Hibru

Hibru

Araabōom ibha Ẹnaan abhin ạkpete mạar

¹Kageedi mobho Ẹnaan abhin ịnu arizil obho ạkpete ghạ mạar ạnogho bụrude ezira mọlogh amen mi toḍigh kẹrekere araabōom, ²keḍio esiibha ikunughi aruḍuma bho, odi nạkpete ạnogho ezira mi tọnu Ọony obhꞌodi, obho ịḍua todi iru kẸnaan ạlem ẹmar-arōoy obho nꞌobho odi ạson ạseghe mọteeny ẹmoogh oomo ẹmorokpo bho. ³Ẹḅaal eghuan obho tẸnaan idi nꞌodi, molo odi nꞌẸnaan akẹrẹkẹrẹ olo nolo, molo odi abhin oghōrōkō ọnuekpete ịnyaam obhꞌodi nạpamam oomo ẹmar-arōoy obho. Amen odi aḍighi rōoy ạḅaaleni mi tịkarabh obhꞌeedi, podi ạsiin tạnyu obho ạrol delede toḍiom ạvo tẸnaan obho ạmoogh oomo ẹmiriikpo bho.

Ọony obho apu mitelema bho tẸnaan

⁴Ẹnaan naaḍighi aseeri mỌony obho apuoghom mitelema bhꞌodi, kẹzo bho aḍien obhꞌodi apu nạ mibhꞌeedi obho. ⁵Ẹnaan dọkpete ghạ ḍio ạnogho monyiin otelema bhꞌodi aghōl kua,

“Ạna Ọony ạmi,

aadon ạami Ọde onuma.”

Odi dọkpete ghạ nạ ḍio ạnogho monyiin otelema bho aghōl kua,

“Ạami tatu mỌde odi,

odi atu mỌony ạmi.”

⁶Tamen obho Ẹnaan natōm mọkpana Ọony obhꞌodi moru tẹmar-arōoy obho, odi ạkpete nạ kua,

“Kotelema kotelema tẸnaan aakpulughu zodi!”

⁷Tilo igboloman nꞌitelema bhꞌodi, odi ạkpete kua,

“Ẹnaan ạnogho mitelema bhꞌodi nꞌạnwuny oḍighi obhꞌodi mịnyaam oḍighi ịto bhꞌodi,

aḍighi eedi ạghuemi kọpibha nꞌạnyan.”

⁸Keḍio tilo igboloman nꞌỌony obho odi ạkpete kua,

“Ẹtolom nꞌẹḅu ọdaam ẹma bhꞌonuma Ẹnaan ikunughi olo,

ịiruan obhꞌonuma ịikpalaghia ḍio.

⁹Iiḅi eḍighiom ạar pibha iḍigh tologhi onuma, keḍio ạna ụlogh ḍien mịkarabh eḍighiom ạar.

Iibha kiḍighi kẸnaan, ạkar Ẹnaan obhꞌonuma ạson ạna ạseghe,

ạnogho ạna lịsebh ọḅaal ologhi nꞌeghuan ilo ipu mibhꞌaburugbo onuma.”

¹⁰Odi ạkpete nạ kua,

“Ạna, Obumọogh, ụlem kạar kạar tesuo ade bho kọḅel egbiom obho,

keḍio ạna ụseghe mạkar ạravo bhꞌonuma ụlemom mạnyu obho.

¹¹Ạnyu obho nꞌade bho tepẹ ni ẹḍua, keḍio ạna tạtol nị.

Oomo eedi teḅu ni karukpe.

¹²Ạna takpōr eedi kọota, keḍio eedi tenwian karukpe.

Keḍio ạna tạtol monyiin ẹzo bho ạna odi obho,

ạlukpo otuan io talōor onuma.”

¹³Bọbon amen olo Ẹnaan nạakpete ghạ ạnogho monyiin otelema odi aghōl,

“Tọl suo delede toḍiom ạvo ạmi,

ninii ạami atu aḍighi mobo ọlogh aḍien onuma etu moḅeleriom asike onuma” olo.

¹⁴Ilōghōm mobho itelema bhibha, oomo eedi iru mạruumugh ạnwuny adōm tẸnaan mọlogh ạvo ọnogho obo bho tepin mịbhelegha odi obho.

Ịbhelegha olo ọnon olo aaleeny olo

¹Tebum iibha bẹleni, ezira ọmaar ọkaaniom ibha ezira nọomoghon obho, molo ạmuum ogbōrōm ezira ạḍuonom. ²Eru kạar olo adōm obho itelema bho ịgba bho iru magey, nꞌobho kōoy kōoy olo aḍighi akōrōnuan nọtuugh ghạ nị ọliom, ³ezira toḍighi ẹko komuzaan erumolo ezira uunon utughuneen ḍien mi toḍigh ịbhelegha bhobho ọnon olo aaleeny olo bho? Obạmọogh obho abhira ạgba amutiom mịbhelegha bhibha, keḍio obo bho ịmoghon tọnu odi obho iḍighi imutiom ịnogho ezōor mobho iru magey. ⁴Ẹnaan ẹkona, abhin ịnyaam ạvo aḍighi ọkpo ịiḍaany nꞌeemōogh nꞌoḍigh kẹrekere ọkpo ibꞌaruugu, ạḍi mẹnogho Ẹmugh Iigbia bho rōoy kẹzo ịto bhꞌodi, ạmara ạgba nạ amutiom.

Uvẹmụ ịbhelegha bho

⁵Itelema bho ḍio mobho Ẹnaan ạnogho mịnyaam mọda ẹmar-arōoy obho natu obho, obho ezira nọḍeghe bho. ⁶Kir esi olo ụḍeghe tọbhereer iigbia bho ughōl kua,

“Oōy kẹkaraan molo ạna ụseghe zodi urōol kua tẹmu onuma,

bolobolo ọony ōoy, molo ạna ubhin odi naanon kua?

⁷Ạna uḍighi zodi asōoriōm ịbam molo itelema bho ipu odi mịbam mọbam amen be.

Ạna naazu zodi meghōony eghuan nꞌiibhughumi ibhꞌạruula,

⁸aḍighi zodi mọda kạar kạar.”

Esiibha odi nạda kạar kạar obho, bọbon ạar olo olo tạravo odi olo. Ẹzo bho idi siibha bho, ezira ụmiin io mōoy mobho nạda kạar kạar siibha, ⁹keḍio ezira nọmiin mạJizos obho uḍighi tọbam amen itelema bho ipu zodi mịbam, molo tọsu ạghusan aḍien tẸnaan odi ạpo ạnogho moomo arōoy. Ezira nọmiin mobho noozu zodi meghōony eghuan nꞌiibhughumi siibha tebum ọbho bho odi ạmiinom obho. ¹⁰Iḍigh tologhi odi Ẹnaan be, obo bho ạlem ạbham kạar kạar tạvo odi obho, moḍighi olo ạJizos uvẹmụ ịbhelegha bho kagbẹbh kạman mi tọmiinom, mobhin ọlogh ạnwuny keru kebhin ạni bin eghuan obhꞌodi. ẠJizos obo nạpam eedi ạloghom tịbhelegha.

¹¹Keḍio odi obo bho naḍighi rōoy ạḅaaleni mi tịkarabh eedi obho, nꞌeedi obo nooḍighi ụḅaaleni obho, oomo eedi ịteeny monyiin Ọde. Pạar obho aḍighi bọ kodi okiil io rẹgheer moghōl eedi aburumōr odi, ¹²kẹzo bho odi ạkpete ạnogho mẸnaan obho,

“Ạami tạgba ni ḍien obhꞌonuma ạnogho burumōr ạmi,

ạmoor sọor abuom ạna mi togbo arōoy.”

¹³Keḍio amina ạkpete kua,

“Ạami taseeriom moomo ologhi ạmi mi tẸnaan.”

Keḍio amina nạ ạkpete kua,

“Ạami odi suo nꞌạnwuny obho Ẹnaan ạnogho ạami obho.”

¹⁴Tebum obho ạnwuny bhibha iru rōoy ilo ịteeny miikpōogh nꞌịḅaal obho, podi ạJizos abhin ạni nạ moḍigh alōor obhꞌeedi, molo odi apin tọbho odi apiẹmiom mịnyaam ọbho obho idi teru obho ¹⁵nꞌolo odi ạpel mobo bho ịtuan aruugu ọbho iḍiku rụbana toomo aghuḍum eedi obho. ¹⁶Oōy olo olōghōm io olo, mobho odi otu ḍio mọbhel itelema bho, aru mọbhel ạnwuny ọobhe tEbrạhạm. ¹⁷Iibha bho nẹgba mobho iizuan ni zodi moru ọrol kẹzo kẹzo olo aburumōr odi ịrol, molo odi atu muvẹmụ ōoy iiḅua ọsu ạghusan aḍien eedi, olo obi ghạ ḍio mi toḍighi obho tẸnaan keḍio ubhin odi ụboromiom Ẹnaan mọḅelemaan ịkarabh arōoy. ¹⁸Ebum obho odi nịvo nịvo ạmiinom amina nạ aḍigh tọdegh oonon obho odi tatue ni ạpel mobo bho idi tọdegh oonon obho.

ẠJizos apu maMozis

¹Tebum iibha bẹleni, iiḅi aburumōr mi taKraist, ibha Ẹnaan naabheleghi nạ ạseghe bho, ịitua ghạ mạJizos, oteledōm nꞌuvẹmụ ōoy iiḅua bho kẹzo bho ezira omōruōm obho. ²Odi obi ḍio mobo bho ạson odi ạseghe bho, kẹzo bho aMozis obi ḍio mẸnaan mi toḍighi odi mi teghun otu tẸnaan obho. ³Keḍio eghuan ibha tạJizos ipu ạni nị kua mibha taMozis kẹzo bho obo bho aḅōgh motu obho naḍigh ghạ meghuan apu motu obho. ⁴Kotu kotu ōoy aḅōgh keḍio Ẹnaan pobo aḅōghi moomo iibha bho. ⁵AMozis ạrol kọony otu mi teghun otu tẸnaan molo ạgba ghạ amutiom mọkpo bho idi tologhi tẸnaan mọkpeteey obho, obi ḍio nobi. ⁶Keḍio aKraist obho aru mỌony olo oomo ọkpo eghun otu tẸnaan idi tạravo odi obho, obi ghạ ḍio. Ezira peghun otu obhꞌodi, erumolo ezira ụmara useeriom oomo ologhi ezira mi tọkpo bho ezira moḍuom ologhi obho.

