2 Tẹsalonika

2 Tẹsalonika

¹Ạami ạPol nꞌạSailas nꞌaTimoti ụge mọbhereer obhobho natuom enyina arōoy ạsosi obhꞌạTesalonika, obho iru bọ marōoy tẸnaan Ọde bho nꞌạJizos Kraist Obạmọogh obho.

²Ẹnaan Ọde bho nꞌạJizos Kraist Obạmọogh obho ẹnogho ni enyina lịsebh nꞌekima.

Ịiruan ilo tẹtol men aKraist obho tatu

³Iiḅi aburumōr, ịkpe ni magey molo ezōor kọsebh ghạ mẸnaan moomo amen mebum enyina, tebum obho ologhi omōruōm enyina nepōbh ni magey nꞌobho etulan obhꞌenyina, bho onyiin atulan monyiin obho, netu nạ mọbugh agey. ⁴Iibha kiḍighi kezōor nịvo nịvo noḅuōm ni enyina magey mi tạrasosi obho tẸnaan. Ezōor noḅuōm ni enyina mobho toomo ịiḅaghami nꞌọmiinom obho nẹteeny enyina bho, enyina idi nini nẹkparam emōruōm.

⁵Iibha nẹgba emutiom miiḅi ịiruan obho tẸnaan, mobho, toomo iibha bho nemute bho, tọḅalam ạni ni enyina moru igey arōoy tAde-Ọolema bhꞌodi. Oobho podi ạar obho enyina ịtuan bọ nẹmiinom obho. ⁶Ẹnaan tamulumian ni kōoy kōoy, apin mọmiinom atuom obo bho nẹnogho enyina mọmiinom obho, ⁷keḍio tạnogho ezōor nꞌenyina obo bho nẹmiinom obho mobhooghia. Odi taḍighi miibha bho taḍuma bho ạJizos Obạmọogh obho tạḍua tạnyu obho ạpamam nꞌitelema ibꞌịnyaam obhꞌodi atu obho. ⁸Ẹnaan tapin amuumōr ạnyan ạliom mobo bho ilōghōm io zodi obho nꞌobo bho ikiilaan io mọnuekpete ooḅi adōm obho tạJizos Obạmọogh ezira bho. ⁹Eedi tẹmiinom mọmiinom ọgbaranuan Ẹnaan olo ikunughi olo. Tọgbarion ni zeedi ọseghe taghisigh tObạmọogh obho nꞌibꞌeghuan obhꞌodi, ¹⁰taḍuma bho odi tatu mobhin eghuan mi toomo arōoy obhꞌodi nꞌiibhughumi mi tobo bho imōruōm odi obho. Enyina ẹkona tẹtol ạni ni togbo bhꞌeedi ebum obho enyina neemōruōm dōm obho ezōor ụgba ụnogho enyina bho.

¹¹Iibha kiḍighi kezōor nookpulughu ghạ mẸnaan ọnogho enyina moomo amen. Ezōor nogbẹel ghạ zodi molo odi kạḅalam ạni enyina moḍum aghuḍum obho odi abheleghi enyina moḍum obho. Odi abhin tịnyaam obhꞌodi aḍighi amuzeniom toomo ịitua oḍighi iiḅi obhꞌenyina, amina agbẹbhẹghiōm toḍighi ologhi omōruōm obhꞌenyina. ¹²Tiibha bho, penyina orue ọnogho eghuan maḍien obho tạJizos Obạmọogh ezira bho, obhin ạni nạ todi meghuan mi tọsu ạghusan aḍien tẸnaan ezira nꞌạJizos Kraist Obạmọogh obho.

