2 Kọrint

2 Kọrint

¹Ạami ạPol obo bho Ẹnaan ạto kạami uru monyiin oteledōm tạJizos Kraist obho, nꞌaTimoti umōr ezira, nọge mọbhereer obhobho notuom mạsosi obho tẸnaan obho odi tạKorint obho nꞌoomo arōoy tẸnaan ibha idi toomo ebhugh aGris obho.

²Ẹnaan Ọde bhꞌezira nꞌạJizos Kraist Obạmọogh obho ẹnogho ni enyina lịsebh nꞌekima.

ẠPol ạsebh mẸnaan

³Ạlisebh ẹrol ẹnogho mẸnaan tạJizos Kraist Obạmọogh ezira bho, Ọde bho odi, Ọde ọsu ạghusan aḍien, nꞌẸnaan obho oomo ọlogh ạvo nẹḍua ghạ todi etu obho. ⁴Odi nạlogh ạvo ạnogho ezōor mi toomo ịiḅaghami ezōor molo ezōor otue opin tonyiin odi ọlogh ạvo bho ezōor ubhin tẸnaan obho ọlogh ạni mạvo ọnogho mobo bho ịteeny moomo oḍigh kẹrekere ịiḅaghami obho. ⁵Ẹzo bho ezōor nopin mọlogh abin mi tọmiinom obho taKraist obho, pẹzo ezōor nopin nạ mọlogh abin mi tịkanya ọlogh ạvo taKraist. ⁶Ọmiinom bhꞌezōor pilo ọlogh ạvo ọbhel enyina. Ibha ụbhel ezōor pu nọpel nạ zenyina, omina ọnogho nạ zenyina mịnyaam ọkparaghiom nꞌalideny alōor mi tonyiin odi ọmiinom obho ezōor nọkparaghiom nạ bho. ⁷Iibha bho neeḍighi molo oḍuom ologhi ezōor mi tenyina odi kighibh. Ezōor noolōghōm mobho ẹzo bho enyina itul nꞌezōor nẹmiinom obho pẹzo enyina tetul nạ nꞌezōor epin ạni mọlogh ạvo bho ezōor nopin obho.

⁸Ezōor ụḅoki ḍio enyina, iiḅi aburumōr, mọmiinom olo ezōor ụmiinom tebhugh obhꞌEsia. Adōol ọmiinom obho ezōor urōol obho ịimor ịrol kua be ḍịkpobh molo ezōor ụutua mụ nạ ghuḍum. ⁹Ịrol kilo noosōbh rạakpe ọbho ụnogho ezōor. Iibha bho iḍighi molo ezōor ugbiom io mologhi nꞌalōor ezōor, orōbhōnaan Ẹnaan be, obo bho naḅẹriōn ghạ mobo bho nẹebho bho. ¹⁰Odi ạbhel ezōor ạseghe tibꞌigbōgh ịgu ọbho. Odi tạpel ni ezōor, molo ezōor nooseeriom moomo ologhi ezōor mi todi mobho odi tamina ni ạpel ezōor. ¹¹Enyina ẹkona ịlogh ạvo mẹnogho ezōor mi tiikpulughu enyina molo obꞌọlogh iikpulughu obhꞌenyina teḍighi ni arōoy eḅẹriōn maraghōrōkō eedi ẹsebh mẸnaan tebum ạlisebh obho odi abhin tiikpulughu obhꞌenyina ạsebhom ezōor obho.

ẠPol anwe merele odi

¹²Iibha pibha ezōor noḅuom obho, ibha ologhi ezōor ạkar ạgba amutiom ạnogho ezōor mobho ezōor ubhin tịnyaam ọsu ạghusan aḍien tẸnaan noḍumom aghuḍum ezōor mi tẹmar-arōoy obhobho, nꞌạkar ẹzo ezira ulōghōmuan obho, nꞌobho ezōor upin io tịnyaam olōghōm ạar ẹmar-arōoy obhobho ku noḍumom ooḅi aghuḍum ọgba agey obho. ¹³Ezōor nọge ghạ otuom enyina mibha enyina tetue ni ekōl ẹmoghonyan obho be. Ạami nạatua enyina tetue ni ẹmaar ẹmoghonyan ẹman ¹⁴mibha enyina nẹmoghonyan mịpaḍi be siibha bho, molo taḍuma bho ạJizos Kraist Obạmọogh obho tatu obho, enyina tetue ni eḅuom ezōor kẹzo bho ezōor noḅuom nạ enyina bho.

¹⁵Ạami nạakar kua alōghōm miibha bho pạar obho aḍighi bọ ạami ubhira uguan moru ọmiinan enyina molo enyina epin ịzal abin ạlisebh. ¹⁶Ạami ạkar aguan moru ọmiinan enyina men ạami nạki taMasidonia nꞌamen ạami namula, mobhin ọlogh ạvo tenyina mi terele ạmi ọghi taJudia. ¹⁷Tonwe oguan obhobho tạmi ạami naaru moḅile nꞌọḅaal ōoy gạ? Enyina nekōl amen ạami naguan moguan ạmi ạami naguan ghạ moguan ẹmar-arōoy obho moghōl “Ii, eenyi” monyiin amen obho gạ? ¹⁸Ẹzo bho Ẹnaan ọgba ghạ ḍio miben obho pẹzo oguan obhꞌezōor mi tenyina otu nạ ḍio ma “Ii” nạ “Eenyi.” ¹⁹Ebum obho ạJizos Kraist Ọony obho tẸnaan obho ạSailas nꞌaTimoti nꞌạami ụgba ụnogho enyina bho otu ḍio mōoy olo nakōl ghạ “Ii, eenyi” monyiin amen obho. Kpẹlen nꞌipa, odi pa “Ii” tẸnaan, ²⁰ebum obho todi oomo oguan tẸnaan iru magey obho. Iibha pạar obho aḍighi bọ kezira nokōl ghạ “Ẹrol nạ kua” mi taḍien tạJizos Kraist mọnogho eghuan mẸnaan obho. ²¹Ẹnaan pobo aḍighi ezōor ụkar nolōghōm mobho aghuḍum ezōor nꞌenyina ịkar idi nꞌaKraist. Odi Ẹnaan nịvo nịvo obo arōm ezōor dōm obhobho, ²²ạlogh ezōor melẹkẹ elẹgh mobho ezōor uru milꞌodi, ạnogho nạ zezōor mẸmugh Iigbia bhꞌodi mi tiloghi obhꞌezōor mọbhaghan oomo ọkpo bho odi tạnogho ezōor obho.

²³Ạami takiran ni mịzo mẸnaan. Odi naalōghōm mologhi ạmi. Tẹzo olo ọbhel enyina kạami ạḅele moru tạKorint. ²⁴Ezōor ụva ḍio mọto ịto ọnogho enyina oghōl “Iibha nꞌiibha pibha enyina temōruōm obho”, ebum obho enyina nẹemara ịghua tomōruōm obho. Agey nạ nị, ezōor utul nꞌenyina noḍighi moḍighi obhobho mọḅaaleni iloghi enyina.

¹Ebum olo ạami utu ḍio amina ạnogho enyina mịnon ịitu pạar obho ạami unwe mologhi ạmi obho. ²Ạami kạnogho enyina mịitu, okōr ōoy mobho asughō bọ mọnogho ạmi mọḅaal ologhi obho, tughuneen zenyina obo bho ạami ụnogho mịitu obho ḍio? ³Pạar obho aḍighi bọ kạami ụge mọḅel ọbhereer obho uruom enyina bho. Ạami ụva ḍio moru ọnogho ịitu zenyina, ạkar obo bho kịnogho ạami mọḅaal ologhi obho. Ebum obho ạami nạatua ụkar ulōghōm mobho amen ologhi ạmi nạḅaal pologhi enyina ẹkona nạḅaal nạ. ⁴Amen obho ạami ụge mọḅel ọbhereer obho, ạami ubhin tẹegama alōor nꞌizin kạgiom molo enyina kelōghōm mẹzo ạami ubhin utulan oomo enyina, ebum olo enyina keḍigh mịitu ḍio.

Obo bho aḍighi mịkarabh kụliom obho, ịḅelemaan

⁵Eru nạ kạar olo onyiin ōoy naaḍighi molo arōoy kẹetu, odi oḍighi ḍio ạami, aḍighi enyina. Ạami ụva ḍio mọvimoghom enyina opueni, oomo enyina ni mobho odi aḍighi. ⁶Mẹeneghiom mẹzo ẹde enyina neebhin ịliom zodi ōoy obhobho bho. ⁷Esiibha bho ịḅelemaan odi mẹlogh ạvo mẹnogho odi molo odi ọtol tịitu ịitu abhẹ ạman. ⁸Tebum iibha bẹleni, ạami naasen ni enyina, inwe mẹghuemi metulan obhꞌenyina mi todi. ⁹Iibha kiḍighi kạami ạge mọḅel ọbhereer obho mọmiin ẹzo enyina ịmara toghiilaan obhꞌenyina. ¹⁰Kamen kamen olo enyina ịḅelemaan mōoy olo aḍighi mịkarabh, pạami ẹkona nạaḅelemaan nạ zodi. Kamen kamen olo ạami ụḅelemaan mịkarabh, eru kạar olo ạami ụkar ụḅelemaan, ạami ụtuan enyina aḍighi kua mi taghisigh taKraist, ¹¹molo aSetan opuom ezira mạvo, tẹzo bho ezira noolōghōm mibha odi nạva moḍighi obho.

