Eḍighiom ạar

Eḍighiom ạar

¹Ooḅi ạTiofilos, tọḅel ọbhereer obho ạami ụge bho, ạami ụgba moomo ibha ạJizos aḍighi obho nꞌibha odi ạtughumiom obho, ki tamen obho odi ạke moḍighi odi obho, ²ninii ạteeny ḍuma bho ụseghe odi ụsiine tạnyu obho. Odi abhin tịnyaam Ẹmugh Iigbia bho ạto mịto ạnogho mobo bho odi ạson ạseghe moru iteledōm odi obho. ³Erubal aḍuma bho odi ạrol tade bho ki tamen obho odi aḅetunu tọbho bho, odi aḍeeriom lōor odi ạnogho zeedi mịkanya amen ilo ịgba neḍeeriom mibha odi ọkar odi taghuḍum: eedi ẹmiin odi, keḍio odi ạḍeghe nạ ạnogho zeedi milꞌAde-Ọolema bho tẸnaan. ⁴Amen eedi iru iikōbhōghian monyiin esi, podi ạnogho zeedi liiki obhobho, “Ị́ḍua ghạ taJerusạlẹm, ịtol meḅōrō moguan obho Ọde ạmi aguan mọnogho enyina bho, obho ạami nạagba ụnogho enyina obho. ⁵ẠJon azuughiom ghạ rōoy mụum, keḍio ịbam aruḍuma isughō pozuom enyina mẸmugh Iigbia bho.”

Ụseghe mạJizos ọsiine tạnyu

⁶Tamen obho iteledōm obho iikōbhōghian mi tạJizos obho, peedi ipuruan kua odi, “Obumọogh, nạateeny men olo ạna tạta mIzirẹl molo eedi kemina kẹda lōor eedi bẹle?” ⁷Keḍio ạJizos ạbhagharana kua ạnogho eedi, “Ilo molo enyina kelōghōm mamen nꞌaḍio bho, idi tịnyaam tỌde ạmi be. ⁸Enyina tẹteeny ni mịnyaam tamen olo Ẹmugh Iigbia bho naaru tenyina, keḍio enyina tẹgba mooḅi adōm obho ẹnogho rōoy ạseghe taJerusạlẹm nꞌoomo aJudia nꞌaSameria ninii asi tikunughi ẹmar-arōoy obho.” ⁹Amen odi ạkpete mabaabha bho ạḅele, taghisigh eedi, pụseghe zodi ụsiine tạnyu, keḍio ọbhurubuur ikpeom odi molo eedi ịḅele mọmiin odi.

¹⁰Eedi neenon ni tạnyu obho mẹzo bho odi nạsiin tạnyu obho, pịzal arōoy ilo ibura mịḅaal ịmaranuan eedi ịkpete kua ịnogho eedi, ¹¹“Enyina arōoy aGalili, eeghe aḍighi kenyina ẹmara neenon kua tạnyu obho? ẠJizos obhobho, obho ụseghe tenyina nọki tạnyu obho, tamula ni atu kẹzo bho enyina nẹmiin odi nạsiin tạnyu obho.”

Obo bho ụson ụseghe mọrol tesi taJudas obho

^12-13Keḍio iteledōm obho, aPita nꞌạJon nꞌaJems nꞌẠndru nꞌaFilip nꞌạTomos nꞌaBatolomiu nꞌaMatiu nꞌaJems ọony tẠlifios nꞌạSaimon obho atulan magey mẹma odi obho, nꞌaJudas ọony taJems, ịḍua tobꞌeegum obhꞌỌlivs, olo nạkian mạḍian atobi, irughẹel taJerusạlẹm ịghi iikōbhōghian tẹkpe bho eedi ịrologhu ghạ bho, tonyiin otu-ạnyu. ¹⁴Eedi nꞌạraani obho, nꞌaMeri oniin tạJizos nꞌaburumōr odi, iikōbhōghian ghạ mookpulughu nꞌonyiin ologhi.

¹⁵Ịbam aruḍuma itẹn, pobo bho imōruōm obho iikōbhōghian iḍikuan ezue (ọnu arōoy obo bho iikōbhōghian bho tegbẹbh ni ịraar ạraala), keḍio aPita aḅetunu ạkpete kua, ¹⁶“Aburumōr ạmi, toḍighi ni opulughi tibha Ẹmugh Iigbia bho ạkpete ạnogho maDevid milo igboloman nꞌaJudas obo bho akpo bọ atẹnōm mobo bho iḅol bọ mạJizos obho. ¹⁷AJudas olꞌogbo ezira mi tebum obho ụson ạni zodi mọteeny ạni abin mi toḍighi obhobho bho.”

¹⁸(AJudas abhin ikpoki obho odi abhin mi tịkarabh odi obho aghuōm made olo odi ạbhuom. Ọbaraka bhꞌodi arubhaan ni keḍio oomo ịla bhꞌodi imuteghu. ¹⁹Oomo arōoy obho netugh taJerusạlẹm obho ịmoghon ni ẹman, keedi ighōl zodi ade bho mi tọnu ẹma eedi mAkeldama, olo amōrō kua, “Ade Ịḅaal.”)

²⁰“Ẹzo bho pẹzo ụge mi tọbhereer ạsoor taDevid,

‘Otu odi aru mozōol, ōoy otugh io!’

“Omina nạ ọge kua,

‘Ọnon ōoy ạseghe mesi oḍighi odi!’

^21-22“Tebum ipa bẹleni, onyiin ōoy taḍigh ni ạḅarama ezira, ạgba mobho ạJizos Obạmọogh obho aḅetunu tọbho bho. Odi tatu mōoy olo ạrolan ạni ghạ zezira moomo amen obho ạJizos Obạmọogh obho abhin ghạ zezira areliom obho, ạke ki tamen obho ạJon ạgba madōm ozu-ạmuum obho ninii ạteeny taḍuma bho ụseghe mạJizos mi tezira ụsiine tạnyu obho.” ²³Peedi ighōl mịzal arōoy: aJosef obho ughōl bọ ạBasabas obho (ạJustos aḍien odi nạ) nꞌạMatayas. ²⁴Keḍio eedi iru iikpulughu kua, “Obumọogh, ạna pobo ulōghōm miloghi arōoy. Tebum ipa bẹleni, Obumọogh, ḍeeriom ezōor mōoy obho ạna nạason ụseghe, ²⁵molo odi kạseghe mesi oḍighi taJudas oteledōm obho odi ạḅele ạghi tesi obho iḍigh tologhi odi obho.” ²⁶Eedi iikpulughu ịḅele, peedi iru ịsa mẹlel. Ẹlel obho ameelom mạMatayas, keḍio ụseghe zodi ụḅaram tipedi aḍiōbh nꞌonyiin iteledōm obho.

Ẹzo uḍighi ubhulughi moguan Ẹmugh Iigbia bho

¹Taḍuma ẹzaal obho ughōl bọ ạPentikost obho, poomo obo bho imōruōm obho iikōbhōghian monyiin esi. ²Tekperenom poghur olo odi kogim ạḍua tạnyu obho aru amuzō toomo otu obho eedi idi obho. ³Keḍio eedi ịmiin mạar olo odi kanem amuumōr ạnyan nalela moomo otu obho: kōoy kōoy olo odi totu obho, anem obho akulaan ni ạman. ⁴Keḍio Ẹmugh Iigbia bho aḍigh amuzō toomo eedi, keḍio ịrol ịkpaay oḍigh kẹrekere ọnu ạraama, tẹzo bho Ẹmugh Iigbia bho ạnogho zeedi mịnyaam.

⁵Kir arōoy aJu ilo netele tebōom tẸnaan, ilo ịḍua iru taJerusạlẹm mi toomo aruubhugh obho idi bọ tesuo ẹmar-arōoy obho. ⁶Amen eedi ịmoghon malisian bhibha, pọlogh arōoy iikōbhōghian. Oomo eedi iru mọmiin ạni ibha nemute bho, tẹzo bho eedi nẹmoghon mibha obo bho imōruōm obho nẹkpa mọnu ạraama eedi obho. ⁷Tibꞌaruugu nꞌeemōogh peedi ịkpete kua, “Arōoy bhibha nẹkpaay kua bho, oomo eedi ilꞌaGalili. ⁸Ịteko emute molo ezira nọmoghon eedi nẹkpa mọnu ạraama ezira? ⁹Ezōor ụḍua taruubhugh ạPatia nꞌaMidia nꞌẸlam, nꞌaMesopotamia nꞌaJudia nꞌaKapadosia, nꞌạPontos nꞌEsia, ¹⁰nꞌaFrijia nꞌạPamfilia, nꞌIzipt nꞌaRom nꞌoomo ebhugh obhꞌaLibia obho atuan maSairini obho oru: ¹¹ẹde ezōor ilꞌaJu, ẹde ezōor itẹnẹghu marōoy aJu mebum ookpulughu Ẹnaan; ẹtede ilꞌaKrit nꞌArebia — keḍio oomo ezira nọmoghon mibha eedi nẹkpa mạkar ọnu ạraama bhꞌezira, igbōgh ọkpo ilo Ẹnaan naaḍighi.” ¹²Teemōogh nꞌẹmoghonyan poomo eedi onyiin napuruan kua monyiin, “Iibha bho keeghe kua bho?” ¹³Pẹtede arōoy ịrol ịiḅaghami mobo bho imōruōm obho nekōl kua, “Arōoy bhibha nẹebhoghol miim nekigh.”

Ọbhagharana taPita

¹⁴PaPita nꞌaḍiōbh nꞌonyiin iteledōm ipedi obho iḅetunu ịmara, keḍio aPita ạkpete kua ạnogho rōoy obho, “Oomo enyina arōoy aJu nꞌobo bho netugh taJerusạlẹm obho, ịmoghonyan ạami mibha ạami tạgba ạnogho enyina bho. ¹⁵Arōoy bhibha ịbhoghol io miim. Esiibha bho, ịmaar eenon, esughō asuo ụḍirogh be. ¹⁶Iibha bho pibha ạJuel ozil obho ạgba bho:

¹⁷‘Ẹnaan ạkpete kua:

Iibha pibha ạami taḍighi mi tikunughi aḍuma bho.

Ạami tazuughiom ni moomo arōoy mẸmugh ạmi.

Ạnwuny nꞌạsunwunyaan enyina telōghōm ni milꞌaghisigh ẹgba moghōrōkō tẸnaan.

Ạnwuny-ughẹel enyina tẹmiin ni ghịiny,

keḍio arukenya enyina tẹmalaay rạmala.

¹⁸Ii, ạraani nꞌilobhir ạrubana enyina ẹkona, todi aḍuma bho ạami tazuughiom ni mẸmugh ạmi, keḍio eedi tẹmiin milꞌaghisigh ẹgba moghōrōkō tẸnaan.

¹⁹Ạami taḍighi ni mọkpo ibꞌaruugu mi tạnyu obho, nꞌaraalẹgh mi tade bho. Ịḅaal nꞌạnyan nꞌibꞌạmugi tẹtol ni:

²⁰aghōzōgh obho taḅil ni, ụvanyu obho takōgh kịḅaal, keḍio obꞌaḍuma bho nꞌaḍuma eghuan tObạmọogh obho tagbi moru.

²¹Keḍio tetu molo kōoy kōoy olo aghōl maḍien tObạmọogh obho pobo tọpel.’ ”

²²“Enyina arōoy Izirẹl, ịmoghonyan moghōrōkō ạmi. ẠJizos obhꞌạNazaret ōoy olo Ẹnaan ạnogho mịnyaam moḍighi ọkpo ịiḍaany, nꞌọkpo ibꞌaruugu nꞌaraalẹgh ilo oḍeeriom mobho ọno ku arōm odi. Enyina nịvo nịvo neelōghōm nạ miibha bho, tẹzo bho imuteey tesuo mi taghisigh enyina bho. ²³Tịto nꞌolōghōm ạar odi, Ẹnaan naalegheri aḍighi molo tọseghe mạJizos ọlogh tạravo enyina, keḍio enyina ịḅelemaan miḍighi mịkarabh ịseghe zodi ịkan ighigh odi mi toorẹeny ẹmigheri obho. ²⁴Keḍio Ẹnaan aḅẹtōn zodi mi tọbho bho. Odi aḍighi nạ molo odi ọmiinom io mi tẹegama ọbho bho, tẹzo bho ọbho ịnyaam ilo motẹnẹ odi mẹbana odi bho. ²⁵ADevid ạgbaam ẹzo bho zodi:

‘Ạami ụmiin Obạmọogh obho moomo amen mi taghisigh ạmi.

Odi odi toḍiom ạmi, molo ịiḅaghami ịtol io ẹnogho ạami.

²⁶Tebum iibha bẹleni pologhi ạmi ạḅaal,

molo ọḅaal ologhi imuzō toghōrōkō ạmi,

keḍio toomo ibha ạami tạpo ni obho ẹkona,

ạami tạmaar ni apooghia nꞌoḍuom ologhi,

²⁷ebum obho ạna ọḅele ḍio maghuḍum ạmi mi tẹmir-iḍim,

ạna omōrō nạ ḍio iikpōogh alōor Oōy oḍigh ologhi onuma ạḅor.

²⁸Ạna naaḍeeriom zạmi mebōom aghuḍum;

ẹzo bho ạna odi nꞌạami obho, ạna tạnogho ni ạami mogbōgh ọḅaal ologhi.’

²⁹“Aburumōr, ạami tạgba ni magey obho igboloman nꞌaDevid ogbōgh ọde obhꞌezira ạnogho enyina. Odi nạabho, oḍi zodi, keḍio oogu odi odi tesuo nꞌezira dodon. ³⁰Odi ozil olo alōghōm oguan obho Ẹnaan aguanaan odi obho: Ẹnaan naaghiran ịzo modi taḍighi monyiin ōoy mi teghun otu taDevid mọolema, kẹzo bho odi aDevid ạrol obho. ³¹ADevid nạamiin mibha Ẹnaan natu moḍighi obho, podi ạgba mibha aKraist obho taḅetunu tọbho bho mi tamen olo odi ạkpete kua:

‘Ụḅelemaan io zodi mi tẹmir-iḍim. Iikpōogh alōor odi ịḅor io.’

³²“Ẹnaan naaḅẹtōn mạJizos Kraist obhobho mi tọbho bho, keḍio oomo ezōor nọgba ghạ miibha bho ọnogho rōoy. ³³Nooḅẹtōn zodi mi toḍiom ạvo tẸnaan, keḍio odi abhin todi Ẹnaan mẸmugh Iigbia bho, tẹzo bho Ọde bho aguan obho; iibha bho enyina nẹmiin nẹmoghon obho pẹnogho bho odi ạnogho zezōor obho. ³⁴ADevid nịvo nịvo ọsiin io tạnyu, keḍio odi ạkpete kua:

‘Obạmọogh obho ạkpete kua ạnogho mObạmọogh ạami obho:

Tọl suo delede mi toḍiom ạvo ạmi,

³⁵ninii ạami uḍighi mobo ọlogh aḍien onuma aru moḅeleriom asike onuma.’

³⁶“Oomo enyina arōoy Izirẹl, ilōghōm kua maghōl, mobho odi ạJizos obho enyina ịkan bọ mi toorẹeny ẹmigheri obho, pobo Ẹnaan aḍighi aseeri mObạmọogh obho nꞌaKraist obho.”

³⁷Amen arōoy obho ịmoghon miibha bho, peedi iḍigh mịitu, keḍio ipuruan kua maPita nꞌiteledōm obho, “Aburumōr, ezōor toḍighi ẹko siibha bho?” ³⁸Keḍio aPita ạkpete kua ạnogho zeedi, “Ikiton meghiraan tịkarabh enyina mezua mụum mi taḍien tạJizos Kraist molo kọḅelemaan ịkarabh enyina, penyina obhin ạni ẹnogho Ẹmugh Iigbia bho tẸnaan. ³⁹Oguan obho tẸnaan, uguan ụnogho zenyina nꞌạnwuny enyina nꞌoomo obo bho idi nạ tegbeeny obho — oomo arōoy ilo Ẹnaan Obạmọogh ezira bho abheleghi.”

⁴⁰Keḍio aPita aasen eedi ạḅaraghiom nꞌịnon ọnuekpete aliiki aghōl kua, “Ịpela lōor enyina mi tạliliom ọmiinom obho natuanaan miḍighi mịkarabh arōoy bhibha bho.” ⁴¹Ọlogh eedi emōruōm dōm obho molo iru izua mụum. Ọnu arōoy obo bho ụlogh ụḅaram tobo bho imōruōm obho tẹkian ni moḍual nꞌạmaḍian ọonir arōoy ḍuma popo. ⁴²Keḍio obo bho imōruōm obho ibhin moomo amen eedi mọtuugha ghạ ịtuugha iteledōm obho, nꞌookōbhōghian ghạ onyiin esi, nꞌole ghạ eḍian ạruumugh obho, nꞌookpulughu ghạ Ẹnaan.

Aghuḍum obo bho imōruōm obho

⁴³Iteledōm obho iḍighi mọlogh ọkpo ibꞌaruugu, molo aruugu isibh moomo arōoy obho. ⁴⁴Keḍio oomo eedi obo bho imōruōm obho ịrol ghạ monyiin esi, ịḍianogh ghạ ile ghạ mogbo mọkpo obho eedi ịteeny obho. ⁴⁵Eedi iḅoḍi ghạ kạar kạar olo eedi ịteeny, ẹseghe mikpoki obho ẹḍi kōoy kōoy tẹzo ekulom odi. ⁴⁶Oomo aḍuma mobho eedi iikōbhōghian ghạ mi totu iikpulughu obho, keḍio eedi ile ghạ nạ mariḍian eedi monyiin esi mi tarutu eedi, ibhin ghạ tosōoriōm alōor nꞌọḅaal ologhi iliom meḍian obho. ⁴⁷Eedi ịsebh ghạ mẸnaan, iḍigh nạ tologhi oomo arōoy. Keḍio oomo aḍuma Obạmọogh obho ạlogh ghạ ạḅaram eedi marōoy obo bho nọpel tịkarabh eedi obho.

APita nꞌạJon iikō mokula

¹Onyiin aḍuma tịraar asuo ootaany, paPita nꞌạJon nẹki mookpulughu Ẹnaan mi totu iikpulughu obho. ²Tonyiin Ọnu-otu olo eedi ighōl ạneghe bho, kir ẹkugha ōoy olo dorele ghạ ḍio moomo aghuḍum odi. Oomo aḍuma pobhin ghạ odi ọghi oseeri todi ọnu-otu obho mogbẹel ghạ igbẹel mi tarōoy obho netu ghạ moḍigh totu iikpulughu obho. ³Amen odi ạmiin maPita nꞌạJon, podi agbẹel zeedi mọnogho odi mạar. ⁴Keḍio eedi ịmaar iinon taghisigh obhꞌodi, keḍio aPita ạkpete kua ạnogho zodi, “Nonon ezōor!” ⁵Podi ạmaar naanon zeedi naḅōrō mobho eedi tẹnogho zodi mạar. ⁶Keḍio aPita ạkpete kua ạnogho zodi, “Ikpoki ilo ạami ụteeny olo, keḍio ibha ạami ụteeny obho ạami tạnogho ni ạna: taḍien tạJizos Kraist obhꞌạNazaret, ḅetunu marele!” ⁷Keḍio odi ạbham moḍiom ạvo ōoy obho ạmarami. Tonyiin amen obho, pasike nꞌịikpoghor asike bhꞌodi ịghua ịman, ⁸podi apẹl ạmara ạke morele. Keḍio odi ạtuonuman zeedi aḍigh ạni totu iikpulughu obho, apẹlẹghu nꞌọḅaal ologhi, abuom mẸnaan. ⁹Keḍio ọlogh arōoy obho ịmiin odi mobho odi natele nabuom mẸnaan. ¹⁰Amen eedi ịlogh zodi melẹgh mobho odi aru moogbẹel miigbẹel obho nạtol ghạ tỌnu-otu obho ạneghe bho, poomo eedi neemōogh mi tibha imutenaan odi obho.

Adōm taPita mi totu iikpulughu obho

¹¹Oomo arōoy obho iimōogh ni men obho eedi ịmiin mobho ōoy obho aḅol maPita nꞌạJon keḍio ighiil ịtuonuman zeedi ịghi tẹkul obho ughōl bọ Ạpe tạSolomon obho. ¹²Amen aPita ạmiin rōoy obho, keḍio odi ạkpete kua ạnogho zeedi, “Arōoy Izirẹl, ebum eeghe kenyina neemōogh mi tiibha bho? Eeghe kenyina neenon kua zezōor? Enyina ighōdi ezōor ubhin tịnyaam nꞌoḍighi iiḅi ezōor koḍighiom mōoy obhobho morele? ¹³Ẹnaan obho tEbrạhạm nꞌẠizik nꞌạJekob, Ẹnaan obho igbōgh ạburude ezira nạanogho mạJizos Ọony-otu odi meghuan. Odi obho enyina ịseghe ịlogh tạravo ạruula bho, keḍio enyina igin odi mi taghisigh taPailet, oomo ibha aPailet ẹkona naamōrō mọḅelemaan odi obho. ¹⁴Oḍighi ịkarabh ilo todi, odi ooḅi ōoy nạ, keḍio enyina igin ni zodi ekiton ku egbẹel maPailet mọḅelemaan ọokoma. ¹⁵Keḍio enyina ighigh zodi obo bho ạteeny bọ ghuḍum obho. Keḍio Ẹnaan aḅẹtōn zodi mi tọbho bho — keḍio ezōor nọgba mabaabha bho ọnogho rōoy. ¹⁶Tịnyaam aḍien odi pẹkugha ōoy obho ạteeny ịnyaam olo oreliom. Iibha bho enyina nẹemiin ilōghōm nạ bho uḍighi mi tologhi omōruōm taḍien odi: ologhi omōruōm mi taḍien tạJizos mobho uukuōm mōoy obhobho mi taghisigh enyina.

¹⁷“Keḍio esiibha bho, aburumōr ạmi, ạami ulōghōm mobho ibha enyina nꞌạruula bho iḍighi mạJizos obho, enyina ilōghōm io ni. ¹⁸Ẹnaan nạagba kọkanya amen mi tarizil obho mibha aKraist obhꞌodi tạmiinom ni; keḍio odi aḍighi nạ mẹzo bho iru magey. ¹⁹Toomo ipa bẹleni, ikiraan tesi ịkarabh enyina mesōmōghan mẸnaan molo odi kạagburion mịkarabh obhꞌenyina katughuneen, ²⁰molo Obạmọogh obho ạnogho enyina maruḍuma ilo oḍighi ạruumugh enyina otẹnẹ imoom, atōm nạ mạJizos ạMesaya bho odi nạason ạseghe ạnogho enyina bho. ²¹Odi tạtol ni mi tạnyu ninii ạteeny mamen obho kạar kạar toḍighi otẹnẹ mimoom, kẹzo bho Ẹnaan ạgba ạnogho migbaany arizil obho ịrol bọ mi tamen olo neetẹn ibia. ²²AMozis mạakpete kua, ‘Ẹnaan Obạmọogh enyina bho tạnogho ni enyina mozil, kẹzo bho odi ạnogho ạami zenyina bho, olꞌeesoḍia arōoy enyina. Ịmaar mẹmoghonyan kạar kạar olo odi ạkpete ạnogho zenyina. ²³Kōoy kōoy olo ọmoghon io mibha odi ozil obho tạkpete ạnogho zenyina bho, tọseghe ni zodi otughuneen mi tarōoy tẸnaan.’ ²⁴Arizil obho ịgba dōm obho ki tamen tạSamuel nꞌoomo obo bho ịtuonuman zodi obho, ẹgba maḍuma bhobho. ²⁵Aruguan obho tẸnaan obho arizil obho ịgba bho ilꞌenyina, keḍio enyina tele rutu tịzo bho Ẹnaan aghiran nꞌạburude enyina bho. Kẹzo bho odi ạkpete ạnogho mEbrạhạm obho, ‘Tạnwuny onuma pobo ạami tạsebh oomo arōoy obho idi tade bho.’ ²⁶Ipa kiḍighi kẸnaan ạseghe mỌony-otu odi arōm molo abhira aru tenyina, mọsebh enyina oḍighi olo enyina keghiraan tịkarabh araabōom enyina.”

APita nꞌạJon ịmara taghisigh isōbh rạakpe bho

¹Ẹzo bho aPita nꞌạJon idi nini nẹgba nẹnogho rōoy obho, parōoy iḅo miiḅua bho nꞌọola otu iikpulughu obho nꞌarōoy aSadusi obho iru teedi. ²Eedi nẹle mibha ịzal iteledōm obho nẹtughumiom rōoy moḅetunu tọbho bho tạJizos nꞌiibha nẹgba neḍeeriom mibha obo ụbho bho teḅerenu ni. ³Aḍio nakul peedi iḅol zeedi ịloghom tikoli mọliom eedi meḍie. ⁴Ọlogh obo bho ịmoghon dōm obho imōruōm; keḍio ọlogh eedi obo bho neemōruōm obho iru iḍighi maḍisibh nꞌōogh ọonir.

⁵Ạḅaal pạruula nꞌarukenya bhꞌaJu obho nꞌobo ịtughumiom araalōgh obho iikōbhōghian taJerusạlẹm. ⁶Ạnas uvẹmụ arōoy iḅo miiḅua bho, nꞌạKayafas nꞌạJon nꞌẠleksanda, nꞌoomo arōoy ipedi obho ilꞌeghun otu uvẹmụ obho pobo ịrol ạni. ⁷Keḍio eedi iru ịmarami miteledōm obho mi tamusigh eedi ipuruan kua zeedi, “Enyina iikō ẹko mōoy obhobho? Tikir ịnyaam nạ taḍien okōr ōoy mibha enyina ibhin kiḍighi moḍighi obhobho?” ⁸PaPita abhin mịnyaam tẸmugh Iigbia bho ạbhagharana kua zeedi, “Ạruula nꞌarukenya arōoy, ⁹erumolo aadon enyina nepuruan zezōor mi toḍighi iiḅi olo uḍighi ụnogho mẹkugha ōoy obhobho nꞌẹzo ezōor uukō zodi, ¹⁰pilōghōm kua. Oomo enyina arōoy Izirẹl ilōghōm mobho ōoy obhobho ạmara bọ taghisigh enyina bho naaḍum ạman. Uukō tịnyaam aḍien tạJizos Kraist obhꞌạNazaret — obo bho enyina ịkan bọ ighigh obho, keḍio Ẹnaan aḅẹtōn zodi tọbho bho. ¹¹Odi ạJizos pobo bho ẹegia bho ạgba bọ kua,

‘Ọpaḍi ọbharakpar obho iḅōghi rutu obho igin obho naaru ạla mạar apu.’

¹²“Ịbhelegha ilo tọnon tughuneen todi ḍio. Tesuo ẹmar-arōoy obho, ọnon ōoy olo Ẹnaan nạanogho rōoy maḍien odi molo obhin ọbhelom ezira olo.”

¹³Obo bho ịrolom delede mọkpe bho iimōogh ni mọmiin ọoghuanaan ologhi obho aPita nꞌạJon ịteeny obho, nꞌomina olōghōm mibha eedi iru mapa arōoy ilo ọmiin ọbhereer ilo. Keḍio eedi tetu elōghōm mibha eedi ịtuonuman ghạ mạJizos. ¹⁴Molo bọbon ạar olo eedi ịteeny mọkpete ọnogho eedi olo, mẹzo bho eedi nẹmiin mōoy obho uukō bho ạmaranuan nꞌaPita nꞌạJon obho. ¹⁵Peedi ibhirighan zeedi mi totu ạkoti obho mọḍeghe ilo eedi tesōbh ẹnogho zeedi. ¹⁶Keḍio eedi ipuruan kua silōor eedi, “Ezira tọkpete meeghe ọnogho marōoy bhibha? Oōy olo odi taJerusạlẹm olo olōghōm io mibha eedi iḍighi mibꞌọkpo ibꞌaruugu bhibha olo, keḍio ezira ẹkona urue ḍio ọbharanaan. ¹⁷Ẹzo olo oḍighi olo ọkpo bhibha ilela ḍio moomo arōoy, ezira tookiom zeedi mọḅele ọkpete ạar mi taḍien tạJizos.” ¹⁸Keḍio eedi ibheleghi zeedi iru, ịkpete ịnogho zeedi meedi ịgba mu, ịtughumiom mu nạ mi taḍien tạJizos, kẹzo kẹzo ilo ịrol.

¹⁹Keḍio aPita nꞌạJon ịbhagharana kua zeedi, “Iḍighen ịneghe epu moḍighi mi taghisigh tẸnaan? Oghiilaan enyina bẹlee koghiilaan Ẹnaan? ²⁰Ezōor urue ḍio ọḅele mọgba ibha ezōor nịvo nịvo nọomiin ụmoghon obho.” ²¹Keḍio eedi arōoy ạkoti obho imina ịmaar iikiom zeedi ịghuemi keḍio imutiom zeedi mịkpo. Ekpo ạar olo eedi ịmiin mobhin ọliom eedi olo, ẹzo bho oomo arōoy obho nebuom mẸnaan mi tibha imute obho. ²²Odi ōoy obho uukō bho nạakpo apu merubal ạsia.

Obo bho neemōruōm obho iikpulughu mọteeny ọoghuanaan ologhi

²³Eedi imute kua be, paPita nꞌạJon ighiil imula togbo bhꞌeedi ịgba moomo ibha aruvẹmụ iḅo miiḅua bho nꞌarukenya bho ịkpete ịnogho zeedi obho. ²⁴Amen eedi ịmoghon, peedi itul mọnu iikpulughu mẸnaan, “Obạmọogh obho ạlem bọ mạnyu nꞌade bho nꞌọbhiiny obho nꞌoomo ọkpo bho idi bọ teedi obho. ²⁵Ạna ubhin mẸmugh Iigbia bho ạkpete kua mi taDevid ogbōgh ọde ezōor, ọony-otu onuma,

‘Eeghe kobo bho ilōghōm io mẸnaan nemutiom ḍien?

Eeghe karōoy nẹva miben ạraakpe ilo ẹmu olo?

²⁶Ạruula ẹmar-arōoy obho neekōbhōghia silōor eedi,

keḍio aruvẹmụ obho neetul mọnu moḅe Obạmọogh obho nꞌaKraist obhꞌodi.’

²⁷“Agey nạ ni mibha ạHerod nꞌạPontios Pailet itul ọnu tẹma bhobho nꞌarōoy obho ilōghōm io mẸnaan obho nꞌarōoy Izirẹl morubhiom ạJizos Ọony-otu iigbia bhꞌonuma, odi obho ạna uḍighi aru maKraist obho. ²⁸Oomo eedi iikōbhōghian mọtuugh oḍighi ibha ạna nꞌịnyaam onuma nạato aseeri milo temute ni. ²⁹Keḍio esiibha bho, Obumọogh, mạar ạmiin mibha eedi nẹpaama, keḍio nọgho ni zezōor ạrubana tonuma mịikpo olo ọgba adōm obho tonuma nꞌịnyaam. ³⁰Sele ni mạvo tonuma maakō, maḍighi molo ọkpo ibꞌaruugu temute ni taḍien tạJizos Ọony-otu iigbia bhꞌonuma.” ³¹Ẹzo bho eedi iikpulughu nẹḅele bho, pesi obho eedi idi obho aazighinian. Keḍio Ẹmugh Iigbia bho aru aḍigh teedi amuzō, keḍio eedi ịke mọgba adōm obho tẸnaan nꞌọoghuanaan ologhi.

