Ẹfesos

Ẹfesos

¹Ạami ạPol obo bho Ẹnaan ạto kạami uru moteledōm tạJizos Kraist obho, ụge mọbhereer obhobho natuom oomo arōoy tẸnaan ibha idi tẸfesos obho, obo bho neemōruōm ạni mạJizos Kraist obho.

²Ẹnaan Ọde bhꞌezira nꞌạJizos Kraist Obạmọogh obho ẹnogho nị enyina lịsebh nꞌekima!

Ạruumugh obho ilo aKraist ạnogho ezira

³Ạlisebh ẹrol ẹnogho mẸnaan tạJizos Kraist Obạmọogh ezira bho, Ọde bhꞌodi, obo bho nạnogho ezira obo bho notul ọnu nꞌaKraist obho moomo oḍigh kẹrekere ạlisebh ạruumugh obho mi tạnyu obho. ⁴Keḍio Ẹnaan aru ạlem mẹmar-arōoy obho, odi nạason ezira ạseghe moru ilꞌodi mi taKraist, molo ezira otu miiḅi arōoy ilo ọghor ạman ilo mi taghisigh odi. ⁵Ẹnaan nạato mi tetulan obhꞌodi molo ezira koru nwụny odi mi tạJizos Kraist kẹzo ịto bhꞌologhi odi, ⁶molo obuom aluunwo eghuan obhꞌodi obho odi ạtuan tebum Ọony oḍigh ologhi obhꞌodi naanwo ezira bho.

⁷Ubhin tịḅaal tạJizos Kraist Ọony obhꞌodi ọtaam ezira, ọḅelemaan nạ ezira mịkarabh ezira mi tẹzo ẹela aluunwo ạlisebh obhꞌodi ⁸ibha odi abhin naanwuom ezira bho. ⁹Tolōghōm ạar obhꞌodi nꞌịitua ologhi obhꞌodi podi aḍighi amutiom ạnogho ezira molōghōm ọkpo ẹḅokia ibhꞌologhi odi, tẹzo bho odi ạatua ạto molo aKraist kaḍighi kamutiom obho, ¹⁰molo tamen olo aruḍuma bho neegbẹbh odi aakōbhōghi kạar kạar ilo idi tade bho nꞌạnyu obho monyiin esi, aKraist kạda.

¹¹Uḍighi kạar kạar tẹzo ịitua ologhi obho tẸnaan, molo odi ạson ezōor ạseghe moru arōoy odi totul ọnu nꞌaKraist tebum ẹzo bho odi ạatua ạto nạ kọḅel egbiom obho. ¹²Ẹnaan nạato molo ezōor obo bho ubhira noḍuom ologhi maKraist obho kobuom eghuan obhꞌodi.

¹³Pẹzo idi nạ mi tenyina obo bho nẹemoghon mạkar agey adōm obho, ooḅi adōm obho abhin ịbhelegha aru obho. Amen obho enyina imōruōm maKraist obho pẸnaan ạnogho enyina mẸmugh Iigbia bho odi aguanaan obho, mọlogh enyina melẹkẹ mobho enyina iru marōoy odi. ¹⁴Ẹmugh Iigbia bho pobho Ẹnaan ạbhaghan mobho ezira topin ni mibha odi aguanaan rōoy odi obho, nꞌobho odi tạkar nị ạta ạseghe mobo bho iru bọ milꞌodi obho, mobuom eghuan obhꞌodi.

Iikpulughu tạPol

¹⁵Tebum iibha bẹleni, kamen obho ạami ụmoghon mọdu ologhi omōruōm enyina mi tạJizos Obạmọogh obho nꞌetulan obhꞌenyina mi toomo arōoy obho tẸnaan, ¹⁶ạami dọḅele ḍio nọḅele mọotua ghạ enyina mi tiikpulughu ạmi ọnogho ạlisebh mẸnaan, ¹⁷nꞌogbẹel odi Ẹnaan obho tạJizos Kraist Obạmọogh ezira bho, Ọde eghuan obho, mọnogho enyina mẸmugh Iigbia bho, obho tạkparion riḍien enyina ạgba mẸnaan amutiom ạnogho enyina molo enyina elōghōm odi obho. ¹⁸Ạami naakpulughu ghạ nạ molo iloghi enyina ẹkparanu mọmiin ẹḅaal obhꞌodi molo enyina elōghōm moḍigh oḍuom ologhi obho odi abheleghi enyina mọteeny obho, nꞌẹzo ạlisebh ibꞌaruugu obho odi aguanaan rōoy odi obho ịla mạar isi, ¹⁹nꞌẹzo ịnyaam oḍighi odi ịbugh isi tezira obo bho umōruōm odi obho. Ịnyaam bhibha todi ibha idi tezira bho, onyiin eedi ịnyaam ²⁰obho odi abhin aḅẹtōnōm maKraist mi tọbho bho, aḍighi nạ odi ạghi ạrol delede mi toḍiom ạvo odi mi tạnyu obho.

