1 Kọrint

1 Kọrint

¹Ạami ạPol obo bho ịḍua tịitua tẸnaan kiru kodi abheleghi ạami moru onyiin oteledōm tạJizos Kraist obho, nꞌạSostenis umōr obhꞌezira ²ụge notuom oomo enyina arōoy ạsosi obhꞌạKorint, nꞌoomo obo bho Ẹnaan naabheleghi ạseghe moru arōoy odi mi totul ọnu nꞌạJizos Kraist, nꞌoomo arōoy obho idi toḍigh kẹrekere aruubhugh ibha nekōl maḍien tạJizos Kraist Obạmọogh ezira bho, olꞌezira be ḍio, olꞌeedi ạni.

³Ạlisebh nꞌekima tẸnaan Ọde bho nꞌạJizos Kraist Obạmọogh obho ẹrolan nꞌoomo enyina.

Ạlisebh ilo idi taKraist

⁴Ạami nạsebh ghạ ni mẸnaan moomo amen mebum enyina, tebum obho odi nạanogho zenyina mọsu ạghusan aḍien mi tạJizos Kraist. ⁵Totul ọnu obhꞌenyina nꞌạJizos Kraist, enyina neeru egbo mẹela mi toomo ẹmorokpo, tạkar oomo ọnuekpete enyina nꞌoomo olōghōm ạar enyina. ⁶Adōm obho igboloman bọ maKraist obho nẹemar eḍigh tiloghi obhꞌenyina egbẹbh ⁷molo bọbon onyiin ạlisebh olo naapẹl enyina olo, suo enyina neḅōrō meruom tạJizos Kraist Obạmọogh ezira bho. ⁸Odi tạmaar nạ ni nạ ạpam enyina ạkuemi ninii ạteeny tikunughi amen obho, molo bọbon ịkarabh olo tọteeny mọgbaam enyina mi tobꞌaḍuma bho ạJizos Kraist Obạmọogh ezira obho tatu obho olo. ⁹Ẹnaan obo bho abheleghi enyina motul ọnu nꞌỌony odi ạJizos Kraist Obạmọogh ezira bho obi ghạ ḍio.

Ạmaḍian arōoy ạsosi ạKorint

¹⁰Iiḅi aburumōr, ạami ubhin tịnyaam ịto bho tạJizos Kraist Obạmọogh ezira bho naasen enyina molo oomo enyina ketul mọnu mi toomo ọnuekpete enyina, molo ạmaḍian ạruuku ịtol teesoḍia enyina. Ịteeny motul ọnu olo agbẹbh ni ạman molo ịitua nꞌeḍighiom ạar enyina etu monyiin. ¹¹Iiḅi aburumōr ạmi, ạami nạḍeghe miibha bho tebum obho ẹde arōoy ilo eghun otu taKloi nẹeḍua iru ịgba imutiom ịnogho ạami mobho ạruruan idi teesoḍia bhꞌenyina. ¹²Ịḅele ạami ulegheri ụgba ụnogho zenyina miibha ạami ụmoghon obho menyina nẹeḍianogh. Onyiin nakōl kua, “Ạami olo tạPol,” ọnon, “Ạami olo tẠpolos,” omina ọnon, “Ạami olo taKifas,” ọnon, “Ạami olo taKraist.” ¹³Enyina nẹeveleghi ẹḍian maKraist. Ụkan mạPol toorẹeny ẹmigheri obho ọnogho enyina gạ? Ubhin taḍien tạPol kozuughiom enyina mụum obho gạ?

¹⁴Ạami nạsebh lẹpuuny mẸnaan mobho ạami uzuom io mụum monyiin enyina tughuneen maKrispas nꞌạGayos ḍio. ¹⁵Bọbon onyiin enyina olo tatue atu ạgba mobho ubhin taḍien ạami kuzuom odi mụum olo. ¹⁶(Ọo agey, ạami azuom nạ mụum mạStefanas nꞌeghun otu odi, ạami ụutua mu merumolo ạami umina uzuom mụum mọnon ōoy.) ¹⁷AKraist orōm io ạami mozuoghom ạrumuum rōoy. Odi arōm ạami mọgba ghạ ọnuekpete ooḅi adōm obho. Ạami upin io moghōrōkō ẹmel ọnu olōghōm ạar arōoy ẹmar-arōoy obho kạgbaam dōm obho, molo ịnyaam ọbho bho taKraist mi toorẹeny ẹmigheri obho otu mapa ạar be.

AKraist pịnyaam nꞌolōghōm ạar tẸnaan

¹⁸Tobo bho nepẹ bho, ẹmu ọnuekpete adōm obho igboloman nꞌọbho bho taKraist mi toorẹeny ẹmigheri obho, ọnuekpete araama be, tezira obo bho nọobhel utẹnẹmi tịkarabh obho, ạkar agey ịnyaam tẸnaan. ¹⁹Ẹegia ọnuekpete iigbia bho aghōl kua,

“Ạami tapiẹmi ni molōghōm ạar ilōghōm ạar arōoy obho,

ạami taḅōr atẹnẹ tọtu mọmoghonyan arōoy ibꞌiloghi obho.”

²⁰Iḍighen siibha bho milōghōm ạar arōoy obho, iḍighen marōoy ibꞌiloghi obho, iḍighen marōoy ibꞌịitua ibha ẹmar-arōoy obhobho bho? Ẹnaan neeḍighi aḍeeriom mobho olōghōm ạar ẹmar-arōoy obhobho iru molōghōm ạar araama.

²¹Ẹnaan, tolōghōm ạar obhꞌodi, abhin aḍighi molo arōoy ipin io tolōghōm ạar eedi eru elōghōm odi. Kpẹlen nꞌipa, iḍigh tologhi odi mobhin ịigbaay adōm araama bho ezōor nọgba bho, mọbhelom obo bho imōruōm obho. ²²Arōoy aJu obho nẹva ghạ mọmiin elẹgh, arōoy ibhꞌaGris obho nẹva ghạ mobhin olōghōm ạar eedi ọmoghonyan ọkpo. ²³Ezira nị dụgh, ezira nọgba ghạ omutiom mẹmu ọbho taKraist mi toorẹeny ẹmigheri obho. Adōm obhobho naḍighi ghạ molo arōoy aJu obho kekpetaan kemeleghu; tarōoy ịnon aruubhugh obho ọnuekpete araama. ²⁴Keḍio tezira obo bho Ẹnaan naabheleghi ạseghe bho, ibha aJu nꞌibha ịnon aruubhugh obho, adōm obhobho paKraist obho aru bọ mịnyaam nꞌolōghōm ạar tẸnaan obho. ²⁵Oḍigh evel tẸnaan ipu ạni ni kua molōghōm ạar arōoy, alidugh alōor odi ẹghua nạ epu mịnyaam arōoy.

²⁶Iiḅi aburumōr, ịitua moḍigh aghuḍum obho enyina ịrol bọ kẸnaan abheleghi enyina ạseghe bho. Oḍigh arōoy obho ẹmar-arōoy obho negbiom ghạ mobho eedi ịteeny molōghōm ạar nꞌịnyaam nꞌeghuan obho ịrol io mịkanya tesooḍia enyina. ²⁷Ẹnaan alōghōm ni kabhin mibha ẹmar-arōoy obho nekōl ghạ moḍigh evel obho mọlokiom ạregheer marōoy olōghōm ạar obho, nꞌobhin ibha eedi nekōl ghạ modughom alōor obho mọlokiom ạregheer mạruukpara bho. ²⁸Odi Ẹnaan ạson ạseghe mibha ẹmar-arōoy obho iinon isōoriōm, imina iinon ịpue bho, ibha eedi nẹetua ghạ nekōl mạar oḍighiom olo bho, mobhin obhiẹmiom ọkpo ibha eedi nẹetua ghạ ekōl mẹla mạar mịkanya bho. ²⁹Iibha nẹgba emutiom mobho bọbon ōoy olo tatue abo taghisigh tẸnaan olo. ³⁰Keḍio enyina, Ẹnaan naabhin atu motul ọnu nꞌạJizos Kraist, aḍighi nạ zodi aKraist mọnogho ezira molōghōm ạar nꞌoḍighi olo ezira koru miiḅi arōoy taghisigh odi nꞌoru ạkar arōoy odi, nꞌọta ezira otughuneen tịkarabh. ³¹Tebum iibha bẹleni, “Kōoy kōoy olo tabo abo ghạ tibha Obạmọogh obho naaḍighi ạnogho zodi obho,” kẹzo bho ẹegia iigbia bho ạkpete bho.

Ịigbaay ọbho taKraist mi toorẹeny ẹmigheri obho

¹Iiḅi aburumōr ạmi, tamen obho ạami uru tenyina mọgba ọnogho enyina mẹmu agey obho Ẹnaan ạḅoki obho, ạami ụgbaam io mẹmel oghōrōkō ibꞌilōghōm ạar arōoy. ²Tamen obho ạami odi ni nꞌenyina bho, ạami ụkar ni alōghōm kạami aḅulo moomo ịnon ọkpo, ạgba ghạ mạJizos Kraist be, nꞌạkar ọbho bhꞌodi mi toorẹeny ẹmigheri obho. ³Molo amen ạami uru usi tenyina, ạami ụrol ni abhiigha tedughom alōor nꞌaruugu mi teesoḍia enyina. ⁴Ạami upin io mẹmel oghōrōkō olōghōm ạar ẹmar-arōoy obho kạgbaam madōm nꞌịtughumiom obhꞌạmi. Ẹmugh Iigbia bho tẸnaan aḍighi aḍereghiom mobho ibha ạami ụgba bho ịḍua tịikpo tẸnaan kiru. ⁵Molo omōruōm obhꞌenyina ịḍua ḍio tolōghōm ạar arōoy keru, ịḍua iru tịikpo tẸnaan kenyina imōruōm.

⁶Oomo ipa ẹkona, ezōor nọgba ghạ ni magey olōghōm ạar ọnogho mobo bho neeḍum igbẹbh rōoy mi tạruumugh obho, keḍio olōghōm ạar obhobho ilꞌesuo ẹmar-arōoy obho ḍio, ilꞌạruula esuo ẹmar-arōoy obho nạ ḍio. Olōghōm ạar ạruula bhibha tepẹ ni emuneen. ⁷Ezōor nọgba ghạ magey olōghōm ạar obho Ẹnaan ạḅoki rōoy ẹmar-arōoy obho obho, keḍio odi ạlem mẹmar-arōoy obho, odi ạseghe aseeri molo obhin ọnogho ezira meghuan. ⁸Bọbon ọola tesuo ẹmar-arōoy obho olo alōghōm molōghōm ạar obhobho olo. Eedi ilōghōm ni bọ, eedi kịkan io toorẹeny ẹmigheri obho mObạmọogh oomo eghuan obho. ⁹Keḍio idi nạ kẹzo bho, ẹegia iigbia bho ạgba amutiom obho maa

“Ibha ariḍien arōoy dẹmiin io bho, nꞌibha areḅeri arōoy dẹmoghon io bho,

nꞌibha iloghi arōoy dẹetua ḍio mibha temute ni obho,

pibha Ẹnaan naakōbhōghi aseerian mobo bho itulan odi obho.”

¹⁰Keḍio ezira pobo Ẹnaan naabhin mẸmugh Iigbia bhꞌodi ạgbaam amutiom mẹmu ọnuekpete ẹḅokia bhibha. Ẹmugh Iigbia bho nạamoghonyan kạar kạar, nꞌạkar ibꞌịitua ẹḅokia bho tẸnaan. ¹¹Kōoy kōoy, ẹmugh obhꞌodi pobo alōghōm kạar kạar ilo idi tologhi odi; monyiin ẹzo bho nạ pẹzo idi tẸnaan, Ẹmugh Iigbia bhꞌodi be mobo alōghōm kạar kạar ilo idi tologhi odi. ¹²Ẹmugh Iigbia bho ezira ụteeny obho olꞌesuo ẹmar-arōoy obho ḍio. Ẹnaan kạnogho zezira molo ezira opin olōghōm moomo inwo bho odi naanwo zezira bho.

¹³Molo, kamen kamen olo ezōor nọgba magey ibha ạruumugh obho nọnogho mobo bho ịteeny mẸmugh Iigbia bho, ezōor ubhin io toghōrōkō ịtughumiom olōghōm ạar ẹmar-arōoy obho, ezōor ubhin toghōrōkō ịtughumiom Ẹmugh Iigbia bho.

¹⁴Oōy obo bho ạteeny mịitua ọkpo esuo ẹmar-arōoy be bho, orue ḍio abhin ạni miinwo Ẹmugh Iigbia bho tẸnaan, ebum obho ọkpo ạruumugh obho iru mọkpo araama todi. Odi orue ḍio mọmoghonyan, ebum obho eedi ọkpo bho iru milꞌạruumugh be bho. ¹⁵Oōy obo bho oomo ịitua odi idi tọkpo ạruumugh obho tatue ghạ ni alōghōm mẹzo oomo ẹmorokpo bho ịla mạar isi, keḍio bọbon ọnon ōoy olo tatue ạmiin mẹzo odi ạla mạar asi olo. ¹⁶Kẹzo bho ẹegia iigbia bho ạkpete bho,

“Okōr ōoy obo alōghōm mịitua tObạmọogh obho?

Okōr ōoy tatue ạnogho zodi liiki?”

Keḍio ezira obo noolōghōm mịitua taKraist.

Arōoy ariḍighi tẸnaan

¹Tạkar agey nạ ni, iiḅi aburumōr, tamen obho ạami ụrolan enyina bho, ạami utue ḍio mọḍeghe ọnogho enyina karōoy ilo nẹeteeny igbẹbh ịman tịitua eedi mọkpo ạruumugh obho; ạami ụḍeghe ụnogho enyina karōoy ilo ịitua ọkpo ẹmel ẹmar-arōoy obho idi nini talōor kạnwuny ọkpaam ạman taKraist mi tomōruōm obho. ²Ạami uukuōm io enyina maraḅōkō nꞌighumaan, ạami uukuōm enyina mạmaam, ebum obho enyina degbẹbh io mole ịighuanaan eḍian. Kaadon ẹkona enyina degbẹbh io, ³tebum obho ịitua ọkpo ẹmel ẹmar-arōoy obho idi nini talōor enyina bho. Suo ibōbhan nꞌạruruan idi ninii teesoḍia enyina bho, enyina ilōghōm io mobho enyina idi koobho arōoy ilo ịitua eedi idi tọkpo ẹmel ẹmar-arōoy obho be gạ? ⁴Suo enyina nẹeḍianogh onyiin nakōl, “Ạami olo tạPol,” ọnon, “Ạami olo tẠpolos” obho, enyina ilōghōm io mobho enyina idi nini neḍum aghuḍum arōoy ẹmar-arōoy obho gạ?