Obhooghia arōoy tẸnaan

⁷Tebum iibha bẹleni, ẹrol kẹzo bho Ẹmugh Iigbia bho ạkpete bho,

“Enyina ẹmoghon moghōrōkō tẸnaan dodon,

⁸íḅulughia ghạ raḅeri enyina kamen obho ạburude enyina irubhe mọḅaar-ẹmu ịnogho mẸnaan obho,

mi taḍuma bho eedi ịlogh Ẹnaan mi tọdegh oonon mi tobꞌeekpu eḍum ọosaar obho.

⁹Tesuo, pesi eedi ịlogh ạami mi tọdegh oonon,

toomo ibha eedi ịmiin moḍighi obho ạami uḍighi taghisigh eedi merubal ạsia bho.

¹⁰Tebum iibha bẹleni, pạami uḅẹebhẹni mologhi ạmi ụnogho mọoke popo,

ụkpete kua, ‘Eedi nẹpionuman ghạ nị nị be mi tibhꞌologhi eedi,

eedi dẹtuugha ḍio elōghōm raabōom ạmi.’

¹¹Molo ologhi ạmi aḅẹebh ạami ughir ịzo ughōl kua, ‘Eedi iḍigh mu tobhooghia bhꞌạmi.’ ”

¹²Tiibha bho bẹleni, iiḅi aburumōr, igona lōor enyina molo onyiin enyina ọteeny ọkarabh ologhi olo omōruōm olo, aḍionom ạman mẸnaan obho aḍum nị ạrol kamen kamen obho. ¹³Kpẹlen nꞌipa, onyiin ạlogh ạvo ạnogho monyiin moomo aḍuma, kẹzo bho ezira ụmoghonyan mẹmu “adodon” obho, molo ịkarabh iibiōghōm enyina ẹlogh tọḅaar-ẹmu enyina. ¹⁴Ezira nopin ạni bin mi taKraist, erumolo ezira ụmaar umōruōm tọḅel ọoghuanaan ologhi obhꞌezira usi tikunughi.

¹⁵Ẹegia iigbia bho ạkpete kua,

“Enyina ẹmoghon moghōrōkō tẸnaan dodon,

íḅulughia ghạ raḅeri enyina kamen obho ạburude enyina irubhe mọḅaar-ẹmu ịnogho mẸnaan obho.”

¹⁶Ikōr arōoy mobo bho ịmoghon bọ moghōrōkō tẸnaan kirubhe ni mọḅaar-ẹmu ịnogho zodi obho? Eedi obo bho aMozis areliom amutiom tebhugh obhꞌIzipt obho ḍio gạ? ¹⁷Ẹnaan ạle ạnogho mikōr arōoy moomo erubal ạsia? Obo bho iḍighi mịkarabh, ibha imeleghu ịbhozu tobꞌeekpu eḍum obho ḍio gạ? ¹⁸Ikōr arōoy mobo bho Ẹnaan aghir ịzo aghōl meedi iḍigh io tobhooghia bhꞌodi obho? Obo bho ịḅaar bọ mẹmu ịnogho odi obho ḍio bẹle? ¹⁹Enyina nẹmiin, ebum obho eedi imōruōm io bho kiḍighi keedi irue ḍio moḍigh ạni.

¹Tebum iibha bẹleni, suo nọoḅelemaan ezira moguan obhꞌodi molo ezira kọghi koḍigh kobhooghia bho, pitu oghiilaan nꞌeegu aḍien molo ụva ọmiin mobho onyiin enyina otẹn ạni ḍio aḍigh tobhooghia bho. ²Ebum obho ezira nọomoghon kẹzo bho eedi ịmoghon nạ mooḅi adōm obho. Iiḅi olo adōm obho eedi ịmoghon obho aḍighi ạnogho eedi olo, ebum obho eedi ipinom io nꞌologhi omōruōm obho. ³Ezira obo bho noomōruōm obho pobo noḍigh tobhooghia bho. Idi nạ kẹzo bho odi ạkpete bho,

“Ạami naaghir ịzo tạlile bhꞌạmi akōl kua,

‘Eedi iḍigh mu tobhooghia bhꞌạmi.’ ”

Odi ạkpete miibha bho toomo ibha aruḍuma oḍighi obhꞌodi neesi tikunughi kamen obho odi ạlem bọ mẹmar-arōoy obho. ⁴Tonyiin esi mi tọbhereer iigbia bho ụkpete kua milo igboloman nꞌogbẹbhiōm oḍual aḍuma bho, “Ẹnaan abhooghia toomo ariḍighi obhꞌodi, mogbẹbhiōm oḍual aḍuma bho” ⁵Keḍio odi amina ạkpete nạ kua tesuo, “Eedi iḍigh mu tobhooghia bhꞌạmi.” ⁶Ịḅel obo bho ibhira ịmoghon mọnuekpete ooḅi adōm obho iḍigh ạni ḍio tobhooghia bho, ebum obho eedi imōruōm io bho. Toomo ipa ẹkona, kir ẹde ilo ụḅelemaan moḍigh ạni tobhooghia bho. ⁷Iibha bho nẹgba mobho Ẹnaan naagu mọnon aḍuma aseeri, “Aadon.” Odi ạkpete miibha bho kageedi mi tọnu taDevid mibha ezira nooghōl ghạ tọbhereer iigbia bho,

“Enyina ẹmoghon oghōrōkō tẸnaan dodon,

irubhe ghạ mọḅaar-ẹmu mẹnogho mẸnaan.”

⁸Ughōl aJosua areliom ni rōoy obho aḍighom tobhooghia bho tẸnaan bọ, Ẹnaan kụḍeghe mụ milo igboloman nꞌọnon aḍuma. ⁹Ẹzo bho idi obho, aḍuma obhooghia odi nini nꞌarōoy tẸnaan; ¹⁰molo kōoy kōoy olo aḍigh tobhooghia bho tẸnaan, pobhooghia nạ tariḍighi obhꞌodi kẹzo bho odi abhooghia tariḍighi odi obho. ¹¹Itu oḅe magey molo ezira oḍigh ạni tobhooghia bho tẸnaan, molo onyiin ezira ọteeny ạni mọḅaar-ẹmu obho ạḅele moḍigh tobhooghia bho.

¹²Ilōghōm mobho oghōrōkō bho tẸnaan odi nꞌaghuḍum naḍighi mọoghuanaan oḍighi, nꞌobho arōbh ni apu mạmugem ẹgham ịzal ạman, naagbooy kua be nwạny nwạny nwạny mesi obho utul maghuḍum nꞌẹmugh ōoy obho, nꞌesi obho igibh obho nꞌịikpo bho iizuan obho, ạtu mịiruan ạnogho mibha idi tiloghi arōoy obho. ¹³Bọbon ạar olo totue ọḅoki mẸnaan olo. Kạar kạar olo odi ạlem ukpẹerōn ni oseeri mozōol taghisigh odi obo bho ezira tọmaranuan ọgba kạar kạar olo ezira uḍighi ọnogho bho.

Uvẹmụ ōoy iiḅua olo aaleeny mạJizos olo

¹⁴Tebum iibha bẹleni, itu ọbham ọghuemi mibha ezira umōruōm obho, tebum obho ezira nọoteeny muvẹmụ ōoy iiḅua olo ọnon olo aaleeny olo bho, obho naaḍigh ạghi tạkar aghisigh tẸnaan obho. Odi, ạJizos Kraist Ọony obho tẸnaan. ¹⁵Uvẹmụ ōoy iiḅua bhꞌezira ōoy olo otue ghạ ḍio mọsuanaan ạghusan ezira obo bho asilōor obho idugh obho ḍio. Odi ōoy olo ụdegh zodi uunon toomo araabōom kezira keḍio ịkarabh olo odi ạpiom olo nolo. ¹⁶Tebum iibha bẹleni, itu, uzuum io lōor, otirom ọghi otuan ạni mẹtolom ọdaam ẹma bho tẸnaan obho ạlisebh idi obho, molo ezira ọteeny ọsu ạghusan nꞌaluunwo ilo ọlogh ạvo ọnogho ezira kamen kamen olo ezira nogbẹel.

¹Kuvẹmụ kuvẹmụ ōoy iiḅua nọson ghạ togbo arōoy ọseghe mobhin taḍien eedi oḍighi oḍighi ọnogho Ẹnaan, nꞌoḅo iiḅua ọnogho aluunwo ootōl ịkarabh arōoy obho. ²Odi naalōghōm mẹzo ọminoghom nꞌobo odi nịvo nịvo ạteeny ạni nạ medughom alōor obho. ³Ebum obho alōor odi nịvo nịvo nadugh ghạ nạ nị obho, odi oḅo ḍio miiḅua ạnogho mẸnaan milꞌịkarabh arōoy obho be, odi taḍighi ạni nị milꞌịkarabh odi. ⁴Bọbon ōoy olo taḅum eghuan uvẹmụ oḅo miiḅua bho ạlogha talōor odi olo. Ẹnaan pobo napeleghi ghạ kẹzo bho odi abheleghi mEron obho.

⁵Onyiin ẹzo bho nạ, ạJizos Kraist oḅum io ni atẹn muvẹmụ ōoy iiḅua bho. Odi obo bho ạkpete kua ạnogho zodi,

“Ạna Ọony ạmi, ạami Ọde onuma dodon”, obho ạson odi ạseghe.

⁶Odi amina ạkpete nạ kua tọnon esi,

“Ạna tatu mōoy iiḅua kamen kamen,

koḍigh ōoy iiḅua obho tạMelkizedek.”

