ꞌPɔlʋꞌa ꞌꞌbɔgʋ ɔ poꞌa EFƐƐZƖKƆMƲ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Efɛɛzɩkɔmʋ ꞌma-a Zeziiꞌa nyʋ, ꞌɩnnʋ ꞌɔ -dalbhoyi ꞌPɔlʋ poꞌo ꞌꞌbɔgʋ -nɛɛ -jeyi. -Ka Zezii -kɔꞌɔ lɛꞌꞌo lɛ, ꞌɩnnɛ ɔ-ɔ triꞌe -jiɛ ꞌꞌkpiti. -Bho -a ꞌꞌdu ꞌZuifʋ o, -bho -a -se ꞌZuifʋ o, -ka ɔ nʋꞌa -amʋ -zɛgɛ ꞌꞌlruli ꞌle ɔ ꞌyeꞌa -amʋ ꞌpʋʋn a, ꞌle -aꞌba ꞌwee ꞌyeꞌa ꞌɔ -glɩgbawɔnyiꞌa nyʋ ꞌꞌdu, ꞌɩnnɩ ɔ-ɔ zaꞌa ꞌmʋ -lrɛɛ, ꞌka-a ɛ -nɩꞌe ꞌmʋꞌa dɩ, -ka -a -ke Zezii ꞌꞌsisriꞌa ꞌꞌyi, nyʋ-ʋ ꞌye ɛ -kaa -amʋ ꞌmʋ liꞌyee -nɩ mʋ.
1ꞌYewlu
1ꞌƖnmɔ, ꞌPɔlʋ, ꞌma-a *Zezii *Kliisɩꞌa -dalbhoyi ꞌle -Lagɔꞌɔ ꞌgwlʋdɩ ꞌmʋ a, a-bʋ ꞌma-a *Zezii Kliisɩ -lue ꞌmnɔꞌɔ nyʋ-ʋ de ꞌɔ ꞌꞌgwli, ꞌle -ʋ -ke ɔ ꞌꞌsisriꞌa ꞌꞌyi, -ʋ -nɩꞌa ꞌle Efɛɛzɩgwlɔ ꞌmʋ, a-bʋ ꞌɩn-ɩ poꞌo ꞌꞌbɔgʋ -jeyi.
2-Aꞌba -tɩta -Lagɔ -ke -aꞌba -Kɔyi Zezii Kliisɩ -nɩ ꞌsɔn -wʋnna amʋ ꞌꞌniti ꞌle ʋn ꞌke amʋ -pɔlʋꞌa bhlubhlua ꞌꞌnyɩ!
Nyʋ-ʋ -ke *Zezii ꞌꞌsisriꞌa ꞌꞌyi, -zɩgɩ -Lagɔ-ɔ nʋ ꞌʋ ꞌꞌlruli
3-A ꞌbhɛɛ -aꞌba -Kɔyi *Zezii *Kliisɩꞌa -tɩta -Lagɔꞌɔ ꞌnynɩ ꞌꞌyi! -A -ke Zezii Kliisɩ -lue ꞌmnɔ ꞌꞌsisriꞌe-e ꞌꞌyiꞌa kamʋ, -zɛgɛ ꞌwlʋꞌo ꞌle yaku ꞌli, ɔ ꞌye ɛ -amʋ ꞌꞌlrulinʋ.
4A -gblee, -Lagɔ -see -bhla ꞌkmʋ ti-ya ke see, ꞌle ɔ ꞌye ꞌɛ lɛtuꞌa -gɔlɩ ꞌtɛ, ɔ ꞌye -amʋ ꞌmʋꞌtɛ -a ꞌke ꞌɔ nʋ ꞌꞌdu ꞌle -a ꞌke pepe -nɩ ꞌbho ꞌɔ ꞌꞌyigbeyi. 5A ꞌye li-ɔ, ɔ -kmaꞌa-a -aꞌba dɩꞌa dɩ ɔ ꞌtɛꞌɛ -amʋ ꞌmʋ see ꞌle -a ꞌke ꞌɔ ꞌꞌyreetɩ ꞌꞌdu. Ɔ -zi -nɩꞌe-e Zezii Kliisɩ ꞌmʋ ꞌle ɔ ꞌye ꞌɛ lɛtu nʋ. Ɔ nʋꞌa -kaa a, ɛ ꞌnʋ -ɔ ꞌtʋ. 6Ɔ ꞌnʋ-o ꞌna ꞌle -a ꞌke ꞌɔ ꞌnynɩ ꞌꞌyiꞌbhɛɛ ꞌɔ ꞌlimʋꞌa wɔnnmɔɛklagbaꞌa dɩ. -A -ke ꞌɔ dɩkmayu ꞌꞌsisriꞌe-e ꞌꞌyiꞌa dɩ, ɔ nʋ ꞌɛ -amʋ ꞌꞌlruli bhubhu.
7A -gblee, ɔ ꞌbɔ-ɔ ti -a -ke ꞌɔ ꞌꞌyisisriɛ ꞌmnɛ ꞌke -nʋ-ɛꞌɛ dɩ ɔ zetie -nɩꞌe -amʋ ꞌle -aꞌba ꞌꞌnyinynidɩ ꞌmʋ ꞌbho ꞌɔ ꞌꞌyigbeyi ꞌle ɔbɔ ꞌmnɔꞌɔ ꞌmɛmɛɛ ꞌmʋ. ꞌƆ nymɔ-ɔ ꞌwlaꞌa ti, ɛ-ɛ tɔ-oꞌo na -Lagɔ ꞌbhɔ-ɔ -aꞌba ꞌꞌnyinynidɩꞌa dɩ ꞌbho ꞌɔ ꞌꞌyigbeyi. ꞌBho ꞌmnɔ ɔ, ꞌbho-o ɔ -za -nɩꞌe ꞌɔ ꞌlimʋꞌa wɔnnmɔɛklagba ꞌmnɛ -druku ꞌꞌyrili ꞌle ɔ ꞌye ɛ -amʋ ꞌꞌyi-tɔ -ka ɛ -nmɔꞌɔ ꞌꞌyrili. 8Ɔ ꞌnʋ-o -amʋ -zɛgɛ ꞌꞌlruli tenyɩtenyɩ. ꞌLe ɛ ꞌmʋ ɔ ꞌꞌnyɩ -nɩꞌe -amʋ -naagɩ ꞌle -a ꞌke ꞌɔ ꞌgwlʋdɩ ꞌmʋtiꞌwɔn. 9A -gblee, ɔ ꞌbɔ-ɔ ti -a ꞌke ꞌɔ ꞌgwlʋdɩ yibo. ꞌƐ dɩ, ꞌɛ ꞌꞌsra-a ꞌꞌzizeꞌa ꞌꞌyi -tanyɩ, ɔ -tɔ ꞌnɛ -amʋ. ꞌLe Zezii Kliisɩ ꞌmʋ, ꞌle-e ꞌɔ ꞌꞌbhuo -de -nɩꞌe ꞌɛ duo see. 10ꞌƐ ꞌꞌsra-a ꞌꞌzizeꞌa, lɛ-ɛ -ke ꞌꞌkpi ɛ ꞌka ꞌꞌlru ꞌꞌyi -jra -nɩ, ꞌɩnnɛ ꞌmo-o, -nɔɔ -Lagɔ ꞌꞌduꞌa, ɛ-ɛ ꞌye-e -nyni -mʋ ꞌle ɔ ꞌke ɛ nʋ, ꞌle, yaku ꞌli -ke ꞌnɔɔ ꞌbhlʋkpa ꞌꞌkpiꞌa lɩ ꞌwee, Zezii Kliisɩ ꞌke ꞌya ꞌꞌlrugayʋɛ ꞌꞌdu.
11-Ka -Lagɔ ꞌbɔꞌɔ ti, ꞌka-a ɔ-ɔ nʋꞌo ꞌɔ lɩ. -Ka ɛ nʋ ꞌɔ ꞌtʋ, ꞌka-a ɔ ꞌtɛꞌɛ -amʋ ꞌmʋ see ꞌle -a ꞌke ꞌɔ nʋ ꞌꞌdu. -A ꞌmo-o nyʋ -ke Zezii Kliisɩ ꞌmnɔ ꞌꞌsisriꞌa ꞌꞌyiꞌa dɩ -a -see ꞌɔ -zɛgɛ ꞌmʋ-bɔ yi. 12A -gblee, ɔ ꞌtɛꞌɛ -amʋ ꞌmʋ-ɛ, ꞌle, -a-bʋ *ꞌZuifʋ ꞌma-a nyʋ-ʋ deꞌa Zezii Kliisɩ ꞌmnɔ ꞌꞌgwliꞌa nyamna, -aꞌba dɩ nyʋ ꞌke yibo -ka ꞌɔ ꞌnynɩ ꞌbhɛꞌɛ ꞌꞌyi ꞌle ʋn ꞌke ɛ ꞌꞌyiꞌbhɛɛ.
13A-bʋ nyʋ-ʋ -seꞌa-a ꞌZuifʋ, -ka -lue ꞌmnɔ ɔ, ꞌka-a ɛ -nɩꞌe amʋ -bodɩ -lrɛɛ. -Lagɔꞌɔ ꞌꞌdɩzɩgɩ -yɩ -ke ꞌmʋ ɔ ꞌpʋʋn -nɩꞌa amʋ ꞌle aꞌba ꞌꞌnyinynidɩ ꞌmʋ, a ꞌwɩn -ɩ ꞌbɔ, ꞌle a ꞌye Zezii Kliisɩ ꞌmnɔ ꞌꞌgwlide. ꞌƐ lɛtu -nʋ-ɛꞌɛ ɛ, a -ke ɔ ꞌꞌsisriꞌe-e ꞌtɔ ꞌꞌyiꞌa dɩ ɔ poꞌo amʋ ꞌɛ ꞌmʋyibolɛ ꞌmʋ. ꞌƖnnɛ ꞌmo-o *ꞌɔ Lisaazuzu ɔ ꞌꞌduꞌa -amʋ wɔn ꞌmʋti see ɔ ꞌye ꞌɔ -amʋ ꞌꞌnyɩ. Ɛbɛ ꞌmnɛ, ꞌɩnnɛ tɔꞌɔ -ka -a ꞌꞌduꞌa ꞌɔ nʋ. 14A ꞌye li-ɔ, ꞌɔ Lisaazuzu ɔ-ɔ ꞌꞌnyɩꞌa -amʋ, -zɩgɩ ɔ ꞌka -amʋ ꞌꞌlrulinʋ, ꞌɩnnɔ ꞌmo-o ꞌya ꞌmnaꞌa ꞌꞌyitisabhlelɛ. Ɛ-bɛ -lue ꞌmnɛ-ɛ tɔ-oꞌo -ka -aꞌba ꞌpʋnpʋan -a ꞌyeꞌa ꞌbho ꞌɔ ꞌꞌyigbeyi ꞌka -amʋ ꞌmʋ ꞌꞌyi ꞌle ɛ ꞌka tiꞌpɩple. -Bho ɛ-bɛ -nɔɔ ꞌmnɛ yi a, ꞌꞌlemnɩɩ ɔ-ɔ ꞌye-e -amʋ -zɩgɩ ꞌmnɩ ꞌꞌlruli-nʋ -mʋ ꞌꞌfɩa ꞌwee. A-ba ꞌbhɛɛ ꞌɔ ꞌnynɩ ꞌꞌyi, ɔbɔ-ɔꞌɔ ꞌꞌbhuo ꞌbhɛ-ɛ ꞌꞌyi!
