1 Jọn

1 Jọn

Ẹmu obho

Ekpo-ọnuekpete aghuḍum obho

¹Ezōor ụge notuom enyina milo igboloman nꞌEkpo-ọnuekpete aghuḍum obho, obho ạrol bọ kꞌọḅẹl egbiom ọlem obho; obho ezōor nọomoghon; umina uunon ụmiinom nꞌariḍien ezōor, ụbhamam nạ nꞌạravo ezōor. ²Amen odi aghuḍum obho aru amute tẹmar-arōoy obho, ezōor ọmiin, molo ezōor nọgbaam ọnogho enyina olelemi tilo igboloman nꞌaghuḍum obho ikunughi olo bho, obho ạrol bọ tỌde bho keḍio uru uḍighi ezōor ulōghōm odi. ³Ibha ezōor ụmoghon ụmiin obho pibha ezōor nọgba nạ ọnogho enyina, molo enyina etul nꞌezōor mi tookōbhōghian obho ezōor ụteeny bọ mi tỌde bho nꞌỌony obhꞌodi ạJizos Kraist obho. ⁴Ezōor nọge miibha bho, molo ọḅaal ologhi obhꞌezira agbẹbh ạman.

Ẹnaan ẹḅaal

⁵Iibha padōm obho ezōor ụmoghon bọ tọnu Ọony obhꞌodi obho, obho ezōor nọgba ọnogho enyina bho. Ẹnaan pẹḅaal keḍio todi bọbon ọkinim olo. ⁶Erumolo ezira udi tọkinim ku nokōl ghạ mezira ọteeny ookōbhōghian nꞌodi Ẹnaan, tịnu nꞌeḍighiom ạar obhꞌezira nẹgba miben be. ⁷Erumolo ezira udi tẹḅaal obho kẹzo bho odi Ẹnaan odi tẹḅaal obho, pezira, onyiin ọteeny ookōbhōghian mi tonyiin, keḍio ịḅaal tạJizos Ọony obhꞌodi taatōl moomo ịkarabh ezira ạḅaaleni.

⁸Erumolo ezira ughōl mezira ịkarabh iloghi ilo, pezira noobiōghōm silōor ezira, agey obho ilo nạ tezira. ⁹Kezira ootuman mịkarabh ezira ọnogho mẸnaan, odi tapin ni mebum oguan obhꞌodi aḍighi mibha ịneghe bho ạḅelemaan ezira mịkarabh ezira aatōl ezira ạḅaaleni mi toomo ịkarabh eḍighiom ạar. ¹⁰Erumolo ezira ughōl mezira doḍighi ghạ ḍio mịkarabh, pezira nọgbaam Ẹnaan miben. Ọnuekpete bhꞌodi ẹko olo nạ tezira.

AKraist obo nạamaranuan Ẹnaan naasen odi ạnogho ezira

¹Ịbam ạnwuny ạmi, ạami nạge miibha bho atuom enyina molo enyina iḍighi mu mịkarabh, keḍio ōoy olo aḍighi mịkarabh, pạatua ghạ mobho ạJizos Kraist, obho odi be aru mooḅi obho, nạamaranuan mỌde bho naasen zodi ạnogho ezira. ²Odi aKraist nịvo nịvo pobo ụboromiom mẸnaan molo ezira kọteeny mọḅelemaan ịkarabh ezira, ịkarabh ibhꞌezira be ḍio, ịkarabh oomo arōoy ẹmar arōoy obho.

³Erumolo ezira nokiilaan oḍighi mibhꞌịto bho tẸnaan, pezira ọkar olōghōm mobho ezira noolōghōm zodi. ⁴Kōoy kōoy olo aghōl modi alōghōm Ẹnaan koghiilaan io aḍighi mibhꞌịto bho todi, odi ọgba miben, agey obho ilo nạ todi. ⁵Kōoy kōoy olo aghiilaan aḍighi mibhꞌoghōrōkō bho tẸnaan podi naḍeeriom mobho odi atulan Ẹnaan ạman nꞌoomo ologhi odi. Iibha pẹzo ezira tolōghōm mobho ezira ụteeny otul ọnu nꞌodi. ⁶Kōoy kōoy olo aghōl modi nạateeny otul ọnu nꞌẸnaan, podi aḍum oḍigh aghuḍum obho ạJizos Kraist aḍum obho.