⁵Ạpolos kokōr ōoy? ẠPol kokōr ōoy mi tenyina? Ezōor arōoy ariḍighi tẸnaan be, ibha iḍighi kenyina imōruōm obho. Oomo ezōor, ōoy oḍighi oḍighi ọno, Obạmọogh obho ạnogho moḍighi. ⁶Ạami pobo oḅẹbh, Ạpolos pobo ozuughiom ạrumuum, keḍio Ẹnaan pobo oḍighi keḍum kebhōbh. ⁷Obo bho aḅẹbh obho, nꞌobo bho azuughiom rụmuum obho ịla ḍio mạar. Ẹnaan obo bho aḍighi kiḍum nepōbh obho pobo ạla mạar. ⁸Akẹrẹkẹrẹ olo todi obo bho aḅẹbh obho nꞌobo bho azuughiom bọ rụmuum obho. Ẹnaan tạtuugh ni ạkpe amulumian moomo eedi tẹzo oḍighi obho eedi iḍighi obho. ⁹Ezōor arōoy onyiin oḍighi-ogbo neḍighi moḍighi nẹnogho mẸnaan, keḍio enyina pookua tẸnaan.

Enyina ẹkona oḅōghaan otu tẸnaan. ¹⁰Ạami ubhin ẹnogho bho Ẹnaan ạnogho ạami obho, ạkiom moḅōgh otu obho konyiin obꞌoḅōghi rutu aru agim abhighi motu obho. Keḍio ọnon ōoy naaru ạmara naḅōgh. Keḍio kōoy kōoy olo natu moḅōgh ạmaar agona lōor odi mẹzo odi abhin naḅōgh motu obho! ¹¹Ebum obho kọkanya amen Ẹnaan naaseeri mạJizos Kraist odi be moru ạnyu otu obho. Omina ọnon ạnyu otu olo tomina opighi motu obho olo. ¹²Ẹtede tepin magold, bolobolo asilva, bolobolo ibꞌiiḅi ạrubharakpar, moḅōghōm todi ạnyu otu obho. Ẹtede tepin miirẹeny moḅōghōm, ẹtede ịigho, ẹde ịbherebher. ¹³Tọmiin ni ogananaan ọman moomo ariḍighi arōoy togbōgh aḍuma bho taKraist. Ạnyan obꞌaḍuma popo tạgba amutiom moḍighi ōoy olo aru mooḅi nꞌọkarabh. Ạnyan obho pobo tạḍa zeedi amutiom molo ạneghe nꞌolo ọneghe ḍio. ¹⁴Kōoy kōoy olo aḅōgh todi ạnyu otu obho kạnyan obho ole ḍio, odi tapin ni mạmukpe oḍighi obhꞌodi. ¹⁵Oḍighi ōoy olo ạnyan obho aliom, oḍighi obhꞌodi ibhẹ ni be. Odi ōoy obho nị dụgh, tọpel ni zodi, kẹzo olo odi amuzōnaan ni nyạn obho.

¹⁶Tọkar ọgba agey obho, enyina elōghōm mobho enyina iru mạkar otu iikpulughu obho tẸnaan gạ, nꞌobho Ẹmugh Iigbia bho tẸnaan natughom enyina gạ? ¹⁷Kōoy kōoy olo ạakpo motu iikpulughu obho tẸnaan obho odi todi obho, pẸnaan ọokpo ạni odi ōoy obho. Otu iikpulughu obho tẸnaan otu iigbia, keḍio ạkar enyina podi otu iikpulughu obho tẸnaan.

¹⁸Iíbiōghōm ghạ lōor enyina. Kōoy kōoy olo abhin tịitua ẹmar-arōoy obho kaghōl modi obꞌolōghōm ạar, odi atẹn meema molo odi ạkar atu obꞌolōghōm ạar. ¹⁹Ebum obho ibha ẹmar-arōoy obho nekōl miibha polōghōm ạar obho, ạar oḍighiom olo mi taghisigh tẸnaan. Kẹzo bho ẹegia iigbia bho ạkpete bho maa “Ẹnaan abhin olōghōm ạar ilōghōm ạar arōoy obho nagonom eedi,” ²⁰keḍio amina ạkpete nạ kua tọnon esi maa “Obạmọogh obho naalōghōm mobho ịitua ilōghōm ạar arōoy obho ạar oḍighiom olo.” ²¹Tebum ibha bẹleni, iítumuom ghạ mọkpo ilo arōoy tetue ni eḍighi. Tagey obho nị dụgh, kạar kạar ilꞌenyina. ²²ẠPol nꞌẠpolos nꞌaKifas, nꞌẹmar-arōoy obhobho nꞌaghuḍum obho nꞌọbho bho, nꞌọkpo bho idi bọ siibha bho, nꞌibhꞌaghuḍum obho natu obho, oomo iibha bho ilꞌenyina, ²³keḍio enyina ilo taKraist, aKraist olo tẸnaan.

Iteledōm taKraist

¹Iinon ghạ zezōor karōoy oḍighi taKraist ilo Ẹnaan naaseeriom mologhi mobho ezōor totue ni ọpamam mẹmu agey obho odi ạḅoki obho. ²Keḍio oomo ạar obho nọva mọmiin todi obo bho nooseeriom mologhi obho pọmaar oseeri oomo ologhi odi oḍighi oḍighi obho. ³Ạami nị dụgh, igboloman io zạmi erumolo enyina bolobolo ạruula ạkoti ẹmar-arōoy obhobho mọru ịiruan ọnogho ạami. Ạami ẹkona ụtu nạ ḍio mịiruan ạnogho lōor ạmi. ⁴Ạami dolōghōma ḍio lōor ạmi mobho ạami ụbham mapum keḍio oomo ipa ẹkona, iibha bho ịgba ḍio mobho ịkarabh olo ạami naaḍighi ilo. Obạmọogh obho pobo tasōbh mọkpe bho ạnogho ạami. ⁵Tebum iibha bẹleni, ísōbh ghạ mọkpe mẹnogho mōoy tamen olo dẹteeny io. Tamen olo Obạmọogh obho tatu, podi omutiom tẹḅaal mọkpo ẹḅokia ọkinim obho, ọgba omutiom ịitua arōoy. Keḍio kōoy kōoy tagbi mobhin tẸnaan mạlisebh obho ịgbaan zodi mobhin obho.

⁶Ebum enyina, iiḅi aburumōr, kạami abhin lōor ạmi nꞌẠpolos nạkpete ạgbaaniom miibha bho, molo enyina ẹtuonuman mạraaḅa asike ezōor, molo enyina ẹmoghonyan mẹmu ọnuekpete bhobho, “Ipẹl ghạ mọota araalōgh obho.” Iínon ghạ monyiin ōoy mẹbughe, meenon mọnon mekiemi. ⁷Okōr ōoy aḍighi onyiin apu monyiin? Ẹnaan io gạ mobo bho ạnogho enyina kạar kạar obho? Kebum eeghe kenyina ebhin nẹbughiom lōor kilo ibha enyina ịteeny obho itu ḍio mẹnogho tẸnaan.

⁸Agey, enyina nẹeteeny kạar kạar olo enyina nẹva, enyina neegbo mẹela, enyina nꞌalōor enyina, ezōor ạni ḍio, nẹtologhom mạsigada ạruula bho. Oomo eedi kukōl enyina ạkar ạruula nạ, molo ezōor kutu mạruḅarama enyina mi tọda ẹma bho. ⁹Idi kolo Ẹnaan nạaseghe zezōor iteledōm obho aḍighi kạnwuny osōbh-ọla, karōoy ilo usineni togbo etẹrẹ molo oomo itelema tẸnaan nꞌarōoy, ibha ạnyu obho nꞌade bho, kebhōgha. ¹⁰Ezōor nooru raama mi tebum aKraist, enyina etu ibꞌilōghōm ạar mi taKraist. Enyina neeru rụukpara, ezōor otu miifōobh. Ọghi togbo arōoy, enyina nẹtologhom sịgada ạruula, ezōor nọtologhom ruukpolom. ¹¹Kesiibha bho ẹkona, ezōor idi nini nọpozu mẹḍogh ọkoony nꞌạmuum; ezōor nominaay migbaany arukpe; kesiibha noḍulogh ni ezōor, otu oḍigh nạ olo. ¹²Ezōor nokumuan ni ku nọteeny mạar ọrolom. Arōoy ilo ịghor ezōor, ezōor nọnogho ghạ zeedi lịsebh. Amen olo ụnogho ezōor mịiḅaghami tebum aKraist, ezōor nọkparaghiom ghạ ni. ¹³Amen olo ụuḅaghami ezōor, ezōor nomulumian ghạ nꞌooḅi oghōrōkō. Keḍio esiibha bho, ezōor ụneghe ḍio opu matōbha nꞌarōoy oḅōorōm ẹma ẹmar-arōoy obho.

¹⁴Ạami ụge ḍio miibha bho natuom enyina mebum ọloki enyina rẹgheer. Ạami nạge mookiom enyina kiiḅi ạnwuny oḍigh ologhi ạmi. ¹⁵Erumolo enyina ịteeny nạ ni nạ mạsumuunir iibia mi taghuḍum enyina mi taKraist ẹkona, onyiin ọde be mobho enyina ịteeny. Taghuḍum enyina mi tạJizos Kraist ạami naaru mọde enyina tebum obho ạami pobo ubhin mọnuekpete ooḅi adōm obho uruom enyina bho. ¹⁶Tebum iibha bho bẹleni, ạami naasen ni enyina mọtuonom ghạ ạraaḅa asike ạmi. ¹⁷Pạar obho aḍighi bọ kạami natōm maTimoti, ọony oḍigh ologhi bhꞌạmi, obho nakumuan magey mi toḍighi obho tObạmọogh obho, moru tenyina bho, odi tạatuemi enyina moḍigh ararele bhꞌạmi mi tạJizos Kraist, ibha ạami ụḍua tạsosi natẹn tạsosi nạtughumiom ghạ marōoy obho.

¹⁸Ọlogh enyina neeḅom ẹmu nẹetua ghạ ekōl mạmi une mu aru tenyina. ¹⁹Ạami tatu siibha siibha mi tenyina erumolo Obạmọogh obho ạto ạni kua. Amen ạami naaru, pạami nịvo nịvo ọmiin ạni ibha arōoy oḅom ẹmu obho teḍighi obho, ilo ọkpete ghạ tọnu be ḍio. ²⁰TAde-Ọolema bho tẸnaan ịnyaam oḍighi ạar pibha nọva, ilo ọkpete ghạ tọnu be ḍio. ²¹Iḍighen mibha teḍigh tologhi enyina — oru tenyina nꞌạsunu bẹlee koru tenyina nꞌetulan nꞌalideny alōor?

Ịdianan tạsosi obho

¹Ịmiin, nọomar nọmoghon kesi kesi mobho oḍigh ịkarabh ịdianan olo utue nạ ḍio ọmiin tobo bho ilōghōm io mẸnaan obho idi tesooḍia enyina. Nọogba ọnogho ạami mobho onyiin enyina natughom ạni tọde odi. ²Oomo iibha bho ẹkona, enyina nẹbughia ni lōor, kpẹlen nꞌolo enyina keḍigh tịitu omutiom togbo bhꞌenyina zodi obo bho naḍighi maraamagh bhibha bho. ³Tạmi nị dụgh, oomo ibha ạami olo nꞌenyina tiikpōogh obho, ạami odi nꞌenyina tạruumugh obho, molo ạami ubhin taḍien tạJizos Kraist Obạmọogh ezira bho nạtu mịiruan ạnogho zodi obo bho naḍighi maraamagh bhibha bho, kilo ạami nꞌenyina idi monyiin esi. ⁴Amen enyina iikōbhōghian monyiin esi olo ẹmugh ạmi odi ạni nꞌenyina, mi tịnyaam tạJizos Obạmọogh ezira bho ⁵pikuugh zodi ōoy obhobho mẹnogho maSetan mobhiẹmi ịkarabh eḍighiom ạar iikpōogh obho, molo tọpel ni mẹmugh obhꞌodi tobꞌaḍuma bho Obạmọogh obho tatu obho.

⁶Ịgbaan io molo enyina kẹbughia lōor siibha bho. Enyina ẹkar elōghōm mọnuekpete bhobho gạ, obho ạkpete kua, “Onyiin ọkarabh okōlōgh nạpue ghạ mizagara eḍian.”? ⁷Ịseghe mọkarabh okōlōgh ịkarabh eḍighiom ạar obho idi kayist obho merōbh, molo oomo enyina ẹtol yọgh yọgh yọgh, molo enyina ẹtol kạbred olo ayist olo, kẹzo bho, ạami nạatua, enyina idi obho. Ẹzaal Opẹl-Otẹn obhꞌezira nạateeny, suo aKraist obho aru bọ mẹena oliom ẹzaal Opẹl-Otẹn obho nọotunom mạar ụnogho ezira bho. ⁸Pitu ole mẹzaal obhꞌezira, uliom io mạbred olo ayist oḍighi ịkarabh nꞌọḅaar ẹmu idi, toliom oḍigh ạbred olo ayist ọgba iben olo.

⁹Tọbhereer obho ạami ụge bọ uruom enyina bho, ạami ụkpete ụnogho enyina mọkporion asike enyina mi tịkarabh arōoy ịva rạani nꞌilobhir. ¹⁰Ịmoghonyan ạami, ạami ukōl io molo enyina tẹkporion sike enyina mi tarōoy obo bho ilōghōm io mẸnaan obho, obo bho nẹvaay rạani nꞌilobhir obho, obo bho ịteeny ẹḍogh okpoki obho, obo bho neḅumogh ghạ mọkpo ịnon arōoy obho, nꞌobo bho neekpulughu ghạ ruru obho. Ibha enyina ịkporion silōor enyina mi tarōoy bhibha penyina ilo ọḍuaghu ọman tesuo ẹmar-arōoy obho. ¹¹Ibha ạami nakōl obho, pobo bho ighōl meedi iiḅi aburumōr mi taKraist keḍio neḍum aghuḍum ọva ạraani nꞌilobhir nꞌẹḍogh okpoki nꞌookpulughu aruru, nꞌọsu ọnu, nꞌoḍimighia arimiim, nꞌoḅumogh ọkpo ịnon arōoy obho. Arōoy ilo idi kua, irelian ghạ zeedi, ítul ghạ nạ zeedi mele meḍian. ¹²Ạami tạtu mịiruan ạnogho mobo bho otu ḍio molo ogbo ezira bho molo eeghe? Obo bho idi togbo ezira bho ḍio mobho ezira tọtu mịiruan ọnogho bho. ¹³Ẹnaan tạtu mịiruan ạnogho mobo bho itu ḍio molo ogbo ezira bho. Ịtuugh eḍighi kẹzo bho ẹegia iigbia bho ạkpete bho, “Itughuneen mọkarabh ōoy obho togbo enyina.”

