ꞌꞌDukuyrilizadɩ

-Lebhɔɔnɔɔ ꞌliꞌa ꞌꞌDUKUYRILIZADƖ

Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.

ꞌLe ꞌꞌbɔgʋ -nɛɛ ꞌli, -lebhɔɔnɔɔ ꞌliꞌa lɩ Zezii Kliisɩ -tɔꞌɔ ꞌZaan ꞌꞌyi, ꞌɩnnɩ ɔ-ɔ zɩzaꞌa gbɔ. Zeziiꞌa -glɩgbɩ -mɛɛsɔn ɔ ꞌꞌsiꞌa ꞌnynɩ ꞌle ꞌɛ ꞌꞌyriꞌa -klɩgbɩ ꞌsɔn -ke tan ꞌꞌyi, ꞌya nyʋ ɔ poꞌo ꞌꞌbɔgʋ -nɛɛ -jeyi. -Nɔɔ -ke ti ɔ po ꞌɛ ʋ -jeyi, ꞌWlomɛɛꞌɛ ꞌbhlʋkpayowliklagba-a ꞌkla-a Zeziiꞌa nyʋ nyanɩ ꞌmʋ tenyɩ. ꞌƐ dɩ ꞌZaan po ɛ ꞌʋ -jeyi ꞌle ɔ ꞌke ʋ ꞌkpa ꞌꞌyi po ꞌle ʋn ꞌke ꞌkpa ꞌꞌyi ku. Ɔ ꞌka ꞌꞌbɔgʋ -nɛɛ ꞌcnɩ a, ɔ ꞌye-e yaku li, ɛ ꞌye wɔn kati. ꞌꞌYritiyeɛɛ -ke lɩ -lrɩɩ Zezii -tɔ ꞌnɔ ꞌꞌyi, ꞌɩnnɩ ɔ-ɔ zaꞌa ꞌmʋ. -Ka -Lagɔ -ke Zezii ꞌmnɔ luꞌa lɛꞌꞌo lɛ tʋ wɔn ꞌmʋ, ꞌɩnnɩ ɩbɩ ꞌmnɩ-ɩ tɔꞌɔ nyʋ. Ʋn ꞌkpa-a tʋꞌa ꞌꞌlru ꞌbho Sataan ꞌꞌkpi -ka -zɛgɛka. ꞌƖnnɛ ꞌbhleꞌe ꞌnynɩꞌa dɩ, -Lagɔꞌɔ nyʋ ɔ -kɔꞌɔ ɔ, ɔ -ke ʋn ꞌke ꞌꞌtrolitidede ꞌꞌkɔmʋ.

Lɛ -ke ꞌꞌlru ꞌꞌyi *ꞌZaan ꞌcnɩꞌa ꞌꞌbɔgʋ -nɛɛ

¹Lɩ -Lagɔ ꞌꞌzizeꞌa nyʋ ꞌꞌyrili, ꞌle *Zezii *Kliisɩ ꞌye ꞌɩ ꞌꞌduku ꞌꞌyrili-za, ɔ ꞌye ꞌɩ -Lagɔꞌɔ lbhʋnʋmʋ ꞌtmʋʋ, ꞌya dɩ ɛ-bɛ ꞌꞌbɔgʋ -nɛɛ -zaꞌa ꞌmʋ. Lɛ -Lagɔ ꞌꞌsiꞌa ꞌnynɩ -ɛ ꞌka -nʋ-ɛ ꞌwla, ʋn ꞌke ɩ yiboꞌa dɩ, ꞌɔ ꞌꞌbhuo-o ꞌlɔ ꞌɔ -kaa ꞌꞌyi. A -gblee, ꞌɛ ꞌꞌlru ꞌꞌyi Zezii Kliisɩ lbhoꞌo ɔ gboꞌa -dalbhoyi, ꞌle, ꞌɩnmɔ, ꞌɔ lbhʋnʋyi *ꞌZaan gbo, ɔ ꞌke ꞌɩnmʋ lɩ ꞌmnɩ -tɔ. ²Ɩ ziꞌa -kaa a, ꞌle, lɛꞌꞌo lɛ -Lagɔ gboꞌa -dalbhoyi -tɔꞌɔ ꞌɩnmʋ ꞌꞌyi, ꞌɩn ꞌye ɩ ꞌcnɩ ꞌle ꞌꞌbɔgʋ -nɛɛ ꞌli ꞌle nyʋ ꞌke ɩ yibo. ꞌƖn na: -Lagɔꞌɔ wlu moꞌo -ziaka ꞌle Zezii Kliisɩ ꞌye ɩ ꞌꞌkpiꞌwɔɔn.

³Wlu-u ꞌwlʋꞌa ꞌle -Lagɔꞌɔ wɔn ꞌmʋ, ꞌɩnmɔ ꞌɔ lbhʋnʋyi ꞌZaan ꞌcnɩꞌa, nyɔ-ɔ zrɛꞌɛ ꞌɛ ꞌꞌbɔgʋtu ꞌbho nyʋ ꞌweeꞌa ꞌꞌyigbeyi a, ɔ ꞌwa-a ti. Ɩ-bɩ wlu ꞌmnɩ, nyʋ-ʋ po ꞌɩ -lokui ꞌle -ʋ ꞌꞌdu ꞌɩ ꞌbho a, -Lagɔ-ɔ wʋnna ꞌnʋ-ʋ ꞌꞌniti, -ɛkedɩmaa, -nɔɔ -ke ti lɩ ꞌmnɩ ꞌka yi, ɛ ꞌꞌkɔɔꞌɔ-ɔ gbo.

*Zeziiꞌa -glɩgbɩ -mɛɛsɔn-ɔ -nɩꞌa Aziibhlʋkpa ꞌꞌkpi, *ꞌZaan ꞌpo -ɩ ꞌꞌbɔgʋ -jeyi.

⁴Ɛ-bɛ ꞌꞌbɔgʋ -nɛɛ, ꞌɩnmɔ *ꞌZaan ꞌcnɩ ɛꞌo. A-bʋ *Zeziiꞌa -glɩgbɩ -mɛɛsɔn-ɔ -nɩꞌa Aziibhlʋkpa ꞌꞌkpi, ꞌɩnmɔ ꞌyeꞌe amʋ.

ꞌꞌKɔgwlɛlagɔ -kɔꞌɔ lɩ ꞌwee, ɔ -wʋnna amʋ ꞌꞌniti, ꞌle ɔ ꞌke amʋ -pɔlʋꞌa bhlubhlua ꞌꞌnyɩ! ꞌƆ -zuzu ꞌsaaꞌa li kpɛ -mɛɛsɔn, ɔ nʋ amʋ -zɛgɛ ꞌꞌlruli, ꞌle a ꞌke -pɔlʋꞌa bhlubhlua ꞌye -lrɛɛ! ⁵Zezii *Kliisɩ ꞌma-a -ziadɩꞌa ꞌmʋzayi, ɔ nʋ amʋ -zɛgɛ ꞌꞌlruli, ꞌle ɔ ꞌke amʋ -pɔlʋꞌa bhlubhlua ꞌꞌnyɩ! A -gblee, tinɩɛzɛgɛ-ɛ seꞌa ꞌꞌtiinamʋ ꞌbhle, nyʋ -Lagɔ-ɔ ꞌꞌnyɩ ꞌɛ ꞌle ꞌmɛmʋꞌa ꞌꞌklumʋ, ꞌɩnnɔ ꞌmo-o ꞌwa nyamna, ꞌle ɔ -kɔꞌɔ ꞌbhlɩkpɩyowli.

Ɔ-bɔ Zezii ꞌmnɔ ɔ, ɔ -kmaꞌa-a -aꞌba dɩ. Ʋn ꞌlbhɔ -ɔꞌo, ꞌɔ nymɔ ꞌye tiꞌwla ꞌle ɔ ꞌye ꞌmɛ -aꞌba ꞌꞌnyinynidɩꞌa dɩ ꞌle ɔ ꞌye -amʋ zetie ꞌle ɩ ꞌmʋ, ⁶ꞌle ɔ ꞌye ꞌle -amʋ -za, nyʋ ɔ -kɔꞌɔ ɔ, ɔ ꞌye ꞌle -amʋ ꞌwa ꞌꞌklumʋ po, -a -ke ɔ ꞌke lɩ ꞌwee -kɔ, ꞌle -a ꞌye ꞌɔ -tɩta -Lagɔꞌɔ bʋbɔmʋ ꞌꞌdu. ꞌNynɩꞌa ꞌꞌyibhɛɛɛ -ke wɔnkuɛ ꞌꞌdu Zeziiꞌa lɩ ꞌꞌkɔmʋ! Dɩ -nɩɩ, *ꞌya lɛtu -nɩ -kaa ꞌmʋ ꞌꞌkɔmʋ!

⁷A -gblee, ꞌle yakuꞌa -druku ꞌmʋ, ꞌle-e Zezii-i ꞌye le -yi -nɩ mʋ. Nyɔꞌꞌo nyɔ-ɔ ꞌye -ɔ liꞌye -mʋ. Nyʋ-ʋ -see ꞌɔ ꞌwɔɔn, ʋn-ʋ ꞌye -ɔ liꞌye -mʋ -lrɛɛ. ꞌLe ꞌbhlɩkpɩ ꞌwee ꞌꞌkpi, nyʋ-ʋ -see ꞌɔ ꞌꞌgwlide, ʋn-ʋ ꞌye-e ꞌɔ dɩ ꞌꞌvi -mʋ. ꞌƖn-ɩ zɩ ꞌɩ amʋ -bodɩ ꞌmʋ, ꞌɛ lɛtu-u ꞌye-e -nʋ-ɛ -mʋ. Ɩ-bɩ dɩ -nɩɩ, *ɩ -nɩ -kaa ꞌmʋ ꞌꞌkɔmʋ!

⁸ꞌLe -aꞌba -Kɔyi -Lagɔ na: ꞌƖnmɔ ꞌmo-o ꞌꞌKɔgwlɛlagɔ -ɔ -kɔꞌɔ lɩ ꞌwee ꞌle ꞌan wɔnkuɛ ꞌbhɛꞌɛ ꞌꞌyi ɛ -ziꞌe lɛꞌꞌo lɛ. ꞌƖnmɔ -yaꞌa lɛꞌꞌo lɛ ti, ꞌɩnmɔ ꞌbhleꞌe ꞌɛ tisɔɛꞌɛ ꞌkpʋ kwa.

*ꞌZaan ꞌye-e *Zezii li, ꞌle ꞌꞌyritiyeɛɛ ꞌmʋ.

⁹ꞌƖnmɔ aꞌba ꞌlotʋꞌa ꞌꞌyu *ꞌZaan -ke a bheteꞌa gbo, ꞌle -a -ke *Zezii ꞌyeꞌa ꞌꞌyiꞌꞌsisri a, ꞌɩnmɔ ꞌmnɔ, ꞌɩnmɔ poꞌo amʋ ꞌꞌbɔgʋ -nɛɛ -jeyi. ꞌKa-a ɛ -nɩꞌe ꞌmʋꞌa dɩ, ꞌɩn -ke a -plɛꞌɛ ꞌkleyeɛɛ ꞌmʋ, ꞌle -a ꞌye ꞌꞌgwli-ku, -ɛkedɩmaa, -a-bʋ ɔ -kɔꞌɔ ꞌwee ꞌle ꞌɔ -kɔkɔɔ ꞌmnɛ -see ꞌꞌtiinamʋ ꞌbhle yi. A -gblee, ꞌꞌdɩzɩgɩ-ɩ ꞌwlʋꞌa ꞌle -Lagɔ gbo, ꞌɩn-ɩ zaꞌa ꞌmʋ, ꞌle ꞌɩn-ɩ nʋꞌa, -da Zezii -nɩꞌa ꞌnɔɔ ꞌkmʋ ꞌmʋ, ɔ -tɔ ꞌnɩ-ɩ nyʋ, ɩ-bɩ -ziadɩ ꞌmnɩ, ꞌya kamʋ ʋn kpʋnꞌo ꞌɩnmʋ, ꞌle ʋn ꞌye ꞌɩnmʋ likpe -lue ʋn-ʋ ꞌlaꞌa Patɩmɔsɩ ꞌli kpa. ¹⁰A -gblee, ꞌɩn -nɩ ꞌbho likpe ꞌmnɛ ꞌli, ꞌle *-Lagɔꞌɔ Lisaazuzuꞌa -jijri ꞌye ꞌɩnmʋ ꞌꞌkpi yi. Zɔ -ke ꞌli -a fɔ nɩꞌa li, ꞌle -a bʋbɔꞌɔ -aꞌba -Kɔyi Zezii, ꞌɩnnɛ moꞌo. ꞌƖn nʋꞌa -kaa, ꞌɩn ꞌwɔn-ɔ wlu -lue ꞌbɔ ꞌle ꞌan lemʋ. Ɛ -nɩꞌe-e vevlele -ka nyɔ-ɔ bhlaꞌa lɛglɛ, ¹¹ꞌle ɛ na ꞌɩnmʋ -bodɩ: ꞌꞌLuo ꞌꞌbɔgʋ ꞌmʋ, lɛ-ɛ -a ꞌyeꞌa li, ꞌcnɩ ɛ! Zeziiꞌa -glɩgbɩ-ɩ -nɩꞌa Efɛɛzɩ-e, Sɩminɩ-e, Pɛgamʋ-e, Tiatilɩ-e, Saadɩ-e, Filadɛlɩfii -ke Laodisee, ɩ -nɩ -mɛɛsɔn, po ɛ ʋ -jeyi!

¹²-Wluwlu -gwɛꞌɛ ꞌle ꞌan -loku ꞌmʋ ti a, ꞌle ꞌɩn ꞌye ꞌle popo, nyɔ-ɔ zaꞌa ꞌɩnmʋ dɩ -bodɩ ꞌmʋ, ꞌɩn ꞌke ɔ liꞌye. ꞌƖn nʋꞌa -kaa, ꞌɩn ꞌye-e ꞌꞌnapɩ -mɛɛsɔn li ꞌbho ꞌya ꞌꞌkpitidelɩ -mɛɛsɔn ꞌꞌkpi. Ɩ-bɩ ꞌꞌkpitidelɩ ꞌmnɩ, ɩ -nʋ-ɛꞌɛ-ɛ sanu ꞌmʋ. ¹³ꞌBho ɩ-bɩ ꞌꞌnapɩꞌa ꞌꞌkpitidelɩ ꞌmnɩꞌa gwia ꞌmʋ, nyɔ -lue -ke nyunyɔꞌɔ ꞌꞌyu gʋgɔꞌɔ, ꞌɩnnɔ ꞌɩn ꞌyeꞌe li. Ɔ -paꞌa-a -vilɔbana ꞌmʋ, ꞌle ɔ bhlaꞌa ꞌbho ꞌɛ ꞌꞌkpi sanuꞌa ꞌꞌbɛtʋ. ¹⁴ꞌƆ ꞌꞌlru -nɩꞌe-e ꞌꞌbuu! ꞌƆ ꞌꞌyri-i vlan-oꞌo -ka nɛ. ¹⁵-Bho nyɔ ꞌꞌdu nɛtɛ ꞌꞌyri, -ka ɛ-ɛ vlanꞌa tenyɩ, ꞌka-a ꞌɔ bhɩ -nɩꞌo. -Ka ꞌbho ꞌꞌdɩklagba ꞌmʋꞌa ꞌꞌniꞌa wlu kuꞌa ti, ꞌka-a ꞌɔ wlu ꞌbhɛɛꞌɛ ꞌꞌyi -lrɛɛ. ¹⁶ꞌLe ɔ ꞌbhleꞌe ꞌcʋdrɩ -mɛɛsɔn kwa ꞌle ꞌɔ -linasʋ ꞌmʋ, ꞌle, -blajrɛɛ-ɛ ꞌbhleꞌa ꞌꞌyri ꞌsɔn, ɛ-ɛ ꞌwlʋꞌo ꞌle ꞌɔ wɔn ꞌmʋ. -Bho ꞌyrʋ -nɩ ꞌꞌduu ꞌmʋ, -ka ꞌɛ -vlavlɩ kuꞌa wɔn, ꞌka-a ꞌɔ ꞌꞌyigba-a vlanꞌo -lrɛɛ.

¹⁷A -gblee, ꞌɩn ꞌye ꞌɔ li a, ꞌɩn ꞌga-a ti ꞌle ꞌɩn ꞌye ꞌgwlʋꞌkpa ꞌbho ꞌɔ wɔnyi. Ɔ nʋꞌa -kaa, ɔ ꞌde-e ꞌɩnmʋ -linasʋ ꞌꞌkpi ꞌle ɔ na: -Sɩanyɩꞌa ꞌlbha -ɩnmʋ -le! ꞌƖnmɔ ꞌꞌKɔgwlɛyi Zezii moꞌo. ꞌƖnmɔ -yaꞌa lɛꞌꞌo lɛ ti. ꞌƖnmɔ ꞌbhleꞌe ꞌɛ tisɔɛꞌɛ ꞌkpʋ kwa. ¹⁸ꞌƖnmɔ ꞌmo-o ꞌꞌKɔgwlɛyi. ꞌƖn ꞌmɛ ꞌko-oꞌo ꞌle -Lagɔ ꞌye ꞌɩnmʋ glu -za, ꞌɩn ꞌye ti-nɩ -lrɛɛ. Ɛ-bɛ ꞌan tinɩɛ ꞌmnɛ -see ꞌꞌtiinamʋ ꞌbhle yi. ꞌMɛmɛɛ -ke -da -yɔ, nyʋ-ʋ ꞌmɛꞌɛ, ʋn -nɩꞌa, ꞌɩn ꞌbhle-e wɔnkuɛ ꞌbho ꞌya ꞌꞌkpi. ¹⁹ꞌƐ dɩ, lɛꞌꞌo lɛ -ɩn -nɩꞌa liyenamʋ, ꞌcnɩ ɛ! Lɩ-ɩ -nɩꞌa ꞌtraamʋ zinamʋ -ke -yɩ ꞌyeꞌa -yi mʋ ꞌwla, ꞌcnɩ ɩ ꞌwee! ²⁰-Ɩn ꞌye li-ɔ, ꞌcʋdrɩ -mɛɛsɔn ꞌɩn ꞌbhleꞌa kwa ꞌle ꞌan -linasʋ ꞌmʋ -ke sanuꞌa ꞌꞌnapɩꞌa ꞌꞌkpitidelɩ -mɛɛsɔn, ꞌɩn-ɩ yi-oꞌo ꞌɩn ꞌke -ɩnmʋ ꞌya ꞌzɔ -tɔ: ꞌCʋdrɩ -mɛɛsɔn ꞌmo-o Zeziiꞌa -glɩgbɩ -mɛɛsɔnꞌɔ ꞌꞌlrutidemʋ. ꞌꞌNapɩꞌa ꞌꞌkpitidelɩ -mɛɛsɔn ꞌmo-o Zeziiꞌa -glɩgbɩ -mɛɛsɔn.

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Efɛɛzɩ, ɔ ꞌye ɛ ꞌꞌbɔgʋ -jeyi po.

¹Ɩ ziꞌa -kaa, ꞌle ɔ-bɔ nyɔ ꞌmnɔ na ꞌɩnmʋ -bodɩ -lrɛɛ: ꞌCnɩ ꞌꞌbɔgʋ -lue, ꞌan -glɩgbaꞌa ꞌꞌlrutideyi -nɩꞌa ꞌbho Efɛɛzɩ, -ɩn ꞌke ɔ ɛ -jeyi po! ꞌTmʋʋ nɔ na: ꞌƖnmɔ -yɔ ꞌbhleꞌa ꞌcʋdrɩ -mɛɛsɔn kwa ꞌle ꞌan -linasʋ ꞌmʋ, ꞌle ꞌꞌnapɩꞌa ꞌꞌkpitidelɩ -mɛɛsɔn-ɔ -nʋ-ɛꞌɛ sanu ꞌmʋ, ꞌɩnmɔ naꞌa ꞌle ꞌya ꞌnynɩmʋ, ²ꞌan wlu ꞌka-a ɔ -bodɩ: Lɛꞌꞌo lɛ a-bʋ ꞌɩnmɔ *Zeziiꞌa nyʋ-ʋ nʋꞌa a, ꞌɩn yibo nɛ-oꞌo. -Ka a-a ꞌmɛꞌɛ ꞌan lbhʋ wɔn ꞌmʋ, ꞌle a-a kuꞌa ꞌkpa ꞌꞌyi, ꞌɩn yibo nɩ-oꞌo -lrɛɛ. ꞌLe ꞌɩn deꞌe ꞌꞌgwli na aꞌba ꞌꞌtayi nyanɩbhlemʋ ꞌꞌyiti, ꞌwa -sie ꞌle aꞌba ꞌꞌklumʋ. Nyʋ -yʋ ꞌlaꞌa ꞌwa ꞌꞌbhi *ꞌan -dalbhomʋ, ꞌle ʋn -see ꞌʋ -ko a, a ꞌcrʋ -ʋ ꞌmʋti ꞌle a ꞌye ʋ ꞌꞌyrili-gwɛ. ³ꞌAn nyʋ a ꞌꞌduꞌa dɩ, a-a ꞌyeꞌe ꞌkle, ꞌle a ꞌye ꞌkpa ꞌꞌyi ku, ꞌle ꞌkpɩ -see amʋ ꞌꞌyiti-wa. ⁴Ɛ -nɩꞌa -kaa ꞌmʋ a, aꞌba lɛ -lue-e -nɩꞌe ꞌbho, ꞌɩnnɛꞌɛ nʋꞌo ꞌɩnmʋ ꞌtʋ: ꞌƐ lɛtu ꞌmo-o, -ka a -kmaꞌa ꞌan dɩ -bɛnyɩ, a se ꞌtraamʋ -kaa -nɩ. ⁵ꞌƐ dɩ, -da a yibo -nɩꞌa ꞌɩnmʋ -lreeka, -ka aꞌba kpli -nɩꞌa, a popo -kaa ꞌgwlʋti! -Ka a -yiꞌa gbɔ, a ꞌye -kaa li-ɔ! A yibo aꞌba ꞌꞌnyinynidɩ ꞌꞌyi ꞌle a ꞌke ꞌɩnmʋ gbo ꞌꞌbhiti! A ꞌꞌluo aꞌba -bɛnyɩkpli ꞌmʋ! -Bho ɛ -se -mnɛɛ, ꞌɩn-ɩ yi-oꞌo ꞌɩn ꞌke amʋ aꞌba ꞌꞌnapɛꞌɛ ꞌꞌkpitidelɛ kwa ꞌmʋ -za. ⁶ꞌBho ꞌɛ lemʋ, aꞌba lɛ -lue -gbɛ nʋꞌo ꞌɩnmʋ ꞌtʋ. ꞌƖnnɛ ꞌmo-o, *ꞌꞌNikolaaꞌa nyʋꞌa -tɔtɔlɩ, -ka ꞌɩn -see ꞌɩ ꞌybha, ꞌka-a a -nɩꞌo -lrɛɛ.

⁷A -gblee, dɩ *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, nyɔ -yɔ ꞌbɔꞌɔ ti ɔ ꞌke ɩ ꞌmʋtiꞌwɔn, ɔ -na nɩ -tɔɔ ti! Nyɔ -yɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, ꞌɩn-ɩ ꞌye -ɔ -jolʋ ꞌꞌnyɩ -mʋ, ꞌle tuꞌa ꞌꞌbhuo-o -nɩꞌa ꞌle -Lagɔꞌɔ ꞌbhozagwlɔ ꞌmʋ, -ɛ ꞌꞌnyɩꞌa nyɔ ꞌꞌkɔgwlɛtinɩɛzɛgɛ, ɔ ꞌke ɛ -za ꞌle ɔ ꞌke ɛ li.

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Sɩminɩ, ɔ ꞌye ɛ ꞌꞌbɔgʋ -jeyi po.

⁸Ɩ ziꞌa -kaa, ꞌle ɔ-bɔ nyɔ ꞌmnɔ na ꞌɩnmʋ -bodɩ: ꞌCnɩ ꞌꞌbɔgʋ -lue -lrɛɛ, ꞌan -glɩgbaꞌa ꞌꞌlrutideyi -nɩꞌa ꞌbho Sɩminɩ, -ɩn ꞌke ɔ ɛ -jeyi po! ꞌTmʋʋ nɔ na: ꞌƖnmɔ -yɔ ꞌma-a ꞌꞌKɔgwlɛyi, ꞌɩnmɔ -yaꞌa lɛꞌꞌo lɛ ti, ꞌɩnmɔ ꞌbhleꞌa ꞌɛ tisɔɛꞌɛ ꞌkpʋ kwa, ꞌɩnmɔ ꞌmɛꞌɛ ꞌle ꞌɩn ꞌyeꞌa glu -sɔ, ꞌɩn ꞌyeꞌa ti-nɩ -lrɛɛ, ꞌɩn na ɔ -bodɩ: ⁹ꞌƖn yiboꞌo-o -ka a-bʋ *Zeziiꞌa nyʋ-ʋ ꞌyeꞌa ꞌkle, ꞌle ꞌꞌpʋan-a ꞌlbhaꞌa amʋ. Ɛ -nɩꞌa -kaa ꞌmʋ a, -bho ꞌɩn -gbʋ amʋ ya, a -see lɛ ꞌmʋ-bɔ. Aꞌba ꞌꞌnyinynidɩ *ꞌZuifʋ-ʋ zaꞌa a, ꞌɩn yibo nɩ-oꞌo -lrɛɛ. Ʋ-bʋ ꞌZuifʋ ꞌꞌduꞌa amʋ dɩ ꞌꞌkpi, ʋn na ʋn-ʋ ꞌmo-o -Lagɔꞌɔ -glɩgbawɔnyiꞌa nyʋ. -Bho ꞌɩn -gbʋ nʋ ya, ʋn-ʋ ꞌmo-o ꞌꞌnyinynidɩꞌa tiyayi *Sataanꞌa -nʋ. ¹⁰A ꞌye li-ɔ, a-a ꞌmu-o ꞌkle ꞌye -mʋ. -Bho ɛ -nɩ -kaa ꞌmʋ a, -sɩanyɩꞌa ꞌlbha amʋ -le! A -gblee, ɛ-bɛ ꞌꞌnyinynidɩꞌa tiyayi ꞌmnɛ-ɛ ꞌye-e aꞌba -dadudu tiꞌdɩn -mʋ, ꞌle ɛ ꞌke ʋ -jie ꞌmʋ po. A-a ꞌye-e ꞌkle ꞌye -mʋ ꞌle ꞌwɩ -lrɩɩ ꞌli. -Bho nyɔꞌɔ ꞌꞌbhuo nʋ, ɔ ꞌke amʋ ꞌlbha a ꞌke ꞌmɛ ɛ, aꞌba depo ꞌɩnmʋ ꞌꞌyi -le! -Bho ɛ -nɩ -kaa ꞌmʋ a, ꞌꞌlemnɩɩ ꞌɩn-ɩ ꞌye-e amʋ ꞌꞌkɔgwlɛtinɩɛzɛgɛ ꞌꞌnyɩ -mʋ.

¹¹A -gblee, wlu *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, nyɔ -yɔ ꞌbɔꞌɔ ti ɔ ꞌke ɛ ꞌmʋtiꞌwɔn, ɔ -na nɩ -tɔɔ ti! Nyɔ -yɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, ꞌɔ nyɔtu -ke -Lagɔ-ɔ ꞌye-e ꞌꞌyiꞌꞌsisri -mʋ ꞌꞌkɔgwlɛka. ꞌꞌKɔgwlɛmɛmɛɛ -see ɔ -yɛ yi ꞌbho -Lagɔꞌɔ ꞌꞌyigbeyi.

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Pɛgamʋ, ɔ ꞌye ɛ ꞌꞌbɔgʋ -jeyi po.

¹²Ɩ ziꞌa -kaa, ꞌle ɔ-bɔ nyɔ ꞌmnɔ ꞌye ꞌbho wlu -lrɛɛ kɔ, ꞌle ɔ na: ꞌCnɩ ꞌꞌbɔgʋ -lrɛɛ, ꞌan -glɩgbaꞌa ꞌꞌlrutideyi -nɩꞌa ꞌbho Pɛgamʋ, -ɩn ꞌke ɛ ɔ -jeyi po! ꞌTmʋʋ nɔ na, ꞌɩnmɔ ꞌbhleꞌa -blajrɛɛ-ɛ ꞌbhleꞌa ꞌꞌyri ꞌsɔn, wlu-u ꞌwlʋꞌa ꞌle ꞌan wɔn ꞌmʋ, ꞌɩnnɛ ꞌka-a: ¹³A-bʋ ꞌma-a ꞌan nyʋ, -gwlɔ -ke ꞌmʋ a -deꞌa ti, ꞌɩn yibo nɛ-oꞌo. A -gblee, ɛ-bɛ gwlɔ ꞌmnɛ, ꞌꞌnyinynidɩꞌa tiyayi *Sataan -kɔ nɛꞌo. A ꞌye li-ɔ, ꞌan -ziadɩꞌa ꞌmʋzalbhʋnʋyi Atipasɩ, -ɔ -seeꞌa ꞌɩnmʋ ꞌꞌyidepo, Sataanꞌa nyʋ ꞌlbhɔ -ɔꞌo, ɔ ꞌye ꞌmɛ. Ɛ-bɛ -nɔɔ ꞌmnɛ ti a, a -see ꞌɩnmʋ ꞌꞌyitiꞌꞌtayi, a ꞌde-e ꞌɩnmʋ ꞌꞌgwli, ꞌle ꞌɩn -ke a ꞌye ꞌꞌyiꞌꞌsisri ꞌꞌkɔmʋ. A -gblee, -gwlɔ -ke ꞌmʋ a -ke Sataan ꞌmnɛ -nɩꞌa a, ꞌbho-o ʋn -za -nɩ ꞌnɔ ꞌle aꞌba ꞌꞌklumʋ, ʋn ꞌye ɔ ꞌlbha, ɔ ꞌye ꞌmɛ. Ɛ -nɩꞌa -kaa ꞌmʋ a, -ka ꞌɩn -kɔꞌɔ amʋ, a-a ꞌzɩ -ɩ nyʋ -bodɩ ꞌmʋ gbaa! ¹⁴ꞌBho ꞌɛ lemʋ, ꞌɩn ꞌbhle-e dɩtɔlʋ ꞌɩn ꞌke amʋ ꞌꞌyikpa. ꞌYa lɛtu ꞌmo-o, *Balaamʋ -nɩꞌa -bɛnyɩ, aꞌba tɔlʋ ꞌybha-a ꞌtraamʋ ꞌɔ -tɔtɔlɩ. -Ka *Balaakɩ ꞌka -nyna ꞌle ɔ ꞌka *Izrayɛɛlɩkɔmʋ ꞌꞌyrabha ꞌmʋ ꞌlbha, ꞌle, nmi nyʋ-ʋ zaꞌa *ꞌsraga ꞌmʋ kɔkuiꞌa dɩ, ʋn ꞌke ɩ li, ꞌle ʋn ꞌke ꞌꞌwɩlɩ -lrɛɛ, ꞌɩnnɛ ɔ -tɔ nɔꞌo. ¹⁵-Ka -lue ꞌmnɔ, ꞌka-a aꞌba ꞌꞌklumʋꞌa nyʋtɔlʋ -nɩꞌo. Ʋ-bee -mnʋʋ ꞌybha-a *ꞌꞌNikolaaꞌa -tɔtɔlɩ -lrɛɛ. ¹⁶ꞌKa-a ɛ -nɩꞌe ꞌmʋꞌa dɩ, a yibo aꞌba ꞌꞌnyinynidɩ ꞌꞌyi ꞌle a ꞌke ꞌɩnmʋ gbo ꞌꞌbhiti! -Bho ɛ -se -mnɛɛ, ꞌan -blajrɛɛ-ɛ ꞌbhleꞌa ꞌꞌyri ꞌsɔn, -ɛ ꞌwlʋꞌa ꞌle ꞌan wɔn ꞌmʋ, ꞌɩn-ɩ ꞌꞌluo ꞌnɛ ꞌmʋ-ɛ, ꞌɩn -ke ɛ-ɛ yi-oꞌo ꞌle -a ꞌke tʋ vɔ.

¹⁷A -gblee, dɩ *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, nyɔ -yɔ ꞌbɔꞌɔ ti ɔ ꞌke ɩ ꞌmʋtiꞌwɔn, ɔ -na nɩ -tɔɔ ti! Nyɔ-ɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, lililɛ -lue-e -nɩꞌa -Lagɔ gbo ꞌnɔɔ yaku ꞌli, ꞌɩn-ɩ ꞌꞌnyɩ -ɔ ɛꞌo. ꞌBho ꞌɛ lemʋ, ꞌle ꞌɩn ꞌke ɔ sʋkpʋplu -lue ꞌꞌnyɩ. Ɛ-bɛ sʋkpʋ ꞌmnɛꞌɛ ꞌꞌkpi, ꞌnynɩlre -lue ꞌke ꞌbho ꞌcnɩ-ɛ. Ɛ-bɛ ꞌnynɩ ꞌmnɛ, nyɔ -lue ꞌtɩn -see ɛ yibo yi, -bho ɛ -se nyɔ-ɔ ꞌye ꞌɛ ꞌye mʋ.

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Tiatilɩ, ɔ ꞌye ɛ ꞌꞌbɔgʋ -jeyi po.

¹⁸Ɩ ziꞌa -kaa, ꞌle ɔ-bɔ nyɔ ꞌmnɔ na ꞌɩnmʋ -bodɩ: ꞌCnɩ ꞌꞌbɔgʋ -lue -lrɛɛ, ꞌan -glɩgbaꞌa ꞌꞌlrutideyi -nɩꞌa ꞌbho Tiatilɩ, -ɩn ꞌke ɔ ɛ -jeyi po! ꞌTmʋʋ nɔ na, ꞌɩnmɔ -Lagɔꞌɔ ꞌꞌyu -ke ꞌꞌyri-i vlanꞌa -ka nɛ, ꞌle, -bho nyɔ ꞌꞌduꞌa nɛtɛ ꞌꞌyri, -ka ɛ-ɛ vlanꞌa tenyɩ, ꞌɩnmɔ -ke bhɩ-ɩ -nɩꞌa -kaa, -ka ꞌɩn ꞌlɛꞌɛ, ꞌka-a ꞌka-a: ¹⁹A-bʋ ꞌma-a ꞌan nyʋ, lɛꞌꞌo lɛ a-a nʋꞌa, ꞌɩn yibo nɛ-oꞌo. -Ka nyɔꞌɔ dɩkmɛɛ -nɩꞌa ꞌle aꞌba -pɔlʋ gbo -lue -lue, -ka a deꞌa ꞌɩnmʋ ꞌꞌgwli ꞌꞌkɔmʋ, -ka a kuꞌa ꞌkpa ꞌꞌyi, -ka a ꞌbhɛɛꞌɛ aꞌba -Lagɔlbhʋ wɔnyi, ꞌle, -ka a -seeꞌa gbɔ -yi, a-a mu nɩꞌa ꞌꞌlru, ꞌɩn yibo nɩꞌo -lrɛɛ. ²⁰Ɛ -nɩꞌa -kaa ꞌmʋ a, aꞌba lɛ -lue-e -nɩꞌe ꞌbho, ꞌɩnnɛꞌɛ nʋꞌo ꞌɩnmʋ ꞌtʋ: A -gblee, ꞌle aꞌba ꞌꞌklumʋ, Zezabɛlɩ -nɩꞌa ti -bɛnyɩ, ꞌwa kpliyitigʋgɔnynaakpʋ -lue-e -nɩꞌe ꞌle. ꞌƖnnʋ ꞌꞌmaaꞌa amʋ, -ʋ nʋꞌo -Lagɔwluꞌa ꞌmʋtizayi ʋn ꞌꞌduꞌo ꞌle a-a ꞌwɔɔn nɩꞌo. A-bʋ ꞌma-a ꞌan lbhʋnʋmʋ, sɩndɩ ʋn-ʋ tɔꞌɔ amʋ, a ꞌke ꞌꞌwɩlɩ, ꞌle, nmi nyʋ-ʋ zaꞌa *ꞌsraga ꞌmʋ kɔkuiꞌa dɩ, a ꞌke ɩ li. ²¹ꞌƐ kamʋ ꞌɩn ꞌꞌnyɩ ꞌʋ ꞌꞌyiflɔɛ, ʋn ꞌke ꞌwa ꞌꞌnyinynidɩ ꞌꞌyiyibo ꞌle ʋn ꞌke ꞌɩnmʋ gbo ꞌꞌbhiti. Ɛ -nɩꞌa -kaa ꞌmʋ a, ʋn -see ɛ ꞌwɔɔn, ꞌle ʋn ꞌybhaꞌo ʋn ꞌke ꞌꞌwɩlɩɛ ꞌꞌsrii. ²²ꞌƐ ꞌꞌlru ꞌꞌyi, ꞌɩn-ɩ ꞌye ʋ ꞌwɛ ꞌꞌkpi -ya mʋ, ꞌle, -ka ʋn -ke nyukpasi-i ꞌpɛ nɩꞌa ꞌbho ꞌwa ꞌꞌkpitipɛlɛ ꞌꞌkpi ti, ʋn ꞌke -kaa ꞌbho tiꞌpɛ. Ʋ-bʋ nyʋ -ke ʋn -plɛꞌɛ nʋnʋdɩ ꞌmʋ, -bho ʋn se ʋ ꞌꞌyriliꞌwlʋ, ꞌle ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ꞌɩnmʋ gbo ꞌꞌbhiti, ꞌɩn-ɩ ꞌye -ʋ ꞌkleyeɛɛ ꞌꞌkpi -ya -mʋ tenyɩ. ²³ꞌBho ꞌɛ lemʋ, nyʋ-ʋ ꞌwɔɔnꞌɔ ꞌwa -tɔtɔlɩ, ꞌɩn-ɩ ꞌye -ʋ ti-za -mʋ, ꞌle ꞌan -glɩgbawɔnyiꞌa nyʋ ꞌke ꞌꞌgwlide -ka ꞌɩn yiboꞌa nyɔꞌꞌo nyɔꞌɔ -pɔlʋ. A -gblee, -bho ꞌɩn ꞌke amʋ lɛ ꞌꞌlrulinʋ, aꞌba lbhʋ a nʋꞌa -lue -lue, ꞌɩnnɛ ꞌɩn-ɩ ꞌye ya-gbʋ mʋ!

²⁴A-bʋ ꞌan nyʋ -lrʋʋ-ʋ -nɩꞌa Tiatilɩ, a -see ʋ-bʋ ꞌnynaakpʋ ꞌmnʋ -lokuipo. Nyʋ-ʋ ꞌlaꞌa ꞌwa ꞌꞌbhi «lɩꞌa yibomʋ» ꞌle ɩ ꞌyeꞌa *Sataanꞌa nɩ ꞌꞌdu, ɩ-bɩ ꞌwa lɩ ꞌmnɩ, a se ɩ yibo. A-bee -mnʋʋ, ꞌɩn se lɛ ꞌbhle ꞌɩn ꞌke amʋ -bodɩ ꞌmʋ-za, ²⁵-bho ɛ -se lɛ -lue -nɛɛꞌɛ ꞌꞌsɛ: ꞌƖn na: -Bho ꞌɩn -ka ꞌnɔɔ ꞌkmʋ ꞌmʋ le-e yi a, a kpʋn ꞌan -tɔtɔlɩ ti ꞌꞌkɔmʋ! ²⁶A -gblee, nyɔ-ɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, ꞌɩn-ɩ ꞌnʋ -ɔ ꞌbhlɩkpɩ ꞌweeꞌa -yowli ꞌmʋ. ²⁷Wɔnkuɛ ꞌan -tɩta -Lagɔ ꞌꞌnyɩꞌa ꞌɩnmʋ, ꞌɛ lɛtu ꞌɩn-ɩ ꞌye ɔ ꞌꞌnyɩ mʋ -lrɛɛ. Ɔ-ɔ ꞌye-e wɔn-ku -mʋ tenyɩ, ꞌle, -ka nyɔ-ɔ waꞌa mɛꞌɛ -yakpe, ɔ ꞌke -kaa ꞌꞌnyinynikpliꞌa nʋmʋ ti-za. ²⁸ꞌLe, -bho zɔ -ka ꞌꞌyri tiꞌwla, ꞌɩnmɔ kɔɔꞌɔ ꞌɛ ꞌcʋdrɩɛ fanꞌa a, ꞌɩn -ke a ꞌke -na.

