ꞌPɔlʋꞌa ꞌꞌbɔgʋ ɔ poꞌa TIITƖ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
-Lagɔꞌɔ lbhʋnʋyi -lue -ke Zeziiꞌa -dalbhoyi ꞌPɔlʋ -plɛꞌɛ lbhʋ -lue ꞌmnɛ ꞌmʋ, ꞌɩnnɔ ɔ poꞌo ꞌꞌbɔgʋ -nɛɛ -jeyi. ꞌƆ ꞌnynɩ ꞌmo-o Tiitɩ. -Ka ɔ ꞌka Klɛɛtɩlikpe ꞌliꞌa Zeziiꞌa -glɩgbawɔnyiꞌa nyʋ ꞌꞌyriliꞌꞌdu ꞌle ɔ ꞌke ɩ-bɩ -glɩgbɩ ꞌmnɩ glu po, ꞌya lbhʋ ꞌPɔlʋ ꞌꞌnyɩ ɔ ꞌo. ꞌƐ dɩ ɔ po ꞌɔ wlu -jeyi, ꞌle, ꞌꞌdɩmʋduwlu ɔ ꞌka nyʋꞌa ꞌꞌpa ꞌꞌpa -bodɩ ꞌmʋ-za, ɔ-ɔ zɩ ꞌɩ ꞌmʋ.
1ꞌYewlu
1Tiitɩ, ꞌɩnmɔ ꞌPɔlʋ ꞌma-a -Lagɔꞌɔ lbhʋnʋyi ꞌle -ɔ ꞌꞌduꞌa *Zezii *Kliisɩꞌa -dalbhoyi a, ꞌɩnmɔ poꞌo -ɩnmʋ wlu -jeyi. -Lagɔ -tbhaꞌa-a ꞌɩnmʋ ꞌɔ lbhʋ ꞌɩn ꞌke ɛ nʋ. *-Aꞌba ꞌPʋʋnyi -Lagɔ tbha ꞌnɛ ꞌɩnmʋ-ɛ, ꞌle, nyʋ -Lagɔ ꞌtɛꞌɛ ꞌmʋ ʋn ꞌke ꞌɔ -glɩgbawɔnyiꞌa nyʋ ꞌꞌdu, ꞌɩn ꞌke ʋ -kpa ʋn ꞌke -Lagɔ ꞌꞌgwlide ꞌle ꞌɩn ꞌke ʋ -tɔ ʋn ꞌke ꞌya ꞌwee yibo ꞌle ʋn ꞌke lɩzɩgɩ nʋ ꞌle ɩ ꞌke -Lagɔ ꞌtʋ nʋ. 2ꞌƖn-ɩ nʋ -ɛꞌo ꞌle nyʋ ꞌke ɛ yibo, ꞌle, tinɩɛzɛgɛ-ɛ seꞌa ꞌꞌtiinamʋ ꞌbhle, -Lagɔ ꞌke ɛ ʋ ꞌꞌnyɩ. Ɔ -see -bhla ꞌkmʋ ti-ya ke see ꞌle ɔ ꞌye nyunyu ꞌgwlʋtipopo ɔ ꞌke ʋ ꞌꞌkɔgwlɛtinɩɛ ꞌꞌnyɩ. ꞌƆ cɛ sɩn. Lɛ ɔ-ɔ cɛꞌɛ wlu ꞌꞌkpiti, ɔ-ɔ nʋ -ɛꞌo. 3ꞌTraamʋ ꞌtɔ ɔ, ꞌꞌyrilinmɔnɔɔ ꞌmnɛ nyni-oꞌo. -Aꞌba ꞌPʋʋnyi -Lagɔ ꞌbɔ-ɔ ti ɔ ꞌke ꞌꞌdɩ ꞌmnɩ ꞌꞌpiemʋ po ꞌle nyunyu ꞌke ɩ yibo. ꞌƐ dɩ ɔ ꞌꞌduꞌo ꞌɩnmʋ wlu ꞌꞌyi ꞌle ꞌɩn ꞌke nyunyu wlu -ya.
