Afilipi

Baruwa ya P’aulo kwa

AFILIPI

Uthongodhyeri

Baruwa ii yandhikwa ni P’aulo wakathi arihokala a jela. Lengo ra kuyandhika were ni kuashukuru Amasihia a Filipi kwa vigerwa marizhomuhirikira na pia kwa mavoyo ga kwao (1:5-7; 4:10-19). P’aulo wakathi anandhika baruwa ii were ana th’amaa nikwenda akambola kuko jela ili aenderere kuhubiri Uv̱oro Udzo, ela hatha hamwenga na vizho were anamanya kamare kukala kala k’andambozwa, andahenda kwalagwa (1:21; 2:17; 3:10).

Mudzi wa Filipi u kahi za luhande lwa kwa vuri lwa ts’i ya Ayunani luifwalo Mak’edonia. P’aulo arihozhoga mudzi wa Filipi, wakala ndo adzangira Ulaya kuhirika Uv̱oro Udzo kwa mara ya kwandza be vizho. Bai wahubiri Uv̱oro Udzo kuko na akiandzisha kanisa (Mahendo 16).

Lengo ra baruwa ii

Kahi za baruwa ii P’aulo anaambira Amasihia kuko Filipi kukala k’amana budhi kupata mateso dza here Jesu arizhopata mateso na dza viryahu P’aulo arizho anateseka. Anaambira kukala mandihoteseka, nimahende raha mana gago ganakala kwa ut’u wa kumukuluhira Jesu (1:28-30).

Kahi za kanisa riri ra Afilipi, kwakala na at’u angine mariokala manaamba kukala at’u suthi mathuwe Sheria ya Musa ndo madime kuokoka. Ela P’aulo ye akiakanya Afilipi akiambira madzitsundze na ao at’u mario ni here k’uro (3:2-11). Pia kwa upande mungine baruwa ii ina maut’u manji ga kufwahiza. Kwa mufano, P’aulo a jela, ela ko ana raha, kwa kukala kwakwe iye kila rikalaro k’aridima kumuhendya akakosa kuhenda raha. Kidza anakumbukira viryahu Amasihia a Filipi marizhomwaviza.

Maut’u garigo mumu

Mulamuso na mavoyo 1:1-11

P’aulo ana raha, mana Uv̱oro Udzo unahubiriwa 1:12-30

Kudzitsereza kwa Masihi 2:1-11

At’u a Mulungu manav̱irya kukala mulangaza 2:12-18

P’aulo anamulika T’imoth’i na Epafurodito 2:19-30

K’akuna kit’u kibomu here kumumanya Masihi 3:1-21

P’aulo anaaadha Afilipi 4:1-9

P’aulo analazha muv̱era kwa zawadi arizoreherwa 4:10-20

Maut’u ga mwisho-mwisho 4:21-23

¹1:1 T’imoth’i: 1 Akor 4:17Baruwa ii ninayandhika mimi P’aulo, hamwenga na T’imoth’i. Siswi fu ahumiki a Masihi Jesu. Funayandhika kwenu ninwi at’u aeri, hamwenga na mabishopu enu na ahumiki kuko mudzi wa Filipi.

²Bai nema na dheri kula kwa Mulungu Babiyehu na Bwana Jesu Masihi, navikale kwenu.

P’aulo analazha muv̱era kwa Mulungu

³1:3 Arum 1:8-10; 1 Akor 1:4; 1 Ath’es 1:2-3Ninamulazhira muv̱era Mulungu wangu kwa ut’u wenu kila nimukumbukiraho. ⁴Kila nimuvoyeraho nyosi, nikumuvoyera na raha. ⁵Ninahenda vizho kwa viryahu murizhoungana nami na mukinaviza kuhubiri wo Uv̱oro Udzo kula yo siku murihokuluhira hatha vivi. ⁶1:6 2:13; Siku: 1.10Na nina hakika kukala iye Mulungu ariyeandzisha kazi ii mbidzo ndani mwenu, andaenderera nayo muhaka aimarigize siku iryahu Jesu Masihi andihokudza.