²⁹Dɩ *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, ꞌɩnnɩ ꞌka-a! Nyɔ -yɔ ꞌbɔꞌɔ ti ɔ ꞌke ɩ ꞌmʋtiꞌwɔn, ɔ -na nɩ -tɔɔ ti!

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Saadɩ, ɔ ꞌye ɛ ꞌꞌbɔgʋ -jeyi po.

¹Ɔ-bɔ nyɔ ꞌmnɔꞌɔ -glɩgba-a -nɩꞌa Tiatilɩ, ɔ gwɛꞌɛ ꞌɛ ꞌꞌkpidɩꞌa ꞌmʋzɛɛ ꞌꞌyi, ꞌle ɔ na ꞌɩnmʋ -bodɩ: ꞌCnɩ ꞌan ꞌꞌbɔgʋ -lue, ꞌan -glɩgbaꞌa ꞌꞌlrutideyi -nɩꞌa ꞌbho Saadɩ, -ɩn ꞌke ɔ ɛ -jeyi po! *-Lagɔꞌɔ -zuzu ꞌsaaꞌa li kpɛ -mɛɛsɔn, ꞌɩnmɔ ɔ -nɩꞌa ꞌmʋ, ꞌle -ɔ ꞌꞌsiꞌa ꞌbho, -ɔ ꞌbhleꞌa ꞌcʋdrɩ -mɛɛsɔn kwa, ꞌɩn na ɔ -bodɩ: A-bʋ ꞌma-a ꞌɩnmɔ *Zeziiꞌa nyʋ, lɛꞌꞌo lɛ a-a nʋꞌa, ꞌɩn yibo nɛ-oꞌo. A -gblee, -bho nyʋ -de ti, ʋn na a yaaꞌa-a ꞌmʋti. Ɛ -nɩꞌa -kaa ꞌmʋ a, -bho ꞌɩn -gbʋ amʋ ya, a-a ꞌmʋ-oꞌo ꞌbho -Lagɔꞌɔ ꞌꞌyigbeyi. ²A yaa ꞌmʋti, -bhladɩ a -seeꞌa plɩplɩplɩ -nɩ ke a, ꞌle a ꞌke ꞌkpɩ ꞌꞌyipopo! -Ɛkedɩmaa, aꞌba kpli ꞌɩn ꞌꞌduuꞌa ꞌꞌyriti, ɩ se ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi. ³A -gblee, a ꞌka -Lagɔꞌɔ -glɩgbawɔnyiꞌa nyʋ ꞌꞌdu, wlu ʋn -zaꞌa amʋ -bodɩ ꞌmʋ, -ka ʋn -zɛ ꞌɛ ꞌmʋ ꞌle a ꞌye ꞌɛ -lokuipo a, a popo -kaa ꞌgwlʋti! A yibo aꞌba ꞌꞌnyinynidɩ ꞌꞌyi ꞌle a ꞌke ꞌɩnmʋ gbo ꞌꞌbhiti, ꞌle a ꞌke ɩ-bɩ -tɔtɔlɩ ꞌmnɩ ꞌbho ꞌꞌdu. ꞌƐ dɩ, -bho a -see ꞌmʋtiyaa a, ꞌɩn-ɩ ꞌye-e amʋ ꞌzɔꞌdaa -mʋ -ka ꞌꞌyriyi. -Nɔɔ -ke ti ꞌɩn-ɩ ꞌyeꞌa -yi mʋ, a -see ɛ ꞌꞌgwlide yi. ⁴Ɛ -nɩꞌa -kaa ꞌmʋ a, -da a -deꞌa ꞌbho Saadɩ ti, nyʋtɔlʋ -nɩꞌe ꞌle aꞌba ꞌꞌklumʋ, ꞌɩnnʋ yiboꞌo ꞌan dɩ ꞌꞌyri. Ʋ-bʋ nyʋ ꞌmnʋ, -banɩpli ꞌɩn-ɩ ꞌye ʋ ꞌꞌnyɩ mʋ, ʋn ꞌke ꞌmʋ-pa, ꞌle ꞌɩn -ke ʋn ꞌke -na, -ɛkedɩmaa, ꞌɛ lɛtu ʋn -nmɔꞌɔ ꞌꞌyiti.

⁵A -gblee, nyɔ-ɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ ꞌle -ɔ kuꞌa ꞌkpa ꞌꞌyi ꞌꞌkɔmʋ, -banɩpli ꞌɩn-ɩ ꞌye ɔ ꞌꞌnyɩ mʋ ɔ ꞌke ꞌmʋ-pa, ꞌle, -Lagɔꞌɔ ꞌꞌbɔgʋ -lue -ke ꞌli, nyʋ-ʋ -nɩꞌa ti ꞌbho ꞌɔ ꞌꞌyigbeyi, ꞌwa ꞌnynɩ ꞌcnɩ-ɛꞌɛ ɛ, ꞌɩn -see ꞌle ɔbɔ-ɔꞌɔ ꞌnynɩ -za yi. ꞌBho ꞌan -tɩta -Lagɔ -ke ɔ gboꞌa -dalbhomʋꞌa ꞌꞌyigbeyi, -ka ɔ ꞌꞌduꞌa ꞌan nyɔ, ꞌbho-o ꞌɩn-ɩ ꞌye ɩ ꞌmʋ-za -nɩ mʋ gbaa.

⁶Dɩ -Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, nyɔ-ɔ ꞌbɔꞌɔ ti ɔ ꞌke ɩ ꞌmʋtiꞌwɔn, ɔ -na nɩ -tɔɔ ti!

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Filadɛlɩfii, ɔ ꞌye ɛ ꞌꞌbɔgʋ -jeyi po.

⁷A -gblee, ꞌɔ -glɩgba-a -nɩꞌa ꞌbho Saadɩ, ꞌɩn gwɛꞌɛ ꞌɛ ꞌꞌbɔgʋ ꞌꞌyi, ꞌle ɔ-bɔ nyɔ ꞌmnɔ na ꞌɩnmʋ -bodɩ: ꞌꞌLuo ꞌꞌbɔgʋ -lrɛɛ ꞌmʋ, ꞌan -glɩgbaꞌa ꞌꞌlrutideyi -nɩꞌa ꞌbho Filadɛlɩfii, -ɩn ꞌke ɛ ꞌcnɩ ꞌle -ɩn ꞌke ɛ ɔ -jeyi po. ꞌƖnmɔ -sɔꞌɔ -Lagɔ gbo, ꞌɩnmɔ ꞌma-a -ziadɩꞌa ꞌmʋzayi ꞌꞌkɔmʋ, ꞌɩnmɔ kuꞌa wɔn, Zelizalɛɛmʋlre, -ɛ ꞌwlʋꞌa ꞌle -Lagɔ gbo yaku ꞌli, ꞌɩnmɔ, -bho -ɔ katiꞌa nyɔ ꞌɛ -jolʋ wɔnyi, ꞌle nyʋ -Lagɔ-ɔ ꞌyeꞌa -kɔ mʋ ꞌle ꞌɛ ꞌlimʋ, ɔ ꞌke ꞌwa ꞌꞌklumʋ -nɩ, ꞌle nyɔ -lrɔɔ seꞌa ꞌbhɛɛ, ɔ ꞌke ꞌbho ka, ꞌɩnmɔ, -bho -ɔ -kaꞌa nyɔ ꞌɛ -jolʋ le, ꞌle ɔ -kaa ʋ-bʋ nyʋ ꞌmnʋꞌa ꞌꞌklumʋ -nɩ, ꞌle nyɔ -lrɔɔ seꞌa ꞌbhɛɛ, ɔ ꞌke ɔ wɔnyi kati, ꞌɩnmɔ nʋꞌo na: ⁸A-bʋ, ꞌɩnmɔ *Zeziiꞌa nyʋ, lɛꞌꞌo lɛ a-a nʋꞌa a, ꞌɩn yibo nɛ-oꞌo. -Ka a seꞌa ꞌmʋtikuku tenyɩ a, ꞌɩn yibo nɩ-oꞌo -lrɛɛ. Ɛ -nɩꞌa -kaa ꞌmʋ, a ꞌꞌduꞌo ꞌbho-o ꞌan wlu, ꞌle a -see ꞌɩnmʋ ꞌꞌyidepo. A -gblee, ꞌɛ dɩ ꞌle aꞌba nya a, -ka -Lagɔ ꞌka amʋ -kɔ ꞌꞌkɔgwlɛka, ꞌɩn -flɔꞌɔ-ɔ ꞌɛ -jolʋ wɔn. Nyɔ -lrɔɔ se ꞌbhɛɛ ɔ ꞌke ɛ -ka. ⁹*ꞌZuifʋ -yʋ ꞌma-a *Sataanꞌa nyʋ, lɛ ꞌɩn-ɩ ꞌye ꞌʋ ꞌꞌlruli-nʋ mʋ, a ꞌye ɛ li-ɔ, ʋn na, ʋn-ʋ ꞌmo-o -Lagɔꞌɔ -glɩgbawɔnyiꞌa nyʋ. -Bho ꞌɩn ꞌcrʋ ʋ ꞌmʋti, ʋn-ʋ ꞌmo-o ꞌꞌnyinynidɩꞌa tiyayi Sataanꞌa -nʋ. Ʋ-bʋ ꞌZuifʋ ꞌmnʋ, ꞌɩn ꞌye -ʋ -kpʋn -mʋ -glaka ꞌle ʋn ꞌke yi, ʋn ꞌke amʋ ꞌkolri wɔnyi glu po, ʋn ꞌke amʋ ꞌbho ꞌꞌdu, ꞌle, -ka ꞌɩn -kmaꞌa aꞌba dɩ, ʋn ꞌke -kaa yibo. ¹⁰ꞌBho aꞌba ꞌꞌbhiꞌa damʋ, -ka a ꞌka ꞌkpa ꞌꞌyi ku, ꞌɛ wlu ꞌɩn -zaꞌa amʋ -bodɩ ꞌmʋ, a ꞌꞌdu -ɛ ꞌbho. ꞌƐ ꞌꞌlru ꞌꞌyi ꞌɩn-ɩ ꞌye amʋ ꞌꞌyriliꞌꞌdu mʋ, ꞌle, ꞌkleyeɛɛklagba-a ꞌyeꞌa nyɔꞌꞌo nyɔ ꞌꞌkpi -yi mʋ ꞌnɔɔ ꞌkmʋ ꞌmʋ, ɛ ꞌke ɔ tiꞌdɩn ɛ -kaa amʋ ꞌꞌkpi bhla. ¹¹ꞌꞌYisrɛɛlɩ ꞌɩn -tɔꞌɔ amʋ a -deꞌa ꞌliti, a kpʋn ɩ ti -gli, ꞌle, lɩ ꞌɩn-ɩ ꞌyeꞌa nyɔꞌꞌo nyɔ ꞌsɛɛ -po -nɩ mʋ, nyʋ -lrʋʋꞌa ꞌꞌsɛ -kɩɩ ɩ ꞌye! ꞌƖn-ɩ ꞌye-e le -yi -mʋ -susueyiꞌꞌa!

¹²Nyɔ-ɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, ꞌꞌtibhe -ɛ -nʋ-ɛꞌɛ sʋkpʋ ꞌmʋ, -ka ꞌɛ -lue -nynaꞌa ꞌle ꞌan -tɩta *-Lagɔꞌɔ bʋbɔbhlegboꞌa lisaabudu ꞌli ti, ꞌka-a ꞌɩn-ɩ wɔ ꞌɔ ꞌꞌyiti ꞌle ɔ ꞌke ꞌꞌgwlide na -Lagɔ ꞌmnɔ -ke ɔ-ɔ ꞌye-e ꞌꞌyiꞌꞌsisri -mʋ ꞌꞌkɔgwlɛka. Ɔ-bɔ -Lagɔ ꞌmnɔꞌɔ ꞌnynɩ -ke ꞌɔ gwlɔꞌɔ ꞌnynɩ ꞌɩn-ɩ ꞌye ɔ ꞌꞌduu mʋ. Ɛ-bɛ gwlɔ ꞌmnɛ, ꞌɩnnɛ ꞌmo-o Zelizalɛɛmʋlre -ɛ ꞌwlʋꞌa ꞌle -Lagɔ gbo yaku ꞌli. ꞌƖn-ɩ ꞌye -ɔ ꞌan ꞌnynɩlre ꞌꞌduu -mʋ -lrɛɛ.

¹³Dɩ *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, ꞌɩnnɩ ꞌka-a! Nyɔ-ɔ ꞌbɔꞌɔ ti, ɔ ꞌke ɩ ꞌmʋtiꞌwɔn, ɔ -na nɩ -tɔɔ ti!

*Zezii -zi -nɩꞌe-e *ꞌZaan ꞌmʋ, ꞌle, ꞌɔ -glɩgba-a -nɩꞌa Laodisee, ɔ ꞌye ɛ ꞌꞌbɔgʋ -jeyi po.

¹⁴Ɔ-bɔ nyɔ ꞌmnɔꞌɔ nyʋ-ʋ -nɩꞌa Filadɛlɩfii, ꞌɩn gwɛꞌɛ ꞌwa ꞌꞌbɔgʋ ꞌꞌyi a, ꞌle ɔ na ꞌɩnmʋ -bodɩ: ꞌꞌLuo ꞌꞌbɔgʋ -lue -lrɛɛ ꞌmʋ, ꞌan -glɩgbaꞌa ꞌꞌlrutideyi -nɩꞌa ꞌbho Laodisee, -ɩn ꞌke ɛ ɔ -jeyi po! ꞌƖnmɔ -Lagɔ lbhoꞌa ꞌnɔɔ ꞌkmʋ ꞌmʋ ꞌɩn ꞌke ꞌɔ lbhʋ ꞌꞌyi-nynia, ꞌɩnmɔ ꞌma-a -ziadɩꞌa ꞌmʋzayi, ꞌɩnmɔ seꞌa sɩn wɔn ꞌmʋ ꞌbhle, lɛꞌꞌo lɛ -Lagɔ -yaꞌa ti, ꞌɩnmɔ ꞌye ꞌɛ da, ꞌɩnmɔ nʋꞌo, na: ¹⁵Lɛꞌꞌo lɛ a-a nʋꞌa a, ꞌɩn yibo nɛ-oꞌo. -Ka ꞌꞌnipɩpɛ -ke ꞌꞌnismuanu ꞌꞌduꞌa lɛzɛgɛ, a-bʋ ꞌma-a ꞌɩnmɔ *Zeziiꞌa nyʋ ꞌbho Laodisee, ꞌɩn yiboꞌo-o na, a se -kaa -nɩ. -Ka a -nɩꞌa ꞌbho ꞌya ꞌnynɩmʋ, ꞌɛ nʋ ꞌɩnmʋ ꞌtʋ. ¹⁶ꞌꞌNi-i -nɩꞌa -bhogee, ꞌɛ -ka a -nɩꞌa dɩ, -bho nyɔ ꞌnɛ ɛ, -ka ɔ-ɔ zɛ ꞌɛ wɔn, ꞌka-a ꞌɩn-ɩ ꞌye amʋ -nʋ mʋ. ¹⁷A -gblee, -bho a -de ti, a-a ꞌnʋ-o: -A ꞌbhle-e mɔniꞌa -dadudu, -a ꞌga-oꞌo, -a -see lɛ -lue ꞌtɩn ꞌmʋ-bɔ. A-a ꞌlɛꞌɛ -kaa ꞌle, -ka aꞌba dɩ ꞌbhleꞌa ngaze ꞌmʋ tenyɩ, a se ɩ yibo? -Bho ꞌɩn -gbʋ amʋ ya, a-a ꞌmo-o ꞌꞌpʋanlbhamʋ, a -cɛꞌɛ-ɛ -patɩ ꞌle a ꞌꞌlɔꞌo. ¹⁸ꞌƐ ꞌꞌlru ꞌꞌyi ꞌɩn-ɩ ꞌꞌduꞌo amʋ ꞌꞌdɩ ꞌmʋ ꞌle ꞌꞌyi ꞌmʋ, ꞌle a ꞌke yi, sanu ꞌɩn leleꞌa a, a ꞌke ɛ de, ꞌle a ꞌke ꞌꞌwlilɛbhlemʋ ꞌꞌdu. A yi, a ꞌke -banɩpli de, ꞌle, aꞌba -patɩ-ɩ ꞌbhleꞌa dɩn ꞌmʋ, a ꞌke ɛ ꞌꞌyiꞌꞌzize, ꞌle a ꞌke aꞌba ꞌꞌyriꞌa kɔku -lue de -lrɛɛ, ꞌle a ꞌke tiꞌye wesaa! ¹⁹A -gblee, nyʋ -ke dɩ ꞌɩn -kmaꞌa a, ꞌɩnnʋ ꞌɩn-ɩ ꞌꞌduꞌo ꞌꞌlru ꞌꞌyi. ꞌƐ dɩ, a yibo aꞌba ꞌꞌnyinynidɩ ꞌꞌyi, a ꞌke ꞌɩnmʋ gbo ꞌꞌbhiti, ꞌle a ꞌke ꞌtɔ ꞌmʋtiyaa! ²⁰A ꞌye li-ɔ, ꞌꞌyi -lue -lrɛɛ ꞌɩn-ɩ poꞌo amʋ: ꞌBho nyɔꞌꞌo nyɔꞌɔ -buduwɔn ꞌꞌyi ꞌɩn-ɩ nynaꞌa ti ꞌle ꞌɩn-ɩ ꞌlɔ ɔꞌo. -Bho ɔ ꞌwɔn ꞌan wlu ꞌbɔ, ꞌle ɔ ꞌke ꞌbho kati, ꞌɩn-ɩ ꞌpa-a ꞌle ɔ gbo ꞌle ꞌɩn -ke ɔ-ɔ sisriꞌe sʋ gbo.

²¹-Ka ꞌɩn kuꞌa ꞌkpa ꞌꞌyi ꞌꞌkɔmʋ, ꞌle ꞌɩn ꞌyeꞌa ꞌan -tɩta -Lagɔꞌɔ ꞌgwlʋdɩ nʋ, ꞌle ꞌɩn -ke ɔ -kɔꞌɔ lɩ ꞌwee, nyɔ -yɔ ꞌwɔnꞌɔ ꞌan wlu ꞌbɔ, -ɔ nʋꞌa ꞌan ꞌgwlʋdɩ, ꞌle -ɔ kuꞌa ꞌkpa ꞌꞌyi ꞌꞌkɔmʋ, ꞌɩn-ɩ ꞌꞌnyɩ -ɔ ꞌꞌyiflɔɛ, ꞌle ꞌɩn -ke ɔbɔ ꞌke lɩ ꞌwee -kɔ -lrɛɛ.

²²Dɩ *-Lagɔꞌɔ Lisaazuzu -zaꞌa ꞌan -glɩgbɩwɔnyiꞌa nyʋ -bodɩ ꞌmʋ, ꞌɩnnɩ ꞌka-a! Nyɔ-ɔ ꞌbɔꞌɔ ti, ɔ ꞌke ɩ ꞌmʋtiꞌwɔn, ɔ -na nɩ -tɔɔ ti!

-Lagɔꞌɔ bʋbɔɛ ꞌle yaku ꞌli

¹A -gblee, ꞌɩn gwɛꞌɛ ɩ-bɩ ꞌꞌbɔgʋɩ ꞌmnɩꞌa ꞌcnɩcnɩa ꞌꞌyi, ꞌle ꞌɩn ꞌye yayi popo -lrɛɛ. ꞌƖn nʋꞌa -kaa, ꞌɩn ꞌye-e yaku li, ɛ ꞌye wɔn kati, ꞌle nyɔ -ke wlu kɔɔꞌɔ lɛglɛ, -ɔ ꞌtmʋʋ ꞌka ꞌɩnmʋ, ꞌɩn ꞌye ꞌɔ wlu -lrɛɛ ꞌbʋꞌwɔn, ꞌle ɔ na ꞌɩnmʋ -bodɩ: Yi ꞌɩnmʋ gbo ꞌnɔɔ yaku ꞌli, ꞌle, lɩ -Lagɔ ꞌꞌsiꞌa ꞌnynɩ -ɩ ꞌka -nʋ-ɛ ꞌwla, ꞌɩn ꞌke ɩ -ɩnmʋ ꞌꞌyi-tɔ!

²ꞌBho -gbaa -lue ꞌmnɛ ꞌmʋ, *-Lagɔꞌɔ Lisaazuzuꞌa -jijri ꞌyi-e ꞌɩnmʋ ꞌꞌkpi -lrɛɛ. ꞌBho-o ꞌɩn ꞌye -nɩꞌe ꞌnynɩbhlekpe -lue li, ꞌle nyɔ -lue -deꞌe ꞌbho ꞌɛ ꞌꞌkpi ti. ³ꞌꞌYrilinmɔsɩkpɩ ꞌsɔn-ɔ ꞌbhleꞌa ꞌpɛlʋ ʋn-ʋ ꞌlaꞌa *zasɩpʋ -ke *sadʋanɩ, -ka ɩ-ɩ vlanꞌa, ꞌka-a ꞌɔ ꞌꞌyigba -nɩꞌo, ꞌle ꞌꞌniꞌa -bhlii biꞌe ꞌɔ ꞌnynɩbhlekpe ꞌmnɛ. ꞌꞌyrilinmɔsʋkpʋ -lue -lrɛɛ-ɛ ꞌbhleꞌa ꞌpɛlʋ, ʋn-ʋ ꞌlaꞌa *emelodɩ, -ka ɛ-ɛ nʋꞌa ꞌꞌwleewle, ꞌka-a ɛ-bɛ ꞌꞌniꞌa -bhlii ꞌmnɛ -nɩꞌo.

⁴A -gblee, ꞌnynɩbhlekpiꞌa -gwlʋ -lue ꞌyɔ nyiɛ -lrɩɩ, ꞌɩnnɩ biꞌe ɛ-bɛ ꞌnynɩbhlekpe ꞌmnɛ. Nyʋklɩgbɩꞌa -gwlʋ -lue nyʋ nyiɛ, ꞌɩnnʋ -de ꞌnɩ ꞌꞌkpi. ꞌWa -banɩ ʋn -paꞌa ꞌmʋ, ɩ ꞌꞌplu-oꞌo ꞌꞌbuu, ꞌle ʋn deꞌe sanuꞌa -kwloo ꞌꞌlru. ⁵Ɛ-bɛ ꞌnynɩbhlekpe ꞌmnɛ, -da ɛ -nɩꞌa, nɛꞌɛ ꞌꞌdradrɩ-ɩ ꞌwlʋꞌo ꞌbho, ꞌle ꞌꞌni-i ꞌꞌgbuꞌo ꞌbho, ꞌle, -dayruꞌa -pupo -mɛɛsɔn-ɔ ꞌma-a -Lagɔꞌɔ -zuzu ꞌsaaꞌa li kpɛ -mɛɛsɔn, ꞌɛ ꞌmʋyibolɩ, ɩ-ɩ wanꞌa ꞌbho ɛ-bɛ kpe ꞌmnɛꞌɛ wɔnyi. ⁶A ꞌye li-ɔ, ꞌbho ɛ-bɛ kpe ꞌmnɛꞌɛ wɔnyi -lrɛɛ, lɛ-ɛ kɔɔꞌɔ ꞌꞌniklagba, ꞌɩnnɛ -nɩꞌe ꞌbho. Ɛ -nɩꞌe-e ꞌꞌwlelaa -ka ꞌꞌyena.

Ɛ-bɛ kpe ꞌmnɛ -lrɛɛ, lɩ nyiɛ-ɛ bi ɛꞌo. Ɩ -nɩꞌe-e ti ꞌle ꞌꞌyri -tro nɩꞌo -nyakaa ꞌle nya -ke lemʋ. ⁷ꞌYa -antanyɩnɛ -ke -blakpa gʋgɔꞌo. ꞌYa ꞌsɔnnɛ kɔɔꞌɔ-ɔ -bhliigbuda, ꞌya tannɛ ꞌbhle-e ꞌꞌyigba -ka nyunyɔ; -bho jisi -ka ꞌle yayi zi nɩ, -ka ɛ -nɩꞌa, ꞌka-a ꞌya nyiɛnɛ -nɩꞌo. ⁸-Kpakpɩ -mɛɛlo ɩ-bɩ lɩ ꞌmnɩ ꞌbhleꞌo -lue -lue, ꞌle ɩ -troꞌo ꞌꞌyri; tɔlɩ -nɩ ꞌbho ꞌya ku ꞌmʋ, ꞌle -lrɩɩ -nɩꞌe ꞌle ꞌya ꞌlimʋ. -Nɔɔꞌꞌo -nɔɔ ti, ꞌya wɔn -nɩꞌe-e ꞌꞌtonamʋ ꞌle ɩ-ɩ nʋꞌo:

-Aꞌba -Kɔyi -Lagɔ ꞌsaaꞌa-a li kpɛ -mɛɛsɔn, ɔ ꞌku-o wɔn ɔ ꞌye lɩ ꞌwee -zi ꞌle ɔ -nɩꞌe ti ꞌꞌkɔgwlɛka.

^9-10Ɔ-bɔ nyɔ-ɔ -deꞌa ꞌbho ɛ-bɛ ꞌnynɩbhlekpe ꞌꞌkpi ti, -ɔ -ke tinɩɛ-ɛ seꞌa ꞌꞌtiinamʋ ꞌbhle, -bho ɩ-bɩ lɩ nyiɛꞌɛ wɔn -ka ꞌꞌto ɩ ꞌke ꞌɔ ꞌnynɩ ꞌꞌyiꞌbhɛɛ, ꞌle ɩ ꞌke ɔ ꞌsɛɛ po a, ʋ-bʋ nyʋklɩgbɩꞌa -gwlʋ -lue nyʋ nyiɛ ꞌmnʋ-ʋ ꞌza-a ꞌwa ꞌnynɩbhlekwloo ꞌꞌlru, ʋn-ʋ de ꞌɩ ꞌbho ꞌɔ wɔnyi ti ꞌle ʋn-ʋ po ꞌɔ ꞌkolri wɔnyi glu ꞌle ʋn-ʋ bʋbɔ nɔꞌo, ʋn-ʋ nʋꞌo:

¹¹-Aꞌba -Kɔyi -Lagɔ, -ka -ɩn kuꞌa wɔn ꞌle -aꞌa ꞌnynɩ ꞌbhɛꞌɛ ꞌꞌyi, -ɩn -nmɔ ꞌnɩ-ɩ ꞌꞌyiti, -ɛkedɩmaa, -ɩnmɔ -yaꞌa lɛꞌꞌo lɛ ti, ꞌle -aꞌa ꞌgwlʋdɩ ꞌmʋ, ɩ ꞌye ti-nɩ.

*Zezii kɔɔꞌɔ-ɔ *ꞌbhlabhlɛgbuda nyʋ-ʋ zaꞌa *ꞌsraga ꞌmʋ.

¹A -gblee, ꞌɩn nʋꞌa -kaa -lrɛɛ ɛ, ɔ-bɔ nyɔ-ɔ -deꞌa ꞌbho ꞌnynɩbhlekpe ꞌmnɛ ꞌꞌkpi ti, ꞌɩn ꞌye -ɔ li. Ɔ ꞌbhle-e ꞌꞌbɔgʋ -lue kwa ꞌle ꞌɔ -linasʋ ꞌmʋ. Ɛ-bɛ ꞌꞌbɔgʋ ꞌmnɛ, ꞌɛ ꞌfɔtɩ ꞌsɔn gbo-o ꞌcnɩ-ɛꞌo, ꞌle ʋn ꞌye ɛ ꞌfɩan. Nyɔ -kɛɛ ɛ ꞌꞌyikatiꞌa dɩ, lɩ -mɛɛsɔn, ꞌɩnnɩ ʋn -ka -nɩ ꞌnɛ wɔnyi. ²ꞌƖn nʋꞌa -kaa -lrɛɛ, -Lagɔ gboꞌa wɔnkudalbhoyi -lue, ꞌɩn ꞌye -ɔ li, ꞌle ɔ-ɔ poꞌo weze, ɔ-ɔ nʋꞌo: Nyɔ yɔɔ kuꞌo wɔn, -ɔ ꞌbhɛɛꞌo ɔ ꞌke ꞌꞌbɔgʋ -nɛɛꞌɛ wɔnyikalɩ ꞌbho -za ꞌle ɔ ꞌke ɛ ꞌꞌyikatiꞌa?

³Ɔ ꞌlɛꞌɛ -kaa, ꞌle yaku ꞌli-e, ꞌnɔɔ ꞌbhlʋkpa ꞌꞌkpi -ke ꞌnɔɔ ꞌmɛmʋ -nɩꞌa glu, nyɔ -lue ꞌtɩn, -ɔ ꞌka ꞌbhɛɛ ɔ ꞌke ꞌꞌbɔgʋ ꞌmnɛ ꞌꞌyikati ꞌle ɔ ꞌke ɛ ꞌli zrɛ, ꞌɔ nyɔtu se -nɩ. ⁴Nyɔ-ɔ ꞌkɛ ɛ ꞌꞌyikati ꞌle ɔ ꞌke ɛ ꞌli zrɛ, ɔ -see ꞌɔ ꞌyeꞌa ꞌꞌlru ꞌꞌyi ꞌle ꞌɩn ꞌye ꞌꞌvi. ⁵ꞌLe nyʋklɩgbɩ-ɩ -nɩꞌa ꞌbhoꞌa -lue na ꞌɩnmʋ -bodɩ: ꞌBhɔ ꞌꞌvidɩ! -Gblee, *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ -blakpa, -ɔ ꞌma-a *Zidaaꞌa -gluuwɔnyiꞌa ꞌꞌyu, ꞌbhlʋkpayowli *Daviidɩꞌa ꞌꞌnayu, ɔ ꞌlu-o ꞌꞌnyinynidɩꞌa tiyayi tʋ wɔn ꞌmʋ. Ɔ ꞌbhɛɛꞌo ɔ ꞌke ꞌꞌbɔgʋ ꞌmnɛꞌɛ wɔnyikalɩ -mɛɛsɔn ꞌbho -za ꞌle ɔ ꞌke ɛ ꞌꞌyikati.

⁶Ɔ poꞌa wlu ꞌmnɛ ti a, ꞌɩn nʋꞌa -kaa -lrɛɛ, nyɔ -lue-e kɔɔꞌɔ *ꞌsragamʋzabhlabhlɛgbuda, ꞌɩn ꞌye -ɔ li ꞌbho ꞌnynɩbhlekpe ꞌꞌkpi. Ɔ ꞌbhle-e ꞌgbɩn -mɛɛsɔn -ke ꞌꞌyri -mɛɛsɔna ƆFa5 6 ꞌGbɩn -mɛɛsɔn -ke ꞌꞌyri -mɛɛsɔnꞌɔ ꞌzɔ-ɔ ꞌmo-o, ɔ ꞌku-o wɔn ɔ ꞌye lɩ ꞌwee -zi, ꞌle ɔ yiboꞌo lɩ ꞌwee.klɩgbɩꞌa -gwlʋ -lue nyʋ nyiɛ-ɛ bi ɔꞌo. A -gblee, ꞌbhlabhlɛgbuda nyʋ ꞌlbhaꞌa, ʋn ꞌyeꞌa ꞌsraga -za, -ka ɛ ꞌbhleꞌa -jrɛɛꞌɛ ꞌbɩ li, ꞌmɛmɛɛ ɔ ꞌmɛ ꞌka, ꞌka-a ɔ ꞌbhleꞌe ꞌɛ fanɩ li. A -gblee, ɩ-bɩ ꞌꞌyri -mɛɛsɔn ꞌmnɩ, *-Lagɔꞌɔ -zuzu ꞌsaaꞌa li kpɛ -mɛɛsɔn ɔ -yaꞌa ꞌnɔɔ ꞌbhlɩkpɩ ꞌwee ꞌꞌkpi, ꞌɔ ꞌmʋyibolɛ moꞌo. ⁷A ꞌye li-ɔ, *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛgbuda, ɔ nʋꞌa -kaa, nyɔ-ɔ -deꞌa ꞌbho ꞌnynɩbhlekpe ꞌꞌkpi ti, ɔ ꞌmu -ɔ ꞌꞌyi, ꞌle ꞌꞌbɔgʋ ɔ ꞌbhleꞌa ꞌle ꞌɔ -linasʋ ꞌmʋ, ɔ ꞌye ɛ kpʋn. ⁸A -gblee, ɔ nʋꞌa -di, ɔ kpʋn ꞌɛ ɛ, ɩ-bɩ lɩ nyiɛ -ke nyʋꞌa -gwlʋ -lue nyʋ nyiɛ ꞌmnʋ nʋꞌa -kaa, ʋn ꞌpo-o ꞌkolri glu ꞌbho ꞌɔ wɔnyi. ꞌWa nyɔꞌꞌo nyɔ ꞌbhle-e -dɔdɔ -ke sanuꞌa ꞌꞌkɔpʋ -kwa. Lɛ -lue -ke ꞌꞌwle gʋgɔꞌɔ nyɔ-ɔ poꞌa ꞌꞌyri ʋn ꞌke -Lagɔ bʋbɔ ɔ, ʋn-ʋ ꞌlaꞌa *lasaasɩ, ꞌɩnnɛ ꞌꞌyiꞌe ɩ-bɩ ꞌꞌkɔpɩ ꞌmnɩ: *-Lagɔꞌɔ nyʋꞌa wɔngbopowluꞌa ꞌmʋyibolɛ moꞌo. ⁹Ʋn nʋꞌa -kaa, ʋn ꞌꞌdu-o ꞌbho ꞌlʋlre -lue ꞌle ʋn-ʋ bhleꞌo, ʋn-ʋ nʋꞌo:

-Ɩnmɔ ꞌbhɛɛꞌo -ɩn ꞌke ꞌꞌbɔgʋ -nɛɛ kpʋn ꞌle -ɩn ꞌke ɛ ꞌꞌyikati. -Ɛkedɩmaa, ꞌcɛꞌꞌo ꞌcɛꞌɛ nyʋ, wluꞌꞌo wluꞌa nyʋ, ꞌbhlʋkpaꞌꞌo ꞌbhlʋkpa ꞌꞌkpiꞌa nyʋ, ꞌꞌnyinynidɩ kpʋnꞌa ꞌgeyiɛ ꞌmʋ ꞌbho -Lagɔꞌɔ ꞌꞌyigbeyi, ꞌwa dɩ -ɩn ꞌmɛꞌo, ꞌle, -yʋ ꞌwɔɔnꞌɔ -ɩnmʋ, -ɩn ꞌye ʋ zetie ꞌle ɩ ꞌmʋ, ꞌle ʋn ꞌke -aꞌba -Kɔyi -Lagɔꞌɔ nyʋ ꞌꞌdu, ¹⁰ꞌle -ɩn ꞌye ʋ ꞌmʋꞌꞌluo, nyʋ ɔ -kɔꞌɔ, -ɩn ꞌye ʋ ꞌle ꞌwa ꞌꞌklumʋ po, ɔ -ke ʋn ꞌke lɩ ꞌwee -kɔ, ꞌle -ɩn ꞌke ʋ ꞌɔ bʋbɔmʋ ꞌmʋ nʋ, ꞌle ʋn ꞌke ꞌkmʋ -kɔ.

¹¹ꞌƖn nʋꞌa -kaa -lrɛɛ, ꞌɩn ꞌye-e -Lagɔ gboꞌa -dalbhomʋꞌa -gbogboyoko li. Lɩ nyiɛ ꞌmnɩ -ke nyʋklɩgbɩꞌa -gwlʋ -lue nyʋ nyiɛ-ɛ biꞌa ꞌnynɩbhlekpe ꞌmnɛ, ʋn ꞌpo -ɩ ꞌꞌgbele ꞌli, ¹²ꞌle ʋn-ʋ poꞌo wlu yayi, ʋn-ʋ nʋꞌo:

-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛgbuda nyʋ ꞌlbhaꞌa, ꞌɩnnɔ ꞌbhleꞌe wɔnkuɛ-e, -Lagɔꞌɔ -bonyaa ꞌwee-e, -naagɩ-e, ꞌmʋtikukuɛ -ke ꞌnynɩꞌa ꞌꞌyibhɛɛɛ.

¹³ꞌƖn nʋꞌa -kaa -lrɛɛ ɛ, lɛꞌꞌo lɛ-ɛ -nɩꞌa yaku ꞌli, -ɛ -nɩꞌa ꞌnɔɔ ꞌbhlʋkpa ꞌꞌkpi, -ɛ -nɩꞌa ꞌle ꞌtɔnni kɔ, -ɛ -nɩꞌa ꞌle glu, lɛꞌꞌo lɛ -Lagɔ -yaꞌa ti, ꞌɩn ꞌwɔn-ɔ ꞌɛ wlu ꞌbɔ, ꞌle ɛ-ɛ nʋꞌo:

-Lagɔ -deꞌa ꞌbho ꞌɔ ꞌnynɩbhlekpe ꞌꞌkpi ti -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛgbuda, ꞌnynɩꞌa ꞌꞌyibhɛɛɛ -ke wɔnkuɛ ꞌꞌdu ꞌwa lɩ ꞌꞌkɔmʋ!

¹⁴Ɩ ꞌlɛꞌɛ -kaa a, ꞌle ɩ-bɩ lɩ nyiɛ ꞌmnɩ-ɩ nʋꞌo, na: -Ka a ꞌlɛꞌɛ ꞌtɩn, *ɩ -nɩ -kaa ꞌmʋ! ꞌLe nyʋklɩgbɩꞌa -gwlʋ -lue nyʋ nyiɛ ꞌmnʋ nʋꞌa -kaa, ʋn ꞌpo -ʋ ꞌkolri wɔnyi glu ꞌle ʋn-ʋ bʋbɔ nʋꞌo.

*-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛgbuda, ɔ ꞌꞌdu-o ꞌꞌbɔgʋꞌa ꞌꞌyikatiɛ wɔn.