⁷Taghuḍum odi mi tiikpōogh obhꞌodi, ạJizos abhin timulughu eḍi nꞌizin aakpulughu agbẹel obo bho tatue ni ạpel ạseghe odi tọbho bho mọbhel odi. PẸnaan ạmoghon oghōrōkō bhꞌodi tebum osōoriōm alōor obhꞌodi nꞌeegu aḍien obho odi ạnogho zodi Ẹnaan obho. ⁸Toomo ibha odi aru mỌony tẸnaan obho ẹkona, odi abhin tọmiinom obhꞌodi ạtuugha moghiilaan. ⁹Amen uru uḍighi zodi agbẹbh ạman, podi aru mebōom obho oomo obo bho ighiilaan odi obho tẹteeny mịbhelegha olo kamen kamen, ¹⁰suo Ẹnaan abhin zodi amutiom moru uvẹmụ ōoy iiḅua koḍigh ōoy iiḅua obho tạMelkizedek obho.

Aliiki olo arōoy ipẹ ẹḍua tẸnaan

¹¹Ịkanya ọkpo idi mọḍeghe ilo igboloman nꞌiibha bho, molo ẹkpar magey mọgba ẹmu obho omutiom tebum obho enyina ikẹm ghạ ḍio mọmoghonyan ọkpo bho. ¹²Esiibha nẹeneghiom molo enyina kẹtughumiom mịnon, keḍio enyina negbẹel ni mobo kạtughumiom enyina mịḅel ikpo A B C D ọnuekpete bho tẸnaan. Kpẹlen nꞌolo enyina kenomi mikpo araḅōkō, enyina nẹmaam ni mạamaam. ¹³Kōoy kōoy olo nạmaam ni mạamaam, odi nini mọony ạvo, olo dolōghōm io mịkarabh nꞌiiḅi. ¹⁴Ikpo araḅōkō aḍian arōoy ilo neegbẹbh mẹmu, obo bho nẹelogh ẹmu eedi ịinama ilōghōm makẹrẹkẹrẹ ịkarabh nꞌiiḅi obho.

¹Tebum iibha bẹleni, itu orōbh mạ A B C D ịtughumiom obho taKraist orele ọghi taghisigh ogbẹbh ẹmu olꞌezira. Ezōor umina mu ọke tẹḅel egbiom obho, mọtughumiom enyina moghiraan tiḍim aghuḍum ẹmar-arōoy obho ạar oḍighiom olo bho momula oru omōruōm Ẹnaan, ²nꞌilo igboloman nꞌozua ạmuum nꞌọḅamaghi ạravo tẹmu, nꞌoḅerenu tọbho bho, nꞌọru ịiruan. ³Itu ọghi ghạ taghisigh be. Iibha pibha ezira toḍighi, erumolo Ẹnaan ạlogh ạvo ạnogho ezira.

⁴Ẹkpar magey momina omulumi obo bho neemeel ịḍua tomōruōm obho, eedi keghiraan tịkarabh eedi, eedi obo bho neeḍigh ghạ tẹḅaal, ịinama mẹnogho bho tẸnaan, ịteeny ạni bin tẸmugh Iigbia bho. ⁵Eedi nẹenama elōghōm mobho ọnuekpete bho tẸnaan aru mooḅi, elōghōma nạ talōor eedi mịnyaam aghuḍum obho natu obho. ⁶Keedi ẹḍua tẸnaan, tẹkpar ni magey momulumi eedi, ebum obho eedi neemina nẹkan mỌony obho tẸnaan mi toorẹeny ẹmigheri obho ẹloki nạ zodi rẹgheer obho.

⁷Ẹnaan nạnogho lịsebh made bho nạpoghol ghạ mẹlebhe bho nạlobhom zodi obho momute eḍian ọnogho obo bho uḅẹbhanaan obho. ⁸Kodi ade bho asi miiḅulom nꞌịigho be, pạar oḍighiom odi olo. Amen itōnyōgh odi natuan, keḍio ikunughi obho, odi olo ọsu ạnyan.

⁹Keru nạ molo ezōor nọḍeghe miibha bho, iiḅi aburumōr, ezōor nọotua ạar olo teḍighi enyina olo. Ezōor noolōghōm mobho nọosebhom enyina miiḅi ọkpo mi tịbhelegha bhꞌenyina. ¹⁰Ẹnaan olo kọkarabh ọola otu ạkoti. Odi oḅulo ḍio moḍighi obho enyina neeḍighi obho, bolobolo etulan obho enyina netulan odi mi tọlogh ạvo bho enyina ịlogh, kenyina nemina ni nạ nẹlogh, ẹnogho maburumōr enyina mi taKraist obho. ¹¹Oomo ibha ezōor nọva bho, pilo oomo enyina, kōoy kōoy ạmara aḍighi amutiom monyiin odi ibha enyina ibhin ịkiom tọḅel egbiom obho, ninii enyina esi tikunughi obho molo enyina elōghōm mạkar ibha enyina neḍuom ologhi obho. ¹²Ezōor ụva ḍio molo enyina keru rōoy ạrugbuor. Ezōor nọva molo enyina kẹta rōoy ibha imōruōm mẸnaan nꞌalideny ịghi ibhin mibha odi Ẹnaan aguanaan obho.

Oguan tẸnaan ubi ghạ ḍio

¹³Amen obho Ẹnaan aguan bọ mEbrạhạm moguan obho, ẹzo bho ọnon olo apu odi olo odi kabhin ḍien odi kaghirom ịzo olo bho, podi aghiran nꞌalōor odi, ¹⁴ạkpete kua, “Ạkar agey nạ nị, ạami tạsebh ni ạna, ạnogho ạna mọlogh ạnwuny tạman onuma.” ¹⁵Talideny nꞌọkparami alōor obho tEbrạhạm, podi abhin moguan obho tẸnaan. ¹⁶Amen olo ōoy natu moghir ịzo napin ghạ taḍien ọnon ōoy olo apu zodi akirom, keḍio tobo bho ighiran ịzo bho, ịzo pobo nasōbh ghạ rạakpe ịkanan. ¹⁷Ẹnaan ạva moḍighi omutiom oḍeeriom molo obo bho tepin bọ moguan obho kelōghōm mobho odi onwe ḍio moguan obhꞌodi podi ạḅaram nꞌịzo. ¹⁸Ịzal bhibha ibha inwean ghạ ḍio bho pibha iḍighi kulōghōm mobho Ẹnaan ọgba ghạ ḍio miben, molo nẹkuemi ezira obo bho nooḍigh ạḍigalaga eḍigh-otu mi todi obho mọmaar oḅolom oḍuom ologhi obho odi taghisigh ezira bho. ¹⁹Oobho pobho ạmaar ạbham ạkpo maghuḍum obhꞌezira koghuugh olo ụkasiom agbirigbiri oḍuom ologhi olo aḍigh kakpiribh ki tologhi ạman oḅile ukpe bho usōbhōm mẹkpe iigbia obhꞌạnyu obho. ²⁰ẠJizos naatẹnōm ghạ zezira ạki aḍigh mi tesi ezira. Odi naatẹn muvẹmụ ōoy iiḅua kamen kamen kẹzo oḍigh ōoy iiḅua, ạMelkizedek.

ẠMelkizedek ōoy iiḅua bho

¹Odi ạMelkizedek obhobho ọolema ạSalem nꞌōoy iiḅua tẸnaan obho ạbugh bọ apu obho. Ẹzo bho Ebrạhạm ạḍua natughẹel mi tẹgham obho odi ạghi ạzeey rụulema bho, podi ạMelkizedek aru ạmiinan odi ạnogho zodi lịsebh. ²Ebrạhạm aru ạḍi moomo ọkpo bhꞌodi ḍiōbh abin, ạseghe bin ạnogho zodi. Ọḅel ẹmu aḍien odi ughōl “Ọola olo ạneghe ni ạman taghisigh tẸnaan.” Nꞌẹzo bho ughōl nạ zodi ọolema ạSalem obho, pẹmu aḍien odi ughōl nạ “Ọolema ekima.” ³Eghun otu odi, nꞌọde odi nꞌoniin odi ụgba ḍio, ulōghōm nạ ḍio mamen nꞌẹzo ụmar odi nꞌọbho odi. Odi odi kỌony obho tẸnaan, odi mōoy iiḅua kamen kamen.

⁴Enyina nẹmiin mẹzo odi ạbugh asi. Ebrạhạm onyiin obꞌọde arōoy aJu obho ạḍi moomo ọkpo odi mi tẹgham obho ḍiōbh abin ạseghe bin ạnogho zodi. ⁵Keḍio oomo ạnwuny ọobhe taLivai, ibha neḅo miiḅua bho, ụto ụnogho mi taraalōgh obho mobhin ghạ onyiin abin mi taḍiōbh abin ọkpo ibha arōoy aIzirẹl ịteeny obho. Iibha bho nemōrō kua meedi ebhin tạkar aburumōr obhꞌeedi, toomo ibha eedi iru nạ mạnwuny ọobhe tEbrạhạm obho. ⁶ẠMelkizedek olꞌọobhe taLivai io, keḍio odi abhin nạ nị nạ monyiin abin mi taḍiōbh abin ibha Ebrạhạm ạteeny obho, ạnogho zodi obo bho naabhin moguan tẸnaan obho lịsebh. ⁷Ẹzo ọgba olo, obo bho nạnogho lịsebh obho apu ạni nị kua mobo bho napin lịsebh obho. ⁸Tamen arōoy iiḅua aLivai obho, arōoy ilo nẹebhozu ibhin bin taḍiōbh abin arōoy obho, keḍio tamen tạMelkizedek, ōoy olo odi nꞌaghuḍum abhin, kẹzo bho ẹegia bho ạgba bho. ⁹Noolōghōm mobho aLivai obo bho abhin ghạ tarōoy bin mi taḍiōbh abin obho aḍigh ạni nạ nꞌEbrạhạm ạnogho ạni nạ bin odi. ¹⁰Dọmar io zodi aLivai men ạMelkizedek ạghi ạmiinan bọ mEbrạhạm obho.

¹¹Tẹzo bho ụseghe rōoy aLivai moru arōoy iiḅua bho kọlogh olōgh obhobho ọnogho marōoy aIzirẹl. Kughōl oḍighi arōoy iiḅua aLivai obho ịneghe nị ẹman bọ, kugbẹel mụ mọnon oḍigh ōoy iiḅua olo odi kạMelkizedek momina omute oru, kulegheri kụtolom marōoy Eron obho. ¹²Ẹzo bho noonwe meghun-otu arōoy iiḅua bho, iizuan ni nạ monwe olōgh obho. ¹³Odi obo bho ụkpete miibha bho nogboloman obho, olꞌọnon eghun-otu olo deḍighi ghạ ḍio moḍighi mi tẹede iiḅua bho. ¹⁴Bọbon ōoy olo olōghōm io mobho ạJizos aru molꞌeghun-otu aJuda olo. Tilo igboloman nꞌoḅo iiḅua, bọbon ạar olo aMozis ạkpete milo igboloman nꞌeghun-otu obhobho olo.