²¹AKraist nạda moomo ạruula nꞌịto mịto, nꞌarōoy ịnyaam, nꞌaruvẹmụ arōoy ibha ạruumugh obho, apu nạ kaḍien kaḍien olo tokōl tesuo ẹmar-arōoy obho nꞌobho natu obho. ²²Ẹnaan naaḍighi odi aḅeleriom sike kạar kạar, odi atu nạ mọola oomo ẹmorokpo ạnogho mạsosi obho ²³aru bọ malōor odi obho, obho aḍighi odi agbẹbhẹghiōm obho, odi obo bho naḍighi kạar kạar agbẹbhẹghiōm obho.

Nooḅẹriōn enyina tọbho ọnogho ghuḍum

¹Tamen olo naatẹn enyina ịbhozu nị tạruumugh obho ebum obho enyina ịteeny io moghiilaan nꞌebum ịkarabh obhꞌenyina bho. ²Tamen opopo enyina ịtuonom ghạ mịkarabh araabōom ẹmar-arōoy obhobho, ẹtuonom ghạ nạ raalōgh ọola ạruumugh obho ạda bọ mookugh obho, ẹmugh obho nateliom bọ siibha marōoy obho ikiilaan io mẸnaan obho. ³Oomo ezira ụrologhu ghạ keedi, ọtuugh ọrologhu ghạ tibha iikpōogh alōor obhꞌezira negbẹel obho, ọtuugh ghạ nạ oḍighi mibha idi tiloghi ezira nꞌịitua ẹmu ezira nꞌibha alōor ezira negbẹel obho, molo ịkar nị ịgbaan molo ezira kọmiinom ạni kịnon arōoy mi tạlile bho tẸnaan.

⁴Keḍio Ẹnaan, obho agbo magey mẹela ọsu ạghusan aḍien obho, abhin toomo etulan obho odi atulan ezira bho, ⁵ạaveghi amulumi ezira taghuḍum nꞌaKraist mi tạkar amen olo ezira nọobho tebum oḍighi ịkarabh ezira. Tebum ọsu ạghusan aḍien tẸnaan kọbhel enyina. ⁶Tebum otul ọnu ezira nꞌạJizos Kraist podi aḅẹriōn ezira mọda nꞌodi mi tạnyu obho, ⁷molo odi aḍighi amutiom ạnogho mọoke atẹn mọoke mobꞌẹela ọsu ạghusan aḍien obhꞌodi mi toḍighi iiḅi obho odi naḍighi ạnogho ezira mi tạJizos Kraist obho. ⁸Ẹnaan abhin tọsu ạghusan aḍien aluunwo bhꞌodi kạbhelom enyina mi tologhi omōruōm obhꞌenyina. Enyina kiḍighi ḍio, idi tẹnogho aluunwo tẸnaan. ⁹Ilo nạ tebum ịnyaam oḍighi ạravo enyina, molo onyiin enyina opin aatumuom. ¹⁰Ẹnaan obo ạlem ezira, molo, totul ọnu obhꞌezira nꞌạJizos Kraist, odi nạanogho ezira momoom aghuḍum oḍighi iiḅi ibha odi naakōbhōghi aseerian ezira moḍighi obho.

