Akolosai

Baruwa ya P’aulo kwa

AKOLOSAI

Uthongodhyeri

Baruwa ii ya kwenda kwa at’u a Kolosai, yaorwa ni muhumwi mumwenga wa Jesu aifwaye P’aulo. P’aulo were ni mut’u wa kula T’ariso naye kabila k’adzagaluzwa ni Jesu, wakala akiatesa sana o at’u mariomukuluhira Jesu. Badaye kahi za kuhubirikwe Uv̱oro Udzo wa Mulungu ndo akiora ii baruwa kwa Akolosai. Kolosai were ni mudzi muhimu sana kahi za Asia Th’ith’e. Mudzi uu were k’aukure na Efeso. Efeso were ni mudzi uriwo hehi na Bahari. Wakathi P’aulo anaora ii baruwa ii, wakala ko Kolosai hatha k’adzakufika bule, ela were wahenda kusikira thu dzulu za viryahu marizhokala manamukuluhira Mulungu t’ot’ot’o (1:3-7; 2:6, 7). Mut’u ariyeambiriza Uv̱oro Udzo ao Akolosai ni Epafura ambaye wakala akitoa ko Kolosai (1:7; 4:12, 13).

Lengo ra baruwa ii

Wakathi P’aulo anaora ii baruwa, were yu jela iye, hamwenga na ye Epafura. Kahi za ao mariomukuluhira Jesu ko Kolosai, anji makala ni at’u mario si Ayahudi (1:27). At’u aa were manavufwa ni mafundisho garigo si ga karakara. Kwani ao makala manaona kukala kumuvoya Mulungu t’ot’ot’o suthi uriche maut’u fulani gahendzwago ni mwiri na pia uavoye malaika na zhumbe vingine-vingine zha kiroho. Vikara P’aulo akihendza mamanye kamare kukala Jesu Masihi ni Mulungu na anathawala zo nguvu zosi zirizo kahi za urumwengu, na kwa ut’u uwo kila mudamu ni amuvoye iye h’akeye (3:1).

Maut’u garigo mumu

Mulamuso 1:1-2

Voyo ra kulazha muv̱era 1:3-8

Kazi za Masihi 1:9–2:19

Maisha masha kahi za Masihi 2:20–4:6

Maut’u ga mwisho-mwisho 4:7-18

¹1:1 Muhumwi: Agal 1:1Baruwa ii ila kwangu mimi P’aulo. Mulungu kwa mahendzoge mwenye, wanitsagula nikale muhumwi wa Masihi Jesu. Baruwa ii ninayandhika hamwenga na ndugu yehu T’imoth’i, ²idze kwenu ninwi at’u a Mulungu murio kuko Kolosai, na murio mu ndugu aaminifu kahi za Masihi. Bai nema na dheri kula kwa Mulungu Babiyehu navikale kwenu.

P’aulo ananena dzulu za viryahu maavoyerazho Akolosai

³1:3 Aefe 1:16; 1 Ath’es 1:2-3At’u siswi be kila humuvoyeraho, nikulazha muv̱era kwa Mulungu babaye Bwana wehu Jesu Masihi kwa ut’u wenu ninwi. ⁴1:4 Aefe 1:15Mana fwapata uv̱oro dzulu za zho mumukuluhirazho Bwana wehu Masihi Jesu na viryahu muahendzazho at’u osi a Mulungu. ⁵1:5 1 P’et 1:3-4; Aefe 1:13Nanwi munahendza at’u a Mulungu kwa ut’u wa yo th’amaa muriyo nayo dzulu za zho murizhoikirwa kuko mulunguni. Th’amaa ii yamwangira wakathi uryahu murihosikira wo ujeri wa wo Uv̱oro Udzo na mukiukuluhira. ⁶1:6 Mahe 2:41; Arum 1:13; 1 T’imo 3:16Uv̱oro uwo Udzo muriwouhokera bai unaenderera kutsamuka kahi za urumwengu muzima. Kidza unaagaluza at’u dza here zho urizhomugaluza ninwi wakathi murihousikira. Kwani murihousikira mwang’alirwa ni uwo ujeri dzulu za viryahu Mulungu arizho na mbazi nyinji na at’u enye dambi. ⁷1:7 Epafura: 4:12; File 23Uv̱oro uu Udzo mwaureherwa ni muhendzwi wehu Epafura, ariye hunahenda kazi ya Mulungu hamwenga. Mut’u iye Epafura ni muhumiki mwaminifu wa Masihi ahumikaye kwa ut’u wenu. ⁸1:8 1 Akor 8:1Bai iye ndiye ariyehumanyisa viryahu Roho Mweri arizhomuhendya muahendze at’u a Mulungu.