Omoom olōgh obho

⁷Ibꞌiiḅi aburumōr, iibha bho ạami ụge natuom enyina bho omoom olōgh io. Onyiin odi ugbaany olōgh obho, obho enyina ịmoghon kọḅel egbiom obho. Ugbaany olōgh obho, padōm obho enyina nẹemoghon obho. ⁸Keḍio ạkar odi iibha ạami nạge bho omoom olōgh olo agey obho nọmiin taKraist nꞌenyina mobho ọkinim obho nạḍua, ạkar odi ẹḅaal obho nạake nạmua.

⁹Oōy olo aghōl odi odi tẹḅaal obho kụ nạlogh ḍien mumōr odi, agey obho ilo todi, odi odi nini tọkinim obho kesiibha. ¹⁰Kōoy kōoy olo atulan mumōr odi, odi odi tẹḅaal obho. Bọbon ạar olo idi todi molo ọnon ōoy kạtuan odi kaḍighi mịkarabh olo. ¹¹Obo bho ạlogh ḍien mumōr odi obho odi nini tọkinim. Odi natele tọkinim mobho keḍio olōghōm io mesi odi nạki, ebum obho ọkinim obho naapuughi riḍien odi.

¹²Ạami ụge natuom enyina, ịbam ạnwuny obho, ebum obho nọotuan tebum aKraist kụ nọoḅelemaan enyina mịkarabh enyina. ¹³Ạami ụge natuom enyina ạburude bho, ebum obho enyina neelōghōm zodi obo bho aḍum ni ạrol kọḅel egbiom obho. Ạami ụge natuom enyina ạnwuny ughẹel obho, tebum obho enyina neeḅe ipuom mObo-oḍighi mịkarabh obho.

¹⁴Ạami ụge natuom enyina ạnwuny obho, ebum obho enyina neelōghōm mỌde bho. Ạami ụge natuom enyina ạburude obho, ebum obho enyina neelōghōm zodi obo bho aḍum ni ạrol kọḅel egbiom obho. Ạami ụge natuom enyina ạnwuny ughẹel obho ebum obho enyina ịteeny mịnyaam obho. Ekpo-ọnuekpete bho tẸnaan odi tiloghi obhꞌenyina molo enyina neeḅe ipuom mObo-oḍighi mịkarabh obho.

¹⁵Ítulan ghạ ghuḍum ẹmar-arōoy obho nꞌoomo iibha idi bọ tẹmar-arōoy obho. Enyina etulan maghuḍum ẹmar-arōoy obho penyina ịteeny mụ metulan Ọde bho mi taghuḍum enyina. ¹⁶Iibha idi bọ tẹmar-arōoy obho pibha iikpōogh obho nẹnyaghagh moḍighi obho, nꞌibha ariḍien obho nẹnyaghagh mọteeny obho, nꞌọbughia lōor tibha nọoteeny tesuo aghuḍum obho. Iibha bho bọbon olo ạḍua tịto Ọde bho karu olo. Oomo eedi ịḍua tịto ẹmar-arōoy obho keru. ¹⁷Ẹmar-arōoy obho nꞌoomo ọkpo bho arōoy nẹva mọteeny obho neebhẹ nemuneen, keḍio odi obo bho naḍighi bọ mibha Ẹnaan nạva bọ bho taḍum aghuḍum olo ikunughi olo.

Obo ọlogh aḍien taKraist

¹⁸Ạnwuny ạmi, ikunughi obho natuan. Nọogba ọnogho enyina mobho obo ọlogh aḍien taKraist natu, keḍio esiibha ọlogh obo ọlokian ariḍien odi neemute etu, pạar obho ezira nolōghōm mobho ikunughi obho natuan. ¹⁹Arōoy bhibha ịkar io erelian nꞌogbo bhꞌezira, pạar obho eḍighi bọ keedi ịgbaranuan ezira bho. Eedi netelian nꞌogbo bhꞌezira bọ, peedi kịtolan nꞌezira. Eedi ịgbaranuan kua molo ọkar ọmiin mobho oomo eedi ịkar io erelian nꞌogbo bhꞌezira.

