Baruwa ya hiri ya P’aulo kwa
ATH’ESALONIKE
Uthongodhyeri
Baruwa ii yandhikwa ni muhumwi mumwenga wa Jesu aifwaye P’aulo. P’aulo were ni mut’u wa T’ariso na wakala akiritesa sana kanisa, ela siku mwenga akidzambolerwa ni Jesu na akimukuluhira.
P’aulo anaandza baruwaye kwa kumushukuru Mulungu kwa kukala ao Ath’esalonike manaenderera kuhendzana na kumukuluhira Jesu t’ot’ot’o (1:3).
Lengo ra baruwa ii
At’u a kanisa ra Th’esalonike were manapata thabu sana. Vikara P’aulo kahi za baruwa ii anaangiza moyo kwa kuambira kukala majezo garyahu mapatago ni ngira mwenga yaho ya kujezwa kwa kuluhiro rao, na si kwamba Mulungu anaadhibu (1:4-5).
Bai kuko Th’esalonike, kwereko mut’u mumwenga ariyekala anaamba wapata baruwa kula kwa P’aulo iambayo kukala Bwana Jesu wauya kare haha dhuniani (2:2). P’aulo arihosikira vizho akiambira makale matso masikengwe ni mut’u yoyosi. Kidza akiambira kukala Bwana k’andauya muhaka yuyahu Mubandi wa Sheria aonekane (2:3).
P’aulo pia anaambira Ath’esalonike masikale akaha, hat’uhe mahende kazi kwa bidhii. Kidza anaambira kukala madzichunge na andugu mario k’amandagasikira gago adzigogandhika mumo baruwani.
Maut’u garigo mumu
Uvoro 1:1-2
P’aulo anaangiza moyo Ath’esalonike 1:3-12
Maut’u gandigohendeka kabila kuuya kwa Bwana Jesu 2:1-12
Fungani nguwo ziume 2:13-17
P’aulo anaambira Ath’esalonike mamuvoyere 3:1-5
Ukaha k’aufwaha 3:6-15
Maut’u ga mwisho-mwisho 3:16-18
1Uvoro
11:1 1 Ath’es 1:1Mimi P’aulo ninandhika baruwa ii hamwenga na Silivano,1:1 Silivano na Silasi ni ye mut’u mumwenga. na T’imoth’i. Baruwa ii, ninamwandhikira ninwi at’u a kanisa ra Th’esalonike, murio mu a Mulungu Babiyehu na Bwana Jesu Masihi.
2Bai nema na dheri kula kwa Mulungu Baba na Bwana Jesu Masihi, navikale kwenu.
P’aulo anaangiza moyo Ath’esalonike
31:3 2:13; 1 Ath’es 1:2-3Ndugu zangu, at’u siswi k’afuna budhi kumushukuru Mulungu wakathi wosi kwa ut’u wenu. Na vizho ndo viv̱iryazho, mana kuluhiro renu, na kuhendzana kwenu vinakaza kwangezeka. 41:4 1 Ath’es 2:19-20; 3:3, 7Kwa vizho ninwi ndinwi murio funadzionyera wakathi fusumuriraho na gago makanisa mangine ga Mulungu. Funadzionyera viryahu murizho munaenderera kumukuluhira Mulungu, hatha idzaho munakirira mateso na maut’u manji makomu-makomu. 51:5 Afil 1:28Maut’u gaga gananyesa kukala Mulungu anahukumu kwa ngira ya hachi. Na kwa ut’u uwo bai ninwi munafwaha kwangira kahi za uthawali wa Mulungu uriwo ndo umuhendyao munateswa. 61:6 Arum 12:19; Ugun 18:6Mulungu ni wa hachi, kwa vizho aryahu mario manamutesa ninwi, ao nao andaariha mateso. 71:7 Math’ 25:31; 1 Ath’es 5:1-2Ninwi murio vivi munateswa, Mulungu andamuhula uwo muzigo uwo, na siswi naswi andafuhendera vizho. Gaga gandahendeka wakathi Bwana Jesu andihombola kula mulunguni. Naye andakudza na malaikae a nguvu hamwenga na moho. 81:8 Isa 66:15; Arum 2:8; 1 P’et 4:17Bai haho akidza andaangiza akili aryahu at’u masiomumanya Mulungu na mario k’amaukubali uryahu Uv̱oro Udzo wa Bwana wehu Jesu. 9Mandahukumiwa kwa kunongwa kare na kare. Mandathengwa kure na Bwana na kure na zo nguvuze za nguma. 10Maut’u gaga gandahendeka wakathi Bwana wehu Jesu andihokudzahokera nguma kula kwa at’ue aeri, na osi mariomukuluhira mandafwahirwa. Nanwi bai mundakala kahi za kundi riri mana mwaukuluhira uwo ushahidhi furiwomwambiriza dzuluze.
