1 Tẹsalonika

1 Tẹsalonika

¹Ạami ạPol nꞌạSailas nꞌaTimoti ụge mọbhereer obhobho natuom enyina arōoy ạsosi obhꞌạTesalonika, obho iru bọ marōoy tẸnaan Ọde bho nꞌạJizos Kraist Obạmọogh obho.

Ạlisebh nꞌekima ẹrolan enyina.

Aghuḍum nꞌologhi omōruōm arōoy ạTesalonika bho

²Ezōor nọsebh ghạ ni mẸnaan moomo amen mebum oomo enyina, ụḅele ghạ nạ ḍio nọḅele mọotua enyina tiikpulughu ezōor. ³Taghisigh tẸnaan Ọde bho, ezōor uḅulo ḍio mẹzo bho enyina ịtuugh neḍighi mibhꞌologhi omōruōm obho, nꞌẹzo bho etulan obhꞌenyina iḍighi kenyina nekumuan kua bho, nꞌẹzo bho oḍuom ologhi obhꞌenyina mi tạJizos Kraist Obạmọogh obho ạghua ni ạman obho. ⁴Iiḅi aburumōr, ezōor noolōghōm mobho Ẹnaan atulan ni enyina magey keḍio ạson enyina ạseghe moru arōoy odi. ⁵Ezōor ubhin io moobho ọnu be kọgbaam ọnogho enyina mọnuekpete ooḅi adōm obho. Ezōor ubhin tịnyaam Ẹmugh Iigbia bho nꞌibha ezōor ụkar umōruōm mi tagey obho kọgbaam ọnogho enyina. Enyina neelōghōm moḍigh aghuḍum obho ezōor ubhin ụrolan enyina bho. Oomo iibha bho ezōor ụtuan ebum enyina. ⁶Enyina ịtuonom ạraaḅa asike ezōor nꞌObạmọogh obho. Toomo iibha enyina ịmiinom obho ẹkona, enyina ibhin nꞌọḅaal ologhi ebhinom dōm obho ạḍua bọ tẸmugh Iigbia bho karu obho. ⁷Molo enyina ịrol taghisigh oomo obo bho imōruōm mi taMasidonia nꞌaGris obho, ⁸molo ụmoghon io madōm obho igboloman bọ mObạmọogh obho mi tịnu enyina mi taMasidonia nꞌaGris be, ọdu ologhi omōruōm enyina mi tẸnaan ilela ni mi toomo ariisi. Bọbon ạar olo ezōor umina ụteeny mọkpete olo mu, ⁹ebum obho arōoy nịvo nịvo kụ nẹgba ghạ mẹzo bho enyina ibhin ezōor ịloghom men obho ezōor uru ụrolan enyina bho, nꞌẹzo enyina nẹeḍua taruru imula iru tẸnaan mokumuan odi ọkar agey Ẹnaan obho aḍum ni ạrol obho, ¹⁰nꞌẹzo bho enyina neḅōrō mỌony obhꞌodi mọḍua tạnyu obho oru obho. ẠJizos Ọony obhꞌodi obho odi aḅẹtōn bọ tọbho bho, obho ạbhel ezira ạseghe tạlile bho tẸnaan, pobo tatu.

