Zaakɩ

ZAAKƖꞌa ꞌꞌbɔgʋ

Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.

Zeziiꞌa nyʋ ꞌꞌwe Zaakɩ poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa ꞌle ɔ ꞌke ʋ ꞌkpa ꞌꞌyi po, ꞌle, kpli-i tɔꞌɔ -ka ʋn deꞌa -Lagɔ ꞌꞌgwli ꞌle ʋn -ke Zezii -naꞌa -ka -zɛgɛka, ʋn ꞌke ɩ nʋ ꞌle ɩ ꞌke -Lagɔ ꞌtʋ nʋ.

ꞌYewlu

¹A-bʋ ꞌma-a -Lagɔꞌɔ nyʋ, -ʋ -nɩꞌa ꞌbhlɩkpɩꞌa -dadudu ꞌꞌkpi, ꞌɩnmɔ Zaakɩ ꞌma-a ɔ-bɔ -Lagɔ ꞌmnɔ -ke -aꞌba -Kɔyi *Zezii *Kliisɩꞌa lbhʋnʋyi, ꞌɩnmɔ poꞌo amʋ ꞌꞌbɔgʋ -nɛɛ -jeyi. ꞌƖnmɔ ꞌyeꞌe amʋ -yeye!

ꞌꞌGwlideɛ -ke -naagɩ

²ꞌAn ꞌlotʋꞌa ꞌꞌnynuu-a, lɛꞌꞌo lɛ-ɛ yaꞌa nyɔ ꞌkleyeɛɛ -bodɩ, -bho ɛ bhla amʋ ꞌꞌkpi a, a li ꞌbʋbʋa! ³-Ɛkedɩmaa, -bho a de -Lagɔ -ke *Zezii ꞌꞌgwli ꞌꞌkɔmʋ, ꞌle a ꞌke lɛ ꞌmnɛ wɔn ꞌmʋ cɛ, ꞌɛ lɛtu-u nʋ -ɛꞌo ꞌle aꞌba ꞌꞌgwlikuɛ-ɛ ꞌkpaꞌa ꞌꞌkpi. ⁴ꞌBho ꞌɛ lemʋ, a ꞌꞌdu aꞌba ꞌꞌbhi ꞌꞌyrili ꞌle aꞌba ꞌꞌgwlikuɛ ꞌmnɛ ꞌke ꞌmʋku -ka -zɛgɛka, ꞌle, -ka -Lagɔ ꞌbɔꞌɔ ti a ꞌke -nɩ, a ꞌke -kaa -nɩ -lrɛɛ, ꞌle ꞌꞌnyinynidɩ -kaa amʋ -kɔ! -Bho ɛ -nɩ -kaa a, ꞌꞌlemnɩɩ a -see ꞌbɩ liꞌbhle yi, a -see lɛ ꞌmʋ-bɔ yi.

⁵ꞌLe a ꞌke -kaa -nɩ a, -bho nyɔ se ꞌle aꞌba ꞌꞌklumʋ -naagɩ ꞌbhle ꞌbho lɛꞌɛ ꞌꞌkpi, ɔ ꞌybhaa nɛ -Lagɔ! ꞌƖnnɔ ꞌye ɛ ɔ ꞌꞌnyɩ mʋ. -Ɛkedɩmaa, ɔ-ɔ ꞌꞌnyɩ-e nyɔꞌꞌo nyɔ lɛ ꞌɔ -pɔlʋꞌa klɛ ti, ꞌle, -bho ɔ -ka -kaa nyɔ-ɔ ꞌꞌnyɩ a, ɔ-ɔ ꞌꞌnyɩ -ɔꞌo -yoboo. ⁶Ɛ -nɩꞌa -kaa ꞌmʋ a, -bho aꞌba ꞌꞌklumʋꞌa nyɔ ꞌybhaa -Lagɔ lɛ, ɔ de ꞌꞌgwli na ɔ-ɔ ꞌye -ɔ ɛ ꞌꞌnyɩ -mʋ! ꞌƆ ꞌkɔlʋ -le! A yibo ꞌꞌniꞌa ꞌꞌtarili ꞌnɩ? -Bho -bibie -ka yi, -bho ɛ cɛ ꞌya ꞌplan, ꞌnɔɔ ɛ ꞌybhaꞌa ꞌtɩn, ꞌle-e ɛ-ɛ ꞌꞌvuto nɩꞌo. Nyɔ -ke -pɔlʋ ꞌkɔlʋꞌa a, -ka -lue ꞌmnɔ, ꞌka-a ꞌɔ dɩ -nɩꞌo -lrɛɛ. ^7-8Nyɔ-ɔ -nɩꞌa -kaa a, ꞌɔ nyɔtu -see ꞌle ꞌɔ -pɔlʋꞌa klɛ -za ꞌle ɔ ꞌke ɛ -Lagɔ -jeyi ꞌꞌnyɩ. ꞌƆ -pɔlʋ ꞌmnɛ ꞌgble-ɛꞌɛ ꞌmʋ-ɛꞌɛ dɩ, ꞌɔ popo ꞌgwlʋti -le na -Lagɔ-ɔ ꞌye -ɔ -zɛgɛ ꞌꞌlruli-nʋ -mʋ!

ꞌꞌPʋanlbhamʋ -ke ꞌꞌwlilɩbhlemʋ ꞌma-a -Lagɔꞌɔ nyʋ

⁹A -gblee, nyɔ-ɔ ꞌma-a *Zeziiꞌa nyɔ, -ɔ ꞌꞌlrɛꞌɛ ꞌbho ɔ -bonyunyuꞌa ꞌꞌyigbeyi, ɔ li ꞌbʋbʋa, -ɛkedɩmaa, nyʋ -lrʋʋ -Lagɔ -kɔꞌɔ ɔ, ɔ ꞌꞌnyɩ -ɔ ꞌbɩ ꞌle ꞌwa ꞌꞌklumʋ! ¹⁰Nyɔ-ɔ ꞌma-a Zeziiꞌa nyɔ, -ɔ ꞌbhleꞌa ꞌnynɩ tenyɩ, ɔ li ꞌbʋbʋa -lrɛɛ, -ɛkedɩmaa, -Lagɔ -yɔ ꞌɔ-ɔ ꞌzɔ ꞌle ɔ ꞌke ɔ -kɔ! -Ka -sukuiꞌa ꞌꞌbowleꞌa -gwleꞌa ꞌmʋ ꞌle ɩ-ɩ sɔꞌɔ ti, ꞌɔ ꞌꞌbhuo yiboꞌo-o ꞌka-a ꞌɔ tinɩɛ -nɩꞌo. ¹¹A -gblee, -bho ꞌyrʋ fan tenyɩ, -sukui-i ꞌꞌzrɛ-ɛ li, ꞌya ꞌꞌbowle-e yɛ-oꞌo ꞌle ɩ-ɩ cɛꞌɛ tawɔn, ɩ-ɩ ꞌgaꞌa ti, ꞌle ɩ -ke ꞌya ꞌꞌyrilinmɔɛ-ɛ sɔꞌɔ ti. -Ka -lue ꞌmnɔ, ꞌka-a ꞌꞌwlilɛbhleyi-i sieꞌe ꞌɔ -kɔkɔlɩ ti.