Aburumōr ạsosi obho ịgbaan io moḍighian ạraakpe

¹Erumolo onyiin enyina ạteeny mọkpe nꞌọnon umōr mi taKraist, ebum eeghe kodi abhin mumōr obho ạghi tạkoti ạruula obo bho ilōghōm io mẸnaan obho? Ịkpe ḍio gạ mobhin ọghiom arōoy tẸnaan kẹkpetian mọkpe bho ketẹnẹ? ²Enyina ilōghōm io gạ mobho arōoy tẸnaan tẹtu mịiruan ẹnogho mẹmar-arōoy obho? Kerumolo enyina pobo tẹtu mịiruan ẹnogho mẹmar-arōoy obho, enyina irue ḍio gạ mọkpetian otẹnẹ ịbam ạraakpe? ³Enyina ilōghōm io gạ mobho ezira tọtu mịiruan ọnogho mitelema bho tẸnaan. Kerumolo ezira pobo tọtu mịiruan ọnogho mitelema tẸnaan, ebum eeghe kezira siibha bho kurue ḍio mọkpetian otẹnẹ ọkpo aghuḍum obhobho? ⁴Erumolo ọbam ẹmoghonyan amute, enyina tepin ni gạ ẹkiom mobo bho ạsosi ịtuom io mạar obho mọkpetian otẹnẹ ọkpe bho? ⁵Ạregheer esibh enyina. Idi kolo bọbon onyiin olōghōm ạar ōoy olo togbo bhꞌenyina mọkpetian otẹnẹ ạraakpe aburumōr obho. ⁶Kpẹlen nꞌipa, onyiin abhin onyiin nasōorōm ghạ totu ạraakpe obo bho imōruōm io maKraist obho mọkpetian otẹnẹ ọkpo eedi.

⁷Ạraakpe bho idi bọ togbo enyina bho, obho onyiin napin monyiin ạki totu ạraakpe bho, nẹgba mobho ịkarabh neepuom enyina. Ịgbaan io gạ molo enyina kẹminoghom mịkarabh. Ịgbaan io gạ mọḅelemaan eedi kẹḅirogh mẹmoogh enyina? ⁸Kpẹlen nꞌiibha enyina nịvo nịvo onyiin naḍighi mịkarabh monyiin, onyiin amiigh monyiin. Enyina nẹkar eḍighi nạ miibha bho todi obo bho ạkar aru bọ mumōr enyina mi taKraist obho. ⁹Ạami nạatua, enyina neelōghōm mobho ịkarabh arōoy iḍigh io tAde-Ọolema bho tẸnaan. Iíbiōghōm gha silōor enyina arōoy ịva rạani nꞌilobhir nꞌiikpulughu ruru, nꞌile mẹma, nꞌịdioghom ruutu, nꞌạruḅa, ¹⁰nꞌịḍogh mẹḍogh ikpoki, nꞌiḍimighia arimiim, nꞌobo bho nẹgba ghạ mịnon ẹpue bho nꞌiḅumogh mọkpo ịnon arōoy — oomo abaabha bho bọbon olo taḍigh tAde-Ọolema bho tẸnaan olo. ¹¹Ẹde enyina pẹzo enyina ịrol, keḍio esiibha bho nootōl ịkarabh enyina. Nọoḅaaleni enyina moru arōoy tẸnaan. Ẹmugh Iigbia bho tẸnaan ezira nạaseghe enyina aseeri taghisigh tẸnaan kiiḅi arōoy tebum aḍien tạJizos Kraist Obạmọogh obho.

Ipin silōor enyina mẹlogh eghuan mẸnaan

¹²Onyiin ōoy tatue ni akōl kua, “Ạami ạteeny mịnyaam moḍighi ilo iḍigh tologhi ạmi.” Toomo ipa ẹkona, kạar kạar io mobho ịkpe lo ạami kaḍighi. “Ạami ạteeny mịnyaam moḍighi ilo iḍigh tologhi ạmi,” keḍio ạami ụnogho ḍio lōor ạmi moḍigh evel ọnogho bọbon onyiin ạar. ¹³Ọnon ōoy tatue ni ạkpete kua, “Eḍian ilꞌọbaraka, ọbaraka bho olꞌiḍian,” keḍio Ẹnaan tapiẹmi ni meḍian nꞌọbaraka bho. Iikpōogh alōor ōoy olo opesioghom oḍigh kẹrekere ipesi ạraani nꞌilobhir io, olo tObạmọogh obho, keḍio Obạmọogh obho olꞌiikpōogh alōor obho. ¹⁴Ẹzo bho Ẹnaan aḅẹtōn mObạmọogh obho mi tọbho bho, pẹzo odi tapin nạ tịnyaam obhꞌodi aḅẹriōn ezira.

¹⁵Enyina neelōghōm mobho iikpōogh alōor obhꞌenyina iru mịpaḍi alōor taKraist? Ạami tatue ni ạseghe monyiin ọpaḍi alōor taKraist aḍighi atẹnẹ monyiin ọpaḍi alōor oliom ẹma gạ? Ẹkpugh. ¹⁶Mạar io suo, enyina ilōghōm io gạ mobho kōoy kōoy olo ạseghe miikpōogh alōor odi atulom mole mẹma, ịzal eedi tiikpōogh obho neeru monyiin. Ẹegia iigbia bho nạakar ạgba amutiom akōl kua mịzal obho tetu monyiin tiikpōogh alōor obho. ¹⁷Keḍio obo bho ạseghe lōor odi atulom Obạmọogh obho tatu monyiin ẹmugh tạruumugh obho nꞌodi.

¹⁸Ịkporion rạvo enyina tipesi ọva ạraani nꞌilobhir. Ọnon oḍigh ịkarabh olo ōoy nạpue gha miikpōogh alōor obho olo keḍio obo bho naḍighi mịkarabh mi tọva ạraani nꞌilobhir naḍighi mịkarabh mạkar iikpōogh alōor obhꞌodi. ¹⁹Enyina ilōghōm io gạ mobho iikpōogh obhꞌenyina iru motu iikpulughu Ẹmugh Iigbia bho, obho natugh tenyina bho, obho Ẹnaan ạnogho enyina bho. Enyina ịteeny io silōor enyina, enyina ilo tẸnaan. ²⁰Odi aghō enyina mi taḅua olo ạla magey. Tebum iibha bẹleni, ipin silōor obhꞌenyina mẹlogh eghuan mẸnaan.

Iipuruan ilo igboloman nꞌọḅalan ilom

¹Esiibha tilo igboloman nꞌiibha enyina ịge bọ zạmi obho, ẹneghe magey molo ōoy kạḅele mobhin ạni. ²Toomo ipa ẹkona, kōoy kōoy abhin mạni, kạni kạni ạḅal milom molo eedi iḍigh tọdegh oonon ọva ạraani nꞌilobhir. ³Kōoy kōoy ạtuugh aḍighi mibha ịgbaan bọ zodi moḍighi kolom obho, kạni kạni ạtuugh nạ ạmaar aḍighi miibha ịgbaan bọ zodi moḍighi kạni ilom obho, ⁴ebum obho ạni obho ọteeny io lōor obhꞌodi, olom odi kạteeny. Olom obho ẹkona ọteeny io lōor obhꞌodi, ạni obhꞌodi kạteeny. ⁵Onyiin ogin io mọmunuom onyiin, tughuneen molo enyina ịmoghonyan kua ḍio mọrol ekua mọbam amen mookpulughu iikpulughu. Ipa bho neetẹn be pimula tẹmuna molo enyina iḍigh tọdegh oonon taSetan tebum obho enyina itue ḍio mọbhama alōor enyina bho.

⁶Ạami ụkpete ḍio miibha bho nạnogho zenyina kolōgh, Ẹnaan nạaḅelemaan ạami mọkpete ibhꞌologhi ạmi. ⁷Ughōl oomo arōoy tetue ni ẹtol kạami kōl iiḅi, keḍio Ẹnaan nạanogho kōoy kōoy mẹnogho obhꞌodi ōoy ilꞌọno ilꞌọno.

⁸Tạsunwunyaan ologhi otu nꞌarukpukele ạraani obho, tạami ni bọ, ạami nakōl enyina kịtol kẹzo bho ạami odi obho, ẹḅele mọḅal ilom. ⁹Keḍio erumolo enyina itue ḍio ẹbhama silōor enyina, pịḅalagh milom. Ọḅal ilom ịneghe epu moghilighuan ạraani nꞌilobhir ọbhuom.

¹⁰Ạami nạlogh olōgh obhobho ạnogho mobo bho nẹeḅalan ilom obho. Ịto bho ilꞌạmi ḍio, ilo tObạmọogh obho. Ạni ilom ogbo ḍio mạḅam, ¹¹kerumolo odi agbo mạḅam, odi ọtolom mụ mọnon ōoy bolobolo odi amula tolom odi. Olom obho ẹkona ogbo ḍio mạḅam amutiom mạni odi.

¹²Tarōoy ipedi obho ạami nạkpete miibha bho ạnogho zeedi. Obạmọogh obho ọkpete ḍio, ạami nịvo nịvo nạkpete. Erumolo ōoy olo naamōruōm maKraist naabhin mạni olo omōruōm io kodi amōrō mọrolan odi, odi ogbo ḍio zodi mạḅam amutiom. ¹³Kerumolo ạni olo naamōruōm maKraist nạaḅal molom olo omōruōm io kodi ogin io morughom odi, odi ogbo ḍio mạḅam. ¹⁴Ebum obho Ẹnaan tapin ni atueni talōor odi zodi obo bho omōruōm io bho tebum ologhi omōruōm ạni obho, Ẹnaan tapin nạ ni monyiin ẹzo bho mạni obho omōruōm io bho tebum ologhi omōruōm olom obho. Iibha ilo ni dụgh, pạrunwuny obhꞌeedi ọrol kạrunwuny arōoy aruru, keḍio ẹzo bho pẹzo idi molo Ẹnaan naabhin eedi atueni talōor odi. ¹⁵Kerumolo odi obo bho omōruōm io bho nạva mọgbaranuan odi obo bho naamōruōm obho, pịḅelemaan odi ạḍua. Iibha bho keru emutanaan mōoy olo naamōruōm erumolo aru mạni obho bolobolo olom obho, odi aḍighi ni mibha iḍigh tologhi odi obho, ebum obho Ẹnaan abheleghi zezira moḍum aghuḍum ekima bho. ¹⁶Ạna olōghōm io gạ mobho tẹḍua ni tonuma ạni obho naamōruōm obho, eḍighi molo olom onuma tamōruōm ạni, bolobolo ạna olom obho naamōruōm obho, olōghōm io gạ mobho tẹḍua ni tonuma eḍighi molo ạni obhꞌonuma tamōruōm ạni?

Ịtol kẹzo bho enyina ịrol kẸnaan abheleghi enyina bho

¹⁷Kōoy kōoy aḍum aghuḍum ẹnogho bho Obạmọogh obho ạnogho zodi obho, ạrol kẹzo bho odi ạrol bọ kẸnaan abheleghi zodi obho. Iibha pibha ạami nạtughumiom ghạ toomo ạrasosi obho. ¹⁸Oōy olo naaḍuna kagbi momōruōm aKraist, odi ọva ḍio momina ozua eghōony uudu obho, obo bho doḍuna ḍio karu amōruōm maKraist obho, odi ọva ḍio moḍuna, ¹⁹ebum obho ạar oḍighiom olo erumolo ạna uḍuna nꞌerumolo ạna oḍuna ḍio bho. Ookō ghạ araalōgh obho tẸnaan pibha ịla mạar. ²⁰Kōoy kōoy aḍum ghuḍum obho odi naḍum bọ kẸnaan abheleghi zodi obho. ²¹Erumolo ạna uru mẹbana kẸnaan agbi mobheleghi onuma, pụuḅaghami ghạ lōor onuma, kạna ạteeny mamen oru ạni ọony ogbo eghun, pụ tụugh mẹzo bho maḍighi. ²²Ạar obho aḍighi obho keeghe? Ẹbana bho Obạmọogh obho naabheleghi obho naaḍighi mọony ogbo eghun odi. Onyiin ẹzo bho nạ ọony ogbo eghun obho aKraist naabheleghi obho naaḍighi mẹbana odi. ²³Taḅua olo ạla magey pobho Ẹnaan abhin aghō enyina. Tebum iibha bẹleni, ítẹn gha mạrubana arōoy. ²⁴Iiḅi aburumōr, kōoy kōoy ạrolan Ẹnaan kẹzo amen obho odi ạrol bọ kẸnaan agbi mobheleghi odi obho.

Iipuruan ilo igboloman nꞌạsunwunyaan ologhi otu nꞌarukpukele ạraani

²⁵Tẹkpete ilo igboloman nꞌobo bho dẹḅalan io milom obho, ạami upin io mịto mi tạvo tObạmọogh obho, ạami ubhin mibha ologhi ạmi nạkpetiom konyiin olo ịkar ni iizuan mọtuonuman tebum ọsu ạghusan aḍien tObạmọogh obho.

²⁶Tebum ịiḅaghami obho idi siibha bho, ạami nạatua ịkpe ni molo kōoy kōoy kạrol mẹzo bho odi odi obho. ²⁷Erumolo ạna naabhin mạni, ụva ghạ mebōom olo obhirighan odi. Erumolo ạna dobhin io mạni, ụva ghạ nạ momina obhin ạni. ²⁸Kerumolo ạna ubhin mạni, ịkarabh olo ạna uḍighi olo. Kạni obho dọḅal io milom obho aru ạḅal ilom, ịkarabh ilo odi naaḍighi ilo. Keḍio ạami ụva ḍio molo enyina keḍigh ạni tịiḅaghami oḍigh arōoy ẹmar-arōoy obhobho.

²⁹Iiḅi aburumōr, iibha pạkar ẹmu ọkpo bho ạami nạkpete bho. Ọbam amen be asughō molo ạseghe dodon ạghi taghisigh kōoy kōoy olo naabhin mạni ạrol kolo odi dobhin io mạni, ³⁰obo bho naleghe bho kōoy olo olo tịitu; obo bho nạmologh obho kōoy olo ologhi ọḅaal io; obo bho nakōoy mọkpo bho ạrol kolo ọkpo bho odi aghō bho itu ḍio milꞌodi; ³¹obo bho natughom ọkpo ẹmar-arōoy obho ạrol kolo odi ọteeny io bọbon ạar, ebum obho ẹmar-arōoy obhobho siibha natu mosi tikunughi obho.