Ilo ạPol ạto moḍighi taTroas

¹²Amen ạami ụghi usi taTroas mọgba adōm obho taKraist, Obạmọogh obho naaghuuron ebōom oḍighi oḍighi obho ạnogho ạami, ¹³keḍio ologhi ạmi ọneghe ḍio, ebum obho ạami ụmiin io mạTaitos ooḅi umōr ạmi obho. Tipa bẹleni, pạami ụkpete ụnogho rōoy obho ughōl “Ịmaar ẹrol”, keḍio ạami utẹn ụghi taMasidonia.

Ịnyaam opuom ạvo ilo idi taKraist

¹⁴Oomo ipa ẹkona, ạlisebh ẹrol ẹnogho mẸnaan obo bho abhin ezōor nateliom karōoy ilo aKraist aḅologh tẹgham, needu mọdu taKraist kesi kesi kọkpo iiḅi eḍu. ¹⁵Ezōor idi ka ịnsens ooḅi eḍu ilo aKraist ạsu nạnogho mẸnaan ilo nekpiom moomo obo bho nọpel obho nꞌobo bho nepẹ bho. ¹⁶Tobo bho nepẹ bho, eḍu obho, eḍu ilo nẹnogho mọbho, keḍio tobo bho nọpel obho, eḍu ilo nẹnogho ghuḍum. Tiibha bho, okōr ōoy mobo ịgbaan moḍighi? ¹⁷Ezōor ilo kịnon arōoy ibha ịseghe madōm obho tẸnaan kọkpo aḅo ilo ịla ḍio mạar obho. Tebum obho Ẹnaan karōm ezōor obho, pezōor ubhin nꞌoomo ologhi ezōor nọgbaam mi taghisigh odi kạrubana taKraist.

Ạrubana omoom ịzo bho

¹Mạa-suo, ezōor kọke mootuma iituma gạ? Bẹlee kemina ẹgbaan kẹzo bho ẹde arōoy neḍighi ghạ bho, molo ezōor kobhin mịbhereer koruom enyina bolobolo kobhin tenyina milo ọgba ezōor ọnogho arōoy? ²Enyina pịbhereer ibha ezōor ụteeny, ibha ụge tologhi enyina, molo kōoy kōoy kaghōl kalōghōm. ³Ịḅokia nạ ḍio mobho enyina iru mịbhereer taKraist ibha urōm ezōor moodu obho, ibha ụgiom io miiḅu mi toobolom obho. Ụgiom Ẹmugh obho tẸnaan obho aḍum ni ạrol kamen kamen obho mi tiloghi arōoy.

⁴Iibha pọoghuanaan ologhi obho ezōor ụteeny taKraist mi tẸnaan. ⁵Bọbon ạar olo ezōor ụteeny mọgbaam oghōl “Ezōor ubhin tolōghōm ạar nꞌịnyaam ku noḍighiom oḍighi obhobho” olo nolo. Olōghōm ạar nꞌịnyaam oḍighi obhꞌezōor ịḍua tẸnaan keru. ⁶Odi pobo ạnogho ezōor mịnyaam moḍighi oḍighi omoom ịzo bho, obho araalōgh obho ụgeey obho iḍighom ạani ḍio bho, Ẹmugh obho be. Araalōgh obho ụgeey obho pobo nepin ghạ mọbho etu, keḍio Ẹmugh obho nạnogho ghạ ghuḍum.

⁷Araalōgh obho ụkaragh ụgeey toobolom ọbharakpar. Tamen obho ụnogho bọ marōoy Izirẹl obho, ẹḅaal eghuan tẸnaan aru asōor. Toomo ibha iḍim ni nẹman obho ẹkona, ẹḅaal aghisigh obho taMozis ạmu molo arōoy obho ine ḍio none mosōmōghian odi. Eru kạar olo araalōgh obho nepin ọbho etu obho aḍigh meghuan ilo ileeny mẹzo bho, ⁸kịitua moḍigh eghuan olo Ẹmugh obho tạteeny. ⁹Tamen opopo, araalōgh obho nạnogho rōoy mapum obho kaḍigh meghuan kua, ịitua moḍigh eghuan ilo tẹtol siibha bho Ẹmugh obho nạnogho makẹel rōoy obho. ¹⁰Agey nạ nị, ezira totue ni okōl tebum obho ẹḅaal eghuan ibha esiibha bho ipu ạni ni kua bho, pẹḅaal eghuan obho ạmu bọ tamen olo neetẹn obho olo mu. ¹¹Keru kạar olo ẹḅaal eghuan idi tobho ạrol mịbam amen be bho, kịitua mẹḅaal eghuan obho tạtol kamen kamen obho.

¹²Ebum obho ezōor ụteeny ọoghuanaan ologhi obhobho bho, pạar obho ezōor utighaan io bho. ¹³Ezōor ilo kaMozis obo bho ạseghe mẹnu apuom maghisigh odi molo arōoy Izirẹl ịmiin mobho ẹḅaal obho naḍim apẹ taghisigh obhꞌodi obho. ¹⁴Ịitua bhꞌeedi ẹkona noopuughi nạ molo aadon noopughiom nạ monyiin odi ẹnu obho mariḍien obhꞌeedi mamen eedi nekōl mọbhereer ugbaany ịzo bho. Kamen kamen olo ōoy aḍigh nꞌaKraist keḍio togbi mozuuron odi ẹnu obho. ¹⁵Kaadon ẹkona, kamen kamen olo eedi nekōl raalōgh obho taMozis, ẹnu obho napuughi ni mịitua bhꞌeedi. ¹⁶Keḍio kamen kamen olo ōoy aghiraan aru tObạmọogh obho, pẹnu obho ozuurunu. ¹⁷Enyina nẹmiin, Obạmọogh obho pẸmugh obho, keḍio kesi kesi olo Ẹmugh tObạmọogh obho odi, oḍiku ạrubana olo ghạ. ¹⁸Esiibha bho oomo ezira nooḍighi ọgbaaniom meghuan obho tObạmọogh obho nꞌasumusigh ilo upuughi ḍio. Onyiin odi eghuan obho mobho ạḍua tObạmọogh obho aru bọ mẸmugh obho natu monwe ezira, ezira kọrol kodi nꞌoḍigh eghuan olo ẹzo ọkpaton ọnu olo nolo bho.

Ẹela ạruumugh obho ilo idi tạruunu

¹Ebum obho Ẹnaan abhin tọsu ạghusan aḍien odi kạnogho ezōor moḍighi obhobho bho, ezōor ụutu ḍio. ²Ezōor ụḍeghe ghạ ḍio rạḍeghe eḅughotu, oḍighi mọkpo ạregheer. Ezōor unweeghi ghạ ḍio moghōrōkō tẸnaan obhin oobiōghōm rōoy. Ezōor ubhin tagey obho ọkinim olo nolo bho ọgba silōor ezōor ọloki tiloghi oomo arōoy mi taghisigh tẸnaan. ³Eru nạ kạar olo adōm obho ezōor nọgba bho ụḅoki ni, ụḅoki mobo bho nepẹ bho be. ⁴Ọkarabh ẹmugh ẹnaan ade bho naapuughi miloghi obo bho imōruōm io bho, molo eedi ẹmiin mẹḅaal ooḅi adōm eghuan obho taKraist, obho Ẹnaan nꞌodi akẹrekere olo nolo bho. ⁵Ezōor ụgba ghạ ḍio dōm alōor ezōor. Ezōor nọgba ghạ dōm obho ạJizos Kraist aru mObạmọogh obho, nꞌobho ezōor uru mạrubana enyina mi tebum ạJizos. ⁶Ẹnaan obo bho aghōl “Ẹḅaal amute tọkinim obho”, pobo aḍighi mẹḅaal obhꞌodi mọmu tiloghi obhꞌezira, mọnogho ezira mẹḅaal olōghōm ạar eghuan obhꞌodi mi taghisigh taKraist.