Nyɔꞌɔ ꞌkleyelɩ ꞌꞌkpiꞌa wlu

¹²A -gblee, nyɔ ꞌkleyelɩ bhlaꞌa ꞌꞌkpi, -ɔ -kuꞌa ꞌliti, -ɔ cɩ ꞌɩ wɔn ꞌmʋ a, ɔ ꞌwa-a ti, -ɛkedɩmaa, ɔ ꞌbhle-e -Lagɔ -ke *Zeziiꞌa ꞌꞌgwlideɛ ꞌmʋ. ꞌBho ꞌɛ lemʋ, -Lagɔ-ɔ ꞌnʋ -ɔ -zɛgɛ ꞌꞌlruli. Ɔ-ɔ ꞌꞌnyɩ -ɔ ꞌꞌkɔgwlɛtinɩɛzɛgɛ ꞌle ɛ-ɛ ꞌꞌyi ꞌɔ ꞌmʋ, ɛ-ɛ ꞌpɩpleꞌe ti ꞌbho ꞌɔ ꞌꞌtroli. Nyʋ-ʋ -kmaꞌa -Lagɔꞌɔ dɩ, ꞌɩnnʋ ɔ ꞌꞌdu ꞌɛ wɔn ꞌmʋti see. ¹³Lɛ-ɛ ꞌka nyɔ ꞌꞌnyinynidɩ wɔnpo ꞌbho -Lagɔꞌɔ ꞌꞌyigbeyi, -bho ɛ bhla aꞌba ꞌꞌklumʋꞌa nyɔ ꞌꞌkpi, ꞌɔ nʋ na: -Lagɔ -nɩꞌe ꞌɩnmʋ tidɩnnamʋ, -le! -Ɛkedɩmaa, lɛꞌꞌo lɛ se ꞌbhɛɛ ɛ ꞌke ɔ ꞌle ꞌꞌnyinynidɩꞌa nʋnʋa ꞌmʋ po ꞌle ɔ se ꞌbhɛɛ ɔ ꞌke nyɔ tiꞌdɩn ɔ ꞌke ɩ nʋ -lrɛɛ. ¹⁴A ꞌye li-ɔ, nyunyɔꞌɔ ꞌꞌnyinyninaagɩ ɔ ꞌbhleꞌa ꞌmʋ, ꞌɩnnɩ jri ꞌɔ ꞌle, ꞌle ɩ-ɩ ꞌꞌtuu nɔꞌo, ɔ-ɔ nʋꞌo ꞌꞌnyinynidɩ ꞌbho -Lagɔꞌɔ ꞌꞌyigbeyi. ¹⁵Kɩn, ɩ-bɩ ꞌꞌnyinyninaagɩ ꞌmnɩ, -bho nyɔ kpɩ ɩ, ꞌle ɔ-ɔ ꞌgaꞌa ꞌle ꞌꞌnyinynidɩ ꞌmʋ ti. A -gblee, ɩ-bɩ ꞌꞌnyinynidɩ ꞌmnɩ, ꞌmɛmɛɛ ɩ poꞌo ꞌꞌlru ꞌꞌkpi ti ꞌbho -Lagɔꞌɔ ꞌꞌyigbeyi.

¹⁶ꞌAn dɩkmalotʋꞌa ꞌꞌnynuu-a, aꞌba ꞌꞌmaa aꞌba ꞌꞌbhi dɩ ꞌꞌyrili -le! ¹⁷Lɛꞌꞌo lɛ-ɛ ꞌma-a -zɛgɛ, nyɔ-ɔ ꞌyeꞌa a, -Lagɔ -yaꞌa ꞌyrʋ-e, ꞌcʋ -ke ꞌcʋdrɩ ti, ꞌle ɔ ꞌmʋ ɛ-ɛ ꞌwlʋꞌo. ꞌƆ zizia ꞌꞌyi. -Bho ɩ -nɩ tan -ka fan, -ka ɩ-ɩ yaꞌa -zuzu ꞌle ꞌfɔtɩ -lrɩɩ gbo ꞌle ɛ ꞌbhɛɛꞌo ɛ ꞌke ꞌꞌyizizia a, ɔ se -kaa -nɩ. ¹⁸ꞌƆ wlu-u ꞌma-a -ziadɩ, a ꞌwɔnꞌɔ ꞌbɔ, ꞌle ɛ ꞌmʋ a ꞌye -nɩꞌe ꞌꞌkɔgwlɛtinɩɛzɛgɛ. ꞌLe ꞌɔ ꞌgwlʋdɩ ꞌmʋ ɔ nʋꞌo -kaa, ꞌle, ꞌbho lɛꞌꞌo lɛ ɔ -yaꞌa tiꞌa damʋ, -abʋ ꞌke kpɔ cɛ ꞌɔ dɩ, -ka lɩꞌa ꞌꞌyizabhi nyɔ-ɔ ꞌꞌnyɩꞌa -Lagɔ, ꞌya ka.

A po -Lagɔwlu -lokui ꞌle a ꞌke ɛ ꞌbho ꞌꞌdu

¹⁹ꞌAn dɩkmalotʋꞌa ꞌꞌnynuu-a, wlu-u nʋꞌa: -Bho ɛ ꞌꞌdu dɩꞌa -lokuiponamʋ, a ꞌꞌtɩtra li! -Bho ɛ ꞌꞌdu -wlunamʋ, aꞌba wɔnꞌɔ ꞌfɩɩn ti -le! Dɩ-ɩ ꞌka amʋ ꞌcɛ ꞌꞌyi ꞌlbhaa, -bho ɩ -yɛ amʋ, aꞌba ꞌꞌbɔ -le!, ɛ-bɛ wlu ꞌmnɛ, a popo ꞌɛ dɩ ꞌgwlʋti! ²⁰A -gblee, -bho nyɔ po ꞌcɛ, lɛꞌꞌo lɛ ɔ-ɔ nʋꞌa a, ɛ se ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi. ²¹ꞌƐ dɩ, lɛꞌꞌo lɛ-ɛ ꞌma-a ꞌꞌnyinynidɩ ꞌbho -Lagɔꞌɔ ꞌꞌyigbeyi, a ple ɛ li! A -nmɔ kpli ꞌmʋ, ꞌle, -Lagɔꞌɔ wlu a ꞌwɔnꞌɔ ꞌbɔ, -ɛ poꞌa ꞌkpʋ glu ꞌle amʋ ꞌmʋ, a ꞌꞌdu ɛ ꞌbho! Ɛ-bɛ wlu ꞌmnɛ ꞌbhle-e wɔnkuɛ ꞌmʋ, aꞌba ꞌpʋnpʋan a ꞌyeꞌa ꞌbho -Lagɔꞌɔ ꞌꞌyigbeyi, ꞌle ɛ ꞌke ɛ nʋ a ꞌke ɛ ꞌli ti-de ꞌꞌkɔmʋ.

²²A -gblee, -bho a -ka ꞌɔ wlu -lokui-ipo, -ka ɔ ꞌlɛꞌɛ ꞌtɩn, -bho aꞌba nʋ -kaa a, a-a ꞌꞌmaa-a aꞌba ꞌꞌbhi dɩ ꞌꞌyrili. ꞌƐ dɩ a ꞌꞌdu ꞌbho ꞌɔ wlu! ²³A ꞌye li-ɔ, nyɔ-ɔ po ꞌɔ -lokui, -ɔꞌɔ ꞌꞌduꞌa ꞌbho ꞌɔ wlu a, ɔ kɔɔꞌɔ-ɔ -ka nyɔ -lue-e ꞌꞌluoꞌa ka ꞌꞌyena ꞌmʋ, ɔ ꞌye ꞌɛ ꞌli popo ꞌle ɔ ꞌyeꞌa lɛ -lue liꞌye ꞌle ꞌɔ ꞌꞌyigbeyi. Ɔ nʋꞌa -kaa, ɔ ꞌꞌtayi ꞌnɛ-ɛ ꞌꞌyiti. ²⁴-Nɔɔ gbɛ ziꞌa a, -ka ꞌɔ ꞌꞌyigba -nɩꞌa, ɔ ꞌmateꞌe-e -kaa. Ɔ -see ɛ nmaze. ²⁵Ɛ -nɩꞌa -kaa ꞌmʋ, -Lagɔwlu ꞌꞌnyɩꞌa nyɔ ꞌꞌyiflɔɛ, nyɔ-ɔ ꞌcrɛ ꞌɛ ꞌmʋti, ꞌle, -ka ɛ ꞌlɛꞌɛ ꞌtɩn, -ɔ -naꞌa -kaa, -Lagɔ-ɔ ꞌnʋ -ɔ ꞌɛ dɩ -zɛgɛ ꞌꞌlruli. ꞌƆ nyɔtuꞌa po -lokui bhubhuyiti. Ɔ-ɔ ꞌꞌdu -ɛ ꞌbho. -Bho ɔ nʋ -kaa, ꞌꞌlemnɩɩ ɔ-ɔ wʋnna ꞌnɔ-ɔ ꞌꞌniti, -ɛkedɩmaa, ꞌɛ lɛtu-u ꞌmo-o wluzɛgɛ.

²⁶-Bho nyɔ nʋ Zeziiꞌa nyɔ ɔ ꞌꞌduꞌo, -bho ɔ -ka dɩ ꞌmʋ-ʋza -flafla a, ɔ-ɔ ꞌꞌmaa-a ꞌɔ ꞌꞌbhuo. Bhʋ ɔ-ɔ naꞌa ꞌbho -aꞌba -tɩta -Lagɔꞌɔ -jeyi, ɛ-ɛ ꞌmo-o bhubhulɛ. ²⁷-Dɩgbanynʋkpakpɩ -ke ꞌꞌkuenynuu -nɩꞌa sɩanamʋ, nyɔ-ɔ ziꞌa ꞌwa dɩ ꞌle ɔ ꞌꞌsiꞌa ꞌbho, -ɔ pleꞌa ꞌꞌnyinynidɩ li, ꞌɔ nyɔtuꞌa -nanabhʋ nʋ ꞌɔ ꞌtʋ ꞌbho ꞌɔ -jeyi.