ꞌPɔlʋꞌa *-Lagɔꞌɔ wɔngbopowlu
15ꞌƖnnɩ ꞌbhleꞌe ꞌnynɩꞌa dɩ a, kpli a -nɩꞌa ti ꞌbho -Lagɔjeyi, ɛ ꞌnʋ-o ꞌɩnmʋ ꞌtʋꞌa dɩ ꞌɩn-ɩ poꞌo -Lagɔ ꞌsɛɛ aꞌba dɩ ꞌꞌkɔmʋ. ꞌƖn-ɩ ꞌwɔn-ɔ ꞌbɔ na, -aꞌba -Kɔyi Zeziiꞌa ꞌꞌgwlideɛ ꞌkpa-a ꞌꞌkpi ꞌle amʋ ꞌmʋ ꞌꞌkɔmʋ. ꞌƖn-ɩ ꞌwɔn-ɔ ꞌbɔ -lrɛɛ a -kmaꞌa-a Zeziiꞌa nyʋꞌa dɩ ꞌle a-a nmɔ ꞌnʋ kwa ꞌmʋti. 16ꞌƖn ꞌwɩn ꞌɩ -kaa ꞌbɔ ɔ, ꞌle ꞌan *-Lagɔꞌɔ wɔngboponamʋ aꞌba ꞌnynɩꞌa bɔ ꞌle ꞌan wɔn ꞌmʋ ꞌle ꞌɩn-ɩ poꞌo aꞌba dɩ -Lagɔ ꞌsɛɛ. 17A ꞌye li-ɔ, -Lagɔ -ke ꞌnynɩ ꞌbhɛꞌɛ ꞌꞌyi, -aꞌba -Kɔyi Zezii Kliisɩ-ɩ bʋbɔꞌɔ, ꞌɩn-ɩ bhade ꞌnɔ-ɔ li ꞌle ɔ ꞌke amʋ -naagɩ ꞌꞌnyɩ ꞌle ɔ ꞌke amʋ ꞌꞌyrikʋɩ ꞌmʋ -flɔ a ꞌke ɔ yibo -ka -zɛgɛka. 18ꞌƖn-ɩ ꞌpo -ɔ wɔn gbo ɔ ꞌke aꞌba -pɔlʋ ꞌꞌkpiꞌa ꞌꞌyri kati ꞌle ɔ ꞌke ꞌle aꞌba -pɔlʋ gbo zɔ -ya, ꞌle, lɛ -ke dɩ ɔ ꞌlaꞌa amʋ, aꞌba -pɔlʋ -deꞌa ꞌꞌyi, a ꞌke ɛ yibo ꞌle a ꞌke ɛ ꞌye. -Zɛgɛ ɔ-ɔ ꞌyeꞌa amʋ ꞌꞌlruli-nʋ mʋ, -ka ɛ -nmɔꞌɔ ꞌꞌyrili tenyɩ, ꞌɩn-ɩ ꞌpo -ɔ wɔn gbo -lrɛɛ a ꞌke ɛ yibo. -Zɛgɛ ꞌmnɛ, ɔ ꞌde -ɛ ꞌbho ti nyʋ -lrʋʋ-ʋ ꞌma-a ꞌɔ -nʋ -lrɛɛ -ke a-beeꞌa dɩ. 19ꞌƖn-ɩ bhade ꞌnɔ-ɔ li -lrɛɛ, -ka ꞌɔ wɔnkuɛ ꞌbhɛꞌɛ ꞌꞌyi, ɛ -ziꞌa lɩ ꞌwee ꞌmʋ, ꞌle, -a-bʋ de ꞌɔ ꞌꞌgwli, ɛ-ɛ nʋꞌa -amʋ lbhʋ ꞌmʋ, a ꞌke ꞌna yibo.
20Ɛ-bɛ wɔnkuɛklagba ꞌmnɛꞌɛ ꞌmʋtikukuɛ nʋ -ɛꞌo ꞌle Zezii Kliisɩ ꞌye glu -sɔ ꞌle ꞌmɛmʋꞌa ꞌꞌklumʋ ꞌle ɔ ꞌye ti-nɩ -lrɛɛ. Ɔ -sɔꞌɔ glu a, ꞌle ɛ-bɛ wɔnkuɛ ꞌmnɛ ꞌmʋ -aꞌba -tɩta -Lagɔ ꞌꞌnyɩ -nɩ ꞌnɔ -denɩ ꞌbho ꞌɔ ꞌꞌtroli ꞌle yaku ꞌli. ꞌBho-o ɔ -deꞌe ti, ꞌle ɔ -ke ɔ ꞌke lɩ ꞌwee -kɔ. 21A -gblee, ꞌbho ꞌmnɔ ɔ, -Lagɔ ꞌꞌluo ꞌnɔ-ɔ ꞌꞌyi ɔ ꞌye ɔ ꞌnynɩklagba ꞌꞌkpi po, nyʋ ꞌwee -Lagɔ ꞌmnɔ -yaꞌa ti ꞌle yaku ꞌli o, lɛꞌꞌo lɛ-ɛ ꞌbhleꞌa wɔnkuɛ, ɔ ꞌke ɩ ꞌꞌkpi -nɩ, ꞌle, -nɔɔꞌꞌo -nɔɔ ꞌliꞌa nyʋ ꞌwee, ꞌnɔɔ ꞌkmʋ ꞌmʋꞌa nʋ-e, -yɛ ꞌyeꞌa -yi mʋ -lrɛɛ, ꞌɛ nyʋ, ɔ ꞌke ꞌwa ꞌwee -kɔ. 22-23A ꞌye li-ɔ, ꞌka-a -Lagɔ ꞌꞌnyɩ ꞌɔ lɩ ꞌweeꞌa -kɔkɔɔ -jeyi -ziaka. Ɔ -nɩꞌa -kaa lɩ ꞌwee ꞌꞌkpi a, -ka nyɔꞌɔ ꞌꞌlru-u ꞌbhleꞌa ꞌɔ ꞌgblʋ kwa, -ka -lue ꞌmnɔ, ꞌka-a ɔ ꞌꞌdu ꞌɔ ꞌɔ -glɩgbaꞌa ꞌꞌlrugayʋɛ ꞌmʋ. Ɔbɔ ꞌmnɔ, -ɔ ꞌma-a lɩ ꞌweeꞌa -kɔyi, ɔ -nɩꞌe-e -da ꞌwee, ꞌle, ꞌɔ wɔnkuɛ ꞌmnɛ, ɔ-ɔ ꞌꞌnyɩ ꞌɛ ꞌɔ -glɩgba ꞌmnɛ -jeyi ꞌle ɛ-ɛ ꞌꞌyi ꞌɛ ꞌmʋ, ɛ-ɛ ꞌpɩple ꞌnɛ ꞌꞌkpi ꞌꞌfɩa ꞌwee.
2ꞌLe ꞌꞌgwlideɛ ꞌmʋ nyɔ-ɔ ꞌpʋn -nɩꞌo ꞌbho -Lagɔꞌɔ ꞌꞌyigbeyi
1A -gblee, -tanyɩ ꞌkɩ a, a ꞌmɛ ꞌko-oꞌo ꞌbho -Lagɔꞌɔ ꞌꞌyigbeyi aꞌba ꞌꞌnyinynikpli -ke aꞌba ꞌꞌnyinynidɩꞌa dɩ. 2ꞌNɔɔ ꞌkmʋ ꞌmʋꞌa nyʋ, kpli ʋn -nɩꞌa ti, -yɩꞌa nʋꞌa -Lagɔ ꞌtʋ, ꞌle a-a ple ꞌɩ kli, -bho a -kɩ ɩ-ɩ nʋ a, ꞌꞌnyinynidɩꞌa tiyayi -ke wɔnkuɛ-ɛ -nɩꞌa -daa ꞌbhlʋkpa -ke yakuꞌa ꞌnynɩmʋ, ꞌɔ wlu a-a ꞌꞌduꞌo ꞌbho. Nyʋꞌa -dadudu-u ꞌnaa-a -Lagɔꞌɔ wlu ꞌꞌyi, ꞌɛ -zuzutu nʋ ꞌʋ lbhʋ ꞌmʋ ꞌle ʋn ꞌye -lokumʋkumʋ ꞌꞌdu. 3-Aꞌba ꞌwee, -ka ʋ-bʋ nyʋ ꞌmnʋ -nɩꞌa a, ꞌka-a -abʋ -nɩ ꞌkoꞌo, ꞌle -a ꞌwlaaꞌa -aꞌba ꞌgwlʋdɩꞌa lɩ wɔn ti. -Aꞌba ꞌꞌbhiꞌa ꞌmʋwlʋdɩ -a ziꞌe gbo. -Ka -lue ꞌmnɔ ꞌka-a, -a -nɩ ꞌkoꞌa dɩ, nyʋ -Lagɔꞌɔ ꞌcɛkʋta -nɩꞌa ꞌꞌkpi ꞌle ʋn-ʋ ꞌyeꞌa ꞌkle ꞌye mʋ ꞌbho ꞌɔ ꞌꞌyigbeyi, -a -ke ʋn ꞌke ɛ ꞌkɩ ꞌmʋ-plɛ.
4-5Ɩ -nɩꞌa -kaa ꞌmʋ a, -aꞌba ꞌꞌnyinynidɩꞌa dɩ -a-bʋ ꞌmɛ ꞌka ꞌbho ꞌɔ ꞌꞌyigbeyi, ɔ -kmaꞌa-a -aꞌba dɩ tenyɩꞌa dɩ, ꞌɔ ꞌlimʋꞌa wɔnnmɔpɔlʋ ꞌbhɛꞌɛ ꞌꞌyi ꞌbho -aꞌba ꞌꞌkpi, ꞌle -a -see ꞌtɔ ꞌmɛ. Ɔ ꞌꞌnyɩ-e -amʋ *Zezii *Kliisɩ. ꞌLe ɔ ꞌmʋ -a ꞌye -nɩꞌe tinɩɛlre bhubhu ꞌle -a ꞌye ꞌpʋn. 6ꞌLe -a -ke ꞌɔ ꞌꞌyisisriɛ ꞌmnɛ ꞌmʋ, -ka -Lagɔ -zɔ ꞌɔ glu ꞌle ꞌmɛmʋꞌa ꞌꞌklumʋ ꞌle ɔ ꞌyeꞌa ti-nɩ -lrɛɛ ꞌle ɔ ꞌyeꞌa ꞌbho ꞌɔ ꞌꞌtroli mu ɔ -ke ɔ ꞌke lɩ ꞌwee -kɔ ɔ, ꞌka-a -Lagɔ bhete ꞌnɔ -amʋ gbo ꞌle -a ꞌye tinɩɛlre ꞌmnɛ -ke ꞌɔ wɔnkuɛ ꞌye. 7A ꞌye li-ɔ, ꞌka-a -Lagɔ -zi -nɩ ꞌnɔ ꞌmʋ ꞌle ɔ ꞌye -amʋ -zɛgɛklagba -bodɩ nʋ. Ɛ -nɩꞌa -kaa ꞌmʋ, ꞌꞌyrilinmɔlɩzɩgɩ ꞌmnɩ, ɔ ꞌbɔ-ɔ ti, -bho ꞌwla, -aꞌba ꞌwee ꞌyeꞌa ꞌbho ꞌɔ ꞌꞌtroli -nɩ mʋ, ɔ ꞌke ɩ -amʋ ꞌꞌyi-tɔ. 8A -gblee, a ꞌde-e Zezii Kliisɩ ꞌꞌgwliꞌa dɩ, -Lagɔ ꞌpʋʋnꞌo amʋ ꞌbho ꞌɔ ꞌꞌyigbeyi. Ɔ ꞌnʋ-o amʋ ɛ-bɛ ꞌjɛ ꞌmnɛ ꞌꞌlruli bhubhu ꞌle ɛ -ke aꞌba ꞌpʋnpʋan ꞌmnɛ -naꞌo. 9Ɛ -nɩꞌa -kaa ꞌmʋ a, ɛ -se nyɔꞌɔ ꞌꞌbhuoꞌa ꞌmʋtikukuɛꞌɛ ꞌmʋpɛɛɛ ꞌmʋ ꞌle ɔ ꞌke ɔ -zɛgɛ ꞌꞌlruli-nʋ -nɩ -ko. Ɔ nʋ -ɛꞌo ꞌle nyɔ -kaa ꞌɛ dɩ ꞌꞌdu ɔ -kaa ꞌɔ ꞌꞌbhuo ꞌꞌyiꞌbhɛɛ. 10ꞌKa-a ɛ -nɩꞌe ꞌmʋꞌa dɩ, ɔ-bɔ -yaꞌa -amʋ ti, ɔ ꞌꞌnyɩꞌe -amʋ tinɩɛlre Zezii Kliisɩꞌa dɩ, ꞌle -a -ke Zezii Kliisɩ ꞌmnɔ ꞌꞌsisriꞌe ꞌꞌyi, ꞌle -a ꞌke ꞌꞌyrilinmɔlɩꞌa nʋnʋa wɔnyiꞌbhɛɛ. Ɛ-bɛ ꞌꞌyrilinmɔlɩꞌa nʋnʋa ꞌmnɛ, -Lagɔ ꞌde -ɛ ꞌbho ti see ꞌle -a ꞌke ꞌle ɛ ꞌmʋ ti-de.
