh aḍighi kạar kạar olo odi aghōl ạami moḍighi.”

“Iḅerenu ọḍua tesuo.”

ẠJizos pạkar egum oorẹeny avain obho

¹“Ạami pạkar egum oorẹeny avain obho, Ọde ạmi pobo bho naakō. ²Odi naḅuni kịgha kịgha ilo idi tạmi ilo ịloki ḍio mitu. Ibha nẹloki mitu bho podi ạmaar aaghō, molo ịmaar iḍum ịloki mọlogh itu. ³Nooḍighi enyina ọḅaaleni mi tadōm obho ạami ụgba ụnogho zenyina bho. ⁴Ịtolan ạami nꞌotul ọnu, pạami ọrolan enyina nꞌotul ọnu. Ọgha oorẹeny orue ḍio ạrol esi olo odi be ạloki mitu, tughuneen molo odi ạrolan tegum obho ḍio. Onyiin ẹzo bho nạ enyina irue ḍio ẹloki mitu tughuneen molo enyina ịrolan ạami ḍio.

⁵“Ạami egum obho, enyina ịgha bho. Kōoy kōoy olo ạrolan ạami, ạami ụrolan todi, tạloki ni mịkanya itu. Olo ạḍua tạmi orue ḍio aḍighi mạar amutiom. ⁶Totōbh ni omutiom zodi obo bho ọtolan io zạmi, kẹzo bho ịgha iirẹeny nemughughu ghạ bho. Ịgha ilo idi kua nookpooy ghạ ni ọlogh tạnyan ọsu. ⁷Erumolo enyina ịrolan zạmi nꞌọnuekpete obho tạmi ịrolan enyina, kạar kạar olo enyina tegbẹel penyina ọteeny. ⁸Pẹzo toḍighi oḍeeriom meghuan obho tỌde ạmi: amen enyina ịloki mịkanya itu. Tẹzo bho nạ penyina oru obo nẹtuonuman zạmi. ⁹Ạami utulan zenyina kẹzo bho Ọde ạmi atulan ạami obho. Ịtol tetulan obho tạmi. ¹⁰Erumolo enyina ịtuugh iḍighi mibha ạami ụkpete ụnogho enyina bho, penyina ọrol tetulan ạmi, kẹzo bho ạami ụtuugh uḍighi mibha Ọde ạmi ạkpete ạnogho ạami obho kạami ụrol tetulan odi obho.

¹¹“Ạami nạagba miibha bho ạnogho zenyina, molo ọḅaal ologhi enyina egbẹbhan. ¹²Oobho olōgh ạmi: onyiin atulan monyiin, kẹzo bho ạami utulan zenyina bho. ¹³Obꞌetulan obho ōoy tạnogho mạburubulol odi, pọnogho aghuḍum odi tebum eedi. ¹⁴Enyina ạburubulol ạmi, erumolo enyina iikō maraalōgh obhꞌạmi. ¹⁵Ạseghe dodon ạghi taghisigh, ạami upeleghi mu zenyina mạnwuny-otu ạmi, tebum obho ọony-otu olōghōm ghạ ḍio mọkpo ilo ọde otu odi naḍighi. Tebum ipa bẹleni, ạami tapeleghi zenyina mạburubulol ạmi, tebum obho ạami nạagba ạnogho zenyina moomo ibha ạami ụmoghon tỌde ạmi obho. ¹⁶Enyina kịson io ạami ẹseghe, ạami kụson zenyina ạseghe molo enyina ẹki ẹloki miiḅi itu, itu ilo tẹkparam ni tọmiinom. PỌde ạmi ọnogho enyina kạar kạar olo enyina tegbẹel zodi mi taḍien ạmi. ¹⁷Oobho polōgh obho ạami nạlogh ạnogho zenyina: onyiin atulan monyiin.”

Ẹmar-arōoy obho tẹlogh ni zenyina ḍien

¹⁸“Erumolo ẹmar-arōoy obho ịlogh zenyina ḍien, ilōghōm meghōl eedi ibhira ịlogh ạami ḍien. ¹⁹Erumolo enyina iru milꞌẹmar-arōoy obho, eedi kitulan ni zenyina kilꞌeedi. Suo ạami naabheleghi zenyina ụseghe tẹmar-arōoy obho, enyina ilo mu milꞌeedi. Iibha pạar obho ẹmar-arōoy obho nẹlogh enyina ḍien obho. ²⁰Ịitua mibha ạami ụgba ụnogho enyina bho: ‘Ọony-otu olo apu mọde otu odi olo.’ Erumolo eedi ịlogh ạami tesi ọmiinom, eedi tẹlogh nạ ni zenyina tesi ọmiinom. Erumolo eedi ighiilaan dōm obhꞌạmi, peedi oghiilaan nạ ibhꞌenyina. ²¹Eedi teḍighi ni moomo ibaabha bho zenyina tebum obho enyina iru milꞌạmi obho, nꞌebum obho eedi ilōghōm io zodi obo bho arōm ạami aru obho. ²²Eedi kilōghōma ḍio mịkarabh obho teedi, ughōl ạami utu ḍio bọ ạgba dōm obho ạnogho zeedi; ẹzo bho idi siibha bho, omina ọgba ọḍua olo eedi tetue ẹgba ẹḍua tịkarabh obho teedi olo. ²³Kōoy kōoy olo nạlogh ạami ḍien, nạlogh nạ mỌde ạmi ḍien. ²⁴Eedi kilōghōma ḍio mịkarabh obho teedi, ughōl ạami utu ḍio aḍighi tasumusigh eedi mariḍighi obho ạami uḍighi obho, ibha ọnon ōoy doḍighi ghạ ḍio bho; tẹzo bho idi obho, eedi mẹemiin mibha ạami uḍighi obho keḍio ịlogh zạmi nꞌỌde ạmi ḍien. ²⁵Tẹtol ni kua molo ibha ụge bọ taraalōgh obho teedi obho etu magey obho, ụkpete kua,

‘Ạkar ạar olo eedi ibhin kịlogh ạami ḍien olo nolo.’

²⁶“Ọkuemia bho tatu ni — Ẹmugh obho aru bọ magey obho, obho tạḍua tỌde bho katu obho. Ạami tatōm odi mi tỌde bho atu, odi tạgba ạami amutiom. ²⁷Enyina ẹkona tẹgbaanaan nạ zạmi, tebum obho enyina ịrolan ạami kọḅel egbiom obho.

¹“Ạami nạagba miibha bho ạnogho zenyina molo enyina imeel io emula tạman. ²Eedi tepirighan ni zenyina emutiom tarutu ịtughumiom obhꞌeedi. Amen natu molo kōoy kōoy olo aghigh monyiin enyina tạatua akōl modi naḍighi moḍighi tẸnaan. ³Eedi teḍighi ni mabaabha zenyina mebum obho eedi ilōghōm io mỌde ạmi nꞌạami obho. ⁴Ạami nạagba miibha bho ạnogho zenyina molo amen obho tatu mobho eedi teḍighi zenyina miibha bho, enyina ẹetua elōghōm mibha ạami nạagba ụnogho zenyina.”