4ꞌAn -Lagɔjeyiꞌa ꞌꞌyu Tiitɩ, -ɩnmɔ -ke ꞌɩn -plɛꞌɛ ꞌꞌgwlideɛ -lue ꞌmʋ, -aꞌba -tɩta -Lagɔ -ke -aꞌba *ꞌPʋʋnyi Zezii Kliisɩ -sie -ɩnmʋ gbo, ʋn ꞌke -ɩnmʋ -pɔlʋꞌa bhlubhlua ꞌꞌnyɩ!
Tiitɩꞌa nʋnʋlbhʋ ꞌbho Klɛɛtɩbhlʋkpa ꞌꞌkpi
5Lɛ -ke dɩ ꞌɩn sieꞌa -ɩnmʋ ꞌbho Klɛɛtɩbhlʋkpa ꞌꞌkpi, ꞌɩnnɛ ꞌka-a: Lbhʋ ꞌɩn nʋꞌa ꞌbho -ɛ sieꞌa ꞌꞌlruvlan ꞌꞌyi, -ɩn ꞌke ɛ ꞌꞌyigwɛ. ꞌƐ ꞌmʋnyaanɛ ꞌmo-o -ɩn ꞌke -Lagɔꞌɔ -glɩgba glu po. ꞌLe, nyʋ -a ꞌyeꞌa ꞌbho ꞌꞌdu mʋ a, ʋn ꞌke -glɩgba ꞌmnɛ ꞌꞌlru ti-de -lue -lue. -Ka ꞌɩn -tɔꞌɔ -ɩnmʋ, nʋ -kaa ꞌle -gwlɔ gwlɔ ꞌmʋ! 6-Bho nyɔ ꞌke -Lagɔꞌɔ -glɩgbaꞌa ꞌꞌlrutideyi ꞌꞌdu, ɔ ꞌꞌdu nyɔ-ɔ seꞌa ꞌbɩ liꞌbhle; ɔ ꞌꞌdu ꞌnynɔ -lueꞌa ꞌbhleyi ꞌle ɔ ꞌke ʋ ꞌꞌyi-kpʋn; ɔ ꞌꞌdu nyɔ -ke ꞌꞌyreetɩ-ɩ deꞌa *Zezii *Kliisɩ ꞌꞌgwli ꞌle ʋn ꞌke dɩ likpʋn; ꞌle nyʋ -kaa ꞌbho ꞌwa da ꞌꞌdu ꞌꞌnyinynika ꞌle ꞌɔ ꞌꞌyreetɩ ꞌke ꞌbho nyʋ ꞌꞌdu! 7Nyɔ-ɔ -kɔꞌɔ -Lagɔꞌɔ -glɩgbaꞌa -dɔnʋꞌa nya a, ɔ-ɔ ꞌmo-o -Lagɔꞌɔ lbhʋꞌa kwabhleyiꞌa dɩ, ꞌɔ ꞌbhle ꞌbɩ li -le! Lɩ ɔ ꞌka gbo-tɛ, ꞌɩnnɩ ꞌka-a: ꞌƆ ꞌꞌdu nyɔ-ɔ ꞌbhɛɛꞌɛ ꞌɔ ꞌꞌbhuo ꞌꞌyi -le! ꞌƆ ꞌꞌdu nyɔ-ɔ ꞌbhleꞌa ꞌcɛ ꞌmna ꞌꞌyi -le! ꞌƆ ꞌꞌdu nmɔꞌɔ ꞌꞌkalɛyiziyi -le! ꞌƆ ꞌꞌdu -gbaatibɔyi -le! ꞌƆ ꞌꞌdu nyʋꞌa lɩꞌa wɔnkaliyi -le! 8A -gblee, ꞌɔ nyɔtuꞌa -dedekplizɩgɩ ꞌka-a: Ɔ ꞌꞌdu ꞌlɩkpʋꞌa -glikpʋnyi; ɔ ꞌꞌdu ꞌꞌyrilinmɔkplizɩgɩꞌa nyʋꞌa bha; ɔ ꞌꞌdu kpliꞌa ꞌmʋnmɔyi; ɔ ꞌꞌdu dɩlikpʋnyi; ɔ ꞌꞌdu nyɔ -ke nʋnʋdɩ -nɩꞌa pepe ꞌle ɔ ꞌke ꞌɔ ꞌꞌbhuo wɔnyiꞌbhɛɛ! Ɔ ꞌꞌdu nyɔ-ɔ ꞌꞌduꞌa ꞌbho -Lagɔ ꞌle ɔ -kaa ꞌɔ ꞌꞌbhuo -tɔ! 9-Tɔtɔlɩzɩgɩ -a -tɔꞌɔ nyʋ a, nyʋꞌa -jolʋgbopoyi ꞌmnɔ -de nɩ ꞌmʋ ti, ꞌꞌlemnɩɩ ɔ ꞌbhɛɛꞌo ɔ ꞌke -tɔtɔlɩzɩgɩ ꞌmʋ nyʋ ꞌkpɩ ꞌꞌyi -po -nɩ ꞌle ɔ ꞌke lɩꞌa ꞌꞌyidamʋzamʋ ꞌgɩ -za, ɔ ꞌke depomʋ le -zi -nɩ ɔ ꞌke ʋ ꞌle ꞌꞌtaa!
10De -kaa ꞌbho nyʋ ti, -ɛkedɩmaa, nyʋꞌa -dadudu ꞌku-o -loku ꞌmʋ, ꞌle, dɩ-ɩ seꞌa ꞌkpʋ ꞌbhle, ʋn-ʋ tɔ ꞌnɩ nyʋ, ʋn-ʋ poꞌo nyʋ ꞌsrɛ li! ꞌWa -daduduꞌa ꞌꞌklumʋꞌa nyʋ-ʋ ꞌmo-o *ꞌZuifʋ. 11Ʋ-bʋ nyʋ ꞌmnʋ, ꞌɩnnʋ nyʋ ꞌke ꞌle ꞌꞌtaa ꞌle ʋn ꞌke wɔn ꞌꞌmu. -Bho ɛ -se -mnɛɛ ɛ, ʋn-ʋ ꞌꞌmaa-a ꞌbho -glɩgbawɔnyiꞌa nyʋ ꞌwee ꞌle ʋn-ʋ ꞌꞌmaaꞌa nyʋ -tɔɔ ꞌꞌyrili. Lɩ-ɩ seꞌa -tɔka -nɩ, ꞌɩnnɩ ʋn-ʋ tɔꞌo ꞌle ꞌsrɛ ꞌmʋ ꞌle ʋn-ʋ ꞌyeeꞌe nɩ mɔni ti. 12A -gblee, Klɛɛtɩꞌa ꞌybhayi -lue na: Klɛɛtɩyi-i ꞌmo-o sɩnbhleyi, ꞌle ɔ kɔkɔɔꞌɔ ꞌmnamʋnyninmi: liliaꞌa ꞌꞌsɛꞌɛ dɩ ɔ-ɔ popoꞌo ꞌgwlʋti. Ɔ vlan-oꞌo, liliaꞌa ꞌꞌsɛꞌɛ dɩ ɔ-ɔ ziꞌo. 13Wlu ꞌmnɛ-ɛ ꞌmo-o -ziadɩ. Ɛ -nmɔꞌɔ-ɔ ꞌꞌyrili, -ɩn ꞌke ʋ ꞌꞌdɩ ꞌmʋ ꞌꞌdu ꞌle ʋn ꞌke -Lagɔꞌɔ -jolʋ tikpʋn. 14ꞌꞌDu ʋ ꞌꞌdɩ ꞌmʋ -ka -zɛgɛka tenyɩ ꞌle ʋn -kaa ꞌZuifʋꞌa sabhladɩ -lokuipo, ꞌle ʋn -kaa nyʋ-ʋ -tbhɛꞌɛ -ziadɩ ꞌꞌkpiꞌa gba ꞌꞌyi-kpʋn! Ɩ-bɩ dɩ ꞌmnɩ, -bho ʋn -kɩ ɩ nyʋ-ʋ tɔ, ꞌwa po ɩ -lokui -le! ꞌWa -kpʋn ꞌya gbatu ꞌꞌyi -le, -ɛkedɩmaa, ɩ ꞌmo-o bhebhedɩ! 