Ugunulo

UGUNULO WA JOHANA

Uthongodhyeri

Chuwo kiki chaorwa ni Johana. Anji manaona kukala Johana yuyu ni yuyahu mwanafundzi wa Jesu, yani mwana wa Zebedayo. Ela kuna achache mario manaona kukala seye.

Chuwo kiki kinanena dzulu za maono arigogaona Johana. Maono gaga were ni dzulu za maut’u garigo were k’agandatoa gandakala. Maono na miv̱ano minji kahi za chuwo kiki were ina mana za siri, zirizo were o Amasihia enye zinaang’alira.

Chuwo kiki kinaamba kukala kahi za urumwengu uu kuna nguvu mbii zirizo zinamupinga Mulungu. Nguvu zizo zindaahendya Amasihia mateswe zhomu na hatha angine malagwe. Ela nguvu zizo zindashindwa kamare-kamare ni Jesu mana iye ana wadimi mubomu.

Lengo ra chuwo kiki ni kuakanya Amasihia na kuangiza nguvu ili mavumirire. Kuvumirira kuku kundamuhendya Mulungu aahanguse matsozi gao, na aangize kahi za raha ya kare na kare (21:3, 4). Iye andakala Mulungu wao nao mandakala at’ue.

Maut’u garigo mumu

Johana anaandhikira at’u a makanisa mafungahe ga jimbo ra Asia 1:4-8

Mwana wa Mudamu anamwambolera Johana 1:9-20

Uv̱oro kwa makanisa mafungahe ga Asia 2, 3

Mavoyo kuko mulunguni 4

Mwana Ng’ondzi anavugula chuwo 5

Mwana Ng’ondzi anavugula yo mihuri 6

At’u alifu gana na mirongo mine na ne a Iziraeli manav̱anwa ni Mulungu 7:1-8

Kundi bomu ra at’u riungerere ko mulunguni 7:9-17

Mwana Ng’ondzi anavugula muhuri wa fungahe 8:1-5

Malaika afungahe manapiga magunda gao 8:6–11:19

Mwanamuche na ridzoka 12

Minyama miri 13

Mwana Ng’ondzi na at’ue 14:1-13

Hukumu ya siku ya Mwisho 14:14-20

Mashaka mafungahe ga mwisho 15

Ndhuwa fungahe za k’oro za Mulungu 16

Mwanamuche malaya 17

Mulungu anawanonga mudzi wa Babiloni 18

At’u manamulika Mulungu kuko mulunguni 19:1-10

Jesu Masihi anaridhima riro rinyama 19:11-21

Shethani anafungwa jela miaka alifu mwenga 20:1-6

Shethani anashindwa 20:7-15

Jerusalemu mbisha 21

Muho wa madzi ga uzima 22:1-5

Kudza kwa Jesu 22:6-21

¹1:1 4:1; 22:6Mulungu wamwanyesa Jesu Masihi maut’u garigo were k’agandatoa lazima gandahendeka. Naye wamwanyesa ili Jesu naye aanyese ahumikie. Bai Jesu akihuma malaikawe achendamwanyesa muhumikiwe Johana gago maut’u. ²1:2 6:9Naye Johana wamboza ushahidhi dzulu za maut’u gosi arigogaona. Wamboza ushahidhi dzulu za ujumbe wa Mulungu, na dzulu za ujeri wosi ariwowanyesa Jesu Masihi. ³1:3 14:13Iye andiyeshoma, na ao mandiogasirikiza maneno ga unabii uu, na kugagwira gaga garigondhikwa mumu, mandahaswa. Kwani wakathi wa kuthimira maut’u gaga udzafika hehi.

Uv̱oro kwa makanisa mafungahe ga Asia

^4-51:4 4:51:5 2:26; 7:14; 19:15; Akol 1:18; Aebu 9:14; 1 Joh 1:7Mimi Johana, ninandhikira makanisa mafungahe garigo kahi za jimbo ra Asia. Nema na dheri kula kwa iye ariyekalako, ariyeko,1:4-5 Haha ariyeko inamanisha ‘Aishiye kare na kare.’ Kumbola 3:14. na andiyekudza, na kula kwa o roho afungahe1:4-5 Ayahudi manaamini kukala 7 ni namba ya kunyesa kukala kit’u ki kamili. Kwa vizho haha roho afungahe inadima kumanisha Roho Mweri. mario mbere za kihi cha kwakwe cha endzi, na kula kwa Jesu Masihi, navikale hamwenga nanwi.

Jesu Masihi, ni shudhia wa kukuluhirika, ndiye mut’u wa kwandza kufufulwa ni Mulungu kula kifwani. Iye ni muthawali wa athawali osi haha urumwenguni. Anahuhendza na wahuvugula kula kwa dambi zehu kukirira na yo milatsoye. ⁶1:6 5:10; 20:4, 6; 22:5; Kumbo 19:6; 1 P’et 2:9Wahuhendya huthawale hamwenga naye, na hukale alombi a Mulungu babaye. Nguma na wadimi navikale kwakwe ye Jesu hatha kare na kare. H’aami.

⁷1:7 1:13; Dani 7:13; Math’ 24:30; Joh 19:34, 37; 1 Ath’es 4:17Lolani, Jesu Masihi anadza na maingu, na kila mumwenga andamona. Hatha ao mariomudunga fumo nao kidza mandamona. Na at’u osi urumwenguni mandashikithika kwa ut’u wa iye. Na vizho ndo vindizhokala zhenye.

⁸1:8 1:4, 8; 2:8; 4:8; 11:17; 16:5; 21:6; 22:13; Kumbo 3:14; Isa 44:6Bwana Mulungu mwenye nguvu zosi, iye ariyekalako, ariyeko, na andiyekudza anaamba vivi, “Mimi ndimi Alifa na ndimi Omega.”1:8 Alifa na Omega kahi za luga ya Kiyunani manaye ni mwandzo na mwisho. Vivi manaye ni kuamba Mulungu nde kila kit’u.

Mwana wa Mudamu anamwambolera Johana

⁹1:9 22:8Mimi ndugu yenu Johana, here mufuasi wa Jesu Masihi, ninashiriki hamwenga nanwi kahi za kuvumirira mateso gaapatago aryahu at’u mario kahi za uthawali wa Jesu Masihi. Mimi nahirikwa kahi za kisiwa cha P’at’imo1:9 P’at’imo were ni kisiwa kithithe kirichokala kikihumirwa ni uthawali wa Kirumi kuikira afungwa. kwa kukala were ninahubiri neno ra Mulungu na kumboza ushahidhi dzulu za Jesu Masihi. ¹⁰1:10 17:3Mut’u mimi were ni kahi za Roho, na siku iyo yere ni siku ya Bwana. Bai, nikisikira sauthi bomu here gunda ikinena ho nyuma zangu ¹¹1:11 4:5ikiniamba, “Gaga ugaonago be gandhike kahi za chuwo, na ugahirike kwa gago makanisa mafungahe garigo kahi za jimbo ra Asia: Kanisa ra Efeso, ra Simurina, ra P’erigamo, ra Thiyatira, ra Saridi, ra Filadelifia, na ra Laodikia.”

¹²1:12 Zaka 4:2Bai nikigaluka nimulole ye ariyekala ananena nami, ela lola nikiona viguzo vifungahe zha dhahabu zha kuikira mataa. ¹³1:13 Dani 7:13; 10:5Na kahikahi ya zho viguzo, were hadzaima mut’u here Mwana wa Mudamu. Were adzavala k’andzu iriyokala idzafika nyayoni, na ukanda wa dhahabu uriwokala udzafungwa kathini mwakwe. ¹⁴1:14 Dani 7:9; 10:6Nyereze zere ni nyaruhe tse-tse-tse here sufi. Matsoge gere ganaaka here moho. ¹⁵1:15 14:2Maguluge gere ganang’ala-ng’ala here ng’andu idziyoochwa gonya ikatsulwa. Mumirowe were ni here mururumo wa madzi manji. ¹⁶1:16 Fungahe: 4:5; Mushu: 2:12; 9:15; Aebu 4:12Wakala adzagwirira nyenyezi fungahe kahi za mukonowe wa kurya. Kanwani mwakwe muchombola mushu wa kurya kosi-kosi. Usowe were unang’ala here dzuwa ra vitswani. ¹⁷1:17 1:8; Dani 8:17-18Nirihomona, nagwa maguluni hakwe, nikikala here lufu. Ela iye akigoloza mukonowe wa kurya akiwika dzulu zangu akinamba, “Usogohe, mimi ndimi wa kwandza na wa mwisho. ¹⁸1:18 Arum 14:9; 1 Akor 15:3-4, 25-26Mimi ndimi niishiye. Nafwa, ela lola vivi ni moyo hatha kare na kare. Mimi nina funguo za kifwa na za kuzimu. ¹⁹Bai, ndhika go maut’u udzigogaona, na go garigoko vivi, na go gandigokala badaye. ²⁰Na ii be ndo mana ya yo siri ya zo nyenyezi fungahe, na zho viguzo vifungahe zha mataa udzizhozhona kahi za mukono wangu wa kurya. Zizo nyenyezi fungahe ni malaika a go makanisa mafungahe. Zho viguzo vifungahe zha mataa, ni go makanisa mafungahe.”

Ujumbe kwa kanisa ra Efeso

¹2:1 1:16, 20; Aefe 1:1Bai akienderera kunena akiamba, “Kwa malaika wa kanisa ra Efeso, ndhika uambe,

‘Iye agwiriraye zo nyenyezi fungahe kahi za mukonowe wa kurya, na anendaye kahikahi za zho viguzo vifungahe zha dhahabu, zha kuikira mataa, anaamba vivi:

²2:2 2 Akor 11:13; 1 Joh 4:1Ninamanya mahendo ga kwako. Unahenda kazi kwa chadi na kuvumirira. K’udima kuavumirira athiriri, na hatha aryahu mariokudzadzihendya kukala ni ahumwi, waapima na ukiamanya kukala ni alongo. ³Ninamanya unavumirira bila kutsoka, idzaho unakut’a mashaka kwa ut’u wangu, ela hatha vizho k’udzaremezwa. ⁴Ela una kit’u kimwenga kiricho k’akinifwaha bule. Garyahu mahendzo urigokala nago kwandza, be k’unago kaheri. ⁵2:5 2:16, 22; 3:3, 19Hedu kumbukira ho urihokosera, na uthubu, uhende zho urizhokala ukihenda haho kwandza. Ukikala k’undathubu, ninadza nidze nichuse cho kiguzo cha kwako cha mataa kula haho hat’uhe kiriho. ⁶Ela hatha vizho una ut’u umwenga udzo. Uwe nawe udzamena kazi za o at’u mathuwao mafundisho ga Nikolai2:6 Nikolai were ni mut’u ariyeandzisha mafundisho ga ulongo. dza zho nidzizhozimena mimi. ⁷2:7 22:2, 14, 19; Mwan 2:8-9; 3:22; Izik 28:13; 31:8; Math’ 13:9, 43Ariye na masikiro naasikire maneno gaga arigo Roho anagambira makanisa. Iye andiyeshinda nindamup’a ruhusa ya kurya matunda ga muhi wa uzima uriwo kahi za munda wa Mulungu kuko p’ehoni.’ ”

Ujumbe kwa kanisa ra Simurina

⁸2:8 1:8, 18“Kwa malaika wa kanisa ra Simurina, ndhika uambe,

‘Iye wa Kwandza na wa Mwisho, ariyefwa na akifufuka, anaamba:

⁹2:9 2 Akor 6:10; Jako 2:5; Shethani: 3:9; 2 Akor 11:14-15Ninamanya thabu za kwako, na ukiya wa kwako (ela mimi ninakwamba u mushaha). Ninamanya go usingwago nago ni o madziambao ni Ayahudi, kumbe hatha ni kundi ra at’u a Shethani. ¹⁰2:10 Math’ 10:28; 1 Akor 9:24-25Bai gago mateso garigo ga hehi na kumupata, gasimwagoshe kamare. Lolani bai, Shethani andamujeza kwa kumuhendya mwangizwe jela, nanwi mundateseka kwa muda wa siku kumi. Ela kalani aaminifu hatha chamba ni kwalagwa, lagwani, nami nindakudzamup’a taji ya uzima. ¹¹2:11 20:6, 14; 21:8Ariye na masikiro naasikire maneno gaga arigo Roho anagambira makanisa. Iye andiyeshinda, cho kifwa cha hiri k’akindamupata bule.’ ”

Ujumbe kwa kanisa ra P’erigamo

¹²2:12 1:16“Kwa malaika wa kanisa ra P’erigamo, ndhika uambe,

‘Iye ariye na mushu wa kurya kosi-kosi anaamba:

¹³Ninamanya kukala ho ukalaho ndo Shethani athawalaho. Ela uwe udzaenderera kukala mwaminifu kwangu. Na hatha wakathi Anitipasi shahidhi wangu mwaminifu ariholagwa kahi zenu, kahi za mudzi ukalao Shethani, kidza k’amunikanire. ¹⁴2:14 2:20; Hesab 24:25; 25:1-3; 31:16; 2 P’et 2:15Ela muna maut’u machache garigo k’aganifwaha. Kahi zenu, kuna angine mathuwao mafundisho ga Balamu. Balamu wamufundisha Balaki aahege Aiziraeli kwa kuahendya marye chakurya kirichokala kidzambozerwa sadaka vizuka na pia makale azindzi. ¹⁵Na ninwi nanwi, muna at’u kahi zenu mathuwao mafundisho ga Nikolai. ¹⁶H’aya thubuni, kwani kala k’amundathubu, nadza kare niapige ao mathuwao mafundisho mai na wo mushu umbolao kanwani mwangu. ¹⁷2:17 Zabu 78:23-25; Joh 6:48-51 Iwe: Zaka 3:9; Dzina risha: 3:12; Isa 62:2; 65:15Ariye na masikiro naasikire maneno gaga arigo Roho anagambira makanisa. Iye andiyeshinda nindamup’a Mana2:17 Mana ni chakurya kirichohenda kupothoka kula mulunguni. Kumbola 16. iriyofitswa. Kidza nindamup’a iwe raruhe tse rirondhikwa dzina risha. Dzina riro k’ahana arimanyaye isihokala ye arigerwaye.’ ”

Ujumbe kwa kanisa ra Thiyatira

¹⁸2:18 1:14-15“Kwa malaika wa kanisa ra Thiyatira, ndhika uambe,

‘Iye Mwana wa Mulungu, ariye na matso ga kuaka here moho, kidza ariye na magulu ga kung’ala here ng’andu idziyoochwa na ikatsulwa, anaamba:

