Kọlosi

¹Ạami ạPol, obo bho ịḍua tịto tẸnaan kiru kạami uru ạni monyiin oteledōm tạJizos Kraist obho, nꞌaTimoti umōr obhꞌezira,

²ụge notuom enyina arōoy obho tẸnaan ibha idi bọ tạsosi obhꞌạKolosi, obo bho ịteeny ạni nꞌezōor mologhi omōruōm mi taKraist obho.

Ẹnaan Ọde bhꞌezira ạnogho enyina lịsebh nꞌekima.

Iikpulughu ạlisebh

³Ezōor nọsebh ghạ ni mẸnaan Ọde bho tạJizos Kraist Obạmọogh ezira bho moomo amen ọlogh enyina tiikpulughu ezōor, ⁴ebum obho ezōor nọomoghon mologhi omōruōm obhꞌenyina mi tạJizos Kraist, nꞌetulan obho enyina netulan moomo arōoy tẸnaan obho. ⁵Amen ạkar agey ọnuekpete ooḅi adōm obho aru asi tenyina, enyina ẹmoghon milo igboloman nꞌọkpo olo Ẹnaan naakōbhōghi aseerian enyina mi tạnyu obho. Molo ịḍua teedi ọkpo bho enyina neḍuom ologhi obho, kenyina ẹteeny mologhi omōruōm nꞌetulan obhꞌenyina. ⁶Ooḅi adōm obho nạnogho lịsebh, apōbh nạ alela toomo ẹmar-arōoy obho, kẹzo bho ịrol bọ tenyina kọḅel aḍuma bho enyina ịmoghon bọ mọsu aghusạn aḍien obho tẸnaan kenyina iru ilōghōm imōruōm magey obho. ⁷Ẹpafras ooḅi ẹbana-umōr ezira, obo bho nakumuan tesi ezōor mi toḍighi obho taKraist, pobo ạtughumiom enyina miibha bho. ⁸Odi nạagba ạnogho ezōor metulan obho Ẹmugh Iigbia bho ạnogho zenyina bho.

⁹Iibha kiḍighi kezōor ụḅele ghạ ḍio nọḅele mọlogh enyina tiikpulughu ezōor, kamen obho ezōor ụmoghon mibha igboloman nꞌenyina bho. Ezōor nookpulughu ghạ ọnogho mẸnaan molo odi apulughi tenyina mịitua ịto bhꞌodi, nꞌoomo olōghōm ạar nꞌọmoghonyan obho Ẹmugh Iigbia bhꞌodi nạnogho ghạ bho, ¹⁰penyina orue oḍum aghuḍum obho Obạmọogh obho nạva bho, omina oḍighi nạ moomo amen mibha iḍigh bọ tologhi obho odi. Nꞌolo toomo oḍigh kẹrekere iiḅi oḍighi enyina, aghuḍum enyina teḅu ni miiḅi iiḅua, enyina epōbh nạ tịitua tẸnaan. ¹¹Ẹnaan ạnogho zenyina mịnyaam kotꞌịnyaam obho ịḍua bọ tịnyaam eghuan bhꞌodi kiru obho, molo enyina tetue ni ẹkparam nꞌalideny alōor toomo ẹmorokpo. ¹²Nꞌolo enyina ẹnogho lịsebh nꞌọḅaal ologhi mỌde bho, obo bho aḍighi enyina mogbẹbh ạni arōoy ilo tepin mabin eedi mi tọkpo bho Ẹnaan, naakōbhōghi aseerian marōoy odi tepa ogbōgh ẹḅaal obho. ¹³Odi ạbhel ezira momuzōnaan tịnyaam ọkinim obho keḍio ạde lōor abhin ezira ạloghom tAde-Ọolema ooḅi Ọony obhꞌodi, ¹⁴obo bho ịḍua todi kiru, kụbhel ezira utẹnẹmi mi tọḅelemaan ịkarabh ezira bho.