Ịḍian kạar kạar mogbo

³²Keḍio ogbo obo bho imōruōm obho irughan ghạ nꞌonyiin ologhi nꞌonyiin ịitua. Bọbon ōoy olo ạseghe mạar odi aghōl olꞌodi be olo, eedi ịḍian ghạ kạar kạar mogbo. ³³Tigbōgh ịnyaam mibha iteledōm obho ibhinom ịgba moḅetunu tọbho bho tạJizos Obạmọogh obho, keḍio Ẹnaan ạnogho zeedi migbōgh ạlisebh. ³⁴Bọbon ōoy olꞌogbo bho olo ọteeny ạni ḍio mạar ole nꞌoḍighia olo. Obo bho ịteeny bọ marade nꞌarutu iḅool ni, ebhin ikpoki obho eedi iḅool obho, ³⁵ẹnogho miteledōm obho, keḍio tọḍi mikpoki obho ọnogho kōoy kōoy mi tẹzo bho ịiḅaghami odi ịbugh isi.

³⁶Pẹzo imute keḍio onyiin ōoy olo ughōl aJosef, olꞌeghun otu taLivai, ụmar odi mi tạSaipros, (iteledōm obho ighōl aḍien ughẹel odi mạBanabas — azin aḍien obho ughōl “Ọony olo nạsuanaan ghạ rōoy ghụsan,”) ³⁷aḅool moḍighi odi abhin ikpoki obho aruom iteledōm obho.

Ạnanayas nꞌaSafaira

¹Pōoy olo ughōl Ạnanayas nꞌạni odi olo ughōl aSafaira iḅool ọkpo ilo eedi ịteeny, ²keḍio ịḅoki mẹde ikpoki obho iseerian lōor eedi. Olom obho ạseghe mẹde be ạghiom miteledōm obho keḍio ạni obhꞌodi alōghōm ạni. ³Keḍio aPita apuruan zodi, “Sey, Ạnanayas, eeghe imute kạna ạḅelemaan mEru obho moreliom ologhi obhꞌonuma mọgba iben ọnogho Ẹmugh Iigbia bho, molo ạna useeri mẹde ikpoki obho ạna ụteeny mi tọkpo obhꞌonuma ạna uḅool obho? ⁴Amen obho ạna doḅool io bho, eedi ọkpo bho ilꞌonuma ḍio bẹle; suo ạna naaḅool obho, ikpoki obho ilꞌonuma nạ ḍio? Eeghe ịkar emute kạna ạteeny mịkarabh ịitua mi tologhi onuma mọḅoki ẹde ikpoki obhꞌonuma? Ạna ọgbaam io miben obho marōoy be, ạna ụgbaam ụnogho nꞌẸnaan.” ⁵Ẹzo bho Ạnanayas ạmoghon miibha bho be podi ameel ạbho. Oomo obo bho ịmoghon miibha bho, iḍiku ruugu mi teedi. ⁶Keḍio ạnwuny ughẹel obho iḍigh, ịseghe moḍim obho ịghoroghi ịseghe ịghi iḍi.

⁷Ịbam amen iru itẹn pạni odi aru aḍigh, odi olōghōm io mibha neemute bho. ⁸APita apuruan kua zodi, “Gbạ magey obho: iibha pạkar ọnu ikpoki ibha olom onuma nꞌạna iḅool bọ mọkpo bhꞌenyina bho?” Keḍio odi amōrō mu, “Ii, ipa poomo eedi.” ⁹Keḍio aPita ạkpete nạ kua ạnogho zodi, “Eeghe imute kạna nꞌolom onuma etul ọnu mọdegh Ẹmugh tObạmọogh obho? Obo bho ịghi moḍi olom onuma bho neesi suo ọnu-otu obho, eedi tetōol ạna ẹki eḍi siibha!” ¹⁰Tonyiin amen obho podi ameel tasike odi ạbho. Amen ạnwuny ughẹel obho iru iḍigh ịmiin mobho odi nạabho, keḍio eedi ịseghe zodi ịghi iḍi tọtu olom odi. ¹¹Keḍio iibha bho iḍiku ruugu moomo arōoy ạsosi obho nꞌoomo obo bho ịmoghon obho.

Ọkpo ibꞌaruugu nꞌịiḍaany

¹²Piteledōm obho iḍighi rōoy mịkanya ọkpo ibꞌaruugu. Oomo obo bho imōruōm obho iikōbhōghian ghạ monyiin esi mi tesi ẹtolom obho tạSolomon. ¹³Oomo bho arōoy obho nekiilaan zeedi obho, keḍio tughuneen zeedi be ḍio, ọnon ōoy olo ane ghạ aḍighom zeedi olo. ¹⁴Keḍio ọnu ilobhir nꞌạraani ilo ikiton imōruōm ạni mObạmọogh obho iḍigh ạni nꞌịḅel ọlogh obho ẹbugh magey. ¹⁵Ibha iteledōm obho neeḍighi obho neelegheri molo kesi kesi olo aPita arele natẹn mi taraabōom nꞌoomo ariisi, porōol obo bho nẹnweey obho mi tạrumuna nꞌịtagara obhin koru molo bọbon ookōogh odi kazuom zeedi. ¹⁶Keḍio arōoy ilo idi ghạ tịbam ạraama ibha ikō maJerusạlẹm obho ibhin ghạ marōoy ilo asilōor ịnegheey io nꞌarōoy ilo ịkarabh ạruumugh nẹeḅaghami eru, keḍio uukōoy ni ọman.

Ụmiine ni miteledōm obho

¹⁷Puvẹmụ oḅo miiḅua bho nꞌoomo obo bho itul ọnu nꞌodi togbo aSadusi obho ịlogh ḍien miteledōm obho, iguan moḍighi eedi mạar. ¹⁸Peedi iḅologh miteledōm obho ịlokiom tikoli. ¹⁹Ạteeny muḍugul potelema tObạmọogh obho aru aghuuron meguugh ikoli obho, abhin zeedi amutiom ạkpete kua ạnogho zeedi. ²⁰“Ịki mẹmara totu iikpulughu obho, mẹgba mẹnogho marōoy milo igboloman nꞌomoom aghuḍum obho.” ²¹Keḍio iteledōm obho imōruōm, ịghi totu iikpulughu obho mụḍirogh ịrol ịtughumiom.

Keḍio uvẹmụ oḅo miiḅua obho nꞌarōoy odi iikōbhōghi moomo arukenya aJu obho mọteeny obꞌotu ạkoti; keḍio ubheleghi miteledōm obho ubhin uru ụmarami tasumusigh eedi. ²²Amen ạruula bho iru, eedi ịmiin io miteledōm obho tikoli obho, keḍio imula ịghi ịgba totu ạkoti obho maa, ²³“Amen ezōor ụghi usi totu ikoli obho, nọomaar ọḍuuy obho, obo iḅōrō bho idi nạ neḅōrō; keḍio amen ezōor ughuuron eguugh obho, bọbon ōoy olo odi tologhi obho olo!” ²⁴Amen uvẹmụ obo iḅōrō otu iikpulughu obho nꞌaruvẹmụ oḅo miiḅua obho ịmoghon mẹzo bho, pu neemōogh mạar olo neemutenaan miteledōm obho. ²⁵Keḍio onyiin ōoy aru ạgba kua ạnogho zeedi, “Ịmiin! Arōoy obho enyina ịloghom bọ mikoli obho idi totu iikpulughu obho nẹtughumiom rōoy obho.” ²⁶Podi uvẹmụ obho ạbham rōoy mọghi ọseghe iteledōm obho omulumi. Ubhin io mịnyaam tẹzo bho eedi nekiil obho molo arōoy obho itōḅōl zeedi.

²⁷Keḍio eedi ibhin miteledōm obho iru ịmarami tạkoti obho, keḍio uvẹmụ oḅo miiḅua bho apuruan kua zeedi, ²⁸“Ạami ughōdi, ezōor nookiom zenyina molo enyina kẹḅele mọtughumiom mi taḍien ōoy obhobho, keḍio mịin ẹzo enyina neḍighi. Enyina meelelemi moomo aJerusạlẹm mịtughumiom enyina, molo enyina netu mọḅam ịḅaal ōoy obhobho mi tẹmu ezōor.” ²⁹Keḍio aPita nꞌiteledōm ipedi obho ịbhagharana imulumian zeedi ighōl kua, “Ezōor tokiilaan mẸnaan, arōoy io. ³⁰Ẹnaan ạburude ezira aḅẹtōn mạJizos mi tọbho bho, suo enyina ịkan zodi toorẹeny ẹmigheri obho ighigh zodi obho. ³¹Ẹnaan aḅẹtōn zodi mi toḍiom odi kUvẹmụ nꞌỌpela, mọnogho arōoy Izirẹl mamen olo eedi keghiraan tịkarabh eedi, milo Ẹnaan kạḅelemaan zeedi. ³²Ezōor nꞌẸmugh Iigbia bho Ẹnaan nạnogho mobo bho nekiilaan zodi obho ku nọgba mabaabha bho nọnogho rōoy.”

³³Amen arōoy ạkoti obho ịmoghon ẹzo bho, pologhi eedi aḅẹebh magey eedi nẹva mọze iteledōm obho. ³⁴Keḍio onyiin eedi, olꞌaFarisi obho olo ughōl aGameliel, obo ịtughumiom iilōgh obho olo oomo arōoy obho nekiilaan magey, aḅetunu ạmara tạkoti obho, ạto mobhirighan iteledōm obho omutiom mịbam amen ku, ³⁵keḍio ạkpete kua ạnogho mạkoti obho, “Arōoy Izirẹl, ịmaar megon mibha enyina netu moḍighi arōoy bhibha bho. ³⁶Tamen olo neetẹn, aTeodas amute aghōl modi monyiin ogbōgh ōoy, keḍio ọlogh arōoy ilo tẹkian ni mọonir arōoy iḍigh nꞌodi. Ughigh ni zodi, poomo obo bho ịtuonuman zodi obho ighilighu ni ẹḍuaghu, keḍio ogbo bhꞌeedi abhẹ. ³⁷Iibha iru itẹn, paJudas obhꞌaGalili aru nạ mi tamen ọḅalagh arōoy obho; odi ẹkona aḍur nạ mọlogh arōoy ạseghe, keḍio odi ẹkona ạbho ni keḍio oomo obo bho ịtuonuman odi obho ịizaranu. ³⁸Keḍio esiibha bho mi tabaabha bho nạ, ạami nạgba kua ạnogho enyina, ịḅelemaan rōoy bhibha, íḍighi ghạ zeedi mạar. Eru molo iibha bho eedi neḍighi obho iru milꞌịnyaam ōoy, ogbo bhꞌeedi tapẹ ni nạ kipedi obho. ³⁹Keru kạar olo ịḍua tẸnaan kiru, enyina irue ḍio ẹmaranuan zeedi. Ikunughi obho, enyina tẹtol eḅe mẸnaan!” Pạkoti obho imōruōm iikiom taGameliel. ⁴⁰Keḍio eedi ibheleghi miteledōm obho iḍighom, ịgurogh zeedi, keḍio ịkpete ịnogho zeedi mọḅele ọgba taḍien tạJizos kamen kamen; keḍio eedi imutiom zeedi. ⁴¹Eedi iteledōm obho imute tạkoti obho nꞌogbōgh ọḅaal ologhi mibha Ẹnaan naabhin zeedi aseeri karōoy ilo igbẹbh mọmiinom ịiḅaghami mi taḍien tạJizos. ⁴²Keḍio eedi ịtughumiom ghạ, ịgba nạ mooḅi adōm obho tạJizos Kraist moomo aruḍuma mi totu iikpulughu obho nꞌarutu arōoy.

Oḍual ịpela

¹Aruḍuma bhibha, ọnu obo bho nẹtuonuman obho neeru eḍighan; keḍio ạruruan imute teesoḍia arōoy aJu obho nẹmoghon nẹkpa mọnu-ẹma aGris obho nꞌobo bho nẹmoghon nẹkpa mọnu aHibru obho mobho uunon io marukpukele ạraani eedi mi tạmaḍian eḍian obho moomo aruḍuma. ²Paḍiōbh nꞌịzal iteledōm obho ibheleghi moomo obo bho nẹtuonuman obho iikōbhōghi monyiin esi keḍio ịkpete kua, “Ịneghe ḍio molo ezōor kọḅele mọgba ọnuekpete bho tẸnaan koru kọḍi ghạ meḍian. ³Tebum iibha bẹleni, aburumōr, ịson oḍual arōoy mi tenyina ilo Ẹmugh Iigbia bho amuzō ni teedi, ịteeny nạ magey olōghōm ạar, molo ezōor tokuugh moḍighi obho ọnogho zeedi. ⁴Ezōor nịvo nịvo tọnogho malōor obho mookpulughu ghạ nꞌoḍighi ọgba ọnuekpete tẸnaan.” ⁵Ibha iteledōm obho ịḍeghe obho iḍigh ni tologhi oomo ogbo bho; keḍio eedi iru ịson maStivin, ōoy olo ọoghuanaan ologhi omōruōm nꞌẸmugh Iigbia bho amuzō ni talōor odi, nꞌaFilip nꞌạProkoros nꞌaNikanor, nꞌaTimon, nꞌaPamenas nꞌaNikolaos, isoloman olꞌẠntiok olo aghiraan naakpulughu mẸnaan aJu obho. ⁶Keḍio eedi ịseghe zeedi ịmarami tasumusigh iteledōm obho, keḍio eedi iikpulughu ịnogho zeedi, ịḅamaghi rạvo eedi mi tẹmu eedi.

⁷Tesuo keḍio ọnuekpete bho tẸnaan amina alela nạki taghisigh. Ọnu obo bho nẹtuonuman obho mi taJerusạlẹm neḍighan magey moomo amen, keḍio ọlogh arōoy iḅo miiḅua iru ạni imōruōm nạ.

Uḅol maStivin

⁸AStivin ōoy olo Ẹnaan nạasebh magey ạnogho nạ mịnyaam aḍighi mọkpo ibꞌaruugu mi tasumusigh arōoy obho. ⁹Pẹtede arōoy iru nẹnwiom zodi: eedi arōoy aJu ibhꞌaSairini nꞌẠleksandria ilꞌotu ịtughumiom olo ughōl otu ịtughumiom arōoy obo bho neemuzaan (pẹzo ughōl zeedi). Eedi nꞌịnon arōoy aJu ilꞌaSilisia nꞌEsia ịke mọghanan aStivin. ¹⁰Keḍio Ẹmugh Iigbia bho ạnogho maStivin molōghōm ạar olo amen ạkpete eedi irue ḍio mọghanan odi. ¹¹Peedi ịghi iḅia rōoy ilo oghōl ekua, “Ezōor ụmoghon mibha odi nạkpete ạpue maMozis nꞌẸnaan!” ¹²Tẹzo bho peedi iḍighi molo nẹekany marōoy obho nꞌarukenya bho nꞌobo ịtughumiom araalōgh obho. Keḍio iru ịbham maStivin, ibhin zodi ịghi tạkoti obho. ¹³Keḍio eedi ibhin rōoy ịgbaam odi miben ighōl kua, “Oōy obhobho nạgbaaghiom mịkarabh motu iigbia iikpulughu ezira nꞌaraalōgh obho taMozis. ¹⁴Ezōor ụmoghon mibha odi aghōl mạJizos obhꞌạNazaret tạakpo ni motu iikpulughu obho, anweeghi nạ moomo eḍighiom ạar obhꞌezira ibha ịḍua taMozis iru obho!” ¹⁵Keḍio oomo obo bho idi bọ tạkoti obho igbiom riḍien eedi maStivin keḍio ịmiin mobho aghisigh obhꞌodi nạagbaanan mamusigh obhꞌotelema tẸnaan.

Ọnuekpete taStivin

¹Keḍio uvẹmụ arōoy iḅo miiḅua bho apuruan kua maStivin, “Agey nạ ni miibha bho?” ²Suo keḍio aStivin tạpagharana akōl kua, “Aburumōr nꞌạburude, ịmoghon ạami! Ẹnaan obho aḍigh ni meghuan obho amutenaan Ebrạhạm ogbōgh ọde ezira tamen obho odi natugh ni mi taMesopotamia obho, keḍio odi tagbi mọghi orugh tạHeran, ³ạkpete kua ạnogho zodi, ‘Ḅẹle meghun otu nꞌarōoy onuma maru mạghi tade olo ạami taḍeeriom ạna.’ ⁴Tẹzo bho podi ạḅele made aKaldia obho ạghi morugh mi tạHeran. Amen ọde tEbrạhạm ạbho, pẸnaan aḍighi molo odi ạḍua aru tẹma bhobho, obho enyina idi siibha bho. ⁵Bọbon esi olo Ẹnaan ạnogho mEbrạhạm, bọbon eekpu eḍum olo; keḍio Ẹnaan aru aguan zodi modi tạnogho zodi nạ mạnwuny ọobhe bho tetu tạman odi obho. Tamen obho Ẹnaan aguan miibha bho, Ebrạhạm ọony olo. ⁶Iibha bho pibha Ẹnaan ạkpete ạnogho zodi, ‘Ạnwuny ọobhe onuma tetughogh tọnon ẹma kạrubana keḍio tọmiine zeedi mọonir ạsia. ⁷Ạami tasōbh ni rạakpe ạnogho marōoy obho eedi tekumuan obho. Amen iibha neetẹn peedi omute tẹma popo oru tesuo ookpulughu ạmi.’ ⁸Keḍio Ẹnaan ạnogho mEbrạhạm meḍighiom ạar iḍuna bho melẹgh ịzo oguan obho. Tipa bẹleni pEbrạhạm aru aḍun mẠizik mamen obho ụmar odi oḍual aḍuma itẹn, pẠizik aḍun mạJekob, keḍio ạJekob aḍunogh maḍiōbh nꞌịzal ạnwuny todi, igbōgh ạburude arughun otu tezira.

⁹“Ạburude arughun otu tezira ibōbhan maJosef, keḍio iru iḅool odi mẹbana mi tIzipt. Ẹnaan ạrolan nini zodi, ¹⁰keḍio ạbhel nini zodi magey mi toomo ịiḅaghami odi. Amen ubhin maJosef uru taFero ọolema obhꞌIzipt, Ẹnaan ạnogho ni zodi mooḅi eḍighiom ạar nꞌolōghōm ạar. PaFero ạnogho maJosef mẹmoogh oomo ebhugh obho nꞌoghōol otu ọolema bho. ¹¹Keḍio oḅẹer aru tebhugh obhꞌIzipt nꞌaKenan, olo ạnogho mọmiinom magey. Igbōgh ạburude bhꞌezira ịmiin io meḍian. ¹²Tamen olo ạJekob ạmoghon mibha eḍian idi tIzipt, pọḅel amen odi arōm mạnwuny odi igbōgh ạburude bhꞌezira mọghi tIzipt. ¹³Amen eedi ịghi mobho tagbẹbhiōm ịzal amen obho, paJosef ạgba aḍeeriom lōor odi maburumōr obhꞌodi, keḍio aFero tatu alōghōm meghun otu taJosef. ¹⁴Keḍio aJosef tatōm dōm ạkiom ạJekob ọde odi molo odi nꞌeghun otu odi keru tIzipt: oomo bhꞌeedi erubal nꞌaḍisibh ḍiōbh nꞌōogh arōoy. ¹⁵Suo pạJekob ạghi tIzipt, tesi obho odi nꞌigbōgh ạburude obhꞌezira ịbhozu. ¹⁶Iḍim obhꞌeedi ubhin ụghi tesi obho ughōl bọ ạSekem obho. Uḍiiy zeedi mi toogu obho Ebrạhạm aghuōm bọ mikpoki mi tạvo ạnwuny tạHemor.

¹⁷“Amen natuan olo Ẹnaan taḍighi moguan obho odi aguanaan mEbrạhạm obho, arōoy ezira ibha ịrol tIzipt nẹebugh magey. ¹⁸Tikunughi obho pọnon ọolema olo olōghōm io maJosef aru ạda mIzipt. ¹⁹Keḍio odi ạdereghi marōoy obhꞌezira, ạrolom mạburude obho tezira mịkarabh ạdolomaan, ạkpaariom zeedi molo eedi kesereghi ghạ mạrunwuny mi tetẹrẹ milo ẹpozu. ²⁰Tesuo pamen ụmar maMozis, ọony olo ạneghe magey. Uukō zodi tologhi otu mịraar ụvanyu. ²¹Tamen obho umutiom zodi totu eedi obho, pọnyani taFero ạseghe ạloghom zodi aakō kọony olꞌodi. ²²Oomo olōghōm ạar Izipt ụtughumiom ni zodi ọman, molo odi aru mogbōgh ōoy mi tọnuekpete nꞌeḍighiom ạar.

²³“Amen ạsumusia taMozis igbẹbh erubal ạsia, podi ạatua mọghi ọmiinan arōoy odi obhꞌIzirẹl. ²⁴Odi ạmiin monyiin olo ōoy olꞌIzipt naḍul, podi ạghi ạbhel zodi, aḍighi ạkpe mōoy obhꞌIzipt obho, aghigh zodi. ²⁵(Odi aghōdi arōoy bhꞌodi tẹmoghonyan ni zodi mobho Ẹnaan tạseghe zodi aḍighiom molo eedi kemuzaan, keḍio eedi ịmoghonyan io.) ²⁶Ạteeny mọnon aḍuma, podi ạmiin mịzal arōoy ilꞌIzirẹl neḅe keḍio odi ạghi mosibhi eedi. Odi ạkpete nạnogho zeedi, ‘Sọo. Enyina saburumōr. Eeghe konyiin digha amina aḍul monyiin?’ ²⁷Keḍio odi obo bho naḍul bọ mopedi obho anyu maMozis atẹnẹ tọtu, apuruan kua zodi, ‘Okōr ōoy aseeri ạna mọola nꞌọtu mịiruan ezōor? ²⁸Ạna nạva moghigh ạmi kẹzo bho ạna ughigh mobhꞌIzipt obho meḍienaan obho bẹle?’ ²⁹Amen aMozis ạmoghon miibha bho, podi aghiil ạḍua mi tIzipt ạghi ạke morugh tade bhꞌaMidia. Tepa podi ạteeny ịzal ạnwuny.

³⁰“Erubal ạsia iru itẹn, potelema tẸnaan amutenaan maMozis mi tologhi amuumōr ạnyan mi tobꞌeekpu eḍum ọosaar olo atuan mobꞌeegum obhꞌaSainai. ³¹AMozis aamōogh ni mi tibha odi nạmiin obho, podi ạghi atuan mọmaar ọmiin eḍum obho. Keḍio odi ạmoghon oghōrōkō tObạmọogh obho. ³²‘Ạami Ẹnaan tigbōgh ạburude bhꞌonuma, Ẹnaan obhꞌEbrạhạm nꞌẠizik nꞌạJekob.’ Keḍio ologhi taMozis ạrol akpooy nꞌaruugu molo odi omina ḍio ane moonon. ³³Keḍio Obạmọogh obho ạkpete kua ạnogho zodi, ‘Kpọrona rakōrō bhꞌonuma. Esi obho ạna ụmara bho ade iigbia. ³⁴Ạami nꞌꞌaanon ạmiin mọmiinom arōoy obhꞌạmi mi tIzipt. Ạami nạamoghon mịkubh obhꞌeedi. Siibha bho ạami naasōor atu mọbhel eedi. Tue siibha, ạami tatōm ạna ạki tIzipt.’

³⁵“AMozis obho arōoy Izirẹl igin bọ ipuruan zodi ighōl maa, ‘Okōr ōoy aseeri ạna mọola nꞌọtu mịiruan ezōor?’ obho, odi pobo Ẹnaan arōm kỌola nꞌỌpela, men obho otelema tẸnaan aru amutenaan zodi tologhi amuumōr ạnyan obho. ³⁶Tamen olo odi naaḍighi mịkanya ọkpo ibꞌaruugu mi tIzipt, podi abhin zeedi amutonom, ạḅolom tọbhiiny obho ughōl bọ Ọbhiiny Igbila bho, aḍighi nạ mọkpo ibꞌaruugu mi tobꞌeekpu eḍum obho merubal ạsia. ³⁷AMozis obo bho ạkpete ạnogho marōoy Izirẹl aghōl kua, ‘Ẹnaan tạnogho ni zenyina mozil odi, kẹzo bho odi ạnogho zạmi zenyina bho, olo tatu molꞌalōor enyina nịvo.’ ³⁸AMozis obo bho ạrol ạni mi tookōbhōghian arōoy ibhꞌIzirẹl mi tobꞌeekpu eḍum obho: odi ạrolan ạni mạburude obhꞌezira nꞌotelema tẸnaan obho ạkpete bọ mạar ạnogho zodi mi tobꞌeegum obhꞌaSainai bho. Odi ạmoghon moghōrōkō tẸnaan obho omuneen ghạ ḍio ạnogho zezira bho.

³⁹“Keḍio igbōgh ạburude obhꞌezira igin moghiilaan odi, inyu zodi itẹnẹ tọtu, ịva momula tIzipt, ⁴⁰ịkpete nạ ịnogho Eron ighōl kua, ‘Lẹm maruru mạnogho ezōor ilo tekpo zezira eḍionom. Ezōor ulōghōm io milo neemutenaan maMozis obho abhin ezira amutonom mi tIzipt obho.’ ⁴¹Tesuo peedi tẹlem meru olo ạgbaanan mọony ạnam, ẹtun mạar ẹnogho, keḍio tele mẹzaal nebuom moḍighi ạravo bhꞌeedi. ⁴²Keḍio Ẹnaan ạḅele zeedi, ạseghe zeedi ạnogho mookpulughu ghạ ịinaany ạnyu obho, kẹzo bho nọoge bọ mi tịbhereer arizil obho maa:

‘Arōoy Izirẹl, enyina ịze ghạ mịnam obho merubal ạsia mi teekpu eḍum obho ku negbiom molo enyina nẹtunom mạar ẹnogho zạmi?

⁴³Eenyi, enyina ịgban ghạ meḅina bhꞌạMolok nꞌẹenaany obhꞌaRefayim,

maruru obho enyina ịlemogh mookpulughu obho.

Ạami tapirighan ni zenyina ạseghe atẹnōm nạ mạBabilon.’

⁴⁴“Ẹnaan ạrolan nꞌigbōgh ạburude ezira mi totu-eḍum iikpulughu olo notōol ghạ ni mi tobꞌeekpu eḍum obho. Uḅōgh nạ kẹzo bho Ẹnaan ạtughumiom maMozis obho, kẹzo bho uḍeeriom nạ zodi obho. ⁴⁵Otu-eḍum opopo ạrol ạteeny mọnon ọoke tigbōgh ạburude bhꞌezira. Eedi ibhin ni irōol zodi otu eḍum iikpulughu obho ẹtuonuman maJosua mi tamen obho eedi ịghi mọḅirogh arade bho Ẹnaan abhirighanogh rōoy obho ạnogho zeedi obho. Keḍio ạrol suo ninii ạteeny mamen taDevid. ⁴⁶Odi aḍigh tologhi tẸnaan molo odi agbẹel mẸnaan molo odi kaḅōgh motu kạnogho zodi Ẹnaan tạJekob. ⁴⁷Keḍio ạSolomon pobo aḅōgh motu obho ạnogho zodi.

⁴⁸“Keḍio Ẹnaan obho ạbugh bọ apu kạar kạar obho orugh ghạ ḍio mi tarutu ilo arōoy iḅōgh, kẹzo bho ozil obho ạkpete bho,

⁴⁹‘Ẹnaan ạkpete kua: Ạnyu obho pẹtolom ạmi,

keḍio ade bho poḅeleriom asike ạmi.

Okōr oḍigh otu mobho ạna taḅōgh ạnogho zạmi?

Esi obhooghia ạmi kodi teḍighen?

⁵⁰Oomo ọkpo bhibha ạami ụlem io bẹle?’

⁵¹“Ịmiin ọḅaar ẹmu obho tenyina! Ịmiin ịkarabh iloghi obho tenyina mẹzo enyina itẹnẹghu mikpom araḅeri mi tadōm tẸnaan. Igbōgh ạburude obho tenyina nꞌenyina akẹrekere olo. Enyina ẹkona nẹḍaanan nạ mẸmugh Iigbia bho. ⁵²Kir ozil olo igbōgh ạburude obhꞌenyina ịnogho ḍio mịiḅaghami? Eedi ịze ni miteledōm obho tẸnaan, obo bho ịgba kọkanya amen moru obho tỌony-otu odi obho ịkarabh ilo bho. Keḍio esiibha enyina neeḅool ekigh zodi. ⁵³Enyina obo bho ibhin bọ maraalōgh tẸnaan obho, ibha itelema tẸnaan ibhin iruom enyina bho — oomo ipa ẹkona enyina iikō nạ ḍio.”

Urōḅōl aStivin oghigh

⁵⁴Amen arōoy ạkoti obho ịmoghon mibha aStivin ạgba bho, piloghi obhꞌeedi iḅẹebh molo ạruumu obhꞌeedi iibhuughogh keḍio eedi ịghiir rạlaay eedi nꞌọkarabh ologhi. ⁵⁵Ẹmugh Iigbia bho naamuzō agbẹbh talōor taStivin, keḍio odi aanon tạnyu obho ạmiin meghuan obho tẸnaan, nꞌạJizos nạamara toḍiom ạvo tẸnaan. ⁵⁶Odi ạkpete kua, “Sey, ịmiin ạni. Ạami nạmiin mibha ạnyu obho naakperenu keḍio Ọony Oōy obho nạamara toḍiom ạvo tẸnaan!” ⁵⁷Peedi iḅulughia raḅeri eedi, imulughu ighughaan izuom zodi. ⁵⁸Ibhin odi imutiom tẹma bho irōḅōl odi. Arōoy bhibha ịkporona mọkpo eedi ịnogho monyiin onyughẹel olo ughōl ạSol mọbham. ⁵⁹Ẹzo bho eedi netōḅōl odi obho, podi abheleghi mObạmọogh obho aghōl kua, “ẠJizos Obạmọogh, sẹghe ghuḍum obho tạmi.” ⁶⁰Keḍio odi azuman aakpulughu nꞌobꞌoghōrōkō aghōl kua, “Obumọogh, ụḅamam ghạ mịkarabh ibhibha mi tẹmu eedi!” Odi ạkpete kua ạḅele, podi ạbho.

¹Eḍigh tologhi tạSol moḍighi ạrookoma bhibha.