ꞌLe -pɔlʋ -lue ꞌmʋ nyʋ ꞌwee -ke *Zezii *Kliisɩ ꞌꞌsisriꞌe-e ꞌꞌyi
11ꞌƐ dɩ ꞌtɔ ɔ, -ka a -nɩꞌa, ꞌɩn-ɩ popo-o amʋ -kaa ꞌgwlʋti: A -se *ꞌZuifʋ -koꞌa dɩ, ꞌZuifʋ ꞌꞌwe-e ꞌma-a nyʋ-ʋ ꞌlaꞌa ꞌwa ꞌꞌbhi nyʋ-ʋ muꞌa *klɛ ꞌmʋ, ʋn-ʋ ꞌlaꞌa amʋ nyʋ-ʋ -seeꞌa klɛ ꞌmʋ mu. (A -gblee, -bho ʋn -ka -kaa klɛmʋmuɛ ꞌnynɩ-ɩ ꞌꞌsi a, ɛ-ɛ ꞌmo-o ku liꞌa lɛ nyʋ-ʋ nʋꞌa, ꞌɛ ꞌꞌsɛ.) 12ꞌƖn-ɩ ꞌtmʋʋꞌo amʋ-ɛ, ʋn-ʋ nʋꞌa -kaa -tanyɩ, -ka a -ke *Zezii *Kliisɩ -seeꞌa -bhla ꞌꞌyiꞌꞌsisri ke, a popo ꞌna ꞌgwlʋti, nyʋ-ʋ ꞌma-a -Lagɔꞌɔ -nʋ, ꞌlɩkpʋ a ꞌꞌduꞌo ꞌbho ꞌwa damʋ! Ʋ-bee -ke -Lagɔ ꞌbhla-a tite. Tite ꞌmnɛ ꞌmʋ, ꞌle-e ɔ ꞌꞌdu -nɩ ꞌnʋ lɛ wɔn ꞌmʋti. ꞌBho ꞌmnɔ ɔ, a-bee se ꞌle ꞌɛ lɛtuꞌa ꞌlimʋ -nɩ, a ꞌꞌdu ꞌko-o ꞌlɩkpʋ. Lɛ a ꞌka ꞌgwlʋ ꞌꞌyi -ku, ɛ se -nɩ. ꞌKmʋ ꞌmʋꞌa nyʋ a ꞌꞌdu ꞌkoꞌo. A se -Lagɔ yibo. 13ꞌLe ꞌtraamʋ ꞌtɔ ɔ, a-bʋ se ꞌɔ -kaa yibo, a -ke Zezii Kliisɩ ꞌꞌsisriꞌe-e ꞌꞌyi. Ɔbɔ ꞌmnɔ, ꞌɔ nymɔ-ɔ ꞌwlaꞌa ti ꞌle ɔ ꞌye ꞌmɛ aꞌba dɩ. ꞌƖnnɛ ꞌbhleꞌe ꞌnynɩ, ꞌle a ꞌye -Lagɔ yibo. 14A -gblee, -aꞌba ꞌwee ꞌꞌsri-e Zezii Kliisɩ ꞌꞌyiꞌa dɩ -a ꞌyeꞌe -pɔlʋꞌa bhlubhlua. -Ybhɛybhɛɛ se ꞌbho ꞌZuifʋ -ke nyʋ-ʋ -seꞌa-a ꞌZuifʋꞌa ꞌnynɩmʋ -nɩ. Ɔ-bɔ nʋ ɛꞌo ꞌle -a ꞌye nyɔ -lue ꞌꞌdu. -Aꞌba ꞌmʋnyɩnyɛɛ-ɛ ꞌꞌduꞌo ꞌbho -aꞌba ꞌnynɩmʋ kplu. ꞌƆ ꞌmɛmɛɛ-ɛ -zaꞌa ꞌbho kplu ꞌmnɛ. 15A ꞌye li-ɔ, ɛ-bɛ ꞌɔ ꞌmɛmɛɛ ꞌmnɛ ꞌmʋ ɔ -po -nɩꞌe ꞌZuifʋꞌa gba ꞌliꞌa -tɔtɔlɩ ꞌplʋ ꞌmʋti. Ɔ ꞌnʋ-o -kaa ꞌle ɔ ꞌye ꞌZuifʋ -ke nyʋ-ʋ -seꞌa-a ꞌZuifʋ gbobhete. Ɔ bhete ꞌnʋ gbo a, ʋn -se ꞌtɔ-ɔ nyʋꞌa ꞌdigbi ꞌsɔn -ko. Nyɔ -lue ʋn ꞌꞌduꞌo. ꞌBho -Lagɔꞌɔ ꞌꞌyigbeyi ʋn -yiꞌe-e nyʋlre ꞌmʋ. -Pɔlʋꞌa bhlubhlua-a -nɩꞌe ꞌbho ꞌwa ꞌnynɩmʋ. 16ꞌBho nyʋyrilbhaatu ꞌꞌyri ɔ ꞌmɛ -nɩꞌa dɩ, ɔ -zaꞌa ꞌbho ꞌmʋnyɩnyɛɛ ꞌbho ꞌwa ꞌnynɩmʋ. ꞌƖnnɔ nʋ ɛꞌo ꞌɔ ꞌsana ꞌmʋ, ꞌle ʋn -ke -Lagɔ ꞌye -ybhɛ ꞌle ʋn ꞌye nyɔ -lue ꞌꞌdu. 17A -gblee, ɔ-bɔ -lue ꞌmnɔ, ɔ yiꞌa ꞌnɔɔ ꞌkmʋ ꞌmʋ, ꞌꞌdɩzɩgɩ ɔ -zaꞌo. ꞌYa dɩ, a-bʋ nyʋ-ʋ -seꞌa-a ꞌZuifʋ -ʋ seꞌa -Lagɔ yibo, ꞌtraamʋ ꞌtɔ ɔ, a ꞌyeꞌe -pɔlʋꞌa bhlubhlua, ꞌle, -a-bʋ ꞌZuifʋ a, -ʋ nʋꞌa na ʋn yiboꞌo-o -Lagɔ, ꞌya dɩ -abʋ ꞌyeꞌe -pɔlʋꞌa bhlubhlua -lrɛɛ. 18ꞌKa-a ɛ -nɩꞌe ꞌmʋꞌa dɩ a, ꞌɔ ꞌsana ꞌmʋ -a -nɩ ꞌwee ꞌbhɛɛꞌo -a -ke -Lagɔ ꞌke ꞌꞌyiꞌꞌsisri. *ꞌƆ Lisaazuzu -kpaꞌa -amʋ.
19A-bee -mnʋʋ ꞌtɔ ɔ, -Lagɔꞌɔ nyʋ a ꞌꞌduꞌo a -Bolagɔꞌɔ nyʋꞌa ka. A -se ꞌtɔ-ɔ ꞌlɩkpʋ -ko, ꞌle a -se ꞌtɔ zikamʋ -ko -lrɛɛ. ꞌLe, a ꞌꞌsiꞌe ꞌbho, a ꞌꞌduꞌo ꞌɔ -glɩgbaꞌa nyʋ. 20A -gblee, -ka, -bho -budupomʋ -ka -budu-u po, -babasɩkpɩ ʋn-ʋ ꞌꞌluoꞌa ꞌmʋ, ʋn-ʋ ꞌꞌduꞌa ꞌbho ꞌɛ ku ꞌmʋ, ꞌɩnnɩ -ke -a gʋgɔꞌɔ ꞌꞌyiti -lrɛɛ. ꞌLe *Zeziiꞌa -dalbhomʋ -ke -Lagɔꞌɔ wluꞌa ꞌmʋtizamʋ kɔɔꞌɔ -buduꞌa ꞌkpʋ, ꞌle -aꞌba -Kɔyi Zeziiꞌa ꞌꞌbhuo kɔɔꞌɔ ꞌɛ sʋkpʋ -ɛ -ziꞌa ꞌya ꞌwee. 21ꞌƆ ꞌsana ꞌmʋ -a -ke ɔ ꞌꞌsisriꞌe-e ꞌꞌyi -budu kukuꞌa ꞌmʋtiꞌa ka. ꞌLe, -a-bʋ ꞌma-a ꞌɔ -glɩgba, -aꞌba ꞌɔ ꞌꞌgwlideɛ-ɛ kuꞌo ꞌmʋ ꞌle -a ꞌkpaꞌa ꞌꞌkpi ꞌle -a ꞌꞌduꞌo -Lagɔꞌɔ -dena. -Ka *ꞌɔ bʋbɔbhlegboꞌa lisaabudu ꞌꞌduꞌa ꞌɔ -dena, ꞌka-a ɛ -nɩꞌo -amʋ -bodɩ. 22A -gblee, a -ke Zezii Kliisɩ ꞌmnɔ ꞌꞌsisriꞌe-e ꞌꞌyiꞌa dɩ, ꞌka-a aꞌba dɩ -nɩꞌe ꞌmʋ -ziaka. Ɩ-bɩ dɩ ꞌmnɩ ꞌꞌsri-e amʋ ꞌꞌyi -lrɛɛ. -Ziaka, -Lagɔꞌɔ -dena a ꞌꞌduꞌo, ꞌle ꞌɔ Lisaazuzu -nɩꞌe amʋ ꞌmʋ.