¹Ʋ-bʋ nyʋ ꞌmnʋ gwɛꞌɛ ꞌwa bʋbɔɛ ꞌꞌyi, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ɔ-bɔ *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛgbuda, ꞌɩn ꞌye -ɔ li. ꞌꞌBɔgʋ ʋn -ka -nɩꞌa lɩ -mɛɛsɔn wɔnyi, ɔ ꞌkpa-a ꞌbho ɔ ꞌke ɛ wɔnyi kati. Ɩ-bɩ lɩ -mɛɛsɔn ꞌmnɩ, ɔ nʋꞌa -kaa, ɔ -zaꞌa ꞌbho-o ꞌya -lue. Ɔ -zɛ ꞌɛ ꞌbho a, ꞌle, ɩ-bɩ lɩ nyiɛ-ɛ -nɩꞌa ꞌbho, ꞌɩn ꞌye ꞌya -lueꞌa wlu ꞌbʋꞌwɔn ꞌle ɛ na: ꞌDa, -ɩn ꞌke yi! ꞌƆ wlu ꞌmnɛ kɔɔꞌɔ-ɔ ꞌꞌni-i ꞌꞌgbu. ²ꞌƖn -ka ꞌle-e gbʋ, -siekoplu ꞌdaꞌo. Nyɔ -lue-e -deꞌe ꞌbho ꞌɛ ꞌꞌkpi ti. Ɔ-bɔ nyɔ ꞌmnɔ ꞌbhle-e plʋ -kwa. Nyɔ-ɔ luꞌa tʋ, -kwloo ʋn-ʋ ꞌꞌnyɩ ꞌɔ ɔ, ꞌɩnnɛ ʋn ꞌꞌnyɩ ɔꞌo, ɔ deꞌe ꞌꞌlru. Ɔ-ɔ mu-oꞌo ɔ ꞌke tʋꞌa -dadudu vɔ ꞌle ɔ ꞌke ɩ ꞌꞌkpi ꞌya -lrɛɛ.

³Ɔ-bɔ nyɔ ꞌmnɔ ꞌwlʋꞌa ꞌbho -jeyi a, ꞌle ɔ-bɔ -Lagɔꞌɔ ꞌBhozayi ꞌmnɔ ꞌye ꞌbho ꞌkpa -lrɛɛ, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya ꞌsɔnnɛ -za. Ɩ-bɩ lɩ nyiɛ ꞌmnɩ ꞌle ꞌɩn ꞌye ꞌya -lue -lrɛɛꞌɛ wlu ꞌbʋꞌwɔn ꞌle ɛ na: ꞌDa -ɩn ꞌke yi! ⁴-Sieko -lrɛɛ nʋꞌa -kaa, ɛ ꞌda-aꞌo. ꞌƐ ku -nɩꞌe-e zoo -ka nymɔ. Nyɔ-ɔ -de ꞌnɛ ꞌꞌkpi ti, ʋn ꞌꞌnyɩ -ɔ ꞌꞌyiflɔɛ ɔ ꞌke tʋ ꞌꞌyiglu-za ꞌnɔɔ ꞌkmʋ ꞌmʋ ꞌle nyʋ ꞌke ꞌlɩlbha, ʋn ꞌke ꞌmɛ. ꞌƐ kamʋ ʋn ꞌꞌnyɩ ꞌɔ -blajrɛɛ.

⁵ꞌLe, ɔ-bɔ kɔɔꞌɔ ꞌsragamʋzabhlabhlɛgbuda, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya tannɛ ꞌbho -za, ꞌle ɩ-bɩ lɩ nyiɛꞌɛ -lue -lrɛɛ na: ꞌDa -ɩn ꞌke yi! -Sieko -nɩꞌa -ka -blibli nʋꞌa -kaa, ꞌꞌbɔyɩ! ɛ ꞌda-aꞌo. Nyɔ -lue-e -deꞌe ꞌbho ꞌɛ ꞌꞌkpi ti. Ɔ-bɔ nyɔ ꞌmnɔ ꞌbhle-e kilo -kwa. ⁶Ɩ-bɩ lɩ nyiɛ ꞌmnɩꞌa ꞌꞌklumʋ ꞌle ꞌɩn ꞌye lɛ -lue ꞌbʋꞌwɔn. Ɛ kɔɔꞌɔ-ɔ nyunyɔꞌɔ wlu, ꞌle ɛ na nyɔ-ɔ -nɩꞌa ꞌbho -sieko ꞌꞌkpi -bodɩ: Zɔ -lue ꞌliꞌa mɔni lbhʋnʋyi-i ꞌyeꞌa, ꞌɩnnɛ ꞌke ꞌꞌcɩmnɩselɛꞌɛ kilo -lue ꞌtɩn de, ꞌle, -bho ɛ ꞌꞌdu -pʋsa, ꞌɛ kilo tan ꞌtɩn ɛ ꞌke de. ꞌBho nmɔ -ke ꞌcnaꞌa damʋ, -aꞌa po ꞌya mɔni ꞌꞌkpi -le!

⁷-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛgbuda, ɔ nʋꞌa -kaa -lrɛɛ, ɩ-bɩ lɩ -mɛɛsɔn ꞌmnɩ, ɔ -zaꞌa ꞌbho-o ꞌya nyiɛnɛ. ꞌLe ɩ-bɩ lɩ nyiɛ-ɛ -nɩꞌa ꞌbhoꞌa -lue -lrɛɛ ꞌye -wlu ꞌle ɛ na: ꞌDa, -ɩn ꞌke yi! ⁸ꞌƖn -ka ꞌle-e gbʋ, -sieko -ke ku-u ꞌꞌpluꞌa ꞌmʋti -ka ꞌꞌlrubhatiyi, ꞌɩnnɛ ꞌdaꞌo. Nyɔ-ɔ -nɩ ꞌnɛ ꞌꞌkpi, ʋn-ʋ ꞌlɔ -ɔ ꞌMɛmɛɛ. Nyɔ -lrɔɔ nʋꞌa -kaa, ɔ ꞌbhla-a ꞌbho ꞌɔ lemʋ. ꞌƆ ꞌnynɩ ꞌmo-o ꞌMɛmʋꞌa -nɩnamʋ. A -gblee, nyunyu ꞌwee -nɩꞌa ꞌnɔɔ ꞌbhlʋkpa ꞌꞌkpi, -bho nyɔ de ꞌwa ꞌdigbi nyiɛ ti, ʋ-bʋ nyʋ ꞌsɔn ꞌmnʋ, -Lagɔ ꞌꞌnyɩ -ʋ wɔnkuɛ ꞌle ʋn ꞌke tʋ-e, ꞌmʋ-e, ꞌꞌlrubhatiɛ -ke ꞌmnamʋnyninmi ꞌmʋ -zi -nɩ ꞌle ʋn ꞌke ꞌya -lueꞌa nyʋ ꞌlbha ʋn ꞌke ꞌmɛ.

⁹Ɔ-bɔ *nyʋꞌa ꞌpʋʋnyi ꞌmnɔ nʋꞌa -kaa -lrɛɛ, ɩ-bɩ lɩ -mɛɛsɔn ꞌmnɩ, ɔ -zaꞌa ꞌbho-o ꞌya -muunɛ. -Gbagbʋ -ke ꞌꞌkpi ʋn-ʋ za nɩꞌa -Lagɔꞌɔ *ꞌsraga, ꞌɩn popoꞌa ꞌle ꞌɛ ꞌzɔ, nyʋ-ʋ ꞌwɔɔnꞌɔ -Lagɔwlu, -ʋ ꞌꞌdu ꞌɛ ꞌbho -ka -zɛgɛka, ꞌle ʋn ꞌye ɩ ꞌmʋ-za gbaa, ꞌle ꞌɛ kamʋ, nyʋ ꞌye ꞌʋ ꞌlbha, ʋn ꞌyeꞌa ꞌmɛ, ꞌɩn ꞌye -ʋ li, ¹⁰ꞌle ʋn-ʋ ꞌꞌwɔꞌɔ, ʋn-ʋ nʋꞌo: -Aꞌba -Kɔyiklagba, -ɩn ꞌmo-o -ziadɩꞌa ꞌmʋzayi. Nyʋ-ʋ -nɩꞌa ꞌle ꞌkmʋ ꞌmʋ, -ʋ ꞌlbhaꞌa -amʋ, -a ꞌyeꞌa ꞌmɛ, -bhlaaka -ɩn ꞌke ʋ dɩ -kpʋnꞌa? -Bhlaaka -ɩn ꞌke ʋ ꞌkleyeɛɛ ꞌꞌkpi -yaꞌa? ¹¹Ʋn ꞌlɛꞌɛ -kaa a, ꞌle, -banɩpli -nɩꞌa ꞌꞌbuu, ʋn ꞌye ɩ ꞌle -za, ʋn ꞌye ɩ ʋ ꞌꞌnyɩ -lue -lue, ꞌle ʋn na: A -fɔ -bhla ꞌbho ꞌꞌyi -toope! A -gblee, aꞌba -bonyunyu -nɩꞌa -Lagɔꞌɔ lbhʋ nʋnamʋ, -ka ʋn ꞌlbhaꞌa amʋ, -bho ʋn ꞌlbhʋ ʋ -kaa -lrɛɛ, -ka -Lagɔꞌɔ ꞌꞌbhuo ꞌlɛꞌɛ, -bho ɛ zi -kaa a, ꞌꞌlemnɩɩ ɔ-ɔ kpʋn ꞌnʋ-ʋ dɩ.

¹²Ɩ-bɩ lɩ -yɩɩ ꞌwlʋꞌa ꞌbho -jeyi, ꞌle, -Lagɔꞌɔ ꞌBhozayi kɔɔꞌɔ ꞌsragamʋzabhlabhlɛgbuda, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya -mɛɛlonɛ ꞌbho -za. ꞌBhlʋkpa nʋꞌa -kaa, ɛ -trɛꞌo tenyɩ. -Ka ꞌzʋɩnyriɛ -nɩꞌa -blibli, ꞌka-a ꞌyrʋ -nɩꞌo. ꞌBho ꞌcʋ -mnɛɛꞌɛ damʋ ɛ -ke nymɔ -plɛꞌɛ-ɛ zaanzaan ꞌmʋ. ¹³-Bho sakɔ -ka -bada-a za ꞌle -pʋpɔɔ ꞌke yi, -ka ɛ-ɛ ꞌwlaꞌa ꞌꞌbhi ꞌzɔ, ꞌka-a ꞌcʋdrɩ ꞌgaꞌa ti. ¹⁴-Ka nyɔ-ɔ ꞌfɩanꞌa -cakpa, ꞌka-a yaku nʋꞌo ꞌle ɛ ꞌye ꞌꞌma ꞌle yayi. Trɩ -ke likpe ꞌꞌwe nʋꞌa -kaa, ɩ -sɔꞌɔ-ɔ -denɩ ꞌmʋ. ¹⁵A -gblee, ꞌle nyɔꞌꞌo nyɔ-ɔ -nɩꞌa ꞌnɔɔ ꞌbhlʋkpa ꞌꞌkpi, -ɔ -seeꞌa -Lagɔwlu ꞌwɔɔn, -bho ɔ ꞌꞌdu ꞌbhlʋkpayowli o, -bho ɔ ꞌꞌdu nyɔklagba o, -bho ɔ ꞌꞌdu ꞌꞌsrojayiklagba o, -bho ɔ ꞌꞌdu ꞌgagayi o, -bho ɔ ꞌꞌdu wɔnkuyi o, -bho ɔ ꞌꞌdu ꞌgeyikpaan o, -bho ɔ se ɔ ꞌꞌdu o, ɔ ꞌye ꞌle trɩꞌa ꞌꞌbhi ꞌli -ke ꞌya ꞌnynɩmʋ ꞌꞌzize. ¹⁶ꞌLe ʋn-ʋ ꞌlɩ ɩꞌo, ʋn-ʋ nʋꞌo: A ꞌwla -amʋ ꞌꞌkpi ti, a ꞌke -amʋ ꞌꞌyi-ka, ꞌle, -Lagɔ -kɔꞌɔ lɩ ꞌwee, ɔ -kaa -amʋ liꞌye, ꞌle, ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ɔ -kaa -amʋ dɩ -kpʋn. ¹⁷-Ɛkedɩmaa, -da ʋn ꞌꞌduꞌa ꞌle ʋn ꞌke nyʋ dɩ -kpʋn, ꞌbho nyni-oꞌo. -Aꞌba nyɔ -lue ꞌtɩn -see ꞌwa ꞌcɛkʋta wɔn ꞌmʋ -cɛ yi ɛ-bɛ -nɔɔ ꞌmnɛ ꞌli.

Nyʋ -Lagɔ -kɔꞌɔ, ꞌɩnnʋ ɔ gboꞌa -dalbhoyi ꞌꞌduꞌo ꞌɔ ꞌmʋyibolɛ li

¹Ɩ-bɩ lɩ ꞌmnɩ nʋꞌa -kaa, ɩ ꞌgwɛ-ɛ ꞌbho ti, ꞌle ꞌɩn ꞌye -Lagɔ gboꞌa -dalbhomʋ nyiɛ liꞌye. ꞌLe ꞌbhlʋkpaꞌa ꞌꞌkete nyiɛ ꞌꞌyi, ꞌle-e ʋn -nynaꞌa ti, ꞌle ʋn-ʋ kpʋnꞌo -pʋpɔɔꞌɔ ꞌdigbi nyiɛ ti, ɩ -kaa ꞌnɔɔ ꞌkmʋ ꞌmʋ yi, ꞌle ꞌya -lue ꞌtɩnꞌa ꞌꞌbhuo -kaa ꞌnɔɔ ꞌbhlʋkpa ꞌꞌyi -ke ꞌtɔnni ꞌꞌkpi yi ꞌle ɛ -kaa tu -lue ꞌtɩn ꞌmʋ wlaa. ²ꞌɩn -ka ꞌle-e gbʋ, ꞌɩn ꞌye-e -Lagɔ gboꞌa -dalbhoyi -lue -lrɔɔ li. ꞌLe ꞌyrʋꞌa ꞌwlʋnamʋ ɔ -sɔ -nɩꞌe ꞌmʋ. Lɛ -lue ʋn-ʋ ꞌꞌduꞌa nyɔꞌɔ ku li ꞌle ꞌꞌKɔgwlɛlagɔ-ɔ yibo ꞌnɔ ꞌꞌyi ꞌɔ nyɔꞌɔ kamʋ, ꞌɩnnɛ ɔ ꞌbhleꞌe kwa. ꞌLe ʋ-bʋ -Lagɔ gboꞌa -dalbhomʋ nyiɛ, -ʋ ꞌyeꞌa wɔnkuɛ ʋn ꞌke ꞌbhlʋkpa -ke ꞌtɔnni wɔn-nyni, ɔ nʋꞌa -kaa, ɔ ꞌkpa-a ꞌbho ꞌle ɔ-ɔ poꞌo wlu yayi, ɔ-ɔ ꞌtmʋʋ ꞌnʋ -kaa: ³Aꞌba ꞌtʋ -bhla ꞌbhlʋkpa-e, ꞌtɔnni -ke tui li -le, ꞌle, nyʋ-ʋ ꞌma-a -Lagɔꞌɔ lbhʋnʋmʋ, -nɔɔ -ke ti -a ꞌyeꞌa ꞌɔ ꞌmʋyibolɛ ꞌwa ꞌꞌyigbeyiꞌa ꞌꞌdudua ꞌꞌyi -gwɛ -nɩ mʋ a, ɛ ꞌke nyni! ⁴A -gblee, ꞌle, ʋ-bʋ nyʋ ꞌmnʋ, ʋn ꞌye ʋ ꞌnynɩ ꞌꞌsi: nyʋꞌa -gwlɩ -mɛɛsɔn nyʋ nyiɛꞌɛ kpɛꞌɛ ꞌꞌdui ꞌsɔn -gwlɩ -bue, ʋn -nɩꞌo. A -gblee, ʋ-bʋ nyʋ ꞌmnʋ, *Izrayɛɛlɩkɔmʋꞌa ꞌcɛ -bue ꞌcɛ ꞌsɔn ꞌmʋ ʋn ꞌwlʋꞌo.

⁵Nyʋ-ʋ ꞌma-a *Zidaaꞌa -gluuwɔnyiꞌa nyʋ, ʋn -nɩ ꞌꞌduꞌa -gwlʋ -lue ꞌꞌdui -bue.

Wlubɛnɩꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

Gaadɩꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

⁶Asɛlɩꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

Nɛfʋtaliiꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

Manaseeꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

⁷Siminyɔꞌɔ nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

*Leviiꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

Isakaaꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

⁸Zabilɔɔꞌɔ nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

*ꞌZɩzɛɛfʋꞌa nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

*Bɛzamɛɛꞌɛ nɛꞌɛ nyʋ -nɩ ꞌꞌduꞌa -gwlʋ -lue ꞌꞌdui -bue.

Nyʋ-ʋ -ke ꞌꞌyigbeyi ʋn ꞌꞌduꞌa -Lagɔꞌɔ ꞌmʋyibolɛ, ꞌɩnnʋ ꞌka-a!

*ꞌZaan ꞌye-e nyʋꞌa -gbogboyoko li ꞌle yaku ꞌli.

⁹Ʋ-bʋ nyʋ -yʋʋ ꞌwlʋꞌa ꞌbho -jeyi, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e nyʋꞌa -gbogboyoko li. Nyɔ se ꞌtɔ -mnʋʋꞌa zrɛzrɛɛ ꞌbhɛɛ. Ʋn-ʋ ꞌmo-o ꞌbhlʋkpaꞌꞌo ꞌbhlʋkpaꞌa nyʋ, ꞌcɛꞌꞌo ꞌcɛꞌɛ nyʋ, wluꞌꞌo wluꞌa nyʋ. Ʋn nʋꞌa -kaa, -da ꞌꞌKɔgwlɛlagɔ -nɩꞌa ꞌbho ꞌɔ ꞌnynɩbhlekpe ꞌꞌkpi, ꞌle, *ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛgbuda, -da ɔ -nɩꞌa ꞌbho ꞌɔ ꞌꞌtroli, ʋn ꞌyi-e ꞌbho. -Vilɔbanɩ -nɩꞌa ꞌꞌbuu, ꞌɩnnɩ ʋn -paꞌa ꞌmʋ, ꞌle, ʋn ꞌke ꞌɔ ꞌnynɩ ꞌꞌyibhɛɛɛꞌɛ dɩ, ʋn ꞌbhleꞌe -galɩꞌa ꞌtɩan kwa, ¹⁰ꞌle ʋn-ʋ ꞌꞌwɔꞌo, ʋn-ʋ nʋꞌo: -Aꞌba -Kɔyi -Lagɔ -nɩꞌa ꞌbho ꞌɔ ꞌnynɩbhlekpe ꞌꞌkpi -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌɩnnʋ ꞌpʋʋnꞌo -amʋ ɔ! ¹¹A -gblee, -Lagɔ gboꞌa -dalbhomʋ ꞌwee nʋꞌa -kaa, ʋn ꞌbi-e -Lagɔꞌɔ ꞌnynɩbhlekpe ꞌbho nyʋklɩgbɩ -ke lɩ nyiɛꞌɛ ꞌꞌtroli, ꞌle ʋn-ʋ po ꞌɔ ꞌkolri wɔnyi glu, ʋn-ʋ ꞌꞌjriꞌe ꞌꞌyiti ꞌbho ɛ-bɛ kpe ꞌmnɛꞌɛ wɔnyi ꞌle ʋn-ʋ bʋbɔ nɔꞌo, ¹²ʋn-ʋ nʋꞌo: ꞌNynɩꞌa ꞌꞌyibhɛɛɛ-e, -naagɩ-e, nyɔꞌɔ dɩꞌa ꞌꞌyriyiboɛ-e, wɔnkuɛ -ke ꞌmʋtikukuɛ ꞌꞌdu -aꞌba -Kɔyi -Lagɔꞌɔ lɛ! Dɩ -a -zaꞌa -laa ꞌmʋ, *ɩ -nɩ -kaa ꞌmʋ ꞌꞌkɔmʋ!

¹³Ʋn gwɛꞌɛ -wluwlua ꞌꞌyi a, ꞌle nyʋklɩgbɩ-ɩ -nɩꞌa ꞌbhoꞌa -lue na ꞌɩnmʋ -bodɩ: Nyʋ-ʋ -paꞌa -laa -vilɔbanɩpli ꞌmʋ, -ɩn yibo nʋ ꞌnɩ? ꞌLe, -da ʋn ꞌwlʋꞌa, -ɩn yibo ꞌbho ꞌnɩ? ¹⁴ꞌLe ꞌɩn na: -Gba, ꞌan -Kɔyi, -ɩnmɔ yibo nʋꞌo. ꞌLe ɔ na: ꞌBho ꞌkleyeɛɛklagbaꞌa -nɔɔ ꞌꞌyi, nyʋ-ʋ -seeꞌa ꞌbho ꞌwa -Lagɔjeyi ꞌwlʋ, ꞌɩnnʋ moꞌo. ꞌWa ꞌꞌnyinynidɩꞌa dɩ -Lagɔꞌɔ ꞌBhozayi ꞌmɛꞌo ꞌbho ꞌwa ꞌbɩ ꞌmʋ ꞌle ɔ ꞌye ʋ ɩ ꞌmʋ zetie, ꞌle ʋn ꞌye ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. ꞌƐ dɩ ʋn -paꞌa -vilɔbanɩpli ꞌmʋ. ¹⁵-Gblee, ꞌɛ ꞌꞌlru ꞌꞌyi ʋn-ʋ yiꞌe ꞌbho ꞌɔ ꞌnynɩbhlekpeꞌa wɔnyi -zɔɔ ꞌle ʋn-ʋ bʋbɔ nɔꞌo. -Ɩn ꞌye li-ɔ, ɔ-bɔ -nɩꞌa ꞌbho kpe ꞌmnɛ ꞌꞌkpi, -ɔ -ke ꞌꞌyigbeyi ʋn -nɩꞌa a, ɔ-ɔ ꞌꞌdu -ʋ ꞌꞌyrili. ¹⁶ꞌMʋ-e, ꞌꞌnitʋ-e, ꞌyrʋ -ke wɔnkusisia, ꞌya -lue ꞌtɩn -see ʋ ꞌtɔ ꞌlbha yi. ¹⁷-Ɛkedɩmaa, -bho *ꞌbhlabhlɩ li ti, -ka ꞌya *ꞌꞌyriliduyi-i kpɩ ꞌɩ ꞌle ꞌꞌnizɛgɛ kɔ ꞌle ɩ-ɩ ꞌnaꞌa a, -Lagɔꞌɔ ꞌBhozayi -nɩꞌa ꞌbho ꞌnynɩbhlekpe ꞌꞌkpi, ꞌka-a ɔ-ɔ nʋ ʋꞌo ꞌle ꞌwa ꞌgwlʋ-ʋ ꞌwɔnꞌo tenyɩ ꞌbho -Lagɔꞌɔ ꞌꞌtroli, ꞌle ɔ-ɔ ꞌsrʋ ꞌʋ ꞌꞌmi ꞌꞌyri.

-Lagɔꞌɔ ꞌmʋyibolɛꞌɛ -mɛɛsɔnnɛ.

¹Ɩ-bɩ lɩ ꞌmnɩ ziꞌa -kaa, ꞌle *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ɔ ꞌye ꞌbho ꞌkpa -lrɛɛ, ꞌle, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya gbɔmʋbhɔɔnɛ -za. Ɔ nʋꞌa -kaa, ꞌle yaku ꞌli -nɩꞌe-e blenyi! Nyɔ -see lɛꞌɛ wlu ꞌbʋꞌwɔn ꞌle -nɔɔ gbɛ ꞌye zi. ²Ɛ-bɛ -nɔɔ ꞌmnɛ ziꞌa -kaa, ꞌle ꞌɩn ꞌye -Lagɔ gboꞌa -dalbhomʋ -mɛɛsɔn liꞌye. Ʋn -nynaꞌa-a ꞌbho -Lagɔꞌɔ ꞌꞌyigbeyi ti ꞌɔ lbhʋꞌa dɩ. Nyʋ nʋꞌa -kaa, ʋn ꞌꞌnyɩ -ʋ lɛglɩ -mɛɛsɔn -jeyi.

³A -gblee, -Lagɔ gboꞌa -dalbhoyi -lue -lrɔɔ nʋꞌa -kaa, -gbagbʋ -nʋ-ɛꞌɛ sanu ꞌmʋ ꞌle -ɛ -deꞌa ꞌbho -Lagɔꞌɔ ꞌnynɩbhlekpeꞌa wɔnyi ti, -ɛ -ke ꞌꞌkpi ʋn-ʋ za nɩꞌa ꞌɔ *ꞌsraga, ɔ ꞌyi-e ꞌbho ꞌɛ ꞌꞌtroli. ꞌCna -lue-e poꞌa ngnɛzɛgɛ ʋn-ʋ poꞌa ꞌꞌyri, ʋn-ʋ ꞌlaꞌa *lasaasɩ, sanuꞌa ꞌꞌkɔpɩ -ke ꞌli nyʋ-ʋ po ꞌɩ a, ꞌɩnnɛ ɔ ꞌbhleꞌe kwa. ꞌƐ kamʋ ʋn ꞌꞌnyɩ ꞌɔ ɛ-bɛ ꞌcna ꞌmnɛꞌɛ -dadudu ɔ ꞌke ɩ -Lagɔꞌɔ nyʋ ꞌweeꞌa *wɔngbopowlu ꞌgbaa, ꞌle ɔ ꞌke ɩ ꞌbho -Lagɔ ꞌꞌnyɩ -nɩ. ⁴Ɛ-bɛ lasaasɩ ɔ poꞌa ꞌꞌyriꞌa ngnɛ nʋꞌa -kaa, ɛ-ɛ ꞌsɔ-ɔ -Lagɔ gboꞌa -dalbhoyiꞌa kwa ꞌmʋ sueyi, ꞌle ɛ -ke -Lagɔꞌɔ nyʋꞌa wɔngbopowlu-u ꞌyaꞌo ꞌbho ꞌɔ ꞌꞌyigbeyi. ꞌƖnnɛ -tɔꞌɔ na ɔ ꞌkpʋn-o ꞌwa wɔngbopowlu. ⁵A -gblee, -Lagɔ gboꞌa -dalbhoyi nʋꞌa -kaa, nɛ-ɛ -nɩꞌa ꞌbho ꞌsragagbagbʋꞌa da, ɔ ꞌꞌluo ꞌnɩ ꞌmʋ-ɛ, ɔ ꞌye ɩ ꞌꞌkɔpɩ ꞌꞌyii, ꞌle ɔ ꞌye ɩ ꞌzɔ ꞌwla. ꞌBho -gbaa -lue ꞌmʋ, ꞌꞌniꞌa -wlewle-e ꞌcɛ-ɛ yaku -kpoo ꞌꞌkpi ꞌle dɛ-ɛ ꞌꞌgaꞌo, ꞌle ꞌbhlʋkpa ꞌye -trɛ.

-Lagɔ gboꞌa -dalbhomʋ -mɛɛsɔn ꞌbhla-a lɛglɛ -lue -lue.

⁶A ꞌye li-ɔ, ʋ-bʋ -Lagɔ gboꞌa -dalbhomʋ -mɛɛsɔn ʋn ꞌꞌnyɩꞌa lɛglɩ -mɛɛsɔn, ʋn nʋꞌa -kaa, ʋn sanꞌa ꞌtɔ-ɔ ꞌꞌyi, ʋn ꞌke ɩ bhla -lue -lue.

⁷ꞌWa -lue nʋꞌa -kaa, ɔ ꞌkpa-a ꞌbho ꞌle ɔ ꞌye ꞌɔ nɛ bhla. -Sɩnkplo ꞌꞌni maꞌa-e, nɛ -ke nymɔ, ɩ bheteꞌe-e gbo ꞌle ʋn ꞌye ɩ ꞌzɔ ꞌwla. ꞌBhlʋkpa nʋꞌa -kaa, ɛ ꞌgble-ɛꞌɛ-ɛ ꞌfɔtɩ tan ꞌmʋ, ꞌle ꞌɛ ꞌfɔtɔ -lue -ke ꞌɛ tui-e, ꞌɛ -sukui ꞌwee ꞌye sin.

⁸ꞌLe ʋ-bʋ ɔ gboꞌa -dalbhomʋ ꞌmnʋ, ꞌwa ꞌsɔnnɔ ꞌye ꞌɔ nɛ bhla. Lɛ -lue-e kɔɔꞌɔ trɩklagba, ꞌle -ɛ wanꞌa, ɛ nʋꞌa -kaa, ʋn ꞌꞌvuto ꞌnɛ-ɛ ꞌle ꞌtɔnni kɔ. ꞌBho -gbaa -lue ꞌmʋ, ꞌꞌni ꞌgble-ɛꞌɛ-ɛ ꞌfɔtɩ tan ꞌmʋ, ꞌle ꞌfɔtɔ -lue ꞌye nymɔ ꞌmʋ -zɛ. ⁹Lɛꞌꞌo lɛ-ɛ -nɩꞌa ɛ-bɛ ꞌꞌni ꞌmnɛ kɔ, ɩ nʋꞌa -kaa, ɩ ꞌmɛ-oꞌo ꞌwee, ꞌle ɛ-bɛ ꞌfɔtɔ ꞌmnɛ ꞌꞌyiꞌa batoo ꞌwee ꞌye -wa -lrɛɛ.

¹⁰-Lagɔ gboꞌa -dalbhomʋꞌa tannɔ nʋꞌa -kaa, ɔ ꞌbhla-a lɛglɛ -lrɛɛ, ꞌle ꞌꞌnigblʋ -ke ꞌꞌnilru ꞌꞌwe ꞌye ꞌfɔtɩ tan ꞌmʋꞌgble-ɛ, ꞌle ꞌcʋdrɩɛklagba -lue-e wanꞌa -ka -dayru ꞌye ꞌle yayi -cɛ, ɛ ꞌye ꞌya ꞌfɔtɩ tanꞌa -lue kɔ ꞌkpa, ꞌle ɛ ꞌye ɛ wɔn-nyni. ¹¹A -gblee, ɛ-bɛ ꞌcʋdrɩɛ ꞌmnɛꞌɛ ꞌnynɩ ꞌmo-o -kmakmalɛ. Ɩ-bɩ ꞌꞌniꞌa ꞌfɔtɩ tan ꞌmnɩ, ꞌya -lue -ke kɔ ɛ ꞌgaꞌa ti, ꞌle ɛ ꞌye -kma. Nyʋ-ʋ ꞌnɛ ꞌɛ ɛ, ꞌɛ -kmakmaꞌa dɩ ʋn ꞌmɛꞌo.

¹²-Lagɔ gboꞌa -dalbhomʋꞌa nyiɛnɔ nʋꞌa -kaa, ɔ ꞌbhla-a lɛglɛ -lrɛɛ, ꞌyrʋ -ke ꞌcʋ -nɩ ꞌsɔn, -ka nyɔ ꞌgble ꞌɩ ꞌfɔtɩ tan ꞌmʋ, ꞌka-a ɩ -nɩꞌo. ꞌYa -lueꞌa ꞌfɔtɔ -lue gbo -nɩꞌe-e -bliblibli! -Ka -lue ꞌmnɔ, ꞌka-a ꞌcʋdrɩ ꞌgble-ɛꞌɛ ꞌplan tan ꞌmʋ, ꞌle ꞌya ꞌplan -lue ꞌye -kpe -lrɛɛ. -Ka ɩ-ɩ fan ꞌka ꞌꞌcɩcɩ, ꞌɛ ꞌꞌlru ꞌꞌyi ɩ -see -kaa nʋ. A -gblee, zɔ -ke -kuyre ꞌgble-ɛꞌɛ-ɛ ꞌꞌdiꞌa kpɛ tan ꞌmʋ. Zɔ zɩꞌa a, ꞌyrʋ -see fan ꞌle zɔꞌɔ ꞌfɔ -lue ꞌli. -Ka -lue ꞌmnɔ ꞌka-a ꞌcʋ -see fan ꞌle ꞌꞌmatʋꞌa ꞌfɔ -lue ꞌli -lrɛɛ.

¹³Ɩ-bɩ lɩ -yɩɩ ziꞌa -kaa, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e jisi -lue li ꞌle yakutrubo ꞌle ɛ-ɛ ꞌꞌwɔꞌo, ɛ-ɛ nʋꞌo: -Yeee, ngazedɩ! -Yeee, ngazedɩ! -Lagɔ gboꞌa -dalbhomʋ tan-a -sieꞌa ꞌbho, -da ʋn-ʋ ꞌyeꞌa ꞌwa lɛglɩ -bhla -nɩ mʋ, ꞌꞌnyinynidɩꞌa nʋmʋ-ʋ ꞌye-e ꞌkle ꞌye -mʋ tenyɩ ꞌꞌsɛ!

Nyʋnmugagɩ ꞌwlʋ-o ꞌle -dogwigbaa -lue ꞌli.

¹Ɛ-bɛ jisi poꞌa wlu ꞌmnɛ ti a, ꞌle -Lagɔ gboꞌa -dalbhomʋꞌa -muunɔ ꞌye lɛglɛ bhla. ꞌƖn -ka ꞌle-e gbʋ, ꞌcʋdrɩɛ -lue -sɔꞌɔ-ɔ ꞌle yaku ꞌꞌyi, ꞌle ɛ ꞌye ꞌzɔ ꞌkpa. A -gblee, -dogwigbaa -lue-e -nɩꞌe ꞌbho, ꞌɛ ꞌꞌsapɛ ʋn ꞌꞌnyɩ ɛꞌo. ²Ɛ nʋꞌa -kaa, ɛ kati ꞌnɛ-ɛ wɔnyi. -Bho nyɔ cɛ nɛgbaaklagba ꞌꞌyi, -ka ꞌɛ -dayrʋ -dieꞌa ꞌꞌyi, -dayrʋ-ʋ ꞌwlʋꞌa ꞌle ꞌɛ ꞌlimʋ, ꞌka-a ɛ -nɩꞌo. ꞌƖnnɛ -kpeꞌe -pʋpɔɔ -ke ꞌyrʋ, ꞌle -kuyre ꞌye kpʋn. ³Ɛ-bɛ -dayrʋ ꞌmnɛ -nɩꞌa -kaa ꞌle ɛ-bɛ -dogwigbaa ꞌmnɛꞌɛ ꞌli ꞌmʋsɔnamʋ, ꞌle -gagɩ ꞌye ꞌle ɛ ꞌmʋ ꞌwlʋ ꞌle ɩ ꞌye ꞌbhlʋkpa ꞌꞌkpi tibʋba. ꞌYa lɛtu ꞌye-e wɔnkuɛ, ꞌle, ꞌꞌgwɩangwɩan -nɩꞌa ꞌnɔɔ ꞌbhlʋkpa ꞌꞌkpi, -ka, -bho ɩ nmuꞌa nyɔ ꞌle ꞌya gu-u ꞌꞌvuvloꞌo a, ɩbɩ-aꞌa nɛ ꞌke -kaa -nɩ -lrɛɛ. ⁴Ɩ ꞌka yi a, ʋn ꞌtmʋʋ nɩ-ɩꞌo, ɩ -kaa -sukui -ke tuꞌꞌo tu ꞌꞌlru li. Ɛ -nɩꞌa -kaa ꞌmʋ a, nyʋ-ʋ seꞌa -Lagɔꞌɔ ꞌmʋyibolɛ ꞌꞌyigbeyi ꞌbhle, ꞌle ɩ ꞌke ꞌwa ꞌꞌsɛ nmu. ⁵Ʋn ꞌkɩ ɩ ꞌtmʋʋ a, ʋn na ꞌya ꞌlbha nyɔ, ꞌɔ ꞌmɛ -le, ɩ kla ʋ-bʋ ꞌꞌnyinynidɩꞌa nʋmʋ ꞌmnʋꞌa ꞌꞌsɛ nyanɩ ꞌmʋ, ꞌle ꞌcʋɩ -muu ɩ-ɩ nʋꞌa-ɔ, ꞌle ɩ-ɩ ꞌmɛꞌɛ, ɩ ꞌke nyni. A -gblee, -bho ꞌꞌgwɩangwɩan nmu nyɔ, -ka ɛ-ɛ ꞌꞌvuvloꞌa tenyɩ, -bho ɩbɩ nmu nyɔ -lrɛɛ, ꞌka-a ɛ-ɛ ꞌꞌvuvloꞌo tenyɩ. ⁶A ꞌye li-ɔ, ɩ-bɩ ꞌcʋɩ -muu ꞌmnɩ ꞌli, ʋ-bʋ ꞌꞌnyinynidɩꞌa nʋmʋ-ʋ ꞌye-e ꞌmɛmɛɛ tiꞌbɔ -mʋ, ꞌle ʋn -see ꞌmɛ yi. Ʋn ꞌye-e ꞌybha -mʋ ʋn ꞌke ꞌmɛ, ꞌle lɛꞌꞌo lɛ -see ʋ ꞌlbha yi.

⁷A -gblee, -bho nyɔ -ke ꞌɔ -sieko -ka tʋ kpanamʋ-ʋ mu, -ka ɛ -nɩꞌa ꞌtɩn, ꞌka-a ɩ-bɩ -gagɩ ꞌmnɩ -nɩꞌo -lrɛɛ. Lɛ -lue -ke sanuꞌa ꞌnynɩbhlekwloo gʋgɔꞌɔ, ꞌɩnnɛ ɩ ꞌbhleꞌe ꞌꞌlru ꞌle ꞌya ꞌꞌyigba -ke nyunyɔꞌɔ ꞌꞌyigba gʋgɔꞌo. ⁸-Ka ꞌnynʋkpakpɩꞌa ꞌꞌnɩmnɩ -tɛꞌɛ ti, ꞌka-a ꞌya ꞌꞌnɩmnɩ -nɩꞌo ꞌle ꞌya ꞌnynɩ kɔɔꞌɔ -blakpaꞌa ꞌnynɩ. ⁹Nɛtɛklugba, ʋn-ʋ ꞌꞌduꞌa ꞌbɛtɛ ꞌꞌyi ꞌbho tʋvɔnɔɔ ꞌꞌyi, ꞌle ꞌwa jɛkamʋꞌa popolɩ -kʋʋ ʋ kpʋn a, -ka ɛ kuꞌa ꞌmʋ ꞌle ɛ -kmuꞌa ꞌꞌyi, ꞌkʋɩn ɩ ꞌbhleꞌa ꞌbɛtɛ ꞌꞌyi, ꞌka-a ɩ -nɩꞌo. Koko -ɩ ꞌbhleꞌa bhɩ ꞌzɔ -sieko-o jriꞌa ti, nyʋ-ʋ ꞌkpaꞌa ꞌli ꞌle ʋn-ʋ ꞌbhleꞌa -jiji, ʋn-ʋ muꞌa tʋvɔnamʋ, -bho ɩ -tbhɛ -dɔnʋ ꞌle -sieko -kɩ ɩ-ɩ tijri, -ka ꞌya wlu-u ꞌꞌsuꞌa nyɔ -loku ꞌꞌlru, -bho ɩ ꞌꞌgbu a, ꞌka-a ꞌya -kpakpɩꞌa wlu -nɩꞌo. ¹⁰-Ka ꞌꞌgwɩangwɩan ꞌbhleꞌa ꞌgʋn -ke ꞌgɛn, ꞌka-a ɩbɩ ꞌbhle ɩꞌo -lrɛɛ, ꞌle ꞌya nyʋꞌa nmunmua gʋgɔꞌo. Ɩ-bɩ ꞌya ꞌgʋɩn ꞌmnɩ ꞌli, ꞌle-e ꞌya wɔnkuɛ -nɩꞌo ꞌle ɩ-ɩ ꞌye nɩꞌe nyʋ ꞌkle ꞌle ꞌcʋɩ -muu ti. ¹¹A -gblee, ɩ ꞌbhle-e -kɔyi -lue, ꞌɩnnɛ ꞌmo-o ꞌꞌnyinynidɩꞌa tiyayiꞌa -dalbhoyi -ɛ ꞌꞌduꞌa -dogwigbaa ꞌmnɛ ꞌꞌyrili. Ɛ-bɛ ꞌya -klagba ꞌmnɛ, ꞌle *ꞌZuifʋwlu ꞌmʋ, ʋn-ʋ ꞌlɛ -ɛ Abadɔɔ, ꞌle Glɛkɩwlu ꞌmʋ, ꞌɛ ꞌnynɩ ꞌmo-o Apoliyɔɔ. (ꞌƐ ꞌzɔ ꞌmo-o lɩꞌa tizayi.)