ẠSol ạnogho mọmiinom mạsosi obho

Odi aḍuma popo parōoy ạsosi obho idi bọ taJerusạlẹm obho ịke mọmiinom mi tạravo obo bho imōruōm io bho, molo oomo obo bho imōruōm obho tughuneen miteledōm obho ḍio, ịizaranu toomo ebhugh obhꞌaJudia nꞌaSameria. ²Keḍio ẹtede arōoy ilo itulan mẸnaan iḍi maStivin, ịitu zodi nꞌigbōgh eḍi.

³Keḍio ạSol ạva mobhiẹmi ạsosi obho, ạḍua ghạ motu atẹn motu ạghoghogh ghạ mobo bho imōruōm obho, ạraani nꞌilobhir, amutiom tetẹrẹ abhin zeedi ạghi ạlokiom ghạ zeedi mikoli.

Ụgba taSameria mooḅi adōm obho

⁴Eedi obo bho imōruōm obho nẹezaranu, kesi kesi olo eedi ịghi, nẹgba ghạ mooḅi adōm obho. ⁵AFilip ạḍua ạghi taSameria keḍio ạgba maKraist ạnogho rōoy obho mi tepa. ⁶Obꞌọlogh arōoy obho ideny ni ịrol bịrim ịmaar ịmoghon mibha aFilip ạḍeghe nạnogho zeedi obho. Eedi ịmaar ịmoghonyan ịmiin nạ mọkpo ibꞌaruugu obho odi aḍighi obho. ⁷Ịkarabh ạruumugh imuteghu ni nꞌibꞌịkanya imulughu mi tọlogh arōoy; arōoy ilo asilōor obho neemughughu nꞌilo itele ghạ ḍio ookō nạ. ⁸Molo ogbōgh ọḅaal ologhi ạrol ni mi taSameria.

⁹Todi ẹma bho kir ōoy olo ughōl ạSaimon, olo arōoy aSameria nekiilaan zodi magey mebum ọkpo iḍeeriom obho odi aḍighi ghạ bho. Molo odi nakōl ghạ modi ōoy. ¹⁰Molo kōoy kōoy olo odi tẹma bho, igbōgh nꞌịbam, imōruōm zodi nekōl kua, “Odi pịnyaam obho tẸnaan obho ughōl bọ ‘Ibꞌịnyaam obho.’ ” ¹¹Odi maaḍighi magey mọkpo iḍeeriom obho mi tẹma bho mịkanya molo eedi nekiilaan zodi. ¹²Keḍio tamen obho eedi imōruōm mooḅi adōm obhꞌAde-Ọolema bho tẸnaan obho aFilip ạgba bho mi taḍien tạJizos Kraist obho, peedi iru izua mụum, ạraani nꞌilobhir. ¹³ẠSaimon nịvo nịvo amōruōm ạni. Amen odi aru azua mụum obho, podi ạrolan ghạ maFilip, molo odi aamōogh magey mamen odi ạmiin mọkpo ibꞌaruugu obho aFilip naḍighi obho.

¹⁴Iteledōm obhꞌaJerusạlẹm ịmoghon mibha arōoy aSameria neebhin mọnuekpete bho tẸnaan, peedi irōm aPita nꞌạJon ịghiom eedi. ¹⁵Amen eedi ịghi isi, peedi iikpulughu molo obo bho imōruōm obho kebhin ạni mẸmugh Iigbia bho. ¹⁶Tẹzo bho Ẹmugh Iigbia bho dosōor io mi tonyiin eedi, uzuom zeedi mụum be mi taḍien tạJizos Kraist Obạmọogh obho. ¹⁷Keḍio aPita nꞌạJon ịḅamaghi rạvo mi tạruumu obhꞌeedi, peedi ibhin ạni mẸmugh Iigbia bho.

¹⁸ẠSaimon ạmiin eedi ibhin mẸmugh Iigbia bho mi tamen obho ụḅamaghi rạvo tạruumu eedi obho, podi aru nạnogho mikpoki maPita nꞌạJon, ¹⁹ạkpete kua, “Nọgho ạni ạami mịnyaam ibhibha molo kōoy kōoy olo ạami ụḅam rạvo ạmi apin ạni mẸmugh Iigbia bho.” ²⁰Keḍio aPita ạbhagharana kua zodi, “Ạna nꞌikpoki onuma iḍigh teḍum tibha ạna nạatua moghuom ikpoki mẹnogho tẸnaan obho! ²¹Bọbon abin bolobolo ẹku olo ạna ụteeny mi toḍighi ezōor olo, tẹzo bho ologhi onuma oozuan io mi tọpaḍi obho tẸnaan. ²²Tebum ipa bẹleni, kiraan mi tịkarabh ịitua bhꞌonuma maakpulughu mẸnaan mọḅelemaan onuma mi tịkarabh ịitua bhibha tonuma. ²³Ẹzo ạami nạmiin, ạna tạḅum ni magbuay mọkpo ịnon arōoy molo ạna naaru mẹbana mi toḍighi ịkarabh.” ²⁴Keḍio ạSaimon tạkpete kua ạnogho maPita nꞌạJon, “Isesen ni, iikpulughu mObạmọogh obho mẹnogho ạami molo oomo ibha ạna ụkpete suo obho imutenaan io zạmi.”

²⁵Tamen olo aPita nꞌạJon nẹegba mọnuekpete tObạmọogh obho ịnogho rōoy, peedi imula taJerusạlẹm, ịgbaay nạ mooḅi adōm obho mi tịkanya ạraama aSameria.

AFilip nꞌogbōgh ōoy olꞌẸtiopia

²⁶Keḍio otelema tObạmọogh obho ạkpete kua ạnogho maFilip, “Ḅetunu maakōbhōghia mạghi tebōom obho ạḍua taJerusạlẹm ạghi tạGaza bho.” (Ebōom opopo ōoy olo digha ạḅol olo mu.) ^27,28PaFilip aḅetunu aakōbhōghia ạghi. Suo bho, obhaghaan ōoy olꞌẸtiopia nạaḅol tebōom opopo nakẹel. Odi ogbōgh ōoy olo nạpam ghạ mikpoki ạni-ọolema bhꞌẸtiopia. Odi ạghi taJerusạlẹm mookpulughu Ẹnaan, keḍio aḍigh oghuugh olo ẹnam nakiilom nakẹel. Ughiilom nọki obho, odi nakōl ghạ mọbhereer tẠizaya ozil obho. ²⁹Keḍio Ẹmugh Iigbia bho ạkpete kua ạnogho maFilip, “Kịa matuan zodi.” ³⁰PaFilip ạghi keḍio ạmoghon bho odi nakōl bọ mi tọbhereer tẠizaya ozil obho, keḍio odi tapuruan kua zodi, “Ạna nạmoghonyan mibha ạna nakōl obho?” ³¹Keḍio odi ōoy obho ạbhagharana kua zodi, “Kir ẹzo olo ạami kạmoghonyan, tughuneen molo ọnon ōoy tạmaar ạgba ạnogho ạami ḍio?” Keḍio odi abheleghi maFilip moru oḍigh ạni toghuugh obho. ³²Esi oghōl obho odi nakōl bọ bho nạgba kua,

“Odi ạrol kẹena olo nọki moghigh.

Odi ạrol kọony ẹena olo omulughu ḍio,

bho nokul subhuubh obhꞌodi.

Odi ọkpete nạ ḍio mạar.

³³Tẹzo bho ụloki zodi rẹgheer obho.

Pụḅele mọru agey ịiruan ọnogho odi.

Oōy olo tatue ạgba mọobhe odi olo,

tẹzo bho aghuḍum odi naakunughi tesuo ade bho.”

³⁴Keḍio ōoy obho apuruan kua maFilip, “Kạr ạgba mạnogho ạami, odi ozil obho nạgba milꞌokōr ōoy? Ilꞌodi bẹlee kọnon ōoy?” ³⁵Keḍio aFilip tạke mọḍeghe, ạkiom zodi adōm obho tozil obho aru ạgbaam mooḅi adōm obho tạJizos. ³⁶Ẹzo bho eedi nẹki obho, peedi iru isi tesi olo ạmuum idi, keḍio odi ōoy obho ạkpete kua ạnogho zodi, “Iibha ạmuum. Ẹkaraan temina ẹpuenaan zạmi mozua ạmuum obho?” ³⁷[Keḍio aFilip tạkpete kua ạnogho zodi, “Eru molo ạna umōruōm nꞌoomo ologhi onuma, pạna ozua ạmuum obho.” Keḍio ōoy obho ạbhagharana kua, “Ạami naamōruōm mibha ạJizos Kraist aru mỌony obho tẸnaan.”] ³⁸Pōoy obho ạto molo kosōbhẹ moghuugh obho, keḍio aFilip nꞌodi isōor tạmuum obho, keḍio aFilip aru azuom zodi mụum. ³⁹Amen eedi imute mi tạmuum obho, pẸmugh tObạmọogh obho ạseghe maFilip ạḍuonom. Oōy obho omina ḍio ạmiin zodi, odi ōoy obho atẹn nakẹel nꞌogbōgh ọḅaal ologhi. ⁴⁰Ụmiin maFilip tẠzotos, keḍio ạghi toomo ạraama bho nạgba mooḅi adōm obho ninii odi aru asi taSizaria.

Ẹzo unwe mạSol utẹnẹ mōoy tẸnaan

¹Tamen bhibha, ạSol odi ni nạnogho mịiḅaghami ạzeey mobo bho nẹtuonuman mObạmọogh obho. Odi ạghi tuvẹmụ arōoy iḅo miiḅua obho ²agbẹel abhin mịbhereer ilo ịnogho zodi mịnyaam mọghi tarutu iikpulughu ibhꞌạDamaskos, merumolo odi ạmiin mōoy olo nạtuonuman mEbōom tObạmọogh obho, milobhir nꞌạraani, odi aḅologh apin atu taJerusạlẹm.

³Tebōom obho, suo odi nạki, natuan tạDamaskos obho, pazuḅa ọpuuny obꞌẹḅaal olo ạḍua tạnyu obho aru asōorōm zodi, ⁴keḍio odi ameel tade bho, keḍio ạmoghon oghōrōkō olo ạkpete kua ạnogho zodi, “ẠSol, ạSol! Eeghe kạna nạnogho kua zạmi mịiḅaghami?” ⁵Keḍio odi apuruan kua zodi, “Obumọogh, ạna kokōr ōoy?” Keḍio oghōrōkō bho ạbhagharana kua, “Ạami pạJizos obho ạna nạnogho mịiḅaghami obho. ⁶Keḍio ḅetunu mạghi tẹma bho, tọgba ọnogho zịna milo ạna taḍighi.” ⁷Arōoy obho nẹtuonuman zodi obho ịmara nꞌikpom ịnu; eedi nẹmoghon oghōrōkō bho keḍio ōoy olo eedi nẹmiin olo. ⁸Amen ạSol aḅetunu tade bho ạkparion riḍien odi, odi ọmiin io mạar, molo eedi ịbham zodi tạvo ireliom zodi ịghi tạDamaskos. ⁹Odi ạrol mikpom ariḍien mịraar aḍuma, olo eḍian ole ḍio, ạmuum ọbhoghol io.

¹⁰TạDamaskos, kir onyiin olo nạtuonuman mạJizos olo ughōl Ạnanayas. Odi ạmiin ghịiny olo Obạmọogh obho ạkpete kua ạnogho zodi, “Ạnanayas.” Keḍio odi ạbhagharana kua, “Oobho ạami, Obumọogh.” ¹¹Keḍio Obạmọogh obho ạkpete kua ạnogho zodi, “Kōkōbhōghia mạghi tebōom obho ughōl ‘Asel ni’ obho, mapuruan mi totu taJudas mōoy olo ughōl Sọl obhꞌạTasos. Odi naakpulughu, ¹²nạamiin nạ ghịiny olo onyiin ōoy olo ughōl Ạnanayas ạḅamaghi rạvo mi talōor odi molo odi kamina kạmiin mạar.” ¹³Keḍio Ạnanayas ạbhagharana kua, “Obumọogh, ọlogh arōoy nẹegba ẹnogho ạami milꞌōoy obhobho, nꞌibꞌịkarabh ọkpo ilo odi naaḍighi marōoy onuma mi taJerusạlẹm. ¹⁴Keḍio esiibha odi naabhin mịnyaam mi taruvẹmụ iḅo miiḅua bho atu tạDamaskos moḅologh arōoy obo bho nekōl ḍien onuma bho.” ¹⁵Obạmọogh obho ạkpete kua ạnogho zodi, “Kịa, ạami nạason zodi ạseghe moḍighiom oḍighi ạmi, omutiom aḍien obhꞌạmi ọghi tobo bho ilōghōm io mẸnaan obho, nꞌạruula, nꞌarōoy Izirẹl. ¹⁶Keḍio ạami nịvo nịvo taḍeeriom zodi milo odi tạmiinom mebum aḍien ạmi.”

¹⁷PẠnanayas ạghi aḍigh totu obho, ạḅamaghi rạvo odi mi tẹmu tạSol, keḍio ạkpete kua, “ẠSol umōr ạmi. ẠJizos Obạmọogh obho nịvo nịvo, obho ạmiinan ạna mi tebōom obho suo ạna natu obho, arōm ạami moru molo ạna kạmiin mạar, nꞌolo Ẹmugh Iigbia bho kaḍigh talōor onuma kamuzō.” ¹⁸Tonyiin amen obho, pạar olo odi kopolom ena ạḍua ameel tariḍien tạSol, keḍio odi ạke momina ọmiin ạar, keḍio odi aḅetunu aru azua mụum; ¹⁹keḍio odi aru ale meḍian alōor odi amina aru ạghua.

ẠSol ạgba madōm obho mi tạDamaskos

Keḍio ạSol ạrolan mịbam aruḍuma nꞌobo bho nẹtuonuman mạJizos obho ibha idi tạDamaskos obho. ²⁰Odi obhiẹmi ḍio men mọghi tarutu iikpulughu obho ọgba mạJizos Ọony obho tẸnaan. ²¹Keḍio oomo obo bho ịmoghon zodi obho neemōogh, nepuruan ghạ kua, “Oobho ōoy obho nạzeey bọ rōoy mi taJerusạlẹm, mobo bho nekōl maḍien obhobho bho ḍio gạ? Suo odi aru eebha mi tinyiin eedi abaabha bho, moḅologh eedi ọghiom aruvẹmụ arōoy iḅo miiḅua bho ḍio?”

²²Keḍio ạSol ạgba ni ạkpaariom mibha ạJizos aru maKraist obho, keḍio ịnyaam ọnuekpete obhꞌodi iru ịghua magey molo arōoy aJu obho idi tạDamaskos obho irue ḍio mọbhagharana odi.

²³Ịbam aruḍuma itẹn parōoy aJu obho iikōbhōghian moghigh ạSol. ²⁴Puru ụgba ụnogho zodi mibha eedi nẹetua moḍighi obho. Keḍio ịrol iḅōrō moomo uḍugul nꞌootaany mi tọnu-ẹma bho moghigh odi. ²⁵Molo, onyiin uḍugul obo bho nẹtuonuman mạSol obho ịseghe zodi ịlogh tọkpaagh isōorẹ mi tẹḅagh-otu obho.

ẠSol ạghi taJerusạlẹm

²⁶ẠSol ạghi taJerusạlẹm keḍio ạva moḍigh ạni mi tobo bho nẹtuonuman mạJizos obho. Eedi irue ḍio momōruōm mibha odi naaru monyiin obo nạtuonuman mạJizos, molo aruugu nesibh eedi. ²⁷Keḍio ạBanabas aru ạbhel zodi ạseghe odi ạghiom miteledōm obho. Keḍio aru ạgba mibha ạSol ạmiin mObạmọogh obho mi tebōom tạDamaskos obho, nꞌibha Obạmọogh obho ạkpete ạnogho zodi obho. Odi ạgba nạ mẹzo bho odi ạSol ạgbaam nꞌọoghuanaan ologhi milo igboloman nꞌạJizos. ²⁸Keḍio ạSol tạtolan zeedi ạki mi toomo aJerusạlẹm nạgba maḍien tObạmọogh obho nꞌọoghuanaan ologhi. ²⁹Odi nꞌarōoy aJu obho ịmoghon ịkpa mọnu aGris ẹghanan ghạ magey molo eedi ịrol ịva moghigh odi. ³⁰Amen aburumōr obho ilōghōm miibha bho pịseghe zodi ịghi taSizaria ịkpete ịnogho zodi mọghi tạTasos.

³¹Tesuo keḍio oomo ạrasosi obhꞌaJudia nꞌaGalili nꞌaSameria tẹtol nꞌekima iru ịghua nạ magey. Ọnu arōoy obho tepōbh nạ mi tọlogh ạvo bho tẸmugh Iigbia bho nꞌẹzo oghiilaan obho eedi ịrol ịnogho mObạmọogh obho.

APita ạghi taLida nꞌạJopa

³²APita ạrol ạghi kesi kesi, keḍio ạteeny monyiin aḍuma podi ạghi mọmiin arōoy tẸnaan ibha netugh taLida bho. ³³Todi ẹma bho podi ạmiinan mōoy olo ughōl Inias, olo oomo alōor obho naamuugh ạman molo neegbẹbh ạbhenya ạsia doḅetunu ḍio tẹmuna. ³⁴Keḍio aPita abheleghi ạkpete kua ạnogho zodi, “Inias, ạJizos Kraist naakō ạna. Ḅetunu makpōr mẹmuna onuma.” Todi onyiin amen obho podi Inias aḅetunu. ³⁵Oomo arōoy obho netugh bọ mi taLida nꞌaSeron obho ịmiin mẹzo bho zodi, peedi ighiraan tObạmọogh obho.

³⁶TạJopa kir ạni olo nạtuonuman mạJizos, olo ughōl Tạbita, tọnu aGris pạDokas, ẹmu aḍien obho pọnue. Odi ạseghe moomo aghuḍum odi aseeri moḍighiom iiḅi nꞌọbhel aruvekulom. ³⁷Tamen opopo podi aru ạnwe ạbho. Keḍio uru uutōl moḍim obho todi ụmuneen tẹkpe totu ạnyu. ³⁸ẠJopa ogbeeny io mịkanya mi taLida, molo amen obo bho imōruōm obho ịmoghon ighōl maPita odi taLida, peedi irōm rōoy ịghiom zodi, ighōl kua, “Sesen ni, kẹm maru tezōor.” ³⁹Keḍio aPita aḅetunu aakōbhōghia ạtuonuman zeedi ạghi. Odi aru asi, pubhin zodi ụghi tạnyu otu obho. Oomo arukpukele ạraani obho iru ikō zodi aPita ikiton neleghe neḍereghiom mạrasuoma olo ạDokas ạkologh ạnogho zeedi men obho odi dọbho ḍio obho. ⁴⁰Keḍio aPita abhirighan moomo eedi amutiom totu obho, keḍio agbuluman aakpulughu, aghiraan asōmōghan moḍim obho ạkpete kua, “Tạbita, ḅetunu!” Podi ạkparion riḍien odi, ạmiin maPita, podi aḅetunu ạrol delede. ⁴¹Keḍio aPita ạnogho zodi mạvo odi ạbham ạḅar zodi aḅẹtōn. Keḍio odi abheleghi mobo bho imōruōm obho nꞌarukpukele ạraani obho ạseghe zodi ạnogho zeedi nꞌaghuḍum. ⁴²Ịimoghon nꞌạsuugba bho ilela moomo ạJopa, molo ọlogh arōoy imōruōm mObạmọogh obho. ⁴³Keḍio aPita ạrol mịkanya aruḍuma mi tạJopa mi totu ōoy olo nalooy ghạ rụḅa izu ịnam olo ughōl Sạimon.

APita nꞌạKonilios

¹Onyiin amen mi taSizaria, kir ōoy olo ughōl Kọnilios, onyiin uvẹmụ iḅe rạagham obhꞌaRom olo ạteeny mọlogh obho ughōl bọ “Eegu ẹgham Itali.” ²Odi ōoy olo nạtuonuman raabōom tẸnaan; odi nꞌoomo otu odi neekpulughu ghạ mẸnaan. Odi ạlogh ghạ mạvo ạnogho maruvekulom arōoy aJu obho, keḍio naakpulughu ghạ mẸnaan moomo amen. ³Onyiin aḍuma ịraar asuo mogbo ọsilaan, podi ạmiin ghịiny olo odi ạmaar ạmiin motelema tẸnaan aru ạkpete nạnogho zodi, “Kọnilios!” ⁴Ologhi odi nakpooy, aruugu nesibh, keḍio ạbhagharana kua, “Obo apu ạami, ẹkaraan?” Odi otelema bho aghōl kua, “Ẹnaan nạamoghon miikpulughu onuma nꞌọlogh ạvo bhꞌonuma, keḍio nạatua ạna siibha. ⁵Siibha tōm rōoy mạghiom ōoy olo ughōl ạSaimon Pita; odi odi tạJopa. ⁶Odi asulomaan molōoy rụḅa izu ịnam obho, ōoy olo ughōl Sạimon. Otu odi odi tọtu ọbhiiny obho.” ⁷Podi otelema bho nạḍeghe ạnogho odi obho ạmany ạḍua, keḍio ạKonilios abheleghi mịzal ạnwuny otu odi nꞌonyiin ōoy ẹgham olo nạtuonuman nạ mẸnaan, olo aru nạ monyiin uvẹmụ eegu ẹgham odi. ⁸Odi ạgba ạnogho zeedi mibha imute bho keḍio arōm zeedi mọghi tạJopa.

⁹Ạḅaal, ẹzo bho eedi idi tebōom obho netuan tạJopa, paPita ạsiin tạnyu otu obho mookpulughu. Aḍio nạaḍi ịzal abin ootaany men opopo. ¹⁰Ọkoony nasibh odi, odi nạatua ghạ nạ mole; suo nọsa ni meḍian obho, podi ạmiin nạ ghịiny. ¹¹Odi ạmiin mobho ạnyu obho naakperenu keḍio ạar asōor natu, ạar olo ạgbaanan ọpuuny obꞌukpe ẹmuna olo nꞌinya ạruukul, asōor natu tade bho. ¹²Tologhi obho, oḍigh kẹrekere ịnam nꞌiiḍigh nꞌịnun ạnyu obho ịkani. ¹³Keḍio oghōrōkō ạkpete kua ạnogho zodi, “Pita, ḅetunu, kigh mạḅa!” ¹⁴PaPita ạbhagharana kua, “Ekua ḍio, Obumọogh. Ạami dọḅa ghạ ḍio mạar olo nogbi ni, ọḅaal nạ ḍio.” ¹⁵Keḍio oghōrōkō bho amina ạkpete kua ạnogho zodi, “Ugbi ghạ mạar olo Ẹnaan nạakpete aghōl ạneghe ni.” ¹⁶Uḍighi kua ninii ịraar amen keḍio ụseghe zodi ạar obho ụloghom umulumi tạnyu obho.

¹⁷APita naaḅetunu nạatua ghạ mạkar ạar obho amute tạghiiny obho odi ạmiin obho. Tonyiin odi amen obhobho arōoy obho ạKonilios arōm obho nẹva motu obho tạSaimon etu esi ẹmara tọnu otu obho. ¹⁸Keḍio eedi ibheleghi ipuruan, “Isoloman odi suo olo ughōl Sạimon Pita?” ¹⁹APita odi nini tịitua azin ạghiiny obho todi men Ẹmugh Iigbia bho ạkpete ạnogho zodi mu, “Nonon! Ịraar arōoy neeru nẹva ạna. ²⁰Ḅetunu siibha maakōbhōghia masōor ạghi teedi, ugin ghạ mọtuonuman eedi. Ạami urōm zeedi eru tonuma.” ²¹PaPita asōor ạghi tarōoy obho ạkpete kua ạnogho zeedi, “Ạami odi ōoy obho enyina nepuruan obho. Enyina ịtuan eeghe keru?” ²²Eedi maa, “ẠKonilios uvẹmụ ezōor arōm ezōor. Odi ooḅi ōoy olo naakpulughu ghạ mẸnaan, olo oomo arōoy aJu obho nekiilaan magey. Onyiin otelema tẸnaan arōm odi mobhin onuma ọghi totu odi, molo odi ạmoghon mọnu onuma.” ²³PaPita ạloghom rōoy obho totu ịrolan odi muḍugul obho.

Ạḅaal podi aakōbhōghia ạtuonuman eedi, keḍio ẹtede aburumōr obhꞌạJopa ịtuonuman ạni zeedi. ²⁴Amina ạḅaal peedi isi taSizaria. ẠKonilios maakōbhōghia moomo otu odi. Aburumōr nꞌạburubulol odi neḅōrō. ²⁵Ẹzo bho aPita naḍigh totu obho, pạKonilios aru abheleghian odi, agbuluman azuman tasike odi. ²⁶Keḍio aPita ạbham odi aḅẹtōn, ạkpete kua ạnogho zodi, “Ḅetunu, ạami ōoy nạ konuma.” ²⁷APita ạḍeghe ghạ mẹzo bho nạnogho mạKonilios suo eedi neḍigh totu obho. Eedi iḍigh podi ạmiin marōoy obho neekōbhōghian neḅōrō zodi obho. ²⁸Keḍio odi ạkpete kua ạnogho zeedi, “Enyina nịvo nịvo neelōghōm mobho ōoy aJu umōrō ghạ ḍio tebum eḍighiom ạar odi molo odi kạghi kaḍigh totu, bolobolo ạḍeghian rạḍeghe nꞌarōoy obo bho itu ḍio milꞌaJu obho. Keḍio Ẹnaan nạakpete kua ạnogho zạmi mụseghe ghạ mōoy maghōl mugbini, bolobolo mọneghe ḍio. ²⁹Ẹzo bho ạna urōm uruom zạmi obho ạami une ḍio mogin. Siibha bho, ạami napuruan kua zịna, eeghe amute kạna arōm aruom ạami?”

³⁰Keḍio ạKonilios ạbhagharana kua, “Otamen obhobho molo ịraar aḍuma neetẹn mobho ạami ụrol tiikpulughu mi totu ạmi mi tịraar asuo ọsilaan. Tekperenom pōoy olo ạlokia mịḅaal aru ạmara taghisigh ạmi, ³¹keḍio ạkpete kua, ‘Kọnilios! Ẹnaan nạamoghon miikpulughu onuma, ạatua nạ riḍighi etulan obhꞌonuma, ³²Tōm mōoy ạghi tạJopa abheleghi mōoy olo ughōl Sạimon Pita. Odi asulomaan monyiin olōoy rụḅa izu ịnam olo ughōl Sạimon natugh ghạ tọtu ọbhiiny.’ ³³Molo oḅetunu be, pạami urōm uru tonuma molo ạna ẹkona uḍighi nạ miiḅi uru. Siibha bho oomo ezōor mookōbhōghian taghisigh tẸnaan, noḅōrō mọmoghon ạar obho Obạmọogh obho arōm ạna bho.”

Ịigbaay taPita

³⁴PaPita ạke mọgba, “Esiibha bho keḍio ạami naalōghōm mobho eḍighiom ạar tẸnaan iru monyiin mi toomo arōoy. ³⁵Kōoy kōoy olo aghiilaan odi ạtuugh aḍighi mibha ịneghe bho, podi ọseghe, odi oonon io mẹma bho odi amute bho. ³⁶Enyina neelōghōm madōm obho odi arōm aruom marōoy Izirẹl obho, mobho ạJizos Kraist Obạmọogh oomo arōoy nạaseghe mekima ạnogho zeedi. ³⁷Enyina neelōghōm moomo ibha imute bọ mi toomo ade bhꞌaJudia, ạkiom taGalili mi tamen obho ịigbaay ozua-ạmuum obho tạJon neekunughiom. ³⁸Enyina neelōghōm mibha igboloman mạJizos obhꞌạNazaret mẹzo Ẹnaan azuughiom zodi mẸmugh Iigbia bho nꞌịnyaam. Odi ạghi kesi kesi aḍighi ghạ miiḅi, aakōoy moomo obo bho nẹeghoroghian mi tịnyaam Eru obho, tebum obho Ẹnaan ạrolan nꞌodi obho. ³⁹Ezōor ụmiin ạni moomo ọkpo bho odi aḍighiiy bọ tebhugh obhꞌaJu obho mi taJerusạlẹm. Eedi ịkan odi toorẹeny ẹmigheri obho ighigh odi. ⁴⁰Keḍio Ẹnaan aḅẹtōn odi tọbho bho mi togbẹbhiōm ịraar aḍuma bho, aḍighi odi amutenaan rōoy. ⁴¹Toomo arōoy io, tezōor obo bho ụmiin ạni obho kụ nọgba mobho Ẹnaan aḅẹtōn zodi obho, obo bho odi ạson ạseghe bho be. Ezōor utul nꞌodi ole ọbhoghol suo odi naaḅetunu tọbho bho. ⁴²Keḍio odi ạto ạnogho zezōor mọgba adōm obho ọnogho kōoy kōoy, nꞌọgba ibha Ẹnaan nạaseghe zodi aseeri mọru ịiruan ọnogho imoom nꞌobo ụbho bho. ⁴³Oomo arizil obho ịgba miibha bho todi, eghōl kua mu kōoy kōoy olo amōruōm zodi, pọteeny ọḅelemaan ịkarabh odi mi tịnyaam aḍien obhꞌodi.”

Ẹnaan ạnogho mẸmugh Iigbia bho marōoy ịnon aruubhugh

⁴⁴APita odi nini nạḍeghe, pẸmugh Iigbia bho aru azuom moomo arōoy obho nẹmoghon dōm obho. ⁴⁵Molo aburumōr arōoy aJu obho ịtuonuman maPita mi tạJopa iru obho iimōogh ni mọmiin obho Ẹnaan naazuughi ạni mẹnogho Ẹmugh Iigbia bho marōoy ịnon aruubhugh. ⁴⁶Eedi nẹemoghon mibha eedi nẹkpaay mọnu ạraama nebuom mạlibugh tẸnaan. PaPita ạkpete kua amutiom, ⁴⁷“Arōoy bhibha neebhin mẸmugh Iigbia bho kẹzo bho tezira. Oōy tatue ni siibha bho ạpuenaan mozuom eedi mụum?” ⁴⁸Podi ạto mozuughiom eedi mụum mi taḍien tạJizos Kraist. Keḍio eedi ịkpete ịnogho zodi mọrolan eedi mịbam aruḍuma.

Ịigbaay bho aPita ạgba ạnogho mạsosi aJerusạlẹm

¹Iteledōm obho nꞌaburumōr obhꞌoomo aJudia ịmoghon mibha ịnon aruubhugh neebhinom ạni mọnuekpete bho tẸnaan. ²Amen aPita ạḍua aru asi taJerusạlẹm pobo bho negbẹel molo koḍunogh rōoy ịnon aruubhugh obho iru nesi maPita maa, ³“Ạna ụghi misoloman mi totu arōoy ilo deḍunaay io, ibhꞌịnon aruubhugh obho, keḍio ạna utul nạ zeedi ule meḍian!” ⁴PaPita aru ạgba ạnogho zeedi moomo ibha imute obho, ạke ki tọḅel egbiom obho.