AKraist nꞌoḍigh oḍighi obhꞌodi

¹⁵AKraist aaghirinaan ni mẸnaan, molo nọomiin zodi, pụ nọomiin mẸnaan, obho dọmiin ghạ ḍio bho. Odi pọkpana bho ạrol bọ kugbi mọlem ẹmar-arōoy obho. ¹⁶Ịḍua todi kọlem moomo ẹmorokpo bho idi bọ tạnyu obho nꞌade bho, ilo nọmiin nꞌilo ụmiin io, nꞌoomo obo bho ịteeny mịnyaam mọda nꞌọto ịto mi tạruumugh obho. Ịḍua tịto odi keḍio ụtuan nạ zodi kụlem moomo ẹmorokpo bho. ¹⁷Odi odi kọlem oomo ẹmorokpo bho. Oomo ẹmorokpo bho ịkpabhaghian todi ẹrol mẹzo bho idi siibha bho. ¹⁸Odi ẹmu ạsosi obho aru bọ miikpōogh odi obho. Aghuḍum ạke todi. Odi ọḅel ọony obo ubhira uḅẹtōn tọbho bho. Molo odi be tạtol tẹtolom ọolema bho mi toomo ẹmorokpo. ¹⁹Iḍigh magey mi tologhi tẸnaan molo kọmiin kọmadon moomo eḍighiom ạar odi mi tỌony obho, ²⁰nꞌolo kẹḍua tỌony obho, odi katulughian mẹmar-arōoy obho. Molo ịḍua nạ tọbho Ọony obhꞌodi mi toorẹeny ẹmigheri obho keḍio odi abhin mekima aru tẹmar-arōoy obho, momulumi todi moomo ọkpo olo idi tade bho nꞌạnyu obho.

²¹Tamen olo neetẹn, enyina igbeenyan ni tịitua enyina nꞌẸnaan, molo enyina iru mobo ọlokian ariḍien odi tebum ịkarabh iloghi nꞌeḍighiom ạar obhꞌenyina. ²²Keḍio esiibha bho Ẹnaan nạatuan mebum ọbho iikpōogh alōor Ọony obhꞌodi atulughian enyina mobhin enyina oseeri taghisigh odi kiiḅi arōoy olo ịneghe ni ịman, ilo ụgbaam ghạ ḍio mịkarabh. ²³Tẹzo bho odi kabhin enyina mẹzo bho, pịmaar mẹmara mẹghua magey tologhi omōruōm enyina kạkpo otu. Ímōrō ghạ alōor enyina aabhigha toḍuom ologhi obho enyina ịteeny tamen obho enyina ịmoghon bọ mooḅi adōm obho. Ọgba odi ooḅi adōm obho kaḍighi mạar obho ạami ạPol uru mookō rạana ạsosi obho. Odi adōm obhobho poobho nọgba ọnogho kōoy kōoy mi tẹmar-arōoy obho.

Oḍighi olo ạPol aḍighi ạnogho mạsosi obho

²⁴Tebum iibha bẹleni, ologhi ạmi nạḅaal magey mi tọmiinom obhꞌạmi mebum enyina. Ọmiinom iikpōogh alōor obhꞌạmi nẹpel moḍighi ọmadon tọmiinom obho aKraist ạmiinom tebum iikpōogh obhꞌodi obho aru bọ mạsosi obho asughenaan zeedi obho. ²⁵Ẹnaan obo bho ạnogho ạami moḍighi oḍighi obhobho ọnogho enyina bho, pobo abheleghi ạami moru ookō rạana ạsosi obho, ọgba omutiom ooḅi adōm obhꞌodi molo arōoy kẹmoghonyan. ²⁶Kageedi, ẹmu adōm obhobho ụḅoki ni moomo itelema tẸnaan nꞌarōoy, keḍio esiibha Ẹnaan naamutiom mẹmu adōm obho ạnogho rōoy odi. ²⁷Iibha pibha ịrol tịitua tẸnaan: ọgba omutiom ọnogho rōoy odi mẹmu ẹela nꞌeghuan obho ụḅoki obho, obho odi aseerian moomo arōoy ịnon aruubhugh obho. Oobho podi ẹmu obho ụḅoki obho: maKraist odi tenyina. Oobho nẹgba eḍeeriom mobho enyina tepin ạni ni mabin eghuan obho tẸnaan. ²⁸Pạar obho ezōor nọgba maKraist ọnogho moomo arōoy obho. Ezōor ubhin toomo olōghōm-ạar obho ezōor ụteeny obho nookiom ọtughumiom kōoy kōoy mobhin eedi oru taghisigh tẸnaan karōoy olo neeḍum ịman tạruumugh obho mi totul ọnu nꞌaKraist. ²⁹Tẹzo olo oḍighi iibha bho, pạami ubhin toomo ibꞌịnyaam obho aKraist ạnogho ạami obho, ibha neḍighi moḍighi mi tạmi obho, nakumuan ghạ.