15-Bho nyunyɔꞌɔ -pɔlʋ ꞌsaa li ꞌle ɔ ꞌke *liꞌsaa ꞌbho -Lagɔꞌɔ ꞌꞌyigbeyi, ɔ -bodɩ lɛꞌꞌo lɛ ꞌsaaꞌa-a li -lrɛɛ. Nyʋ-ʋ seꞌa -Lagɔ ꞌꞌgwlide -ʋ -ke ꞌlimʋ -nyniꞌa wɔn, lɛꞌꞌo lɛ-ɛ -nɩꞌa ꞌle ꞌwa -pɔlʋ ꞌzɔ se ꞌꞌyiꞌsrɛɛ, ʋn-ʋ popo-o ꞌꞌnyinynidɩ ꞌgwlʋti ꞌꞌkɔmʋ. -Bho ʋn nʋ ꞌꞌnyinynidɩ, ꞌya ꞌlbhaa nʋ dɩn ꞌꞌyi; ʋn se ꞌꞌnyinynidɩ -ke -zɩgɩ yibo. 16Nyʋ ꞌmnʋꞌa ꞌꞌbhi na, ʋn yiboꞌo-o -Lagɔ ꞌle ꞌwa ꞌꞌnyinynikpli-i zʋ ꞌʋ gbɔ, -ka ʋn seꞌa -Lagɔ yibo -ziaka. ꞌWa ꞌꞌdu ꞌbho -Lagɔ, lɩ-ɩ nya ꞌnɔ li, ꞌɩnnɩ ʋn-ʋ nʋꞌo ꞌle ʋn se -zɩgɩꞌa nʋnʋa ꞌbhɛɛ.
2ꞌꞌYisrɛɛtɔtɔlɩ
1Tiitɩ, lɩ-ɩ ꞌbhleꞌa ꞌkpʋ ꞌle -ɩ ꞌka nyʋ -kpa a, -tɔ nɩ!
2ꞌTmʋʋ nyunyuzɩgɩ, ʋn yibo ꞌwa ꞌꞌbhiꞌa kpʋnka, nmɔnɛɛɛꞌɛ zi ʋ -le! Ʋn kpʋn dɩ li ꞌle nyʋ ꞌke ʋ ꞌbho ꞌꞌdu! Ʋn kpʋn dɩ li ꞌle ꞌwa -Lagɔꞌɔ ꞌꞌgwlideɛ-e dɩkmɛɛ -ke ꞌkpayikuɛ ꞌke ꞌꞌyrigbɔ mu!
3-Ka -lue ꞌmnɔ, ꞌka-a ɛ ꞌke nyunyuzɩgɩnynʋkpakpɩ -bodɩ -nɩ -lrɛɛ! ꞌꞌDu ʋ ꞌꞌdɩ ꞌmʋ, ʋn kpʋn dɩ li, ʋn ꞌke nyʋ-ʋ pleꞌa -Lagɔꞌɔ kpli ꞌꞌsɛlɩ-za! ꞌWa ꞌꞌdu ʋn -bonyunyu nyʋ wɔn ꞌmʋ ti -le! Nmɔꞌɔ kpʋn ʋ ꞌgeyiɛ ꞌmʋ -le! Lɩ-ɩ -nmɔꞌɔ ꞌꞌyrili, ʋn -tɔ nɩ ʋn -bonyunyu! 4-Bho ʋn -ka -kaa-a nʋ a, ꞌꞌlemnɩɩ ꞌbhʋabhʋayranynʋ-ʋ ꞌpo -ʋ -lokui ꞌle ʋn-ʋ gbʋ ꞌnʋ ya, ʋn-ʋ kmaꞌa ꞌwa nyimiɛ ꞌꞌwe -ke ꞌꞌyreetɩꞌa dɩ. 5Ʋn kpʋn dɩ li, ꞌwa ꞌbhle ꞌꞌnyinyninynɩ ꞌꞌkpi -le! ꞌLe ʋn ꞌke ꞌꞌbhlegboꞌa ꞌnynʋkpakpɩzɩgɩ ꞌꞌdu, ꞌle ʋn ꞌke -yranynʋlbhʋ nʋ -ka -zɛgɛka, ꞌle ʋn ꞌke ꞌbho ꞌwa nyimiɛ -bodɩ ꞌwa ꞌꞌbhi ya -ya! -Bho ʋn nʋ -kaa a, nyʋ -see -Lagɔꞌɔ wlu kwaꞌfɩɩn yi.