Oḍighi tạPol mi tạTesalonika

¹Enyina nịvo nịvo, iiḅi aburumōr, neelōghōm mobho oru obho tezōor mi tenyina otu ḍio moobho ạar ni be. ²Enyina meelōghōm mobho, keḍio ezōor usi tenyina mi tạTesalonika, ubhira ni ụloki zezōor rẹgheer mi taFilipai. Toomo iibha obo ọlokian ariḍien ezōor ạka ni obho Ẹnaan obhꞌezōor ạnogho ni ezōor mọoghuanaan ologhi mọgba ọnogho enyina mooḅi adōm obho ạḍua todi karu obho. ³Ezōor ubhin io mologhi ipesi, ọgbaay iben, ọgbaam dōm obho ọnogho enyina moobiōghōm onyiin enyina. ⁴Kpẹlen nꞌipa, tẹzo bho Ẹnaan nạava zezōor ạmiin moru ugey arōoy olo tetue ni ẹgba mooḅi adōm obho odi ạnogho zezōor obho. Ezōor ụgba ḍio mibha bho ọḅaaleni iloghi arōoy, ezōor ụgba ghạ mọḅaaleni ologhi odi Ẹnaan obo bho alōghōm bọ miloghi ezōor obho. ⁵Enyina meelōghōm mobho ezōor upin io mẹmel ọnu koru tenyina. Ezōor ubhin nạ ḍio tọnuekpete iiniom koru. Ẹnaan be kalōghōm. ⁶Ezōor ụva nạ ḍio rōoy mọlogh ezōor meghuan, enyina bolobolo ịnon arōoy ẹkona. Tibha ezōor oru miteledōm taKraist obho, ezōor kutue ni ogbẹel enyina mọkpo, ⁷keḍio ezōor usōoriōm ni lōor tamen obho ezōor ụrolan enyina obho, koniin olo naakō nwụny odi. ⁸Enyina iḍigh tologhi ezōor magey molo tebum etulan obhꞌezōor kezōor ụmara ḍio mọnogho enyina be mọnuekpete ooḅi adōm obho tẸnaan, ụnogho zenyina nꞌạkar aghuḍum obhꞌezōor. ⁹Iiḅi aburumōr, enyina nẹekar elōghōm menoman alikumuan oḍighi obhꞌezōor, ezōor ụḅar ghạ muḍugul nꞌootaany koḍighi moḍighi obho molo ezōor ụnogho ḍio zenyina mịiḅaghami men obho ezōor ụgba ghạ ụnogho enyina mọnuekpete ooḅi adōm obho ạḍua bọ tẸnaan aru obho.

¹⁰Enyina nꞌẸnaan tetue ni ekiran ezōor mịzo mobho eḍighiom ạar ezōor mi tenyina obo bho imōruōm obho ịneghe ni ịman isel nạ ni ịman, ọpionuman ẹkona ịtol nạ ḍio. ¹¹Enyina neelōghōm mobho ezōor ụrolan enyina kẹzo bho ooḅi ọde nạtolan ghạ rụnwuny odi obho. ¹²Ezōor uḍighi miloghi enyina ọghuemi, omina ọkparami, keḍio ezōor ụkpaariom ghạ molo enyina keḍighi ghạ mibha iḍigh tologhi tẸnaan, obo bho abheleghi enyina mobhin ạni abin Ade-Ọolema nꞌeghuan obhꞌodi obho.

¹³Tebum iibha bho nạ bẹleni, kezōor nọnogho nạ mẸnaan lịsebh moomo amen, molo amen obho ezōor ubhin madōm obho tẸnaan uruom enyina bho, enyina ịmoghon ni, imina nạ ibhin kadōm olo ạḍua tōoy karu ḍio, ạkar adōm tẸnaan, obho odi moḍighi tenyina obo bho imōruōm obho. ¹⁴Enyina, iiḅi aburumōr, onyiin ẹzo bho imutenaan enyina bho pẹzo imutenaan rōoy obho tạJizos Kraist ibhꞌạrasosi obhꞌaJudia. Ẹzo bho enyina ịmiinom tạravo arōoy enyina bho pẹzo eedi nạ ịmiinom tạravo arōoy aJu obho, ¹⁵obho ighigh bọ mạJizos Kraist, ịze nạ marizil obho, ịnogho nạ zezōor mịiḅaghami tebum adōm obho, molo iibha bho iḅẹebh ni magey tologhi tẸnaan. ¹⁶Eedi ịmaranuan ni kōoy kōoy ẹva moḍighi olo ezōor kọḅele mọgba ghạ adōm obho ọnogho arōoy ịnon aruubhugh molo eedi kẹteeny ạni mịbhelegha. Oḍighi ịkarabh obhꞌeedi neemute egbẹbh, molo esiibha ạlile bho tẸnaan nạvimoghom eedi magey.

ẠPol ạva mọghi omina ọmiinan eedi

¹⁷Iiḅi aburumōr, tọbam amen obho ezōor ụgbaranuan enyina bho, — tiikpōogh obho be, tạruumugh obho ḍio, — eebhia enyina esibh ezōor magey molo ezōor ụva ghạ ni magey momina ọmiin enyina. ¹⁸Ezōor ọto ghạ momula oru tenyina. Ạkar ạami ạPol tepẹl ni monyiin amen mobho ạami ụva ghạ momula oru tenyina keḍio aSetan omōrō ḍio nomōrō. ¹⁹Ẹkaraan aḍighi kezōor ọteeny moḍuom ologhi bolobolo nꞌọḅaal ologhi nꞌeghōony ibo mi taghisigh tạJizos Kraist tamen obho odi tatu obho? Enyina ḍio gạ? ²⁰Enyina peghuan ezōor nꞌọḅaal ologhi ezōor.