⁹1:9-10 Aefe 1:17; Afil 1:9Kwa kukala fwasikira uwo uv̱oro wenu, at’u siswi be k’ahudzaricha kumuvoyera Mulungu ili amumanyise garyahu maut’u ahendzago muhende. Kidza amup’e ulachu wosi wa kimulungu na amuhendye mung’alirwe ni maut’u ga kiroho. ¹⁰1:10 Aefe 4:1; 2:10; Afil 1:27Kwani vizho ndo vindizhomuhendya mutoe here at’u a Mulungu mav̱iryazho kutoa. Vivi vindamufwahiza Mulungu kahi za kila ngira na mundakala at’u a mahendo madzo kwenda-kwenda. Kidza mundakala munaenderera kumumanya Mulungu zaidhi na zaidhi. ¹¹1:11-12 Arum 5:2; Aefe 1:18Bai hunamuvoyera Mulungu akaze kumwangiza nguvu na zo nguvuze nyinji za nguma ili hatha mupatwaho ni mashaka, muvumirire na raha. ¹²Kidza mukale mukimulazhira muv̱era Mulungu kwa viryahu arizhomuhendya mupate muthalo hamwenga na at’ue kahi za wo uthawaliwe wa mulangaza. ¹³1:13-14 Joh 5:18; Luk 22:53; Mahe 26:18; Aefe 1:6, 7, 21; 2:2; 6:12Kwani iye wafwamboza kula kizani na akifwangiza kahi za uthawali wa Mwanawe muhendzwi. ¹⁴Bai yuyu Mwanawe ndiye ariyefukombola, na hukisamehewa dambi zehu.

Masihi ndiye ariye dzulu za kila kit’u

¹⁵1:15 Joh 1:18; 2 Akor 4:4; 1 T’imo 6:16; Aebu 1:3Vizho arizho Masihi zhenye, ndizho arizho ye Mulungu ariye k’aoneka. Na yuyu Masihi ndiye mwenye wadimi dzulu za kila kit’u kirichoumbwa. ¹⁶1:16 1:13; Joh 1:3, 19; 1 Akor 8:6; Aebu 1:2Kukirira kwa Masihi, Mulungu waumba vit’u zhosi virizho dzulu na ts’i, vionekazho na visizhooneka. Athawali osi na kila aina ya uthawali uriwo dzulu na haha ts’i, vivi zhosi zhaumbwa kukirira kwakwe na kwa ut’u wa iye. ¹⁷1:17 Joh 1:1; 8:58Iye Masihi wakalako kare hatha kabila vit’u zhosi kuumbwa, naye ndiye ariye dzulu za kila kit’u. ¹⁸1:18 Kitswa na Mwiri: 2:19; 3:15; Aefe 1:22-23; Wa kwandza: Mahe 4:2; 26:23; 1 Akor 15:20; Ugun 1:5Nde kitswa cha mwiri, yani kanisa. Iye ndiye chandzo cha maisha masha na ndiye wa kwandza kufufuka na kuishi kare na kare. Kwa vizho iye yu dzulu za kila kit’u. ¹⁹1:19 2:9-10; Joh 1:16; Aefe 1:23Kwani Mulungu waonat’o kuishi kamare-kamare kahi za Masihi. ²⁰1:20 Arum 3:25-26; Aefe 1:9-10, 21; 2:13-16Kidza kukirira kwa iye, Mulungu wahendya vit’u zhosi, vipatane naye. Bai kwa ut’u uwo akihenda kukale na dheri kahi za iye na vit’u zhosi virizho dzulu na ts’i kukirira na milatso ya Masihi iriyomwagika musalabani. ²¹1:21-22 Arum 5:10; Aefe 2:12-13; 5:27Ninwi nanwi, were mu kure na Mulungu. Maazo genu gamuhendya mukale mahadhuie, na kidza mukihenda maut’u mai-mai. ²²Ela vikara bai, Mulungu wamupatanisha ninwi na iye kwa kumuhendya Jesu akale mudamu na afwe musalabani. Naye Mulungu wahenda vivi ili mukiima mbereze mukale mu aeri hasiho kaila kokosi ka kumuhendya mupigwe ulongo. ²³1:23 2:7; Aefe 3:17; 1 T’imo 3:16; Aebu 3:6Na vizho ndo vindizhokala, bora thu muenderere kumukuluhira Masihi na kuima imara. Kidza yo th’amaa iriyomwangira wakathi murihosikira wo Uv̱oro Udzo isimwambole bule. Uv̱oro uwo wahubiriwa kila hat’u, na mimi P’aulo ni muhubiri wa uwo uv̱oro uwo.

Kazi ya P’aulo kwa at’u mariomukuluhira Jesu

²⁴1:24 2 Akor 1:5; 11:23-29; Aefe 3:13Vivi nina raha kwa mateso nigapatago kwa ut’u wenu. Kidza kwa mwiri wangu, ninakamilisha mateso ga Masihi, arigopata kwa ut’u wa wo mwiriwe, yani kanisare. ²⁵1:25 Aefe 3:1-3Bai Mulungu wanip’a kazi ii ya kuahumikira at’ue, ili nihubiri neno ra kwakwe kwenu ninwi. ²⁶1:26-27 2:2; 4:4; Aefe 3:6Uv̱oro uu Udzo, miaka na miaka were k’akuna aumanyaye, mana were ni siri, ela bai vivi Mulungu waung’aziza at’ue. ²⁷1:27 Nguma: 3:4; Arum 5:2; Aefe 1:18Mulungu wahenda vizho, kwa kukala were anahendza ninwi at’u murio k’amu Ayahudi mung’alirwe ni siri ii bomu ya nguma. Siri yenye ni kwamba, Masihi a ndani zenu, na iye ndiye amwangizaye th’amaa ya kupata muthalo kahi za yo ngumaye. ²⁸1:28 Aefe 4:13Kwa vizho bai hunamuhubiri Masihi kwa at’u. Naswi kahi za kuhubiri hunahumira ulachu wosi kuonya at’u osi na kuafundisha. Lengo ra vivi ni kwamba mwisho kila mut’u andiyeima mbere za Mulungu, akale adzakumala kahi za Masihi. ²⁹1:29 Aefe 3:20; Afil 4:13Nami ninahenda kazi iyo kwa chadi kwa kuhumira zo nguvu nyinji za Masihi zirizo zinahenda kazi ndani mwangu.

¹Mimi ninahendza mumanye viryahu ambazho ninahenda kazi kwa chadi kwa ut’u wenu na kwa ut’u wa o at’u mariomukuluhira Masihi ko Laodikia, na kwa ut’u wa o angine osi mario k’amadzanona na matso. ²2:2 1:26-27; Aefe 5:2Lengo rangu ni kuhakikisha kukala madzangizwa moyo na ma kit’u kimwenga kwa kuko kuhendzana. Ninahendza makale na hakika kamare-kamare na kila kit’u kukirira na kuko kumanyat’o iyo siri ya Mulungu, ambayo siri ii ni iye Masihi mwenye. ³2:3 Ndhum 2:4-5; 1 Akor 1:24, 30; Aefe 3:19Na ni kahi za Masihi h’akeye ndo funadima kukala alachu na fukang’alirwa ni wo uv̱oro wa Mulungu uriwo una th’amani bomu. ⁴2:4 2:8; Arum 16:18Ninamwambira maut’u gaga, ili hasidze mut’u akamukenga na maneno madzo-madzo hatha mukagwira go mafundisho ga ulongo. ⁵2:5 1 Akor 5:3Idzaho mimi ni kure nanwi, moyo wangu u kuko kwenu. Nina raha kwa viryahu nirizhopata habari kukala mu kit’u kimwenga na kidza mudzagwira kumukuluhira Masihi hasiho kulola nyuma.