⁷1:7 2 Akor 7:3; Aefe 3:1Ninwi be ninamuhendza wakathi wosi, ndosa ninamuaza kahi za kila kit’u nihendacho. Na vizho be ni karakara kamare, kwani Mulungu wafuhasa na akihup’a kazi ya kwakwe fuihende hamwenga. Nirihokala ninauhehera Uv̱oro Udzo na kuuhendya umanywe kukala ni wa jeri, ninwi mwanisaidhia. Na hatha vivi nirizho haha jela kidza munanisaidhia kuhubiri wo Uv̱oro Udzo vizho. ⁸1:8 1 Akor 16:24; Mwiri wa Masihi: 2 Akor 5:14Gaga ninenago be ni ga ujeri, na Mulungu ni shudhia. Ninamuhendza zhomu kidza nina p’ola nanwi, na Masihi Jesu nde anihendyaye nihende vizho.

⁹1:9 Akol 1:9-10Nimuvoyerazho mimi, ni kwamba mahendzo genu gaenderere kukula kwenda-kwenda, na mumumanye Mulungu zaidhi. Kidza mudime kutsagula ridzo na rii, ¹⁰1:10 Arum 12:2; Aefe 5:27; Aebu 5:14; Siku andihouya Masihi: 1 Akor 1:8; 2 Akor 5:10; Afil 1:6; 2:16mana nahendza mumanye kifwahacho kuhendwa ni hicho. Kalani aeri hatha siku andihouya Masihi. ¹¹1:11 Joh 15:8; Jako 3:17Ishini maisha ga kumufwahiza Mulungu kwa ngira ya Masihi, ili at’u makiona zho murizho munaishit’o, mamulike Mulungu na mamup’e nguma.

P’aulo ana raha, mana Uv̱oro Udzo unahubiriwa

¹²1:12 Aefe 3:1; 2 T’imo 2:9Ndugu zangu, nahendza mumanye kukala gosi garigonipata mimi, gadzauhendya wo Uv̱oro Udzo uenderere t’ot’ot’o. ¹³Maut’u gago ganaviza kuueneza wo Uv̱oro Udzo. Kwani o shikari a mumu nyumbani mwa muthawali na at’u angine osi, manamanya kukala ni jela kwa kukala ninamuhumikira Masihi. ¹⁴Na kufungwa kwangu kudzaahendya anji a o ndugu zangu, mangizwe nguvu mamukuluhire Bwana bila wasiwasi. Kwa vizho, manahubiri neno ra Mulungu bila woga wowosi.

¹⁵1:15-17 2 Akor 2:17Ela hamwenga na vizho, hana angine manahubiri Uv̱oro wa Masihi kwa ut’u wa wivu na kupingana nami. Angine manahubiri at’u kwa nia mbidzo. ¹⁶Aa mahubirio kwa nia mbidzo manavihenda kwa ut’u wa mahendzo. Manamanya kukala Mulungu adzanika haha jela kwa ut’u wa kuuhehera wo Uv̱orowe Udzo. ¹⁷Ela o angine, mamuhubirio Masihi kwa kupingana nami, lengo rao ni manithabishe mumu jela. ¹⁸Ela vizho k’avinithethenya bule. Nasikira raha zhomu, kwa kukala Uv̱oro Udzo wa Masihi unahubiriwa. Makamuhubiri kwa nia mbidzo, hedu kwa nia mbii, ye bado anahubiriwa thu. Na sindaricha kukala na raha kwa vizho. ¹⁹1:19 Arum 15:30Namanya kukala haha jela nindambola, mana munanivoyera na Roho wa Masihi naye ananaviza.

²⁰Ut’u niuhendzao, na nirio nina th’amaa nawo moyoni mwangu, nikuenderera kuhenda kazi ii bila aebu. Namala vivi nihende kazi bila woga, dza vizho zha hangu chaho, ili kahi za hali ii niriyo nimup’e nguma Masihi hatha chamba ndalagwa.