3ꞌPɔlʋ-ʋ ꞌza-a *Zezii *Kliisɩꞌa ꞌꞌdɩzɩgɩ nyʋ-ʋ -seꞌa-a *ꞌZuifʋ -bodɩ ꞌmʋ
1ꞌKa-a ɛ -nɩꞌe ꞌmʋꞌa dɩ a, ꞌɩn-ɩ poꞌo aꞌba dɩ *-Lagɔ wɔn gbo. Aꞌba nyʋtu ꞌɩn-ɩ zaꞌa *Zezii *Kliisɩꞌa ꞌꞌdɩzɩgɩ -bodɩ ꞌmʋꞌa dɩ ꞌɩn -po-ɛꞌɛ -jie ꞌmʋ. 2ꞌLe ꞌmna gbo, aꞌba ꞌꞌbhi yiboꞌo-o -ka -Lagɔ ꞌꞌduꞌa ꞌbho ꞌɩnmʋ ꞌle ꞌɩn ꞌke amʋ lbhʋ ꞌmnɛ -bodɩ nʋ. ꞌLe ꞌɔ ꞌsana ꞌmʋ ɔ -nʋ -nɩꞌe ꞌɛ lɛtu. 3A ꞌye li-ɔ, ꞌɔ ꞌꞌdɩzɩgɩꞌa ꞌꞌkpidɩ ɔ ꞌꞌzizeꞌa nyʋ -lrʋʋ ꞌꞌyrili, ɔ -tɔ ꞌnɩ ꞌɩnmʋ-ɛ ꞌle ꞌɩn ꞌke ɩ yibo. Ɩ-bɩ dɩ ꞌmnɩ, ꞌɩn ꞌꞌsi -ɩ ꞌꞌkpi ti see ꞌle ɛ-bɛ ꞌꞌbɔgʋ ꞌmnɛ ꞌli ꞌle ꞌɩn -see ɩ ꞌꞌyiti-tɛ. 4A -gblee, -bho a -kɩ ɩ-ɩ zrɛ, ɩ-bɩ Zezii Kliisɩꞌa ꞌꞌkpidɩ ꞌꞌzizeꞌa ꞌꞌyi -tanyɩ, -ka ꞌɩn yibo ꞌnɩ ꞌtɔ ɔ, ꞌbho-o a ꞌye ɩ ꞌmʋtiꞌwɔn -nɩ mʋ. 5ꞌLe -bɛnyɩꞌa -nɔɔ ꞌli ꞌkɩ a, -Lagɔ -see ɩ-bɩ dɩ ꞌmnɩ nyunyu -tɔ. ꞌTraamʋ ꞌtɔ ɔ, ɔ nʋ -ɛꞌo ꞌle ɔ ꞌye *ꞌɔ Lisaazuzu -ya, ꞌle, *Zeziiꞌa -dalbhomʋ -ke -Lagɔ ꞌmnɔꞌɔ wluꞌa ꞌmʋtizamʋ -ʋ ꞌma-a ꞌɔ -nʋ, ɔ ꞌke ʋ ɛ -tɔ. 6A ꞌye li-ɔ, ꞌɔ ꞌꞌkpidɩ -ke ꞌꞌyriꞌa ꞌbɩ-ɩ ꞌwlʋꞌa a, ꞌɩnnɩ ꞌka-a: -Zɩgɩ -Lagɔ nʋꞌa *ꞌZuifʋ ꞌꞌlruli, a-bʋ -seꞌa-a ꞌZuifʋ, a-bee -mnʋʋ -see ɛ ꞌmʋ-bɔ yi -lrɛɛ. A-bee -ke ꞌZuifʋ ꞌpa-a kpan -lue ꞌli. -Zɛgɛ ɔ deꞌa ꞌbho ti, nyʋ-ʋ -ke Zezii Kliisɩ ꞌꞌsisriꞌa ꞌꞌyi, ɔ nʋꞌa ɔ ꞌke ʋ ꞌꞌnyɩ, ꞌle abʋ ꞌke aꞌba nɛ ꞌye -lrɛɛ. ꞌLe Zezii ꞌmnɔꞌɔ ꞌꞌdɩzɩgɩ ꞌmʋ, ꞌle-e ɛbɛ ꞌmnɛ ꞌwlʋꞌo.
7A -gblee, -Lagɔ poꞌo ꞌɩnmʋ ꞌɔ lbhʋ ꞌꞌyi, ꞌle ꞌɔ ꞌsana ꞌmʋ ꞌle ꞌɩn ꞌke Zeziiꞌa ꞌꞌdɩzɩgɩ ꞌmnɩ nyʋ -bodɩ ꞌmʋ-za. Ɔ ꞌnʋ-o ꞌɛ lɛtu ꞌle ꞌɔ wɔnkuɛ ꞌmʋ. 8A ꞌye li-ɔ, ꞌle Zezii Kliisɩꞌa nyʋ ꞌweeꞌa ꞌꞌklumʋ ꞌɩnmɔ -see-e lɛ. Ɩ -nɩꞌa -kaa ꞌmʋ-ɔ, -Lagɔ nʋꞌo ꞌɩnmʋ -zɩgɩ ꞌꞌlruli, ꞌle, ꞌꞌyrilinmɔdɩ ꞌꞌwe Kliisɩ-ɩ nʋꞌa nyʋ ꞌꞌlruli, nyʋ-ʋ -seꞌa-a ꞌZuifʋ, ꞌmna ꞌke ʋ ꞌya ꞌꞌkpidɩ -bodɩ ꞌmʋ-za. ꞌƆ ꞌꞌyrilinmɔdɩ ꞌmnɩ ꞌbhɛ-ɛ ꞌꞌyi tenyɩ, ɩ ꞌye nyunyuꞌa -naagɩ wɔn ꞌmʋti-zi. 9ꞌƆ ꞌꞌkpidɩ nyʋ seꞌa yibo, -ɩ ꞌꞌzizeꞌa ꞌꞌyi ꞌle ɛ ꞌyeꞌa -nɔɔ -nɛɛ ꞌꞌkpi bhla a, -Lagɔ -yaꞌa lɩ ꞌwee ti, -ɔ po ꞌɩ ꞌbho zɔ ꞌꞌyi, -ɔ cɛꞌɛ ꞌɔ ꞌꞌkpidɩ ꞌmnɩ wɔn ꞌꞌkpiti, ɔ ꞌke ɩ ꞌꞌpiemʋ po, ꞌɩnnɔ nʋꞌo ꞌɩnmʋ -zɩgɩ ꞌꞌlruli -lrɛɛ, ꞌle, ꞌɔ ꞌꞌkpidɩ ꞌmnɩ, ꞌɩn ꞌke ɩ gbɔzɩza nyʋ -bodɩ, 10ꞌle, -ka ꞌɔ -naagɩ -tɛꞌɛ ꞌmʋ ꞌle ɛ seꞌa ꞌꞌtiinamʋ ꞌbhle, Zeziiꞌa -glɩgba ꞌke ꞌna -tɔ, ꞌle ɛ ꞌke ꞌya kpli ti-nɩ, ꞌle, nyʋ ꞌwee ꞌbhleꞌa wɔnkuɛ ꞌle yaku ꞌꞌyi -ke ꞌle ɛ ꞌli, ʋn ꞌke ɩ yibo. 11A ꞌye li-ɔ, -da ꞌkmʋ -seeꞌa -bhla tiyi ke, -ka ꞌɔ ꞌꞌbhuo deꞌa ꞌya duo, ꞌka-a ɔ -zi -nɩꞌe -aꞌba -Kɔyi Zezii Kliisɩ ꞌmʋ ɔ ꞌye ɩ nʋ. 12-A ꞌde-e Zezii Kliisɩ ꞌmnɔ ꞌꞌgwli ꞌle -a -ke ɔ ꞌꞌsisriꞌe-e ꞌꞌyiꞌa dɩ -a ꞌyeꞌe ꞌꞌyiflɔɛ ꞌle -aꞌba -pɔlʋ -gwɛꞌɛ ti ꞌbho -Lagɔꞌɔ ꞌꞌyigbeyi. 13ꞌKa-a ɩ -nɩꞌe ꞌmʋꞌa dɩ a, ꞌɩn-ɩ bhadeꞌe amʋ li, sɩasɩaa-a -nɩꞌa ꞌɩnmʋ ꞌꞌkpi aꞌba dɩ, -bho a popo nɩ ꞌgwlʋti, ꞌya ꞌkpɩꞌa -wa amʋ ꞌꞌyiti -le! ꞌYa sɩasɩaatu-u ꞌmo-o lɛ -yɛ -ke dɩ aꞌba ꞌnynɩ-ɩ ꞌyeꞌa ꞌꞌyiꞌbhɛ-ɛ mʋ ꞌle yaku ꞌli ɔ-bɔ -Lagɔꞌɔ nɛꞌɛ ka.
*Zeziiꞌa nyʋꞌa dɩkmɛɛ
14ꞌꞌYrilinmɔdɩklɩgbɩ -aꞌba -tɩta -Lagɔ nʋꞌa -aꞌba dɩꞌa dɩ ꞌɩn-ɩ poꞌo ꞌkolri glu ꞌbho ꞌɔ ꞌꞌyigbeyi ꞌle ꞌɩn-ɩ bhade ꞌnɔ li aꞌba dɩ. 15A ꞌye li-ɔ, ꞌle yaku ꞌliꞌa nyʋ -ke ꞌɔ nyʋ-ʋ -nɩꞌa ꞌnɔɔ ꞌbhlʋkpa ꞌꞌkpi, ꞌɩnnʋ ꞌmo-o ꞌɔ -glɩgba. 16A -gblee, ꞌɔ ꞌnynɩ ꞌbhɛ-ɛ ꞌꞌyi -ziaka ꞌle ɔ ꞌbhleꞌe lɩ ꞌweeꞌa dɩ a, ꞌɩn-ɩ po ꞌɔ *wɔn gbo ꞌle *ꞌɔ Lisaazuzu ꞌke amʋ ꞌkpɩ -ke wɔnkuɛ ꞌꞌnyɩ. Ɩ-bɩ ꞌkpɩ -ke wɔnkuɛ ꞌmnɩ ꞌke amʋ ꞌmʋ -nɩ ꞌle ɩ ꞌke aꞌba -pɔlʋ ti-ku a ꞌke ꞌbho ꞌɔ -jeyi -na -ka -zɛgɛka. 17ꞌƖn-ɩ ꞌpo -ɔ wɔn gbo -lrɛɛ, a ꞌde-e *Zezii *Kliisɩ ꞌꞌgwliꞌa dɩ, ꞌle ɔ ꞌke ꞌle aꞌba -pɔlʋ ꞌzɔ -nɩ ꞌꞌkɔmʋ. ꞌƖn-ɩ ꞌpo -ɔ wɔn gbo -lrɛɛ, -ka tu-u bhlaꞌa gbɔ ti ꞌle ꞌɛ ꞌsɩsɩanyɩ-ɩ nymaꞌa ꞌbhlʋkpa ꞌmʋ ꞌꞌklaklakla, ꞌka-a ꞌɔ dɩkmɛɛ ꞌke amʋ ꞌmʋ -nɩ ꞌle a ꞌke dɩ kɩkma, ꞌle, -budu -ke ꞌkpʋ ʋn poꞌa glu, ɛ -ke ɛ ꞌke ꞌꞌyitigʋgɔ -lrɛɛ. 18-Bho ɛ -nɩ -kaa a, a-bʋ -ke nyʋ -lrʋʋ bheteꞌa gbo, a ꞌyeꞌa Zezii Kliisɩꞌa nyʋ ꞌꞌdu, -ka ɔ -kmaꞌa -aꞌba dɩ tenyɩ, ꞌle a ꞌke -kaa ꞌmʋtiꞌwɔn. A yiboꞌo-o ꞌɔ dɩkmapɔlʋ -tɛꞌɛ ꞌmʋ-ɛ, ɛ ꞌbhɛ-ɛ ꞌꞌyi tenyɩ ꞌle ɛ se ꞌꞌtiinamʋ ꞌbhle. 19ꞌƖn-ɩ ꞌpo -ɔ wɔn gbo -lrɛɛ, ꞌɔ dɩkmɛɛ-ɛ -tɛꞌɛ ꞌmʋ ꞌmnɛ, nyunyɔꞌɔ ꞌwɔnꞌɔ ꞌmʋti, a ꞌke ɛ yibo, ꞌle, -bho a yibo nɛ -kaa a, -Lagɔꞌɔ ꞌꞌbhuoꞌa tinɩɛꞌɛ klɛ ꞌke ꞌle aꞌba -pɔlʋ gbo ꞌꞌyi -lrɛɛ.