³²Ạami ụva ḍio molo enyina kẹlogh mẹmu enyina tịiḅaghami. Oōy olo dobhin io mạni naseeriom ghạ moomo ologhi obhꞌodi mi toḍighi obho tObạmọogh obho, ebum obho odi nạva moḍighi ghạ ibha iḍigh tologhi tObạmọogh obho. ³³Keḍio ōoy obho naabhin mạni obho naseeriom ghạ mologhi odi tọkpo ẹmar-arōoy obho, ebum obho odi nạva moḍighi ibha teḍigh tologhi ạni odi obho, ³⁴molo nọnyaghagha zodi mi tịzal araabōom. Ạni olo olom olo bolobolo dọḅal io milom naseeriom ghạ moomo ologhi odi toḍighi obho tObạmọogh obho, ebum obho odi nạva moseeri ọnogho alōor odi nꞌẹmugh odi mObạmọogh obho, keḍio ạni-ilom obho naseeri ghạ moomo ologhi odi mi tọkpo ẹmar-arōoy obho, ebum obho odi nạva moḍighi ghạ ibha iḍigh tologhi olom odi obho.

³⁵Ebum ọbhel enyina, pạar obho ạami nạḍeghe miibha bho. Ạami ụva ḍio mọloki araalōgh ọnogho enyina. Kpẹlen nꞌipa, ạami nạva molo enyina keḍighi mibha ịmaar ẹneghe iizuan nạ bho, nꞌọnogho asilōor enyina ọman mi toḍighi obho tObạmọogh obho, olo omuluom tạman olo.

³⁶Tilo igboloman nꞌọnyani olo ọony naatuḅeen mọkala keḍio ịva mụ mọḅalan, erumolo ọony obho ạatua mobho odi otue ḍio mọkparaghiom tọnyani obho, erumolo nẹtal ni odi epu kodi ạatua molo eedi kẹḅalan, pịḅelemaan eedi eḅạlan kẹzo bho odi nagbẹel obho, ịkarabh ilo suo. ³⁷Kerumolo ọony obho ạmaar ạatua tologhi odi kaghōl meedi ịḅalan io, erumolo odi tatue ni ạmaar ạpamam lōor odi, ạmaar ạatua nạ mobho odi tatue ni ạtol, kodi ạḅele mobhin ạni obho piiḅi. ³⁸Tịzal eedi, obo bho abhin bọ mọnyani obhꞌodi obho aḍighi miiḅi, keḍio odi obo bho opin io mọnyani obho aḍighi miiḅi obho apu.

³⁹Kạni kạni olo nạaḅal milom, suo olom odi odi ni obho odi ẹmu olo. Keḍio erumolo olom odi ạbho, podi nạateeny mẹmu mọḅal ọnon ōoy olo naamōruōm maKraist. ⁴⁰Tologhi ạmi nị dụgh, ibha odi ạrol kua ạḅele mọḅal ilom ịneghe epu; iibha pibha idi tologhi ạmi, keḍio ạami ụutua ibhꞌologhi obhꞌạmi pibha Ẹmugh Iigbia tẸnaan nạatua nạ.

Iipuruan ilo igboloman nꞌeḍian ilo ụtunom mạar ụnogho ruru

¹Esiibha bho ạami natu mọḍeghe ọnogho enyina tilo igboloman nꞌeḍian ilo ụtunom mạar ụnogho ruru. Agey nạ, ezira noolōghōm mobho “Oomo ezira ụteeny molōghōm ạar,” kẹzo bho arōoy nekōl ghạ bho. Kẹzo kẹzo olo ịrol, olōghōm ạar naḍighi rōoy mọbughia alōor be, etulan pobo nạkuemi ghạ rōoy. ²Obo bho ạatua aghōl modi alōghōm mạar obho dọkar io alōghōm asi kẹzo bho odi nạva molōghōm obho. ³Keḍio obo bho atulan Ẹnaan obho, Ẹnaan naalōghōm zodi.

⁴Omula siibha tạraḍeghe bho igboloman nꞌole eḍian ilo nọotunom mạar ụnogho ruru obho. Ezira noolōghōm mobho eru aru mạar olo aghuḍum olo tẹmar-arōoy obho. Ezira noolōghōm mobho Ẹnaan aru monyiin be. ⁵Toomo iibha, aruru bho eedi nekōl “mẹnaan obho”, idi mi tạnyu obho nꞌade bho, nꞌoomo iibha, aruru nꞌobạmọogh eedi obho ịka ni obho — ⁶keḍio ezira noolōghōm mobho tezira onyiin Ẹnaan be mobho odi, Ẹnaan Ọde bho, obho ạlem bọ moomo ẹmorokpo bho, obo bho ezira noḍumaan obho, nꞌonyiin Obạmọogh be, odi ạJizos Kraist, obo bho ịḍua todi iru kụlem bọ moomo ẹmorokpo bho, obho ịḍua nạ todi kiru kezira noḍum opooghu obho.

⁷Oomo arōoy io mobo ilōghōm miibha bho, molo ẹtede arōoy ilo nẹerolan iḅeghenom nꞌaruru, kamen kamen olo eedi ile meḍian ilo ụtunom mạar nemina ghạ ni ẹetua ekōl meedi nele meḍian eru. Ologhi eedi dẹghua ḍio molo eedi negbiom mologhi mobho eedi nẹpuena lōor eedi mi taghisigh tẸnaan. ⁸Eḍian nị dụgh, ịgba ḍio ezira miiḅi bolobolo ịkarabh mi taghisigh tẸnaan. Erumolo ezira ule ḍio, amapẹ olo ezira topẹ tẸnaan olo; ezira ule nạ ni ẹkona, ạsuo olo ezira topin nạ olo.

⁹Ịmaar! Ị́tuan ghạ mobho enyina nẹeteeny mẹmu moḍighi ibha iḍigh tologhi enyina bho meḍighi mobo bho ologhi omōruōm eedi dẹghua ḍio bho kemeel keḍigh tesi ịkarabh. ¹⁰Erumolo ōoy olo ologhi odi dọghua ḍio mi tiibha bho kạmiin ạna obo bho nạamaar alōghōm magey obho, mobho ạna uḍigh totu eru nale, ạna nakōl iibha bho iḍighi ḍio ẹnogho zodi mẹmu ọghi ole ạni eḍian olo ụtunom mạar ụnogho meru gạ? ¹¹Keḍio nonon ni, ōoy obhobho obho ologhi obho dọghua ḍio bho, umōr obhꞌonuma obho aKraist ạbhuonaan obho, tapẹ aḍigh tịkarabh tebum olōghōm ạar onuma. ¹²Tụtua malōghōm mobho erumolo ạna uḍighi mịkarabh maburumōr uḍighonom mologhi obhꞌeedi ọkua ḍio bho, pạna naḍighi nạ mịkarabh maKraist. ¹³Tebum iibha bẹleni, erumolo eḍian teḍighi molo umōr ạmi kameel kaḍigh tịkarabh, pạami ụḅa mụ nạ mẹnam, molo ạami uḍighi umōr ạmi ameel aḍigh tịkarabh.

Oḍighi nꞌaluunwo ilo ịrol ịnogho moteledōm taKraist

¹Ạami utue ḍio ạto mịto ạnogho lōor ạmi gạ? Ạami onyiin oteledōm taKraist ḍio gạ? Ạami ụmiin ạni ḍio mạJizos Obạmọogh ezira bho gạ? Enyina ḍio gạ mạsuo oḍighi obhꞌạmi mi tObạmọogh obho? ²Erumolo ịnon arōoy imōruōm io mobho ạami uru monyiin oteledōm taKraist, enyina nịvo nịvo temōruōm ni, ebum obho aghuḍum enyina mi tObạmọogh obho nẹgba emutiom mobho ạami uru moteledōm taKraist obho.

³Kamen kamen olo arōoy iru mọva olōghōm erumolo ạami uru monyiin oteledōm obho, iibha pibha ạami napin ghạ ạpagharana zeedi. ⁴Ạami ugbẹbhan io molo ạami kabhin meḍian nꞌamiim oḍighi obhꞌạmi gạ? ⁵Ịgbaan io gạ molo ạami kaḍighi ạni kẹzo bho iteledōm ipedi obho neḍighi obho, kẹzo bho aburumōr tObạmọogh obho nꞌaPita neḍighi obho, abhin ạni mạni olo naamōruōm maKraist akitonom ạni tararele bhꞌạmi? ⁶Bẹlee kạBanabas nꞌạami be gạ mobo ughōl egir kele keḍum? ⁷Ịitua, okōr ōoy mobo naḍighi moḍighi iḅe rạagham olo nạkpianaan lōor odi? Okōr oḅẹbh miḅẹbh olo ole ḍio meḍian iḅẹbh obhꞌodi? Bolobolo okōr ookō rạana olo oliom ghạ ḍio mạraana odi?

⁸Ạami ụva ḍio mọkpete ọgbaaniom tọkpo ibha nemute taghuḍum ezira moomo aḍuma bho be. Araalōgh obho ịkpete nạ monyiin ẹzo bho. ⁹Ezira oghōl taraalōgh obho taMozis pezira ọmiin mobho ụkpete kua,

“Ụghoroghi ghạ mọnu ạnam obho mamen olo odi nạpoghion mịbiakpa bho.”

Enyina nekōl Ẹnaan ạkar ạtuom mạar mạranam gạ?

¹⁰Enyina nekōl odi ọkpete ḍio miibha bho ạgbaaniom ezira gạ? Ẹzo bho, ụge miibha bho ọgbaaniom ezira. Ịkpe ni molo obo bho aḅẹbh obho nꞌobo bho aḅun ạpoghion mịbiakpa bho keḍighi moḍighi eedi mi tịitua olo eedi tepin ạni ni mabin oḍighi obho. ¹¹Ezōor nooḅẹbh iḅẹbh ạruumugh obho ọnogho enyina. Ipu ni gạ molo ezōor kobhin ạni tenyina mọkpo esuo ẹmar-arōoy obho? ¹²Ịneghe ni bọ, kōl ezōor kupin opu mobo bho nepin tenyina miibha bho.

Ezōor ni kụva ḍio mobhin iibha bho tạvo enyina. Kpẹlen nꞌiibha, ezōor ụkparaghiom ni mi toomo iibha bho molo ezōor uḍighi mạar olo tạpuenaan enyina mọmoghon ọnuekpete ooḅi adōm obho igboloman bọ maKraist obho. ¹³Ạami ụutua enyina nẹekar elōghōm mobho obo bho neḍighi moḍighi totu iikpulughu obho nẹteeny ghạ meḍian oḍighi eedi mi tesuo otu iikpulughu obho nꞌobho obo bho nẹtunogh ghạ mọkpo totu iikpulughu obho nepin ghạ nạ bin eedi suo. ¹⁴Onyiin ẹzo bho nạ pẹzo Obạmọogh obho ạto aghōl mobo bho nẹgba bọ mooḅi adōm obho ebhin tọgba ọnuekpete adōm obho ẹteeny mạar ole oḍumom.

¹⁵Keḍio ạami dobhin io tiibha bho ạgbeelom tenyina mẹmoogh ạmi. Ạami ụge nạ ḍio siibha bho aruom enyina mebum obhin ẹmoogh obhꞌạmi mi tenyina. Ọbho ạneghe apu, kpẹlen nꞌolo onyiin ōoy karu kạgba kạpue miibha bho ạami naatumuom obho. ¹⁶Ạami uutuma ḍio mebum obho ạami nạgba mooḅi adōm obho. Ẹzo olo ạami kaghiil kạḍua olo. Itōnyōgh ẹrol ẹnogho ạami erumolo ạami ugin mọgba ooḅi adōm obho. ¹⁷Ughōl ạami kụutua nꞌalōor ạmi kạami naḍighi moḍighi obhobho bọ, kōl ạami kugbẹel ni molo kọkpe ạami. Kẹzo bho ịḍua ḍio tịitua ạami keru obho, pạami naḍighi moḍighi obho kolo ụnogho ni ạmi moḍighi. ¹⁸Nọkpe ạami mẹkaraan? Oghōl ekua, “ẹḅel onuma” obo bho nạgba mooḅi adōm obho, pạmukpe obho ạami napin, ạami umuul io nạ, ạami ugbẹel nạ ḍio mẹmoogh ạmi mi toḍighi ọgba ooḅi adōm obho.

¹⁹Ạami nꞌẹmu olꞌạmi. Ạami ẹbana ōoy io. Keḍio ạami naaḍighi lōor ạmi atẹnẹ mẹbana oomo arōoy molo ạami ạnyaghagh eedi ạḅirogh kẹzo kẹzo olo ạami urue. ²⁰Kamen kamen olo ạami naḍighian moḍighi marōoy aJu obho ạami uḍum aghuḍum arōoy aJu obho molo ạami ạnyaghagh eedi ạḅirogh. Toomo iibha ạami uzuman io ạnogho maraalōgh obho, ạami natugh kolo ạami naakō zeedi araalōgh obho mamen olo ạami naḍighian moḍighi mobo bho neekō maraalōgh obho, molo ạami ạnyaghagh eedi ạḅirogh. ²¹Onyiin ẹzo bho nạ, ạami natugh karōoy ịnon aruubhugh obho obo bho ịteeny ạni ḍio maraalōgh arōoy aJu obho, molo ạami ạnyaghagh marōoy ịnon aruubhugh obho ạḅirogh. Iibha bho ịgba ḍio mobho ạami ukiilaan io maraalōgh obho tẸnaan. Ạami nạkar aakō maraalōgh obho taKraist. ²²Tobo bho ologhi omōruōm obho dẹghua ḍio bho, pạami ụrolan eedi konyiin eedi molo ạami ạnyaghagh eedi ạḅirogh. Iibha neeḍighi molo ạami ạghi tẹma arōoy ilo neteliom rụumu, pạami oreliom ạni ẹmu molo ạami ạpel eedi kebōom kebōom olo ạami urue. ²³Ạami naḍighi moomo iibha bho tebum ooḅi adōm obho, molo ịnon arōoy epin ạni mabin ọgba odi ooḅi adōm obho.