²¹1:21 Agal 2:20; Akol 3:3-4Lengo rangu ra kuishi nikumuhumikira Masihi, nikifwa kwangu ni faidha. ²²Nikikala moyo nindahenda kazi ya kuoneka. Kwa vizho simanya nitsagule hizho, ²³1:23 2 Akor 5:8-9kwani zhosi ni vidzo. Nahendza zhomu kuhauka haha urumwenguni na nikakale na Masihi, mana vizho ni vidzo zaidhi, ²⁴ela kwa ut’u wenu baha nikale moyo kwandza. ²⁵Ninamanya kamare kukala nindaima-ima nanwi nyosini, ili mukale na raha na muenderere kahi za kumukuluhira Masihi. ²⁶Na hatha fundihoonana kaheri kuko kwenu, mundakala na chausa cha kudzionya kwa gago andigokala Masihi Jesu wanihendera.

²⁷1:27 Akol 1:10; 1 Ath’es 2:12Bora thu muhakikishe kukala munathuwa malagizo ga Masihi t’ot’ot’o. Ndakudzamulola, sindakudzamulola, nahendza nisikire kukala mu t’ot’ot’o, na mu kit’u kimwenga kahi za kuukuluhira uwo Uv̱oro Udzo wa Masihi.

²⁸Musogohe ao mamupingao, mana vivi vindaanyesa kukala Mulungu andamwakola, ela ao andaanonga-nonga. ²⁹Mana mudzagerwa nafasi ya kumuhumikira Masihi, si kwa kumukuluhira thu-thu-thu, ela hatha kwa kupata thabu kwa ut’u wa iye. ³⁰1:30 Mahe 16:19-40; Afil 1:13Vikara nanwi mundadima kuhala muza hamwenga nami kahi za yo k’ondo. K’ondo ii, ni iyo muriyonona nikiipiga ho nyuma, na ni iyo vizho nichereyo kuiheha here musikirazho.

Kudzitsereza kwa Masihi

¹Bai ninwi mwamukuluhira Masihi naye anamwangiza nguvu. Mahendzo ga kwakwe ganamuhendya musikiret’o. H’aya zho mbai bai, munashirikiana na Roho, munahendzana, na munaonerana mbazi. ²2:2 Joh 13:34; 1 Akor 1:10-11; Agal 6:10; Aefe 5:2; 1 Joh 4:12Kwa vizho bai, kalani kit’u kimwenga kahi za kuaza na kuhendzana kwenu. Kidza mukale na nia mwenga kahi za kila kit’u. Mukihenda vizho nindasikira raha sana. ³2:3 Arum 12:10; Agal 5:26Mut’u asitengeze kit’u kwa kumupinga mwandziwe, hedu kwa kumala kuonewa. Kalani ap’ore kidza muaone angine kukala mana mana kumukira ninwi. ⁴2:4 1 Akor 10:24Musifwahirwe ni kulola maut’u genu enye thu, ela lolani hatha ga andziyenu. ⁵2:5 Joh 13:15; Arum 13:14; 15:5Gahalireni maut’u gosi here zho Masihi Jesu arizhogahalira.

⁶2:6 Joh 1:1-2; 17:5; Aebu 1:3Ingahokala iye were ni Mulungu, k’akalire na lazima ya kuthuwa kukala here Mulungu. ⁷2:7 Joh 1:14; Arum 8:3; 2 Akor 8:9; Aebu 2:14, 17Hat’u ha vizho, akigaricha gosi kwa kuhendza mwenye na akikala here mutumwa. Akizhalwa mudamu na akikala na hali ya mudamu. ⁸2:8 Joh 10:17; Aebu 5:8; 12:2Iye wakala mup’ore na akimusikira Mulungu hatha akikubali kukotw’a musalabani akifwa kifwa cha aibu. ⁹2:9 Mahe 2:33; Aefe 1:21; Aebu 1:4Kwa ut’u uu, Mulungu akimwanula dzulu zhomu na akimup’a dzina bomu kukira madzina mangine gosi. ¹⁰2:10-11 Isa 45:23; Joh 5:23; Arum 10:9; Ugun 5:13Bai kwa dzina ra Jesu, zhumbe zhosi virizho mulunguni, na ts’i, na kuzimu vindamupigira mavindi, ¹¹vikubali na vinene lwazu-lwazu kukala Jesu Masihi nde Bwana. Nazho vindahenda vivi kwa ut’u wa kumup’a nguma Mulungu Baba.

