ꞌPɔlʋꞌa ꞌꞌbɔgʋ ɔ poꞌa GALASIIKƆMƲ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Galasiibhlʋkpaꞌa nyʋ-ʋ ꞌma-a Zeziiꞌa -nʋ, ꞌɩnnʋ ꞌɔ -dalbhoyi ꞌPɔlʋ poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa, -ɛkedɩmaa, lɩ-ɩ seꞌa ꞌkpʋ ꞌbhle, nyʋtɔlʋ tɔ ꞌnɩ a, ʋn-ʋ ꞌnʋ-o na, ꞌwa ꞌꞌklumʋꞌa nyʋ-ʋ -seꞌa-a ꞌZuifʋ, -ka ꞌZuifʋ-ʋ nʋꞌa ꞌle ꞌwa -Lagɔlbhʋ ꞌli, ꞌka-a ʋn ꞌke nʋ -lrɛɛ ꞌle ʋn ꞌke ꞌpʋn ꞌbho -Lagɔꞌɔ ꞌꞌyigbeyi. Lɛklagba ʋn ꞌka nʋ, ꞌɩnnɛ ꞌmo-o ʋn ꞌke klɛ ꞌmʋ mu. ꞌƐ dɩ ꞌPɔlʋ poꞌo ꞌꞌbɔgʋ -nɛɛ -jeyi ꞌle ɔ-ɔ nʋꞌo ɛ -se -klaa -ko. Nyɔ -yɔ deꞌa -Lagɔ ꞌꞌgwli, ꞌɩnnɔ ꞌpʋnꞌo ꞌbho ꞌɔ ꞌꞌyigbeyi. ꞌƐ ꞌꞌsɛ moꞌo. Nyɔ -yɔ ꞌpɛɛꞌɛ ꞌɔ ꞌꞌbhuoꞌa ꞌmʋtikukuɛ ꞌmʋ ꞌle ɔ ꞌke ꞌpʋn, ɔ -see ꞌpʋn yi. -Lagɔ-ɔ zetieꞌe -amʋ-ɛ ꞌle ɩ ꞌmʋ ꞌle ɔ-ɔ poꞌo -amʋ ꞌꞌyiflɔmʋzɩgɩ.
1Galasiikɔmʋ ꞌPɔlʋ poꞌo ꞌꞌbɔgʋ -jeyi
1ꞌƖnmɔ ꞌPɔlʋ ꞌma-a *Zeziiꞌa -dalbhoyi, ꞌɩnmɔ poꞌo amʋ ꞌꞌbɔgʋ -jeyi. -Aꞌba -tɩta, -Lagɔ -zaꞌa *Zezii *Kliisɩ glu ꞌle ꞌmɛmʋꞌa ꞌꞌklumʋ ꞌle ɔ ꞌyeꞌa ti-nɩ -lrɛɛ, ɔ -ke Zeziiꞌa ꞌꞌbhuo-o lbhoꞌo ꞌɩnmʋ ꞌɩn ꞌke lbhʋ ꞌmnɛ nʋ. Ɛ -se nyunyɔ lbho ꞌɩnmʋ -ko ꞌle ɛ -se nyunyɔꞌɔ ꞌnynɩ ꞌɩn ꞌbhle ꞌꞌkpi -ko -lrɛɛ. 2ꞌƖnmɔ ꞌPɔlʋ -ke ꞌlotʋꞌa ꞌꞌnynuu -ke ꞌɩn -plɛꞌɛ ꞌꞌgwlideɛ -lue ꞌmʋ, -ʋ -ke ꞌɩn -nɩꞌa ꞌnɔɔgbɛ ɛ, -a-bʋ ꞌyeꞌe a-bʋ ꞌlotʋꞌa ꞌꞌnynuu ꞌma-a Zeziiꞌa -glɩgbɩ ꞌwee -nɩꞌa ꞌle Galasiibhlʋkpa ꞌꞌkpi!
3-Aꞌba -tɩta -Lagɔ -ke -aꞌba -Kɔyi Zezii Kliisɩ -nɩ ꞌsɔn -wʋnna amʋ ꞌꞌniti ꞌle ʋn ꞌke amʋ -pɔlʋꞌa bhlubhlua ꞌꞌnyɩ! 4Zezii Kliisɩ ꞌꞌtayiꞌe-e ꞌɔ ꞌꞌbhuo ꞌꞌyiti ɔ ꞌye ꞌmɛ ꞌle ɔ ꞌke -amʋ -aꞌba ꞌꞌnyinynidɩ ꞌꞌkpi -za, ꞌle, ꞌꞌnyinynilɩ -nɩꞌa ꞌnɔɔ ꞌkmʋ mʋ, -ɩ -ke ꞌꞌklumʋ -a -nɩꞌa ꞌtraamʋ, ɔ ꞌke -amʋ ꞌya wɔnkuɛ ꞌꞌkpi -za. ꞌLe -aꞌba -tɩta -Lagɔꞌɔ ꞌgwlʋdɩ ꞌmʋ, ꞌle-e ꞌɛ lɛtu -nʋ-ɛ -nɩꞌo. 5Nyunyu ꞌbhɛɛ -Lagɔꞌɔ ꞌnynɩ ꞌꞌyi ꞌꞌkɔmʋ, -nɔɔꞌꞌo -nɔɔ ti! *Ɩ -nɩ -kaa ꞌmʋ!
ꞌꞌDɩzɩgɩ -nɩꞌe-e -lue ꞌtɩn
6A -gblee, kpli -yɛ a-a nʋꞌa -laa, ɛ ꞌꞌmaaꞌa ꞌɩnmʋ-ɛ, -Lagɔ ꞌlaꞌa amʋ-ɛ ꞌle *Zezii *Kliisɩꞌa ꞌsana ꞌmʋ ɔ ꞌke amʋ -kɔ, ꞌle a-a tbhɛ ꞌnɔ ꞌꞌkpi -susueyi, ꞌle a-a poꞌo nyʋ -lrʋʋꞌa -tɔtɔlɩ -lokui ꞌle a-a ꞌlɩ ꞌɩ ꞌꞌdɩzɩgɩ. 7ꞌƖn-ɩ ꞌtmʋʋꞌo amʋ-ɛ, ꞌꞌdɩgɩzɩ ꞌɩn -tɔꞌɔ amʋ, ꞌya ꞌꞌsɛ-ɛ moꞌo -ziaka. ꞌꞌDɩ -lrɩɩ-ɩ ꞌka -zɩgɩ ꞌꞌdu, -ɩ ꞌkɩ ɩ ꞌmʋ -zi, ɩ se -nɩ. ꞌƖn-ɩ zɩ ꞌɩ ꞌmʋ-ɛ, -ɛkedɩmaa, nyʋ -lrʋʋ ꞌgble-e aꞌba -pɔlʋ ꞌmʋ ꞌle ʋn ꞌbɔꞌɔ ti, ꞌbho *-Lagɔꞌɔ ꞌBhozayi Zezii Kliisɩꞌa ꞌꞌdɩzɩgɩꞌa damʋ, ʋn ꞌke ɩ ꞌꞌyida ꞌmʋ -za. 8A ꞌꞌdu aꞌba ꞌꞌbhi ꞌꞌyrili, -bho nyɔ -lrɔɔ yi, ꞌle ɔ ꞌke amʋ -tɔ, -bho ɛ ꞌꞌdu ꞌkɩ -aꞌba ꞌꞌbhi o, ꞌle ɛ ꞌke ꞌkɩ -Lagɔ gboꞌa -dalbhoyiꞌa ꞌꞌbhuo ꞌꞌdu o, lɩ ꞌɩn -tɔꞌɔ amʋ, -bho ɩ -ke ɩ se gʋgɔ ɔ, -Lagɔꞌɔ tutibhlasʋ -nɩ nɔ ꞌꞌkpi! 9ꞌƖn -zɩ ꞌɩ-ɩ amʋ -bodɩ ꞌmʋ see ꞌle ꞌɩn-ɩ muꞌo ꞌbho le -lrɛɛ ꞌtraamʋ: -Bho nyɔ -tɔ amʋ -tɔtɔlɩ -lrɩɩ, ꞌan -nɩ a ꞌwɔnꞌɔ ꞌbɔ ɔ, -bho ɩ -ke ɩ se gʋgɔ ɔ, -Lagɔꞌɔ tutibhlasʋ -nɩ nɔ ꞌꞌkpi!
10-Bho ꞌɩn -zɩ ɩ ꞌmʋ ꞌtraamʋ, nyunyuꞌa ꞌmʋybhɛɛ ꞌɩn-ɩ ꞌbɔꞌɔ tiꞌa? -Gba! -Lagɔꞌɔ -nɛ ꞌɩn-ɩ ꞌbɔꞌɔ ti. Nyunyuꞌa ꞌtʋnʋdɩ ꞌɩn-ɩ ꞌbɔꞌɔ tiꞌa? -Gba! -Lagɔꞌɔ ꞌtʋnʋdɩ ꞌmna-a ꞌbɔꞌɔ ti; ꞌle, -bho ꞌɩn -ka ꞌkɩ nyunyuꞌa ꞌtʋnʋdɩ tiꞌbɔ -bhla a, ꞌɩn se ꞌkɩ ꞌbhɛɛ ꞌɩn ꞌke Zezii Kliisɩꞌa lbhʋnʋyizɛgɛ ꞌꞌdu.
ꞌPɔlʋꞌa -dalbhoyiꞌa ꞌꞌdudua
11ꞌAn ꞌlotʋꞌa ꞌꞌnynuu-a, ꞌɩn-ɩ ꞌwɩ -ɩ amʋ ꞌꞌyiti, ꞌle ꞌɩn ꞌbɔꞌɔ ti a ꞌke ɩ yibo, ꞌꞌdɩzɩgɩ ꞌɩn -zaꞌa ꞌmʋ see ꞌle ꞌɩn -nɩꞌa -bhla ꞌꞌkpi a, ɩ -se nyunyuꞌa ꞌlimʋticɛdɩ -ko. 12*Zezii *Kliisɩꞌa ꞌꞌbhuo-o poꞌo ꞌɛ -naagɩtu ꞌle ꞌan -pɔlʋ ꞌzɔ. Ɛ -se nyɔ -zɩ ɩ ꞌɩnmʋ -bodɩ ꞌmʋ -ko, ꞌle ɛ -se nyɔ -tɔ nɩ ꞌɩnmʋ -ko -lrɛɛ.
13Ɩ -nɩꞌa -kaa ꞌmʋ, a yiboꞌo-o ꞌan -dedekpli ꞌɩn -nɩꞌa ti ꞌkɩ -tanyɩ, ꞌɩn -nɩꞌe-e *ꞌZuifʋꞌa -Lagɔlbhʋ ꞌli ꞌle ꞌɩn-ɩ klaꞌa Zeziiꞌa -glɩgbawɔnyiꞌa nyʋ nyanɩ ꞌmʋ tenyɩ, ꞌle, lɩ ʋn deꞌa ꞌꞌgwli, ꞌɩn ꞌbɔꞌɔ ti ꞌɩn ꞌke ʋ ɩ -pɔlʋ ꞌꞌyi -za. 14ꞌƖn -nɩꞌa -kaa ꞌle ꞌZuifʋꞌa -Lagɔlbhʋ ꞌli a, ꞌɩn -boyreetɩ -ke ꞌɩn ꞌbhɛɛꞌɛ ꞌmʋ ꞌle ʋn -ke ꞌɩn -plɛꞌɛ lbhʋ -lue ꞌmnɛ ꞌmʋ, ꞌɩn -zi nʋ-oꞌo ꞌwee. ꞌBho ꞌɛ ꞌꞌkpi a, ꞌɩnmɔ -smuaꞌa ꞌmʋti tenyɩ, -ɔ -deꞌe ꞌle -aꞌba ꞌꞌna ꞌꞌweꞌa kpli ꞌli ti.
15A -gblee, ɛ -nɩꞌa -kaa ꞌmʋ a, ꞌle -Lagɔ -mnɔɔꞌɔ ꞌsana ꞌmʋ ɔ ꞌlaꞌa ꞌɩnmʋ-ɛ ꞌɩn ꞌke ꞌɔ lbhʋ nʋ. ꞌƐ dɩ, ꞌɩn -see -bhla ꞌwlʋ ke see, ɔ ꞌye ꞌɩnmʋ ꞌbho -za. 16ꞌLe, -nɔɔ-ɔ nʋꞌa -Lagɔ ꞌtʋ, ɔ ꞌꞌduꞌa see ꞌle ɔ ꞌke ꞌɩnmʋ ꞌɔ ꞌꞌyu ꞌꞌyi-tɔ, ɛ nyniꞌa a, ɔ -tɔ ꞌnɔ ꞌɩnmʋ ꞌꞌyi ꞌle ꞌɩn ꞌye ɔ yibo. ꞌBho ꞌmnɔ, ꞌbho-o ɔ -za -nɩꞌe ꞌɔ ꞌꞌkpidɩ -druku ꞌꞌyrili, ɔ ꞌye ɩ ꞌɩnmʋ -tɔ, ꞌle, nyʋ -lrʋʋ -seꞌa-a ꞌZuifʋ, ꞌɩn ꞌke ʋ ꞌɔ ꞌꞌkpidɩzɩgɩ -bodɩ ꞌmʋ-za. Ɛ ziꞌa -kaa a, ꞌɩn -see nyɔ gbo mu, ꞌle ɔ ꞌke ꞌɩnmʋ ꞌbho Zeziiꞌa damʋ ꞌꞌdɩ ꞌmʋ-ʋ ꞌꞌdu. 17ꞌƖn -see Zelizalɛɛmʋ mu -lrɛɛ, ꞌle, nyʋ-ʋ ꞌꞌduꞌa *Zeziiꞌa -dalbhomʋ -tanyɩ ꞌan damʋ, ꞌɩn ꞌke ʋ ꞌye. ꞌƖn -sɔꞌɔ ꞌmʋ -nalo, ꞌɩn ꞌkpa-a Alabiibhlʋkpa ꞌꞌkpiꞌa -jeyi. ꞌƖn nyniꞌa ꞌle a, ꞌle ꞌɩn ꞌye Damaasɩgwlɔ ꞌmʋ le yi. 18-Zʋɩn tan zi -kpayɩ-ɔ ꞌle ꞌɩn ꞌye Zelizalɛɛmʋ mu, ꞌle ꞌɩn -ke *ꞌPiɛlɩ ꞌke yibo -yibo. ꞌƖn -ke ɔ ꞌnʋ-o ꞌbho ꞌwɩ -bue ꞌwɩ -muu ꞌꞌklenyɩ! 19ꞌƖn -see Zeziiꞌa -dalbhomʋ -lrʋʋ ꞌye, -bho ɛ -se Zaakɩ ꞌma-a -aꞌba -Kɔyi Zeziiꞌa leyi. 20A -gblee, dɩ ꞌɩn-ɩ zaꞌa -laa ꞌmʋ, -Lagɔꞌɔ ꞌꞌyigbeyi ꞌɩn-ɩ za nɩ ꞌnɩ ꞌmʋ. -Ziadɩ moꞌo, ꞌɩn -see sɩn cɛ.