Oḍighi olo Ẹmugh Iigbia bho taḍighi

“Ạami ụgba ḍio miibha bho ạnogho zenyina kọḅel egbiom obho tebum obho ạami odi ni nꞌenyina bho. ⁵Esiibha bho ạami nạki todi obo bho arōm ạami aru obho, keḍio onyiin enyina olo naapuruan ạami aghōl, ‘Ạna nạki teḍighen?’ olo. ⁶Siibha bho ạami nạagba ạnogho zenyina bho, enyina nẹetuuy. ⁷Ạami nạgba magey obho ạnogho zenyina: iiḅi mi tenyina molo ạami kạḅele enyina kạḍua, tebum obho erumolo ạami ụḍua ḍio Ọkuemia bho otu ḍio. Erumolo ạami ụki ḍio, ạami utōm io zodi aru. ⁸Amen odi tatu podi ọgba ẹmar-arōoy obho omutiom ạar olo ịkarabh nꞌiiḅi nꞌịiruan mẹzo idi. ⁹Ẹzo bho eedi imōruōm io zạmi obho kolōgh oḍighi ịkarabh ạbham zeedi. ¹⁰Ẹzo bho ạami nakẹel tỌde bho nꞌobho enyina imina mu ẹmiin zạmi obho kodi amutiom miiḅi ibhꞌạmi aḍeeriom zeedi. ¹¹Ẹzo bho nọoru mịiruan ubhumeni mọolema ẹmar-arōoy obho keḍio eedi ilōghōm mobho Ẹnaan tạtu mịiruan ạnogho zeedi.

¹²“Ạami ạteeny mịkanya ọkpo olo ọgba ọnogho enyina molo ạami ạgba siibha enyina itue ḍio ẹrolom. ¹³Amen Ẹmugh obho aru bọ magey obho tatu, odi taḍeeriom ni zenyina moomo agey obho. Odi ootuma ḍio milꞌodi, tapin ibha odi ạmoghon obho ạgba ạnogho zenyina mọkpo ilo netu momute. ¹⁴Odi tạnogho ạami meghuan, tebum obho odi tapin mibha ạami natu mọkpete obho, keḍio tạgba ạnogho enyina. ¹⁵Kạar kạar ilo Ọde bho ạteeny pilꞌạmi. Pạar obho ạami ughōl Ẹmugh obho tapin mibha ạami ụnogho zodi obho ạgba ạnogho zenyina.”

Ịitu nꞌọḅaal ologhi

¹⁶“Ịbam amen isughō, penyina ịmiin mu zạmi, keḍio ịbam amen namina atẹn penyina ọmiin ạmi.” ¹⁷Ẹtede iteledōm obho nẹekpete kua ẹnogho mipedi obho, “Iibha kodi nạkpete ẹko mu, ‘Ịbam amen isughō, penyina ịmiin mu zạmi, keḍio ịbam amen namina atẹn penyina ọmiin ạmi,’ keḍio amina nạkpete kua mu, ‘Tebum obho ạami nạki tỌde bho’? ¹⁸Ịbam amen obho odi nakōl obho keeghe? Ezōor ulōghōm io mibha odi nạḍeghe obho.” ¹⁹ẠJizos naalōghōm mobho eedi netu mopuruan odi miipuruan, podi ạkpete kua ạnogho zeedi, “Ạami ụkpete kua, ‘Ịbam amen isughō, penyina ịmiin mu zạmi, keḍio ịbam amen tetẹn penyina ọmiin ạmi.’ Iibha pibha enyina nepuruan silōor enyina bho? ²⁰Agey nạ ni, enyina teleghe ni mizin, molo ẹmar-arōoy obho tebo ni. Enyina tẹetu ni, keḍio ịitu obho tenyina tetẹn mọḅaal ologhi. ²¹Amen olo ạni-ebhōbh natu mọmar, odi tạtol tịitu, tebum obho amen ọmiinom odi nẹteeny. Tamen olo odi nạamar mọony obho, podi oḅulo ọmiinom obhꞌodi, tebum obho odi tabo ni mobho odi nạamar mọony tẹmar-arōoy obho. ²²Pẹzo enyina tẹtol nạ: esiibha enyina idi tịitu, keḍio ạami tamina ni ạmiin enyina, keḍio ọḅaal ologhi tạtolaan enyina magey, oḍigh ọḅaal ologhi olo ọnon ōoy otue ḍio ạḅoor zenyina.

²³“Amen tạteeny ḍuma popo, enyina igbẹel mu zạmi mạar. Agey nạ ni, Ọde bho tạnogho ni zenyina kạar kạar olo enyina tegbẹel zodi mi taḍien ạmi. ²⁴Ninii kesiibha, enyina degbẹel io mạar mi taḍien ạmi. Igbẹel, penyina obhin, molo ọḅaal ologhi enyina egbẹbhan.”

ẠJizos naapuom mẹmar-arōoy obho

²⁵“Ạami nạagba miibha bho ạnogho enyina mi tasidōgh. Amen natu molo ạami ụgbaam mu nꞌasidōgh, ạami tạgba mibha tỌde bho mozōol ạnogho enyina. ²⁶Amen tạteeny ḍuma popo, enyina ki tegbẹel mi taḍien ạmi: ạami kugbẹel mu zodi ạnogho zenyina, ²⁷tebum obho odi Ọde bho nịvo nịvo atulan enyina. Odi atulan enyina mebum obho enyina itulan ạami, imōruōm mobho ạami ụḍua tẸnaan uru. ²⁸Ạami ụkar ụḍua tỌde bho karu, keḍio ạami ụḍua uru tẹmar-arōoy obho; molo esiibha bho ạami nạaḅele mẹmar-arōoy obho nạḍua ạki tỌde bho.”

²⁹Keḍio iteledōm obho tẹkpete kua ẹnogho zodi, “Nonon, ạna nạamaar nạgba amutiom siibha bho, ạna ọgbaam io sidōgh. ³⁰Ezōor noolōghōm siibha bho mobho kạar kạar ạna ulōghōm ni ụman; iipuruan olo ōoy amina ạteeny mopuruan onuma olo mu. Iibha bho iḍighi kezōor omōruōm mobho ạna ụḍua tẸnaan uru.” ³¹Keḍio ạJizos ạbhagharana kua zeedi, “Enyina neemōruōm siibha bho. ³²Amen obho natu, naasi siibha bho, amen obho enyina tẹezaranu, ōoy otu otu odi, keḍio tesughōnōm zạmi be. Oomo ipa ẹkona, ạami be usughō ḍio, Ọde bho odi nꞌạami. ³³Ạami ụgba miibha bho ạnogho zenyina molo enyina ẹteeny mekima mi tạmi. Ẹmar-arōoy obho tẹnogho ni zenyina mọmiinom. Ịteeny ọoghuanaan ologhi. Ạami naapuom mẹmar-arōoy obho.”