Ọnon ōoy iiḅua olo odi kạMelkizedek

¹⁵Iibha bho nẹemaar emute kua gōogh tamen obho ọnon oḍigh ōoy iiḅua olo odi kạMelkizedek amute aru obho. ¹⁶Ubhin io taraalōgh nꞌeḍighiom ạar arōoy kotẹnẹ zodi mōoy iiḅua. Ubhin tịnyaam aghuḍum olo ikunughi olo otẹniōm odi. ¹⁷Ẹegia bho ạkpete kua, “Ạna tatu moḍigh ōoy iiḅua kamen kamen kạMelkizedek.” ¹⁸Ebum obho ugbaany olōgh obho ọkua ḍio, ạar oḍighiom olo nạ bho, pụḅughe tọtu. ¹⁹Araalōgh obho taMozis bọbon ạar olo arue moḍighi ọneghemi olo, keḍio esiibha noobhin otu moḍuom ologhi olo ạneghe apu olo ezira tọḅol ọki otuan Ẹnaan.

²⁰Oobho bho ughōl io ughirom io mịzo. Amen obho utẹnẹ marōoy ipedi obho marōoy iiḅua bho ughirom io mịzo. ²¹Keḍio ạkar odi oobho bho Ẹnaan aghirom odi mịzo ạkpete kua,

“Obạmọogh obho naaghir mịzo, olo odi onwe ḍio,

‘Ạna tatu mōoy iiḅua kamen kamen.’ ”

²²Oobho bho aḍighi mạJizos aru mọbhaghaam ịzo olo ạneghe apu ạni nị kua.

²³Ọnon akẹrẹkẹrẹ odi. Arōoy iiḅua ipedi obho ịka nị be, ebum obho eedi ịbhozuuy itue mu moḍighi oḍighi obho. ²⁴Keḍio ạJizos odi kamen kamen, molo oḍighi oḅo iiḅua bhꞌodi utẹnẹ ḍio mọnon. Odi tạvo odi kamen kamen. ²⁵Iibha neeḍighi molo odi natue ni siibha bho nꞌoomo amen mọbhel obo bho ịḍua todi ku netu tẸnaan obho, ebum obho odi aḍum ni ạrol kamen kamen naakpulughu mẸnaan ạnogho zeedi obho.

²⁶Ẹkar eezuan molo ezira kọteeny muvẹmụ ōoy iiḅua olo odi kua, olo bọbon ịkarabh ilo, ọteeny nạ ḍio mịghor ạman, ọpuena nạ ḍio lōor odi mi tịkarabh, olo ụgbarion zodi mi tịkarabh arōoy, keḍio ulegheri ụsiine zodi upẹlōghōm mạnyu obho. ²⁷Odi olo karuvẹmụ arōoy iiḅua ipedi obho mọtun ghạ ạar ọnogho Ẹnaan moomo aruḍuma, obhira ọtu ạar ịkarabh ẹmu odi kogbi ọtun ibha ịnon arōoy. Odi ạtun mạar monyiin amen be, ọnon amen olo, tamen obho odi ạtunom mạar lōor odi obho. ²⁸Araalōgh obho taMozis ịson rōoy ilo igbẹbhan io moru aruvẹmụ arōoy iiḅua, keḍio ọnuekpete ịzo bho, obho araalōgh obho ibhira iru obho, ịson ịseghe mỌony obho naagbẹbh ạman kamen kamen obho.

ẠJizos uvẹmụ ōoy iiḅua ezira

¹Ạkar ogbogbo ẹmu odi ạraḍeghe bho poobho: ezira nọoteeny mạkar uvẹmụ ōoy iiḅua olo odi kua, obho odi delede mi toḍiom ạvo ẹtolom ọola bho ạsiiniom bọ apu mi tạnyu obho. ²Ạkar esi ibꞌiigbia bho pesi odi odi naḍighi moḍighi uvẹmụ ōoy iiḅua bho, tạkar otu iikpulughu obho ụkasiom marukpe ōoy oḅōgh io bho, Obạmọogh obho nịvo nịvo kaḅōgh obho.

³Kuvẹmụ kuvẹmụ ōoy iiḅua, ụson useeri mobhin aluunwo arōoy ọtunom ạar ọnogho Ẹnaan. Tiibha bho bẹleni, uvẹmụ ōoy iiḅua bhꞌezira tạteeny ạni nị mạar obhin ọtunom ạar ọnogho Ẹnaan. ⁴Odi odi ni tesuo ade bho bọ, bọbon ạar olo kuḍighi odi aru mōoy iiḅua olo, tebum obho arōoy iiḅua idi nẹtunogh mọkpo ẹnogho mẸnaan tẹzo eḍighiom ạar araalōgh arōoy aJu obho. ⁵Oḍighi obhꞌeedi mi tesuo ade bho idi kafoto nꞌiikōogh ibha idi tạnyu obho. Idi nạ kẹzo bho, amen obho aMozis natu mọkasi otu iikpulughu obho ụkasiom marukpe bho Ẹnaan ạto ạkpete kua ạnogho zodi,

“Uḅulo ghạ bọbon onyiin ạar, tụugh aḍighi mẹzo bho uḍeeriom ạna mi tạnyu obꞌeegum obho.”

⁶Keḍio ẹzo bho idi obho, nọonogho maKraist moḍighi oḍighi iiḅua olo apu ạni nị kua mibhꞌeedi, kẹzo bho ịzo bho odi aghiran rōoy nꞌẸnaan obho ạneghe nạ apu mobhꞌeedi obho, ebum obho ịzo bhꞌodi ughirom toguan ọkpo ilo ịneghe nạ ipu obho.

⁷Ughōl ọḅel ịzo bho ạneghe nị ạman bọ kugbẹel mu mogbẹbhiōm ịzal. ⁸Ẹnaan nạamiin mobho arōoy obho neeḍighi ikōrōnuan tịzo bho kodi ạkpete kua,

“Obạmọogh obho nạakpete kua,

maruḍuma netu molo odi tanwe akiran ịzo marōoy aIzirẹl nꞌoghōol otu taJuda.

⁹Ọrol mụ kịzo bho ạami ughiran nꞌạburude eedi obho,

mi taḍuma bho ạami ụbham eedi tạvo umutiom togbo ade ebhugh aIzipt obho.

Eedi ịbham io mịzo bho ạami ughiran nꞌeedi obho,

molo ạami uunon eedi utughuneen ḍien, pẹzo Obạmọogh obho ạkpete.

¹⁰Oobho odi ịzo bho ạami takiran nꞌeghun otu taIzirẹl obho.

Obạmọogh obho ạkpete kua, maruḍuma bhibha neetẹn pọno ọlogh araalōgh obhꞌạmi mi tiloghi obhꞌeedi,

ọgiom tekpom obhꞌeedi,

keḍio ạami tatu mẸnaan eedi,

eedi etu marōoy ạmi.

¹¹Onyiin eedi olo tamina ạtughumiom mọnon olo mu.

Oōy olo tamina ạkpete nạ kua ạnogho mọnon mu

‘Lōghōm Obạmọogh obho,’ olo mu.

Oomo eedi telōghōm ni ạami ẹman,

ạseghe tọbam asi togbōgh.

¹²Ạami tạteeny ni mọsu ạghusan aḍien mi tịkarabh eedi,

aḅulo kịkarabh kịkarabh ilo eedi iḍighi.”

¹³Tạraḍeghe ilo igboloman nꞌimoom ịzo bho Ẹnaan naaḍighi mọḅel obho atẹnẹ mugbaany ạar. Keḍio kạar kạar olo naatẹn mugbaany nạkaghanyu tapẹ ni ạḍua.

Iikpulughu ibhꞌade obho nꞌibhꞌạnyu obho

¹Ạkar odi ọḅel ịzo bho ạteeny nạ maraalōgh ẹzo ookpulughu Ẹnaan nꞌotu iikpulughu olo arōoy iḅōgh nọpam ghạ ni okitonom. ²Todi otu iikpulughu obho osōbh ọnon ẹkpe olo ughōl ẹkpe iigbia. Tologhi obho, ọtodi nꞌizebele nꞌạbred obho ụnogho mẸnaan obho. ³Tạman ogbẹbhiōm ịzal ukpe bho ụkpo usōbh obho, pesi ẹkpe bho ughōl bọ ẹkpe ibꞌiigbia bho odi. ⁴Tologhi obho ẹede agold obho nọsu ghạ mọkpo ooḅi eḍu obho nꞌeḅina ịzo bho obho oomo odi nọomaar uḅologhom magold obho, mibha idi. Tologhi eḅina bho okōtō agold nꞌạmanna mobho idi, nꞌẹḅu obho tEron obho naasi sigo bho, nꞌịzal iibolom ạrubharakpar obho ụge mịzo bho. ⁵Tạnyu eḅina bho ạKerubim ịmara ẹseghe masubhōm obhꞌeedi ekpereghiom mesi ọḅelemaan ịkarabh obho. Oobho amen ọgba kạar kạar ọman tiibha bho ḍio.