¹⁹Ninamanya mahendogo, na mahendzogo. Ninamanya kuluhiroro, kuvumirira na kuhumika kwa kwako. Ninamanya kukala zo kazizo uhendazo vivi be zidzakira ziryahu za kwandza urihonikuluhira. ²⁰2:20 Hesab 25:1-8; 1 Athaw 16:31; 2 Athaw 9:22, 30; Mahe 15:20Ela una maut’u machache garigo k’aganifwaha. Ye mwanamuche aifwaye Jezebeli ariye anadziha nabii, unamuricha anaakenga at’u angu. Unamuricha anaafundisha at’u angu uzindzi, na kurya zhakurya vidzizhombozerwa sadaka vizuka. ²¹Namup’a wakathi athubu na ariche wo uzindzi wa kwakwe, ela k’endzi bule. ²²Lola nindamugwiza ukongo akale kitandani. Na ao mazingao naye nao kala k’amandathubu gago maut’u mahendago naye, nindaagwiza mashaka mabomu. ²³2:23 22:12; Jere 11:20Kidza o anafundzie nindaalaga na makanisa gosi gandamanya kukala mimi ndimi nimanyaye maazo na moyo wa kila mut’u. Nami nindamuriha kila mut’u karakara na mahendoge. ²⁴Ela ninwi angine kuko Thiyatira, murio k’amugakubali go mafundisho ga Jezebeli, na murio k’amudzadzifundisha garyahu angine maambago ni “siri ya Shethani,” ninamwamba kukala sindamuhika muzigo mungine. ²⁵2:25 3:11Ela gwirani cho muricho nacho muchunye muhaka haho nindihokudza. ²⁶2:26-27 12:5; 19:15; Zabu 2:8-9Ao mandioshinda, na kuenderera kuhenda here nihendzazho hatha mwisho, nindakudzaap’a wadimi dzulu za k’olo. ²⁷Mandathawala k’olo zosi za at’u na ukali munji, here dza viryahu mudhath’a wa chuma udimazho kubanda-banda nyungu. ²⁸2:28 22:16Here dza viryahu nirizhogerwa wadimi ni Baba mimi nami nindaap’a wadimi. Kidza nindaap’a nyenyezi ya madzach’a.2:28 Nyenyezi ya madzach’a ni muv̱ano wa kunyesa ushindi wao.²⁹Ariye na masikiro naasikire gaga maneno arigo Roho anagambira makanisa.’ ”

Ujumbe kwa kanisa ra Saridi

¹3:1 1:4, 16Bai akienderera kunena akinamba, “Kwa malaika wa kanisa ra Saridi, ndhika uambe,

‘Iye ariye na zo roho fungahe za Mulungu, na zo nyenyezi fungahe anaamba:

Ninamanya zho uhendazho. Ninamanya kukala unaonewa kukala u moyo kudzi wafwa. ²Bai lamuka ukagangize nguvu go gaserego garigo nago ganamala kufwa. Kwani nidzaona kukala mahendogo k’agakamili mbere za Mulungu wangu. ³3:3 16:15; Math’ 24:43; 1 Ath’es 5:1-2Kumbukira garyahu urigogasikira na kugahokera. Ugagwire na uthubu. Ukikala k’undakala matso, nindakudza gafula here mwivi, na k’undamanya nindakudza wakathi wani. ⁴3:4 6:11Ela hamwenga na vizho kuna at’u achache kuko Saridi, mario k’amadzadzangiza kahi za uchafu wowosi. Ao mandavala nguwo nyaruhe tse, na fwanende hosi kwa kukala manav̱irya vizho. ⁵3:5 Math’ 10:32; Kithabu: 13:8; 17:8; 20:15; 21:27; Kumbo 32:32; Zabu 69:28; Isa 4:3; Luk 10:20Iye andiyeshinda, andavikwa nguwo nyaruhe dza vivi, na dzinare sindarifuta bule kahi za cho kithabu cha uzima.3:5 Kiki ni kithabu kiricho na madzina gosi ga at’u a Mulungu. Nindanena lwazu mbere za Baba na mbere za malaikae kukala iye ni wangu. ⁶Ariye na masikiro naasikire maneno gaga arigo roho anaambira makanisa.’ ”

Ujumbe kwa kanisa ra Filadelifia

⁷3:7 Isa 22:22; Math’ 16:19“Kwa malaika wa kanisa ra Filadelifia, ndhika uambe,

‘Iye mueri na mujeri,

iye mwenye funguo ya Daudi,3:7 Funguo ii ni wadimi wa kuthawala.

iye ariye akivugula, k’ahana adimaye kufunga,

na akifunga k’ahana adimaye kuvugula, anaamba:

⁸Ninamanya mahendogo. Ninamanya kukala una wadimi muchache, ela udzaenderera kuthuwa mafundisho ga kwangu na kukala mwaminifu kwangu. Bai nidzavugula muryango mberezo, ambawo k’ahana adimaye kuufunga. ⁹3:9 2:9; Isa 49:23; 60:14Kidza lola, aryahu at’u mamuthuwao Shethani, yani aryahu at’u madzihendyao kukala ni Ayahudi kumbe sozho, nindaahendya madze makuzamire maguluni, nao mandamanya kukala ninakuhendza. ¹⁰3:10 1:9; Luk 21:19; 1 Akor 10:13; 2 P’et 2:9Na kwa kukala unavumirira here nirizhokulagiza, nindakuthenga na uryahu wakathi wa mashaka undiwokudzaajeza at’u osi mandiokala manaishi haha urumwenguni. ¹¹3:11 2:10, 25; 22:7, 12, 20; Zaka 2:10Ninadza kare, kwa vizho kicho uricho nacho be kigwire kuchunya, sidze mut’u akakuhoka zawadiyo. ¹²3:12 2:17; 14:1; 21:2; 22:4; Izik 48:35Iye andiyeshinda, nindamuhendya muhongohi kahi za Hekalu ra Mulungu wangu, na andakala mumo kwenda-kwenda. Kidza, nindandhika dzulu za kwakwe: Dzina ra Mulungu wangu, dzina rangu risha, na dzina ra mudzi mubomu musha wa Mulungu. Mudzi uu unaifwa Jerusalemu, nawo undathima kula mulunguni kwa Mulungu wangu. ¹³Ariye na masikiro, naasikire maneno gaga arigo roho anaambira makanisa.’ ”

Ujumbe kwa kanisa ra Laodikia

¹⁴3:14 1:5; 19:11; Joh 1:3; 2 Akor 1:20“Kwa malaika wa kanisa ra Laodikia, ndhika uambe,

‘Iye aifwaye H’aami, ariye ni Shudhia mwaminifu na mujeri, ariye iye nde chaho cha kila kit’u kirichoumbwa ni Mulungu, anaamba:

¹⁵Ninamanya mahendogo. K’umoho na k’up’eho. Be ni baha kala u moho, hedu kala u p’eho. ¹⁶Ela kwa kukala u kaloholoho, k’up’eho na k’umoho, nindakuhahika umbole mo kanwani mwangu. ¹⁷3:17 Hose 12:8; 1 Akor 4:8Ati unaamba “Ni mushaha, nidzahenda vit’u hatha sina nitsowacho.” K’umanya, ela una mashaka hatha unagwizisha mbazi. Uwe u mukiya, kidza u kipofu, kidza u huhu. ¹⁸3:18 6:11; 16:15Kwa vizho ninakuadha ugule vit’u vivi kula kwangu: gula dhahabu mbidzo ya zosi, iriyoochwa na moho ili ukale mushaha; gula k’andzu nyaruhe ili uvale uziye waebu wa huhuro; na muhaso wa matso ili wangize matsoni mwako uone. ¹⁹3:19 Ndhum 3:11-12; Aebu 12:5-6Osini niahendzao mimi, nikuakanya na kuangiza akili. Bai kala na chadi na uthubu. ²⁰3:20 Math’ 8:11; Joh 14:23Kwani lola niimire muryangoni ninabisha. Kila andiyesikira sauthi yangu na kunivugulira, nindangira mwakwe nyumbani nirye hamwenga naye, na iye naye arye hamwenga nami. ²¹3:21 1:6; Math’ 22:44; Aebu 8:1Iye andiyeshinda, nindamup’a ruhusa ya kukeresi nami kahi za kihi changu cha endzi, here mimi nirizhoshinda, na vivi nikeresi na Baba kahi za kihiche cha endzi. ²²Ariye na masikiro naasikire maneno gaga arigo Roho anagambira makanisa.’ ”

Mavoyo kuko mulunguni

¹Bada ya vizho, natsuha matso, na lola nikiona muryango uriwokala u lwazu ko mulunguni. Na wo mumiro here wa gunda niriwokala nidzausikira ho kwandza ukinamba, “Ndzo haha dzulu, na nindakwanyesa zho ambazho ni lazima vithimire bada ya vivi.” ²4:2-3 5:7; Zabu 11:4; 103:19Na mara mwenga kare nikikala kahi za Roho, na lola ko mulunguni, kwere kuna kihi cha endzi na mut’u ariyekala adzakikeresiza. ³4:3 Izik 1:26-28Ye mut’u were anang’ala-ng’ala here mawe ga th’amani, na cho kihi cha endzi chere kidzadengerekwa ni kisiki cha v̱ula kirichokala kinang’ala here iwe ra th’amani ra chani kitsi. ⁴4:4 Azhere: 5:5, 8, 10; 7:11, 13; 11:16; 14:3; 19:4; Isa 24:23; Nyaruhe: 6:11Pia cho kihi cha endzi were kidzadengerekwa ni vihi vingine zha endzi mirongo miri na vine. Vihi vivi zhere vidzakelesirwa ni azhere mirongo miri na ane, mariokala madzavala nguwo nyaruhe na taji za dhahabu. ⁵4:5 8:5; 11:19; 16:18; 17:9; Kumbo 9:24; 19:16; Izik 1:13-14Kwambola lumethe, na sauthi, na kigwaragwara kula kahi za cho kihi cha endzi. Mbere za cho kihi cha endzi kwere kuna mataa mafungahe garigokala ganaaka. Mataa gaga ni zo roho fungahe za Mulungu. ⁶4:6 15:2; Izik 1:22; Zhumbe vine: 5:6, 8, 11; 6:1; 7:11; 14:3; 15:7; 19:4; Izik 1:5-12; 10:14Kidza kwere kuna ut’u here bahari ya kilolo iriyokala inanyesa lwazu-lwazu. Haho kahikahi kukidengereka cho kihi cha endzi kwere kuna zhumbe vine zha moyo virizhokala vi thele matso mbere na nyuma. ⁷Chumbe cha kwandza were ni here simba. Cha hiri were ni here kidzao cha ng’ombe. Cha hahu were kina sura here ya binadamu, na cha ne were ni here mwee abururukaye. ⁸4:8 1:17; 11:17; Isa 6:2-3; Izik 1:18; 10:12Kahi za zho zhumbe vine, kila chumbe, were kina mahaha mahandahu, na matso mwiri muzima. Zhumbe vivi zhaimba usiku na mutsana bila kunyamala. Zhaimba vikiamba,

“Mweri, mweri, mweri

Bwana Mulungu mwenye nguvu zosi.

Ariyekalako, ariyeko, na andiyekudza.”

⁹Na wakathi wosi virihokala zho zhumbe vine vinamwimbira maira ga nguma na ishima na muv̱era ye ariyekala akelesi dzulu za cho kihi cha endzi, aishiye kare na kare, ¹⁰o azhere mirongo miri na ane magwa mbere za ye ariyekala akelesi dzulu za cho kihi cha endzi makimuvoya ye aishiye tha kare na kare. Matsuha ts’i taji zao mbere za cho kihi cha endzi na makiimba makiamba,

¹¹4:11 Mwan 1:1, 31; Ugun 5:9, 12; 11:15, 17; 12:10; 15:3-4; 19:6“Mulungu wehu uriye Bwana wehu

unav̱irya kuhokera nguma na ishima na wadimi.

Kwa kukala waumba vit’u zhosi,

na kwa kuhendzako mwenye zhaumbwa vikaleko.”

Mwana Ng’ondzi anavugula chuwo

¹5:1 10:2; Isa 29:11; Izik 2:9-10; Dani 12:4, 9Kidza nikiona chuwo kahi za mukono wa kurya wa iye ariyekala adzakelesi dzulu za cho kihi cha endzi. Chuwo5:1 Chuwo kiki si here zhuwo zha siku zizi. Chuwo kiki were ni mugolozo mumwenga uriwolingwa here kitseka. kicho were chandhikwa ndani na ndze na were kidzafungwa na mihuri5:1 Muhuri uhadzwao haha si here muhuri wa siku zizi. Muhuri uu were ni here kidhana kirichopathikwa dzulu ya vit’u, ili mut’u akivugula vimanyikane. mifungahe. ²Nikitsuha matso kaheri na nikiona malaika mwenye wadimi analuta mumirowe na kuamba, “Ni h’ani av̱iryaye kubanda yo mihuri na kukivugula cho chuwo?” ³Ela k’akumbolere yoyosi kula mulunguni hedu kula ts’i hedu kula ts’ini za ts’i ariyekala anadima kukivugula cho chuwo na kukishoma. ⁴Kuona vizho narira zhomu kwa kukala k’ahana ariyeonekana kukala anav̱irya kuvugula cho chuwo hedu kukishoma. ⁵5:5 4:4; Mwan 49:9; Math’ 1:1; Arum 1:3-4; Aebu 7:14Gonya mumwenga wa o azhere akinena nami akiamba, “Usirire bule, lola ye Simba wa mbari ya Juda, Mudzungu wa Daudi adzashinda ili abande yo mihuri mifungahe na kuvugula cho chuwo.” ⁶5:6 4:6-7; Mwana Ng’ondzi: 5:9, 12; 6; 7:17; 12:11; 13:8; Isa 53:7; Jere 11:19; Joh 1:29; 1 P’et 1:19; Roho fungahe: 4:5; Zaka 3:9Gonya nikiona Mwana Ng’ondzi aimire hehi na cho kihi cha endzi. Naye were adzadengerekwa ni zho zhumbe vine zha moyo na o azhere. Ye Mwana Ng’ondzi waonekana here adziyetsindzwa. Were ana p’embe fungahe na matso mafungahe. Gago matso mafungahe ni zo roho fungahe za Mulungu ambazo zahumwa urumwengu muzima. ⁷5:7 4:2, 9; 5:1, 13; 6:16; 7:10, 15; 19:4; 20:11; 21:5; 1 Athaw 22:19; Isa 6:1; Izik 1:26-28; 10:1Bai ye Mwana Ng’ondzi achendahala cho chuwo kula kahi za mukono wa kurya wa ye arekala adzakelesi dzulu za cho kihi cha endzi. ⁸5:8 8:3-4; Zabu 141:2; Kinubi: 15:2Arihokihala, zho zhumbe vine zha moyo na o azhere mirongo miri na ane magwa mbere za ye Mwana Ng’ondzi, kuno kila mumwenga adzagwirira kinubi.5:8 Kinubi ni kifaa cha kuimbira kiricho na nyuzi. Kila mumwenga were adzagwirira ludhuwa lwa dhahabu lurokala lu thele mavumba ga kufukizira. Bai gago mavumba, ni gago mavoyo ga at’u a Mulungu. ⁹5:9 4:11; 5:6; 7:9; 14:3; Zabu 96:1Kwa hamwenga maimba wira musha wenye uambao,

“Uwe unav̱irya kukihala cho chuwo

na kuvugula mihuriye,

kwa kukala uwe watsindzwa,

na kwa milatsoyo ukimugulira Mulungu at’u

kula kwa kila taifa na ts’i, na kila kabila na kidhyomo.

¹⁰5:10 1:6Nawe waahendya at’u ao mathawale hamwenga nawe,

na makale alombi a Mulungu wehu

na mathawale dhunia.”

¹¹5:11 Malaika: Ayub 1:6; Dani 7:10; Aebu 12:22Gonya nikilola kaheri. Nikiona malaika anji sana hatha k’amathalika, madzadengereka cho kihi cha endzi, na o azhere na zho zhumbe. Nikiasikira ¹²5:12 4:11manaimba zhomu na kuamba,

“Ye Mwana Ng’ondzi ariyetsindzwa anav̱irya kuhokera

wadimi, na ushaha, na ulachu, na nguvu,

na ishima, na nguma, na kuhaswa.”