Nyʋ ꞌwee ꞌbhɛɛꞌɛ-ɛ ꞌmʋ ꞌbho -Lagɔꞌɔ ꞌꞌyigbeyi

¹ꞌAn ꞌlotʋꞌa ꞌꞌnynuu-a, -aꞌba -Kɔyi *Zezii *Kliisɩ -ke ꞌnynɩ-ɩ ꞌbhɛꞌɛ ꞌꞌyi, a-bʋ de ꞌɔ ꞌꞌgwli, aꞌba ꞌtɛ nyɔ ꞌmʋ -le! ²A -gblee, ꞌɩn-ɩ yi-oꞌo ꞌɩn ꞌke ꞌɛ dɩꞌa kpɛ de ꞌle a ꞌke ꞌan wlu ꞌmnɛꞌɛ ꞌzɔ ꞌmʋtiꞌwɔn: Zɔ -lue ꞌzɔ, a ꞌgbʋʋꞌo-o ꞌꞌlru ꞌle -budu -lue ꞌli. Nyʋ ꞌsɔn nʋꞌa -kaa, ʋn -paꞌa-a amʋ ꞌbɩ. -Lue -paꞌa-a ꞌꞌyrilinmɔbanɩ ꞌmʋ, ꞌle, -jiɛmʋpolɛ -nʋ-ɛꞌɛ sanu ꞌmʋ, ɔ -po ꞌnɛ -jiɛ ꞌmʋ. ꞌꞌPʋan-a ꞌlbhaꞌa -lrɔɔ. Ɔ -paꞌa-a ꞌꞌsazʋzʋɩn ꞌmʋ. ³A ꞌye ꞌʋ ꞌꞌyri a, nyɔ-ɔ -paꞌa ꞌꞌyrilinmɔbanɩ ꞌmʋ, ꞌɩnnɔ a ꞌꞌduꞌo ꞌbho tenyɩ ꞌle a-a nʋ ꞌɔ -bodɩ: -Aꞌba -klagba, kpezɛgɛ ꞌka-a! -Zi ꞌbho -ɩn ꞌke ti-de. ꞌLe a-a nʋꞌo ꞌꞌpʋanlbhayi -bodɩ: -Ɩnmɔ -yɔɔ, -nyna yayi ti, ꞌle ꞌꞌbhalrɛɛke: -Zi -laa ꞌbhlʋgbɔ, -aꞌba bhɩꞌa ꞌꞌtroli -ɩn ꞌke ti-de! ⁴-Bho a -ka -kaa-a nʋ a, a-a popo-o ꞌgwlʋti ꞌꞌnyinynika ꞌle a-a ꞌtɛꞌɛ nyʋ ꞌmʋ.

⁵ꞌAn dɩkmalotʋꞌa ꞌꞌnynuu-a, a po -lokui! Nyʋꞌa -dadudu-u ꞌꞌlrɛꞌɛ ꞌbho ꞌwa -bonyunyuꞌa ꞌꞌyigbeyi a, -Lagɔ -zʋ ꞌʋ ꞌbho -lrɛɛ ʋn ꞌke ɔ ꞌꞌgwlide ʋn ꞌke ꞌɔ nyʋ ꞌꞌdu, ꞌle ꞌɔ ꞌꞌnitiwʋnnasʋ ꞌke ʋ ꞌꞌkpi ꞌpɩple. Nyʋ-ʋ -kmaꞌa ꞌɔ dɩ, ɔ na ꞌka-a ɔ ꞌke ʋ -bodɩ nʋ. ⁶Ɛ -nɩꞌa ꞌtɔ -kaa ꞌmʋ ꞌle, leedɩ aꞌba ꞌꞌdu ꞌʋ ꞌbhoꞌa? A -gblee, nyʋ-ʋ ꞌma-a ꞌnynɩbhlemʋ, ꞌwa ꞌꞌklumʋꞌa nyʋ-ʋ yaꞌa amʋ ꞌkleyeɛɛ ꞌꞌkpi. Ʋbʋ ꞌmnʋ, ꞌɩnnʋ kpaꞌa amʋ -zigletumʋ wɔnyi. ⁷Ʋbʋ ꞌmnʋ -lrɛɛ, *Zezii *Kliisɩꞌa ꞌnynɩ a ꞌbhleꞌa ꞌꞌkpi, ꞌɩnnʋ nyni ꞌnɛ wɔn.

⁸A -gblee, wlu-u ꞌcnɩ-ɛꞌɛ ꞌle -aꞌba -Kɔyi -Lagɔꞌɔ ꞌꞌbɔgʋ ꞌli, -ɛ nʋꞌa: -Ka -ɩn -kmaꞌa -aꞌa ꞌꞌbhuoꞌa dɩ, -kma -kaa -aꞌa -bonyunyɔꞌɔ dɩ, ɛ-bɛ wlu ꞌmnɛ, nyɔ-ɔ ꞌꞌdu ꞌɛ ꞌbho, ɔ-ɔ ꞌnʋ-o ꞌꞌyrilinmɔlɛ. ⁹Ɛ -nɩꞌa -kaa ꞌmʋ a, -bho a ꞌtɛ nyɔ ꞌmʋ, a ꞌnʋ-o ꞌꞌnyinynidɩ ꞌbho -Lagɔꞌɔ ꞌꞌyigbeyi. A ꞌcɛ-ɛ ꞌɔ wlu ꞌmʋ, -ɛkedɩmaa, a -see ɛ ꞌbho ꞌꞌdu. ¹⁰A ꞌye li-ɔ, -bho nyɔ -ka ꞌkɩ *-Lagɔꞌɔ gba ꞌwee ꞌꞌyi-ikpʋn, ꞌle ɔ ꞌke ꞌɛ -lue ꞌtɩn ꞌmʋcɛ ɛ, ꞌɔ nyɔtu kɔɔꞌɔ-ɔ nyɔ -yɔ cɛꞌɛ ꞌya klɛ ꞌmʋ ꞌbho -Lagɔꞌɔ ꞌꞌyigbeyi. ¹¹-Ɛkedɩmaa, -Lagɔ nʋꞌa: Nyɔꞌɔ ꞌye -yranynɔbha -le, ꞌɩnnɔ nʋꞌo na: Nyɔꞌɔ ꞌlbha ꞌꞌku -le, -lrɛɛ. ꞌKa-a ɛ -nɩꞌe ꞌmʋꞌa dɩ, -bho nyɔ -see -yranynɔbha ꞌye ꞌle ɔ ꞌke ꞌꞌku ꞌlbha a, ɔ ꞌcɛ-ɛ ꞌɔ gba ꞌmʋ. ¹²ꞌƐ dɩ ꞌɩn-ɩ ꞌtmʋʋꞌo amʋ, ꞌbho -Lagɔꞌɔ -zigleꞌa zɔ, ꞌɔ wlu-u ꞌꞌnyɩꞌa nyɔ ꞌꞌyiflɔɛ -ɛ -ke ꞌli a deꞌa ti a, -bho ɔ ꞌke ɛ amʋ ꞌꞌkpi cɛ, aꞌba ꞌmʋzadɩ -ke aꞌba kpli ɔ-ɔ ꞌye ya-gbʋ mʋ. ꞌƖnnɛ ꞌbhleꞌe ꞌnynɩꞌa dɩ, a ꞌbhle a -bonyunyɔꞌɔ ngaze ꞌle ɩ-bɩ aꞌba ꞌmʋzadɩ -ke aꞌba kpli ꞌmnɩ ꞌmʋ! ¹³A ꞌye li-ɔ, nyɔ-ɔ seꞌa ɔ -bonyunyɔꞌɔ ngaze ꞌbhle, -Lagɔ -see ꞌɔ ngaze ꞌye yi -lrɛɛ. Nyɔ-ɔ ꞌbhleꞌa ngaze a, ɔ se -Lagɔꞌɔ -zigleꞌa -sɩanyɩ ku ꞌmʋti ꞌbhle.