²⁴Enyina nẹemaar elōghōm mobho teghiil, ọlogh arōoy nekiil ghạ, keḍio ọḅel obho be mobo napin ghạ meghuan obho. Pikiil ạni tẹzo olo enyina tepin ạni meghuan obho. ²⁵Kōoy kōoy olo nạtuugha moghiil eghiil nadeny ghạ ni tọmiinom ịtuugha eghiil obho molo odi kaghiil kazua meghōony eghuan olo obia ḍio odi tazuuruna bho, keḍio ezira nokiil meghiil mọghi ozua eghōony olo tạtolaan ezira kamen kamen. ²⁶Iibha kiḍighi kạami nakiil monyen mọghi osi tikunughi obho. Iibha kiḍighi nạ kạami aru konyiin ōoy olo nạkpologhan ghạ olo opu ḍio kua be ạkpologh toobho esi. ²⁷Tịkpologhan obho pạami ụkparami lōor ạmi molo ạami atue ạmaar ạkparami asi tikunughi, molo unyu ạmi, obo bho ukōol saageme bho, otẹnẹ tọtu.

Aliiki ilo igboloman nꞌaruru

¹Iiḅi aburumōr, ịitua mibha imutanaan mạburude ezōor, obo bho ịtuonom bọ maMozis obho. Ẹnaan akpiom moomꞌeedi mọbhurubuur abhin ạḅeenyom zeedi mi tọbhiiny obho ughōl bọ okōkōgh ọbhiiny obho. ²Oomꞌeedi izua mụum taMozis mi tọbhurubuur obho nꞌạmuum ọbhiiny obho. ³Oomꞌeedi ile nạ monyiin eḍian ạruumugh obho, ⁴keḍio oomꞌeedi imina nạ ẹbhoghol monyiin ạmuum ạruumugh obho. Eedi ịbhoghol tozi ạmuum ọbharakpar obho ạtuonuman zeedi obho. AKraist nịvo nịvo podi ozi ọbharakpar obho. ⁵Toomo iibha ẹkona, ologhi tẸnaan aḅẹebh magey tebum ọkpo bho eedi iḍighi obho molo iikpōogh alōor obhꞌeedi ịizaranu tobꞌeekpu eḍum ọosaar obho.

⁶Oomo abaabha bho imute moḍighi oḍeeriom ezira nꞌookiom ezira molo ezira ụva ḍio moḍighi ịkarabh ọkpo kẹzo bho eedi iḍighi obho, ⁷bolobolo ookpulughu aruru kẹzo bho eedi iikpulughu obho. Ẹzo bho nạ pẹzo ẹegia iigbia bho ạkpete nạ,

“Arōoy obho ịrol delede ele ẹbhoghol eḅerenu mọgher ịḅa.”

⁸Iibha neekiom ezira molo ezira uḍighi ḍio mịkarabh ọva ạraani nꞌilobhir kẹzo bho ẹde eedi iḍighi obho, molo arōoy ilo nẹkian erubal nꞌaḍisibh ọonir arōoy ịbhozu monyiin aḍuma bho. ⁹Onyiin ẹzo bho nạ, ezira ụdegh io maKraist obho, kẹzo bho ẹde eedi iḍighi obho, molo ạririar iru inomi eedi ịze. ¹⁰Ị́ghunughun ghạ kẹzo bho ẹde eedi iḍighi obho, molo otelema ọbho bho aru ạze zeedi obho.

¹¹Oomo abaabha bho imutanaan eedi molo ịnon arōoy ịtuonom ạraaḅa asike eedi. Ụge nạ useerian ezira mọnogho ezira liiki, ebum obho ezira notugh tamen olo ikunughi obho naatuan obho.

¹²Kōoy kōoy olo aghōl modi ạmara ni, ạmaar, molo odi omeel. ¹³Oḍigh ọdegh oonon olo tạteeny enyina olo dọteeny ghạ ḍio mịnon arōoy olo. Keḍio Ẹnaan obi ghạ ḍio toguan odi. Odi omōrō ḍio ọdegh oonon olo apu molo enyina kẹḍuana aru ạteeny enyina. Keḍio, tamen olo ọdegh oonon aru ạteeny enyina, odi tạnogho ni enyina mịnyaam mọkparam nꞌọva ebōom olo enyina kẹḍuana.

¹⁴Tebum iibha bẹleni, iiḅi aburumōr ạmi, ịkporion rạvo enyina tiikpulughu aruru. ¹⁵Ạami nạkpete miibha bho ạnogho enyina karōoy ilo ịteeny molōghōm ạar. Tebum iibha bẹleni, imutiom tezue miibha bho ạami nạḍeghe ạnogho enyina bho. ¹⁶Amen olo ezira nọpogholom mạkopu ạlisebh obho ezōor nọsebh ghạ mẸnaan obho, ịḅaal taKraist ḍio gạ, mobho ezira ubhin ụḍian nọpoghol? Amen olo ezira nole mạbred obho ezōor uḅigi obho, iikpōogh alōor taKraist ḍio gạ, mobho ezira ubhin ụḍian nole? ¹⁷Onyiin eḅol ạbred mobho ọlogh ọlogh ezira nole, keḍio oomo ezira onyiin kẹzo bho ạbred obho ezira ule bho aru monyiin eḅol be bho.

¹⁸Iinon, arōoy aJu obo bho nele meḍian olo ụtunom ạar ụnogho mẸnaan obho nẹgba mobho eedi iru monyiin tẹeḍiani ẹede ọtun ạar obho. ¹⁹Ẹmu iibha bho kẹkaraan? Enyina nekōl ạami nakōl meru bolobolo eḍian ilo ụtunom ạar ụnogho meru ilo gạ? ²⁰Eenyi, iibha ạami nạḍeghe bho ạami nakōl kua miibha arōoy aruru nẹtunom ạar obho nẹnogho ruru, ịnogho ḍio mẸnaan. Keḍio ạami ụva ḍio molo enyina itul mẹede nꞌaruru. ²¹Enyina irue ḍio ẹḅar mạḅugha amiim tObạmọogh obho nꞌạḅugha amiim aruru ẹrol ẹbhogholom; enyina irue nạ ḍio ẹḅar meḍian tObạmọogh obho nꞌeḍian aruru ẹrol ele. ²²Bẹlee kezira nọva moḍighi olo Obạmọogh obho kạteeny mobo obōbhan? Ẹgbaanan molo ịnyaam ezira ipu mibhꞌodi gạ?

²³Arōoy nekōl ghạ ni kua mụ, “Nọoḅelemaan zezira moḍighi kạar kạar.” Oomo ipa ẹkona, kạar kạar io mobho ịkpe molo ezira koḍighi. Mụ “Nọoḅelemaan zezira moḍighi kạar kạar,” keḍio kạar kạar io, mobho nẹlogh mạvo ẹnogho ezira. ²⁴Kōoy kōoy ạva ghạ milo tẹnogho sụo mịnon arōoy, ọva ḍio milꞌodi be.

²⁵Itōbh ologhi enyina mi tẹnam olo noḅool taḍighi obho meghō ghạ ni be mẹḅa, iipuruan ịtol io, ²⁶ebum obho ẹegia iigbia bho ạkpete kua,

“Ade bho nꞌoomo ẹmorokpo bho idi bọ tade bho ilo tObạmọogh obho.”

²⁷Erumolo ōoy olo omōruōm io maKraist ạḅeni enyina mole eḍian kenyina ẹetua motul odi ole, pitōbh ologhi enyina suo enyina nele bho, iípuruan ghạ miipuruan. ²⁸Kerumolo ōoy aru ạkpete ạnogho enyina aghōl kua, “Eḍian bhibha ụtunom mạar ọnogho maruru,” pịtuan mebum odi ōoy obho mẹḅele mole eḍian obho. ²⁹Enyina ịtuan mebum odi ōoy obho ku nẹḅele mole eḍian obho, ebum ịitua ologhi enyina ḍio.

Onyiin ōoy tatue ni apuruan kua, “Ebum eeghe molo ạami tạtuan ebum ịitua ologhi ọnon ōoy ạḅele moḍighi ibha iizuan molo ạami kaḍighi obho? ³⁰Erumolo ạami nạsebh ghạ ni mẸnaan mi teḍian olo ạami natu mole, ebum eeghe molo onyiin ōoy tatu apuruanagh ạami mạar obho aḍighi bọ kạami nale meḍian obho ạami nạanogho lịsebh mẸnaan obho?”

³¹Ạami tạpagharana kua, “Kạar kạar olo enyina neḍighi, tilo igboloman nꞌọkpo ilo ole nꞌọbhoghol, iḍighi ghạ moomo eedi mọlogh eghuan maḍien tẸnaan. ³²Iḍum maghuḍum olo enyina ipirighan io marōoy aJu obho nꞌarōoy ịnon aruubhugh obho nꞌarōoy ạsosi obho tẸnaan. ³³Iḍighi ghạ kẹzo bho ạami naḍighi obho. Kạar kạar olo ạami naḍighi, ạami nạva ghạ moḍighi ilo teḍigh tiloghi arōoy. Ạami ụva ghạ ḍio mobhin ạsuo ilꞌạmi. Ibha ạami nạva bho pilo ọlogh ạvo ọnogho oomo arōoy, molo ọpel ạni eedi.”

Ọkagha ẹmu tamen iikpulughu

¹Ịtuonom mạraaḅa asike ạmi kẹzo bho ạami nạtuonom mạraaḅa asike taKraist obho. ²Ạami nabuom enyina magey mebum obho enyina nẹetua ghạ zạmi moomo amen nẹtuonom nạ mịtughumiom obho ạami ụtughumiom enyina bho. ³Keḍio ạami nạva molo enyina kẹmoghonyan mobho aKraist aru mẹmu oomo arōoy kẹzo bho olom obho aru mẹmu ạni obho, Ẹnaan aru mẹmu taKraist. ⁴Molo kōoy kōoy olo azua meghōony kaḍigh totu iikpulughu obho naakpulughu, bolobolo nạgba mọnuekpete ooḅi adōm obho tẸnaan nạloki rẹgheer maKraist. ⁵Onyiin ẹzo bho nạ ạni-ebhōbh olo ọkagha ḍio mẹmu odi kaḍigh totu iikpulughu obho naakpulughu, bolobolo nạgba mọnuekpete ooḅi adōm obho tẸnaan, odi nạloki rẹgheer molom odi. Akẹrẹkẹrẹ olo todi nꞌạni obho ufe mẹmu odi tebum oḍighi ịkarabh obho. ⁶Ạni olo ọkagha ḍio mẹmu odi pabula mẹmu odi. Ẹzo bho ạni-ebhōbh mobula ẹmu odi nꞌoghula ạsilaan odi aru mạar olo ọlokia ạregheer obho, podi ạkagha mẹmu odi. ⁷Ạar olo olobhir ọony kạtuan kazuan meghōony tẹmu odi olo, ebum obho ụlem odi ụgbaaniom meghuan tẸnaan obho. Ạni-ebhōbh obho ụlem ụgbaaniom meghuan olobhir ọony obho, ⁸ebum obho ụseghe ḍio mọpaḍi ạni-ebhōbh obho koru ọlemom molobhir ọony obho, ụseghe mọpaḍi olobhir ọony obho kụlemom mạni-ebhōbh obho. ⁹Onyiin ẹzo bho nạ, ụtuan io mạni-ebhōbh obho kọlem molobhir ọony obho, ụtuan molobhir ọony obho kọlem mạni-ebhōbh obho. ¹⁰Tebum ẹzo eḍighiom ạar itelema bho tẸnaan, kạni kạni ạkagha ghạ mẹmu odi mọgba oḍeeriom mobho odi odi tịto olom odi. ¹¹Taghuḍum ezira mi tObạmọogh obho, ạni-ebhōbh olo, olobhir ọony olo nạ, olobhir ọony obho nạ olo, ạni-ebhōbh obho olo. ¹²Ẹzo bho ụseghe mọpaḍi olobhir ọony obho ụlemom mạni-ebhōbh obho pẹzo nạ ạni-ebhōbh obho nạmar ghạ nạ molobhir ọony obho. Oomo iibha bho ịḍua tịto tẸnaan keru.

¹³Ịmaar ẹetua, ẹkar eezuan mạni-ebhōbh mookpulughu Ẹnaan totu iikpulughu obho molo ọkagha ḍio mẹmu odi? ¹⁴Ịmaar eenon, ạregheer idi tolobhir ọony moseeri ạsilaan odi kẹdoony gọdogodo ¹⁵keḍio ịidoony ạsilaan peghuan ạni-ebhōbh. Ụnogho zodi mịidoony ạsilaan mopuughiom ghạ ẹmu odi. ¹⁶Erumolo ōoy natu mọghanan tiibha bho, ọnon ạar olo ạami ụteeny mọkpete olo tughuneen mọkpete kua — kamen kamen olo ezōor bolobolo arōoy ạsosi obho tẸnaan iikōbhōghian, ọnon eḍighiom ạar iikpulughu olo.

Eḍian ạruumugh obho

¹⁷Ạami utue ḍio abuom enyina tibha ạami natu mọḍeghe bho. Kpẹlen nꞌiiḅi momute tookōbhōghian obhꞌenyina mi tạsosi obho, ịkarabh ikiton nemute. ¹⁸Ọḅel ịkarabh obho enyina neḍighi obho, nọogba ọnogho ạami mobho enyina nẹeḍianogh nẹtuanogh mi tookōbhōghian obhꞌenyina tạsosi obho. Ạami amōruōm mẹde bho mobho iru magey. ¹⁹(Ạkar agey nạ, ịgbaan ni molo ạmaḍian kẹrol teesoḍia enyina, molo ọmiin mạkar obo bho neekpulughu mẸnaan obho). ²⁰Kamen kamen olo enyina iikōbhōghian monyiin esi, enyina ịtuan io mole eḍian ạruumugh obho tObạmọogh obho keru, ²¹ebum obho, amen enyina nele, ōoy ilꞌọno ilꞌọno nale ghạ, molo ẹde ọkoony nasibh, ẹde amiim nekigh. ²²Enyina ịteenyogh io rutu ole ọbhoghol gạ? Bẹlee kenyina nẹva moofelemi ạsosi obho tẸnaan nꞌọloki ạregheer marōoy obo bho ịteeny ạni ḍio mạar ole bho? Enyina ịkar nẹva molo ạami tạkpete meeghe kạnogho enyina? Enyina nẹva molo ạami kabuom enyina gạ? Ẹkpugh.

