Galetia

Galetia

¹Ạami ạPol obo bho ubheleghi moru onyiin oteledōm obho ụge mọbhereer obhobho. Oōy kobheleghi ḍio ạami, bolobolo ịḍua nạ ḍio tịto ōoy keru, ạJizos Kraist nịvo nꞌẸnaan Ọde bho, obo bho aḅẹtōn bọ zodi tọbho bho, kibheleghi ạami. ²Ạami ụge natuom enyina oomo arōoy ạrasosi obho idi bọ tebhugh obho aGaletia bho. Oomo aburumōr obho idi eebha nꞌạami obho epuruan enyina.

³Ẹnaan Ọde bhꞌezira nꞌạJizos Kraist Obạmọogh obho ẹnogho ni enyina lịsebh nꞌekima!

⁴Tẹzo ọbhel ezira ọseghe tịkarabh ẹmar-arōoy obhobho nꞌẹzo olo oghiilaan ịto bho tẸnaan Ọde bhꞌezira, paKraist ạnogho lōor obhꞌodi ḍuugh ạbho mebum ịkarabh ezira. ⁵Kamen kamen eghuan ẹrol ẹnogho mẸnaan! Ẹrol ni nạ kua!

Ooḅi adōm obho, ọnon olo

⁶Ạami naamōogh ni magey mẹzo enyina ikẹm ighiraan nẹḍua todi obo bho ạtuan tinwo bho taKraist kabheleghi enyina bho nẹki mọtuonom ọnon adōm. ⁷Ạkar odi nị dụgh ọnon adōm olo, ạami ụtuan mebum ẹde arōoy olo nẹpueghi miloghi obhꞌenyina nẹva moghireni adōm obho taKraist obho, kạami nạkpete miibha bho. ⁸Itōnyōgh ẹrol ẹnogho mobo bho tạḍua atu ạgba mọnon oḍigh adōm obho ezōor ụgba ụnogho enyina bho, erumolo onyiin ezōor ẹkona bolobolo otelema tẸnaan ạḍua nạ tạnyu obho aru anwe ạgba. ⁹Ezōor nọokpete ghạ miibha bho, keḍio ạami digh amina ạkpete: kōoy kōoy olo ạgba ạnogho enyina mọnon oḍigh adōm olo akōrōnuan tobho enyina neebhinom obho, itōnyōgh ẹrol ẹnogho zodi!

¹⁰Abaabha bho nẹgbaanan molo oghōl ạami nạva molo arōoy kebuom ạami gạ? Eenyi. Ạami nạva mẸnaan mobuom ạami. Ẹgbaanan nạ molo oghōl ạami nạva molo arōoy kelōghōm ạami gạ? Ughōl ạami nạva ni miibha bho bọ, ạami kutu ḍio mẹbana taKraist.

Ẹzo ạPol atẹn monyiin oteledōm taKraist

¹¹Iiḅi aburumōr, ilōghōm kua, adōm obhꞌạmi ōoy kọgba ḍio ạnogho ạami. ¹²Ạami upin nạ ḍio tọnu ōoy; ōoy ẹkona kọtughumiom io ạami. ẠJizos Kraist nịvo nịvo kạgba amutiom ạnogho ạami.

¹³Nọogba ọnogho enyina mẹzo ạami ụrol men obho ạami ụnogho lōor ạmi mi tiikpulughu arōoy aJu obho, ẹzo ạami ụsuanaan io ghụsan marōoy ạsosi obho tẸnaan, ụnogho ni zeedi mịiḅaghami, ụbham magey mobhiẹmi eedi. ¹⁴Tẹzo eḍighiom ạar arōoy iikpulughu aJu bho, ạami upu mọlogh aburugbo ạmi. Ạami ụtuom mạar meḍighiom ạar ạburude bhꞌezōor apu mịnon.

¹⁵Keḍio Ẹnaan, tọsu ạghusan aḍien obhꞌodi, ạson ạami ki tamen olo dọmar io ạami, abheleghi ạami moḍighi oḍighi ọnogho odi. ¹⁶Tamen olo idi tologhi odi mọgba omutiom Ọony obhꞌodi ọnogho ạmi, molo ạami kạgba mọnuekpete ooḅi adōm obho, obho igboloman nꞌodi obho, mọnogho arōoy ibhꞌịnon aruubhugh obho, ōoy olo ạami ụghi mọnogho ạmi maliiki olo, ¹⁷ạami ụki nạ ḍio taJerusạlẹm mọmiinan iteledōm obho idi bọ taghisigh ạmi obho. Kpẹlen nꞌipa, ạami ụghi tArebia keḍio ạami umula urughẹel tạDamaskos. ¹⁸Ịraar ạsia neetẹn keḍio ạami ugbi mọghi taJerusạlẹm mọmiinan aPita, keḍio ezōor ụrolan maḍiōbh nꞌōogh aḍuma. ¹⁹Ọnon oteledōm olo ạami ụmiin olo, tughuneen maJems umōr tObạmọogh obho ḍio.