⁷Oomo ipa ẹkona, ezōor obo bho noogbo mẹela ạruumugh obho ẹkona, idi kạruunu ilo ụlemom ọomi, moḍighi omutiom mobho oomo ịnyaam obho iru milo tẸnaan itu ḍio milꞌezōor. ⁸Ọmiinom akuōm ezōor akiton, keḍio ọmiinom olo ạteeny ezōor olo. Oto amen ologhi ezōor ạḍian ghạ zạzal, keḍio amen olo ezōor ụteeny io mạar oḍighi olo. ⁹Obo ọlogh aḍien obho ạka ni, keḍio amen olo ezōor ụteeny io mọbulol olo. Oto amen tokuugh kua ezōor ọgurom tade bho, keḍio ulẹrẹghi ḍio ezōor. ¹⁰Oomo amen ezōor notōol ọlogha ghạ mọbho bho tạJizos tiikpōogh obhꞌezōor tẹḅor ni obho, molo ọmiin nạ maghuḍum obhꞌodi mi tiikpōogh obhꞌezōor. ¹¹Toomo aghuḍum ezōor, ezōor idi ghạ teesoḍia aghuḍum nꞌọbho mi tebum ạJizos, molo arōoy ẹmiin aghuḍum obhꞌodi mi tiikpōogh obhꞌezōor tẹḅor ni obho. ¹²Iibha nẹgba emutiom mobho ọbho odi moḍighi tezōor, aghuḍum noḍighi tenyina.

¹³Ẹzo bho ẹegia bho ạkpete aghōl “Ạami umōruōm ni kạami nạgba” bho, pẹzo ezōor umōruōm nạ kụ nọgba. Odi obo bho ạge mipa bho nꞌezōor ụteeny monyiin ologhi omōruōm obho. ¹⁴Ezōor noolōghōm mobho Ẹnaan obo bho aḅẹtōn mạJizos Obạmọogh obho mi tọbho bho taḅẹtōn nạ nị zezōor nꞌodi ạJizos, aakōbhōghi ezōor nꞌoomo enyina mi taghisigh odi. ¹⁵Ụtuan ebum enyina ku noḍighiiy miibha bho molo ẹzo bho arōoy obo bho nepin luunwo ọsu ạghusan aḍien tẸnaan nelōghōm ọbugh obho, pẹzo ạlisebh obho ẹkona nạbugh nạ mọnogho eghuan mẸnaan.

Ologhi omōruōm poomo aghuḍum ezōor

¹⁶Tebum iibha bẹleni, ezōor ụutu ḍio. Toomo ibha iikpōogh bhibha nẹeghogholaan nemuneen obho ẹkona, ạruumugh obho ezōor nẹnwana ghạ ninii be moomo aḍuma. ¹⁷Keḍio ọbam ọmiinom obho ezōor nọmiinom teekpōogh amen obhobho bho tạnogho ezōor meghuan olo ẹzo ọgba olo nolo, ilo tepu ạni ni kua mọmiinom obho. ¹⁸Ezōor ugbiom io riḍien ezōor mi tọkpo ibha nọmiin obho, idi ghạ tibha ụmiin io bho be. Ibha nọmiinom riḍien obho tẹtol meekpōogh amen be, keḍio ibha ụmiin io bho idi ghạ kamen kamen.

¹Ezōor noolōghōm mobho kamen kamen olo ụvobh motu ạrisinagh obho ezira notugh obho, ạami nakōl iikpōogh obhꞌezira, pẸnaan oḅōgh ọnon otu ọnogho ezira mi tạnyu obho, otu olo uḅōghōm io rạvo, olo taḍum ni ạtol kamen kamen. ²Esiibha bho ezira nọfibhighu magey, mokẹm ọghi oḍigh totu obhꞌezira obho odi tạnyu obho, ³molo amen ezira nooḍigh ụmiin mụ mẹduḅa ezira. ⁴Ibha ezira nọfibhighu tesuo ade bho mi totu ạrisinagh obho mi tọmiinom obho, ughōl io oghōl ezira nọva mozuuruna orōbh. Ezira nọva moḍigh tobho odi tạnyu obho molo aghuḍum obho ạmin apiẹmi mibha tẹḅor ni bho. ⁵Ẹnaan obo bho naḍighi miibha bho mọnogho ezira obho. Odi nạanoghuom ezira mẸmugh Iigbia bho ạpaghan ezira mobho ipa bho tẹkar ni etu milꞌezira magey.

⁶Iibha kiḍighi kologhi ezōor ạghua moomo amen. Ezōor noolōghōm mobho suo ezira idi nini notughom miikpōogh bhibha bho, ezira urughom io nꞌodi Obạmọogh obho. ⁷Ebum obho, taghuḍum obhobho ezira, upin io tọkpo bho ezira nọmiin obho koḍumom, noḍumom ologhi omōruōm be. ⁸Ologhi ezōor ạghua ni magey, molo ozuuruna iikpōogh bhibha ọghi orughom Obạmọogh obho, ịneghe ạani ni kua epu. ⁹Tilo ipuom suo, ughōl nạ ezōor notughom iikpōogh bhibha bolobolo Obạmọogh obho ẹkona, oomo ạar ibha ezōor nọva, poḍighi ibha teḍigh tologhi odi obho be. ¹⁰Ebum obho kōoy kōoy tạmaranuan nị maKraist mi tẹtolom ịiruan obhꞌodi mobhin abin odi, tịkarabh nꞌiiḅi, tẹzo bho odi abhin iikpōogh alōor obhꞌodi aḍumom aghuḍum obhobho bho.

Itulughian arōoy nꞌẸnaan mi taKraist

¹¹Tẹzo bho ezōor noolōghōm moghiilaan obho tObạmọogh obho kiḍighi kezōor nọkpete ọkpaariom ọnogho rōoy monwe aghuḍum eedi. Bọbon ịbam ilo Ẹnaan olōghōm io ezōor olo, keḍio ạami nạatua enyina ẹkona neelōghōm nạ zezōor mi tiloghi obhꞌenyina. ¹²Iibha bho ilo molo oghōl ezōor digh omina ọgba silōor ezōor mọnogho enyina. Kpẹlen nꞌipa, ezōor nọva kụ molo enyina ẹteeny mesi ọmara ootumuom ezōor, molo enyina ẹteeny ikpo ọnu obhin ọbhagharanaam obo bho neetumuom ghạ silōor eedi mẹzo ịnon arōoy ịbugh isi obho, keḍio neḅulo ghạ meḍighiom ạar eedi obho. ¹³Eru nạ kạar olo ezōor nokpo mizim ẹede ọnon ẹkona, ezōor ukpo nọnogho mẸnaan, keru nạ kạar olo alōor ezōor ạar olo, pịrol ịnogho enyina. ¹⁴Ebum obho etulan taKraist mobho natōmōghiōm ezōor obho, siibha bho ezōor nooru ulōghōm mobho ebum obho onyiin ōoy aru ạbho ạnogho moomo arōoy obho, poomo arōoy neeḍigh nꞌodi ẹpo nạ bho. ¹⁵Odi ạbho ạnogho moomo arōoy molo obo bho idi nꞌaghuḍum obho iḍumanaan silōor eedi, eḍum ẹnogho zodi be, obo bho ạbhuonaan eedi kuḅẹtōn tọbho bho mebum eedi nạ bho.

¹⁶Tebum iibha bẹleni ạseghe dodon ạghi taghisigh, ezōor uunon mu mōoy kẹzo bho arōoy neenon mōoy obho. Eru nạ kạar olo ezōor nꞌꞌoonon ghạ maKraist men kẹzo bho arōoy neenon ghạ bho, esiibha ezōor uunon mụ kua. ¹⁷Kamen kamen olo kōoy kōoy odi nꞌaKraist, odi omoom ōoy, ugbaany aghuḍum obhꞌodi naatẹn, odi naḍum omoom aghuḍum. ¹⁸Iibha bho ịḍua tẸnaan keru, odi obo bho ạtuan ebum aKraist atulughian ezira, ạnogho nạ zezōor moḍighi oḍighi itulughi obho. ¹⁹Ẹmu adōm obhꞌezōor piibha, Ẹnaan ạtuan aKraist natulughian kōoy kōoy. Odi ọḅal mụ azu tẹmu eedi mịkarabh eedi. Odi nịvo nịvo nạanogho zezōor madōm itulughi obho.

²⁰Siibha bho, ezōor ạnwuny adōm ilo ụson useeri mi tesi taKraist, molo Ẹnaan odi tezōor nookpulughu enyina. Tebum aKraist, sesen ni, itulughian mẸnaan. ²¹Odi aḍighi maKraist obo bho ịkarabh ilo bho moru ọkarabh ōoy mebum ezira, molo, todi, ezira otu miiḅi arōoy mi taghisigh tẸnaan.

¹Ezōor noosen ni enyina, tẹzo bho ezōor utul nꞌodi Ẹnaan noḍighi moḍighi obho, ibhin ghạ mẹbasi maluunwo ọsu ạghusan aḍien obho tẸnaan. ²Ịmoghon ẹzo odi ạkpete,

“Ạami ạmoghon oghōrōkō onuma tạkar ogbo amen olo iizuan, ạbhel ạna togbo aḍuma ịbhelegha bho.”

Ilōghōm mobho esiibha aru mạkar amen obho iizuan obho, aadon aru mạkar ogbo aḍuma ịbhelegha bho.