¹Ikunughi obho, ezōor umina ḍio orue mọkparam molo ụutua ni molegheri ọrol tẠtens ²orōm aTimoti umōr obhꞌezōor karu tenyina. Odi aḍigh nꞌezōor naḍighi moḍighi tẸnaan, nạgba ạni ghạ mooḅi ọnuekpete adōm obho igboloman nꞌaKraist obho. Ezōor urōm odi moru ọghuemi iloghi enyina nꞌọlogh ạvo ọnogho enyina mi tiloghi omōruōm enyina, ³molo bọbon onyiin enyina okiraan io amula mebum ịiḅaghami obho. Enyina nịvo nịvo neelōghōm mobho ịiḅaghami bhibha iru monyiin ẹde ịto tẸnaan mi tezira. ⁴Amen obho ezira ụrolan bọ bho, ezōor ụḅoki ḍio mọgba ọnogho enyina mobho ịiḅaghami tetu ni ẹteenyom ezira, kẹzo bho enyina meelōghōm nạ bho, pẹzo ịkar imute nạ. ⁵Pạar obho aḍighi kạami tatōm bọ maTimoti moru tenyina bho. Ạami utue mu mọkparaghiom, pạar obho ạami urōm bọ zodi moru ọva ọmiin ologhi omōruōm enyina bho. Ạami ụutua idi kolo eru obho nạadegh enyina enyina imeel molo oomo oḍighi obhꞌezōor nạabhe ạman.

⁶Debia ḍio mobho aTimoti arughẹel nạgba miiḅi ạnogho ezōor milo igboloman nꞌologhi omōruōm enyina nꞌetulan enyina. Odi nạagba ạnogho zezōor mobho enyina nẹetua ghạ zezōor moomo amen, nꞌobho enyina nẹva nạ magey mọmiin ezōor kẹzo bho ezōor nọva ghạ nạ bho. ⁷Molo, iiḅi aburumōr, toomo ịiḅaghami nꞌọmiinom obhꞌezōor, ologhi ezōor nạḅaal ni tilo igboloman nꞌenyina. Ologhi omōruōm obhꞌenyina pobho nạḅaaleni miloghi obhꞌezōor, ⁸ebum obho esiibha, ezōor nọokar noḍum aghuḍum obho, erumolo enyina ịmaramiom ịghuemiom ghuḍum enyina mi tObạmọogh obho. ⁹Esiibha, tebum enyina, ezōor totue ni ọnogho lịsebh mẸnaan. Ezōor nọsebh ni zodi mebum ọḅaal ologhi, obho ezōor ụteeny taghisigh Ẹnaan obhꞌezōor mebum enyina bho. ¹⁰Ezōor ubhin uḍugul mꞌootaany nogbẹelom ghạ zodi nꞌooḅi ologhi molo ezōor komina kọmiin enyina nꞌalōor ezōor, ọgba ọnogho enyina ogbẹbhẹghiōm tologhi omōruōm obhꞌenyina.

¹¹Ẹnaan Ọde bhꞌezira nịvo nịvo nꞌạJizos Kraist Obạmọogh ezira bho, aghuuron ni mebōom olo ezōor kọḅol koru tenyina. ¹²Obạmọogh obho aḍighi ni ạbughe metulan enyina molo enyina onyiin katulan monyiin, ketulan nạ moomo arōoy togbo enyina, ninii eru eleeny etulan obho ezōor utulan enyina bho. ¹³Tẹzo bho, podi oḍighi iloghi enyina ọghuemi nꞌolo enyina tẹneghe ẹman mi taghisigh tẸnaan Ọde bhꞌezira, tamen obho ạJizos Obạmọogh obho tatu nꞌoomo obo bho iru bọ milꞌodi obho.