²⁰Iibha bho ạami nạge bho agey. Ẹnaan be kalōghōm, ạami ụgba ḍio miben.

²¹Ọbam amen atẹn, pạami ụghi tariisi ilo idi taruubhugh aSiria nꞌaSilisia. ²²Tamen obhobho, arōoy ạsosi ibhꞌaJudia delōghōm io ạami. ²³Eedi nẹmoghon ghạ mibha ịnon arōoy nekōl kua: “Oōy obho ạnogho ezōor mịiḅaghami obho tebum ooḅi adōm obho naaghiraan nạgba ạni ạnogho rōoy momōruōm obho odi ạva bọ mobhiẹmi obho.” ²⁴Tiibha bho bẹleni, peedi ibuom mẸnaan mebum ạmi.

ẠPol nꞌiteledōm ipedi obho

¹Ḍiōbh nꞌinya ạsia itẹn, pạami nꞌạBanabas umula ụghi taJerusạlẹm. Ạami ạbhamam nạ mạTaitos. ²Ẹnaan ạgba amutiom ạnogho ạami aghōl mọ kịa, kạami ạghi. Tezue eghun otu nꞌarukenya bho, pạami ụgba ụnogho eedi mọnuekpete adōm obho ạami ụgba ghạ bọ ụnogho marōoy ịnon aruubhugh obho, molo oḍighi obho ạami naaḍighi obho nꞌibha ạami naḍighi obho itu mapa ạar be. ³ẠTaitos obo bho ạtuonom ạami obho toomo ibha odi aru molꞌaGris obho, uḅum io zodi oḍun. ⁴Ẹde arōoy ilo iighirina iḍigh ạni togbo bhꞌezōor kaburumōr mi taKraist, ịva ghạ moḅum oḍun odi. Arōoy bhibha iru ịḅar tọtu mọva ọmiin ilo igboloman nꞌomuzōnaan obho ezōor ụteeny mi totul ọnu nꞌạJizos Kraist obho. Eedi ịva ghạ momina omulumi ezōor moḍum aghuḍum ạrubana. ⁵Ezōor udughom io nodughom lōor ọnogho zeedi bọbon amen molo ezōor useerian enyina magey obho ooḅi adōm obho.

⁶Keḍio obo bho ighōl bọ meedi ịvaruumu obho, ạkar eedi ịvaruumu obho ịgba ḍio momoom ạar ẹnogho ạami. Ạami nạkpete miibha bho tebum obho eedi itu ḍio makẹrẹ arōoy mi tạmi obho. Ẹnaan oonon ghạ ḍio tozu alōor obho kasōbh rạakpe odi. ⁷Eedi ịmaar iinon, peedi ịmiin mobho Ẹnaan nạanogho ạami mịnyaam mọgba ooḅi adōm obho ọnogho arōoy ịnon aruubhugh, kẹzo bho odi ạnogho maPita mịnyaam mọgba ooḅi adōm obho ọnogho obo bhꞌaJu obho. ⁸Ịḍua tịnyaam tẸnaan keru kạami aru moteledōm mi tarōoy ịnon aruubhugh obho, kẹzo bho aPita aru moteledōm mi tarōoy aJu obho. ⁹Amen obho aJems nꞌaKifas nꞌạJon, obho ịrol kịvaruumu obho, ịmiin mobho Ẹnaan nạanogho ạami moḍighi oḍighi obhobho bho, peedi iḅolom mạBanabas nꞌạami. Karōoy onyiin oḍighi obho, oomo ezōor umōruōm ughōl mezōor oḍighi ghạ moḍighi obho mi togbo arōoy aJu obho. ¹⁰Iibha ạami naḅe ghạ moḍighi obho, pibha eedi ịkpete ịnogho ezōor, mọotua ghạ ọlogh ạni ghạ mạvo ọnogho maruvekulom obho idi togbo eedi obho.

ẠPol asi maPita

¹¹Amen olo aPita aru tẠntiok, ạami asi zodi taghisigh odi tebum obho odi aḍighi akōrōnuan. ¹²Keḍio obo bho aJems arōm moru obho, iru isi, aPita naatul nꞌaburumōr arōoy ịnon aruubhugh obho ale ghạ meḍian; eedi iru isi, podi amuluom ạman agin motul eedi ole eḍian, nakiil ruugu mobo bho ighōl moḍunogh rōoy ịnon aruubhugh obho. ¹³Pipedi arōoy aJu aburumōr obho ẹkona, ịke nạ moḍighi karōoy ẹroogh nꞌaPita, ạBanabas ẹkona ạtuonom nạ rạaḅa asike eedi. ¹⁴Men ạami ụva ụmiin mobho eedi ịtuonom io monyen tagey ooḅi adōm obho, pạami ụkpete ụnogho maPita mi taghisigh oomo eedi, ughōl kua “Ạna ōoy aJu olo naḍum aghuḍum arōoy ịnon aruubhugh obho kaghuḍum ōoy aJu ḍio, imute ẹko kạna nạvimom rōoy ịnon aruubhugh obho moḍum aghuḍum arōoy aJu obho?”