Masihi nde aikaye at’u huru

⁶Bai vizho murizhomukubali Masihi akale Bwana wenu, endererani kuishi here at’u mariomukuluhira Masihi Jesu mav̱iryazho kuishi. ⁷2:7 1:23At’u ninwi mwaukuluhira wo uv̱oro wa jeri wa Masihi na mukiugwira ngwa dza here muhi uriwo na miziji mire. Bai endererani kumukuluhira na kidza garyahu murigofundishwa ho chaho dzuluze, bai endererani kugagwira kuno munamulazhira Mulungu muv̱era munji kwa gago arigomuhendera.

⁸2:8 1 T’imo 6:20Musiriche mut’u akamwangamiza v̱uv̱a na elimu isiyo mana. Maut’u gaga ganaoneka kukala ni ulachu, ela ko sozho. Gago ni mafundisho ga mudamu, na ni maadha ga kidhunia, si kula kwa Masihi bule. ⁹2:9-10 1:19; 2:15, 20; Aefe 1:21Mana mafundisho ga Masihi ni ga ujeri, kwa kukala ye Masihi ariyezhalwa na akiishi haha dhuniani bai ni Mulungu kamare-kamare na ana nguvu zosi. ¹⁰Bai kwa kukala ninwi na Masihi mu kit’u kimwenga, muna kila kit’u kidimacho kumwaviza kiroho. Kwani kila aina ya nguvu iriyo haha urumwenguni i ts’ini za Masihi. ¹¹2:11 Aefe 2:11Ninwi murihomukuluhira Masihi, iye wazimboza ziryahu nguvu zirizokala zikimwangiza th’amaa mbii dza viryahu konde ritoswazho na kutsufwa wakathi mut’u angizwaho lwembeni. ¹²2:12 3:1; Arum 6:3-4; Aefe 1:19-20; 2:6Kwani wakathi murihobat’izwa mwakala here kwamba mudzazikwa hamwenga na Masihi na mukifufuka hamwenga naye kwa kukala mwakuluhira kahi za zo nguvu za Mulungu zirizomufufula Masihi. ¹³2:13 Aefe 2:1, 5Mwakala mwafwa kiroho kwa zizo dambi, na mwere munathawalwa ni th’amaa zenu mbii. Bai Mulungu akimufufula hamwenga na Masihi. Akihusamehe dambi zehu zosini furizokala fwazihenda. ¹⁴2:14 Aefe 2:15-16; 1 P’et 2:24Mulungu wahala iryahu k’esi yehu akiitsuha. Wahala garyahu mashithaka gehu gosi furigokala funago na akigafuta wakathi uryahu Masihi arihosulubiwa musalabani. ¹⁵2:15 2:9-10Bai kukirira na kuko kusulubiwa kwa Masihi, Mulungu wazizhoga-zhoga ziryahu nguvu mbii zirizokala zinathawala. Wazihoka wadimi na akizigwiza aibu lwazu-lwazu.

¹⁶2:16 Arum 14:1-6Kwa vizho k’ahana cha mut’u kumwamba ati ni makosa kurya chakurya fulani hedu kunwa kinywaji fulani. Na kidza k’ahana cha mut’u kumwamboza makosa kwa kukala k’amusherehekea zo sherehe za Kiyahudi, here siku ya kuzumwa mwezi na siku za sabato. ¹⁷2:17 Aebu 8:5Maut’u gaga gosi were ni here kivurivuri cha mut’u thu, ela ye mut’u mwenye ni iye Masihi ariyekudza. ¹⁸2:18 Aefe 1:21At’u masimuhendye mukakosa yo zawadi yenu kwa kumwamba ati suthi mudzitsereze na muavoye malaika ndo muipate yo zawadi. Manadzionya na kuamba maona maono dzulu za maut’u gaga. Ela kudzionya kwao k’akuna mana, kwa kukala gago madzionyerago ni maut’u marigogazhala enye. Manadzihendya at’u mario nikudzitsereza, ela ko sozho. ¹⁹2:19 1:18; Aefe 4:16At’u dza vivi aa k’amakit’u kimwenga na iye Masihi, ambaye nde kitswa. Na cho kitswa ndicho kidzichogwirana na uwo mwiri. Na zho vilungo vidzagwizanywa hamwenga na iyo misihaye na bai vinakula kulengana na zho ahendzazho ye Mulungu. ²⁰2:20 2:9-10; Agal 4:3-5, 9Ninwi mwafwa hamwenga na Masihi, naye akimwika huru na maadha ga kidhunia. Viandzadze kaheri muchere kuthuwa sheria dza zizi za, ²¹2:21-22 Isa 29:13; Math’ 15:9; 1 T’imo 4:3; Aebu 13:9“Usigwire kit’u fulani,” “Usirye chakurya fulani” na “Usithathe kugut’a kit’u fulani”? ²²Sheria dza zizi ni za kibinadamu na zinahusu vit’u ambazho vikihumirwa nikukira. ²³Kwa ndze sheria zizi zinaonekana kukala ni mbidzo kuthuwa, kwa kukala zinamuhendya mut’u aonekane here kwamba adzadzambozeza kwa Mulungu kamare. Anadzitsereza na hatha anadzilasha-lasha vit’u. Ela bai sheria zizi k’azina nguvu za kumuhendya mut’u ashinde th’amaa mbii za wo mwiriwe.