111:11 1 Ath’es 1:2-3; 5:24Kwa ut’u uwo, kila wakathi funamuvoyera ili Mulungu amuthale kukala mudzaishi gago maisha arigomulagiza muishi. Pia funamuvoyera Mulungu amup’e nguvu ili mwadime kuthimiza kila kazi mbidzo mumalayo kuhenda kwa ut’u wa kuko kukuluhira kwenu. 12Hunamuvoyera gago, ili mudime kumup’a nguma ye Bwana wehu Jesu Masihi, na ninwi nanwi mugerwe nguma kahi za iye. Vizho zhosi navikale kukirira na nema ya Mulungu wehu na Bwana Jesu Masihi.1:12 Maoro mangine ganaamba, ‘Vizho zhosi navikale kukirira na nema ya Mulungu wehu, Bwana Jesu Masihi.’
2Maut’u gandigohendeka kabila kuuya kwa Bwana Jesu
12:1-2 1 Ath’es 4:15-17; 5:1-2Vikara dzulu za kuuya kwa Bwana wehu Jesu Masihi haha urumwenguni, na viryahu fundizhokundzumanywa hamwenga kumutsangira, funamala fumwambe vivi ndugu: 22:2 2:15Kuna at’u mario manaamba kukala iryahu siku andiyokudza Bwana, yafika kare. Bai hatha makaamba kukala Roho waanyesa, hedu mazhambirwa ni mut’u, hedu mavishoma kahi za baruwa kula kwehu, kidza siakuluhireni. Masimubabaishe na kumwangiza wasiwasi wa bule. 32:3 1 T’imo 4:1; 1 Joh 2:18Musikengwe bule, iyo siku ya kudza Bwana k’aindafika muhaka wakathi at’u mandihomukahala Mulungu zhomu, na yuyahu Mubandi wa Sheria za Mulungu, iye mwana wa wangamiki ang’azwe lwazu-lwazu. 42:4 Izik 28:2; Dani 11:36; Ugun 13:5-6Bai andihokudza yuyu Mubandi wa Sheria, andapinga kila kit’u kiifwacho mulungu, hedu kivoywacho ni anadamu. Andadzika dzulu ya zhosi na ende kahi za ro Hekalu ra Mulungu, akadzitangaze kukala iye nde Mulungu.
5Maut’u gaga namwambiriza kare wakathi nirihokala hamwenga nanwi, hedu mudzasahau? 6Kiryahu kitumacho hatha k’adzadza ye Mubandi wa Sheria, ni kwamba uryahu wakathiwe wa kudza k’audzafika bule. Na vivi munavimanya pia. 7Kwani ye mubandi wa sheria za Mulungu be vivi anahenda kazi kare kisiri-siri, na andaenderera vizho muhaka yuyahu ariye nde adziyemuzulia auswe. 82:8 Isa 11:4; Ugun 19:15Bai andihokala adzauswa, iye Mubandi wa Sheria andaonyeswa lwazu. Badaye Bwana Jesu andahenda kusoha thu naye vikale vidzamutoka, na andazinonga nonga zo nguvuze kwa iyo nguma ya kuko kudzakwe. 92:9 Math’ 24:24; Ugun 13:11-13Vikara kabila k’adzanongwa-nongwa yuyu Mubandi wa Sheria, andahumira nguvu za Shethani kuhendera miujiza na maut’u ga kwangalaza-ngalaza ga ulongo. 10Naye andahumira uthiriri wa kila samupuli kuakenga aryahu at’u mario makwendani kahi za kifwa cha kare na kare. At’u aa manakahala kuukuluhira uwo ujeri wa Jesu Masihi uriwo ndiwo ungawoaokola. 112:11 2 T’imo 4:4Vikara kwa kukala manaukahala uwo ujeri wa Jesu Masihi, Mulungu andaahendya mangamizwe v̱uv̱a na makengwe ni yuyu Mubandi wa Sheria. 122:12 1:6-8Kwa ut’u uwo, aryahu mario manatsamirwa ni uthiriri na k’amendzi kuukuluhira ujeri wa Jesu Masihi, mandahukumiwa.
Fungani nguwo ziume
132:13 1:3Ela siswi k’afuna budhi kumushukuru Mulungu kila wakathi kwa ut’u wenu ndugu zangu muhendzwao ni Bwana, mana iye wamutsagula hangu chaho.2:13 Haha mana nyingine ya Kiyunani inaamba, ‘here at’u a kwandza a kumukuluhira.’ Wamutsagula ili amwakole kwa kuhendywa aeri ni iye Roho Mweri na kwa kuukuluhira ujeri wa Jesu Masihi. 142:14 1 Ath’es 5:9Mulungu wamwiha kukirira na uwo Uv̱oro Udzo furiwomwambiriza, ili mukale na fungu kahi za iyo nguma ya Bwana wehu Jesu Masihi. 152:15 3:6; 1 Akor 11:2Kwa vizho ndugu zangu, fungani nguwo ziume, na mugagwire kuuma garyahu furigomufundisha na mulomo na garyahu furigohenda kumwandhikira baruwani.