At’u a Mulungu manav̱irya kukala mulangaza

¹²Ahendzwi, ninwi mudzakala munamwogoha Mulungu wakathi wosi furihokala hamwenga. Bai hatha vivi nirizho siho, kidza zidhini kumwagoha Mulungu vizho. Hendani vizho kwa chadi na ishima nyinji, here at’u mariookolwa mav̱iryazho kuhenda, ¹³2:13 1:6; Joh 15:5; Arum 7:18; 15:18; 1 Akor 12:6; 15:10; 2 Akor 3:5mana Mulungu anahenda kazi ndani mwenu. Anamuhendya mukale na hamu, na nguvu ya kuthuwa malagizoge.

¹⁴Hendani maut’u gosini bila kunung’unika hedu kunenezana, ¹⁵2:15-16 1:10; Kumbu 32:5; Dani 12:3; Math’ 5:14; 10:16; 1 Akor 1:31; 2 Akor 1:14; Agal 2:1-2; Aefe 5:8; 1 Ath’es 2:19ili musilaumiwe hedu kuonekana na kaila ni mut’u yoyosi. Kalani at’u aeri, enye maisha gasigo kaila here ana a Mulungu, mario kahi za urumwengu wa kiza udziwodzala at’u madzionongeka na mahendzao kuhenda mai. Kalani mulangaza mung’ale haha urumwenguni, ¹⁶kuno mukiambiriza uv̱oro urehao uzima. Mukihenda vizho, nindakala na chausa cha kudzionyera haho Masihi andihouya kaheri. Kwani yo kazi niriyohenda kwa nguvu na chadi indakala si ya kihuhu bule.

¹⁷2:17 Arum 15:16; 2 T’imo 4:6; 1 Joh 3:16Ninwi mwamukuluhira Jesu na munamuhumikira. Kumuhumikira kuku ni sadaka yenu kwakwe. Nami vivi hatha nikalagwa kidza ndahenda raha hamwenga nanwi nyosi, mana nindakala nidzakamilisha iyo sadaka yenu. ¹⁸2:18 3:1; 4:4Kwa vizho ninwi nanwi kalani na raha na mufwahirwe hamwenga nami.

P’aulo anamulika T’imoth’i na Epafurodito

¹⁹2:19 1:1Bwana Jesu ahendzaho, ninakuluhira kukala sindatoa nindamuhuma T’imoth’i kwenu. Namala wakathi akiuya kuku adze anip’e moyo kwa kunambiriza uv̱oro wa kuko. ²⁰2:20 Mahe 16:2Sina mut’u mungine ajaliye maut’u genu kwa moyo mumwenga here T’imoth’i. ²¹2:21 2 T’imo 4:10Angine osi manathuwa gao enye, si go ahendzago Jesu Masihi bule. ²²Hatha ninwi enye munamanya zho arizho T’imoth’i adzanyesa kukala ana mana. Iye na mimi hudzahenda kazi ya Uv̱oro Udzo hamwenga here mut’u na babaye. ²³Kwa vizho bai, nina th’amaa kukala nindamuhuma kuko kwenu haho nindihokala nidzamanya ro rindironipata kuku. ²⁴Kidza Bwana adzanihenda nikuluhire kukala mimi mwenye sindatoa bule nindakudza. ²⁵2:25 4:18Ela vivi kare nidzaona vinav̱irya nimuhume Epafurodito auye kuko kwenu. Iye ni ndugu kahi za Masihi fuhendaye kazi hosini, na ni shikari mwandzangu. Kidza ni muhumwa wenu, muriyemuhuma kunitsundza kwa maut’u gosi nimalago. ²⁶Vikara ninamuhuma kwenu kaheri kwa kukala ana p’ola nanwi nyosi, kidza wabudzyika sana arihomanya kukala mwasikira wakala mukongo. ²⁷Naye were ni mukongo jeri, hatha vichache zhenye afwe, ela Mulungu akimuonera mbazi akimuhoza. Kidza Mulungu k’amuonerere mbazi iye h’akeye, ela wanionera mbazi hatha mimi nami, kwani kala wafwa vingakala here ro ra ch’ongo kubolwa riro. ²⁸Kwa vizho nasikira kumuhuma kwenu, ili mumonaho kaheri, musikire raha na wo wasiwasi unihaukire. ²⁹2:29 1 Akor 16:16, 18Bai mukaribisheni na raha yosi, kwa kukala iye anamukuluhira Bwana dza vizho ninwi. Ishimuni at’u osi mario dza iye, ³⁰kwa kukala wamala kufwa kwa kazi ya Masihi. Maishage gakala hatharini ili anigere wavizi uriwo ninwi enye k’amukadimire kunigera.