³Ezōor ukiki ghạ ḍio mọpuenaan ōoy mi tebōom odi molo ezōor ụteeny ọghor ạman mi toḍighi obhꞌezōor. ⁴Kpẹlen nꞌipa, kạar kạar olo ezōor noḍighi, ezōor noḍighi ghạ mọgba omutiom mobho ezōor uru mạrubana tẸnaan mi talideny alōor obho ezōor ubhin nọkparaghiom mi tịiḅaghami, nꞌekulom nꞌọmiinom obho. ⁵Ụgba ḍio men olo uḍulogh ezōor, ụsarom migiri ụlokioghom ikoli. Oto aḍuma ezōor tokumuan kua ninii molo ạrala ilo, eḍian ilo. ⁶Iiḅi eḍighiom ạar obhꞌezōor, nꞌolōghōm ạar obhꞌezōor, nꞌalideny alōor obhꞌezōor, nꞌọsu ạghusan aḍien obhꞌezōor, nꞌẸmugh Iigbia bho odi tezōor obho, nꞌoomo etulan obho nẹgba nạ mẹzo bho. ⁷Onyiin oghōrōkō nạ mobho ọnuekpete agey obho ezōor nọgba bho, nꞌịnyaam obho tẸnaan ibha idi nꞌezōor obho neeli nạ. Ooḅi aghuḍum mi taghisigh tẸnaan pikpo ẹgham obho ezōor ubhin noḅiom, nopin nạ okōrōm ikpo ọduana. ⁸Ezōor oḍigh eghuan tẹde arōoy, ẹde ịloki zezōor rẹgheer; ẹde netōnyōgh, ẹde nebuom. Toomo ibha agey obho ọḍua ḍio tịnu ezōor obho ẹkona, ẹde ibhin ezōor nẹlaam mobho ezōor uru mịgba miben. ⁹Toomo ibha kesi kesi noolōghōm ezōor obho ẹkona, ẹde neḍighi kilo bọbon ōoy olo alōghōm ezōor olo nolo. Ẹde mezōor nọobhozu, keḍio enyina nẹmiin, ezōor udi. Oobum ọliom ezōor magey keḍio ezōor ụbho ḍio. ¹⁰Oomo ibha ezōor idi karōoy ịkunu obho ẹkona, ologhi ezōor ạbalala moomo amen. Ezōor idi karuvekulom keḍio ezōor nooḍighi mọlogh otẹnẹ rụula. Idi kolo bọbon ạfu ạar olo tọmiin tạvo ezōor olo, keḍio kạar kạar ezōor ụteeny ni ọman.

¹¹Tenyina arōoy ạKorint, ezōor nookpẹriōn ịnu nꞌiloghi ezōor ozuanaan enyina. ¹²Ezōor ụḅoki ḍio zenyina miloghi ezōor, enyina kụ nẹḅoki zezōor miloghi enyina. ¹³Ạami nạḍeghe ạnogho enyina siibha bho kạnwuny ạmi, ipin tonyiin ologhi obhobho meghuuron iloghi obhꞌenyina mẹnogho ezōor.

Aliiki olo ọḅele oḍigh ọobhughuḍian nꞌarōoy aruru

¹⁴Ị́ḅaran ghạ moḍighi nꞌobo aruru. Iiḅi nꞌịkarabh ạmaḅaran ilo ghạ. Ẹḅaal nꞌọkinim irughan ghạ ḍio monyiin esi. ¹⁵AKraist nꞌeru obho otul ọnu odi gạ? Okōr oḍigh ạar mobho obo bho imōruōm maKraist obho nꞌobo aruru obho ịḅaran? ¹⁶Ịgbaan eeghe molo otu iikpulughu tẸnaan taalian nꞌotu ịikool aruru? Ezira potu iikpulughu tẸnaan obho aḍum ni ạrol kamen kamen obho. Odi nịvo nịvo ạkpete kua,

“Ạami tatugh teedi, atelian nꞌeedi, molo ạami atu mẸnaan eedi, eedi etu rōoy ạmi.”

¹⁷Iibha kiḍighi kObạmọogh obho ạkpete kua,

“Ịḍua teedi, mẹgbaranuan silōor enyina nꞌeedi.

Ị́teeny ghạ mạar oḍighiom mọkpo ilo ịḅaal io, molo ạami apin enyina ạloghom.”

¹⁸“Pạami oru Ọde enyina, enyina keru nwụny nꞌạsunwunyaan ạmi,

Obạmọogh oomo ẹmiriikpo bho ạkpete kua.”

¹Iiḅi aburumōr ạmi, oomo iibha bho uguanaan ezira. Tebum iibha bẹleni, itu ọḅaaleni lōor ezira toomo ẹmorokpo ilo neḍighi ghạ lōor bolobolo ẹmugh ezira mọḅele ọḅaal, oḍum aghuḍum oghiilaan Ẹnaan, ọneghe ọman taghisigh odi.

Ọḅaal ologhi tạPol

²Ipinom ezōor. Oōy olo ezōor uḍighi mịkarabh olo, ezōor doḍighi nạ ḍio ọpue mōoy, bolobolo ooniom onyiin ōoy. ³Ạami ụkpete ḍio miibha bho mọgba enyina mịkarabh. Tamen olo neetẹn ạami nạagba ghạ ạnogho enyina mẹzo enyina iḍigh tologhi ezōor molo tọbho nꞌaghuḍum oomo ezira idi monyiin esi. ⁴Ạami nạtuughuom enyina mologhi magey molo ạami naḅuom enyina magey. Toomo ịiḅaghami obhꞌezōor ẹkona, ologhi ạmi ạghua ni ạman, ạami nạpeebh kugo.

⁵Ạkar amen obho ezōor ụghi usi taMasidonia obho ẹkona, ipooghu ezōor ikima ḍio. Oomo kẹkul kẹkul ịiḅaghami ịiḅaghami, ạruruan nꞌịnon arōoy nꞌaruugu tekpom ezōor. ⁶Keḍio Ẹnaan obo bho nạnwanami ghạ miloghi obo bho iloghi obho neeḅōkōom obho, abhin mạTaitos aru ạnwanami miloghi ezōor. ⁷Ibha odi aru obho be ḍio, ịimoghon obho odi abhin abhulughi raḅeri ezōor mẹzo enyina ịghuemi mologhi odi obho. Odi ạgba ạnogho ezōor mẹzo enyina negbẹel mọmiin ạmi, nꞌẹzo ologhi enyina ọneghe ḍio tibha enyina iḍighi obho, nꞌẹzo enyina nẹemara mọgba ọbhel ạmi ọseghe. Iibha bho nẹekar ẹḅaaleni mologhi ạmi magey.

⁸Ughōl nạ ẹko ọḅel ọbhereer obhꞌạmi aḍighi molo ologhi enyina ọneghe ḍio ẹkona, ạami ụutu mụ. Ạami alōghōm mobho ọḅel ọbhereer obhꞌạmi aḍighi molo ologhi enyina ọneghe ḍio mọbam eekpōogh amen. ⁹Ologhi ạmi nạḅaal magey tiibha bho, tebum obho ạami uḍighi enyina mọotu obho ḍio, ebum obho ịitu obhꞌenyina iḍighi molo enyina neenweeghian taraabōom aghuḍum enyina bho. Ẹnaan kạlogh mịitu bhibha tiloghi obhꞌenyina molo iḍighi molo ezōor ụpue ḍio miloghi enyina. ¹⁰Ịitu obho Ẹnaan nạlogh ghạ tiloghi arōoy obho neḍighi ghạ molo iloghi eedi nenweeghian mosōmōghi eedi tịbhelegha. Tiibha bho ōoy olo takōl “ạar iḅōr ạami” olo. Ịitu ẹmar-arōoy obho pobo nẹnogho ghạ mọbho. ¹¹Ịmiin mẹzo Ẹnaan abhin mịitu obhꞌenyina aḍighi amutiom mobho enyina ibhin oomo ologhi enyina neḍighiom oḍighi obho nꞌẹzo enyina ịmara ni mọgba mobho ạar olo enyina ịpiom olo, nꞌẹzo enyina ibhin ịkarabh iseeri, nꞌẹzo aruugu isibh enyina, nꞌẹzo enyina nẹva magey mọmiin ạmi, nꞌẹzo enyina nẹemara mọgba ọbhel ạmi, nꞌẹzo enyina nẹemara mọliom oḍighi mịkarabh obho. Enyina nẹegba lōor enyina emutiom mobho enyina ịghor ạman ilo tibha imute bho.

¹²Tọkpete okpẹrẹni, toomo ibha ạami ụge mọbhereer obhobho bho ẹkona, ạami ụtuan io mobo bho aḍighi mịkarabh obho bolobolo obo bho uḍighi mịkarabh obho kạge. Ạami ụge mọmiin ạkar agey ẹzo enyina nẹetua zezōor mi taghisigh tẸnaan. ¹³Iibha kiḍighi kologhi ezōor nạnwana.