Arōoy aJu obho nꞌibhꞌịnon aruubhugh obho, omōruōm nạpel

¹⁵Agey nạ ni, ezōor ạkar arōoy aJu. Ezōor isoloman ibha ikiilaan io maraalōgh obho taMozis obho ḍio. ¹⁶Keḍio ezōor noolōghōm mobho ụtuan io tibha araalōgh obho ịkpete bho, kobhin mōoy oseeri kooḅi ōoy mi taghisigh tẸnaan, ologhi omōruōm odi mi tạJizos Kraist be. Ezōor ẹkona noomōruōm nạ mạJizos Kraist molo kobhin ạni ezōor koseeri taghisigh tẸnaan kiiḅi arōoy tebum ologhi omōruōm obhꞌezōor mi taKraist. Ụtuan io tookō ibha araalōgh obho ịkpete bho. Bọbon ōoy olo tatu mooḅi ōoy mi taghisigh tẸnaan tebum obho odi aakō raalōgh obho olo. ¹⁷Kẹzo bho ezōor obo bho noḅe moru iiḅi arōoy mi taghisigh tẸnaan tebum otul ọnu obhꞌezōor nꞌaKraist obho, kọva ọmiin mobho ezōor uru miḍighi mịkarabh karōoy ibhꞌịnon aruubhugh obho, iibha bho nemōruōm mobho aKraist aabe mịkarabh gạ? Eenyi, ekua ḍio. ¹⁸Ạami aḅẹriōn mibha ạami ulẹrẹghi obho, pụ nẹgba mobho ạami naapẹl molōgh. ¹⁹Araalōgh obho ịnyaam ilo mu talōor ạmi. Eedi neeghigh ạami molo ạami kaḍum kạnogho mẸnaan. Nọokanam ạami nꞌạJizos Kraist mi toorẹeny ẹmigheri obho okigh, ²⁰molo tạmi aghuḍum olo mu, ạJizos Kraist pobo naḍum mi tạmi. Keḍio aghuḍum obhobho ạami naḍum siibha bho, ạami naḍum tologhi omōruōm obho ạami ụteeny mi tỌony obho tẸnaan, obho atulan ạami magey kạnogho lōor odi ḍuugh ạbho mebum ạmi obho. ²¹Ạami ugin io minwo bho tẸnaan mi tọbho bho taKraist. Erumolo Ẹnaan tapin ni ezira kiiḅi arōoy mi taghisigh odi tebum ookō araalōgh obho, pọbho bho taKraist ạar oḍighiom olo.

Araalōgh bẹlee kologhi omōruōm

¹Ibꞌaraama arōoy aGaletia, okōr ōoy ạḍaany miloghi obhꞌenyina? Tasumusigh enyina nọogba ọveleghi mọbho bho tạJizos Kraist mi toorẹeny ẹmigheri obho ọnogho enyina. ²Onyiin ạar odi molo ạami nạva molōghōm tenyina. Enyina ibhin mẸmugh Iigbia obho tẸnaan tebum obho enyina iikō raalōgh obho taMozis, bẹlee kebum obho enyina ịmoghon imōruōm mooḅi adōm obho? ³Iibha kokōr oḍigh eema olo enyina neḍigh! Enyina igbiom mOoḅi Ẹmugh obho tẸnaan enyina nẹva siibha mokunughiom tịnyaam alōor enyina gạ? ⁴Oomo ibha imutenaan enyina bho apa ạni ni be gạ? Eenyi. Ẹla mịkanya mạar. ⁵Ẹnaan ạnogho enyina mOoḅi Ẹmugh obho aḍighi mọkpo ibꞌaruugu mi togbo enyina mebum obho enyina iikō raalōgh obho, bẹlee modi ạtuan mebum obho enyina ịmoghon imōruōm mooḅi adōm obho?

⁶Idi nạ kibha ẹegia bho ịgba bọ milo igboloman nꞌEbrạhạm obho, “Odi amōruōm Ẹnaan keḍio Ẹnaan ạtuan tebum ologhi omōruōm obhꞌodi keḍio ạseghe zodi aseeri kooḅi ōoy.” ⁷Ilōghōm kua siibha bho, mobho kōoy kōoy olo ạteeny ologhi amōruōm, odi ạkar ọony ọobhe tEbrạhạm. ⁸Ẹnaan nạagba ạnogho mobo bho ạge bọ mẹegia bho, mobho odi nạatua kọkanya amen mọloghom ạni arōoy ịnon aruubhugh obho ịteeny bọ mologhi omōruōm obho, moru iiḅi arōoy taghisigh odi. Ọgba mọnuekpete ooḅi adōm obho ọnogho mEbrạhạm kọkanya amen mobho, “Tẹḍua tonuma keḍio Ẹnaan tạsebh moomo arōoy ibhꞌade bho.” ⁹Ebrạhạm amōruōm ni keḍio ụsebh nạ zodi. Iibha kiḍighi, kōoy kōoy olo amōruōm, pọsebh ạni nạ odi.