¹²A ꞌye li-ɔ, ɛ-bɛ -antanyɩkleyeɛɛ ꞌmnɛ nʋꞌa -kaa, ɛ zi-oꞌo. ꞌƖn -ka ꞌle ꞌɛ lemʋ gbʋ, ꞌya ꞌsɔn -lrɩɩ-ɩ -sieꞌa ꞌbho ɩ ꞌke yi ꞌwla, ꞌle ꞌɩn ꞌye ɩ liꞌye.

-Lagɔ gboꞌa -dalbhoyi bɔtiꞌe-e ꞌꞌnyinynidɩꞌa tiyayiꞌa -dalbhomʋ nyiɛ ti, ꞌle ɩ ꞌye nyʋꞌa -dadudu ti-za.

¹³ꞌƖn ꞌye ꞌɩ li a, ꞌle -Lagɔ gboꞌa -dalbhomʋꞌa -mɛɛlonɔ ꞌye ꞌɔ lɛglɛ bhla. A -gblee, -gbagbʋ -ke ꞌꞌkpi ʋn-ʋ za nɩꞌa -Lagɔꞌɔ ꞌsraga, -ɛ -nʋ-ɛꞌɛ sanu ꞌmʋ, -ɛ -nɩꞌa ꞌbho -Lagɔꞌɔ wɔnyi, -ɛ ꞌbhleꞌa ꞌgbɩn -lue -lue ꞌle ꞌɛ ꞌꞌkete nyiɛ ꞌꞌyi, wlu -lue nʋꞌa -kaa, ɛ ꞌwlʋ-o ꞌle, ꞌɩn ꞌye ɛ ꞌbʋꞌwɔn. ¹⁴-Lagɔ gboꞌa -dalbhomʋꞌa -mɛɛlonɔ ꞌbhleꞌa lɛglɛ kwa, ꞌle ɛ na ɔ -bodɩ: ꞌBho ꞌꞌnigblʋ Eflatɩꞌa wɔnli, ꞌꞌnyinynidɩꞌa tiyayiꞌa -dalbhomʋ nyiɛ-ɛ -mɔ-ɛꞌɛ ꞌbho ti, bɔti nɩ ti! ¹⁵Wlu ꞌmnɛ -gwɛꞌɛ ꞌle -loku ꞌmʋ ti a, ꞌle ɔ ꞌye ꞌbho mu, ɔ ꞌye ɩ tibɔti. A ꞌye li-ɔ, ɛ-bɛ -nɔɔ ꞌmnɛ ɛ, -Lagɔꞌɔ ꞌꞌbhuo-o -zɛ ꞌɛ ꞌbho, ꞌle ɔ ꞌye ɩ-bɩ -dalbhomʋ nyiɛ ꞌmnɩ ꞌbho -za -lrɛɛ, ɔ ꞌye ɩ ꞌbho tide, ꞌle nyunyu -nɩꞌa ꞌnɔɔ ꞌkmʋ ꞌmʋ, -bho nyɔ de ꞌwa ꞌplanꞌa kpɛ tan ti, ꞌle ɩ ꞌke ꞌya -lueꞌa nyʋ ꞌlbha, ʋn ꞌke ꞌmɛ. ¹⁶Ɩ-bɩ ꞌꞌnyinynidɩꞌa tiyayiꞌa -dalbhomʋ nyiɛ ꞌmnɩ ꞌbhle-e ꞌꞌsroja, ꞌɩnnʋ -deꞌe ꞌbho ꞌwa -siekoe ꞌꞌkpi ti, ꞌle, -ka ʋn -dieꞌa ꞌmʋ, nyʋ ꞌye -kaa ꞌnynɩ ꞌꞌsi, ꞌɩn ꞌye ɩ ꞌbʋꞌwɔn. Ʋn na, ʋn -nɩꞌe-e ꞌꞌduꞌa -gwlʋ -lue ꞌꞌdui -muuꞌa kpɛꞌɛ ꞌꞌduꞌa -gwlʋ -lue ꞌꞌdui -muu, ꞌya ꞌweeꞌa kpɛ ꞌsɔn (10.000 x 10.000 x 2 = 200.000.000). ^17-18A -gblee, ꞌle ꞌan ꞌꞌyritiyeɛɛ ꞌmʋ, ꞌbho ꞌan wɔnyi, ꞌbho-o ɩ-bɩ -siekoe ꞌmnɩ -zi -nɩꞌo. Nɛtɛklugba nyʋ-ʋ bhaꞌa ꞌwa ꞌbɛtɛ ꞌꞌyi ꞌbho tʋꞌa -nɔɔ ꞌꞌyi ꞌle ꞌwa jɛkamʋꞌa popolɩ -kʋʋ ʋ kpʋn a, ꞌya -yɩ zaanꞌa-e, -yɩ -kpeꞌa -ke -yɩ ꞌfaꞌa ꞌsɔ, ꞌɩnnɩ ꞌya -kɔmʋ ꞌbhleꞌe ꞌbɛtɛ ꞌꞌyi ꞌle ꞌɩn ꞌye ʋ liꞌye. Ɩ-bɩ -siekoe ꞌmnɩꞌa ꞌꞌlru kɔɔꞌɔ-ɔ -blakpaꞌa ꞌꞌlru, ꞌle nɛ-e, -dayrʋ -ke wɔnnyningnɛ -lue-e ꞌwlʋꞌo ꞌle ꞌya wɔn ꞌmʋ. Ɩ-bɩ lɩꞌa ꞌdigbi tan ꞌmnɩ, ꞌɩnnɩ ꞌlbhaꞌa nyʋ, ʋn ꞌye ꞌmɛ. Ʋ-bʋ ꞌmɛmʋ ꞌmnʋ, nyʋ ꞌwee -nɩꞌa ꞌbhlʋkpa ꞌꞌkpi, -bho ꞌwa ꞌplan tan -de-ɛ ꞌkɩ ti, ʋn-ʋ ꞌmo-o ꞌwa ꞌplan -lue. ¹⁹A -gblee, ɩ-bɩ -siekoe ꞌmnɩꞌa wɔn ꞌmʋ -ke ꞌya ꞌgʋɩn ꞌli, ꞌle-e ꞌya wɔnkuɛ -nɩꞌo. ꞌYa ꞌgʋɩn ꞌmnɩ kɔɔꞌɔ-ɔ sɛn ꞌle ɩ ꞌbhleꞌe ꞌꞌlru ꞌꞌyi -lue -lue. ꞌƖnnɩ ɩ-ɩ ꞌye nɩꞌe nyʋ ꞌkle.

²⁰A ꞌye li-ɔ, ɩ-bɩ lɩ tan ꞌmnɩ ziꞌa a, nyʋtɔlʋ -seeꞌa ꞌmɛ, ɛ -nɩꞌa -kaa ꞌmʋ, ʋn -see ꞌwa ꞌꞌnyinynidɩ ꞌꞌyiyibo ꞌle ʋn ꞌke -Lagɔ gbo ꞌꞌbhiti. ꞌꞌNyinynidɩꞌa -zuzu -ke lɩ ꞌwa ꞌꞌbhi nʋꞌa lɛ, ꞌya bʋbɔɛꞌɛ ꞌꞌlru ʋn-ʋ mu nɩꞌo. Sanu o, nɛtɛ o, sʋkpʋ o, tu o, ꞌɩnnɩ ʋn-ʋ nʋ nɩ ꞌɩ lɛ, ꞌle ꞌya lɛtuꞌa ꞌyeꞌe ti, ꞌya ꞌwɔnꞌɔ ti, ꞌya -naꞌo. ²¹Ʋ-bʋ nyʋ ꞌmnʋ, ꞌꞌkui ʋn-ʋ ꞌlbhaꞌa-e, gu ʋn-ʋ poꞌa-e, ꞌꞌwɩlɩɛ -ke ꞌꞌyriyria, ɩ-bɩ ꞌwa ꞌꞌnyinynikpli ꞌmnɩ, ʋn -see ɩ ꞌꞌyiyibo, ʋn -see ɩ kwa gbo -za, ꞌle ʋn ꞌke -Lagɔ gbo ꞌꞌbhiti.

-Lagɔ gboꞌa -dalbhoyi -lue -ke ꞌꞌbɔgʋꞌa kpan.

¹Ɩ ziꞌa -kaa a, ꞌle ꞌɩn ꞌye -Lagɔ gboꞌa wɔnkudalbhoyi -lue -lrɔɔ liꞌye, ɔ ꞌye yaku ꞌꞌyi ꞌwlʋ ꞌle ɔ ꞌye ꞌnɔɔ ꞌbhlʋkpa ꞌꞌyi tiꞌꞌsi. Ɔ ꞌka tiꞌꞌsi a, ꞌle yakuꞌa -druku ꞌmʋ ɔ -yi -nɩꞌo ꞌle ꞌꞌniꞌa -bhlii bi ꞌɔ ꞌꞌlru. ꞌƆ ꞌꞌyigba-a vlan-oꞌo -ka ꞌyrʋ ꞌle ꞌɔ bhɩ kɔɔꞌɔ nɛꞌɛ -mɩɩ. ²ꞌꞌBɔgʋ -lue-e kati-ɛꞌɛ ꞌꞌyi, ꞌɩnnɛ ɔ ꞌbhleꞌe kwa. A -gblee, ɔ nʋꞌa -kaa, ɔ ꞌꞌsi-e ꞌɔ -linabhʋ ꞌle ꞌtɔnni kɔ ti ꞌle ɔ ꞌye ꞌɔ kɩmnabhʋ ꞌmʋꞌꞌluo, ɔ ꞌye ɛ ꞌkɩka ꞌꞌyi tiꞌꞌsii, ³ꞌle ɔ ꞌye ꞌꞌwɔ. ꞌƆ ꞌꞌwɔwlu ꞌmnɛ kɔɔꞌɔ-ɔ -blakpaꞌa kluwlu. ꞌƆ wlu ꞌmnɛ -gwɛꞌɛ ꞌle -loku ꞌmʋ ti a, ꞌle -dɛ -mɛɛsɔn ꞌye -dalue ꞌꞌga -nɩ. ⁴ꞌYa wlu -cɛꞌɛ ꞌꞌyi a, ꞌɩn-ɩ ꞌkpa ꞌko ꞌbho-ɛ, dɩ ɩ -zaꞌa ꞌmʋ, ꞌɩn ꞌke ɩ ꞌkɩ ꞌcnɩ, ꞌle wlu -lue ꞌye ꞌle yaku ꞌꞌyi ꞌmʋ-sɔ -nɩ, ꞌɩn ꞌye ɛ ꞌbʋꞌwɔn ꞌle ɛ na: -Dɛ -mɛɛsɔnꞌɔ wlu -ɩn wɔnꞌɔ ꞌbɔ, de ɩ ꞌle -aꞌa -pɔlʋ gbo ti, -aꞌa ꞌcnɩ ɩ -le!

^5-6Ɛ ꞌlɛꞌɛ -kaa, ꞌle -Lagɔ gboꞌa wɔnkudalbhoyi ꞌmnɔ ꞌye ꞌɔ sʋ yayi -tɔ, ꞌle, ꞌꞌKɔgwlɛlagɔ -yaꞌa yaku -ke lɩ-ɩ -nɩꞌa ꞌle ꞌɛ ꞌꞌyi ti, -ɔ -yaꞌa ꞌbhlʋkpa -ke lɩ-ɩ -nɩꞌa ꞌle ꞌɛ ꞌꞌkpi ti, -ɔ -yaꞌa ꞌtɔnni -ke lɩ-ɩ -nɩꞌa ꞌle ꞌɛ kɔ ti, ɔ ꞌye ꞌle ꞌɔ ꞌnynɩ ꞌmʋ -zrɛ -nɩ ꞌle ɔ na: Ɛ -gwɛꞌɛ ꞌtɔ-ɔ ꞌꞌyi, -nɔɔ -lrɛɛ se ꞌbho le -sie! ⁷-Da -Lagɔ gboꞌa -dalbhomʋꞌa -mɛɛsɔnnɔ-ɔ ꞌyeꞌa ꞌtɔ ꞌɔ lɛglɛ -bhla -nɩ mʋ, dɩ -Lagɔ -seeꞌa -bhla ꞌꞌpiemʋ po ke ꞌle ꞌya ꞌꞌyriꞌa ꞌbɩ ꞌke ꞌwlʋ, ꞌbho-o ɔ-ɔ ꞌye ɩ ꞌꞌyi-nynia -nɩ mʋ. ꞌƆ wluꞌa ꞌmʋtizamʋ ꞌma-a ꞌɔ lbhʋnʋmʋ -lrɛɛ, ꞌka-a ɔ ꞌlʋ ꞌʋ ꞌꞌyi -bɛnyɩ.

⁸A ꞌye li-ɔ, wlu -lue-e -sɔ -nɩ ꞌka ꞌle yaku ꞌꞌyi ꞌmʋ ꞌɩn ꞌwɔn ꞌka ꞌbɔ, ꞌle ɛ ꞌye ꞌbho le mu ꞌle ɛ na: -Lagɔ gboꞌa -dalbhoyi -nynaꞌa ꞌle ꞌtɔnni kɔ -ke ꞌbhlʋkpa ꞌꞌyi ti, ꞌꞌbɔgʋ -ɛ kati-ɛꞌɛ ꞌꞌyi, ɔ ꞌbhleꞌa kwa, mu ꞌle ɔ gbo, ɔ ꞌke ɛ -ɩnmʋ ꞌꞌnyɩ. ⁹Ɛ ꞌlɛꞌɛ -kaa, ꞌle ꞌɩn ꞌye ꞌmʋ-sɔ, ꞌɩn ꞌye ꞌle mu, ꞌɩn ꞌye ɛ ɔ ꞌybhaa. ꞌle ɔ na ꞌɩnmʋ -bodɩ: Kpʋn ɛ, -ɩn ꞌke li! -Bho -ɩn -kɛ ɛ-ɛ li a, -ka lʋ ꞌmɩɩꞌa, ꞌka-a ɛ-ɛ ꞌye -nɩ mʋ ꞌle -aꞌa wɔn ꞌmʋ. -Bho ɛ nyni ꞌle -aꞌa ꞌlimʋ ꞌle ɛ ꞌke -kma. ¹⁰Ɛ-bɛ -wluwlu ꞌmnɛ -gwɛꞌɛ ꞌꞌyi ꞌle ꞌɩn ꞌye ꞌꞌbɔgʋ ꞌmnɛ ꞌmʋꞌꞌluo ꞌle ꞌɩn ꞌye ɛ li. ꞌLe ꞌan wɔn ꞌmʋ -ziaka, ɛ kɔɔꞌɔ-ɔ lʋ. Ɛ ꞌꞌsiꞌa ꞌtɔ ꞌle ꞌan ꞌlimʋ ti a, ɛ -nɩꞌe-e ꞌꞌkɩkɩkɩ!

¹¹ꞌBho ꞌɛ ꞌꞌkpi, ꞌbho-o nyʋ ꞌlɛ -nɩꞌe ꞌtɔ ꞌɩnmʋ -kaa ꞌꞌyi: ꞌBhlʋkpaꞌa -daduduꞌa nyʋ -ke ꞌwa -yowli-e, nyʋꞌa -dadudu-u poꞌa ꞌꞌsesiwlu-e, -ɩn ꞌke -Lagɔwlu ꞌmʋti-za moꞌo -lrɛɛ ꞌwa damʋ.

*Zeziiꞌa dɩꞌa ꞌmʋzamʋ ꞌsɔn.

¹Ʋn ꞌtmʋʋꞌa -kaa ꞌɩnmʋ a, ꞌle ꞌɩn ꞌye ꞌꞌyri tiꞌye -lrɛɛ, ꞌle, tuꞌa ꞌꞌklɛɛ kɔɔꞌɔ -kɔɔtu, ʋn-ʋ ybha nɩꞌa lɩ, ʋn ꞌye ɛ ꞌɩnmʋ -jeyi ꞌꞌnyɩ ꞌle ʋn na ꞌɩnmʋ -bodɩ: -Sɔ ꞌmʋ, -ɩn ꞌke mu, -ɩn ꞌke *-Lagɔꞌɔ bʋbɔbhlegboꞌa lisaabudu -ke ꞌɔ *ꞌsragagbagbʋ -ybha, ꞌle, nyʋ-ʋ bʋbɔ ꞌnɔ ꞌbho, -ɩn ꞌke ʋ zrɛ! ²-Bho -ɩn -kɩ ɩ-ɩ ybha a, nyʋ -yʋ -seꞌa-a *ꞌZuifʋ, ꞌɛ -da ʋn-ʋ paꞌa, sie ꞌbho, -ɛkedɩmaa, ʋ-bʋ seꞌa -Lagɔ yibo, ꞌɩnnʋ ʋn ꞌꞌnyɩꞌe ꞌbho, ꞌle, -Lagɔꞌɔ -gwlɔ ɔ -zaꞌa ꞌbho, ʋn ꞌke ꞌbho nyanɩ -kla -nɩ ꞌle ꞌcʋɩꞌa -gwlɩ ꞌsɔn ꞌyɔ ꞌsɔn ꞌli! ³ꞌLe, nyɔ-ɔ -nɩꞌa -wlunamʋ, ɔ ꞌye -kaa ꞌɩnmʋ ꞌꞌyiꞌlɛ -lrɛɛ: ꞌBho gwlɔ ꞌmnɛ ꞌmʋ, ꞌɩn-ɩ ꞌye ꞌbho-o ꞌan dɩꞌa ꞌmʋzamʋ ꞌsɔn -ya -mʋ. -Bhɛcɩzʋɩn ʋn-ʋ ꞌye -crɛ mʋ, ꞌle ɩ-bɩ ꞌwɩꞌa ꞌꞌdui tan -gwlɩ tan ꞌli, ʋn ꞌke -Lagɔꞌɔ wlu ꞌmʋti-za. -Bhɛcɩzʋɩn ʋn-ʋ ꞌyeꞌa -crɛ mʋ a, ꞌɩnnɛ ꞌke nyʋ -tɔ -ka ʋn ꞌka ꞌwa ꞌꞌnyinynidɩ ꞌꞌyiyibo ꞌle ʋn ꞌka -Lagɔ gbo ꞌꞌbhiti.

⁴-Gblee, -Lagɔ -kɔꞌɔ nyunyu ꞌwee -nɩꞌa ꞌnɔɔ ꞌkmʋ ꞌmʋ, ꞌan dɩꞌa ꞌmʋzamʋ ꞌɩn-ɩ ꞌꞌsiꞌa ꞌnynɩ, ʋn kɔɔꞌɔ-ɔ olivieetui ꞌsɔn -ke ꞌꞌnapɩꞌa ꞌꞌkpitidelɩ ꞌsɔn-ɔ -nɩꞌa ꞌbho ꞌɔ wɔnyi. ⁵Nyʋ-ʋ ꞌnyʋ ꞌʋ ꞌmʋ, -bho ʋn ꞌbɔ ti ʋn ꞌke ʋ ꞌꞌnyinynidɩ ꞌꞌlrulinʋ, nɛ-ɛ ꞌye-e ꞌle ꞌwa wɔn ꞌmʋ ꞌwlʋ -mʋ ꞌle ɛ ꞌke ʋ ti-za. Nyɔꞌꞌo nyɔ-ɔ ꞌyeꞌa tiꞌbɔ mʋ ɔ ꞌke ʋ ꞌꞌnyinynidɩ ꞌꞌlrulinʋ, -ka ɔ-ɔ ꞌyeꞌa ꞌmɛ mʋ, ꞌkla-a ꞌka-a! ⁶-Bho ʋn -ka -Lagɔꞌɔ wlu ꞌmʋti-iza, ꞌꞌni -kaa -nɔɔ ꞌmnɛ ti lbhaꞌa dɩ, ʋn-ʋ ꞌye wɔnkuɛ ꞌmʋꞌbhle mʋ ꞌle ʋn ꞌke ɛ kpʋn. Ɛ-bɛ wɔnkuɛ -lue ꞌmnɛ, ꞌɩnnɛ ʋn-ʋ ꞌye ꞌmʋꞌbhle mʋ ꞌle ʋn ꞌke ꞌꞌni nymɔ ꞌmʋ -zɛ. Ʋn-ʋ ꞌye-e wɔnkuɛ ꞌmʋꞌbhle -mʋ -lrɛɛ, ꞌle, nyʋ ꞌwee -nɩꞌa ꞌnɔɔ ꞌkmʋ ꞌmʋ, ʋn ꞌke ʋ ꞌkleyeɛɛꞌꞌo ꞌkleyeɛɛ ꞌꞌkpi -ya -nɔɔꞌꞌo -nɔɔ ti.

⁷-Ɩn ꞌye li-ɔ, -bho ʋn gwɛ -Lagɔwluꞌa ꞌmʋtizɛɛ ꞌꞌyi a, nmi -lue-e ꞌye-e ꞌle -dogwigbaa ꞌli ꞌwlʋ -mʋ, ꞌle ɛ -ke ʋn ꞌke tʋ vɔ, ɛ ꞌke ɛ-bɛ tʋ ꞌmnɛ lu, ꞌle ɛ ꞌke ʋ ꞌlbha, ʋn ꞌke ꞌmɛ. ⁸Ɛ-bɛ -gwlɔklagba -ke ꞌmʋ nyʋ -kɔ -nɩꞌa ꞌwa -Kɔyi *Zezii tu ꞌꞌyri ꞌle ɔ ꞌyeꞌa ꞌmɛ, ꞌbhoꞌa -jolʋgblʋ -lue ꞌꞌyi, ꞌwa ꞌꞌkui-i ꞌye tiꞌpɛ mʋ. ꞌƐ kamʋ ʋn-ʋ ꞌye ɛ-bɛ gwlɔ ꞌmnɛ *Sodɔɔmʋ -ke *Ezipʋtɩbhlʋkpa ꞌla mʋ. ⁹ꞌBhlʋkpaꞌꞌo ꞌbhlʋkpa ꞌꞌkpiꞌa nyʋ, ꞌcɛꞌꞌo ꞌcɛꞌɛ nyʋ, wluꞌꞌo wluꞌa nyʋ-ʋ ꞌye-e ꞌwa ꞌꞌkui ya-gbʋ -mʋ ꞌle ꞌwɩ tan ꞌꞌdie ꞌli, ꞌle ʋn -see ꞌwɔn yi nyʋ ꞌke ʋ tinmaze. ¹⁰Ʋ-bʋ nyʋ ꞌsɔn ꞌmnʋ, -bho ʋn ꞌmɛ, nyʋ-ʋ -nɩꞌa ꞌbhlɩkpɩ ꞌwee ꞌꞌkpi, ꞌwa ꞌgwlʋ-ʋ ꞌye-e ꞌwɔn -mʋ. Ʋn-ʋ ꞌye-e ꞌbʋbʋa -li -mʋ ꞌle ʋn ꞌke -bonyaa -jeyi popo, -ɛkedɩmaa, ʋ-bʋ -Lagɔꞌɔ wluꞌa ꞌmʋtizamʋ ꞌsɔn ꞌmnʋ, ʋn -sɩa -nɩ nʋ-ʋꞌo tenyɩ.

¹¹-Bho ɩ-bɩ ꞌwɩ tan ꞌꞌdie ꞌmnɩ zi a, -Lagɔ-ɔ ꞌye -ʋ ꞌɔ tinɩpʋpɔɔ ꞌmʋ -po -mʋ, ꞌle ʋn ꞌke ꞌmʋ-sɔ, ʋn ꞌke ti-nɩ -lrɛɛ. Nyʋ-ʋ ꞌye ꞌʋ liꞌye mʋ, -sɩanyɩ-ɩ ꞌye -ʋ ꞌlbha -mʋ tenyɩ. ¹²-Bho ʋn -sɔ ꞌtɔ -kaa ꞌmɛnynɔɔ ꞌmʋ, ꞌle wluklagba -lue ꞌke ꞌle yaku ꞌli ꞌmʋ-sɔ -nɩ, ʋn ꞌke ɛ ꞌbʋꞌwɔn ꞌle ɛ ꞌke ʋ -kaa ꞌꞌyiꞌlɛ: A ꞌya ꞌnɔɔ yaku ꞌli! -Bho ꞌꞌwɔwlu ꞌmnɛ -gwɛ ꞌle ꞌwa -loku ꞌmʋ ti, ꞌle yakuꞌa -druku ꞌmʋ, ʋn ꞌke yaku ꞌli mu ꞌbho ꞌwa jekamʋꞌa ꞌꞌyigbeyi. ¹³-Bho ʋn -nɩ nʋ ꞌyranamʋ, ꞌbho -gbaa -lue ꞌmnɛ ꞌmʋ, ꞌle ꞌbhlʋkpa ꞌke -trɛ tenyɩ. -Bho ɛ-bɛ -gwlɔklagba ꞌmnɛ ꞌgble-ɛ ꞌkɩ ꞌfɔtɩ bue ꞌmʋ, -ɛ ꞌyeꞌa -wa mʋ, ɛ-ɛ ꞌmo-o ꞌfɔtɔ -lue, ꞌle ɛ ꞌke nyʋꞌa ꞌꞌdui -bue ꞌꞌdui -mɛɛsɔn -gwlɩ bue ꞌlbha, ʋn ꞌke ꞌmɛ. Nyʋ-ʋ ꞌyeꞌa ꞌpʋn mʋ, -bho ʋn ꞌye ꞌɛ lɛtu li, -sɩanyɩ-ɩ ꞌye -ʋ ꞌlbha -mʋ, ꞌle, -Lagɔ -nɩꞌa ꞌle yaku ꞌli, ʋn ꞌke ꞌɔ ꞌnynɩ ꞌꞌyiꞌbhɛɛ.

¹⁴A ꞌye li-ɔ, ɛ-bɛ ꞌkleyeɛɛꞌɛ ꞌsɔnnɛ -yɛɛ nʋꞌa -kaa, ɛ zi-oꞌo. ꞌƖn -ka ꞌle ꞌɛ lemʋ-ʋ gbʋ, -lue -lrɛɛ-ɛ -sieꞌa ꞌbho -ɛ ꞌka yi -susueyi, ꞌle ꞌɩn ꞌye ɛ liꞌye.

-Lagɔ gboꞌa -dalbhoyi ꞌbhla-a gbɔmʋbhɔɔlɛglɛ.

¹⁵Ɩ ziꞌa -kaa, ꞌle -Lagɔ gboꞌa -dalbhomʋꞌa -mɛɛsɔnnɔ ꞌye lɛglɛ bhla, ꞌle wluklɩgbɩ ꞌye ꞌle yaku ꞌli ꞌmʋ-sɔ -nɩ, ꞌle ɩ na: -Aꞌba -Kɔyi -Lagɔ -ke *ꞌɔ ꞌBhozayi -ɔ ꞌpʋʋnꞌa nyʋ, ꞌɩnnʋ ꞌbhleꞌe wɔnkuɛ ꞌbho nyunyu ꞌwee ꞌꞌkpi, ꞌle ꞌwa nyʋꞌa -kɔkɔɔ -see ꞌꞌtiinamʋ ꞌbhle yi! ¹⁶A -gblee, wlu ꞌmnɩ -gwɛꞌɛ ꞌle -loku ꞌmʋ ti a, ʋ-bʋ nyʋklɩgbɩꞌa -gwlʋ -lue nyʋ nyiɛ-ɛ -deꞌa ꞌbho -Lagɔꞌɔ wɔnyi ꞌwa ꞌnynɩbhlekpi ꞌꞌkpi ti, ʋn nʋꞌa -kaa, ʋn-ʋ ꞌpo -ɔ ꞌkolri wɔnyi glu, ʋn-ʋ bʋbɔ nɔꞌo, ¹⁷ꞌle ʋn-ʋ nʋꞌo:

-Aꞌba -Kɔyi ꞌꞌKɔgwlɛlagɔ, -ɩnmɔ -kɔꞌɔ lɩ ꞌwee a, -a ꞌpo-o -ɩnmʋ ꞌsɛɛ, -ɛkedɩmaa, -ɩn ꞌku-o wɔn -ɩn ꞌye lɛꞌꞌo lɛ -zi, ꞌle ɛ-bɛ -aꞌa wɔnkuɛklagba ꞌmnɛ ꞌmʋ, ꞌle-e -ɩn ꞌꞌdu -nɩꞌe nyʋꞌa -kɔkɔɔ wɔn. ¹⁸Nyʋ-ʋ seꞌa -ɩnmʋ yibo ꞌle ꞌbhlɩkpɩ ꞌꞌkpi, ʋn -yaꞌa-a -aꞌa nyʋꞌa -dadudu tʋ gbo -bɛnyɩ. ꞌTraamʋ ꞌtɔ ɔ, -aꞌa -nɔɔ-ɔ nyniꞌo ꞌle -ɩn ꞌke ʋ -aꞌa ꞌcɛkʋta ꞌꞌkpi -ya, ꞌle -ɩn ꞌke ꞌmɛmʋ -zigle -tu. -Aꞌa -nɔɔ-ɔ nyniꞌo -lrɛɛ, ꞌle, -aꞌa lbhʋnʋmʋ zaꞌa -aꞌa wlu ꞌmʋti, ʋn -ke -aꞌa nyʋ -lrʋʋ-ʋ ꞌꞌduꞌa ꞌbho -aꞌa wlu, -bho ʋn ꞌꞌdu nyʋklɩgbɩ o, -bho ʋn ꞌꞌdu nyʋtoope o, -ɩn ꞌke ʋ -zɛgɛ ꞌꞌlrulinʋ, ꞌle, nyʋ-ʋ nʋꞌa ꞌꞌnyinynidɩ, -ʋ lokwlaꞌa ꞌbhlʋkpa ti, -ɩn ꞌke ʋ ti-za ꞌꞌfɩa.

¹⁹Ʋn gwɛꞌɛ -wluwlua ꞌꞌyi a, ꞌle ꞌɩn ꞌye ꞌle popo -lrɛɛ. ꞌƖn -ka ꞌle-e gbʋ, *-Lagɔꞌɔ bʋbɔbhlegboꞌa lisaabudu katiꞌe-e wɔn ꞌle yaku ꞌli, ꞌle ꞌɩn ꞌye ɛ liꞌye. Ɛ-bɛ -budu ꞌmnɛ ꞌli, koko -lue-e -nɩꞌe ꞌle, ꞌle ꞌɩn ꞌye ɛ liꞌye -lrɛɛ. -Ybhɛybhɛtite -Lagɔ -ke nyunyu bhlaꞌa -bɛnyɩ, ꞌɛ ꞌꞌbɔgʋꞌa koko moꞌo. ꞌƖn ꞌye ꞌɛ -kaa li a, ꞌle -wlewle ꞌye yaku -kpoo ꞌꞌkpi cɛ, dɛ ꞌye ꞌꞌga, ꞌbhlʋkpa ꞌye -trɛ, ꞌle ꞌꞌniꞌa -sɩnkplo ꞌye tiꞌga kplokplokplo.

-Lagɔ ꞌpʋʋnꞌo-o ꞌnynaakpʋ -lue -ke ꞌwa ꞌꞌyu -zree wɔn ꞌmʋ.

¹Ɩ-bɩ lɩ ꞌmnɩ ziꞌa -kaa, ꞌle ꞌɩn ꞌye ꞌle yaku ꞌꞌyi popo -lrɛɛ, ꞌɩn ꞌye wɔnkulɛklagba -lue liꞌye: ꞌNynaakpʋ -lue-e -paꞌa ꞌyrʋꞌa -vlavlɩ ꞌmʋ -ka -bana, ꞌɩnnʋ ꞌɩn ꞌyeꞌe li, ꞌle ʋn -nynaꞌa ꞌcʋ ꞌꞌkpi ti. ꞌNynɩbhlekwloo -lue -ke ꞌꞌkpi ꞌcʋdrɩ -bue ꞌyɔ ꞌsɔn -nɩꞌa a, ꞌɩnnɛ ʋn deꞌe ꞌꞌlru. ²Ʋn ꞌbhle-e -nɩgblaa ꞌle ꞌwa -gbagbanɔɔ nyniꞌo, ꞌle ꞌgwlʋ-ʋ cɛ ꞌnʋ liꞌa dɩ, ʋn-ʋ ꞌꞌplanꞌo.

³ꞌƖn nʋꞌa -kaa -lrɛɛ, ꞌɩn ꞌye-e wɔnkulɛklagba -lue -lrɛɛ li ꞌle yaku ꞌꞌyi. ꞌƐ lɛtu-u ꞌmo-o -zreezana -lue. Ɛ-bɛ -zree ꞌmnɛ ꞌbhle-e ꞌꞌlrui -mɛɛsɔn -ke ꞌgbɩn -bue. Ɩ-bɩ ꞌɛ ꞌꞌlrui ꞌmnɩ, ꞌnynɩbhlekwloo ɩ ꞌbhleꞌe ꞌꞌlru -lue -lue. ⁴Ɛ-bɛ -zree ꞌmnɛ -lrɛɛ, ɛ ꞌbhle-e ꞌgʋn -lue, ꞌle ɛ-bɛ ꞌɛ ꞌgʋn ꞌmnɛ ꞌye ꞌcʋdrɩ tijri, ꞌle ɛ ꞌye ɩ ꞌzɔ ꞌwla. ꞌCʋdrɩ -nɩꞌa ꞌle yaku ꞌꞌyi, -bho ɩ ꞌgble-ɛ ꞌkɩ ꞌmʋ ꞌdigbi tan, -yɩ ꞌwlaꞌa ꞌzɔ, ɩ ꞌnʋ-o ꞌya ꞌdigbiꞌa kpɛ -lue. Ɛ nʋꞌa -kaa, ɛ ꞌnyni-e ʋ-bʋ ꞌnynaakpʋ ꞌmnʋ li, ꞌle ɛ-ɛ fuo ꞌnʋ li, -bho ʋn -gba a, ꞌle ɛ ꞌke ꞌwa ꞌꞌyu li, ⁵ꞌle ʋn ꞌye ꞌꞌyunyukpasu ꞌwlʋ. ꞌWa ꞌꞌyu ꞌmnɔꞌɔ wɔnkuɛ-ɛ ꞌye-e ꞌbhlʋkpayowli ꞌweeꞌa wɔnkuɛ ꞌmʋ-zi -mʋ ꞌle ɔ ꞌke ꞌbhlɩkpɩ ꞌwee -kɔ. -Zree-e fuo ꞌnɔ-ɔ wɔnꞌɔ dɩ, ɔ ꞌwlʋꞌa a, ꞌle, -Lagɔ -nɩꞌa ꞌbho ꞌɔ ꞌnynɩbhlekpe ꞌꞌkpi ꞌle yaku ꞌli, ɔ ꞌye ɔ ꞌla, ꞌle ɔ ꞌye ꞌbho ꞌɔ ꞌꞌtroli mu. ⁶ꞌƆ ꞌlotʋ -mnʋʋ nʋꞌa -kaa, ʋn-ʋ ple-oꞌo ʋn ꞌke ꞌle ꞌꞌmusa ꞌꞌkpi mu. A -gblee, -Lagɔꞌɔ ꞌꞌbhuo-o -zaꞌa ꞌbho ꞌbɩ ꞌmnɩ, ꞌle ʋn ꞌke ꞌle mu, ɔ ꞌke ʋ ꞌꞌyriliꞌꞌdu ꞌle ɔ ꞌke ʋ lilia ꞌꞌnyɩ ꞌle ꞌwɩꞌa ꞌꞌdui tan -gwlɩ tan ꞌli.

-Lagɔ ꞌꞌvutoꞌo-o ꞌꞌnyinynidɩꞌa tiyayi -ke ꞌɛ -namʋ ꞌnɔɔ ꞌzɔ.

⁷Ɛ-bɛ -nɔɔ ꞌmnɛ ti, ꞌle tʋ ꞌye ꞌle yaku ꞌli ꞌkpa. ꞌLe -Lagɔ gboꞌa -dalbhoyiklagba -lue ʋn-ʋ ꞌlaꞌa *Misɛlɩ, ɔ -ke -Lagɔ gboꞌa -dalbhomʋ -lrʋʋ-ʋ bheteꞌe gbo ꞌle ʋn -ke ꞌꞌnyinynidɩꞌa tiyayi -ke ꞌɛ nɩ-ɩ vɔꞌo. ⁸A -gblee, Misɛlɩ -ke ꞌɔ nyʋ nʋꞌa -kaa, ʋn ꞌlbha-a ꞌꞌnyinynidɩꞌa tiyayi -ke ꞌɛ -nɩ, ꞌle ʋn -see ꞌtɔ ꞌwɔn ʋn -ke ɩ ꞌke ꞌle yayi -plɛ. ⁹A ꞌye li-ɔ, ꞌɩnnɛ ꞌbhleꞌe ꞌnynɩꞌa dɩ, ɛ-bɛ -zreeklagba ꞌmnɛ, -ɛ ꞌma-a ɛ-bɛ sɛn -nɩ ꞌka -bɛnyɩ, -ɛ ꞌlbhaꞌa nyʋ ꞌꞌyrabha ꞌmʋ, ʋn-ʋ ꞌlaꞌa ꞌꞌnyinynidɩꞌa tiyayi, -ɛ -ke ꞌnynɩ -lrɛɛ-ɛ ꞌma-a *Sataan, ɛ -ke ꞌɛ -namʋ ꞌye ꞌnɔɔ ꞌzɔ ꞌꞌvuto-ɛ.

¹⁰Ɩ ꞌkpaꞌa ꞌzɔ ɔ, ꞌle ꞌɩn ꞌye wluklagba ꞌbʋꞌwɔn, ɛ ꞌye ꞌle yaku ꞌli ꞌmʋ-sɔ -nɩ ꞌle ɛ-ɛ nʋꞌo:

-Nɔɔ -ke ti -aꞌba -Kɔyi -Lagɔ ꞌka nyʋ -kɔ -ziaka, ꞌtraamʋ ɛ nyniꞌo. -Ka ɔ kuꞌa wɔn tenyɩ, ꞌle ɔ ꞌyeꞌa Sataan tʋ wɔn ꞌmʋ lu ꞌꞌfɩa ꞌwee ꞌle ɔ ꞌke nyʋ zetie ꞌle ꞌɔ wɔnkuɛ ꞌmnɛ ꞌmʋ, ꞌtraamʋ ɔ -tɔ ꞌnɩ nyʋ ꞌꞌyi. *ꞌƆ ꞌBhozayi -ɔ ꞌpʋʋnꞌa nyʋ, wɔnkuɛ-ɛ ꞌma-a ꞌɔ lɛ, ꞌtraamʋ ɔ -tɔ ꞌnɛ nyʋ ꞌꞌyi. A -gblee, Sataan -nɩ ꞌka ꞌbho -Lagɔꞌɔ wɔnyi, -ɛ ꞌꞌdu ꞌɔ ꞌɔ nyʋ wɔn ꞌmʋ ti -zɔɔ, ɛ ꞌꞌvuto-ɛꞌɛ-ɛ ꞌle ꞌzɔ. ¹¹A ꞌye li-ɔ, nyʋ -Lagɔ -kɔꞌɔ, -ʋ ꞌma-a -aꞌba ꞌlotʋꞌa ꞌꞌnynuu, ʋn ꞌlu-o ɛ-bɛ Sataan ꞌmnɛ tʋ wɔn ꞌmʋ. -Lagɔꞌɔ ꞌBhozayi -ɔ kɔɔꞌɔ *ꞌsragamʋzabhlabhlɛ, -Lagɔꞌɔ wlu-u ꞌma-a -ziadɩ -ɛ -ke ꞌli ʋn -deꞌa ti, ɛ -ke ꞌɔ ꞌmɛmɛɛ, ꞌɩnnɩ -lu -nɩ ꞌnʋ tʋ. ꞌLe ʋn -see tinɩɛꞌɛ dɩ ꞌꞌdu, ʋn -see ꞌmɛmɛɛ ple. ¹²ꞌƐ dɩ, a-bʋ -nɩꞌa ꞌnɔɔ yaku ꞌli, a li ꞌbʋbʋa! -Yeee, ngazedɩ! ꞌKmʋ ꞌmʋꞌa nyʋ-ʋ ꞌma-a ꞌꞌnyinynidɩꞌa nʋmʋ, ʋn-ʋ ꞌye-e ꞌkle ꞌye -mʋ tenyɩ ꞌꞌsɛ! -Ɛkedɩmaa, ꞌle ʋ gbo, ꞌle-e ɛ ꞌꞌvuto-ɛꞌo. -Nɔɔ-ɔ sieꞌa ꞌbho ꞌɛ ꞌꞌyigbeyi ꞌle ɛ ꞌke nyʋ -sɩa -nɩ, ɛ yiboꞌo-o na ꞌɛ ꞌꞌyigwɛnamʋ-ʋ nyniꞌa dɩ, ɛ ꞌbhleꞌe ꞌcɛ ꞌli tenyɩ.