Ẹzo ologhi ezōor ạnwana be ḍio, ologhi ezōor ạḅaal nạ magey men ạTaitos aru ạgba ạnogho ezōor mẹzo oomo enyina ibhin ịḅaaleni mologhi odi. ¹⁴Ạami abhin enyina aatumuom ạnogho odi, keḍio enyina ibhin nạ mẹzo bho ịlogh ạami meghuan. Kamen kamen, agey obho mobho ezōor ụgba ghạ ụnogho enyina. Onyiin ẹzo bho nạ, iituma bho ezōor ubhin enyina uutumuom ụnogho mạTaitos obho neeru nạ magey. ¹⁵Iibha bho neeḍighi molo, etulan obhꞌodi mi tenyina neebhōbh isi mesi olo ẹzo oḍighi olo, molo, kamen kamen olo odi ạatua mẹzo oomo enyina ibhin ịmaruom toghiilaan obhꞌenyina, nꞌẹzo enyina ibhin toghiilaan nꞌeegu aḍien ibhin odi ịloghom talōor enyina. ¹⁶Ologhi ạmi nạḅaal magey siibha bho mobho ạami tatue ni aḍuom enyina mologhi.

Ẹzo iizuan mọnogho aluunwo

¹Iiḅi aburumōr, ezōor nọva molo enyina elōghōm mẹzo ọsu ạghusan aḍien aluunwo bho tẸnaan naaḍighi moḍighi mi tạrasosi obhꞌaMasidonia. ²Eedi eḍigh togbōgh ọdegh oonon mi tọmiinom obho eedi ịmiinom obho, keḍio ọḅaal ologhi obhꞌeedi ẹzo ọgba olo, molo toomo ekulom obhꞌeedi ẹkona, eedi ibhin ologhi aluunwo bho irōol tẹmu. ³Tọgba agey obho, eedi ịnogho kẹzo kẹzo olo eedi irue, keḍio tilo imina ipuom suo, eedi ibhin nꞌoomo ologhi eedi ẹnoghuom ⁴egbẹel, eesen ezōor molo kọnogho eedi meepōogh olo eedi kẹlogh ạni mạvo kẹnogho marōoy tẸnaan ibha idi taJudia obho. ⁵Ibha eedi iḍighi obho nẹekar kua epu mibha ezōor nọotua bho. Eedi ibhira ịnogho lōor eedi mObạmọogh obho, keḍio igbi mọnogho ạni alōor eedi zezōor tẹzo ịto bho tẸnaan. ⁶Tiibha bho pezōor ụkpete ụkpaariom mạTaitos obo bho ạke moḍighi obhobho bho, moḍighi ọghi taghisigh ọlogh ạvo ọnogho enyina ọman mi tạkar oḍighi etulan obhobho. ⁷Enyina ạruula mi toomo ọkpo bho enyina ịteeny obho, tạkar omōruōm obhꞌenyina, nꞌoghōrōkō ọnuekpete enyina, nꞌolōghōm ạar obhꞌenyina, nꞌẹzo bho iḍigh tologhi enyina mọlogh ạvo bho, nꞌetulan obho enyina ibhin netulan ezōor obho. Ipin nạ tẹzo bho mẹteeny nạ mologhi aluunwo mi toḍighi etulan obhobho.

⁸Iibha bho ạami ụlogh io ni molōgh ạnogho enyina. Ạami nạgba ni be ạnogho enyina mẹzo iḍigh tiloghi ịnon arōoy mọlogh ạvo, mọva ọmiin oḍigh etulan obhꞌenyina. ⁹Enyina neelōghōm maluunwo ọsu ạghusan aḍien obho tạJizos Kraist Obạmọogh ezira bho. Toomo ẹzo bho odi agbo mẹela asi obho, odi atẹn muvekulom mebum enyina, molo ẹḍua tekulom obhꞌodi etu enyina etẹnẹghu rụula.

¹⁰Iibha aliiki ạmi mi tiibha bho. Oḍighi ọman esiibha mibha enyina ịke kạla bho atẹn obho ịneghe epu. Enyina obo bho ibhira ịke moḍighi iibha bho, enyina ibhira nạ eḍumom nꞌoomo ologhi enyina. ¹¹Iḅerenuom siibha meḍighi mẹghi taghisigh mẹman oḍighi obho. Ebhulubhul nạ tiloghi enyina mọman kẹzo bho ịrol bọ men obho idi nini tịitua enyina bho. Oomo ipa ẹkona, ipin tibha ạravo enyina meḍighiom. ¹²Eru kạar olo idi tiloghi enyina mọnogho, Ẹnaan taanon tibha idi tạravo enyina bho apin mẹnogho bhꞌenyina, oonon io tibha enyina ịteeny io bho. ¹³Ạami ụva ḍio molo koghōl ạami naḅẹriōn dōol ịnon mọḅamaghi tạruumu enyina. ¹⁴Eezuan magey siibha bho enyina ịteeny mịkanya ọkpo magey obho molo enyina kẹlogh ạvo kẹnogho mobo bho ịteeny ạni ḍio obho, molo amen enyina ịteeny ạni ḍio peedi ọlogh ạni ạvo ọnogho ạni enyina. Tiibha bho pạvo oḅur avel avel kaḅur mạvo mụum. ¹⁵Kẹzo bho ẹegia bho ạkpete bho,

“Odi obo bho aakōbhōghi mịkanya bho ọteeny io milo ilegheri ipu,

keḍio odi obo bho aakōbhōghi mịbam obho ọteeny io milo ilegheri ikio ipu.”

¹⁶Ezōor nọsebh mẸnaan magey mobho iḍigh tologhi tạTaitos magey mọlogh ạvo ọnogho enyina kẹzo bho ezōor nọotua nạ bho. ¹⁷Odi oḍumom io ni be tibha ezōor ụkpete ụnogho odi obho, neeḍigh nạ tologhi odi magey mọlogh ạvo ọnogho enyina molo odi nạatua nạ moru tenyina. ¹⁸Ezōor notōm mọnon umōr olo oomo ạrasosi obho nekiilaan odi tebum oḍigh oḍighi ọgba ọnuekpete adōm obho, mọḅarama odi. ¹⁹Odi umōr obhobho, ạrasosi obho ẹkona nẹeson odi ẹseghe molo odi kạtuonom ạni ghạ ezōor mi toḍighi oḍighi-iiḅi obho ezōor noḍighi mọnogho eghuan mObạmọogh obho, nꞌoḍighi omutiom mobho ịkar idi tologhi ezōor mọlogh ạvo bho.

²⁰Ezōor noḅe magey molo ịghor ạman ịtol io mi tẹzo ezōor ubhin nọpam maluunwo bhibha. ²¹Ezōor nooseeriom mologhi ezōor mi toḍighi ghạ ibha ịneghe taghisigh tObạmọogh obho be ḍio, tasumusigh arōoy nạ.

²²Iibha kiḍighi kezōor notōm umōr ezōor nꞌeedi. Ezōor nọodegh odi mọlogh amen, ọmiin nạ mobho nebhulubhul tologhi odi mọlogh ạvo ọnogho arōoy. Keḍio esiibha bho odi naaseeriom ologhi odi zenyina bho, neelegheri nebhulubhul tologhi odi mọlogh ạvo ọnogho enyina. ²³ẠTaitos nị dụgh, odi nꞌạami utul noḍighi moḍighi obho mọlogh ạvo ọnogho enyina. Aburumōr ipedi obho netu nꞌodi obho, ạrasosi obho ịson eedi moru taḍien eedi mọnogho eghuan maKraist. ²⁴Itulan eedi magey molo oomo ạrasosi obho ẹkar kua elōghōm mobho iituma bho ezōor uutumuom enyina bho iru magey.

Ọloghonaan ạvo arōoy tẸnaan

¹Ạami nạatua, ạar ọga omina ọge oruom enyina milo igboloman nꞌikpoki ọloghonaan ạvo ọnogho arōoy tẸnaan ibhꞌaJudia olo. ²Ạami naalōghōm mobho idi tologhi enyina magey mọlogh ạvo, molo ạami naatumuom enyina ụnogho marōoy aMasidonia. Ạami ụgba kua ạnogho eedi, “Ịmiin, aburumōr ibhꞌaGris nẹemara kaana mọlogh ạvo ọnogho.” Ologhi ọlogh ạvo bho enyina ịteeny obho neenyuughi miloghi ọlogh eedi. ³Iibha kiḍighi kạami arōm burumōr bhibha natuom enyina molo iituma bho ezōor uutumuom enyina mi tilo igboloman nꞌiibha bho itu moobhulo ọnu be, molo kẹzo bho ạami ụḍeghe bho, enyina neḅōruōm nꞌaluunwo enyina. ⁴Iibha ilo, karōoy aMasidonia bho nꞌạami oru ọteeny enyina kọva ọmiin mobho enyina deekōbhōghia ḍio, ịmiin ạregheer ilo tesibh ezōor (ibhꞌenyina ụgba ḍio nọgba) moḍuom enyina mologhi ilo ịrol mẹzo bho. ⁵Iibha kiḍighi kạami ạatua morōm aburumōr bhibha keḍionom ghạ zạmi taghisigh keru keekōbhōghi ghạ maluunwo bho enyina iguan obho, molo, amen ạami tatu asi, kạar kạar idi neḅōrō. Poḍighi nạ oghōl ịkar idi tiloghi enyina mọnogho, ụvimoghom io ni zenyina.