6ꞌTmʋʋ ꞌbhʋabhʋayreetɩnyukpasi, -ka -lue ꞌmnɔ -lrɛɛ ꞌtmʋʋ nʋ ʋn kpʋn dɩ li! 7-Mnaaaꞌa ꞌꞌbhuoka -lrɛɛ, ꞌɩn-ɩ ꞌtmʋʋꞌo -ɩnmʋ-ɛ, ꞌɩn na, ꞌle lɩ ꞌwee ꞌmʋ, nʋ lɩzɩgɩ ꞌle -ɩn -boyreetɩ ꞌke -ɩnmʋ liꞌye, ꞌle ʋn ꞌke -ɩnmʋ ꞌꞌkpi ꞌcɩaan -nɩ ꞌle ʋn ꞌke -ɩnmʋ ꞌꞌyi ꞌꞌkpi -za! -Bho -ɩn -kʋ ʋ lɛ-ɛ tɔ ɔ, ꞌwla -pɔlʋ ti! Lɩ-ɩ ꞌbhleꞌa ꞌkpʋ, -tɔ nɩ ꞌle nyʋ ꞌke ꞌbho -ɩnmʋ ꞌꞌdu! 8-Tɔ nʋ wlu -ɩ ꞌma-a -ziadɩ, nyʋ -seeꞌa -feyi ꞌzɔ -za yi! ꞌꞌLemnɩɩ, nyʋ-ʋ ꞌke ꞌka -aꞌba da ꞌꞌdu se ꞌtɔ ꞌbhɛɛ ʋn ꞌke -amʋ ꞌꞌnyinynilɛ ꞌꞌkpi ꞌꞌduu, -ɛkedɩmaa, ꞌwa wɔn ꞌꞌmu-ɛꞌo.
9Nyʋ-ʋ ꞌma-a nyʋzɔlbhʋnʋmʋ, ꞌtmʋʋ nʋ, ʋn ꞌꞌdu ꞌbho ꞌwa -kɔmʋꞌa wlu ꞌle lɛꞌꞌo lɛ ꞌmʋ! Lɩ-ɩ -nmɔꞌɔ ꞌꞌyrili, ʋn nʋ ɩ ꞌwa -kɔmʋ -bodɩ; ꞌle ʋn -ke ʋn -kaa jɛ! 10ꞌWa ꞌꞌyri ʋ -le -lrɛɛ, ʋn nʋ ʋ -zɩgɩ ꞌꞌlruli, ꞌle ꞌwa -kɔmʋ ꞌke ꞌwa dɩlikpʋndɩ -za! ꞌꞌLemnɩɩ -aꞌba *ꞌPʋʋnyi -Lagɔꞌɔ wlu -a tɔꞌɔ nyʋ, ʋn-ʋ bha nɛ-oꞌo.