Oōy olo ịkarabh ikunughiom todi

¹Tibha igboloman nꞌoru obho tạJizos Kraist Obạmọogh ezira bho nꞌookōbhōghian obhꞌezira nꞌodi, ạami naasen ni enyina, iiḅi aburumōr, ²mọḅele okẹm ọteeny ẹmoghonyan mi tịitua enyina bolobolo ọteeny ozuum alōor omōruōm oghōl maḍuma bho tObạmọogh obho naaru atẹn. Mạar io suo, onyiin ōoy ạmiin ghịiny ạgba miibha bho ạnogho enyina, bolobolo onyiin ōoy apirisi ạnogho enyina, bolobolo mạar io suo onyiin ōoy amina ạgba ạnogho enyina aghōl mezōor ụge miibha bho mi tọbhereer. ³Ímōrō ghạ nomōrō bọbon amen molo arōoy kepuughi miloghi enyina. Aḍuma bhobho oru ḍio ninii ạteeny mikunughi aḍuma omeleghu ọḍua tẸnaan obho nꞌamen olo Oōy obho ịkarabh ikunughiom todi obho, nooguanaan mosumeni odi toonu ạnyan obho naamute aru. ⁴Odi tạgba ạpue kạar kạar olo arōoy neekpulughu, nꞌoomo ẹmorokpo ilo arōoy nẹtuom Ẹnaan. Odi taseeri lōor odi apuom oomo eedi, ạki nạ ạtol delede mi totu iikpulughu obho tẸnaan akōl nạ modi pẸnaan.

⁵Enyina nẹetua ni gạ, mobho ạami ụgba ni moomo iibha bho ụnogho enyina men obho ạami odi nꞌenyina bho? ⁶Keḍio, kir ạar olo aḍighi molo abaabha bho imute ḍio siibha. Enyina neelōghōm nạ zodi ạar obho. Amen olo nạateeny, podi ōoy obho ịkarabh ikunughiom todi obho omute ọman. ⁷Ịnyaam odi Obꞌoḍighi mịkarabh obho nạake moḍighi odi, keḍio ibha temute bọ bho imute ḍio ninii ọpam otẹnẹ tọtu mObo bho ạbham bọ mịnyaam obho ạmaruom obho. ⁸Amen opopo pamen odi ōoy obho ịkarabh ikunughiom todi obho tamute atu, keḍio ạJizos Obạmọogh obho tapin mipooghu ọnu obhꞌodi akighom zodi apiẹmi tamen obho odi tatu nꞌeghuan odi obho. ⁹Oōy obho ịkarabh ikunughiom todi obho tapin tịnyaam taSetan atu aḍighiiy moḍigh kẹrekere ịiḍaany nꞌiben ọkpo ibꞌaruugu ¹⁰nꞌoḍigh kẹrekere ịkarabh ipesi mobhiẹmi obo bho tepẹ bho. Eedi tepẹ ni tebum obho eedi ipinom io etulan nạ magey obho molo kọbhel ạni zeedi. ¹¹Ẹnaan ạtuan iibha bho kạnogho zeedi mịnyaam oḍighi okōrōnuan molo eedi emōruōm mibha itu ḍio magey obho. ¹²Molo oomo obo bho imōruōm io magey obho, kile ni mẹzaal mi tịkarabh obho, ẹteeny mapum.

Ẹnaan ạson enyina ạseghe mọnogho ịbhelegha

¹³Iiḅi aburumōr, ịkpe ni magey molo ezōor kọsebh ghạ mẸnaan moomo amen mebum enyina obo bho Obạmọogh obho atulan obho, ebum obho Ẹnaan ạson enyina moru ịḅel obo bho odi abhira ạbhel, obhin tịnyaam Ẹmugh Iigbia nꞌologhi omōruōm enyina tagey obho oḍighi enyina keru miiḅi arōoy tẸnaan. ¹⁴Ịḍua tooḅi adōm obho ezōor ụgba ụnogho enyina bho kẸnaan abheleghi enyina mi tiibha bho, abheleghi nạ enyina moru obhin ạni abin eghuan tạJizos Kraist Obạmọogh obho. ¹⁵Tiibha bẹleni, iiḅi aburumōr, ịmaar ẹmara mẹbhamam tagey obho ezōor ụtughumiom enyina bho, mi tịigbaay obhꞌezōor nꞌibha ezōor ụge uruom enyina bho.

¹⁶ẠJizos Kraist Obạmọogh ezira bho nịvo nịvo nꞌẸnaan Ọde bhꞌezira, obho atulan ezira bho kạtuan tebum ọsu aghusạn aḍien obhꞌodi kạnogho ezira mọoghuanaan ologhi nꞌagey oḍuom ologhi obho ikunughi olo bho, ¹⁷emuzeni tiloghi obhꞌenyina mọoghuanaan ologhi nꞌịnyaam olo ọkpetiom nꞌoḍighiom oomo ibha ịneghe bho.