⁶Pẹzo ụmaar ụtooghi mọkpo bho usereghi. Tọḅel ẹkpe iigbia bho pesi arōoy iiḅua bho neḍigh ghạ eḍighi moḍighi eedi moomo aruḍuma. ⁷Keḍio tẹkpe bho ikunughi obho uvẹmụ ōoy iiḅua bho be naḍigh ghạ men mẹmu ạla. Odi nạpam ghạ mạzara aḍighom mọtunom ạar ọnogho Ẹnaan tebum ịkarabh odi nꞌịkarabh ibha arōoy obho iḍighi ịpionuman taghisigh tẸnaan obho. ⁸Ẹmugh Iigbia bho abhin ạgba amutiom tịitooy bhibha mobho ebōom ọḅol oḍigh tẹkpe ibꞌiigbia bho doghuuron io tamen olo obꞌukpe bho ụkpo usōbh obho odi nini. ⁹Iibha bho iikōogh ibhꞌạnyu obho mọnogho ạnwuny ọoke obhobho. Iibha bho nẹgba emutiom mobho aluunwo ọtun ạar obho nꞌọtunom ịnam ọnogho mẸnaan obho itue ḍio moḍighi ologhi obo bho naakpulughu mẸnaan obho kagbẹbh kạman. ¹⁰Iibha bho igboloman nꞌariḍian ole, nꞌịpoghol, nꞌoḍigh kẹrekere eḍighiom ạar ọḅaaleni alōor. Iibha araalōgh ozu alōor obho, ibha ụrol noḅōruōm mamen Ẹnaan tatu anweeghi moomo ẹmorokpo bho.

¹¹Keḍio tamen obho aKraist aru aḍighi muvẹmụ ōoy iiḅua iiḅi ọkpo bho neeru obho, podi ạḅol tebōom otu iikpulughu obho agbẹbh nị ạman obho, amina nạ ạneghe apu obho, obho uḅōghōm io rạvo, obho namōrō akōl muḅōgh io tesuo ade bho, ¹²aḍigh tẹkpe ibꞌiigbia bho monyiin amen be. Odi oḍighom io mịḅaal ivel bolobolo ilo ạnam ọtunom ạar obho, odi ạseghe kụ mạkar ịḅaal odi abhin ạtaam ezira kamen kamen. ¹³Eru kạar olo ịḅaal ivel nꞌạranam, nꞌịiru ọtun ạar obho ụsu nyạn mọony ạnam obho, ụseghe ụsaraghiom rōoy obho neḍighi eedi obo bho neeru rōoy ẹeniir tẹzo eḍighiom ạar eedi obho nẹḅaaleni, ¹⁴kịitua mẹzo ịḅaal taKraist teḍighi esi, odi obo bho abhin tẸmugh obho ọpo ghạ ḍio bho ạtunom lōor odi mạar ạnogho mẸnaan tilo ịkarabh ịkpabh io nẹkpabh zodi obho, tạḅaaleni miloghi obhꞌenyina mi tiimughaan ọkpo moḍighianaan oḍighi mẸnaan obho aḍum ni ạrol kamen kamen obho.

¹⁵Tebum iibha bẹleni, odi aKraist pọokpaany omoom ịzo bho, molo obo bho Ẹnaan naabheleghi obho epin ạni bin oguan ạlisebh obhꞌodi ibha tẹtol kamen kamen obho. Iibha bho temute ni kua tebum obho ōoy nạabho mọta eedi mi tịkarabh obho eedi iḍighi tọḅel ịzo bho.

¹⁶Kamen kamen olo ụmoghon mọnuekpete ikunughi ōoy nọgba ghạ nị omutiom mobho odi obo bho ạkpete bho nạabho. ¹⁷Ọnuekpete ikunughi ōoy ọla ḍio mạar tamen olo odi odi nini nꞌaghuḍum, odi nạabho keḍio togbi mọtuom ạar. ¹⁸Iibha kiḍighi kobhin nạ mịḅaal oḍighiom mọḅel ịzo bho ọneghemi. ¹⁹Tamen olo aMozis naaghōl moomo araalōgh obho ạnogho rōoy obho, podi ọseghe ịḅaal ạnam nꞌivel obho, nꞌạmuum, nꞌokōkōgh awul nꞌoḅẹerōm etẹrẹ ọsaraghiom ạkar odi ọbhereer obho nꞌoomo arōoy obho, ²⁰ọkpete ekua,

“Iibha ịḅaal ịzo bho Ẹnaan aghiran enyina bho.”

²¹Onyiin ẹzo bho nạ mobho odi aMozis tạsaraghiom mịḅaal obho motu iikpulughu obho nꞌoomo ọkpo obho idi totu iikpulughu obho. ²²Agey nạ nị, taraalōgh obho, ịbam isughō kōl kạar kạar ubhin ghạ mịḅaal koḍighi ọḅaaleni, molo uzu ḍio mịḅaal ọḅelemaan ịkarabh olo.

Ọtun ạar obho taKraist naatōl ghạ mịkarabh

²³Iibha bho iru miikōogh ạkar ọkpo ibha idi tạnyu obho milo iizuan nị moḍighi emutiom ọḅaaleni kẹzo bho nạ. Keḍio ạkar eedi ọkpo bho idi tạnyu obho negbẹel mọtun ạar ilo ịneghe ạni nị kua ipu. ²⁴AKraist oḍigh io tẹkpe iigbia olo uḅōghōm rạvo arōoy, obho aru mookōogh agey obho, odi ạghi aḍigh tạnyu Ẹnaan obho nịvo ịvo, tesi obho odi odianaan ezira mi taghisigh tẸnaan obho. ²⁵Uvẹmụ ōoy iiḅua arōoy aJu obho aḍigh ghạ tẹkpe iigbia moomo kạla kạla nꞌịḅaal ilo itu ḍio milꞌodi, keḍio aKraist ọtunom io lōor odi mạar mọlokor amen, ²⁶iru ḍio kua bọ, kōl kamen obho ụlem ẹmar-arōoy obho odi nạamiinom mọlokor amen. Kpẹlen nꞌipa, odi amutiom lōor odi monyiin amen be tamen olo ọoke oomo amen natuan tikunughi mobhin ọtun ạar alōor obhꞌodi ootōlōm ịkarabh. ²⁷Onyiin amen be mobho ōoy tạpo, keḍio ipa neetẹn pẸnaan ọru ịiruan ọnogho odi. ²⁸Onyiin ẹzo bho nạ mobho ụtunom mạar maKraist mootōl ịkarabh ọlogh arōoy. Odi tamina ni atu mogbẹbhiōm ịzal amen. Ọtuan mụ mịkarabh arōoy karu, tatu mọbhel obo bho neḅōrō zodi obho.

¹Araalōgh arōoy aJu obho iikōogh iiḅi ọkpo ibha netu taghisigh obho be, ạkar eedi agey obho ḍio. Ạla ạgba mạla atẹn, onyiin odi ọtun ạar obho mobho nọtun ghạ kamen kamen. Keedi araalōgh bhibha teḍighi ẹko kepin ọtun ạar obhobho eḍighi rōoy obho netu tẸnaan obho ẹneghe ẹman? ²Kughōl obo bho neekpulughu mẸnaan obho nẹeḅaal ẹman mi tịkarabh eedi, eedi kilōghōma mu mobho eedi neeḍighi mịkarabh, pọtun ọkpo ẹkona kiḍigh teḍum. ³Keḍio tọtun ọkpo bhibha, nẹetuemi rōoy obho mịkarabh eedi moomo kạla kạla, ⁴ebum obho ạzara ạranam nꞌivel itue ḍio eetōl mịkarabh arōoy etughuneen obho.

⁵Tebum iibha bẹleni, tamen obho aKraist natu moru tẹmar-arōoy obho, podi ạkpete kua ạnogho mẸnaan,

“Ạna ọva ḍio mobhin ịnam ọtunom ọkpo ọnogho onuma,

keḍio ạna uru ụseghe lōor ōoy ụnogho ạami.

⁶Obhin ịnam ọsu ạnyan ọman ọtunom ạar mi tẹede bho nꞌọtun ạar mootōl ịkarabh iḍigh io tologhi onuma.

⁷Keḍio ạami umulumian kua zịna,

‘Eey Ẹnaan, oobho ạami, moḍighi ibha idi tologhi onuma bho,

kẹzo bho nọogianaan ạami mi taraalōgh obho.’ ”

⁸Tibha odi abhira ạkpete kua aghōl, “Mobhin ịnam ọtunom ạar ọnogho onuma, bolobolo ọtunom ạar mịnam ọsu ạnyan tẹede bho, nꞌọtun ạar mootōl ịkarabh, ạna ọva ḍio, iḍigh nạ ḍio tologhi onuma” bho uḍighi tẹzo ịto araalōgh obho. ⁹Keḍio odi amina ạkpete kua, “Eey Ẹnaan, oobho ạami, moḍighi ibha idi tologhi onuma bho.” Tiibha bho pẸnaan ạka mugbaany obho momutiom omoom obho. ¹⁰Ebum obho ạJizos Kraist aḍighi mibha idi tologhi tẸnaan obho, pịḍua tọtun ạar obho odi ạseghe lōor odi ạtunom obho, aḍighi aatōl oomo ezira ạḅaaleni mi tịkarabh ezira monyiin amen be.

¹¹Oomo arōoy iiḅua aJu obho ịmara ghạ moomo aḍuma eḍighi moḍighi oḅo iiḅua ọtun ạar ilo iitōl io ẹseghe mịkarabh ōoy moomo amen. ¹²Keḍio aKraist aḍighi mọtun ạar ootōl ịkarabh monyiin amen be, ọtun ạar olo ạneghe magey, tạtol nạ kamen kamen. Odi aḍighi ạḅele pạghi ạrol delede mi toḍiom ạvo tẸnaan. ¹³Tepa pesi odi odi naḅōrō men Ẹnaan tapin mobo ọlogh aḍien odi etu moḅeleriom asike odi. ¹⁴Tonyiin ọtun ạar obho podi abhin aḍighi agbẹbhẹghiōm mobo bho nootōl ụḅaaleni tịkarabh obho.

¹⁵Ẹmugh Iigbia bho ẹkona nạgba amutiom nạ tiloghi ezira ạkpete kua,

¹⁶“Oobho ịzo bho ạami takiran nꞌeedi tamen olo aruḍuma bhibha neetẹn.

Obạmọogh obho ạkpete miibha bho.

Ạami tạlogh raalōgh obhꞌạmi tiloghi obhꞌeedi,

ạge nạ tekpom obhꞌeedi.”

¹⁷Keḍio odi amina ạkpete kua, “Ạami ụutua mụ kamen kamen mịkarabh nꞌipesi obhꞌeedi.” ¹⁸Tebum iibha bẹleni, kamen kamen olo nọoḅelemaan mōoy mẹzo bho, ụva mụ mọtun ạar olo ootōl ịkarabh.