Nyɔ-ɔ deꞌa -Lagɔ ꞌꞌgwli, ɔ -tɔ ꞌɛ kpli

¹⁴ꞌAn ꞌlotʋꞌa ꞌꞌnynuu-a, -bho nyɔ nʋ ɔ ꞌde-e -Lagɔ ꞌꞌgwli, -bho ɔ se ꞌɛ kpli -tɔ ꞌle, ɛ -se -laa bhubhuyitiꞌa lɛ? Ɔ ꞌde-e -Lagɔ ꞌꞌgwliꞌa ꞌꞌsɛꞌɛ kamʋ, ɔ ꞌbhɛɛ ɔ ꞌke ꞌpʋn ꞌnɩ ꞌbho ꞌɔ ꞌꞌyigbeyi? ¹⁵A -gblee, ꞌɩn-ɩ ꞌde-e ꞌɛ dɩꞌa kpɛ -lrɛɛ ꞌle a ꞌke ꞌan wlu ꞌmnɛꞌɛ ꞌzɔ ꞌmʋtiꞌwɔn. Zɔ -lue ꞌzɔ, nyukpasu ꞌle ꞌꞌbhalrɛɛke ꞌnynaakpʋ -ke a ꞌꞌduꞌa *Zeziiꞌa nyʋ, -bho aꞌba nyɔ -lue -ke ꞌwa -lue ꞌgbʋʋ -dalue ꞌꞌyi, -ka ɔ seꞌa lililɛ -ke -bana ꞌbhle ꞌle ɔ ꞌke ɩ ɔ -bodɩ ꞌmʋ-za, ¹⁶-bho ɔ nʋ na: ꞌƖn-ɩ ꞌmu-o le. -Lagɔ -sie -ɩnmʋ gbo! Ɔ ꞌꞌnyɩ -ɩnmʋ -banɩ -ke lililɩ!, -bho ɔ se ɔ -kpa ꞌle ɔ ꞌke -kaa ꞌlɛ ꞌle, ɛ -se -laa bhubhuyitiꞌa lɛ? ¹⁷-Ka -lue ꞌmnɔ ꞌka-a -Lagɔꞌɔ ꞌꞌgwlideɛꞌɛ dɩ -nɩꞌe ꞌmʋ. -Bho nyɔ nʋ ɔ ꞌde-e -Lagɔ ꞌꞌgwli, -ka ꞌɔ wlu ꞌlɛꞌɛ, -bho ɔ -see -kaa -na, ꞌɔ ꞌꞌgwlideɛ ꞌmnɛ-ɛ ꞌmo-o bhubhuyitiꞌa lɛ.

¹⁸A -gblee, nyɔ ꞌbhɛɛꞌo ɔ ꞌke nʋ, na: -Ɩnmɔ -yɔɔ, -ɩn ꞌbhle-e -Lagɔꞌɔ ꞌꞌgwlideɛ ꞌmʋ, ꞌle -ɩn se kplizɩgɩ nʋnamʋ -nɩ, ꞌle ꞌmna-a nʋ ɩꞌo. -Ka -mnɔɔɔ se ꞌɩ nʋnamʋ -nɩ, ꞌle -ɩn ꞌyeꞌa na, -ɩn ꞌde-e -Lagɔ ꞌꞌgwli, nʋ, -tɔ -kaa ꞌɩnmʋ, ꞌle, ꞌan -nɩ nʋꞌa na ꞌɩn ꞌde-e -Lagɔ ꞌꞌgwli, ꞌɩn ꞌke ɩ -ɩnmʋ ꞌꞌyi-tɔ. ¹⁹-Ka -Lagɔ -nɩꞌa -lue ꞌtɩn, -ɩn ꞌde-e -kaa ꞌꞌgwli, ꞌkla -ko? Ɛ -nmɔꞌɔ-ɔ ꞌꞌyrili. -Ka -lue ꞌmnɔ, ꞌka-a ꞌꞌnyinynidɩꞌa -zuzu ꞌꞌwe deꞌe ꞌꞌgwli ꞌle ꞌɛ -sɩanyɩ-ɩ ꞌlbhɩ ɩꞌo.

²⁰-Naagɩꞌa ꞌꞌyisuyi! Nyɔ-ɔ deꞌa -Lagɔ ꞌꞌgwli, -bho ꞌɔ nʋ kplizɩgɩ, -ka ꞌɔ ꞌꞌgwlideɛ ꞌmnɛ ꞌꞌduꞌa bhubhuyitiꞌa lɛ, -ɩn ꞌbɔ-ɔ ti, ꞌɩn ꞌke ɩ gbɔzɩza ꞌle -ɩn ꞌke ɩ ꞌmʋtiꞌwɔn? ²¹-Gblee, popo -aꞌba ꞌꞌna *Ablaamʋꞌa dɩ ꞌgwlʋti! ꞌƆ kplizɩgɩ ɔ nʋꞌa kamʋ -Lagɔ po ꞌɔ ꞌꞌyisrɛɛyi ꞌbho ꞌɔ ꞌꞌyigbeyi. -Gbagbʋ -ke ꞌꞌkpi nyʋ-ʋ za nɩꞌa -Lagɔꞌɔ *ꞌsraga a, ꞌbho-o ɔ -ke ꞌɔ ꞌꞌyu *Izaakɩ muꞌo, ɔ ꞌke ɔ -Lagɔꞌɔ ꞌsraga ꞌmʋ -za -nɩ. ²²-Ɩn ꞌye li-ɔ, ꞌbho ꞌɔ -Lagɔꞌɔ ꞌꞌgwlideɛ ꞌꞌkpi ɔ poꞌo kplizɩgɩ. ꞌƐ lɛtu -nyniaꞌa ꞌɔ -Lagɔꞌɔ ꞌꞌgwlideɛ ꞌꞌyi. ²³Ɩ ziꞌa -kaa a, ꞌle, wlu-u ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli -ɛ nʋꞌa na: Ablaamʋ ꞌde-e -Lagɔ ꞌꞌgwli. ꞌƐ dɩ ɔ ꞌꞌduꞌo ꞌꞌyisrɛɛyi ꞌbho ꞌɔ ꞌꞌyigbeyi, ꞌle ꞌɛ -lrɛɛ-ɛ tɔꞌɔ na ɔ ꞌmo-o ꞌɔ bha, ɩ-bɩ wlu ꞌmnɩ ꞌye ꞌꞌyinyni. ²⁴A -gblee, kplizɩgɩ nyɔ-ɔ nʋꞌa a, ꞌɩnnɩ po ꞌɔ ꞌꞌyisrɛɛyi ꞌbho -Lagɔꞌɔ ꞌꞌyigbeyi, ɛ -se ꞌɔ ꞌꞌgwlideɛꞌɛ ꞌꞌsɛꞌɛ dɩ -ko. ²⁵Raabʋ ꞌma-a ꞌꞌwɩlɩnynaakpʋ, a popo ꞌwa dɩ ꞌgwlʋti -lrɛɛ! *ꞌZuifʋtɔlʋ ꞌwa -lrʋʋ lbhoꞌa, ʋn ꞌye ꞌʋ a, ʋn -kpa nʋ-oꞌo ꞌle ʋn ꞌye ʋ -jolʋ -lrɛɛ -tɔ. ꞌƖnnɛ -zʋ ꞌʋ ꞌmɛmɛɛꞌɛ wɔn ꞌmʋ. A -gblee, ꞌwa kplizɩgɩ ꞌmnɩꞌa dɩ ꞌɛ lɛtu -nʋ-ɛꞌo. Ɛ -se ꞌwa ꞌꞌgwlideɛꞌɛ ꞌꞌsɛꞌɛ dɩ -ko. ²⁶A ꞌye li-ɔ, nyɔ-ɔ seꞌa -zuzu ꞌmʋꞌbhle, -ka ɔ ꞌꞌduꞌa ꞌꞌku a, ꞌka-a -Lagɔꞌɔ ꞌꞌgwlideɛꞌɛ dɩ -nɩꞌe ꞌmʋ -lrɛɛ. Nyɔ-ɔ deꞌa -Lagɔ ꞌꞌgwli, -bho ꞌɔ nʋ kplizɩgɩ, ꞌɔ ꞌꞌgwlideɛ ꞌmnɛ-ɛ ꞌmo-o bhubhuyitiꞌa lɛ.

Nyɔꞌɔ ꞌmʋzadɩ

¹ꞌAn ꞌlotʋꞌa ꞌꞌnynuu-a, aꞌba -daduduꞌa ꞌꞌtɩtra li ʋn ꞌke nyʋꞌa -Lagɔwluꞌa -tɔmʋ ꞌꞌdu -le! -Ɛkedɩmaa, -a-bʋ ꞌma-a nyʋꞌa -tɔmʋ, -aꞌba -zigle-e ꞌye-e wɔn-ku -mʋ tenyɩ ꞌbho -Lagɔꞌɔ ꞌꞌyigbeyi ꞌle ɛ ꞌke nyʋ -lrʋʋꞌa nɛ -zi.