¹³5:13 Zabu 150:6; Afil 2:10Na nikisikira kila chumbe mulunguni na ts’i, na ts’ini ya ts’i, na baharini, na zhosi virizhokala mumo vikiimba vikiamba,

“Iye akelesiye dzulu za cho kihi cha endzi hamwenga na ye Mwana Ng’ondzi,

namap’ewe sifa, na ishima, na nguma na wadimi

hatha kare na kare.”

¹⁴Na zho zhumbe vine zha moyo vikidzigidzya vikiamba, “H’aami.” Na o azhere makigwa makivoya.

Mwana Ng’ondzi anavugula yo mihuri

¹Gonya nikimona ye Mwana Ng’ondzi anavugula muhuri wa kwandza kahi za yo mihuri mifungahe. Arihovugula, nikisikira chumbe kimwenga kahi za zho zhumbe vine zha moyo kikinena kwa sauthi ya dzulu here kigwaragwara kikiamba, “Ndzo!” ²6:2-8 19:11, 14; Zaka 1:8; 6:1-7Nikitsuha matso, nikiona farasi mwaruhe na mut’u ariyekala adzamupanda. Na ye ariyekala anamuhirika were adzagwirira uha. Akigerwa taji akimbola ko ndze here mushindi ili akashinde.

³Gonya ye Mwana Ng’ondzi akivugula wo muhuri wa hiri. Nikisikira cho chumbe cha hiri cha moyo kikiamba, “Ndzo!” ⁴Hachambola farasi mungine. Farasi yuyu were ni muthune do. Ye muhirikiwe akigerwa mushu mubomu na wadimi wa kuusa dheri urumwenguni ili at’u malagane enye kwa enye.

⁵Gonya ye Mwana Ng’ondzi akivugula wo muhuri wa hahu. Nikisikira cho chumbe cha hahu cha moyo kikiamba, “Ndzo!” Nikitsuha matso, na lola hakikala hana farasi mwiru pi. Ye muhirikiwe were adzagwirira mizani mo mukononi mwakwe. ⁶Nikisikira here sauthi iriyokala inambola kahikahi za zho zhumbe vine zha moyo ikiamba, “Kilo mwenga ya ngano kwa dinari6:6 Dinari were ni mushahara wa siku mwenga wakathi uwo. mwenga na kilo t’ahu za shayiri6:6 Shayiri ni mumera udziwohalana na ngano, ela bei ya kwakwe yere i rahisi. kwa dinari mwenga. Ela mafuha na divai usizhanonge bule.”

⁷Gonya ye Mwana Ng’ondzi akivugula wo muhuri wa ne. Nikisikira cho chumbe cha ne cha moyo kikiamba, “Ndzo!” ⁸6:8 Jere 14:12; Izik 14:21; Hose 13:14Nikitsuha matso, nikiona farasi wa ivu-ivu. Na ye muhirikiwe were anaifwa “Kifwa,” na “Kuzimu” were anamuthuwa nyuma. Makigerwa wadimi dzulu za robo ya wo urumwengu ili malage at’u kwa ngira ya viha, ndzala, mapigo ga makongo na nyama a tsakani.

⁹6:9 1:2, 9; 12:11, 17; 19:10; 20:4; 1 Joh 1:1-2Gonya ye Mwana Ng’ondzi akivugula wo muhuri wa tsano. Nikiona kijaja cha kumbozera sadaka. Na ts’ini za cho kijaja, nikiona roho za o mariokala malagwa kwa ut’u wa neno ra Mulungu na wo ushuhuda mariwokala nawo. ¹⁰6:10 18:24; Zabu 13:2-3; Kumbu 32:43; Luk 18:7Makinena kwa sauthi bomu makiamba, “H’ewe Bwana mueri na mujeri, at’u a urumwengu mafwalaga, vikara unaalolera hatha rini? K’uahukumu ukaarihiza bai?” ¹¹6:11 K’andzu nyaruhe: 3:5, 18; 4:4; 7:9, 13; 19:8, 14; Isa 61:10Gonya kila mumwenga wao akigerwa k’andzu nyaruhe tse. Makiambwa maoye matharize vichache muhaka namba ya aryahu ahumiki andziyao na ndugu zao mandiolagwa here ao ikamilike.

¹²6:12-13 8:5, 12; 11:13, 19; 16:18; Joe 2:10; Math’ 24:29Mwana Ng’ondzi arihovugula wo muhuri wa handahu, natsuha matso. Na lola ts’i ikithukuka zhomu na dzuwa rikikala pi here makala. Mwezi ukigaluka muthune here milatso. ¹³Na nyenyezi nazo zikigwa ts’i dza viryahu mutini ubagarisazho t’ini upigwaho ni luv̱utho. ¹⁴6:14 16:20; 20:11; Isa 34:4; Aebu 1:11-12Wo mulungu ukiuka here kitseka kikundzwacho, na kila murima na kila kisiwa kikiuswa hat’uhe. ¹⁵6:15 Isa 2:10, 19, 21; 24:21Gonya o athawali a ts’i, abomu, na majemadari a viha, mathajiri na enye wadimi, atumwa na masokala atumwa na at’u angine osi, makidzifitsa p’angani na ts’ini za mawe kuko mirimani. ¹⁶6:16 5:7; Hose 10:8; Luk 23:30Makiyiha yo mirima na go mawe makiamba, “Fugwerereni, mufufitse kula kwa ye akelesiye dzulu za cho kihi cha endzi na kula kwa zo k’oro za ye Mwana Ng’ondzi, ¹⁷6:17 Joe 2:11; Nah 1:6; Zefa 1:14-18; Mala 3:2kwa kukala siku bomu ya kwanyesa k’oro zao idzafika, na ni h’ani bai adimaye kuipinga?”

At’u alifu gana na mirongo mine na ne manav̱anwa ni Mulungu

¹7:1 9:14-15; Jere 49:36; Dani 7:2Bada ya vivi, naona malaika ane maungerere. Kila mumwenga were aungerere kahi za p’embe mwenga ya dhunia. Bai mahenda vizho ili mazulie zo p’eho ne za dhunia kwamba hasikale na p’eho indiyopiga ts’i, hedu bahari, hedu mihi. ²Gonya nikiona malaika mungine akidza kula mwambolero wa dzuwa na muhuri wa Mulungu ariye moyo. Akiaiha zhomu o malaika ane mario Mulungu waap’a wadimi wa kunonga ts’i na bahari. ³7:3 9:4; 14:1, 3; 22:4; Izik 9:4, 6Ye malaika akiambiriza akiamba, “Yo ts’i, yo bahari, na yo mihi, musizhanonge kwandza muhaka o ahumiki a Mulungu wehu huangize muv̱ano vidhanguni mwao.” ⁴7:4-8 14:1, 3; 21:12-13Na nikisikira yo hesabu ya at’u mariov̱anwa na muhuri wa Mulungu vidhanguni mwao, ni at’u alifu gana mwenga na mirongo mine na ne (144,000). At’u aa mambola kahi za mbari zosi za ana a Iziraeli. ⁵Na kahi za o at’u mariov̱anwa na wo muhuri, kila mbari ya Iziraeli were ina at’u alifu kumi na mbiri. Mbari ya Juda alifu kumi na mbiri, ya Rubeni alifu kumi na mbiri, ya Gadi alifu kumi na mbiri. ⁶Mbari ya Asheri, alifu kumi na mbiri, ya Nafutali alifu kumi na mbiri, ya Manase alifu kumi na mbiri. ⁷Mbari ya Simioni alifu kumi na mbiri, ya Lawi alifu kumi na mbiri, ya Isakari alifu kumi na mbiri. ⁸Mbari ya Zabuloni alifu kumi na mbiri, ya Josefu alifu kumi na mbiri, na mbari ya Benjamini alifu kumi na mbiri.

Kundi bomu ra at’u riungerere ko mulunguni

⁹7:9 5:9; 6:11; Alaw 23:40Bada ya vivi natsuha matso, na lola nikiona kundi bomu ra at’u mario k’amathalika. At’u a kula kila taifa na kabila, na kila ts’i na kidhyomo. Were maungerere mbere za cho kihi cha endzi, na mbere za ye Mwana Ng’ondzi. At’u ao were madzavala k’andzu nyaruhe na were madzagwirira vitai zha mitende. ¹⁰7:10 5:7Makiluta mimiro yao zhomu makiamba,

“Wokolwi ula kwa Mulungu wehu,

ye akelesiye dzulu za cho kihi cha endzi

na kula kwa ye Mwana Ng’ondzi.”

¹¹7:11 4:4, 6Na malaika osi makiungarara kudengereka cho kihi cha endzi na o azhere na zho zhumbe vine zha moyo. Gonya makidzigwaga na moyo mbere za cho kihi cha endzi na makimuvoya Mulungu. ¹²7:12 4:11Makiamba,

“H’aami. Kuhaswa, nguma, na ulachu,

na muv̱era na ishima, na nguvu

na wadimi vina Mulungu wehu hatha kare na kare.

H’aami.”

¹³7:13 6:11; 7:9Gonya mumwenga wa o azhere akinuza akiamba, “Ni ano h’ani ano madziovala k’andzu nyaruhe na manaombolahi?” ¹⁴7:14 1:5; 22:14; Zabu 51:7; Dani 12:1; Math’ 24:21Nikimudzigidzya nikimwamba, “Uwe ndiwe umanyaye bwana.” Akiamba, “Aa be ni at’u madziombola kahi za mashaka mabomu. Madzafula k’andzu zao kahi za milatso ya iye Mwana Ng’ondzi, makazihendya nyaruhe tse. ¹⁵7:15 21:3Ndosa maimire mbere ya kihi cha endzi cha Mulungu, mamuhumikire usiku na mutsana kahi za Hekalure. Ye akelesiye dzulu za cho kihi cha endzi andakala hamwenga nao aarinde. ¹⁶7:16 Isa 49:9-10K’amandasikira ndzala hedu k’ihu kaheri. K’amandaochwa ni dzuwa hedu theri kali. ¹⁷7:17 5:6; 21:6; Joh 10:10, 11; Izik 34:11-16, 23-24; Matsozi: 21:4; Zabu 126:5-6; Isa 25:8Kwa kukala ye Mwana Ng’ondzi ariye kahikahi za cho kihi cha endzi, andakala murisa wao na andaalongoza kwenda ko kwenye matso ga madzi ga uzima. Na Mulungu andaafuta matsozi gao gosi.”

Mwana Ng’ondzi anavugula muhuri wa fungahe

¹8:1 Zaka 2:13; Haba 2:20Vikara Mwana Ng’ondzi arihovugula wo muhuri wa fungahe, kwanyamala zii ko mulunguni kwa muda wa nusu saa. ²8:2 Magunda: Josh 6:4, 6; Math’ 24:31Gonya nikiona o malaika afungahe maimao mbere za Mulungu makigerwa magunda mafungahe. ³8:3 5:8; Kumbo 30:1, 3Hakidza malaika mungine akidzaima ho kijajani. Malaika yuyu were adzagwirira ludhuwa lwa mavumba. Ludhuwa lulu lwere lwatengezwa na dhahabu. Akigerwa mavumba manji angezeze go mavoyo ga at’u osi a Mulungu dzulu za cho kijaja cha dhahabu mbere za cho kihi cha endzi. ⁴Na wo mosi wa go mavumba uchambola mikononi mwa ye malaika uchenda dzulu mbere za Mulungu, hamwenga na go mavoyo ga at’u a Mulungu. ⁵8:5 4:5; 6:12-13; Alaw 16:12; Izik 10:2Gonya ye malaika akihala lo ludhuwa lwa mavumba, akiludzaza moho kula ho kijajani gonya akilutsuha dhuniani. Kukikala na kigwaragwara, na sauthi, na lumethe, na ts’i ikithukuka.

Malaika ane manapiga magunda gao

⁶Gonya o malaika afungahe mariokala na magunda makidzika thayari kugapiga. ⁷8:7-12 9:15, 18; Izik 5:2, 128:7 Kumbo 9:23-25Malaika wa kwandza akipiga gundare. V̱ula ya mawe na moho urotsanganyikana na milatso vikimwagika dzulu za ts’i. Luhande lumwenga lwa ts’i, na lwa mihi, na lwa nyasi mbitsi vikisha. ⁸8:8 16:3-4; Kumbo 7:20, 21Gonya malaika wa hiri akipiga gundare naye. Ut’u here murima mubomu uakao moho wagwa baharini. Luhande lumwenga lwa bahari lukigaluka milatso. ⁹Zhumbe zha moyo virizhokala luhande lulo lwa bahari vikifwa. Na meli zosi zirizokala luhande lulo zikinongwa-nongwa. ¹⁰Malaika wa hahu akipiga gundare. Nyenyezi bomu iakayo here mui ikigwa dzulu za luhande lumwenga lwa miho na matso ga madzi. ¹¹8:11 Jere 8:14Dzina ra yo nyenyezi ni “Utsungu.” Madzi garigokala luhande lulo gakikala utsungu na at’u anji mafwa kwa kunwa go madzi kwani were gadzagaluka utsungu. ¹²8:12 6:12-13; Isa 13:10; Izik 32:7-8Gonya malaika wa ne akipiga gundare. Luhande lumwenga8:12 Kula kifungu cha 7 hadhi cha 12, ukiona ‘luhande lumwenga’ Kiyunani ni 1/3, yani th’eluth’i. The’luth’i ni sehemu mwenga kahi za sehemu t’ahu. lwa dzuwa na mwezi na nyenyezi vikipigwa ili vikatsang’ala. K’akukalire na mulangaza muda wa masaa mane usiku na mutsana. ¹³Gonya nikiona na nikisikira mwee ariyekala akibururuka dzulu mulunguni akipiga londzo akiamba, “O malaika ahahu mario k’amadzangwe kupiga magunda gao vivi be makili kugapiga. Be haho makigapiga o at’u maishio dhuniani mandagamanya enye, kisha mandagamanya enye sana.”

Malaika wa tsano anapiga gundare

¹9:1 Ridzina risiro mwisho: 11:7; 20:1; Ayub 26:6; 28:22; Luk 8:31; 2 P’et 2:4Gonya ye malaika wa tsano akipiga gundare. Na lola, nikiona nyenyezi iriyokala idzagwa kula mulunguni nayo ikigerwa funguo ya kusundula wo muryango wa ridzina risiro mwisho. ²9:2 Mwan 19:28; Kumbo 19:18Bai, irihosundula ro ridzina risiro mwisho lola hachambola mosi here wa ts’andzala. Mosi uu were u gigigi hatha ukihendya dzuwa na uwo mulungu vikale gigigi kiza. ³9:3-11 Kumbo 10:12-20Mumo mosini muchambola kw’eth’eth’e makidza dhuniani na makigerwa wadimi wa kupasha dza viryahu zha mah’ambini. ⁴9:4 7:2-3Makiambwa masilumize nyasi, hedu mihi, hedu mimera yoyosi, ela makanonge aryahu at’u mario k’amana muv̱ano wa Mulungu mo vidhanguni mwao. ⁵Makigerwa ruhusa ya kuatesa kwa miezi mitsano, ela masialage. Na go mateso gao were ni here kwakakwa kwa kupashwa ni h’ambini. ⁶9:6 Ayub 3:21; Jere 8:3Na nyakathi zizo at’u mandamala kifwa, ela k’amandachona bule. Mandathamani kufwa, ela cho kifwa kindaachimbira. ⁷9:7 Ayub 39:19-20; Joe 2:4Kw’eth’eth’e aa were ni here farasi mario thayari kwenda vihani. Vitswani mwao were mavikwa ut’u here virauni zha dhahabu na mabushu gao were ni here ga binadamu. ⁸9:8 Joe 1:6Nyere zao were ni here za ache. Meno gao were ni here ga simba. ⁹9:9 Joe 2:5H’aya zho mbai bai, kw’eth’eth’e ao were mana makoko here ngao za chuma. Na lulo londzo lwa mahaha gao were ni here londzo lwa magari ga farasi gahirikwago malo kwenda vihani. ¹⁰Kidza were mana mikira ya kupasha here ya h’ambini na yo mikira yao ndo iriyo na wadimi wa kulumiza anadamu kwa wo muda wa miezi mitsano. ¹¹Kidza were mana muthawali wao. Muthawali yuyu were nde malaika aimiriraye ro ridzina risiro mwisho. Na kwa Kieburania were anaifwa Abadoni na Kiyunani anaifwa Apolioni. Mana ya madzina gaga kahi za zizo luga mbiri ni “Mwanongi.” ¹²H’aya mashaka ga kwandza gadzagoma kukira, lola kuchere na mangine ga k’ana mbiri garigo ganadza.