ẠJizos naakpulughu ạnogho miteledōm odi

¹Odi ạJizos ạkpete miibha bho ạḅele, podi aanon tạnyu-ẹnaan, aakpulughu kua, “Ạda, amen obho nạateeny. Nọgho meghuan mỌony obho tonuma, molo Ọony obho ạnogho ạni ạna meghuan. ²Ạna nạanogho zodi mịnyaam ọbhamam oomo arōoy, molo odi kạnogho maghuḍum olo ikunughi olo moomo obo bho ạna ụnogho zodi obho. ³Oobho podi aghuḍum obho ikunughi olo bho: molo arōoy kelōghōm ạna, mobho ạna be uru mạkar Ẹnaan obho, nꞌolōghōm ạJizos Kraist obho ạna urōm uru obho. ⁴Ạami naaghueni ạna tesuo ade obho; ạami nạaman moḍighi obho ạna ụnogho ạami obho. ⁵Ạda, nọgho ạami meghuan siibha tesuo aghisigh onuma, onyiin odi eghuan obho ạami ụteeny tonuma tamen obho aḅirini obho domute ḍio bho.

⁶“Ạami naaḍighi marōoy obho ạna ụseghe tẹmar-arōoy obho ụnogho ạami obho elōghōm ạna. Eedi ilꞌonuma, keḍio ạna ụnogho zeedi zạmi. Eedi neeghiilaan moghōrōkō onuma, ⁷keḍio esiibha bho eedi meelōghōm mobho kạar kạar olo ạna ụnogho ạami ịḍua tonuma kiru. ⁸Ạami ụnogho zeedi madōm obho ạna ụnogho ạami obho, molo eedi neebhin; eedi neelōghōm mobho ạami ụkar ụḍua tonuma kuru, keḍio eedi imōruōm mobho ạna kurōm ạami moru.

⁹“Ạami naakpulughu ạnogho eedi. Ạami uukpulughu ḍio ạnogho mẹmar-arōoy obho, ạami naakpulughu ạnogho marōoy obho ạna ụnogho ạami obho, tebum obho eedi iru milꞌonuma bho. ¹⁰Oomo ibha ạami ụteeny obho ilꞌonuma, ibhꞌonuma ilꞌạmi; eghuan ạmi idi teedi. ¹¹Esiibha bho ạami natu tonuma; ạami olo mu tẹmar-arōoy obho, keḍio eedi idi tẹmar-arōoy obho. Ọde Iigbia, tịnyaam aḍien onuma, taḍien obho ạna ụnogho ạami obho, mạar ạbhamam eedi maseeri, molo eedi etu monyiin kẹzo bho ezira uru monyiin obho. ¹²Amen obho ạami odi nꞌeedi obho, ạami ubhin ni mịnyaam aḍien onuma ạmaar ạbhamam eedi, aḍien obho ạna ụnogho ạami obho. Ạami nạamaar ạpam eedi molo bọbon onyiin olo abhẹ olo, tughuneen zodi obo bho noogu ughōl tapẹ ni obho, molo oḍighi opulughi tibhꞌẹegia bho. ¹³Keḍio esiibha bho ạami natu tonuma, pạami ụkpete mabaabha bho ụnogho zeedi molo eedi ẹteeny magey ọḅaal ologhi olo igbẹbh ni ịman tekpom eedi. ¹⁴Ạami nạagba ạnogho zeedi madōm onuma molo ẹmar-arōoy obho nẹelogh zeedi ḍien, tebum obho eedi itu ḍio milꞌẹmar-arōoy obho, kẹzo bho ạami utu ḍio molꞌẹmar-arōoy obho. ¹⁵Ạami ụva ḍio molo ạna kạḅirogh zeedi tẹmar-arōoy obho, keḍio ạami nagbẹel molo ạna kạmaar kạbham zeedi kạseghe mi tạravo eru obho. ¹⁶Ẹzo bho ạami utu ḍio molꞌẹmar-arōoy obho, eedi ẹkona ilꞌẹmar-arōoy obho ḍio. ¹⁷Pin agey obho maḍighiom zeedi mạneghemi; ọnuekpete onuma pagey obho. ¹⁸Ạami urōm zeedi mi tẹmar-arōoy obho kẹzo bho ạna urōm ạami moru tẹmar-arōoy obho. ¹⁹Tebum eedi keḍio ạami ubhin lōor ạmi uḍighi ụneghemi taghisigh onuma, molo eedi ẹkona eḍighia lōor eedi ẹneghemi taghisigh onuma mi tagey obho.

²⁰“Ạami uukpulughu ḍio ạnogho zeedi be, ạami naakpulughu nạ ạnogho mobo bho tẹmoghon dōm eedi emōruōm ạami obho. ²¹Ạami naakpulughu molo oomo eedi kẹrol keru monyiin. Ạda, eedi ẹrolan ezira, kẹzo bho ạna odi nꞌạmi obho; ạami odi nꞌạna bho. Ḍighi eedi ẹrol monyiin, molo ẹmar-arōoy obho emōruōm mobho ạna urōm ạami uru. ²²Ạami ụnogho zeedi monyiin eghuan obho ạna ụnogho ạami obho, molo eedi etu monyiin kẹzo bho ạna nꞌạami uru monyiin obho. ²³Ạami ụtolan eedi, ạna mạrolan ạami, molo eedi egbẹbh ni etu monyiin, nꞌolo ẹmar-arōoy obho elōghōm mobho ạna urōm ạami uru nꞌobho ạna utulan eedi kẹzo bho ạna utulan ạami obho.

²⁴“Ạda, ạna kụnogho zeedi zạmi, keḍio ạami nạva molo eedi kẹrolan ạami mesi olo ạami odi, molo eedi ẹmiin meghuan ạmi, eghuan obho ạna ụnogho zạmi obho; tebum etulan obho ạna utulan ạami kugbi mọlem ẹmar-arōoy obho. ²⁵Ọde obo ạneghe ni ạman, ẹmar-arōoy obho ilōghōm io ạna, ạami naalōghōm ạna molo abaabha bho neelōghōm mobho ạna urōm ạami uru. ²⁶Ạami naaḍighi eedi elōghōm ạna, keḍio ạami tạtol ni amina aḍighi molo etulan obho ạna utulan ạami obho ẹtolan zeedi, ạami ẹkona ạtolan zeedi.”

Ẹzo uḅol mạJizos

¹ẠJizos aakpulughu kua ạḅele, podi nꞌiteledōm obhꞌodi ịḍua ịḅeeny mozi obho ughōl Kidron obho. Tesi obho kir oḍighi olo ukō, pạJizos nꞌiteledōm odi iḍigh. ²AJudas obho aḅool mạJizos obho naalōghōm mesi obho, tebum obho ạJizos naabhin miteledōm obho ạghi ghạ tesi obho mịkanya amen. ³Podi aJudas abhin iḅe rạagham nꞌẹtede obo iḅōrō otu iikpulughu ilo aruvẹmụ iḅo miiḅua bho nꞌarōoy aFarisi obho irōm, ạghi tologhi oḍighi obho. Eedi nẹemaar ẹkpamaghia, ẹpamagh mịtodi nꞌịtaany ẹki. ⁴ẠJizos naalōghōm kạar kạar ilo netu momutenaan odi, podi amute ạghi apuruan zeedi, “Enyina nẹva mokōr ōoy?” ⁵Eedi nẹebhagharana kua, “ẠJizos obhꞌạNazaret.” Podi ạkpete kua, “Ạami odi.”