20Ɔ-bɔ -Lagɔ ꞌbhleꞌe wɔnkuɛ ꞌwee. Lɛ -abʋ ꞌybhaa ꞌnɔ ɔ, ɛ-ɛ zi ꞌnɛ-ɛ wɔn ꞌmʋti, -da -aꞌba ꞌgwlʋtipopoɛ -seeꞌa nyni, ꞌbho-o ɛ-ɛ nyniꞌo, ꞌle ɛ-ɛ nʋꞌo -amʋ lbhʋ ꞌmʋ. 21Ɔ-bɔ -Lagɔꞌɔ ꞌnynɩ ꞌbhɛ ꞌꞌyi! Zezii Kliisɩ -ke ꞌɔ -glɩgbaꞌa kamʋ ꞌɔ ꞌnynɩ ꞌmnɛ ꞌke ꞌꞌyiꞌbhɛ-ɛ ꞌꞌkɔmʋkɔmʋ! *Ɛ -nɩ -kaa ꞌmʋ!
4ꞌLe -pɔlʋ -lue ꞌtɩn ꞌmʋ a kpʋkpʋn ti
1Ɩ -nɩꞌa ꞌtɔ -kaa ꞌmʋ-ɔ, ꞌɩnmɔ -yɔɔ ɔ, -aꞌba -Kɔyi *Zezii *Kliisɩꞌa ꞌꞌdɩzɩgɩ ꞌɩn-ɩ zaꞌa ʋn ꞌꞌdu ꞌɛ dɩ ʋn poꞌa ꞌɩnmʋ -jie ꞌmʋ, a-bee -mnʋʋ, ꞌɩn-ɩ ꞌpo-o amʋ ꞌkpa ꞌꞌyi. -Lagɔ ꞌlaꞌa amʋ ꞌle a ꞌyeꞌa ꞌbho ꞌɔ -jeyi ꞌkpa, kpli-i ꞌkɔ ɔ ꞌtʋ nʋ, a nʋ ɩ! 2ꞌKa-a ɛ -nɩꞌe ꞌmʋꞌa dɩ a, a -ya aꞌba ꞌꞌbhi ꞌzɔ ꞌle lɛꞌꞌo lɛ ꞌmʋ ꞌle a ꞌke kpli ꞌmʋ -nmɔ, a ꞌke ꞌꞌgwli-ku ꞌle a ꞌke dɩ kɩkma ꞌle a ꞌke wɔnyiꞌbhɩbhɛ. 3A po ꞌle ꞌkpɩ, ꞌle, tikpʋkpʋɛn *-Lagɔꞌɔ Lisaazuzu ꞌꞌnyɩꞌa amʋ, -ɛ -ke ꞌli a -deꞌa ti, a ꞌke ɛ ꞌꞌlru-mu ꞌꞌkɔmʋ! ꞌƐ lɛtu ꞌke -nʋ-ɛ, -ɛkedɩmaa, -pɔlʋꞌa bhlubhlua -Lagɔ ꞌꞌnyɩꞌa amʋꞌa dɩ a-a ybhɛꞌo ꞌle a-a ꞌꞌsisriꞌe ꞌꞌyi. 4A -gblee, ꞌɩn -zɩ ꞌɩ ꞌmʋ-ɛ, -ɛkedɩmaa, -Lagɔꞌɔ Lisaazuzu -nɩꞌe-e -lue ꞌtɩn, ꞌɩnnɔ -nɩꞌe ꞌle amʋ ꞌmʋ, ꞌɔ dɩ a ꞌꞌduꞌo nyɔ -lue. -Ka -lue ꞌmnɔ, ꞌka-a ꞌꞌkɔgwlɛtinɩɛ ꞌbho -Lagɔꞌɔ ꞌꞌtroli a -deꞌa -pɔlʋ ꞌꞌyi -nɩꞌe -lue ꞌtɩn. A ꞌke ɛ ꞌyeꞌa dɩ -Lagɔ ꞌlaꞌa amʋ. 5A ꞌye li-ɔ, ꞌɩn-ɩ ꞌkpa-a ꞌan wlu nya. -Aꞌba -Kɔyi -nɩꞌe-e -lue ꞌtɩn. ꞌƖnnɔ -aꞌba ꞌwee deꞌe ꞌꞌgwli, ꞌle ꞌɔ ꞌnynɩ ꞌmʋ -aꞌba ꞌwee *batizee-ɛ -nɩꞌo. 6ꞌBho ꞌɛ lemʋ a, -Lagɔ -nɩꞌe-e -lue ꞌtɩn, ꞌɩnnɔ ꞌmo-o ꞌɔ nyʋ ꞌweeꞌa -tɩta. Ɔ -nɩꞌe-e nyʋ ꞌwee ꞌꞌkpi, ɔ -nɩꞌe-e ꞌɔ nyʋ ꞌweeꞌa ꞌꞌklumʋ ꞌle ɔ -nɩꞌe ꞌɔ nyʋ ꞌwee ꞌmnʋ ꞌmʋ -lrɛɛ.
7Ɛ -nɩꞌa -kaa ꞌmʋ a, ꞌɔ Lisaazuzu-u ꞌpo-o ꞌɔ nyɔꞌꞌo nyɔ ꞌkpɩ ꞌmʋ ꞌle -a ꞌke ꞌɔ lbhʋ nʋ. Ɩ-bɩ lɩzɩgɩ ꞌmnɩ, -ka Zezii Kliisɩ ꞌgblee nɩꞌa -amʋ ꞌꞌyiti, ꞌka-a -a ꞌye ɩꞌo ꞌle ɩ se gʋgɔ. 8A ꞌye li-ɔ, -kaa ꞌka-a ɛ ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli see ꞌbho Zezii Kliisɩ ꞌmnɔꞌɔ ꞌꞌkpi na:
-Da ɔ luꞌa ꞌɔ tʋꞌa nyʋ tʋ wɔn ꞌmʋ a, ɔ ꞌmu-o ꞌbho -Lagɔꞌɔ ꞌꞌtroli le. Ɔ ꞌka mu a, ɔ ꞌbhle-e -jiemʋ ꞌmnʋ, ꞌɩnnʋ -ke ɔ muꞌo, ꞌle, ꞌɔ nyʋ-ʋ -nɩꞌa ꞌnɔɔ ꞌbhlʋkpa ꞌꞌkpi, ɔ ꞌye ʋ lɩzɩgɩ ꞌꞌnyɩ.
9(ꞌLe, -bho ɛ-bɛ wlu -nɛɛ nʋ: Ɔ ꞌmu-o ꞌbho -Lagɔꞌɔ ꞌꞌtroli le ꞌle, -mnɩɩ ꞌɩnnɛ -se ꞌtɔ-ɔ ɔ ꞌyi-e ꞌnɔɔ ꞌbhlʋkpa -nɛɛ ꞌꞌkpi-ɔ ꞌle ɔ ꞌye le mu ꞌya? 10A -gblee, ɔ-bɔ -ke ꞌꞌbhuo yiꞌa ꞌnɔɔ ꞌkmʋ ꞌmʋ, ɔ-bɔ -lue ꞌmnɔꞌɔ ꞌꞌbhuo-o muꞌo yaku ꞌli, ꞌle ɔ ꞌke lɩ ꞌwee -kɔ ꞌle ꞌɔ wɔnkuɛ ꞌke ɩ ꞌꞌkpi ꞌpɩple.) 11A ꞌye li-ɔ, ꞌɔ -glɩgbawɔnyiꞌa nyʋ ꞌyeꞌa ꞌkpɩ ꞌle ʋn ꞌke -Lagɔꞌɔ lbhʋ nʋ, ꞌɔ ꞌꞌbhuo-o ꞌgblee ꞌnʋ lbhʋ ꞌmnɛ ꞌꞌyiti! Ɔ ꞌꞌnyɩ nyʋ -lrʋʋ *ꞌɔ -dalbhomʋꞌa lbhʋ, ɔ ꞌꞌnyɩ tɔlʋ -Lagɔꞌɔ wluꞌa ꞌmʋtizalbhʋ, ꞌɔ ꞌꞌdɩzɩgɩꞌa nyʋbodɩmʋzɛɛ, nyʋ -lrʋʋ ꞌbhle-e ꞌɛ lbhʋ, ꞌle -lrʋʋ -nɩꞌe ꞌbho, ʋn ꞌꞌduꞌo ꞌɔ -glɩgbaꞌa ꞌꞌyrilidumʋ, ꞌle -lrʋʋ ꞌꞌduꞌo ꞌɛ nyʋꞌa -Lagɔwluꞌa -tɔmʋ. 12A -gblee, ɔ ꞌnʋ-o ꞌɛ lɛtu ꞌle ꞌɔ -glɩgbawɔnyiꞌa nyʋ ꞌke -Lagɔꞌɔ lbhʋ wɔnyiꞌbhɛɛ, ꞌle ʋn ꞌke ꞌkpa ꞌꞌyipopo ꞌle ꞌwa ꞌɔ ꞌꞌgwlideɛ ꞌke ꞌmʋku. 13A ꞌye li-ɔ, ꞌka-a ʋn ꞌke nʋnamʋ -nɩ, ꞌle, -a -nɩ ꞌwee, -a-bʋ de ꞌɔ ꞌꞌgwli, -a ꞌke ꞌꞌyiꞌꞌsisri -ka -zɛgɛka, ꞌle -a ꞌke ɔ yibo -ziaka. ꞌLe, -a ꞌke -kaa -nɩ a, ꞌbho -aꞌba -Lagɔjeyiꞌa -nanamʋ -a ꞌke ꞌꞌyritiku, ꞌle Zezii Kliisɩ ꞌmnɔꞌɔ -dedekpliꞌa klɛ-ɛ -nɩ ꞌnɔ ꞌmʋ, nyʋ ꞌke ɩ -amʋ ꞌmʋ liꞌyee. 14ꞌLe -a ꞌke -kaa -nɩ a, ꞌꞌlemnɩɩ -a -see tiꞌꞌtoto yi ꞌꞌyreetɩꞌa ka. ꞌLe nyʋ-ʋ ꞌꞌmaaꞌa nyʋ dɩ ꞌꞌyrili, ꞌwa sɩnsɩndɩ-e ꞌꞌyrabhadɩ ꞌmnɩ ꞌmʋ ʋn se ꞌbhɛɛ ꞌwa -tɔtɔlɩ ꞌke -amʋ -tɔtɔlɩzɩgɩꞌa -jolʋ ꞌꞌyriliꞌꞌmaa. -Mnɩɩ, -ka ꞌꞌni -ke -pʋpɔɔ poꞌa gɔlʋ -gboko, -a -see -kaa -nɩ yi. 15Lɛ -a ꞌka nʋ a, ꞌɩnnɛ ꞌmo-o, -a ꞌke dɩ kɩkma, ꞌle -a ꞌke -ziadɩ -bodɩmʋzɩza. ꞌLe ɛ ꞌmʋ -a -ke Zezii Kliisɩ ꞌꞌsisri -nɩꞌe ꞌꞌyi. Ɔ-bɔ ꞌma-a ꞌɔ -glɩgbaꞌa ꞌꞌlrugayʋɛ, ꞌɔ nʋnʋdɩ -a ꞌke ꞌꞌsɛlɩ-za ꞌle -aꞌba nʋnʋdɩ -ke ꞌɔ nɩ ꞌke ꞌꞌyitigʋgɔ. 16A -gblee, -ka nyunyɔꞌɔ ꞌꞌlru -ke ꞌɔ ꞌgblʋ ꞌꞌsisriꞌa ꞌꞌyi, -ka -lue ꞌmnɔ ɔ, ꞌka-a Zezii Kliisɩ nʋ ɛꞌo ꞌle ɔ -ke ꞌɔ -glɩgbawɔnyiꞌa nyʋ ꞌꞌsisriꞌe ꞌꞌyi. ꞌƐ lɛtu kɔkɔɔꞌɔ-ɔ nyɔꞌɔ kuku ꞌzɔꞌɔ -tani. Lɩ ꞌwee ꞌꞌsriꞌa ꞌgblʋ ꞌꞌyi, -bho ɩ -ka ꞌya lbhʋ-ʋ nʋ -lue -lue a, -mnɩɩ ꞌɔ ku-u tɔpɔꞌo -ka -zɛgɛka. Ɛbɛ ꞌmnɛ, ꞌɩnnɛ -ke ꞌɔ nyʋ-ʋ maꞌa kpan gʋgɔꞌɔ ꞌꞌyiti. -Bho nyʋ ꞌmnʋ kɩkma -kɩkma dɩ a, ꞌbho ꞌwa -Lagɔjeyinanamʋ ʋn-ʋ ꞌku-o ꞌꞌyriti ꞌle ꞌɛ kpantu-u muꞌo ꞌꞌyrigbɔ ꞌle lɩ ꞌwee ꞌmʋ.
