2 Pita

2 PITA

¹Ạami ạSaimon Pita ẹbana nꞌoteledōm obho tạJizos Kraist ụge natuom enyina obo bho ịḍua toḍighi iiḅi obho tạJizos Kraist Ẹnaan bhꞌezira kạnogho enyina Ọpela mologhi omōruōm olo ạla mạar kobhꞌezōor.

²Ọsu ạghusan aḍien nꞌekima ẹmaraghia ẹrolan enyina tebum obho enyina ilōghōm mẸnaan nꞌạJizos Kraist Obạmọogh ezira bho.

Ẹnaan abheleghi enyina ạson ạseghe

³Tebum obho ezira noolōghōm zodi obo bho abheleghi ezira moru obhin abin eghuan nꞌoomo iiḅi obhꞌodi obho, neeḍighi molo ịnyaam tẸnaan nẹenogho zezira kạar kạar olo ezira nogbẹel mobhin oḍumom aghuḍum iikpōogh obho nꞌạruumugh obho. ⁴Tiibha bho podi ạnogho zezira mẹnogho ilo ịbugh ịla mạar magey, ibha odi aguanaan obho, molo tẹnogho bhibha penyina omuzōnaan tọbho ẹnyaghaam ọkpo ẹmel ẹmar-arōoy obho, oru obhin ạni abin aghuḍum obho tẸnaan. ⁵Tebum iibha bho bẹleni, ịkparam magey mẹḅaram iiḅi eḍighiom ạar mi tologhi omōruōm enyina, tiiḅi eḍighiom ạar obho ịḅaram olōghōm ạar, ⁶tolōghōm ạar obho ịḅaram ọbhama lōor, tọbhama lōor obho ịḅaram ọkparami alōor, tọkparami alōor obho ịḅaram olōghōm Ẹnaan, ⁷mẹḅaram ọbhomoghian aburumōr obho mi tolōghōm Ẹnaan, kụ mẹḅaram etulan mi tọbhomoghian aburumōr obho. ⁸Erumolo enyina ịteeny taghuḍum enyina magey mabaabha bho, peedi oru oḍighi enyina, enyina kẹmaar kemute keḅom mi tolōghōm ạar enyina mi tạJizos Kraist Obạmọogh obho. ⁹Keḍio ōoy olo ọteeny io miibha bho mi taghuḍum odi, pariḍien odi nẹegbarara molo odi nạmiin miikōogh be, odi naaḅulo nạ mobho nootōl migbaany ịkarabh obhꞌodi.

¹⁰Tiibha bho bẹleni, iiḅi aburumōr ạmi, ilōghōma mẹbhamam tobheleghi obho Ẹnaan naabheleghi enyina ạson enyina ạseghe bho. Enyina eḍighi miibha bho, enyina imeel io tọtu. ¹¹Poḍighi olo Ẹnaan tạnogho enyina mịikpo moḍigh ạni tAde-Ọolema bho tạJizos Kraist Obạmọogh obho nꞌỌpela bhꞌezira, obho ikunughi olo bho.

¹²Tebum ibha bẹleni, ạami uzuum io lōor mọḅele ghạ ọotueni enyina mọkpo bhibha, toomo ibha enyina neelōghōm itẹnẹ miibha bho, imina nạ ịghua gbigbiribh mi tagey obho enyina neebhinom obho. ¹³Ạami ụutua, ẹkar ẹneghe molo ạami kazighe miloghi obhꞌenyina mọotuemi ghạ enyina mọkpo bhibha, suo ạami odi nini napooghu obho. ¹⁴Ạami naalōghōm mobho naatuan molo ạami kạkporona kạmuneen moḍim aghuḍum obhꞌạmi kẹzo bho ạJizos Kraist Obạmọogh ezira bho nạagba ạnogho ạami obho. ¹⁵Ạami tạkparam ni aḍighi mẹzo olo enyina tẹetua ghạ miibha bho moomo amen, tamen olo ạami naaḍigh toogu.

Ezōor nọomiin nọgba eghuan taKraist

¹⁶Ezōor ubhin io tiben ịigbaay iiḍuul kọgba ọnogho enyina milo igboloman tịnyaam nꞌoru obho tạJizos Kraist Obạmọogh ezira bho. Ezōor ubhin nꞌạkar ikpo ariḍien obhꞌezōor kọmiinom eghuan obhꞌodi. ¹⁷Ezōor ụrol ạni men obho Ẹnaan Ọde bho ạnogho bọ zodi miibhughumi nꞌeghuan obho, tamen olo oghōrōkō ạḍua aru todi mi tesi Ibꞌeghuan obho, ạkpete kua ạnogho zodi, “Oobho pogini Ọony obhꞌạmi, obho ạami uḅeleriom ẹmu obho.” ¹⁸Ezōor nịvo nịvo ụmoghon ạni moghōrōkō bhobho, bho ạḍua tạnyu obho aru tamen obho ezōor udi nꞌodi mi tobꞌeegum iigbia bho.