AJudas obho aḅool odi obho nạamaranuan nꞌeedi. ⁶Amen ạJizos ạkpete kua ạnogho zeedi, “Ạami odi,” peedi imulaay tạman imeleghu tade bho. ⁷Keḍio ạJizos amina apuruan zeedi, “Enyina ịkar nẹva mokōr ōoy?” Peedi ịbhagharana, “ẠJizos obhꞌạNazaret.” ⁸PạJizos ạkpete kua, “Sạami nạagba ghạ ạnogho zenyina akōl ạami odi. Erumolo enyina nẹva zạmi, pịḅele iibhakele eghẹel.” ⁹(Odi ạkpete kua molo ibha odi nạakpete bho etu magey, “Ọde, bọbon onyiin tobo bho ạna ụnogho ạami obho olo abhẹ olo.”) ¹⁰ẠSaimon Pita ạbham nꞌelōor ẹgham, podi aabhaghami melōor obho aben monyiin ẹbana uvẹmụ iḅo miiḅua bho olo ughōl Mạlkos asōbh maḅeri obhꞌoḍiom obho. ¹¹PạJizos ạkpete kua ạnogho maPita, “Mulumi melōor ẹgham onuma mi tesi obho ạna ụseghe bho. Ạna ughōdi ạami utue ḍio ạbhogholom mạkopu ọmiinom obho Ọde ạmi ạnogho ạami obho bẹle?”

Ụmarami mạJizos taghisigh tẠnas

¹²Peedi iḅe rạagham obho nꞌuvẹmụ obhꞌeedi nꞌobo iḅōrō aJu obho iḅol mạJizos ịduughi rạvo bho. ¹³Keḍio ịbham zodi ịghi tẠnas. Odi ọzogo tạKayafas obho aru muvẹmụ iḅo miiḅua bho mạla popo. ¹⁴ẠKayafas obo bho aakiom marōoy aJu obho aghōl mịkpe ni molo onyiin ōoy kạbho kạnogho moomo arōoy obho.

APita ạbharanaan mạJizos

¹⁵ẠSaimon Pita nꞌọnon oteledōm nẹtuonuman mạJizos. Oteledōm opedi obho, uvẹmụ iḅo miiḅua bho nạamaar alōghōm zodi. Podi ạtuonuman mạJizos aḍigh togigo obhꞌotu ạkoti uvẹmụ iḅo miiḅua bho. ¹⁶APita ạrol tetẹrẹ atuan mọnu-otu obho. Poteledōm obho uvẹmụ iḅo miiḅua bho nạamaar alōghōm obho amula ạghi ạkpete ạnogho mọnyani obho naḅōrō ghạ mọnu-otu obho pụloghom maPita. ¹⁷Pọnyani obhꞌọnu-otu obho apuruan maPita, “Ạna onyiin oteledōm odi ōoy obho ḍio?” APita ạbhagharana mu, “Tạa, ạami ạni ḍio.”

¹⁸Uuta odi, pạrubana bho nꞌobo iḅōrō bho igbonoghi megi ạnyan nẹenwa. PaPita ạghi ạmara nạanwa ạni.

Uvẹmụ iḅo miiḅua bho apuruan mạJizos mọkpo

¹⁹Puvẹmụ iḅo miiḅua bho apuruan mạJizos milo igboloman nꞌiteledōm obhꞌodi nꞌịtughumiom obhꞌodi. ²⁰PạJizos ạbhagharana kua, “Ạami nạakpete ạnogho kōoy kōoy mi togbo arōoy; oomo ịtughumiom ạmi, ạami ụtughumiom mi tarutu ịtughumiom nꞌotu iikpulughu obho, ariisi obho arōoy aJu obho neekōbhōghian ghạ bho. Ạami dọkpete ḍio mạar mi tẹḅokia. ²¹Ebum eeghe kạna digha apuruan ạami? Kịa mapuruan mobo bho ịmoghon ạami. Puruan zeedi mibha ạami ụgba ụnogho zeedi obho — eedi neelōghōm mibha ạami ụkpete bho.” ²²Suo ạJizos ạkpete kua bho ponyiin obo iḅōrō bho aḅōr odi ạkpete kua, “Ạna une uḅom ẹmu nạkpete kua muvẹmụ iḅo miiḅua bho!” ²³Keḍio ạJizos ạbhagharana kua zodi, “Erumolo ạami nạakpete mịkarabh tesuo, pụgba mạnogho kōoy kōoy tesuo. Kerumolo ibha ạami ụkpete bho iru magey obho, ebum eeghe kạna aḅor ạami?”

²⁴PẠnas abhin zodi, nꞌẹzo bho ụḍuughi rạvo bho, ạghiomonaan mạKayafas uvẹmụ iḅo miiḅua bho.

APita amina ạbharanaan mạJizos

²⁵APita odi nini mẹmara nạanwa nyạn obho. Pipedi obho ipuruan kua zodi, “Ạna onyiin oteledōm odi ōoy obhobho ḍio?” PaPita ạbharanaan mu, “Tạa, ạami ạni ḍio sọo.” ²⁶Onyiin ẹbana uvẹmụ iḅo miiḅua bho olꞌeghun otu ōoy obho odi aPita asōbh maḅeri obho, ạgba kua amutiom, “Ạna ḍio mobo bho ạami ụmiin tologhi oḍighi bho?” ²⁷PaPita amina ạbharanaan mu, “Eenyi” — tamen opopo pạkenegh ạlaal.