11Nyʋ-ʋ ꞌma-a -Lagɔꞌɔ -nʋ, dɩ ꞌɩn-ɩ zaꞌa -daa ꞌmʋ, ʋn nʋ ɩ! -Ɛkedɩmaa, ɔ-bɔ -Lagɔ-ɔ ꞌtɔ-ɔ nyunyu, -ka ꞌɔ ꞌlimʋ -nmɔꞌɔ wɔn ꞌꞌgɩɩ ꞌbho nyunyu ꞌwee ꞌꞌkpi ꞌle ɔ ꞌke ʋ ꞌpʋʋn. 12-Zɩgɩ -Lagɔ nʋꞌa -amʋ ꞌꞌlruli, -a yibo ꞌnɩ-ɩ ꞌꞌyiꞌa dɩ, -a ꞌbhɔ ꞌꞌnyinynidɩꞌa dɩ! -Aꞌba ple ꞌkmʋ ꞌmʋꞌa ꞌꞌnyinynidɩ kli -le ꞌle -a ꞌke ꞌɔ ꞌtʋnʋdɩ nʋ! -Nɔɔ -ke ti -a -nɩꞌa -bhla ꞌnɔɔ ꞌkmʋ ꞌmʋ, ɛ -nmɔꞌɔ-ɔ ꞌꞌyrili -a ꞌke dɩ likpʋn, ꞌle, lɩ-ɩ ꞌsrɛɛꞌɛ ꞌꞌyi, -ɩ nʋꞌa -Lagɔ ꞌtʋ, -a ꞌke ɩ nʋ! 13-Nɔɔ -ke ti -a -nɩꞌa -bhla ꞌbʋbʋaꞌa zɔ wɔnfuonamʋ, -a nʋ -kaa, -ɛkedɩmaa, -a yiboꞌo-o -aꞌba *ꞌPʋʋnyi *Zezii *Kliisɩ ꞌmo-o -aꞌba -Lagɔklagba. ꞌƖnnɔ ꞌye le -yi mʋ ꞌle ꞌɔ ꞌnynɩꞌa ꞌꞌyibhɛɛɛ ꞌmʋ. 14A -gblee, ɔbɔ ꞌmnɔ, ꞌɩnnɔ ꞌꞌtayiꞌe ꞌɔ ꞌꞌbhuo ꞌꞌyiti ɔ ꞌye ꞌbho -aꞌba ꞌbɩ ꞌmʋ ꞌmɛ -nɩ ꞌle ɔ ꞌke -amʋ ꞌꞌnyinynidɩ ꞌꞌkpi -za, ɔ ꞌke -amʋ *liꞌsaa ꞌbho -Lagɔꞌɔ ꞌꞌyigbeyi, ꞌle ɔ ꞌke -amʋ -kɔ ꞌle -a ꞌke ꞌꞌyrilinmɔlɩꞌa nʋnʋa wɔnyiꞌbhɛɛ.
15Tiitɩ, lɩ ꞌɩn ꞌcnɩꞌa -daa a, -tɔ nɩ nyʋ, po ʋ ꞌkpɩ ꞌꞌyi! Nyʋ-ʋ -seeꞌa -ɩnmʋ -lokuipo, ꞌꞌdu ʋ ꞌꞌsrɩn ꞌmʋ! Wɔnkuɛ -Lagɔ ꞌꞌnyɩꞌa -ɩnmʋ, -wlu -nɩ nɛ ꞌmʋ! -Aꞌa ꞌwɔn nyʋꞌa ꞌfɩɩn -ɩnmʋ kwa -le!
3-Pɔlʋꞌa bhlubhlua ꞌlitideɛ
1-Za *Zeziiꞌa nyʋꞌa -pɔlʋ ꞌꞌyiglu, ʋn ꞌꞌdu ꞌbho ꞌbhlɩkpɩyowli -ke ꞌwa nyʋlrutidemʋ! Lɛ ʋn ꞌꞌsiꞌa ꞌnynɩ, ʋn nʋ ɛ! Ʋn -kma ꞌꞌyrilinmɔlɩꞌa nʋdɩ! 2ꞌTmʋʋ nʋ, ꞌwa -za nyʋ ꞌꞌnyinynidɩ -bodɩ ꞌmʋ -le! Ʋn -ke nyʋꞌa jɛ -le! Ʋn -nmɔ ꞌlimʋ wɔn ꞌle ʋn ꞌke nyʋ ꞌwee -bodɩ ꞌyɔɔ -nɩ!