¹Ịḅele ạami ụgba ụnogho enyina mẹzo ạami uḅe ụnogho enyina nꞌarōoy ibhꞌaLaodisia nꞌoomo obo bho nꞌạami ulōghōmuan io bho, ²molo eedi ẹteeny mọoghuanaan iloghi, nꞌolo oomo eedi eḍuraan tetulan, molo eedi ẹteeny magey ọmoghonyan, ẹkar elōghōm ạni mẹmu ạar obho Ẹnaan ạḅoki obho paKraist ³Todi aKraist pesi ụḅoki mẹela olōghōm ạar nꞌọmoghonyan.

⁴Ạami nạgba kua ạnogho enyina siibha bho, ímōrō ghạ onyiin ōoy abhin miben ịkanan aḍighi enyina raama, kẹzo kẹzo olo eedi ịneghe isi. ⁵Toomo ibha ạami olo nꞌenyina tiikpōogh obho, ạami odi nꞌenyina tạruumugh obho, molo ologhi ạmi nạḅaal ni magey mọmoghon ọoghuanaan otul ọnu obho enyina ibhin ịmaruom monyiin esi mi tologhi omōruōm enyina mi taKraist obho.

Aghuḍum olo agbẹbh ni ạman taKraist

⁶Suo enyina neebhin imōruōm mạJizos Kraist moru Obạmọogh enyina bho, pitul mọnu nꞌodi. ⁷Iḍiineni mịika bhꞌenyina mi todi, megim otu aghuḍum obhꞌenyina nạ mi todi, molo enyina eḍum ẹki taghisigh ẹkua magey tiloghi omōruōm obhꞌenyina kẹzo bho ụtughumiom enyina bho. Aghuḍum enyina emuzō mọnogho ghạ Ẹnaan lịsebh.

⁸Igona lōor enyina, molo arōoy ipin moobho olōghōm ạar ẹmar-arōoy obho eebiōghōm enyina, etẹnẹ enyina rụbana. Oḍigh olōghōm ạar obhobho pịtughumiom eḍighiom ạar ibha ịḍua iru tezira kageedi obho. Iibha ịtughumiom ịbam ạnwuny, ilo taKraist ḍio. ⁹AKraist aaḅua mẸnaan mi tiikpōogh obho. Odi pōoy olo oomo iiḅi eḍighiom ạar tẸnaan imuza ni ịman. ¹⁰Enyina neegbẹbh ẹman mi todi, obo bho nạda bọ moomo ạruula nꞌịto mịto ạruumugh obho.

¹¹Enyina neeḍunaay totul ọnu obhꞌenyina nꞌodi. Aliḍun ibha ozu alōor obho ḍio, aliḍun obho taKraist obho aḍighi enyina momuzōnaan tịnyaam ịkarabh iikpōogh alōor obhobho bho. ¹²Men obho uzuom enyina mụum obho, ịrol kilo nọoḅar enyina uḍiom nꞌaKraist molo Ẹnaan obo bho aḅẹtōn odi tọbho bho aḅẹriōn enyina nꞌodi mi tiloghi omōruōm obho enyina. ¹³Tamen olo neetẹn, enyina aghuḍum ilo tạruumugh obho, tebum ịkarabh obhꞌenyina nꞌebum obho enyina iru misoloman olo deḍunaay io bho. Keḍio esiibha bho, Ẹnaan nạaḅạr maKraist nꞌenyina ạnogho ghuḍum. Odi Ẹnaan nạaḅelemaan ezira moomo ịkarabh ezira. ¹⁴Odi nạagburion mọbhereer ọmugh obho ezira nꞌoomo araalōgh obho, ạḅar moomo eedi ạkanam toorẹeny ẹmigheri obho taKraist. ¹⁵Tọbho bho taKraist mi toorẹeny ẹmigheri obho, podi amuzōnaan lōor odi mi tịnyaam ạruula nꞌịto mịto ibhꞌạruumugh obho. Odi ạsaram eedi migiri mobho odi naapuom zeedi.