Ụmarami mạJizos taghisigh taPailet

²⁸Eedi ịseghe mạJizos mi totu tạKayafas ịḍuonom ịghi totu ạgovono bho. Obun ụḍirogh men obho. Arōoy aJu obho iḍigh ạni ḍio tologhi obho mebum olo oseeri alōor eedi kạḅaal tẹzo eḍighiom ạar eedi, molo eedi ele ạni meḍian ẹzaal Opẹl-Otẹn obho. ²⁹PaPailet amute ạghi teedi apuruan kua zeedi, “Ikōr oḍigh ịkarabh mobho ōoy obhobho aḍighi?” ³⁰Peedi ịbhagharana kua, “Ezōor kupin io zodi oruom ạna, erumolo odi oḍighi ḍio mịkarabh.” ³¹PaPailet ạkpete kua ạnogho zeedi, “Enyina nịvo nịvo ịseghe zodi mẹghi mẹtuugh mesōbh tibhꞌaraalōgh enyina.” Arōoy aJu obho nẹebhagharana kua, “Ịnyaam olo ezōor ụteeny moghigh ōoy olo.” ³²(Iibha bho imute kua molo ibha ạJizos ạkpete bho etu magey, tamen obho odi ạgba moḍigh ọbho bho odi tạpo bho.) ³³PaPailet ạghi aḍigh totu abheleghi mạJizos apuruan kua zodi, “Ạna ọolema aJu obho bẹle?” ³⁴PạJizos ạbhagharana kua, “Iipuruan ibhibha ịkar ịḍua tologhi onuma keru bẹlee kạna ụmoghon tịnu ịnon arōoy?” ³⁵PaPailet ạbhagharana kua, “Ạna ụutua ạami olꞌaJu obho bẹle? Arōoy onuma nꞌaruvẹmụ iḅo miiḅua bhꞌeedi ibhin ạna eruom ạami. Ạna uḍighi meeghe?” ³⁶ẠJizos nạakpete kua, “Ọdaam ẹma ạmi olꞌesuo ẹmar-arōoy obho ḍio. Ughōl ọdaam ẹma ạmi olꞌesuo ẹmar-arōoy obho bọ, obo bho nẹtuonuman ạami obho kiḅe ni molo ạami kuḍigh io tạravo aJu obho. Eenyi. Ọdaam ẹma ạmi olꞌesuo ḍio!” ³⁷PaPailet apuruan kua zodi, “Ẹrol kua, pạna ọolema?” PạJizos ạbhagharana kua, “Ạna kughōl ạami ọolema. Ụmar ạami, ạami aru tẹmar-arōoy obho mebum iibha, ọgba agey obho. Kōoy kōoy olo aru molꞌagey obho tạmoghonyan ni zạmi.” ³⁸PaPailet apuruan kua zodi, “Agey obho kẹkaraan?”

Usōbh molo koghigh mạJizos

PaPailet amute amula ạghi tarōoy aJu obho ạkpete kua ạnogho zeedi, “Ạami ụmiin io mạar olo ọtuan oghigh ōoy obhobho. ³⁹Tẹzo eḍighiom ạar obho enyina ịteeny obho, ạami nạḅelemaan ghạ ni amutiom monyiin ōoy ikoli ạnogho zenyina mi taḍuma ẹzaal Opẹl-Otẹn obho. Ạami umutiom ụnogho zenyina mọolema aJu obho bẹle?” ⁴⁰Poomo eedi imulughu, “Eenyi-o, odi ḍio. Ezōor nogbẹel mạBarabas!” (Odi ạBarabas ōoy olo naḅumiiy ghạ magbuaay.)

¹PaPailet abhin mạJizos aḍighi molo ụgurogh zodi. ²Iḅe rạagham obho ilo meghōony iiḅulom ezuom zodi, ẹloki zodi mạsuoma ọolema, ³iru todi nẹkpete ghạ kua, “Ọolema aJu obho, ḍum ọodoony aghuḍum.” Keḍio ịghi nạ iḅōrōgh odi.

⁴Keḍio aPailet tamina amula ạki tarōoy obho ạkpete kua, “Iinon, ạami tapin odi atuom enyina, molo enyina ẹmiin elōghōm ekōl mobho bọbon ạar olo ạami ụmiin olo ọtuan oghigh odi olo.” ⁵PạJizos amute nꞌeghōony ọolema iiḅulom obho uzuom bọ zodi nꞌạsuoma ọolema bho ụloki bọ zodi obho. Keḍio aPailet ạkpete kua ạnogho zeedi, “Iinon! Oobho odi ōoy obho!” ⁶Amen aruvẹmụ iḅo miiḅua bho nꞌobo iḅōrō bho ịmiin zodi, pimulughu, “Kạn zodi mi toorẹeny ẹmigheri obho! Kạn zodi mi toorẹeny ẹmigheri obho!” Keḍio aPailet ạkpete kua ạnogho zeedi, “Enyina kịseghe zodi mẹghi mẹkan. Ạar olo ạami ụva ụmiin olo oghigh odi olo.” ⁷Parōoy aJu obho imulumian kua zodi, “Ezōor ọteeny molōgh olo aghōl modi tạpo ni, tebum obho odi ạseghe lōor odi aghōl modi Ọony tẸnaan obho.”

⁸Amen aPailet ạmoghon mibha eedi ịkpete bho, paruugu isibh odi magey. ⁹Odi amula ạghi tẹkpe bhꞌodi apuruan kua mạJizos, “Ạna kolꞌokōr ẹma?” ẠJizos ọbhagharana ḍio. ¹⁰PaPailet ạkpete kua ạnogho zodi, “Ạna ọbhagharana ḍio zạmi. Tụtua, ạami ạteeny moomo ịnyaam olo omutiom onuma nꞌolo ọkan onuma toorẹeny ẹmigheri obho.” ¹¹PạJizos ạbhagharana kua, “Ạna ụteeny mịnyaam mi tạmi mi tebum obho Ẹnaan kạnogho ạna. Keḍio odi obo bho ạseghe zạmi ạlogh tạvo onuma bho pobo bho aḍighi mịkarabh ilo iḅẹebh ipu obho.” ¹²Amen aPailet ạmoghon miibha bho podi ạva mịkanya mebōom olo omutiom ạJizos. Arōoy aJu obho imōrō ḍio, nemulughu kua, “Erumolo ạna umutiom zodi, pu nekōl ạna ọbulol ọolema bhꞌaRom io. Kōoy kōoy olo aghōl odi ọolema, podi obo ạlokian riḍien mọolema bhꞌaRom!” ¹³Amen aPailet ạmoghon mọnuekpete bhibha podi ạghi abhin mạJizos amutiom ạrol delede tẹtolom ịiruan obho, tesi olo ughōl “Egbolom Ọbharakpar” (tọnu-ẹma aJu obho pọ aGabata).

¹⁴Amen natuan molo aḍio kạḍi ịzal abin taḍuma bho tạḅaal pẹzaal Opẹl Otẹn obho, paPailet ạkpete kua ạnogho marōoy aJu obho, “Oobho ọolema enyina!” ¹⁵Peedi imulughu imulumian maa, “Kigh zodi! Kigh zodi! Kạn zodi toorẹeny ẹmigheri obho.” Keḍio aPailet apuruan kua zeedi, “Enyina negbẹel molo ạami kạkan mọolema enyina mi toorẹeny ẹmigheri obho?” Paruvẹmụ iḅo miiḅua bho ịbhagharana kua, “Onyiin ọolema obho ezōor ụteeny pọolema bhꞌaRom!” ¹⁶Keḍio aPailet tạnogho zeedi mạJizos mọghi ọkan odi mi toorẹeny ẹmigheri obho.