Ezira onyiin mi taKraist

¹¹Tebum iibha bẹleni, enyina arōoy ịnon aruubhugh obho ịitua mẹzo enyina ịrol tamen olo neetẹn, enyina obo bho arōoy aJu ibha neeḍunaay tozu alōor obho nekōl ghạ marōoy ilo idi muudu obho. ¹²Tamen opopo enyina arōoy ilo ịgbaranuan nị nꞌaKraist. Enyina iru misoloman ilo iḍigh ạni ḍio nꞌarōoy obho Ẹnaan ạson ạseghe bho. Enyina iḍighom ạni ḍio tịzo oguan obho Ẹnaan aguanaan rōoy odi obho. Taghuḍum enyina mi tesuo ẹmar-arōoy obho ạar olo enyina iseeriom ologhi olo, Ẹnaan ẹko olo nạ nolo taghuḍum enyina. ¹³Keḍio esiibha, tebum otul ọnu obhꞌenyina nꞌạJizos Kraist enyina obo bho igbeenyan ni tamen olo naatẹn obho, noobhin tịḅaal obho taKraist notueni enyina mẸnaan. ¹⁴AKraist naaḍighi arōoy aJu obho nꞌibha ịnon aruubhugh obho etu monyiin, ạnogho ezira mekima, ạveleghi nạ apiẹmi moghōony ọkuan ọlokian ariḍien obhꞌeedi. ¹⁵Odi abhin tiikpōogh alōor obhꞌodi abhiẹmi raalōgh arōoy aJu obho nꞌoomo ịto araalōgh obho mobhin tịzal oḍigh aruubhugh arōoy obho oḍighi onyiin be, ọnogho eedi mekima. ¹⁶Tọbho bhꞌodi mi toorẹeny ẹmigheri obho podi ạseghe mọlokian ariḍien obho atulughi mịzal ẹde aruubhugh obho moru onyiin be mi tiikpōogh obho omulumi eedi ọnogho Ẹnaan. ¹⁷Iibha kiḍighi kaKraist aru ạgba mooḅi adōm ekima bho ạnogho kōoy kōoy, tenyina ibha ịnon aruubhugh obo bho igbeenyan mẸnaan obho, nꞌarōoy aJu obo bho ituan odi obho. ¹⁸Ịḍua taKraist keḍighi molo oomo ezira, arōoy aJu nꞌibhꞌịnon aruubhugh obho orue ọghi nookōbhōghian tonyiin Ẹmugh obho mi taghisigh Ọde bho.

¹⁹Tebum iibha bẹleni, enyina arōoy ibha ịnon aruubhugh obho isoloman mu ḍio, enyina ạnwuny ogbo eghun nꞌarōoy tẸnaan, nꞌarōoy onyiin eghun otu obho tẸnaan. ²⁰Enyina otu olo uḅōgh tạnyu otu ịtughumiom iteledōm obho nꞌarizil obho. ẠJizos Kraist nịvo nịvo pạkpo otu obho. ²¹Odi pobo ạbham otu obho ạmarami napōbhẹ ạki taghisigh mọnu otu iikpulughu iigbia mọnogho Obạmọogh obho. ²²Totul ọnu obhꞌenyina nꞌodi noḅōghōm ạni enyina nꞌezōor motu tẸnaan olo Ẹmugh Iigbia bhꞌodi karugh.

Oḍighi olo ạPol aḍighi ạnogho rōoy ịnon aruubhugh obho

¹Tebum iibha bho kạami ạPol ōoy ikoli obho tạJizos Kraist mebum enyina obo bho iru milꞌịnon aruubhugh obho naakpulughu ghạ ạnogho mẸnaan. ²Ạami nạatua enyina nẹekar ẹmoghon mobho Ẹnaan abhin tọsu ạghusan aḍien obhꞌodi, nạalogh tạvo ạmi moḍighian enyina moḍighi obhobho. ³Ẹnaan aḍighi amutiom agananaan ạnogho ạami mịitua ẹḅokia ologhi obhꞌodi kẹzo bho ạami nạage ghạ ụgba meekpōogh obho. ⁴Enyina eghōl mibha ạami ụge bho penyina ọtuugha ọmoghonyan ọkpo ẹḅokia bho taKraist. ⁵Tamen olo neetẹn ụgba ḍio mọkpo ẹḅokia bhobho ọnogho rōoy, keḍio esiibha Ẹnaan naabhin tẸmugh Iigbia bhꞌodi ạgba amutiom ạnogho miiḅi iteledōm nꞌarizil obhꞌodi. ⁶Odi ịitua ẹḅokia bhꞌodi pọgba omutiom mi tooḅi adōm obho mobho arōoy ịnon aruubhugh obho teḍigh ạni nị nꞌarōoy aJu obho epin lịsebh bhꞌodi. Eedi arōoy onyiin iikpōogh alōor obho, molo eedi nepin ạni bin mi toguan obho Ẹnaan aguan aḍighi abhulughi mi tạJizos Kraist obho.