⁵“Ạami ụrol tạJopa monyiin aḍuma naakpulughu, pạami ụmiin ghịiny. Tạghiiny obho ạar olo ạḍua tạnyu obho nasōor, olo odi kobꞌukpe ẹmuna nꞌinya ạruukul, uru utueni ạami. ⁶Ạami ụghiom ḍien uunon tologhi obho, pạami ụmiin moḍigh kẹrekere ịnam nꞌịnun nꞌiiḍigh. ⁷Keḍio ạami ụmoghon oghōrōkō olo ạkpete kua ạnogho ạami, ‘Pita, ḅetunu, kigh mạḅa!’ ⁸Keḍio ạami ụbhagharana kua, ‘Ekua ḍio, Obumọogh, ạami dọḅa ghạ ḍio mạar olo ugbi ni, bolobolo ale meḍian ilo ịneghe ḍio.’ ⁹Keḍio oghōrōkō amina ạḍua tạnyu obho aru aghōl kua, ‘Ụseghe ghạ mạar olo Ẹnaan naaḍighi ạneghemi maghōl mọneghe ḍio.’ ¹⁰Iibha bho imute mịraar amen, keḍio togbi mọseghe ọsiine tạnyu obho. ¹¹Tonyiin odi amen obho, parōoy ilo urōm taSizaria moru tạmi iru isi tesi obho ạami ụrol obho. ¹²PẸmugh Iigbia bho ạkpete ạnogho ạami ugin ghạ mọtuonuman arōoy obho. Odiin aburumōr ibhibha ịtuonuman ạni zạmi ẹghi taSizaria, keḍio oomo ezōor usul totu tạKonilios. ¹³Keḍio odi ạKonilios ạgba ạnogho ezōor mẹzo onyiin otelema tẸnaan aru totu odi ạkpete kua ạnogho zodi, ‘Tōm mōoy olo tạki tạJopa apeleghi mōoy olo ughōl Sạimon Pita. ¹⁴Odi tạgba mọkpo ilo tẹpel ạna nꞌotu onuma.’ ¹⁵Ạami odi nini nạgba men Ẹmugh Iigbia bho aru ạteeny zeedi kẹzo bho ạteeny bọ ezira tọḅel egbiom obho. ¹⁶Keḍio ạami tạatua alōghōm mibha Obạmọogh obho ạkpete bho mu, ‘ẠJon ạseghe mụum kazuughiom marōoy; enyina, tozuom enyina mẸmugh Iigbia bho.’ ¹⁷Neemute ẹman mobho Ẹnaan ạnogho marisoloman obho monyiin odi ẹnogho bho odi ạnogho zezira tamen obho ezira umōruōm bọ mạJizos Kraist Obạmọogh obho. Ạami kokōr ōoy moḍighi ilo ọpuenaan Ẹnaan?” ¹⁸Amen eedi ịmoghon miibha bho, peedi ịḅele mosi, ikiton nẹsebh mẸnaan, ighōl kua, “Siibha bho Ẹnaan naamōrō misoloman obho ekiraan tịkarabh obhꞌeedi ẹteeny ạni ghuḍum!”

Arōoy ạsosi Ạntiok

¹⁹Obo bho imōruōm obho nẹezaranu tebum ibha ịiḅaghami ịteeny zeedi tamen obho ughigh bọ maStivin obho. Ẹtede eedi neegbeeny molo neesi kaFonisia nꞌạSaipros nꞌẠntiok, nẹgbaay dōm obho nẹnogho marōoy aJu obho be. ²⁰Keḍio ẹtede obo bho imōruōm obho, arōoy ilꞌạSaipros nꞌaSairini ịghi tẠntiok ịgba dōm obho ilelemi ịnogho marisoloman obho ạani, nẹgba mooḅi adōm obho tạJizos Kraist. ²¹Ịnyaam tObạmọogh obho ạrolan zeedi molo ịkanya arōoy imōruōm ighiraan tObạmọogh obho.

²²Ọdu eedi abaabha bho isi tạsosi obhꞌaJerusạlẹm, molo eedi irōm mạBanabas ạghi tẠntiok. ²³Amen odi aru asi kạmiin mẹzo Ẹnaan nạasebh marōoy obho, pologhi odi ạḅaal, keḍio odi aakiom oomo eedi mọteeny ologhi omōruōm ọnogho alōor eedi mObạmọogh obho. ²⁴ẠBanabas ooḅi ōoy olo ạteeny magey mologhi omōruōm nꞌẸmugh Iigbia bho keḍio ụḅaram mịkanya arōoy mi tọlogh arōoy ilo neemōruōm mObạmọogh obho.

²⁵Keḍio ạBanabas ạghi tạTasos mọmiinan ạSol. ²⁶Amen odi ạmiin mạSol, podi abhin zodi aru tẠntiok. Ịzal eedi ịrol suo moomo ạla eekōbhōghi ghạ marōoy ạsosi obho, ẹtughumiom mobꞌọlogh arōoy. Tesuo Ạntiok pọḅel esi ubhira ughōl mobo bho nẹtuonuman maKraist obho aKristiens.

²⁷Tamen opopo parizil ịḍua taJerusạlẹm ịghi tẠntiok. ²⁸Ponyiin eedi olo ughōl Ạgabos aḅetunu ạmara, abhinom ịnyaam Ẹmugh obho ạgba mobꞌoḅẹer olo natu tesuo oomo ade bho. (Iibha bho imute tamen olo ạKlodios nạda mebhugh obhꞌaRom.) ²⁹Pobo bho imōruōm obho ịitua molo kōoy kōoy, tibha ạvo odi asi, mọfirima ikpoki ọghiom aburumōr obho idi taJudia obho. ³⁰Keḍio eedi iḍighi mẹzo bho ịfirima mạBanabas nꞌạSol ịghiom marukenya bho.

Umina ụmiine zeedi

¹Tamen obhobho, ạHerod ọolema bho nạake mọnogho ịiḅaghami mịkanya arōoy ạsosi obho. ²Odi ạseghe mobꞌạmugem aghighom maJems umōr tạJon. ³Amen odi ạmiin mobho iḍigh ni magey mi tologhi arōoy aJu obho, podi anyeene ạghi aḅol maPita. (Iibha bho imute tamen ẹzaal obho noliom ghạ mạbred obho ụlogh ghạ ḍio mayist obho.) ⁴Odi aḅol maPita, pụloghom zodi mikoli ụḍuom, ụlogh zodi tạravo arōoy iḅe rạagham obho, ilo usereghi minya ạruuku, ẹku esuo inya inya arōoy. ẠHerod nạatua ghạ mọseghe odi ọlogh tạravo arōoy aJu obho mamen aḍuma ẹzaal Opẹl-Otẹn obho naatẹn. ⁵Puseeri maPita tikoli, keḍio arōoy ạsosi obho iḍigh miikpulughu ịnogho mẸnaan mebum odi nꞌoomo ologhi eedi.

Umutiom maPita mịkpo mi tikoli

⁶Uḍugul aḍuma bho tạḅaal pạHerod omutiom odi ọnogho arōoy obho, aPita nakoḍi teesoḍia ịzal arōoy iḅōrō bho. Nọoḍuom zodi mịzal arigbirigbiri. Arōoy iḅōrō idi nạ mi tọnu otu ikoli obho. ⁷Tekperenom potelema tObạmọogh obho aru ạmara, ẹḅaal nạmu tẹkpe ikoli obho. Keḍio odi otelema bho ạzabhaan maPita ạsumeen zodi, ạkpete kua ạnogho zodi, “Kẹm aḅetunu!” Onyiin odi amen obho parigbirigbiri obho taPita ịworo izuan nꞌibha ạravo odi. ⁸Keḍio otelema obho ạkpete kua, “Mina mukpe onuma mạlogha marakōrō onuma.” PaPita ạtuugh nạ mẹzo bho aḍighi, keḍio otelema bho ạkpete kua ạnogho zodi, “Lọgha makoti onuma mạtuonom ạami.” ⁹PaPita ạtuonuman odi amute tikoli obho. Odi olōghōm io merumolo ibha nemute bho iru magey: odi aghōdi odi nạmiin ghịiny. ¹⁰Eedi ịḅol itẹn mọḅel esi arōoy iḅōrō bho, iru itẹn mogbẹbhiōm ịzal obho ninii iru isi tobho ikunughi obho, teguugh arukurōgh obho amutiom tẹma bho. Odi eguugh obho nịvo nịvo aghuurunu ạnogho zeedi, keḍio eedi iru imute. Eedi irele ịman monyiin ebōom obho, potelema bho ạmany ạḍua ạḅele zodi be.

¹¹Keḍio aPita talōghōm ibha nemutenaan zodi obho, keḍio ạkpete kua, “Esiibha keḍio ạami naalōghōm mibha iru magey. Obạmọogh obho arōm otelema odi aru ạbhel ạami atughuneen tạravo tạHerod nꞌoomo ibha arōoy aJu obho neḅōrō mọmiin ibha temute bho.”

¹²Odi alōghōma lōor odi, podi ạghi totu taMeri oniin tạJon Mạk. Ọlogh arōoy neekōbhōghian suo neekpulughu. ¹³Keḍio aPita aakpu teguugh obho, keḍio ọnyani otu olo ughōl aRoda aru ạmoghon. ¹⁴Podi ạmoghon moghōrōkō taPita. Tọḅaal ologhi ipa bho podi ạḅele moghuuron eguugh obho aghiil amula ạghi ạgba maPita odi tetẹrẹ bho. ¹⁵Eedi ịkpete kua ịnogho zodi, “Ạna nạtaal gạ?” Keḍio odi aghōl mạkar agey nạ ni. Peedi ịbhagharana kua zodi, “Ẹmugh odi gạ!” ¹⁶APita odi nini naakpu. Keḍio eedi iru ighuuron meguugh obho. Amen eedi ịmiin maPita, peedi iimōogh. ¹⁷Keḍio odi ạnwaaghi rạvo odi meedi imulughu ḍio, aru ạgba mẹzo Obạmọogh obho amutiom zodi tikoli obho. Keḍio odi ạkpete kua, “Ịgba miibha bho mẹnogho maJems nꞌaburumōr ipedi obho.” Odi ạkpete kua ạḅele, podi ạḍua ạghi tọnon esi.

¹⁸Amen aḍio aru ạḅaal pọpuuny obꞌẹmoghonyan amute togbo arōoy iḅōrō bho tilo igboloman maPita. ¹⁹ẠHerod ạnogho mịnyaam mọva odi. Peedi ịva irue ḍio mọmiin. Podi ạHerod abheleghi zeedi ạmaar apuruan zeedi, keḍio ạto aghōl mọze zeedi. Iibha iru itẹn podi ạHerod ạḍua taJudia ạghi ạrol taSizaria mịbam amen.

Ọbho tạHerod

²⁰Ologhi tạHerod naḅẹebh mebum arōoy aTaya nꞌaSaidon, peedi ịlogh rōoy mọghi ọmiinan odi. Eedi ibhira iisen mạBlastos, paḍigh teedi: odi ạteeny mịnyaam oomo okōol ọolema bho. Keḍio eedi ịghi tạHerod igbẹel odi mekima, tebum obho arōoy ebhugh eedi nẹteeny ghạ meḍian eedi mi tebhugh odi ọolema bho.

²¹Taḍuma bho odi agu obho, pạHerod ạkpaaghia mibura ọolema bho, ạrol tẹtolom ọdaam ẹma bho, keḍio ạkpete mọnuekpete ạnogho marōoy obho. ²²Arōoy obho imulughu ighōl kua, “Mọnuekpete bho, olꞌōoy io, olo tẸnaan.” ²³Tonyiin odi amen obho, potelema tẸnaan ạgur mạHerod atuḅeen, tebum obho odi ọnogho ḍio mẸnaan meghuan obho. Keḍio ikpukuma ịḅa zodi keḍio odi aru ạbho.

²⁴Keḍio ọnuekpete bho tẸnaan ạrol ni ạregh, alela.

²⁵ẠBanabas nꞌạSol iḍighi moḍighi eedi ẹman mi taJerusạlẹm, pịbham mạJon Mạk ịḍua irughẹel.

Ụson mạBanabas nꞌạSol urōm

¹Tạsosi obhꞌẠntiok, kir arizil tẸnaan nꞌobo ịtughumiom: ạBanabas nꞌạSimion (obho ughōl Oḅile), nꞌạLusios obhꞌaSairini, nꞌaManain (obho uukō nꞌạHerod obho tatu mạgovono obho) nꞌạSol. ²Tamen olo eedi idi tọkoony neekpulughu, pẸmugh Iigbia bho ạkpete kua ạnogho zeedi, “Ịgbarion mạBanabas nꞌạSol moḍighi oḍighi obho ạami ụtuan ubheleghi zeedi obho.” ³Keḍio eedi imina ịrol mọkoony iikpulughu, ịḅamaghi rạvo eedi mi tạruumu eedi.

ẠPol mi tạSaipros

⁴Suo Ẹmugh Iigbia bho naarōm zeedi dōm obho mọghi obho, peedi iḅetunu ịghi taSelusia keḍio ịzoghi ịghi teekpu eḍum obho ughōl bọ Sạipros obho. ⁵Amen eedi ịghi isi tẹma bhꞌạSalamis, peedi ịgba mọnuekpete bho tẸnaan mi tarutu iikpulughu aJu obho. Eedi ịbhamam mạJon Mạk mọlogh ạvo ọnogho eedi mi toḍighi obho.

⁶Keḍio eedi irele ịḅeeny meekpu eḍum obho isi tạPafos. Tesuo peedi ịmiinan monyiin ōoy ịiḍaany olo ughōl Bạr-Jịzos, odi ōoy aJu olo nakōl ghạ modi ozil. ⁷Odi ọbulol tạgovono eekpu eḍum obho ughōl Sajios Pọlos, ōoy olo alōghōm lẹpuuny mạar. Odi ạgovono bho abheleghi mạBanabas nꞌạSol iru todi. Odi nạva mọmoghon ạni ọnuekpete bho tẸnaan. ⁸Pōoy ịiḍaany obho, olo ughōl mọnu aGris mẸlimas, aru nạpuenaan, naḍighi moghireni ologhi omōruōm tạgovono bho. ⁹Keḍio ạSol obho ughōl nạ ạPol obho, Ẹmugh Iigbia bho naagbẹbhan talōor odi, keḍio ạmaar aanon taghisigh odi ōoy ịiḍaany obho, ¹⁰Keḍio ạkpete kua. “Ạna ọony Eru obho! Ạna obo ọlokiom ariḍien toomo ọkpo ilo iru miiḅi; oomo onuma ịkarabh ipesi be imuza, keḍio ạna naḍighi ghạ moghireni agey obho tẸnaan otẹnẹ iben. ¹¹Ạvo tObạmọogh obho tatu ạteeny ạna siibha; ạna tatu mikpom ariḍien, ạḅele mọmiin ẹḅaal bho mịbam amen.” Tonyiin amen obho pẸlimas ạke mọmiin oḅile ọbhurubuur mi tariḍien odi, keḍio ạrol arele nạvaam rạvo mobo tạpam rạvo odi ateliom. ¹²Pạgovono bho amōruōm men odi ạmiin mibha imute bho; odi aamōogh magey mịtughumiom ibha tObạmọogh obho.

ẠPol mi tẠntiok obhꞌaPisidia

¹³PạPol nꞌọlogh odi ịzoghi mi tạPafos ịḅeeny ịghi taPaaga mi tạPamfilia. PạJon Mạk ạḅele zeedi tesuo amula taJerusạlẹm. ¹⁴Keḍio eedi ịḍua suo ịghi tẠntiok obhꞌaPisidia, ạteeny maḍuma obhooghia bho peedi ịghi ịrol delede mi totu iikpulughu obho. ¹⁵Amen uru ughōl tọbhereer araalōgh obho taMozis nꞌẹegia arizil obho, pạruula otu iikpulughu obho irōm mọnu ịghiom eedi ịkpete kua, “Aburumōr, erumolo enyina ịteeny dōm olo ọghuemi iloghi arōoy obho, ezōor nọva molo enyina keru kẹgba.” ¹⁶PạPol aḅetunu, aabhaghami rạvo odi keḍio ạke mọgba,

“Arōoy Izirẹl nꞌoomo enyina obo bho neekpulughu mẸnaan obho, ịmoghonyan ạami. ¹⁷Ẹnaan arōoy Izirẹl ibhibha ạson ạseghe mạburude ezira, keḍio aḍighi zeedi iru mazuḅa ọpuuny obꞌebhugh mi tamen obho eedi iḍighomaan kisoloman mi tebhugh obhꞌIzipt. Tibꞌịnyaam odi, podi abhin zeedi amutonom mi tIzipt. ¹⁸Erubal ạsia bho odi ạkparam ạbham zeedi mi tobꞌeekpu eḍum ọosaar obho. ¹⁹Odi abhiẹmi moḍual aruubhugh mi tade bhꞌạKenan, keḍio ạseghe made bho ạnogho marōoy obhꞌodi. ²⁰Ịrol mạsumusia ilo nẹkian mọonir nꞌerubal ḍiōbh.

“Iibha iru itẹn podi ạnogho zeedi mịtu mịiruan ilo oreliom eedi, ninii aru ạteeny tamen tạSamuel ozil obho. ²¹Tamen olo eedi igbẹel mọolema, pẸnaan ạnogho zeedi mạSol, ọony taKis, olo eghun otu obho taBenjamin, odi ạda zeedi merubal ạsia. ²²Uru utughuneen odi, pẸnaan ạseghe maDevid atẹnẹ mọolema eedi. Ẹnaan ạgba kua maDevid, ‘Ạami nạamiin mobho aDevid ọony tạJesi aru moḍigh ōoy obho ạami nạva bho, ōoy olo taḍighi kạar kạar olo ạami ụkpete ụnogho zodi moḍighi.’ ²³ẠJizos obhꞌọobhe obho taDevid mobho Ẹnaan atẹnẹ mỌpela bhꞌarōoy Izirẹl, kẹzo bho odi aguan obho. ²⁴Keḍio ạJizos tạke moḍighi odi, ạJon nạagba ạnogho moomo arōoy Izirẹl eghiraan tịkarabh eedi eru ezua mụum. ²⁵ẠJon natu mọman oḍighi odi, podi ạkpete kua ạnogho rōoy obho, ‘Enyina ịitua ạami kokōr ōoy? Ạami odi obo bho enyina neḅōrō bho ḍio. Iinon! Odi natu tạman ạmi keḍio ạami ugbẹbh io molo ạami kạkporion rakōrō asike odi.’

²⁶“Aburumōr, ọobhe tEbrạhạm, nꞌoomo enyina arōoy obho neekpulughu mẸnaan obho, ebum ezira kobhin dōm ịbhelegha bho oru. ²⁷Arōoy obho netugh taJerusạlẹm obho nꞌạruula bhꞌeedi ilōghōm io mobho odi aru mỌpela bho, ịmoghonyan io nạ moghōrōkō arizil obho nokōl ghạ moomo aḍuma obhooghia bho. Keḍio eedi nạ ịtuugh iḍighi mibhꞌoghōrōkō arizil obho iru magey suo eedi ighigh mạJizos obho. ²⁸Oomo ibha eedi ịmiin io mạar ọtuan oghigh odi obho, eedi ịseghe ni zodi ẹlogh tạravo taPailet ẹkpete ẹnogho moghigh odi. ²⁹Amen eedi neeru iḍighi moomo ibhꞌẹegia bho ạgba mibha temutenaan zodi obho, peedi isōorẹ zodi mi toorẹeny ẹmigheri obho ịlogh zodi mi toogu. ³⁰Keḍio Ẹnaan aḅẹtōn zodi mi tọbho bho. ³¹Ọlogh aruḍuma mobho odi amute aḍeeriom lōor odi mobo bho ịtuonuman ghạ zodi ịḍua taGalili ịghi taJerusạlẹm obho. Eedi siibha bho nẹgba milo igboloman nꞌodi nẹnogho rōoy Izirẹl. ^32,33Ezōor uru suo dodon mọgba ooḅi adōm obho ọnogho enyina: ibha Ẹnaan aguan mạburude ezira bho odi taḍighi ni, odi naaḍighi nạ siibha ạnogho ezira mobo bho uru bọ milꞌọobhe eedi obho, suo odi aḅẹtōn mạJizos ạnogho ghuḍum obho. Kẹzo bho odi ạkpete bọ togbẹbhiōm ịzal ẹmu tỌbhereer Ạsoor taDevid obho maa,

‘Ạna ọony ạmi.

Aadon ạami naatẹn mỌde onuma.’

³⁴“Iibha pibha Ẹnaan ạgba mibha toḅẹtōn zodi mi tọbho bho, oru mu ạḅor,

‘Ạami tạnogho ạna magey ạlisebh obho ạami ụkar uguan maDevid obho.’

³⁵“Tọgba agey, odi amina nạkpete tọnon esi,

‘Ạna omōrō ḍio ạkar agey Ọony-otu tonuma ạḅor.’

³⁶“ADevid aḍighi mibhꞌologhi tẸnaan mi tamen obhꞌodi, keḍio odi aru ạbho, uḍi zodi utueni mạburude odi, keḍio alōor odi ạḅor. ³⁷Odi obo bho Ẹnaan aḅẹtōn tọbho bho pobo bho alōor odi ọḅor io. ^38,39Oomo enyina, aburumōr, ịmaar elōghōm mobho adōm ọḅelemaan ịkarabh obho ịḍua tạJizos kiru nọgba ọnogho enyina. Ilōghōm mobho kōoy kōoy olo amōruōm zodi pọteeny ọḅelemaan toomo ịkarabh obhꞌodi ibha araalōgh obho taMozis utue ḍio amuzaan. ⁴⁰Igona lōor enyina, molo ibha arizil obho ịkpete bho imutenaan io enyina,

⁴¹‘Iinon, enyina obo ịimologh! Iimōogh mẹbhuom!

Oḍighi obho ạami naḍighi dodon obho,

ilo enyina imōruōm io,

erumolo ōoy ạgba nạ ẹkona ạnogho zenyina!’ ”

⁴²Ẹzo bho ạPol nꞌạBanabas nemute totu iikpulughu bho, parōoy obho ịkpete ịnogho zeedi momina omula oru aḍuma obhooghia bho natu obho, momina ọgba ọnogho eedi miibha bho. ⁴³Amen arōoy obho imuteghu pịkanya arōoy aJu nꞌobo bhꞌẹma ilo neekpulughu karōoy aJu obho ịtuonuman zeedi. Keḍio iteledōm obho ịkpete iikiom zeedi mọrol oomo amen oḍum aghuḍum inwo bho tẸnaan.

⁴⁴Amina ạteeny maḍuma obhooghia bho, odi kolo oomo ẹma bho iru ni ịman mọmoghon ọnuekpete tObạmọogh obho. ⁴⁵Amen arōoy aJu obho ịmiin marōoy obho, pibōbhan iḍigh tiloghi obhꞌeedi, peedi ịkpete ịpue mạPol nꞌọnuekpete bho todi. ⁴⁶Keḍio ạPol nꞌạBanabas, aruugu isibh io zeedi; eedi ịmara ịgba mọnuekpete bho ighōl kua, “Ẹkpe magey mobhira ọgba ọnuekpete bho tẸnaan ọnogho enyina. Suo enyina neegin obho, iseeri lōor enyina karōoy ilo ịgbaan io mọteeny aghuḍum obho ikunughi olo bho, ezōor tọḅele zenyina ọki tarōoy ịnon aruubhugh obho. ⁴⁷Iibha pịto bho Obạmọogh obho ạnogho ezōor,

‘Ạami naaseeri zenyina moru ẹḅaal taruubhugh ipedi obho,

nꞌoru ebōom ịbhelegha bho ọnogho oomo ẹmar-arōoy obho.’ ”

⁴⁸Amen obo bho itu ḍio milꞌaJu obho ịmoghon miibha, peedi ibo molo eedi ibuom ni madōm obho tObạmọogh obho. Keḍio obo bho nọoson ụnogho maghuḍum olo ikunughi olo bho iru mobo neemōruōm.

⁴⁹Keḍio ọnuekpete bho tObạmọogh obho alela moomo ebhugh obho. ⁵⁰Parōoy aJu obho ịghi iḅia migbōgh arōoy ẹma bho nꞌạraani obho itu ḍio milꞌaJu ibha ịla mạar magey neekpulughu nạ mẸnaan. Eedi ịke mọnogho ịiḅaghami mạPol nꞌạBanabas, molo ibhirighan zeedi mi tebhugh obhꞌeedi. ⁵¹Keḍio iteledōm izighe itubeḍi mobhugh obhꞌasike eedi ịnogho zeedi, keḍio ịḍua ịghi tAikoniom. ⁵²Obo bho imōruōm mi tẠntiok obho ịteeny magey ọḅaal ologhi nꞌẸmugh Iigbia bho.

Ạpol nꞌạBanabas mi tAikoniom

¹Onyiin ẹzo bho mobho imute nạ tAikoniom: ạPol nꞌạBanabas ịghi iḍigh totu iikpulughu arōoy aJu obho ịgba dōm obho molo ịkanya arōoy aJu obho nꞌarōoy ịnon aruubhugh obho imōruōm magey. ²Arōoy aJu obho imōruōm io bho ịghi iḅia marōoy ibha itu ḍio milꞌaJu obho, ighireni miloghi obhꞌeedi moḍighi ịkarabh burumōr obho. ³Iteledōm obho ịrol ibia tesuo. Nꞌọoghuanaan ologhi, eedi ebhin ịgba dōm tObạmọogh obho. Obạmọogh obho aḍeeriom mobho adōm obho teedi aru magey, ạnogho zeedi mịnyaam oḍighiom ọkpo ibꞌaruugu, nꞌịiḍaany. ⁴Ọlogh arōoy ẹma bho nẹeḍian ịzal abin: ẹtede iḍigh nꞌarōoy aJu obho, ẹde iḍigh nꞌiteledōm obho.

⁵Parōoy aJu obho nꞌarōoy ịnon aruubhugh obho iikōbhōghian nꞌikponom arōoy obho mọnogho ọmiinom miteledōm obho orōḅōl eedi. ⁶Amen iteledōm obho ịmoghon miibha bho peedi ịḍua ịghi taListra nꞌaDaabi ạraama aLaikonia nꞌoomo ạraama aruubhugh ipedi obho. ⁷Tepa peedi ịgba mooḅi adōm obho ịnogho rōoy.

ẠPol nꞌạBanabas mi taListra nꞌaDaabi

⁸TaListra kir ōoy olo asike bho neeḅaghanyu; ki tamen ụmar odi, odi dorele ghạ ḍio. ⁹Ẹzo bho odi odi delede bho, odi nạmoghon ghạ mibha ạPol nạḍeghe obho. PạPol ạmiin mobho odi naamōruōm, nꞌobho totue ni ookō zodi, podi ạmaar aanon zodi, ¹⁰keḍio ạkpete amulughu nꞌobꞌoghōrōkō aghōl kua, “Ḅetunu mạmaruom sike onuma!” Podi ōoy obho apẹl aḅetunu ạmara, keḍio arele. ¹¹Amen arōoy obho ịmiin mibha ạPol aḍighi obho, peedi ịrol imulughu tọnu-ẹma eedi ighōl kua, “Obo bho ezira nookpulughu ghạ bho neesōor etu tezira karōoy!” ¹²Peedi ighōl ḍien mạBanabas aJupita, ạPol eedi ighōl aMekiuri, tebum obho odi aru mobo bho ạkpete mạar obho. ¹³Poku eru obho aJupita obho otu eru obhꞌodi odi temutonom ẹma bho, abhin ịnam nꞌạrafalawa aseeri tọnu-otu bho. Odi nꞌarōoy obho neeru mọtun ạar ọnogho iteledōm obho. ¹⁴Amen ạBanabas nꞌạPol ịmoghon ibha eedi netu moḍighi obho, peedi ịbaay rụsuoma eedi, ighiil ịghi iḍigh togbo arōoy obho imulughu ịkpete kua, ¹⁵“Sọo enyina arōoy bhibha, eeghe kenyina neḍighi mọkpo ilo idi kua? Ezōor ạkar arōoy ilo idi kenyina! Ezōor uru eebha mọgba ooḅi adōm obho be, molo oghireni iloghi obhꞌenyina mi tọkpo bhibha ibha ịgbaan io bho oru tẸnaan obho aḍum ni ạrol obho, obho ạlem bọ mạnyu nꞌade nꞌọbhiiny obho nꞌoomo ọkpo bho idi teedi obho. ¹⁶Tamen olo neetẹn odi ạḅelemaan kōoy kōoy mọḅol tebōom olꞌodi. ¹⁷Keḍio odi ọrol io kua molo odi ọgba ḍio lōor odi amutiom aḍeeriom rōoy. Enyina ịmiin odi toḍighi iiḅi odi: odi ạnogho zenyina mẹlebhe bhꞌạnyu obho, nꞌeḍian tamen olo iizuan. Odi ạnogho zenyina meḍian abhule miloghi enyina nꞌọḅaal ologhi.” ¹⁸Toomo ọnuekpete bhibha, ịbam kisughō iteledōm obho kitue ḍio ẹpuenaan zeedi mọtun ạar ọnogho eedi.

¹⁹Ẹtede arōoy aJu obho ilꞌẠntiok obhꞌaPisidia nꞌilꞌAikoniom iru. Eedi iḅia rōoy obho eḍigh teedi, irōḅōl ạPol ịghogh zodi imutiom tẹma bho, nẹtughom ghạ mologhi mobho odi nạabho. ²⁰Amen obo bho imōruōm obho iru ikō zodi ikiton, podi aḅetunu amula tẹma bho. Aḍio ạḅaal podi nꞌạBanabas ịḍua ịghi taDaabi.

Imula ịghi tẠntiok obhꞌaSiria

²¹TaDaabi pạPol nꞌạBanabas ịgba mooḅi adōm obho ịnogho rōoy molo ọlogh arōoy imōruōm. Keḍio eedi imula taListra, ịḍua suo ịghi tAikoniom, imina ịḍua suo ịghi tẠntiok obhꞌaPisidia. ²²Keḍio eedi iikiom ịghuemi miloghi obo bho imōruōm obho mọrol ọghi taghisigh mi tologhi omōruōm obho eedi nẹeteeny obho, ịtughumiom zeedi kua, “Ezira tọḅol ni otẹn mi tọlogh ịiḅaghami moḍigh ạni tAde-Ọolema bho tẸnaan.” ²³Keḍio eedi ịsonogh marukenya iseeri mi toomo ạrasosi obho, ịrol mọkoony iikpulughu ịseghe zeedi ịlogh tạravo tẸnaan, obho eedi neerōbhanaan mologhi eedi obho.

²⁴Eedi irele moomo ebhugh obhꞌaPisidia ịman, peedi iru tạPamfilia. ²⁵Eedi ịgba dōm obho ịnogho rōoy aPaaga, peedi ịghi tẠtalia. ²⁶Tesuo peedi ịzoghi ịḅeeny imula tẠntiok, tẹma bho ụseghe zeedi ụnogho talaakō bho tẸnaan molo oḍighi oḍighi obho eedi nẹeman bọ siibha bho.