Ụkan mạJizos toorẹeny ẹmigheri obho

PạJizos aḍigh tạravo eedi. ¹⁷Podi amute aru arōol moorẹeny ẹmigheri obho todi, ạghi tesi obho ughōl “Esi Ịikpo,” (tọnu-ẹma aJu obho ughōl Gọlgota.) ¹⁸Tesuo peedi ịkan odi toorẹeny ẹmigheri obho. Eedi ịkanam nꞌịnon ịzal arōoy, onyiin tekẹeny onyiin toḍiom, ạJizos ạrol teesoḍia eedi. ¹⁹APailet ạge mạar ạkanam toorẹeny ẹmigheri obho. Ạge kua, “ạjizos obhꞌạnazaret, ọolema aju obho.” ²⁰Ọlogh arōoy aJu obho ịḅal ịmiin miibha bho, tebum obho esi obho ụkan zodi toorẹeny ẹmigheri obho ogbeenyan io mi tẹma bho. Ibha ụge bho, ụge tịnu aHibru nꞌạLatin nꞌaGris. ²¹Paruvẹmụ iḅo miiḅua aJu obho ịkpete kua ịnogho maPailet, “Ụge ghạ maghōl kua, ‘Ọolema aJu obho,’ gẹ maghōl kua, ‘Oōy obhobho aghōl ạami Ọolema aJu obho.’ ” ²²PaPailet ạbhagharana kua, “Ibha ạami nạage bho pu nọoge.”

²³Amen iḅe rạagham obho nẹekan mạJizos ịḅele, peedi ịseghe mukpe bhꞌodi ịḍian inya abin, ōoy onyiin onyiin. Peedi ịseghe nạ mạsuoma ạruula bho, obho aru monyiin ọpaḍi ukpe olo uluom ạvo ụkpologhiom nạ ḍio. ²⁴Piḅe rạagham obho onyiin ạkpete ạnogho monyiin maa, “Ị́baay ghạ. Itu ọsa mẹlel olōghōm mobo tạteeny.” Iibha bho imute kua moḍighi ibhꞌẹegia bho keru magey, ibha ughōl kua,

“Eedi ịḍian mukpe ạmi mōoy onyiin onyiin,

ẹsa mẹlel molōghōm ōoy olo tạteeny mạdoni ạmi.”

Parōoy ẹgham obho ịtuugh iḍighi kua.

²⁵Oniin tạJizos, nꞌụmarani odi oniin obho, nꞌaMeri ạni tạKlopas nꞌaMeri obhꞌạMagdala nẹemara etuan moorẹeny ẹmigheri obho tạJizos. ²⁶PạJizos ạmiin moniin odi nꞌoteledōm obho odi atulan obho, ịmara nạ tepa, podi ạkpete kua ạnogho moniin odi, “Ạni obho, pạm mọony onuma.” ²⁷Odi ạkpete kua ạnogho moteledōm obho, “Oobho oniin onuma.” Ạseghe tamen opopo ạghi taghisigh, poteledōm obho abhin mạni obho aghẹel totu odi aakō.

Ọbho tạJizos

²⁸ẠJizos naalōghōm mobho tạteeny kesiibha kạar kạar neegbẹbh ịman, toḍighi ẹzo olo omuzeni tibhꞌẹegia bho, pạJizos ạkpete kua, “Ạmuum nẹtal zạmi.” ²⁹Ạḅugha amiim ilo idi kạkata idi todi esi obho, peedi ịseghe mạsapo ịtobhori tamiim obho ịkeleriom tẹkom oorẹeny iibhaghami iseeriom tọodoronu odi. ³⁰ẠJizos ạbhoghol miim obho paghōl kua, “Neemuneen!” Podi azumeni mẹmu odi ạbho.

Ugim ọsobh titakara tạJizos

³¹Keḍio arōoy aJu igbẹel maPailet mọnogho eedi mịnyaam oḅuni asike arōoy obho ụkan ụze bho, molo osōorẹ zeedi mi toorẹeny ẹmigheri obho. Eedi iḍighi miibha bho mebum obho ạḅaal aru maḍuma obhooghia. Eedi igbẹel io molo iḍim obho kẹrol toorẹeny ẹmigheri obho mi taḍuma obhooghia bho, tebum obho ạkar odi aḍuma popo aru maḍuma iigbia. ³²Parōoy ẹgham obho ịghi iḅuni masike ọḅel ōoy obho nꞌōoy opedi obho ụḅaram ụkanam nꞌạJizos obho. ³³Amen eedi iru tạJizos, odi nạabho kọkanya amen, peedi ịḅele moḅuni asike odi. ³⁴Ponyiin oḅe-rạagham obho ạseghe mọsobh agim titakara tạJizos, tonyiin amen obho pịḅaal nꞌạmuum igbōr imute. ³⁵(Obo bho ạmiin mibha iibha bho imute bho nạagba molo enyina ẹkona emōruōm. Ibha odi ạgba bho agey, keḍio odi naalōghōm mobho odi ạgba magey obho.) ³⁶Uḍighi kua molo ibhꞌẹegia bho etu magey, tibha ụge kua,

“Bọbon ọokpo odi olo toḅun olo.”

³⁷Kir ọnon esi mi tẹegia bho olo aghōl kua,

“Arōoy teenon ni zodi obo bho eedi igim obho.”

Amaḍi tạJizos

³⁸Iibha iru itẹn, paJosef obhꞌẠrimatia ạghi agbẹel maPailet mọseghe oḍim obho tạJizos. (AJosef onyiin ōoy olo nạtuonuman mạJizos mi tẹḅokia, tebum obho odi ạrol aghiil mạruula aJu obho.) PaPailet ạnogho zodi mịnyaam mọseghe oḍim obho, keḍio odi aJosef ạghi ạseghe moḍim obho. ³⁹ANikodimos obho abhira ạghi tạJizos muḍugul obho, ạḅar maJosef, ạseghe mạrumunu nꞌaralo ilo nẹkunu magey, ilo ẹemor obho teleeny ni mọbam ẹḅa abōbh, ạbhamam ạghi. ⁴⁰Eedi ịzal arōoy obho ịseghe moḍim obho tạJizos ịghoroghiom mạbalala ukpe nꞌaralo bho. Pẹzo arōoy aJu obho neekōbhōghia ghạ mamaḍi. ⁴¹Oḍighi olo ukō odi tesi obho ughigh bọ mạJizos obho, omoom oogu olo doḍi ghạ ḍio mōoy odi. ⁴²Suo taruḍuma bho tạḅaal paḍuma obhooghia aJu obho, nꞌebum obho oogu obho atuan suo bho, peedi iḍi zodi ạJizos suo.