¹⁶Tebum iibha bho bẹleni ímōrō ghạ nomōrō ōoy aru ạru mịiruan ạnogho enyina tilo igboloman nꞌọkpo ilo ole nꞌilo ọbhoghol, nꞌilo igboloman nꞌaruḍuma olo enyina keegbiemiiy, bolobolo ariwiki nꞌạruvanyu nꞌạsumusia. ¹⁷Oomo abaabha bho iikōogh ọkpo ilo iru momute be. TaKraist pesi ẹmu eedi ọkpo bhibha neemute ịman. ¹⁸Ímōrō ghạ nomōrō molo obo bho nepōbha lōor eedi tebum ạghiiny olo eedi nẹmiin obho ẹru mịiruan ẹnogho enyina. Ịitua eedi igboloman nꞌọkpo esuo ade bho be. Eedi nẹgbaay ghạ molo kosōoriōm lōor kookpulughu ghạ mitelema tẸnaan. Oōy olo odi kua, ōoy iituma olo ẹmu olo, ¹⁹olo nạaḅele mọkpabh aKraist obo bho aru bọ mẹmu ạsosi obho. Odi aKraist ạda ạmarami nạnogho ghuḍum moomo alōor obho, ạpam atulughi monyiin moomo ariisi alōor obho molo epōbh ẹki taghisigh kẹzo bho Ẹnaan nạva bho.

Obo bho nẹebho nꞌaKraist obho neḍum nꞌodi

²⁰Ẹzo bho enyina nẹebho nꞌaKraist ịgbaranuan tịtughumiom ịbam ạnwuny obho, ebum eeghe kesiibha bho kenyina neḍum maghuḍum olo idi kolo enyina iru milꞌesuo ẹmar-arōoy obho? Ebum eeghe kenyina nẹtuonuman egbiiy miigbia ilo ighōl mụ ²¹“Ụbham ghạ moobho, ule ghạ mipa, ukulaan ghạ miibha?” ²²Nooḍighi ọḅele moomo abaabha bho, peedi ạar oḍighiom olo mu. Iibha iigbia ilo arōoy ẹmar-arōoy obho ịtooghiiy. ²³Iibha ịgbaanan kolo eedi ịteeny ni molōghōm ạar mi tiikpulughu itelema tẸnaan, nꞌiben osōoriōm alōor, nꞌọnogho obꞌọmiinom tiikpōogh alōor ọbho, keḍio eedi ạar oḍighiom olo mi tọbhama lōor tibha iikpōogh obho nẹnyaghagh obho.

¹Ẹzo bho nọoḅar aKraist nꞌenyina uḅẹriōn tọbho bho ụnogho ghuḍum obho, piseeri mologhi obhꞌenyina mi tọkpo iibha idi bọ tạnyu obho, tesi obho aKraist odi tẹtolom mi toḍiom ạvo tẸnaan obho. ²Igim mịitua enyina meseeri tọkpo ibhꞌạnyu obho, ibhꞌesuo ade bho ḍio. ³Enyina nẹebho, keḍio aghuḍum enyina nọoḅoki nꞌaKraist mi tẸnaan. ⁴Ạkar aghuḍum obhꞌenyina paKraist. Amen odi tamute atu, penyina ẹkona omute oru ạni nꞌodi obhin ạni abin eghuan obhꞌodi.

Omoom nꞌugbaany aghuḍum obho

⁵Tebum iibha bho bẹleni, ịloki toogu mẹezeghi mẹmel ẹmar-arōoy obho nẹnyaghagh enyina bho, ibha iru bọ mọva ạraani nꞌole ẹma, nꞌọotua ịkarabh ịitua, nꞌopesiom ạraani, nꞌogbẹel ọteeny ọkpo olo nogbiiy ni, nꞌoseeriom ologhi ọteeny kạar kạar (oobho bho ponyiin oḍigh iikpulughu eru). ⁶Ạlile bho tẸnaan tẹtol ẹnogho mobo bho neḍighi mọkpo bhibha bho, obo bho ikiilaan io zodi obho. ⁷Tamen olo neetẹn enyina nịvo nịvo iḍum ghạ maghuḍum obhobho molo aghuḍum enyina iḍigh rụbana eedi.

⁸Keḍio esiibha bho, ikẹl mọkpo bhibha: ọkarabh ologhi, ạlile, aḅẹebh ologhi. Ọnuekpete ịkarabh nꞌitōnyōgh ịtol io tịnu enyina. ⁹Onyiin ọgbaam io monyiin miben, ebum obho enyina nẹekporonaay mugbaany aghuḍum obho nꞌoomo ịkarabh eḍighiom-ạar obhꞌodi, ¹⁰nẹelokiaay siibha momoom aghuḍum. Oobho pomoom aghuḍum obho Ẹnaan obo bho ạlem obho nạva ghạ moomo amen monwe enyina ọgbaaniom odi molo aḍighi enyina ẹmaar elōghōm odi. ¹¹Oobho bho naaru aḍighi molo akẹrẹkẹrẹ olo mu tarōoy aJu nꞌibhꞌịnon aruubhugh obho, obo bho idi muudu nꞌobo bho neeḍunaay obho, obo bho iru milo iloghi nꞌarōoy eḍum, ạrubana nꞌạnwuny ogbo eghun. AKraist poomo eedi, mi toomo eedi.