¹⁰Oomo obo bho ịmara bọ mookōoy ghạ araalōgh obho idi togbo itōnyōgh tẸnaan. Ạar bho aḍighi obho keeghe? Ẹegia bho nạakpete kua, “Kōoy kōoy olo ookō ḍio moomo araalōgh obho ụge bọ tọbhereer araalōgh obho taMozis obho, odi odi togbo itōnyōgh tẸnaan.” ¹¹Iibha bho nemōrō kua, bọbon ōoy olo tapin tookō araalōgh obho ạmara taghisigh tẸnaan kooḅi ōoy olo, kẹzo bho ẹegia bho ạkpete bho, “Kōoy kōoy olo Ẹnaan ạtuan tebum ologhi omōruōm odi kaseeri zodi kooḅi ōoy mi taghisigh odi, taḍum ni maghuḍum olo ikunughi olo.” ¹²Araalōgh obho ịmaruom io tologhi omōruōm. Idi kẹzo bho ẹegia bho ạkpete bho, “Kōoy kōoy olo aakō moomo araalōgh obho taḍum ni maghuḍum olo ikunughi olo.”

¹³Keḍio aKraist nạata zezira ạseghe titōnyōgh obho araalōgh obho ibhin iru obho, tamen obho odi abhin itōnyōgh mebum ezira bho. Kẹzo bho ẹegia bho ạkpete bho, “Kōoy kōoy olo usineni toorẹeny, odi togbo itōnyōgh tẸnaan.” ¹⁴ẠJizos Kraist ạmiinom miibha bho molo ẹḍua todi etu molo arōoy ịnon aruubhugh obho epin ạni mạlisebh obho. Ẹnaan aguanaan mEbrạhạm obho, molo ẹḍua tologhi omōruōm ezira etu molo ezira topin ạni mẸmugh Iigbia bho Ẹnaan aguanaan obho.

Olōgh obho nꞌoguan obho

¹⁵Iiḅi aburumōr, tẹzo olo ọkpete ọgbaaniom, amen olo ịzal arōoy ighiran ịzo, ōoy olo tạtol tạman anwe mịzo bho bolobolo amina ạlogh mọnon ọnu olo. ¹⁶Oguan obho tẸnaan, odi aguanaan mEbrạhạm nꞌọony ọobhe bhꞌodi. Ẹegia bho ọkpete ḍio aghōl kua, “Nꞌạnwuny ọobhe onuma” moḍeeriom oghōl mọlogh arōoy; ụge ughōl, “Nꞌọony ọobhe onuma.” Iibha bho nẹgba eḍeeriom mobho aru monyiin ōoy be, odi aKraist. ¹⁷Ẹmu ạraḍeghe bhꞌạmi imōrō kua. Ẹnaan aghiran ịzo aguan moguan molo kookō. Onyiin ọonir nꞌaḍisibh ḍiōbh ạsia neetẹn keḍio aMozis ạge maraalōgh obho abhin aru. Araalōgh bhibha irue ḍio enwe mịzo bho nꞌoguan obho tẸnaan. ¹⁸Ughōl Ẹnaan ạmara taraalōgh obho kụ nạnoghooy ghạ lịsebh obho, odi kụmara mụ toguan obhꞌodi. Ịmiin, odi Ẹnaan ạmara toguan obhꞌodi kodi ạnogho mEbrạhạm lịsebh.

Ạar obho aḍighi bọ kụnogho raalōgh obho

¹⁹Ụtuan eeghe kọlogh raalōgh obho? Ụḅaram raalōgh obho mi toguan obho molo arōoy kelōghōm mịkarabh nꞌiiḅi eḍighiom ạar, ninii ạteeny men obho ọony ọobhe bho tEbrạhạm obho aru bọ mẹmu oguan obho tatu. Itelema tẸnaan ibhin maraalōgh obho eruom mōoy olo ạrol kọokpaany moruom arōoy.

²⁰Keḍio oguan obho, Ẹnaan nịvo nịvo ạnogho mEbrạhạm. Ọokpaany ọrol io. ²¹Ḅōrō ku, iibha bho neḍighi milo oghōl araalōgh obho nꞌoguan obho tẸnaan imōruōm io gạ? Eenyi. Ekua ḍio. Erumolo nọologh raalōgh obho mọnogho arōoy ghuḍum, pōoy kutue ni ạmara taghisigh tẸnaan kooḅi ōoy tebum eedi araalōgh obho. ²²Keḍio ẹegia bho nạakpete kua, moomo ẹmar-arōoy obho idi tịnyaam ịkarabh, molo obo bho imōruōm obho epin mẹnogho bho uguanaan bọ mobo bho tẹteeny mologhi omōruōm mi tạJizos Kraist obho.