Oḍigh aghuḍum olo aḍigh tologhi tẸnaan

¹Tẹzo olo ọkpete okunughiom, iiḅi aburumōr, enyina nẹetuugha tezōor moḍigh aghuḍum obho enyina teḍum teḍigh ni tologhi tẸnaan. Ẹzo bho nạ, pẹzo enyina nẹtuugh nạ neḍum. Keḍio esiibha bho, sesen ni, tebum aḍien tạJizos Obạmọogh obho, iḍum mepuom suo. ²Enyina neelōghōm mịtughumiom obho ezōor ọtughumiom enyina bho, obho ịḍua iru tịnyaam tạJizos Kraist Obạmọogh obho. ³Iibha pịto tẸnaan mi tenyina. Odi nạva molo enyina keḍum ooḅi aghuḍum nꞌọḍua ọman tịkarabh eḍighiom ạar. ⁴Oomo enyina ilobhir ạnwuny obho ịkpe ni molo enyina kelōghōm mẹzo obhin ạni mi tebōom olo ạneghe ni. ⁵Odi opin io mạni mi tịitua ẹmar-arōoy obho kobo bho ilōghōm io mẸnaan nepin obho. ⁶Tiibha bho, bọbon ōoy oḍighi ḍio mịkarabh akōrōnuan mumōr odi tibha odi ạteeny obho. Ezōor nọogba ghạ mibha bho ọnogho enyina keḍio ezōor digha omina ookiom enyina mobho Obạmọogh obho tạliom ni marōoy ilo iḍighi mibha bho. ⁷Ẹnaan abheleghi ezira moḍum ooḅi aghuḍum, odi obheleghi ḍio ezira moḍum aghuḍum opesiom ạraani. ⁸Tibha bho bẹleni, kōoy kōoy olo agin ịtughumiom bhibha, odi ogin io mōoy, odi agin mẸnaan obo bho ạnogho enyina mẸmugh Iigbia odi obho.

⁹Ạar olo ọga omina ọge ilo igboloman nꞌetulan aburumōr obho ọnogho enyina olo, ebum obho Ẹnaan nịvo nịvo nạatughumiom enyina mẹzo olo onyiin katulan monyiin. ¹⁰Pẹzo nạ enyina nẹetuugh nạ ịrolan nꞌoomo aburumōr obho idi toomo ebhugh obhꞌaMasidonia, molo, iiḅi aburumōr, ezōor noosen ni enyina motulan opuom esuo. ¹¹Ịtuugha moḍum aghuḍum ạbiribirim. Kōoy kōoy aanon aḍighi moḍighi odi be, akumuan milo ookuōm aghuḍum odi kẹzo bho ezōor nọogba ghạ ụnogho zenyina obho. ¹²Enyina eḍighi mibha bho, penyina oḍigh eghuan taghisigh arōoy obo bho imōruōm io maKraist obho, nꞌolo enyina imina nạ ḍio eḍum aghuḍum olo oḅeleriom alōor mọnon ōoy mookō enyina.

Ẹzo Obạmọogh obho tamina atu

¹³Iiḅi aburumōr, ezōor nọva molo enyina kelōghōm ạni magey obho tibha igboloman nꞌobo bho nẹebho bho molo enyina ịtol tịitu, kobo bho ịteeny io nọteeny bọbon oḍuom ologhi obho. ¹⁴Ẹzo bho ezira umōruōm mobho ạJizos ạbho kamina aḅetunu tọbho bho pẹzo ezira umōruōm nạ mobho Ẹnaan tapin ni nạ atu mạJizos nꞌobo bho imōruōm odi ibha nẹebho bho.

¹⁵Iibha pịtughumiom tObạmọogh obho ibha ezōor nọgba ọnogho enyina, bho ezira obo bho idi nini taghuḍum mi taḍuma bho tObạmọogh obho, ezira utẹnōm io taghisigh mobo bho nẹebho bho. ¹⁶Igbōgh ịto tẹtol ni, ọmoghon moghōrōkō uvẹmụ itelema bho nꞌoghur eeḍue bho tẸnaan, keḍio Obạmọogh obho nịvo nịvo tạḍua tạnyu obho asōor atu. Obo bho imōruōm maKraist kịbho bho tepira eḅerenu nꞌaghuḍum, ¹⁷keḍio ezira obo bho idi nini nꞌaghuḍum obho tookōbhōghian monyiin esi nꞌeedi mi teḅōghōghaan obho mọmiinan Obạmọogh obho mi tạnyu obho. Keḍio, pẹzo ezira tọtolan nꞌObạmọogh obho moomo amen. ¹⁸Tebum ibha bẹleni, ipinom nꞌọḅaal ologhi mọnuekpete bhobho, onyiin ạderiom monyiin.