*Sataan -sɩaꞌa-a ꞌꞌyuꞌa ꞌlotʋ ꞌꞌyi ꞌle ɛ ꞌye ꞌwa ꞌꞌyreetɩ -lrʋʋ tʋ gbo -kpanamʋ mu.

¹³Ɛ-bɛ ꞌꞌnyinynidɩꞌa tiyayi ꞌmnɛ, -ka ʋn ꞌꞌvuto ꞌnɛ ꞌzɔ, ɛ ꞌyeꞌa -kaa li a, ꞌle ɛ ꞌye ꞌꞌyuꞌa ꞌlotʋ kli ꞌꞌsoto. ¹⁴Ɛ -nɩ ꞌʋ kli -munamʋ, ꞌle ʋn ꞌye ʋ jisiklagbaꞌa -kpakpɩ ꞌsɔn ꞌꞌnyɩ, ꞌle ʋn ꞌye ꞌꞌblu, ꞌle ꞌbɩ -ke ꞌꞌyi ʋn ꞌka mu ꞌle ꞌꞌmusa ꞌꞌkpi, ʋn ꞌye ꞌle mu, ʋn ꞌke ꞌle ti-de ꞌle ɩ-bɩ -zʋɩn tan ꞌꞌdie ꞌmnɩ ꞌli, ꞌle -Lagɔ ꞌke ʋ lilia ꞌꞌnyɩ. -Bho ʋn -de -kaa ꞌle ti a, ɛ-bɛ ꞌꞌnyinynidɩꞌa tiyayi se ꞌbhɛɛ, ɛ ꞌke ʋ -sɩa -nɩ. ¹⁵A -gblee, ʋn ꞌke ꞌꞌblunamʋ mu a, ɛ ꞌgwla-a ꞌꞌnigblʋ -lue, ꞌle ɛ ꞌke ʋ ꞌmʋꞌꞌluo, ɛ -ke ʋn ꞌke zi. ¹⁶ꞌBhlʋkpa nʋꞌa -kaa, ɛ -kpa nʋ-ʋꞌo: ꞌBho -gbaa -lue ꞌmʋ, ɛ katiꞌe-e wɔn ꞌle ɛ ꞌye ꞌꞌni ꞌmnɛ mna. ¹⁷Ɛ ꞌyeꞌa ꞌna li a, ꞌɛ ꞌlimʋ -gbaꞌa-a ya ꞌle ꞌwa ꞌꞌyreetɩ -lrʋʋ-ʋ ꞌma-a *Zeziiꞌa -glɩgbawɔnyiꞌa nyʋ, -Lagɔꞌɔ wlu-u ꞌma-a -ziadɩ, Zezii ꞌwɔɔnꞌɔ ꞌꞌkpi, -ɩ -ke ꞌli ʋn -deꞌa ti, -ʋ ꞌꞌdu ꞌɩ ꞌbho, ꞌle ɛ-ɛ muꞌo ɛ -ke ʋn ꞌke tʋ vɔ. ¹⁸Ɛ nʋꞌa -kaa, ɛ ꞌmu-o ꞌtɔnni wɔnli, ꞌle ɛ ꞌye ꞌbho ti-nyna.

*Sataan ꞌꞌnyɩ-e nmiklagba -lue ꞌɔ wɔnkuɛ ꞌle ɛ ꞌye ꞌtɔnni kɔ ꞌmʋ-sɔ, ɛ ꞌye ꞌꞌpiemʋ ꞌda.

¹Ɩ ziꞌa -kaa, ꞌle ꞌɩn ꞌye ꞌle ꞌtɔnni kɔ popo. ꞌƖn -ka ꞌle-e gbʋ, nmi -lue-e ꞌsɔ-ɔ ꞌle ꞌɛ kɔ ꞌmʋ, ɛ ꞌke ꞌkɩka ꞌꞌyi mu. Ɛ ꞌbhle-e ꞌꞌlrui -mɛɛsɔn -ke ꞌgbɩn -bue, ꞌle ꞌnynɩbhlekwloo -bue -nɩꞌe ꞌle ꞌɛ ꞌgbɩn -bue ꞌꞌyi -lue -lue, ꞌle wlu-u ꞌka -Lagɔꞌɔ ꞌnynɩ wɔn-nyni, ɛ ꞌcnɩ-ɛꞌɛ ꞌbho ꞌɛ ꞌꞌlru ꞌmnɩ ꞌꞌkpi. ²A -gblee, ɛ-bɛ nmi ꞌmnɛ kɔɔꞌɔ-ɔ ji, ꞌle ꞌɛ bhɩ -ke sʋɩ -ke ꞌsrukuꞌa nɩ gʋgɔꞌo. -Bho a ꞌye ꞌɛ wɔn, ɛ kɔɔꞌɔ-ɔ -bhlakpaꞌa wɔn. *Sataan nʋꞌa -kaa, ɛ ꞌꞌnyɩ -ɛ ꞌɛ wɔnkuɛklagba, ꞌle, ɩ -nɩ ꞌsɔn, ɩ ꞌke nyʋ -kɔ. ³A ꞌye li-ɔ, ꞌɩn -gbʋꞌa ꞌɛ ꞌꞌlru -lue ya, -ka nyɔ po ꞌɛ ꞌlbhalɛ ꞌꞌlru, ꞌle ꞌɛ ꞌꞌjie ꞌyeꞌa -gwɛ, ꞌka-a ɛ -nɩꞌo. Nyʋ-ʋ -nɩꞌa ꞌnɔɔ ꞌkmʋ ꞌmʋ, ʋn ꞌye ꞌɛ li a, wɔn ꞌmʋ -ʋ ti, ꞌle ʋn -ke ɛ-ɛ naꞌo. ⁴ꞌLe ʋn-ʋ bʋbɔꞌɔ Sataan, -ɛkedɩmaa, ꞌɩnnɛ ꞌꞌnyɩꞌe ꞌɛ wɔnkuɛ ɛ-bɛ nmi ꞌmnɛ. -Bho ʋn -kɛ ɛ-ɛ bʋbɔ, ꞌle ʋn-ʋ nʋꞌo: Nyɔ yɔɔ -nɩꞌe ꞌnɔɔ ꞌkmʋ ꞌmʋ, -ɔ -ke nmi -nɛɛ ꞌbhɛɛꞌɛ ꞌmʋ ꞌbho wɔnkunamʋꞌa? Yɔɔ ꞌbhɛɛꞌo ɔ -ke ɛ ꞌke vɔ ꞌle ɔ ꞌke ɛ tʋ wɔn ꞌmʋ luꞌa?

⁵Ɛ-bɛ nmi ꞌmnɛ nʋꞌa -kaa, ɛ ꞌye-e ꞌꞌyiflɔɛ, ꞌle, wlu-u ꞌka ꞌɛ ꞌꞌbhuo ꞌꞌyiꞌbhɛɛ -ke -Lagɔꞌɔ ꞌnynɩꞌa wɔnnyniwlu, ɛ-ɛ zɩ ꞌɩ ꞌmʋ. Ʋn ꞌꞌnyɩ -ɛ wɔnkuɛ ꞌle ɛ ꞌke ꞌꞌnyinynikpli ꞌmnɩ nʋ ꞌle ꞌcʋɩꞌa -gwlɩ ꞌsɔn ꞌcʋɩ ꞌsɔn ꞌli. ⁶ꞌƖnnɛ ꞌbhleꞌe ꞌnynɩꞌa dɩ, ɛ-ɛ vlɛꞌɛ -Lagɔ ꞌle ɛ-ɛ nyniꞌe ɔ -ke ꞌɔ nyʋꞌa ꞌnynɩ wɔn, ꞌle, yaku ꞌma-a ꞌwa -dena, ɛ-ɛ nyniꞌe ꞌleꞌa ꞌnynɩ wɔn -lrɛɛ. ⁷Ɛ ꞌye-e ꞌꞌyiflɔɛ -lrɛɛ ꞌle ɛ ꞌke -Lagɔꞌɔ nyʋ tʋ gbo -ya, ꞌle ɛ ꞌke tʋ ꞌmnɛ lu. Ʋn ꞌꞌnyɩ -ɛ wɔnkuɛ, ꞌle, ꞌcɛꞌꞌo ꞌcɛꞌɛ nyʋ, ꞌbhlʋkpaꞌꞌo ꞌbhlʋkpa ꞌꞌkpiꞌa nyʋ, wluꞌꞌo wluꞌa nyʋ, ɛ ꞌke ʋ -kɔ. ⁸ꞌkmʋ ꞌmʋꞌa nyʋ-ʋ ꞌma-a ꞌꞌnyinynidɩꞌa nʋmʋ, ʋn-ʋ ꞌye -ɛ bʋbɔ -mʋ. Ʋ-bʋ nyʋ ꞌmnʋ, nyʋ-ʋ -nɩꞌa ti ꞌbho -Lagɔꞌɔ ꞌꞌyigbeyi, ꞌɔ ꞌꞌbɔgʋ -ke ꞌli ꞌwa ꞌnynɩ ꞌcnɩ-ɛꞌɛ, ʋn-ʋ ꞌmo-o -yʋ -ke ꞌnynɩ-ɩ -seeꞌa ꞌle ꞌɛ ꞌlimʋ ꞌcnɩ-ɛ. A -gblee, ɩ-bɩ ꞌnynɩ ꞌmnɩ, -da -Lagɔ -seeꞌa -bhla ꞌkmʋ ti-ya ke, ꞌbho-o ɩ ꞌcnɩ-ɛ -nɩꞌo see. A ꞌye li-ɔ, ɛ-bɛ ꞌꞌbɔgʋ ꞌmnɛ, *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, nyʋ ꞌlbhaꞌa -bɛnyɩ, ɔ ꞌyeꞌa ꞌmɛ, ꞌɩnnɔ -kɔ nɛꞌo -lrɛɛ.

⁹Ɩ-bɩ dɩ -nɩɩ, nyɔ-ɔ ꞌbɔꞌɔ ti ɔ ꞌke ɩ ꞌmʋtiꞌwɔn, ɔ popo nɩ ꞌgwlʋti -ka -zɛgɛka! ¹⁰Nyɔ -Lagɔ nʋꞌa ɔ ꞌke -jiekɔyi ꞌꞌdu, ɔ-ɔ ꞌꞌdu -ɛꞌo katii. Nyɔ -yɔ ʋn ꞌka -blajrɛɛ ꞌmʋ ꞌlbha, ʋn-ʋ ꞌlbhɔ -ɔ ɛ ꞌmʋ katii. A -gblee, ꞌɩnnɛɛnɛꞌɛ dɩ, nyʋ -Lagɔ -kɔꞌɔ, ʋn ꞌke ꞌꞌgwli-ku ꞌle ʋn ꞌke ɔ ꞌꞌgwlide.

Nmiꞌa ꞌsɔnnɛ ꞌkpʋn-o nyʋ -glaka ꞌle ʋn-ʋ bʋbɔꞌɔ -antanyɩnɛ.

¹¹A -gblee, ꞌɩn -ka ꞌle-e gbʋ -lrɛɛ, ꞌɩn ꞌye-e nmi -lue -lrɛɛ li. Ɛ-ɛ ꞌsɔ-ɔ glu. Ɛ ꞌbhle-e ꞌgbɩn ꞌsɔn ꞌle ɩ -ke *ꞌbhlabhlɛgbudaꞌa ꞌgbɩn gʋgɔꞌo, ꞌle, -ka *Sataan-a wluꞌa a, ɛ-ɛ wluꞌo -kaa. ¹²-Antanyɩnmiꞌa wɔnkuɛ ɛ ꞌbhleꞌo -lrɛɛ, ꞌle ɛ-ɛ nʋꞌo ꞌɛ lbhʋ ꞌle ꞌɛ ꞌnynɩ ꞌmʋ, nyʋ-ʋ seꞌa -Lagɔ yibo ꞌnɔɔ ꞌkmʋ ꞌmʋ, ɛ-ɛ kpʋn ʋꞌo -glaka ꞌle ɛ-bɛ nmi-i kɔɔꞌɔ nyɔ-ɔ po ɛ ꞌlbhalɛ ꞌꞌlru, ꞌle ꞌɛ ꞌꞌjie ꞌyeꞌa -gwɛ, ʋn ꞌke ɛ bʋbɔ. ¹³A -gblee, ɛ-bɛ nmiꞌa ꞌsɔnnɛ ꞌmnɛ, ɛ-ɛ ꞌnʋ-o *wɔnkulɩklɩgbɩ. ꞌƐ dɩꞌa kpɛ -lue ꞌka-a: ꞌBho nyʋ ꞌweeꞌa ꞌꞌyigbeyi ɛ-ɛ zaꞌa nɛ ꞌle yaku ꞌꞌyi ꞌle ɛ-ɛ po ꞌɛ ꞌzɔ. ¹⁴ꞌꞌYiflɔɛ ɛ ꞌyeꞌa ꞌle ɛ-ɛ nʋꞌa wɔnkulɩ ꞌbho ꞌɛ -antanyɩnɛꞌɛ ꞌnynɩ ꞌmʋ, nyʋ-ʋ -nɩꞌa ꞌnɔɔ ꞌkmʋ ꞌmʋ, -ʋ ꞌma-a ꞌꞌnyinynidɩꞌa nʋmʋ, ꞌɩnnɛ ɛ-ɛ ꞌlbha nɩ ꞌnʋ ꞌꞌyrabha ꞌmʋ ꞌle ɛ-ɛ ꞌꞌmaa ꞌnʋ dɩ ꞌꞌyrili. Ʋ-bʋ nyʋ-ʋ seꞌa -Lagɔ yibo, ɛ-ɛ ꞌtmʋʋ nʋ-oꞌo, nmi-i -po-ɛ ꞌka -jrɛɛ ꞌꞌlru ꞌle ɛ ꞌyeꞌa ti-nɩ ꞌꞌkɔmʋ, ʋn ꞌke ꞌɛ gʋgɔbolɛ lɛ nʋ, ꞌle ʋn ꞌke ɛ bʋbɔ. ¹⁵A ꞌye li-ɔ, ɛ-bɛ nmiꞌa ꞌsɔnnɛ ꞌmnɛ, ɛ ꞌye-e wɔnkuɛ ꞌle ɛ ꞌke -antanyɩnɛꞌɛ gʋgɔbolɛ ꞌmnɛ tinɩpʋpɔɔ ꞌmʋ po, ꞌle ɛ ꞌke -wluꞌa ꞌꞌbhuo, ꞌle, nyʋ-ʋ -see ꞌɛ bʋbɔdɩ ꞌwɔɔn, ɛ ꞌke nyʋ ꞌtmʋʋ ʋn ꞌke ʋ ꞌlbha ʋn ꞌke ꞌmɛ. ¹⁶Nyɔꞌꞌo nyɔ, -bho ɔ ꞌꞌdu nyɔtoope o, -bho ɔ ꞌꞌdu nyɔklagba o, -bho ɔ ꞌꞌdu ꞌꞌwlilɛbhleyi o, -bho ɔ ꞌꞌdu ꞌꞌpʋanlbhayi o, -bho ɔ ꞌꞌdu ꞌꞌyiflɔyi o, -bho ɔ ꞌꞌdu ꞌgeyikpaan o, ɛ-bɛ nmiꞌa ꞌsɔnnɛ -ke ꞌɛ nyʋ-ʋ ꞌye -ɔ -glaka -kpʋn -mʋ ꞌle ʋn ꞌke ɔ -antanyɩnmiꞌa ꞌmʋyibolɛ liꞌꞌdu, ꞌle, -bho ʋn -see ɛ ꞌɔ -linasʋ liꞌꞌdu ꞌle ʋn ꞌke ɛ ꞌle ꞌɔ ꞌꞌyigbeyi ꞌꞌdu. ¹⁷A ꞌye li-ɔ, ɛ-bɛ ꞌmʋyibolɛ ꞌmnɛ, nyʋ-ʋ ꞌbhle ꞌɛ li, ꞌwa ꞌꞌsɛ-ɛ ꞌbhɛɛꞌo ʋn ꞌke lɛ de ꞌle ꞌꞌbhalrɛɛke ʋn ꞌke lɛ ꞌpɛlʋ -po. Ɛ-bɛ ꞌmʋyibolɛ ꞌmnɛ, ɛ-bɛ nmi ꞌmnɛꞌɛ ꞌnynɩ moꞌo, ꞌle ꞌɛ ꞌnynɩ ꞌꞌduꞌo lɛꞌɛ ꞌcnɩyriꞌa ꞌꞌyri.

¹⁸A -gblee, -naagɩꞌa ꞌbhlenamʋ ꞌka-a! Nyɔ-ɔ ꞌbhleꞌa -naagɩ tenyɩ, ɔ zrɛ ɛ-bɛ nmi ꞌmnɛꞌɛ ꞌcnɩyriꞌa ꞌꞌyri, -ɛkedɩmaa, nyunyɔꞌɔ ꞌnynɩ moꞌo. ꞌƐ ꞌcnɩyriꞌa ꞌꞌyri-i ꞌmo-o -mɛɛloꞌa ꞌꞌyikʋkɔlɩ tan (666).

-Lagɔꞌɔ nyʋ-ʋ ꞌbhle-e ꞌlʋlre ꞌle yaku ꞌli.

¹Ɛ-bɛ nmiꞌa ꞌsɔnnɛ ꞌwlʋꞌa ꞌbho -jeyi ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌɩn ꞌye -ɔ li. Trɩ ʋn-ʋ ꞌlaꞌa *Siɔn, ꞌle ꞌɛ ꞌꞌkpi ɔ -nynaꞌa ti. Nyʋ -ke ꞌꞌyigbeyi ɔ -ke ꞌɔ -tɩta -Lagɔꞌɔ ꞌnynɩ ꞌcnɩ-ɛꞌɛ, ꞌɩnnʋ -ke ɔ -nɩꞌe ꞌle. Ʋ-bʋ nyʋ ꞌmnʋꞌa gwlɩ -nɩ -mɛɛsɔn nyʋ nyiɛꞌɛ kpɛꞌɛ ꞌꞌdui ꞌsɔn -gwlɩ -bue (144.000). ²Wlu -lue nʋꞌa -kaa -lrɛɛ, ɛ -sɔ -nɩꞌe-e ꞌle yaku ꞌli ꞌmʋ, ꞌɩn ꞌye ɛ ꞌbʋꞌwɔn. -Ka ꞌꞌdɩklagba ꞌmʋꞌa ꞌꞌniꞌa wlu kuꞌa ti, ꞌka-a ɛ -nɩꞌo. Ɛ-bɛ wlu ꞌmnɛ kɔɔꞌɔ-ɔ -dɛ ꞌꞌga. -Bho nyɔ -ka -dɔdɔ-ɔ bhla, -ka ꞌɛ wlu -nmɔꞌɔ ꞌle -loku ꞌmʋ ti, ꞌka ꞌmnɔ ꞌka-a ɛ-bɛ wlu -lue ꞌmnɛ -nɩꞌo -lrɛɛ. ³Ʋ-bʋ nyʋꞌa -gbogboyoko ꞌmnʋ, -Lagɔ -nɩꞌa ꞌbho ꞌɔ ꞌnynɩbhlekpe ꞌꞌkpi-e, lɩ nyiɛ-ɛ -nɩꞌa ti -ke nyʋklɩgbɩꞌa ꞌꞌyigbeyi ʋn -nynaꞌa ti ꞌle ʋn-ʋ bhleꞌe ꞌlʋlre -lue. ꞌWa ꞌlʋ ꞌmnɛ ɛ, nyɔ -lrɔɔ se ꞌbhɛɛ ɔ ꞌke ɛ yibo. Ʋ-bʋ nyʋꞌa -gwlɩ -mɛɛsɔn nyʋ nyiɛꞌɛ kpɛꞌɛ ꞌꞌdui ꞌsɔn -gwlɩ -bue -Lagɔ zetieꞌa ꞌle ꞌwa ꞌꞌnyinynidɩ ꞌmʋ ꞌnɔɔ ꞌbhlʋkpa ꞌꞌkpiꞌa nyʋꞌa ꞌꞌklumʋ, ꞌwa ꞌꞌsɛ-ɛ yibo nɛꞌo. ⁴Ʋ-bʋ nyʋ ꞌmnʋ -kpʋnꞌo-o -Lagɔ ꞌꞌyi ꞌle ʋn ꞌsaaꞌa li ꞌbho ꞌɔ ꞌꞌyigbeyi. -Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌle ʋn -ke ɔ-ɔ naꞌo ꞌwa tinɩɛꞌɛ klɛ ti. A -gblee, -Lagɔ zetie nʋ-oꞌo ꞌle ꞌwa ꞌꞌnyinynidɩ ꞌmʋ, ꞌle ꞌwa -bonyunyuꞌa ꞌꞌklumʋ, ꞌle ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, -ka nyʋ-ʋ ꞌꞌluoꞌa ꞌwa -lololɩꞌa ꞌnyaanyaabhi ꞌmʋ ꞌle ʋn-ʋ ꞌꞌnyɩ ꞌɩ -Lagɔ, ꞌle ɩ ꞌke ꞌɔ lɩ ꞌꞌdu, ꞌka-a ʋn ꞌke ꞌle ꞌwa ꞌꞌbhiꞌa tinɩɛ ꞌle -za ꞌwee, ʋn ꞌke ɛ ʋn -nɩ ꞌsɔn -jeyi ꞌꞌnyɩ. ⁵Ʋn se sɩn ꞌbhle, ꞌle, lɛ-ɛ -ke dɩ nyʋ ꞌkʋ ʋ dɩ ꞌꞌyikpa, ɛ se -nɩ.

-Lagɔ gboꞌa -dalbhomʋ tan-a ꞌza-a ꞌɔ -zigleꞌa dɩ ꞌmʋ.

⁶A -gblee, ꞌɩn nʋꞌa -kaa, ꞌle ꞌɩn ꞌye ꞌle popo -lrɛɛ, ꞌle ꞌɩn ꞌye -Lagɔ gboꞌa -dalbhoyi -lue liꞌye, ꞌle ɔ-ɔ zi nɩꞌe yakutrubo. ꞌBhlʋkpaꞌꞌo ꞌbhlʋkpaꞌa nyʋ, ꞌcɛꞌꞌo ꞌcɛꞌɛ nyʋ, wluꞌꞌo wluꞌa nyʋ, nyʋꞌꞌo nyʋ-ʋ -nɩꞌa ꞌnɔɔ ꞌbhlʋkpa ꞌꞌkpi, -Lagɔꞌɔ ꞌꞌdɩzɩgɩ-ɩ -seeꞌa ꞌplʋ ꞌkpa yi, ꞌɩnnʋ ɔ yi ꞌɩ -bodɩmʋzanamʋ. ⁷ꞌle ɔ-ɔ poꞌo weze, ɔ-ɔ nʋꞌo: A ꞌꞌdu ꞌbho -Lagɔ ꞌle a ꞌke ꞌɔ ꞌnynɩ ꞌꞌyiꞌbhɛɛ! -Ɛkedɩmaa, -nɔɔ -ke ti ɔ ꞌka nyʋ -zigle -tu, ɛ nyni-oꞌo. Ɔ-bɔ -Lagɔ -yaꞌa yaku-e, ꞌbhlʋkpa-e, ꞌtɔnni -ke ꞌꞌni -lrɩɩ ti a, a bʋbɔ nɔ!

⁸A ꞌye li-ɔ, -Lagɔ gboꞌa -antanyɩdalbhoyi ꞌmnɔ nʋꞌa -kaa, ɔ ꞌwlʋ-o ꞌbho -jeyi ꞌle ꞌɔ ꞌsɔnnɔ ꞌye ꞌbho -zi ꞌle ɔ-ɔ nʋꞌo: *Babilɔɔnʋgwlɔklagbaꞌa tisɔnɔɔ nyni-ɔ! ꞌƐ tisɔnɔɔ nyni-ɔ! ꞌƐ nyʋ-ʋ ꞌnaa-a -Lagɔꞌɔ wlu ꞌꞌyi ꞌle ꞌwa dɩ ꞌɔ wluꞌa ꞌꞌyinɛɛɛ ꞌmnɛ ꞌye ꞌle ɛ-bɛ ꞌbhlʋkpa ꞌmnɛ ꞌꞌkpi ti-wa, ꞌle -Lagɔ-ɔ ꞌye ʋ ꞌɔ ꞌcɛklagba ꞌꞌkpi -ya mʋ.

^9-11A -gblee, -Lagɔ gboꞌa -dalbhomʋꞌa ꞌsɔnnɔ ꞌwlʋꞌa ꞌbho -jeyi, ꞌle ꞌwa tannɔ ꞌye ꞌbho ꞌkpa ꞌle ɔ-ɔ poꞌo weze, ɔ-ɔ nʋꞌo: Nmi-i -sɔꞌɔ ꞌꞌnukɔ -ke ꞌɛ gʋgɔbolɛ ʋn nʋꞌa lɛ, nyʋ-ʋ -ke ꞌꞌyigbeyi ꞌle ꞌꞌbhalrɛɛke nyʋ-ʋ -ke kwa ꞌmʋ ʋn-ʋ ꞌyeꞌa ꞌya ꞌnynɩꞌa ꞌmʋyibolɛ ꞌꞌdu mʋ a, ꞌle wɔnkpʋnnmɔ ꞌke ꞌle ꞌꞌkɔpʋ ꞌli -nɩ, -bho nyɔ -see ɛ ꞌꞌni ꞌꞌkpi po ꞌle ɛ ꞌke wɔn ꞌyɔɔ, -ka ɛ kuꞌa wɔn, nyʋ-ʋ ꞌyeꞌa ɛ-bɛ nmi ꞌmnɛ -ke ꞌɛ gʋgɔbolɛ bʋbɔ mʋ a, ꞌka-a -Lagɔ-ɔ ꞌye ꞌwa nyʋtu ꞌɔ ꞌcɛklagba ꞌꞌkpi -ya mʋ, ꞌle, wɔnnyningnɛ -lue-e ꞌwlʋꞌa ꞌle nɛ ꞌmʋ, ɛ -ke nɛꞌɛ ꞌꞌbhuo -nɩ ꞌsɔn ꞌmʋ, ꞌle-e ʋn-ʋ ꞌye ꞌkle ꞌye -nɩ mʋ. -Lagɔ gboꞌa -dalbhomʋ -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ꞌbho ꞌwa ꞌꞌyigbeyi, ꞌbho-o ɛ-ɛ ꞌye -nʋ-ɛ -nɩ mʋ. A -gblee, -dayrʋ -ke ꞌmʋ ʋn-ʋ ꞌye nɩꞌa ꞌkle, ɛ -see ti-sɔ yi ꞌꞌkɔmʋkɔmʋ, ꞌle ʋn -see ꞌꞌyiflɔɛ ꞌye yi ꞌle -nɔɔꞌꞌo -nɔɔ ti.

¹²A ꞌye li-ɔ, nyʋ-ʋ ꞌma-a -Lagɔꞌɔ -nʋ, -ʋ ꞌꞌduꞌa ꞌbho ꞌɔ wlu ꞌle -ʋ deꞌa *Zezii ꞌꞌgwli, lɛ-ɛ -ke ꞌꞌlru ꞌꞌyi ʋn ꞌka ꞌꞌgwli-ku, ꞌɩnnɛ ꞌka-a!

¹³Ɔ gwɛꞌɛ wezepoɛ ꞌꞌyi a, ꞌle ꞌɩn ꞌye wlu -lue -lrɛɛ ꞌbʋꞌwɔn, ɛ ꞌye ꞌle yaku ꞌli ꞌmʋ-sɔ -nɩ ꞌle ɛ na ꞌɩnmʋ -bodɩ: Dɩ ꞌɩn-ɩ ꞌyeꞌa -ɩnmʋ -bodɩ ꞌmʋ-za mʋ, ꞌcnɩ ɩ! Ɩ-bɩ dɩ ꞌmnɩ, ꞌɩnnɩ ꞌka-a: -Ɛ ꞌwlʋꞌa -laa -zɩan, -bho nyɔ -ke -aꞌba -Kɔyi Zezii ꞌꞌsisri ꞌꞌyi ꞌle ɔ ꞌke ꞌmɛ, ɔ ꞌwa-a ti tenyɩ. Kɩn, -ziadɩ moꞌo, ꞌka-a *-Lagɔꞌɔ Lisaazuzu ꞌlɛꞌo. ꞌWa sɩasɩaa -gwɛ ꞌnʋ-ʋ ꞌꞌkpi ti. Ʋn -flɔꞌɔ ꞌtɔ-ɔ ꞌꞌyi, -ɛkedɩmaa, -ka ʋn nʋꞌa ꞌꞌyrilinmɔlɛ ꞌnɔɔ ꞌbhlʋkpa ꞌꞌkpi, ꞌwa lbhʋꞌa ꞌꞌyriꞌa ꞌbɩ-ɩ ꞌye-ɛꞌɛ, ꞌɩnnɛ -tɔ nɛꞌo, ꞌle, ɛ-bɛ lbhʋnʋnynɩzɛgɛ ʋn ꞌbhleꞌa ꞌꞌkpi, ʋn -ke ɛ -naꞌo.

-Lagɔꞌɔ -zigleꞌa -nɔɔ nyni-oꞌo.

¹⁴A -gblee, ʋ-bʋ -Lagɔ gboꞌa -dalbhomʋ ꞌmnʋ ꞌwlʋꞌa ꞌbho -jeyi a, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e yakuꞌa -druku li. Nyɔ -lue -ke nyunyɔꞌɔ ꞌꞌyu gʋgɔꞌɔ, ꞌɩnnɔ -nɩꞌe ꞌle ɛ ꞌmʋ. ꞌNynɩbhlekwloo -ɛ -nʋ-ɛꞌɛ sanu ꞌmʋ, ꞌɩnnɛ ɔ deꞌe ꞌꞌlru, ꞌle, -jrɛɛ-ɛ ꞌꞌnmaꞌa, -ɛ ꞌꞌkwlɛɛꞌɛ ꞌmʋ, ɔ ꞌbhle ꞌɛ kwa. ¹⁵ꞌƖn -ka ꞌle-e gbʋ -lrɛɛ, -Lagɔ gboꞌa -dalbhoyi -lue -lrɔɔ -sɔꞌɔ-ɔ *-Lagɔꞌɔ bʋbɔbhlegboꞌa lisaabudu ꞌli, ꞌle ɔ ꞌye -wlu vevlele, ꞌle ɔ na nyɔ-ɔ -nɩꞌa yakuꞌa -druku ꞌmʋ -bodɩ: -Jrɛɛ -ɩn ꞌbhleꞌa ꞌbho kwa, -ka nyɔ-ɔ cɛ nɩ ꞌnɛ lɩꞌa ꞌyɔzanɩ, ꞌya cɛcɛnɔɔ ti, -ka -lue ꞌmnɔ, mu, nyʋ-ʋ -nɩꞌa ꞌle ꞌbhlɩkpɩ ꞌꞌkpi, -ɩn ꞌke ʋ tapi ꞌmʋti-za, -ɩn ꞌke ʋ -dalue tide, -ɛkedɩmaa, ꞌwa -zigleꞌa -nɔɔ nyni-oꞌo.

¹⁶Nyɔ-ɔ -nɩ ꞌka ꞌle yakuꞌa -druku ꞌmʋ, -Lagɔ gboꞌa -dalbhoyi ꞌtmʋʋ ꞌnɔ -kaa, ꞌle ɔ ꞌye ꞌmʋ-sɔ, ɔ ꞌye mu, ꞌle, -ka ɔ ꞌlɔ ꞌɔ ꞌꞌyi ꞌtɩn, ɔ ꞌye -kaa nʋ.

¹⁷A ꞌye li-ɔ, ɔ de ꞌʋ -kaa -dalue ti a, ꞌle -Lagɔ gboꞌa -dalbhoyi -lue -lrɔɔ ꞌye ꞌbho ꞌɔ lemʋ bhla. Ɔ -sɔꞌɔ-ɔ yaku ꞌli. -Lagɔꞌɔ bʋbɔbhlegboꞌa lisaabudu ꞌli ɔ ꞌwlʋꞌo. ꞌMʋkwlɛɛjrɛɛ-ɛ ꞌꞌnmaꞌa, ꞌɩnnɛ ɔ ꞌbhleꞌe kwa -lrɛɛ.

¹⁸-Lagɔ gboꞌa -dalbhoyi ꞌmnɔ -nɩ ꞌbho, ꞌle -lue -lrɔɔ ꞌye ꞌda. -Gbagbʋ -nɩꞌa ꞌle -Lagɔꞌɔ bʋbɔblegboꞌa lisaabudu ꞌli, -ɛ -ke ꞌꞌkpi ʋn-ʋ za nɩꞌa -Lagɔꞌɔ *ꞌsraga, ꞌbho-o ɔ ꞌwlʋꞌo. Ɔ-bɔ ɔ, ɔ ꞌbhle-e wɔnkuɛ ꞌbho nɛ ꞌꞌkpi, ꞌle ꞌɔ -Bolagɔ gboꞌa -dalbhoyi ꞌbhleꞌa -jrɛɛ kwa, ɔ ꞌye wlu yayi po, ɔ ꞌye ɔ ꞌla, ꞌle ɔ na: -Gbʋ ꞌnɔɔ! -Bho lezɛɛntuꞌa ꞌꞌbhi zaan, -ka nyɔ-ɔ ꞌꞌluoꞌa -jrɛɛ ꞌmʋ ꞌle ɔ-ɔ zɩ ꞌɩ, ɔ-ɔ po ꞌɩ -zrʋʋ ꞌmʋ a, -ka -lue ꞌmnɔ, mu -kaa ꞌle ꞌbhlɩkpɩ ꞌꞌkpi, -ɩn ꞌke ꞌꞌnyinynidɩꞌa nʋmʋ tapi ꞌmʋti-za, -ɩn ꞌke ʋ -dalue tide ꞌle -ɩn ꞌke ʋ ti-za. ¹⁹A -gblee, -ka nyɔ-ɔ ꞌꞌluoꞌa -jrɛɛ ꞌmʋ ꞌle ɔ-ɔ zaꞌa lezɛɛntuꞌa ꞌꞌbhi, ɔ-ɔ po ꞌɩ -zrʋʋ ꞌmʋ ꞌle -dedeyibhie -ke ꞌli ʋn-ʋ ꞌꞌpli nɩ nɩꞌa ꞌya ꞌꞌni ꞌmʋ, ʋn-ʋ ꞌkpɩ ꞌɩ ꞌle, ꞌka-a -Lagɔ gboꞌa -dalbhoyi nʋ ʋꞌo. Ɩ-bɩ dɩ-ɩ ziꞌa -laa, ꞌɩnnɩ -tɔꞌɔ -ka -Lagɔꞌɔ ꞌcɛklagbaꞌa -kʋta -nɩ ꞌnʋ ꞌꞌkpi. ²⁰A ꞌye li-ɔ, ʋ-bʋ nyʋ ꞌmnʋ, ꞌwa ꞌꞌkpidɩ -ke lezɛɛnꞌɛ ꞌꞌbhiꞌa dɩ gʋgɔꞌɔ-ɔ ꞌꞌyiti -lrɛɛ. -Ka nyɔ-ɔ vlɔtɔ ꞌnɩ a, ꞌle ꞌya ꞌꞌni-i ziꞌa ti, ꞌka-a -Lagɔ gboꞌa -dalbhoyi nʋꞌo ʋ-bʋ nyʋ ꞌmnʋ. A -gblee, ɔ ꞌkʋ ʋ -kaa nʋ a, ɔ -ke ʋn ꞌda-a ꞌꞌgbe, ꞌle ꞌwa nymɔ ꞌye tizi -ka ꞌꞌnigblʋ. ꞌƐ titɛɛ ꞌbhɛɛꞌɛ-ɛ kiloꞌa -gwlɩ -bue -gwlɩ nyiɛ. -Ka -yɔ ɛ -tɛꞌɛ ꞌmʋ a, -gba, -bho nyɔ ꞌꞌsii ꞌkɩ ꞌle ꞌɛ kɔ -sieko ti, ꞌɛ ꞌꞌlruꞌa ꞌꞌsɛ nyɔ ꞌke ꞌkɩ liꞌye.

-Lagɔ gboꞌa -dalbhomʋ -mɛɛsɔn -ke lɩ -mɛɛsɔn-ɔ -yaꞌa nyʋ ꞌkleyeɛɛ ꞌꞌkpi.

¹Ɩ ziꞌa -kaa, ꞌle ꞌɩn ꞌye yaku ꞌꞌyi popo -lrɛɛ. ꞌƖn nʋꞌa -kaa, *wɔnkulɛklagba -lue-e maꞌa nyɔ wɔnti, ꞌɩn ꞌye -ɛ li. Ɛ-ɛ ꞌmo-o -Lagɔ gboꞌa -dalbhomʋ -mɛɛsɔn-ɔ ꞌbhleꞌa nyʋꞌa ꞌklekpiyalɩ -mɛɛsɔn kwa. Nyʋ-ʋ seꞌa -Lagɔ yibo, ꞌcɛ ɔ -po ꞌnʋ kwa ꞌle ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ɔ gbo ꞌꞌbhiti, ꞌya gbɔmʋbhɔɔlɩ moꞌo.