²³Keḍio aKraist aru, araalōgh obho ịduom ezira karōoy ikoli ninii aru ạteeny men obho odi obo bho ezira umōruōm obho amute aru ạman. ²⁴Molo araalōgh obho iḅologh ezira ịbham ninii aru ạteeny men obho aKraist aru obho, nꞌolo ezira otu miiḅi arōoy mi taghisigh tẸnaan tebum iloghi omōruōm obhꞌezira. ²⁵Siibha bho ezira noomōruōm maKraist obho, araalōgh obho ịnyaam ilo mu tezira.

²⁶Ịḍua tebum ologhi omōruōm, koomo enyina obo bho itul mọnu nꞌạJizos Kraist obho eru mạnwuny tẸnaan. ²⁷Enyina neezua mụum etul mọnu nꞌaKraist molo enyina neebhin nꞌalōor enyina moḍum oḍigh aghuḍum obho tạJizos Kraist nịvo nịvo. ²⁸Molo akẹrẹkẹrẹ olo mu mi tarōoy aJu nꞌarōoy ịnon aruubhugh obho, tạrubana nꞌạnwuny ogbo eghun tạraani nꞌilobhir. Oomo enyina neeru monyiin tạJizos Kraist. ²⁹Erumolo enyina iru milo taKraist, penyina arōoy ọobhe tEbrạhạm. Enyina tepin ạni ni mibhꞌoguan obho tẸnaan.

¹Ạami nạkpete miibha bho mọloghom, ọony olo tale rutu mọde odi toomo iibha oomo ịga bho tọde odi iru milꞌodi obho ẹkona, topira ni oseeri zodi kẹbana suo odi dogbẹbh io mōoy obho. ²Suo odi odi nini mọbumoony obho, ạrabobo odi tẹpamanaan mọkpo bho eseerian odi ninii odi tatu asi agbẹbh mōoy tamen obho ọde odi aghōl bọ molo kọnogho zodi mọkpo bho. ³Ẹzo bho nạ zezira. Tamen obho ezira idi nini mịbam ạnwuny obho, ezira uḍigh rụbana ọnogho mịtughumiom ạnwuny, ⁴keḍio, amen ạkar ogbo odi amen obho, aru ạteeny, pẸnaan arōm ạkar Ọony obhꞌodi aru. Odi aru kẹzo bho ạni-ebhōbh nạmar ghạ mọony obho; arughom raalōgh arōoy aJu obho ⁵mọta obo bho idi tịto araalōgh obho, molo ezira koru mạnwuny tẸnaan. ⁶Tẹzo olo oḍighi enyina kelōghōm mobho enyina iru mạnwuny odi, pẸnaan arōm mẸmugh Ọony obhꞌodi moḍigh tiloghi obhꞌezira, odi Ẹmugh obho naleghe ghạ bọ tezira, “Mạda, mạda” bho. ⁷Tiibha bho bẹleni, enyina ạrubana mụ ḍio. Odi naaḍighi kōoy kōoy mọony odi olo odi tạnogho zodi moomo iibha odi naaseerian bọ mạnwuny odi obho.

Ẹzo ạPol abhin ạtuom mạar marōoy aGaletia

⁸Tamen olo neetẹn, enyina ilōghōm io mẸnaan, molo enyina iru mạrubana aruru ilo enyina ịgbaaniom mẸnaan. ⁹Esiibha bho enyina neelōghōm mẸnaan — mạa-suo ạami kukōl kua, esiibha bho Ẹnaan naalōghōm enyina — ebum eeghe kenyina nẹva momina oghiraan tịtughumiom ạnwuny olo ịnyaam ilo mọbhel ōoy, ạsuo ẹko olo nạ? Eeghe amute kenyina digh emula moḍigh ạrubana ọnogho ịtughumiom bhibha? ¹⁰Enyina neemina neekōoy ruḍuma nꞌạruvanyu nꞌaḍio nꞌạsumusia neegbiemi. ¹¹Ạami nꞌꞌạatu ni mobho oomo oḍighi obho ạami ukumuan enyina bho netu moru apa be. ¹²Iiḅi aburumōr, ịtol kạmi kẹzo bho ạami naaru ụrol kenyina bho. Ịkarabh ilo enyina neeḍighi ạami olo. ¹³Enyina nẹetua ni gạ mobho ịḍua tebum ẹzegh alōor obhꞌạmi kiḍighi mobho ạmi ụgba mooḅi adōm obho ụnogho enyina tọḅel egbiom obho? ¹⁴Oomo ipa ẹkona, enyina ịkpete ḍio ạami ẹpue, bolobolo egin ạami mebum ẹzegh alōor obhꞌạmi, obho ạnogho enyina mogbōgh ọdegh oonon obho. Kpẹlen nꞌiibha, enyina ibhin ni ạami ẹloghom kẹzo bho enyina tepin nạ ni ẹloghom motelema tẸnaan obho. Enyina ibhin ạami ẹloghom kẹzo bho enyina tepin nạ ni mạJizos Kraist ẹloghom obho. ¹⁵Ologhi enyina ạḅaal magey. Ẹkaraan imina emute? Ạami nịvo nịvo tatue ni ạgbaam enyina miibha bho. Enyina tetue ni bọ, kōl enyina kịtoghonya ni riḍien enyina ẹnogho ạami. ¹⁶Keḍio, esiibha bho enyina nẹetuan mebum agey obho ạami ụgba ụnogho enyina bho nẹlogh ạami ḍien bẹle? ¹⁷Arōoy ipedi obho ẹkar etuan enyina magey, keḍio tịitua bhꞌeedi iiḅi ilo. Oomo iibha eedi nẹva bho pilo ọgbarion enyina mi tạmi be, molo enyina etuan ạni zeedi kẹzo bho eedi ituan enyina bho. ¹⁸Ạami ugin io molo ịnon arōoy nꞌạami kotuan enyina. Iiḅi molo ịkanya arōoy ketuan enyina erumolo eedi ịteeny miiḅi ịitua. Iibha bho eezuan magey moomo amen tamen olo ạami odi nꞌenyina, nꞌamen olo ạami olo nꞌenyina. ¹⁹Iiḅi ạnwuny etulan ạmi, ạami kamula digh ạmiinom koniin olo odi nꞌiguneghun ninii ọmiin maghuḍum obho taKraist mi tenyina. ²⁰Ughōl ạami odi nꞌenyina siibha bọ, ẹzo kiḍigh tologhi ạami, molo ạami kunwe moghōrōkō ạmi mi tenyina. Ạami nạatu magey zenyina.