⁶Ilōghōm mobho kōoy kōoy olo aḅẹbh meeghōorō oḍighi taḅu mịbam eḍian, obo bho aḍighi mẹesia bho taḅu mịkanya eḍian. ⁷Tebum iibha bẹleni, kōoy kōoy ạnogho kẹzo bho idi tologhi odi obho. Odi ọogboghomi ḍio riḍien kạnogho bolobolo ạnogho kilo nọvimoghom ni zodi. Ẹnaan natulan ghạ mobo bho nạnoghuom nꞌooḅi ologhi obho. ⁸Odi Ẹnaan tatue ni ạnogho enyina apuom ibha enyina negbẹel mọteeny obho, molo kamen kamen enyina tẹteeny ghạ ni mibha alōor enyina nꞌilo ipuom suo mobhin oḍighiom oomo oḍigh kẹrekere iiḅi ọkpo, ⁹kẹzo bho ẹegia bho ạkpete bho,

“Odi ọokuom ghạ ḍio maruvekulom obho, oḍighi iiḅi odi idi kamen kamen.”

¹⁰Ẹnaan obo bho nạnogho ghạ mikpo iḅẹbh moḅẹbh iḅẹbh, nꞌạbred molo ole bho, tạnogho ni enyina moomo ikpo iḅẹbh ilo enyina negbẹel, aḍighi nạ eedi esiiy moḅu iiḅua ẹela mi taluunwo bhꞌenyina. ¹¹Odi tagbuemi ghạ ni zenyina molo enyina eenwo luunwo moomo amen, molo ọlogh arōoy tepin luunwo bhꞌenyina mi tezōor ẹnogho lịsebh mẸnaan. ¹²Ọlogh ạvo bhobho enyina nẹlogh obho, enyina iḍighi ḍio ẹnogho marōoy tẸnaan be, neḍighi nạ molo ịkanya arōoy ẹnogho lịsebh mẸnaan. ¹³Ọlogh ạvo bhꞌenyina neeḍighi emutiom miiḅi eḍighiom ạar obhꞌenyina, molo ọlogh arōoy tẹnogho ni meghuan mẸnaan tebum oghiilaan obhꞌenyina mi tooḅi adōm obho taKraist, obho enyina imōruōm obho, nꞌaluunwo bho enyina iinwo zeedi nꞌoomo ịnon arōoy obho. ¹⁴Peedi ookpulughu Ẹnaan ọnogho enyina nꞌigbōgh etulan tebum aluunwo ibꞌọsu ạghusan aḍien obho tẸnaan mi tenyina. ¹⁵Itu ọsebh Ẹnaan tebum ẹnogho bhꞌodi ẹzo ọgba olo bho.

Ilo ạPol ạgba mọbhela alōor odi

¹Ạami ạPol obo bho nạaḅoogh ghạ taghisigh enyina, ạteeny ọnu tạman obho, ubhin taḍien alideny alōor nꞌoḍighi iiḅi obho taKraist naakpulughu enyina. ²Ị́vimoghom ghạ zạmi molo ạami kạteeny mọnu men ạami uru tenyina. Ạami nạgba ạnogho enyina, ạami tatue ni ạteeny mọnu ạmaranuan mobo bho nekōl meḍighiom ạar ezōor ilo esuo ẹmar-arōoy obho. ³Agey, ezōor idi tesuo ẹmar-arōoy obho keḍio ezōor ubhin io meḍighiom ạar esuo ẹmar-arōoy obho noḅiom. ⁴Ọkpo ẹgham ezōor, ọkpo ẹgham esuo ẹmar-arōoy obho ḍio. Ịnyaam tẸnaan, ibha tetue ni eḅuni moomo ịikpo bho, pibha ezōor ubhin noḅiom opiẹmi miben ịkarabh ịkanan obho. ⁵Kạar kạar olo ạagighimian nꞌọbughia alōor mi tebōom, mọmaranuan olōghōm ạar obho tẸnaan pobho ezōor nọkom ghạ ozu ọokpo, ọlogh ghạ mẹbana moomo ịitua molo ekiilaan maKraist? ⁶Kamen kamen olo enyina iḍighi imutiom mobho oghiilaan obhꞌenyina neegbẹbh ịman, pezōor ọmara mọliom oomo eḍighiom ạar arōoy ilo oghiilaan olo.

⁷Enyina neenon ghạ mọkpo tozu ạnyu obho be. Kir ōoy olo odi epa mi tenyina olo nagbiom lōor odi mobho odi aru mōoy taKraist. Odi anwe mịitua ologhi odi agbiom nạ zezōor mobho ezōor uru ạni marōoy taKraist. ⁸Ạregheer ẹko isibh nạ ḍio zạmi, eru kạar olo ạami uutuma miituma ịikpo bho Obạmọogh obho ạnogho ezōor obho upu nạ suo ẹkona, ịikpo bho obhōbhẹ enyina, ilo obhiẹmi enyina ḍio. ⁹Ạami ụva ḍio mobhin ibha ạami ụge tịbhereer ạmi obho oḍighi ọloki enyina ruugu. ¹⁰Mạar io suo, onyiin ōoy tạkpete ni kua, “Hụ! ẠPol nạteeny ghạ mọnu ạkua tịbhereer odi, taghisigh arōoy odi ịnyaam ilo, ọnuekpete odi ạar oḍighiom olo.” ¹¹Oōy olo nạatua miibha bho alōghōm mobho akẹrekere ilo tibha ezōor ụge tịbhereer ezōor mi tamen olo ezōor idi tegbeeny, nꞌibha ezōor toḍighi tamen olo ezōor idi nꞌenyina.

¹²Enyina neelōghōm mobho ezōor une ḍio ọseghe lōor ezōor otueni bolobolo ọtuom mobo bho ịseghe silōor eedi ịsiine kepa bho. Eedi neḍigh evel monyiin mọseghe alōor onyiin ogbiom, omina ọtuom onyiin. ¹³Tezōor, kẹzo kẹzo ilo ịrol, iituma ezōor kir ọkuan, ezōor upẹlōm ghạ nạ ḍio suo. Ezōor useeriom tọkuan oḍighi obho Ẹnaan ạlogh tạravo ezōor obho, obho enyina iḍighom ạni obho. ¹⁴Tẹzo bho enyina idi ạani togbo odi ọkuan obho, tamen obho ezōor ubhin mọnuekpete ooḅi adōm obho igboloman nꞌaKraist uruom enyina bho, ezōor upẹl io mọkuan obho. ¹⁵Tebum iibha bẹleni, ezōor uutuma ḍio opẹlōm mi tọkuan obho Ẹnaan aseeri ezōor obho oḍigh toḍighi ịnon arōoy. Kpẹlen nꞌipa, ezōor useeriom ologhi mẸnaan molo ologhi omōruōm enyina kabhōbh kạghi taghisigh, nꞌolo ezōor totue ni oḍighi mọkanya oḍighi teesoḍia enyina moomo amen molo ezōor upẹl io mọkuan obho Ẹnaan aseeri ezōor obho. ¹⁶Pezōor orue opẹl enyina ọghi tịnon aruubhugh ọgba ọnuekpete ooḅi adōm obho, molo ezōor upin io moḍighi ạravo ọnon ōoy ootumuom.

¹⁷“Kōoy kōoy olo taatuma aatumuom mObạmọogh obho,” kẹzo bho ẹegia bho ạkpete bho. ¹⁸Ebum obho kōoy kōoy olo Obạmọogh obho ạbham amutiom pobo nọsebh ghạ, obo bho amutiom lōor odi obho ḍio.

ẠPol nꞌiben iteledōm obho

¹Ịmoghonyan ạami, sesen ni, ạkar esiibha bho ạami natu mọḍeghe ạraḍeghe araama bho. ²Ạami ạteeny mobōbhan mi tenyina kẹzo bho Ẹnaan ạteeny obho, ebum obho enyina idi kooḅi ọkpur ọnyani olo ạneghe ni ạman, olo ạami utuḅenaan mọkala maKraist komoom olom olo odi ạteeny. ³Ạami nạatu magey molo enyina ịgbaranuan ẹḍua tetulan nꞌịitua bhꞌenyina mi taKraist kẹzo bho ooḍigh obho abhin aapeleghia ạdegh mIiv, odi ameel obho. ⁴Ebum obho enyina ikẹm lẹpuuny nepinom kōoy kōoy olo aru nạgba ạnogho enyina mọnon ạJizos olo akōrōnuan mobho ezōor ụgba ụnogho enyina bho, nepinom nạ mẹmugh nꞌadōm olo oozuan io noozuan mẹmugh obho nꞌadōm obho enyina ibhin tezōor obho.

⁵Ạami nạatua, ạami usōoriōm io apu mạkar ibꞌiteledōm ibhꞌenyina. ⁶Eru nạ kạar olo ạami ụmaar io mọnuekpete, olōghōm ạar ạmi idi. Ezōor nọogba ghạ miibha bho mi toomo oḍigh kẹrekere araabōom mi toomo kạar kạar ọnogho zenyina.