Tinɩɛlre -nɩꞌa ꞌle *Zezii *Kliisɩ ꞌmʋ, ꞌɩnnɛ -a ꞌyeꞌo
17ꞌKa-a ɩ -nɩꞌe ꞌmʋꞌa dɩ a, ꞌle -aꞌba -Kɔyiꞌa ꞌnynɩ ꞌmʋ ꞌɩn-ɩ ꞌtmʋʋꞌo amʋ, nyʋ-ʋ seꞌa -Lagɔ yibo a, aꞌba ꞌkpa ꞌwa nʋnʋkpli kli -le! ꞌWa -naagɩꞌa klɛ ꞌꞌbhitiꞌe-e ꞌle bhebhelɩ ꞌꞌkpi. 18ꞌWa nyʋtuꞌa ꞌlimʋ -kpeꞌe-e ti. Tinɩɛlre -Lagɔ-ɔ ꞌꞌnyɩꞌa nyʋ, ꞌwa -lokumʋkudɩ ʋn -bɔ ꞌnɛ ꞌmʋ, ꞌle ʋn se -Lagɔꞌɔ -jolʋ yibo. 19A -gblee, ꞌwa nyʋtu se dɩndɩ yibo, ꞌle ʋn-ʋ ꞌwlaaꞌa ꞌꞌnyinynidɩ wɔn ti, ʋn-ʋ nʋ ɩꞌo ꞌle ꞌwa ꞌꞌtiiꞌo.
20A-bʋ ꞌbɔꞌɔ ti a -ke Zezii Kliisɩ ꞌke -na, ꞌle a-bee -mnʋʋ -bodɩ a, ɛ -se -klaabokpli ꞌɔ nyʋ -tɔ amʋ -ko. 21ꞌLe ꞌmna yiboꞌo, a -ke ɔ ꞌꞌsisriꞌe-e ꞌꞌyiꞌa dɩ, -ziadɩ ɔ poꞌa ꞌꞌpiemʋ ꞌle -amʋ -bodɩ, ꞌɩnnɩ nyʋ -tɔꞌɔ amʋ ꞌle a ꞌye ɩ ꞌmʋtiꞌwɔn ꞌle a-a ꞌꞌdu ꞌɔ ꞌbho. 22-Bho ɛ -nɩ -kaa, a ꞌꞌtayi aꞌba kplisʋa ꞌꞌyiti! Ɩbɩ-ɩ ꞌnyni-e amʋ wɔn, -ɛkedɩmaa, aꞌba ꞌꞌnyinynidɩꞌa ꞌtʋnʋdɩ-ɩ ꞌꞌmaa-a amʋ dɩ ꞌꞌyrili. 23ꞌTraamʋ ꞌtɔ ɔ, a ꞌꞌtayi -Lagɔ ꞌꞌyiti ɔ ꞌke amʋ ꞌꞌyizizia ꞌle a ꞌke nyʋlre ꞌꞌdu! 24A -mu kplilreꞌa nʋnʋaꞌa ꞌꞌlru. Ɩbɩ ꞌmnɩ, ꞌɩnnɩ -Lagɔ -yaꞌa ti, ꞌɩnnɩ -ke ꞌɔ ꞌꞌyisrɛɛdɩ gʋgɔꞌɔ ꞌꞌyiti. ꞌLe ɛ ꞌmʋ, ꞌle-e -ziadɩ -nɩꞌo. ꞌƖnnɛ nʋꞌo -Lagɔ ꞌtʋ.
25ꞌƖnnɩ ꞌbhleꞌe ꞌnynɩꞌa dɩ a, a ꞌbhɔ sɩnꞌa dɩ ꞌle a ꞌke -ziadɩ -bodɩmʋzɩza, -ɛkedɩmaa, -aꞌba ꞌwee ꞌꞌsisriꞌe-e ꞌꞌyi! 26A -gblee, -bho a po ꞌcɛ ɛ, aꞌba kpa ꞌꞌnyinynidɩ wɔn -le! Aꞌba ꞌcɛꞌɛ kpʋn -kuyre -le! 27Aꞌba ꞌꞌnyɩ ꞌꞌnyinynidɩꞌa tiyayi -flɔna -le! 28Nyʋ-ʋ ꞌꞌyriꞌa, ʋn ꞌbhɔ ꞌꞌyriyridɩ! Ʋn nʋ lbhʋ! -Bho ʋn ꞌbhle lɛ, ꞌle, nyʋ-ʋ se ꞌɛ ꞌbhle, ʋn ꞌke ʋ -kpa -lrɛɛ. ꞌKla ꞌmnɔ, ꞌkla-a -nmɔꞌɔ ꞌꞌyrili. 29ꞌƖn-ɩ ꞌtmʋʋꞌo amʋ-ɛ -lrɛɛ, ꞌꞌnyinyniwluꞌa ꞌwlʋ ꞌle aꞌba wɔn ꞌmʋ -le! Wlu-u ꞌka a -bonyunyu ꞌkpa ꞌꞌyi po ꞌle ʋn ꞌka ꞌkpɩ ꞌmʋꞌbhle ꞌbho -Lagɔꞌɔ -jeyi, a -zɩ ɩ ꞌmʋ! -Da ɩ -nmɔꞌɔ ti, -bho a -za nɩ ꞌbho ꞌmʋ, ꞌle, nyʋ-ʋ poꞌa amʋ -lokui, ɩ ꞌke ʋ -zɛgɛ ꞌꞌlrulinʋ -ka -zɛgɛka. 30*-Lagɔꞌɔ Lisaazuzu -nɩꞌa amʋ ꞌmʋ, ꞌɔ ꞌꞌdu, aꞌba kpli a -nɩꞌa tiꞌa dɩ, ꞌɔ -kma ꞌꞌyigbeyi -le! Ɔbɔ ꞌmnɔ ꞌmo-o ꞌmʋyibolɛ -Lagɔ ꞌꞌduꞌa amʋ ꞌꞌkpi, ꞌle, -ka -a ꞌꞌduꞌa ꞌɔ nʋ, ɩ ꞌke yibo-ɛ. ꞌLe lɛ ɛ-ɛ tɔꞌɔ -lrɛɛ, ꞌɩnnɛ ꞌmo-o, -ka Zezii zetieꞌa amʋ ꞌle aꞌba ꞌꞌnyinynidɩ ꞌmʋ ꞌle a ꞌyeꞌa ꞌpʋn ꞌbho -Lagɔꞌɔ ꞌꞌyigbeyi, ꞌbho ꞌɔ leyinɔɔ ꞌli ɛ-bɛ ꞌpʋnpʋan ꞌmnɛ ꞌke amʋ ꞌmʋ ꞌꞌyi ꞌle ɛ ꞌke tiꞌpɩple. 31A -za ꞌle aꞌba -pɔlʋ gbo ꞌgagwlo -ke ꞌcɛ, aꞌba jɛ -le, aꞌba zɩza ꞌꞌnyinyniwlu -bodɩ ꞌmʋ -le, a ꞌbhɔ ꞌlimʋwɔnnynidɩ ꞌwee! 32ꞌBho ꞌɛ lemʋ, lɛ a ꞌka nʋ a, ꞌɩnnɛ ꞌmo-o, aꞌba ꞌlimʋ nɩnmɔ -nɩ ꞌꞌkpi wɔn ꞌle a ꞌke -zɩgɩ ꞌꞌlrulinʋnʋ -lrɛɛ! -Ka -Lagɔ ꞌbhɔꞌɔ aꞌba ꞌꞌnyinynidɩꞌa dɩ, abʋ ꞌbhɔ -kaa a -bonyunyuꞌa nɩꞌa dɩ, -ɛkedɩmaa, Zezii Kliisɩ ꞌnʋ-o amʋ -zɛgɛ ꞌꞌlruli! Ɔ ꞌmɛ-ɛꞌo aꞌba ꞌꞌnyinynidɩꞌa dɩ.
5-Lagɔꞌɔ dɩkmayreetɩꞌa nʋnʋkpli
1A -gblee, a-a ꞌmo-o -Lagɔꞌɔ dɩkmayreetɩꞌa dɩ a, a -za ꞌɔ kpli ꞌꞌsɛlɩ ꞌle aꞌba -pɔlʋ ꞌke ꞌɔ nɛꞌɛ ka -nɩ. 2ꞌKa-a ɛ -nɩꞌe ꞌmʋꞌa dɩ a, ꞌle aꞌba nʋnʋkpli ꞌwee ꞌmʋ a -kma a -bonyunyuꞌa dɩ -ka *Zezii *Kliisɩ -kmaꞌa -aꞌba dɩ ꞌle ɔ ꞌyeꞌa ꞌɔ ꞌꞌbhuo ꞌꞌyitiꞌꞌtayi ɔ ꞌyeꞌa ꞌmɛ -aꞌba dɩ! ꞌƆ ꞌmɛmɛɛ ꞌmnɛ kɔɔꞌɔ-ɔ ꞌsraganmi ʋn-ʋ ꞌꞌnyɩꞌa -Lagɔ -ɛ nʋ ꞌɔ ꞌtʋ.