¹³9:13 8:3; Kumbo 30:1-3Gonya ye malaika wa handahu akipiga gundare. Nikisikira sauthi kumbola kwa zo p’embe ne za cho kijaja cha kumbozera sadaka cha dhahabu kiricho mbere za Mulungu. ¹⁴9:14 7:1; Kumbu 1:7Bai, yo sauthi ikimwamba ye malaika wa handahu ariyekala ana riro gunda akiamba, “Arichire o malaika ane mariofungwa kwenye muho mubomu wa Yufurati.” ¹⁵9:15 8:7-12Ndo ao malaika ane mariokala madzaikwa thayari kwa mwaka uwo, mwezi, siku, na saa iryahu makirichirwa malage sehemu mwenga9:15 ‘sehemu mwenga’ Kiyunani ni 1/3, yani th’eluth’i. The’luth’i ni sehemu mwenga kahi za sehemu t’ahu. ya o anadamu. ¹⁶Bai kukidza majeshi garigokala gadzapanda farasi. Nichambirizwa kukala namba ya go majeshi were ni milioni magana mairi. ¹⁷9:17 Ayub 41:18-20Na vizho ndizho nirizhoona kahi za go maono ga kwangu. Ao ahiriki mere madzavala ngao mo makathini mwao. Ngao zizi were ni th’une here moho, na buluu here bahari, na manjano here maji ga zhape. Vitswa zha o farasi were ni here zha simba. Na mumo makanwani mwao mwambola moho, na mosi wa baruthi. ¹⁸Sehemu mwenga9:18 ‘Sehemu mwenga’ Kiyunani ni 1/3, yani th’eluth’i. The’luth’i ni sehemu mwenga kahi za sehemu t’ahu. ya anadamu malagwa ni wo moho, na wo mosi, na wo unga wa baruthi. Mapigo gago mahahu were ganambola kanwani mwa o farasi. ¹⁹Wadimi wa o farasi u mo makanwani mwao na mo mikirani mwao. Mikira yao ni here nyoka enye vitswa na manaihumira kulumizira at’u. ²⁰9:20-21 16:9; Kumbo 20:13-159:20 Dani 5:4, 23; Zabu 135:15-17; Isa 44:9-20Vikara aryahu anadamu mario k’amalagirwe ni gago mapigo, makahala kuthubu vizho. Makahala kuricha kuhasa vit’u marizhovitengeza na mikono yao enye. Makienderera kuhasa p’ep’o na vizuka zha dhahabu, na zha fedha, na zha ng’andu, na zha mawe na zha mihi. Vit’u virizho k’aviona, k’avisikira, na k’avinenda. ²¹H’aya zho mbai bai, at’u aa makahala kuricha kwalaga, utsai, uzindzi na wivi.

Malaika adzagwirira kadzuwo kathithe

¹10:1 4:3Gonya nikiona malaika mungine kaheri mwenye wadimi anathima kula mulunguni. Were adzadengerekwa ni maingu na dzulu za kitswache were hana kisiki cha v̱ula. Suraye were ni here dzuwa na maguluge were ni here viguzo zha moho. ²10:2 5:1; 10:8Mumo mukononi mwakwe were adzagwirira kadzuwo karikokala ka lwazu. Bai, akihala kiguluche cha mukono kurya akizhoga bahari na kiguluche cha mukono kumots’o akizhoga ts’i furufu. ³10:3 Jere 25:30-31; Hose 11:10Na akiiha kwa mumiro mubomu sana here simba arurumazho. Arihoiha, kigwaragwara chadzigidzya kwa kududumiza tha k’ana fungahe. ⁴Na kicho kigwaragwara kirihodudumiza zo k’ana fungahe were ni hehi na kwandhika wo uv̱oro niriwokala nidzausikira. Ela nikisikira sauthi kula mulunguni ikinamba, “Zho vidzizhonenwa ni cho kigwaragwara k’ana fungahe usizhandhike bule mana ni siri.” ⁵Gonya ye malaika niriyekala nidzamona aungerere dzulu za bahari na dzulu za ts’i, akigoloza mukono wa kwakwe wa kurya kulola ko mulunguni. ⁶10:6 Zabu 146:6; Dani 12:7; Mahe 4:24Na akiapa kwa dzina ra Mulungu aishiye tha kare na kare, ye ariyeumba mulunguni na ts’i, na bahari na zhosi virizho mumo, kukala maut’u k’agandatoa kaheri bule. ⁷10:7 22:6; Jere 25:4; Amo 3:7-8Ela ye malaika wa fungahe andihopiga ro gundare ndiho Mulungu andihokamilisha mupangowe wa siri here arizhoambiriza ahumikie, manabii. ⁸10:8-10 Izik 2:8–3:3Gonya nikisikira yo sauthi iriyokala idzambola mulunguni kunena nami, ikinena nami kaheri ikiamba, “Enda tha kwa ye malaika aungerereye dzulu za yo bahari na dzulu za yo ts’i, na ukahale cho chuwo cha lwazu kahi za wo mukonowe.” ⁹Bai nichenda hatha kwa ye malaika nikimuvoya anip’e ko kadzuwo. Iye akinamba, “Kahale ukarye na undasikira kutsamirwa mo kanwani here uryaye uchi wa nyuchi, ela mo ndanini vindagaluka utsungu.” ¹⁰Nakahala kako kadzuwo mumo mikononi mwakwe na nikikarya. Nako kere kanatsama here uchi wa nyuchi mo kanwani, ela nirihokamiza, mo ndanini mwangu mukikala utsungu. ¹¹Gonya nikiambwa, “Vinakuv̱irya wamboze unabii kaheri dzulu za ts’i nyinji, mataifa, vidhyomo na athawali anji.”

Mashahidhi airi a Mulungu

¹11:1 21:15Bai nagerwa mudhath’a wa kupimira, gonya nikiambwa, “Enda ukaripime ro Hekalu ra Mulungu, na cho kijaja cha kumbozera sadaka, na uthale o at’u mavoyao mumo. ²11:2 Zabu 79:1; Luk 21:24; 42 Miezi: 12:6, 14; 13:5; Dani 7:25; 12:7Ela wo muhala uriwo ndze ya ro Hekalu usiupime bule kwa kukala uwo wagerwa at’u mario si Ayahudi. Nao mandauzhoga-zhoga wo mudzi mueri wa Jerusalemu kwa muda wa miezi mirongo mine na miri (siku 1,260). ³Na nindaap’a wadimi mashahidhi angu airi, nao mandamboza unabii kwa muda uwo wa siku alifu mwenga na magana mairi na mirongo mihandahu (1,260). Mashahidhi ao mandakala madzavala magunia.”11:3 Nguwo za magunia were zinahumirwa wakathi wa sumazi hedu wakathi wa kufunga.⁴11:4 Zaka 4:1-3, 11-14; Joh 8:17Na mashahidhi aa airi ni yo mihi miri ya mizeituni na zho viguzo viri zha kuikira mataa viimirezho mbere za Bwana wa dhunia ndzima. ⁵11:5 2 Athaw 1:10; Zabu 97:3; Jere 5:14Na mo makanwani mwao munambola moho. Na kila hadhui ajezaye kuahenda mai, moho uwo nikumbola mo makanwani mwao na kumuocha tse-tse-tse. Vizho ndo at’u osi mandiojeza kuahenda mai mandizhofwa. ⁶11:6 Kumbo 7:17-19; 1 Athaw 17:1; Jako 5:17Ao mana wadimi wa kugwira v̱ula isinye wakathi wa kumboza unabii wao. Kidza mana wadimi wa kugagaluza madzi kukala milatso na kureha mapigo ga kila aina haha ts’i here mahendzazho. ⁷11:7 13:1-2; 17:8Na mandihogonya kumboza ushahidhi wao, kundambola rinyama kula ridzina risiro mwisho. Rinyama riri rindagwaga k’ondo nao. Rindaheha nao na rindaadhima rialage. ⁸11:8 Luk 13:33-34; Sodomu: Mwan 18:20; Isa 1:10; Izik 16:46; Misiri: Kumbo 3:16-19; 7:3-5Na miri yao indagwagwa kahi za ngira bomu za mudzi mubomu ambako ndo arikosulubiwa Bwana wao. Na mudzi uwo kimafumbo unaifwa Sodomu na Misiri. ⁹Miri iyo indalolwa kwa muda wa siku t’ahu na nusu ni at’u a kila ts’i na kabila, na kila kidhyomo na taifa k’amandaruhusu ikazikwe bule. ¹⁰11:10 Joh 16:20Na o matoao dhuniani mandaererwa kwa ut’u wa zho vifwa zha aa manabii airi. Mandasherehekea na magerane zawadi kwa kukala manabii aa airi maasirinya sana at’u matoao dhuniani. ¹¹11:11 Izik 37:9-10Ela bada ya zizo siku t’ahu na nusu, Mulungu akiavivira muhuyewe wa uzima na makirungarara kaheri. Bai aryahu marioaona na matso gao mangirwa ni woga sana. ¹²11:12 2 Athaw 2:11; Mahe 1:9Gonya kuchambola sauthi bomu kula mulunguni ikiambiriza, “Ndzoni kuno dzulu!” Bai makihalwa ni ingu machenda mulunguni kuno mahadhui ao manalola. ¹³11:13 6:12-13; Izik 38:19-20Na wakathi uwo wenye ts’i ikithukuka ut’u wa kwangalaza. Sehemu mwenga ya sehemu kumi za wo mudzi yagwa na ikilaga at’u alifu fungahe. O at’u mariothia, mangirwa ni woga na makimup’a nguma Mulungu ariye dzulu mulunguni. ¹⁴K’uzhona zho pigo ra hiri rikikala ridzakira, ela lola ro ra hahu be rinadza vikara zhenye.

Malaika wa fungahe anapiga gundare

¹⁵11:15 4:11; Kumbo 15:18; Zabu 22:28-29; Dani 2:44; 1 Akor 15:24-28Gonya ye malaika wa fungahe akipiga gundare. Nikisikira sauthi bomu ko mulunguni zikinena zikiamba,

“Vivi be wadimi wa kuthawala haha urumwenguni ni wa Bwana wehu,

na iye Masihiwe.

Naye andathawala hatha kare na kare.”

¹⁶11:16 4:4Na o azhere mirongo miri na ane makeresio dzulu ya vihi zhao zha endzi mbere za Mulungu, madzigwaga na moyo makimuvoya Mulungu. ¹⁷11:17 1:8; 4:8; 15:3; 16:7; 19:6, 15; 21:22; Amo 4:13; 2 Akor 6:18Makiamba,

“Huna muv̱era h’ewe Bwana Mulungu, mwenye nguvu zosi.

Mulungu uriyekalako na uriyeko.

Huna muv̱era kwa kukala udzahala wadimio mubomu

na udzaandza kuthawala.

¹⁸11:18 19:5; Zabu 2:1-5; 110:5-6At’u mario si Ayahudi mana k’oro,

ela wakathi wa kwako wa kwanyesa k’orozo udzafika.

Wakathi wa kuhukumu at’u mariofwa

na kuap’a zawadi ahumikio, manabii

na at’uo,

na osi marigohao dzinaro,

hariho abomu na athithe.

Wakathi udzafika wa kuanonga-nonga ao manongao ts’i.”

¹⁹11:19 4:5; 6:12-13; 8:7; 15:5; Ayub 38:22-23; Sanduku ra Kilagane: 1 Athaw 8:1, 6Gonya ro Hekalu ra Mulungu kuko mulunguni rikivugulwa na ro Sanduku ra Kilagane rikionewa mumo. Kidza kukikala na lumethe na sauthi na kigwaragwara. Ts’i ikithukuka na kukinya v̱ula nyinji ya mawe.

Mwanamuche na ridzoka

¹12:1 Isa 7:14; 26:17Gonya kuko dzulu kuchambola ut’u wa ajabu. Kwere kuna mwanamuche ariyekala adzavikwa dzuwa, na wo mwezi were u ts’ini za maguluge. Kidza were adzavikwa taji ya nyenyezi kumi na mbiri kitswani mwakwe. ²Mwanamuche yuyu were adzafikirwa na were a hehi na kudzivugula. Be wo utsungu wa mazhazi wamuhendya arire. ³12:3 Ridzoka: 12:7, 9, 13; 13:2; 16:13; 20:2; Dani 7:7, 24Kidza, kuko dzulu kuchambola ut’u ungine wa ajabu. Lola were hana ridzoka rithune, renye vitswa vifungahe na p’embe kumi. Na kila kitswa were kidzavikwa kirauni. ⁴12:4 Dani 8:10Rikishera sehemu mwenga12:4 Kiyunani haha kinaamba 1/3, yani th’eluth’i. ya zo nyenyezi na uwo mukirawe na rikizitsuha ts’i. Rikiima mbere za ye mwanamuche ili akidzivugula thu rimumize ye mwana. ⁵12:5 19:15; Zabu 2:9Bai ye mwanamuche akidzivugula mwana mulume ariye nde andethawala makabila gosi ga at’u na ukali munji.12:5 Haha go maneno genye ga Kiyunani ganaamba, ‘Mudhath’a wa chuma.’ Ela ye mwana akihalwa mara mwenga muhaka dzulu kwa Mulungu, kahi za kihiche cha endzi. ⁶12:6 1 Athaw 17:1-7; 19:5-7; Math’ 2:13; 1,260 Siku: 11:2Na ye mwanamuche akichimbirira nyika. Kuko ndiko kurikokala kwathayarishwa ni Mulungu, ili adime kutsundzwa kwa muda wa siku alifu mwenga na magana mairi na mirongo mihandahu (1,260).

⁷12:7 Dani 10:13; Jud 9Gonya kukigwa k’ondo kuko mulunguni. Mikaeli; malaika mubomu na malaika andziye makipigana na riro ridzoka na o malaikae. ⁸Ela riro ridzoka na o malaikae makishindwa na kuko mulunguni k’amakalire na hat’u ha kukala kaheri. ⁹12:9 20:2; Mwan 3:1; Isa 14:12; 27:1; Luk 10:18; Joh 12:31Ridzoka riro ratsufwa ts’i. Na riro nde iye nyoka wa kapindi aifwaye Ibilisi, hedu Shethani aukengaye urumwengu wosi. Bai ratsufwa ts’i hamwenga na o malaikae. ¹⁰12:10 4:11; 11:15; Mushithaki: Ayub 1:9-11; Zaka 3:1Gonya kuko mulunguni kuchambola sauthi bomu ikiamba, “Vivi be Mulungu andathawala, andaaokola at’ue. Na iye Masihiwe andahumira wadimiwe kuthawala dzulu za urumwengu, kwa kukala iye aimaye mbere za Mulungu kuashithaki ndugu zehu usiku na mutsana vivi be wakuingwa kuko mulunguni. ¹¹12:11 6:9; Math’ 16:25; Mwana Ng’ondzi: 5:6; 1 Joh 2:14; 5:4Na kwa kukirira na milatso ya iye Mwana Ng’ondzi na kwa ushuhuda wao, mamushinda Shethani, mana were ma thayari hatha kufwa kwa ut’u wa Jesu. ¹²12:12 18:20Kwa vizho kalani na raha nwi mutoao kuko mulunguni. Ela ninwi mutoao dzulu za ts’i, na ninwi a baharini,12:12 Haha vinadima kumanisha zhumbe zhosi. be mundasirima. Mana Shethani adzatsufwa kuko ts’i mukalako na atsukirwe sana, kwani anamanya kukala k’ana wakathi kaheri.”