⁷Taluunwo ẹnogho tẸnaan mobho odi abhin abheleghi ạami ạnogho mịnyaam odi moḍighi oḍighi ooḅi adōm obhobho. ⁸Ạami usōoriōm apu mobo bho akio bọ apu mi toomo arōoy tẸnaan obho, keḍio oomo ipa ẹkona, odi ạlogh ni ạami meghuan mobhin ooḅi adōm ẹela taKraist obho ikunughi olo bho oruom arōoy ibhꞌịnon aruubhugh obho, ⁹moḍighi kōoy kōoy kạmiin mịitua ẹḅokia tẸnaan ibha ụḅoki kageedi mi todi obo bho ạlem kạar kạar obho, ¹⁰molo esiibha bho, ẹḍua tarōoy ạsosi obho eḍighi molo ạruula arōoy ịnyaam ạnyu obho elōghōm moḍigh kẹrekere ẹzo olōghōm ạar obho tẸnaan. ¹¹Ẹnaan abhin tịitua bhꞌodi ikunughi olo bho ạtooghi miibha bho aḍighi amutiom magey obho mi tạJizos Kraist Obạmọogh ezira bho. ¹²Totul ọnu obhꞌezira nꞌodi, nꞌologhi omōruōm obhꞌezira mi todi pesi ezira ụteeny mebōom ọḅol ọghi ọmara ạni taghisigh tẸnaan nꞌọoghuanaan ologhi. ¹³Ạami naasen ni enyina tebum iibha bho, ịítu ghạ tebum ọmiinom obhꞌạmi, ibha iru bọ meghuan enyina bho.

Etulan taKraist

¹⁴Tebum eedi iibha bho, pạami ugbuluman uukpulughu mỌde obho, ¹⁵obo bho keghun otu keghun otu mi tạnyu obho nꞌade bho nepin riḍien eedi obho, ¹⁶ugbẹel odi mọseghe tẹela eghuan obhꞌodi, obhin Ẹmugh Iigbia bhꞌodi ọnogho enyina mịnyaam mọghuemi iloghi obhꞌenyina ¹⁷nꞌolo aKraist karu kakima tiloghi obhꞌenyina mi tologhi omōruōm. Ạami naakpulughu ghạ nạ molo Ẹnaan ạnogho enyina metulan, enyina ẹmaar ẹmara ẹkua koorẹeny olo ạteeny iiḅi ịgha, nꞌotu, olo uḅōgh ụghuemi magey ¹⁸nꞌolo enyina nꞌoomo arōoy tẸnaan ẹteeny mịnyaam ẹmoghonyan ẹreghe nꞌạlidoony nꞌẹsiiniom ạnyu nꞌekuḍum etulan obho taKraist, ¹⁹nꞌolōghōm odi etulan obho taKraist obho bọbon amen olo nọkar ghạ kua olōghōm ọman olo bho, molo oomo iiḅi eḍighiom ạar obho tẸnaan egbẹbh ni ẹman tenyina.

²⁰Esiibha, todi obo bho, tẹzo ịnyaam oḍighi obho odi naḍighi tezira bho, tatue ni aḍighi ạnogho ezira apuoghom tibha ezira ugbẹel obho bolobolo tibha ezira nọotua bho, ²¹eghuan ẹrol ẹnogho zodi mi tạsosi obho, ạḍua tọoke asi tọoke, mi taḍien tạJizos Kraist kamen kamen. Ẹrol ni nạ kua.

Otul ọnu alōor obho

¹Tebum iibha bẹleni, ạami obo bho odi mikoli tebum obho ạami nakumuan mObạmọogh obho, naasen ni enyina moḍum aghuḍum ilo teezuan ni tibha Ẹnaan abheleghi enyina bho. ²Iḍum aghuḍum osōoriōm alōor nꞌọkparaghiom nꞌalideny alōor, mebhin tetulan onyiin ạghurughiom ịkarabh onyiin. ³Ịkparam mẹbham magey motul ọnu obho Ẹmugh Iigbia bho ạghoroghi ạkpo enyina mi tekima bho. ⁴Onyiin alōor nꞌonyiin Ẹmugh be mobho idi, kẹzo bho Ẹnaan abheleghi enyina tonyiin oḍuom ologhi be bho. ⁵Onyiin Obạmọogh nꞌonyiin ologhi omōruōm nꞌonyiin ozua ạmuum be mobho idi, ⁶nꞌonyiin Ẹnaan nꞌỌde oomo arōoy, Obạmọogh kạar kạar obho. Odi odi moḍighi toomo ẹmorokpo, olo odi nạ toomo ọkpo.

⁷Oomo ezira, ōoy oḍigh oḍigh ẹnogho mobho Ẹnaan ạnogho ezira tẹzo ạmaḍi obho aKraist nạḍi ạnoghooy obho, ⁸kẹzo bho ẹegia bho ạkpete bho,

“Amen obho odi ạsiin bọ tobꞌạnyu obho,

podi aakōbhōghi mọlogh ạrubana ạsiinom,

aanwo rōoy mẹnogho.”