²A -gblee, ꞌɩn nʋꞌa -kaa, ꞌɩn ꞌye-e lɛ -lue li. Ɛ kɔɔꞌɔ-ɔ ꞌꞌniklagba ꞌle ɛ -nɩꞌe ꞌꞌwlelaa, -ka ꞌꞌyena, ꞌle nɛ -nɩꞌe ꞌle ɛ kɔ. A ꞌye li-ɔ, ꞌbho -antanyɩnmi-e, ꞌɛ gʋgɔbolɛ -ke ꞌɛ ꞌnynɩꞌa ꞌcnɩyriꞌa ꞌꞌyri ꞌꞌkpi nyʋ-ʋ kuꞌa ꞌkpa ꞌꞌyi, -ʋ nʋꞌa -Lagɔꞌɔ ꞌgwlʋdɩ, ꞌɩn ꞌye -ʋ li -lrɛɛ. Ɛ-bɛ ꞌꞌniklagba ꞌmnɛꞌɛ ꞌꞌyigbeyi ʋn -nynaꞌa ti, ꞌle, -dɔdɔ ʋn ꞌyeꞌa ʋn ꞌke -Lagɔꞌɔ ꞌnynɩ ꞌꞌyiꞌbhɛɛ -nɩ, ʋn ꞌbhle ꞌɩ kwa. ³*Moyiizɩ ꞌma-a -Lagɔꞌɔ lbhʋnʋyi, ꞌlʋ ɔ -ke *Izrayɛɛlɩkɔmʋ ꞌbhleꞌa -bɛnyɩ -Lagɔꞌɔ ꞌnynɩꞌa ꞌꞌyibhɛɛɛꞌɛ kamʋ, ꞌle, *ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ɛ-bɛ ꞌlʋ -lue ʋn ꞌbhleꞌa ꞌɔ dɩ -lrɛɛ, ʋn ꞌye ɛ ꞌbho ꞌꞌdu ꞌle ʋn-ʋ nʋꞌo:

-Aꞌba -Kɔyi -Lagɔ, -ɩnmɔ kuꞌa wɔn, -ɔ ziꞌa lɛꞌꞌo lɛ, -aꞌa nʋnʋdɩ-ɩ ꞌbhɛɛ-ɛ ꞌꞌyi ꞌle nyɔ se ɩ wɔnyiꞌbhɛɛ. -Ɩnmɔ -kɔꞌɔ ꞌbhlɩkpɩyowli ꞌwee, -aꞌa nʋnʋdɩ-ɩ ꞌmo-o -ziadɩ ꞌle ɩ ꞌsrɛɛꞌɛ ꞌꞌyi. ⁴-Aꞌba -Kɔyi, nyɔ yɔɔ -see ꞌbho -ɩnmʋ ꞌꞌdu yiꞌa? Nyɔ yɔɔ -see ꞌwɔn yi, ɔ ꞌke -aꞌa ꞌnynɩ ꞌꞌyiꞌbhɛɛꞌɛ? -Ɩn -nɩ -lue ꞌtɩn, nyɔ se ꞌbhɛɛ ɔ ꞌke -ɩnmʋ linyni. Nyɔꞌꞌo nyɔ-ɔ -nɩꞌa ꞌbhlɩkpɩ ꞌꞌkpi, ɔ-ɔ ꞌye-e -yi -mʋ, ɔ ꞌke -ɩnmʋ ꞌkolri wɔnyi glu po, ɔ ꞌke -ɩnmʋ bʋbɔ, -ɛkedɩmaa, ɔ -gwɛꞌɛ-ɛ -aꞌa ꞌꞌyrilinmɔkpli ꞌꞌyrili.

⁵Ʋn gwɛꞌɛ -kaa bhlebhlea ꞌꞌyi, ꞌle ꞌɩn ꞌye ꞌle popo -lrɛɛ. ꞌƖn -ka ꞌle-e gbʋ, *-Lagɔꞌɔ bʋbɔbhlegboꞌa lisaabudu katiꞌe-e wɔn ꞌle yaku ꞌli, ꞌle ꞌɩn ꞌye ɛ liꞌye. ꞌƖnnɛ nyʋ-ʋ ꞌlaꞌa -Lagɔꞌɔ -denaꞌa *gbedeti -lrɛɛ. ⁶Ɛ katiꞌa -kaa wɔn ɔ, ꞌle, -Lagɔ gboꞌa -dalbhomʋ -mɛɛsɔn-ɔ ꞌbhleꞌa nyʋꞌa ꞌklekpiyalɩ -mɛɛsɔn kwa -lue -lue, ʋn ꞌye ꞌle ꞌɛ ꞌlimʋ ꞌda, ꞌɩn ꞌye ʋ liꞌye. -Banɩpli nʋꞌa ꞌꞌwleewle, ꞌɩnnɩ ʋn -paꞌa ꞌmʋ, ꞌle ʋn -bhlaꞌa ꞌbho ꞌya ꞌꞌkpi sanuꞌa ꞌꞌbɛtʋ. ⁷ꞌLe, lɩ nyiɛ-ɛ -nɩꞌa ti, ꞌya -lue ꞌye sanuꞌa ꞌꞌkɔpɩ -mɛɛsɔn ꞌmʋꞌꞌluo, ɔ ꞌye ɩ -Lagɔ gboꞌa -dalbhomʋ -mɛɛsɔn ꞌmnʋ -jeyi ꞌꞌnyɩ. Ɩ-bɩ ꞌꞌkɔpɩ ꞌmnɩ, -aꞌba -Kɔyi ꞌꞌKɔgwlɛlagɔꞌɔ ꞌcɛ ɔ-ɔ ꞌyeꞌa nyʋ ꞌꞌkpi -ya mʋ, ꞌɩnnɩ ꞌꞌyiꞌe ꞌle ꞌya ꞌlimʋ -lue -lue. ⁸Ɛ-bɛ -Lagɔꞌɔ bʋbɔbhlegboꞌa lisaabudu ꞌmnɛ nʋꞌa -kaa, ɛ ꞌꞌyi-e -dayrʋ. -Ka -Lagɔ kuꞌa wɔn, ꞌɔ ꞌnynɩ ꞌbhɛꞌɛ ꞌꞌyi ꞌle ɔ -nɩꞌa ꞌle, ɛ-bɛ -dayrʋ ꞌmnɛ, ꞌɩnnɛ -tɔ nɩꞌo, ꞌle nyʋꞌa ꞌklekpiyalɩ -mɛɛsɔn -Lagɔ gboꞌa -dalbhomʋ ꞌbhleꞌa kwa, -bho ɩ -see ꞌbho ti-gwɛ, nyɔ se ꞌbhɛɛ ɔ ꞌke ꞌle pa.

-Lagɔ-ɔ ꞌya-a nyʋ ꞌkleyeɛɛ ꞌꞌkpi ꞌle ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ɔ gbo ꞌꞌbhiti.

¹A -gblee, ʋ-bʋ -Lagɔ gboꞌa -dalbhomʋ ꞌmnʋ ꞌbhle ꞌɩ -kaa kwa, ꞌle ꞌɩn ꞌye wluklagba -lue ꞌbʋꞌwɔn. Ɛ -sɔꞌɔ-ɔ ꞌle *-Lagɔꞌɔ bʋbɔbhlegboꞌa lisaabudu ꞌli ꞌle ɛ na ʋ -bodɩ: ꞌꞌKɔpɩ a ꞌbhleꞌa, ꞌcɛ -Lagɔ-ɔ ꞌyeꞌa nyʋ ꞌꞌkpi -ya mʋ, -ɩ ꞌꞌyiꞌa ꞌle ꞌya ꞌlimʋ -lue -lue, a ꞌwlɩ ɩ ti ꞌle ꞌbhlʋkpa ꞌꞌyi!

²Wlu ꞌmnɛ -gwɛꞌɛ ꞌle -loku ꞌmʋ ti, ꞌle -Lagɔ gboꞌa -dalbhomʋꞌa -antanyɩnɔ ꞌye ꞌmʋ-sɔ, ɔ ꞌye mu ꞌle ɔ ꞌye ꞌɔ nɛ tiꞌwla. Ɔ ꞌwlɛ ꞌɛ ti, nyʋ-ʋ ꞌbhleꞌa -antanyɩnmiꞌa ꞌmʋyibolɛ li, ꞌle ꞌɛ gʋgɔbolɛ ʋn nʋꞌa lɛ, -ʋ bʋbɔ ꞌnɛ ɛ, ꞌle, ꞌꞌjiklɩgbɩ-ɩ ꞌꞌvuvloꞌa, ɩ ꞌye ʋ ꞌꞌlruꞌwla.

³ꞌLe -Lagɔ gboꞌa -dalbhomʋꞌa ꞌsɔnnɔ ꞌye ꞌɔ nɛ tiꞌwla ꞌle ꞌtɔnni kɔ. Ɛ nʋꞌa -kaa, ɛ klɔn-oꞌo -ka ꞌmɛyiꞌa nymɔ, ꞌle, tinɩlɩ ꞌwee ɛ ꞌbhleꞌa kɔ, ɩ ꞌye ꞌmɛ.

⁴A -gblee, -Lagɔ gboꞌa -dalbhomʋꞌa tannɔ nʋꞌa -kaa, ɔ ꞌwla-a ꞌɔ nɛ ꞌle ꞌꞌnigblɩ -ke ꞌꞌnilru ꞌꞌwe kɔ ti, ꞌle ɩ ꞌye nymɔ ꞌmʋ -zɛ. ⁵Ɩ -zɛꞌɛ nymɔ ꞌmʋ a, ꞌle, -Lagɔ gboꞌa -dalbhoyi ꞌꞌduꞌa ꞌꞌni ꞌꞌwe ꞌꞌyrili, ꞌɩn ꞌye ꞌɔ wlu ꞌbʋꞌwɔn ꞌle ɔ na: -Ɩn -nɩ -lue ꞌtɩn, -ɩnmɔ ꞌma-a ꞌꞌKɔgwlɛyi, -ɩnmɔ -kɔꞌɔ lɩ ꞌwee, nyʋ-ʋ seꞌa -ɩnmʋ yibo, -ka -ɩn -nɩ ꞌʋ ꞌkleyeɛɛ ꞌꞌkpi -yanamʋ, ꞌka ꞌsrɛɛꞌɛ ꞌꞌyi. ⁶-Ɛkedɩmaa, ʋn ꞌlbha-a -aꞌa wluꞌa ꞌmʋtizamʋ -ke -aꞌa nyʋ -lrʋʋ, ʋn ꞌye ꞌmɛ, ꞌle ꞌwa nymɔ ꞌye tizi, ꞌle -mnaaa-a ꞌꞌnyɩ ꞌʋ ꞌtraamʋ nymɔ, ʋn ꞌke ꞌna. Lɛ ʋn ꞌbɔꞌɔ ti, ꞌɩnnɛ ʋn ꞌyeꞌo! ⁷Ɔ ꞌlɛꞌɛ -kaa, ꞌle ꞌɩn ꞌye wlu -lue -lrɛɛ ꞌbʋꞌwɔn. -Lagɔꞌɔ *ꞌsragazagbagbʋꞌa -da ɛ -sɔ -nɩꞌe ꞌmʋ ꞌle ɛ na: -Aꞌba -Kɔyi -Lagɔ, -ɩnmɔ kuꞌa wɔn, -ɔ -ziꞌa lɛꞌꞌo lɛ, -aꞌa ꞌmʋzadɩ-ɩ ꞌmo-o -ziadɩ ꞌle -aꞌa nyʋꞌa -zigleꞌa tutusʋ-ʋ ꞌsrɛɛꞌɛ ꞌꞌyi!

⁸Ɔ poꞌa wlu ꞌmnɛ ti a, ꞌle -Lagɔ gboꞌa -dalbhomʋꞌa nyiɛnɔ ꞌye ꞌɔ nɛ ꞌmʋꞌꞌluo, ɔ ꞌye ɛ ꞌyrʋ ꞌꞌyri ꞌwla. ꞌBho-o ɛ ꞌye -nɩꞌe ꞌꞌyiflɔɛ, ɛ ꞌke fan tenyɩ, ꞌle, -ka nɛ-ɛ sinꞌa nyʋ, ɛ ꞌke ʋ -kaa -sin -lrɛɛ. ⁹Ɛ-bɛ ꞌyrʋ ꞌmnɛ nʋꞌa -kaa -ziaka, ɛ ꞌkpa-a ꞌbho ꞌle ɛ-ɛ sin nʋꞌo tenyɩ, ꞌle, -Lagɔ ꞌꞌtayiꞌa ɩ-bɩ ꞌklekpiyalɩ ꞌmnɩ ꞌꞌyiti ꞌle ɩ ꞌye ꞌʋ ꞌꞌkpi yi a, ʋn-ʋ vlɛ nɔꞌo, ʋn-ʋ nyniꞌe ꞌɔ ꞌnynɩ wɔn. Ɛ -nɩꞌa -kaa ꞌmʋ a, ʋn -see tiꞌbɔ ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ɔ gbo ꞌꞌbhiti, ꞌle ʋn ꞌke ꞌɔ ꞌnynɩ ꞌꞌyiꞌbhɛɛ.

^10-11Ɩ ziꞌa -kaa, ꞌbhlɩkpɩ -ke nyʋ-ʋ bʋbɔꞌɔ ɛ-bɛ -antanyɩnmi ꞌmnɛ, ꞌle -Lagɔ gboꞌa -dalbhomʋꞌa -muunɔ ꞌye ꞌɔ nɛ ɩ ꞌꞌkpi tiꞌwla, ꞌle -kuyre ꞌye ꞌle ɩ ꞌꞌkpi kpʋn. A ꞌye li-ɔ, sɩasɩaa -die ꞌnʋ-ʋ ꞌꞌkpi ꞌꞌyiꞌa dɩ, ʋn-ʋ liꞌe ꞌnynɩ ꞌꞌyi, ꞌle, -Lagɔ -nɩꞌa ꞌle yaku ꞌli, ʋn-ʋ vlɛ nɔꞌo, ʋn-ʋ nyniꞌe ꞌɔ ꞌnynɩ wɔn. Ɛ -nɩꞌa -kaa ꞌmʋ a, ʋn -see ꞌwa ꞌꞌnyinynidɩ ꞌꞌyiyibo, ʋn -see ɩ kwa gbo -za ꞌle ʋn ꞌke ɔ gbo ꞌꞌbhiti.

¹²A -gblee, -Lagɔ gboꞌa -dalbhomʋꞌa -mɛɛlonɔ nʋꞌa -kaa, ɔ ꞌꞌluoꞌo-o ꞌɔ ꞌꞌkɔpʋ ꞌmʋ, ꞌle, -Lagɔꞌɔ ꞌcɛ-ɛ -nɩꞌa ꞌle ꞌɛ ꞌlimʋ, ɔ ꞌye ɛ ꞌle ꞌꞌnigblʋ ʋn-ʋ ꞌlaꞌa Eflatɩ kɔ tiꞌwla. ꞌBho -gbaa -lue ꞌmʋ, ɛ-bɛ ꞌꞌni ꞌmnɛ ma-oꞌo, ꞌle, ꞌbhlɩkpɩyowli ꞌꞌwe-e -nɩꞌa ꞌle ꞌyrʋꞌa ꞌwlʋnamʋ, ʋn ꞌye ꞌɛ -bɩsɩ ꞌꞌkpi -na, ꞌle ʋn ꞌye ɛ cɛ, ʋn ꞌye tʋvɔnamʋ yi. ¹³Ɛ-bɛ -nɔɔ ꞌmnɛ ti, ꞌle ꞌɩn ꞌye ꞌꞌnyinynidɩꞌa -zuzui tan liꞌye, Ɩ -ke -gbɛdɩ gʋgɔꞌo: -Lue ꞌwlʋ ꞌle *Sataanꞌa wɔn ꞌmʋ, ꞌle ꞌya ꞌsɔn-ɔ -sieꞌa ꞌbho, ɩ -sɔꞌɔ -antanyɩnmi -ke Sataanꞌa wluꞌa ꞌmʋtizayiꞌa wɔn ꞌmʋ -lue -lue. ¹⁴A ꞌye li-ɔ, ꞌꞌnyinynidɩꞌa tiyayiꞌa -zuzui moꞌo ꞌle ɩ-ɩ nʋꞌo *wɔnkulɩ. Ɩ-bɩ -zuzui tan ꞌmnɩ nʋꞌa -kaa, ɩ-ɩ ꞌmu-o ꞌbhlɩkpɩyowli ꞌwee tapi ꞌmʋtizanamʋ, ꞌle, -ka -Lagɔ kuꞌa wɔn, ɔ ꞌyeꞌa lɛꞌꞌo lɛ -zi, zɔ -ke ti ɔ-ɔ ꞌye ꞌɛ nyʋ ꞌꞌyi-tɔ -nɩ mʋ a, ɩ ꞌke ʋ ꞌꞌlruꞌgbʋʋ, ꞌle ɩ -ke ʋn ꞌke ɔ tʋ gbo kpa.

¹⁵ꞌLe -aꞌba -Kɔyi *Zezii ꞌye -kaa ꞌlɛ: A ꞌꞌdu aꞌba ꞌꞌbhi ꞌꞌyrili! -Bho nyɔ -see ꞌꞌyriyi ꞌꞌgwlide, -ka ɔ-ɔ ꞌdaa ꞌnɔ ꞌzɔ, -ka -lue ꞌmnɔ, ꞌka-a ꞌan leyinɔɔ-ɔ ꞌye nyʋ tiꞌgete mʋ -lrɛɛ. -Ka ꞌꞌsrojayi-i paꞌa ꞌɔ -banɩ ꞌmʋ ꞌle ɔ-ɔ deꞌa ti, -bho ʋn bhla lɛglɛ ꞌle ɔ -kaa -patɩ ꞌmʋ-sie, ꞌle ɔ -kaa tʋ ꞌmʋ mu a, -ka -lue ꞌmnɔ ꞌka-a, ꞌbho ꞌan leyinɔɔ ꞌꞌyi, nyɔ-ɔ ꞌyeꞌa ꞌmʋtiyaa mʋ, ꞌɩn -seeꞌa ꞌzɔꞌdaa yi a, ꞌɔ nyɔtu waꞌa ti!

¹⁶A -gblee, ɩ-bɩ ꞌꞌnyinynidɩꞌa -zuzui nʋꞌa -kaa, ɩ -zaꞌa-a ꞌbhlɩkpɩyowli ꞌꞌwe tapi ꞌmʋti, ꞌle ɩ ꞌye ʋ -dalue ꞌꞌlruꞌgbʋʋ ɩ -ke ʋn ꞌke -Lagɔ tʋ gbo kpa. ꞌLe *ꞌZuifʋwlu ꞌmʋ, ꞌbho-o ʋn-ʋ ꞌlaꞌa Amagedɔɔ.

¹⁷Ɩ ziꞌa -kaa, ꞌle -Lagɔ gboꞌa -dalbhomʋꞌa -mɛɛsɔnnɔ ꞌye ꞌɔ nɛ ꞌle yaku ꞌꞌyi tiꞌwla. ꞌƖn nʋꞌa -kaa, ꞌɩn ꞌwɔn-ɔ wluklagba -lue ꞌbɔ. Ɛ -sɔꞌɔ-ɔ *-Lagɔꞌɔ bʋbɔbhlegboꞌa lisaabudu ꞌli. ꞌƆ ꞌnynɩbhlekpe -ke ꞌꞌkpi ɔ -nɩꞌa a, ꞌbho-o ɛ -sɔ -nɩꞌe ꞌmʋ ꞌle ɛ na: Ɛ -gwɛ ꞌꞌyi-ɔ! ¹⁸Ɛ-bɛ wlu ꞌmnɛ -gwɛꞌɛ ꞌle -loku ꞌmʋ ti a, ꞌle -wlewle ꞌye yaku -kpoo ꞌꞌkpi cɛ, dɛ ꞌye ꞌꞌga ꞌle ꞌbhlʋkpa ꞌye -trɛ tenyɩ. -Lagɔ -kaaa nyunyu tiya a, ɛ-bɛ ꞌbhlʋkpaꞌa -trɛtrɛɛ ꞌmnɛ, ꞌɛ wɔnkuɛꞌɛ kamʋ, ꞌɩn -see ꞌɛ ꞌsɔnnɛ ꞌye ke. ¹⁹A ꞌye li-ɔ, ꞌɛ wɔnkuɛ ꞌmnɛꞌɛ dɩ ɛ -zaꞌa -gwlɔklagba ti ꞌle ɛ ꞌye ɛ ꞌmʋ -dogwigbɩɩklɩgbɩ tan cɛ, ꞌle, -gwlɛklɩgbɩ -lrɩɩ-ɩ -nɩꞌa ꞌle ꞌbhlɩkpɩ ꞌꞌkpi, ɩ ꞌye ti-sɔ -lrɛɛ. Ɩ-bɩ lɩ ꞌmnɩ, ꞌya lɛtu-u ziꞌa -kaa a, -Lagɔ -see *Babilɔɔnʋgwlɔklagba gboꞌmate: -Bho -kmakmanmɔ -nɩ ꞌle ꞌꞌkɔpʋ ꞌli, -ka nyɔ ꞌbhɛɛꞌo, ɔ ꞌke ꞌɔ -bonyunyɔ -glaka kpʋn ꞌle ɔ ꞌke ɛ ꞌna a, ꞌka-a -Lagɔ -yɛ ꞌɛ ꞌɔ ꞌcɛklagba ꞌꞌkpi. ²⁰ꞌLe ꞌꞌni ꞌye likpe ꞌwee ꞌꞌkpi-zi, ꞌle trɩ ꞌye ti-sɔ -lrɛɛ. ²¹ꞌLe, ꞌꞌniꞌa -sɩnkplo, -ɩ -ke -lueꞌa kwakuɛ-ɛ ꞌbhɛɛꞌɛ kiloꞌa -gwlɩ ꞌsɔn, ɩ-ɩ ꞌwlʋꞌo yaku ꞌꞌyi, ꞌle ɩ-ɩ ꞌgaꞌa nyʋ ꞌꞌkpi ti. Ʋ-bʋ nyʋ ɩ-ɩ ꞌgaꞌa ꞌꞌkpi ti a, ꞌkleyeɛɛ ɩ-ɩ yʋ ꞌʋ ꞌꞌkpi a, ɩ ꞌku-o wɔn tenyɩꞌa dɩ, ꞌle ʋn-ʋ vlɛꞌɛ -Lagɔ, ʋn-ʋ nyniꞌe ꞌɔ ꞌnynɩ wɔn.

ꞌꞌWɩlɩnynaakpʋꞌa ꞌꞌkpiꞌa ꞌꞌyi.

¹Ɩ ziꞌa -kaa, ꞌle ꞌꞌkɔpɩ -mɛɛsɔn-ɔ ꞌꞌyi ꞌka -Lagɔꞌɔ ꞌcɛ, -Lagɔ gboꞌa -dalbhomʋ -mɛɛsɔn-ɔ ꞌbhle ꞌɩ ꞌka kwa, ꞌwa -lue ꞌye ꞌɩnmʋ -bodɩ yi ꞌle ꞌꞌyritiyeɛɛ ꞌmʋ -lrɛɛ ꞌle ɔ na: Yi, -ka -Lagɔ-ɔ ꞌyeꞌa ꞌꞌwɩlɩnynaakpʋklagba ꞌkleyeɛɛ ꞌꞌkpi -ya mʋ, ꞌɩn ꞌke -kaa -ɩnmʋ ꞌꞌyi-tɔ! -Gblee, ꞌꞌwɩlɩnynaakpʋ ꞌɩn-ɩ ꞌꞌsiꞌa ꞌnynɩ, ꞌle ꞌꞌnisʋɩꞌa -dadudu wɔnli ʋn -deꞌe ti. ²-Ɩn ꞌye li-ɔ, ʋ-bʋ ꞌnynaakpʋ ꞌmnʋ -ke ꞌbhlɩkpɩyowli ꞌꞌwe ꞌꞌdu-o ꞌꞌbha. Nyʋ ꞌwee -nɩꞌa ꞌbhlɩkpɩ ꞌꞌkpi, -ʋ ꞌma-a ꞌꞌnyinynidɩꞌa nʋmʋ, nyɔ-ɔ ziꞌa nmɔ ꞌꞌkalɛ ꞌꞌyi, -ka ɛ-ɛ kpʋnꞌa ꞌgeyiɛ ꞌmʋ, ꞌle ɔ seꞌa ꞌbhɛɛ ɔ ꞌke ɛ ꞌꞌyitiꞌꞌtayi, ꞌka-a ʋ-bʋ ꞌꞌwɩlɩnynaakpʋ ꞌmnʋꞌa kplisasʋɩ ꞌjri -ʋ ꞌle, ꞌle ʋn-ʋ nʋ ɩꞌo -lrɛɛ.

³Ɔ-bɔ -Lagɔ gboꞌa -dalbhoyi ꞌmnɔ ꞌlɛꞌɛ -kaa, ꞌle *-Lagɔꞌɔ Lisaazuzuꞌa -jijri ꞌye ꞌɩnmʋ ꞌꞌkpi yi, ꞌle ɔ ꞌye ꞌɩnmʋ ꞌmʋꞌꞌluo ꞌle ɔ ꞌye ꞌle ꞌɩnmʋ ꞌꞌmusa ꞌꞌkpi kpa. ꞌƖn -nɩ ꞌle ꞌbɩ ꞌmnɩ ꞌꞌyi, ꞌle ꞌɩn ꞌye ꞌnynaakpʋ -lue liꞌye. Nmi -lue-e zaanꞌa -ka ꞌzoo, ꞌbho ꞌɛ ꞌꞌkpi ʋn -deꞌe ti. Wlu-u ꞌka -Lagɔꞌɔ ꞌnynɩ wɔn-nyni, ꞌle ɩ ꞌcnɩ-ɛꞌɛ ꞌbho ꞌɛ ku li. Ɛ-bɛ nmi ꞌmnɛ ꞌbhle-e ꞌꞌlrui -mɛɛsɔn -ke ꞌgbɩn -bue. ⁴Ʋ-bʋ ꞌnynaakpʋ ꞌmnʋ, -banɩ ʋn -paꞌa ꞌmʋ, ɩ zaanꞌo, ɩ -nmɔꞌɔ-ɔ ꞌꞌyrili ꞌle ɩ ꞌbhleꞌe ꞌpɛlʋ. Sanu -ke sɩkpɩ -lrɩɩ-ɩ nʋꞌa ꞌꞌwleewle, -ɩ -ke ꞌpɛlʋ-ʋ -kmuꞌa ꞌꞌyi tenyɩ, ꞌɩnnɩ ʋn ꞌꞌduꞌo li, ꞌle ʋn ꞌbhleꞌe sanuꞌa ꞌꞌkɔpʋ kwa. ꞌꞌNyinynidɩ ʋn-ʋ nʋꞌa ꞌbho -Lagɔꞌɔ ꞌꞌyigbeyi, ꞌɩnnɩ ꞌꞌyiꞌe ꞌle ɛ-bɛ ꞌꞌkɔpʋ ꞌmnɛꞌɛ ꞌlimʋ. ⁵A -gblee, wlu -lue-e ꞌbhleꞌa ꞌzɔ, ꞌɩnnɛ ꞌcnɩ-ɛꞌɛ ꞌbho ꞌwa ꞌꞌyigbeyi. Ɛ-bɛ wlu ꞌmnɛ, ꞌɩnnɛ ꞌka-a:

ꞌƖnmɔ ꞌmo-o *Babilɔɔnʋgwlɔklagba! ꞌƖnmɔ ꞌmo-o ꞌꞌwɩlɩnynʋkpakpɩ ꞌweeꞌa ꞌlotʋ! ꞌꞌNyinynidɩ ꞌwee -nɩꞌa ꞌnɔɔ ꞌbhlɩkpɩ ꞌꞌkpi, ꞌɩnmɔ ꞌbhleꞌe ꞌya ꞌꞌlru kwa!

⁶ꞌƖn -gbʋ ꞌnʋ ya a, nyʋ-ʋ ꞌma-a -Lagɔꞌɔ -nʋ, -ʋ ꞌꞌduꞌa ꞌbho *Zeziiꞌa wlu, ʋn ꞌlbha-a ꞌwa -dadudu ꞌle ꞌwa nymɔ ꞌye tizi ꞌle ꞌwa ꞌꞌbhuoꞌa ꞌgwlʋ ꞌye ꞌwɔn, ɛ ꞌye ꞌꞌkalɛ ꞌꞌyi zi, ꞌle, -ka nmɔ-ɔ ꞌlbhaꞌa ka nyɔ, ʋn -nɩꞌe -kaa. ꞌƖn ꞌye ꞌʋ -kaa li, wɔn ꞌma-a ꞌɩnmʋ ti tenyɩ.

⁷ꞌLe -Lagɔ gboꞌa -dalbhoyi -lue ꞌmnɔ ꞌye -kaa ꞌɩnmʋ ꞌꞌyiꞌlɛ: Leelɛ -ke wɔn-ɔ maꞌa -ɩnmʋ tiꞌa? -Ɩn ꞌye li-ɔ, ʋ-bʋ ꞌnynaakpʋ ꞌmnʋ, lɛ ʋn ꞌꞌduꞌa, ɛ ꞌbhle-e ꞌzɔ. Nmi-i ꞌbhleꞌa ꞌꞌlrui -mɛɛsɔn -ke ꞌgbɩn -bue, -ɛ -ke ꞌꞌkpi ʋn -deꞌa ti, ꞌka-a ɛ ꞌbhleꞌe ꞌzɔ -lrɛɛ. ⁸Ɛ-bɛ nmi -ɩn ꞌyeꞌa li, ɛ -nɩ ꞌko-o ti -bɛnyɩ. ꞌTraamʋ ꞌtɔ ɔ, ɛ ꞌmɛ-oꞌo. Ɛ -nɩꞌa -kaa ꞌmʋ, ɛ-ɛ ꞌye-e ꞌmɛnynɔɔ ꞌmʋ -sɔ -mʋ, ꞌle ɛ ꞌke -dogwigbaa ꞌli ꞌwlʋ, ɛ ꞌke ꞌꞌpiemʋ ꞌda. -Bho ɛ ꞌda -kaa a, ꞌle -Lagɔ ꞌke ɛ ti-za. -Gblee, -da -Lagɔ -seeꞌa -bhla ꞌkmʋ ti-ya ke, nyʋ-ʋ -nɩꞌa ti ꞌbho ꞌɔ ꞌꞌyigbeyi, ɔ ꞌcnɩ-e ꞌwa ꞌnynɩ ꞌle ꞌɔ ꞌꞌbɔgʋ ꞌli. Nyʋtɔlʋ -ke -nɩ -seeꞌa ꞌle ꞌɛ ꞌlimʋ ꞌcnɩ-ɛ, -bho ʋn ꞌye ɛ-bɛ nmi ꞌmnɛ li, wɔn-ɔ ꞌye -ʋ ti-ma -mʋ. -Ɛkedɩmaa, ɛ -nɩ ꞌko-o ti -bɛnyɩ ꞌle ɛ ꞌye ꞌtraamʋ ꞌmɛ ꞌle ɛ-ɛ ꞌye glu -sɔ mʋ ꞌwla ꞌle ɛ ꞌke ꞌkmʋ ꞌmʋ le yi.

⁹Ɔ poꞌa wlu ꞌmnɛ ti, ꞌle ɔ ꞌye -kaa ꞌɩnmʋ ꞌꞌyiꞌlɛ -lrɛɛ: -Gblee, -da nyɔ ꞌka -naagɩ ꞌbhle -nɩ ꞌle ɔ ꞌka dɩ ꞌmnɩ ꞌmʋtiꞌwɔn, ꞌbho-o ꞌka-a! ꞌꞌLrui -mɛɛsɔn ɛ-bɛ nmi ꞌmnɛ ꞌbhleꞌa, ɩ-ɩ ꞌmo-o trɩ -mɛɛsɔn -ke ꞌꞌkpi ʋ-bʋ ꞌnynaakpʋ -deꞌa ti. Ɩ-ɩ ꞌmo-o ꞌbhlɩkpɩyowli -mɛɛsɔn -lrɛɛ! ¹⁰ꞌWa -muu ꞌmɛ-oꞌo see. ꞌWa -lue -kɔꞌɔ nyʋ ꞌtraamʋ. ꞌWa -mɛɛsɔnnɔꞌɔ -nɔɔ -see -bhla nyni ke. -Bho ɛ nyni a, ꞌɔ nyʋꞌa -kɔkɔɔ -see ꞌmʋ-gwle yi. ¹¹Nmi-i -nɩ ꞌka ti -bɛnyɩ, -ɛ ꞌmɛꞌɛ ɛ, ꞌɩnnɛ ꞌmo-o ʋ-bʋ ꞌbhlɩkpɩyowli ꞌmnʋ, ꞌwa -mɛɛtannɔ. -Da ɛ -seeꞌa ꞌmɛ ke, ɛ-ɛ ma ꞌko-o ꞌwa -lue. -Bho ɛ yi le a, -Lagɔ-ɔ ꞌye -ɛ ti-za -mʋ.

¹²Nmiꞌa ꞌgbɩn -ɩn ꞌyeꞌa li, ꞌbhlɩkpɩyowli -bue -seeꞌa -bhla nyʋꞌa -kɔkɔɔ wɔnꞌꞌdu ke, ꞌɩnnʋ ɩ ꞌꞌduꞌo. Ʋbʋ ꞌmnʋ a, ʋn-ʋ ꞌye-e wɔnkuɛ ꞌye -mʋ ꞌle ʋn -ke ɛ-bɛ nmi ꞌmnɛ ꞌke nyʋ -kɔ -kaa -daan. ¹³Ʋn -nɩ -bue, ʋn-ʋ ꞌye-e -pɔlʋ ꞌmʋ-plɛ -mʋ, ꞌle ʋn ꞌke ꞌwa wɔnkuɛ ꞌmʋꞌꞌluo, ʋn ꞌke ꞌɛ lbhʋ nʋ. ¹⁴*-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ʋn-ʋ ꞌye -ɔ tʋ gbo -ya -mʋ, ꞌle ɔ ꞌke ʋ tʋ wɔn ꞌmʋ lu, -ɛkedɩmaa, ꞌɩnnɔ ꞌmo-o nyʋkɔmʋ ꞌweeꞌa -kɔyi, ꞌle ɔ ꞌꞌduꞌo ꞌbhlɩkpɩyowli ꞌweeꞌa ꞌꞌlrugayʋɛ -lrɛɛ. Nyʋ ɔ -zaꞌa ꞌbho, ɔ ꞌlaꞌa ɔ -ke ʋn ꞌke -na, -ʋ ꞌꞌduꞌa ꞌbho ꞌɔ wlu, ꞌɩnnʋ -ke ɔ-ɔ ꞌye gbobhete mʋ ꞌle ʋn ꞌke ʋ tʋ wɔn ꞌmʋ lu.

¹⁵Ɔ poꞌa wlu ꞌmnɛ ti a, ꞌle ɔ ꞌye ꞌbho ꞌɛ lemʋ wlu -lrɛɛ kɔ ꞌle ɔ na: ꞌꞌNi ꞌꞌwe -ɩn ꞌyeꞌa li, -ɩ -ke wɔnli ʋ-bʋ ꞌꞌwɩlɩnynaakpʋ -deꞌa ti, ɩ-ɩ ꞌmo-o ꞌbhlɩkpɩꞌꞌo ꞌbhlɩkpɩ ꞌꞌkpiꞌa nyʋ, wluꞌꞌo wluꞌa nyʋ. ¹⁶Nmiꞌa ꞌgbɩn -bue -ɩn ꞌyeꞌa li, ɩ -ke ɛ-bɛ nmiꞌa ꞌꞌbhuo-o ꞌye-e gbɔ-po -mʋ ꞌle ɩ -ke ʋ-bʋ ꞌnynaakpʋ ꞌmnʋ ꞌke ꞌꞌyidede. Ɩ-ɩ ꞌye -ʋ lɛꞌꞌo lɛ ku li-za -mʋ ꞌle ʋn ꞌke -patɩ -cɛ. Ɩ-ɩ ꞌye -ʋ -kpʋn -mʋ, ꞌle ɩ ꞌke ʋ ꞌlbha, ɩ ꞌke ʋ li. -Bho ɩ li ʋ, ꞌle ꞌwa nmitɔlʋ ꞌke ꞌbho -sie a, ɩ-ɩ ꞌye -ɩ ꞌꞌyri-po -mʋ ꞌle ɩ ꞌke -kʋn -gwɛ. ¹⁷A -gblee, -Lagɔꞌɔ ꞌꞌbhuo-o ꞌye ꞌɔ ꞌgwlʋdɩ ꞌmnɩ ꞌle ꞌya -pɔlʋ ꞌzɔ -po mʋ ꞌle ɩ ꞌke ɩ nʋ. Ɩ-ɩ ꞌye-e -pɔlʋ ꞌmʋ-plɛ -mʋ ꞌle ɩ ꞌke ꞌya wɔnkuɛ ꞌmʋꞌꞌluo, ɩ ꞌke ɛ-bɛ nmi ꞌmnɛꞌɛ lbhʋ nʋ, ɛ ꞌke nyʋ -kɔ. -Lagɔꞌɔ ꞌꞌbhuo-o nʋ ɛꞌo ꞌle ɩ ꞌke ꞌɔ ꞌgwlʋdɩ nʋ. Ɛ-bɛ nmi ꞌmnɛ, ɛ-ɛ ꞌye-e nyʋ -kɔ -mʋ, ꞌle, dɩ -Lagɔ -zaꞌa ꞌmʋ, ꞌya ꞌꞌyriꞌa ꞌbɩ ꞌke ꞌwlʋ.

¹⁸ꞌBho ꞌɛ lemʋ, ꞌnynaakpʋ -ɩn ꞌyeꞌa li a, ʋn kɔɔꞌɔ-ɔ -gwlɔklagba. ꞌBhlɩkpɩyowliꞌa klɛ-ɛ -nɩꞌa ꞌnɔɔ ꞌbhlɩkpɩ ꞌꞌkpi, ꞌɩnnɛ ꞌbhleꞌe wɔnkuɛ ꞌbho ꞌwa ꞌꞌkpi.

-Lagɔ-ɔ ꞌye-e *Babilɔɔnʋgwlɔ ti-za -mʋ.

¹Ɩ ziꞌa -kaa, ꞌle ꞌɩn ꞌye -Lagɔ gboꞌa -dalbhoyi -lrɔɔ liꞌye. ꞌLe yaku ꞌli ɔ ꞌwlʋꞌo. Ɔ ꞌbhle-e wɔnkuɛklagba -lue, ꞌle, ꞌɔ -vlavlɩ ꞌbhɛɛꞌɛ -Lagɔꞌɔ ꞌnynɩ ꞌꞌyi, ɩ -waꞌa ꞌbhlɩkpɩ ꞌꞌkpi ti. ²ꞌLe ɔ-ɔ poꞌo weze, ɔ-ɔ nʋꞌo:

*Babilɔɔnʋgwlɔklagbaꞌa tisɔnɔɔ nyni-ɔ! ꞌƐ tisɔnɔɔ nyni-ɔ! ꞌƐ lɛtu-u ꞌye ꞌtɔ-ɔ ꞌꞌnyinynidɩꞌa -zuzu ꞌweeꞌa gwlɔ ꞌꞌdu -mʋ, ꞌle ɩ ꞌke ꞌbho -de. Nɩkpɩ nyʋ-ʋ nʋꞌa ɩ se *liꞌsaa ꞌbho -Lagɔꞌɔ ꞌꞌyigbeyi, -ɩ ꞌlbhaꞌa nyʋ -sɩanyɩ ꞌꞌyi, ʋn-ʋ pleꞌa, ꞌbho-o ɩ-ɩ ꞌye -nɩ mʋ -lrɛɛ. ³-Lagɔ-ɔ ꞌye-e ꞌɛ -gwlɔtu ꞌɔ ꞌcɛklagba ꞌꞌkpi -ya -mʋ ꞌle ɛ ꞌke ti-sɔ, -ɛkedɩmaa, ꞌɛ nyʋ-ʋ ꞌnaa-a ꞌɔ wlu ꞌꞌyi, ꞌle, ꞌwa dɩ, ꞌɔ wluꞌa ꞌꞌyinɛɛɛ ꞌmnɛ ꞌye ꞌle ꞌbhlɩkpɩ ꞌwee ꞌꞌkpi ti-wa. ꞌWa kplisasʋɩ ꞌmnɩ nʋꞌa -kaa, ɩ ꞌjri-e ꞌbhlɩkpɩyowli ꞌꞌwe ꞌle, ꞌle ʋn-ʋ nʋ ɩꞌo. A -gblee, ɛ-bɛ gwlɔ ꞌmnɛꞌɛ nyʋ ꞌbhle-e ꞌꞌwlilɛ, ʋn ꞌye ꞌɛ ꞌꞌkalɛ ꞌꞌyizi. Nyʋ-ʋ -po ꞌnʋ ꞌwa ꞌtʋnʋlɩ kwa ꞌmʋ ꞌpɛlʋ, ʋbʋ ꞌga-oꞌo -lrɛɛ.