¹³Vikara riro ridzoka ririhoona kukala ridzatsufwa ts’i, ramuinga ye mwanamuche ariyekala adzadzivugula muthana. ¹⁴12:14 Miaka mihahu na nusu: 11:2Ela Mulungu akimugera ye mwanamuche mahaha mairi ga mwee mubomu ili abururuke achimbirire nyika. Kuko ndiko ariko were andatsundzwa kula kwa riro ridzoka kwa muda wa miaka mihahu na nusu.12:14 Haha go maneno genye ga Kiyunani ganaamba, ‘Wakathi, Nyakathi na nusu wakathi.’¹⁵Riro ridzoka rikihahika madzi manji here muho nyuma ya iye mwanamuche ili gamuhale. ¹⁶Ela ts’i ikimwaviza ye mwanamuche. Ichamoka wina mubomu sana na go madzi gosi garigokala gadzahahikwa ni ro ridzoka gakimizwa mumo winani. ¹⁷12:17 6:9; 11:7; 13:7; Dani 7:21Lola riro ridzoka ratsukirwa sana kwa ut’u wa iye mwanamuche. Richendapigana na o at’u a lukolo lwa ye mwanamuche mariokala madzasala. At’u aa ni aryahu mazigwirao amuri za Mulungu na mana ushuhuda wa Jesu Masihi.

Bai riro ridzoka rikiima k’anda-k’anda za bahari.

Rinyama rinatsumbuka kula baharini

¹13:1 Bahari: Dani 7:3; Rinyama: 11:7; 13:11-17; 16:10; 17:3, 7-13; 19:20; Dani 7:3-8, 21, 25Gonya nikiona rinyama rinambola baharini. Naro were rina vitswa vifungahe na p’embe kumi. Kila lupembe were ludzavikwa kirauni na dzulu za kila kitswa were hana dzina ra kumukufuru Mulungu. ²13:2 2 Ath’es 2:9Na riro rinyama nirirorona were ni here ts’uwi. Maguluge were gana mikombe here dubu. Mulomowe were ni here wa simba. Riro ridzoka rikirip’a riro rinyama nguvu, na kihi cha kwakwe cha endzi, na wadimi mubomu. ³13:3 17:8Kitswa kimwenga cha zho vitswa vifungahe zha ro rinyama were kina kironda kiricho were ni here kindaralaga, ela kironda kicho kikihola na urumwengu ukimashwa ni riro rinyama na ukimuthuwa. ⁴13:4 Zabu 89:6Kwa kukala ro ridzoka were ridzalazha wadimi kwa ro rinyama, at’u makirivoya, na kidza makivoya hatha ro rinyama, kuno manaamba, “K’ahana mwenye wadimi dza riro rinyama na ni h’ani adimaye kupigana naro?” ⁵13:5-6 Dani 7:25; 11:36; 42 Miezi: 11:2Na ro rinyama rikigerwa ruhusa ya kudzionya na kumukufuru Mulungu, kidza rikigerwa wadimi wa kuthawala kwa muda wa miezi mirongo mine na miri. ⁶Bai ro rinyama rikiandza kumukufuru Mulungu, rikikufuru dzinare, rikikufuru ko mulunguni akalako Mulungu, hamwenga na osi makalao kuko. ⁷13:7 12:17Kidza rikigerwa ruhusa ya kupigana, na kuadhima at’u a Mulungu na rikigerwa wadimi dzulu za kila kabila, na ts’i, kidhyomo, na taifa. ⁸13:8 3:5; Mwana Ng’ondzi: 5:6Na at’u osi mario madzina gao k’agandhikirwe kahi za kithabu cha uzima cha ye Mwana Ng’ondzi ariyelagwa kabila urumwengu k’audzaumbwa, mandarivoya ro rinyama. ⁹Bai mut’u ariye na masikiro naasikire. ¹⁰13:10 14:12; Jere 15:2; 43:11; Luk 8:15Kila ariyethalwa andagwirwa akale mateka, andahendwa vizho. Andiyelaga kwa mushu, naye andalagwa kwa mushu. Kwa vizho mut’u wa Mulungu anav̱irya akale na kuluhiro na kuvumirira.

Rinyama rinatsumbuka kula ts’i

¹¹13:11 Math’ 7:15Gonya nikiona rinyama ringine kaheri rinatsumbuka kula ts’i. Rinyama riri were rina p’embe mbiri here za mwana ng’ondzi na were rinanena here ridzoka. ¹²Rinyama riro rahumira wadimi wosi wa ro rinyama ra kwandza. Na rauhumira mbere za riro rinyama riro. Raihendya yo dhunia yosi na osini matoao mumo marivoye riro rinyama ra kwandza ririrokala na kironda cha kwalaga na kikihola. ¹³13:13 16:14; 20:8Rinyama riri rahenda maajabu mabomu sana, hatha rahendya moho uthime ts’i kumbola mulunguni kamare kuno at’u manalola. ¹⁴Na kwa ut’u uu wa kuruhusiwa kuhenda maajabu mbere za ro rinyama ra kwandza, raakenga o at’u osi matoao urumwenguni. Raambira o at’u a urumwengu marihendere kizuka ro rinyama ra kwandza ririropata ranga ra mushu kidza rikienderera kuishi. ¹⁵13:15-16 14:9, 11; 15:2; 16:2; 19:20; 20:4; Isa 44:5; Dani 3:5Ro rinyama rikigerwa ruhusa ya kukivivira muhuye wa uzima cho kizuka, ili kidime kunena na kiahendye at’u osi mandiokahala kukivoya cho kizuka cha riro rinyama ra kwandza malagwe. ¹⁶Kidza rikiahendya at’u osi, hariho anyonge na enye nguvu, ashaha na akiya, atumwa na at’u mario si atumwa, mangizwe muv̱ano vidhanguni mwao hedu dzulu za mikono yao ya kurya. ¹⁷13:17 13:18; 15:2Vivi vindahenda mut’u akale k’adima kugula hedu kuguza kit’u bila kukala na uwo muv̱ano uwo. Muv̱ano uwo ni ro dzina ra ro rinyama, hedu namba iimayo hat’u ha ro dzinare. ¹⁸Bai vivi vinahendza ulachu. Mut’u ariye ni mulachu naang’alirwe ni mana ya namba ii, kwani ni namba ya kibinadamu. Namba ii ni, 666.

Mwana Ng’ondzi na at’ue

¹14:1 22:4; Murima wa Sayuni: Isa 4:5; Joe 2:23; At’u 144,000: 3:12; 7:3-4Gonya nikitsuha matso, na lola were hana Mwana Ng’ondzi aungerere haho dzulu za Murima wa Sayuni. Naye were a hamwenga na kundi ra at’u alifu gana mwenga na mirongo mine na ne (144,000). At’u aa makala madzandhikwa madzina mairi mumo vidhanguni mwao. Dzina ra Mwana Ng’ondzi na dzina ra babaye iye Mwana Ng’ondzi. ²14:2 1:15; 15:2; 19:6; Izik 1:24-25Na nikisikira sauthi here ya mwamba wa baharini na here kigwaragwara cha londzo kula mulunguni. Kidza sauthi iyo niriyoisikira were ni here sauthi za at’u mapigao vinubi. ³14:3 4:4, 6; Wira musha: 5:9Na at’u osi alifu gana mwenga na mirongo mine na ne (144,000), makiimba wira musha wenye mbere za cho kihi cha endzi, na mbere za zho zhumbe vine zha moyo, na mbere za o azhere. Wira uu were k’ahana mut’u adimaye kuugwira, isihokala ao at’u maalifu mariokala magulwa kula dhuniani. ⁴14:4 Joh 10:4-5At’u aa ni aryahu mamuthuwao ye Mwana Ng’ondzi kokosi endako. Mana maishani mwao k’amadzangizire nyenye kwa kulala na mwanamuche yoyosi.14:4 Haha vinadima kueleweka kiroho kukala aa at’u mamuthuwa Mwana Ng’ondzi na mioyo yao yosi hasiho kudzingiza nyenye na maut’u ga dambi. Bai at’u aa magulwa kula kahi za adamu na makilazhwa kwa Mulungu na kwa ye Mwana Ng’ondzi dza here malumbuko. ⁵14:5 Isa 53:9; Zefa 3:12-13At’u aa were k’amadzanena ulongo, na were k’amana makosa gogosi.

Malaika manalazha uv̱oro kula kwa Mulungu

⁶14:6 Math’ 24:14Gonya nikiona malaika anabururuka dzulu mulunguni na were ana Uv̱oro Udzo wa kare na kare kuambiriza at’u osini matoao haha dhuniani, at’u a kila taifa, kila kabila, kila kidhyomo na kila ts’i. ⁷14:7 Zabu 146:6Bai akinena zhomu akiamba, “Wakathi wa kumuhukumu mudamu udzafika. Kwa vizho mup’eni nguma Mulungu kidza muheshimuni. Muvoyeni iye ariyeumba mulunguni na ts’i, na bahari, na matso gosi ga madzi.”

⁸14:8 17:2; 18:2Bai ye malaika arihoziwiwa hambola malaika mungine mwenye akiamba, “Udzagwa! Mudzi mubomu wa Babiloni, udzagwa! Mudzi uriwohenda urumwengu muzima unwe divai ya mathuruthuru ga uzindzi wa kwakwe, udzagwa!” ⁹14:9 13:15Bada ya iye, kuchambola malaika wa hahu akiluta mumiro kuathuwa o airi a kwandza akiamba, “Mut’u yoyosi andiyerivoya ro rinyama na cho kizukache, na kwangizwa muv̱ano ho kidhanguni hedu mukononi hakwe, ¹⁰14:10 15:7; 16:1, 19; 19:20; Mwan 19:24; Zabu 11:6; Jere 25:15; Izik 38:22; Math’ 25:41andaadhibiwa ni Mulungu. Vizho be vindakala ni here divai k’ali ambayo iye Mulungu mwenye ndiye adziyeitsoha kahi za kikombe. Bai Mulungu andaatesa at’u aa kwa moho wa baruthi mbere za malaika aeri na mbere za iye Mwana Ng’ondzi. ¹¹14:11 19:3; Isa 34:10Hat’u haho k’ahana kuoya kwa ao marivoyao riro rinyama na cho kizukache na yoyosi ariye na muv̱ano wa dzinare. Kwani wo mosi wa moho uatesao unaenderera kukwera dzulu hatha kare na kare.”

¹²14:12 13:10Ndo at’u a Mulungu, mazithuwao amuri za kwakwe na mamukuluhirao Jesu, manav̱irya maenderere kuvumirira. ¹³14:13 1:3; 16:15; 19:9; 20:6; 22:7, 14; Aebu 4:9-10Gonya nikisikira sauthi kula mulunguni ikinena ikiamba, “Zhandhike vivi, Roho anaamba, ‘Baha aryahu at’u mafwao kahi za Bwana kuandzira vivi, mana mandaoya thabu za kwao, kwani mahendo gao ganathuwana nao.’ ”

Hukumu ya siku ya mwisho

¹⁴14:14-20 Joe 3:13; Math’ 13:39-4014:14 1:7, 13Gonya nikitsuha matso, na lola were hana ingu raruhe tse. Dzulu za ingu riro were hakelesi mut’u here Mwana wa Mudamu. Naye were adzavala kirauni cha dhahabu na mukononi mwakwe were adzagwirira upanga wa kurya. ¹⁵Gonya kahi za ro Hekalu kuchambola malaika mungine akidzapiga luchemi zhomu kumwamba iye ariyekala akelesi ho inguni, “Bai mavuno ga dhunia ga thayari na wakathi wa kuvuna udzafika, kwa vizho hala upangao ukwatye kuvuna.” ¹⁶Na iye ariyekala akelesi mumo inguni akitsuha upangawe dzulu za ts’i na ts’i ikivunwa. ¹⁷Gonya nikiona malaika mungine ariyekala naye adzagwirira upanga wa kurya. Malaika yuyu wambola kula kahi za ro Hekalu ra mulunguni. ¹⁸Badaye hakidza malaika mungine kula ho henye kijaja cha kulazhira sadaka. Malaika yuyu were ana wadimi dzulu za moho. Bai akiluta mumiro akinena na iye ariyekala adzagwirira uwo upanga wa kurya akimwamba, “Kwa kukala zo zabibu zizhalwazo dzulu za ts’i zi thayari, bai humira wo upangao uzivune na uzikundzumanye.” ¹⁹14:19 19:15; Isa 63:1-6Kwa ut’u uwo bai, ye malaika akitsuha wo upangawe dzulu za ts’i kuvuna zo zabibu na kuzitsuha kahi za hat’u ha k’oro za Mulungu ha kuzikamulira. ²⁰Na zo zabibu zichangizwa hat’uhe ha kuzikamulira ndze ya wo mudzi mubomu zikikamulwa. Bai hachambola milatso minji here muho kula kwa zo zabibu. Na muho uwo were una wina wa futi ts’ano, na ure wa here maili magana mairi.

Mashaka mafungahe ga mwisho

¹15:1 4:5; 15:7; 16:1; 17:1; 21:9Gonya nikiona ut’u ungine ubomu wa ajabu kidza wa kwangalaza. Naona malaika afungahe mariokala mana mapigo mafungahe ga mwisho. Mapigo gaga were ndo garigokamilisha k’oro za Mulungu. ²15:2 4:6; 5:8; 13:15, 18; 14:2Gonya nikiona ut’u here bahari ya kilolo idziyotsanganywa na moho. Na haho k’anda ya bahari were haimire ao at’u mariokala madzarishinda riro rinyama, hamwenga na cho kizukache na iyo namba ya kwakwe.15:2 Mana ya kushinda cho kizukache hamwenga na yo namba ya kwakwe, ni kukahala kukivoya cho kizuka na kukahala kwangizwa muv̱ano wa ro rinyama. At’u aa were madzagwirira vinubi marizhogerwa ni Mulungu. ³15:3-4 4:1115:3 16:5-6; 19:2; 22:12; Kumbu 32:4; Zabu 145:17; Wira: Kumbo 15:1; Zabu 111:2; 139:14Na makiimba wira uriwoimbwa ni Musa muhumiki wa Mulungu, na wira wa iye Mwana Ng’ondzi. Wira uu were unaamba,

“H’ewe Bwana Mulungu mwenye nguvu zosi,

mahendogo ni madzo na ni mabomu sana!

Ngirazo ni za hachi na za jeri,

uwe u muthawali wa makabila gosi.15:3 Maoro mangine ganaamba, ‘Uwe u Muthawali hatha kare na kare.’

⁴15:4 14:7; Zabu 86:9; 98:2-3; Isa 2:2-3; Jere 10:6-7Ni h’ani Bwana asiyekugoha na kurilika dzinaro?