²A -gblee, wlu-u ꞌwlʋꞌa ꞌle -aꞌba wɔn ꞌmʋ, -ɩ seꞌa ꞌꞌyrili-nmɔ ꞌbho -Lagɔꞌɔ ꞌꞌyigbeyi, -a -gwle ꞌnɩ-ɩ ꞌmʋzanamʋ. -Bho nyɔ -ka wlu, -bho wlu -see ɔ ꞌꞌyizi ꞌbho -Lagɔꞌɔ ꞌꞌyigbeyi, ɔ -se ꞌbɩlibhleyi -ko. Ɔ ꞌbhɛɛꞌo ɔ ꞌke ꞌɔ ꞌꞌbhuo wɔnyiꞌbhɛɛ. ³A yibo -sieko ꞌnɩ? ꞌLe ꞌɛ wɔn ꞌmʋ -a ꞌꞌduꞌo nɛtɛdie ꞌle -a sɛn ɛꞌo ꞌle ɛ-bɛ -siekobhuo ꞌke -aꞌba wlu ꞌbho ꞌꞌdu. -Bho -a nʋ ɛ -kaa, ꞌꞌlemnɩɩ, -jolʋ -a ꞌybhaꞌa, ɛ-ɛ bhlu -ɛꞌo. ⁴A yibo batooklɩgbɩ ꞌnɩ -lrɛɛꞌɛ? ꞌYa lɛtu ꞌbhɛ-ɛ ꞌꞌyi tenyɩ ꞌle wɔnkupʋpɔɔ-ɔ ꞌꞌtuu nɩꞌo ꞌle ɩ-ɩ naꞌo. Ɛ -nɩꞌa -kaa ꞌmʋ a, tufɔtɩ ꞌsɔn-ɔ seꞌa ꞌꞌyiꞌbhɛ, -ɩ ꞌpɛꞌɛ ꞌle ꞌya lemʋ ti, -bho ʋn -kɩ ɩ-ɩ tri, ꞌɩnnɩ ꞌsrɛɛꞌɛ ꞌya ꞌꞌlru ꞌꞌyi, ꞌle, -da ꞌya trimʋꞌa -pɔlʋ -nɩꞌa a, ɩ-ɩ mu nɩꞌe ꞌbho. ⁵A -gblee, -ka -lue ꞌmnɔ ꞌka-a nyunyɔꞌɔ -mɩɛ -nɩꞌo. Ɛ-ɛ ꞌmo-o lɛtoope. Ɛ-bɛ ma ꞌka-a lɛtoope a, ɛ-ɛ ꞌnʋ-o ꞌꞌnyinynilɩꞌa -dadudu.

A popo -naklaatoopeꞌa dɩ ꞌgwlʋti! ꞌKwla-a ꞌbhɛꞌɛ ꞌꞌyigbeyi ti, ɛ ꞌbhɛɛꞌo ɛ ꞌke ɛ ꞌꞌyri po. ⁶-Ka nɛ-ɛ sinꞌa lɩ, ꞌka-a nyunyɔꞌɔ wlu -nɩꞌo -lrɛɛ. Lɛꞌꞌo lɛ-ɛ ꞌma-a ꞌꞌnyinynidɩ ꞌbho -Lagɔꞌɔ ꞌꞌyigbeyi, ꞌle -mɩɛ ꞌmʋ ɛ-ɛ ꞌwlʋꞌo. Ɛ-bɛ -mɩɛtoope ꞌmnɛ, ꞌle nyɔꞌɔ wɔn ꞌmʋ ɛ ꞌꞌsriꞌo, ꞌle ɛ-ɛ poꞌo nyunyɔbhuo ꞌꞌnyinyninyɔ ꞌbho -Lagɔꞌɔ ꞌꞌyigbeyi. -Ɛ -sɔꞌɔ ꞌbho -aꞌba ꞌwlʋnamʋ ꞌmʋ, -ɛ nyniꞌa -aꞌba ꞌmɛnamʋ, ɛ-ɛ ꞌnʋ-o ꞌꞌnyinynidɩ. Ɩ-bɩ ꞌꞌnyinynidɩ ꞌmnɩ, ꞌle ꞌꞌnyinynidɩꞌa tiyayi ꞌmʋ ɩ-ɩ ꞌwlʋꞌo. ⁷A -gblee, nmi-i na nɩꞌa bhɩ o, -ɩ na nɩꞌa ꞌbɛtɛ o, zmi o, nɩkpɩ o, nyɔ-ɔ ꞌkpʋn-o ꞌya tɔlʋ ꞌle ɔ-ɔ ꞌꞌsɩan nɩꞌo, ɔ-ɔ ꞌbhɛɛ ꞌnɩ wɔnyi ꞌle ɩ-ɩ ꞌꞌdu ꞌɔ ꞌbho. Ɛ-bɛ wɔnkuɛ ꞌmnɛ, ꞌɩnnɛ nyɔ ꞌbhleꞌo. ⁸ꞌLe nyɔ-ɔ nʋꞌa -kaa ꞌmnɔ ɔ, ɔ se ꞌɔ ꞌꞌbhuoꞌa -mɩɛ wɔnyiꞌbhɛɛ. Ɛ-ɛ ꞌmo-o ꞌꞌnyinynilɛ. ꞌƐ lɛtuꞌa -de ti ꞌtɩn. -Bho sɛn nmu nyɔ, -ka ꞌɛ gu-u ꞌwlʋꞌa ꞌle ꞌɛ wɔn ꞌmʋ ꞌle ɛ ꞌbhɛɛꞌo ɛ ꞌke ɔ ꞌlbha, ꞌka-a nyɔꞌɔ -mɩɛ-ɛ nʋꞌo ꞌꞌnyinynidɩꞌa -dadudu nyʋ ꞌꞌlruli. ⁹A -gblee, -aꞌba -tɩta -Lagɔ -kɔꞌɔ -amʋ, wlu -a ꞌꞌluoꞌa ꞌmʋ ꞌle -a ꞌbhɛɛꞌɛ ꞌɔ ꞌnynɩ ꞌꞌyi, ɛ-bɛ wlu -lue ꞌmnɛ, nyunyu ɔ -yaꞌa ti, -ka ɔ -nɩꞌa, -ʋ -nɩꞌa -kaa, ꞌle -a ꞌꞌbhitiꞌe ꞌꞌyiti, -a zɛ ꞌɛ ʋ -bodɩ ꞌmʋ ꞌꞌnyinynika. ¹⁰ꞌAn ꞌlotʋꞌa ꞌꞌnynuu-a, a ꞌye -ka ꞌꞌyrilinmɔwlu -ke ꞌꞌnyinyniwlu-u ꞌwlʋꞌa ꞌle -aꞌba wɔn ꞌmʋ li-ɔ! ꞌƐ lɛtu se ꞌꞌyrili-nmɔ. -Aꞌba nʋ ɛ -le! ¹¹A -gblee, ꞌꞌni-i -nmɔꞌɔ wɔn -ke ꞌꞌni-i ꞌbhleꞌa ꞌtɔn wɔn, ɩ se ꞌbhɛɛ ɩ ꞌke ꞌꞌnilru -lue kɔ ꞌwlʋ. ¹²Tu-u troꞌa ꞌmɩɩmɩɩbhi, ɛ se ꞌbhɛɛ ɛ ꞌke -kmakmabhi po -lrɛɛ. -Ka -lue ꞌmnɔ ꞌka-a ɛ -nɩꞌe ꞌmʋ -lrɛɛ ꞌbho ꞌꞌniꞌa damʋ. ꞌꞌNilru ꞌbhleꞌa ꞌtɔn wɔn, nyɔ se ꞌbhɛɛ ɔ ꞌke ꞌle ꞌɛ kɔ wɔnnmɔni ꞌꞌpli.