⁹Ẹmu obho ughōl bọ mọ “odi ạsiin tạnyu obho” keeghe? Nẹgba mobho odi abhira asōor tade bho, tạkar obꞌekuḍum ẹeḍiani ade bho. ¹⁰Odi obo bho asōor tade bho pobo bho ạsiin tạnyu obho, tạnyu obho ạsiiniom bọ apu obho molo odi ạtol kesi kesi mi toomo ạnyu bho nꞌade pho. ¹¹Ẹnogho arōoy obho, odi ạnoghooy molo ẹde keru miteledōm, ịnon keru rizil, imina ẹde keru mịgba dōm obho, imina ịnon keru mạrapasto nꞌobo ịtughumiom. ¹²Uḍighi kua mookōbhōghia oomo arōoy tẸnaan moḍighi oḍighi ạsosi obho onyiin kạlogh ạvo kạnogho monyiin, mọneghemi ọman alōor obho taKraist, ¹³ninii oomo ezira otu otul mọnu mi tologhi omōruōm nꞌolōghōm ạar ezira mi tỌony obho tẸnaan, opōbh ogbẹbhẹghu rōoy ooleeny ạni maKraist, ¹⁴molo ezira uḍum mụ ghuḍum ạnwuny, olo apōkō ạmuum akpōgh naḅōrōghōm, ọpibha iben ịtughumiom arōoy obo bho ibhin iipelekia eedi ịloghom rōoy tịkarabh araabōom obho ọpibhoghom ezira. ¹⁵Kpẹlen nꞌipa, obhin tologhi etulan ọgba ghạ magey obho molo ezira opōbh ọteenyom maKraist obho aru bọ mogbogbo ẹmu obho. ¹⁶Odi pobo ạbham ạghoroghi moomo alōor obho monyiin esi. Oomo iitula alōor obho ụbham ụghoroghi ụkpo monyiin esi mi todi, molo, onyiin ọpaḍi alōor esuo naḍighi moḍighi odi magey, poomo alōor obho ọrol tetulan obhōbh oḍiku.

Omoom aghuḍum olo odi taKraist

¹⁷Gụa siibha bho, ạami ubhin taḍien tObạmọogh obho nạkpete ạkpaariom miibha bho, ímina ghạ meḍum aghuḍum arōoy aruru obho, obo bho ịitua eedi ạar oḍighiom olo bho, ¹⁸nꞌiloghi obhꞌeedi ọkinim naasōorōm obho. Ạar olo eedi ịteeny moḍighiom aghuḍum obho Ẹnaan nạnoghooy rōoy obho olo, ebum obho bọbon ạar olo eedi ilōghōm olo bho nꞌebum ọḅaar ẹmu obhꞌeedi. ¹⁹Ạregheer ẹko isibh mụ nạ zeedi. Eedi neeḅoolaan silōor eedi mọkpo ẹebhuom ẹmar-arōoy obho, neḍighiiy moḍigh kẹrekere ilo aḅeri obho ọva ḍio mọmoghon, keḍio alōor obhꞌeedi oozighina ḍio.

²⁰Iibha pibha enyina ịtuugha taKraist obho ḍio. ²¹Enyina nẹekar ẹmoghon milo igboloman nꞌodi. Ẹzo bho enyina iru rōoy ilo nẹtuonom odi obho, nọotughumion enyina magey obho idi tạJizos obho. ²²Tebum iibha bẹleni, ịizeghi meḍi mugbaany eḍighiom ạar obhꞌenyina, obho enyina iḍighi ghạ men olo neetẹn obho, odi ugbaany eḍighiom ạar obhꞌenyina obho naabiōghōm ạloghom apiẹmi enyina mi tọkpo ẹmel ẹmar-arōoy obho, enyina iḍighi ghạ bho. ²³Inweeghian mẹman mi tịitua nꞌologhi obhꞌenyina, ²⁴meḍiiron emulumi meḍighiom ạar obho ụlem ụgbaaniom meḍighiom ạar tẸnaan obho, ibha neḍighi emutiom magey aghuḍum obho anyen nini ạman, ịkarabh ẹko ilo bho.