Kuishi maisha masha

¹3:1 2:12; Aefe 1:20Dza viryahu Mulungu arizhomufufula Masihi na akimup’a maisha masha, ninwi nanwi, wamwamboza kula kahi za go maisha genu ga kapindi na akimup’a maisha masha. Bai kwa kukala mwapata maisha masha hamwenga na Masihi, maazo genu na mahendo genu nagakale dza vizho Mulungu ahendzazho kuko mulunguni ariko Jesu. Naye akeresi mukono wa kurya wa Mulungu, luhande lwa nguvu na ishima nyinji. ²3:2 Math’ 6:33Kalani na k’ihu isiyogoma ya kuhenda garyahu Mulungu ahendzago muhende kahi za go maisha masha. Go mahendo mai-mai murigokala mukihenda kabila k’amudzamumanya Mulungu, bai musigaaze kamare. ³3:3 Arum 6:4; 2 Akor 5:14Ninanena vivi kwa kukala ninwi mu here at’u mariofwa, go maisha genu ga kapindi gagonya kukira na vivi munaishi maisha masha dza vizho zha Masihi aishizho na Mulungu kuko dzulu. Vivi kare maisha genu masha gafitswa kahi za Masihi. ⁴3:4 Agal 2:20; Afil 1:21; Nguma: 1:27; Afil 3:21; 1 Akor 15:43; 1 Joh 3:2Ela haho Masihi ariye ndiye mwandzo wa maisha ga kwenu andihouya haha dhuniani na kuonewa lwazu-lwazu ni kila mut’u, ninwi nanwi mundaonewa hamwenga naye kahi za nguma ya kwakwe.

⁵3:5-8 Agal 5:19-213:5 Arum 6:6, 11; Agal 5:24; Aefe 4:19; 5:3Kwa vizho bai, maut’u gosi mai-mai murigokala nago ho kapindi kabila k’amudzamukuluhira Masihi, galageni kamare-kamare. Musidzangize kahi za namuna yoyosi ya uzindzi, hedu kuhenda maut’u maitsi-maitsi. Kidza musithamani kuhenda namuna yoyosi ya maut’u mai-mai. Musikale na dzitso, kwani mut’u mwenye dzitso ni kumwika Mulungu k’anda na akavikiza mbere zho vit’u hatha akakala ni here avivoyaye. ⁶3:6 Aefe 5:6Na mut’u yoyosi andiyehenda maut’u gago nidzigomwambira k’oro za Mulungu zindakala dzuluze. ⁷3:7 Arum 1:18; Aefe 5:8Gaga ndo maut’u murigokala mukihenda haho murihokala k’amudzamumanya Masihi. ⁸3:8 Aefe 4:29; 5:4Ela vivi bai musigahende kaheri, garicheni kamare. Musikale na k’oro kidza musiatsukirirwe at’u angine na musiazire. Musikale na maneno ga kupothoka-pothoka, na musiatsindzire andziyenu. ⁹3:9 Aefe 4:22, 25Musikengane bule, mana yo mitoere mii ya kapindi mwairicha, ¹⁰3:10 Mwan 1:26-27; Aefe 4:24na muchangira kahi za maisha masha. Mulungu wamwangiza kahi za maisha gaga masha, kidza anaenderera kumugaluza kwenda-kwenda ili mukale here iye na mukaze kumumanya zaidhi. ¹¹3:11 2:11; Agal 3:28; 1 Akor 12:13Bai kahi za maisha gaga masha, k’akuna tofauti yoyosi kahi za Muyahudi na mut’u ariye si Muyahudi. Kidza k’akuna tofauti yoyosi kahi za mut’u ariyengizwa lwembeni na ariye k’adzangizwa lwembeni. H’aya zho mbai, k’akuna tofauti yoyosi kahi za mut’u ariyeshoma na mut’u ariye k’ashomere. K’akuna tofauti ya mutumwa na mut’u ariye si mutumwa. Mana Masihi nde kila kit’u na a kahi za osi.