-Naagɩ -Lagɔ-ɔ ꞌꞌnyɩꞌa nyʋ

¹³ꞌAn ꞌlotʋꞌa ꞌꞌnynuu-a, -bho nyɔ -nɩ ꞌle aꞌba ꞌꞌklumʋ ꞌle ɔ ꞌke -naagɩ ꞌbhle ɔ ꞌke lɛ ꞌꞌyri yibo a, ꞌle ꞌɔ ꞌꞌyrilinmɔkpli ꞌmʋ, ɔ -tɔ ꞌna! -Bho ɔ -kɩ ɩ-ɩ nʋ, ɔ -nmɔ kpli ꞌmʋ! ꞌKa-a -naagɩzɛgɛꞌɛ ꞌbhleyi -nɩꞌo. ¹⁴A -gblee, -bho aꞌba ꞌlimʋ -nyni wɔn ꞌle a ꞌke aꞌba -bonyunyu -lrʋʋꞌa ꞌꞌmʋnynɩ ꞌbhle, -bho a -ka aꞌba ꞌꞌbhiꞌa ꞌꞌsɛꞌɛ dɩ-ɩ zi, ꞌꞌlemnɩɩ aꞌba ꞌꞌplin -le bhubhuyiti! Dɩ-ɩ ꞌma-a -ziadɩ, aꞌba ꞌꞌbhiti nɩ ꞌꞌyiti -le! ¹⁵Nyʋ-ʋ nʋꞌa -kaa, -naagɩ ʋn ꞌbhleꞌa, ꞌɛ lɛtu -see -Lagɔ ꞌmʋ ꞌwlʋ. Ɛ-ɛ ꞌmo-o nyunyu -ke ꞌkmʋ -nɛɛ ꞌmʋꞌa lɛ. ꞌꞌNyinynidɩꞌa tiyayi ꞌmʋ ɛ-ɛ ꞌwlʋꞌo. ¹⁶A -gblee, nyʋ-ʋ ziꞌa ꞌwa ꞌꞌsɛꞌɛ dɩ, -ʋ ꞌbhleꞌa ꞌwa -bonyunyu -lrʋʋꞌa ꞌꞌmʋnynɩ ꞌli, -bho ʋn -nɩ -dalue, ꞌmʋtiwʋnwɔɛɛnꞌɛ -nɩ ꞌle ꞌwa ꞌꞌklumʋ, ꞌꞌnyinynikpliꞌa ꞌꞌsɛ nyɔ-ɔ ꞌyeꞌe ꞌle li. ¹⁷Ɛ -nɩꞌa -kaa ꞌmʋ a, -naagɩ -yɛ ꞌwlʋꞌa -Lagɔ ꞌmʋ, ɛ -ke ɛ se lɛ -lue ꞌmʋ-nɩ. Nyɔ-ɔ ꞌbhleꞌa -naagɩ ꞌmnɛ, ꞌɔ ꞌbhle ꞌbɩ li ꞌbho -Lagɔꞌɔ ꞌꞌyigbeyi. Ɔ-ɔ ꞌꞌnyɩ-e nyʋ wɔnlipɩpɛɛ. ꞌƆ -wlu wɔn. Ɔ-ɔ ꞌwɔn-ɔ ꞌɔ -bonyunyuꞌa -naagɩ ꞌmʋti -susueyi. Ɔ ꞌbhle-e ngaze. Ɔ-ɔ ꞌnʋ-o kplizɩgɩ. ꞌƆ ꞌtɛ nyʋ ꞌmʋ ꞌle ɔ ꞌse ꞌꞌyrabha ꞌbhle. ¹⁸A -gblee, nyʋ -ke -pɔlʋ -nmɔꞌɔ ꞌꞌyrili, -ʋ ꞌꞌnyɩꞌa ꞌwa -bonyunyu -lrʋʋ wɔnlipɩpɛɛ, lɛꞌꞌo lɛ ʋn-ʋ nʋꞌa a, ɛ-ɛ ꞌwɔn-oꞌo. Ʋn-ʋ ꞌnʋ-o ꞌꞌyisrɛɛkpli ꞌbho -Lagɔꞌɔ ꞌꞌyigbeyi ꞌle ꞌwa dɩ ꞌwa -bonyunyu -lrʋʋ ꞌke ɩ-bɩ kplizɩgɩ ꞌmnɩ nʋ -lrɛɛ. -Bho nyɔ -lo tu, ꞌle ɛ ꞌke -tro, -ka ɔ -ke nyʋ -lrʋʋ-ʋ li ꞌɛ ꞌꞌbhi, ꞌɩnnɛ -ke ꞌɛ lɛtu gʋgɔꞌɔ ꞌꞌyiti.

Nyʋ-ʋ -kmaꞌa ꞌkmʋ ꞌmʋꞌa lɩꞌa dɩ

¹ꞌAn ꞌlotʋꞌa ꞌꞌnynuu-a, jɛjɛɛ -ke tʋvɔɛ-ɛ -nɩꞌa ꞌle aꞌba ꞌꞌklumʋ, doo ɩ-ɩ ꞌwlʋꞌa? A-a nʋ -ɩꞌo, -ɛkedɩmaa, lɩ-ɩꞌa ꞌbhɛɛꞌɛ -Lagɔꞌɔ ꞌnynɩ ꞌꞌyi, aꞌba -pɔlʋ -nɩꞌa ꞌꞌyi, ɩ -ke ꞌɔ ꞌgwlʋdɩꞌa nʋnʋaꞌa ꞌtʋ-ʋ dede-e ꞌꞌyi ꞌle aꞌba -pɔlʋ gbo. ²Nyʋꞌa lɩ-ɩ nʋꞌa amʋ ꞌtʋ, a-a ꞌyeꞌa li, -bho ʋn se ɩ amʋ ꞌꞌnyɩ ꞌle ꞌya ꞌgwlʋ-ʋ nyniꞌe amʋ li. -Bho ꞌya ꞌtʋ -nɩ amʋ ꞌꞌgwli, -bho a -see ɩ ꞌye ꞌle a-a ꞌꞌduꞌo ꞌɛ dɩ a-a jɛꞌo ꞌle a-a vɔꞌɔ tʋ. Ɩ-bɩ lɩ a-a ꞌbɔꞌɔ ti, aꞌba ꞌye ɩ, -ɛkedɩmaa, aꞌba ꞌybhaa nɩ -Lagɔ. ³-Bho a ꞌybhaa nɔ, ꞌɔ ꞌꞌnyɩ ɩ amʋ, -ɛkedɩmaa, aꞌba ꞌgwlʋtipopoɛ se ꞌꞌyrili-nmɔ. Dɩ-ɩꞌa ꞌbhɛɛꞌɛ ꞌɔ ꞌnynɩ ꞌꞌyi, -ɩ ꞌma-a aꞌba ꞌꞌbhiꞌa ꞌtʋnʋdɩ, ꞌya ꞌꞌlru ꞌꞌyi a-a ꞌbɩ ꞌɩ ti.

⁴A-a ꞌmo-o nyʋ-ʋ -see ꞌɔ ꞌꞌyi-kpʋn. Lɩ-ɩꞌa ꞌbhɛɛꞌɛ ꞌɔ ꞌnynɩ ꞌꞌyi, -bho a -kɩ ɩ kli-i ple, a se yibo na a-a ꞌmo-o ꞌɔ ꞌꞌyidedemʋ? Nyɔꞌꞌo nyɔ-ɔ ple ꞌɩ kli a, ɔ-ɔ ꞌmo-o ꞌɔ ꞌꞌyidedeyi. ⁵Aꞌba popo ꞌgwlʋti -le na, wlu-u ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli, ɛ-ɛ ꞌmo-o bhubhuyitiꞌa lɛ! Ɛ na *-Lagɔꞌɔ Lisaazuzu ꞌbɔ-ɔ ti ɔ ꞌke -aꞌba -pɔlʋꞌa klɛ ꞌmʋꞌꞌluo ꞌle ɔ ꞌke amʋ ꞌmʋ -nɩ. ⁶ꞌBho ꞌɛ lemʋ, ɔ-ɔ ꞌpo-o -amʋ ꞌkpɩ ꞌmʋ tenyɩ ꞌle -a -kaa ɩ-bɩ ꞌꞌnyinynilɩ ꞌmnɩ ꞌwɔɔn ꞌle -a -kɩɩ ɩ kli ple. ꞌƐ ꞌꞌkpiꞌa wlu-u ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli -lrɛɛ ꞌle ɛ na:

Nyʋ-ʋ ꞌbhɛɛꞌɛ ꞌwa ꞌꞌbhi ꞌꞌyi, -Lagɔꞌɔ -gbʋ nʋ ya. Ɛ -nɩꞌa -kaa ꞌmʋ a, nyʋ-ʋ yaꞌa ꞌwa ꞌꞌbhi ꞌzɔ ꞌbho ꞌɔ ꞌꞌyigbeyi, ɔ-ɔ kpa nʋ-oꞌo.

⁷ꞌƖnnɛ ꞌbhleꞌe ꞌnynɩꞌa dɩ, a ꞌꞌnyɩ ɔ aꞌba ꞌꞌbhi -jeyi ꞌꞌfɩa ꞌwee, ꞌle a ꞌke ɔ ꞌbho ꞌꞌdu! Aꞌba ꞌwɔɔn ꞌꞌnyinynidɩꞌa tiyayiꞌa -naagɩ -le, ꞌle ɔ ꞌke amʋ liple! ⁸A ꞌꞌsrii -aꞌba -Kɔyi -Lagɔ ꞌle ɔ ꞌke amʋ ꞌꞌsrii -lrɛɛ! A-bʋ ꞌma-a ꞌꞌnyinynidɩꞌa nʋmʋ, a yibo nɩ ꞌꞌyi ꞌle a ꞌke ɔ gbo ꞌꞌbhiti ꞌle a ꞌke kplizɩgɩ nʋ! A-bʋ -ke -pɔlʋ ꞌgble-ɛꞌɛ ꞌmʋ, a zizia nɩ ꞌꞌyi, ꞌle ɩ ꞌke ꞌɔ ꞌꞌsɛ ꞌꞌyi-de! ⁹Aꞌba ꞌꞌnyinynidɩꞌa ꞌꞌlru ꞌꞌyi, ꞌgwlʋ -nyni amʋ li! -Ka nyɔ -nɩꞌa gu ꞌzɔ, ꞌle ɔ-ɔ ꞌꞌviꞌa a, a ꞌꞌvi -kaa aꞌba ꞌꞌnyinynidɩꞌa dɩ ꞌle a ꞌke ɩ ꞌꞌyiyibo a ꞌke ɔ gbo ꞌꞌbhiti! Aꞌba ꞌcɩsɛ -le, ꞌgwlʋ -nyni amʋ li, ꞌle a ꞌke ꞌꞌvi ꞌya dɩ! ¹⁰A -ya aꞌba ꞌꞌbhi ꞌzɔ ꞌbho ꞌɔ ꞌꞌyigbeyi ꞌle ɔ ꞌke amʋ -zɛgɛ ꞌꞌlrulinʋ!