²⁷Amen eedi iru isi tẠntiok peedi iikōbhōghi marōoy ạsosi obho ịgba moomo ibha Ẹnaan aḍighian zeedi obho, nꞌẹzo bho odi naaghuuron mebōom olo arōoy ilꞌịnon aruubhugh obho kemōruōm ạni. ²⁸Keḍio ịrolan tesuo nꞌobo bho imōruōm obho mịkanya aruḍuma.

Ezue bhꞌaJerusạlẹm

¹Ẹde arōoy mẹeḍua taJudia etu tẠntiok nẹtughumiom maburumōr obho maa, “Urue ḍio ọbhel enyina otẹnẹmi tughuneen molo mooḍunogh zenyina kẹzo bho araalōgh obho taMozis ịgba bho.” ²Keḍio ạPol nꞌạBanabas ịghanan zeedi tụtuu mi tabaabha bho, molo uru ụḍeghe molo ạPol nꞌạBanabas nꞌẹde ibhꞌẠntiok mọghi taJerusạlẹm ọmiinan iteledōm nꞌarukenya bho mebum eedi iibha bho.

³Ạsosi obho irōm zeedi mọghi. Suo eedi nẹki bọ bho eedi ịḅol taFonisia nꞌaSameria isulogh ịgba mẹzo arōoy ịnon aruubhugh nekiraan etu tẸnaan. Iiḅi ịimoghon bhibha ẹḅaaleni miloghi aburumōr obho. ⁴Amen eedi iru isi taJerusạlẹm, pạsosi obho nꞌiteledōm obho, nꞌarukenya bho ibhin zeedi ịloghom, tobo bho eedi ịgba ịnogho moomo ibha Ẹnaan aḍighian zeedi obho. ⁵Pẹde obo bho imōruōm obho, obho iḍigh ạni mogbo arōoy aFarisi iḅetunu ịkpete kua, “Toḍunogh ni zeedi, ọkpete ọnogho zeedi mookō araalōgh obho taMozis.”

⁶Keḍio iteledōm obho nꞌarukenya bho iḍigh mezue mọḍeghe iibha bho otẹnẹ. ⁷Amen eedi nẹeghanan ninii ịbher keḍio aPita aḅetunu ạkpete kua, “Aburumōr, enyina neelōghōm mobho tamen olo neetẹn ibia, Ẹnaan ạseghe ạami mi togbo enyina mọghi ọgba ooḅi adōm obho ọnogho obo bho ịnon aruubhugh obho, molo eedi ẹmoghon ạni emōruōm. ⁸Keḍio Ẹnaan obho alōghōm bọ miloghi arōoy obho aḍighi aḍeeriom mobho odi nạaseghe ạni zeedi, tibha odi ạnogho ạni zeedi mẸmugh Iigbia bho, kẹzo bho odi ạnogho zezira bho. ⁹Akẹrekere olo odi aḍighi teedi nꞌezira olo, keḍio aḍighi ạḅaaleni miloghi obhꞌeedi tebum obho eedi imōruōm obho. ¹⁰Kebum eeghe kenyina netu mọdegh Ẹnaan mọnogho ibꞌadōol mobo bho imōruōm obho, ilo ạburude ezira nꞌezira nạ ni ẹko utue ḍio morōol. ¹¹Ekua ḍio! Ezira umōruōm ni keḍio ụbhel zezira tebum inwo bho tạJizos Obạmọogh obho, pẹzo nạ ụbhel zeedi.”

¹²Oomo arōoy obho ịbhamagh ni mịnu eedi men eedi ịmoghon mạBanabas nꞌạPol nẹgba mọkpo ibꞌaruugu ilo Ẹnaan aḍighi teedi mi taruubhugh obho itu ḍio milꞌIzirẹl obho. ¹³Amen eedi ịkpete ịḅele paJems aḅetunu ạkpete kua, “Aburumōr, ịmoghon ạami. ¹⁴ẠSaimon eede siibha aḅetunu ạgba mẹzo Ẹnaan abhira aḍighi aḍeeriom mobho odi nạaseghe ạni marōoy ịnon aruubhugh obho tibha odi ạseghe ạni mi teedi arōoy ilo neeru milꞌodi be. ¹⁵Ọnuekpete arizil obho emōruōm magey miibha bho. Kẹzo bho ẹegia bho ạkpete bho:

¹⁶‘Iibha neetẹn pạami omula, pẹzo Obạmọogh obho ạkpete,

keḍio ạami kaḅẹtōn motu obho taDevid obho naameel obho.

Ạami tamulumi ni mọkpo bho iḅẹebh obho,

keḍio ạami tamina aḅōgh ạmarami,

¹⁷molo oomo arōoy ipedi obho tẹva mObạmọogh obho,

oomo aruubhugh ipedi obho ạami naabheleghi moru ilꞌạmi.

¹⁸Pẹzo Ẹnaan ạkpete, obo bho aḍighi miibha bho amutiom kọkanya amen.’

¹⁹“Idi tologhi ạmi molo ezira kụuḅaghami ḍio zeedi obo bho neemōruōm obho. ²⁰Kpẹlen nꞌipa, ezira ọge ọghiom zeedi milo eedi kẹḅele mole ariḍian ilo nọotunom mạar ụnogho meru, ẹḅele mịkarabh eḍighiom ạar, ẹḅele mọḅa ẹnam olo ụbhur orum obho ughigh, bolobolo amughom ịḅaal. ²¹Ilōghōm mobho nooghōl umina ughōl maraalōgh obho taMozis mi tarutu iikpulughu obho moomo aḍuma obhooghia bho, nꞌobho nọogba mọnuekpete odi umina ụgba mi toomo ạraama.”

Ọbhereer obho ụge ụghiom obo bho neemōruōm obho itu ḍio milꞌaJu obho

²²Keḍio iteledōm obho nꞌarukenya bho, nꞌoomo arōoy ạsosi obho, iḍumom mọson arōoy mi togbo eedi ọseghe morōm eedi kẹtuonuman mạPol nꞌạBanabas kẹghi tẠntiok. Keḍio eedi iru ịseghe maJudas, obho ughōl nạ Bạsabas obho nꞌạSailas, ịzal arōoy ilo aburumōr obho nekiilaan magey. ²³Keḍio eedi ịge mọbhereer ịfirima. Ọbhereer obho ạkpete kua,

“Ezōor, iteledōm obho nꞌarukenya bho, aburumōr obhꞌenyina nepuruan enyina magey, oomo enyina aburumōr arōoy ibha itu ḍio milꞌaJu obho, ibha netughogh tẠntiok nꞌaSiria, nꞌaSilisia obho.

²⁴“Ezōor nọomoghon mobho ẹde arōoy ezōor neemute iru ịnogho zenyina mịiḅaghami mi tọnuekpete obhꞌeedi. Eedi ibhin io mịikpo tezōor moru oḍighi ibha eedi iḍighi obho. ²⁵Tiibha bho bẹleni, keḍio ezōor uḍigh mezue ụmoghonyan mọson itelema oruom enyina. Eedi tẹtuonuman mibꞌiiḅi aburumōr ezōor ạPol nꞌạBanabas, ²⁶obo bho neebhiẹmi maghuḍum eedi mi toḍighi tạJizos Kraist Obạmọogh ezira bho. ²⁷Ezōor nọoson maJudas nꞌạSailas notuom enyina milo eedi kẹgba mibha ezōor ụge nạ bho. ²⁸Ẹmugh Iigbia bho nꞌezōor nọomoghonyan mọḅele ooti enyina mobꞌadōol, tughuneen araalōgh bhibha bho ịgbaan ni obho. ²⁹Íle ghạ meḍian ilo ụtunom mạar ụnogho mEru obho; ị́ḅa ghạ mẹnam olo ạbhuom nꞌịḅaal bolobolo ụbhur orum obho ughigh; metughuneen lōor enyina mi tịkarabh eḍighiom ạar. Enyina eḍighi miibha bho, pịnon ọkpo ilo mu. Ịmaar mẹrol!”

³⁰Peedi irōm itelema bho ịghi tẠntiok, keḍio eedi iru iikōbhōghi moomo obo bho imōruōm obho iru ịnogho mọbhereer obho. ³¹Amen arōoy obho iru ighōl mọbhereer obho, pologhi eedi ạḅaal mi taliiki obho. ³²AJudas nꞌạSailas arizil tẸnaan ẹkpete nạ mịkanya ọkpo ẹnogho maburumōr obho molo ọghuemi iloghi obhꞌeedi ẹnogho nạ zeedi aliiki. ³³Eedi ịrolan zeedi mịbam amen, paburumōr obho ịḅele zeedi momula oghẹel nꞌekima mi tobo bho irōm zeedi obho. ³⁴ẠSailas ạatua momina ọrolan eedi.

³⁵ẠPol nꞌạBanabas ịrol mịbam amen mi tẠntiok. Eedi nꞌịnon arōoy itul mọnu ẹrol ẹtughumiom rōoy, ẹgba nạ mọnuekpete tObạmạogh obho.

ẠPol nꞌạBanabas ịgbaranuan

³⁶Ịbam amen itẹn pạPol ạkpete kua ạnogho mạBanabas, “Tue omina omula ọghi ọmiinan aburumōr ibhꞌạraama bho ezira ụgba mọnuekpete tObạmọogh obho molo omina ọmiin mẹzo eedi idi.” ³⁷PạBanabas aghōl mọbhamam ạJon Mạk, ³⁸keḍio ạPol omōrō ḍio ebum obho odi amula tạPamfilia ạḅele zeedi ọtol io asi tikunughi erele obhꞌeedi. ³⁹Peedi ịteeny mọoghuanaan ẹmoghonyan olo aḍighi molo eedi ịbaana raabōom. PạBanabas ạseghe mạMak ạzoghi ạghi tạSaipros. ⁴⁰Keḍio ạPol ạseghe mạSailas aḅetunu. Aburumōr obho nạ iikpulughu ịnogho zodi molo inwo tObạmọogh obho kẹrolan zeedi. ⁴¹Keḍio odi ạḅol atẹn taSiria nꞌaSilisia ạnogho liiki mạrasosi obho.

ATimoti ạtuonuman mạPol nꞌạSailas

¹ẠPol arele ninii ạghi asi taDaabi nꞌaListra. Kir ōoy olo odi suo olo amōruōm, olo ughōl Timoti. Oniin odi olꞌaJu obho, naamōruōm nạ; keḍio ọde odi olꞌaGris. ²Oomo aburumōr ibhꞌaListra nꞌAikoniom nẹgba magey miiḅi milo taTimoti. ³PạPol ạva mọbhamam aTimoti, podi aru aḍun odi. Odi aḍighi kua tebum obho oomo arōoy aJu obho idi bọ tepa bho neelōghōm mobho ọde taTimoti aru molꞌaGris. ⁴Ẹzo bho eedi ịḍua mẹma itẹn ẹma peedi ịgbaay ịnogho mobo bho neemōruōm obho maraalōgh obho iteledōm obho nꞌarukenya ibhꞌaJerusạlẹm ịlogh obho, iikiom zeedi mọmaar ọbham araalōgh obho. ⁵Iibha bho iḍighi milo ologhi omōruōm ạrasosi obho ịghua magey, molo ọnu arōoy obho neḍighan magey moomo aḍuma.

ẠPol ạmiin ghịiny mi taTroas

⁶Eedi irele moomo ebhugh obhꞌaFrijia nꞌaGaletia, tebum obho Ẹmugh Iigbia bho omōrō ḍio molo eedi kẹgba dōm obho mi tebhugh obhꞌEsia. ⁷Amen eedi isi tọkuan obho mi taMaisia, peedi iru mọghi tebhugh obhꞌaBaitinia, Ẹmugh obho tạJizos omōrō ḍio. ⁸Peedi iḅetunu irele mi taMaisia ịghi isi taTroas. ⁹ẠPol ạmiin ghịiny muḍugul opopo, ạmiin mōoy olꞌaMasidonia nạamara naasen zodi mu, “Tue teebhakele aMasidonia mạbhel ezōor!” ¹⁰ẠPol ạmiin ghịiny obhobho paḅetunu aakōbhōghia mọghi taMasidonia, tebum obho ezōor nọomiin mobho Ẹnaan napeleghi zezōor mọghi ọgba ooḅi adōm obho ọnogho arōoy obho idi tepa bho.

Ẹzo aLidia aghiraan tẸnaan mi taFilipai

¹¹Pezōor uḍigh tụnwiaru mi taTroas ụzoghi ụḅeeny taSamotres. Ạḅaal pezōor usi tạNiapolis. ¹²Keḍio ezōor ụḍua tesuo urele tavel ụghi taFilipai, ẹma ọḅel ebhugh obhꞌaMasidonia, olo iḅe rạagham aRom netugh. Ezōor ọrol mịkanya aruḍuma mi tẹma popo. ¹³Taḍuma obhooghia bho pezōor ụḍua tẹma bho ụghi tọtu ọbhiiny obho. Ezōor nọotua ghạ okōl ezōor tọmiin ni motu iikpulughu arōoy aJu obho. Keḍio ezōor ụrol delede nọḍeghe nꞌạraani obho iikōbhōghian monyiin esi obho. ¹⁴Onyiin olo ạmoghon ạni mọnuekpete bhꞌezōor ughōl aLidia olꞌaTiatira, olo naḅoḍi ghạ rukpe. Odi ạni olo naakpulughu ghạ mẸnaan, keḍio Obạmọogh obho aghuuron mologhi obhꞌodi mọmoghonyan ibha ạPol nạgba bho. ¹⁵Odi nꞌarōoy otu odi izua mụum. Podi abhin ezōor mọghi totu odi, ạkpete kua, “Itu mẹrol totu ạmi, erumolo enyina nekōl ạami ạkar ōoy olo naamōruōm mObạmọogh obho.” Keḍio odi aasen ezōor ụghi.

ẠPol nꞌạSailas mi totu ikoli aFilipai

¹⁶Onyiin aḍuma, ẹzo bho ezōor nọki tesi iikpulughu obho pezōor ụmiin mẹbana ọnyani olo ạteeny mọkarabh ẹmugh olo aḍighi odi nạseghe ghạ mẹkia. Odi nagbuemi magey mobo bho ạteeny odi obho mi tebum ọkpo bho odi nạagbaay ghạ bho. ¹⁷Podi ạtuonuman mạPol nꞌezōor namulughu, “Iibha ạrubana tẸnaan obho ạbugh bọ apu obho! Eedi nẹgba mẹzo olo kọbhel enyina!” ¹⁸Odi aḍighi ghạ kua mọlogh aruḍuma, molo ịikaany mạPol, keḍio odi aghiraan ạkpete kua ạnogho mẹmugh obho aghōl kua, “Ạami ubhin taḍien tạJizos Kraist kạto nạnogho ạna momute talōor odi!” Tonyiin odi amen obho pẹmugh obho ạḍua todi. ¹⁹Amen obo bho ịteeny odi ịmiin mobho ebōom ikpoki eedi naakunughi obho peedi ịbham mạPol nꞌạSailas inyuughi ịghi totu ạraakpe bho ịnogho rụula bho. ²⁰Keḍio eedi ibhin zeedi iru tisōbh rạakpe bho peedi ịkpete kua, “Iibha arōoy aJu keḍio iru tẹma bhobho nẹnogho rōoy mịiḅaghami. ²¹Eedi nẹtughumiom rōoy meḍighiom ạar olo iizuan io maraalōgh ezira: ezira ilꞌaRom, ezira urue ḍio obhin bolobolo oḍighi mipa bho.” ²²Pobꞌọlogh arōoy obho iḍigh mọlogh neḍul eedi. Pisōbh rạakpe bho ịbaay mạrusuoma tạPol nꞌạSailas, ịto ighōl mọgurogh zeedi. ²³Eedi ịmaar ịgurogh zeedi ịḅele, pinyuughi zeedi ịlokiom tikoli, ịkpete ịnogho mobo bho naḅōrō marōoy ikoli obho mọmaar oḍuom eedi. ²⁴Odi obo bho ikoli obho ạmoghon mẹzo bho panyuughi zeedi ạloghom tẹkpe bho ikunughi obho ạduom masike eedi mi tibꞌiikpōogh iirẹeny.

²⁵Nạateeny mogbo uḍugul, pạPol nꞌạSailas neekpulughu ẹmoor sọor nẹnogho mẸnaan, molo arōoy ikoli ipedi obho nẹmaar nẹnagha zeedi. ²⁶Tonyiin odi amen obho, pade bho naazighinian naḅomian, molo azighe motu ikoli obho magey. Onyiin odi amen obho paruguugh otu ikoli obho ighurunuuy, arigbirigbiri ibhꞌarōoy ikoli obho ịworo izuan. ²⁷Amen obo bho naḅōrō marōoy ikoli obho ạsuma ạmiin mibha aruguugh obho neeghurunuuy obho, podi aghōdi arōoy ikoli obho neeghilighu ẹḍuaghuuy, podi ạnyagh ạkpoton mobꞌạmugem odi mogima ọbho. ²⁸Keḍio ạPol amulughu aghōl mu, “Sey. Ugima ghạ lōor onuma! Oomo ezōor idi suo!” ²⁹Podi ōoy obho agbẹel mọtodi, aghiil aḍigh ạghi agbuluman tasike tạPol nꞌạSailas. ³⁰Keḍio odi abhin zeedi amutiom, apuruan kua, “Obo ipu ạami, ạami taḍighi meeghe kạami aḍum ạni?” ³¹Keḍio eedi ịbhagharana kua, “Mōruōm mạJizos Obạmọogh obho, pạna oḍum ạni — ạna nꞌeghun otu onuma.” ³²Keḍio eedi iru ịgba mọnuekpete tObạmọogh obho ịnogho zodi nꞌoomo arōoy obho idi totu odi obho. ³³Tonyiin odi amen obho muḍugul obho podi abhin mạPol nꞌạSailas ạghi aatōlōgh rạnem obhꞌeedi. Keḍio odi nꞌoomo eghun otu odi izua mụum monyiin odi amen obho. ³⁴Keḍio odi abhin mạPol nꞌạSailas ạghi totu odi ạnogho zeedi meḍian. Ogbōgh ọḅaal ologhi aḍigh magey mi todi nꞌoomo otu odi, tebum obho siibha bho odi naamōruōm mẸnaan obho.

³⁵Ạḅaal ụḍirogh obho, pạruula aRom obho irōm rōoy ịto ịnogho zeedi ighōl kua mu, “Ịḅele marōoy pipa eghẹel.” ³⁶Pobo naḅōrō marōoy ikoli obho ạgba ạnogho mạPol maa, “Ạruula bho neerōm mọnu etu molo ạna nꞌạSailas kemute. Siibha, enyina tetue ni ekẹel. Ikẹel nꞌekima.” ³⁷Keḍio ạPol ạkpete kua ạnogho rōoy obho maa, “Ịkarabh ilo ụva ụmiin milo ezōor uḍighi ilo, keḍio eedi ịgurogh ni zezōor mi togbo arōoy — ezōor arōoy ilꞌaRom! Keḍio eedi inyuughi zezōor ịlokioghom ikoli. Keḍio esiibha bho eedi nẹva momutiom ezōor tẹḅokia. Ekua ḍio. Ạruula aRom obho nịvo nịvo ki tetu suo emutiom ezōor!” ³⁸Keḍio arōoy obho imula ịghi ịgba ịnogho mạruula bho. Amen eedi iru ịmoghon mobho ạPol nꞌạSailas iru milꞌaRom paruugu isibh zeedi. ³⁹Peedi ịghi iisen zeedi, keḍio ibhin zeedi imutiom totu ikoli obho, ịkpete ịnogho zeedi mọḍua tẹma bho. ⁴⁰Keḍio ạPol nꞌạSailas ịḍua totu ikoli obho ịghi totu taLidia. Tesuo peedi ịmiinan burumōr obho, ịkpete nạ mọnuekpete aliiki ịnogho zeedi, keḍio tẹḍua.

ẠPol mi tạTesalonika

¹Keḍio eedi ịḍua itẹn mẠmfipolis nꞌẠpolonia iru isi tạTesalonika, obho otu iikpulughu arōoy aJu obho odi obho. ²Tẹzo eḍighiom ạar odi, podi ạPol ạghi totu iikpulughu obho. Odi ạrol suo mịraar awiki ạrol ạghanan rōoy mi tibhꞌẹegia bho, ³nạgba amutiom moḍeeriom eedi mibha ịgbaan ni molo aKraist obho kạmiinom, kamina kaḅetunu tọbho bho. Odi ạgba kua mu, “ẠJizos obhobho ạami nạgba ạnogho zenyina obho paKraist obho.” ⁴Pẹde eedi imōruōm, iḍigh ạni tạPol nꞌạSailas. Pẹzo nạ mobꞌọlogh arōoy ilꞌaGris ilo nekiilaan mẸnaan, nꞌịvaruumu ạraani ẹma bho.

⁵Parōoy aJu obho iru nebōbhan mạPol, ịghi iikōbhōghi mịkarabh ạruumu arōoy mi taraabōom obho milo oḅe obo ạPol. Keḍio eedi izighe mẹma bho, ịghi totu tạJesin mọnyaghagh omutiom ạPol nꞌạSailas ọnogho arōoy obho keḍul. ⁶Eedi isi, eedi ịmiin io zeedi, peedi ịbham mạJesin nꞌịnon aburumōr ịghiom mạruula ẹma bho nemulughu ẹkpete kua, “Arōoy bhibha neeghireni mẹmar-arōoy obho mebughuleni. Eedi neesi nạ teebha. ⁷Keḍio ạJesin nạaloghom zeedi totu odi. Oomo eedi neepeleghu maraalōgh ọolema bhꞌaRom, nekōl maa kir ọnon ọolema olo ughōl ạJizos.” ⁸Tọnuekpete bhobho, pịikaany arōoy obho nꞌạruula ẹma bho. ⁹Pạruula ẹma bho imuul mạJesin nꞌipedi obho ịkpe molo kọḅelemaan zeedi, eedi iru ịkpe peedi ịḅele eedi ịḍua.

ẠPol mi taBeria

¹⁰Aḍio agul be, paburumōr obho ibhin mạPol nꞌạSailas ịghi taBeria. Eedi iru isi peedi ịghi iḍigh totu iikpulughu arōoy aJu obho. ¹¹Arōoy ibhꞌesuo ibhinom epu mibhꞌạTesalonika. Eedi ibhin nꞌooḅi ologhi ẹmoghonyan dōm obho, molo eedi ịḅele ḍio ḍuma mọtuugha ẹegia bho ọmiin olōghōm erumolo ibha ạPol ạkpete bho ịkar iru magey obho. ¹²Ọlogh eedi imōruōm: ịkanya ịvaruumu ạraani ilꞌaGris nꞌịkanya arōoy ilꞌaGris imōruōm nạ. ¹³Amen arōoy aJu ibhꞌạTesalonika ịmoghon mibha ạPol naasiemi mọnuekpete bho tẸnaan mi taBeria, peedi ịghi ịkpete ịpue miloghi arōoy obho moḍighi ịkarabh. ¹⁴Tonyiin odi amen obho, paburumōr obho ibhin mạPol ịghi tọbhiiny obho, ạSailas nꞌaTimoti ịrol taBeria. ¹⁵Obo bho neteliom bọ mạPol obho ibhin zodi isiemi kẠtens. Keḍio ạPol arōm zeedi mọkpete ọnogho ạSailas nꞌaTimoti mokẹm oru todi, keḍio eedi imula taBeria.

ẠPol mi tẠtens

¹⁶Suo ạPol naḅōrō mạSailas nꞌaTimoti moru obho, ologhi odi ọneghe ḍio nọneghe mọmiin ọlogh aruru mi tẹma bho. ¹⁷Podi ạghi ghạ totu iikpulughu obho asōmōghan rōoy aJu obho nꞌobo ịnon aruubhugh ibha neekpulughu mẸnaan obho mi tịkanan. Moomo aḍuma odi ạghi ghạ mi tibꞌaraatẹrẹ mọghanan nꞌobo bho irele netẹn iru itulom odi obho. ¹⁸Pẹde ilo nẹtuonom mịtughumiom tẸpikurios nꞌilo nekōl meedi aStoik iru mọmaar ọmoghonyan ạni odi. Ẹtede nẹkpete kua, “Odi oobho bho kokōr oḍigh obꞌolōghōm ạar! Odi tạkpete meeghe amutiom?” Ẹde ịkpete kua, “Odi odi kolo odi nạgba ghạ milꞌaruru ịnon ạraama.” Eedi ịkpeteey kua mebum obho ạPol nạgba milo igboloman mạJizos nꞌoḅetunu tọbho bho. ¹⁹Peedi ibhin zodi ịghi tesi olo ughōl Ạriopagos ịkpete kua ịnogho zodi, “Ezōor nọva molōghōm ạni imoom ịtughumiom ibha ạna nạgba bho. ²⁰Ẹtede ọkpo bho ạna nạgba bọ bho deḍigh ghạ ḍio taraḅeri ezōor, molo ezōor nọva molōghōm ạkar ẹmu obho.” ²¹(Eedi arōoy Ạtens nꞌisoloman ilo irugh tepa nẹva mọgba nꞌọmoghon moomo amen mimoom ọkpo.)

²²Keḍio ạPol aḅetunu tesi obho uukōbhōghian mi tẠriopagos ạkpete kua, “Arōoy Ạtens, ạami nạamiin mobho toomo ọkpo enyina nẹtuonuman ịkanya mọkpo aghuḍum. ²³Ẹzo bho ạami urele ukiton tẹma bhꞌenyina, uunonogh tariisi iikpulughu obhꞌenyina, ạami ạmiin nạ tonyiin otu eru obhꞌenyina mobho ụge, ‘tẹnaan obho ulōghōm ghạ bho!’ Odi obo bho enyina neekpulughu obho, toomo ibha enyina ilōghōm io zodi obho, odi pobo bho ạami natu mọgba ọnogho enyina. ²⁴Ẹnaan obho ạlem bọ mẹmar-arōoy nꞌoomo ọkpo bho idi bọ todi obho, ạteeny mạnyu nꞌade bho, molo odi orugh ghạ ḍio tarutu iikpulughu ilo ạravo iḅōgh. ²⁵Odi ẹkona ọva ghạ nạ ḍio mọkpo ilo ōoy tatue ni aḍighi amutiom mọnogho odi, tebum obho odi nịvo nịvo nạnogho ghạ kōoy kōoy ghuḍum nꞌipooghu nꞌoomo ẹmar ọkpo. ²⁶Todi onyiin ōoy obho podi aru ạlem moomo arōoy aruubhugh obho, aḍighi molo eedi kerughogh toomo ade bho. Odi nịvo nịvo kạto mạkar amen nꞌikunughi ariisi ilo eedi irughogh. ²⁷Odi aḍighi kua molo eedi kẹva zodi molo mạar io suo eedi tẹmiin ni zodi, tẹzo bho eedi nẹva bọ zodi obho. Keḍio Ẹnaan ọkar io agbeenyan ạḍua tonyiin ezira, ²⁸kẹzo bho onyiin ōoy ạkpete bọ bho,

‘Ezira uḍum ụrol notele todi.’

“Kẹzo onyiin obꞌolōghōm ạar obhꞌenyina ạkpete bho,

‘Ezira ẹkona ạnwuny odi.’

²⁹“Tibha ezira uru nwụny tẸnaan, ezira ụutua ḍio ọseghe maghuḍum tẸnaan mọtuom kịga ẹela agold nꞌasilva nꞌọbharakpar. ³⁰Taruḍuma bho arōoy ilōghōm io bho, Ẹnaan naanon atughuneen ḍien, keḍio esiibha odi nạato molo kōoy kōoy kesi kesi kaghiraan tịkarabh araabōom odi. ³¹Odi naagu ḍuma olo odi tạtu magey ịiruan ạnogho moomo ẹmar-arōoy obho, ilo tẹḍua etu tōoy olo odi nạason ạseghe. Odi nạagba aḍighi aḍeeriom magey obho tibha odi aḅẹtōn zodi ōoy obho mi tọbho bho!”

³²Amen eedi ịmoghon mibha ạPol ạgba milo igboloman nꞌoḅẹtōn tọbho bho, pẹde eedi ịrol iḍumonyom zodi, keḍio ịnon ịkpete kua, “Ezōor nọva momina ọmoghon iibha bho mọnon amen.” ³³PạPol ạḅele mezue bho ạḍua. ³⁴Ẹtede iḍigh nꞌodi emōruōm. Teedi pōoy olo ughōl Dionisios, olꞌogbo bhꞌẠriopagos, nꞌạni olo ughōl Dạmaris, nꞌịnon.

ẠPol mi tạKorint

¹Iibha iru itẹn pạPol ạḍua tẠtens ạghi tạKorint. ²Tesuo podi ạmiinan mōoy olo ughōl Ạkuila, ụmar zodi tạPontos. Eede amen odi ạḍua tItali aru nꞌạni odi aPrisila, ebum obho ạKlodios ọolema aRom mạalogh molōgh molo oomo arōoy aJu kẹḍua taRom. PạPol ạghi mọmiinan eedi, ³podi ạrolan ghạ zeedi, aḍighi ghạ nꞌeedi moḍighi, tebum obho odi naakua ghạ lōor odi mi tilōoy arutu atapol pẹzo nạ zeedi ạni nꞌolom obho. ⁴Oomo aḍuma obhooghia bho podi ọghi ghạ totu iikpulughu ọḍeghe ghạ, nạva ghạ mokiton arōoy aJu bho nꞌarōoy ilꞌaGris.

⁵Amen ạSailas nꞌaTimoti ịḍua taMasidonia iru, pạPol ạseghe moomo amen obho odi ạteeny obho mọgbaam ghạ adōm obho be, nạgba ạnogho marōoy aJu mibha ạJizos aru maKraist obho. ⁶Amen eedi ipinom io zodi, nẹgba zodi mịkarabh, podi amulumian zeedi agunugun mobhugh ibura odi ạkpete kua ạnogho zeedi, “Ịḅaal enyina ẹrol tạruumu enyina! Ọkpe ạmi olo mu. Ạseghe dodon ạghi taghisigh, ạami tạki tobo bho itu ḍio milꞌaJu obho.” ⁷Podi ạḍua ạghi arughan monyiin ōoy olo ughōl ạTitios Jụstos, odi isoloman olo naakpulughu ghạ mẸnaan, otu odi ạgbagian motu iikpulughu aJu obho. ⁸AKrispas uvẹmụ otu iikpulughu obho, aru amōruōm Obạmọogh obho, odi nꞌoomo otu odi. Ịkanya arōoy ẹma bhꞌạKorint ịmoghon dōm obho pimōruōm, izuaay rụmuum.