Itu oḍuraan otuan Ẹnaan

^19,20Tebum iibha bẹleni, iiḅi aburumōr, tẹzo bho ezira noḍuom ọoghuanaan ologhi mobhin tịḅaal tạJizos ọḅol tomoom ebōom aghuḍum obho odi tukpe bho ụkpo usōbh obho, obho aru bọ miikpōogh odi obho, oḍighom ạni tẹkpe ibꞌiigbia bho, ²¹nꞌebum obho ezira nọoteeny mogbōgh ōoy iiḅua mi totu tẸnaan obho, ²²pitu oḍuraan otuan Ẹnaan nꞌạkar agey ooḅi ologhi nꞌomōruōm, nꞌiloghi ilo nootōl ụḅaaleni mi tịkarabh iloghi, nꞌasilōor ilo nooḅurogh tiiḅi ạmuum. ²³Itu ọkaaniom magey momōruōm obho ezira noḍuom ologhi obho, uuzighina ḍio, ebum obho odi obo bho aguan obho obi ghạ ḍio toguan odi obho. ²⁴Itu onyiin ạatua ghạ monyiin, aḍighi molo onyiin ạlogh ạvo ạnogho monyiin, nꞌetulan nꞌoḍighi iiḅi. ²⁵Ụḅele ḍio nọḅele mookōbhōghian ghạ onyiin esi kẹzo bho ẹde arōoy ịva ghạ ḍio bho. Kpẹlen nꞌipa, onyiin ạghuemi ghạ mologhi onyiin magey tẹzo bho enyina nẹmiin mobho aḍuma tObạmọogh obho nạarol ḅubh obho.

²⁶Tamen olo ezira noolōghōm magey obho kọmaar olōghōm ọrol noḍighi mịkarabh, ọnon ọtun ạar mootōl ọseghe ịkarabh ezira olo mu. ²⁷Oomo ạar ibha isughōnōm poghiil aruugu ịiruan tẸnaan nꞌaruugu ạnyan obho tạnuemi moomo obo bho nẹmaranuan Ẹnaan obho. ²⁸Kōoy kōoy olo asōor olōgh taMozis, ọsu ạghusan aḍien olo, poghigh orōbh, tamen olo ịzal nꞌịraar iru ịgba ịnogho zodi mapum. ²⁹Kịitua moḍigh ạliliom olo tọliom mobo bho aanon atughuneen ḍien mỌony obho tẸnaan, ạgba ạpue mịḅaal omoom ịzo bho tẸnaan obho aatōl odi ạḅaaleni obho, nꞌodi obo bho ạkpete mịkarabh mẸmugh inwo tẸnaan obho? ³⁰Ezira noolōghōm zodi obo bho ạkpete aghōl bọ kua, “Oḍighi omulumian ilꞌạmi, ạami taḍighi ạkpe.” Keḍio amina nạ ạkpete kua, “Obạmọogh obho tạtu ni mịiruan ạnogho rōoy odi.” ³¹Ibꞌaruugu idi momeel oḍigh tạravo tẸnaan obho aḍum ni ạrol kamen kamen obho.

³²Ịitua milo imutenaan enyina taruḍuma ilo neetẹn. Enyina ẹmiinom mịkanya tamen obho ẹḅaal tẸnaan asōorōm miloghi enyina bho, keḍio ạvo olo apuom enyina mi telebhir obhꞌenyina olo. ³³Ẹde amen tọloki enyina rẹgheer togbo arōoy nꞌẹegama alōor, tọnon amen enyina ịmara moḍigh ạni nꞌobo bho nẹmiinom kua bho. ³⁴Enyina ẹsuanaan ghụsan aḍien mobo bho idi mikoli obho, ebhin nạ nꞌọḅaal ologhi ẹghurughiom mamapẹ enyina tamen olo uḅumogh mọkpo enyina, tebum obho enyina neelōghōm mobho enyina nẹeteeny mọkpo ilo ịneghe ni ipu mipa bho ilo tẹtolan enyina kamen kamen obho. ³⁵Tebum iibha bẹleni, irōbh ghạ moḍuom ologhi enyina ibha ịteeny mụkpe ilo ịneghe mịkanya bho. ³⁶Ịgbaan nị molo enyina kẹteeny ologhi ọghurughiom ọkpo, molo enyina etue eḍighi mibha idi tologhi tẸnaan obho mobhin ạni ibha odi aguan obho. ³⁷Idi nạ kẹzo bho ẹegia bho ạkpete bho,

“Ịbam amen be isughō podi obo bho natu obho oru.

Odi obia ḍio.

³⁸Ooḅi ōoy ạmi olo tạneghe taghisigh ạmi tạteeny ghuḍum tologhi omōruōm;

kodi aḍionom ạman, ologhi ạmi orue ḍio ạneghe todi.”

³⁹Ezira arōoy ilo neḍionom ạman epẹ ḍio, ezira arōoy ilo ịteeny ologhi omōruōm nꞌilo nọobhel.

Ologhi omōruōm

¹Ologhi omōruōm pọkar oḍumom tagey obho kụvou mi tọkpo bho ezira noḍuom ologhi obho, nꞌọkar olōghōma talōor ezira obhinom ọkpo bho ezira ụmiin io bho. ²Tebum ologhi omōruōm arōoy ageedi obho keedi eḍigh tologhi tẸnaan.

³Ezira ubhin tologhi omōruōm be ọmoghonyan mobho Ẹnaan abhin ọnuekpete odi be ạlemom ẹmar-arōoy obho, molo ụseghe mibha ụmiin io bho ụlemom mibha nọmiin obho.

⁴Ologhi omōruōm aḍighi kEbẹl ạtun mạar ạnogho mẸnaan milo iḍigh tologhi odi ipu mibha taKen, molo odi aru aḍigh tologhi tẸnaan, ạrol taghisigh odi kooḅi ōoy. Ẹnaan nịvo nịvo ạgba miibha bho amutiom tamen obho odi abhin luunwo odi obho. Odi nạabho, keḍio tologhi omōruōm obhꞌodi, odi nạkpete ni mạar kaadon.

⁵Ologhi omōruōm aḍighi kỊnok ọbho ḍio nọbho, ụseghe zodi ụsiinom tạnyu obho. Bọbon ōoy olo ạmiin odi olo, ebum obho Ẹnaan nạaseghe zodi obho. Ẹegia bho ạkpete kua, mu keḍio tọseghe zodi mu nọoḍa zodi ọmiin mobho odi aḍighi milo iḍigh tologhi tẸnaan. ⁶Keḍio, tughuneen tologhi omōruōm io, bọbon ōoy olo taḍighi milo teḍigh tologhi tẸnaan olo. Ebum obho kōoy kōoy olo tatu tẸnaan mobhin ạlisebh tamōruōm ni mobho odi odi, nꞌobho odi namulumian ghạ nị miiḅi mobo bho ịva zodi iru obho.

⁷Ologhi omōruōm aḍighi kaNoa ạtuonom maliiki obho Ẹnaan aakiom odi milo igboloman nꞌọkpo ilo netu taghisigh ilo odi ọmiin io. Odi aghiilaan ni mọnu tẸnaan ạkasi mobꞌoghuugh obho ubhin ụbhelom odi nꞌotu odi obho. Tiibha bho podi ạru mịiruan ạnogho mapum mẹmar-arōoy obho, abhin tẸnaan mạlisebh oḍighi iiḅi taghisigh odi, ibha nopinom ghạ mologhi omōruōm be bho.

⁸Ologhi omōruōm aḍighi kEbrạhạm aghiilaan ọnu tẸnaan men obho odi abheleghi zodi obho, ạghi tebhugh olo Ẹnaan naaguanaan zodi, ạḅele mẹma odi ạḍua, toomo ibha odi olōghōm io nolōghōm mesi odi nạki obho. ⁹Tologhi omōruōm obhꞌodi podi ạghi arugh kisoloman mi tade bho uguanaan odi obho. Odi nꞌẠizik nꞌạJekob obo bho ibhin nạ monyiin odi oguan obho irugh ghạ tarutu ạgalaga. ¹⁰Odi Ebrạhạm naḅōrō ghạ mọmiin ẹma olo Ẹnaan ạtooghi aḅōgh aseeri olo tạtol kamen kamen.

¹¹Ologhi omōruōm aḍighi kEbrạhạm nꞌaSera ẹteeny ịnyaam ẹmar mọony, toomo ibha eedi neepẹl sịa ọmar ọony obho, ebum obho odi naabhinom Ẹnaan mobho odi tạpam nị moguan odi obho, ¹²molo todi onyiin ōoy obhobho, tamen olo ạlukpo odi, ọbho amina ạneghe apu, pạnwuny tạnwuny odi iru ịmaraghia nwụny ilo idi kịinaany ibha ạnyu obho nꞌọosaar ibha idi tọtu ọbhiiny obho bọbon ōoy olo tatue ạḅal olo bho.

¹³Oomo arōoy bhibha ịrol tologhi omōruōm eedi ẹbhozu. Eedi ịteeny io nọteeny mibha Ẹnaan aguanaan eedi obho. Eedi ịmiin kegbeeny ebheleghian, ẹgba emutiom mobho eedi iru misoloman iḍigh mạḍigalaga eḍigh-otu mi tesuo ade bho. ¹⁴Obo bho ịḍeghe miibha bho nẹgba emutiom mobho eedi nẹva mẹma olꞌeedi. ¹⁵Ịitua eedi imula ḍio tọḅel ẹma bho eedi ịḍua bho. Eedi ịitua nị bọ, ạar olo kụpuenaan eedi momula olo. ¹⁶Eedi ịrol kụ ẹva mẹma olo ạneghe apu moobho bho, olo odi tạnyu obho, molo ạregheer isibh io mẸnaan molo koghōl odi Ẹnaan eedi, ebum obho odi Ẹnaan naaḅōgh mẹma aseerian eedi obho.