K’akuna kit’u kibomu here kumumanya Masihi

¹3:1 2:18Vikara ndugu zangu, Bwana na amugere raha nyinji. Sindatsoka kumwambira gaga kwenda-kwenda, mana gandamwikat’o.

²3:2 2 Akor 11:13Dzimanyirireni na o at’u ai. Mino hatha niaiha k’uro. Manaamba suthi ungizwe lwembeni ndo uokolwe. ³3:3 Arum 2:28-29Siswi fwangizwa lwembeni kiroho, na hunamuvoya Mulungu kukirira na Rohowe, na uryahu uzima fuupatao kwa Masihi Jesu, funaunyeth’era, k’ahuthuwa maut’u ga mwiri. ⁴3:4 2 Akor 11:18, 21Kala kuna mut’u ariye were ana sababu ya kudziona kukala anadima kudziokola kwa mahendoge, be ngere ni mimi. Kala at’u ni kuokolwa ni zho marizho, be jeri wenye ngere zhanikala. ⁵3:5 Luk 1:59; Arum 11:1Kwa kukala nangizwa lwembeni nirihokala nidzafisha siku nane. Ni Muiziraeli, wa mbari ya Benjamini, Mueburania kidanga. Were ni Farisayo ambaye were nathuwa Sheria ya Kiyahudi jeri-jeri. ⁶3:6 Mahe 8:3; 22:4; 26:9-11Na were be nina moho sana wa kutesa kanisa. Yo Sheria ya Kiyahudi were naithuwat’o sana, bila kukoseza.

⁷3:7 Math’ 13:44, 46Ela gago gosi nirigogaona kukala gana faidha, vivi be nagathala kukala ni hasara kwa ut’u wa Masihi. ⁸Ee, kila kit’u nachona ni hasara kwa viryahu kumumanya Masihi Jesu Bwana wangu, kurizho na mana zhomu kukira zhosi. Kwa ut’u wa iye nidzavitsuha zhosi k’anda, here mavi, ili nimupate Masihi ⁹3:9 Arum 1:17na nigwirane naye ngwa. Vikara hachi yangu si ya mimi mwenye kudzipatira kwa kuthuwa Sheria, ela ni iryahu niipatayo kumbola kwa Mulungu kwa kumukuluhira Masihi. ¹⁰3:10-11 Arum 6:8-11; Niteseke dza iye: 2 Akor 4:10-11; Kufufuka: Mahe 4:2; Arum 5:17Vivi zhosi zhakala ili nimumanye Masihi hamwenga na zo nguvu zirizomufufula. Kidza namala niteseke dza vizho arizhoteseka na hatha kala ni kufwa nifwe dza iye, ¹¹ili vichadimikika nifufulwe kula nyufuni.