Iikpulughu ghạ mẸnaan mẹnogho ezōor

¹Iiḅi aburumōr, tẹzo olo ọkpete okunughiom, iikpulughu ghạ mẹnogho ezōor, molo adōm obho tObạmọogh obho tạtol ni mokẹm olela toomo ariisi obhin eghuan kẹzo bho ịrol bọ tenyina bho. ²Iikpulughu nạ mẹnogho ezōor molo Ẹnaan kạbhel ezōor momuzōnaan tạravo ịkarabh arōoy obho, ebum obho oomo arōoy io mobo neemōruōm dōm obho.

³Keḍio, Obạmọogh obho obi ghạ ḍio. Odi tạnogho ni enyina mịnyaam ạpel enyina ạseghe tạravo odi oḍighi mịkarabh obho. ⁴Obạmọogh obho nạnogho ghạ ni zezōor mọoghuanaan oḍuom ologhi zenyina tibha ezōor nolōghōm mobho enyina neḍighi, teḍighi nạ ni ẹki taghisigh, mibha ezōor ụkpete ụnogho enyina bho.

⁵Obạmọogh obho ạbham ni miloghi obhꞌenyina asiemi tetulan obho tẸnaan nꞌagey ạlikparam obho aKraist nạnogho ghạ bho.

Ị́gbuor ghạ mẹgbuor

⁶Iiḅi aburumōr, ezōor ubhin taḍien tạJizos Kraist Obạmọogh obho nọkpete ọnogho enyina molo enyina kẹnyagha lōor enyina kẹseghe toomo aburumōr ilo neḍum aghuḍum ẹgbuor, obo bho ịtuonom io mịtughumiom obho ezōor ụtughumiom eedi obho. ⁷Enyina nịvo nịvo neelōghōm mobho ịkpe ni magey molo enyina keḍighi mibha ezōor uḍighi togbo enyina bho. Ezōor ụgbuor io men obho ezōor ụrolan nꞌenyina obho. ⁸Ạar ōoy olo ezōor ubhin olo ezōor ụkpe ḍio olo. Ezōor nịvo nịvo ukumuan ghạ nꞌalōor ezōor muḍugul nꞌootaany oḍighi moḍighi molo enyina itōbh mạkobo tẹmu ezōor. ⁹Iibha bho ịgba ḍio mobho ezōor ụteeny io mịnyaam mobhin tenyina mibha ịgbaan ezōor mobhin tenyina bho. Ezōor uḍighi kua molo enyina kẹtuugh kẹtuonom mạraaḅa asike ezōor. ¹⁰Amen obho ezōor ụrolan nꞌenyina bho, ezōor ọgba oghōl kua, “Kōoy kōoy olo ọva ḍio moḍighi oḍighi, ole nạ ḍio meḍian!”

¹¹Ezōor nọkpete miibha bho tebum obho ezōor nọmoghon mobho ẹde togbo enyina neḍum aghuḍum ạrugbuor olo iḍighi ghạ ḍio bọbon ạar, nedu ghạ mizon eedi tariḍighi ịnon arōoy. ¹²Ezōor ubhin taḍien tạJizos Kraist Obạmọogh obho nookiom obo bho neḍum aghuḍum ẹgbuor obho moḍighi oḍighi molo eedi ẹmiin mạar ole.

¹³Enyina ẹkona, iiḅi aburumōr, ighiilaan ghạ moḍighi ghạ iiḅi. ¹⁴Mạar io suo, kir ẹde enyina ilo tegin moghiilaan oḍighi ibha adōm obho ezōor ụge notuom enyina tọbhereer obhobho bho. Enyina ẹmiin mōoy olo odi kua, pịnyagha lōor enyina mẹseghe todi molo ạregheer kesibh zodi. ¹⁵Tiibha bho ẹkona, íseeri ghạ zodi kobo ọlokian ariḍien enyina; kpẹlen nꞌipa, iikiom zodi kumōr.

Ọnuekpete ikunughi obho

¹⁶Obạmọogh obho nịvo nịvo, obo bho aru mikunughi ekima bho, ạnogho ni enyina mekima kesi kesi moomo amen. Obạmọogh obho ạrolan nꞌoomo enyina.

¹⁷Ạami ạPol ubhin ạkar ạvo ạmi nạgiom miibha bho mopuruan oomo enyina. Iibha pẹzo ạami naḅiiḍiom ghạ mạvo ạmi mi toomo ịbhereer ilo ạami ụge. Iibha pẹzo ạami nạge ghạ nạ.

¹⁸Inwo bho tạJizos Kraist Obạmọogh ezira bho ẹrolan oomo enyina.