⁹Onyiin uḍugul podi ạPol ạmiin ghịiny olo Obạmọogh ạkpete kua ạnogho zodi, “Ughiil ghạ ruugu, gbạ ghạ ni be dōm obho, ughiilaan ghạ. ¹⁰Ạar obho aḍighi obho, ạami odi nꞌạna. Oōy olo tatue aḍighi ạna mạar olo, ebum obho ọlogh arōoy ilo idi tẹma bhobho ilꞌạmi.” ¹¹PạPol ạrol tẹma bho mạla nꞌobharabhaar, ạtughumiom ghạ rōoy obho mọnuekpete bho tẸnaan.

¹²Tamen olo uḍighi maGalio muvẹmụ aRom mi tebhugh obhꞌaGris, parōoy aJu obho iikōbhōghian monyiin esi, ịghi iḅol mạPol ibhin odi ịghi totu ạraakpe bho, ¹³ịgba kua, “Oōy obhobho naḅe moghireni arōoy mookpulughu Ẹnaan mi tẹzo olo ọpue ọlogh arōoy aJu obho.” ¹⁴ẠPol natu moḅetunu ọkpete ạar, paGalio asōbh ạseghe ạkpete kua ạnogho marōoy aJu obho aghōl kua, “Enyina arōoy aJu obho, ughōl iibha ạraakpe ilo igboloman mịkarabh ilo uḍighi, kōl ạami kudeny ni ạmoghon. ¹⁵Kiru mịkanan ilo igboloman nꞌọnuekpete nꞌariḍien nꞌaraalōgh enyina bho, penyina nịvo nịvo ịki mẹtuugh ẹkpetian. Ạami utue ḍio ạmoghon mịiruan ọkpo bhibha.” ¹⁶Podi abhirighan zeedi amutiom mi totu ạkoti obho. ¹⁷Poomo eedi ịbham mạSostenis uvẹmụ otu iikpulughu obho, iḍul zodi mi taghisigh otu ạkoti obho. Ipa ịikaany nạ ḍio bọbon nꞌịbam maGalio.

ẠPol amula tẠntiok

¹⁸Keḍio ạPol ạrolan burumōr obho mi tạKorint mịkanya aruḍuma, keḍio odi nꞌaPrisila nꞌẠkuila iḍigh toghuugh ịghi taSiria. Keḍio odi taḅetunu, podi aguan oguan mẸnaan mi taKenkria afia mẹmu obhꞌodi. ¹⁹Eedi iru isi tẸfesos, pạPol ạḅele maPrisilia nꞌẠkuila. Odi ạghi totu iikpulughu obho ạghanan nꞌarōoy aJu obho. ²⁰Peedi ịkpete ịnogho zodi mọrolan eedi obia, keḍio odi omōrō ḍio. ²¹Kpẹlen nꞌipa, odi ạkpete kua ạnogho zeedi suo odi natu moḅetunu obho, “Ẹrol tịto tẸnaan, ạami tamula ni atu tenyina.” Tesuo podi aḍigh toghuugh mi tẸfesos.

²²Odi aru asi taSizaria podi atẹn ạghi taJerusạlẹm abheleghian mạsosi obho, keḍio odi ạḍua ạghi tẠntiok. ²³Odi ạrol ịbam amen tesuo, podi atẹn ạḍua. Odi ạghi toomo aruubhugh obhꞌaGaletia nꞌaFrijia ạnogho moomo obo bho imōruōm obho maliiki mọghuemi iloghi obhꞌeedi.

Ạpolos ạghi tẸfesos nꞌạKorint

²⁴Onyiin ōoy olꞌaJu olo ughōl Ạpolos, ụmar odi tẠleksandria aru tẸfesos. Odi ōoy olo ạteeny lẹpuuny mọnu, alōghōm nạ magey mịigia bho. ²⁵Mọotughumiom zodi mEbōom tObạmọogh obho, molo odi abhinom nꞌoomo ịnyaam odi ạgbaam ạtughumiom magey obho milo igboloman nꞌạJizos. Oomo ipa ẹkona, odi alōghōm mibhꞌozua ạmuum tạJon be. ²⁶Keḍio odi abhinom nꞌọoghuanaan ologhi ạgba dōm obho mi totu ịtughumiom obho. Amen aPrisila nꞌẠkuila ịmoghon zodi, peedi ibhin odi ịghi tọtu ịmaar ịgba ịnogho zodi mạkar agey Ebōom obho tẸnaan. ²⁷PẠpolos ạatua mọghi taGris, pobo bho imōruōm bọ mi tẸfesos obho ịge mọbhereer ịnogho maburumōr ibhꞌaGris mọbhel odi, obhin ọmaar ọbham odi mi tepa. Amen odi asi, odi ạlogh ạvo ạnogho magey mobo bho ịḍua tinwo bho tẸnaan kiru mobo imōruōm obho. ²⁸Odi ạghanan magey rōoy aJu obho mi togbo arōoy nạgba aḍeeriom mi tịigia bho mibha ạJizos aru maKraist obho.

ẠPol ạghi tẸfesos

¹Tamen obho Ạpolos odi mi tạKorint obho, pạPol aghiraan rạama ạnyu obho aru asi mi tẸfesos. Tesuo podi atulom mẹde arōoy ilo nẹtuonuman mạJizos, ²keḍio odi apuruan kua zeedi, “Tamen obho enyina imōruōm obho, enyina ebhin mẸmugh Iigbia bho?” Peedi ịbhagharana kua, “Ezōor dọmoghon ghạ nạ ḍio milo igboloman nꞌẸmugh Iigbia bho.” ³PạPol apuruan kua, “Kokōr oḍigh ozua ạmuum mobho enyina izua?” keḍio eedi ịbhagharana ighōl maa, “Ozua ạmuum tạJon.” ⁴PạPol ạkpete kua, “Ozua ạmuum obho tạJon ilꞌobo bho ighiraan tịkarabh eedi obho; keḍio odi ạkpete ạnogho marōoy Izirẹl momōruōm onyiin obo bho natu tạman odi obho — odi pạJizos.” ⁵Eedi ịmoghon miibha bho peedi iru izua mụum mi taḍien tạJizos Obạmọogh obho. ⁶PạPol aru ạḅamaghi rạvo odi mi tạruumu bhꞌeedi, pẸmugh Iigbia bho aru azuughiom zeedi, peedi ịkpaay mọnu ạraama, ịgba nạ dōm obho tẸnaan. ⁷Oomo eedi tegbẹbh ni maḍiōbh nꞌịzal.

⁸PạPol aḍigh totu iikpulughu obho, abhinom nꞌọoghuanaan ologhi ạgba ghạ ạnogho rōoy obho mi tesi ịraar ụvanyu nạkanan ghạ nꞌarōoy obho, nạva ghạ mokiton eedi mi tilo igboloman nꞌAde-Ọolema tẸnaan. ⁹Ẹtede eedi ịḅaar liḍim mẹmu, molo imōruōm io nẹkpeteey nạ mịkarabh ọkpo milo igboloman nꞌEbōom tObạmọogh obho mi togbo arōoy obho. PạPol ạḅele zeedi ạseghe mobo bho nẹtuonuman obho ạḍua, molo oomo aḍuma odi ạtughumiom mịtughumiom mi tobꞌotu ogbo ịtughumiom aTiranos. ¹⁰Odi aḍighi kua moomo ịzal ạsia molo oomo arōoy ibha netugh taruubhugh obhꞌEsia, arōoy aJu obho nꞌarōoy isoloman ịmoghon mọnuekpete tObạmọogh obho.

Ạnwuny taSkiva

¹¹Ẹnaan naḍighi mịkanya ọkpo ibꞌaruugu mi tạvo tạPol, ¹²molo bọbon ạpoghota bolobolo ạko ukpe olo odi naaḍighiom mạar kobhin ọghiom obo bho nẹnwe bho pẹzegh obhꞌeedi ọḍua, ịkarabh ạruumugh ẹkona pọḍua. ¹³Ẹde arōoy aJu obho neeghiraan apirighanogh mịkarabh ạruumugh obho ẹkona, ẹva nạ mobhin aḍien obho tạJizos Obạmọogh obho moḍighiom. Eedi nẹkpete ghạ kua ẹnogho mịkarabh ạruumugh obho, “Ạami ụkpete nạnogho ạna mi taḍien tạJizos obho ạPol abhin nạgbaam obho.” ¹⁴Oḍual ạnwuny uvẹmụ iḅo miiḅua olꞌaJu obho, obho aḍien odi ughōl Skiva, pobo neḍighi ghạ miibha bho. ¹⁵Pọkarabh ẹmugh obho ạkpete kua ạnogho eedi, “ẠJizos ạami alōghōm, ạPol ẹkona ạami naalōghōm, enyina kikōr arōoy?” ¹⁶Pōoy obho ạteeny mọkarabh ẹmugh obho abhum eedi aḍulogh ạloki rạnem, molo oomo eedi ighilighu mẹduḅa imute totu obho. ¹⁷Oomo arōoy aJu obho nꞌarōoy aGris obho ibha netughogh tẸfesos obho ịmoghon ni miibha bho ẹman, molo aruugu isibh ni zeedi magey, nꞌolo uubhughumi magey maḍien obho tạJizos Obạmọogh obho. ¹⁸Ọlogh obo bho neemōruōm obho iru togbo arōoy obho neetuma ẹgba milo eedi neeḍighi. ¹⁹Ọlogh obo bho nẹetuugha mịiḍaany obho ibhinogh mịbhereer ịtuugha bhꞌeedi iru iikōbhōghi monyiin esi ịsu nyạn mi tasumusigh oomo arōoy. Uukōbhōghi ugbi mọnu ikpoki ibha ịbhereer obho ịla bho igbẹbh erubal ḍiōbh ẹḅa. ²⁰Iibha bho iru iḍighi molo ọnuekpete tObạmọogh obho abhōbh alela magey nꞌọoghuanaan ạvo.

Elebhir olo uḅe tẸfesos

²¹Iibha bho imute bho iru itẹn, pạPol ạatua tologhi odi mọḅol taMasidonia nꞌaGris ọghi taJerusạlẹm. Odi nạakpete kua, “Ạami nạaghi epa, ạami tạki nạ ni mọmiin aRom.” ²²Podi arōm maTimoti nꞌẸrastos, ịzal obo bho nẹloghonaan zodi mạvo, mọghi taMasidonia, podi tamina ạtol mịbam amen mi tebhugh obhꞌEsia.

²³Taruḍuma bhibha pamen ogbōgh ọoḅaghami odi mịkanya mi tẸfesos mebum Ebōom obho tObạmọogh obho. ²⁴Onyiin ọlemogh masilva olo ughōl Dimitrios nạlem ghạ masilva atuom obꞌotu eru obho ughōl bọ Ạtemis obho, molo oḍighi obhobho todi nạnogho zodi mịkanya ạsuo nꞌobo bho neḅuan nꞌodi obho. ²⁵Podi abheleghi moomo eedi monyiin esi, nꞌobo bho neḍighi nạ moḍigh odi oḍighi obho, ạkpete kua ạnogho zeedi, “Otu, enyina meelōghōm mobho ẹela ezira idi toḍighi obhobho. ²⁶Enyina nẹemiin ẹmoghon nꞌalōor enyina mọkpo ilo ōoy obhobho ạPol naḍighi. Odi aghōl maruru ibha arōoy ịkaay obho mẹnaan io, molo odi naakirion miloghi ọlogh arōoy, mi tesuo Ẹfesos nꞌịnon ariisi mi toomo ebhugh obhꞌEsia. ²⁷Esiibha bho, ilo temute, oḍighi obhobho tezira tatu ạteeny mọkarabh aḍien. Ipa nạ be ḍio nạ, otu obꞌeru obho tezira Ạtemis tapẹ siibha, ụmoghon mu mogbōgh aḍien obhobho todi — eru obho kōoy kōoy mi tEsia nꞌẹmar-arōoy obho neekpulughu obho.”

²⁸Amen arōoy obho ịmoghon mọnuekpete bhibha, pạruumu eedi ịisuuy, ịke momulughu maa, “Olo apu mẠtemis obhꞌẸfesos olo!” ²⁹Oomo ẹma bho naazighinian. Arōoy obho ịghi ibhum mạGayos nꞌẠristakos, ịzal arōoy aMasidonia ilo nẹtuonuman mạPol, ibhin eedi ịghi tobꞌetẹrẹ ọḍe bho. ³⁰ẠPol nịvo nịvo ạva mọghi tarōoy obho, keḍio obo bho imōruōm obho ịbham zodi. ³¹Ẹde ịvaruumu ạkoti obho, ạburubolol odi ẹkona, irōm dōm iruom odi mọḅele omutiom alōor odi tetẹrẹ. ³²Tamen opopo oomo eedi arōoy obho nẹyaghayagha: ẹde nemulughu kẹre, ẹde nemulughu mịnon, ebum obho ạkar ẹde eedi ilōghōm io mạar obho aḍighi keedi iru isōor monyiin esi obho. ³³Ẹtede eedi meeghōl mẠleksanda aḍighi, tebum obho arōoy aJu obho neebhin zodi iseeri motẹnōm taghisigh. Keḍio odi Ạleksanda aabhaghami mạvo odi molo eedi kẹḅele, odi kạkpete mạar kạgba mibhꞌọnu odi kạnogho rōoy obho. ³⁴Amen eedi ịmiin mobho odi aru molꞌaJu obho, poomo eedi imulughu monyiin ẹzo moomo ịzal asuo ighōl kua, “Olo apu mẠtemis obhꞌẸfesos olo!”

³⁵Ikunughi obho keḍio ọge-mọbhereer ẹma bho aru adenyemi rōoy bho ạkpete kua, “Arōoy Ẹfesos, kōoy kōoy maalōghōm mobho ẹma bhꞌẸfesos neekō ghạ mobꞌotu eru obho Ạtemis nꞌibha ọbharakpar iigbia ạḍua bọ tạnyu ameel obho. ³⁶Bọbon ōoy olo tạparanaan miibha bho olo. Tebum ipa bẹleni, ideny, íḍighi ghạ mọkpo ilo ịneghe ḍio. ³⁷Enyina ibhin eru suo marōoy ilo ikulaan io motu eru enyina, dẹkpete nạ ḍio mịkarabh ilo igboloman nꞌodi. ³⁸Erumolo aDimitrios nꞌarōoy oḍighi odi ịteeny mọkpe nꞌōoy, saruḍuma ạkoti nꞌạruula bho sidi, eedi ebhin zeedi ẹghi tepa. ³⁹Erumolo ọnon ạar odi olo enyina nẹva, pu tọki totu ẹma bho ọkpetian. ⁴⁰Ezira toḍigh tọkpe bho usōorẹ mẹgham mi tiibha bho imute dodon obho. Bọbon ẹzo ọgba ọḍua mi toomo iibha bho olo, ilo ezira ụteeny nạ mọgba tibha imute bho ilo.” ⁴¹Odi ạkpete miibha bho ạḅele, podi abhirighanogh zeedi.

ẠPol ạghi taMasidonia nꞌaGris

¹Amen iloghi arōoy obho neesōrōghu, pạPol aakōbhōghi moomo obo bho neemōruōm obho monyiin esi ạnogho zeedi mọnuekpete aliiki aghōl meedi ẹmaar ẹrol. Podi aḅetunu atẹn ạghi taMasidonia. ²Odi ạghi toomo aruubhugh bhibha ạnogho liiki rōoy obho ạgbaam nạ dōm obho. Keḍio odi ạḍua aru taGris, ³ạrol suo mịraar ụvanyu. Odi nạatua ghạ mọghi taSiria men odi ạmoghon mobho arōoy aJu obho neḅia moḍighi odi mịkarabh; podi anwe ạto momula ọḅol taMasidonia ọghi. ⁴PaSopata ọony tạPiros olꞌaBeria, ạtuonom zodi; pẠristakos nꞌaSekondos ilꞌạTesalonika, nꞌạGayos olꞌaDaabi nꞌaTimoti nꞌạTikikos nꞌạTrofimos, ilꞌebhugh obhꞌEsia, ịtuonom nạ zodi. ⁵Eedi itẹn ghạ ịghi neḅōrō ezōor mi taTroas. ⁶Taḍuma ẹzaal obho noliom ghạ mạbred obho ụlogh ghạ ḍio mayist obho naatẹn, pezōor ụḅol taFilipai; ōogh aḍuma itẹn, pezōor ụghi utulom eedi mi taTroas ụrol suo mawiki.

Ikunughi erele tạPol mi taTroas

⁷Udule ạSatode pezōor uukōbhōghian monyiin esi mole eḍian otul-ọnu obho. PạPol ạḍeghe ạnogho rōoy obho ninii kogbo uḍugul, tebum obho nạḅaal podi oḅetunu. ⁸Tạnyu otu-ạnyu obho ezōor idi obho kir ịtodi mịkanya. ⁹Onyiin onyughẹel ọony olo ughōl aYutikos odi delede mi tawindo bho. ẠPol nạḍeghe bho, odi nakoḍi ghạ be. Odi akoḍi asi tẹma ạlaagh, podi ạḍua tạnyu otu ịraar ạdeki obho ameel tade. Ụghi ubhum odi mạabho. ¹⁰PạPol asōor ạghi aḅobhonyom odi, keḍio ạkpete kua: “Ịítu ghạ, odi napooghu ni!” ¹¹Keḍio odi amula ạsiin totu ạnyu obho, aḅigi mạbred ale. Odi ạḍeghe nꞌeedi ninii aghōzōgh namute podi aḅetunu. ¹²Eedi ibhin monyughẹel ọony obho nꞌaghuḍum ighẹel, molo ologhi eedi ạḅaal magey.

ẠPol ạḍua taTroas ạghi taMailitos

¹³Pezōor utẹn ghạ uḍigh toghuugh obho ụzoghi ụghi usi tẠsos, esi olo ezōor nọki mọsaay ạPol. Odi kạkpete ạnogho ezōor moḍighi ekua mebum obho odi nakiton tavel obho. ¹⁴Odi aru ạteeny ezōor, pezōor ụsaay odi utẹn ụghi taMitilini. ¹⁵Keḍio ezōor ụzoghi suo, ạḅaal, pusi tạKios. Aḍuma amina atẹn pezōor ụghi usi tạSamos, ạḅaal pezōor usi taMailitos. ¹⁶ẠPol nạatua mọzoghi ọghi otẹn tẸfesos, molo upiẹmi men mi tebhugh obhꞌEsia. Odi naḅe mokẹm osi taJerusạlẹm, erumolo totue ni, keḍio kạteeny maḍuma bho ughōl bọ ạPentikost obho.

ẠPol aakiom marukenya ạsosi Ẹfesos

¹⁷PạPol arōm dōm mi taMailitos ạghi tẸfesos, nagbẹel molo arukenya ạsosi obho kẹmiinan odi. ¹⁸Amen eedi iru, podi ạkpete kua ạnogho zeedi: “Enyina neelōghōm mẹzo ạami ubhin ụrolom enyina moomo amen obho ạami ụrolan enyina bho, kọḅel aḍuma bho ạami ụḍua bọ tebhugh obhꞌEsia uru obho. ¹⁹Toomo osōoriōm alōor nꞌizin mobho ạami ubhin uḍighiom moḍighi kẹbana tObạmọogh obho, nꞌoomo ọmiinom obho iru ịteeny ạami tebum ezue bho arōoy aJu neḍigh ghạ ẹgbaam ạmi obho. ²⁰Enyina neelōghōm mobho ạami ụpam io bolobolo ạḅoki enyina mạar olo tạpel zenyina mi tịigbaay nꞌịtughumiom obhꞌạmi mi togbo ẹsel, nꞌarutu enyina. ²¹Ạami ubhin onyiin ẹzo bho aakiom marōoy aJu obho nꞌibhꞌịnon aruubhugh obho moghiraan tịkarabh eedi mi tẸnaan, omōruōm ạJizos Obạmọogh ezira bho. ²²Toghiilaan Ẹmugh Iigbia bho, ạami natu mọghi taJerusạlẹm siibha; ilo temutenaan ạami tepa, ạami ulōghōm io. ²³Ạami ulōghōm mobho Ẹmugh Iigbia bho, kẹma kẹma olo ạami ụghi, naakiom ghạ kua ạnogho ạami mịiḅaghami nꞌikoli neḅōrō ạmi. ²⁴Keḍio ạami ụseghe ḍio mạkar aghuḍum obhꞌạmi ạtuom kir obꞌạar, molo ạami aḍighi agbẹbhẹghiōm ạman nạ moḍighi obho ạJizos Obạmọogh obho ạnogho ạami moḍighi obho, ọgba ooḅi adōm inwo bho tẸnaan.

²⁵“Ạami naakiton toomo arutu enyina ạgba mibhꞌAde-Ọolema bho tẸnaan, keḍio esiibha bho ạami naalōghōm mobho bọbon onyiin enyina olo tamina ạmiin ạami olo mu, ²⁶molo ạami udeny ni usōoriōm lōor naakiom enyina dodon: erumolo onyiin enyina abhẹ, ạravo ạmi ịḅaal ni. ²⁷Bọbon ạar olo ạami ugin mọgba ọnogho enyina mi toomo ịitua bho tẸnaan olo. ²⁸Ịmaar elōghōma lōor enyina mẹbham nạ moomo ạraana bho Ẹmugh Iigbia bho ạnogho enyina mookō bho. Itu miikō rạana arōoy ạsosi obho tẸnaan, ibha aghuōm ịḅaal odi obho ogini Ọony obhꞌodi. ²⁹Ạami naalōghōm mobho, ẹḅughaman ạmi be, pibꞌạrukurunuma omute togbo enyina, ilo ịsuanaan io ghụsan mạnwuny ạraana bho. ³⁰Amen natu nạ molo ẹde arōoy mi togbo enyina tẹgbaay miben eebiōghōm mobo bho imōruōm obho ẹtuonom eedi. ³¹Ịmaar eenon, mẹetua mobho ạami ubhinom ịkanya izin muḍugul nꞌootaany ụtughumiom kōoy kōoy mi tenyina moomo ịraar ạsia.

³²“Keḍio esiibha bho ạami naabhin enyina nạlogh tạvo tẸnaan nꞌadōm inwo obhꞌodi, obho tatue ni aakō zenyina ạnogho nạ zenyina mạlisebh obho Ẹnaan aseerian moomo arōoy odi obho. ³³Ạami upin io mobꞌekpaḍien ạḅoorom mokpoki bolobolo ukpe onyiin enyina. ³⁴Enyina nịvo nịvo neelōghōm mobho ạami ubhin rạvo bhibha tạmi uḍighiom moḍighi ụteeny kạar kạar olo ạami nꞌogbo ạmi nọva mọteeny. ³⁵Ạami naaḍeeriom enyina mobho toḍighi ịnyaam ạvo mi toomo kạar kạar olo ezira uḍighi, pezira orue ọbhel obo bho asilōor ilo bho, ọotua ạkar ọnuekpete bho ạJizos Obạmọogh obho nịvo nịvo ạkpete bho, ‘Ọḅaal ologhi ilo idi tọnogho ịnon ipu mobhin ghạ.’ ”

³⁶Amen ạPol ạḍeghe ạḅele, podi agbuluman nꞌoomo eedi, aakpulughu. ³⁷Oomo eedi ibhin nꞌizin ẹnoghuan zodi rạvo eḅolom odi, eghōl lōor amoon. ³⁸Eedi ịkar iḍigh tịitu mi tọnuekpete bho odi ạkpete aghōl bọ meedi irue mu emina ịmiin odi obho. Peedi ịtuonom odi isōor tesiḍia, odi aḍigh toghuugh obho.

ẠPol ạghi taJerusạlẹm

¹Amen ezōor ụkpete ụnogho eedi ughōl, “Ịmaar ẹrol,” pezōor umutiom. Ụzoghi monyen ụḅeeny pezōor ụghi usi tạKos; ạḅaal pezōor usi taRods, ụḍua suo pusi tạPatara. ²TạPatara pezōor ụmiin oghuugh olo nạki taFonisia, pezōor ubhun ụghi uḍigh ụḍua. ³Ezōor ụzoghi usi tesi olo tọmiin ni mạSaipros, ụgbaaron ụzoghi ụghi taSiria. Keḍio ezōor ubhun taTaya, ebum obho oghuugh obho natu mobhunughi adōol. ⁴Ezōor ụva pụmiin mobo bho neemōruōm obho, keḍio ezōor ụrolan eedi mawiki. Tịnyaam Ẹmugh obho peedi ịkpete ịnogho mạPol mọḅele osi taJerusạlẹm. ⁵Aruḍuma bho ezōor kọrolan nꞌeedi obho igbẹbh, pezōor uḍigh tebōom. Oomo eedi nꞌạraani nꞌạrunwuny eedi ịtuonom ezōor etẹn mẹma bho eḍigh tebōom. Tesiḍia bho poomo ezōor ugbuluman uukpulughu. ⁶Ezōor ughōl, “Ịmaar ẹrol,” eedi ighōl, “Alōor enyina emoon, mẹmaar eenon mẹzoghi,” pezōor ụghi uḍigh toghuugh ụnwiaru obho, eedi imula ighẹel.

⁷Pezōor umutiom terele bhꞌezōor, ụzoghi taTaya ụghi taToleme. Tesuo pezōor usul ubheleghian burumōr obho, ụrolan eedi ḍuma. ⁸Ạḅaal pezōor uḅetunu ụghi usi taSizaria. Tesuo pezōor usulomaan maFilip. Odi ōoy olo naḍighi moḍighi ọgba ọnuekpete tẸnaan. Odi onyiin mi toḍual arōoy obho ụson bọ ụseghe taJerusạlẹm obho. ⁹Odi ạteeny minya ạsunwunyaan ilo dẹbal io milom, nẹgba ghạ dōm obho tẸnaan. ¹⁰Ezōor nọorol suo mesi ịzal aḍuma keḍio onyiin ozil tẸnaan olo ughōl Ạgabos ạḍua taJudia aru. ¹¹Odi aru tezōor, pạseghe mọkpuom ukpe tạPol ạkpuom sike nꞌạravo odi, ạkpete kua, “Ẹmugh Iigbia bho ạkpete kua: obo bho ạteeny bọ mọkpuom ukpe bhobho bho, pẹzo arōoy aJu obhꞌaJerusạlẹm tẹkasi zodi, ẹseghe zodi ẹlogh tạravo obo bho ilōghōm io mẸnaan obho.” ¹²Amen ezōor ụmoghon miibha bho, pezōor nꞌaburumōr obho uusen mạPol mọḅele ọghi taJerusạlẹm. ¹³Podi ạbhagharana kua, “Enyina neḍighi meeghe, mọrol oleghe ẹzo bho modughe ologhi ạmi bẹle? Ạami nạamara naḅōrō molo kọkasi ạmi mi taJerusạlẹm nꞌọbhuom mi taḍien tạJizos Obạmọogh obho.” ¹⁴Ezōor urue ḍio mọpuenaan odi, pezōor ụḅele ụkpete nạ ni kua, “Ẹrol tẹzo ịto tObạmọogh obho.”

¹⁵Ịbam aruḍuma itẹn, pezōor uukōbhōghia uḅetunu ụghi taJerusạlẹm. ¹⁶Ẹde obo bho nẹtuonom maKraist obho ibhꞌaSizaria, ịtuonom nạ zezōor ịghi esi totu taMnason obo bho ezōor usulanaan obho. Odi olꞌạSaipros olo amōruōm kịḅel aruḍuma bho.

ẠPol ạghi ạmiinan maJems

¹⁷Ezōor uru usi taJerusạlẹm, aburumōr obho ẹmaar ebhin ezōor ẹloghom. ¹⁸Ạḅaal, pạPol nꞌezōor ụghi mọmiinan aJems; oomo arukenya ạsosi obho idi nạ totu odi. ¹⁹ẠPol aru abheleghian eedi, pạgba ạnogho eedi kạar kạar ilo Ẹnaan aḍighi tạraama ipedi obho mi toḍighi obho odi aḍighi obho. ²⁰Odi ạḍeghe ạḅele, poomo eedi ibuom Ẹnaan. Keḍio eedi ịkpete kua ịnogho mạPol, “Umōr, ạna nạamiin mẹzo idi. Ọlogh arōoy aJu obho neemōruōm, ilo ịseghe maraalōgh obho irōol tẹmu. ²¹Nọogba ọnogho zeedi milo igboloman nꞌạna, mobho ạna nạtughumiom ghạ marōoy aJu obho idi tịnon ạraama bho morōbh araalōgh obho taMozis, nạgba ghạ nạ ạnogho eedi mọḅele oḍunogh ạnwuny eedi nꞌọḅele ọtuonom eḍighiom ạar aJu obho. ²²Ẹzo olo eedi tẹḅele mọmoghon mobho ạna naasi olo. Toḍighi ẹko siibha bho? ²³Ḍighi mibha ezōor tọkpete ọnogho ạna bho. Inya arōoy idi suo ilo neeghiran mịzo mẸnaan. ²⁴Tụonuman eedi mạghi maḅua miiḅua ọḅaaleni alōor obho mạkpienaan eedi, keḍio eedi tetue efia mạruumu eedi. Ạna aḍighi kua, pu kōoy kōoy olo tạmiin polōghōm mobho iru miben mibha eedi ịmoghon bho ụgbaam ạna bho, nꞌobho ạna ụtuugh naḍighi tẹzo ibhꞌaraalōgh obho taMozis. ²⁵Tarōoy ibhꞌịnon aruubhugh ibha neemōruōm obho, ezōor nọoge mọbhereer ọkiom eedi ọgba ọnogho zeedi mobho ezōor nọotua mobho ịneghe ḍio molo eedi kele meḍian nꞌọḅa ẹnam olo ụtunom mạar ụnogho meru, nꞌọlaay ịḅaal, nꞌọḅa ẹnam olo ụbhur orum obho, nꞌọseghe asilōor eedi mi toḍighi ịkarabh.” ²⁶Ạḅaal pạPol abhin rōoy obho ạghi aḍighi mạar iigbia ọḅaaleni alōor obho. Keḍio odi aḍigh totu iikpulughu obho mọnogho ọnu aruḍuma bho tẹtol kegbẹbh ḍuma ọḅaaleni alōor obho, tamen obho arōoy obho tetu ōoy amen amen eḍighi mạar iiḅua bho.