⁷Ạami umuul io enyina bọbon onyiin ạar men obho ạami ụgba mọnuekpete ooḅi adōm obho tẸnaan ụnogho enyina bho. Ạami usōoriōm lōor ạmi mọbughe enyina. Iibha bho ạami uḍighi mịkarabh gạ? ⁸Amen obho ạami ụrolan enyina uḍighian enyina moḍighi obho, ịnon ạrasosi kịkpe ghạ zạmi mikpoki oḍighi ạmi. Idi kolo ạami umiigh eedi mọloghom ạvo ọnogho enyina. ⁹Men obho ạami odi nꞌenyina bho, ạami ụnogho ḍio enyina mịiḅaghami ọlogh ạvo ọnogho ạmi tamen olo okpoki olo nolo tạvo ạmi, ebum obho aburumōr ibha aMasidonia ibhin iruom ạami kạar kạar ilo ạami nạva mọrolom. Ẹzo bho ịrol tamen olo naatẹn obho pẹzo tẹtol nạ taghisigh. Bọbon amen olo ạami tạnogho enyina mịiḅaghami olo. ¹⁰Tọgba agey taKraist ibha idi tạmi obho, iituma bhibha tạmi iḍigh io meḍum kesi kesi mi toomo ebhugh obhꞌaGris. ¹¹Ebum eeghe kạami nạḍeghe miibha bho? Ebum obho ạami utulan io enyina gạ? Ẹnaan be kalōghōm erumolo ạami utulan io enyina.

¹²Ạami taḍighi ghạ ni be ạki taghisigh siibha bho molo “iteledōm” ipedi obho ịteeny mọnu ootuma oghōl meedi nꞌezōor uḍighi monyiin oḍighi obho. ¹³Arōoy ilo idi kua iben iteledōm. Oḍighi eedi oobiōghōm arōoy be, ooghirina ọrol kiteledōm taKraist. ¹⁴Ẹzo bho, aSetan ẹkona naaghirina ghạ nị ạtol konyiin oteledōm ẹḅaal obho. ¹⁵Molo, ibꞌạar io erumolo ạrubana odi iighirina ịrol kạrubana ilo ịneghe ni ịman taghisigh tẸnaan. Ikunughi obho eedi tepin tạvo tẸnaan mạmukpe oḍigh oḍighi obho eedi neḍighi obho.

Ọmiinom tạPol tebum obho odi aru monyiin oteledōm obho

¹⁶Ạami digha ạḍeghe nạ monyiin ẹzo bho, ịítua ghạ mobho ạami uru meema. Kenyina ẹetua nạ kua ẹkona, pipinom ạami keema molo ạami ạteeny ạni mạar obhin ootumuom. ¹⁷Ibha ạami nạḍeghe siibha bho ạami nạḍeghe rạḍeghe eema, ịḍua ḍio tịto tObạmọogh obho keru. Ạkar ạraḍeghe iituma bhobho ạami nạḍeghe araama. ¹⁸Ku neeḍigh iru molo ọlogh arōoy neebhin neetumuom mịitua ịlelemu arōoy obho, ạami ẹkona taatuma ạni ni. ¹⁹Enyina nịvo nịvo ilōghōm mạar arōoy, molo enyina nẹḅaal ghạ ni mologhi eḅaam rạḍeghe araama. ²⁰Enyina neḅaam ghạ nị ẹnogho mobo bho neeghirimi enyina kạrubana bho, bolobolo eliom enyina bho, ẹdeghogh enyina mẹzo olo ologhi eedi aḍigh, eenon enyina ekiemi, eḅōrōgh nạ masumusigh enyina bho. ²¹Ạami nạkpete mọlokia ạregheer, ezōor ụroogh nị opu moḍighi ipa bho.

Keḍio kōoy kōoy olo ane ạkpaton mọnu mootuma, — ạami nạḍeghe mạraḍeghe eema — ạami ẹkona tane nạ nị aatuma. ²²Eedi arōoy aHibru bẹle? Ạami sẹzo bho nạ. Eedi ilꞌIzirẹl? Ạami ẹkona. Eedi ạnwuny ọobhe tEbrạhạm? Ạami ẹzo bho nạ. ²³Eedi ạrubana taKraist? Ạami nạḍeghe kōoy olo nakpo mizim ẹede ọnon, ạami ukumuan apu eedi. Ạami uḍiku nạ mikoli apu eedi, ilo nọogurogh nạ zạmi ipu zeedi, keḍio ọlogh amen olo ạami naatuan mọbho, oomo eedi olo naarubh lẹke motuan olo. ²⁴Neegbẹbh ōogh amen mobho arōoy aJu obho nẹegurogh ạami monyiin olo merubal ạligur ạvo. ²⁵Ịraar amen mobho nọoguroghom ạami mọga, otōḅōl ạami men. Sịraar amen mobho ạami nạagbana togbo ọbhiiny ạbadi molo onyiin amen ạami ụrol tạmuum ạmuum moomo uḍugul nꞌootaany. ²⁶Tararele bhꞌạmi, ụgba ḍio men mobho ạami ụrol teesoḍia aḍuugh nꞌọbho mi tạribhiiny, nꞌạravo ạruḅa nạ, nꞌạravo ạkar arōoy ạmi nạ, nꞌạravo arōoy ịnon aruubhugh obho nꞌạravo iben aburumōr ạmi tibꞌạraama bho nꞌibꞌeekpu aruuḍum obho, tibꞌạribhiiny. ²⁷Ụgba ḍio men olo ạami ukumuan uḍighi moḍighi molo ạami ukoḍi ḍio rạla muḍugul, ụrol nạ mọkoony eḍian nꞌạmuum. Oto amen, bọbon eḍian ole ilo, esi oḍigh obhooghia olo, ukpe okuugha ẹkona olo. ²⁸Tẹzo olo osōbh okpẹrẹmi, oomo aḍuma mobho ịitua ạmi nẹvimoghom ghạ zạmi tilo igboloman nꞌoomo ạrasosi obho. ²⁹Okōr ōoy adugh tomōruōm odi molo ạmi udugh ạni ḍio? Okōr ōoy ameel aḍigh tesi ịkarabh molo ạami ụsuanaan io ghụsan?

³⁰Ạami taatuma nạ ekona, ạami taatuma tọkpo bho ịgba neḍeeriom ạami mobho ạami ịnyaam ilo nolo bho. ³¹Ẹnaan tạJizos Obạmọogh obho obho aru nạ mỌde odi obho, obho ạlisebh tẹtol ni ẹnogho kamen kamen obho, naalōghōm mobho ạami ụgba ḍio miben. ³²Onyiin amen mi tạDamaskos, uvẹmụ ōoy ẹma bho, obho odi tẹeḍiani tẠretas ọolema bho, arōm rōoy mọmara tọnu otu ẹma bho moḅol ạmi. ³³Keḍio ụlogh ạami tọkpaagh usōorẹ tẹḅagh-otu ẹma bho molo ạami umuzōnaan tạravo odi.

Ạghiiny nꞌọkpo ẹḅokia ilo ạPol ạgba amutiom

¹Toomo ibha ạsuo ilo bho ẹkona, ạami taatuma ni, keḍio ạami natu mọgba ilo igboloman nꞌạghiiny nꞌọkpo ẹḅokia ilo Obạmọogh obho ạgba amutiom ạnogho ạami. ²Ạami alōghōm monyiin olo atul ọnu nꞌaKraist olo tamen olo aḍiōbh nꞌinya ạsia neetẹn, ụseghe ụsiinom tobꞌạnyu obho. Eru kạar olo iru tiikpōogh obho nꞌeru kạar olo iru tạruumugh obho, ạami ulōghōm io, Ẹnaan be kalōghōm. ³Ạami ulōghōm mobho ụseghe mōoy obhobho ubhin ụghi tạnyu-ẹnaan obho. Eru kạar olo iru tiikpōogh obho nꞌeru kạar olo iru tạruumugh obho, ạami ulōghōm io, Ẹnaan be kalōghōm. ⁴Tepa podi ạmoghon mọkpo ilo ōoy otue ḍio ạgba, ilo anem odi ẹkona otue ḍio ạsir amutiom. ⁵Odi ōoy obhobho pobo ạami taatumuom. Ạami uutumuom io lōor ạmi, tughuneen tọkpo bho nẹgba emutiom mobho ạami ịnyaam ilo bho ḍio. ⁶Ạami aru nạ mootuma ẹkona, ạami uḍigh io meema, ebum obho ạami ụgba ḍio miben obho. Keḍio ạami ụva ḍio, molo onyiin ōoy ọlogh ạami apu tịitua odi, tughuneen tibha odi ạmoghon toghōrōkō ạmi, ạmiin nạ bhꞌạami naḍighi obho ḍio.