Ozōol oogu obho

¹Ẹtughuḅaal ạSondi, aḍio dokpaaran io, paMeri obhꞌạMagdala ạghi toogu obho, keḍio ạmiin mobho nootughuneen mọbharakpar obho ukpereghiom obho. ²Podi aghiil ạghi tạSaimon Pita nꞌoteledōm opedi obho, obho ạJizos atulan obho, ạgba kua ạnogho zeedi, “Eedi nẹeseghe mObạmọogh obho mi toogu obho, keḍio ezōor ulōghōm io mesi eedi iseeri zodi.” ³PaPita nꞌoteledōm opedi obho ịḍua ịghi toogu obho. ⁴Ịzal eedi nekiil ni, keḍio oteledōm opedi obho aghiil apuom maPita abhira asi toogu obho. ⁵Odi ạghi asi azuman aanon pạmiin mịḅaal arukpe obho, odi oḍigh io ạghi. ⁶Keḍio aPita ạḍua tạman odi aru, podi aḍigh onyen mi toogu obho. Odi nạamiin mịḅaal arukpe obho idi toogu obho, ⁷nꞌukpe bho ụghoroghiom bọ mẹmu tạJizos obho. Olo ạni tesi obho mịḅaal arukpe obho idi obho, ụkpulughi kua zodi be oseeri kẹre esi. ⁸Keḍio oteledōm opedi obho, obho abhira asi maPita toogu obho, aḍigh ạni. Odi ạmiin pamōruōm. ⁹(Eedi ẹkona dẹmoghonyan nạ ḍio mibha ẹegia bho ạgba aghōl modi taḅetunu ni tọbho bho.) ¹⁰Peedi iteledōm obho ighẹel totu.

ẠJizos amutenaan maMeri obhꞌạMagdala

¹¹AMeri ạmara tọtu oogu obho naleghe. Odi naleghe obho, keḍio azuman ghạ naanon ghạ toogu obho. ¹²Podi ạmiin mịzal itelema ilo ibura mịḅaal, ịrol delede tesi obho ụmuneen moḍim tạJizos obho, onyiin tẹmu, opedi obho tasike, ¹³keḍio ipuruan kua zodi, “Ạni obho, ạna naleghe meeghe?” Keḍio odi ạbhagharana kua zeedi, “Eedi nẹeseghe mObạmọogh ạami obho, keḍio ạami ulōghōm io mesi eedi iseeri zodi!” ¹⁴Odi ạkpete kua ạḅele, podi aghiraan aanon tạman ạmiin mobho ạJizos ạmara, keḍio odi olōghōm io mobho odi aru mạJizos. ¹⁵ẠJizos apuruan zodi, “Ạni obho, ạna naleghe meeghe? Ạna nạva mokōr ōoy?” Odi aghōdi odi ōoy obho naakō moḍighi obho, podi ạkpete kua ạnogho zodi, “Obo apu ạami, erumolo ạna ụseghe zodi, kōl mesi obho ạna useeri zodi obho molo ạami ạki ạseghe zodi.” ¹⁶PạJizos abheleghi zodi, “AMeri!” Podi aghiraan tạJizos ạkpete kua mi tọnu aHibru, “Rabonạy” (obho amōrō kua, “Obꞌịtughumiom”). ¹⁷PạJizos ạkpete kua ạnogho zodi, “Ụbham ghạ zạmi, tebum obho ạami dọghi ḍio asi tỌde bho. Kịa taburumōr ạmi mạgba mạnogho zeedi maghōl kua, ‘Ạami nạki tỌde bho aru bọ mỌde ạmi nꞌỌde enyina bho, Ẹnaan ạmi nꞌẸnaan enyina.’ ” ¹⁸PaMeri obhꞌạMagdala ạghi ạgba ạnogho miteledōm obho modi nạamiin mObạmọogh obho mobho odi ạkpete miibha bho ạnogho zịno.

ẠJizos amutenaan miteledōm obho

¹⁹Udule aḍuma odi ạSondi opopo, nakpereghi, oomo iteledōm obho neekōbhōghian tonyiin otu ẹḍuughi ruguugh obho, tẹzo bho eedi nekiil ruugu mạruula aJu obho. PạJizos aru ạmara togbo bhꞌeedi, ạkpete kua, “Ekima ẹrolaan enyina.” ²⁰Odi ạkpete kua ạḅele, podi aḍeeriom zeedi mạravo nꞌitakara bhꞌodi. Pologhi iteledōm obho ạḅaal magey mọmiin Obạmọogh obho. ²¹Keḍio ạJizos amina ạkpete kua ạnogho zeedi, “Ekima ẹrolaan enyina. Ẹzo bho Ọde bho arōm ạami obho, pẹzo ạami natōm zenyina.” ²²Odi ạkpete kua ạḅele, podi abhooghuom zeedi ạkpete kua, “Ipin mẸmugh Iigbia bho. ²³Erumolo enyina ịḅelemaan mịkarabh arōoy, pu nọoḅelemaan zeedi. Erumolo enyina ịḅelemaan io, pụḅelemaan io nạ zeedi.”

ẠJizos nꞌạTomos

²⁴Onyiin oteledōm obho, ạTomos (obho ughōl Ụmar Ịzal obho) olo ạni men obho ạJizos aru obho. ²⁵Pipedi iteledōm obho ịgba kua ịnogho zodi, “Ezōor mọomiin mObạmọogh obho.” ẠTomos ạkpete kua, “Erumolo ạami ụmiin io melẹkẹ esi obho ụkanam bọ mọgbo tạravo bhꞌodi ạlogh mạghunu ạmi, nꞌesi obho ugim titakara obhꞌodi, ạlogh mạvo bhꞌodi, ạami umōruōm io.”

²⁶Awiki aru atẹn iteledōm obho keekōbhōghian tonyiin odi otu obho ạTomos odi ạni nꞌeedi. Nọoḍuughi maruguugh obho, keḍio ạJizos aru ạmara togbo bhꞌeedi ạkpete kua, “Ekima ẹrolaan zenyina.” ²⁷Keḍio odi ạkpete kua ạnogho mạTomos, “Lọgh mạghunu ạvo bhꞌonuma suo, mạmiin rạvo ạmi, ku masele mạvo onuma mạlogh titakara bhꞌạmi. Umina ghạ mamōogh, mōruōm ni be.” ²⁸Keḍio ạTomos ạbhagharana kua zodi, “Obạmọogh ạami nꞌẸnaan ạmi!” ²⁹PạJizos ạkpete kua ạnogho zodi, “Ạna naamōruōm mebum obho ạna nạamiin ạami obho. Ọḅaal ologhi tạtol ni magey ạnogho mobo bho ịmiin io ạami kimōruōm obho!”

Ạar obho aḍighi kụge mọbhereer obho

³⁰ẠJizos aḍighi mịnon ịkanya ariḍighi ibꞌaruugu mi tasumusigh obo bho nẹtuonuman zodi obho ilo ụge ḍio ọlogh tọbhereer. ³¹Ụge miibha bho molo enyina emōruōm mobho ạJizos aru maKraist Ọony tẸnaan obho, nꞌolo tologhi omōruōm obhobho, enyina ẹteeny maghuḍum olo ikunughi olo mi taḍien odi.