¹²3:12-15 Aefe 4:2-4Bai kwa kukala Mulungu anamuhendza wamutsagula mukale at’ue, kidza akimuthenga mumuhumikire. Kalani na mbazi na mioyo midzo. Visithoshe, kalani at’u a kudzitsereza, na ap’ore na kidza mukale at’u akuvumirira. ¹³3:13 Aefe 4:32Vumiriranani. Mwandziyo akikukosera, musamehe dza vizho Bwana arizhomusamehe ninwi. ¹⁴3:14 Aefe 5:2Na dzulu za maut’u gaga gosi, hendzanani, kwani mukihendzana mundakala kit’u kimwenga na mundaishi na dheri. ¹⁵3:15 1:18, 20; 2 Akor 13:11; Aefe 1:23; 4:4Ninwi mu here vilungo zha Masihi, Mulungu wamutsagula na akimuhendya mukale na dheri kahi zenu. Kwa vizho bai ro dheri ra Masihi narithawale mioyo yenu. Kalani na muv̱era. ¹⁶3:16-17 Aefe 5:19-20; Aebu 13:15Gago mafundisho murigopata dzulu za Masihi, nagalongoze maazo genu, mahendo genu na maneno genu. Fundishanani na kanyanani. Maut’u gaga bai gahendeni kwa akili. Kidza mulikeni Mulungu kwa kumuimbira maira ga kumulika iye. Kahi za gago gosi, mulazhireni muv̱era Mulungu. ¹⁷Kwa kukala siswi fu at’u a Masihi, maneno na mahendo ga kwehu lazima ganyese kukala fu at’u a Masihi jeri. Siku zosi mulazhireni muv̱era Mulungu Baba kukirira kwa dzina ra Bwana wehu Jesu Masihi.

Mafundisho ga mitoere ya midzini

Aefeso 5:22–6:9

¹⁸3:18–4:1 Aefe 5:21–6:9Ninwi ache asikireni alume enu, kwani vizho ndo Bwana ahendzazho. ¹⁹Ninwi alume nanwi ahendzeni ache enu na musikale akali nao bule. ²⁰Ahoho, asikireni azhazi enu kahi za kila ngira, kwani vizho ndizho vimufwahizazho Bwana. ²¹Ninwi azhazi nanwi, musiatsukize-tsukize ana enu, sidze mukaabanda moyo. ²²Atumwa, asikireni mabwana enu a haha ts’i kahi za kila ngira. Ahumikireni kwa moyo mumwenga kila wakathi, bila kujali kala manamulolera hedu k’amamulolera. Vivi zhosini vihendeni kwa ut’u wa kumuheshimu Bwana Jesu. ²³Kila mundirohenda rihendeni na moyo mumwenga, musirihendeni kuafwahiza at’u, ela hendani here at’u mamalao kumufwahiza Bwana mav̱iryazho kuhenda. ²⁴3:24 Aefe 6:8Musisahau kukala iye Bwana Jesu Masihi andamup’a muthalo wenu kahi za iyo zawadi ariyolaga kukala andaap’a at’ue. Mana k’amumuhumikira mudamu, ela munahumikira Bwana Jesu Masihi. ²⁵3:25 Jako 2:1Kila andiyehenda mai, Bwana andamuriha karakara na go mahendoge mai, bila kupendhelea mut’u.

¹4:1 Alaw 25:43Vikara ninwi murio muna atumwa, hakikishani kukala munaahalirat’o na kwa hachi. Musisahau kukala ninwi nanwi mu atumwa a iye Bwana kuko dzulu mulunguni.