²⁰Enyina nị dụgh, Oōy Iigbia bho naazuughiom enyina mẸmugh Iigbia bho, molo oomo enyina neelōghōm magey obho. ²¹Ạami ụtuan io mebum obho enyina ilōghōm io magey obho kạami ạge miibha bho natuom enyina, ạami ụtuan tebum obho enyina neelōghōm magey obho nꞌobho enyina neelōghōm nạ mobho iben ịḍua ghạ ḍio tagey obho emute.

²²Okōr ōoy ọkar ọgba miben obho? Odi obo bho ạbharanaan bọ aghōl mạJizos paKraist obho ḍio bho. Odi ōoy obhobho pobo ọlogh aḍien taKraist. Odi nạabharanaan mỌde bho nꞌỌony obho, ²³Kōoy kōoy olo ạbharanaan mỌony bho odi olo ạni nꞌỌde bho. Kōoy kōoy olo ạgba miiḅi mỌony obho odi odi ạni nꞌỌde bho.

²⁴Tebum iibha bho bẹleni, ịkua magey mẹbhamam tiloghi obhꞌenyina madōm obho enyina ịmoghon bọ kọḅel egbiom obho. Erumolo enyina ịbhamam mibha enyina nẹemoghon kọḅel egbiom obho, penyina ọrolan ạni Ọony bho nꞌỌde bho moomo amen. ²⁵Aghuḍum olo ikunughi olo poobho aKraist nịvo nịvo aguanaan mọnogho ezira.

²⁶Ạami ụge miibha bho natuom enyina tibha igboloman nꞌobo bho nẹva mebōom oobiōghōm enyina bho. ²⁷Enyina nị dụgh, aKraist naazuughiom enyina Ẹmugh Iigbia bho. Enyina obo bho netughom mẸmugh Iigbia bho, ịva mu mọnon ōoy mọtughumiom enyina. Odi Ẹmugh Iigbia bho pobo tạtughumiom enyina kạar kạar. Ibha odi nạtughumiom obho pagey obho, iben ilo. Ikiilaan mịtughumiom Ẹmugh Iigbia bho mẹrolan ghạ maKraist.

²⁸Lꞌagey, ạnwuny ạmi, ịtolan nꞌodi molo ezira ọteeny mọoghuanaan ologhi tamen obho odi tamute atu obho molo ezira ukiil io zodi rẹgheer taḍuma obho odi tatu obho. ²⁹Enyina neelōghōm mobho aKraist be mobho aru mooḅi ōoy keḍio ilōghōm meghōl kua, kōoy kōoy olo aḍighi mibha ịneghe bho noonwe zodi omina ọmar.

Ạnwuny tẸnaan

¹Ịmiin etulan olo Ọde bho abhin atulan ezira. Etulan obhꞌodi ạbugh magey molo ubhin ezira ughōl mạnwuny tẸnaan. Ẹzo bho nạ pẹzo ezira idi. Ẹmar-arōoy obho ilōghōm io mẸnaan pạar obho eedi ilōghōm io zezira bho. ²Ibꞌiiḅi aburumōr, esiibha ezira ạnwuny tẸnaan keḍio dọkar io ọmaar olōghōm milo ezira tọtol. Oomo iibha ezira ulōghōm obho, pezira tọtol ạni ni kaKraist men odi amute aru, ebum obho ezira tọmiin ni zodi kạkar ẹzo bho odi odi obho. ³Kōoy kōoy olo ạteeny oḍuom ologhi obhobho mi taKraist naaseeri lōor odi ạḅaaleni kẹzo bho aKraist ạḅaal ni ạman obho.