¹⁷Ologhi omōruōm aḍighi kEbrạhạm abhin mẠizik ạghi mọtunom ạar ọnogho Ẹnaan tamen obho Ẹnaan ạḍa zodi aanon obho. Odi Ebrạhạm mobo Ẹnaan aguanaan moguan obho, keḍio odi amina ni ạmara mọtunom ạar mogini ọony obhꞌodi. ¹⁸Ẹnaan nạakpete kua ạnogho zodi, “Ạnwuny ọobhe bhꞌonuma tẹḍua tẠizik ketu.” ¹⁹Odi naamōruōm mobho Ẹnaan tatue ni aḅẹriōn rōoy tọbho bho, molo tebum iibha bho podi amula abhin mọony obhꞌodi nꞌaghuḍum mi tẹzo olo ọtuom.

²⁰Ologhi omōruōm aḍighi kẠizik aakpulughu mẸnaan ạnogho lịsebh ilo netu taghisigh mạJekob nꞌỊso.

²¹Ologhi omōruōm aḍighi molo, tamen obho aJẹkob natu mọbho bho, odi ạkpabh tẹmu ẹḅu odi agbuluman aakpulughu mẸnaan ạnogho lịsebh men onyiin onyiin mạnwuny taJosef.

²²Ologhi omōruōm aḍighi kaJosef ạgba tamen obho odi natu mọbho, mobho arōoy aIzirẹl temute ni ẹḍua tebhugh obhꞌaIzipt, aakiom eedi milo igboloman nꞌamaḍi odi.

²³Ologhi omōruōm aḍighi kọde nꞌoniin taMozis ẹḅoki odi moomo ịraar ụvanyu men obho ụmar odi obho. Tẹzo bho eedi ịmiin mẹneghe ọony obho, aruugu ịto ọolema bho isibh io zeedi.

²⁴Ologhi omōruōm aḍighi kaMozis ạbugh aru agin molo koghōl odi ọony ọnyani taFero ọolema bho. ²⁵Oḍigh ọmiinom nꞌarōoy tẸnaan iḍigh tologhi odi epu mole ẹzaal ịkarabh aghuḍum mịbam amen. ²⁶Odi agbi aanon, obhin itōnyōgh tebum aKraist obho ịneghe ạni nị kua epu moomo ẹela bhꞌIzipt, ebum obho odi naagbiom riḍien odi mi taluunwo ilo netu taghisigh obho.

²⁷Ologhi omōruōm aḍighi kaMozis aghiil ạḍua tIzipt molo aruugu ạlile bhꞌọolema bho isibh io zodi. Odi ạghurughiom nị aḍighi kilo odi nạamiin mẸnaan obho ụmiinom ghạ ḍio mekpo-aḍien obho. ²⁸Ologhi omōruōm aḍighi kodi asōorẹ mẹzaal Opẹl-Otẹn obho, aakiom eedi mọsaraghiom ạzara mi tạraḅa aruguugh eedi molo otelema ọbho bho okulaan mịkpana ạnwuny eedi.

²⁹Ologhi omōruōm aḍighi karōoy aIzirẹl erele ẹḅeeny mOkōkōgh Ọbhiiny obho kilo eedi irele teḅum ọosaar. Amen arōoy aIzipt ịghi ạni mọḅeeny pịguḅaay.

³⁰Ologhi omōruōm aḍighi kẹḅagh otu ẹma bhꞌaJeriko ameel tamen olo arōoy aIzirẹl neekin ikiton mẹma bho moḍual aḍuma. ³¹Ologhi omōruōm aḍighi kughighom ạni ḍio mạRehab ole-mẹma bho nꞌobo bho ikiilaan io mẸnaan obho, ebum obho odi abhin ologhi ạburubolol ạloghom mobo bho iru bọ moḍinigha ẹma ạJeriko bho.

³²Ạami ukōlōgh ghạ nị be bẹle? Amen olo mọgba ilo tạGidion, nꞌạBarak, nꞌạSamsin, nꞌạJefta, nꞌaDevid, nꞌạSamuel nꞌarizil obho tẸnaan. ³³Tologhi omōruōm mobho eedi ibhin iḅiom ipuoghom rạvo moomo aruubhugh obho iru ịmaranuan eedi obho. Eedi iḍighi milo ịneghe, ebhin tạvo tẸnaan mibha odi aguan obho, ẹbhaḍi mịnu arudumunuḅụạgụ, ³⁴eḍime mibꞌarigi ạrinyan, emuzōnaan tịnu ibꞌạsumugem ẹgham. Talidugh alōor obhꞌeedi peedi ịteeny mịnyaam, iru mibꞌiḅe rạagham ilo ipuoghom rạvo misoloman arōoy ạraagham obho. ³⁵Omulumi taghuḍum ọnogho rạani marōoy eedi ibha nẹebho bho.

Ẹtede ịrol tọmiinom, egin molo komutioghom eedi, molo oḅẹriōn eedi eedi etu eḍum aghuḍum olo ạneghe apu mibha eedi idi obho. ³⁶Ụmologh nị ọgurogh mẹde, ọbhaḍi ọlokioghom mikoli mịnon. ³⁷Orōḅōl eedi ọveleghi nạ zeedi zạzal, ọziom mobꞌạmugem ẹgham. Eedi iminaay ghạ mizu ạraana nꞌivel ekitonom, eḍum aghuḍum aruvekulom, ebhin ịiḅaghami nꞌọmiinom tebum aḍien taKraist. ³⁸Eedi ịneghe ni epu mọrol tẹmar-arōoy obhobho. Eedi ikiton ghạ kua be mi tibꞌaruukpu eḍum ọosaar obho nꞌibꞌaruugum obho erughogh ghạ taraapōgh ạrubharakpar nꞌade bho.

³⁹Oomo arōoy bhibha, toomo ologhi omōruōm obhꞌeedi, ibhin io nobhin mibha Ẹnaan aguanaan obho, ⁴⁰ebum obho odi nạamiinaan ezira miiḅi ọkpo ilo ịneghe ipu mipa bho, mu tughuneen tezira ḍio uḍighi ḍio zeedi ogbẹbhẹghiōm.

Ẹnaan Ọde ezira

¹Ebum obho obꞌọlogh arōoy ilo neekō ezira ikin ikiton nẹmiin ibha ezira noḍighi obho idi obho bẹleni, itu orōbh tọtu kạar kạar olo ạamoromi ezira nꞌịkarabh ibha neeḅolom ezira bho, ọkparaghiom oghiil eghiil obho odi taghisigh ezira bho. ²Teghiil obhꞌezira, ogbiom riḍien ezira mạJizos obo bho ologhi omōruōm ezira ạkiom obho, takunughiom nạ todi obho, obo bho ạtuan tebum ọḅaal ologhi olo nooseerian odi taghisigh obho, ạkparaghiom nị mọmiinom oorẹeny ẹmigheri obho, aanon atughuneen ḍien mạregheer obho. Ikunughi obho, odi odi delede toḍiom ạvo ẹtolom tẸnaan ọolema bho.

³Ịitua mẹzo odi ạkparaghiom tạravo ạsukarabh arōoy obho ịlogh odi ḍien obho. Tebum iibha bẹleni, ịítu ghạ merōbh ologhi enyina. ⁴Telebhir obho enyina neḅe mọḅele ịkarabh aghuḍum obho, enyina deḅe ḍio esi mesi olo enyina neezu mịḅaal enyina. ⁵Enyina neeḅulo mọnuekpete bho Ẹnaan ạkpete mọkue enyina kạnwuny odi obho gạ? Odi ạkpete kua,

“Mạar ạmoghonyan, ọony ạmi, men Obạmọogh obho ạliom ạna,

urōbh ghạ nạ mologhi onuma mi todi, men odi asi ạna.

⁶Obo bho Obạmọogh obho atulan obho pobo odi nạliom ghạ,

ạgurogh ghạ nạ kōoy kōoy olo odi abhin kọony odi.”

⁷Ịkparaghiom tọmiinom obhꞌenyina kạliliom ọde enyina, ebum obho tọmiinom obhꞌenyina nẹgba emutiom mobho Ẹnaan naabhin enyina kạnwuny odi obho. Kir ọony olo ọde ọliom ghạ ḍio gạ? ⁸Eru kạar olo ụliom ạni ḍio ạna kẹzo bho odi nạliom oomo ạnwuny odi obho, pạna ạkar ọony odi ḍio, ạna ọony olo ọde olo. ⁹Ịneghe ḍio gạ molo ezira kughiilaan mỌde ezira mi tạruumugh obho koḍum? ¹⁰Ạburude ezira esuo ẹmar-arōoy obho nẹliom ghạ ezira mọbam amen be tẹzo bho iḍigh tologhi eedi obho, keḍio Ẹnaan nạliom ezira mọneghemi ezira, molo ezira opin ạni bin taghuḍum obhꞌodi obho ịkarabh ilo bho. ¹¹Kamen kamen olo ụliom ezira idi kolo noḍighi ezira tamen opopo moḅẹebhẹni iloghi ezira, ilo oḍighi iloghi ezira kẹḅaal io. Keḍio ọbam amen naatẹn, obo bho nọoliom ụtughumiom kua bho teḍum aghuḍum ekima, eḍum taghuḍum eedi kiiḅi arōoy mi taghisigh tẸnaan.

Aliiki nꞌịtughumiom

¹²Tebum iibha bẹleni, iibhaghami rạvo ạrugbuor obhꞌenyina mẹghuemi mariigi obhꞌenyina ibha ịnyaam ilo bho. ¹³Itele ghạ tebōom olo asel molo ookō masike bhꞌenyina ibha iru marukula bho enyina etue etele.

¹⁴Ịkparam mẹrolan kōoy kōoy mi tekima, mẹkparam nạ meḍum aghuḍum olo ịkarabh ilo talōor enyina, obho tughuneen kua ḍio ọnon ẹzo olo ōoy tatue ạḅol ạmiin Ẹnaan olo bho. ¹⁵Ịmaar molo onyiin ōoy ọgbaranuan taluunwo ạlisebh obho tẸnaan. Ịmaar molo onyiin ōoy otu ạrol koorẹeny eghiḍim olo ụseghe mịika bhꞌodi nọḍaanyom ọnogho mịiḅaghami rōoy. ¹⁶Ịmaar molo onyiin ōoy oḍum aghuḍum ole ẹma bolobolo oḍum aghuḍum olo olōghōm io mẸnaan kỊso obo bho aḅoolaan marukenya odi monyiin ẹkpa eḍian be bho. ¹⁷Enyina neelōghōm mobho enyemen podi ạghi mobhin ạlisebh tọde odi, umulumi ni zodi ebum obho odi otue ḍio mọva ebōom olo onwe ibha odi naaḍighi obho, toomo ibha odi aleghe nꞌizin agbẹelōm obho ẹkona.