²⁵Ọgba iben ịtol mụ siibha bho. Kōoy kōoy ạgba ghạ magey obho ạnogho mobo bho atuan odi obho, ebum obho oomo ezira uru moḍigh kẹrekere ariisi alōor taKraist obho. ²⁶Ọle, nọle ghạ ni, keḍio umōrō ghạ ạlile onuma ebhin ạna ẹloghom tesi ịkarabh. Ibha ạna nạle bho ịtol io tekpom onuma ninii aghōzōgh obho asōor. ²⁷Ụnogho ghạ bọbon onyiin eepōogh meru obho. ²⁸Oōy olo naḅomi rutu ạḅele viigh obho aḍighi moḍighi molo odi ale mikpoki oḍighi ilo iizuan odi mobhin, nꞌolo odi atue ạlogh ạni mạvo ạnogho ruvekulom obho. ²⁹Ọnuekpete enyina ọsu ḍio nyạn rutu. Ịkpete ghạ mọnuekpete ilo tẹlogh ni mạvo ẹnogho mịnon, ilo tẹnogho ni eedi mibha eedi nẹva bho, epōbhẹ nạ zeedi, molo ibha ọnu obhꞌenyina eḍighi miiḅi ẹnogho mobo bho ịmoghon obho. ³⁰Íḍighi ghạ molo ologhi Ẹmugh Iigbia bho tẸnaan kaḅẹebh. Odi pelẹkẹ obho Ẹnaan ạnogho enyina mobho enyina iru milꞌodi nꞌobho odi tạta ni enyina mi tobꞌaḍuma bho. ³¹Ịḅughe tọtu moomo ologhi ạghuma, nꞌạlile, nꞌọkarabh ologhi, nꞌitōnyōghan nꞌaḅẹebh ologhi. ³²Kpẹlen nꞌipa, iḍighi ghạ miiḅi, onyiin ạsuanaan ghụsan aḍien monyiin, onyiin ạḅelemaan mịkarabh onyiin kẹzo bho Ẹnaan ạḅelemaan enyina mi taKraist obho.

Itugh tẹḅaal obho

¹Ịtuonom rạaḅa asike tẸnaan kạnwuny oḍigh ologhi odi. ²Itele taraabōom aghuḍum etulan, kẹzo bho aKraist atulan ezira, ạnogho ghuḍum odi ạbho mebum ezira bho. Ọbho bhobho todi idi kọtun ạar ooḅi eḍu olo aḍigh magey tologhi tẸnaan.

³Ụmoghon io nọmoghon teesoḍia enyina karōoy tẸnaan, milo igboloman nꞌọva ạraani nꞌilobhir, nꞌọkpo ilo ịneghe ḍio mọmoghon, nꞌẹḍogh okpoki. ⁴Ịgbaan nạ ḍio molo kọmoghon mi tenyina mọnuekpete aḅẹebh ọmiin, nꞌọnuekpete araama. Ịíḅaghami ghạ nạ miiḅi ọnuekpete. Kpẹlen nꞌipa, ịsebh ghạ mẸnaan be. ⁵Ilōghōm kua mobho bọbon ọva rạani nꞌilobhir, nꞌōoy olo naḍighiiy mọkpo ilo ịneghe ḍio, nꞌọḍogh mẹḍogh okpoki, (obho aru monyiin oḍigh iikpulughu aruru obho,) olo tapin ạni bin mi tAde-Ọolema bho taKraist nꞌẸnaan olo.

⁶Ímōrō ghạ onyiin ōoy abhin ọnuekpete araama aabiōghōm enyina. Ạkar ebum eedi iibha bho kạlile tẸnaan tatu apuom mobo bho ikiilaan io zodi obho. ⁷Arōoy ilo idi kua, ítuan ghạ. ⁸Tamen olo naatẹn enyina irele ghạ tọkinim, keḍio esiibha enyina neeru marōoy tObạmọogh obho netele tẹḅaal. ⁹Ẹḅaal obho pobo nagbo ghạ mẹela iiḅua oḍigh kẹrekere oḍighi iiḅi, nꞌọkpo ilo ịneghe, nꞌagey obho. ¹⁰Ịkparam mẹtuugha mibha teḍigh tologhi tObạmọogh obho. ¹¹Ị́logh ghạ rạvo enyina mi teḍighiom ạar arōoy ilo idi tọkinim, ilo ạsuo ilo, kpẹlen nꞌipa, ize memutiom zeedi tẹḅaal obho. ¹²Ạregheer ịkar idi magey mobhin ọnu ọgbaam ibha eedi neḍighi tẹḅokia bho. ¹³Kamen kamen olo ẹḅaal asōorōm mạar, pọmiin ọman. Kạar kạar olo nọomiin ụman, odi odi tẹḅaal obho. ¹⁴Kạar kạar olo naamute ạman nooḍighi otẹnẹ mẹḅaal obho pạar obho aḍighi bọ kụkpete miibha bho,

“Okoḍi rạla, suma; ḅetunu tọbho bho,

paKraist ọnogho onuma mẹḅaal.”

¹⁵Tebum iibha bẹleni, ịmaar eenon ghạ ku merele. Itele kilōghōm mạar arōoy, irele ghạ karaama. ¹⁶Kọbam kọbam amen olo enyina ịteeny, ipin eḍighiom iiḅi ọkpo, aruḍuma bhibha ịkarabh. ¹⁷Tebum iibha bẹleni ítẹnẹghu ghạ raama arōoy siibha bho, ilōghōm mibha Obạmọogh obho nạva molo enyina keḍighi obho.