¹²Enyina arōoy tẸnaan. Odi atulan enyina magey molo odi ạson enyina moru ạkar ilꞌodi. Tebum iibha bho bẹleni, ịteeny mọsu ạghusan aḍien nꞌoḍighi iiḅi nꞌosōoriōm alōor nꞌoghiilaan nꞌalideny alōor. ¹³Onyiin ạminoghom ịkarabh onyiin, ẹḅelemaan nạ mịkarabh olo onyiin aḍighi monyiin, kẹzo bho Obạmọogh obho ạḅelemaan enyina mịkarabh enyina bho. ¹⁴Ilo ipuom suo, onyiin atulan monyiin. Etulan pobo nạkoroghi ghạ rōoy monyiin esi ạnogho motul ọnu olo agbẹbh ni ạman. ¹⁵Ekima bho taKraist aru mọtu mịiruan tiloghi obhꞌenyina. Tilo enyina keḍum ạni maghuḍum ekima bhobho pobho Ẹnaan ạtuan kabheleghi aakōbhōghi enyina monyiin esi moru oḍighi onyiin alōor. Ịnogho ghạ lịsebh mẸnaan. ¹⁶Ọnuekpete taKraist nꞌoomo ẹela bhꞌodi erugh ni tiloghi obhꞌenyina. Onyiin abhin olōghōm ạar obhꞌodi ạtughumiom monyiin ạnogho liiki. Ịmoor ghạ miiḅi ạsoor mebuom mẸnaan, mẹnogho lịsebh zodi tiloghi obhꞌenyina. ¹⁷Toomo ariḍighi enyina nꞌọnuekpete enyina ipin ghạ maḍien tạJizos Obạmọogh obho kụ meḍighiom, ebum obho ạlisebh obho enyina nẹnogho ghạ bho nẹḍua ghạ todi kụ nẹki esi tẸnaan Ọde bho.

Ẹzo orughan arōoy

¹⁸Enyina ạraani, ikiilaan maburulom enyina. Iibha pilo ịgbaan ni molo enyina obo bho nẹtuonuman maKraist obho keḍighi.

¹⁹Enyina aburulom obho, itulan mạraani enyina. Ị́bhooruom ghạ zeedi.

²⁰Enyina ịbam ạnwuny obho, ikiilaan mọde nꞌoniin enyina mi toomo ọkpo. Iibha pibha iḍigh tologhi tẸnaan.

²¹Enyina ạburude bho, íḍighi ghạ iloghi ạnwuny enyina aḅẹebh molo eedi ịfibhighu.

²²Enyina ạrubana bho, iḍighi moomo ibha ọde otu enyina ạkpete ạnogho enyina moḍighi obho, tamen olo odi odi suo naanon enyina nꞌamen olo odi olo suo mọmiin enyina. Ipin magey ologhi obhꞌenyina ku meḍighiom ghạ tebum oghiilaan obho enyina nekiilaan mObạmọogh obho. ²³Kạar kạar olo enyina neḍighi ipin nꞌoomo ologhi enyina meḍighiom, kilo enyina neḍighi ẹnogho mObạmọogh obho, iḍighi ḍio ẹnogho rōoy. ²⁴Ilōghōm mobho Obạmọogh obho tamulumian ni enyina tibha enyina iḍighi obho, ạnogho ạni enyina mabin ịga bho odi aseerian marōoy odi obho. AKraist podi ạkar ọde otu obho enyina nekumuan ẹnogho bho. ²⁵Kōoy kōoy olo naḍighi mịkarabh tapin ni mạmukpe ịkarabh obho odi naḍighi obho. Ẹnaan ọoseen ghạ ḍio mōoy, ịkarabh obho ạna uḍighi obho pibha odi tapin ạliom ạna.

¹Enyina ạburude arutu obho, ịmaar ẹbham mạrubana enyina. Ilōghōm mobho enyina ẹkona ịteeny nạ mọde otu olo odi tạnyu obho.