Uwe h’akeyo ndiwe uriye u mueri Bwana.

Na kwa kukala mahendogo ga hachi ganaonekana lwazu,

makabila gosi ga at’u gandakudza na gakuvoye uwe.”

⁵15:5 11:19; Kumbo 40:34; Mahe 7:44Vinakira vivi, natsuha matso kuko mulunguni, nikiona ro hekalu ri lwazu na mumo ndani mwere muna ro hema ra kwanyesa kukala Mulungu anao. ⁶15:6 1:13; Dani 10:5Na o malaika afungahe enye wadimi wa kureha mapigo mafungahe, machambola kahi za ro Hekalu makidza. Mere madzavala majoho maruhe ga kitani safi na madzadzifunga mikanda ya dhahabu mumo makathini mwao. ⁷15:7 4:6; 14:10; 16:1Gonya mumwenga wa ao zhumbe ane, akiagolozera o malaika afungahe ndhuwa fungahe za dhahabu zidzizodzala k’oro za iye Mulungu aishiye kare na kare. ⁸15:8 Kumbo 40:34-35; Isa 6:4; Izik 44:4Na wo mosi wa nguma na wadimi wa Mulungu ukiridzaza ro hekalu. Bai k’ahana mut’u ariyedima kwangira kahi za ro Hekalu muhaka garyahu mapigo mafungahe ga o malaika afungahe gakigoma.

Ndhuwa fungahe za k’oro za Mulungu

¹16:1 15:1; Zabu 69:24; Isa 66:6; Jere 10:25Gonya nikisikira sauthi ikinena zhomu ikiaamurisha o malaika afungahe kula kwa ro Hekalu. Ikiambira, “Endani mukazimwage ts’i zo k’oro za Mulungu zirizo kahi za zho vidhuwa vifungahe.” ²16:2 13:15; Kumbo 9:10Bai iye malaika wa kwandza akihenda vizho zhenye. Achendamwaga ts’i zho virizhokala ndani ya lulo ludhuwalwe. Lola ao mariokala na muv̱ano wa riro rinyama na ao mariokala madzakivoya kicho kizukache, machambolwa ni vironda vii-vii kidza zha kwakaka. ³16:3-4 8:8; Kumbo 7:17-21; Zabu 78:44Gonya ye malaika wa hiri akigwira ludhuwalwe boo baharini. Na gago madzi gakikala doo milatso here ya mut’u adziyepigwa mushanga. Zhumbe zhosi vitoazho mumo baharini vikifwa. ⁴Gonya malaika wa hahu akigwira ludhuwalwe naye boo, mihoni na kwenye matso ga madzi, na gago madzi gakigaluka milatso gosi. ⁵Bai nikisikira iye malaika ariye na wadimi dzulu za madzi akiamba, “H’ewe mueri, uwe uriyekalako kidza uriyeko vivi, hukumuzo ni za hachi. ⁶16:6 17:6; 18:24; 19:2; Kumbu 32:43; Zabu 79:3, 10; Math’ 23:35, 37Kwa kukala athiriri maakot’a at’uo na manabii a kwako, ndosa Bwana udzaap’a milatso manwe. Mana vizho ndizho mav̱iryazho kupata.” ⁷16:7 15:3Gonya haho kijajani ha kulazhira sadaka hachambola sauthi ikinena zhomu ikiamba, “H’ewe Bwana Mulungu mwenye nguvu zosi, hukumuzo ni za jeri na za hachi.” ⁸H’aya, malaika wa ne akilugwira lo ludhuwalwe akimwaga vizho virizhokala mumo dzulu za ro dzuwa na bai rikiruhusiwa rioche at’u. ⁹16:9 9:20-21; 16:11, 21Bai at’u makiochwa ni wo moho wa dzuwa, na makirilani riro dzina ra Mulungu, ariye iye ndiye mwenye wadimi dzulu za go mapigo. Kidza k’amathubire na kumup’a nguma Mulungu.

¹⁰16:10 13:1-2; Kiza: Kumbo 10:21-22; Isa 8:22Gonya ye malaika wa tsano akilugwira lo ludhuwa akilumwaga dzulu za cho kihi cha endzi cha riro rinyama. Kiza kikigit’ana gii dzulu za wo uthawali wosi wa ro rinyama na at’u makiluma ndhimi zao kwa utsungu. ¹¹Makimuhukana iye Mulungu wa mulunguni kwa gago maumivu gao na kwa vizho vironda zhao, ela hatha hamwenga na vizho, go mahendo gao mai k’amagathubire bule.

¹²16:12 Isa 11:15; 44:27; 46:11Ye malaika wa handahu naye akilugwira lo ludhuwalwe, akimwaga zho virizhokala mumo kahi za muho mubomu wa Yufurati. Nawo furu, ukifuruka, ili uatengezere ngira athawali a mwambolero wa dzuwa. ¹³16:13-14 12:3; 13:1-2; Kumbo 8:6; Zabu 78:45Gonya nikiona roho t’ahu k’olo here zhula zichambola kula kahi za kanwa ka ro ridzoka na ro rinyama na kula kahi za kanwa ka ye nabii wa ulongo. ¹⁴16:14 11:17; 13:13-14; 19:20; Math’ 24:24; 2 Ath’es 2:9; K’ondo: 19:11-21Roho zizo ni roho za p’ep’o mahendao miujiza. Kazi ya zizi roho t’ahu ni kwendakundzumanya athawali osi a urumwengu hamwenga. Zindaakusanya ili zigwage k’ondo siku iryahu bomu ya Bwana Mulungu mwenye nguvu zosi. ¹⁵16:15 3:3, 18Bwana anaamba vivi, “Lola bai, mimi ninadza gafula here mwivi. Baha ye achesaye na nguwoze ili akatsanenda huhu ra mutindi na kupata waebu mbere za at’u.” ¹⁶Bai ao athawali makikundzumanywa hamwenga ni zo roho t’ahu za iye p’ep’o kahi za hat’u hariho kwa Kieburania hanaifwa Harimagedoni.

¹⁷16:17-21 16:1; Isa 66:6Gonya malaika wa fungahe akilugwira lo ludhuwalwe akimwaga hewani vizho virizhokala mumo ndani. Nikisikira sauthi ya dzulu kula kahi za cho kihi cha endzi kiricho ndani za ro Hekalu. Ikiamba, “Vidzahendwa bewe.” ¹⁸16:18 4:5; 6:12-13Bai hakala na lumethe, na sauthi, na kigwaragwara na ts’i ikithukuka zhomu. Kuthukuka kuku kwa ts’i were k’akudzaonewa hangu urumwengu uumbwe. ¹⁹16:19 14:10; 18:2Wo mudzi mubomu ukigazhika k’ana t’ahu, na yo midzi mibomu ya urumwengu muzima ikinongwa-nongwa yosi. Na Mulungu k’ausahauire bule wo mudzi wa Babiloni. Waulazimisha ukwakwahire cho kikombe cha divai kiricho kinaima hat’u ha k’oro za Mulungu. ²⁰Kila kisiwa changamika na mirima k’aionekanire kaheri. ²¹16:21 11:19; 16:9Hakigwa v̱ula ya mawe ga uziho wa kufika kilo mirongo mine na ts’ano dzulu za o at’u. Bai o at’u makimulani Mulungu kwa ut’u wa riro pigo riro, mana were ni pigo bomu.

Mwanamuche malaya

¹17:1 Jere 51:13Vikara mumwenga wa aryahu malaika afungahe mariokala madzagwirira ndhuwa akidza kwangu akinamba, “Ndzo nikwanyese zho andizhohukumiwa ye malaya mubomu ariye akelesi dzulu za madzi manji. ²17:2 14:8; 17:18; 18:3; Jere 51:7; Nah 3:4Mwanamuche ariyezinga na athawali na at’u a urumwengu, waahenda maree divai ya wo uzindziwe.” ³17:3 Roho: 1:10; 21:10; Izik 8:3; 40:2; Rinyama: 13:1-2Bai ye malaika akinihala kahi za Roho hatha nyika. Kuko nikiona rinyama rithune ririrokala ridzaorwa madzina ga kumukufuru Mulungu mwiri wosi. Kidza were rina vitswa vifungahe na p’embe kumi. Dzulu za riro rinyama were hana mwanamuche akeresi. ⁴17:4 18:3, 16; Jere 51:7; Izik 28:13Ye mwanamuche were adzavala joho ra rangi ya zambarau na rangi th’une. Kidza were adzapambwa na dhahabu, vikolokolo zha kima kibomu na lulu. Mukononi mwakwe were adzagwirira kikombe cha dhahabu kirichokala kithele mathuruthuru na vit’u vikolo, zha uwo uzindziwe. ⁵17:5 Jere 2:20; Hose 1:2Haho kidhanguni hakwe were handhikwa dzina ririro k’arimanyikana manaye. Na dzina renye ndo riri, “MUDZI MUBOMU WA BABILONI, MAMEYE MALAYA OSI, na MAMEYE MATHURUTHURU GOSI HAHA DHUNIANI.” ⁶17:6 16:6Namulola ye mwanamuche, nikimona kukala ni murevi kwa ut’u wa kunwa milatso ya at’u a Mulungu na milatso ya osi mariokotw’a kwa ut’u wa kumukuluhira Jesu.

Nami nirihomona nangalala zhomu. ⁷17:7-8 13:1-2Ela ye malaika akinuza akiamba, “Kwanoni unangalala we? Thariza nikwambire siri ya yuyu mwanamuche na ro rinyama ra vitswa vifungahe na p’embe kumi, ambaro ridzamwareka iye mwanamuche. ⁸17:8 13:3; Kithabu: 3:5Riryahu rinyama uronaro, rakalako gonya rikifwa. Vivi rindambola kaheri kula kahi za ro ridzina risiro mwisho na rinongwe-nongwe. At’u osi matoao urumwenguni mario madzina gao k’agaorerwe kahi za cho kithabu cha uzima kabila urumwengu k’audzaumbwa, mandangalala zhomu kurona. Kwa kukala rakalako, rikifwa, na vino rinambola kaheri.

⁹17:9 13:18“Bai vivi vinahendza ulachu ndo mut’u avielewe. Zho vitswa vifungahe vinaima hat’u ha mirima mifungahe hariho ndiho adzihokeresi ye mwanamuche. ¹⁰Kidza vinaima hat’u ha athawali afungahe. Kahi za ao athawali afungahe, mumwenga anathawala, atsano magonya kufwa, na mumwenga ye tha k’adzadza. Bai andihokudza andathawala kwa muda mufuti. ¹¹Na ro rinyama ririrokala moyo, ela rikifwa ni rimwenga ra o athawali afungahe na ro renye ni muthawali wa nane. Naro pia rindanongwa-nongwa.

¹²17:12 Dani 7:7, 24“Zo p’embe kumi uzonazo ni athawali kumi mario k’amadzangwe kugerwa wadimi wa kuthawala, ela mandagerwa wadimi wa kuthawala hamwenga na ro rinyama kwa muda wa saa mwenga thu. ¹³Athawali aa osi kumi mana lengo mwenga, na mandarip’a ro rinyama nguvu na wadimi wa kwao. ¹⁴17:14 19:16, 19; Kumbu 10:17; Zabu 136:3; Dani 2:47; 1 T’imo 6:15Aa osi mandagwaga k’ondo kuheha na ye Mwana Ng’ondzi hamwenga na o marioifwa, makitsagulwa na manamukuluhira. Ela ye Mwana Ng’ondzi na o at’ue, mandaadhima kwa kukala iye be ni Bwana wa mabwana, na Muthawali wa athawali.”

¹⁵17:15 17:1Bai iye malaika akinena nami kaheri akinamba, “Gago madzi udzigogaona gadzakeresizwa ni iye mwanamuche malaya, be ni at’u a kila ts’i, kila kabila, na kila kidhyomo. ¹⁶17:16 17:2; 18:8; Alaw 21:9; Izik 23:29; Hose 2:3Zizo p’embe kumi na riro rinyama udzirorona, zhosi vindamumena ye mwanamuche malaya. Mandamuhendya akale huhu na kumuhoka zhosi arizho nazho akale tsululu. Mandamutharura-tharura na mamwangamize na moho. ¹⁷17:17 17:13Kwani Mulungu waahendya mathimize lengore, kwa kuahendya makale angara na kulazha wadimi wao wa kuthawala kwa riro rinyama muhaka go maneno ga Mulungu gandihothimira. ¹⁸Iye mwanamuche udziyemona, ni wo mudzi mubomu uathawalao o athawali a urumwengu.”

Mulungu anawanonga mudzi wa Babiloni

¹18:1-24 Isa 13; 47; Izik 27Vivi virihokira, natsuha matso nikimona malaika mungine kaheri mwenye wadimi mubomu. Akithima kula mulunguni. Bai wo mulangaza wa kwakwe waihendya dhunia yosi ing’ale. ²18:2 14:8; 16:19; Isa 13:20-22; 21:9; 34:11, 14; Jere 50:39-40; 51:8Bai akinena kwa sauthi ya dzulu akiamba,

“Mudzi mubomu wa Babiloni udzagwa benwi udzagwa!

Vivi be udzakala mudzi wa mashethani

na p’ep’o achafu na ukolo wa kila samupuli.

Udzakala kitsunji cha unyama uchafu wa kubururuka wa kila aina,

unyama wa kisirani.

³18:3 17:2; 18:11-19; Isa 23:8; Izik 27:22-23, 33Vivi zhakala kwa kukala kila kabila ranwa divai ya mathuruthuru ga uzindziwe.

Mudzi uwo wazinga na athawali a haha urumwenguni.

Ahendi a biashara mathajirika kukirira na zizo th’amaaze mbii zisizo na muhaka.”

⁴18:4 Isa 48:20; Jere 51:45; 2 Akor 6:17Gonya kuchambola sauthi nyingine kuko mulunguni ikiamba,

“At’u angu, kwamboleni kuko kwakwe sidze mukashiriki zizo dambize,

na sidze mukashiriki gago mapigoge.

⁵18:5 Mwan 18:20Mana zizo dambize iye zidzakala ts’umbi bomu iriyo hatha inagut’a dzulu mulunguni.

Na Mulungu k’adzausahau bule uwo uthiririwe.

⁶18:6 Zabu 137:8; Jere 50:29Bai vizho arizhoahendera at’u, nanwi muhendereni dza vizho zhenye.

Muriheni k’ana mbiri ya vizho arizhohenda.

Mutsohereni kikombe cha divai mbifu k’ana mbiri ya cho arichokitsoha iye.

⁷18:7-8 Isa 47:8-9Mwangizeni kigondzi na mumutese dza viryahu

arizhodzip’a nguma na uwo ukolo wa kwakwe.

Kwani iye anadziamba kimoyo-moyo, ‘Mimi nikeresi here muthawali muche.

Si muche gungu mino na sindangirwa ni kigondzi chochosi.’

⁸18:8 17:16Bai kwa ut’u uu, andapata mapigo ga manyonge, kiriro, na ndzala siku mwenga.

Na kidza andakundywa moho,

mana iye Bwana Mulungu andiyemuhukumu, nde mwenye nguvu zosi.”

⁹18:9-10 Izik 26:16-17; 27:30-35Na o athawali a urumwenguni mariozinga na kupiga maisha naye, mandihowona wo mosi wakathi andihokala anasha mandamuririra. ¹⁰Mandahenda kuima kure kwenye kwa kugoha kupatwa ni gago mateso ga kwakwe. Mandaamba,

“Undagamanya wenye wo mudzi wa Babiloni!