¹⁹Iibha bho neeḍighi molo ịghuemi magey miloghi ezōor mi tadōm obho arizil obho tẸnaan ịgbaay obho. Ẹkpe magey molo enyina kedeny kẹmoghonyan ạni, ebum obho ịigbaay bhibha idi kọtodi olo nạmua tọkinim ninii aḍio naaru ạḅaal, pẹḅaal ẹenaany ụḍirogh obho aru ạmua tiloghi obhꞌenyina. ²⁰Tilo ipuom suo, ịitua ghạ miibha bho, mobho bọbon ōoy olo tatue ạseghe mịitua odi ạgba amutiom mẹmu ạghiiny arizil obho, ibha ụge bọ tọbhereer iigbia bho, olo, ²¹ebum obho bọbon onyiin adōm ạghiiny arizil obho olo ạḍua tịitua ōoy karu olo. Ẹmugh Iigbia bho ạbham anyuughi rōoy molo eedi ịgba mọnuekpete bho tẸnaan.

Iben arōoy obo ịtughumiom

¹Tamen olo neetẹn, iben arizil emute teesoḍia arōoy. Onyiin ẹzo bho nạ, pẹzo iben arōoy obo ịtughumiom temute nạ teesoḍia enyina. Eedi tẹḅokia ni epin etu ẹloghom mịtughumiom amapẹ, emina ẹparanaan mạkar Ọde Otu obho ạta bọ zeedi obho, molo ekperenom aḍuugh tapuom ni zeedi. ²Ẹzo bho nạ, pẹzo ọlogh arōoy tẹtuonom miḍim araabōom obhꞌeedi, molo tiibha bho eedi neḍighi obho parōoy ọgba ịkarabh ọpue Ooḅi Ebōom obho. ³Tẹmel ikpoki peedi ọtughumiom iben eedi mobhin ạsuo mi tenyina. Kọkanya amen mobho ọtu mịiruan eedi naaru naḅōrō, nꞌobho obo bho tapiẹmi eedi obho okoḍi ḍio.

⁴Ẹnaan ọḅelemaan io mitelema bho iḍighi bọ mịkarabh obho. Odi anyuughi zeedi ạloki toonu olo ikunughi olo, ạkasiiy zeedi aseeri tesi olo obꞌọkinim, naḅōruōm maḍuma ịiruan obho. ⁵Ẹnaan ọḅelemaan io mọḅel ẹmar-arōoy obho. Odi abhin mobꞌaḍigho ạziom mịkarabh arōoy obho ilōghōm io mẸnaan obho. Odi ạbhel ni maNoa obho ạgba gha mebōom ooḅi aghuḍum obho nꞌịnon oḍual arōoy be. ⁶Ẹnaan abhin ni nyạn abhiẹmiom rạama bhꞌạSodom nꞌaGomora mọnogho aliiki milo temutenaan mobo bho ilōghōm io mẸnaan obho. ⁷Odi ạsoghoron ni amutiom mạLot, obho aru bọ mooḅi ōoy, obho ịkarabh eḍighiom ạar arubheeny obho ịiḅaghami ghạ bho. ⁸Odi ooḅi ōoy obhobho arughan zeedi molo oomo aḍuma odi ạmiin ghạ ạmoghon mọkpo ịkarabh eḍighiom ạar obhꞌeedi olo ịnogho mịiḅaghami mooḅi ologhi obhꞌodi. ⁹Iibha bho nẹgba eḍeeriom mobho Obạmọogh obho alōghōm magey mẹzo ọbhel ọsighe mi tọdegh oonon eedi marōoy obo bho ilōghōm mẸnaan obho, nꞌẹzo ọbham ịkarabh arōoy oseeri tọmiinom oḅōruōm aḍuma ịiruan obho, ¹⁰ạkar obo bho neegin mịto tẸnaan nẹtuonuman ịkarabh ẹebhuom alōor obhꞌodi, obho tạpue ghuḍum eedi obho.