¹⁸Ịbhoghoḍia ghạ rimiim eghigh enyina. Iibha bho nẹpue ghuḍum be. Kpẹlen nꞌipa, ịḅele Ẹmugh Iigbia bho aru amuza agbẹbh talōor enyina. ¹⁹Ipin ibha ọnuekpete ạsoor taDevid nꞌibha ịbhereer ạsoor ạsosi obho nꞌạsoor iigbia bho, onyiin ạḍeghiom rạḍeghe ạnogho monyiin, mebhin nạ mẹmoorom sọor mebuom Obạmọogh obho mi tiloghi enyina. ²⁰Ịnogho ghạ lịsebh mẸnaan Ọde bho moomo amen mi toomo ẹmorokpo ilo imute mi taḍien tạJizos Kraist Obạmọogh ezira bho.

Aliiki ạraani nꞌilom

²¹Onyiin aghiilaan monyiin tebum eegu aḍien obho enyina nẹnogho maKraist obho.

²²Enyina ạraani obho, ikiilaan burulom enyina kẹzo bho enyina nekiilaan mObạmọogh obho. ²³Olom obho pẹmu ạni obho kẹzo bho aKraist aru mẹmu ạsosi obho, aru nạ mỌpela odi, obho aru bọ lōor odi nạ bho. ²⁴Onyiin ẹzo bho nạ, ạraani eghiilaan burulom eedi toomo kạar kạar kẹzo bho ạsosi obho nạnogho moghiilaan maKraist obho.

²⁵Aburulom, itulan rạani enyina kẹzo bho aKraist atulan mạsosi obho ạnogho ghuḍum odi zodi obho. ²⁶Odi aḍighi miibha bho, abhin toghōrōkō ọnuekpete bhꞌodi aḍighi ạḅaaleni mạsosi obho momulumi ọnogho Ẹnaan tamen olo odi naabhin mụum aatōlōm odi ạḅaaleni, ²⁷momulumi ạsosi obho talōor odi, mi toomo ẹneghe bhꞌodi tilo ịkarabh ilo nolo, ịghor ạman ẹko ilo nạ, nꞌạdoti bolobolo ạlukpo nꞌịnon ịkarabh ọkpo ịpue ḍio nọpue mẹneghe bhꞌodi. ²⁸Onyiin ẹzo bho nạ, pẹzo aburulom kitulan rạani eedi kẹzo bho eedi itulan lōor eedi obho. Odi obo bho atulan mạni odi obho atulan nạ lōor odi. ²⁹Bọbon ōoy olo ạlogh ḍien malōor odi olo. Odi nạmaar ghạ ni aakō, ạmaar aseeri ạḅaaleni kẹzo bho aKraist naḍighi mạsosi obho, ³⁰ebum obho ezira uru moḍigh kẹrekere ariisi alōor odi obho.

³¹“Tebum iibha bẹleni, kōoy kōoy tạḅele nị mọde nꞌoniin odi,

ạki atul mạni odi, ịzal eedi etu monyiin.”

³²Ẹkpar magey mọmoghonyan ọkpo ilo ụḅoki tọnuekpete bhobho, keḍio ạami nạatua, ụkpete ugboloman maKraist nꞌạsosi obho. ³³Egboloman nạ kōoy kōoy. Kolom kolom ạmaar atulan mạni odi kẹzo bho odi atulan lōor odi obho. Kạni kạni ạmaar ạnogho moghiilaan molom odi.

Aliiki ạnwuny nꞌạburude nꞌaburuniin eedi

¹Ạnwuny, oobho oḍighi enyina mi taKraist, ọmoghonyan ọnu ọde nꞌoniin enyina. Iibha bho ịkar kua ẹneghe magey moḍighi. ²“Ikiilaan mọnu ọde nꞌoniin enyina” pọḅel olōgh olo ụḅaram nꞌoguan, ³olo ạkpete kua, “molo ẹneghe ẹnogho ạna, aruḍuma onuma ẹdoony mi tade bho.”

⁴Enyina ạburude nꞌaburuniin obho, íḍighi ghạ mạar olo iloghi ạnwuny enyina keḅẹebh. Kpẹlen nꞌipa, ipin tạliliom nꞌịtughumiom taKraist merughom eedi.