Uḅol ạPol totu iikpulughu obho

²⁷Amen oḍual aḍuma bho netu mokunughiom, parōoy aJu ilo ịḍua tebhugh obhꞌEsia iru, pịmiin mạPol totu iikpulughu obho. Peedi igun mobꞌọlogh arōoy ịbham mạPol, ²⁸nemulughu kua, “Arōoy Izirẹl, itu mẹlogh ạvo! Oobho ōoy obho ạghi kesi kesi nạtughumiom kōoy kōoy mịkarabh milo igboloman nꞌarōoy Izirẹl, nꞌaraalōgh obho taMozis, nꞌotu iikpulughu obhobho. Esiibha odi kapin rōoy ilo ilōghōm io mẸnaan kạloghom mi totu iikpulughu obho, ạpue mesi iigbia bhobho!” ²⁹(Eedi ịkpete miibha bho mebum obho eedi nẹemiin mạTrofimos obhꞌẸfesos nꞌạPol mi tẹma bho, peedi ịitua ighōl mạPol naabhin zodi aḍighom totu iikpulughu obho.) ³⁰Oomo ẹma bho naazighina, molo oomo arōoy ighilighu iikōbhōghian monyiin esi, ibhum mạPol ịghogh imutiom totu iikpulughu obho. Tonyiin amen obho peedi ịḍuughiiy ruguugh otu iikpulughu obho. ³¹Arōoy ịkarabh iloghi obho neḅe ghạ mẹzo oghigh odi ạPol, mamen urōm ụghi ụgba ụnogho muvẹmụ ōoy ẹgham obhꞌaRom moomo aJerusạlẹm nẹpozuan. ³²Tonyiin amen obho podi arōm rōoy oḍighi odi nꞌibha ẹgham obho, ighiil ịghi tesi obho noḅe bho. Amen arōoy obho ịmiin zodi nꞌarōoy ẹgham obho, peedi ịḅele moḍul odi. ³³Uvẹmụ arōoy ẹgham obho akẹm ạghi tạPol, aḅol odi ạto ạnogho rōoy odi mọkasiom odi mịzal agbirigbiri, keḍio odi apuruan kua, “Oobho kokōr ōoy? Odi aḍighi meeghe?” ³⁴Ẹde mi tọlogh arōoy obho nẹgba kẹre, ịnon kẹre. Obꞌẹmoghonyan ẹrol magey molo uvẹmụ arōoy ẹgham obho otue ḍio molōghōm ạkar ạar obho amute bho; molo odi arōm rōoy odi mobhin ạPol ọghi ọduom. ³⁵Eedi isi tesi obho nọoda ghạ ọsiin obho, peedi irōol mạPol ebum obho arōoy ịkarabh iloghi obho neelegheri nẹtaal. ³⁶Oomo eedi netu todi nꞌimulughu nekōl kua, “Kigh odi! kigh odi!”

Ilo ạPol ạbhagharana zeedi

³⁷Ẹzo bho eedi netu mọduom odi obho, podi ạkpete ạnogho muvẹmụ obho, “Sesen ạami ụkpete mạar ụnogho ạna!” Podi apuruan kua zodi, “Ạna nạkpa ghạ ni mọnu aGris? ³⁸Pạna ōoy obhꞌIzipt ḍio, obho tamen olo neetẹn, aru arubhe lisian akpo modiin ọonir arōoy ẹgham aḍighom tobꞌeekpu eḍum ọosaar obho ḍio?” ³⁹PạPol ạbhagharana kua, “Ạami ōoy aJu. Ụmar ạami tạTasos obhꞌaSilisia. Oōy olꞌugey ẹma. Sesen ni, ḅẹle ạami ụkpete mạar ụnogho rōoy obho.” ⁴⁰Puvẹmụ obho ạnogho zodi mịikpo, keḍio ạPol aḅetunu ạmara tạnyu esi obho nọsiin ghạ bho, aabhaghami rạvo odi ạnogho rōoy obho. Amen eedi iru iḅa podi ạkpete mọnu aHibru ạnogho zeedi aghōl kua:

¹“Ẹma, ạburude, nꞌaburumōr, ịmoghon mibhꞌọnu ạmi, nꞌịigbaay ibhꞌạmi.” ²Amen eedi ịmoghon mibha odi nạkpete mọnu aHibru obho, peedi ịmaar iḅa ịrologhu bịrim; keḍio ạPol aḅẹtōn:

³“Ạami ōoy aJu. Ụmar ạami tạTasos obhꞌaSilisia, keḍio uukō zạmi mi tesuo aJerusạlẹm kọony ịtughumiom taGameliel. Ọmaar ọtughumiom ạami maraalōgh ạburude ezira, molo ạami ụnogho lōor ạmi mẸnaan koomo enyina ibha idi suo dodon obho. ⁴Ạami ụnogho mịiḅaghami ạze mobo bho nẹtuonom mEbōom obhobho obho, aḅologh ạkasiiy milobhir nꞌạraani ạlokioghom mikoli. ⁵Uvẹmụ ōoy iiḅua bho nꞌạruula ạkoti obho tetue ni ẹgba ạami emutiom mi tiibha bho. Ạami abhin teedi mịbhereer ilo ọghi taburumōr aJu ibhꞌạDamaskos, molo ạami kạghi kaḅologh rōoy bhibha, kạduoghom kabhin kamulumi taJerusạlẹm molo ọliom eedi.”

ẠPol ạgba mẹzo odi aghiraan amōruōm maKraist

⁶“Ẹzo bho ạami nạki natuan tạDamaskos, bho aḍio nạaḍian ịzal abin, pazuḅa ọpuuny obꞌẹḅaal ạḍua tạnyu obho asōorōm ạami. ⁷Pạami umeel tade bho, ụmoghon moghōrōkō nạkpete kua ạnogho ạami, ‘ẠSol, ạSol! Eeghe kạna nạnogho ạami mibꞌịiḅaghami bhibha?’ ⁸Keḍio ạami ụbhagharana kua, ‘Obumọogh, ạna kokōr ōoy?’ Keḍio odi ạbhagharana kua, ‘Ạami ạJizos obhꞌạNazaret, obho ạna nạnogho mịiḅaghami obho.’ ⁹Obo bho nẹtuonom ạami obho nẹmiin mẹḅaal obho keḍio ịmoghon io moghōrōkō odi obo bho nạḍeghe atuom ạami obho. ¹⁰Keḍio ạami upuruan kua zodi, ‘Obumọogh, ạami uḍighi ẹko?’ Keḍio Obạmọogh obho ạbhagharana kua, ‘Ḅetunu mạghi tạDamaskos, tepa pọgba ọnogho onuma milo Ẹnaan nạato milo ạna taḍighi.’ ¹¹Ạami umina ḍio ạmiin mạar mebum ẹḅaal obho asōorōm ạami obho, pobo bho ogbo ạmi ịbham rạvo ạmi ireliom ạami ịghi tạDamaskos.

¹²“Kir ōoy olo ughōl Ạnanayas, ōoy tẸnaan olo nakiilaan magey maraalōgh obhꞌezira, olo oomo arōoy ibhꞌaJu obho idi tạDamaskos obho nekiilaan magey. ¹³Odi aru tạmi ạmaruom ạami ạkpete kua, ‘Umōr ạSol, ariḍien onuma ẹkparanu!’ Tonyiin odi amen opopo pạami umina ụke mọmiin ạar, ụrol ubhōgha zodi. ¹⁴Podi ạkpete kua, ‘Ẹnaan ạburude ezira nạason ạna ạseghe molōghōm ibhꞌịto odi, ọmiin Ooḅi Ọony-otu bhꞌodi, nꞌọmoghon mobho odi abhin moghōrōkō bhꞌodi nạkpete ạnogho ạna. ¹⁵Ạna obo tạgba ạnogho zodi ạnogho moomo arōoy mibha ạna ụmiin ụmoghon obho. ¹⁶Esiibha kạna naḅōrō meeghe? Ḅetunu mazua mụum, aatōla mịkarabh obhꞌonuma mi taḍien obhꞌodi.’ ”

Ẹzo ubheleghi mạPol mọgba ooḅi adōm obho ọnogho arōoy ịnon aruubhugh obho

¹⁷“Keḍio ạami umula ụghi taJerusạlẹm naakpulughu mi totu iikpulughu obho pạami ụmiin ghịiny. ¹⁸Tạghiiny obho, pạami ụmiin mObạmọogh obho ạkpete kua ạnogho ạami, ‘Kẹm siibha siibha mạḍua taJerusạlẹm. Arōoy bhibha irue ḍio ebhinom ịigbaay onuma tibha igboloman nꞌạami obho.’ ¹⁹Keḍio ạami ụbhagharana kua, ‘Obumọogh, eedi nẹemaar elōghōm mobho ạami ụghi ghạ tarutu ịtughumiom obho uḅologh uḍulogh rōoy obo bho imōruōm ạna bho. ²⁰Amen obho ughigh bọ maStivin obo bho ạgba bọ mooḅi adōm obho ạnogho enyina, ạami nịvo nịvo ụrol ạni ạmiin mịikom enu obhꞌodi, ạbhamagh nạ rukpe ịikom enu obho.’ ²¹Keḍio Obạmọogh obho ạkpete kua ạnogho ạami, ‘Kịa, ạami tatōm ạna, ạna ạki tạraama aruubhugh obho ilōghōm io mẸnaan obho.’ ”

²²Arōoy obho ẹmaar nẹneghanyan zodi ninii odi ạkpete miibha bho; keḍio tẹke momina omulughu tạruumu eedi nekōl kua, “Sẹghe zodi mạḍuonom. Kigh odi. Odi ogbẹbh io moḍum aghuḍum.” ²³Eedi nemulughu, ẹpibh rukpe eedi, ekpooy nạ mibhugh etōḅōl mi tạnyu obho. ²⁴Uvẹmụ iḅe rạagham obhꞌaRom ạnogho mịnyaam rōoy odi mobhin ạPol ọghi ọduom, nꞌọgurogh odi ọva ọmiin ạar obho aḍighi bọ karōoy aJu obho nemulughuom kua zodi obho. ²⁵Eedi iru ịghoroghi zodi netu mọgurogh, podi ạkpete kua ạnogho muvẹmụ obo iḅōrō bho, “Ọkpe olo mọgurogh ōoy ogbo eghun aRom olo dọva ḍio ọmiin mobho odi aḍighi ạpiom obho gạ?” ²⁶Amen odi obo iḅōrō bho ạmoghon miibha bho, podi aghiil ạghi tuvẹmụ iḅe rạagham obho apuruan kua, “Ạna naḍighi ẹko? Oōy obho olꞌogbo eghun aRom!” ²⁷Puvẹmụ obho ạghi tạPol apuruan kua zodi, “Kạr ạgba mạnogho ạami, ạna ōoy ogbo eghun aRom?” PạPol amōrō mu, “Ii.” ²⁸Puvẹmụ obho ạkpete kua, “Ạami ụkpe mịkanya ikpoki karu molꞌaRom.” PạPol ạbhagharana kua, “Ụkar ụmar ạami mōoy ogbo eghun aRom.” ²⁹Tonyiin amen opopo, pobo bho netu mopuruan ạPol miipuruan obho ịkporion rạvo eedi; odi uvẹmụ obho aruugu nesibh suo odi nạamoghon mobho ạPol aru mōoy ogbo eghun aRom obho, nꞌobho odi nạaghi ạkasi zodi obho.

Ịigbaay tạPol mi tạkoti obho

³⁰Odi uvẹmụ obho ạkar kua nạva molōghōm ibha arōoy aJu obho nẹgbaam ạPol obho; molo ạḅaal, podi ạkarion marigbirigbiri obho tạPol, ạto abheleghi maruvẹmụ arōoy iḅo miiḅua bho nꞌạruula bho mosōor. Keḍio odi abhin mạPol aru togbo eedi.

¹ẠPol ạmaar aanon tasumusigh arōoy ạkoti obho ạkpete kua, “Aburumōr ạmi! Ologhi ạmi ạneghe ni ạman nꞌoomo aghuḍum obhꞌạmi mi taghisigh tẸnaan ninii kạkar aḍuma bhobho.” ²PẠnanayas uvẹmụ arōoy iḅo miiḅua bho ạkpete ạnogho mobo bho ịmara ituan mạPol obho moḅōr odi mi tọnu obho. ³PạPol ạkpete kua ạnogho zodi, “Ẹnaan tạkar ni aḅōr ạni ạna — sọo ạna ạganeghe! Ạna ụrol suo mọseghe araalōgh obho ọgba obhumeni ạmi, keḍio ạna digha apẹl molōgh obho morōm ōoy kaḅōr ạami!” ⁴Obo bho ịrol ituan mạPol obho ịkpete kua ịnogho zodi, “Ạna nạkpete kua mịkarabh muvẹmụ oḅo miiḅua tẸnaan!” ⁵PạPol ạbhagharana kua, “Ạami ulōghōm io, aburumōr ạmi, mobho odi aru muvẹmụ obo miiḅua bho. Ẹegia bho ạkpete kua, ‘Ụkpete ghạ mịkarabh mobo bho ạda moomo arōoy enyina bho.’ ”

⁶Amen ạPol ạmiin mobho ẹde arōoy obho iru milꞌogbo aSadusi obho, ẹde iru milꞌogbo aFarisi obho, podi abheleghi mạkoti obho ạkpete kua, “Aburumōr ạmi, ạami olꞌogbo aFarisi obho, ọony ogbo aFarisi obho nạ. Uru tesuo mosōbh ạraakpe ọnogho ạmi mebum obho ạami useeriom ologhi ạmi mobho iḍim obho temula ni taghuḍum!” ⁷Ẹzo bho odi ạkpete kua be, parōoy aFarisi nꞌaSadusi obho ịke mọruanogh, ịḍian nạ. ⁸(ASadusi obho nekōl ghạ kua, miḍim iḅerenu mu tọbho bho, itelema tẸnaan nꞌạruumugh ẹkona ilo; aFarisi obho imōruōm ni moomo iibha.) ⁹Poghur imulughu obho ịsiin tạnyu, keḍio ẹde obo ịtughumiom araalōgh obho ibha iru milꞌogbo aFarisi obho iḅetunu nesi magey nekōl kua, “Ezōor ụmiin io bọbon onyiin ạar olo ōoy obhobho aḍighi akōrōnuan! Ụmar io suo ẹmugh bolobolo otelema tẸnaan nạaḍeghe nạ ạnogho zodi magey!”

¹⁰Pịkanan obho ịsiin mịkanya molo aruugu isibh muvẹmụ iḅe rạagham obho molo kọveleghi mạPol. Podi arōm mọlogh arōoy ẹgham odi moḍigh ọghi ọseghe ạPol mi teedi ọghi ọduom.

¹¹Aḍio aru agul, pObạmọogh obho aru ạmaranuan mạPol ạkpete kua, “Pạm ologhi onuma! Ạna nạagba ạami mi tesuo aJerusạlẹm, ạna tạgba nạ ni nạ monyiin ẹzo bho mi taRom.”

Ẹzo arōoy iḅia moghigh ạPol

¹²Ạḅaal pẹde arōoy aJu obho iikōbhōghian monyiin esi iḅia ighir ịzo, meedi ile ḍio ẹbhoghol bọbon ạar tughuneen molo eedi neeghigh mạPol nolo. ¹³Oomo eedi erubal arōoy bho ighiran mịzo bho. ¹⁴Peedi ịghi taruvẹmụ arōoy iḅo miiḅua bho nꞌarukenya bho, ịkpete kua, “Ezōor nooghiran mịzo mọḅele ole eḍian tughuneen molo ezōor nooghigh mạPol nolo. ¹⁵Esiibha bho enyina nꞌạkoti obho itōm mọnu mẹghiom uvẹmụ iḅe rạagham obhꞌaRom, odi abhin ạPol aruom enyina. Meḍighi kolo enyina netu mọmaar ọva ọmiin tilo igboloman nꞌọkpe bhꞌodi. Ezōor nọomara noḅōrō moghigh odi tebōom obho.”

¹⁶Oomo ipa bho ọony ụmarani tạPol nạamoghon; podi aghiil ạghi tikoli obho ạgba ạnogho mạPol. ¹⁷PạPol abheleghi monyiin obo iḅōrō bho ạkpete kua ạnogho zodi, “Pin mọbam ọony obhobho mabhin ạghiom muvẹmụ obho; kir ạar olo odi ạteeny mọḍeghe ọnogho odi.” ¹⁸Podi obo iḅōrō bho abhin mọony obho ạghiom uvẹmụ obho ạkpete kua, “ẠPol ōoy ikoli obho abheleghi ạami ạkpete ạnogho ạami mobhin ọony obhobho oruom onuma, modi kir ạar olo ạteeny mọḍeghe ọnogho onuma.” ¹⁹Podi uvẹmụ obho abhin odi ạbham odi tạvo ạghi apuruan zodi, “Ạna ụteeny meeghe mọgba ọnogho ạmi?” ²⁰Keḍio odi ạkpete kua, “Ạruula aJu obho neeḍigh mezue molo ạna kabhin mạPol karu totu ạkoti obho meḍie, mopu oghōlōm mạkoti obho netu mọva omutiom ạkar agey obho mi tilo igboloman nꞌodi. ²¹Ụmoghon ghạ zeedi. Tegbẹbh ni merubal arōoy mobho nẹeḅokia neḅōrō zodi. Eedi neeghiran mịzo mọḅele ole bolobolo ọbhoghol tughuneen molo eedi neeghigh mạPol nolo. Eedi nẹemara neḅōrō moḍighi oḍighi obhobho, keḍio neḅōrō mọmoghon ibhꞌologhi onuma.” ²²Puvẹmụ obho ạkpete kua, “Ụgba ghạ mạnogho bọbon ōoy maghōl ạna nạagba miibha bho ạnogho ạami.” Keḍio odi ạkpete ạnogho mọony obho moghẹel.

Ubhin ạPol ọghiom maFiliks

²³Keḍio uvẹmụ iḅe ạraagham obho abheleghi mịzal arōoy oḍighi odi ạkpete kua, “Ịseghe mōogh ạraala iḅe rạagham meekōbhōghia mọghi taSizaria, ịpamam nạ merubal nꞌaḍisibh ḍiōbh arōoy ilo nekiilom mạrusu, nꞌōogh ạraala arōoy ịsobh, meekōbhōghia moḅetunu tesughō asuo uḍugul obho. ²⁴Ịnogho ạni mạPol mạrusu ilo tepin ni odi esiom taFiliks ạgovono bho, tẹzo olo bọbon ạar ọteeny io zodi.” ²⁵Keḍio odi uvẹmụ obho aru ạge mọbhereer obhobho ạfirimiom:

²⁶“Ạami ạKlodios Lisias ụge natuom aFiliks ạgovono bho. Mẹeḅaal.

²⁷“Arōoy aJu obho ịbham mōoy obhobho eru moghigh odi. Nẹgbaanan kilo odi ōoy ogbo eghun aRom, pạami ubhin rōoy ẹgham ạmi ụghi ụbhel odi utughuneen. ²⁸Ạami ụva mologhōm agey obho mi tibha noḅologhiom odi obho, pạami ubhin zodi ụghi totu ạkoti obhꞌeedi. ²⁹Ạami ụva ụmiin, odi doḍighi ḍio bọbon ạar olo kọtuan koghigh bolobolo kọloghom zodi mikoli. Ọkpe bho nọgbaam odi obho igboloman nꞌiipuruan araalōgh eedi. ³⁰Amen ạami uḅughula umutiom mobho eedi neḅia moghigh odi, pạami ụutua mobhin odi oruom onuma. Ạami nạagba ạnogho mobo bho nẹva zodi obho moru tonuma.”

³¹Parōoy ẹgham obho ịtuugh nạ mẹzo bho iḍighi. Peedi ibhin mạPol isiemi kẠntipatris. ³²Ạḅaal parōoy ẹgham ibhꞌavel obho imula, keḍio obo bho iḍikuuy tạrusu obho nꞌodi inyeeneni. ³³Eedi ibhin odi ịghi taSizaria ịnogho mọbhereer obho mạgovono bho, ibhin mạPol ịlogh tạvo odi. ³⁴Odi ạgovono bho aru aghōl mọbhereer obho, papuruan mạPol mebhugh odi. Amen odi aru ạmoghon mobho odi aru molꞌaSilisia, ³⁵podi ạkpete kua, “Ạami tạmoghon mịigbaay onuma mamen obo bho nẹgbaaghiom ạna bho neeru.” Podi ạto aghōl mọloghom oḅōrō mạPol mi totu tạHerod.

Arōoy aJu obho ikooniom ạPol

¹Tesi ōogh aḍuma, pẠnanayas uvẹmụ oḅo miiḅua bho atẹn ạghi taSizaria nꞌẹde arukenya nꞌonyiin ọgba raalōgh obho olo ughōl ạTatulios. Eedi ịghi ịmara taghisigh taFiliks ạgovono bho ịnogho mịigbaay ibhꞌeedi mi tọkpe bho tạPol. ²Keḍio eedi imutiom ạTatulios ạke mọgbaaghiom iibha mạPol:

“AFiliks obo ạda zezōor! Tẹzo bho olōghōm ạar ereliom obhꞌonuma neeḍighi molo ezōor nọorol tọpuuny obꞌọodoony ekima, nꞌolo ọkpo neenweeghian nạ mịkanya mi tebhugh obhꞌezōor. ³Ezōor nobuom miibha bho magey moomo amen, molo ezōor ẹkona nobuom nạ zịna magey. ⁴Ạami ụva ḍio mobhiẹmi amen onuma oomo ipa ẹkona, ụle ghạ, deny mạmoghonyan mi tịbam ịigbaay ibhꞌezōor. ⁵Ezōor nọva ọmiin mobho ōoy obhobho aru mịkpakpa nꞌịnunu ōoy; natubheey ghạ rạagham mi tarōoy aJu obho mi toomo ẹmar-arōoy obho; odi ẹkona obo akpo atẹnōm mogbo arōoy obhꞌạNazaret. ⁶Odi ạva nạ mọpueghi otu iikpulughu obho, keḍio ezōor uḅol odi. [Ezōor ụva ghạ mọseghe araalōgh obhꞌezōor ọru ịiruan obho ọnogho odi, ⁷paLisias uvẹmụ arōoy ẹgham obho aḍigh nꞌẹbhooru aru ạseghe zodi mi tezōor amutonom. ⁸Keḍio odi aLisias ạto aghōl mobo bho nẹva zodi obho eru tonuma.] Erumolo ạna upuruan zodi ōoy obhobho, pạna nịvo nịvo ọva nạ mi todi ọmiin ibha ezōor nọgbaam odi obho.” ⁹Parōoy aJu ipedi obho iḍumom, mibha odi ạgba bho agey agey.

Ịigbaay tạPol mi taghisigh taFiliks

¹⁰Keḍio ạgovono bho ạnwaaghi rạvo molo ạPol karu kạgba ạni, keḍio odi ạPol aḅetunu ạkpete kua:

“Ạami naalōghōm mobho ạna nạarol mi tạgada osōbh ạraakpe mi tebhugh obhobho ubia, molo ologhi ạmi nạḅaal magey mọmara ọgba ọkpe bhobho ọnogho onuma. ¹¹Ạna tatue ni ạva ạmiin nꞌalōor onuma mobho depu ḍio maḍiōbh nꞌịzal aḍuma suo ạami ụḍua uru taJerusạlẹm mookpulughu. ¹²Eedi arōoy aJu obho ịmiin io mobho ạami nạkanan mōoy mi totu iikpulughu obho, eedi ịmiin nạ ḍio mobho ạami urubhe melebhir nꞌarōoy obho, eedi ịmiin nạ ḍio mobho ạami naḍighi mipa mi tarutu ịtughumiom obho bolobolo tonyiin esi mi tẹma bho. ¹³Eedi ẹkona ịteeny io mạar ọgba omutiom ọnogho onuma mi tibha eedi nẹgbaam ạami obho. ¹⁴Ạami amōruōm iibha bho nạnogho ạna: ạami naakpulughu mẸnaan ạburude bhꞌezōor, nạtuonom mEbōom obho, obho eedi nekōl mọneghe ḍio bho. Ạami ẹkona amōruōm mi toomo ibha ụge bọ mi taraalōgh obho taMozis nꞌịbhereer arizil obho. ¹⁵Ạami ụteeny monyiin oḍuom ologhi obho ạkar eedi ịteeny nạ bho, obho ughōl kua mu kōoy kōoy, iiḅi nꞌịkarabh obho, teḅerenu ni mi tọbho bho. ¹⁶Ipa kiḍighi molo ạami ụseghe moomo ịnyaam ạmi mọteeny ooḅi ologhi mi tẸnaan nꞌarōoy.

¹⁷“Tamen olo ạami nạaḍua mi taJerusạlẹm mịkanya ạsumusia, pạami ụseghe mikpoki mọghi ọnogho ạkar arōoy obhꞌạmi, nꞌoḅo iiḅua ạar iigbia bho. ¹⁸Iibha pibha ạami naḍighi bho eedi ịmiinom ạami mi totu iikpulughu obho, tamen olo ạami naḍighi agbẹbhẹghi mi tiiḅua ọḅaaleni alōor obho. Ọlogh arōoy ịrolan io nꞌạami, koghōl ẹmoghonyan ẹrol. ¹⁹Tamen opopo, kir arōoy aJu ibhꞌebhugh obhꞌEsia; eedi nịvo nịvo kitu ạni ẹmara taghisigh onuma ẹnogho mịigbaay ibhꞌeedi, erumolo eedi ịteeny mạkar ạar olo ọgbaam ạmi! ²⁰Bolobolo ịḅele eedi obo bho idi suo bho ẹgba mịkarabh ibha eedi ịva ịmiin bho ạami uḍighi men obho ạami ụmaranuan nꞌạkoti obhꞌeedi obho, ²¹tughuneen monyiin ạar obho ạami ụkpete men obho ạami ụmara togbo eedi obho ḍio, obho ạami ughōl: ‘Enyina netu mosōbh ạraakpe ọnogho ạmi dodon mebum obho ạami umōruōm mobho iḍim teḅerenu ni tọbho bho mi taghuḍum.’ ”

²²Keḍio aFiliks obho nạamaar ạmoghonyan milo igboloman nꞌEbōom obho, aru aghuughi mịimoghon ọkpe bho, ạkpete kua ạnogho zeedi, “Ạami tạatua ni mọkpe bho enyina tamen olo aLisias uvẹmụ arōoy ẹgham obho naaru.” ²³Podi ạkpete ạnogho mobo bho taḅōrō mạPol obho, mọduom odi mi totu iḅōrō bho, ọnogho odi mịikpo olo ạburubulol odi kebhin ghạ keruom zodi kạar kạar olo odi nagbẹel.

Ụmarami mạPol mi taghisigh taFiliks nꞌaDrusila

²⁴Ịbam aruḍuma itẹn, paFiliks ạḍua aru nꞌaDrusila ạni odi. Odi ạni obho olꞌaJu. Keḍio odi arōm ạghiom ạPol moru, keḍio ạmaar nạmoghonyan mibha ạPol nạgba milo igboloman nꞌologhi omōruōm mi tạJizos Kraist. ²⁵Ẹzo bho odi ạgba ninii ạghi ạgbaam milꞌoḍighi iiḅi, nꞌọkparaghiom alōor, nꞌaḍuma ịiruan obho natu obho, paruugu nesibh maFiliks keḍio ạkpete kua, “Ọkpe olo, kịa. Ạami tamina ni apeleghi ạna men ạami ụteeny men.” ²⁶Odi nạatua ghạ nạ mobho ạPol tạnogho ni zodi mikpoki; tipa bẹleni podi abheleghi ghạ zodi moomo amen mọḍeghe ghạ nꞌodi.

²⁷Ịzal ạsia itẹn, pạPosios Fẹstos ạseghe mesi taFiliks kạgovono bho. AFiliks ạva mọteeny ooḅi aḍien mi tarōoy aJu obho, podi ạḅelemaan mạPol mi tikoli.

ẠPol abhin ọkpe bho ạghi tọolema bhꞌaRom

¹ẠFestos aru tebhugh obho ịraar aḍuma itẹn, podi ạḍua taSizaria ạghi taJerusạlẹm. ²Tepa paruvẹmụ iḅo miiḅua bho nꞌarukenya aJu obho ịituemi zodi mọkpe eedi nꞌạPol. Peedi iikpulughian mạFestos ³mọlogh ạvo ọnogho eedi, obhin ạPol omulumi taJerusạlẹm, ebum obho eedi neeḍigh mezue ịḍeghe moghigh odi mi tebōom. ⁴PạFestos ạbhagharana kua, “Nooseeri mạPol kōoy ikoli mi taSizaria, ạami natu nạ momula esiibha tepa. ⁵Ịto marukenya enyina ẹtuonom ạami ẹghi taSizaria ẹnogho mịigbaay enyina ilo igboloman nꞌodi, erumolo odi naaḍighi mạar ạpionuman.”

⁶Odi ạFestos ạrolan eedi mịnon esi aḍuma olo tegbẹbh ni mạbhenya bolobolo aḍiōbh aḍuma keḍio atẹn amula taSizaria. Ạḅaal podi ạrol delede mi tẹtolom ạkoti obho arōm mobhin ạPol oru. ⁷Ubhin ạPol oru, parōoy aJu ibha ịḍua bọ taJerusạlẹm iru obho, iḅerenu ịmara ikō zodi ikiton, ịke mọgba oḍigh kẹrekere ọkpo aruugu ịḅam tẹmu odi, ilo eedi itue ḍio mọkar ọgba agey obho omutiom. ⁸PạPol ạgba mibhꞌodi aghōl kua, “Ạami doḍighi ḍio mạar akōrōnuan milo igboloman nꞌaraalōgh aJu obho bolobolo otu iikpulughu obho bolobolo ọolema obhꞌaRom.” ⁹ẠFestos nạva ghạ moru ooḅi ōoy mi taghisigh arōoy aJu obho, podi apuruan kua mạPol, “Teḍighi ni tologhi onuma mọghi taJerusạlẹm ọgbaaghian eedi mi tibha ụgba ụḅam tẹmu onuma bho ọnogho ạmi mi tepa gạ?” ¹⁰PạPol ạbhagharana kua, “Ạami ụmara suo asōmōghan mọola ạkoti aRom, ạkar esi mobho ạami tamina ạki ạgba. Ạami doḍighi ḍio mịkarabh marōoy aJu obho, kẹzo bho ạna nịvo nịvo nạamiin ạni nạ bho. ¹¹Erumolo ạami naapẹl maraalōgh obho, uḍighi mịkarabh ilo ịgbaan milo ạami kạbho, ạami uusen io molo kọḅelemaan ạami. Kerumolo agey ilo tịigbaay obho eedi neḅologhiom ạami obho, bọbon ōoy olo tatue ạseghe zạmi ạlogh tạravo eedi olo. Ạami naabhin mọkpe bho ạki taRom.” ¹²Keḍio ạFestos, tamen olo odi naaḍighom mezue nꞌarōoy odi, podi ạkpete kua, “Ạna naabhin mọkpe bho ạki taRom; taRom pesi ạna tạki nạ.”