21Ɩ ziꞌa -kaa a, ꞌɩn -sɔꞌɔ ꞌmʋ-ɛ ꞌɩn ꞌye Silii -ke Silisiibhlʋkpa ꞌꞌkpi mu. 22ꞌLe Zideebhlʋkpa ꞌꞌkpiꞌa Zeziiꞌa -glɩgbɩwɔnyiꞌa nyʋ -see -bhla ꞌɩnmʋ ꞌꞌyri ꞌmʋ ꞌye ke tukutuku. 23ꞌAn ꞌꞌdɩfɔfʋꞌa ꞌꞌsɛ ʋn-ʋ ꞌwɔnꞌɔ ꞌbɔ, nyʋ na: Nyɔ-ɔ kla ꞌka -amʋ nyanɩ ꞌmʋ -bɛnyɩ, ɔ ꞌbhɔ-ɔ -kaaꞌa dɩ. ꞌTraamʋ ꞌtɔ ɔ, Zeziiꞌa ꞌꞌdɩzɩgɩ -ke dɩ ɔ ꞌbɔ ꞌka ti, nyʋ-ʋ deꞌa Zezii ꞌꞌgwli, ɔ ꞌke ʋ ɩ -pɔlʋ ꞌꞌyi -za a, ꞌɩnnɩ ꞌɔ ꞌꞌbhuo-o tɔꞌɔ nyʋ. 24A -gblee, ʋn ꞌwɔnꞌɔ ꞌya ꞌꞌdɩtu ꞌmnɩ ꞌbɔ ɔ, ʋn-ʋ ꞌbhɛɛ-ɛ -Lagɔꞌɔ ꞌnynɩ ꞌꞌyi ꞌan dɩ.
2ꞌPɔlʋ -ke ꞌɔ -bodalbhomʋ -lrʋʋ ꞌgbʋʋꞌo-o ꞌꞌlru
1A -gblee, -zʋɩn -bue -zʋɩn nyiɛ ziꞌa a, zɔ -lue ꞌzɔ ꞌɩn -ke Banabaasɩ -nɩ Zelizalɛɛmʋ le munamʋ ꞌle -a ꞌye Tiitɩ ꞌmʋꞌꞌluo ꞌle -a -ke ɔ ꞌye mu. 2ꞌƖn ꞌka ꞌle mu a, -Lagɔꞌɔ ꞌꞌbhuo-o nʋꞌo ꞌɩn mu. ꞌƐ dɩ, ꞌɩn muꞌo ꞌle. -A nyniꞌa ꞌle a, ꞌɩn -ke Zeziiꞌa -glɩgbɩꞌa -jolʋgbopomʋklɩgbɩ Zaakɩ-e *ꞌPiɛlɩ -ke *ꞌZaan ꞌcɛ-ɛ kpɔ ꞌle ꞌɩn -ke ʋn ꞌye ꞌꞌlruꞌgbʋʋ, ꞌle *Zeziiꞌa ꞌꞌdɩzɩgɩ ꞌɩn-ɩ tɔꞌɔ nyʋ-ʋ -seꞌa-a *ꞌZuifʋ, ꞌɩn ꞌye ʋ ɩ -bodɩ gbɔzɩza. -Ɛ -ke dɩ ꞌɩn -zɩ ꞌɩ ꞌmʋ a, ꞌmna -see tiꞌbɔ, ꞌan lbhʋ ꞌɩn ꞌꞌduꞌa wɔn see ꞌle ꞌɩn -nɩꞌa -bhla ꞌꞌkpi ꞌke ꞌꞌnukɔ ꞌwla. 3Ɩ -nɩꞌa -kaa ꞌmʋ, Tiitɩ -ke ꞌɩn -naꞌa a, ɔ -se ꞌZuifʋyi -ko. Glɛkɩyi moꞌo ꞌle ʋn -see ɔ dɩ ꞌꞌyikpa, -ka ɔ -seeꞌa *klɛ ꞌmʋ muꞌa dɩ. Ʋn -see nʋ, ɔ mu klɛ ꞌmʋ ꞌle ɔ -ke ꞌZuifʋ ꞌꞌwe ꞌke kpli ꞌmʋtigʋgɔ, nʋ -lrɛɛ. 4ꞌTraamʋ ꞌtɔ ɔ, -bho klɛmʋmudɩ -sɔ ꞌꞌyiglu, ꞌꞌlemnɩɩ, nyʋ-ʋ nɩꞌa ꞌnɔɔ -aꞌba ꞌnynɩgbo -ʋ ꞌlaꞌa ꞌwa ꞌꞌbhi -a -bogwlidemʋ, ꞌɩnnʋ ꞌbɔꞌɔ ti nyʋ ꞌke klɛ ꞌmʋ -kpɛ ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. Ʋ-bʋ nyʋ ꞌmnʋ ꞌyi-e ꞌnɔɔgbɛ -aꞌba ꞌꞌklumʋ ꞌꞌdɩ tibɔnamʋ ꞌle ʋn-ʋ ꞌmaꞌa ꞌmʋti, ꞌle, -ka -a ꞌyeꞌa ꞌꞌyiflɔɛ ꞌle -a -ke Zezii ꞌyeꞌa ꞌꞌyiꞌꞌsisri, ʋn ꞌke ɛ ꞌꞌyrili-gwɛ. Ʋn ꞌbɔ-ɔ ti ꞌle ꞌZuifʋꞌa gba ꞌke -amʋ ꞌgeyiɛ ꞌmʋ kpʋn ꞌle -a ꞌke ꞌle ꞌya ꞌmʋ ꞌꞌyisrɛɛmʋ ꞌꞌdu. 5A -gblee, Zeziiꞌa ꞌꞌdɩzɩgɩ-ɩ ꞌma-a -ziadɩ, -a ꞌbɔ-ɔ ti, -ka ɛ -nɩꞌa, ɛ ꞌke -kaa -nɩ, ꞌle a ꞌke ɛ -kaa yibo ꞌꞌgɩɩ. ꞌƐ dɩ -a -see ɩ ꞌwɔɔn -bi.
6Ɩ ziꞌa -kaa a, ꞌɩn -ke ʋ-bʋ Zeziiꞌa -glɩgbɩꞌa -jolʋgbopomʋ ꞌmnʋ -zɩ ꞌɩ ꞌmʋ, ʋn -see ꞌɩnmʋ lɛ -lrɛɛ ꞌꞌkpi ꞌꞌdu. A -gblee, ꞌbho nyakɔmʋ ꞌmnʋꞌa damʋ, -bho ʋn ꞌꞌdu -klɩgbɩ o, ꞌle -bho ʋn -se -klɩgbɩ o, ꞌmna -see ꞌwa -klagba ya-gbʋ. -Lagɔꞌɔ ꞌtɛ nyunyu ꞌmʋ ꞌwa -klagbaꞌa dɩ. 7A ꞌye li-ɔ, ʋ-bʋ nyakɔmʋ ꞌmnʋꞌa ꞌꞌbhi -gwɛꞌɛ-ɛ ꞌɩnmʋ ꞌꞌkpi ꞌle ʋn yiboꞌo -ka -Lagɔ -tbhaꞌa ꞌɩnmʋ ꞌɔ lbhʋ ꞌle ɔ na ꞌɩn ꞌke Zeziiꞌa ꞌꞌdɩzɩgɩ ꞌbhlɩkpɩ -lrɩɩ ꞌꞌkpi kpa ꞌle nyʋ -lrʋʋ-ʋ -seꞌa-a ꞌZuifʋ gbo. ꞌKla ꞌmnɔ, ꞌka-a -Lagɔ lbhoꞌo ꞌPiɛlɩ -antanyɩ ɔ ꞌke ɛ ꞌle ꞌZuifʋ gbo kpa. 8A -gblee, -Lagɔ -lue-e ꞌꞌnyɩꞌa ꞌPiɛlɩ wɔnkuɛ ꞌle ɔ ꞌyeꞌa ꞌZuifʋ Zeziiꞌa ꞌꞌdɩzɩgɩ kpa a, ɔbɔ ꞌmnɔ, ꞌɩnnɔ ꞌꞌnyɩꞌe ꞌɩnmʋ wɔnkuɛ, ꞌle, nyʋ-ʋ -seꞌa-a ꞌZuifʋ, ꞌɩn ꞌke ʋ ɩ-bɩ ꞌꞌdɩ ꞌmnɩ kpa -lrɛɛ. 9-Lagɔ ꞌnʋ-o ꞌɩnmʋ -zɛgɛ ꞌꞌlruli ꞌle ɔ ꞌye ꞌɩnmʋ ꞌɔ lbhʋ ꞌꞌnyɩ. Zaakɩ ꞌꞌwe ꞌmnʋ yibo nɩ-oꞌo. ꞌƐ dɩ ꞌɩn -ke Banabaasɩ -ke ʋn bhʋbhlaꞌa -jiɛ ꞌꞌyi, ꞌɩnnɛ -tɔꞌo -ka -aꞌba lbhʋ -nɩꞌa -lue ꞌtɩn ꞌle -a ꞌbhɛɛꞌɛ wlu ꞌmʋ; ꞌle, -bho -abʋ -ka ꞌle nyʋ-ʋ -seꞌa-a ꞌZuifʋ-ʋ gbo mu nɩ, ʋ-bee ꞌke ꞌle ꞌZuifʋ gbo -mu -nɩ. 10ꞌBho ꞌɛ ꞌꞌkpi ꞌtɔ ɔ, lɛ ʋn ꞌbɔꞌɔ ꞌɩnmʋ ti, ꞌɩnnɛ ꞌmo-o, ꞌꞌpʋanlbhamʋ -nɩꞌa ꞌle Zelizalɛɛmʋꞌa Zeziiꞌa -glɩgbawɔnyiꞌa nyʋꞌa ꞌꞌklumʋ, -a -kpa nʋ. ꞌƐ lɛtu, ꞌmna-aꞌa ꞌꞌbhuo ꞌbɔ-ɔ ti ꞌɩn ꞌke ɛ nʋ see.
ꞌPɔlʋ ꞌkpa-a ꞌPiɛlɩ dɩ ꞌꞌyi
11Zɔ -lue ꞌzɔ -a -nɩ ꞌbho Atiɔsɩgwlɔ ꞌmʋ, *ꞌPiɛlɩ ꞌye ꞌbho -amʋ -yɛ. -A -ke ɔ ꞌzi-e ꞌbho ꞌwɩ. A -gblee, lɛ ɔ-ɔ nʋꞌa ꞌbho, ɛ se ꞌꞌyrili-nmɔ. ꞌƐ dɩ ꞌɩn -wa ꞌnɔ glɛ ꞌbɛtɛ ꞌꞌyi ti ꞌbho Zeziiꞌa nyʋ ꞌweeꞌa ꞌꞌyigbeyi. Ɛ-bɛ lɛ ɔ-ɔ nʋꞌa, ꞌɩnnɛ ꞌka-a: 12Nyʋ ꞌwlʋ-o ꞌle Zaakɩ gbo, ʋn ꞌye -amʋ ꞌꞌkpi tiꞌwla. Ʋn na: Zeziiꞌa nyʋ-ʋ -seꞌa-a ꞌZuifʋ, ʋn mu *klɛ ꞌmʋ ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. Nyʋ ꞌmnʋ -seeꞌa -bhla yi ke, ꞌlotʋꞌa ꞌꞌnynuu -seꞌa-a ꞌZuifʋ, ꞌPiɛlɩ -ke ʋn-ʋ li nɩ ꞌko-o -dalue. Nyʋ ꞌmnʋ -nɩꞌa ꞌbho a, ꞌPiɛlɩ ꞌꞌgɩbhɛ-ɛ li; ɔ -ke ʋn-ʋ ꞌbhɔ-ɔ -dalue -linɩdɩ. 13Ɔ nʋꞌa -kaa a, ꞌlotʋꞌa ꞌꞌnynuu ꞌZuifʋtɔlʋ ꞌkpa-a ꞌɔ nʋnʋdɩ ꞌꞌyi ꞌle Banabaasɩ -mnɔɔꞌɔ ꞌꞌbhuo kpʋ ꞌʋ kli -lrɛɛ. 14A -gblee, -ka ꞌwa -nabhʋ seꞌa ꞌꞌyiꞌsrɛɛ ɛ, -ziadɩ -nɩꞌa ꞌle Zeziiꞌa ꞌꞌdɩzɩgɩ ꞌmʋ, -ka ʋn -tɛ ꞌnɛ gbo, ꞌɩn ꞌyeꞌa ꞌna li a, ꞌbho ꞌlotʋꞌa ꞌꞌnynuu ꞌweeꞌa ꞌꞌyigbeyi ꞌle ꞌɩn ꞌye ꞌmʋ-sɔ ꞌle ꞌɩn ꞌye ꞌPiɛlɩ wlu ꞌꞌyri tbha ꞌle ꞌɩn na: ꞌPiɛlɩ, -ɩnmɔ ꞌꞌduꞌa ꞌZuifʋyi, -ɩn -nɩꞌa nyʋ-ʋ -seꞌa-a ꞌZuifʋꞌa ꞌꞌklumʋ, -ɩn -ke ʋn-ʋ li nɩ ꞌko-o -dalue. -Ka ꞌZuifʋꞌa gba ꞌlɛꞌɛ, -aꞌa nʋ -kaa. ꞌTraamʋ ꞌtɔ ɔ, -a ꞌjri-e ꞌle manɩ. -Aꞌa kpli -a nʋꞌa, ꞌɩnnɛ tɔꞌɔ nyʋ -ka, nyʋ-ʋ na ꞌlotʋꞌa ꞌꞌnynuu -seꞌa-a ꞌZuifʋ ꞌwee -kpʋn ꞌZuifʋꞌa gba ꞌꞌyi ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi, -ɩn -ke ʋn ꞌbhɛɛꞌɛ wlu ꞌmʋ. Leedɩ -a nʋꞌo -kaaꞌa? ꞌKa se ꞌꞌyrili-nmɔ.