⁴Kōoy kōoy olo aḍighi mịkarabh naasōor olōgh tẸnaan, ebum obho oḍighi ịkarabh pu nopẹl olōgh tẸnaan. ⁵Enyina neelōghōm mobho aKraist ạḍua aru mootōl ịkarabh arōoy, nꞌobho todi bọbon ịkarabh ilo. ⁶Keḍio kōoy kōoy olo odi nꞌaKraist ọrol ghạ ḍio aḍighi mịkarabh. Kōoy kōoy olo ạrol naḍighi mịkarabh dọmiin ghạ ḍio zodi, dolōghōm nạ ḍio zodi.

⁷Ímōrō ghạ, ạnwuny ạmi, ōoy aabiōghōm enyina. Kōoy kōoy olo naḍighi mibha ịneghe bho, pooḅi ōoy kẹzo bho aKraist aru mooḅi ōoy obho. ⁸Kōoy kōoy olo naḍighi ghạ mịkarabh, polo Eru obho, ebum obho Eru obho ki tọḅel egbiom obho aḍighi mịkarabh. Ọony tẸnaan ạtuan ebum obhiẹmi ariiḍighi Eru obho kamute aru.

⁹Kōoy kōoy olo noonwe umina ụmar ọrol ghạ ḍio aḍighi mịkarabh, tebum obho amarugh eḍighiom ạar tẸnaan idi nꞌodi obho, nꞌebum obho Ẹnaan aru mỌde odi obho, odi ọrol io ạrol aḍighi ghạ mịkarabh. ¹⁰Iibha pibha tọmiin makẹrẹkẹrẹ mi tạnwuny tẸnaan nꞌạnwuny Eru obho. Kōoy kōoy olo oḍighi ḍio mibha iizuan obho atulan mumōr odi, Odi olꞌEru obho, Ọony tẸnaan io.

Onyiin atulan monyiin!

¹¹Iibha pạkar adōm obho enyina ịmoghon kọḅel egbiom obho mezira onyiin atulan monyiin. ¹²Ezira ụtol io kaKen. AKen olꞌEru obho, molo odi aghigh mạkar umōr odi. Odi ạtuan ebum eeghe kaghigh umōr obhꞌodi? Ebum obho eḍighiom ạar odi iḅẹebh ni, iibha tumōr odi ịneghe ni.

¹³Tẹzo bho nạ, iiḅi aburumōr ạmi, erumolo ẹmar-arōoy obho ịlogh enyina ḍien, iímōogh ghạ. ¹⁴Ebum obho ezira utulan burumōr ezira bho, pạar obho aḍighi bọ mobho ezira noolōghōm mobho ezira noopẹl mọbho oḍigh taghuḍum obho. Kōoy kōoy olo otulan io mumōr odi, odi odi ni tọbho. ¹⁵Kōoy kōoy olo ạlogh ḍien mumōr odi pọokom menu, keḍio enyina neelōghōm mobho ọokom menu ọteeny ghạ ḍio maghuḍum olo ikunughi olo mi todi. ¹⁶Iibha pesi ezira ulōghōm mẹmu etulan, tibha aKraist ạnogho lōor odi ḍuugh mebum ezira bho. Ezira ẹkona ịgbaan ni molo ezira kọnogho ghuḍum obhꞌezira ḍuugh mebum aburumōr obhꞌezira. ¹⁷Erumolo ọola ạmiin umōr odi tekulom kakpereghi riḍien odi mi tumōr obhꞌodi, odi tạgba ẹko mobho odi atulan mẸnaan mi tologhi odi? ¹⁸Ạnwuny ạmi, etulan ezira otu ḍio metulan ọnu be, eru mạkar agey etulan ilo tọmiin teḍighiom-ạar ezira.