ẠJizos amutenaan moḍual iteledōm

¹Iibha iru itẹn, pạJizos amina amutiom lōor odi ạnogho miteledōm obho odi mi tobꞌegha ọbhiiny obhꞌaTaibirias. Odi aḍeeriom kua lōor obhꞌodi ạnogho zeedi. ²Tamen olo ạSaimon Pita, nꞌạTomos (obho ughōl Ụmar Ịzal obho), nꞌạNataniel (obhꞌẹma bhꞌạKena obhꞌaGalili) ọony taZebidi, nꞌịnon ịzal iteledōm tạJizos, idi monyiin esi, ³pạSaimon Pita ạkpete kua, “Ạami nạki mọzuguru.” Pipedi obho ịkpete kua ịnogho zodi, “Ezōor tọki ạni ni.” Peedi ịghi iḍigh toghuugh, keḍio oomo uḍugul opopo, bọbon ena olo eedi ighigh olo. ⁴Aḍio bho nakpaaran kua be pạJizos aru ạmara tọtu ọbhiiny obho, keḍio eedi iteledōm obho ilōghōm io mobho aru mạJizos. ⁵Podi apuruan kua zeedi, “Ạnwuny-o, enyina ẹteeny mina?” Eedi ịbhagharana kua, “Tạa! Bọbon onyiin olo.” ⁶Keḍio odi ạkpete kua ạnogho zeedi, “Itōbh ọzuguru obhꞌenyina mi toḍiom ạvo ọtu oghuugh obhꞌenyina, penyina ọze ina.” Peedi ịigbarion mọzuguru obho, kạ wororororobh. Eedi irue ḍio mọlool, ina bho iḍigh obho ipu ni. ⁷Oteledōm obho ạJizos atulan obho ạgba kua ạnogho maPita, “Odi Obạmọogh obho!” Amen ạSaimon Pita ạmoghon mobho odi aru mObạmọogh obho, podi ạkpua mukpe odi (odi mạakporona mibura obhꞌodi) apẹl asōor tạmuum obho. ⁸Iteledōm ipedi obho ibhun tegbolom, ogbeenyan io aaleeny merubal ḍiōbh akuḅu mobhun tegbolom. ⁹Amen eedi ibhun tegbolom obho peedi ịmiin nyạn ilo noogbonoghi, nꞌena olo nọpooghi tạnyan obho, nꞌạbred. ¹⁰PạJizos ạkpete kua ạnogho zeedi, “Ipin mịbam ina tibha enyina ịze siibha bho meru.” ¹¹PạSaimon Pita abhun ạghi aḍur mọzuguru obho abhune tegbolom, ina neemuzō molo oomo eedi tegbẹbh ni mịraar ạraala nꞌaḍisibh ḍiōbh nꞌịraar. Oomo ibha ịbugh kua bho, ọzuguru obho ọbaan io. ¹²Keḍio ạJizos ạkpete kua ạnogho zeedi, “Itu mele.” Bọbon onyiin mi titeledōm obho olo ane mopuruan odi oghōl, “Ạna kokōr ōoy?” olo, tebum obho eedi neelōghōm mobho odi aru mObạmọogh obho. ¹³Keḍio ạJizos ạghi ạseghe mạbred obho ạnogho zeedi, ạnogho nạ zeedi mina bho.

¹⁴Oobho pogbẹbhiōm ịraar amen mobho ạJizos amutiom lōor odi ạnogho miteledōm obho suo odi naaḅetunu tọbho bho.

ẠJizos nꞌaPita

¹⁵Eedi ile ịḅele, pạJizos ạkpete kua ạnogho mạSaimon Pita, “Sạimon ọony tạJon, ạna ạkar atulan ạami apu mẹzo arōoy ibhibha netulan ạami?” PaPita ạbhagharana kua, “Ii, Obumọogh, ạna naalōghōm mobho ạami natulan ạna.” PạJizos ạkpete kua ạnogho zodi, “Kōkō mạnwuny ạraana ạmi.” ¹⁶Keḍio ạJizos amina apuruan zodi, “Sạimon ọony tạJon, ạna ạkar natulan ạami?” Odi mu, “Ii, Obumọogh, ạna naalōghōm mobho ạami natulan ạna.” PạJizos amina ạkpete kua ạnogho zodi, “Kōkō mạraana ạmi.” ¹⁷Ogbẹbhiōm ịraar amen obho ạJizos amina apuruan maPita maa, “Sạimon ọony tạJon, ạna ạkar natulan ạami?” PaPita aḍigh tịitu mebum obho ạJizos amina apuruan odi agbẹbhiōm ịraar amen aghōl maa, “Ạna ạkar natulan ạami?” keḍio ạbhagharana kua zodi, “Obumọogh, ạna kulōghōm kạar kạar. Ạna naalōghōm mobho ạami natulan ạna.” Keḍio ạJizos ạkpete kua ạnogho zodi, “Kōkō mạraana ạmi. ¹⁸Ạami nạgba magey ạnogho ạna: amen ịbam onuma, ạna ụmaar ghạ ni ạkpua mukpe onuma ạghi kesi kesi olo ologhi onuma aḍigh mọghi. Amen ạna tạkpo, ạna tasele ni mạravo onuma keḍio ọnon ōoy tạkoroghi apin ạna ạki tesi olo ạna ọva ḍio mọghi.” ¹⁹(Odi ạḍeghe miibha bho ạnogho maPita, nạgba moḍigh ọbho bho aPita tạpo mọnogho eghuan mẸnaan.) Keḍio ạJizos ạkpete kua ạnogho zodi mu, “Tụonuman ạami!”

ẠJizos nꞌoteledōm opedi obho

²⁰APita aghiraan tạman pạmiin moteledōm opedi obho, obho ạJizos atulan obho, obho ạrol atuan ạḅeḍian mạJizos mi teḍian udule obho eedi ile bho, kapuruan kua, “Obumọogh, okōr ōoy obo bho taḅool ạna bho?” ²¹Amen aPita ạmiin zodi, podi ạkpete kua ạnogho mạJizos, “Obumọogh, ẹko ạani mōoy obhobho?” ²²PạJizos ạbhagharana kua zodi, “Erumolo iḍigh tologhi ạmi molo odi kaḍum kạrol ninii ạami kamula, iibha bho kịgbaan ạna meeghe? Tụonuman ạami!” ²³Pọdu alela moomo obo bho nẹtuonuman mạJizos obho moteledōm obhobho ọbho mu. ẠJizos ni ọkpete ḍio aghōl odi ọbho mu, odi ạkpete kua, “Erumolo iḍigh tologhi ạmi molo odi kaḍum kạrol ninii ạami kamula, iibha bho kịgbaan ạna meeghe?”

²⁴Odi poteledōm obho ạgba moomo iibha bho, odi nạ kạge miibha bho aseeri; keḍio ezōor noolōghōm mobho ibha odi ạgba bho iru magey obho.

Ikunughi obho

²⁵Ịnon ọkpo ilo ạJizos aḍighi ịka ni, molo oru mọge oomo eedi men onyiin onyiin, ạami nạatua, ịbhereer ilo teḍigh moomo eedi, ẹmar-arōoy obho orue ḍio arōol.