Nyɔꞌꞌo nyɔ-ɔ deꞌa *Zezii *Kliisɩ ꞌꞌgwli ꞌꞌdu-o ꞌꞌyisrɛɛyi ꞌbho -Lagɔꞌɔ ꞌꞌyigbeyi
15ꞌƖn-ɩ ꞌtmʋʋꞌo amʋ-ɛ, -abʋ-aꞌa ꞌꞌbhi ꞌnʋ-o *ꞌZuifʋ -ziaka, ꞌle nyʋ-ʋ ꞌwlʋꞌa -amʋ ꞌꞌduꞌo ꞌZuifʋ -lrɛɛ, ꞌle -a -se ꞌꞌsesibhlʋkpa ꞌꞌkpiꞌa nyʋ -a-bʋ ꞌZuifʋ-ʋ zrɛ nɩꞌa ꞌꞌnyinynikpliꞌa nʋmʋ ꞌꞌyi -ko -lrɛɛ. 16Ɛ -nɩꞌa -kaa ꞌmʋ a, -a-bʋ yiboꞌo na, -bho nyɔ ꞌꞌdu ꞌꞌyisrɛɛyi ꞌbho -Lagɔꞌɔ ꞌꞌyigbeyi, ɔ-ɔ ꞌde-e *Zezii *Kliisɩ ꞌꞌgwliꞌa dɩ moꞌo. Ɛ -se nyɔꞌɔ ꞌꞌbhuoꞌa ꞌmʋtikukuɛꞌɛ ꞌmʋpɛɛɛ ꞌmʋ -ko. ꞌƐ dɩ -abʋ de ꞌɔ ꞌꞌgwli -lrɛɛ ꞌle -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi, -a ꞌde -ɔ ꞌꞌgwliꞌa dɩ. Ɛ -se nyɔꞌɔ ꞌꞌbhuoꞌa ꞌmʋtikukuɛꞌɛ ꞌmʋpɛɛɛ ꞌmʋ -ko, -ɛkedɩmaa, nyɔ-ɔ ꞌka ꞌɔ ꞌꞌbhuoꞌa ꞌmʋtikukuɛ ꞌmʋ ꞌpɛɛ ꞌle -ɔ ꞌka ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi, ɔ se -nɩ. 17A -gblee, -a-bʋ ꞌma-a ꞌZuifʋ, -bho -a de Zezii Kliisɩ ꞌꞌgwli, ꞌle -a -ka -kaa-a nʋ a, -a ꞌbɔ-ɔ ti -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi; ꞌꞌlemnɩɩ -aꞌba nʋnʋkpli-i ꞌtɔ-ɔ nyʋ, -ka nyʋ-ʋ -seꞌa-a ꞌZuifʋ-ʋ nʋꞌa, ꞌka-a -a nʋꞌo. -A ꞌꞌdu-o ꞌꞌnyinynidɩꞌa nʋmʋ -lrɛɛ. -Bho ɛ -nɩ -kaa ꞌle, ꞌꞌlemnɩɩ Zezii Kliisɩ-ɩ ꞌpo-o nyʋ ꞌkpa ꞌꞌyi ꞌle ʋn ꞌke ꞌꞌnyinynidɩ nʋꞌa? -Gba! ꞌKla -ko. 18-Bho ꞌɩn na, -bho nyɔ ꞌpɛɛ ꞌɔ ꞌꞌbhuoꞌa ꞌmʋtikukuɛ ꞌmʋ, ɛ -se ꞌɩnnɛ ꞌke ɔ ꞌꞌyisrɛɛyi po ꞌbho -Lagɔꞌɔ ꞌꞌyigbeyi -ko, ꞌle ꞌɩn ꞌke na -lrɛɛke, -bho nyɔ ꞌpɛɛ ꞌɔ ꞌꞌbhuoꞌa ꞌmʋtikukuɛ ꞌmʋ, ɛ ꞌbhɛɛꞌo ɛ ꞌke ɔ ꞌꞌyisrɛɛyi po ꞌbho ꞌɔ ꞌꞌyigbeyi, nʋ a, ꞌꞌlemnɩɩ ꞌɩn-ɩ ꞌnʋ-o ꞌꞌnyinynidɩ ꞌbho -Lagɔꞌɔ ꞌꞌyigbeyi -ziaka. 19A -gblee, dɩ *-Lagɔꞌɔ gba-a zaꞌa ꞌmʋ, ꞌɛ dɩ ꞌɩn -see ꞌtɔ ꞌan ꞌꞌbhuoꞌa ꞌmʋtikukuɛ ꞌmʋ ꞌpɛɛ yi ꞌle ꞌɩn ꞌke ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi. ꞌƖn ꞌbhɔ-ɔ ꞌɛ lɛtuꞌa nʋnʋdɩ ꞌle ꞌɩn ꞌke -Lagɔꞌɔ ꞌgwlʋdɩ nʋ ꞌle ꞌan tinɩɛ ꞌmʋ. 20-Ka nyʋ kɔꞌɔ Zezii Kliisɩ ꞌbho nyʋyrilbhaatu ꞌꞌyri, ɔ ꞌyeꞌa ꞌmɛ, ꞌkla ꞌmnɔ ꞌka-a ɛ kɔkɔɔꞌɔ -ka nyʋ ꞌgbaa ꞌnɔ ka ꞌɩnmʋ ꞌle ʋn ꞌye -amʋ ꞌbho tu ꞌꞌyri kɔ ꞌɩn -ke ɔ ꞌyeꞌa ꞌmɛ. ꞌƐ ꞌzɔ ꞌmo-o ꞌɩn ꞌbhɔ-ɔ ꞌan ꞌꞌbhuoꞌa ꞌmʋtikukuɛꞌɛ ꞌmʋpɛɛɛꞌɛ dɩ. ꞌTraamʋ ꞌtɔ ɔ, ꞌɩn -ke Zezii Kliisɩ ꞌꞌsisriꞌe-e ꞌꞌyi; ɔ ꞌmɛ-ɛꞌo ꞌan dɩ. ꞌƐ dɩ ꞌtɔ ɔ, -bho ꞌɩn -yi ꞌꞌyisrɛɛyi ꞌmʋ ꞌbho -Lagɔꞌɔ ꞌꞌyigbeyi, Zezii Kliisɩꞌa ꞌmʋtikukuɛ ꞌmʋ ꞌɩn -nɩ -nɩꞌe ti. ꞌƖn se ꞌtɔ ti-nɩ ꞌan ꞌꞌbhuoꞌa ꞌmʋtikukuɛ ꞌmʋ. ꞌꞌYri -ke ꞌꞌyi ꞌɩn -nɩꞌa ti ꞌnɔɔ ꞌbhlʋkpa ꞌꞌkpi ꞌtraamʋ a, ꞌle ꞌan -Lagɔꞌɔ ꞌꞌyu, Zezii Kliisɩꞌa ꞌꞌgwlideɛ ꞌmʋ, ꞌle-e ꞌɩn -nɩ -nɩꞌe ti. Zezii Kliisɩ, ꞌɩnnɔ ꞌꞌduꞌo ꞌan dɩkmɛɛꞌɛ dɩ ꞌle ɔ ꞌye ꞌɔ ꞌꞌbhuo ꞌꞌyitiꞌꞌtayi ɔ ꞌye ꞌmɛ. 21A ꞌye li-ɔ, -zɛgɛ -Lagɔ nʋꞌa ꞌɩnmʋ ꞌꞌlruli, ꞌɩn se ꞌbhɛɛ ꞌɩn ꞌke ɛ gboꞌmate. -Bho nyɔ -ka ꞌkɩ ꞌɔ ꞌꞌbhuoꞌa ꞌmʋtikukuɛ ꞌmʋ-ʋ ꞌpɛɛ ꞌle ɔ ꞌke ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi a, ꞌꞌlemnɩɩ bhebhe Zezii Kliisɩ ꞌmɛ ꞌkoꞌo.
3*Zezii *Kliisɩꞌa ꞌbhoduɛɛ-ɛ ꞌpʋʋnꞌo nyɔ-e -ale *ꞌZuifʋꞌa gbaꞌa?
1-Woo! Galasiikɔmʋ-a, a se -bhla -naagɩ ꞌbhle ꞌmaae -ale nyɔ-ɔ ꞌꞌcrɔkɔꞌɔ amʋꞌa? -Ka *Zezii *Kliisɩ ꞌmɛꞌɛ ꞌbho nyʋyrilbhaatu ꞌꞌyri, ꞌbho ꞌya dɩꞌa damʋ -a zɩzaꞌa gbɔ ꞌꞌfɩa ꞌwee a ꞌwɔnꞌɔ ꞌbɔ ɔ, a ꞌmate nɩ-aꞌa? 2A po -lokui, ꞌɩn ꞌke amʋ lɛ -lue -nɛɛ tidede. Lɛ ꞌmnɛ, ꞌɩnnɛ ꞌka-a: A ꞌka -Lagɔꞌɔ Lisaazuzu ꞌye ꞌle, aꞌba ꞌꞌbhiꞌa ꞌmʋtikukuɛ a ꞌpɛɛꞌɛ ꞌmʋ, ꞌɩnnɛ ꞌꞌnyɩ ꞌɛ amʋ-ae -ale Zeziiꞌa ꞌꞌdɩzɩgɩ a ꞌwɔnꞌɔ ꞌbɔ ꞌle a ꞌye ꞌɔ ꞌꞌgwlide, ꞌɩnnɛ nʋ ꞌɛ? 3A -gblee, Galasiikɔmʋ-a, a se -naagɩ ꞌbhle -ziaka! A ꞌꞌduꞌa -Lagɔjeyinɛɛ wɔn see, a ꞌde-e -Lagɔꞌɔ Lisaazuzu ꞌꞌgwli. Leelɛ nʋꞌo amʋ ꞌle a ꞌye ꞌbhɔ ꞌle a ꞌbɔꞌɔ ti ꞌle aꞌba ꞌꞌbhiꞌa ꞌmʋtikukuɛ ꞌmʋ a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyiꞌa? 4*Wɔnkulɩ -nʋ-ɛꞌo ꞌbho aꞌba ꞌnynɩmʋ a ꞌyeꞌa a, bhebhelɩ a ꞌlɩ ɩꞌa? ꞌMna-a ꞌtmʋʋꞌo amʋ-ɛ, -bho koo ɩ -nɩ ꞌmʋ, ɩ -se bhebhelɩ -ko. 5ꞌBho ꞌɛ ꞌꞌkpi a, -Lagɔꞌɔ ꞌꞌbhuo ꞌꞌnyɩ-e amʋ ꞌɔ Lisaazuzu ꞌle ɔ-ɔ nʋꞌo wɔnkulɩ ꞌle aꞌba ꞌꞌklumʋ. -Bho ɔ -ka -kaa-a nʋ a, aꞌba ꞌꞌbhiꞌa ꞌmʋtikukuɛ a ꞌbɔꞌɔ ti a ꞌke ꞌmʋꞌpɛɛꞌɛ? -Gba! -Ale, -ka a ꞌwɔnꞌɔ Zezii Kliisɩꞌa ꞌꞌdɩzɩgɩ ꞌbɔ ꞌle a ꞌye ꞌɔ ꞌꞌgwlide, ꞌɩnnɛ nʋ ꞌɛ?
6A -gblee, -a-bʋ *ꞌZuifʋꞌa ꞌꞌna *Ablaamʋ -nɩꞌa ti -bɛnyɩ, a popo ꞌgwlʋti ꞌbho ꞌɔ damʋ! ꞌƆ ꞌꞌdɩ-ɩ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli, ɩ na:
Ablaamʋ ꞌde-e -Lagɔ ꞌꞌgwliꞌa dɩ, ɔ ꞌꞌduꞌo ꞌꞌyisrɛɛyi ꞌbho ꞌɔ ꞌꞌyigbeyi.