²³Ịtughumiom bhibha ạami ubhin ụtughumiom enyina bho ạami ubhin tạvo tObạmọogh obho. Odi ạJizos Obạmọogh obho, tuḍugul obho toḅool bọ zodi obho, podi ạseghe mạbred, ²⁴ạnogho lịsebh mẸnaan, aḅigi keḍio ạkpete kua, “Oobho piikpōogh alōor obhꞌạmi, obho ạami nạnogho mọbhel enyina bho. Iḍighi ghạ kua mọotua ghạ ạmi.” ²⁵Onyiin ẹzo bho nạ, eedi ile meḍian udule bho ịḅele, podi ạseghe mạḅugha amiim obho ạkpete kua, “Oobho pạḅugha amiim omoom ịzo bho tẸnaan, obho ughirom bọ mịḅaal ạmi obho. Kamen kamen olo enyina ịbhoghol, ịitua ghạ zạmi.” ²⁶Iibha bho nẹgba mobho, keḍio Obạmọogh obho tatu, kamen kamen olo enyina ile mạbred obhobho ịbhogholom mạḅugha bhobho penyina nẹgba emutiom mọbho bhꞌodi.

²⁷Tiibha bho bẹleni, kōoy kōoy olo abhin tịkarabh ẹzo aliom ạbhogholom mạbred nꞌạḅugha amiim obho tObạmọogh obho, naaḍighi mịkarabh miikpōogh alōor nꞌạzara bho tObạmọogh obho. ²⁸Tebum iibha bẹleni, kōoy kōoy ạmaar aanona lōor odi kagbi mole ạbred obho nꞌọbhogholom ạḅugha bho. ²⁹Erumolo odi ọlogh io mologhi tẹmu iikpōogh alōor tObạmọogh obho, men obho odi nale mạbred obho ạpogholom mạḅugha bho, odi naabhin mapum ạḅama tẹmu odi. ³⁰Pạar obho ẹde enyina nẹnweey rạzegh obho, ịteeny io mọoghuanaan alōor obho, nꞌẹde enyina nẹpozuuy obho. ³¹Erumolo ezira ubhira ụmaar uunona ghạ lōor ezira ezira ubhin io mapum tẸnaan Obạmọogh obho. ³²Keḍio Ẹnaan Obạmọogh obho nạliom aakiom ezira molo ezira ụdigh ạni obhin mapum ẹmar-arōoy obho.

³³Tebum iibha bẹleni, iiḅi aburumōr, kamen kamen olo enyina neekōbhōghian mole eḍian ạruumugh obho tObạmọogh obho, oomo enyina onyiin aḅōrō monyiin. ³⁴Kōoy kōoy olo ọkoony nasibh aghẹel totu odi ale meḍian, molo Ẹnaan ọliom enyina mamen enyina iikōbhōghian. Ạraḍeghe ipedi obho, amen ạami uru kạami ạkpete atẹnẹ.

Ẹnogho Ẹmugh Iigbia bho

¹Esiibha bho iiḅi aburumōr, tilo igboloman nꞌiipuruan enyina mi tẹnogho Ẹmugh Iigbia bho, ạami nạva molo enyina kelōghōm magey obho. ²Enyina neelōghōm mobho tamen obho enyina neekpulughu ni ruru obho, aruru ilo aghuḍum ilo pobo ịto ghạ mịto ịnogho enyina, ibhiẹmi enyina mi taraabōom aghuḍum tẸnaan. ³Ịmaar elōghom siibha bho mobho kōoy kōoy olo Ẹmugh Iigbia bho tẸnaan napin ateliom, otue ḍio ạkpete aghōl kua, “Itōnyōgh ẹrol ẹnogho mạJizos” nꞌobho bọbon ōoy olo tatue ạgba amutiom mobho ạJizos aru Obạmọogh obho olo tughuneen molo Ẹmugh Iigbia bho nateliom odi ḍio.

⁴Oḍigh kẹrekere ẹnogho mobho idi keḍio onyiin odi Ẹmugh Iigbia bho nạnoghooy ghạ. ⁵Oḍigh kẹrekere ariḍighi mobho idi keḍio ubhin noḍighi moomo eedi ọnogho monyiin odi Obạmọogh obho. ⁶Oōy olōghōm ạar olōghōm ạar ọno ạteeny mobhin oḍighiom oḍighi obho keḍio onyiin odi Ẹnaan obho pobo ạnoghooy molōghōm ạar obhobho kōoy kōoy mobhin oḍighiom oomo ariḍighi obho. ⁷Oōy esuo oḍigh kẹrekere eḍighiom ạar tẸmugh Iigbia bho mobho nọmiin todi mọnogho ạsuo moomo arōoy obho. ⁸Onyiin odi Ẹmugh Iigbia bho keḍio odi nạnogho ghạ monyiin ōoy mịitua olōghōm ạar, ạnogho mọnon ōoy molōghōm ạar ọmoghonyan, mọgbaam adōm obho. ⁹Onyiin odi Ẹmugh Iigbia bho nạ nạnogho ghạ monyiin ōoy mologhi omōruōm, ạnogho mọnon ōoy mịnyaam ookō ạrazegh. ¹⁰Onyiin ōoy odi ạnogho mịnyaam oḍighi ọkpo ịiḍaany, ạnogho mọnon mịnyaam ọgbaam ọnuekpete adōm obho tẸnaan. Ọnon odi ạnogho molōghōm ạar mọgba omutiom erumolo ẹnogho arōoy obho iru molo tẸmugh Iigbia bho nꞌerumolo itu ḍio molꞌẸmugh Iigbia bho. Onyiin odi ạnogho mịnyaam mọkpa ọnu-ẹma olo odi dọmoghon ghạ ḍio, keḍio ạnogho mọnon mịnyaam ọgba ẹmu ọnuekpete bho opedi obho nạkpa bho. ¹¹Onyiin odi Ẹmugh Iigbia bho pobo nạnoghooy oomꞌiibha bho. Ẹzo bho iḍigh tologhi odi obho, pẹzo odi abhin nạnoghooy moḍigh kẹrekere ẹnogho moḍigh kẹrekere arōoy.

Onyiin alōor obho keḍio oḍigh kẹrekere ịpaḍi

¹²Onyiin ẹzo bho nạ pẹzo idi nạ mi taKraist; odi ạteeny monyiin alōor nꞌoḍigh kẹrekere ịpaḍi alōor. Toomo ibha odi ạteeny oḍigh kẹrekere ịpaḍi alōor obho, odi odi ni nạ monyiin. ¹³Ẹzo bho nạ pẹzo oomo ezira idi. Arōoy aJu bho, nꞌarōoy ịnon aruubhugh obho, nꞌạrubana, nꞌạnwuny ogbo eghun obho, oomo ezira noozua mụum Ẹmugh Iigbia bho oḍighi monyiin alōor nọonogho nọpoghol monyiin ạmuum ạruumugh obho.

¹⁴Ọlogh ịpaḍi alōor mobho alōor ōoy ạteeny, onyiin okpom be ḍio. ¹⁵Erumolo onyiin alẹkẹ bhꞌodi aghōl mebum obho ọno otu ḍio mạvo bho, pọno olꞌalōor obho ḍio. Iibha bho irue ḍio enwe zodi mọḅele oru onyiin ọpaḍi alōor obho. ¹⁶Kerumolo aḅeri obhꞌodi ạkpete kua, mebum obho ọno otu ḍio ḍien obho, pọno olꞌalōor obho ḍio. Iibha bho ẹkona irue ḍio enwe zodi mọḅele oru onyiin ọpaḍi alōor obho. ¹⁷Erumolo oomo alōor obho aru monyiin ekpaḍien be, kodi tạmoghon ẹko mạar? Kerumolo oomo odi aru monyiin aḅeri be, kodi tapura ẹko meḍu? ¹⁸Ẹnaan alōghōm ni kạmaar ạde moḍigh kẹrekere ịpaḍi alōor obho aseeri tẹzo bho iḍigh bọ tologhi odi obho. ¹⁹Ughōl onyiin ọpaḍi alōor be mobho odi bọ, okpom alōor obho kulo. ²⁰Keḍio toomo ibha ọlogh ịpaḍi mobho idi obho, alōor obho onyiin be.

²¹Tebum iibha bẹleni, ekpaḍien obho orue ḍio ạkpete ạnogho mạvo bho aghōl kua, “Ạna nꞌạami ạar ụmooghan olo.” Ẹmu obho ẹkona orue nạ ḍio ạkpete ạnogho masike bho aghōl kua, “Ạna nꞌạami ạar ụmooghan olo.” ²²Tiibha bho be ḍio ẹkona, ezira urue ḍio ọḅele mọrolom ịpaḍi alōor obho ezira nọotua okōl mịghua ḍio obho, ²³keḍio ịpaḍi alōor obho ezira ụtuom io mạar obho pibha ezira nọmaar ghạ ookō, nꞌobho ịpaḍi alōor obho ịmaar io ẹneghe mọmiin obho, pibha ezira nọmaar ghạ ọkologh mibura oburom ²⁴molo ịpaḍi alōor obhꞌezira ibha nẹmu bho ipin io nobhin. Ẹnaan nịvo nịvo ạto nạ aḍighi miibha bho mi talōor obhꞌezira molo ịpaḍi alōor bhibha tezira tepin mịkanya eghuan epuom mipedi obho. ²⁵Iibha bho iru iḍighi molo ạmaḍian olo talōor obho, molo toomo oḍigh kẹrekere ịpaḍi alōor obho, onyiin naanon ạtuom mạar monyiin. ²⁶Molo, onyiin ạghunu ạvo nạmiinom poomo alōor obho odi tọmiinom obho, kootumeni mekpaḍien obho, ọḅaal ologhi obho ịrol ịnogho moomo alōor obho nạ.

²⁷Oomo enyina palōor obho taKraist, molo ōoy esuo pọpaḍi ọpaḍi alōor odi. ²⁸Molo, Ẹnaan naabhin moomo arōoy obho aseeri tạsosi obho, ạnogho mōoy esuo oḍighi oḍighi: ịḅel obho piteledōm obho, ogbẹbhiōm ịzal, ịgba mọnuekpete adōm tẸnaan; ogbẹbhiōm ịraar obo ịtughumiom, keḍio aru asi tarōoy oḍighiiy ọkpo ịiḍaany, nꞌobo bho ịteeny mịnyaam mookō ạrazegh, nꞌobo ọbhelogh arōoy, nꞌobo okpo ịnon otẹnōm, nꞌobo ọkpaay ọnu-ạraama olo eedi ịmoghon io. ²⁹Oomo arōoy iteledōm bẹlee, bolobolo oomo arōoy obo ọgba ọnuekpete tẸnaan nꞌobo ịtughumiom gạ? Oomo arōoy gạ mobo ịteeny ịnyaam moḍighi ọkpo ịiḍaany ³⁰bolobolo ookōoy ạrazegh nꞌọkpaay ọnu-ạraama olo eedi ịmoghon io, nꞌọgba ẹmu ọnuekpete bho nọkpaay obho. ³¹Iseeriom ghạ mologhi enyina mi tẹnogho bho ạla bọ mạar apu obho.

Siibha bho ạami natu mọgba ọnogho enyina mẹnogho bho ạla bọ mạar apu obho.

Etulan

¹Ạami ạkar arue mọkpaay ọnu-ạraama arōoy nꞌạkar ọnu-ẹma itelema bho tẸnaan kạami ụteeny io metulan, ọnuekpete obhꞌạmi ịneghe ḍio epu moghōrōkō okele nꞌighonogo. ²Erumolo Ẹnaan abhooghuom ạami ạnogho ạami mịnyaam ọgba ọnuekpete adōm obhꞌodi, nꞌerumolo ạami ụteeny moomo olōghōm ạar nꞌoomo ọmoghonyan ọkpo ẹḅokia, nꞌerumolo ạami umina nạ ụteeny moomo ologhi omōruōm olo tatue ni aḍinyogh mibꞌịḅaal iirẹeny nꞌibꞌạruku-ogbo kạami ụteeny io metulan, ạar oḍighiom ạami olo. ³Erumolo ạami ụḅirogh moomo ọkpo ạmi ụnoghooy rōoy ụman, bolobolo ụnogho nạ lōor ạmi mọsu ạnyan tebum oḍighi iiḅi kạami ụteeny io metulan, bọbon ạsuo olo ạami tapin olo.

⁴Etulan palideny alōor nꞌoḍighi iiḅi. Ibōbhan nꞌiituma nꞌọbughia alōor ilo tetulan. ⁵Ọḅaar ẹmu nꞌipesi nꞌạaku nꞌọkarabh ologhi ilo nạ tetulan. Etulan ookōbhōghi ghạ ḍio moḍighi ọpionuman ạlogha tologhi, ⁶ọḅaal ologhi olo tetulan mi toḍighi ịkarabh keḍio nạḅaal ghạ mologhi magey tiiḅi eḍighiom ạar. ⁷Etulan nạkparaghiom ghạ ni kạar kạar, amōruōm kạar kạar, aḍuom ologhi toomo ẹmorokpo, ạteeny alideny alōor toomo eḍighiom ạar.

⁸Ọgba ọnuekpete adōm tẸnaan takunughi ni, ọkpaay ọnu-ạraama olo ụmoghon io tasōbhe ni, olōghōm ạar temuneen ni, keḍio etulan ikunughi olo, ⁹ebum obho ẹnogho olōghōm ạar nꞌọgba ọnuekpete adōm tẸnaan igbẹbhan io bho, ¹⁰keḍio amen olo ibha tẹgbebheghiōm obho tetu pobhiẹmi ibha degbẹbhan io bho.

¹¹Tamen ịbam ạmi, ạami ụḍeghe ghạ rạḍeghe ịbam ạnwuny ạmoghonyan ghạ kịbam ạnwuny, ạatua ghạ nạ mịitua ịbam ạnwuny. Keḍio esiibha bho ạami naaru ugbẹbh mōoy obho, ạami naarōbh tạman moomo eḍighiom ạar ịbam ạnwuny. ¹²Ibha ezira nọmiin siibha bho nọmiin tụum kiikōogh ạtaḅaliki. Keḍio tamen olo natu, tọmiinan tasumusigh. Iibha ạami naalōghōm siibha bho degbẹbhan io keḍio tamen olo natu, pạami olōghōm ọman kẹzo bho Ẹnaan ạmaar alōghōm ạami ạman obho.

¹³Tẹnogho bhibha, ịraar bhibha, ologhi omōruōm, nꞌoḍuom ologhi, nꞌetulan, pibha ịmara kua ịrol, keḍio tịraar eedi, etulan apuom.