Ịmara meḅōrō mamen Obạmọogh obho tatu

¹Aburumōr, ạar olo ọga omina ọge ọnogho enyina milo igboloman nꞌamen nꞌaruḍuma ilo abaabha temute olo. ²Enyina nịvo nịvo meelōghōm mobho aḍuma tObạmọogh obho tatu tekperenom kẹzo bho ọḅa nạki momiigh aviigh muḍugul obho. ³Tamen olo arōoy nekōl kua, “Oomo ọkpo needeny, ịiḅaghami ilo mu,” keḍio tekperenom be pọbho ọteeny eedi. Eedi irue ḍio emuzōnaan, ẹegama bho tẹtol kạni olo odi nꞌegun eghun. ⁴Keḍio enyina, aburumōr, ilo tọkinim molo aḍuma bho ọnogho ḍio enyina mekperenom kọḅa olo natu viigh. ⁵Oomo enyina arōoy ilo idi tẹḅaal ootaany. Ezira ilo tọkinim uḍugul. ⁶Tibha bho bẹleni, ezira ukoḍiiy mu kịnon arōoy, itu oḅerenu ookō alōor ezira. ⁷Uḍugul pamen arōoy nekoḍiiy ghạ; uḍugul pamen amiim nẹze ghạ rōoy. ⁸Keḍio ezira obo bho uru bọ milꞌẹḅaal obho, oḅerenu ookō lōor ezira. Itu ọlokia mạsuoma ologhi omōruōm nꞌetulan okpereghiom eeku ezira, ozua meghōony oḍuom ologhi ịbhelegha bho. ⁹Ẹnaan ọson io abheleghi ezira moru ọmiinom tạlile bhꞌodi. Odi abheleghi ezira mọteeny ịbhelegha mi tạJizos Kraist Obạmọogh ezira bho, ¹⁰obo bho ạtuan ezira kạbho bho molo erumolo ezira nọobho bolobolo dọbho ḍio ẹkona ezira otul nꞌodi oḍum tamen olo odi tatu. ¹¹Tebum ibha bẹleni, onyiin ạghuemi mologhi onyiin abhōbhẹ kẹzo bho enyina idi nạ bọ siibha bho.

Aliiki nꞌiipuruan ikunughi obho

¹²Iiḅi aburumōr, ezōor nookiom ni molo enyina kẹnogho moghiilaan mobo bho neḍighi moḍighi tObạmọogh obho mi togbo enyina, obo bho Obạmọogh obho nạason aseeri mobhin enyina oreliom ọtughumiom enyina nạ bho. ¹³Ịnogho zeedi mịkanya oghiilaan nꞌetulan tebum oḍighi obho eedi neḍighi obho. Oomo enyina ịtolan nꞌekima.

¹⁴Sesen ni, iiḅi aburumōr, iikiom mobo ẹgbuor obho, mẹghuemi mologhi obꞌẹeḅoogh obho, mẹlogh ạvo mẹnogho mobo bho idugh tologhi omōruōm obho mẹrolom kōoy kōoy nꞌalideny alōor. ¹⁵Ímōrō ghạ onyiin amulumian monyiin mọkarabh, ịitua ghạ moomo amen mẹzo olo onyiin taḍighi miiḅi ạnogho monyiin, ẹnogho nạ moomo arōoy.

¹⁶Ịḅaal ologhi moomo amen, ¹⁷Iikpulughu moomo amen. ¹⁸Ịsebh ghạ mẸnaan toomo ẹmorokpo. Iibha pibha Ẹnaan nạva mọmiin taghuḍum enyina obo bho idi tạJizos Kraist obho.

¹⁹Íḍime ghạ nyạn Ẹmugh Iigbia bho odi tenyina bho. ²⁰Iínon ghạ mẹpue mọnuekpete adōm obho tẸnaan. ²¹Ịḍa kạar kạar meenon, mẹbham mibha ịneghe bho, ²²mẹkporion rạvo enyina tibha ịneghe ḍio bho.

²³Ezōor nookpulughu mẸnaan obo bho ạnogho ezōor mekima bho kaḍighi enyina kạneghemi toomo eḍighiom ạar, kạmaar kạbham, mẹmugh obho nꞌịitua bho nꞌiikpōogh obhꞌenyina, kaseeri molo ụmiin io bọbon ịkarabh taḍuma bho ạJizos Kraist Obạmọogh ezira tatu obho. ²⁴Odi obo bho abheleghi enyina bho taḍighi nạ ni nạ kua, ebum obho odi obi ghạ ḍio bho.

²⁵Iiḅi aburumōr, iikpulughu ạni mẹnogho ezōor.

²⁶Ipuruan moomo aburumōr obho mebhin etulan meḅolom eedi.

²⁷Ạami nạkarana tịnyaam aḍien tObạmọogh obho ạnogho enyina molo enyina ịḅele ḍio moghōl ọbhereer obhobho taghisigh oomo aburumōr obho.

²⁸Inwo tạJizos Kraist Obạmọogh ezira bho ẹrolan nꞌoomo enyina.