Ạraḍeghe olo ubhin aSera nꞌaHegar ụtuom

²¹Ạami natu mopuruan enyina obo bho nẹva mookōoy araalōgh obho taMozis obho miipuruan obhobho: Enyina dẹmoghon ghạ ḍio mibha araalōgh obho nẹkpete bho bẹle? ²²Eedi nẹgba kua: mEbrạhạm ạteeny ịzal ạrunwuny, onyiin ẹbana-ạni ạmar, opedi obho ạni ogbo eghun otu ạmar. ²³Keḍio ịto ẹmara odi ọony ẹbana-ạni obho ịḍua tōoy keru. Ibha ọony ạni ogbo eghun otu obho ịḍua tịto oguan tẸnaan keru. ²⁴Iibha bho ụkpete ni nọgbaaniom mobho ịzal ạraani obho iru mịzal ịzo. AHegar ọḅel ạni obho ạmaraghi bọ mạrunwuny-ạrubana bho, pọḅel ịzo bho ughiran bọ tobꞌeegum obhꞌaSainai. ²⁵ASainai obꞌeegum obho odi bọ tArebia bho, paJerusạlẹm aadon, ẹma olo odi nꞌarōoy odi idi rụbana. ²⁶Keḍio aJerusạlẹm obho ạnyu obho pạni ogbo eghun obho. Odi poniin ezira. ²⁷Ạar obho aḍighi obho keeghe? Ẹegia bho nạakpete kua,

“Ạna ẹmar ạni obho, ḅạal mologhi,

ạna obo bho dọmiinom ghạ ḍio mẹegama iguneghun obho,

mulughu mimulughu ọḅaal ologhi,

ebum obho epin ạni obho tạmaraghi rụnwuny apu meebhinaan obho.”

²⁸Nonon ni; iiḅi aburumōr, enyina idi kẠizik ọony obho Ẹnaan aguanaan mEbrạhạm obho. ²⁹Tamen opopo, ọony obho ịḍua bọ tịto ōoy kiru kụmar obho abhirighan ni ạnogho mọmiinom zodi obo bho ụmar bọ mi tịnyaam Ẹmugh tẸnaan obho. Pẹzo idi nạ siibha. ³⁰Ẹegia bho kạkpete ẹko? Ạkpete kua, “Pirighan mẹbana-ạni obho nꞌọony obhꞌodi mamutiom. Ạar obho aḍighi obho keeghe? Ịgbaan io mọony ẹbana-ạni obho kạḅar mọony ạni ogbo eghun otu obho kale rutu mọkpo ọde bhꞌeedi.” ³¹Siibha bho, ilōghōm kua, iiḅi aburumōr ạmi, mobho ezira utu ḍio mạnwuny ẹbana ạni obho, ezira ạnwuny ạni ogbo eghun otu obho.

Ịpamam mibha iḍighi enyina nwụny ogbo eghun obho

¹Oḍum aghuḍum ogbo eghun otu pibha ezira noḍum, keḍio aKraist nạabhel ezira atẹnẹmi. Ímina ghạ memōrō arōoy emulumi enyina moḍum aghuḍum ạrubana. Ịmara moḍum aghuḍum arōoy ogbo eghun.