7A ꞌye li-ɔ, nyʋ -yʋ deꞌa -Lagɔ ꞌꞌgwli a, ꞌɩnnʋ ꞌmo-o Ablaamʋꞌa ꞌꞌnynuuꞌa ꞌꞌnynuuzɩgɩ. Ʋn -plɛꞌɛ-ɛ ꞌꞌgwlideɛ -lue ꞌmʋꞌa dɩ moꞌo. 8Wlu -ɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli -tanyɩ, ɛ na: -Bho ꞌwla, ꞌZuifʋ-e nyʋ-ʋ -seꞌa-a ꞌZuifʋ, ʋn -nɩ ꞌwee, ʋn ꞌde-e -Lagɔ ꞌꞌgwliꞌa dɩ, ɔ-ɔ ꞌye ʋ ꞌꞌyisrɛɛmʋ -po mʋ ꞌbho ꞌɔ ꞌꞌyigbeyi. ꞌƖnnɛ ꞌbhleꞌe ꞌnynɩꞌa dɩ, ɩ-bɩ ꞌꞌdɩzɩgɩ ꞌmnɩ, -da Ablaamʋ ꞌwɩn ꞌɩ ꞌbɔ, ꞌya ꞌꞌyriꞌa ꞌbɩ -see -bhla ꞌwlʋ ke, ꞌle -Lagɔ na:
ꞌLe -ɩn ꞌmʋ ꞌɩn-ɩ ꞌye -zi -nɩ mʋ ꞌle ꞌɩn ꞌke ꞌbhlɩkpɩ ꞌwee ꞌꞌniti-wʋnna.
9Ɛ -nɩꞌe-e -kaaꞌa dɩ a, -ka Ablaamʋ deꞌa -Lagɔ ꞌꞌgwli see, ꞌle ɔ ꞌye ꞌɔ ꞌꞌniti-wʋnna a, ꞌka ꞌmnɔ, ꞌka-a, nyɔꞌꞌo nyɔ-ɔ de ꞌɔ ꞌꞌgwli, ɔ-ɔ -wʋnna ꞌnɔ ꞌꞌniti -lrɛɛ.
10A ꞌye li-ɔ, -bho ɛ ꞌꞌdu nyʋ ꞌwee ꞌpɛɛꞌɛ ꞌwa ꞌꞌbhiꞌa ꞌmʋtikukuɛ ꞌmʋ ꞌle ʋn na ꞌɩnnɛ po ꞌʋ ꞌꞌyisrɛɛmʋ ꞌbho -Lagɔꞌɔ ꞌꞌyigbeyi, ʋ-bʋ nyʋ ꞌmnʋ, -Lagɔꞌɔ -zigle -nɩ ꞌnʋ-ʋ ꞌꞌkpi. A -gblee, ꞌɛ ꞌꞌkpidɩ ꞌcnɩ-ɛꞌɛ ꞌle -Lagɔbɔgʋ ꞌli, na:
Lɩ ꞌwee ʋn ꞌcnɩꞌa ꞌle -Lagɔbɔgʋ ꞌli, nyɔ -yɔ -see ꞌɩ ꞌwɔɔn, ꞌɔ nyɔtu, -Lagɔꞌɔ -zigle -nɩ ꞌnɔ-ɔ ꞌꞌkpi.
11-A yiboꞌo-o na ɛ se ꞌbhɛɛ, nyɔꞌɔ ꞌꞌbhuoꞌa ꞌmʋtikukuɛꞌɛ ꞌmʋpɛɛɛ ꞌmʋ ɔ ꞌke ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi. A -gblee, ꞌɛ ꞌꞌkpidɩ ꞌcnɩ-ɛꞌɛ ꞌle -Lagɔbɔgʋꞌa ꞌfɔ -lrɛɛ gbo, ꞌɩnnɛ ꞌka-a:
Nyɔ -yɔ deꞌa -Lagɔ ꞌꞌgwli a, ꞌɩnnɔ ꞌꞌduꞌo ꞌꞌyisrɛɛyi ꞌbho ꞌɔ ꞌꞌyigbeyi, ꞌɩnnɔ ꞌyeꞌe tinɩɛzɛgɛ.
12Ɩ -nɩꞌa -kaa ꞌmʋ, -bho nyɔ ꞌpɛɛ ꞌɔ ꞌꞌbhuoꞌa ꞌmʋtikukuɛ ꞌmʋ ꞌle ɔ ꞌke ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi, ɔ -see ɔ ꞌꞌgwlide, ꞌɔ ꞌꞌbhuoꞌa ꞌmʋtikukuɛ ɔ-ɔ deꞌe ꞌꞌgwli. Ɛbɛ -ke -Lagɔꞌɔ ꞌꞌgwlideɛ -se lɛ -lue -ko. Ɔbɔ ꞌmnɔ, -bho ɔ nʋ -kaa a, wlu-u ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli see, ꞌɔ ꞌwɔn ꞌɛ ꞌzɔ ꞌmʋti. Wlu ꞌmnɛ, -ɛ nʋꞌa na:
Nyɔ-ɔ -kpʋnꞌa -Lagɔꞌɔ gba ꞌꞌyi -ziaka, ɔ -kpʋn ꞌnɩ-ɩ ꞌꞌyiꞌa dɩ ɔ-ɔ ꞌyeꞌe tinɩɛzɛgɛ.
13A -gblee, -a -see -Lagɔꞌɔ gba ꞌꞌyi-kpʋn, ꞌɛ dɩ ꞌɔ tutibhlasʋ -nɩꞌe -amʋ ꞌꞌkpi, ꞌle Zezii Kliisɩ ꞌye ꞌbho -aꞌba ꞌbɩ ꞌmʋ -zi ꞌle ɔ ꞌye tuti-bhlɛ -aꞌba dɩ. Ɔ nʋꞌa -kaa, ɔ zetieꞌe -amʋ-ɛ ꞌbho tutibhlasʋ ꞌmnɛ ꞌzɔ. ꞌLe -Lagɔbɔgʋ ꞌli ꞌɛ ꞌꞌkpidɩ ꞌcnɩ-ɛꞌɛ ꞌle, ꞌɩnnɛ ꞌka-a:
Nyɔ-ɔ nʋꞌa ꞌꞌnyinynidɩ, ʋn ꞌlbha -nɩꞌa tu ꞌꞌyri, -Lagɔꞌɔ tutibhlasʋ -nɩ ꞌnɔ-ɔ ꞌꞌkpi.
14A ꞌye li-ɔ, Zezii Kliisɩ ꞌnʋ-o ꞌɛ lɛtu, ꞌle, nyʋ-ʋ -seꞌa-a ꞌZuifʋ, -ʋ de ꞌɔ ꞌꞌgwli, -ʋ -ke ɔ ꞌꞌsisriꞌa ꞌꞌyi, -Lagɔꞌɔ ꞌꞌnitiwʋnnakʋta ɔ ꞌꞌduꞌa Ablaamʋ wɔn ꞌmʋti, ʋn ꞌke ɛ ꞌye -lrɛɛ; ꞌle, -a ꞌde-e Zezii Kliisɩ ꞌꞌgwliꞌa dɩ, -Lagɔꞌɔ Lisaazuzu ɔ nʋꞌa ɔ ꞌka -amʋ ꞌꞌnyɩ, ɔ ꞌke ɔ -amʋ ꞌꞌnyɩ -lrɛɛ.
*-Lagɔꞌɔ gba -ke ꞌɔ wɔnmʋtidulɛ
15ꞌAn ꞌlotʋꞌa ꞌꞌnynuu-a, ꞌɩn-ɩ ꞌpo-o amʋ ꞌꞌyi -lue ꞌle a ꞌke ɩ ꞌmʋtiꞌwɔn. -Bho nyʋ ꞌsɔn bhla tite, ʋn ꞌtri -ɛ -jiɛ ꞌꞌkpi ti, ꞌꞌlemnɩɩ nyɔ -see ꞌbho ꞌwa ꞌꞌklumʋ ꞌkpa yi ꞌle ɔ ꞌke ꞌwa dɩ wɔn-nyni; nyɔꞌɔ -lue komu -see ꞌbho wɔn -po yi -lrɛɛ. 16-Ka -lue ꞌmnɔ, ꞌka-a ɛ -nɩꞌe ꞌbho -Lagɔꞌɔ damʋ -lrɛɛ. ꞌLe *Ablaamʋꞌa ꞌꞌyreetɩꞌa ꞌꞌklumʋ ꞌꞌyu -lue ꞌtɩn -Lagɔ -zaꞌa ꞌbho, ꞌle, ɔ-bɔ ꞌꞌyu ꞌmnɔꞌɔ ꞌꞌnynuuꞌa ꞌꞌnynuu, ɔ ꞌtʋ ꞌʋ ꞌꞌkpi ti -lue -lue. A -gblee, sese Ablaamʋ -Lagɔ ꞌꞌduꞌo wlu wɔn ꞌmʋti. Ɛ-bɛ wlu -lue ꞌmnɛ, ꞌɩnnɛ bhlaꞌa ꞌɔ ꞌꞌnynuuꞌa ꞌꞌnynuuꞌa -dɔnʋ ꞌmnɛ ꞌꞌkpi. ꞌLe -Lagɔbɔgʋ ꞌli, ɩ ꞌcnɩ-ɛꞌɛ ꞌle ɩ -see ꞌɔ ꞌꞌnynuuꞌa ꞌꞌnynuuꞌa -dɔnɩꞌa -dadudu ꞌnynɩ ꞌꞌsi. Ɛ ꞌnʋ-o ꞌɔ ꞌꞌnynuuꞌa ꞌꞌnynuuꞌa -dɔnɩꞌa ꞌꞌklumʋꞌa -dɔnʋ -lue. ꞌLe ɛ-bɛ -dɔnʋ ꞌmnɛ ꞌmʋ, ꞌle-e *Zezii *Kliisɩ ꞌwlʋ -nɩ -nɩꞌo. ꞌƖnnɔ ɛ ꞌꞌsiꞌe ꞌnynɩ. 17A ꞌye li-ɔ, lɛ ꞌɩn ꞌka ꞌmʋ-za, ꞌɩnnɛ ꞌka-a: -Lagɔ -ke Ablaamʋ ꞌbhla-a *-ybhɛybhɛtite see ꞌle zʋɩnꞌa ꞌꞌdu -lue -gwlʋ -lue -zʋɩn bue ꞌye zi ke-ɔ -yrɔzaa, ꞌle -Lagɔ ꞌye *ꞌZuifʋ *ꞌɔ gba po. ꞌBho ꞌmnɔ ꞌtɔ ɔ, gba ꞌmnɛ se ꞌbhɛɛ, -Lagɔꞌɔ -ybhɛybhɛtite ɔ -ke Ablaamʋ bhlaꞌa see, ɛ ꞌke ɛ wɔn-nyni. Lɩ ꞌwee -Lagɔ nʋꞌa ɔ ꞌke nʋ, ɛ se ꞌbhɛɛ ɛ ꞌke ɩ ꞌle ꞌꞌtaa -lrɛɛ. 18ꞌKa ꞌmnɔ, lɛzɛgɛ -Lagɔ ꞌꞌduꞌa Ablaamʋ wɔn ꞌmʋti, -bho ɔ ꞌꞌnyɩ ɛ ꞌkɩ nyʋ ꞌɔ gbaꞌa ꞌꞌyikpʋɛnꞌɛ kamʋ, ꞌꞌlemnɩɩ wlu -yɛ ɔ ꞌꞌduꞌa nyʋ wɔn ꞌmʋti -see ɛ ꞌkɩ ꞌꞌyi-tbhɛ yi. Ɩ -nɩꞌa -kaa ꞌmʋ -Lagɔ ꞌnʋ-o -zɛgɛ Ablaamʋ -bodɩ. -Zɛgɛ ꞌmnɛ -Lagɔꞌɔ ꞌꞌbhuo na ɔ-ɔ ꞌye -ɛ -nʋ -mʋ. ꞌƐ dɩ ɔ nʋ ɛꞌo.
19-Bho ɩ -nɩ -kaa ꞌmʋ, lee -ke dɩ -Lagɔ poꞌo ꞌZuifʋ ꞌɔ gbaꞌa? Ɔ ꞌꞌnyɩ ɛ -ʋꞌo ꞌle nyʋ ꞌke yibo -ka, ꞌꞌnyinynidɩ ʋn-ʋ nʋꞌa, ɩ-ɩ ꞌnaaꞌa -Lagɔꞌɔ gba ꞌꞌyi. Gba -mnɛɛ, popolɛ moꞌo ꞌle ɛ ꞌke nyʋ -jolʋ gbo po ꞌle Zezii Kliisɩ, Ablaamʋꞌa ꞌꞌyuꞌa ꞌꞌyu ꞌmnɔ ꞌke yi -kpayɩke. Wlu -Lagɔ ꞌꞌduꞌa Ablaamʋ wɔn ꞌmʋti, ɔ-bɔ ꞌꞌyu ꞌmnɔ, ꞌɩnnɔ ɛ ꞌꞌsiꞌe ꞌnynɩ. Gba ꞌmnɛꞌɛ -klugba, -Lagɔ ꞌꞌnyɩ -ɛ ɔ gboꞌa -dalbhomʋ, ʋn ꞌye ɛ -ya, ꞌle, *Moyiizɩ -yɔ -nɩꞌa ꞌbho -Lagɔ -ke nyunyuꞌa ꞌnynɩmʋ, ʋn ꞌye ɔ ɛ ꞌꞌnyɩ. 20A -gblee, -a -nɩꞌa ꞌꞌcɩcɩ a, -da dɩꞌa ꞌnynɩmʋnɩyi -nɩꞌa a, nyʋꞌa -zapɩ ꞌsɔn-ɔ -nɩꞌe ꞌbho. -Lagɔ ꞌka Ablaamʋ wlu ꞌꞌkpiticɛ, dɩꞌa ꞌnynɩmʋnɩyi se ꞌbho -nɩ, ꞌɔ ꞌꞌbhuo-o -yaꞌa ꞌꞌdɩ.