⁷Keḍio, toḍighi ẹzo olo ạami ụseeghi ḍio rạvo mi tọbughia alōor tebum ibꞌọkpo bho ạami ụmiin obho, pụnogho ạami mẹegama ooḅulom tiikpōogh obho, olo naḍighi moḍigh oḍighi ẹbana taSetan moḍighi olo ạami ụbughia ḍio lōor. ⁸Ịraar amen mobho ạami uukpulughu mObạmọogh obho motughuneen talōor ạmi. ⁹Odi ạbhagharana kua, “Ọnon ạar olo ạna tagbẹbh olo tughuneen ọsu ạghusan aḍien obhꞌạmi ḍio ebum obho ịnyaam obhꞌạmi nẹkua ghạ epu tamen olo alōor onuma naadugh.” Iibha kiḍighi kologhi ạmi nạḅaal magey mootuma tibha ạami ịnyaam ilo bho, molo aKraist apin ịnyaam obhꞌodi akuōm ạami akiton molo ạar ọteeny ạami. ¹⁰Talidugh alōor, nꞌitōnyōgh, nꞌọkoony, nꞌọmiinom, nꞌịiḅaghami mi tebum aKraist, ạami ụuḅaghami ghạ ḍio lōor ạmi. Ebum obho kamen kamen olo alōor ạmi adugh pamen ạami nạteeny ghạ mịnyaam.

Ẹzo ạPol abhin marōoy ạKorint aseeri tologhi odi

¹¹Ạami naḅo miḅo araama, keḍio enyina obo bho iḍighi obho. Eru nạ kạar olo ạami ụla ḍio mạar tenyina ẹkona, ạami uḅẹebh io apu mạkar “iteledōm” obhꞌenyina. ¹²Alideny alōor obhꞌạmi mi togbo enyina nꞌọkpo ịiḍaany nꞌibꞌaruugu obho pibha iḍighi bọ imutiom mobho ạami uru monyiin ạkar agey oteledōm. ¹³Ezōor ọkar ooniom enyina opuom mạrasosi ipedi obho, tughuneen tibha ạami ụuḅaghami ḍio enyina mọlogh ạvo ọnogho ạmi obho be ḍio? Sesen ni, ịḅelemaan ạami tiiniom bhibha.

¹⁴Nꞌoobho sogbẹbhiōm ịraar amen mobho ạami naakōbhōghia moru tenyina, keḍio ạami ugbẹel io zenyina nꞌạar nꞌạar. Enyina pibha ạami nạva, ikpoki ḍio. Ạnwuny io mobo nẹnoghooy ghạ mọkpo bụrude, ạburude ku nẹnoghooy ghạ. ¹⁵Ologhi ạmi tạḅaal ni magey moliom kạar kạar olo ạami ụteeny, nꞌạkar aghuḍum ạmi, mọbhelom enyina. Ebum obho ạami utulan enyina mẹzo bho, pạar obho enyina tepin etulan ạami mịbam obho gạ?

¹⁶Ạami nakōl enyina neemōruōm mobho ạami ụnogho ḍio zenyina dōol orōol. Mạar io suo, onyiin ōoy tatue ni akōl mạami ụgba miben ạloghom enyina tẹto. ¹⁷Ḅōrō ku, ạami ụkar uḍighi ẹko? Ạami abhin tadōm obho ạami urōm uruom enyina bho aaniom enyina gạ? ¹⁸Ạami uusen mạTaitos moru tenyina, amina arōmōm nạ nꞌumōr opedi obho. ẠTaitos aaniom enyina gạ? Araabōom odi nꞌạami, nꞌeḍighiom ạar ezōor onyiin io gạ?

¹⁹Iiḅi aburumōr, mạar io suo enyina nẹetua ekōl mezōor nọva mesi ọgba ọḍua mi tenyina. Ịítua ghạ kua. Ezōor nọḍeghe ọnogho enyina mi taghisigh tẸnaan mibha aKraist nạva molo ezōor kọḍeghe obho. ²⁰Aruugu nesibh ạami mobho ụmaar io suo, amen ạami tatu asi tenyina ạami tạmiin enyina mẹzo olo ạami ụva ḍio mọmiin enyina, enyina ẹmiin ạami mẹzo olo enyina ịva ḍio mọmiin ạmi. Mạar io suo ạami tatu atulom enyina tạruruan, nꞌibōbhan, nꞌọkarabh ologhi ẹbhooru, nꞌologhi ạaku, nꞌitōnyōghan nꞌịnyoghoghan, nꞌọbughia alōor nꞌẹmoghonyan. ²¹Ạami nạatu ni molo amen ạami tamina atu asi tenyina, Ẹnaan obhꞌạmi taḍighi ni ạregheer enyina esibh ạami, nꞌobho ạami taḍigh ni tịitu aleghian mobo bho iḍighi mịkarabh tamen olo neetẹn obho, ibha deghiraan io eḍionom ạman moḍighi ịkarabh, ọva ạraani nꞌilobhir nꞌọkpo ẹmel ẹmar-arōoy obho eedi iḍigh ịduḅuḍian obho.

Iipuruan nꞌaliiki ikunughi obho

¹Oobho ogbẹbhiōm ịraar amen obho ạami natu tenyina. “Keḍio tọpam mōoy molōgh, tọmoghon ni mịigbaay ọnu ịzal nꞌịraar arōoy,” kẹzo bho ẹegia iigbia bho ạkpete bho. ²Ạami naakiom ni enyina obo bho neeḍighi mịkarabh mi tamen olo neetẹn obho, nꞌoomo ipedi obho. Togbẹbhiōm ịzal amen obho ạami uru tenyina bho ạami ạkpete nạ miibha bho, keḍio ạami digha amina ạkpete, siibha bho ạami ugbeenyan ni tenyina bho, mobho, amen obhꞌeede bho ạami tatu obho, bọbon onyiin ōoy olo ạami tạḅelemaan olo. ³Enyina tẹmiin ni moomo ibha enyina nẹva mọmiin obho: mobho aKraist abhin ạami nạkpete ạnogho enyina. Amen odi tạpam enyina, penyina olōghōm oghōl odi ofaabh io, odi taḍighi ni amutiom mịnyaam odi ạnogho enyina. ⁴Toomo ibha odi adughom lōor ạnogho eedi eedi ịkan ighigh odi toorẹeny ẹmigheri obho ẹkona, odi abhin ịnyaam tẸnaan naḍumom siibha. Ezōor idi nạ todughom alōor obho odi ạrol bọ tiikpōogh obho, keḍio tolōghōmuan obhꞌezira, ezōor topin ni tịnyaam tẸnaan oḍum ạni nꞌodi.

⁵Ịḍa lōor enyina meenon, mẹmiina lōor enyina nịvo nịvo erumolo enyina neḍum aghuḍum ologhi omōruōm. Ạami ụga ạni ni napuruan, enyina neelōghōm mobho ạJizos Kraist naḍum taghuḍum enyina? Gạ, pụ mạar io suo enyina neemeleghu ẹman taraabōom obhꞌodi. ⁶Bọbon ịitua ilo oghōl ezōor noomeleghu nạ, ạami nạatua, ilo nolo tenyina. ⁷Ezōor nookpulughu mẸnaan molo enyina iḍighi monyiin ạar ekōrōnuan, tebum olo oḍighi ezōor opẹ ḍio, ebum olo enyina eḍighi ghạ mibha iizuan obho, eru nạ kạar olo oḍighi obhꞌezōor abhẹ nạ ẹkona. ⁸Ebum obho ezōor ụva ḍio mọmaranuan, oḍighi okōrōnuan tagey obho tẸnaan, nọva ghạ mọbham ọghi taghisigh be bho. ⁹Ologhi ezōor nạḅaal ghạ nị men olo alōor ezōor naadugh, kalōor enyina ạghua ni ạmara. Tiibha bho kezōor nookpulughu ghạ molo enyina kegbẹbh kẹman toomo eḍighiom ạar enyina. ¹⁰Pạar obho aḍighi bọ kạami nạge miibha bho tesuo amen olo ạami ugbeenyan ni enyina bho, molo, amen ạami tatu asi, ạami upin io tịnyaam obho Obạmọogh obho ạnogho ạami obho amulughuom enyina. Ịnyaam obho ạami ubhin obho, ịnyaam obhōbhẹ enyina, olo obhiẹmi enyina ḍio.

Ọnuekpete ikunughi obho

¹¹Siibha bho, iiḅi aburumōr, ịmaar ẹrol. Iḅe mẹzo olo enyina egbẹbh ẹman toomo iiḅi eḍighiom ạar. Ịmoghon liiki ạmi, onyiin ạmoghonyan monyiin, meḍum ghuḍum ekima, pẸnaan etulan nꞌekima bho ọrolan enyina.

¹²Onyiin abheleghian ghạ monyiin nꞌiiḅi ipeleghian aburumōr.

¹³Oomo arōoy tẸnaan ibha idi eebha bho epuruan enyina.

¹⁴Ọsu ạghusan aḍien tạJizos Kraist Obạmọogh obho, nꞌetulan obho tẸnaan, nꞌotul ọnu Ẹmugh Iigbia bho, ẹrolan nꞌoomo enyina.