162:16 1 Ath’es 1:4Baba Mulungu wafuhendza sana na kukirira na zizo mbazize, akifufariji na akifuhendya fukale na th’amaa ya kare na kare. Bai, iye hamwenga na Bwana wehu Jesu Masihi mwenye 17namamufariji na mamup’e nguvu kahi za gosini mundigonena na mundigohenda.
3P’aulo anaambira Ath’esalonike mamuvoyere
13:1 Mahe 2:4; Arum 15:30; 1 Ath’es 5:25Vikara mwisho kamare, namala niambe vivi ndugu zangu, fuvoyereni, ili uwo Uv̱oro wa Bwana uenere haraka kila hat’u. Kidza at’u mauishimu dza viryahu murizhouishimu wakathi murihouhokera. 2Pia fuvoyereni, ili Mulungu afuthizhe na at’u athiriri na mario ni ahendi a mai, mana si osi makuluhirao. 33:3 1 Akor 10:13; 1 Joh 5:18Ela Bwana ni mwaminifu, riro andironena ndo ahendaro. Bai iye andamup’a nguvu na amuchinge na yuyahu muthiriri. 43:4 1 Akor 4:16; Agal 5:10Bwana anafuhenda k’afuna wasiwasi kamare dzulu zenu, kwa kukala kila fumwambiraro munarihenda, na mundaenderera kurihenda kwenda-kwenda. 5Bwana naamulongoze mumanye viryahu Mulungu arizho na mahendzo na viryahu Masihi arizhovumirira mateso.
Ukaha k’aufwaha
63:6 3:12; 1 Ath’es 5:14Vikara ndugu, funamulagiza kahi za dzina ra Bwana Jesu Masihi kukala: Musigwirane na ndugu yoyosi ariye ni mukaha na k’athuwa gago malagizo furigomup’a. 7Mana munamanya kamare kukala munav̱irya kuiga miishire yehu. At’u siswi k’afukalire akaha wakathi furihokala hamwenga nanwi. 83:8 1 Ath’es 2:9Na kidza k’afuna furichorya bila kukirihira. Hat’u ha vizho, fwabigilika kuhenda kazi usiku na mutsana kusudhi fusikale muzigo kwenu. 93:9 Mahe 18:3; 1 Ath’es 1:6; Kuvoya wavizi: 1 Akor 9:4Naswi fwahenda vivi, si kwamba were k’afuna hachi ya kuvizwa ni ninwi, were funayo, ela fukihenda vizho ili ninwi mupate mufano. 103:10 1 Ath’es 4:11Wakathi furihokala hamwenga nanwi fwamulagiza kukala mut’u ariye k’endzi kuhenda kazi, hatha kurya nako asirye.
113:11 1 T’imo 5:13Funanena vivi, kwa kukala funasikira kukala angine kahi zenu manadzikeresira thu. K’amana rorosi mahendaro, hatha kazi yao ni kwangirira maut’u ga at’u. 123:12 Aefe 4:28Bai funaalagiza na kuangiza moyo at’u dza vizho ao kahi za dzina ra Bwana Jesu Masihi, kukala mahende kazi kwa up’ore ili marye jasho rao enye.
133:13 Agal 6:9Na ninwi ndugu nanwi, musitsoke bule kuhenda madzo. 143:14 1 Akor 5:9, 11Mut’u yoyosi ariye k’andagagwira gaga malagizo gehu mumu baruwani, mulolenit’o na musigwirane naye kaheri, ili agwirwe ni haya. 153:15 Math’ 18:15-17; 1 Ath’es 5:14Ela hatha hamwenga na vizho, musimuhalire here hadhui, ela mukanyeni here ndugu.
Maut’u ga mwisho-mwisho
163:16 2 Akor 13:11Bai hunamuvoyera Bwana amuhendye mukale na dheri siku zosini na kahi za kila ngira. Iye nde ahendyaye mut’u akakala na dheri. H’aya bai, Bwana naakale hamwenga nanwi.
173:17 1 Akor 16:21Mimi P’aulo nandhika salamu zizi na mukono wangu wenye. Na uu ndo muv̱ano wangu kahi za baruwa zangu zosi. Vivi ndo nindhikazho.
183:18 Agal 6:18Bai nema ya Bwana wehu Jesu Masihi, naikale hamwenga nanwi nyosi.