-Lagɔꞌɔ gbaꞌa ꞌkpʋ
21ꞌLotʋꞌa ꞌꞌnynuu-a, -bho ꞌɩn -ka -kaa-a wlu a, ꞌɩn ꞌnʋ-o -Lagɔꞌɔ wlu ɔ-ɔ ꞌꞌduꞌa nyʋ wɔn ꞌmʋti, ɛ -ke ꞌɔ gba tɩtbhɛꞌɛ-ɛ ꞌꞌkpiꞌa? -Gba! Ɛ se -kaa ꞌmʋ-nɩ. -Bho nyʋ ꞌbhɛɛ ꞌkɩ ʋn ꞌke *-Lagɔꞌɔ gba ꞌwee ꞌꞌyi-kpʋn, -Lagɔ-ɔ nʋ ʋ ꞌko-o ꞌꞌyisrɛɛmʋ ꞌmʋ ꞌbho ꞌɔ ꞌꞌyigbeyi ꞌle ʋn ꞌke tinɩɛzɛgɛ ꞌye, ꞌle ʋn se ꞌbhɛɛ ʋn ꞌke -Lagɔꞌɔ gba ꞌwee ꞌꞌyi-kpʋnꞌa dɩ, ɛ se -kaa ꞌmʋ-nɩ. 22A -gblee, ɛbɛ ꞌmnɛ-ɛ ꞌtɔ-ɔ nyʋ -ka wlu-u ꞌcnɩ-ɛꞌɛ ꞌle -Lagɔbɔgʋ ꞌli ꞌꞌduꞌa -ziadɩ. Wlu ꞌmnɛ na nyʋ ꞌwee ꞌcɛ-ɛ -Lagɔꞌɔ gba ꞌmʋ, ꞌle ꞌꞌnyinynidɩ kpʋn ꞌʋ ꞌgeyiɛ ꞌmʋ. ꞌBho ꞌɛ le a, lɩ -Lagɔ cɛꞌɛ wlu ꞌꞌkpiti, nyʋ-ʋ deꞌa *Zezii *Kliisɩ ꞌꞌgwli, ꞌwa ꞌꞌsɛ-ɛ ꞌke ɩ ꞌye. ꞌƖnnʋ deꞌe Zezii Kliisɩ ꞌꞌgwliꞌa dɩ moꞌo.
23-Tanyɩ ꞌkɩ -da nyʋ seꞌa Zezii Kliisɩꞌa ꞌꞌgwlidejolʋ yibo a, -Lagɔꞌɔ gba-a kpʋnꞌo -amʋ ꞌgeyiɛ ꞌmʋ, gba ꞌmnɩꞌa ꞌlimʋ -a -deꞌe ti kplokplo ꞌle -Lagɔ ꞌye Zezii Kliisɩꞌa ꞌꞌgwlidejolʋ kati. 24-Ka nyɔ-ɔ ꞌꞌduꞌa ꞌꞌyu ꞌꞌyrili ꞌle ɔ-ɔ tɔ ꞌnɔ -jolʋ ꞌle ɔ ꞌke ꞌꞌyiꞌbhɛ, ꞌka ꞌmnɔ, ꞌka-a -Lagɔꞌɔ gba-a tɔꞌɔ -amʋ -jolʋ ꞌle ɛ ꞌye Zezii Kliisɩꞌa yinɔɔ ꞌꞌkpi bhla. Ɛ -nɩꞌe-e -kaa, ꞌle, -abʋ ꞌde-e Zezii Kliisɩ ꞌꞌgwliꞌa dɩ, -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. 25ꞌTraamʋ ꞌtɔ ɔ, Zezii Kliisɩꞌa ꞌꞌgwlidejolʋ katiꞌo. ꞌƐ dɩ -a ꞌyeꞌe ꞌꞌyiflɔɛ, -Lagɔꞌɔ gbaꞌa ꞌmʋtikukuɛ se -amʋ ꞌꞌkpi -nɩ.
26A ꞌye li-ɔ, aꞌba ꞌwee ꞌꞌdu-o -Lagɔꞌɔ ꞌꞌyreetɩ, -ɛkedɩmaa, a ꞌde-e Zezii Kliisɩ ꞌꞌgwli. ꞌƖnnɛ tɔꞌɔ na a -ke Zezii Kliisɩ ꞌꞌsisriꞌe-e ꞌꞌyi. 27A -gblee, a *batizee-ɛꞌo ꞌle a -ke Zezii Kliisɩ ꞌꞌsisriꞌe ꞌꞌyi: ꞌtraamʋ ꞌtɔ ɔ, a ꞌbhle-e Zezii Kliisɩꞌa -pɔlʋ ꞌli. 28ꞌƐ dɩ ꞌtɔ ɔ, -bho -ɩn ꞌꞌdu *ꞌZuifʋyi, -bho -ɩn se ꞌZuifʋyi, -bho -ɩn -nɩ nyɔꞌɔ ꞌꞌlru ꞌzɔ, -bho -ɩn -flɔ ꞌꞌyi, -bho -ɩn ꞌꞌdu nyukpasu, -bho -ɩn ꞌꞌdu ꞌnynaakpʋ, ꞌɛ -nyna nyɔ ka, ꞌle, -abʋ-e abʋ-e, -aꞌba ꞌwee -ke Zezii Kliisɩ ꞌꞌsisriꞌe ꞌꞌyi ꞌle -pɔlʋ -lue ꞌmʋ. 29A-a ꞌye-e liꞌa, a-bʋ -seꞌa-a ꞌZuifʋ a, Zezii Kliisɩꞌa nyʋ a ꞌꞌduꞌo ꞌtɔꞌɔ dɩ a nʋꞌo *Ablaamʋꞌa ꞌꞌnynuuꞌa ꞌꞌnynuu -lrɛɛ. Nyʋ-ʋ ꞌꞌduꞌa -kaa Ablaamʋꞌa ꞌꞌnynuuꞌa ꞌꞌnynuu, lɩzɩgɩ -Lagɔ cɛꞌɛ wlu ꞌꞌkpiti ɔ ꞌke Ablaamʋ -ke ꞌɔ ꞌꞌnynuuꞌa ꞌꞌnynuu ꞌꞌnyɩ, ꞌɩnnʋ ꞌke ɩ ꞌye.
41ꞌƖn-ɩ ꞌtmʋʋꞌo amʋ-ɛ, dɩ -lrɩɩ ꞌɩn ꞌbɔꞌɔ ti ꞌɩn ꞌke amʋ -bodɩ ꞌmʋ-za a, ꞌɩnnɩ ꞌka-a: -Ka ꞌꞌdanakɔnu ꞌle nya ꞌwla ziꞌa ꞌɔ -tɩtaꞌa tisielɩ ꞌꞌkpi, -bho ɔ -see lɛ -gwɛ ke a, nyɔ ꞌꞌlru ꞌꞌyi ɔ -nɩꞌo, ꞌɩnnɔ ꞌꞌdu ꞌɔ ꞌꞌyrili -bho ɔ ꞌke -kɔkɔlɩꞌa klɛ ꞌmʋꞌꞌluo bhebhedɩ. 2-Nɔɔ -ke ꞌli ɔ ꞌꞌduꞌa -bhla ꞌꞌdana a, nyʋ-ʋ ꞌꞌdu -ɔ ꞌꞌyrili ꞌle ʋn-ʋ ziꞌe ꞌɔ nʋnʋlɩꞌa dɩ -lrɛɛ, ꞌle, ꞌɔ lɛgwɛnɔɔ ꞌɔ -tɩta ꞌꞌsiꞌa ꞌnynɩ, ɛ ꞌke ɛ ꞌꞌkpi bhla. 3ꞌBho -aꞌba damʋ ꞌka-a ɛ -nɩꞌe ꞌmʋ -lrɛɛ. -Da -a seꞌa -bhla *Zezii *Kliisɩ yibo, -aꞌba ꞌꞌna ꞌꞌweꞌa kpli -kɔꞌɔ-ɔ -amʋ ꞌꞌlru ꞌmʋ. 4-5A -gblee, -nɔɔ -Lagɔ ꞌꞌduꞌa, ɛ nyniꞌa a, ɔ ꞌpo-o ꞌɔ ꞌꞌyu, Zezii, ꞌnɔɔ ꞌkmʋ ꞌmʋ -jeyi, ꞌle, nyʋ-ʋ ꞌpɛɛꞌɛ ꞌwa ꞌꞌbhiꞌa ꞌmʋtikukuɛ ꞌmʋ ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi, ɔ ꞌke ʋ ɩ ꞌmʋ zetie, ꞌle ɔ ꞌye ꞌnynaakpʋ ꞌmʋ -zi -nɩ, ʋn ꞌye ɔ ꞌwlʋ. -Ka nyunyu ꞌwee-e ꞌwlʋꞌa, ꞌka-a ɔ ꞌwlʋꞌo. Ɔ yiꞌa ꞌnɔɔ ꞌkmʋ ꞌmʋ a, *gba -Lagɔ poꞌa ꞌZuifʋ, ɔ ꞌcɩan-a ꞌya ꞌꞌyikpʋɛn -lrɛɛ. Ɔ-bɔ -Lagɔ -zi -nɩꞌe ꞌmʋ ꞌle ɔ ꞌye -amʋ ꞌɔ ꞌꞌyreetɩ ꞌmʋ nʋ. 6A -gblee, a ꞌꞌdu-o -Lagɔꞌɔ ꞌꞌyreetɩ. -A ꞌꞌdu-o ꞌɔ ꞌꞌyreetɩꞌa dɩ, ɔ poꞌo -amʋ *ꞌɔ Lisaazuzu ꞌmʋ. Lisaazuzu -nɩꞌa ꞌɔ ꞌꞌyu Zezii Kliisɩ ꞌmʋ, ꞌɩnnɔ moꞌo. ꞌƖnnɛ -nʋ-ɛꞌo ꞌle a-a ꞌlaꞌa -Lagɔ aꞌba -tɩta. 7Ɩ -nɩꞌa -kaa ꞌmʋ a, lɛ -see ꞌtɔ amʋ ꞌꞌlru ꞌmʋ -kɔ. A ꞌꞌdu-o ꞌɔ ꞌꞌyreetɩ ꞌtɔ. -Ka a ꞌꞌduꞌa ꞌtraamʋ ꞌɔ ꞌꞌyreetɩ a, lɛ ɔ deꞌa ꞌbho ti ꞌɔ ꞌꞌyreetɩꞌa dɩ, a-a ꞌye -ɛꞌo -lrɛɛ.
ꞌPɔlʋ popoꞌo-o Galasiikɔmʋ ꞌꞌkpi ꞌgwlʋti
8Ɛ -nɩꞌa -kaa ꞌmʋ, -bɛnyɩ a, -da a seꞌa -bhla -Lagɔ yibo a, ꞌbho ꞌmnɔ ɔ, ꞌꞌsesilɩ -seꞌa-a -lagɔzɩgɩ, ꞌɩnnɩ a-a bʋbɔꞌo, -ɩ -kɔꞌɔ amʋ ꞌꞌlru ꞌmʋ. 9ꞌTraamʋ a, a yiboꞌo-o -Lagɔ -ziaka. Nyɔ ꞌbhɛɛꞌo ɔ ꞌke nʋ, -Lagɔ yiboꞌo amʋ -ziaka. Ɛ -nɩꞌa -kaa ꞌmʋ, leedɩ a ꞌꞌbhitiꞌe ꞌꞌyiti ꞌle a ꞌye ꞌle aꞌba ꞌꞌna ꞌꞌweꞌa kpli ꞌmʋ le muꞌa? Lɩ-ɩ seꞌa wɔnku, -ɩ seꞌa -Lagɔ ꞌmʋ-zi, ꞌɩnnɩ a-a pleꞌe kliꞌa? Bhebhelɩ moꞌo. Leedɩ a muꞌo ꞌle ꞌya gbo le, a ꞌbɔꞌɔ ti ɩ ꞌke amʋ ꞌꞌlru ꞌmʋ -kɔ -lrɛɛꞌɛ? 10Leedɩ a-a ꞌpɛɛꞌɛ ꞌwɩ-e ꞌcʋɩ -ke zʋɩn ꞌmʋ ꞌle a-a nʋꞌo nyʋ ꞌꞌdu ɩ ꞌbho ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyiꞌa? 11Lɩ a-a nʋꞌa dɩ, ꞌan -pɔlʋ -see bhlu ꞌbho amʋ ꞌꞌkpi. ꞌLe *Zezii *Kliisɩꞌa dɩ ꞌɩn -zaꞌa amʋ -bodɩ ꞌmʋ, -bheje, ꞌan lbhʋ ꞌmnɛ ꞌɩn nʋꞌa ꞌle aꞌba ꞌꞌklumʋ a -bodɩ, bhebhelɛ maꞌa?