3ꞌTmʋʋ nʋ -kaa, -ɛkedɩmaa, nyigbeyikpli -abʋ-aꞌa ꞌꞌbhi-i nʋ ꞌko -tanyɩ! -Aꞌba ꞌꞌdu ꞌkɩ ꞌbho nyʋ, -a ꞌꞌmaaꞌa-a -jolʋzɛgɛ ꞌꞌyrili, ꞌle ꞌkmʋꞌa lɩꞌa ꞌtʋ -ke lɩꞌa -bhabha kpʋnꞌo -amʋ ꞌgeyiɛ ꞌmʋ. -Klaabolɩꞌa ꞌꞌsɛ -aꞌba -naagɩ -nɩ ꞌkoꞌo ꞌꞌkpi. -A ꞌmɩɩꞌe-e ꞌꞌyri ꞌbho -a -bonyunyuꞌa lɩ ꞌꞌkpi. Nyʋ-ʋ ꞌnyɛ-ɛ -amʋ ꞌmʋ ꞌle -abʋ ꞌnyʋ ꞌʋ ꞌmʋ. 4ꞌLe ɩ -nɩꞌa -kaa ꞌmʋ, -nɔɔ -lue ti -aꞌba *ꞌPʋʋnyi -Lagɔ -tɔꞌɔ-ɔ -a-bʋ nyunyu -ka ꞌɔ ꞌlimʋ -nmɔꞌɔ wɔn ꞌbho -amʋ ꞌꞌkpi, -ka ɔ -kmaꞌa -aꞌba dɩ tenyɩ, ꞌle ɔ ꞌye -amʋ ꞌꞌnyinynidɩ ꞌꞌkpi -za. 5Ɔ -see -amʋ ꞌpʋʋn -aꞌba -zɩgɩꞌa nʋnʋkamʋ. Ɔ ꞌpʋʋnꞌo -amʋ-ɛ ꞌle ꞌɔ ngazepɔlʋ ꞌmʋ. Ɔ *ꞌsaaꞌa-a -amʋ li ꞌle -aꞌba ꞌꞌnyinynidɩ ꞌmʋ. -A ꞌwlʋ-oꞌo -lreeka, -a ꞌye-e tinɩɛlre. Ɔ-bɔ -Lagɔ ꞌnʋ-o ꞌɛ lɛtu ꞌle *ꞌɔ Lisaazuzuꞌa wɔnkuɛ ꞌmʋ. 6Ɔ -zi -nɩꞌe-e -aꞌba *ꞌPʋʋnyi Zezii *Kliisɩ ꞌmʋ ꞌle ɔ ꞌye -amʋ ꞌɔ Lisaazuzu ꞌꞌkpi -ya -gblokoo! 7A -gblee, -ka -Lagɔ nʋꞌa -amʋ -zɛgɛ ꞌꞌlruli ꞌle -a -ke ɔ ꞌyeꞌa -ybhɛ ꞌle -Lagɔ ꞌmnɔꞌɔ ꞌsana ꞌmʋ, -a yiboꞌo, -a ꞌye-e ꞌꞌkɔgwlɛtinɩɛ.