Ọteeny ọoghuanaan ologhi taghisigh tẸnaan

¹⁹Iibha pạar obho aḍighi bọ mobho ezira ulōghōm mobho ezira uru milꞌagey obho, nꞌạar obho aḍighi nạ bọ mobho ezira ụteeny moḍuom ologhi taghisigh tẸnaan obho. ²⁰Erumolo ezira ụteeny mịitu tiloghi ezira, ezira ulōghōm mobho Ẹnaan ạbugh ni apu miloghi ezira amina alōghōm nạ kạar kạar. ²¹Tebum iibha bẹleni, iiḅi aburumōr ạmi, erumolo iloghi ezira ilo tịitu, pezira nọoteeny mọoghuanaan ologhi mi taghisigh tẸnaan. ²²Ebum obho ezira nookō raalōgh obhꞌodi obho, oḍighi nạ mibha iḍigh tologhi odi obho, pụ kạar kạar olo ezira ugbẹel podi ọnogho ezira. ²³Iibha paraalōgh obhꞌodi, mezira omōruōm ḍien obho tạJizos Kraist, Ọony obhꞌodi, onyiin atulan nạ monyiin kẹzo bho aKraist ạto ạnogho ezira bho. ²⁴Kōoy kōoy olo aakō raalōgh obho tẸnaan odi odi nꞌẸnaan, Ẹnaan odi nạ nꞌodi. Ebum Ẹmugh Iigbia bho odi ạnogho ezira bho, pạar obho aḍighi bọ kezira ulōghōm mobho Ẹnaan odi nꞌezira bho.

Ịzal oḍigh ạruumugh

¹Iiḅi aburumōr ạmi, ímōruōm ghạ moomo arōoy ilo nekōl meedi ẹteeny mẸmugh Iigbia bho. Ịḍa meenon merumolo ẹmugh obho eedi ịteeny obho aru molo tẸnaan. Ạar obho aḍighi obho, ọlogh iben arizil neemute etu elela toomo ẹmar-arōoy obho. ²Ẹzo olo oḍighi olo enyina kelōghōm mōoy olo ạteeny mẸmugh obho tẸnaan, piinon ghạ mōoy olo nạgba amutiom mobho ạJizos Kraist abhin nꞌiikpōogh alōor obho aru. Odi pobo ạteeny mẸmugh obho tẸnaan. ³Kōoy kōoy olo nạparanaan mạJizos ọteeny io mẸmugh obho tẸnaan. Ẹmugh obhobho ạḍua todi obo ọlogh aḍien taKraist karu. Enyina nẹemoghon mobho odi natu, keḍio naaru asi siibha tesuo ẹmar-arōoy obho.

⁴Ạnwuny ạmi, enyina ilo tẸnaan, molo enyina neeḅe ipuom miben arizil obho, ebum obho ẹmugh obhobho odi bọ tenyina bho, ạteeny ịnyaam apu miibha iru bọ milꞌesuo ẹmar-arōoy obho. ⁵Eedi nẹgba ghạ mọkpo esuo ẹmar-arōoy obho molo ẹmar-arōoy obho nẹmoghonyan zeedi, ebum obho eedi iru milo ẹmar-arōoy obho. ⁶Ezira nị dụgh, ezira ilo tẸnaan. Kōoy kōoy olo alōghōm mẸnaan pọmoghonyan ezira, obo bho otu ḍio molo tẸnaan obho ọmoghonyan io zezira. Iibha pẹzo ezira tolōghōm makẹrẹkẹrẹ ẹmugh obho nạgba magey obho nꞌobho nạgba miben obho.

Ẹnaan etulan

⁷Iiḅi aburumōr, itu onyiin atulan monyiin, ebum obho etulan ạḍua tẸnaan karu. Kōoy kōoy olo ạteeny metulan, pu noomina oonwe zodi ọmar, odi alōghōm nạ mẸnaan. ⁸Kōoy kōoy olo ọteeny io metulan olōghōm io mẸnaan, ebum obho Ẹnaan aru metulan. ⁹Ẹnaan aḍighi aḍeeriom mobho odi atulan ezira men obho odi arōm mogini Ọony obhꞌodi aru tẹmar-arōoy obho molo ezira kọteeny ghuḍum mi todi. ¹⁰Iibha pẹmu etulan, olo oghōl ezira kutulan mẸnaan io, odi katulan ezira karōm mỌony obhꞌodi aru molo ezira ọteeny ọḅelemaan ịkarabh ezira.