¹²3:12 1 T’imo 6:12; 2 T’imo 4:7; Aebu 12:1Siamba kukala maut’u gaga nidzagonya kare kugapata, hedu kukala vivi be ni kamili kare, hatha. Ninajeza kwenda-kwenda nigapate, kwani Masihi Jesu wanitsagula akinihendya wakwe. ¹³Ndugu zangu, sidzihalira kukala nidzavipata kare, hatha bule. Ut’u niuhendao ni kusahau zhosi virizhokira na kujeza zhadimikikazho kuthuwa cho nindichokipata ko mbere. ¹⁴3:14 1 Akor 9:24-25Kwa vizho nakot’a malo mwenga kwa mwenga muhaka mwisho, ili nikapate yo zawadi ariyo Mulungu anafwihira kuko dzulu kukirira kwa Masihi Jesu. ¹⁵Siswi hosi hurio at’u azima kiroho nihukale hunaaza kivivi. Na hatha kala hangine unaaza kivingine, Mulungu andakugunulira hatha ung’alirwe. ¹⁶3:16 Agal 6:15-16Ela hamwenga na vizho, nifuhakikishe kukala garyahu furigogapata, funagathuwa.

¹⁷3:17 1 Akor 4:16; 1 P’et 5:3Ndugu zangu, at’u siswi be fwamwanyesa mufano mudzo siswi. Kwa vizho uigeni kidza mudzifundishe kula kwa at’u angine maigao wo mufano wehu. ¹⁸3:18 1 Akor 1:23; Agal 6:12Kwani kuna at’u anji mario mahendo gao gananyesa kukala manadharau musalaba wa Masihi. Nami si lwa kwandza bule kumwambira dzulu za at’u aa, namwambira kare. Ela kwa kukala nina utsungu munji, ninamwambira kaheri. ¹⁹3:19 Arum 16:18Mulungu wao ni th’amaa za miri yao. Manadzionyera maut’u ambago be yo karakara makaona aebu nago. Manaaza maut’u ga haha urumwenguni h’akeye. Bai mwisho wa at’u ao ni kwanongwa-nongwa kamare.

²⁰3:20 Aefe 2:6; Aebu 13:14Ela sino kwehu ni mulunguni. Naswi hunamuthariza kwa hamu mwokoli wehu Bwana Jesu Masihi kumbola kuko. ²¹3:21 Arum 8:29; 1 Akor 15:25, 28, 43-53; Akol 3:4Iye andaigaluza ii miri yehu minyonge ikale here wo mwiriwe mudzo wa nguma, kwa kuhumira zo nguvuze ahumirazo kureha vit’u zhosi ts’ini za uthawaliwe.

P’aulo anaaadha Afilipi

¹4:1 1 Ath’es 2:19-20Kwa vizho ndugu zangu ahendzwi, ninamuhendza kidza nina p’ola nanwi. Ninwi ndinwi raha yangu na zawadi ya kazi yangu. Kalani imara kahi za kumuthuwa Bwana.

²Vikara hana aa ana ache airi aa, Yodiya na Sinitiki, ninaavoya masikizane kwa kukala osi manamukuluhira Bwana. ³4:3 Mahe 3:5Na uwe mwandzangu nidzekukuluhira, namala uagwizanye aa ana ache. Namala uhende vizho kwa kukala, aa madzahenda kazi ya Uv̱oro Udzo kwa chadi. Madzaihenda hamwenga nami na Kilemeniti na ahendzi a kazi andzangu osi ambao madzina gao ga kahi za kithabu cha uzima.

⁴4:4 2:18Kalani na raha kahi za Bwana siku zosini, nanena kaheri, kalani na raha. ⁵4:5 1:10; Arum 13:11-12; 1 Akor 16:22; Aebu 10:25; Jako 5:8; 1 Ath’es 5:1-2Up’ore wenu naumanywe ni at’u osini. Bwana a hehi na kuuya. ⁶4:6 Zabu 37:5; Math’ 6:25; 1 P’et 5:7Musihende wasiwasi na ut’u wowosi. Voyerani kila kit’u. Mwambireni Mulungu maut’u gosi mumalago, kidza mumulazhire muv̱era. ⁷4:7 Joh 14:27; Akol 3:15Bai dheri ra Mulungu ambaro k’ahana mudamu adimaye kurielewa nariihendye mioyo yenu na maazo genu gakale kahi za Masihi Jesu.