Mudzi mubomu wenye nguvu,

udzahukumiwa kwa muda wa saa mwenga thu.”

¹¹Na o ahendi a biashara a urumwengu mandamuririra na kumushikithikira, mana vit’u zhao k’avigulwa kaheri. ¹²18:12-13 Izik 27:12-24K’ahana kamare agulaye zo dhahabu zao, na fedha, na hedu go mawe gao ga kima kibomu, kitani safi na nguwo za zambarau, na th’une, na hariri. K’ahana agulaye mihi yoyosi ya udhi na vit’u zhosi vitengezwazho na p’embe za ndzovu, na mbao za gali, na vit’u zha ng’andu, na zha chuma, na zha marimari. ¹³K’akuna agulaye mudhalasini, iliki, mavumba, manemane, ubani, divai, mafuha, unga, ngano. K’akuna agulaye ng’ombe, ng’ondzi, farasi, magari ga kusukumwa ni farasi, atumwa na roho za anadamu. ¹⁴O ahendi a biashara makimwamba ye mwanamuche,

“Zho vit’u vidzo-vidzo zhosi

urizhokala na th’amaa nazho,

na wo ushahawo wosi, na kuko kung’alako

vidzangamika tse na k’undazhona kaheri.”

¹⁵18:15 Isa 47:15; Izik 27:36Bai ao ahendi a biashara kahi za mudzi uwo mubomu, mariopata ushaha kula kwa ye mwanamuche, mandaima kure kwa kugoha kupata mashaka hamwenga naye. Mandarira na kushikithika zhomu zhenye. ¹⁶18:16 17:4Mandaamba,

“Undamanya wenye uwo mudzi mubomu.

Mudzi uriwokala ukidzivika, kitani safi, nguwo th’une na za zambarau,

na kudzipamba na dhahabu, na mawe ga kima kibomu, na lulu.

¹⁷Uwo uthajiriwe wosi udzangamika kwa muda wa saa mwenga thu-thu-thu.”

Ao abomu a zo meli, o mabaharia, o azharo na osi mariokala madzagwirwa mukono ni yo bahari maima kure. ¹⁸18:18-19 Izik 27:28-34Kidza marihowona wo mosi wakathi arihokala anasha makirira makiamba, “Ni mudzi hiwo uriwokala mubomu dza uno?” ¹⁹Na lola marira na kushikithika. Makidzimwagira mitsanga ya kitswa na kuamba,

“Undamanya wenye mudzi uwo mubomu.

Mudzi uriwo kukirira na uwo uthajiriwe,

waahenda mathajiri o at’u enye meli mo baharini.

Vino vivi udzangamizwa kwa muda wa saa mwenga.”

²⁰18:20 12:12; Jere 51:48Hendani raha ninwi mutoao kuko mulunguni, mana Mulungu adzauhukumu uwo mudzi mubomu wa Babiloni kwa gago urigomuhendera. Ninwi at’ue, na ahumwi, na manabii, nanwi hendani raha, mana Mulungu adzauhukumu uwo mudzi wa Babiloni kwa gago urigomuhendera. ²¹18:21 Jere 51:63-64Gonya hakimbola malaika mwenye wadimi, akihatsola riiwe ribomu here lwalwa, akiritsuha mumo baharini. Akiamba,

“Wo mudzi mubomu wa Babiloni nawo undahenderwa vivi zhenye.

Undavugurizwa ts’i kwa nguvu na k’aundaonewa kaheri.

²²18:22 Isa 16:10; 24:8; Izik 26:13Ndani mwako uwe Babiloni, k’amundasikirwa wira upigwao na vinubi,

hedu mimiro ya at’u, hedu kusikira apigi a gunda, hedu apigi a kivoti.

K’akundasikirwa mumiro wa lwalwa kaheri,

kidza k’akundakala na fundhi yoyosi.

²³18:23 Isa 23:8; 47:12; Jere 7:34Taa k’arindaaka kaheri mumu mwako.

Kidza k’akundakala kaheri na kuhala, hedu kuhalwa.

Kwani ahendzio a biashara were ndo at’u abomu haha ts’i,

na uwe waakenga at’u osi matoao mo urumwenguni na wo utsaiwo.

²⁴18:24 16:6; Isa 26:21; Jere 51:49; Izik 24:7-8Na ndani mwakwe mwaonekana milatso ya o manabii na ya at’u a Mulungu,

na ya at’u osi mariolagwa dhuniani.”

At’u manamulika Mulungu kuko mulunguni

¹19:1 4:11Bada ya iye malaika mwenye wadimi kumarigiza kunena, nasikira mumiro here wa kundi bomu ra at’u kuko mulunguni. Bai at’u ao maluta mimiro makiamba,

“H’aleluya! Mulungu wehu ndiye aokolaye at’u, nde mwenye nguma, na wadimi. ²19:2 15:3; 16:6; 22:12; Kumbu 32:43; Zabu 79:10Mana iye anahukumu kwa ngira ya jeri na ya hachi.

Naye adzamuhukumu ye mwanamuche malaya, ariyenonga yo ts’i na uwo uzembewe.

Na pia adzamurihiza kwa ut’u wa iyo milatso ya o ahumikie.”

³19:3 Mosi: 14:11; Isa 34:10Bai makiluta mimiro yao kaheri makiamba,

“H’aleluya! Uwo mosi umbolao kahi za wo moho umuochao ye malaya

unaenderera kwenda dzulu hatha kare na kare.”

⁴19:4 4:4, 6; 5:7; Zabu 106:48Na o azhere mirongo miri na ane na ao zhumbe ane a moyo, madzigwaga na moyo makimuvoya Mulungu. Mamuvoya iye Mulungu ariye akeresi kahi za kihi cha endzi, makiamba, “H’aami. H’aleluya!”

Sherehe ya iye Mwana Ng’ondzi

⁵19:5 11:18; Zabu 22:24; 115:13; 134:1; 135:1Gonya ho henye cho kihi cha endzi hachambola mumiro ukiamba,

“Mulikeni Mulungu wehu ninwi ahumikie nyosi, ninwi mumuheshimuo, hariho mubomu hariho muthithe.”

⁶19:6 11:17; 14:2; Zabu 47:5-9; 96:7-10; Zaka 14:9Vinakira vizho, nikisikira mumiro here wa kundi bomu ra at’u, here wa mwamba ududumizao na here wa kigwaragwara. Bai mumiro uwo wanena zhomu ukiamba, “H’aleluya! Mana iye Bwana Mulungu wehu mwenye nguvu zosi, anathawala. ⁷19:7 21:2Nafuhende raha, fumupigire njerejere na fumup’e nguma. Nahumulike mana wakathi wa harusi ya iye Mwana Ng’ondzi udzafika, na iye bibi harusi mwenye adzagonya kudzithayarisha. ⁸19:8 6:11Adzagerwa nguwo mbidzo za kitani safi, kidza za kung’ala-ng’ala na safi, avale.” Kwani iyo nguwo ya hariri ni gago mahendo ga hachi ga at’u a Mulungu.

⁹19:9 14:12; Isa 25:6; Math’ 22:2; Luk 14:15-16; Maneno ga jeri: 21:5; 22:6Bai ye malaika akinamba, “Ndhika maneno gaga: Baha ao at’u mariosungwa iyo sherehe ya harusi ya iye Mwana Ng’ondzi.” Gonya akinena nami kaheri akinamba, “Maneno gaga ni maneno ga jeri, na ni ga Mulungu.” ¹⁰19:10 6:9; 22:8-9Bai nadzigwaga ho ts’i mbereze nimuvoye, ela ye akiniamba, “Hatha bule, usihende vizho. Mimi nami ni muhumiki thu here uwe, ni muhumiki here o nduguzo mario manathuwa uwo ujeri uriwogunulwa ni Jesu. Kwa vizho muvoye Mulungu, mana uwo ujeri uriwogunulwa ni Jesu, ndo nguvu ziahendazo makamboza unabii.”

Jesu Masihi anaridhima riro rinyama

¹¹19:11 4:1; 19:2; Zabu 72:1-14; 98:9; Isa 11:4; Izik 1:1-3; Mahe 7:56Gonya ko mulunguni kukigunuka na lola nikiona farasi mwaruhe tse. Dzina ra ye muhirikiwe were ni Muaminifu na Mujeri. Naye nikuhukumu na kupiga viha kwa ngira ya hachi. ¹²19:12 1:14-15; 2:17Matsoge were ga here moho uakao. Mumo kitswani mwakwe were adzavala taji nyinji. Mwirini mwakwe mo, were mwandhikwa dzina ambaro k’ahana mut’u arimanyaye hasihokala iye mwenye. ¹³19:13-15 Isa 63:1-619:13 Joh 1:1Kidza were adzavala k’andzu iriyokala idzavikwa mulatsoni. Na riro dzina arirokala anaifirwa were ni “Neno ra Mulungu.” ¹⁴19:14 6:2-8, 11Na go majeshi ga mulunguni garigo were gadzavala kitani mbidzo, nyaruhe tse, na safi, gakimuthuwa nyuma kuno ga dzulu za farasi aruhe. ¹⁵19:15 1:16; 2:26-27; 11:17; 14:14-20; Jere 25:30-31Kanwani mwakwe mwambola mushu wa kurya andiwouhumira kugadhima go makabila, naye andaathawala na ukali munji na kuamwagira k’oro k’ali za ye Mulungu mwenye nguvu zosi.19:15 Haha Kiyunani kinaamba, ‘andazhoga hat’u ha kukamulira divai ya k’oro k’ali za Mulungu mwenye nguvu zosi.’¹⁶19:16 17:14Kahi za riro valore na kahi za kiga cha kwakwe mwere mwandhikwa dzina riri: “Muthawali wa athawali na Bwana wa mabwana.” ¹⁷19:17-18 Izik 39:4-5, 17-19Kidza nikiona malaika aungerere dzulu za ro dzuwa. Bai malaika yuyu wawiha uwo unyama ubururukao mainguni kwa mumiro mubomu, akiamba, “Ndzoni mukundzumanyike hamwenga kwa iyo sherehe bomu ya Mulungu. ¹⁸19:18 13:16Ndzoni murye nyama za athawali, na za abomu a viha, na za at’u enye nguvu, na za apandi a farasi na farasi a kwao, na za at’u osi, atumwa, mario huru, abomu na athithe.” ¹⁹19:19 17:12-14; Zabu 2:2; Izik 38:2-9, 14-16; Zaka 14:2Gonya nikirona ro rinyama na o athawali a urumwengu na majeshi ga kwao. Makikundzumanyana hamwenga mapigane na ye akelesiye dzulu za iye farasi na gago majeshige. ²⁰19:20 13:1-2, 13, 15; Baruthi: 14:10; 20:10, 14; 21:8; Isa 30:33Na ro rinyama rikihalwa mateka hamwenga na ye nabii wa ulongo. Nabii yuyu nde ariyekala akitengeza miujiza mbere za ro rinyama. Bai wahumira miujiza ii kuakenga aryahu mariokala na muv̱ano wa ro rinyama na o mariokala makiivoya yo sanamuye. Bai osi airi, ro rinyama hamwenga na ye nabii makitsufwa a moyo kahi za ziya ra moho wa baruthi. ²¹Na majeshi ga kwao gakithemwa-themwa na wo mushu umbolao kanwani mwa ye ahirikaye farasi, gakilagwa. Bai unyama wosi ukit’ot’a zo nyama zao hatha ukichenjeha.

Shethani anafungwa jela miaka alifu mwenga

¹20:1 10:1; 18:1; Ridzina risiro mwisho: 9:1Nikitsuha matso nikiona malaika anathima kula mulunguni. Malaika yuyu were adzagwirira funguo ya ridzina risiro mwisho na munyororo mubomu. ^2-320:2 12:3, 9Bai akirigwira ro ridzoka, yani yuyahu nyoka wa kapindi, aifwaye Ibilisi na Shethani. Bai akirifunga minyororo, akiritsuha kuko ridzina risiro mwisho. Haho muryangoni akihakot’a k’ufuli na akihapiga muhuri, ili asidze akagakenga kaheri go makabila ga at’u. Naye andafungwa kuko kuzimu kwa muda wa miaka alifu mwenga. Bada ya iyo miaka kukira, andarichirwa huru kwa muda muchache.

⁴20:4 6:9; 13:15; Dani 7:9, 22; Luk 22:30; 1 Akor 6:2Kidza nikiona vihi zha endzi. Na vihi vizho zhakala vidzakeresizwa ni at’u mariogerwa wadimi wa kuhukumu. Kidza nikiona roho za ao at’u mariolagwa kwa kutoswa vitswa kwa ut’u wa ushuhuda wa Jesu Masihi na kwa ut’u wa neno ra Mulungu. At’u aa makala k’amarivoyere riryahu rinyama hedu cho kizukache. Na were k’amangizirwe muv̱ano wa ro rinyama vidhanguni, hedu mikononi mwao. Bai at’u aa mafufuka na makithawala na Masihi kwa muda wa miaka alifu mwenga. ⁵Bai kuko ndiko kufufulwa kwa kwandza. O at’u angine mariofwa, k’amafufukire muhaka iyo miaka alifu mwenga irihogoma. ⁶20:6 1:6; 2:11Yuyahu andiyekala mo kahi za kufufulwa kwa kwandza, be wahaswa na ni mueri. Kiryahu kifwa cha hiri kindakala k’akina nguvu kwa at’u dza vizho aa. Nao bai mandakala alombi a Mulungu na a Jesu Masihi, na mandathawala naye kwa muda wa miaka alifu mwenga.

Shethani anashindwa

⁷Bada ya iyo miaka alifu mwenga kugoma, iye Shethani andambozwa kuko jela. ⁸20:8 13:14; Josh 11:4; Izik 38:2, 10-12Naye andakwenda ndze kwendakenga gago makabila gosini garigo kahi za urumwengu wosi, yani Gogi na Magogi. Andaakundzumanya thayari-thayari kwa viha. Nao be ni anji here mutsanga wa baharini. ⁹20:9 Hesab 2; 2 Athaw 1:10, 12; Zabu 78:68; Izik 38:22; 39:6Bai naaona manatsamuka kila hat’u kahi za urumwengu. Makiidengereka yo k’ambi ya at’u a Mulungu na uwo mudzi mubomu auhendzao, ela marihokala makuhendani vizho, kwathima moho kula mulunguni na ukiaocha makifwa. ¹⁰20:10 19:20Ye Shethani ariyekala akikenga at’u, wagwirwa akitsufwa kahi ya ro ziya ra moho wa baruthi. Haho ndiho harihokala hadzatsufwa riro rinyama na iye nabii wa ulongo. Nao mandateswa hatha kare na kare, usiku na mutsana.

At’u mandizhohukumiwa siku ya mwisho

¹¹20:11 5:7; 6:14; 21:1; Zabu 114:3, 7; Math’ 24:35; 2 P’et 3:10Gonya nikiona mut’u adzakeresira kihi kibomu cha endzi, charuhe tse. Na mulunguni na ts’i vichangamika, kula haho k’avionekanire kaheri. ¹²20:12-13 3:5; 22:12; Dani 7:9-1020:12 Kumbo 32:32Nikiona at’u mariofwa, abomu kwa athithe, maungerere mbere za cho kihi cha endzi. Bai vithabu vikivugulwa. K’ona hakivugulwa kithabu kimwenga kaheri, na kithabu kiki were ni cha uzima. Ao at’u mariofwa makihukumiwa kulengana na mahendo gao garigokala gandhikwa mumo vithabuni. ¹³Bahari yaahahika ao at’u iriyoamiza. Kifwa na kuzimu nazho vikitsumbusa at’u ao. Bai at’u aa osi makihukumiwa kulengana na mahendo gao. ¹⁴20:14 20:10; 1 Akor 15:26; Kifwa cha hiri: 2:11Gonya kifwa na kuzimu vikitsufwa kahi za ro ziya ra moho. Na ziya riri ra moho ndo kifwa cha hiri. ¹⁵20:15 3:5Na mut’u yoyosi ariye dzinare k’arionewerwe kahi za kicho kithabu cha uzima watsufwa kahi za riro ziya ra moho.