Eedi iben arōoy obo ịtughumiom obho, aḍuugh iḅom ẹmu eepughiaay rạgba. Ighiilaan ghạ nạ ḍio meghuan itelema ạnyu obho; kpẹlen nꞌipa, eedi nẹkpete ghạ zeedi ẹpue. ¹¹Eedi itelema bho nạ, ibha ịteeny ịnyaam nꞌịikpo ipuom eedi iben arōoy obo ịtughumiom obho, irōnyōgh ghạ ḍio ẹgba zeedi ẹpue taghisigh tObạmọogh obho. ¹²Arōoy bhibha arōoy ilo ịitua ilo, ẹebhuom ẹmel alōor obhꞌeedi nẹnyaghagh eedi neḍum aghuḍum ịnam eḍum ibha ụmaraghi mokughi ọze bho. Eedi nẹkpete ghạ ẹpue mọkpo olo neepu molōghōm ạar obhꞌeedi. Tọze ni zeedi kẹzo bho nọze ghạ mịnam eḍum obho. ¹³Ọmiinom obho eedi ịnogho rōoy obho, pọmiinom obho topin ọkpeom eedi obho. Ọḅaal ologhi eedi poḍighi togbo etẹrẹ kạar kạar olo tạnogho zeedi nẹmel iikpōogh alōor obho eedi nẹva bọ bho. Eedi nepuughi ghisigh tObạmọogh obho ẹloki rẹgheer meḍian ạruumugh obho, men olo eedi itul nꞌenyina nele nꞌọḅaal ologhi mi tipesi nꞌịkarabh ạdolomaan obhꞌeedi. ¹⁴Ọnon ạar olo eedi nẹva olo, tughuneen obhumogh ạraani ḍio. Ẹmel oḍighi ịkarabh obho igbẹbhan ghạ ḍio mi teedi. Eedi nẹkomogh ghạ ẹlogh tẹsiin mobo bho ịkua ḍio tiloghi omōruōm eedi obho. Eedi nẹetughumiom miloghi eedi eseeri mọteeny kạar kạar. Itōnyōgh tẸnaan idi nꞌeedi. ¹⁵Eedi nẹeḍua epe tonyen ebōom obho. Eedi nẹtuonuman mebōom obho aBelam ọony tạBosor ạtuonuman obho, obo bho atulan mobhin oḍighi ịkarabh ogbuom obho. ¹⁶Molo ụliom ni zodi mi tịkarabh odi, okpom-ụka ạsu ạkpete mạar ạnogho zodi ạpuenaan zodi moti iitia ẹnaghanyan arizil obhꞌodi.

¹⁷Arōoy bhibha ariizi ạmuum ilo ạmuum ilo. Eedi idi nạ keḅōghōghaan olo ọpibha nạpibhoghom. Ẹnaan nạasi mesi obꞌọkinim aseerian zeedi. ¹⁸Eedi ibhin mọnuekpete araama, nꞌiituma, nꞌipesi ẹmel alōor obhꞌeedi nẹḍaam marōoy obo bho eede ịke momuzōnaan ọḍua tobo bho netugh maghuḍum olo ạgbaranuan obho. ¹⁹Eedi neguanaan ghạ rōoy maghuḍum ạnwuny ogbo eghun, keḍio eedi nịvo nịvo ạrubana ịzian ịkarabh eḍighiom ạar, tebum obho ōoy naḍigh ghạ mẹbana ạnogho kạar kạar olo napuom zodi mạvo bho. ²⁰Erumolo arōoy ibhin tolōghōma bhꞌeedi mi tạJizos Kraist Ọpela bho nꞌObạmọgh ezira bho kimuzōnaan tịnyaam ọḅiira ẹenir ẹmar-arōoy obho, kemina emula ẹebhughu teedi, aghuḍum obhꞌeedi taḅẹebh ni apu mibhꞌọḅel egbiom obho. ²¹Ughōl eedi delōghōm io mooḅi ebōom obho bọ kịneghe epu moru olōghōm ạni koghiraan oḍionom ạman mịto iigbia bho ụnogho bọ zeedi obho. ²²Iibha bho imutenaan eedi obho nẹgba eḍeeriom mobho asidōgh bhibha iru magey,

“Aghōogh amina amula nale mibha odi akuḅaan azuughi obho,”

bolobolo

“Obhōrōpō olo uḅur mụum namina ghạ ni ạki tọgbudu obho.”