12ꞌLotʋꞌa ꞌꞌnynuu-a, ꞌɩn-ɩ bhade amʋ li, ꞌɩn -ke a ꞌꞌdu-o ꞌtɔ nyɔ -lueꞌa dɩ, aꞌba ꞌpɛɛ aꞌba ꞌꞌbhiꞌa ꞌmʋtikukuɛ ꞌmʋ -le ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi! ꞌMna-aꞌa ꞌpɛɛ ꞌan ꞌꞌbhuoꞌa ꞌmʋtikukuɛ ꞌmʋ, a -za ꞌle ꞌan ꞌbɩ! A -see ꞌɩnmʋ ꞌꞌnyinynidɩꞌa -lue komu ꞌꞌlrulinʋ. 13A-a popo ꞌgwlʋti ꞌnɩ? ꞌAn ꞌle amʋ gboꞌa ꞌꞌyizanɔɔ ꞌꞌyi ꞌɩn ꞌka amʋ Zeziiꞌa ꞌꞌdɩzɩgɩ -tɔ ɔ, ꞌꞌlemnɩɩ yakalɩ -nɩꞌe ꞌɩnmʋ ꞌꞌkpi. ꞌƐ dɩ ꞌɩn ziꞌe ꞌbho a gbo ꞌwɩ -dudu. 14ꞌBho -dagbɛ ꞌmnɔ, yakalɩ kpʋnꞌa ꞌɩnmʋ a, a -sɩa -nɩꞌe-e ꞌɩnmʋ ꞌzɔ. ꞌWɛꞌɛ dɩ a -see ꞌɩnmʋ liple ꞌle a -see ꞌɩnmʋ ꞌꞌjni. Ɛ -nɩꞌa -kaa ꞌmʋ, -ka a ꞌke ꞌka -Lagɔ gboꞌa -dalbhoyi kpʋn, ꞌka-a a kpʋnꞌo ꞌɩnmʋ -gli. -Ka a kpʋnꞌa ꞌɩnmʋ, ꞌmna-aꞌa ꞌꞌbhuo kɔkɔɔꞌɔ-ɔ Zezii Kliisɩꞌa ꞌꞌbhuo. 15-16ꞌBʋbʋa-a -nɩꞌa ꞌle aꞌba -pɔlʋ gbo ɛ-bɛ -nɔɔ ꞌmnɛ ti, doo ɛ muꞌa? -Tanyɩ ꞌkɩ ꞌɩn yiboꞌo-o a-a cɛ ꞌko-o ku ꞌle a ꞌke ꞌɩnmʋ -kpa ꞌle lɛꞌꞌo lɛ ꞌmʋ. -Ziadɩ ꞌɩn-ɩ zaꞌa amʋ -bodɩ ꞌmʋ, ꞌɛ dɩ a-a kpʋnꞌo ꞌɩnmʋ aꞌba jɛkayiꞌa ka ꞌtraamʋ ꞌtɔꞌɔ?
17Ʋ-bʋ nyʋ -yʋ zaꞌa dɩ ꞌꞌyida ꞌmʋ, -ʋ ꞌbɔꞌɔ ti ʋn ꞌke amʋ dɩꞌa -tɔɔ ꞌꞌyriliꞌꞌmaa, ꞌwa -naagɩ se ꞌꞌyrili-nmɔ. Ʋn ꞌbɔ-ɔ ti ʋn ꞌke amʋ ꞌmʋꞌꞌluo, a -ke ʋn ꞌke gbɔ-po, ꞌle ꞌɩn -ke a ꞌke ꞌꞌyicɩcɛ, ꞌle ʋn-ʋ yaaꞌa ꞌmʋti tenyɩ ꞌya nʋnamʋ. 18-Bho nyɔ yaa ꞌmʋti ꞌle ɔ ꞌke -zɛgɛ nʋ, ɛ -nmɔꞌɔ-ɔ ꞌꞌyrili. Ʋ-bee -mnʋʋꞌa ꞌmʋtiyɛɛɛ -naa, ɛ se ꞌꞌyrili-nmɔ. A-bee -mnʋʋ, -bho ꞌɩn -nɩ ꞌbho aꞌba ꞌꞌtroli o, -bho ꞌɩn se ꞌbho aꞌba ꞌꞌtroli -nɩ o, ꞌɩn ꞌybha-oꞌo a ꞌke ꞌmʋtiyaa ꞌle a ꞌke -zɛgɛ nʋ ꞌꞌkɔmʋ. 19-20ꞌAn dɩkmayreetɩ-a, ꞌɩn-ɩ ꞌpo-o ꞌꞌyi -lue: ꞌBho -nɩgblaanynɔꞌɔ -gbanamʋ, -ka ʋn-ʋ sɩa nɩꞌa ꞌgwlʋlicɛɛꞌɛ wɔn ꞌmʋ ꞌle ʋn-ʋ gbaꞌa a, ꞌka-a ꞌɩn-ɩ sɩaꞌa aꞌba dɩ -lrɛɛ, ꞌle, -nɔɔ -ke ti aꞌba bhɩ ꞌka ꞌle Zezii Kliisɩ ꞌmʋ glu ꞌkpa -ka -zɛgɛka, ɛ ꞌke nyni. -Yeee! Galasiikɔmʋ-a, ꞌan -pɔlʋꞌa klɛ ti ꞌɩn ꞌbɔꞌɔ ti ꞌɩn ꞌke ꞌle aꞌba ꞌꞌklumʋ yi -a ꞌke ꞌꞌyigbeyi tidede ꞌle ꞌɩn ꞌke amʋ dɩ -bodɩ ꞌmʋ-za ꞌle ꞌɩn ꞌke ꞌan dɩꞌa ꞌmʋzasʋ ꞌꞌyizizia. ꞌTraamʋ ꞌtɔ ɔ, ɛ -maꞌa-a ꞌɩnmʋ wɔnti, lɛ ꞌɩn ꞌka ꞌbho aꞌba damʋ ꞌmʋ-za a, ꞌɩn se ɛ ꞌbhle!
*Agaa -ke *Salaaꞌa ꞌꞌkpiꞌa ꞌꞌyi
21A-bʋ nyʋ-ʋ ꞌpɛɛꞌɛ aꞌba ꞌꞌbhiꞌa ꞌmʋtikukuɛ ꞌmʋ ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi, a ꞌtmʋʋ ꞌɩnmʋ, -ka ꞌɔ gba -lue ꞌmnɛ ꞌlɛꞌɛ, aꞌba ꞌwɩn ɩ ꞌbɔꞌɔ? 22Ɩ ꞌcnɩ-ɛꞌɛ-ɛ ꞌle ꞌɔ ꞌꞌbɔgʋ ꞌli, ɩ na: *Ablaamʋ ꞌbhle-e ꞌnynʋkpakpɩ ꞌsɔn. Ɔ -ke ꞌɔ ꞌgeyiɛnynaakpʋ *Agaa ꞌwlʋ-o ꞌꞌyunyukpasu ꞌle ɔ -ke ꞌɔ ꞌꞌyiglɛnynɔ *Salaa ꞌwlʋꞌo ꞌꞌyunyukpasu -lrɛɛ. 23ꞌꞌYu ꞌɔ ꞌgeyiɛnynaakpʋ ꞌwlʋꞌa a, ꞌwa ꞌꞌbhiꞌa -tɔɔcɛyu moꞌo. Ɛ -se -Lagɔꞌɔ ꞌgwlʋdɩ -ko. ꞌꞌYu ꞌɔ ꞌꞌyiglɛnynɔ ꞌwlʋꞌa a, -da ɔ -seeꞌa ꞌwlʋ ke a, -ka -Lagɔꞌɔ ꞌꞌbhuo -zaꞌa ꞌɔ ꞌꞌkpidɩ Ablaamʋ -bodɩ ꞌmʋ ꞌtɩn, ꞌka-a ɔ ꞌwlʋꞌo. 24-25A -gblee, Ablaamʋꞌa ꞌnynʋkpakpɩ ꞌsɔnꞌɔ dɩ -nɩɩ -tɛꞌɛ ꞌmʋ-ɛ: -Bho nyɔ ꞌke ɩ ꞌmʋtiꞌwɔn, ꞌꞌlemnɩɩ nyɔ ꞌke ɩ lɩ likpʋkpa moꞌo. Ʋ-bʋ ꞌnynʋkpakpɩ ꞌmnʋ, ꞌwa ꞌꞌkpidɩ kɔɔꞌɔ-ɔ *-ybhɛybhɛtiteꞌa kpɛ ꞌsɔn. Trɩ ʋn-ʋ ꞌlaꞌa *Sinayi -ɛ -nɩꞌa ꞌle Alabiibhlʋkpa ꞌꞌkpi, ꞌle ꞌɛ ꞌꞌkpi, -ybhɛybhɛtite -Lagɔ -ke *Moyiizɩ bhlaꞌa ꞌle ɔ ꞌye Moyiizɩ *ꞌɔ gbaꞌa -klugba ꞌꞌnyɩ, tite ꞌmnɛ -ke Agaa, ꞌɔ ꞌgeyiɛnynaakpʋ ꞌmnʋꞌa dɩ gʋgɔꞌɔ ꞌꞌyiti. Ʋn kɔɔꞌɔ-ɔ ꞌtraamʋꞌa *ꞌZuifʋ ꞌꞌweꞌa ꞌmʋybhɛgwlɔ Zelizalɛɛmʋ -lrɛɛ. Ʋ-bʋ ꞌZuifʋꞌa -dadudu-u ꞌpɛɛ-ɛ ꞌwa ꞌꞌbhiꞌa ꞌmʋtikukuɛ ꞌmʋ ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. Nyʋ-ʋ nʋꞌa -kaa a, ʋn kɔkɔɔꞌɔ-ɔ Agaaꞌa ꞌꞌyu. -Ka ʋn ꞌwlʋ -nɩ ꞌnɔ ꞌle ꞌgeyikpaankwla ꞌzɔ ꞌle ɔ ꞌyeꞌa ꞌgeyiɛyu ꞌꞌdu a, ꞌka ꞌmnɔ, nyʋ ꞌmnʋ, -Lagɔꞌɔ gba-a kɔ ꞌnʋ ꞌꞌlru ꞌmʋ ꞌle ɛ-ɛ kpʋn ꞌʋ ꞌgeyiɛ ꞌmʋ. 26Ɛ -nɩꞌa -kaa ꞌmʋ, Ablaamʋꞌa ꞌꞌyiglɛnynɔ Salaaꞌa ꞌꞌkpidɩ kɔɔꞌɔ-ɔ -Lagɔꞌɔ ꞌꞌyiflɔnyʋꞌa -gwlɔ -nɩꞌa ꞌle yaku ꞌli, ʋn-ʋ ꞌlaꞌa yakuꞌa Zelizalɛɛmʋ. ꞌƖnnɛ ꞌmo-o -abʋ-aꞌa ꞌmʋybhɛgwlɔ. Ɛ se ꞌꞌlru ꞌmʋ -kɔ-ɛ. 27A -gblee, ꞌɛ ꞌꞌkpidɩ -Lagɔꞌɔ wluꞌa ꞌmʋtizayi *Ezayii ꞌcnɩꞌa ꞌle -Lagɔbɔgʋ ꞌli, ꞌɩnnɛ ꞌka-a:
Zelizalɛɛmʋ kɔɔꞌɔ -ka ꞌnynaakpʋ-ʋ -seeꞌa ꞌꞌyu ꞌwlʋ ꞌle -ʋ -seeꞌa -nɩgblaaꞌa ꞌgwlʋlicɛɛ wɔnꞌye, ꞌbhoꞌa nyʋ li ꞌbʋbʋa tenyɩ! A -gblee, ɛ kɔɔꞌɔ-ɔ ꞌnynaakpʋ ꞌwa nyimiɛ poꞌa ti ꞌle -nɔɔ -lrɛɛ ꞌli ꞌle nyaka ꞌwa ꞌꞌyreetɩ-ɩ ꞌye dɩkmanynɔꞌɔ nʋ ꞌmʋ-zi mʋ.
28A-a ꞌye-e liꞌa, ꞌan ꞌlotʋꞌa ꞌꞌnynuu-a, -ka -Lagɔꞌɔ ꞌꞌbhuo ꞌꞌduꞌa Ablaamʋ wlu wɔn ꞌmʋti ɔ -ke Salaa-a ꞌyeꞌa ꞌꞌyunyukpasu *Izaakɩ ꞌwlʋ mʋ ꞌle ꞌya ꞌꞌyriꞌa ꞌbɩ ꞌyeꞌa ꞌwlʋ a, ꞌka ꞌmnɔ ꞌka-a a -nɩꞌo. ꞌƐ dɩ a ꞌꞌduꞌo -Lagɔꞌɔ ꞌꞌyreetɩzɩgɩ. 29ꞌLe -lrɛɛke, -ka Ablaamʋ -ke Agaa ꞌwlʋꞌa ꞌwa -tɔɔcɛyu, ꞌle, ꞌꞌyu ɔ -ke Salaa ꞌwlʋꞌa ꞌle *-Lagɔꞌɔ Lisaazuzuꞌa ꞌgwlʋdɩ ꞌmʋ, ꞌle Agaaꞌa ꞌꞌyu ꞌyeꞌa Salaaꞌa nɔ nyanɩ ꞌmʋ kla a, -ka -lue ꞌmnɔ, ꞌka-a ꞌɛ lɛtu -nɩꞌe ꞌtraamʋ. Nyʋ-ʋ ꞌpɛɛꞌɛ ꞌwa ꞌꞌbhiꞌa ꞌmʋtikukuɛ ꞌmʋ, ꞌɩnnʋ klaꞌa nyʋ-ʋ ꞌpɛɛꞌɛ -Lagɔꞌɔ Lisaazuzuꞌa wɔnkuɛ ꞌmʋ nyanɩ ꞌmʋ. 30ꞌBho ꞌɛ ꞌꞌkpi a, ɩ ꞌcnɩ-ɛꞌɛ-ɛ ꞌle -Lagɔbɔgʋ ꞌli:
Ablaamʋ, -za ꞌgeyiɛnynɔ -ke ꞌwa ꞌꞌyu ꞌkwla, -ɛkedɩmaa, ꞌgeyiɛyu se ꞌbhɛɛ ɔ ꞌke ꞌɔ -tɩtaꞌa lɩ ꞌꞌkpi -zi, ꞌle ɔ -ke ꞌꞌyiglɛnynɔꞌɔ ꞌꞌyu -see lɩ ꞌgble yi -lrɛɛ! Ɔ-bɔ ꞌꞌyuzɛgɛ ꞌmnɔ, ꞌɩnnɔ zi ꞌnɩ ꞌꞌkpi.
31ꞌKa-a ɩ -nɩꞌe ꞌmʋꞌa dɩ, ꞌan ꞌlotʋꞌa ꞌꞌnynuu-a, -abʋ kɔɔꞌɔ ꞌꞌyiglɛnynaakpʋꞌa ꞌꞌyu. -A se kɔɔ ꞌgeyiɛnynaakpʋꞌa ꞌꞌyu.