¹¹Iiḅi aburumōr, ẹzo bho Ẹnaan abhin atulan ezira bho, ezira obhin nạ mẹzo bho onyiin atulan monyiin. ¹²Oōy olo nạamiin ghạ mẸnaan olo. Kerumolo ezira onyiin atulan monyiin pẸnaan ọrolan ezira molo toḍighi metulan obho odi ạneghe ạman mi tezira.

¹³Ebum obho odi ạnogho bọ zezira mẹmugh obhꞌodi obho pạar obho aḍighi bọ kezira ụkar ulōghōm mobho ezira udi nꞌẸnaan, odi odi nꞌezira bho. ¹⁴Molo ezōor ụmiin, keḍio nọgba ọnogho mịnon arōoy mobho Ọde bho arōm aru mỌony obhꞌodi moru Ọpela ẹmar-arōoy obho. ¹⁵Kōoy kōoy olo ạgba amutiom mobho ạJizos aru mỌony tẸnaan, pẸnaan odi nꞌodi, odi odi nạ nꞌẸnaan. ¹⁶Ezira noolōghōm omōruōm nạ metulan obho Ẹnaan ạnogho ezira bho.

Ẹnaan etulan, keḍio kōoy kōoy olo ạteeny metulan odi mi tẸnaan, Ẹnaan odi nạ nꞌodi. ¹⁷Ẹmu etulan obho uḍighi ụneghemi ụman tezira bho, olo ezira kọteeny mọoghuanaan ologhi mi taḍuma ịiruan obho, keḍio ezira tọteeny nạ ni nạ tebum obho aghuḍum ezira mi tẹmar-arōoy obho odi kobho taKraist. ¹⁸Ologhi okpooy ghạ ḍio tetulan. Agey etulan olo ạneghe ni ạman napirighan ghạ mologhi aruugu. Tebum iibha bẹleni odi obo bho ologhi nakpooy obho, ọteeny io magey etulan olo ạneghe ni ạman, ebum obho ologhi odi nakpooy tebum ạliliom obho tọliom odi obho.

¹⁹Ezira utulan ni tebum obho Ẹnaan abhira atulan ezira bho. ²⁰Oōy olo aghōl modi atulan Ẹnaan kụ nạlogh ḍien mumōr odi, podi ọgba miben. Erumolo odi otulan io mumōr odi obho odi nạamiin ghạ moomo amen obho, odi tạgba ẹko mobho odi natulan mẸnaan obo bho odi dọmiin ghạ ḍio bho? ²¹Oobho podi olōgh obho aKraist ạlogh ạnogho ezira bho, modi obo bho atulan mẸnaan obho, atulan nạ kua mumōr odi.

Ẹzo ezira uḅe nopuom ẹmar-arōoy obho

¹Kōoy kōoy olo amōruōm mobho ạJizos aru maKraist obho, odi pọony tẸnaan; kōoy kōoy olo atulan mỌde bho tatulan nạ ni nạ mỌony obho. ²Kamen kamen olo ezira utulan Ẹnaan, nookō raalōgh obhꞌodi pezira olōghōm mobho ezira notulan mạnwuny tẸnaan. ³Erumolo ezira notulan mẸnaan pezira nookō raalōgh obhꞌodi. Keḍio araalōgh obhꞌodi ịimor io epu molo ezira utue ḍio ookō, ⁴ebum obho kọony kọony tẸnaan tatue ni aḅe apuom mẹmar-arōoy obho. Ologhi omōruōm obhꞌezira pobho ezira ubhin noḅiom opuom ẹmar-arōoy obho. ⁵Obo bho imōruōm bọ ighōl mạJizos Ọony tẸnaan obho pobo tetue ni eḅe epuom mẹmar-arōoy obho.