Aꞌba -tu a -Bozeziiꞌa nyʋ -zigle -le!

¹¹ꞌAn ꞌlotʋꞌa ꞌꞌnynuu-a, aꞌba ꞌꞌsisi ꞌnynɩ ꞌꞌnyinynika -le! -Bho nyɔ ꞌꞌdu ꞌbho ɔ -Bozeziiꞌa nyɔꞌɔ da ꞌꞌnyinynika ꞌle ꞌꞌbhalrɛɛke ɔ cɔ ɔ, ɔ ꞌcɛ-ɛ -Lagɔꞌɔ wlu ꞌmʋ. Ɔ ꞌꞌdu-o ꞌbho ꞌɛ -da -lrɛɛ. A -gblee, nyɔ-ɔ ꞌꞌduꞌa ꞌbho -Lagɔwluꞌa da, -ka ɛ ꞌlɛꞌɛ, ꞌɔ nʋ -kaa. Ɔ-ɔ ꞌꞌdu-o ꞌbho ꞌɛ -da ꞌꞌkɔmʋ. ¹²A ꞌye li-ɔ, -Lagɔꞌɔ ꞌꞌsɛ-ɛ poꞌo nyunyu ꞌɔ gba. Ɔ -nɩ -lue ꞌtɩn, ꞌɩnnɔ ꞌke nyʋ -zigle -tu, -ɛkedɩmaa, ɔ -nɩ -lue ꞌtɩn, ꞌɩnnɔ ꞌbhɛɛꞌo ɔ ꞌke nyɔ ꞌpʋʋn ꞌbho ꞌɔ ꞌꞌyigbeyi, ꞌle ɔ ꞌbhɛɛꞌo -lrɛɛ ɔ ꞌke ɔ dɩ -kpʋn. -Ɩnmɔ tuꞌa -laa -aꞌa -Bozeziiꞌa nyʋ -zigle ꞌle, kbhoo -a ꞌꞌluoꞌo -aꞌa ꞌꞌbhuo ꞌmʋꞌa?

Aꞌba ꞌbhɛɛ aꞌba ꞌꞌbhi ꞌꞌyi -le!

¹³A po -lokui, a-bʋ -bho -ʋ deꞌa ti, -ʋ nʋꞌa: -Zɩan ꞌle ꞌꞌbhalrɛɛke -bho zɔzɩbhla -a ꞌye-e -dagbɛ -nɔɔ -mu -mʋ, -a ꞌye ꞌbho-o -zʋn -lue -nʋ -mʋ, -a ꞌye ꞌbho-o ꞌpɛlʋ -po -nɩ -mʋ ꞌle -a ꞌke mɔniꞌa -dadudu ꞌye. ¹⁴A-bʋ nyʋ-ʋ wluꞌa -kaa, -bho zɔ -ka zɩ, lɛ-ɛ ꞌyeꞌa -zi mʋ ꞌbho amʋ ꞌꞌkpi, a yibo nɛ ꞌnɩ? A -gblee, -bho jru -ka ꞌdre, ꞌle ꞌyrʋ ꞌke glu ꞌwlʋ, -ka ɩ-ɩ gwɛꞌɛ ꞌle yaku ꞌꞌyi ti -susueyi, ꞌka-a aꞌba tinɩɛ -nɩꞌo. ¹⁵ꞌƐ dɩ, -bho a -de ti, a nʋ: -Bho ɛ ꞌꞌdu -Lagɔꞌɔ ꞌgwlʋdɩ ꞌle ɔ ꞌke ꞌwɔn, -a ꞌke ti-nɩ, -a ꞌye-e lɛ -nɛɛ -nʋ -mʋ. ¹⁶-Bho ɛ -se -mnɛɛ, a-a ꞌbhɛɛ-ɛ aꞌba ꞌꞌbhi ꞌꞌyi ꞌle a-a ꞌꞌplinꞌo. Aꞌba ꞌꞌbhiꞌa ꞌꞌyibhɛɛɛ ꞌmnɛ se ꞌꞌyrili-nmɔ.

¹⁷A ꞌye li-ɔ, lɛ-ɛ ꞌma-a -zɛgɛ nyɔ ꞌka nʋ, nyɔ-ɔ yibo ꞌnɛ, -ɔ -see ꞌɛ nʋ, ɔ ꞌnʋ-o ꞌꞌnyinynidɩ ꞌbho -Lagɔꞌɔ ꞌꞌyigbeyi.

ꞌꞌWlilɩbhlemʋ ꞌꞌdu ꞌwa ꞌꞌbhi ꞌꞌyrili!

¹ꞌTraamʋ ꞌtɔ ɔ, a-bʋ ꞌma-a ꞌꞌwlilɩbhlemʋ, a po -lokui! A ꞌꞌvi ngazeka, -ɛkedɩmaa, a-a ꞌye-e ꞌkle ꞌye -mʋ tenyɩ! ²Aꞌba -kɔkɔlɩ-ɩ ꞌye-e wɔn-nyni -mʋ, ꞌle kokoyrele ꞌꞌwe ꞌke aꞌba lidulɩ li. ³ꞌꞌGlɩ-ɩ ꞌye-e aꞌba mɔni -kpʋn -mʋ ꞌle ɩ ꞌke wɔn-nyni. ꞌYa wɔnnyniɛ ꞌmnɛ, ꞌɩnnɛ ꞌye aꞌba ꞌnynɩ wɔn-nyni mʋ, ꞌle, -ka nɛ-ɛ zaꞌa lɩ ti, ɩ ꞌke -kaa amʋ ti-za. -Ka -a -nɩꞌa *-lebhɔɔnɔɔ ꞌli, a se ɩ yibo ꞌle a-a poꞌo ꞌꞌwlilɩ -zrʋʋ ꞌmʋꞌa? ⁴A -gblee, nyʋ-ʋ nʋꞌa lbhʋ ꞌle aꞌba -kpɩɩ ꞌmʋ, a -see ʋ ꞌꞌpɛle. A po ꞌwa wlu -lokui, ꞌɩnnʋ ꞌꞌviꞌo, -aꞌba -Kɔyi -Lagɔ ꞌbhleꞌa wɔnkuɛ ꞌbho lɛꞌꞌo lɛ ꞌꞌkpi, ꞌɩnnʋ ꞌlɔ ɔꞌo ɔ ꞌke ʋ -kpa! Ɔ ꞌwɔn-ɔ ꞌwa wlu ꞌbɔ. ⁵A ꞌye li-ɔ, ꞌkmʋ -ke ꞌmʋ a -nɩꞌa a, ɛ -nmɔꞌɔ-ɔ wɔn tenyɩ ꞌle a ꞌbhleꞌe ꞌꞌwlilɩ a ꞌye ꞌya ꞌꞌkalɛ ꞌꞌyizi. Lɛꞌꞌo lɛ-ɛ ꞌma-a aꞌba ꞌtʋnʋlɛ, a-a nʋ -ɛꞌo ꞌle a ꞌye ɛ ꞌꞌkalɛ ꞌꞌyizi -lrɛɛ. -Bho nyʋ ꞌke -bhlii ꞌlbha, -bho ꞌɛ ꞌwɩ -sie ꞌbho ꞌꞌyigbeyi, -ka ʋn-ʋ ꞌꞌnyɩ ꞌɛ lilia tenyɩ ꞌle ɛ-ɛ ꞌbhɛɛꞌɛ ꞌꞌyi, ɛ-ɛ paꞌa ꞌcna, ꞌka-a a -nɩꞌo, ꞌle -Lagɔꞌɔ -zigle-e ꞌye amʋ -kpʋn mʋ. ⁶A -gblee, nyʋ-ʋ ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, a nʋ -ɛꞌo ꞌle -zigle ꞌye ʋ kpʋn. Ɛ -nɩꞌa -kaa ꞌmʋ a, ʋn -see ꞌwa ꞌꞌbhi ꞌꞌkpiꞌtʋtɔ ꞌle a ꞌye ʋ kpʋn, a ꞌye ʋ ꞌlbha.