⁴Ɔ poꞌa wlu ꞌmnɛ ti a, ꞌle ꞌɩn ꞌye wlu -lrɛɛ ꞌbʋꞌwɔn. Ɛ -sɔꞌɔ-ɔ ꞌle yaku ꞌli ꞌle ɛ na:

A-bʋ ꞌma-a ꞌan nyʋ, a ꞌwlʋ ꞌbho ɛ-bɛ gwlɔ ꞌmnɛ ꞌmʋ, ꞌle, -ka ꞌɛ nyʋ nʋꞌa ꞌꞌnyinynidɩ, a -kaa -ka -lue ꞌmnɔ nʋ, ꞌle, ꞌcɛ ꞌɩn-ɩ ꞌye ꞌʋ ꞌꞌkpi -ya mʋ, a ꞌke ɛ wɔn ꞌmʋ cɛ. ⁵A -gblee, ꞌɩnmɔ -nɩꞌa ꞌnɔɔ yaku ꞌli, ꞌwa ꞌꞌnyinynidɩ -dieꞌe-e ꞌꞌyi tenyɩ ꞌbho ꞌan ꞌꞌyigbeyi. ꞌƖn -see ꞌya -lue ꞌtɩn ꞌmate. ⁶ꞌƐ dɩ, -ka ʋn klaꞌa nyʋ nyanɩ ꞌmʋ -bɛnyɩ, ʋ -nʋ-ɛ -kaa! -Yɩ ꞌye ꞌʋ ꞌꞌlruli-nʋ-ɛ mʋ, ɩ -zi ꞌwa nɩ wɔn ꞌmʋti! Nmɔ-ɔ kpʋnꞌa wɔn, -ɛ ziꞌa ꞌꞌkalɛ ꞌꞌyi, -ka nyɔ-ɔ ꞌꞌnyɩ ꞌɛ ꞌɔ -bonyunyɔ -glaka, -ka -lue ꞌmnɔ, ʋn ꞌye -kaa ꞌkle, ꞌle, ꞌkleyeɛɛ ʋn -yaꞌa nyʋ ꞌꞌkpi a, ɛ ꞌke ɛ ꞌmʋ-zi. ⁷-Ka ʋn ꞌꞌduꞌa ꞌꞌwlilɩbhlemʋklɩgbɩ ꞌle ꞌwa ꞌnynɩ-ɩ muꞌa a, ʋn ꞌye -kaa ꞌkle ꞌle ꞌwa dɩ ꞌke ngaze ꞌmʋꞌbhle. A -gblee, -bho ʋn -de ti, -ka ʋn-ʋ popoꞌa ꞌgwlʋti, ꞌkla-a ꞌka-a: -A-bʋ ꞌmo-o nyʋklɩgbɩ. -Aꞌba dɩ se ngaze ꞌmʋꞌbhle -ka -dɩgbalbhamʋ. Lɛ-ɛ ꞌka -amʋ ngaze ꞌꞌyi ꞌlbhaa, ꞌle -a ꞌka ꞌꞌvi, ꞌɛ lɛtu -see -amʋ -bodɩ -yi yi ꞌꞌkɔmʋ. ⁸A ꞌye li-ɔ, ꞌmʋ-e, ꞌꞌlrubhatiɛ -ke ꞌmɛmɛɛ ꞌɩn deꞌa ꞌbho ti ꞌwa dɩ ꞌle -ɩ -nɩ ꞌʋ wɔnfuonamʋ, ꞌɩnnɛɛnɛꞌɛ ꞌꞌlru ꞌꞌyi, ꞌɩn-ɩ ꞌye ɩ ʋ ꞌꞌkpi -ya mʋ ꞌle zɔ -lue ꞌtɩn ꞌli. ꞌƖn-ɩ ꞌye-e ꞌwa gwlɔ ꞌꞌyri-po -mʋ -lrɛɛ ꞌle ʋn -ke ɛ ꞌke sin, -ɛkedɩmaa, ꞌɩnmɔ nyʋꞌa -Kɔyi -Lagɔ ꞌye ꞌʋ -zigle -tu mʋ, ꞌɩn ꞌku-o wɔn.

⁹A -gblee, ꞌbhlɩkpɩyowli ꞌꞌwe ꞌwa kplisasʋɩ ꞌmnɩ jriꞌa ꞌle, -ʋ nʋ ꞌɩ a, -bho ɛ -ka sin ꞌle ʋn ꞌke ꞌɛ -dayrʋ liꞌye a, ʋn-ʋ ꞌye-e ꞌꞌvi -mʋ ngazeka, -ɛkedɩmaa, ꞌbho-o ꞌwa lɛmʋzɛɛ ꞌwlʋꞌo. ¹⁰Ʋn-ʋ ꞌye-e ꞌkleyeɛɛ -ple -mʋ ꞌle ʋn ꞌke gbɔꞌꞌtɔɔ ꞌle ʋn ꞌke -kaa ꞌlɛ:

-Yeee, ngazedɩ! -Yeee, ngazedɩ! *Babilɔɔnʋgwlɔklagba, -ɛ kuꞌa wɔn tenyɩ, ꞌɩnnɛ -gwɛꞌɛ -ka kʋn ꞌle -nɔɔtoope ꞌliꞌa!

^11-13A ꞌye li-ɔ, ꞌpɛlʋpomʋ -nɩꞌa ꞌbhlɩkpɩ ꞌꞌkpi, ʋn-ʋ ꞌye-e ꞌꞌvi -mʋ ngazeka, -ɛkedɩmaa, ꞌwa lɩꞌa deyi -see ꞌtɔ -nɩ yi. Ɩ-bɩ lɩ ꞌmnɩ, ꞌya ꞌnynɩ ꞌka-a: ꞌꞌyrilinmɔnɛtɩ -ke ꞌpɛlʋ-ʋ -kmuꞌa ꞌꞌyi-e, sanu-e, sɩkpɩ -lrɩɩ-ɩ nʋꞌa ꞌꞌwleewle, -ɩ ꞌbhleꞌa ꞌpɛlʋ-e, ꞌꞌyrilinmɔyrii, -ɩ -ke ꞌpɛlʋ-ʋ -kmuꞌa ꞌꞌyi tenyɩ -lrɛɛ, ꞌle -ɩ -ke tɔlʋ zaanꞌa-e, tui-i poꞌa ngnɛzɛgɛ ꞌle -ɩ -ke ꞌpɛlʋ-ʋ -kmuꞌa ꞌꞌyi-e, lɩ ʋn -baꞌa lʋɛnynɩ ꞌmʋ-e, ꞌcnɩ-ɩ poꞌa ngnɛzɛgɛ ꞌle -ɩ -ke ꞌpɛlʋ-ʋ -kmuꞌa ꞌꞌyi-e nmɔ-e, lilicna-e, lililɩꞌa ꞌyɔ ʋn-ʋ ꞌlaꞌa ꞌblee, ɩ -ke ꞌya ꞌpʋnzɩgɩ-e, -bhlii-e, ꞌbhlabhlɩ-e, -siekoe -ke ꞌꞌyrilinmɔkoko nyʋ ꞌꞌduꞌa bhɩ nyiɛ ꞌzɔ -siekoe-e jriꞌa ti, ꞌle ꞌwa ꞌpɛlʋpoɛ ꞌye mu ꞌle ɛ ꞌye ꞌgenynuukpɩɩnꞌa ꞌpɛlʋpoɛ ꞌꞌkpi bhla. ¹⁴-Bho ɛ -nɩ ꞌtɔ -kaa ꞌmʋ a, ꞌle ʋ-bʋ ꞌpɛlʋpomʋ ꞌmnʋ ꞌke ꞌwa lɩꞌa demʋꞌa dɩ ꞌꞌvi ꞌle ʋn ꞌke -kaa ꞌlɛ: Lɩ-ɩ nʋ ꞌʋ ꞌka ꞌtʋ, ʋn ꞌbɔꞌɔ ti ʋn ꞌke ꞌkɩ ꞌbhle ꞌꞌkɔmʋkɔmʋ, ɩ -ke ꞌwa ꞌꞌwlilɩ -nyniꞌe-e wɔn. -Yeee! Ʋn -see ꞌtɔ ꞌya lɛtu ꞌye yi ꞌꞌsɛ! ¹⁵ꞌLe, ɛ-bɛ gwlɔ ꞌmnɛ ꞌmʋ, ʋ-bʋ nyʋ-ʋ -po -nɩ ꞌka ꞌbho ꞌpɛlʋ ꞌle ʋn ꞌyeꞌa lɛ ꞌmʋ -zɛ, ʋn-ʋ ꞌye-e ꞌɛ ꞌkleyeɛɛ -ple -mʋ ꞌle ʋn ꞌke gbɔꞌꞌtɔɔ ꞌle ʋn ꞌke ꞌꞌvi ngazeka. ¹⁶-Bho ʋn -ka ꞌꞌvi, ꞌle ʋn ꞌke -kaa ꞌlɛ:

-Yeee, ngazedɩ! -Yeee! Babilɔɔnʋgwlɔklagbaꞌa nyʋꞌa dɩ ꞌbhle-e ngaze ꞌmʋ ꞌꞌsɛ! -Banɩ ʋn-ʋ pa ꞌka ꞌmʋ, ɩ -nmɔꞌɔ-ɔ ꞌꞌyrili, ɩ ꞌbhle-e ꞌpɛlʋ ꞌle ꞌya tɔlʋ zaanꞌo. Sanu -ke sɩkpɩ -lrɩɩ-ɩ nʋꞌa ꞌꞌwleewle, -ɩ -ke ꞌpɛlʋ-ʋ -kmuꞌa ꞌꞌyi tenyɩ, ꞌɩnnɩ ʋn-ʋ ꞌꞌdu ꞌko li. ^17-18Ɩ-bɩ ꞌwa -kɔkɔlɩ ꞌmnɩ, ꞌɩnnɩ -nyniꞌe -kaa wɔn ꞌle -nɔɔtoope ꞌliꞌa!

A -gblee, nyʋklɩgbɩ-ɩ triꞌa batoo-e, ꞌwa lbhʋnʋmʋ -ke nyʋ -lrʋʋ-ʋ -nɩꞌa ꞌle ꞌɛ ꞌlimʋ, -bho ɛ-bɛ gwlɔ ꞌmnɛ -ka sin ꞌle ʋn ꞌke ꞌɛ -dayrʋ liꞌye a, ʋn-ʋ ꞌye-e gbɔꞌꞌtɔɔ -mʋ ꞌle ʋn ꞌke ꞌꞌwɔ ꞌle ʋn ꞌke -kaa ꞌlɛ: -Yeee, ɛ-bɛ -gwlɔklagba -nɛɛ, ɛ se ꞌkɩ ꞌsɔnnɛ ꞌbhle ꞌnɔɔ ꞌbhlʋkpa ꞌꞌkpi ꞌꞌsɛ! ¹⁹-Bho ʋn ꞌye ɛ -kaa li a, ʋn-ʋ ꞌye-e -bɩsɩ ꞌꞌlruꞌwla -mʋ ꞌle ʋn ꞌke ꞌꞌvi ngazeka ꞌle ʋn ꞌke -kaa ꞌlɛ -lrɛɛ:

-Yeee, ngazedɩ! -Yeee! Babilɔɔnʋgwlɔklagbaꞌa dɩ ꞌbhle-e ngaze ꞌmʋ ꞌꞌsɛ! Nyʋ-ʋ ꞌbhleꞌa batoo, ꞌɛ nyʋꞌa ꞌꞌwlilɛbhleɛɛꞌɛ kamʋ, ʋn -zɛꞌɛ-ɛ lɛ ꞌmʋ ꞌwee. Ɩ-bɩ ꞌꞌwlilɩ ꞌmnɩ, ꞌɩnnɩ -nyniꞌe -kaa wɔn ꞌle -nɔɔtoope ꞌliꞌa!

A -gblee, ʋ-bʋ nyʋ ꞌmnʋꞌa ꞌꞌviviaꞌa ꞌꞌyigwɛnamʋ ꞌka-a!

²⁰-Lagɔꞌɔ nyʋ-ʋ -nɩꞌa ꞌle yaku ꞌli, -da ʋn-ʋ ꞌyeꞌa gwlɔ ꞌmnɛꞌɛ tisɔdɩ ꞌbʋꞌwɔn -nɩ mʋ a, -kaa wlu -lue-e ꞌye ʋ -kaa ꞌꞌyiꞌlɛ mʋ:

A-bʋ *Zeziiꞌa -dalbhomʋ-e, -Lagɔꞌɔ wluꞌa ꞌmʋtizamʋ -ke ꞌɔ nyʋ -lrʋʋ, a-bʋ -nɩꞌa ꞌle yaku ꞌli, a li ꞌbʋbʋa ꞌɛ tisɔdɩ, -ɛkedɩmaa, aꞌba kpa -Lagɔ -zaꞌo!

²¹A -gblee, -Lagɔ gboꞌa -dalbhoyi -lue-e kuꞌa wɔn tenyɩ nʋꞌa -kaa, sʋkpʋmua -ke ꞌꞌkpi ʋn-ʋ su nɩꞌa lɩꞌa ꞌyɔ, ꞌɛ -kaabolɛ kuꞌa kwa, ɔ ꞌꞌluo ꞌnɛ-ɛ ꞌmʋ ꞌle ɔ ꞌye ɛ ꞌle ꞌtɔnni kɔ ꞌꞌvuto ꞌle ɔ na:

-Ka ꞌɩn kukuꞌa ꞌmʋti ꞌle ꞌɩn ꞌyeꞌa sʋkpʋ -nɛɛ ꞌꞌnukɔ po, ꞌka-a -Lagɔ-ɔ ꞌye Babilɔɔnʋgwlɔ ti-za mʋ ꞌbho -gbaa -lue ꞌmʋ. -Bho ɔ nʋ -kaa a, ꞌle ɛ ꞌke wɔn-nyni ꞌwee, ɛ ꞌke ti-sɔ ꞌꞌkɔgwlɛka. Nyɔ -see ꞌɛ -budukpɩ ꞌye yi. ²²-Bho ɔ -zɛ ɛ -kaa ti a, nyʋ-ʋ bhlaꞌa -dɔdɔ-e, lɛglɛ-e, -gbakɔbheyi -ke bhlemʋ -lrʋʋ, nyɔ -see ꞌwa wlu -lue komu ꞌbʋꞌwɔn yi. Nyɔ -see ꞌbho lbhʋnʋyi -lue ꞌtɩn ꞌye yi. Nyɔ -see ꞌbho ꞌꞌsuꞌa wlu ꞌbʋꞌwɔn yi -lrɛɛ. ²³Nyɔ -see ꞌbho ꞌꞌnapɛꞌɛ -vlavlɩ liꞌye yi. -Ka nyʋ-ʋ kpaꞌa ꞌnynʋkpakpɩ ꞌle ʋn-ʋ liꞌa ꞌya ꞌbʋbʋa, ꞌya lɛtu -see ꞌbho -nʋ-ɛ -nɩ yi. Nyʋ-ʋ po nɩ ꞌka ꞌbho ꞌpɛlʋ -bɛnyɩ, ꞌwa ꞌnynɩ-ɩ mu ꞌko-oꞌo ɛ ꞌye -gwlɛ -lrɩɩ ꞌmʋꞌa ꞌpɛlʋpomʋ -zi, ꞌle ʋn-ʋ ꞌbhɛɛꞌɛ ꞌwa ꞌꞌbhi ꞌꞌyi, ꞌle ꞌꞌnyinynikpli -ke ꞌtʋ-ʋ -nɩꞌa ꞌle ꞌwa -pɔlʋ ꞌzɔ, -ɩ -ke ꞌli ʋn -deꞌa ti, ꞌle ꞌya ꞌmʋ ʋn-ʋ ꞌꞌmaa nɩꞌe ꞌbhlɩkpɩ ꞌweeꞌa nyʋ dɩ ꞌꞌyrili. ꞌYa dɩ -Lagɔ-ɔ ꞌye ɛ ti-za mʋ.

²⁴-Lagɔwluꞌa ꞌmʋtizamʋ -ke ꞌɔ nyʋ -lrʋʋ nyʋ ꞌlbhaꞌa ꞌle ꞌbhlɩkpɩ -lrɩɩ ꞌꞌkpi, -ʋ ꞌmɛꞌɛ ɛ, ɛ-bɛ gwlɔ ꞌmnɛ ꞌmʋꞌa nyʋklɩgbɩꞌa ꞌꞌlrudɩ moꞌo. ꞌƐ kamʋ ɔ-ɔ ꞌye ɛ ti-za mʋ -lrɛɛ.

-Lagɔꞌɔ nyʋ-ʋ ꞌbhɛɛ-ɛ ꞌɔ ꞌnynɩ ꞌꞌyi.

¹Ɩ ziꞌa -kaa, ꞌle ꞌɩn ꞌye nyʋꞌa -gbogboyokoꞌa wlu ꞌbʋꞌwɔn ꞌle yaku ꞌli, ꞌle ʋn-ʋ wluꞌo vevlele, ꞌle ʋn-ʋ nʋꞌo:

A ꞌbhɛɛ -aꞌba -Kɔyi -Lagɔꞌɔ ꞌnynɩ ꞌꞌyi! Nyunyuꞌa ꞌpʋnpʋan-e, ꞌnynɩꞌa ꞌꞌyibhɛɛɛ -ke wɔnkuɛ, ꞌɩnnɔ ꞌbhle ɩꞌo. ²-Ɛkedɩmaa, ꞌɔ ꞌmʋzadɩ-ɩ ꞌmo-o -ziadɩ ꞌle ꞌɔ nyʋꞌa -zigleꞌa tutusʋ ꞌsrɛɛꞌɛ ꞌꞌyi. A -gblee, ꞌꞌwɩlɩnynaakpʋklagba -nyniꞌa ꞌbhlɩkpɩ wɔn ꞌle ꞌwa kplisasʋɩ ꞌmʋ, ꞌɛ kamʋ ɔ -yʋ ꞌʋ ꞌkleyeɛɛ ꞌꞌkpi. Ʋ-bʋ ꞌnynaakpʋ ꞌmnʋ ꞌlbha-a ꞌɔ lbhʋnʋmʋ, ʋn ꞌye ꞌmɛ, ꞌɩnnɛ ꞌbhleꞌe ꞌnynɩꞌa dɩ ʋn ꞌyeꞌe -kaa ꞌkle.

³Ʋn ꞌlɛꞌɛ -kaa, ꞌle ʋn ꞌye ꞌbho wlu -lrɛɛ kɔ ꞌle ʋn na:

A ꞌbhɛɛ -aꞌba -Kɔyi -Lagɔꞌɔ ꞌnynɩ ꞌꞌyi! A -gblee, ɛ-bɛ -gwlɔ -nɩꞌa sinnamʋ, ꞌɛ -dayrʋ -see -cɛ yi, ꞌka-a ɛ-ɛ ꞌye ꞌya mʋ ꞌꞌkɔmʋ.

⁴Ʋn poꞌa wlu ꞌmnɛ ti a, ꞌle, -Lagɔ -deꞌa ꞌbho ꞌɔ ꞌnynɩbhlekpe ꞌꞌkpi ti a, nyʋklɩgbɩꞌa -gwlʋ -lue nyʋ nyiɛ -ke lɩ nyiɛ-ɛ -nɩꞌa ti, ʋn -ke ɩ ꞌye ɔ ꞌkolri wɔnyi glu po ꞌle ʋn -ke ɩ-ɩ bʋbɔ nɔꞌo ꞌle ʋn -ke ɩ-ɩ nʋꞌo:

-Ka a ꞌlɛꞌɛ ꞌtɩn, *ɩ -nɩ -kaa ꞌmʋ! -Aꞌba -Kɔyi -Lagɔꞌɔ ꞌnynɩ ꞌbhɛ-ɛ ꞌꞌyi!

ꞌNynɔkpagɔ.

⁵Wlu ꞌmnɛ -gwɛꞌɛ ꞌle -loku ꞌmʋ ti a, ꞌle ꞌɩn ꞌye wlu -lue -lrɛɛ ꞌbʋꞌwɔn. Ɛ -sɔ -nɩꞌe-e ꞌle -Lagɔꞌɔ ꞌnynɩbhlekpeꞌa ꞌꞌtroli ꞌmʋ ꞌle ɛ na:

Aꞌba ꞌwee, a-bʋ ꞌma-a -aꞌba -Kɔyi -Lagɔꞌɔ lbhʋnʋmʋ, a-bʋ ꞌnynɩbhlemʋ -ke nyʋ-ʋ seꞌa ꞌnynɩ ꞌbhle, a-bʋ ꞌꞌduꞌa ꞌbho ꞌɔ wlu, a ꞌbhɛɛ ꞌɔ ꞌnynɩ ꞌꞌyi!

⁶A ꞌye li-ɔ, ꞌɩn nʋꞌa -kaa, ꞌɩn ꞌwɔn-ɔ wlu -lue -lrɛɛ ꞌbɔ. Nyʋꞌa -daduduꞌa wlu moꞌo. -Ka ꞌꞌdɩklagba ꞌmʋꞌa ꞌꞌniꞌa wlu kuꞌa ti, ꞌka-a ɛ -nɩꞌo, ꞌle ɛ kɔɔꞌɔ -dɛ ꞌꞌga -lrɛɛ, ꞌle ɛ-ɛ ꞌlɛꞌɛ -kaa:

A ꞌbhɛɛ -Lagɔꞌɔ ꞌnynɩ ꞌꞌyi, -ɛkedɩmaa, -aꞌba -Kɔyi ꞌmnɔ ꞌku-o wɔn ɔ ꞌye lɛꞌꞌo lɛ -zi, ꞌle ɔ ꞌye nyʋꞌa -kɔkɔɔ wɔnꞌꞌdu! ⁷-A li ꞌbʋbʋa tenyɩ ꞌle -a ꞌke ꞌɔ ꞌnynɩ ꞌꞌyiꞌbhɛɛ! -Ɛkedɩmaa, *-Lagɔꞌɔ ꞌBhozayi, -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ꞌɔ ꞌnynɔkpagɔꞌɔ -nɔɔ nyni-oꞌo ꞌle ꞌɔ ꞌnynɔ ꞌye ꞌmʋ-pa. ⁸Ʋn ꞌꞌnyɩ -ʋ ꞌꞌyiflɔɛ, ꞌle, ꞌwa -banɩ ꞌfɩɩnꞌa ꞌmʋ, -ɩ nʋꞌa ꞌꞌwleewle, -ɩ ꞌsaaꞌa li, ʋn ꞌke ɩ ꞌmʋ-pa.

(A -gblee, ɛ-bɛ ꞌꞌyrilinmɔbana ꞌmnɛꞌɛ ꞌzɔ ꞌmo-o kplizɩgɩ -Lagɔꞌɔ nyʋ-ʋ nʋꞌa.)

⁹Ʋn gwɛꞌɛ -wluwlua ꞌꞌyi a, ꞌle -Lagɔ gboꞌa -dalbhoyi na ꞌɩnmʋ -bodɩ: ꞌCnɩ ꞌan wlu -nɛɛ: -Lagɔꞌɔ ꞌBhozayi, -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌɔ ꞌnynɔkpagɔꞌɔ -nɔɔ ꞌꞌyi, nyʋ ʋn ꞌlaꞌa lilidɩ, ʋn ꞌwa-a ti. ꞌBho ꞌɛ lemʋ ꞌle ɔ ꞌye ꞌbho wlu -lrɛɛ kɔ ꞌle ɔ na: Dɩ ꞌɩn -zaꞌa -laa ꞌmʋ a, ɩ-ɩ ꞌmo-o -ziadɩ, -ɛkedɩmaa, -Lagɔꞌɔ wɔnmʋwlu moꞌo. ¹⁰Ɔ ꞌlɛꞌɛ -kaa, ꞌle ꞌɩn ꞌye ɔ ꞌkolri wɔnyi glu po ꞌɩn ꞌke ɔ bʋbɔ, ꞌle ɔ na: -Gba, -aꞌa nʋ -kaa -le! -Lagɔꞌɔ wlu-u ꞌma-a -ziadɩ, *Zezii ꞌwɔɔnꞌɔ ꞌꞌkpi, -aꞌa ꞌlotʋꞌa ꞌꞌnynuu -ke -ɩn -de ꞌnɩ ꞌmʋ ti a, -ka a ꞌꞌduꞌa -Lagɔꞌɔ lbhʋnʋmʋ, ꞌka-a ꞌɩn -nɩꞌo -lrɛɛ. -Gblee, ɛ-bɛ -ziadɩ ꞌmnɛ, *-Lagɔꞌɔ Lisaazuzu ꞌmʋ ɔ-ɔ zi nɩꞌo ꞌle ꞌɔ wluꞌa ꞌmʋtizamʋ-ʋ zaꞌa ɩ-bɩ Zeziiꞌa ꞌꞌkpidɩ ꞌmnɩ nyʋ -bodɩ ꞌmʋ. -Ɩn ꞌye li-ɔ, -Lagɔ -ɩn ꞌke bʋbɔ.

*Zezii ꞌmo-o nyʋkɔmʋ ꞌweeꞌa -kɔyi.

¹¹Ɩ ziꞌa -kaa, ꞌle ꞌɩn ꞌye yaku liꞌye, ɛ ꞌye wɔn kati, ꞌle -siekoplu -lue ꞌye ꞌda. Nyɔ -lue-e -deꞌe ꞌbho ꞌɛ ꞌꞌkpi ti. Ʋn-ʋ ꞌlɔ -ɔ -Ziadɩꞌa ꞌmʋzayi -ke ꞌꞌYisrɛɛyi, -ɛkedɩmaa, ꞌɔ -zigleꞌa tutusʋ -ke ꞌɔ nyɔꞌɔ ꞌklekpiyɛɛɛ ꞌsrɛɛꞌɛ-ɛ ꞌꞌyi. ¹²ꞌƆ ꞌꞌyri-i vlan-oꞌo -ka nɛ ꞌle ɔ deꞌe ꞌnynɩbhlekwlooꞌa -dadudu ꞌꞌlru. ꞌBho ꞌɔ ku li, ꞌnynɩ -lue-e ꞌcnɩ-ɛꞌɛ ꞌbho. ꞌꞌSesinyɔ se ɛ yibo -bho ɛ -se ꞌɔ ꞌꞌsɛ. ¹³Ɔ -paꞌa-a -vilɔbana ꞌmʋ ꞌle ɛ -lreꞌe nymɔ. Ʋn-ʋ ꞌlɔ -ɔ -Lagɔwlu. ¹⁴ꞌꞌSroja -nɩꞌa ꞌle yaku ꞌli, ʋn -paꞌa-a ꞌmʋfɩɩnbanɩpli ꞌmʋ, ꞌle ɩ-ɩ nʋꞌo ꞌꞌwleewle. Ʋn -deꞌe-e ꞌbho ꞌwa -siekoepli ꞌꞌkpi ti, ꞌle ʋn-ʋ na ꞌnɔ kli. ¹⁵A -gblee, -blajrɛɛ-ɛ ꞌꞌnmaꞌa tenyɩ, ꞌɔ ꞌꞌyidedemʋ -nɩꞌa ꞌbhlɩkpɩ ꞌwee ꞌꞌkpi, ɔ ꞌkʋ ʋ tʋ wɔn ꞌmʋ -lu -nɩ a, ꞌɩnnɛ ꞌwlʋꞌo ꞌle ꞌɔ wɔn ꞌmʋ. ꞌƆ wɔnkuɛ-ɛ ꞌye-e ꞌbhlɩkpɩyowli ꞌweeꞌa wɔnkuɛ ꞌmʋ-zi -mʋ ꞌle ɔ ꞌke ꞌbhlɩkpɩ ꞌwee -kɔ, ꞌle, -ka nyɔ-ɔ zaꞌa lezɛɛnꞌɛ ꞌꞌbhi, ɔ-ɔ po ꞌɩ -zrʋʋ ꞌmʋ ꞌle -dedeyibhie -lue ꞌli, ꞌle ɔ-ɔ ꞌꞌpli nɩ nɩꞌa ꞌle ꞌya ꞌꞌni ꞌmʋ a, ꞌka-a, -aꞌba -Kɔyi -Lagɔ kuꞌa wɔn, -ɔ ziꞌa lɛꞌꞌo lɛ, ɔ-ɔ ꞌye ʋ ꞌɔ ꞌcɛklagba ꞌꞌkpi -ya mʋ. ¹⁶A -gblee, ꞌɔ -bana -ke ꞌɔ bhʋ li, wlu-u ꞌcnɩ-ɛꞌɛ ꞌbho, ꞌɩnnɛ ꞌka-a:

ꞌƖnmɔ ꞌmo-o nyʋkɔmʋ ꞌweeꞌa -Kɔyi, ꞌle ꞌɩn ꞌꞌduꞌo ꞌbhlɩkpɩyowli ꞌweeꞌa ꞌꞌlrugayʋɛ -lrɛɛ.

¹⁷A ꞌye li-ɔ, ꞌɩn nʋꞌa -kaa ꞌle ꞌɩn ꞌye yaku ꞌꞌyi popo. ꞌƖn -ka ꞌle-e gbʋ, -Lagɔ gboꞌa -dalbhoyi -lue -nynaꞌa-a ꞌle ꞌyrʋ ꞌꞌyi ti, ꞌle ɔ-ɔ poꞌo weze, nɩkpɩ ꞌwee ziꞌa ꞌle yakutrubo, ɔ-ɔ nʋ ꞌɩ -bodɩ: -Lagɔꞌɔ gɔklagbaꞌa dɩ, a yi ꞌwee, a ꞌke ꞌꞌlruꞌgbʋʋ! ¹⁸Nyʋ-ʋ ꞌma-a ꞌbhlɩkpɩyowli-e, ꞌꞌsrojaꞌa -klɩgbɩ-e, nyʋklɩgbɩ -lrʋʋ-e, -siekoe -ke ꞌya ꞌꞌkpitidemʋ-e, nyɔꞌꞌo nyɔ, -bho ɔ ꞌꞌdu ꞌgeyikpaan o, -bho ɔ -se ꞌgeyikpaan o, -bho ɔ ꞌꞌdu ꞌnynɩbhleyi o, -bho ɔ -se ꞌnynɩbhleyi o, a yi ꞌwee, a ꞌke ꞌɔ zienyɩ li! p ¹⁹Ɔ ꞌlɛꞌɛ -kaa, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ɛ-bɛ nmi -nɩ ꞌka-e, ꞌbhlɩkpɩyowli ꞌꞌwe -ke ꞌwa ꞌꞌsroja, -ʋ ꞌgbʋʋꞌa ꞌꞌlru, ʋn -ke -siekoꞌa ꞌꞌkpitideyi -ke ꞌɔ nʋ ꞌke tʋ vɔ, ꞌɩn ꞌye -ʋ li. ²⁰A -gblee, ʋ-bʋ nyʋ ꞌmnʋ nʋꞌa -kaa, ʋn ꞌkpʋn-o ɛ-bɛ nmi ꞌmnɛ -ke *Sataanꞌa wluꞌa ꞌmʋtizayi nʋꞌa *wɔnkulɩ ꞌle ɛ-bɛ nmi ꞌmnɛꞌɛ ꞌnynɩ ꞌmʋ. A ꞌye li-ɔ, nyʋ-ʋ ꞌbhleꞌa ꞌɛ ꞌmʋyibolɛ ku li, -ʋ bʋbɔꞌɔ ꞌɛ gʋgɔbolɛ, ꞌle ɩ-bɩ wɔnkulɩ ꞌmnɩ ꞌmʋ ɔ ꞌꞌma -nɩ ꞌnʋ dɩ ꞌꞌyrili. Ʋn kpʋn ꞌʋ -kaa a, ꞌle, ꞌꞌkɔgwlɛnɛ -ke ꞌmʋ wɔnnyningnɛ-ɛ ꞌwlʋꞌa a, ʋn ꞌye ꞌle ꞌwa yalɩ ꞌꞌvuto. ²¹A -gblee, ɔ-bɔ -nɩꞌa ꞌbho -sieko ꞌꞌkpi, -blajrɛɛ-ɛ ꞌwlʋꞌa ꞌle ꞌɔ wɔn ꞌmʋ, ꞌɩnnɛ ꞌlbhaꞌa ꞌwa nyʋ -yʋ -sieꞌa ꞌbho, ꞌle nɩkpɩ ꞌye yi, ɩ ꞌye ʋ li, ɩ ꞌye lbho.

-Lagɔ gboꞌa -dalbhoyi -lue ꞌgba-a *Sataan wɔnyi.

¹Ɩ-bɩ nɩkpɩ gwɛꞌɛ ꞌwa lilia ꞌꞌyi a, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e -Lagɔ gboꞌa -dalbhoyi li. Ɔ-ɔ ꞌsɔ-ɔ yaku ꞌli, ꞌle ɔ-ɔ ꞌꞌsiꞌe ti. Gblokobhlukuklagba -lue -ke -dogwiklagbaꞌa ꞌꞌsapɛ ɔ ꞌbhleꞌe kwa. ²Ɔ ꞌꞌsiꞌa ti a, -zree-e ꞌma-a ɛ-bɛ sɛn -nɩ ꞌka -bɛnyɩ, ʋn-ʋ ꞌlaꞌa ꞌꞌnyinynidɩꞌa tiyayi ꞌle ꞌꞌbhalrɛɛke ʋn-ʋ ꞌlaꞌa *Sataan, ꞌle ɔ ꞌye ɛ kwa ꞌmʋ tikpʋn, ɔ ꞌye ɛ san, ꞌle ɛ ꞌke ꞌꞌbhlukui wɔn zʋɩnꞌa ꞌꞌdui ꞌsɔn -gwlɩ bue nʋ. ³Ɔ sɛn ꞌɛ ɛ, ꞌle ɔ ꞌye ɛ ꞌle -dogwigbaaklagba ꞌli ꞌꞌvuto, ɔ ꞌye ɛ wɔnyika ꞌle ɔ ꞌye ɛ wɔnyiꞌgba, ꞌle ɛ-bɛ ꞌꞌnyinynidɩꞌa tiyayi ꞌmnɛ -kaa nyʋ ꞌꞌmaa, ꞌle, ɩ-bɩ -zʋɩn -Lagɔ -cɛ ꞌnɛ, ɩ ꞌke nyni. -Bho ɩ nyni a, ꞌle ɛ ꞌke wɔnyikati-ɛ, ɛ ꞌke tibɔti-ɛ ꞌle -nɔɔtoope ꞌli.

⁴Ɔ gwɛꞌɛ Sataan ꞌmnɛꞌɛ wɔnyigbɛɛɛ ꞌꞌyi a, ꞌle ꞌɩn ꞌye ꞌle popo -lrɛɛ, ꞌle ꞌɩn ꞌye ꞌnynɩbhlekpi liꞌye. Nyʋ-ʋ -de ꞌnɩ ꞌꞌkpi. Ʋ-bʋ nyʋ ꞌmnʋ, -Lagɔ ꞌꞌnyɩ -ʋ wɔnkuɛ ꞌle ʋn ꞌke nyɔꞌꞌo nyɔ -zigle -tu. -Lagɔꞌɔ wlu-u ꞌma-a -ziadɩ, *Zezii ꞌwɔɔnꞌɔ ꞌꞌkpi, nyʋ-ʋ ꞌꞌduꞌa ꞌya ꞌmʋzɛɛꞌɛ dɩ nyʋ ꞌlbhaꞌa, ꞌle ʋn ꞌyeꞌa ꞌmɛ, ꞌɩn ꞌye -ʋ li. Ʋ-bʋ nyʋ ꞌmnʋ, ʋn -see nmi -nɩ ꞌka -ke ꞌɛ gʋgɔbolɛ bʋbɔ. Ʋn -see ꞌɛ ꞌmʋyibolɛ ꞌwa ꞌꞌyigbeyi ꞌꞌdu, ꞌle ꞌꞌbhalrɛɛke ʋn -see ɛ ꞌwa sʋ liꞌꞌdu. A -gblee, ꞌɩn ꞌye ꞌʋ li a, ꞌle ʋn ꞌye glu -sɔ, ʋn ꞌye ti-nɩ -lrɛɛ ꞌle ʋn -ke *-Lagɔꞌɔ ꞌBhozayi -ɔ ꞌpʋʋnꞌa nyʋ -kɔꞌɔ lɛꞌꞌo lɛ ꞌle zʋɩnꞌa ꞌꞌdui ꞌsɔn -gwlɩ bue ꞌli. ⁵A -gblee, nyʋ-ʋ ꞌka glu -sɔ -antanyɩ, -ʋ ꞌka ti-nɩ -lrɛɛ, ꞌwa -nɛ ꞌka-a! ꞌMɛmʋtɔlʋ -sieꞌa ꞌbho, ʋbʋ -see glu -sɔ yi, ꞌle ɩ-bɩ zʋɩn ꞌmnɩ ꞌke -gwɛ.

⁶Ʋ-bʋ nyʋ-ʋ ꞌyeꞌa -kaa glu -sɔ mʋ, -ʋ ꞌyeꞌa ti-nɩ mʋ -lrɛɛ ɛ, ʋn ꞌwa-a ti ꞌle ʋn -cɛꞌɛ kpɔ -Lagɔꞌɔ nyʋꞌa kamʋ. ꞌꞌKɔgwlɛmɛmɛɛ se ʋ wɔnyiꞌbhɛɛ. -Lagɔ -ke ꞌɔ ꞌBhozayi -ɔ ꞌpʋʋnꞌa nyʋ, ꞌwa bʋbɔmʋ ʋn-ʋ ꞌye ꞌꞌdu mʋ, ꞌle, -Lagɔꞌɔ ꞌBhozayi ꞌmnɔ ɔ, ʋn -ke ɔ ꞌke lɩ -kɔ, zʋɩn ꞌmnɩ ꞌli.

-Lagɔ ꞌlu-o *Sataan tʋ wɔn ꞌmʋ.

⁷-Bho ɩ-bɩ zʋɩn ꞌmnɩ ziꞌa a, -Lagɔ-ɔ ꞌye-e *Sataan wɔnyikati -mʋ. ⁸-Bho ɛ -sɔ -kaa -jie ꞌmʋ a, ɛ-ɛ ꞌye-e ꞌbhlɩkpɩꞌa ꞌꞌkete nyiɛ ꞌmʋ -mu -mʋ, ꞌle, nyʋ-ʋ -ke -Lagɔ ꞌka ꞌꞌyidede a, -ʋ ꞌma-a ꞌGɔgɩ -ke Magɔgɩ, ɛ ꞌke ʋ ꞌꞌmaa. -Ka ꞌtɔnni kɔꞌɔ -bɩsɩ -dieꞌa ꞌꞌyi, ꞌka-a ʋn-ʋ ꞌye ꞌmʋ-die mʋ, ꞌle ɛ ꞌke ʋ ꞌꞌlruꞌgbʋʋ, ʋn -ke -Lagɔ ꞌke ꞌꞌyidede.