Aliiki ạrubana nꞌạburude otu eedi

⁵Kẹbana kẹbana aghiilaan mọnu ọde-otu odi taruugu nꞌeegu aḍien. Ipin nꞌoomo ologhi enyina ku meḍighiom kilo enyina neḍighi moḍighi obho nẹnogho maKraist. ⁶Íḍighi ghạ miibha bho tamen olo eedi neenon enyina molo enyina kebhin lịsebh tạvo eedi. Ipin ghạ nꞌoomo ologhi enyina meḍighi mibha Ẹnaan nạva bho, kạrubana taKraist. ⁷Ipin nꞌọḅaal ologhi meḍighiom oḍighi enyina kilo enyina iḍighi ḍio ẹnogho rōoy, neḍighi ẹnogho mObạmọogh obho. ⁸Ilōghōm kua mobho Obạmọogh obho tạkpe nị amulumian kōoy kōoy mi tooḅi oḍighi obho odi aḍighi obho, iru kạar olo odi aru mẹbana bolobolo ọony ogbo eghun ẹkona.

⁹Enyina ạburude otu obho ẹkona, itughom nạ zeedi monyiin ẹzo bho. Ímeeḍi ghạ zeedi. Ilōghōm kua meghōl eedi nꞌenyina ilo onyiin ọde-otu obho mi tạnyu obho, olo natughom kōoy kōoy monyiin ẹzo bho.

Oomo ọkpo ẹgham tẸnaan

¹⁰Tilo ọkpete okunughiom, ịkua magey mi tObạmọogh obho mi toomo ibꞌịnyaam obhꞌodi. ¹¹Ịnyaa talōor enyina moomo ọkpo ẹgham obho tẸnaan, molo enyina etue ẹmaranuan mịkarabh iipelekia eru obho. ¹²Ezira ụmaranuan io moḅe arōoy, nọmaranuan moḅe ịkarabh ịnyaam arōoy ạruumugh mi tạnyu obho, nꞌạruula nꞌobo ịto nꞌobo bho ịteeny mịnyaam mi tọoke bhobho idi tọkinim obho. ¹³Tebum iibha bẹleni, ịnyaa moomo ọkpo ẹgham obho tẸnaan, molo amen ịkarabh aruḍuma bho tetu enyina tetue ni ẹmaranuan mikpo ẹgham obo ọlogh aḍien obho, molo tikunughi obho enyina tẹmara nị.

¹⁴Tebum iibha bẹleni, pịmaar ẹmara mebhin ọnuekpete agey obho mẹkpuom ukpe enyina, mebhin oḍighi iiḅi mi taghisigh tẸnaan mepuom eeku enyina, ¹⁵mẹlokia marubudu ọgba ooḅi adōm ekima bho. ¹⁶Tilo ipuom suo, ịpam ghạ moomo amen mọdaam ẹgham obho, obho aru mologhi omōruōm obho, obho enyina tetue ni epin eḍimiom mimōmōgh ịna Ọkarabh Oōy obho nạtaḅal obho. ¹⁷Ịseghe meghōony ẹgham obho aru mịbhelegha bho mezua, mekōbh elōor ẹgham obho aru mọnuekpete bho tẸnaan obho Ẹmugh Iigbia bho ạnogho enyina bho mẹbham. ¹⁸Iikpulughu ghạ moomo amen molo Ẹnaan kạlogh ạvo kạnogho enyina tibha Ẹmugh Iigbia bho natōmōghiōm enyina bho. Iikpulughu ghạ nạ moomo amen mẹnogho moomo arōoy tẸnaan. ¹⁹Iikpulughu ghạ nạ mẹnogho ạami molo Ẹnaan ạnogho ạami dōm ọgba tamen olo ạami nạamara mọgba, molo ạami ukiil io ruugu mọgba omutiom ọkpo ẹḅokia ooḅi adōm obho, ²⁰obho ụtuan bọ kụto zạmi useeri tesi taKraist obho, toomo ibha ạami odi nạ siibha tikoli obho ẹkona. Tebum iibha bẹleni, iikpulughu ghạ molo aruugu isibh io ạami mọgba ghạ tibha iizuan ạami moḍighi obho.

Iipuruan ikunughi obho

²¹ẠTikikos ooḅi umōr ezira obho naḍighi magey moḍighi tObạmọogh obho, tạgba nị ạnogho enyina kạar kạar ilo igboloman nꞌạami molo enyina elōghōm mẹzo ạami odi. ²²Iibha kiḍighi kạami natōm odi atuom enyina mọgba ọnogho enyina mẹzo oomo ezōor idi, mọghuemi iloghi enyina.

²³Ẹnaan Ọde bho nꞌạJizos Kraist Obạmọogh obho ẹnogho nị moomo aburumōr obho mekima nꞌetulan nꞌologhi omōruōm. ²⁴Aluunwo ạlisebh tẸnaan ẹrolan oomo obo bho itulan mạJizos Kraist Obạmọogh ezira bho nꞌetulan olo opẹ ḍio bho.