A -ku ꞌꞌgwli ꞌle a ꞌke *-Lagɔ wɔn gbo po

⁷ꞌAn ꞌlotʋꞌa ꞌꞌnynuu-a, ꞌka-a ɛ -nɩꞌe ꞌmʋꞌa dɩ ꞌɩn-ɩ ꞌtmʋʋꞌo amʋ, a -ku ꞌꞌgwli ꞌle -aꞌba -Kɔyi *Zeziiꞌa leyinɔɔ ꞌke nyni. Nyɔ-ɔ loꞌa lililɩ, a -gbʋ ꞌɔ kpli ya! -Da -antanyɩni-i lbha nɩꞌa, ꞌbho-o ɔ-ɔ lo nɩꞌo, ꞌle ɔ-ɔ kuꞌo ꞌꞌgwli, ꞌle, -da gbɔmʋbhɔɔni-i lbha nɩꞌa, ɩ-ɩ zaan nɩꞌe ꞌbho, ꞌle ɔ-ɔ cɩ ɩꞌo. ⁸A-bee -mnʋʋ a, ꞌlotʋꞌa ꞌꞌnynuu-a, a -ku -kaa ꞌꞌgwli -lrɛɛ! A -ku -pɔlʋ ti, -ɛkedɩmaa, -aꞌba -Kɔyi Zeziiꞌa leyinɔɔ ꞌꞌkɔɔꞌɔ-ɔ gbo!

⁹Aꞌba kpʋkpa dɩ ꞌꞌyi -le ꞌle -Lagɔ -kaa amʋ dɩ -kpʋn! A -gblee, -aꞌba -Kɔyi Zezii *Kliisɩ ꞌka -amʋ -zigle -tu, ꞌɔ leyinɔɔ ꞌꞌkɔɔꞌɔ-ɔ gbo. ¹⁰ꞌAn ꞌlotʋꞌa ꞌꞌnynuu-a, -aꞌba -Kɔyi -Lagɔꞌɔ wluꞌa ꞌmʋtizamʋ -nɩꞌa -bɛnyɩ, a popo ꞌwa dɩ ꞌgwlʋti! Ʋn ꞌnʋ-o ngazedɩ ꞌle ʋn ꞌye ꞌꞌgwli-ku. -Ka -lue ꞌmnɔ, a-bee -mnʋʋ -nɩ -kaa -lrɛɛ! ¹¹Ʋ-bʋ nyʋ ꞌmnʋ, ʋn ꞌwa-a ti, -ɛkedɩmaa, ʋn ꞌku-o ꞌꞌgwli, ꞌle, ꞌkleyeɛɛ-ɛ bhlʋ ꞌʋ ꞌꞌkpi, ʋn ꞌye ɩ wɔn ꞌmʋ cɛ. -Ka ꞌZɔbʋ nʋꞌa ngazedɩ ꞌle ɔ ꞌyeꞌa ꞌꞌgwli-ku, a ꞌwɩn -ɩ ꞌbɔ see. -Zɛgɛ -Lagɔ nʋ ꞌɔ ꞌꞌlruli, a ꞌwɩn -ɩ ꞌbɔ -lrɛɛ. A -gblee, -aꞌba -Kɔyi -Lagɔ ꞌbhle-e ngaze ꞌle ꞌɔ ꞌlimʋ -nmɔꞌɔ wɔn ꞌbho nyʋ ꞌwee ꞌꞌkpi.

¹²ꞌAn ꞌlotʋꞌa ꞌꞌnynuu-a, ꞌɩn bhle-e dɩklagba -lue ꞌɩn ꞌke amʋ -bodɩ ꞌmʋ-za -lrɛɛ: Aꞌba -zrɛ -le! Aꞌba -zrɛ -nɩ ꞌbhlʋkpa -ke yaku ꞌmʋ -le! Aꞌba -zrɛ -leꞌa ꞌꞌbhuo tukutuku! -Bho dɩ ꞌꞌdu -ziadɩ, a na: Kɩn. -Bho ɩ ꞌꞌdu sɩndɩ, a nʋ: -Gba. A -wlu -kaa ꞌle -Lagɔꞌɔ -zigle -kaa amʋ kpʋn.

¹³ꞌAn ꞌlotʋꞌa ꞌꞌnynuu-a, -bho nyɔ -nɩ ꞌle aꞌba ꞌꞌklumʋ, -bho ɔ -ka ꞌkle-e ꞌye, ɔ po *-Lagɔ wɔn gbo! -Bho ɔ -nɩ ꞌle, ꞌle ɔ ꞌke tiwa, ɔ bhle, ɔ ꞌke -Lagɔꞌɔ ꞌnynɩ ꞌꞌyiꞌbhɛɛ! ¹⁴-Bho nyɔ -nɩ ꞌle aꞌba ꞌꞌklumʋ, -bho ꞌɔ lɩꞌa ꞌwɔn, ɔ ꞌla -aꞌba -Kɔyi Zeziiꞌa -glɩgbaꞌa ꞌꞌlrutidemʋ, ʋn ꞌke yi, ꞌle ꞌɔ ꞌnynɩ ꞌmʋ ʋn ꞌke ɔ ꞌcna ꞌꞌlru ꞌli -po ꞌle ʋn ꞌke ɔ wɔn gbo po! ¹⁵ꞌWa klɛ ꞌde -ɔ ꞌꞌgwli ꞌle ʋn ꞌye ɔ wɔn gbo poꞌa dɩ, ɔ-ɔ ꞌye nyɔ ꞌmnɔ ꞌpʋʋn mʋ. -Bho ɔ nʋ ꞌꞌnyinynidɩ ꞌbho -Lagɔꞌɔ ꞌꞌyigbeyi, ɔ-ɔ ꞌbhɔ-ɔ ꞌya dɩ. ¹⁶ꞌƖnnɛ ꞌbhleꞌe ꞌnynɩꞌa dɩ, a-bʋ ꞌma-a *Zeziiꞌa nyʋ, ꞌꞌnyinynidɩ a-a nʋꞌa a, a zɩza nɩ -bodɩmʋ ꞌle a ꞌke aꞌba dɩ -Lagɔ wɔn gbo popo! ꞌꞌLemnɩɩ a-a ꞌpʋn-oꞌo. A ꞌye li-ɔ, nyɔ-ɔ ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, -bho ɔ po ɔ wɔn gbo lɛꞌɛ dɩ, ꞌɔ wɔngbopowlu-u ꞌku-o wɔn ꞌle nyɔ-ɔ ꞌyeꞌe ꞌɛ ꞌꞌyriꞌa ꞌbɩ. ¹⁷*Elii -nɩꞌa -bɛnyɩ, a popo ꞌɔ dɩ ꞌgwlʋti! -Ka -a ꞌꞌduꞌa nyunyu, ꞌka-a ɔ -nɩꞌo. Ɛ -nɩꞌa -kaa ꞌmʋ a, ꞌɔ -pɔlʋꞌa klɛ ti ɔ -po -nɩꞌe -Lagɔ wɔn gbo ꞌle ꞌꞌni -kaa lbha ꞌle ꞌbhlʋkpa ꞌmnɛ ꞌꞌkpi. Ɔ nʋꞌa -kaa ꞌɛ lɛtu, ꞌꞌni -see ꞌzɔ ꞌꞌtoo ꞌle ɛ ꞌye -zʋɩn tan ꞌꞌdie nʋ. ¹⁸Ɩ ziꞌa -kaa, ꞌle ɔ ꞌye ɔ wɔn gbo po -lrɛɛ ꞌꞌni ꞌke ꞌtɔ lbha. -Yrɔzaa! ꞌle ꞌꞌni ꞌye lbha, ꞌle lililɩ ꞌye ꞌpʋn.

¹⁹ꞌAn ꞌlotʋꞌa ꞌꞌnynuu-a, -jolʋzɛgɛ-ɛ ꞌma-a -Lagɔꞌɔ -nɛ, -bho aꞌba nyɔ -lue ꞌwlʋ ꞌbho ꞌɛ ꞌꞌyi, -bho ɔ ꞌbhɔ ꞌɔ ꞌꞌgwlidedɩ ꞌle ɔ -Bozeziiꞌa nyɔ -lrɔɔ ꞌke ɔ ꞌbho le -ya a, ɛ -nmɔꞌɔ-ɔ ꞌꞌyrili. ²⁰Nyɔ-ɔ -yɔ ꞌɔ ꞌbho le, ꞌpʋnpʋan ɔ-bɔ nyɔ ꞌmnɔ ꞌyeꞌa ꞌbho -Lagɔꞌɔ ꞌꞌyigbeyi a, a yibo na ɔ ꞌyi-e ꞌbho ꞌɛ -jeyi le. -Bho ꞌɔ ꞌꞌnyinynidɩ -die ꞌkɩ ꞌꞌyi, -Lagɔ-ɔ ꞌbhɔ-ɔ ꞌya dɩ ꞌle ɔ-ɔ zetie nɔꞌo ꞌle ɩ ꞌmʋ.