²Ịmoghonyan ạami. Ạami ạPol nạkpete miibha bho ạnogho enyina. Enyina emina ẹnogho lōor enyina moḍunaay, pidi kolo aKraist ạar oḍighiom togbo enyina olo mu. ³Ạami kamina digh aakiom enyina mobho kōoy kōoy olo ạnogho lōor odi moḍuna podi tạmara ni mookōoy oomo araalōgh obho. ⁴Enyina obo bho nẹkparam moru iiḅi arōoy mi taghisigh tẸnaan tebum ookōoy araalōgh obho, nẹegbaranuan maKraist. Enyina neegin minwo bho tẸnaan. ⁵Ezōor nị dụgh, oḍuom ologhi ezōor odi tobho Ẹnaan taḍighi ezōor atẹnẹ miiḅi arōoy taghisigh odi. Iibha pibha ezōor ubhin noḅōrō tịnyaam Ẹmugh Iigbia bho tẸnaan, obho naḍighi moḍighi tologhi omōruōm ezōor obho. ⁶Tamen olo ezira nootul mọnu nꞌạJizos Kraist akẹrẹkẹrẹ olo mu tobo bho iḍunaay obho nꞌobo bho iḍuna ḍio bho. Oomo ibha nọva bho, pọteeny ologhi omōruōm olo nꞌetulan.

⁷Enyina ịke magey. Okōr ōoy aru ạpuenaan enyina mọmoghonyan agey obho. Odi kabhironuman enyina ẹko? ⁸Ẹnaan obo bho abheleghi enyina bho oḍighi ḍio miibha bho. ⁹Kẹzo bho nọkpete ghạ bho, “Onyiin ọkarabh okōlōgh be, mobho nạpue ghạ mizagara eḍian.” ¹⁰Toomo ipa ẹkona, ạami naḍuom ni enyina mologhi. Otul ọnu obhꞌezira mi tObạmọogh obho ạnogho ạami mọoghuanaan ologhi mobho enyina inweeghian io, nꞌobho odi obo bho nạaḅaghami miloghi enyina bho, kẹzo kẹzo olo odi ạrol, Ẹnaan tạliom ni zodi.

¹¹Iiḅi aburumōr, erumolo ạami nạgba mibha ịgbaan ni moḍunaay, eeghe aḍighi kụ nomina ọnogho ạami mọmiinom tebum adōm obho? Ughōl iibha bho agey bọ, kōl tịigbaay obhꞌạmi ibha igboloman nꞌoorẹeny ẹmigheri obho taKraist kụnogho mụ ạami mịiḅaghami. ¹²Idi tịto ạami bọ, kōl eedi obo bho nẹeḅaghami miloghi enyina bho kiḍighi ni mibha eedi nẹva bho ẹghi taghisigh, eḍunaay ẹgbaranuan lōor eedi tạsiosi obho.

¹³Enyina nị dụgh, iiḅi aburumōr, ubheleghi enyina mi tomuzōnaan, keḍio ímōrō ghạ omuzōnaan obhobho aru molo taḍighi enyina mọtuonom ibhꞌiikpōogh obho, molo enyina kẹgba kẹḍua. Kpẹlen nꞌipa, ịḅelemaan netulan obhꞌenyina aḍighi molo onyiin kakumuan kạnogho monyiin. ¹⁴Oomo araalōgh obho uukōbhōghi tonyiin olōgh obhobho, “Tulan kōoy kōoy olo atuan ạna kẹzo bho ạna utulan lōor onuma bho.” ¹⁵Igona lōor enyina erumolo enyina nenomian eḅezuan kasighōghō, bolobolo penyina ọzian omuneen.

Aghuḍum Ẹmugh obho nꞌaghuḍum iikpōogh alōor obho

¹⁶Iibha pibha ạami nạkpete bho, ịḅelemaan Ẹmugh obho areliom aghuḍum obhꞌenyina penyina iḍighi mu mibha iikpōogh obho nẹnyaghagh enyina moḍighi obho. ¹⁷Ạar obho aḍighi obho keeghe? Ibha iikpōogh obho nẹva bho, Ẹmugh obho ogbẹel io, keḍio ibha Ẹmugh obho nạva bho, iikpōogh obho ogbẹel io. Ịzal eedi idi kọdele nꞌaghōogh. Tiibha bho, enyina irue ḍio eḍighi mibha enyina nẹva bọ moḍighi obho. ¹⁸Erumolo Ẹmugh obho nateliom enyina, paraalōgh obho ịteeny mụ mịnyaam tenyina.

¹⁹Oōy olo olōghōm io moḍighi iikpōogh alōor obho olo. Iibha eedi ọva ạraani nꞌole ẹma, oghiil ạregheer olo, ²⁰ookpulughu aruru, ọgher ạghuma, ọlokian ariḍien, ọruan ạruruan oḅeey aralebhir, ibōbhan, ọteeny ọkarabh ologhi, ọoku ạaku, ịgbaranuan, ọḍian ạruuku, ²¹ọsebh ọseghiom, ọbhoghoḍiaay arimiim, orubhe ạruruan nꞌaralebhir, nꞌịnon ọkpo ilo idi kua. Ạami digh aakiom enyina kẹzo bho ạami nꞌꞌaakiom ghạ enyina bho, mobho kōoy kōoy olo naḍighi mọkpo bhibha otue ḍio aḍigh ạni tAde-Ọolema bho tẸnaan.