51A -gblee, -a ꞌke ꞌꞌyiflɔmʋ ꞌꞌdu moꞌo. ꞌƖnnɛ ꞌbhleꞌe ꞌnynɩꞌa dɩ *Zezii *Kliisɩ zetieꞌe -amʋ ꞌle -aꞌba ꞌꞌbhiꞌa ꞌmʋtikukuɛꞌɛ ꞌmʋpɛɛɛ ꞌmʋ ꞌle -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. -A po ꞌle ꞌkpɩ ꞌle -a ꞌke ꞌle ꞌꞌyiflɔɛ ꞌmnɛ ꞌli ti-de. Aꞌba ꞌwɔn nyɔꞌɔ -kɔ amʋ ꞌꞌlru ꞌmʋ -le -lrɛɛ ꞌle lɛꞌꞌo lɛ ꞌmʋ.
A -de ꞌle ꞌꞌyiflɔɛ ꞌli ti
2ꞌƖnmɔ ꞌPɔlʋ, ꞌɩn-ɩ ꞌtmʋʋꞌo amʋ-ɛ, na: -Bho a -ka klɛmʋmuɛ ꞌmʋ-ʋ ꞌpɛɛ ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi a, ꞌꞌlemnɩɩ, lbhʋ Zezii Kliisɩ nʋꞌa amʋ -bodɩ, ɛ kɔɔꞌɔ-ɔ lɛ-ɛ se ꞌkɩ ꞌbhɛɛ ɛ ꞌke -nʋ-ɛ. 3A ꞌꞌdu aꞌba ꞌꞌbhi ꞌꞌyrili -lrɛɛ, nyɔꞌꞌo nyɔ-ɔ ꞌpɛɛꞌɛ klɛmʋmuɛ ꞌmʋ ꞌle ɔ ꞌke ꞌꞌyisrɛɛyi ꞌꞌdu ꞌbho -Lagɔꞌɔ ꞌꞌyigbeyi, ꞌɔ nyɔtu nʋꞌa -kaa a, ɔ-ɔ ꞌyi-e ꞌle *-Lagɔꞌɔ gbaꞌa ꞌꞌyikpʋɛnꞌɛ -belu ꞌzɔ leꞌa dɩ, ꞌꞌlemnɩɩ ɔ -kpʋn -Lagɔꞌɔ gba ꞌꞌyi ꞌwee! 4A-a ꞌye-e liꞌa, a-bʋ nyʋ-ʋ popoꞌa ꞌgwlʋti, -bho a ꞌpɛɛ aꞌba ꞌꞌbhiꞌa ꞌmʋtikukuɛ ꞌmʋ, ꞌꞌlemnɩɩ a-a ꞌꞌdu ꞌko-o ꞌꞌyisrɛɛmʋ ꞌbho -Lagɔꞌɔ ꞌꞌyigbeyi, a -ke *Zezii *Kliisɩ se ꞌtɔ ꞌꞌyiꞌꞌsisri, lbhʋ ɔ nʋꞌa amʋ -bodɩ, a -tbhɛ ꞌnɛ-ɛ ꞌꞌkpi ꞌle ɛ se ꞌtɔ ꞌbhɛɛ ɛ ꞌke amʋ -kpa. 5Ɛ -nɩꞌa -kaa ꞌmʋ a, -a-bʋ -yʋ deꞌa Zezii Kliisɩ ꞌꞌgwli, ꞌɛ dɩ -a -de ꞌnɔ -pɔlʋ ꞌꞌyi ꞌle ꞌbʋbʋa ꞌmʋ ꞌle *-Lagɔꞌɔ Lisaazuzu-u kpaꞌa -amʋ ꞌle -a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi. 6A -gblee, -bho nyɔ -ke Zezii Kliisɩ ꞌꞌsisri ꞌꞌyi, -bho ɔ mu *klɛ ꞌmʋ, -bho ɔ se klɛ ꞌmʋ mu, ꞌɛ -nyna nyɔ ka. Lɛ-ɛ ꞌma-a -zɛgɛ, ꞌɩnnɛ ꞌmo-o -a ꞌde -ɔ ꞌꞌgwli. -Ka -a de ꞌɔ ꞌꞌgwli, -aꞌba -bonyunyuꞌa dɩkmɛɛ-ɛ tɔꞌɔ ꞌna ꞌle -a kɩkmaꞌa -kɩkma dɩ.
7-Tanyɩ ꞌkɩ, aꞌba kpli ꞌsrɛɛꞌɛ-ɛ ꞌꞌyi ꞌbho -Lagɔꞌɔ -jeyi. Yɔɔ ꞌꞌmaaꞌa amʋ ꞌle a ꞌye -ziadɩꞌa -jolʋ ꞌꞌyriliꞌꞌsakaꞌa? 8-Lagɔ ꞌlaꞌa amʋ ꞌle a ꞌyeꞌa ꞌɔ nyʋ ꞌꞌdu, ɔbɔ -see amʋ -kaa nʋ. 9A-a ꞌye-e liꞌa, -ka ꞌꞌflɔɔꞌɔ ꞌꞌbuubuulɛtoope-e ꞌꞌbu nɩꞌa lɩ tenyɩ a, ꞌka-a ꞌꞌnyinynitɔtɔlɩꞌa -toope gbɛ ꞌbhɛɛꞌo ɛ ꞌke nyʋꞌa -dadudu ꞌbho -Lagɔꞌɔ -jeyi -za. 10Ɛ -nɩꞌa -kaa ꞌmʋ a, a-bee -mnʋʋ -ke -aꞌba -Kɔyi Zezii ꞌꞌsisriꞌe-e ꞌꞌyiꞌa dɩ, ꞌan -pɔlʋ se ꞌbhɛɛ ɛ ꞌke ꞌsɔn ꞌmʋ ꞌwlʋʋ ꞌbho amʋ ꞌꞌkpi. ꞌƖn yiboꞌo-o -ka ꞌɩn-ɩ popoꞌa ꞌgwlʋti, ꞌka-a abʋ ꞌke ꞌgwlʋtipopo -lrɛɛ, ꞌle, nyɔ -yɔ ꞌꞌmaaꞌa amʋ, -bho koo ɔ -nɩ, -Lagɔꞌɔ -zigle-e ꞌye ɔ -kpʋn mʋ.
11ꞌAn ꞌlotʋꞌa ꞌꞌnynuu-a, -bho ꞌɩn nʋ ꞌkɩ nyʋ mu klɛ ꞌmʋ ꞌle ʋn ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi a, ꞌꞌlemnɩɩ koo -ke dɩ nyʋ-ʋ klaꞌa ꞌtɔ ꞌɩnmʋ nyanɩ ꞌmʋ ꞌbho ɛbɛ-ɛꞌɛ ꞌꞌkpiꞌa? -Bho ꞌan wlu -ke ꞌwa nɛ ꞌbhɛɛ ꞌkɩ, ʋn -see ꞌkɩ ꞌɩnmʋ ꞌcɛ kwa -po yi. -Ka Zezii Kliisɩ ꞌmɛ -nɩꞌa ꞌbho nyʋyrilbhaatu ꞌꞌyri, ꞌɔ ꞌmɛmɛɛ ꞌmnɛ, ꞌɩnnɛ ꞌke nyʋ ꞌꞌyisrɛɛmʋ po ꞌbho -Lagɔꞌɔ ꞌꞌyigbeyi. ꞌƖnnɛ ꞌɩn-ɩ tɔꞌɔ nyʋ: -ɛ -ke dɩ ʋn-ʋ poꞌa ꞌɩnmʋ ꞌcɛ kwa, ꞌɩnnɛ ꞌka-a! 12Nyʋ ꞌmnʋ -yʋ ꞌꞌmaaꞌa amʋ, -bho ʋn nʋ a mu klɛ ꞌmʋ ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi a, ꞌle ꞌmna gbo, -bho ʋn ꞌbɔ ti, ʋn wʋwa, klɛ -se lɛ -ko!
13A-bee -mnʋʋ a, ꞌlotʋꞌa ꞌꞌnynuu-a, -Lagɔ ꞌlaꞌa amʋ-ɛ ꞌle a ꞌke ꞌꞌyiflɔnyʋ ꞌꞌdu. Aꞌba ꞌꞌyiflɔɛ ꞌmnɛ, a -de ꞌle ɛ ꞌli ti, aꞌba ꞌnɛ ɛ ꞌꞌyi ꞌle aꞌba nʋ ꞌꞌnyinynidɩ -le! ꞌBho ꞌɛ lemʋ, a kɩkma dɩ ꞌle a ꞌke kpʋkpa! 14A -gblee, lɛ-ɛ ꞌbhleꞌa -Lagɔꞌɔ gba ꞌꞌlru kwa, ꞌɩnnɛ ꞌmo-o, -ka -ɩn -kmaꞌa -aꞌa ꞌꞌbhuoꞌa dɩ, -kma -kaa -aꞌa -bonyunyɔꞌɔ dɩ! 15A ꞌꞌdu aꞌba ꞌꞌbhi ꞌꞌyrili! Nmi-i vɔꞌɔ ꞌle ɩ-ɩ ninmuꞌa a, -bho aꞌba kpli -ke ꞌya kpli gʋgɔ ɔ, ꞌꞌlemnɩɩ a-a ꞌye-e ꞌkpɩ ꞌꞌyitiwʋwa -mʋ.
*-Lagɔꞌɔ Lisaazuzuꞌa -jolʋgbopoɛ
16ꞌƐ dɩ, ꞌɩn-ɩ ꞌtmʋʋꞌo amʋ-ɛ, a ꞌꞌtayi *-Lagɔꞌɔ Lisaazuzu ꞌꞌyiti ꞌle ɔ ꞌke amʋ -jolʋ gbo po ꞌle aꞌba tinɩɛ ꞌmʋ! -Bho ɛ -nɩ -kaa a, ꞌꞌlemnɩɩ ꞌꞌnyinynilɩ a -ybhɛꞌɛ ꞌmʋ, a -see ɩ -nʋ yi. 17A -gblee, ꞌꞌnyinynilɩ nyunyɔ -ybhɛꞌɛ ꞌmʋ -ke lɩzɩgɩ -Lagɔꞌɔ Lisaazuzu -ybhɛꞌɛ ꞌmʋ, ɩ-ɩ ꞌvɔ-ɔ tʋ, ꞌle, lɩzɩgɩ -Lagɔꞌɔ Lisaazuzu -ybhɛꞌɛ ꞌmʋ -ke ꞌꞌnyinynilɩ nyunyɔ -ybhɛꞌɛ ꞌmʋ, ɩ -se lɛ -lue -ko. Ɩ -nɩ ꞌsɔnꞌɔ wlu sʋsɔꞌɔ-ɔ li. Ɛbɛ ꞌmnɛ, ꞌɩnnɛ nʋ ɛꞌo, ꞌle, lɩ ꞌwee aꞌba ꞌgwlʋ -nɩꞌa ꞌꞌyi, a se ꞌya nʋnʋa ꞌbhɛɛ. 18A ꞌye li-ɔ, -bho -Lagɔꞌɔ Lisaazuzu -ka amʋ -jolʋ gbo-o po, ꞌꞌlemnɩɩ, -ka a ꞌpɛɛꞌɛ aꞌba ꞌꞌbhiꞌa ꞌmʋtikukuɛ ꞌmʋ ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi, ɛ -see ꞌtɔ amʋ ꞌꞌlru ꞌmʋ -kɔ yi.
19ꞌꞌNyinynilɩ -nɩꞌa ꞌle nyunyɔꞌɔ -pɔlʋ gbo, ɩ-ɩ ꞌꞌtuu nɔ-oꞌo ꞌle ꞌɔ ꞌꞌnyinynikpli-i ꞌkpaꞌa ꞌꞌpiemʋ. Ɩ-bɩ ꞌꞌnyinynilɩ ꞌmnɩ, ꞌɩnnɩ ꞌka-a: Nyʋ-ʋ popo-o ꞌꞌnyinynika ꞌgwlʋti ꞌle ʋn-ʋ ꞌꞌwɩlɩꞌo, ʋn-ʋ nʋꞌo -ganɩlbhakpli. 20Ʋn-ʋ bʋbɔ-ɔ kɔkui ꞌle ʋn-ʋ deꞌe ꞌle gupoɛ ꞌli ti, ꞌwa nyɔtu-u ꞌnyɩnyɛꞌɛ ꞌmʋ ꞌle ʋn-ʋ jɛꞌo, ʋn ꞌbhle-e ꞌꞌmʋnynɩ, tɔlʋ ꞌbhle-e ꞌcɛ ꞌmna ꞌꞌyi ꞌle -lrʋʋ-ʋ poꞌo ꞌcɛ; ʋn-ʋ mumu-o li ꞌle ʋn ꞌke lɛ ꞌmʋ -zɛ, ʋn ꞌbhle-e cɛklɩcɛ, ʋn se -ybhɛ. 21Ʋn-ʋ ꞌmɩɩ-e ꞌꞌyri ꞌbho ʋn -bonyunyuꞌa lɩ ꞌꞌkpi, nmɔ-ɔ ꞌkpʋn -ʋ ꞌgeyiɛ ꞌmʋ, ꞌle lilia-a zi ʋꞌo, ʋn-ʋ ꞌnʋ-o -klaabolɩ -lrɩɩ. ꞌƖn ꞌwɩ -ɩ amʋ ꞌꞌyiti -tanyɩ, ꞌle ꞌtraamʋ ꞌtɔ ꞌɩn-ɩ ꞌmu-o ꞌbho le; nyʋ-ʋ nʋꞌa -kaa a, ʋn -see -Lagɔ ꞌꞌyitiꞌꞌtayi ɔ ꞌke ʋ -kɔ.