Obạmọogh obho aguan momula oru

¹Iiḅi aburumōr ạmi, oobho ogbẹbhiōm ịzal ọbhereer obho ạami nạage uruom enyina. Toomo eedi ạami ụva magey mọkparam ọotuemi enyina mọkpo bhibha molo ạami ạloki mạkar iiḅi ịitua tạruumu enyina. ²Ạami nạva molo enyina kẹetua ghạ mịigbaay arizil iigbia bho tẸnaan ibha eedi ịgba kageedi obho, nꞌaraalōgh obho Obạmọogh nꞌỌpela bho ạnogho bọ miteledōm enyina mọnogho enyina bho. ³Ipira melōghōma kua, mobho tikunughi aruḍuma bho ẹtede arōoy temute ni etu ilo tẹtol ẹtuonuman mẹebhuom iikpōogh alōor eedi. Eedi tẹmologh ni ẹeḅaghami enyina ⁴ekōl kua “Odi ạJizos saguan momula oru? Oḍighen odi? Igbaany ạburude ezira sụneebhozu, keḍio kạar kạar odi nini kẹzo bho ụlem bọ mẹmar-arōoy obho kọḅel egbiom obho.” ⁵Eedi ịkar ni elōghōm ku nẹparanaan mobho kageedi obho Ẹnaan ạkpete ni be keḍio ụlem made bho nꞌạnyu obho. Ade bho ạḍua tạmuum amute molo ạmuum obho nẹpam nạ zodi. ⁶Keḍio ạmuum nạ, obho obꞌạdigho bho, mobho ubhin ubhiẹmiom mugbaany ẹmar-arōoy obho. ⁷Onyiin odi oghōrōkō bho tẸnaan mobho ạbham aseeri mạnyu obho nꞌade bho odi bọ siibha bho mobhin ạnyan obhiẹmiom. Nooseeri mạnyu obho nꞌade bho noḅōruōm maḍuma bho tọtu mịiruan ọnogho, opiẹmi marōoy obo bho ilōghōm io mẸnaan obho.

⁸Iiḅi aburumōr, íḅulo ghạ monyiin ekpo ạar obhobho: taghisigh tObạmọogh obho akẹrẹkẹrẹ olo mi tonyiin aḍuma nꞌạsumuunir ạsia. Todi, ịzal obho onyiin.

⁹Obạmọogh obho obiẹmi ghạ ḍio moguan odi kẹzo bho ẹtede enyina nẹetua bho. Odi adeny ni ạnogho enyina, ebum obho odi ọva ḍio molo onyiin ōoy kabhẹ. Odi nạva molo kōoy kōoy kaghiraan tịkarabh odi. ¹⁰Aḍuma bho Obạmọogh obho tatu obho, tatu tekperenom kọḅa. Taḍuma popo, tigbōgh imulughu, pạnyu obho nꞌoomo ọkpo bho idi bọ todi obho ọnu ọnyan ogbōr otẹn. Ade bho nꞌoomo ọkpo bho idi todi obho tepẹ ni ẹḍua. ¹¹Ẹzo bho topiẹmi ni moomo ọkpo bhibha bho, okōr oḍigh aghuḍum mobho ịgbaan lꞌenyina keḍum? Iḍum ooḅi aghuḍum mẹrol ẹnogho mẸnaan, ¹²ku meḅōruōm ghạ maḍuma bho tẸnaan, mẹkparam magey meḍighi molo odi aḍuma bho kakẹm karu, ạkar odi aḍuma bho ạnyu obho tạnu apẹ bọ bho, nꞌẹesu obho tanyẹnẹmi moomo ọkpo bho idi bọ tạnyu obho. ¹³Ẹnaan naaguanaan zezira momoom ạnyu nꞌade olo oḍighi iiḅi tẹtol. Oobho pobho ezira nogon ghạ oḅōruōm obho.

¹⁴Iiḅi aburumōr ạmi, ẹzo bho enyina negon ghạ neḅōrō ḍuma bhobho bho, pịkparam ghạ meḍighi meseeri silōor enyina ẹneghe ẹman olo ụgbaam io mịkarabh taghisigh tẸnaan, mẹrol tekima nꞌodi. ¹⁵Ịkiom ghạ ḍien talideny tObạmọogh ezira bho kebōom olo odi ạnogho enyina mọḅol ọbhel enyina, konyiin ẹzo bho ooḅi umōr obhꞌezira ạPol abhin toomo olōghōm ạar obho Ẹnaan ạnogho zodi obho ạge aruom enyina bho. ¹⁶Onyiin eedi abaabha bho pibha odi nạge ghạ nạ toomo ịbhereer obhꞌodi. Kir ẹde ọkpo olo ịkpar magey mọmoghonyan tịbhereer obhꞌodi olo obo ilōghōm io nꞌarōoy ịzal iloghi nenweeghiiy ẹḅaraghiom miben ẹgba, kẹzo bho eedi nẹgbaam mibha ẹegia ipedi obho, molo eedi negbo maruugu eedi.

¹⁷Keḍio enyina, iiḅi aburumōr ạmi, neelōghōm etẹnẹ miibha bho. Siibha bho, igona lōor enyina, molo okōrōnuan arōoy obo bho ikiilaan io raalōgh obho igbōrōm enyina taraabōom eedi nꞌolo enyina ịkorom emeel tariisi obho enyina ịmaraay bho. ¹⁸Ipōbhōm mẹghi taghisigh nꞌọsu ạghusan aḍien nꞌolōghōm ạar obho tạJizos Kraist Ọpela bho nꞌObạmọogh ezira bho. Eghuan obho ẹrol ẹnogho zodi be siibha kamen kamen. Ẹrol ni kua.