²²Ibha Ẹmugh obho, petulan nꞌọḅaal ologhi nꞌekima, nꞌalideny alōor, onwo inwo, oḍighi iiḅi obi oguan olo, ²³osōoriōm alōor, nꞌọmaar ọbhama alōor. Olōgh olo agin miibha bho olo. ²⁴Obo bho iru bọ milo tạJizos Kraist obho, iikpōogh alōor obhꞌeedi nꞌoomo ịkarabh eḍighiom ạar ibha nẹnyaghagh eedi obho, nọoḅaram nꞌạJizos ọkanam toorẹeny ẹmigheri obho okigh. ²⁵Ẹmugh obho nạanogho ezira ghuḍum; odi tạpam nạ ghuḍum obhꞌezira ateliom. ²⁶Ezira ụbughia ḍio lōor. Onyiin ọpa ḍio monyiin, onyiin obōbhan nạ ḍio monyiin.

¹Iiḅi aburumōr, erumolo onyiin ōoy naḍighi monyiin ịkarabh, enyina obo bho neḍum aghuḍum ạruumugh obho ebheleghi zodi talideny alōor ẹbham zodi emulumi. Igona lōor enyina molo enyina imeel ạni eḍigh tonyiin odi ọdegh oonon obho. ²Onyiin ạḅar ịiḅaghami onyiin arōol, penyina ookō araalōgh obho taKraist. ³Oōy olo aghōl modi ōoy keḍio ụva uunon odi ạar oḍighiom olo, odi naabiōghōm lōor odi be. ⁴Kōoy kōoy aru mịiruan ạnogho meḍighiom ạar odi. Erumolo iru miiḅi, odi ọtuom io milo ọnon ōoy kabuom. ⁵Ilōghōm mobho ōoy adōol adōol ọno tatōol.

⁶Oōy obo bho nọtughumiom madōm taKraist obho ạḍian moomo iiḅi ọkpo bho odi nạateeny obho mobo bho nạtughumiom zodi obho.

⁷Iíbiōghōm ghạ lōor enyina. Bọbon ōoy olo tatue aanon akiemi mẸnaan olo. Ibha ạna uḅẹbh obho, pibha ạna taḅu obho. ⁸Oōy olo aḅẹbh miḅẹbh iikpōogh alōor obho, odi taḅu miiḅua ọbho. Obo bho aḅẹbh miḅẹbh ạruumugh obho, odi taḅu miiḅua aghuḍum olo ikunughi olo. ⁹Tebum iibha bẹleni, oḍighi iiḅi ịper io ezira. Erumolo ezira ụsar io otuḅeen, ikunughi obho, ezira toḅu ni miibha ezira uḅẹbh obho. ¹⁰Tebum iibha bẹleni, kọbam kọbam amen olo ezira ụteeny, obhin oḍighiom ghạ miiḅi ọnogho kōoy kōoy, nꞌạkar obo bho iru bọ milꞌeghun otu ezira tobo bho imōruōm maKraist obho.

Aliiki nꞌiipuruan ikunughi obho

¹¹Ịmiin mẹzo ạami ubhin nꞌạvo ạmi nạgiom ibikpo moruom enyina. ¹²Obo bho nẹva bọ momutiom ozu alōor eedi obhin eghuan obho, pobo nenyuughi enyina moḍunaay. Eedi ịtuan mebum olo ụnogho eedi mọmiinom tebum oorẹeny ẹmigheri obho taKraist. ¹³Ạkar eedi obo bho iḍunaay obho iikō ḍio raalōgh obho. Eedi nẹva molo enyina keḍunaay molo eedi eetuma epin meghuan elẹgh mobho enyina neeḍigh nꞌeedi. ¹⁴Ạami nị dụgh, ạami tabuom mọmiinom obho ạJizos Kraist Obạmọogh ezira bho ạmiinom toorẹeny ẹmigheri obho mebum ạami obho. Ịḍua tọmiinom oorẹeny ẹmigheri obhꞌodi kerumolo ẹmar-arōoy obho ịteeny io mạar oḍighiom ạami, ạami ẹkona ụteeny io mạar oḍighiom ẹmar-arōoy obho. ¹⁵Akẹrẹkẹrẹ olo mi tobo bho odi muudu nꞌobo bho neeḍuna bho. Omoom aghuḍum obho tẸnaan pibha nogbẹel obho. ¹⁶Ekima nꞌọsu ạghusan aḍien ẹrolan moomo arōoy tẸnaan obo bho neekō momoom olōgh obhobho bho.

¹⁷Ạseghe dodon ạghi taghisigh, ōoy ọnogho mụ ạami mịiḅaghami, ebum obho ịgbananaan ibha alōor ạami neḍeeriom mobho ạami uru mẹbana tạJizos.

¹⁸Inwo tạJizos Kraist, Obạmọogh ezira bho, ẹrolan nꞌoomo enyina, iiḅi aburumōr obhꞌạmi. Ẹrol ni nạ kua.