3A ꞌꞌduꞌo ꞌtɔ-ɔ Zeziiꞌa nyʋꞌa dɩ a, ꞌꞌbhɩlɛɛɛ ꞌꞌbhlɛcɛ-e ꞌya -kaabolɩ -lrɩɩ -ke satɛbhleɛɛ, nyɔꞌɔ ꞌꞌwaan nɩ nyɔ wɔn ꞌle aꞌba ꞌnynɩgbo -leꞌꞌa! 4-Vlɛvlɛwlu-e ꞌꞌnyinyniwlu seꞌa wɔnmʋyika -nɩ nyʋ-ʋ po nɩꞌa ꞌꞌzrɔ ꞌmʋ -ke bhebhewlu seꞌa ꞌle -loku ꞌmʋ ti-nmɔ, nyɔꞌɔ ꞌwɔɔn nɩ amʋ wɔn ꞌꞌyi ꞌbɔ -le -lrɛɛ! Lɛ-ɛ -nmɔꞌɔ ꞌꞌyrili a ꞌka nʋ a, ꞌɩnnɛ ꞌmo-o, -zɩgɩ -Lagɔ nʋꞌa amʋ ꞌꞌlruli, a po ɔ ꞌsɛɛ ꞌya dɩ! 5ꞌƖn-ɩ ꞌtmʋʋꞌo amʋ-ɛ ꞌle a ꞌke ɩ yibo, nyɔ-ɔ ꞌꞌbhɩlɛɛɛ ziꞌa a, ꞌle -ɔ kpʋnꞌa ꞌya -kaabolɩ -lrɩɩ ti, ꞌle -ɔ kpʋnꞌa satɛꞌɛ ꞌꞌkpa ti, nyʋ -Lagɔ -ke Zezii Kliisɩ -kɔꞌɔ ɔ, ꞌle ꞌwa ꞌꞌklumʋ, ꞌɔ nyɔtu -see ꞌle ꞌbɩ ꞌye yi, ꞌle, -zɛgɛ ʋn-ʋ nʋ ꞌʋ ꞌꞌlruli, ʋn -see ɛ ꞌye yi -lrɛɛ. A -gblee, ɔ-bɔ satɛbhleyi ꞌmnɔꞌɔ nyɔtuꞌa -pɔlʋ ꞌkpʋn-o -kaabolɩ ti, ɛ ꞌye -Lagɔ ꞌmʋ-zi. Ɩ-ɩ ꞌꞌluo-o -Lagɔꞌɔ ꞌbɩ ꞌmʋ ꞌle ꞌɔ -pɔlʋ ꞌzɔ. 6Nyʋꞌa bhebhewlu seꞌa lɛ ꞌmʋꞌbhle, ꞌya ꞌꞌmaa amʋ dɩ ꞌꞌyrili -le! ꞌYa ꞌꞌnyinynidɩtuꞌa dɩ, nyʋ-ʋ -seeꞌa tiꞌbɔ ʋn ꞌke -Lagɔ ꞌbho ꞌꞌdu a, ꞌɔ ꞌcɛkʋta -nɩ ꞌnʋ ꞌꞌkpi, ꞌle ɔ ꞌke ʋ dɩ -kpʋn. 7ꞌƐ dɩ aꞌba -ke -klaabonyʋꞌa zizi ꞌmʋ -le!
8-Tanyɩ ꞌkɩ a, -klaabokplisasʋɩ a-a nʋꞌo ꞌle -kuyre ꞌmʋ. ꞌTraamʋ ꞌtɔ ɔ, a -ke -aꞌba -Kɔyi Zezii ꞌꞌsisriꞌe-e ꞌꞌyiꞌa dɩ, a -nɩꞌe ꞌbho zɔ ꞌꞌyi ꞌle aꞌba tinɩɛ ꞌsrɛɛꞌɛ ꞌꞌyi. Nyʋ-ʋ -nɩꞌa ꞌbho zɔ ꞌꞌyi, -ka ʋn -nɩꞌa a, a-beeꞌa nʋnʋkpli -nɩ -kaa! 9-Ɛkedɩmaa, nyɔ-ɔ -nɩꞌa ꞌle kplilre ꞌli, ꞌɔ ꞌlimʋ -nmɔꞌɔ-ɔ wɔn ꞌle ɔ ꞌsrɛɛꞌɛ ꞌꞌyi ꞌle ɔ -nɩꞌe ꞌle -ziadɩ ꞌmʋ. 10A po ꞌle ꞌkpɩ -lrɛɛ, lɩ-ɩ nʋꞌa -aꞌba -Kɔyi ꞌtʋ, ꞌle a ꞌke ɩ yibo! 11Nyʋ-ʋ -nɩꞌa ꞌle kplisʋa ꞌli, ꞌwa bhebhelbhʋ ʋn-ʋ nʋꞌa, aꞌba -ke ꞌwa bhete ꞌɛ sʋ gbo -le! A po ꞌwa nʋnʋdɩ ꞌbho ꞌꞌpiemʋ ti ꞌle ɩ ꞌke ꞌbho zɔ ꞌꞌyi ꞌda. 12(A -gblee, lɩ ʋn-ʋ nʋꞌa ꞌle ꞌꞌzizekwla ꞌmʋ, ɩ se ꞌꞌyigbeyi ti-nmɔ, ɩ ꞌbhle-e dɩn ꞌmʋ.) 13-14A ꞌye li-ɔ, ꞌle ꞌwa nʋnʋdɩ ꞌmnɩ ꞌke ꞌꞌpiemʋ ꞌkpa a, -ka ɩ -nɩꞌa ꞌmʋ -ziaka, ʋn ꞌbhɛɛꞌo ʋn ꞌke ꞌna ꞌmʋtiꞌwɔn ꞌle ʋn ꞌke tinɩɛlre ꞌye. -Ɛkedɩmaa, ɩ se ꞌtɔ ꞌꞌzizekwla ꞌmʋ -nɩ. ꞌƖnnɛ ꞌbhleꞌe ꞌnynɩꞌa dɩ a, nyʋꞌa bhlewlu nʋꞌo na:
Nyʋ-ʋ ꞌmɛꞌɛ ꞌbho -Lagɔꞌɔ ꞌꞌyigbeyi, -ɩnmɔ ꞌmʋ nɩꞌa ꞌle ꞌwa ꞌꞌklumʋ, -sɔ ꞌꞌnynɔɔ ꞌmʋ ꞌle Zezii Kliisɩ ꞌke ꞌle -aꞌa -pɔlʋ gbo zɔ -ya!
15ꞌƖnnɛ ꞌbhleꞌe ꞌnynɩꞌa dɩ a ꞌꞌdu aꞌba ꞌꞌbhiꞌa dɩ gba ꞌmʋ aꞌba -nanabhʋꞌa -nɩ badiibadii nyʋ-ʋ seꞌa -naagɩ ꞌbhleꞌa ka -le! Abʋ ꞌꞌdu -naagɩbhlemʋ! 16A -gblee, -nɔɔ -ke ꞌꞌyi -a -nɩꞌa -laa, nyʋ-ʋ ꞌnʋ-o ꞌꞌnyinynilɩꞌa -dadudu. ꞌƐ dɩ a -mu -zɩgɩꞌa nʋnʋaꞌa ꞌꞌlru. Aꞌba ꞌbhɔ ꞌya nʋnʋdɩ -le! 17ꞌKa-a ɛ -nɩꞌe ꞌmʋꞌa dɩ a, nyʋ-ʋꞌa ꞌcrɛꞌɛ -aꞌba -Kɔyiꞌa ꞌgwlʋdɩ ꞌmʋti, aꞌba -nɩ ꞌwa ka -le! A po ꞌle ꞌkpɩ, lɩ ɔ ꞌbɔꞌɔ ti a ꞌke nʋ a, ꞌle a ꞌke ɩ ꞌmʋtiꞌwɔn! 18A -gblee, nyɔ nmɔ -ziꞌa bla, kpli ɔ-ɔ nɩꞌa ti a, a-bee -mnʋʋꞌa -nɩ nɛ ti -le! Lɩꞌa wɔnnyniyiꞌa kpli moꞌo. *-Lagɔꞌɔ Lisaazuzuꞌa -jijri yi amʋ ꞌꞌkpi ꞌle ɔ ꞌke amʋ ꞌmʋ ꞌꞌyi! 19-Bho a ꞌgbʋʋ ꞌꞌlru ꞌle a ꞌke -Lagɔ bʋbɔ, a -zɔ ɔ -wɛɛ li ꞌle a ꞌke ꞌya ꞌlʋ ɔ -bodɩ bhle! Ɩ -ke ꞌlʋɩ -lrɩɩ -Lagɔꞌɔ Lisaazuzu-u poꞌa amʋ wɔn ꞌmʋ, a ꞌbhɛɛ -nɩ nɩ -aꞌba -Kɔyi Zezii Kliisɩꞌa ꞌnynɩ ꞌꞌyi ꞌle aꞌba -pɔlʋ ꞌwee ti! 20A po -aꞌba -tɩta -Lagɔ ꞌsɛɛ ꞌꞌkɔmʋ ꞌle lɩ ꞌwee ꞌmʋ, ꞌle -aꞌba -Kɔyi Zezii Kliisɩ ꞌmnɔꞌɔ ꞌnynɩ ꞌmʋ!
Nyimiɛ -ke ꞌɔ ꞌnynɔꞌɔ kpli ʋn ꞌka ti-nɩ
21A -gblee, a-bʋ -yʋ ꞌꞌduꞌa ꞌbho *Zezii *Kliisɩ, a ꞌyʋyɔɔ -nɩ kwa ꞌle a ꞌke ꞌbho ꞌꞌdudu!
22ꞌLe ꞌnynʋkpakpɩ -bodɩ a, ʋn ꞌyɔɔ -nɩ ꞌwa nyimiɛ kwa ʋn ꞌke ɔ ꞌbho ꞌꞌdu! ꞌNynʋkpakpɩ-ɩ naꞌa ꞌbho -aꞌba -Kɔyi Zezii Kliisɩꞌa -jeyi, kpli ʋn ꞌka ti-nɩ ꞌle ʋn ꞌke ɔ ꞌtʋ nʋ, ꞌɩnnɩ moꞌo. 23-Ɛkedɩmaa, -ka Zezii Kliisɩ ꞌꞌduꞌa -klagba ꞌbho ꞌɔ -glɩgbawɔnyi, -ka -lue ꞌmnɔ ꞌka-a nyukpasu -mnɔɔ ꞌꞌduꞌo ꞌɔ ꞌnynɔꞌɔ -klagba. Zezii Kliisɩ -mnɔɔ ɔ, ɔ -se ꞌɔ -glɩgbaꞌa -klagbaꞌa ꞌꞌsɛ -ko. Ɔ ꞌnʋ-o ꞌɔ -glɩgba ꞌmnɛꞌɛ *ꞌpʋʋnyi -lrɛɛ. 24ꞌKa-a ɛ -nɩꞌe ꞌmʋꞌa dɩ a, -ka ꞌɔ -glɩgba ꞌmnɛ-ɛ ꞌyɔɔ -nɩ ꞌnɔ kwa ꞌle ɛ-ɛ ꞌꞌdu ꞌɔ ꞌbho, -ka -lue ꞌmnɔ ꞌka-a ꞌnynʋkpakpɩ ꞌke ꞌwa nyimiɛ kwaꞌyɔɔ -nɩ -lue -lue ꞌle ʋn ꞌke ɔ ꞌbho ꞌꞌdu ꞌle lɛꞌꞌo lɛ ꞌmʋ.