Ịigbaay ilo igboloman nꞌỌony obho

⁶ẠJizos Kraist podi obo bho aru obho. Odi aru aḍighi agbẹbhẹghiōm tozu ạmuum obhꞌodi nꞌịḅaal obho odi azu tọbho bhꞌodi obho. Odi oru ḍio aḍighi agbẹbhẹghiōm tạmuum be, odi ạḅar mụum nꞌịḅaal aḍighi agbẹbhẹghiōm. Ẹmugh Iigbia bho nịvo nịvo nạgba nạ mobho iibha bho iru magey, ebum obho odi Ẹmugh obho aru magey obho. ^7,8Ẹmugh obho nꞌạmuum obho nꞌịḅaal obho pịraar ikiran mịzo ilo ịnu eedi iru monyiin. ⁹Ezira nomōruōm ghạ ni mịigbaay arōoy, keḍio ịigbaay ibha tẸnaan ịghua epu. Iibha pịigbaay obho Ẹnaan ạgba milo igboloman nꞌỌony odi obho. ¹⁰Molo kōoy kōoy olo amōruōm mỌony obho tẸnaan podi naamōruōm mịigbaay obho tẸnaan mi tologhi odi, keḍio kōoy kōoy olo omōruōm io mịigbaay obho tẸnaan naaḍighi zodi Ẹnaan atu mọgba miben, ebum obho odi omōruōm io mịigbaay obho Ẹnaan ạgba tilo igboloman nꞌỌony odi obho. ¹¹Iibha pịigbaay obhꞌodi, modi Ẹnaan nạanogho zezira maghuḍum olo ikunughi olo, keḍio odi aghuḍum obho odi tỌony obhꞌodi. ¹²Kōoy kōoy olo ạteeny mỌony obho nạateeny ghuḍum. Oōy olo ọteeny io mỌony obho tẸnaan aghuḍum olo todi.

Aghuḍum olo ikunughi olo

¹³Ạami ụge miibha bho natuom enyina molo enyina elōghōm mobho enyina nẹeteeny maghuḍum olo ikunughi olo, ạkar enyina obo bho neemōruōm bọ maḍien Ọony obho tẸnaan obho. ¹⁴Ezira ọteeny ọoghuanaan ologhi mi taghisigh tẸnaan, tebum obho ezira nọkar ulōghōm mobho kạar kạar olo ezira ugbẹel olo idi tịto odi, odi tạmoghon ni ezira. ¹⁵Kamen kamen olo ezira ugbẹel odi mạar, odi nạmoghon ghạ ni ezira. Erumolo ịkar eru kua, pezira noolōghōm nạ mobho odi tạnogho ezira kạar kạar olo ezira ugbẹel odi.

¹⁶Kōoy kōoy olo ạmiin mumōr odi olo naḍighi mịkarabh ilo ịlogh io zodi tesi aḍuugh, odi aakpulughu mẸnaan molo Ẹnaan ạnogho zodi ghuḍum. Iibha bho pilo obo bho eḍighi mịkarabh olo ịlogh io zeedi tesi aḍuugh. Ịkarabh ilo ịlogh io mōoy tesi aḍuugh idi, keḍio ạami ụva ḍio molo enyina keekpulughu Ẹnaan milo igboloman nꞌiibha bho. ¹⁷Ịkarabh ịkarabh, keḍio ịkarabh idi molo ịlogh io mōoy tesi aḍuugh.

¹⁸Ezira noolōghōm mobho kōoy kōoy olo noonwe umina ụmar ọtol ghạ ḍio aḍighi mịkarabh, ebum obho Ọony obho tẸnaan naaghuruom zodi, molo Eru obho oru ḍio aḍighi odi mịkarabh.

¹⁹Toomo ibha Eru obho nạto moḍigh kẹrekere ịto nạnogho moomo arōoy ẹmar-arōoy obho, ezira noolōghōm nạ mobho ezira uru milo tẸnaan.

²⁰Ezira noolōghōm mobho Ọony tẸnaan naaru ạnogho ezira mọmoghonyan, molo ezira noolōghōm zodi Ẹnaan obho odi be mobo ịkpe mookpulughu. Aghuḍum ezira idi todi Ẹnaan obhobho nꞌạJizos Kraist Ọony obhꞌodi be. Oobho pạkar odi Ẹnaan obho, nꞌaghuḍum obho ikunughi olo bho.

²¹Iiḅi ạnwuny ạmi, itughuneen silōor enyina mi tiben aruru.