Jerusalemu mbisha

¹21:1 21:5; Isa 65:17; 2 P’et 3:13Bada ya gago, nikiona mulunguni kusha na ts’i mbisha, mana ko mulunguni kwa kapindi na ts’i ya kapindi zhakala zhagonya kukira, na were k’akuna bahari kaheri. ²21:2 3:12; 19:7; 21:9–22:5, 17; Isa 52:1; Math’ 22:2; Agal 4:26; Aebu 11:16; 12:22Nikiwona wo Mudzi Mueri, yani Jerusalemu mbisha. Bai Jerusalemu iyo yathima kula kuko dzulu mulunguni kwa Mulungu, na were idzathayarishwa dza viryahu zha bibi harusi apambwazho kumuthariza mulumewe. ³21:3 7:15; Alaw 26:12; Izik 37:26-28; Zaka 2:5; 2 Akor 6:16Nikisikira mumiro wa mut’u unanena zhomu kula haho henye cho kihi cha endzi. Ukiamba, “Lola vivi be makalo ga Mulungu, ni hamwenga na anadamu. Andakala hamwenga nao, nao mandakala at’ue na iye Mulungu mwenye andakala hamwenga nao.21:3 Maoro mangine ganaamba, ‘naye andakala Mulungu wao.’⁴21:4 7:17; Isa 26:19; 35:10Mulungu andaafuta matsozi gosi. K’akundakala na kifwa kaheri, hedu huzuni. K’akundakala na kulumira na k’akundakala na kiriro kaheri. Mana maut’u gosini ga kapindi gandakala gadzagoma kukira.”

⁵21:5 5:7; 21:1; Isa 43:19; 2 Akor 5:17; Ga ujeri: 19:9Gonya iye ariyekala akelesi kahi za cho kihi cha endzi akiamba, “Lola vivi be ninahenda kila kit’u kikale kisha.” Kidza akiamba, “Gandhike gaga, mana ni maneno ga kukuluhirika na ga ujeri.” ⁶21:6 1:8; 7:17; 22:1; Isa 55:1; Zaka 14:8; Joh 7:37H’aya iye vizho, akiamba, “Vidzakala! Mimi ndimi Alifa na Omega. Ndimi mwandzo na ndimi mwisho. Kila mut’u mwenye k’ihu, nindamup’a madzi ga bule anwe kula kwa matso ga madzi ga uzima. ⁷21:7 2 Samw 7:14; Izik 11:20Kila andiyeshinda nindamup’a maut’u gago gosi. Andakala mwanangu, nami nindakala Mulunguwe. ⁸21:8 2:11; 19:20; 21:27Ela at’u osi aoga, na masiokuluhira, na ahendi a maitsi-maitsi, na alagi, na azindzi, na atsai, na mavoyao vizuka, na alongo osi, hat’u hao ni riro ziya ra moho wa baruthi. Na kicho bai ndicho kifwa cha hiri.”

Mudzi musha

⁹21:9–22:5 Isa 54:1-1721:9 15:1Vinakira vivi, mumwenga wa o malaika afungahe mariokala mana vidhuwa vifungahe zha gago mapigo mafungahe ga mwisho akidzanamba, “Ndzo nikwanyese ye bibi harusi, mukaza ye Mwana Ng’ondzi.” ¹⁰21:10 17:3; Izik 40:2; Math’ 4:8Bai ye malaika akinihala kahi za Roho hatha dzulu ya murima mubomu kidza mure. Kuko, akinanyesa uwo mudzi mubomu mueri wa Jerusalemu. Nawo were unathima kula kwa Mulungu kuko dzulu mulunguni. ¹¹21:11 21:18, 23; Isa 60:1-3, 19; Izik 43:2Mudzi uu were unang’ala mulangaza wa Mulungu. Mulangaza uwo were unang’ala zhomu dza viryahu mawe ga th’amani ga jasipa gang’alazho. Pia mudzi uu were unanyesa here kilolo. ¹²21:12-13 7:5-8; Mwan 35:22-26; Kumbo 28:21; Izik 48:30-35Were udzadengerekwa ni ukuta mubomu, wenye ure wa dzulu. Kidza were una miryango mibomu, kumi na miri. Kila muryangoni were haimire malaika. Dzulu za kila muryango, were handhikwa madzina ga zizo mbari kumi na mbiri za ana a Iziraeli. ¹³Kila luhande lwa uwo ukuta lwere luna miryango mihahu. Luhande lwa mwambolero wa dzuwa miryango mihahu, lwa kwa mwaka miryango mihahu, lwa mutserero wa dzuwa miryango mihahu, na lwa kwa vuri miryango mihahu. ¹⁴21:14 Aebu 11:10; Aefe 2:20Na uwo ukuta wa mudzi uu were waakwa dzulu za musinji wa mawe kumi na mairi. Kila iwe were randhikwa dzina mwenga ra aryahu ahumwi kumi na airi a iye Mwana Ng’ondzi.

¹⁵21:15 11:1; Izik 40:3Bai iye malaika ariyenena nami, wakala adzagwirira mudhath’a wa kupimira. Na mudhath’a uu were watengezwa na dhahabu. Nawo were ni wa kupimira wo mudzi mubomu, hamwenga na yo miryangoye mibomu, na zizo k’ut’aze. ¹⁶21:16 Izik 48:16-17Iye malaika waupima wo mudzi na walamuwe uchenda karakara de na urewe. Urewe were ni maili alifu mwenga na magana matsano, na walamuwe na kimoche nazho dza zho. ¹⁷Kidza akipima kimo cha wo ukuta wa wo mudzi na ukimbola futi magana mairi na kumi na t’andahu. Vivi ni kulengana na cho kipimo kikubaliwacho ni anadamu, ambacho ndicho arichokala ye malaika anahumira. ¹⁸21:18-21 21:11; Isa 54:11-12; Izik 28:13Wo mudzi wenye were waakwa na dhahabu safi, ya kung’ala-ng’ala here kilolo. Ukutawe wo ukikala waakwa na mawe ga jasipa. ¹⁹Misinji ya wo ukuta wa wo mudzi mubomu were idzapambwa na mawe ga kima kibomu ga kila samupuli. Musinji wa kwandza were ni wa mawe ga jasipa, wa hiri ukikala ni wa mawe ga yakuti samawi, wa hahu ukikala ni wa mawe ga kalikedoni, na wa ne ukikala ni wa mawe ga zumaridi. ²⁰Wa tsano wakala ni wa mawe ga sadoniki, wa handahu ukikala ni wa mawe ga akiki, wa fungahe wakala ni wa mawe ga kirisilitho, na wa nane ukikala ni wa mawe ga zabarajadi. Musinji wa chenda wakala ni wa mawe ga yakuti ya manjano, wa kumi ukikala ni wa mawe ga kirisopuraso. Musinji wa kumi na mwenga wakala ni wa mawe ga hiakinitho, na wa kumi na mbiri ukikala ni wa mawe ga amethisito. ²¹Yo miryango mibomu kumi na miri were ni ya lulu kumi na mbiri. Kila muryango were watengezwa kwa lulu mwenga. Barabara za mudzi uwo were zatengezwa na dhahabu safi, inyesayo here kilolo.

²²21:22 11:17Sionere Hekalu rorosi kahi za mudzi uwo. Mana Hekalu rao were ni iye Bwana Mulungu, mwenye nguvu zosi na iye Mwana Ng’ondzi. ²³21:23 22:5; Isa 60:1-2, 19-20; 24:23Na mudzi uwo were k’auhumira mulangaza wa dzuwa hedu mwezi, mana mulangazawe were ni iyo nguma ya Mulungu na taa ra mudzi uwo were ni iye Mwana Ng’ondzi. ²⁴21:24 Zabu 68:29; Isa 60:3Makabila gosi ga urumwengu gandanenda gakilongozwa ni uwo mulangaza wa mudzi uwo. Na athawali a dhuniani mandaureha ushaha wao mumo. ²⁵21:25-26 Isa 60:11Na miryangoye k’aindafungwa bule, indakala lwazu wakathi wosi, kwa kukala kuko k’akuna usiku hedu mutsana. ²⁶Nguma ya makabila ga urumwengu na ishima yao, zhosi vindarefwa kahi za mudzi uwo. ²⁷21:27 21:8; 22:15; Isa 35:8; 52:1; Izik 44:9; 1 Akor 6:9-10; 2 P’et 3:13; Kithabu cha Uzima: 3:5Ela kit’u chochosi kiricho ni kikolo, na mut’u yoyosi ahendaye maut’u maitsi-maitsi, na mut’u mulongo, osi k’amandangira bule kuko. Mandiongira kuko ni aryahu at’u mario madzina gao gandhikwa kahi za cho kithabu cha uzima cha iye Mwana Ng’ondzi.

Muho wa madzi ga uzima

¹22:1-2 21:6; Izik 47:1-12Gonya ye malaika akinanyesa muho wa madzi ga uzima, umbolao kula kahi za cho kihi cha endzi cha Mulungu na cha iye Mwana Ng’ondzi. Muho uu were unang’ala-ng’ala here kilolo. ²22:2 21:21; Muhi: 2:7Kidza were unakira kahikahi za zizo barabara za mudzi uwo. Kila luhande lwa wo muho were hana muhi wa uzima uriwo were kwa mwezi, unazhala matunda lumwenga, na kwa mwaka were unazhala k’ana kumi na mbiri. Makodza ga muhi uwo were ni muhaso wa kugahoza go makabila. ³22:3 7:15; Jere 3:17Kit’u chochosi kiricholaniwa ni Mulungu, k’akindakalamo bule kahi za mudzi uwo. Kihi cha endzi cha Mulungu na cha iye Mwana Ng’ondzi vindakala kahi za mudzi uwo. Na ahumiki a kwakwe mandamuvoya. ⁴22:4 14:1; Zabu 17:15; Math’ 5:8At’u mandamona Mulungu uso kwa uso na dzinare rindandhikwa dzulu za vidhangu zhao. ⁵22:5 1:6; 21:23; Dani 7:18, 27Kahi za mudzi uwo, k’akundakala na usiku kaheri, na at’u k’amandahenda haja na mwanga wa taa hedu wa dzuwa, mana Bwana Mulungu ndiye andiyekala mulangaza wao. Na bai mandathawala kare na kare.

Kudza kwa Jesu

⁶22:6 1:1; 10:7; 19:9; Mahe 11:27-28; 13:1Gonya iye malaika akinamba, “Maneno gaga be ni ga ujeri na kidza ganakuluhirika. Na iye Bwana, Mulungu aap’aye manabii Roho wa kwakwe, wamuhuma malaikawe akaanyese o ahumikie maut’u garigo k’agandatoa suthi gandathimira.” ⁷22:7 3:11; 22:12, 20“Lolani, ninadza kare sindatoa bule, na mut’u agagwiraye gaga maneno ga unabii garigo kahi za chuwo kiki, andahaswa.”

⁸22:8 1:9; 19:10Mut’u mimi Johana, maut’u gaga nagasikira na nikigaona na matso. Bai nirihokala nidzagonya kugaona na kugasikira, nadzigwaga na moyo mbere za iye malaika ariyekala adzananyesa maut’u gaga na nikikala namala kumuvoya iye. ⁹Ela iye arihoona viryahu, waniamba, “Usihende vizho bule! Muvoye Mulungu, mana mimi ni muhumiki thu dza vizho uwe na nduguzo manabii. Ni muhumiki karakara na at’u mario managwira Maoro ga chuwo kiki, kwa vizho muvoye Mulungu.”

¹⁰22:10 Dani 12:4Kidza akinamba, “Gaga Maoro ga unabii ga chuwo kiki, usigafitse bule, mana wakathi wa kuthimira maut’u gaga udzafika hehi. ¹¹22:11 Isa 56:1; Izik 3:27; Dani 12:10Muthiriri, naaenderere kukala muthiriri thuye. Mut’u ahendaye maitsi-maitsi naye naaenderere kuhenda maitsi-maitsi. Ahendaye madzo naaenderere kuhenda madzo. Mueri naye naathuwe kukala mueri.”

¹²22:12 2:23; 6:10; 15:3; 16:5-6; 19:2, 11; 20:12-13; 22:7; Zabu 28:4; Ndhum 24:12; Jere 17:10; Math’ 16:27“Lolani, ninadza kare si kure bule, nami ninadza na zawadi nimup’e kila mut’u kulengana na mahendo ga kwakwe. ¹³22:13 1:8Mimi ndimi Alifa na Omega. Ndimi wa Kwandza na wa Mwisho. Na ndimi Mwandzo na ndimi Mwisho.

¹⁴22:14 7:14; Zabu 118:19-20; Muhi: 22:2“Aryahu at’u mafulao nguwo zao, ili mapate ruhusa ya kwangira mumo mudzini kukirira iyo miryangoye na marye matunda ga muhi wa uzima, mandahaswa. ¹⁵22:15 21:27; Aefe 5:5Ela kuko ndze ya uwo mudzi kundakala na o k’uro, kundakala atsai, azindzi, alagi, at’u mavoyao vizuka na at’u mahendzao ulongo. ¹⁶22:16 1:1; 5:5; Nyenyezi ya madzach’a: 2:28; Hesab 24:17Mimi Jesu, ndimi nyenyezi ya madzach’a, mimi nazhalwa kahi za lukolo lwa Daudi. Bai nidzamuhuma malaika wangu kwenu adze aambire makanisa maut’u gaga.” ¹⁷22:17 21:2, 6Roho na iye Bibi harusi wa iye Mwana Ng’ondzi manamwiha Bwana, na kuamba, “Ndzo.” Na kila mut’u andiyesikira, naye naambe, “Ndzo.” Kila mwenye k’ihu na ahendzaye, naadze anwe madzi ga uzima bule.

Maut’u ga mwisho-mwisho

¹⁸22:18-19 Kumbu 4:2; 13:122:18 Kumbu 29:20Ninamukanya kila andesikira maneno gaga ga unabii garigo kahi za chuwo kiki: Mut’u andiyegangeza na gakwe, iye naye Mulungu andamungezeza gago mapigo gadzigohadzwa kahi za chuwo kiki. ¹⁹22:19 Muhi: 2:7; Chuwo: Kumbo 32:32Na mut’u yoyosi andiyemboza neno rorosi kula kwa gaga maneno ga unabii wa chuwo kiki, Mulungu andamuhoka uwo muthalowe kahi za uwo muhi wa uzima. Kidza andamuhoka wo muthalowe kahi za uwo mudzi mueri. Mithalo iyo idzahadzwa kare kahi za chuwo kiki.

²⁰22:20 3:11; 22:6; 1 Akor 16:22Bai iye ambozaye ushahidhi wa maut’u gaga anaamba, “Jeri wenye ninadza kare si kure bule.” H’aami, ndzo Bwana Jesu! ²¹22:21 Agal 6:18Nema ya Bwana Jesu naikale hamwenga nanwi nyosi at’u a Mulungu. H’aami.