Ụmarami mạPol taghisigh tẠgripa nꞌaBanis

¹³Ịbam amen iru itẹn, pẠgripa ọolema bho nꞌaBanis ụmarani odi iru taSizaria mobheleghian ạFestos. ¹⁴Eedi ịrol mịbam aruḍuma, pạFestos ạgba mibha tạPol ạnogho mọolema bho aghōl kua, “Kir ōoy olo odi suo mikoli olo aFiliks ạloghom ạḅele ạḍua; ¹⁵amen ạami ụghi taJerusạlẹm, paruvẹmụ iḅo miiḅua ibhꞌaJu obho nꞌarukenya bho ịnogho ạami mịigbaay ibhumeni zodi, negbẹel ạami moghigh odi. ¹⁶Pạami ụkpete kua ụnogho zeedi ughōl, ilo teḍighiom ạar arōoy aRom mọseghe ōoy olo ughōl aḍighi mịkarabh molo kọliom odi tamen olo odi dọgbaaghian io nꞌobo bho nẹgba zodi mọkpe bho. ¹⁷Tipa bẹleni, eedi iru, ạami utōbh io men, molo ạḅaal be pạami ụrol delede tẹtolom ịiruan ạkoti obho, urōm ubhin zodi ōoy obho uru ụloghom. ¹⁸Obo bho nẹgbaaghian nꞌodi obho iḅetunu, irue ḍio mọgba bọbon ịkarabh ibha ạami ụutua bho eedi kịgba ẹḅam tẹmu odi obho. ¹⁹Oomo ibha eedi ịbham obho, pịkanan ilo igboloman nꞌiikpulughu Ẹnaan nꞌaḍien onyiin ōoy olo ughōl ạJizos, olo nạabho keḍio ạPol nạgba ghạ modi siibha nꞌaghuḍum. ²⁰Ạami ụteeny io mịitua ẹzo olo ọva ạkar agey obho mi tọkpe bhobho, pạami upuruan mạPol merumolo teḍigh ni tologhi odi mọghi taJerusạlẹm ọgbaaghian eedi tepa. ²¹Kpẹlen nꞌipa, pạPol abhin mọkpe bho ạghi taRom, nꞌoseeri odi totu ikoli iḅōrō bho molo ọolema aRom kasōbh mọkpe bho kạnogho zodi. Pạami ụnogho mịnyaam moseeri odi mi totu iḅōrō bho ninii ạami tatōm rōoy epin odi ẹki tọolema bhꞌaRom.” ²²PẠgripa ạkpete kua ạnogho mạFestos, “Ạami nịvo nịvo kụmoghon ạni ni mịigbaay odi ōoy obho.” PạFestos ạbhagharana kua, “Eḍie pạna ọmoghon ibhꞌọnu odi.”

²³Ạḅaal pẠgripa nꞌaBanis iru nꞌobꞌọbughia alōor nꞌeghuan ibhꞌọolema bho, iḍigh totu ạkoti obho. Aruvẹmụ iḅe rạagham obho nꞌarukenya ẹma bho ịtuonom eedi iḍigh nạ. PạFestos ạnogho mịto bho, pubhin mạPol uru ụloghom. ²⁴Keḍio ạFestos ạkpete kua, “Ạgripa, ọolema bho, nꞌoomo arōoy obho idi suo nꞌezōor obho, enyina nẹmiin mōoy obhobho, obho oomo arōoy aJu ibha idi suo nꞌaJerusạlẹm neebhin mịigbaay ilo igboloman nꞌodi etuom ạami. Eedi nemulughu ghạ mịgbaan io molo odi kaḍum. ²⁵Ạami utue ḍio mọva ọmiin ạar olo odi aḍighi molo koghigh odi. Kodi nịvo nịvo naabhin mọkpe bho ạghi taRom obho, ạami nạva nạ mobhin odi ọghi. ²⁶Keḍio ạami ụkar io ạteeny mạar olo ạami kabhin kạge kạghi taRom. Molo ạami naabhin zodi uruom enyina — ạkar onuma Ạgripa ọolema bho — molo amen ezira nọova ọmiin mọkpe bho, ạami ạteeny mạar olo ọge. ²⁷Tạmi, iibha oḍighi obꞌeema, mobhin ōoy ikoli ọghiom ọnon ōoy olo ụmaar io ọgba mạkar ạar obho nọgba bọ tẹmu odi obho.”

Ịigbaay tạPol mi taghisigh tẠgripa

¹Keḍio Ạgripa ạkpete kua ạnogho mạPol, “Nọonogho ạna siibha mịnyaam mọgba nꞌalōor onuma.” PạPol aabhaghami rạvo odi aḅetunu ạgba miibha bho:

²“Ạgripa ọolema bho! Ạami nabo magey mọmara aadon ọnogho onuma mịigbaay ạmi mi toomo ibha arōoy aJu obho nẹgbaam ạami obho. ³Ibha ạami nạḍeghe suo bho agey, tebum obho ạna nạamaar ulōghōm moomo eḍighiom ạar nꞌiipuruan arōoy aJu obho. Ạami nagbẹel ạna siibha bho mobhin talideny alōor ọmoghonyan ạmi.

⁴“Oomo arōoy aJu obho neelōghōm mẹzo aghuḍum ạmi kamen ạami odi ni mịbam. Eedi neelōghōm kọḅel egbiom obho mẹzo ạami urugh moomo aghuḍum ạmi mi tebhugh obhꞌạmi nꞌaJerusạlẹm. ⁵Eedi neelōghōm, nẹmiin ghạ ni nạ, erumolo eedi temōrō ni etu ẹgba magey obho, mobho kọḅel egbiom obho ạami uḍigh ạni mogbo arōoy aFarisi obho, obho ibhin bọ maraalōgh arōoy aJu obho irōol tẹmu obho. ⁶Keḍio esiibha bho ạami ụmara suo mosōbh ịiruan ọnogho ạmi tebum obho ạami ụteeny oḍuom ologhi mi toguan obho Ẹnaan aguan mạburude ezōor obho, ⁷ạkar odi oguan obho oomo aḍiōbh nꞌịzal arughun otu arōoy obho ezōor neḍuom nạ mologhi mọteeny ạni, tẹzo bho eedi neekpulughu mẸnaan muḍugul nꞌootaany obho. Ọolema, ụtuan tebum odi oḍuom ologhi obhobho karōoy aJu obho ẹgba neḅologhiom ạami! ⁸Ebum eeghe karōoy aJu obho irue ḍio momōruōm mobho Ẹnaan naḅẹriōn mobo bho nẹebho bho?

⁹“Ạami nịvo nịvo ụva ghạ ni kạar kạar olo ạami tatue ni aḍighi, moḍighi obhiẹmi aḍien obho tạJizos obhꞌạNazaret. ¹⁰Ipa pibha ạami ụrol uḍighi mi taJerusạlẹm. Ạami ubhin mịnyaam mi taruvẹmụ iḅo miiḅua bho, ạloghom mọlogh arōoy tẸnaan mi tikoli; nꞌobho tamen olo usōbh ụnogho mọze eedi, ạami umōruōm ạni nạ. ¹¹Ịkanya amen mobho ạami ụlioghom zeedi mi tarutu ịtughumiom obho, ụva ghạ moḍighi eedi kegin keghiraan tologhi omōruōm obhꞌeedi. Ẹgam ạami magey molo ạami ụghiighu tạraama ịnon aruubhugh ụnogho zeedi mịiḅaghami.

ẠPol ạgba mẹzo odi aghiraan amōruōm maKraist

¹²“Tebum eedi iibha bho, pạar obho ạami ụghi tạDamaskos mi tịnyaam nꞌịto aruvẹmụ iḅo miiḅua bho. ¹³Bẹle, ọolema! Tebōom obho, mogbo ootaany obho, pạami ụmiin mobꞌẹḅaal olo ạḅaal apu mẹḅaal aghōzōgh obho, ạḍua tạnyu obho aru akō ạami akin akiton, nꞌarōoy obho nẹtuonom ạami obho. ¹⁴Poomo ezōor umeleghu tade bho, keḍio ạami ụmoghon moghōrōkō nạkpete kua ạnogho ạami mi tọnu aHibru, ‘ẠSol, ạSol! Ebum eeghe kạna nạnogho ạami mịiḅaghami? Ẹegama ilꞌonuma mọzologh ạkarana.’ ¹⁵Keḍio ạami upuruan kua, ‘Ạna kokōr ōoy, Obumọogh?’ Keḍio Obạmọogh obho ạbhagharana kua, ‘Ạami ạJizos obo bho ạna nạnogho mọmiinom obho. ¹⁶Keḍio ḅetunu siibha mạmara. Ạami umutenaan ạna mọto onuma kẹbana ạmi. Ạna tạgba mibha ạna ụmiin tạmi dodon obho ạnogho mịnon arōoy, nꞌibha ạami taḍeeriom ạna. ¹⁷Ạami tạpel ni ạna mi tarōoy aJu obho, nꞌibha ịnon aruubhugh obho, obo bho ạami tatōm ạna mọghi obho. ¹⁸Ạna tạkparion riḍien eedi, atughuneen eedi mi tọkinim obho atẹnẹ tẹḅaal obho, ạḅirogh zeedi mi tịnyaam eru obho ạnogho mẸnaan, molo tẹḍua tologhi omōruōm eedi mi tạmi eedi ẹteeny ọḅelemaan ịkarabh eedi, epin ạni mesi eedi mi tarōoy obho Ẹnaan nạason ạseghe bho.’ ”

ẠPol ạgba moḍighi odi

¹⁹“Ạgripa ọolema bho! Ạami une ḍio none mogin oḍighi ibhꞌạghiiny obho ạami ụmiin tạnyu obho. ²⁰Ạami ụke mọgba tạDamaskos, keḍio ạami ụghi taJerusạlẹm nꞌoomo ebhugh obhꞌaJudia, nꞌibha ịnon aruubhugh obho, molo eedi ekiraan tịkarabh eedi etu tẸnaan, nꞌoḍighi ọkpo olo teḍeeriom mobho eedi neeghiraan tịkarabh eedi. ²¹Tebum iibha bho, pạar obho arōoy aJu obho ịbham ạami tamen olo ạami odi totu iikpulughu obho, iru moghigh ạmi. ²²Keḍio kaadon Ẹnaan be nạpel ạami, pạar obho ạami ụmara suo mọgba ọnogho kōoy kōoy, ọbam nꞌogbōgh onyiin ẹzo bho. Ibha ạami nạgba bho ponyiin eedi ibha arizil obho nꞌaMozis ịgba ighōl temute ni obho: ²³mobho aKraist obho tạmiinom ni, keḍio tatu nạ mọḅel obo bho teḅetunu tọbho bho, mọgba oolelemi ẹḅaal ịbhelegha bho ọnogho arōoy aJu obho nꞌaruubhugh ipedi obho.”

²⁴Tebum ẹzo ịigbaay obho ạPol nạgba bho, pạFestos aḅetunu amulughuom odi ạkpete kua, “ẠPol, ạna nạnwe! Ibꞌịtuugha bhꞌonuma meeḍighi molo ạna nakpo mizim ẹede ọnon!” ²⁵Keḍio ạPol ạbhagharana kua, “Obo odi tẹtolom, ạami ụtaal io! Ọnuekpete bhibha tạmi ạkar eedi agey obho. ²⁶Ạgripa ọolema bho! Ạami tatue ni ạmara nꞌịnyaam ạgba ạnogho ạna tebum obho ạna naalōghōm moomo iibha bho. Ạami nạatua ạna nạamaar ạpamaghiom oomo eedi men onyiin onyiin. Ạkar eedi iibha bho imute ḍio tẹḅokia. ²⁷Ạgripa ọolema bho ạna amōruōm marizil obho? Ạami naalōghōm mobho ạna umōruōm ni!” ²⁸Keḍio Ạgripa ạkpete kua ạnogho mạPol, “Tọbam amen obhobho, ạna ụutua ạna tatue ni aḍighi ạami atẹnẹ mōoy olo nạtuonom maKraist?” ²⁹PạPol ạbhagharana kua, “Eru kạar olo iru mokpẹrẹ bolobolo ọodoony amen, iikpulughu ạmi mi tẸnaan, ạami naakpulughu molo ạna nꞌoomo obo bho nẹmoghon ạami dodon obho kẹrol ạni kạmi — tughuneen mi tarigbirigbiri bhibha ḍio!”

³⁰Pọolema bho, nꞌạgovono bho, nꞌaBanis, nꞌoomo arōoy ipedi obho iḅerenu nẹḍuaghu, ³¹ponyiin nạkpete kua ạnogho monyiin, “Oōy obhobho doḍighi ḍio mạar akōrōnuan molo odi kạbho nꞌoḍigh ikoli.” ³²Keḍio Ạgripa ạkpete kua ạnogho mạFestos, “Ughōl odi dobhin io mọkpe bho ạghi taRom bọ, kumutiom ni mōoy obhobho.”

Ụsaay ạPol obhin nọki taRom

¹Amen nọoḍeghe ughōl ezōor tọki tItali, peedi ịseghe mạPol nꞌịnon ẹde arōoy ikoli ịlogh tạravo tạJulios. Odi onyiin ogbōgh ōoy mi tẹku iḅe rạagham arōoy ibhꞌaRom, ibha ughōl bọ “Ẹku tỌgostos obho.” ²Pezōor ụghi uḍigh toghuugh ụnwiaru olo ạḍua tAdramitiom natu, olo natu mọghi taraagbolom ibhꞌebhugh obhꞌEsia. Ezōor uḍigh pamutiom. Ạristakos, olꞌạTesalonika tebhugh obhꞌaMasidonia, ạtuonom ạni zezōor. ³Ạḅaal pezōor ụghi usi taSaidon. ẠJulios aḍighi miiḅi magey mạPol, molo odi ạḅelemaan zodi mọghi ọmiin ghạ ạburubulol odi, mobhin kạar kạar olo odi nagbẹel. ⁴Keḍio ezōor umina useghenyaan utẹn. Tebum ogim obho nạpibhoghom ezōor obho, pezōor ụzoghi ụgbaanemi tọtu eeghaara obꞌegbolom obhꞌạSaipros. ⁵Keḍio ezōor uru ụḅeeny mobꞌọbhiiny obho utẹn marisiḍia aSilisia nꞌạPamfilia, uru usi taMaira mi taLisia. ⁶Tesuo pogbōgh ōoy obho ạbham ezōor obho ạmiin moghuugh ụnwiaru olo ạḍua tẠleksandria natu mọghi tItali, podi ạsaay ezōor.

⁷Ezōor ụzoghi mịbam mịbam mi tesi ịzal aḍuma nꞌọmiinom, keḍio ugbi mọkpo oghuugh obho mi tegbolom olo atuan maKnaidos. Ogim obho omōrō ḍio nomōrō molo ezōor kọghiom oghuugh obho taghisigh, pezōor ụghiom oghuugh obho mi tekẹeny ạvo ọtu egbolom obhꞌaKrit obho adeeny obho, ụzoghi teekitena bhꞌaSalmoni. ⁸Ezōor ụmaar ni nọtu, ụzoghi ninii nꞌobꞌọmiinom puru usi tesi olo ughōl Egbolom Omuzōnaan, olo ogbeenyan io mẹma bhꞌaLasea.

⁹Ezōor obia magey tesuo molo iḍighi molo ezōor uḍigh togbōgh ịiḅaghami momutiom, tebum obho aruḍuma bho arōoy aJu nẹtologhu ghạ mọkoony mebum iikpulughu obho neetẹn nạ bho. PạPol aakiom kua zeedi, ¹⁰“Arōoy, ạami nạmiin mobho ọzoghi ezira mọḍua tesuo ọghi taghisigh ọmiinom tẹtol ni; amupẹ ọkpo bho idi bọ toghuugh obho, nꞌoghuugh obho, tẹtol ni, ụmaar io suo arōoy tẹpozu ni nạ.” ¹¹Ogbōgh ōoy ẹgham obho ạtuonom mibha ọzoghiom oghuugh obho nꞌobo bho oghuugh obho ịkpete bho. Omōruōm io mibha tạPol. ¹²Egbolom obho ọneghe ḍio molo arōoy kẹrol tamen uuta; molo iḍigh tologhi ọlogh arōoy obho molo komutiom togbo ọbhiiny obho kọkparam kosi taFiniks, erumolo totue ni. Odi esi obho egbolom aKrit olo ạdaanaan mogim obho ạneghe mọrol amen uuta bho.

Ogim ọbhiiny

¹³Tọpaḍi obho eedi nẹva mọḅol obho, pọbam ọfefe ọpibha ạke mọbhibh, peedi ighōl meedi tetue ni eḍighi mẹzo bho eedi ịitua bho. Peedi ịkoton moghuugh obho ịmaar ịtu magey tọtu aKrit. ¹⁴Obia ḍio pọoghuanaan ọpibha, olo ughōl “Yuroklaidon”, ạbhibh ạḍua tegbolom obho aru, ¹⁵panyu moghuugh obho. Ẹzo bho oghuugh obho otue mu mọdaanaan ọpibha bho, pezōor ụḅelemaan mọpibha bho mobhin ọghi kesi kesi olo odi ạghi ạghi. ¹⁶Amen abhin ezōor asiom tọbam eeghaara egbolom obhꞌạKoda, pezōor ụteeny mọbam esi obhooghia. Tesuo, nꞌogbōgh ọmiinom, pezōor ubhin ụlokian rạvo molo ọbam oghuugh obho ụkpuom obho oḅomian abhẹ. ¹⁷Keḍio ezōor uḍur ụsaay ụseghe mẹde ooḍigh ụnwiaru obho ụkpuom. Eedi nekiil mobho eedi tẹki ni mọgbana tobꞌeekpu ọosaar ọtu ọbhiiny obhꞌaLibia; pezōor usōrōghiom marukpe ụnwiaru obho ụḅelemaan mọpibha bho moreliom. ¹⁸Ọoghuanaan ọpibha bho odi nini, molo ạḅaal peedi ịke mobhunughi ẹde ọkpo bhꞌoghuugh obho orōḅōḍi tạmuum obho. ¹⁹Amina ạḅaal peedi nꞌạravo eedi ịḅirogh mẹde ọkpo oḍighi oghuugh obho irōḅōḍi tạmuum. ²⁰Aruḍuma nẹebugh molo aghōzōgh nꞌịinaany ezōor dọmiin io, keḍio ogim obho nạpibh ghạ ninii be mọoghuanaan ọpibha molo ezōor nooḅulooy maghuḍum ezōor.

²¹Amen arōoy obho nẹerologhu mọkoony mọodoony amen, keḍio ạPol aḅetunu togbo eedi ạkpete kua, “Arōoy, enyina ịmoghonyan ni bọ ẹḅele mọzoghi ọḍua taKrit, ịpueghian nꞌamupẹ ọkpo bhibha kịtol io. ²²Keḍio esiibha bho, sesen ni, ịkuemi miloghi enyina! Bọbon onyiin enyina olo tạpo olo; oghuugh obho be mobho tapẹ. ²³Uḍugul obho tạḅaal obho, potelema tẸnaan ạmi, obho ạami naakpulughu obho, aru tạmi ²⁴ạkpete kua, ‘ẠPol, ughiil ghạ ruugu!’ Ạna tạmara ni taghisigh ọolema bhꞌaRom; keḍio Ẹnaan toḍighi iiḅi obhꞌodi nạanogho ạna maghuḍum oomo arōoy obho idi toghuugh obho. ²⁵Tebum ipa bẹleni, arōoy, ịkuemi miloghi enyina! Ạami amōruōm mẸnaan mobho temute ni kẹzo bho ụgba ụnogho ạami obho. ²⁶Tạpibh ni asiemi ezira mi teḅum onyiin egbolom.”

²⁷Togbẹbhiōm aḍiōbh nꞌinya uḍugul aḍuma bho, pọpibha ọbhiiny aMeditarenian obho ạbhibhom ezōor. Ạteeny mogbo uḍugul, pobo bho nẹzoghiom moghuugh obho ịmiin ighōl nootuan tegbolom. ²⁸Peedi ituḅeen mooḍigh ịva ịmiin mobho ekuḍum obho aru mịraar ạraala ịpaḍi arula; ịbam amen itẹn peedi imina iḍighi nạ monyiin ẹzo bho ịmiin mobho naasi mịzal ạraala nꞌaḍiōbh. ²⁹Aruugu nesibh eedi mobho eedi tẹki ẹgbana tạrubharakpar, peedi isōrōghi minya arigbirigbiri mi tạman ụnwiaru obho, neekpulughu ghạ molo aḍio kẹḅaal. ³⁰Pobo bho nẹzoghiom moghuugh obho nẹva ghạ mobhun ọḍua, peedi isōorẹ mọbam oghuugh obho iḍighi kilo eedi nẹki mosōorẹ ịnon arigbirigbiri mi taghisigh ụnwiaru obho. ³¹PạPol ạkpete kua ạnogho mogbōgh ōoy ẹgham obho nꞌarōoy ẹgham obho, “Erumolo obo bho nẹzoghiom oghuugh obho ịtol io suo, penyina iḍumogh mu.” ³²Parōoy ẹgham obho isōbh mooḍigh oghuugh obho ịḅele odi ạtama ạḍua.

³³Aḍio natu mọḅaal, keḍio ạPol aasen oomo eedi mole ịbam eḍian, ạkpete kua, “Neegbẹbh aḍiōbh nꞌinya aḍuma mobho enyina neeḅōrō, molo oomo amen bhibha enyina dele ḍio bọbon ạar. ³⁴Ạami naasen enyina siibha bho, ile meḍian; ile molo enyina eḍum. Bọbon ạsilaan ẹmu onyiin enyina olo tapẹ olo.” ³⁵ẠPol ạkpete miibha bho ạḅele, podi ạseghe mạbred, ạnogho lịsebh mẸnaan mi taghisigh oomo eedi, aḅigi, ạke mole. ³⁶Peedi ịkparami mologhi eedi, oomo eedi iru ile mịbam ariḍian. ³⁷Oomo ezōor obo bho iḍigh toghuugh obho inya ilo moḍual ạraala arōoy. ³⁸Tamen olo kōoy kōoy naale milo ịneghiom, tẹzo olo oḍighi oghuugh obho kaabhōogh peedi ịḅirogh mạruḅa eḍian ilo idi kịbiakpa obho isumughi tọbhiiny obho.

Oghuugh obho ạveleghian

³⁹Aḍio aru ạḅaal, obo bho nẹzoghiom moghuugh obho ịlogh io elẹgh megbolom obho, eedi ịmiin mesi olo odi kẹgul nꞌesiḍia, keḍio nẹetua ghạ mobho, erumolo eedi tetue ni, eedi tekitonom moghuugh obho mi tẹgul obho. ⁴⁰Peedi iigbooy mịkpuom oghuugh obho, ịḅelemaan iḍinighu tọbhiiny obho, tonyiin amen obho peedi ịkoriom miiḍigh ibha ịbham bọ mariisi ọzoghi obho. Keḍio eedi iru iibhaghamiiy ịsiine tạnyu marukpe oghuugh obho, ibhꞌaghisigh obho, molo ọpibha bho ạpibh oghuugh obho ạki taghisigh, ọghi osi tegbolom obho. ⁴¹Poghuugh obho ạghi ạgbana teḅum ọosaar; aghisigh obho naalegheri ạtol peke peke molo onyaghaan mu, ạman obho naḅomian mebum araakpa ạmuum obho.

⁴²Iḅe rạagham obho neḅia mọze oomo arōoy ikoli obho molo bọbon onyiin eedi olo tạmughi apun akiil ạḍua ọtol. ⁴³Pogbōgh ōoy iḅe rạagham obho nạva mẹzo olo ọbhel ạPol, podi ạpuenaan zeedi. Kpẹlen nꞌipa odi ạto molo kōoy kōoy olo tatue ni ạmughi, mopẹl osōor ọmughi obhun; ⁴⁴keḍio ipedi obho ịtuonom ịkpabhagh tạsuḍubo nꞌịpaḍi oghuugh obho. Iibha pẹzo oomo ezōor uḍighi ubhunughu ụman.

ẠPol mi tạMalta

¹Amen ezōor ubhunughuuy, pezōor ụva ụmiin mobho egbolom obho ezōor idi obho ughōl ạMalta. ²Arōoy obho netughogh suo bho etulan ezōor magey. Nạake nạlobh, uuta ẹkona odi, peedi igbonoghi nyạn ibheleghi moomo ezōor mọonwa. ³PạPol ạghi ạso mịpe aru nạloki tạnyan obho pạar amute tebum ẹesu obho, ạabhinighian tạvo odi. ⁴Obo bhꞌẹma bho ịmiin mạar obho nạaghunughian tạvo tạPol obho, ponyiin ạkpete kua ạnogho monyiin, “Oōy obhobho tatu ni mọokoma, toomo ibha odi naamuzōnaan tọbhiiny obho ẹkona, oghōl oru odi ọḅelemaan io zodi.” ⁵PạPol azighe mạvo odi ạlogh mạar obho tạnyan obho molo ạar obho bọbon ạar olo aḍighi zodi olo nolo. ⁶Eedi neenon ghạ mamen odi taabhuugh bolobolo tameel ạpo. Amen eedi iinon ninii mạar momute, kạar olo amute olo bho, peedi inwe mologhi eedi ighōl kua, “Oōy obhobho ọbam ẹnaan!”

⁷Esi obho eedi idi obho ogbeenyan io mariḍighi tạPublios, ọolema egbolom obho. Odi ạmaar abhin ezōor ạloghom totu odi molo ezōor uḍighinaan zodi moomo ịraar aḍuma. ⁸Ọde tạPublios odi tẹmuna nạnwe mẹzegh ọole nꞌoosaranaan. PạPol aḍigh tẹkpe odi, aakpulughu ạnogho zodi, ạḅam rạvo odi mi todi, aakō zodi. ⁹Amen iibha bho iru imute, poomo obo bho idi tegbolom obho ibha nẹnweey obho iru odi aakōoy zeedi. ¹⁰Eedi ẹnoghooy zezōor mịkanya ọkpo, molo amen ezōor notu momutiom eedi ịsaay kạar kạar olo ezōor koḍighom toghuugh obho.

Ụḍua tạMalta ọghi taRom

¹¹Ịraar ụvanyu itẹn pezōor uḍigh umutiom toghuugh olo ạḍua tẠleksandria aru, olo ughōl “ẠKastor nꞌạPoluks”, olo asul ạrol tegbolom obhobho mebum uuta bho. ¹²Ezōor uru usi tẹma bhꞌaSairokius, pụrol suo mịraar aḍuma. ¹³Ụḍua tesuo pezōor ụghi usi tẹma bhꞌaRigiom. Ạḅaal pọpibha ạbhibhom ezōor; ịzal aḍuma iru itẹn pezōor usi tẹma bhꞌaPutioli. ¹⁴Tesuo pezōor ụmiinan mẹde arōoy ilo neemōruōm ilo ịkpete ezōor mọrolan eedi mawiki. Ezōor ụḍua suo pusi taRom. ¹⁵Aburumōr ibhꞌaRom ịmoghon milo igboloman nꞌezōor pịḍua iru mọmiinan ezōor ki tAḍighi obhꞌẠpios nꞌỊraar Arutu ilo isuloman nesulogh. Amen ạPol ạmiin zeedi podi ạsebh mẸnaan, ạghuemi mologhi odi.

ẠPol mi taRom

¹⁶Ezōor usi taRom, pụḅelemaan mạPol morugh esi olo odi be, nꞌonyiin iḅe rạagham obho moḅōrō odi.

¹⁷Ịraar aḍuma iru itẹn pạPol abheleghi mạruula arōoy aJu ibha idi taRom obho mookōbhōghian. Amen eedi iru iikōbhōghian, podi ạkpete kua ạnogho zeedi, “Aburumōr ạmi! Toomo ibha ạami ụpionuman io tarōoy ezira bọbon ạar bolobolo teḍighiom ạar ibha ezira ubhin tịigbaay ạburude ezira bho ẹkona, puḅol ạami mi taJerusạlẹm ụloghom mikoli, ụlogh tạravo arōoy aRom. ¹⁸Eedi iru ịva iinon mi tiipuruan mobho ạar olo ạami uḍighi ilo ịgbaan molo ạami kạbho olo bho, peedi iru momutiom ạmi. ¹⁹Amen arōoy aJu obho igin miibha bho, pạami utẹnẹmi mọkpe bho uru taRom, toomo ibha ạkar ạami ụteeny io mịkarabh ilo ọgbaam arōoy ạmi obho. ²⁰Iibha kiḍighi kạami abheleghi mọmiin, ọgba ọnogho enyina; tebum obho ạami odi tagbirigbiri obhobho mi tebum odi obo bho arōoy Izirẹl neḍuom ologhi obho.” ²¹Peedi ịkpete kua ịnogho zodi, “Ezōor dobhin io mọbhereer teebha mi taJudia milo igboloman nꞌạna, bọbon onyiin umōr ezira olo ạḍua tepa aru olo ạgba ạnogho ezōor milo igboloman nꞌạna olo nạ, olo nạagba nạ zịna mịkarabh olo nạ. ²²Keḍio ezōor nọva mọmoghon ạni ịtughumiom ibhꞌonuma, tebum obho ezōor noolōghōm mobho kesi kesi, kōoy kōoy nạgba ạpue mogbo bhobho ạna uḍigh ạni obho.”

²³Peedi iru igu ḍuma ịnogho mạPol, molo obꞌọlogh eedi iru ḍuma popo mi tesi obho ạPol natugh obho. Kụḍirogh ninii aru aghul odi ạgba ghạ ạnogho zeedi madōm odi ibha igboloman nꞌAde-Ọolema bho tẸnaan. Odi ạva moḍighi eedi kemōruōm mạJizos, molo odi abhin maraalōgh obho taMozis nꞌịtughumiom arizil obho ạgbaam ạnogho eedi. ²⁴Ẹde eedi emōruōm moghōrōkō bhꞌodi, ẹde imōruōm io nomōruōm. ²⁵Peedi iḅerenu nꞌẹmoghonyan, men ạPol ạkpete monyiin oghōrōkō bhobho aghōl kua, “Ịmiin mẹzo Ẹmugh Iigbia bho ạkpete mi tẠizaya ozil obho ạnogho mạburude obhꞌenyina! ²⁶Odi ạkpete kua,

‘Kịa mạgba mạnogho marōoy bhibha:

Enyina tẹtol mọmoghon mọmoghon ghạ be, keḍio ịmoghonyan ghạ ḍio;

enyina tẹtol ghạ moonon moonon

keḍio enyina ịmiin ghạ ḍio be,

²⁷ebum obho ịitua arōoy bhibha nookpereghi.

Eedi neeḅulughia raḅeri eedi,

epughiay riḍien eedi,

molo eedi ịmiinom riḍien obhꞌeedi,

ẹmoghonyom raḅeri eedi,

ẹmoghonyan tiloghi obhꞌeedi,

eghiraan eru tạmi molo ạami kaakō zeedi.

Iibha ọnuekpete tẸnaan.’ ”

²⁸Keḍio ạPol ạkpete kua akunughiom, “Ilōghōm meghōl kua, madōm ịbhelegha bho tẸnaan neesi ạni tịnon aruubhugh. Eedi tẹmoghonyan ni!” ²⁹[ẠPol ạkpete kua miibha bho ạḅele, parōoy aJu obho iḅerenu nẹḍua, iḍigh tibꞌịkanan nꞌalōor eedi.]

³⁰Oomo ịzal ạsia mobho ạPol ạrol totu olo odi nịvo nịvo ạrol ạkpe ghạ, abhin ghạ nꞌooḅi ologhi ạloghom kōoy kōoy olo aru mọmiinan odi. ³¹Odi abhin tọoghuanaan ologhi ạgba ghạ milo igboloman nꞌAde-Ọolema bho tẸnaan, ạtughumiom ghạ nạ milo igboloman nꞌạJizos Kraist Obạmọogh obho kesi kesi olo ụpuenaan nạ ḍio zodi.