Maadho mangine zaidhi dzulu za kuvoya

²4:2-4 Arum 15:30; Aefe 6:18-194:2 Afil 4:6; 1 Ath’es 5:17Musitsoke kuvoya, na muvoyaho kalani matso na mukale na moyo wa muv̱era. ³4:3 Arum 15:30Na pia fuvoyereni naswi ili Mulungu afuvugulire muryango wa kuhubiri wo Uv̱oro Udzo. Fuambirize at’u dzulu za yo siri ya Masihi ambayo ndo idziyohenda hatha vivi nidzafungwa. Siri ii ni uwo Uv̱oro Udzo ambawo were at’u k’amaumanya bule. ⁴4:4 1:26Voyani, ili niwike lwazu here niv̱iryazho kuhenda.

⁵4:5 Aefe 5:16Kidza toani kwa akili na aryahu at’u ambao k’amadzamukuluhira Masihi, kuno mukiuhumira wakathi wenu t’ot’ot’o. ⁶4:6 Aefe 4:29; 1 P’et 3:15Bai kahi za kunena kwenu, maneno genu nigakale ga nema na kukola munyu. Mukihenda vizho mundamanya ni hiro ra kumudzigidzya mut’u.

Maut’u ga mwisho-mwisho

⁷4:7 Tukiko: Aefe 6:21-22Bai Tukiko, ndugu yehu muhendzwi andakudzamwambira manji dzulu zangu. Iye ni muhumiki mwandzangu kahi za Bwana, na ni muhumiki mwaminifu. ⁸Nidzamuhuma adze amup’e habari za uzima wehu na amup’e moyo kamare. ⁹4:9 Onesimo: File 10-12Nami bai yuyu Tukiko nidzamugwizanya na Onesimo, ndugu yehu muhendzwi na mwaminifu, na ariye ni mut’u wa kuko kwenu. Aa airi mandakudzamwambira gosini garigohendeka kuku.

¹⁰4:10 Arisitariko: Mahe 19:29; 27:2; File 2:4; Mariko: Mahe 12:12H’aya, mudzalamuswa ni Arisitariko, mufungwa mwandzangu na Mariko nduguye Barinaba. Here murizholagizwa, Mariko akidza kwenu, muhokerenit’o. ¹¹Pia mudzalamuswa ni mut’u aifwaye Jesu, ariye dzina ringine anaifwa Jusito. Aa nidzioahadza ndo Ayahudi h’akeye fuhendao kazi ya uthawali wa Mulungu hamwenga. Nao bai madzanaviza sana kahi za kazi ii. ¹²4:12 Epafura: 1:7; File 23Pia mudzalamuswa ni Epafura, mut’u wa kuko kwenu. Iye ni muhumiki wa Masihi Jesu, naye bai anamuvoyera zhomu sana. Anamuvoyera ili mudime kuima imara na mukale na hakika na kila kit’u aricho Mulungu anahendza mukihende. ¹³Mana mimi bai ni shahidhi wa viryahu arizhohenda kazi kwa chadi kwa ut’u wenu na kwa ut’u wa ao mario kuko Laodikia na Hierapoli.

¹⁴4:14 Luka: 2 T’imo 4:11; File 24; Dema: 2 T’imo 4:10Mudzalamuswa ni muhendzwi Luka, yuyahu dhakitari, na pia mudzalamuswa ni Dema. ¹⁵4:15 Laodikia: Ugun 3:14H’aya, nilamusirani o ndugu kuko Laodikia. Na pia nilamusirani Nimufa na ro kanisa rithungananaro mo nyumbani mwakwe.

¹⁶Vikara mundihogonya kushoma baruwa ii, hakikishani kukala idzashomwa kahi za kanisa ra Laodikia, na ninwi nanwi mushome yo baruwa ya Laodikia. ¹⁷4:17 Arikipo: File 2Na pia mwambeni Arikipo, P’aulo anaamba, “Iryahu kazi uriyogerwa ni Bwana, bai hakikisha unaimarigiza.”

¹⁸4:18 1 Akor 16:21; Aefe 1:1; 3:1Salamu zizi haha dzaziora mimi P’aulo mwenye na mukono wangu. H’aya, musisahau bule kukala ni jela. Bai Mulungu amuhase zhomu.