22ꞌBho ꞌɛ lemʋ, ꞌꞌyrilinmɔlɩzɩgɩ -Lagɔꞌɔ Lisaazuzu-u poꞌa ꞌle nyunyɔꞌɔ -pɔlʋ gbo, ɩ-ɩ ꞌꞌtuu nɔ-oꞌo ꞌle ꞌɔ kplizɩgɩ-ɩ ꞌkpaꞌa ꞌꞌpiemʋ, ɩ kɔkɔɔꞌɔ-ɔ ꞌmɩɩmɩɩtuꞌa ꞌꞌbhuo. ꞌꞌYrilinmɔlɩzɩgɩ ꞌmnɩ, ꞌɩnnɩ ꞌka-a: -Lagɔꞌɔ Lisaazuzu-u ꞌya-a dɩkmɛɛ ꞌle nyunyɔꞌɔ -pɔlʋ gbo, ʋn-ʋ ꞌli-e ꞌbʋbʋa ꞌle ꞌwa -pɔlʋ-ʋ bhluꞌo. Ʋn ꞌku-o ꞌꞌgwli ꞌle ꞌwa ꞌlimʋ -nmɔꞌɔ wɔn ꞌle ʋn -nmɔꞌɔ ꞌgwlʋti ꞌle ꞌwa -cna dɩ li. 23Ʋn -nmɔꞌɔ-ɔ kpli ꞌmʋ ꞌle ʋn-ʋ ꞌbhɛɛꞌɛ wa ꞌꞌbhi wɔnyi. Nyʋ-ʋ nʋꞌa ꞌya lɩtu, ʋn -ke *-Lagɔꞌɔ gba -ybhɛꞌo. 24Nyʋ-ʋ ꞌma-a *Zezii *Kliisɩꞌa nyʋ, ꞌꞌnyinyninaagɩ ʋn-ʋ poꞌa -ke ꞌꞌnyinynikpli ʋn-ʋ nʋꞌa -tanyɩ, ʋn ꞌbhɔ-ɔ ꞌya dɩ. Ɩ kɔɔꞌɔ-ɔ -ka ʋn ꞌgbaaꞌa ka ꞌꞌnyinynilɩ ꞌmnɩ Zezii ꞌle ʋn ꞌye ɔ ꞌbho nyʋyrilbhaatu ꞌꞌyri kɔ, ꞌle ɔ -ke ɩ ꞌyeꞌa ꞌmɛ.
25-Lagɔꞌɔ Lisaazuzu, ꞌɩnnɔ ꞌꞌnyɩꞌe -amʋ tinɩɛzɛgɛ. ꞌKa-a ɛ -nɩꞌe ꞌmʋꞌa dɩ, -a ꞌꞌtayi nɔ ꞌꞌyiti ɔ ꞌke -amʋ -jolʋ gbo po ꞌle -aꞌba tinɩɛ ꞌmʋ! 26-Aꞌba ꞌbhɛɛ -aꞌba ꞌꞌbhi ꞌꞌyi -le, -aꞌba tɩtbha -tɩtbha ꞌcɛ -le, -aꞌba nʋnʋ ꞌꞌmʋnynɩ -bodɩ -le!
6A kpʋkpa
1ꞌLotʋꞌa ꞌꞌnynuu-a, -bho nyɔ -ka ꞌꞌnyinynidɩ-ɩ nʋ ꞌle a ꞌke ɔ ꞌꞌkpi ꞌdaa, a-bʋ *-Lagɔꞌɔ Lisaazuzu-u poꞌa -jolʋ gbo a, a ꞌꞌdu ɔ ꞌꞌdɩ ꞌmʋ ꞌle ɔ ꞌke ꞌbho -jolʋzɛgɛ ꞌꞌyi le yi! -Bho a ꞌke ꞌɛ lɛtu nʋ a, a -nʋ -nɩ nɛ ꞌle ꞌlimʋꞌa wɔnnmɔɛ ꞌmʋ! Aꞌba nyɔꞌꞌo nyɔ ꞌɩn-ɩ ꞌtmʋʋꞌo, a ꞌꞌdu aꞌba ꞌꞌbhi ꞌꞌyrili ꞌle aꞌba ꞌꞌbhi -kaa ꞌꞌnyinynidɩ nʋ -lrɛɛ! 2-Bho nyɔ -ka sɩa -ka kwakugbɛ paꞌa nyɔ, a -kpa nɔ! ꞌƖnnɛ ꞌmo-o, a kpʋkpa ꞌle a ꞌke sɩasɩaaꞌa ꞌgbɛ ꞌꞌlru zɩza! -Bho a nʋ -kaa, ꞌꞌlemnɩɩ a-a ꞌꞌdu-o ꞌbho *Zezii *Kliisɩꞌa wlu. 3ꞌLe ꞌbho ꞌɛ ꞌꞌkpi, -bho nyɔ -ka ꞌɔ ꞌꞌbhuo -klagba-a ꞌla, -bho ɔ se -kaa -nɩ a, ɔ-ɔ ꞌpo-o ꞌɔ ꞌꞌbhuo -dugba li. 4Nyɔꞌꞌo nyɔ ꞌcrɛ ꞌɔ ꞌꞌbhuo ꞌmʋti, -bho ꞌɔ kpli ꞌꞌdu -zɛgɛ ꞌle ɔ ꞌke ɩ yibo! -Bho ɔ ꞌye -zɛgɛ ꞌɔ ꞌꞌbhuo ꞌmʋ li ꞌle ɔ ꞌke ꞌbʋbʋa li ꞌɔ kplizɩgɩꞌa dɩ. Ɛ -se ꞌɔ -bonyunyɔ ɔ -zi ꞌmʋꞌa ꞌbʋbʋa ɔ ꞌke li -ko. 5Lbhʋ -Lagɔ ꞌꞌnyɩꞌa -amʋ, nyɔꞌꞌo nyɔ-ɔ ꞌye-e ꞌɛ kuna -po -mʋ.
6A -gblee, nyɔ -yɔ ꞌcɩanꞌa -Lagɔwlu, nyɔ-ɔ tɔ ꞌnɔ ɔ, ꞌɔ lɩzɩgɩ ɔ ꞌbhleꞌa, ɔ -ke ɔ ꞌgble ɩ ꞌmʋ!
7ꞌBho ꞌɛ le a, aꞌba ꞌꞌdu aꞌba ꞌꞌbhi ꞌgwlʋꞌa ꞌꞌyikuna -le! Nyɔꞌɔ ꞌcɩsɛ -Lagɔ -le! ꞌƖnmɔ ꞌlɛꞌɛ ꞌna a, lɛ ꞌɩn ꞌka ꞌbho ꞌꞌdu, ꞌɩnnɛ ꞌka-a: Lɛ nyɔ-ɔ loꞌa, ꞌɛ ꞌꞌbhi ɔ-ɔ zaꞌo. 8ꞌƐ ꞌzɔ ꞌka-a: Nyɔ -yɔ ꞌꞌluoꞌa ꞌɔ tinɩɛ ꞌwee ꞌmʋ, ꞌle, ꞌꞌnyinynidɩ ꞌɔ ꞌgwlʋ -nɩꞌa ꞌꞌyi, ɔ ꞌke ɩ nʋ a, lɛ ɔ ꞌka ꞌye, ꞌɩnnɛ ꞌmo-o ꞌmɛmɛɛ ꞌbho -Lagɔꞌɔ ꞌꞌyigbeyi. ꞌBho ꞌɛ lemʋ, -bho nyɔ ꞌꞌluo ꞌɔ tinɩɛ ꞌwee ꞌmʋ ꞌle ɔ ꞌke -Lagɔꞌɔ Lisaazuzuꞌa ꞌgwlʋdɩ nʋ a, ꞌꞌkɔgwlɛtinɩɛ ɔ-ɔ ꞌꞌnyɩ ɔꞌo. 9ꞌKa-a ɛ -nɩꞌe ꞌmʋꞌa dɩ, -aꞌba sɩa -zɛgɛꞌɛ nʋnʋa ꞌmʋ -le! ꞌLe, -bho ꞌkpɩ -see -amʋ ꞌꞌyiti-wa a, ꞌle -a ꞌke ꞌkpa ꞌꞌyi ku, -a ꞌke -zɛgɛ nʋ a, ꞌꞌlemnɩɩ, -nɔɔ -Lagɔ ꞌꞌduꞌa a, ꞌbho ɛ ti -a ꞌye-e -zɛgɛ ꞌye -mʋ. 10ꞌƖnnɛ ꞌbhleꞌe ꞌnynɩꞌa dɩ a, -da -a ꞌbhle -nɩꞌa ꞌꞌyiflɔnɔɔ, -a nʋ nyʋ ꞌwee -zɛgɛ -bodɩ! Nyʋ -ke -a plɛꞌɛ ꞌbho Zeziiꞌa -glɩgba -lue wɔnyi, -aꞌba -sie ʋ ti -le -lrɛɛ!
ꞌPɔlʋꞌa gbɔmʋbhɔɔwlu -ke ꞌɔ ꞌyeyewlu
11A ꞌye li-ɔ, ꞌtraamʋ ꞌɩn-ɩ ꞌcnɩꞌe aꞌba -jeyipobɔgʋ. -Ka ꞌɩn-ɩ ꞌbhɛɛꞌɛ ꞌan ꞌcnɩyri ꞌꞌyi, a -gbʋ -kaa ya! ꞌAn ꞌꞌbhuoꞌa ꞌꞌyiglɛkʋta ꞌcnɩ ɩꞌo.
12A -gblee, nyʋ-ʋ kpʋnꞌa amʋ -glaka ʋn-ʋ nʋꞌa a mu *klɛ ꞌmʋ ke-ɔ ꞌle a ꞌke ꞌꞌyisrɛɛmʋ ꞌꞌdu ꞌbho -Lagɔꞌɔ ꞌꞌyigbeyi a, nyunyuꞌa ꞌtʋnʋdɩ ʋn-ʋ ꞌbɔꞌɔ ti. ꞌLe, -bho ʋn na ꞌkɩ, *Zezii *Kliisɩꞌa ꞌmɛmɛɛ-ɛ poꞌo nyɔ ꞌꞌyisrɛɛyi ꞌbho -Lagɔꞌɔ ꞌꞌyigbeyi a, ꞌꞌlemnɩɩ nyʋ-ʋ klʋ ʋ ꞌko-o nyanɩ ꞌmʋ, ꞌɛ -fanʋ ʋn ꞌbhleꞌe ku ꞌmʋti ꞌle ꞌwa ꞌwɔɔn nɩꞌo. 13Ʋ-bʋ nyʋ-ʋ ꞌbɔꞌɔ ti a ꞌke klɛ ꞌmʋ -kpɛ ɛ, ʋ-bee -mnʋʋꞌa ꞌꞌbhiꞌa -kpʋn -Lagɔꞌɔ gba ꞌꞌyi, ꞌle ʋn ꞌbɔꞌɔ ti a ꞌke klɛ ꞌmʋ mu, ꞌle, -ka ʋn ꞌka amʋ -jrɛɛ ku li kpa ꞌkɩ ꞌle ꞌɛ fanɩ ꞌka amʋ ꞌli -nɩ, ʋn ꞌke ꞌwa ꞌꞌbhi ꞌꞌyiꞌbhɛɛ ꞌɛ dɩ. 14ꞌLe ꞌmna -bodɩ a, ꞌan ꞌꞌplin, ꞌan po lɛ -lrɛɛ ꞌmʋ, -bho ɛ -se Zezii Kliisɩ ꞌmɛ -nɩꞌa ꞌbho nyʋyrilbhaatu ꞌꞌyriꞌa ꞌꞌsɛ. ꞌƆ ꞌmɛmɛɛꞌɛ dɩ a, -bho ꞌɩn -gbʋ ꞌkmʋ ꞌmʋꞌa lɩ ya, ꞌle ꞌmna gbo ɩ kɔɔꞌɔ bhebhelɩ. -Bho ɩ ꞌbɔ ti ɩ ꞌke ꞌɩnmʋ -bodɩ yi, ꞌle ɩbɩ -bodɩ ꞌɩn kɔɔꞌɔ-ɔ ꞌmɛmɛyi. 15ꞌƖn-ɩ ꞌtmʋʋꞌo amʋ-ɛ ꞌtɔ, -bho nyɔ mu klɛ ꞌmʋ o, -bho nyɔ -see klɛ ꞌmʋ mu o, ꞌɛ -nyna nyɔ ka. Lɛklagba-a ꞌma-a -zɛgɛ, ꞌɩnnɛ ꞌmo-o nyunyɔꞌɔ tinɩɛ ꞌke -lre ꞌmʋ le yi. 16Nyʋ ꞌwee naꞌa ꞌbho -jolʋlre ꞌmnɛ ꞌꞌyi a, ʋn-ʋ ꞌmo-o -Lagɔꞌɔ nyʋzɩgɩ ꞌle ʋn ꞌꞌduꞌo *Izrayɛɛlɩkɔmʋzɩgɩ. -Lagɔꞌɔ ꞌꞌbhuo ꞌꞌnyɩ ʋ -pɔlʋꞌa bhlubhlua ꞌle ɔ ꞌke ʋ -zɛgɛ -bodɩ nʋ!
17-Ɛ ꞌwlʋꞌa -daa -zɩannamʋ, nyɔꞌɔ -sɩa -nɩ ꞌɩnmʋ -le, -ɛkedɩmaa, -ka ꞌɩn ꞌꞌduꞌa Zeziiꞌa nyɔ, ꞌlbhalbhafanɩ ꞌɩn ꞌbhleꞌa ku li a, ꞌɩnnɩ tɔꞌɔ ꞌna!
18ꞌAn ꞌlotʋꞌa ꞌꞌnynuu-a, -aꞌba -Kɔyi Zezii Kliisɩ -wʋnna amʋ ꞌꞌniti! *Ɩ -nɩ -kaa ꞌmʋ!