Ịnon ạraḍeghe ẹnogho aluunwo Ẹmugh Iigbia bho

¹Tebum iibha bẹleni, ikilighuan mẹva mebōom ọteeny ạni etulan. Iseeriom mologhi enyina tẹnogho ạruumugh obho — ạkar ẹnogho ọgba ghạ ọnuekpete bho tẸnaan. ²Obo bho nạkpaay mọnu ẹma olo odi ọmoghon io bho, nạkpaanaan mẸnaan be, ọkpaanaan io rōoy, tebum obho bọbon ōoy olo nạmoghonyan odi olo bho. Ẹmugh Iigbia bho ạnogho odi mịnyaam mọgba ọkpo ẹḅokia omutiom. ³Keḍio obo bho nạgba bọ mọnuekpete adōm tẸnaan obho nạkpaanaan rōoy mọbhel ọnogho eedi mọoghuenaan ologhi nꞌọḅaal ologhi. ⁴Oōy obo bho nạkpaay mọnu-ạraama olo odi ọmoghon io bho nạpela lōor odi be, keḍio obo bho nạgba mọnuekpete adōm tẸnaan obho nạpel moomo arōoy ạsosi obho.

⁵Tạmi nị dụgh, oomo enyina mọkpaay ọnu-ạraama olo enyina ịmoghon io iiḅi, keḍio oomo enyina mọteeny ẹnogho ọgbaay ọnuekpete adōm obho tẸnaan ịneghe epu. Ebum obho odi obo bho nạgba mọnuekpete adōm tẸnaan obho aḍigh eghuan apu mobo bho nạkpaay mọnu-ạraama olo odi ọmoghon io bho. Odi orue ḍio ạbhel moomo arōoy ạsosi obho erumolo obo ọgba ẹmu ibha odi nạkpaay obho olo. ⁶Iiḅi aburumōr, ịmaar ẹetua, ạami aru tenyina kụ nạkpaay mọnu-ẹma olo enyina ịmoghonyan io, ạsuo odi gạ? Ạsuo olo nolo, tughuneen molo ạami uru ụgba ụnogho enyina mọkpo ẹḅokia bho Ẹnaan naḍereghiom rōoy obho ḍio bolobolo ụgba ụnogho enyina mọkpo ilo igboloman nꞌolōghōm ạar nꞌọnuekpete adōm bolobolo ịtughumiom tẸnaan io.

⁷Iinon tobo bho neti magumagum nꞌigelege ibha aghuḍum ilo bho, erumolo eedi iti mẹnaghanyan, okōr ōoy tatue ạker mịḅa ạloghom? ⁸Kerumolo obo bho napulo ghạ meeḍue ẹgham obho apulo mẹnaghanyan, kokōr ōoy taḅetunu ạmara moḅe ẹgham obho? ⁹Onyiin ẹzo bho nạ, okōr ōoy tạmoghonyan enyina erumolo enyina nẹkpaay ẹgbaam madōm obho tẸnaan mọnu-ạraama olo ụmoghonyan io? Penyina netōḅōḍi mịghor ọnu enyina be. ¹⁰Ạsumuunir ọnu-ạraama mibha idi tesuo ẹmar-arōoy obho, keḍio bọbon onyiin olo aru mẹmoghonyan olo. ¹¹Kerumolo ạami ụmoghonyan io mọnu-ẹma bho nọkpa bọ bho, pạami naaru misoloman todi obo bho nạkpa bọ bho, odi atu nạ misoloman tạmi. ¹²Ẹzo bho enyina nẹva mọteeny ẹnogho Ẹmugh Iigbia bho, toomo ilo ipuom suo, ịva ghạ magey mọteeny ạni ẹnogho bho tapōbhẹ bọ mạsosi obho. ¹³Tebum iibha bẹleni, obo bho nạkpaay ghạ mọnu-ạraama olo ụmoghon io bho aakpulughu ghạ agbẹel mobhin ọḅaram ẹnogho ọgbaam ẹmu ịigbaay obhꞌodi. ¹⁴Erumolo ạami ubhin mọnu-ạraama uukpulughu miikpulughu, ẹmugh obhꞌạmi nạkar aakpulughu keḍio ịitua bhꞌạmi ilo ạni. ¹⁵Ạami taḍighi ẹko siibha bho? Ạami tatōbh ologhi obhꞌạmi aakpulughuom mẹmugh obhꞌạmi be gạ? Ạami tatōbh ologhi obhꞌạmi ạmoorom sọor mẹmugh obhꞌạmi be gạ? ¹⁶Amen olo ạna ubhin ẹmugh obhꞌonuma be nạnogho lịsebh mẸnaan, kōoy olo odi ạni tiikpulughu obhꞌonuma ọmoghon io mibha ạna naakpulughu obho, odi taḍighi ẹko katul nꞌạna akōl mẹrol ni nạ kua? ¹⁷Toomo iibha iikpulughu obhꞌonuma ạna naakpulughu ạnogho lịsebh mẸnaan obho iru miiḅi obho ẹkona, bọbon ẹzo olo ịbhel ạni mōoy opedi obho olo.

¹⁸Ạami nạsebh ni mẸnaan magey mobho ạami nạkpaay ghạ apu moomo enyina mọnu-ạraama olo ụmoghon io. ¹⁹Keḍio tamen olo nooḍiku mạsosi kpẹlen nꞌolo ạami kạkpaay mạsumuunir ọnuekpete olo arōoy obho ịmoghonyan io, ạami tạkpa ạkpete mōogh ikpo ọnuekpete ịtughumiom ilo eedi tẹmoghonyan ni.

²⁰Iiḅi aburumōr, íḍum ghạ maghuḍum ịbam ạnwuny mi tịitua enyina. Tesi oḍighi ịkarabh, pịtol kịbam ạnwuny, keḍio tịitua enyina ịtol kikenya arōoy. ²¹Nọoge mi tọbhereer iigbia bho mibha Obạmọogh obho ạkpete bho,

“Ạami tapin mịnu ịnon ạraama kạkpetiom ạnogho marōoy bhibha.

Ạami tapin nạ mịidoronu isoloman kạkpetiom,

keḍio arōoy obhꞌạmi ẹkona irue ḍio mọmoghonyan ạami.”

²²Tebum iibha bẹleni, ẹnogho ọkpaay ọnu-ạraama olo ụmoghon io ilo obhin ookiom arōoy obo bho demōruōm io bho, ẹnogho ọgba ọnuekpete adōm tẸnaan ilo obhin ọsebhom arōoy obo bho neemōruōm obho.

²³Iinon, oomo enyina keḍigh mạsosi koomo enyina nẹkpaayogh mọnu-ạraama olo enyina ịmoghon io, koobho arōoy bolobolo arōoy aruru eru eḍigh, amen eedi ịmoghon, eedi ighōl io enyina nẹtaalogh gạ? ²⁴Kerumolo oomo enyina nẹgba mọnuekpete adōm obho tẸnaan koobho ōoy bolobolo ōoy eru aru aḍigh, pobhin toghōrōkō bho odi ạmoghon obho olōghōma ịkarabh odi. Ibha odi ạmoghon obho tẹtu ni mịiruan ẹnogho zodi, ²⁵molo ịitua ẹḅokia bhꞌodi temute ni tạnyu obho keḍio odi tagbuluman nạ aakpulughu ạni mẸnaan, ạgba amutiom mobho “Tagey obho, Ẹnaan odi nꞌenyina.”

Ẹzo ookō ạsosi obho

²⁶Iiḅi aburumōr, ạami ụkar nạḍeghe ẹko? Ạami ughōl kua mu kamen kamen olo enyina iḍigh mạsosi, onyiin ạteeny sọor ọmoor, ọnon ịtughumiom, omina ọnon ạgba omutiom ọkpo ẹḅokia tẸnaan, ọnon nạ, ạkpaay ọnu-ạraama olo odi ọmoghon io, nꞌōoy olo kạgba ghạ mẹmu ọnu-ạraama bho odi nạkpaay obho. Oomo iibha bho oḍighi mọghuemi ạsosi obho! ²⁷Erumolo arōoy idi togbo enyina netu mọkpaay ọnu-ạraama olo eedi ịmoghon io, ịzal bolobolo ịraar, ōoy amen amen, ẹkpaay ghạ. Eedi ẹteeny nạ monyiin ōoy olo tạgba mẹmu ịigbaay obhꞌeedi. ²⁸Kerumolo obo ọgba ẹmu ịigbaay obho olo, pu kōoy kōoy ạrol bịrim, ạḍeghian nꞌẸnaan be. ²⁹Ịzal nꞌịraar ilo obhin mọnuekpete adōm tẸnaan ẹgba ẹnogho mipedi obho, eedi ipedi obho ẹru mịiruan ẹnogho mibha eedi nẹgba bho. ³⁰Kerumolo onyiin ōoy ạrol togbo bhꞌenyina abhin dōm mi tẸnaan, obo bho nạgba bọ bho asōbhẹ mibha odi nạgba bho. ³¹Oomo enyina ōoy amen amen tetue ni ẹgba dōm tẸnaan, molo oomo arōoy obho ẹtuugha ẹteeny mọoghuanaan ologhi. ³²Obo bho ạteeny mẹnogho ọgba ọnuekpete adōm tẸnaan obho ạmaar ạrolom tipa bho, ³³ebum obho Ẹnaan opeleghi ḍio ezira moḍum aghuḍum ẹmoghonyan obho, abheleghi ezira taghuḍum olo ekima.

Toomo ạrasosi ibhꞌarōoy tẸnaan, ³⁴amen olo nooḍiku mạsosi ạraani obho ẹrologhu ghạ bịrim bịrim. Ụnogho ḍio zeedi mịnyaam mọkpete ạar. Eedi ịtolom io mẹmu ạgada bho, kẹzo bho araalōgh arōoy aJu obho ẹkona ịkpete bho. ³⁵Erumolo eedi nẹva mọmoghonyan ạar, eedi epuruan burulom eedi mi totu. Ạregheer idi magey mạni-ebhōbh mọkpaton ọnu odi ọkpete ạar mi totu ạsosi obho.

³⁶Ụmaar io suo, enyina nekōl ọnuekpete tẸnaan ạḍua tenyina karu gạ? Bẹlee kenyina be gạ mobo neebhin mọnuekpete bho tẸnaan?

³⁷Kōoy kōoy olo nạatua akōl modi onyiin obo nạgba mọnuekpete adōm tẸnaan, bolobolo, mobho odi ạteeny mẹnogho ạruumugh obho, ạatua alōghōm mobho ibha ạami nạge atuom enyina bho iru mịto tObạmọogh obho. ³⁸Oōy olo opinom io miibha bho, ubhinom nạ ḍio zodi.

³⁹Tebum iibha bẹleni, iiḅi aburumōr ạmi, iseeriom mologhi enyina mi tọgba ghạ ọnuekpete adōm obho tẸnaan. Toomo ipa ẹkona, tọkpa ọnu-ạraama olo enyina ịmoghon io, ígbi ghạ. ⁴⁰Kạar kạar ọmaar ọtooghi ghạ koḍighi tebōom olo iizuan.

Uḅẹtōn maKraist tọbho bho

¹Esiibha bho ạami nạva mọotuemi enyina mọnuekpete ooḅi adōm obho ạami ụgba ghạ ụnogho enyina bho, obho enyina ibhinom obho, nꞌobho ologhi omōruōm enyina nạamaar aḅolom obho. ²Ạkar odi ooḅi adōm obho, obho ạami ụgba ụnogho enyina bho. Ooḅi adōm obho nạpel enyina atẹnẹmi tịkarabh enyina bho, erumolo enyina nẹemaar iḅolom zodi adōm obho, tughuneen molo ibhꞌologhi omōruōm obhꞌenyina iru moobho ạar ạni ni be.

³Ạami utẹnẹghi ụnogho enyina mibha ạami ubhin nạ bho, ibha ịla bọ mạar ipu obho: mobho aKraist obho ạbho mebum ịkarabh ezira, kẹzo bho ụge tẹegia iigbia bho, ⁴nꞌobho uḍi zodi ịraar aḍuma itẹn puḅẹtōn odi tọbho bho, kẹzo bho ụge nạ bọ tẹegia iigbia bho, ⁵nꞌobho odi amutiom lōor odi ạnogho maPita men, aḍiōbh nꞌịzal obho amen. ⁶Ạteeny mọnon amen podi amutiom lōor odi ạnogho marōoy ilo tepu ni mọonir nꞌịzal ạraala nꞌaḍisibh obo bho neemōruōm obho monyiin amen obho. Ọlogh eedi idi ni kaadon, ẹde kobho nekoḍiiy taruugu. ⁷Keḍio odi amina nạ amutiom lōor odi ạnogho maJems men, nꞌoomo iteledōm obho amen.

⁸Ạami pobo odi amutiom lōor odi ạnogho akunughiom — toomo ibha ạami ụrol kọony olo igbẹbh io ụmar obho. ⁹Ebum obho ạami uru mọony osōbh ọla oomo iteledōm obho — ạkar ạmi nị dụgh, ạami ugbẹbhan io molo koghōl ạami onyiin oteledōm, ebum obho ạami ụmaranuan mạsosi tẸnaan obho. ¹⁰Keḍio Ẹnaan kạsuanaan ạami ghụsan aḍien kạami odi siibha mẹzo bho ạami odi obho, molo tọsu ạghusan aḍien obhꞌodi ipẹ ḍio nạ kua be. Toomo iibha bho ẹkona, ạami naakumuan apu moomo eedi iteledōm ipedi obho. Ạami nịvo nịvo kụkar io aḍighi moḍighi obhobho, ọsu ạghusan aḍien tẸnaan ibha idi nꞌạami obho kiḍighi. ¹¹Eru kạar olo aru zạmi bolobolo eedi, iibha bho pibha ezōor ụgba, kenyina imōruōm nạ.

Toḅẹriōn ạni ni ezira tọbho bho

¹²Ebum eeghe, siibha bho, kẹde enyina nekōl moḅetunu tọbho bho olo erumolo, tadōm obhꞌezōor, ụgba mobho nooḅẹtōn aKraist tọbho bho? ¹³Erumolo ibha enyina nẹgba bho iru magey, puḅẹtōn io maKraist tọbho bho, ¹⁴kerumolo uḅẹtōn io maKraist tọbho bho pịigbaay adōm obhꞌezōor apa be, ologhi omōruōm obhꞌenyina ẹkona apa be. ¹⁵Tilo ipuom suo, ezōor nọgbaaghiom mẸnaan miben tebum obho ezōor nọgba mobho odi Ẹnaan aḅẹtōn maKraist, obho odi oḅẹtōn io tọbho bho, erumolo iru magey mobho oḅetunu tọbho bho olo. ¹⁶Ẹkar erumolo oḅetunu tọbho bho olo, puḅẹtōn io maKraist tọbho bho. ¹⁷Kerumolo aKraist oḅetunu ḍio tọbho bho, pologhi omōruōm obhꞌenyina ạar oḍighiom olo, enyina ẹkona idi nini tịkarabh enyina. ¹⁸Onyiin ẹzo bho nạ, obo bho imōruōm maKraist ku nekoḍiiy taruugu obho neebhẹ be. ¹⁹Kerumolo oḍuom ologhi obho ezira ụteeny taKraist obho aru molꞌaghuḍum obhobho be, pạghusan ibhꞌezira ipu mibhꞌarōoy oomo ẹmar-arōoy obho.