Aliiki

²Ẹekaany iḍigh io mookpulughu ghạ oomo amen, ịsumaay tiikpulughu enyina mẹnogho ghạ lịsebh mẸnaan. ³Onyiin ẹzo bho nạ, iikpulughu ạni ghạ mẹnogho ezōor molo Ẹnaan kạnogho zezōor maraabōom ọgba adōm obhꞌodi nꞌẹmu ạar obho ụḅoki taKraist obho. Iibha pibha iḍighi bọ kạami odi mikoli obho. ⁴Iikpulughu ghạ molo ạami ạgba magey obho amutiom arōoy ẹmoghonyan ni kẹzo bho ịgbaan obho.

⁵Iḍum aghuḍum arōoy olo ilōghōm ạar mi togbo arōoy obo bho demōruōm io maKraist obho. Kọbam kọbam eepōogh olo amute enyina kẹgba madōm obho, ị́ḅele ghạ mobhin ọgbaam. ⁶Ọnuekpete bhꞌenyina ẹrobhi ghạ raḅeri nꞌiloghi obo bho nẹmoghon obho, meloghōm nạ mẹzo ọbhagharana kōoy kōoy.

Iipuruan ikunughi obho

⁷ẠTikikos ooḅi umōr obhꞌezira, nꞌọḅarama obho atul nꞌezōor naḍighi magey moḍighi tObạmọogh obho, tạgba ni ạnogho enyina moomo ilo igboloman nꞌezōor. ⁸Pạar obho ạami urōm odi natuom enyina bho molo odi ạḅaaleni miloghi enyina ạgba ạnogho enyina mẹzo oomo ezōor idi. ⁹Onisimos onyiin ọony enyina natu ạni. Odi naaru monyiin obꞌooḅi umōr ezōor mi taKraist olo naḍighi nạ magey. Eedi tẹgba ni ẹnogho enyina kạar kạar olo neemutanaan ezōor teebha.

¹⁰Ạristakos obo bho odi nꞌạami tikoli obho, nꞌạMak ọony onyiin eghun otu nꞌạBanabas obho, epuruan enyina. (Ạami nạagba ghạ ạnogho zenyina milo igboloman nꞌạMak akōl kua modi aru tenyina, pipin odi nẹloghom.) ¹¹AJosua obho ughōl bọ ạJustos obho apuruan nạ enyina. Ịraar eedi be marōoy aJu ilo neeghiraan imōruōm ạJizos Kraist toomo obo bho itul nꞌạami neḍighi moḍighi Ade-Ọolema tẸnaan obho. Eedi arōoy ilo ịlogh mạvo ịnogho ạami magey.

¹²Ẹpafras onyiin ōoy olo atul nꞌezōor naḍighi moḍighi obho tạJizos Kraist, apuruan nạ enyina. Odi nạlogh ghạ ni enyina tiikpulughu bhꞌodi moomo amen agbẹel mẸnaan molo enyina kẹmaar kemōruōm kebhōbh kẹghi taghisigh kẹmara kẹghuonom mi toghiilaan obhꞌenyina tẹzo bho ịto bhꞌodi. ¹³Ạami tatue ni ạgbaanaan odi toḍighi alikumuan olo odi nakumuan enyina nꞌoomo arōoy obhꞌaLaodisia nꞌạHierapolis. ¹⁴ALuk ookō laakō bhꞌezōor nꞌaDimas epuruan nạ enyina.

¹⁵Ipurunaan ezōor moomo aburumōr obho idi bọ taLaodisia bho, nꞌaNimfa, nꞌoomo arōoy ạsosi obho neekpulughu ghạ totu odi obho. ¹⁶Amen olo enyina ighōl mọbhereer obhobho, ị́ḅele ghạ mọfirima nạ ọghiom koghōl ạni tạsosi obhꞌaLaodisia. Onyiin ẹzo bho nạ, amen obhꞌaLaodisia aru asi tạvo enyina, pikōl ạni. ¹⁷Ịgba mẹnogho mẠkipos modi ọḅele ḍio moḍighi ọman moḍighi obho Obạmọogh obho ạnogho zodi moḍighi obho. ¹⁸Ạami ạPol ubhin ạkar ạvo ạmi nạgiom miibha bho. Ạami ạPol apuruan enyina. Íḅulo ghạ magbirigbiri ikoli obhꞌạmi.

Ọsu ạghusan aḍien ẹrolan enyina!