8Wlu ꞌɩn -zaꞌa -laa ꞌmʋ ꞌmo-o -ziadɩ. -Bho -ɩn -kɛ ɛ ꞌmʋ-ʋza a, ꞌɩn ꞌbɔ-ɔ ti -ɩn ꞌke ɛ -jiɛ ꞌꞌkpi titri. ꞌꞌLemnɩɩ, nyʋ-ʋ deꞌa -Lagɔ ꞌꞌgwli, ʋn-ʋ ꞌye-e ꞌwa ꞌꞌbhi ꞌꞌyriliꞌꞌdu -mʋ ꞌꞌkɔmʋ ꞌle ʋn ꞌke lɩzɩgɩ nʋ. Ɩ-bɩ wlu -a tɔꞌɔ nyʋ -nmɔꞌɔ-ɔ ꞌꞌyrili ꞌle ɩ-ɩ kpaꞌa nyʋ. 9ꞌBho ꞌɛ ꞌꞌkpi -lrɛɛ, -bho koo nyʋ -ka -nʋkpʋdɩ ꞌꞌyi-idepo nɩ, -aꞌa po ɩ wɔn ꞌꞌkpi -le! -Ɩn -ke ꞌwa jɛ -le! -Aꞌa -ke nyʋꞌa -jɛ -nɩ *ꞌZuifʋꞌa gbaꞌa dɩ ꞌꞌyi -le! ꞌYa lɩtu ꞌmo-o bhebhelɩ. 10Nyɔ -yɔ yaꞌa ꞌꞌyicɩcɛɛ ꞌle -Lagɔꞌɔ nyʋꞌa ꞌꞌklumʋ, po ɔ ꞌꞌda! -Bho ɔ -see ꞌbhɔ ɔ, po ɔ ꞌꞌda -lrɛɛ! -Bho ɔ -see -ɩnmʋ -lokuipo a, jrɔ ɔ ꞌꞌyrili! 11-Ɩn yiboꞌo-o ꞌɔ nyunyɔtu ꞌꞌmaaꞌa-a -Lagɔꞌɔ -jolʋzɛgɛ ꞌꞌyrili, ɔ-ɔ ꞌmo-o ꞌꞌnyinynidɩꞌa nʋyi. Ɔ -see ꞌybha ɔ ꞌke nyɔ -lokuipo ꞌle ɔ -kaa ꞌɔ ꞌꞌnyinynidɩ ꞌꞌyiyibo ꞌle ɔ -kaa ꞌle -Lagɔ gbo ꞌꞌbhiti; ꞌle ꞌɔ ꞌꞌnyinynidɩ-ɩ ꞌkpaꞌa ꞌꞌpiemʋ ꞌle dɩ-ɩ kpʋn ɔꞌo.
Wluyijrawlu
12ꞌƖn-ɩ ꞌtmʋʋꞌo -ɩnmʋ-ɛ -lrɛɛ, ꞌɩn na ꞌnɩ ɛ, Tisikɩ -ke Atemaasɩꞌa -lue ꞌɩn-ɩ ꞌye ꞌle -ɩn gbo -lbho mʋ. -Bho ɔ yi ꞌle -ɩn gbo a, po ꞌle ꞌkpɩ -ɩn ꞌke yi ꞌle -ɩn ꞌke ꞌle ꞌɩnmʋ Nikopoliigwlɔ ꞌmʋ -yɛ. -Vʋvɔꞌɔa ƆFa 3 12 ꞌLe ꞌwa ꞌbhlʋkpa ꞌꞌkpi, -bho -sɩn -ka ti-iyi a, nyɔꞌɔ -na ꞌle -blabla. 13Dɩꞌa nmazeyi Zenaasɩ -ke Apolɔsɩ ꞌyeꞌa -yi mʋ, kuku ꞌmʋti, -ɩn ꞌke ʋ -kpa! Lɛ ʋn ꞌbɔꞌɔ ti, ꞌꞌnyɩ ɛ ʋ ꞌle ʋn ꞌke ꞌwa -jolʋ bhlu ꞌle ʋn -kaa lɛ ꞌmʋ-bɔ. 14ꞌTmʋʋ ꞌlotʋꞌa ꞌꞌnynuu ꞌwee ꞌle a ꞌke ʋ -kpa! ꞌƐ ꞌꞌdu -ɩn -nɩ -lueꞌa ꞌmʋwlʋlɛ -le! Nyɔꞌɔ -nɩ ꞌbho -Lagɔꞌɔ -jeyi bhebhe. -Zɩgɩ-ɩ ꞌka -Lagɔꞌɔ nyʋ ꞌꞌlruli-nʋ-ɛ, ꞌɩnnɩ ꞌka-a!
15Nyʋ ꞌwee -ke ꞌɩn-ɩ naꞌa a, ʋn na ʋ-bʋ ꞌyeꞌe -ɩnmʋ! -A-bʋ ꞌyeꞌe -aꞌba ꞌlotʋꞌa ꞌꞌnynuu ꞌwee -ke -a -plɛꞌɛ -pɔlʋ -lue ꞌmʋ!
-Lagɔ -wʋnna amʋ ꞌꞌniti ꞌꞌfɩa ꞌwee!