⁹A -gblee, ʋn-ʋ ꞌye-e ꞌbhlɩkpɩ ꞌwee ꞌꞌkpi tibʋba -mʋ ꞌle ʋn ꞌke -Lagɔꞌɔ nyʋꞌa ꞌꞌlrugbʋʋnamʋ -ke ꞌɔ dɩkmagwlɔ ꞌꞌgbele ꞌꞌyrili-po. -Bho ʋn nʋ -kaa, ꞌle nɛ ꞌke ꞌle yaku ꞌꞌyi ꞌwlʋ, ɛ ꞌke ʋ ꞌꞌlruꞌwla ꞌle ɛ ꞌke ʋ ti-za. ¹⁰ꞌꞌNyinynidɩꞌa tiyayi ꞌꞌmaa ꞌka nyʋ, ꞌꞌkɔgwlɛnɛ -ke ꞌmʋ wɔnnyningnɛ-ɛ ꞌwlʋꞌa -ɛ -ke ꞌmʋ, nmi -ke Sataanꞌa wluꞌa ꞌmʋtizayi -nɩ ꞌka, ʋn -nɩꞌa a, ꞌle -Lagɔ ꞌke ɛ ꞌle ꞌꞌvuto, ꞌle ɛ -ke ʋn ꞌke ꞌkle ꞌye -nɔɔꞌꞌo -nɔɔ ti.

-Lagɔꞌɔ gbɔmʋbhɔɔzigle.

¹¹Ɩ ziꞌa -kaa a, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e ꞌnynɩbhlekpeklagba -lue li. Ɛ -nɩꞌe-e ꞌꞌbuu, ꞌle nyɔ -lue -de ꞌnɛ ꞌꞌkpi. Yaku -ke ꞌbhlʋkpa nʋꞌa -kaa, ɩ ꞌꞌma-oꞌo ꞌbho ꞌɔ ꞌꞌyigbeyi. Nyɔꞌɔ ꞌye ɩ li. ¹²ꞌƖn nʋꞌa -kaa -lrɛɛ, ꞌmɛmʋ ꞌbhle ꞌka ꞌnynɩ-e, ꞌmɛmʋ se ꞌka ꞌnynɩ ꞌbhle-e, ꞌɩn ꞌye -ʋ li, ꞌle ʋn -nynaꞌa ti ꞌbho ɛ-bɛ kpe ꞌmnɛꞌɛ wɔnyi, ꞌle nyɔ -lue ꞌye ꞌꞌbɔgʋɩ ꞌꞌyikati. Nyʋ-ʋ -nɩꞌa ti ꞌbho -Lagɔꞌɔ ꞌꞌyigbeyi, ꞌɔ ꞌꞌbɔgʋ -ke ꞌli ꞌwa ꞌnynɩ ꞌcnɩ-ɛꞌɛ ɛ, ɔ kati ꞌnɛ-ɛ ꞌꞌyi -lrɛɛ. Ɩ kati-ɛꞌɛ -kaa ꞌꞌyi a, ꞌle -Lagɔ ꞌye ꞌbho ꞌkpa ꞌle ɔ-ɔ tuꞌo ʋ-bʋ ꞌmɛmʋ -zigle. Kpli ʋn nʋꞌa ꞌtɩn, -ɩ ꞌcnɩ-ɛꞌɛ ꞌle ꞌꞌbɔgʋɩ ꞌmnɩ ꞌli, ꞌɩnnɩ ɔ-ɔ gbʋꞌo ya ꞌle ɔ-ɔ tu ꞌnʋ -zigle. ¹³Nyʋ ꞌtɔnni ꞌlbhaꞌa, -ʋ -nɩꞌa ꞌle ɛ kɔ ɔ, ꞌwa ꞌwee ꞌwlʋꞌo ꞌle-ɛ. Nyʋ-ʋ -nɩꞌa ꞌmɛmʋꞌa -denamʋ, ꞌwa ꞌwee -sɔꞌɔ ꞌle ꞌmʋ-ɛ, ꞌle ꞌwa kpli ʋn nʋꞌa a, -Lagɔ ꞌye ɩ ya-gbʋ, ꞌle ɔ ꞌye ʋ -zigle -tu. ¹⁴A -gblee, -Lagɔ nʋꞌa -kaa, ɔ -zaꞌa-a ꞌmɛmɛɛ -ke ꞌmɛmʋꞌa -dena ti ꞌle ꞌꞌkɔgwlɛnɛ ꞌmʋ. A ꞌye li-ɔ, ɛ-bɛ ꞌya tʋwɔnmʋluɛ ꞌle ꞌꞌkɔgwlɛnɛ ꞌmnɛ ꞌmʋ, ꞌɩnnɛ ꞌmo-o ꞌꞌkɔgwlɛmɛmɛɛ. ¹⁵Nyʋ-ʋ -nɩꞌa ti ꞌbho -Lagɔꞌɔ ꞌꞌyigbeyi, ꞌɔ ꞌꞌbɔgʋ -ke ꞌli ꞌwa ꞌnynɩ ꞌcnɩ-ɛꞌɛ ɛ, ꞌɛ kamʋ -yʋ -ke -nɩ seꞌa ꞌle -nɩ, ɔ ꞌye ʋ ɛ-bɛ nɛ ꞌmnɛ ꞌmʋ ꞌꞌvuto.

ꞌBhlʋkpalre -ke yakulre.

¹Ɩ ziꞌa -kaa, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ꞌɩn ꞌye-e ꞌbhlʋkpalre -ke yakulre li. -Ɛkedɩmaa, ꞌbhlʋkpa -ke yaku -Lagɔ -ya ꞌka ti -antanyɩ, ɩ -ke ꞌtɔnni -sɔꞌɔ-ɔ ti. ²A -gblee, ꞌɩn nʋꞌa -kaa -lrɛɛ ɛ, -gwlɔ -Lagɔ -zaꞌa ꞌbho, -ɛ ꞌma-a Zelizalɛɛmʋlre, ꞌɩn ꞌye -ɛ li. ꞌLe -Lagɔ gbo ɛ-ɛ ꞌwlʋꞌo ꞌle ɛ-bɛ ꞌꞌsiꞌe ti. -Bho nyʋ -ka ꞌnynɔkpagɔ-ɔ ꞌꞌdu, ꞌnynaakpʋ-ʋ ꞌꞌtiꞌa nyna, -ka ʋn-ʋ paꞌa ꞌwa ꞌꞌyrilinmɔbanɩ ꞌmʋ ꞌle ʋn-ʋ nmɔꞌɔ ꞌle ꞌꞌyrilemʋ ti a, ꞌka-a ꞌɛ -gwlɔtu -nɩꞌo. ³A -gblee, ꞌɩn ꞌye ꞌɛ -kaa li a, ꞌbho -gbaa -lue ꞌmʋ, ꞌle ꞌɩn ꞌye wluklagba -lue ꞌbʋꞌwɔn. -Da -Lagɔ -nɩꞌa ꞌbho ꞌɔ ꞌnynɩbhlekpe ꞌꞌkpi, ꞌbho-o ɛ-ɛ sɔ nɩꞌe ꞌmʋ ꞌle ɛ-ɛ nʋꞌo: A-a ꞌye-e liꞌa, ꞌtraamʋ ꞌtɔ ɔ, -dalue -Lagɔ -ke nyunyu -nɩꞌo. Ɔ -ke ʋn-ʋ ꞌye-e -de -mʋ ꞌle ʋn ꞌke ꞌɔ nyʋ ꞌꞌdu. ꞌƖnnɔ ꞌye ꞌwa -tɩta ꞌꞌdu mʋ, ꞌle ɔ -ke ʋn ꞌke ti-de. ⁴Ɔ-ɔ ꞌye -ʋ ꞌꞌmi ꞌꞌyri ꞌsra -mʋ. ꞌMɛmɛɛ-e, ngazeɛ-e, ꞌꞌvivia -ke kuꞌa ꞌcnacnaa -see ti-nɩ yi. Lɩ-ɩ -nɩ ꞌka ti -bɛnyɩ, nyɔ -see ꞌya -lue ꞌtɩnꞌa wlu ꞌbʋꞌwɔn yi.

⁵Ɛ-bɛ wlu ꞌmnɛ -gwɛꞌɛ ꞌle -loku ꞌmʋ ti a, ꞌle -Lagɔ -nɩꞌa ꞌbho ꞌɔ ꞌnynɩbhlekpe ꞌꞌkpi na: A -gblee, ꞌɩn -ya lɛꞌꞌo lɛ -lre ꞌmʋ ꞌle-ɔ! ꞌBho ꞌɛ lemʋ ꞌle ɔ ꞌye ꞌbho wlu -lrɛɛ kɔ ꞌle ɔ na ꞌɩnmɔ ꞌZaan -bodɩ: ꞌLe -aꞌa ꞌꞌyritiyeɛɛ ꞌmʋ, lɛꞌꞌo lɛ -a ꞌyeꞌa li, ꞌcnɩ ɛ! -Ɛkedɩmaa, ꞌan wlu-u ꞌmo-o -ziadɩ ꞌle ɛ ꞌꞌduꞌo lɛ nyɔ ꞌka ꞌꞌgwlide. ⁶Ɔ -zɩ ꞌɩ -kaa ꞌmʋ a, ꞌle ɔ ꞌye ꞌbho wlu -lrɛɛ ꞌꞌdu ꞌle ɔ na: Ɛ -gwɛ ꞌꞌyi-ɔ! ꞌƖnmɔ ꞌmo-o ꞌꞌKɔgwlɛlagɔ. ꞌƖnmɔ -yaꞌa lɛꞌꞌo lɛ ti, ꞌɩnmɔ ꞌbhleꞌe ꞌɛ tisɔɛꞌɛ ꞌkpʋ kwa. Nyɔ-ɔ ꞌbɔꞌɔ ꞌɩnmʋ ti ꞌɔ -pɔlʋꞌa klɛ ti, tinɩɛzɛgɛ-ɛ seꞌa ꞌꞌtiinamʋ ꞌbhle, ꞌɩnnɛ ꞌɩn-ɩ ꞌye ɔ ꞌꞌnyɩ mʋ -gblokoo, ꞌle ꞌɔ ꞌgwlʋ ꞌke ꞌwɔn. ⁷Nyɔ-ɔ ꞌwɔnꞌɔ ꞌan wlu ꞌbɔ, -ɔ ꞌꞌdu ꞌɛ ꞌbho, -ɔ kuꞌa ꞌkpa ꞌꞌyi ꞌle -ɔ nʋꞌa ꞌan ꞌgwlʋdɩ a, ɛ-bɛ ꞌjɛ ꞌmnɛ, ꞌɩnnɛ ꞌɩn-ɩ ꞌye ɔ ꞌꞌlruli-nʋ mʋ. ꞌƖn-ɩ ꞌye-e ꞌɔ -tɩta ꞌꞌdu -mʋ ꞌle ɔbɔ ꞌke ꞌan ꞌꞌyu ꞌꞌdu. ⁸Ɛ -nɩꞌa -kaa ꞌmʋ a, nyʋ-ʋ pleꞌa ꞌꞌyri o, nyʋ-ʋ -seeꞌa -Lagɔ ꞌꞌgwlide o, nyʋ-ʋ ꞌma-a ꞌꞌwɩlɩmʋ o, ꞌlimʋꞌa wɔnnynimʋ o, ꞌꞌkulbhamʋ o, gunyʋ o, kɔkuibhlemʋ o, sɩncɛmʋ o, ꞌꞌkɔgwlɛnɛ -ke ꞌmʋ wɔnnyningnɛ-ɛ ꞌwlʋꞌa a, -ɛ -ke ꞌmʋ -bho nyɔ muꞌa ꞌle ɔ-ɔ ꞌmɛꞌɛ ꞌꞌkɔgwlɛka, ꞌle-e ʋn-ʋ ꞌye ꞌꞌvuto-ɛ mʋ.

Zelizalɛɛmʋlre.

⁹Ɔ poꞌa wlu ꞌmnɛ ti a, nyʋꞌa ꞌklekpiyalɩ -mɛɛsɔn -Lagɔ ꞌbhɔɔꞌɔ gbɔ ꞌmʋ, ꞌꞌkɔpɩ -mɛɛsɔn ɩ ꞌꞌyiꞌa ꞌli, -Lagɔ gboꞌa -dalbhomʋ -mɛɛsɔn-ɔ ꞌbhle ꞌɩ kwa, ꞌle ꞌwa -lue na ꞌɩnmʋ -bodɩ: *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, yi, ꞌɩn ꞌke -ɩnmʋ ꞌɔ ꞌnynɔ ꞌꞌyi-tɔ! ^10-11Ɔ ꞌlɛꞌɛ -kaa a, *-Lagɔꞌɔ Lisaazuzuꞌa -jijri nʋꞌa -kaa, ɛ ꞌyi-e ꞌɩnmʋ ꞌꞌkpi ꞌle -Lagɔ gboꞌa -dalbhoyi ꞌye ꞌɩnmʋ ꞌmʋꞌꞌluo, ꞌle, trɩ -lue-e -tɛꞌɛ ya tenyɩ, ɔ ꞌye ꞌɩnmʋ ꞌle ꞌɛ ꞌꞌlrugamʋ kpa. Zelizalɛɛmʋgwlɔ -Lagɔ -zaꞌa ꞌbho, ꞌbho-o ɔ -tɔ -nɩ ꞌnɛ ꞌɩnmʋ ꞌꞌyi, ꞌle -Lagɔ gbo ɛ-ɛ sɔꞌɔ mʋ ꞌle ɛ-ɛ ꞌꞌsiꞌe ti, ꞌle ꞌɛ -vlavlɩ-ɩ ꞌbhɛɛꞌɛ -Lagɔꞌɔ ꞌnynɩ ꞌꞌyi. ꞌꞌYrilinmɔsʋkpʋ -lue-e ꞌbhleꞌa ꞌpɛlʋ, -ɛ -ke ꞌnynɩ ꞌma-a *zasɩpʋ, -ka ɛ-ɛ vlanꞌa ꞌꞌyenaꞌa ka a, ꞌka-a ɛ-bɛ gwlɔ ꞌmnɛ -nɩꞌo. ¹²A -gblee, komi ʋn -po ꞌnɛ ꞌꞌyrili a, ɛ -tɛꞌɛ-ɛ ya tenyɩ ꞌle ɛ ꞌbhleꞌe wɔn -bue wɔn ꞌsɔn. ꞌLe -Lagɔ gboꞌa -dalbhomʋ -bue ꞌyɔ ꞌsɔn-ɔ ꞌꞌdu ꞌɩ ꞌꞌyrili. ꞌBho ɩ-bɩ wɔn ꞌmnɩꞌa -kpana ꞌꞌyri, *Izrayɛɛlɩkɔmʋꞌa ꞌcɛ -bue ꞌyɔ ꞌsɔnꞌɔ ꞌnynɩ-ɩ ꞌcnɩ-ɛꞌɛ ꞌbho. ¹³Ɛ-bɛ komi ꞌmnɛ, ꞌle ꞌɛ ꞌfɔ -lue gbo, -kpanɩ tan -nɩꞌe-e ꞌle: tan -nɩ ꞌle ꞌyrʋꞌa ꞌwlʋnamʋ, tan -nɩ ꞌle ꞌyrʋꞌa -bhlunamʋ, tan -nɩ ꞌle yayi ꞌle tan -lrɩɩ -nɩꞌe ꞌle ꞌzɔti. ¹⁴Sɩkpɩ -bue ꞌyɔ ꞌsɔn, ꞌɩnnɩ ʋn -kɔꞌɔ ꞌle ꞌɛ ꞌzɔ, ꞌle, -Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, *ꞌɔ -dalbhomʋ -bue ꞌyɔ ꞌsɔnꞌɔ ꞌnynɩ ꞌcnɩ-ɛꞌɛ ꞌbho ɩ ꞌꞌkpi.

¹⁵A -gblee, -Lagɔ gboꞌa -dalbhoyi -zaꞌa ꞌɩnmʋ dɩ ꞌmnɩ -bodɩ ꞌmʋ, lɩꞌa -ybhalɛ -lue-e -nʋ-ɛꞌɛ sanu ꞌmʋ, ꞌɩnnɛ ɔ ꞌbhleꞌe kwa, ꞌle ɔ ꞌke gwlɔ-e, ꞌɛ komi -ke ꞌɛ -kpanɩ -ybha. ¹⁶Ɛ-bɛ gwlɔ ꞌmnɛ ꞌbhle-e ꞌꞌkete nyiɛ, ꞌle ɩ ꞌbhɛɛꞌɛ ꞌmʋ ꞌwee. Ɔ-bɔ -Lagɔ gboꞌa -dalbhoyi nʋꞌa -kaa, ɔ -ybha nɛ-oꞌo: ꞌƐ titɛɛ ꞌbhɛɛꞌɛ-ɛ kiloꞌa -gwlɩ bueꞌa kpɛꞌɛ -bue ꞌyɔ ꞌsɔn. ꞌƐ -dɔdʋn ꞌmʋ-e, ꞌɛ -kpoo ꞌmʋ -ke ꞌɛ yatɛɛ ꞌbhɛɛꞌɛ ꞌmʋ-ɛ. ¹⁷-Ka nyʋ-ʋ ybhaꞌa ka lɩ ꞌꞌcɩcɩ, ꞌle -Lagɔ gboꞌa -dalbhoyi ꞌye -kaa ɛ-bɛ komi ꞌmnɛ -ybha. Ɛ ꞌbhɛɛꞌɛ-ɛ sʋꞌa -patʋɩ -bue ꞌyɔ ꞌsɔnꞌɔ kpɛ -bue ꞌyɔ ꞌsɔn.

¹⁸A -gblee, *zasɩpʋ ꞌma-a ꞌꞌyrilinmɔsʋkpʋ-ʋ ꞌbhleꞌa ꞌpɛlʋ, ꞌɩnnɛ ʋn -po -nɩ nɛꞌo. -Bho a ꞌye gwlɔ ꞌmnɛ ɛ, -gba, sanu -yɩ ʋn -po -nɩ ꞌnɛ ɛ, ɩ -nɩꞌe-e ꞌꞌwlelaa, -ka ꞌꞌyena! ¹⁹Ɛ-bɛ komi ꞌmnɛ ɛ, ꞌꞌyrilinnmɔsɩkpɩ-ɩ -ke ꞌpɛlʋ-ʋ -kmuꞌa ꞌꞌyi tenyɩ, ꞌɩnnɩ ʋn -po -nɩ nɩꞌe ꞌɛ ꞌkpʋ glu, ꞌle ʋn ꞌye ɛ ɩ -bɛ -nɩ. Ɩ-bɩ sɩkpɩ -bue ꞌyɔ ꞌsɔn ꞌmnɩ, -ka ʋn-ʋ ꞌlɩ ꞌɩ a, ꞌkla-a ꞌka-a:

-Antanyɩnɛ ꞌmo-o *zasɩpʋ,

ꞌsɔnnɛ ꞌmo-o *safilɩ,

tannɛ ꞌmo-o *agatɩ

ꞌle nyiɛnɛ ꞌꞌduꞌo *emelodɩ.

²⁰-Muunɛ ʋn-ʋ ꞌlaꞌa *onisɩ,

-mɛɛlonɛ ʋn-ʋ ꞌlaꞌa *sadʋanɩ,

-mɛɛsɔnnɛ ʋn-ʋ ꞌlaꞌa *klisolitɩ

ꞌle -mɛɛtannɛ ʋn-ʋ ꞌlaꞌa *belilɩ.

-Mɛɛnyiɛnɛ ꞌmo-o *topasɩ,

-buenɛ ꞌmo-o *klisopasɩ,

-bue ꞌyʋɛ -luenɛ ꞌmo-o *tuikʋasɩ

ꞌle ꞌya -bue ꞌyɔ ꞌsɔnnɛ ꞌꞌduꞌo *ametisɩtɩ.

²¹A ꞌye li-ɔ, sɩkpɩ-ɩ nʋꞌa ꞌꞌwleewle, -ɩ -ke ꞌpɛlʋ-ʋ -kmuꞌa ꞌꞌyi tenyɩ -lrɛɛ, ꞌɩnnɩ ʋn nʋꞌo ꞌɛ -kpanɩ -bue ꞌyɔ ꞌsɔn ꞌmʋ: Sʋkpʋ -lue-e ꞌmo-o ꞌɛ -kpana -lue. -Bho a -gbʋ gwlɔ ꞌmnɛꞌɛ -jolʋgblʋ ya a, -gba, ɛ -nʋ-ɛꞌɛ-ɛ sanu ꞌmʋ ꞌle ɛ -nɩꞌe ngaa, -ka ꞌꞌyena!

²²A -gblee, ɛ-bɛ gwlɔ ꞌmnɛ ꞌmʋ a, ꞌɩn -see ꞌbho *-Lagɔꞌɔ bʋbɔbhlegbo liꞌye. -Ɛkedɩmaa, -aꞌba -Kɔyi -Lagɔ kuꞌa wɔn tenyɩ, -ɔ -ziꞌa lɛꞌꞌo lɛ, ɔ -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌɩnnʋ -ziꞌe ꞌbho ꞌɛ ꞌbɩ ꞌmʋ. ²³Ɛ -see ꞌyrʋ -ke ꞌcʋꞌa fanfaan -gwlɔkɔmʋ-ʋ fuo-ɔ ꞌle ʋn-ʋ ꞌye ti ꞌnɩ -ko. A -gblee, -vlavlɩ ꞌbhɛɛꞌɛ -Lagɔꞌɔ ꞌnynɩ ꞌꞌyi, ꞌɩnnɩ ʋn-ʋ ꞌye nɩꞌe ꞌꞌyiti, ꞌle, -Lagɔꞌɔ ꞌBhozayi -ɔ ꞌpʋʋnꞌa nyʋ, ꞌɩnnɔ kɔɔꞌɔ ꞌwa ꞌꞌnapɛ -lrɛɛ. ²⁴ꞌKmʋ ꞌmʋꞌa nyʋ -Lagɔ zetieꞌa ꞌle ꞌwa ꞌꞌnyinynidɩ ꞌmʋ, ɛ-bɛ zɔ ꞌmnɛ, ꞌɩnnɛ ʋn-ʋ ꞌye ꞌle ꞌꞌyitiꞌye -nɩ mʋ, ꞌle ʋn ꞌke ti-na. -Bho ɛ -nɩ ꞌtɔ -kaa ꞌmʋ a, ꞌle ꞌwa ꞌꞌklumʋꞌa ꞌbhlɩkpɩyowli ꞌꞌwe -ke ꞌwa ꞌnynɩꞌa ꞌꞌyibhɛɛɛ ꞌke ꞌle mu. ²⁵A -gblee, koo ti -nɩ, ɛ-bɛ gwlɔ ꞌmnɛꞌɛ komi-i ꞌye-e wɔn-flɔ -mʋ. Nyʋ -see ɩ wɔnyi-ka yi, -ɛkedɩmaa, -kuyre -see ꞌle -kpʋn yi. ²⁶-Bho ɛ -nɩ -kaa ꞌmʋ a, ꞌle ʋ-bʋ ꞌbhlɩkpɩyowli ꞌꞌwe -ke ꞌwa ꞌnynɩꞌa ꞌꞌyibhɛɛɛ ꞌke ꞌle mu. ²⁷Ɛ -nɩꞌa -kaa ꞌmʋ a, lɛꞌꞌo lɛ-ɛ -nyniꞌa ꞌꞌyrili ꞌbho -Lagɔꞌɔ ꞌꞌyigbeyi, ɛ -see ꞌbho -pa yi. Nyʋ-ʋ ꞌma-a sɩncɛmʋ -ke ꞌꞌnyinynidɩꞌa nʋmʋ -lrʋʋ, ꞌka-a ꞌwa dɩ -nɩꞌo -lrɛɛ. Nyʋ-ʋ -nɩꞌa ti ꞌbho -Lagɔꞌɔ ꞌꞌyigbeyi, ɔ -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ꞌwa ꞌꞌbɔgʋ -ke ꞌli ʋ-bʋ nyʋ ꞌmnʋꞌa ꞌnynɩ ꞌcnɩ-ɛꞌɛ, -yʋ -ke -nɩ -nɩꞌa ꞌle ꞌɛ ꞌlimʋ, ꞌwa ꞌꞌsɛ-ɛ ꞌke ꞌle pa.

-Lagɔꞌɔ nyʋ-ʋ ꞌye -ɔ liꞌye -mʋ ꞌle yaku ꞌli.

¹A -gblee, ꞌɩn -nɩ gwlɔ ꞌmnɛ ꞌyranamʋ, ꞌle, ꞌꞌnigblʋ ꞌꞌnyɩꞌa nyʋ ꞌꞌkɔgwlɛtinɩɛzɛgɛ, ɔ-bɔ -Lagɔ gboꞌa -dalbhoyi ꞌmnɔ ꞌye ɛ ꞌɩnmʋ ꞌꞌyi-tɔ. Sʋkpʋ -lue -ke ꞌpɛlʋ-ʋ -kmuꞌa ꞌꞌyi tenyɩ, ʋn-ʋ ꞌlaꞌa klisɩtalɩ, -ka ɛ-ɛ ꞌyeꞌa ti, ꞌka-a ɛ-ɛ ꞌyeꞌe ti ꞌle ɛ-ɛ sɔꞌɔ ꞌle -Lagɔ -ke *ꞌɔ ꞌBhozayi -ɔ ꞌpʋʋnꞌa nyʋꞌa ꞌnynɩbhlekpeꞌa ꞌꞌtroli, ²ꞌle ɛ-ɛ pleꞌe -jolʋgblʋ wɔnli ti. Ɛ-bɛ ꞌꞌkɔgwlɛtinɩɛ ꞌmnɛ, tui-i ꞌꞌnyɩ ꞌɛ nyɔ, ꞌya tɔlʋꞌa ꞌnynɩmʋ ɛ-ɛ zi nɩꞌo. Ɩ-bɩ tui ꞌmnɩ, kpɛ -bue kpɛ ꞌsɔn ɩ-ɩ tro nɩꞌo ꞌle zʋn ꞌli. ꞌLe ꞌcʋ -lue ꞌli, kpɛ -lue ɩ-ɩ tro nɩꞌo, ꞌle ꞌya wʋɩn-ɩ ꞌpʋʋnꞌo ꞌbhlɩkpɩ ꞌweeꞌa nyʋ. ³Ɛ-bɛ gwlɔ ꞌmnɛ ꞌmʋ, lɛꞌꞌo lɛ-ɛ ꞌbhleꞌa -Lagɔꞌɔ tutibhlasʋ ꞌꞌkpi, ɛ -see ꞌbho -pa yi. -Lagɔ -ke ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ꞌwa ꞌnynɩbhlekpe ꞌye ꞌbho -nɩ mʋ ꞌle -Lagɔꞌɔ lbhʋnʋmʋ ꞌke ɔ ꞌbho bʋbɔ -nɩ. ⁴ꞌƆ ꞌnynɩ-ɩ ꞌye-e ꞌbho ꞌwa ꞌꞌyigbeyi ꞌcnɩ-ɛ -mʋ, ꞌle ʋn ꞌke ɔ liꞌye. Ʋn-ʋ ꞌye-e ꞌɔ ꞌꞌyigba ꞌye -mʋ -lrɛɛ. ⁵-Kuyre -see ꞌbho -kpʋn yi. ꞌLe ʋn -see ꞌꞌnapɛ -ke ꞌyrʋꞌa dɩ -zi yi, -ɛkedɩmaa, -vlavlɩ ꞌbhɛɛꞌɛ -Lagɔꞌɔ ꞌnynɩ ꞌꞌyi, ꞌɩnnɩ ʋn-ʋ ꞌye ꞌꞌyitiꞌye -nɩ mʋ, ꞌle ʋn -ke ɔ ꞌke lɩ ꞌwee -kɔ ꞌꞌkɔgwlɛka. ⁶ꞌLe ɔ-bɔ -Lagɔ gboꞌa -dalbhoyi ꞌmnɔ na: ꞌAn ꞌmʋzadɩ ꞌwee -ɩn ꞌcnɩꞌa a, ɩ-ɩ ꞌmo-o -ziadɩ ꞌle ɩ ꞌꞌduꞌo wlu -yɩ nyɔ ꞌka ꞌꞌgwlide -lrɛɛ. -Aꞌba -Kɔyi -Lagɔ ꞌꞌnyɩꞌa *ꞌɔ Lisaazuzu ꞌɔ wluꞌa ꞌmʋtizamʋ, ɔ ꞌlbho-o ꞌle ꞌɔ lbhʋnʋmʋ gbo ɔ gboꞌa -dalbhoyi -lue, ꞌle, lɛꞌꞌo lɛ-ɛ -nɩꞌa yinamʋ, ɔ ꞌke ɛ ʋ ꞌtmʋʋ.

*Zezii-i ꞌye-e le -yi -mʋ.

⁷-Lagɔ gboꞌa -dalbhoyi poꞌa wlu ꞌmnɛ ti a, ꞌle *Zezii na: A po -lokui, ꞌan leyinɔɔ ꞌꞌkɔɔꞌɔ-ɔ gbo. A -gblee, wlu -Lagɔ -zaꞌa ꞌmʋ, -ɩ ꞌcnɩ-ɛꞌɛ ꞌle ꞌꞌbɔgʋ -nɛɛ ꞌli, nyɔ-ɔ ꞌwɔɔnꞌɔ wlu ꞌmnɩ, -ɔ ꞌꞌdu ꞌɩ ꞌbho, ɔ ꞌwa-a ti, -ɛkedɩmaa, -Lagɔ-ɔ ꞌye -ɔ ꞌꞌniti-wʋnna -mʋ.

⁸A ꞌye li-ɔ, wlu ꞌwee nyʋ -zaꞌa ꞌɩnmɔ *ꞌZaan -bodɩ ꞌmʋ, ꞌɩn ꞌwɩn -ɩ ꞌbɔ, lɛꞌꞌo lɛ-ɛ ꞌyeꞌa -zi mʋ, ꞌle ꞌɩn ꞌye ɛ liꞌye. ꞌƖn gwɛꞌɛ ꞌya ꞌbʋwɔɛɛn -ke ꞌya liyeɛɛ ꞌꞌyi a, -Lagɔ gboꞌa -dalbhoyi -tɔ ꞌnɩ ꞌɩnmʋ ꞌꞌyi, ꞌle ꞌɩn ꞌye ɔ ꞌkolri wɔnyi glu po, ꞌɩn ꞌke ɔ bʋbɔ. ⁹ꞌLe ɔ na ꞌɩnmʋ -bodɩ: -Aꞌa nʋ -kaa -le! -Gblee, -aꞌa ꞌꞌbhuo-e, -aꞌa -Lagɔjeyiꞌa ꞌlotʋꞌa ꞌꞌnynuu ꞌma-a ꞌɔ wluꞌa ꞌmʋtizamʋ -ke, wlu-u ꞌcnɩ-ɛꞌɛ ꞌnɔɔ ꞌꞌbɔgʋ -nɛɛ ꞌli, nyʋ -lrʋʋ-ʋ ꞌꞌdu ꞌɩ ꞌbho, -ka a ꞌꞌduꞌa -Lagɔꞌɔ lbhʋnʋmʋ, ꞌka-a ꞌɩn -nɩꞌo -lrɛɛ. -Ɩn ꞌye li-ɔ, -Lagɔ -ɩn ꞌke bʋbɔ!

¹⁰ꞌLe ɔ ꞌye ꞌbho ꞌɛ lemʋ wlu -lrɛɛ kɔ ꞌle ɔ na: Wlu-u ꞌwlʋꞌa ꞌle -Lagɔꞌɔ wɔn ꞌmʋ, -ɩn ꞌcnɩꞌa a, -aꞌa ꞌꞌmuu nɩ wɔn -le! -Ɛkedɩmaa, -nɔɔ -Lagɔ ꞌꞌdu ꞌɩ ꞌle ɩ ꞌke yi, ɩ ꞌke -nʋ-ɛ, ɛ ꞌꞌkɔɔꞌɔ-ɔ gbo. ¹¹Nyɔ-ɔ nʋꞌa ɔ -see ꞌꞌnyinynidɩꞌa nʋnʋdɩ ꞌbhɔ, ɔ ku ꞌɛ ꞌꞌkpa tiꞌꞌa! Nyɔ-ɔ nʋꞌa ɔ -see kpli ꞌꞌyizizia ꞌle ɔ ꞌke *liꞌsaa ꞌbho -Lagɔꞌɔ ꞌꞌyigbeyi a, ɔ -de ꞌle ꞌɔ -vlɛɛn ꞌmʋ tiꞌꞌa! Nyɔ-ɔ ꞌma-a ꞌꞌyrilinmɔdɩꞌa nʋyi a, ꞌɔ ꞌbhɔ ꞌɛ dɩ -le! Nyɔ -yɔ ꞌꞌduꞌa ꞌbho -Lagɔ, ɔ ꞌꞌdu ɛ ꞌꞌyrili ꞌꞌkɔmʋ!

¹²Ɔ poꞌa wlu ꞌmnɛ ti a, ꞌle Zezii na: A po -lokui, ꞌɩn -nɩꞌe-e -jeyi, ꞌɩn-ɩ ꞌyi-e le. -Bho ꞌɩn yi a, dɩ nyɔꞌꞌo nyɔ nʋꞌa a, ꞌɩnnɛ ꞌɩn-ɩ ꞌye ya-gbʋ mʋ ꞌle ꞌɩn ꞌke ɔ lɛ ꞌꞌlrulinʋ. ¹³ꞌBho ꞌɛ ꞌꞌkpi ɔ kɔꞌɔ wlu -lrɛɛ ꞌle ɔ na: ꞌƖnmɔ ꞌmo-o ꞌꞌKɔgwlɛyi. ꞌƖnmɔ -yaꞌa lɛꞌꞌo lɛ ti ꞌle ꞌɩn ꞌbhleꞌe ꞌɛ tisɔɛꞌɛ ꞌkpʋ kwa.

¹⁴Nyʋ-ʋ ꞌma-a ꞌꞌyisrɛɛmʋ ꞌbho -Lagɔꞌɔ ꞌꞌyigbeyi, ʋn ꞌwa-a ti ꞌle ʋn ꞌbhleꞌe ꞌꞌyiflɔɛ, ʋn ꞌke ꞌbho gwlɔꞌɔ ꞌgbewɔn ꞌꞌyi -zi -nɩ, ʋn ꞌke pa. Ʋbʋ ꞌmnʋ, tu-u ꞌꞌnyɩꞌa nyʋ ꞌꞌkɔgwlɛtinɩɛzɛgɛ, ʋn -flɔꞌɔ-ɔ ꞌꞌyi -lrɛɛ ꞌle ʋn ꞌke ꞌɛ ꞌꞌbhi li. ¹⁵Nyʋ-ʋ ꞌma-a ꞌꞌnyinynidɩꞌa nʋmʋ, -ʋ -seeꞌa ꞌwɔn -Lagɔ ꞌke ʋ -kɔ, gunyʋ o, ꞌꞌwɩlɩmʋ o, ꞌꞌkuilbhamʋ o, kɔkuibhlemʋ o, sɩncɛmʋ o, ʋ-bee -mnʋʋ-ʋ ꞌye-e ꞌꞌpiemʋ -sie -mʋ.

¹⁶ꞌƖnmɔ Zezii, ꞌɩn -zaꞌa-a ꞌle ꞌɩnmʋ gbo ꞌan -dalbhoyi -lue, ꞌle ꞌɩn ꞌye ɔ lbho, ꞌle, dɩ -nɩɩꞌa ꞌwee, ɔ ꞌke ɩ ꞌan -glɩgbɩwɔnyiꞌa nyʋ ꞌtmʋʋ. ꞌBhlʋkpayowli *Daviidɩꞌa ꞌꞌnayu ꞌɩn ꞌꞌduꞌo. -Bho zɔ -ka ꞌꞌyri ti-iꞌwla, ꞌɛ ꞌcʋdrɩɛ fanꞌa a, -ka ɛ-ɛ tɔꞌɔ nyʋ na zɔ-ɔ zɩꞌa a, ꞌka-a ꞌɩn -nɩꞌo -lrɛɛ.

¹⁷Ɔ ꞌlɛꞌɛ -kaa a, ꞌle *-Lagɔꞌɔ Lisaazuzu ꞌye Zeziiꞌa -glɩgbawɔnyiꞌa nyʋ ꞌꞌtuu ꞌle ʋn ꞌye ꞌꞌwɔ ꞌle ʋn na: Yi! A-bʋ nyʋ-ʋ ꞌwɔnꞌɔ wlu -nɛɛ ꞌbɔ, a-bee -mnʋʋ na -lrɛɛ: Yi! -Ka ꞌꞌnitʋ-ʋ ꞌlbhaꞌa nyɔ ꞌle ɔ-ɔ ꞌbɔꞌɔ ꞌꞌni ti ɔ ꞌke ꞌna a, nyɔ-ɔ ꞌbɔꞌɔ ti ɔ ꞌke ꞌɩnmʋ gbo yi ꞌle ꞌɩn -ke ɔ ꞌke -na, ɔ yi, ꞌle ꞌɔ ꞌgwlʋ ꞌke ꞌwɔn!

Wluꞌa ꞌꞌlruyijrawlu.

¹⁸Wlu-u ꞌwlʋꞌa ꞌle -Lagɔꞌɔ wɔn ꞌmʋ, ꞌɩnmɔ *ꞌZaan ꞌcnɩꞌa ꞌle ꞌꞌbɔgʋ -nɛɛ ꞌli, a-bʋ ꞌwɩn ꞌɩ ꞌbɔ, ꞌɩn-ɩ ꞌtmʋʋꞌo amʋ-ɛ, a ꞌꞌdu aꞌba ꞌꞌbhi ꞌꞌyrili, -bho nyɔ po ɩ ꞌꞌkpi, nyʋꞌa ꞌklekpiyalɩ -ke dɩ -Lagɔ -zaꞌa ꞌmʋ ꞌle ꞌꞌbɔgʋ -nɛɛ ꞌli, ꞌɩnnɩ ɔ-ɔ ꞌye ɔ ꞌꞌkpi -ya mʋ. ¹⁹-Bho nyɔ -zɩ ɩ ꞌꞌkpi, tuꞌa ꞌꞌbhi-i ꞌꞌnyɩꞌa nyʋ ꞌꞌkɔgwlɛtinɩɛzɛgɛ, -Lagɔ -see ɔ ꞌtɔ ꞌɛ ꞌꞌbhuo -lue ꞌtɩn ꞌꞌnyɩ yi. -Lagɔꞌɔ -gwlɔ ɔ -zaꞌa ꞌbho, ꞌɔ nyɔtu -see ꞌtɔ ꞌbɩ ꞌye yi ꞌle ɔ ꞌke ꞌle pa. A ꞌye li-ɔ, ɛ-bɛ tu ꞌmnɛ -ke ɛ-bɛ gwlɔ ꞌmnɛ, ꞌɩn -zaꞌa-a ꞌya dɩ ꞌmʋ ꞌle ꞌꞌbɔgʋ -nɛɛ ꞌli.

²⁰A -gblee, *Zezii ꞌwɔɔnꞌɔ wlu ꞌwee ꞌmnɩ ꞌꞌkpi, ɔ na: -Ziadɩ moꞌo, ꞌɩn -nɩꞌe-e -jeyi, ꞌɩn-ɩ ꞌyi-e le!

Kɩn, *ɩ -nɩ -kaa ꞌmʋ -ziaka! -Aꞌba -Kɔyi Zezii, yi le!

²¹-Aꞌba -Kɔyi Zeziiꞌa ꞌꞌnitiwʋnnasʋ -nɩ amʋ ꞌꞌkpi ꞌwee!