¹⁸Ebum obho enyina itu ḍio karōoy aIzirẹl mi tọkpo ilo utue ḍio okulaan, obꞌạnyan obho, nꞌọkinim ibꞌaruugu obho, nꞌogim obho, ¹⁹nꞌoghur eeḍue bho, nꞌimulughu oghōrōkō ōoy obho. Amen arōoy obho moghōrōkō bho peedi iisen molo eedi ịmoghon mu mọnon ọnuekpete, ²⁰ebum obho eedi ine ḍio none momina ọmoghon ọnon ọnuekpete men obho eedi ịmoghon molōgh obho ụlogh ụnogho eedi ughōl, “Ẹnam ẹkona kakulaan mobꞌeegum obhobho pitoḅol meghigh” obho. ²¹Ibha eedi ịmiin mibha nemute bho ịkar kua eḍiku ruugu molo aMozis ạkpete kua, “Aruugu nesibh ạami molo ạami napiigha.”

²²Enyina neeru tobꞌeegum obhꞌạZayon, ẹma bho tẸnaan obho aḍum ni ạrol kamen kamen obho, aJerusạlẹm obho ạnyu obho, obho ạteeny mạsumuunir itelema tẸnaan obho. ²³Enyina neeru eḍigh tookōbhōghian ọḅaal ologhi ịkpana ạnwuny tẸnaan, obo bho ariḍien eedi nọogeey mi tạnyu obho. Enyina neeru tẸnaan obo bho aru mọtu mịiruan oomo arōoy ẹmar-arōoy obho, etu nạ tạruumugh arōoy obo bho nooḍighi ụneghemi ụman taghisigh tẸnaan obho. ²⁴Enyina neeru tạJizos obo bho aguan bọ momoom ịzo bho nꞌobho ạzara bhꞌodi uzu bọ bho nẹgba mobho iibha bho ịneghe ipu mạzara ibha tEbẹl obho.

²⁵Igona lōor enyina siibha, íḅulughia ghạ raḅeri enyina mi todi obo bho nạḍeghe miibha bho. Eru kạar olo eedi obo bho igin mọtuonom oghōrōkō odi obo bho aakiom eedi tade bho ịkatana ḍio emuzōnaan, kezira tomuzōnaan ẹko, erumolo ezira ugin mọtuonom oghōrōkō odi obo bho odi tạnyu obho naakiom ezira bho. ²⁶Oghōrōkō odi mi tamen opopo azighe made bho, keḍio esiibha odi naaguan ạkpete kua, “Ạami tamina ni azighe made bho ạḅaram nꞌạnyu obho.” ²⁷Ọnuekpete bho odi ạkpete ughōl “tamina ni” obho nạgba amutiom mobho ọkpo bho ụlemogh obho tozighe ni opiẹmi, molo ibha uzighe ḍio bho ẹtol.

²⁸Tebum iibha bẹleni, itu ọsebh Ẹnaan magey, ebum obho ezira nọoteeny made-ọolema olo utue ḍio ozighe bho. Itu obhin toghiilaan nꞌeegu aḍien ookpulughu ghạ zodi tẹzo olo teḍigh ni tologhi odi; ²⁹ebum obho Ẹnaan obhꞌezira aru nyạn olo nale apiẹmi mọkpo bho.

Ẹzo olo ezira toḍighi milo teḍigh tologhi tẸnaan

¹Etulan iiḅi aburumōr ebhōbh ẹghi taghisigh mi teesoḍia enyina. ²Ígin ghạ nogin mobhin ọloghom arisoloman mi tarutu enyina. Ẹde arōoy neeḍighi ghạ kua epin ẹloghom mitelema tẸnaan mi tarutu eedi ẹkiom igoni molo eedi ilōghōm io mobho eedi nẹkiom itelema tẸnaan. ³Ịitua ghạ mobo bho idiighu mikoli obho kilo enyina idi ạni nꞌeedi mi tikoli obho, mẹetua ghạ nạ mobo bho idi tọmiinom obho kilo enyina nẹmiinom ạni nạ keedi.

⁴Kōoy kōoy ạlogh eghuan milom, opẹl io maraalōgh ẹmuna ilom obho. Ẹnaan tạtu ni mịiruan ạnogho mobo bho nele mẹma nꞌobo bho nepẹl maraalōgh ẹmuna ilom obho.

⁵Taghuḍum enyina ítulan ghạ mikpoki. Ibha enyina ịteeny obho egbẹbhan talōor enyina! Ẹnaan naaguanaan ezira akōl kua, “Ạami tạtolan ni ạna kamen kamen, ạami ụsar io ạna atuḅeen.” ⁶Itu ọtuan tiibha bho ọkpete ghạ kua,

“Obạmọogh obho pobo tạlogh ạvo ạnogho ạami,

ạami ukiil mụ ruugu.

Oōy tatue ni aḍighi ạami ameel?”

⁷Ịitua migbaany aruvẹmụ arōoy ibhꞌenyina, ibha ịgba mọnuekpete tẸnaan ịnogho enyina bho. ⁸Ịitua miiḅi ibha ịḍua taghuḍum eedi iru obho, mẹtuonom rạaḅa asike ologhi omōruōm obhꞌeedi. ẠJizos Kraist akẹrẹkẹrẹ olo meḍue nꞌaadon nꞌoomo amen. ⁹Ímōrō ghạ arōoy ebhin oḍigh kẹrekere ịtughumiom ilo dọmoghon ghạ ḍio, ẹḍuonom enyina tooḅi ebōom obho. Ịkar kua ẹneghe molo kọghuemiom maghuḍum ezira maluunwo ạlisebh obho tẸnaan, ilo ookōoy araalōgh ogbiiy ariḍian io. Obo bho iikōoy raalōgh obho, eedi araalōgh obho irue ḍio mọlogh ạvo ọnogho eedi.

¹⁰Arōoy iiḅua bho obo bho neḍighi moḍighi totu ạgalaga iikpulughu arōoy aJu obho ịnyaam ilo ịteeny mọḅa ịnam ẹede ọtun ạar obhꞌezira olo. ¹¹Uvẹmụ ōoy iiḅua arōoy aJu obho napin ghạ mạzara ịnam mọtun ạar ootōl ịkarabh obho aḍighom tẹkpe ibꞌiigbia bho, keḍio iikpōogh nꞌịikpo ịnam obho nọsu ghạ nyạn teḅughotu ẹma bho. ¹²Tebum iibha bho, ạJizos ẹkona ạbho teḅughotu ẹma bho molo odi apin ịḅaal obhꞌodi aatōlōm mịkarabh arōoy obho. ¹³Tebum iibha bẹleni, itu ọghi todi mi teḅughotu ẹma bho obhin ạni rẹgheer obhꞌodi. ¹⁴Ebum obho ezira ụteeny io mẹma mi tesuo ade bho, olo tạtolaan ezira kamen kamen obho. Ẹma bho natu taghisigh obho pobo ezira noonon obho. ¹⁵Itu ọrol tạJizos obhin mịnu ezira ọnogho ghạ lịsebh ḍien tẸnaan obho iru mọtun ạar iigbia obuom Ẹnaan obho. ¹⁶Íḅulo ghạ noḅulo moḍighi ghạ iiḅi nꞌonyiin mọlogh ghạ ạvo ọnogho onyiin. Iibha poḍigh ọtun ạar iigbia ibha neḍigh ghạ tologhi tẸnaan obho.

¹⁷Ikiilaan mobo bho enyina idi tẹeḍiani eedi obho, mẹtuugh eḍighi mibha eedi ịto ịnogho enyina bho. Eedi pobo ipooghia ghạ ḍio mọmaar oonon aghuḍum enyina bho, tebum obho eedi tẹmara nị taghisigh tẸnaan ẹgba mẹzo eedi iḍighi moḍighi odi obho. Enyina eḍighi miibha bho peedi ẹkona ọmaar oḍighi oḍighi eedi nꞌọḅaal ologhi. Ekua ilo, ologhi eedi ọḅaal io, ịlogh nạ ḍio mạvo ẹnogho enyina. ¹⁸Iikpulughu ghạ moomo amen mẹnogho ezōor. Ezōor nọokar olōghōm mobho ologhi ezōor ạneghe nị ạman, ezōor nọva ghạ nạ moḍighi oomo amen mibha ịneghe bho. ¹⁹Sesen ni, ạami naamina ạmaar naasen enyina, iikpulughu mẹnogho ạami, molo Ẹnaan amulumi ạami atuom enyina.

Iikpulughu obo bho ạge mọbhereer obhobho bho

²⁰Ẹnaan ekima bho, obho amulumi tọbho bho mạJizos Obạmọogh ezira bho, obho ụtun ịḅaal obhꞌodi odi abhin aghirom bọ mịzo, obho tạtol kamen kamen obho, aru mobꞌookō rạana olo ọnon olo aaleeny olo bho, ²¹ạnogho nị agbẹbhẹghiōm tenyina kạar kạar olo ạneghe molo enyina eḍighi mibha idi tologhi odi obho! Odi aḍighi nạ ezōor oḍighi ghạ milo teḍigh tologhi odi mi tebum ạJizos Kraist. Eghuan ẹrol ẹnogho zodi aKraist kamen kamen. Ẹrol nị nạ kua.

Ọnuekpete ikunughi obho

²²Ạami naasen ni enyina, iiḅi aburumōr ạmi, modeny ọmoghonyan adōm obhobho tạkuemi miloghi enyina bho, ebum obho ọbhereer obhobho ạami ụge bho ọdoony io apu obho. ²³Ạami nạva molo enyina kelōghōm mobho noomutiom maTimoti umōr ezira mi tikoli obho. Eru kạar olo odi akẹm aru, podi nꞌạami totu mọmiinan enyina.

²⁴Ipuruan moomo aruvẹmụ arōoy enyina nꞌoomo arōoy tẸnaan. Aburumōr ibhꞌItali epuruan enyina.

²⁵Aluunwo ạlisebh tẸnaan ẹrolan nꞌoomo enyina.