²⁰Tạkar agey obho, oḅẹtōn maKraist tọbho bho, molo ezira nọoteeny mọoghuanaan ologhi mobho toḅẹriōn ạni ni mobo bho neemōruōm maKraist ku nekoḍiiy taruugu obho. ²¹Ẹzo bho ạar obho aḍighi bọ kọbho aru obho ạḍua tōoy karu obho, pẹzo oḅetunu tọbho bho ạḍua nạ tōoy karu. ²²Ẹzo bho oomo arōoy ibha iḍigh nꞌẠdam nẹpozu obho, pẹzo toḅẹriōn moomo arōoy obho iḍigh nꞌaKraist obho. ²³Keḍio oomo abaabha bho ạar amen amen tẹtuugh emute. AKraist ọḅel oomꞌeedi; keḍio tagbi mọteeny obo bho iru milo taKraist mi tamen obho odi tatu obho. ²⁴Iibha neetẹn pikunughi obho oru, amen olo aKraist tapuoghom moomo ạruula nꞌịto mịto nꞌịnyaam ạruumugh obho, keḍio odi tazuuruna meghōony ọdaam ẹma bho ạnogho mẸnaan Ọde bho. ²⁵Ebum obho aKraist tazua ni meghōony ọdaam ẹma bho ninii odi tapuom ạvo moomo obo ọlogh aḍien odi, ạseghe zeedi atẹnẹ moḅeleriom asike odi obho. ²⁶Ọbho pobo ọlogh aḍien obho topuom ạvo ọḅeliom obho. ²⁷Ebum obho nọoge ụkpete kua mi tẹegia iigbia bho mẸnaan naapuom kạar kạar aḅeleriom sike odi. Kạar kạar obho ughōl bọ suo bho, ụloghom ạni ḍio mẸnaan obo bho tạseghe kạar kạar ạlogh tẹeḍiani asike taKraist obho. ²⁸Amen olo nọoseghe ụlogh tạvo taKraist mọda kạar kạar, podi Ọony obho nịvo nịvo ọrol tẹeḍiani tẸnaan obo bho ạseghe kạar kạar aseeri tẹeḍiani odi mọda bho, keḍio Ẹnaan tatu ạda kạar kạar ạman.

²⁹Eru kạar olo ilo kua, kobo bho nezua mụum ẹnogho mobo bho nẹebho bho kịmara teḍighen? Eru kạar olo oḅetunu tọbho bho olo nolo, kẹzo bho eedi nẹgba bho, ebum eeghe keedi nezua mụum ẹnogho mobo bho nẹebho bho? ³⁰Ezōor ẹkona, ebum eeghe kezōor nokilighuan mi tọmiinom moomo amen? ³¹Iiḅi aburumōr, ạami nasōmōghan ghạ mọbho moomo aḍuma. Ẹzo bho ạami nabuom enyina mi taghuḍum ezōor mi tạJizos Kraist Obạmọogh ezira bho kiḍighi kạami nạḍeghe miibha bho amutiom. ³²Iḍighen mạsuo ạmi mi tịitua ẹmar-arōoy, eru kạar olo ạami uḅe mịnam eḍum mi tesuo Ẹfesos? Ọnuekpete bhobho “Itu ole ọbhoghol, eḍie pezira ọbhozuuy” obho agey, erumolo oḅetunu tọbho bho olo.

³³Sọo, ịmoghonyan rōoy. “Ịkarabh ạburubulol obo nẹpue ghạ mamarugh otu.” ³⁴Imula tịitua enyina, metughuneen silōor obhꞌenyina mi taraabōom oḍighi ịkarabh. Ạregheer esibh enyina. Ẹde enyina delōghōm io mẸnaan.

Oḍigh alōor obho tọnogho mobo bho toḅẹriōn obho

³⁵Onyiin enyina tatue ni apuruan kua, “Eedi obo bho nẹebho bho tọkar eḅerenu ẹko? Okōr oḍigh alōor mobho eedi tẹteeny?” ³⁶Sọo ibꞌaraama! Amen enyina iḅẹbh mekpo oorẹeny mi tade bho, osi ghạ ḍio aḍum aru, tughuneen molo ekpo bho abhira ạbho ḍio. ³⁷Obho enyina iḅẹbh tade bho ekpo be, mạar io suo ekpo ọbiakpa bolobolo olꞌọnon oḍigh oorẹeny. Ekpo bho nꞌoorẹeny obho tasi amute bho kẹrekere. ³⁸Ẹnaan nạnogho ghạ moḍigh ẹetua oorẹeny olo ologhi odi aḍigh mọnogho ekpo bho. Oḍigh kẹrekere ẹetua oorẹeny mobho odi nạnogho ghạ moḍigh kẹrekere ikpo iirẹeny obho.

³⁹Toomo ọkpo bho nepooghu obho, akẹrekere iikpōogh alōor mibha ịteeny. Arōoy akẹrẹ oḍigh alōor, ịnam kẹre, ịnun kẹre, ina kẹre.

⁴⁰Arōoy ibhꞌạnyu obho nꞌade bho nꞌalōor ilꞌeedi. Kir alōor arōoy obhꞌạnyu obho ilo ịmaar ịkpiom, kir alōor arōoy ibhꞌade bho milo ịmaar ịkpiom nạ. ⁴¹Ẹneghe ibhꞌaghōzōgh obho kẹre, ibhꞌụvanyu obho kẹre, ibhꞌịinaany obho oḍigh kẹrekere nạ.

⁴²Pẹzo tẹtol nạ mi toḅerenu tọbho bho. Obho uḍi obho tạḅor ni, obho toḅẹtōn obho ọḅor mu. ⁴³Obho uḍi obho nꞌaḅẹebh ọmiin, obho toḅẹtōn obho nꞌeghuan. Obho uḍi obho naadugh ạkporokporo, obho toḅẹtōn obho ạghua ni ạman. ⁴⁴Obho uḍi obho uḍi miikpōogh alōor obho, obho toḅẹtōn obho toḅẹtōn mẹmugh alōor obho. Ẹzo bho iikpōogh alōor idi tẹmar-arōoy obhobho bho, alōor tạtol nạ ni nạ mi tạruumugh obho. ⁴⁵Pẹzo ụge tẹegia iigbia bho, mu

“Keḍio ọḅel ōoy obho, Ạdam, aru ạteeny ghuḍum;”

keḍio Ạdam obho ạman obho pobo ạteeny mẹmugh obho nạnogho ghạ ghuḍum obho.

⁴⁶Ubhira ḍio ọteeny mẹmugh obho, ubhira ụteeny miikpōogh obho keḍio ugbi mọteeny ẹmugh obho. ⁴⁷Ọḅel Ạdam obho ụlemom mọomi ade bho, ogbẹbhiōm ịzal Ạdam obho ạḍua tẸnaan karu. ⁴⁸Obo bho iru milꞌade bho, idi nạ kodi obo bho ụlemom mọomi ade bho, keḍio obo bho iru milo tẸnaan obho idi nạ kodi obo bho ạḍua tẸnaan karu obho. ⁴⁹Ẹzo bho ezira uzua mozu ōoy obho ụlemom mọomi obho, pẹzo ezira tozua nạ mozu odi ōoy obho ạḍua tẸnaan aru obho. ⁵⁰Iiḅi aburumōr ạkar ẹmu ạraḍeghe bhꞌạmi iibha, ibha ạzara nꞌiikpōogh alōor obhobho irue ḍio ebhin bin tAde-Ọolema bho tẸnaan. Ibha tạḅor ni obho ẹkona irue ḍio ebhin bin tibha ịḅor io obho.

^51-52Ịmoghon, ạami natu mọgba ọnogho enyina mọkpo ẹḅokia. Oomo ezira ụbhozu ḍio ọman, keḍio tokẹm lẹpuuny kẹzo bho ịghanaghan ạnyan nemute ghạ tariḍien obho, tamen olo upulo meeḍue, poomo ezira onwian alōor. Amen noopulo, pobo bho nẹebho bho oḅerenu ọteeny aghuḍum olo kamen kamen keḍio oomo ezira totu onwian lōor. ⁵³Ebum obho ibha tẹḅor ni obho tezua ni mibha ịḅor io bho. ⁵⁴Molo amen ibha tẹḅor ni obho neezua mibha ịḅor io bho, nꞌobho ibha tẹpo ni obho neezua mibha ịpo ḍio bho, pọnuekpete ẹegia iigbia bho oru omute oḍighi agey obho ạkpete kua,

⁵⁵“Mọomin mọbho. Ịnyaam odi ilo mu! Eey ọbho!

Idi teḍighen mịnyaam obhꞌonuma?

Idi teḍighen mịnyaam ọziom arōoy obhꞌonuma?”

⁵⁶Toḍighi ịkarabh pesi ọbho ạteeny mịnyaam mọze arōoy, keḍio taraalōgh obho pesi ịkarabh ịteeny mịnyaam obhꞌodi. ⁵⁷Ạlisebh ẹrol ni ẹnogho mẸnaan obo bho ạtuan mạJizos Kraist Obạmọogh ezira bho nạnogho zezira mịnyaam mobhin opuom ọbho bho.

⁵⁸Tebum iibha bẹleni, iiḅi aburumōr ạmi, ideny mẹmaar ẹmara mẹghua. Suo enyina neelōghōm mobho koḍighi koḍighi olo enyina teḍighi ẹnogho mObạmọogh obho olo tepẹ olo bho, pịmaar ẹrol eḍighi ghạ moḍighi obhꞌodi.

Osōgh ọloghom ạvo ọnogho arōoy tẸnaan

¹Tilo igboloman nꞌosōgh ikpoki ọloghom ạvo ọnogho arōoy tẸnaan ibhꞌaJudia, ịtuugh eḍighi ạni kẹzo bho ạami ụkpete ụnogho marōoy ạsosi ibhꞌaGaletia bho. ²Kawiki kawiki, tọḅel aḍuma bho, kōoy kōoy ạseghe mịbam tibha odi ạteeny obho ạlogh tẹḅa aakōbhōghi aseeri, molo ạami utu ḍio kọke moghilighuan osōgh osōgh. ³Amen ạami uru usi, pạami ọge ọbhereer orōmōm arōoy obho enyina nẹeson bho kebhin luunwo bhꞌenyina kẹghi taJerusạlẹm. ⁴Erumolo iizuan molo ạami kạghi ạni, peedi nꞌạami ọghi.

Ẹzo ạPol ạatua morele

⁵Ạami tapira ạki taMasidonia katu tenyina, ebum obho idi tologhi ạmi mọḅol taMasidonia bho. ⁶Ẹnaan ạlogh ạvo, ạami tạtolan ni enyina mịbam amen, mạar io suo, oomo eesōor obho, molo enyina ẹkparam ẹlogh ạvo ẹnogho ạami mi tararele bhꞌạmi kesi kesi olo ạami tamina ạki. ⁷Ẹrol ạni kua tịto tẸnaan, ạami ụva ḍio molo ạami tatu asi kua be tenyina aḅetunu mọḍua. Ạami nạatua mọkar ọrolan enyina mịbam amen.

⁸Ạami nạatua nạ molo ạami kạrol suo Ẹfesos ninii kạteeny maḍuma ẹzaal obho Ẹmugh Iigbia bho asōor bọ aru amuzō bho. ⁹Toomo iibha ọlogh obo nẹva mọpuenaan ạmi obho ạkani teebha bho ẹkona, ịkanya araabōom idi nạ mobhin oḍighiom oḍighi obho magey.

¹⁰ATimoti aru asi tenyina pịmaar ebhin odi mẹloghom teesoḍia bhꞌenyina. Odi naḍighi moḍighi tObạmọogh obho kẹzo bho ạami naḍighi obho. ¹¹Onyiin enyina oonon io zodi ạpue. Ịlogh ạvo mẹnogho zodi molo odi atele taraabōom odi nꞌekima, amula atu tạmi. Ạami naḅōrō mamen odi nꞌaburumōr obho temula etu tạmi.

¹²Tilo igboloman nꞌẠpolos umōr obhꞌezira, ạami nạakpetian zodi magey molo odi nꞌaburumōr ipedi obho keru kẹmiinan enyina, keḍio odi dọmaar io momōruōm mobho iizuan ni molo odi karu siibha. Kamen kamen olo odi ạteeny men nị dụgh, podi aru.

Ọnuekpete ikunughi obho

¹³Igona lōor enyina, mẹmaar ẹmara mẹghuonom tiloghi omōruōm enyina, mẹghuemi lōor enyina. Ịroogh ghạ. ¹⁴Ipin tetulan mebhin meḍighiom moomo ariḍighi enyina.

¹⁵Enyina neelōghōm mạStefanas nꞌeghun otu odi. Eedi ịḅel arōoy ibha imōruōm maKraist mi taGris, ịnogho nạ ghuḍum obhꞌeedi mi toḍighi arōoy obho tẸnaan. ¹⁶Sesen ni, iiḅi aburumōr ạmi, ikiilaan ghạ moḍigh arōoy ilo idi kua, nꞌoomo arōoy ilo itul nꞌeedi neḍighi moḍighi obho.

¹⁷Ologhi ạmi nạḅaal magey mobho ạStefanas nꞌạFortunatos nꞌẠkiokos iru obho. Eedi ịmara tesi enyina, ¹⁸molo eedi ịḅaaleni magey mologhi ạmi kẹzo bho eedi ịḅaaleni miloghi enyina bho. Ịlogh elẹgh magey marōoy ilo idi kua.

¹⁹Arōoy ạsosi ebhugh obhꞌEsia epuruan enyina. Ạkuila nꞌaPrisila nꞌoomo arōoy obho neḍigh ghạ mạsosi totu eedi obho ibhin nꞌọḅaal ologhi mi tObạmọogh obho epuruan enyina. ²⁰Oomo aburumōr obho idi eebha bho epuruan nạ enyina.

Ipin tetulan aburumōr obho, onyiin aḅolom monyiin.

²¹Ạami ubhin nꞌạvo ạmi nạgiom iibha bho. Ạami ạPol apuruan enyina.

²²Kōoy kōoy olo otulan io mObạmọogh obho, itōnyōgh ẹrol ẹnogho zodi. Obạmọogh ezōor, tue.

²³Ọsu ạghusan aḍien tạJizos Obạmọogh obho ạrolan enyina.

²⁴Etulan ạmi ẹrolan nꞌoomo enyina obo bho idi tạJizos Kraist obho. Ẹrol nạ kua.