⁸4:8 Arum 12:17-18Neno ra mwisho ni riri ndugu zangu: Akili zenu nazikale zikiaza maut’u madzo, maut’u maeri, maut’u ga kulikika, maut’u ga kufwahiza, maut’u ga hachi, maut’u ga jeri na maut’u ga ishima. ⁹4:9 3:17; 1 Akor 13:11Hendani gosi nirigomufundisha, murigogahokera, murigonona nikigahenda, na murigonisikira nikiganena, na Mulungu ahup’aye dheri andakala hamwenga nanwi.

P’aulo analazha muv̱era kwa zawadi arizoreherwa

¹⁰Nina raha zhomu kahi za Bwana, kwa kukala bada ya muda mure mudzanyesa kaheri kukala munanimanya. Namanya siku zosi were munahendza munihirikire chochosi mudimacho, ela were mwanya ndo k’amuna. ¹¹4:11 1 T’imo 6:6-8; Aebu 13:5Sinena vivi kwa kukala sina kit’u, hatha! Mimi nadzifundisha kuthosheka kwa kila hali. ¹²Ninamanya kukala kihuhu na kukala na vinji zhenye. Kahi za hali zizi zosi nadzifundisha siri ii ya kukala na maut’u gaga: Kukuha, kukala na ndzala, kukala na vinji na kukala kihuhu chenye. ¹³4:13 2 Akor 12:9-10Ninadima kuhenda maut’u gosi kwa kuhumira zo nguvu anip’azo Masihi. ¹⁴Ela hamwenga na vizho mwahenda ut’u udzo kunaviza wakathi nirihokala nina thabu.

¹⁵4:15 2 Akor 11:8-9Ninwi Afilipi enye munamanya kamare kukala, nirihombola jimbo ra Mak’edonia zo siku za kwandza-kwandza za kuambiriza at’u Uv̱oro Udzo, kwere k’akuna kanisa ringine ririrokala na umwenga wa kugerana vit’u na mimi isihokala ro renu. ¹⁶4:16 Mahe 17:1Kwani hatha nirihokala mudzi wa Th’esalonike, kisha mwanihirikira vit’u k’ana nyinji zenye. ¹⁷4:17 1 Akor 9:11Siamba vivi kwa kukala ninamala vit’u kula kwenu, ela namala nione Mulungu adzamuhasa na vit’u kwa zizo mbazi zenu. ¹⁸4:18 2:25; Alaw 1:9, 12-13, 17; 2:2; 3:5Vivi kare nina kila kit’u niricho na haja nacho, hatha vidzakira muhaka. Nasikira kuv̱aa, na nina muv̱era kwa zo zawadi zenu nirizozihokera kukirira kwa Epafurodito. Wo ut’u udzo uwo be tha ni here muruk’e mudzo wa sadaka kwa Mulungu. Nayo anaikubali na inamufwahiza. ¹⁹Na Mulungu wangu andamugera zho mumalazho zhosi kulengana na ushahawe wa nguma kwa ut’u wa zho Masihi Jesu arizhomuhendera ninwi. ²⁰Bai Mulungu Babiyehu naagerwe nguma kare na kare. H’aami.

Maut’u ga mwisho-mwisho

²¹Nilamusirani at’u osi a Mulungu mario a Masihi Jesu. O ndugu zangu furiojumula haha, madzamulamusa.

²²At’u osi a Mulungu haha madzamulamusa pia, kwandza o ahendi a kazi a nyumbani kwa Kaisari be madzamulamusa zhomu. ²³4:23 Agal 6:18; Aefe 6:24Bai Bwana Jesu Masihi naamuhase zhomu asena na akale hamwenga na maroho genu.