25ꞌLe nyukpasi -bodɩ a, -ka Zezii Kliisɩ -kmaꞌa ꞌɔ -glɩgbaꞌa dɩ ꞌle ɔ ꞌye ꞌɛ dɩ ꞌꞌdu ꞌle ɔ ꞌyeꞌa ꞌmɛ ɛ, ꞌka-a nyɔꞌꞌo nyɔ ꞌke ꞌɔ ꞌnynɔꞌɔ dɩ -kma. 26Zezii Kliisɩ ꞌmnɔ ꞌnʋ-o -kaa, ꞌle ꞌɔ -glɩgba ꞌmnɛ ꞌke -Lagɔꞌɔ ꞌꞌyiglɛlɛ ꞌꞌdu. ꞌƆ ꞌꞌdɩzɩgɩ-ɩ zaꞌa ꞌɔ ꞌmɛmɛɛ ꞌmnɛꞌɛ ꞌꞌdɩ, -ka ɔ nʋ ꞌɛ ɛ, ꞌɩnnɛ nʋ ɛꞌo ꞌle ɛ ꞌye *liꞌsaa ꞌbho -Lagɔꞌɔ ꞌꞌyigbeyi ꞌle ꞌɛ nyʋꞌa *batizeeɛ ꞌꞌduꞌo ꞌɛ lɛtuꞌa ꞌmʋyibolɛ. 27A -gblee, ɔ ꞌnʋ-o -kaa, ꞌle ɛ -kaa ꞌꞌtɩ liꞌbhle ꞌbho ꞌɔ ꞌꞌyigbeyi ꞌle ꞌɔ ꞌnynɩꞌa ꞌꞌyibhɛnynɩ ꞌke ɛ ꞌꞌkpi -nɩ ꞌle ɛ ꞌke ꞌꞌyrili-nmɔ ꞌle ɛ -kaa ꞌbɩ liꞌbhle ꞌbho -Lagɔꞌɔ ꞌꞌyigbeyi. 28ꞌKa-a ꞌɛ lɛtu ꞌke ꞌnynɔbhlemʋ -bodɩ -nɩ -lrɛɛ. -Ka ʋn -kmaꞌa ꞌwa ꞌꞌbhiꞌa dɩ, nyɔꞌꞌo nyɔ -kma -kaa ꞌɔ ꞌnynɔꞌɔ dɩ! Nyɔꞌꞌo nyɔ-ɔ -kmaꞌa ꞌɔ ꞌnynɔꞌɔ dɩ, ɔ -kmaꞌa-a ꞌɔ ꞌꞌbhuoꞌa dɩ -ziaka. 29A -gblee, nyɔꞌɔ ꞌnyɛ ꞌɔ ꞌꞌbhuo ꞌmʋ! -Ka Zezii Kliisɩ ꞌꞌduꞌa ꞌɔ -glɩgba ꞌꞌyrili ꞌle ɔ -kmaꞌa ꞌɛ dɩ a, ꞌka-a nyunyɔ-ɔ nʋꞌo ꞌɔ kuꞌa dɩ. 30Zezii Kliisɩ ꞌmnɔ-ɔ ꞌzi-e -aꞌba dɩ, -ɛkedɩmaa, -a -nɩ ꞌwee ꞌꞌdu-o ꞌɔ -glɩgbawɔnyiꞌa nyʋ. 31ꞌƐ dɩ -Lagɔꞌɔ wlu nʋꞌo: Nyukpasu ꞌke ꞌɔ -tɩta -ke ꞌɔ ꞌlotʋ ꞌꞌyiꞌwlʋ ꞌle ɔ -ke ꞌɔ ꞌnynɔ ꞌke ꞌwa ꞌꞌbhiꞌa da pa ꞌle ʋn -nɩ ꞌsɔn ꞌke nyɔ -lue ꞌtɩn ꞌꞌdu. 32A ꞌye li-ɔ, ꞌɛ lɛtu -tɛꞌɛ ꞌmʋ-ɛ. -Tanyɩ ꞌkɩ a, nyʋꞌa ꞌwɩn ɩ ꞌmʋti. ꞌTraamʋ ꞌtɔ ɔ, ꞌɛ -ziadɩ ꞌkpa-a ꞌꞌpiemʋ. ꞌƖn-ɩ ꞌlɛ-ɛ ꞌna Zezii Kliisɩ -ke ꞌɔ -glɩgbaꞌa dɩ. 33ꞌKa-a aꞌba dɩ -nɩꞌo -lrɛɛ. ꞌƐ dɩ aꞌba nyɔꞌꞌo nyɔ -kma ꞌɔ ꞌnynɔꞌɔ dɩ -ka ꞌɔ ꞌꞌbhuo, ꞌle ꞌnynʋkpakpɩ -mnʋʋ ꞌke ꞌbho ꞌwa nyimiɛ ꞌꞌdu -lue -lue -lrɛɛ!
6ꞌꞌYreetɩ -ke ꞌwa ꞌbhlemʋꞌa -dedekpli
1ꞌLe a-bee -mnʋʋ -bodɩ a, ꞌꞌyreetɩ-a, ɛ -nmɔꞌɔ-ɔ ꞌꞌyrili ꞌle a ꞌke ꞌbho aꞌba ꞌbhlemʋ ꞌꞌdu. ꞌƖnnɛ nʋꞌo -aꞌba -Kɔyi ꞌtʋ. 2A -gblee, -Lagɔꞌɔ gbawlu -lue na: ꞌꞌYu, ꞌꞌdu ꞌbho -aꞌa -tɩta -ke -aꞌa ꞌlotʋꞌa wlu! ꞌƐ gbawlutu-u ꞌmo-o -yɛ kɔꞌɔ nya -ɛ -ke lemʋ ꞌꞌnitiwʋnnawlu -nɩꞌa. 3Ɛ-bɛ ꞌꞌnitiwʋnnawlu ꞌmnɛ na: -Bho -ɩn -kʋ ʋ ꞌbho-o ꞌꞌdu a, -a ꞌwa-a ti ꞌle -a -gwleꞌe ꞌkmʋ ꞌmʋ.
4A-bʋ -yʋ ꞌma-a ꞌꞌyreetɩꞌa ꞌbhlemʋ, aꞌba -tbha ꞌꞌyreetɩ ꞌcɛ -le! Lɛ a ꞌkʋ ʋ -bodɩ nʋ, -aꞌba -Kɔyi *Zezii *Kliisɩꞌa -jolʋ -ke ꞌꞌyi a -nɩꞌa, ꞌɩnnɛ a ꞌke ʋ -tɔ.
Nyʋꞌa lbhʋnʋmʋ -ke ꞌwa ꞌbhlemʋ, kpli ʋn ꞌka ti-nɩ
5A-bʋ ꞌma-a nyʋꞌa lbhʋnʋmʋ, ꞌɩn-ɩ ꞌtmʋʋꞌo amʋ-ɛ, aꞌba -klɩgbɩ -ke lbhʋ a-a nʋꞌa a, a ꞌꞌdu ʋ ꞌbho -pɔlʋꞌa klɛ ti! A ꞌbhle ꞌwa -sɩanyɩ ku ꞌmʋti ꞌle a ꞌke ʋ lbhʋzɛgɛ -bodɩ nʋ! -Bho a nʋ -kaa, *Zezii *Kliisɩ a-a ꞌꞌduꞌo ꞌbho ꞌꞌbhalrɛɛ. 6ꞌƖn-ɩ ꞌtmʋʋꞌo amʋ-ɛ, -bho ʋn -nɩ ꞌbho aꞌba ꞌꞌtroli, ʋn ꞌke aꞌba ꞌꞌdɩ -zaꞌa dɩ, aꞌba ꞌꞌdu -nɩ nʋ ꞌbhoꞌa ꞌꞌsɛ -le! -Bho ʋn ꞌꞌnyɩ amʋ lbhʋ, a nʋ ɩ aꞌba -pɔlʋꞌa klɛ ti, ꞌɩnnɛ nʋꞌo -Lagɔ ꞌtʋ! A po ꞌle ꞌkpɩ a ꞌke aꞌba -pɔlʋ tiꞌwla ꞌle a ꞌke ꞌɔ ꞌgwlʋdɩ nʋ ꞌꞌkɔmʋ, -ɛkedɩmaa, Zezii Kliisɩꞌa lbhʋnʋmʋ a ꞌꞌduꞌo! 7Kɩn, a nʋ ꞌwa lbhʋ -pɔlʋzɛgɛ ꞌmʋ! -Bho a -ka ꞌɛ lbhʋtu-u nʋ a, a popo ꞌgwlʋti na ɛ -se nyunyuꞌa ꞌꞌsɛꞌɛ lbhʋ -ko! -Aꞌba -Kɔyi ꞌmnɔꞌɔ lɛ moꞌo -lrɛɛ. 8A ꞌye li-ɔ, -bho nyɔ ꞌꞌdu nyɔꞌɔ lbhʋnʋyi ꞌle -bho ɔ -se ɛ -ko, -zɛgɛ nyɔꞌꞌo nyɔ-ɔ nʋꞌa a, -aꞌba -Kɔyi ꞌmnɔ -see ɛ gboꞌmate yi, ɔ-ɔ ꞌye -ɔ -zɛgɛ ꞌꞌlruli-nʋ -mʋ ꞌɔ -zɩgɩ ꞌmnɩꞌa dɩ.
9A-bʋ ꞌbhleꞌa lbhʋnʋmʋ, a-bee -mnʋʋ nʋ ʋ -zɩgɩ ꞌꞌlruli -lrɛɛ! Aꞌba -nyni nʋ kwa ꞌmʋti -le! A de ꞌꞌgwli na, a -ke aꞌba lbhʋnʋmʋ bhete gbo, aꞌba ꞌweeꞌa -klagba -nɩꞌe-e ꞌle yaku ꞌli! ꞌƖnnɔ a ꞌꞌsriꞌe ꞌꞌyi. Ɔbɔ-ɔꞌɔ ꞌtɛ nyɔ ꞌmʋ.
ꞌJɛ -Lagɔ-ɔ nʋꞌa ꞌɔ nyʋ ꞌꞌlruli ꞌle ʋn ꞌke *Sataan wɔn-zi
10-Yɛ -sieꞌa ꞌbho ꞌɩn ꞌka amʋ ꞌtmʋʋ a, ꞌɩnnɛ ꞌmo-o, a-bʋ -ke -aꞌba -Kɔyi ꞌꞌsisriꞌa ꞌꞌyi, a ꞌꞌtayi ꞌɔ wɔnkuɛklagba ꞌꞌyiti ɛ ꞌke amʋ ꞌkpɩ ꞌꞌnyɩ ꞌle a ꞌke ꞌmʋtikuku! 11-Ka, -bho ꞌꞌsrojayi ꞌka tʋ ꞌmʋ mu, -ka ɔ ꞌꞌduꞌa ꞌɔ tʋvɔlɩꞌa klɛ ku li ꞌle ɔ ꞌke tʋ lu a, ꞌka-a, ꞌjɛ -Lagɔ nʋꞌa amʋ ꞌꞌlruli ꞌle a ꞌke ꞌꞌnyinynidɩꞌa tiyayi *Sataanꞌa ꞌsrɛ wɔnyiꞌbhɛɛ, a -de ꞌle ɛ ꞌli ti -ka -zɛgɛka ꞌle a ꞌke ɛ wɔn-zi -ziaka! 12A -gblee, ɛ -se nyunyu -a kpa tʋ gbo -ko. Nyʋ-ʋ -ke -a vɔꞌɔ tʋ a, nyɔꞌɔ ꞌye ʋ li. ꞌWa nyʋtu-u ꞌmo-o ꞌꞌnyinynidɩꞌa -zuzu ꞌbhleꞌa wɔnkuɛ ꞌle yaku ꞌꞌyi, ꞌle, nyʋ-ʋ -nɩꞌa ꞌle ꞌꞌnyinynidɩꞌa -kuyre ꞌmʋ, ɩ-ɩ kɔ ꞌnʋ ꞌꞌlru ꞌmʋ. ꞌƖnnɩ -ke -a vɔꞌɔ tʋ. 13ꞌƖnnɛ ꞌbhleꞌe ꞌnynɩꞌa dɩ a, ꞌjɛꞌɛ klɛ -Lagɔ-ɔ nʋꞌa amʋ ꞌꞌlruli, ꞌle a ꞌke Sataan wɔnyiꞌbhɛɛ, a -kpʋn nɩ -kʋtɩ ꞌsɔn -gli, ꞌle, -da tʋ-ʋ ꞌyeꞌa ꞌꞌlru kwa-ku -nɩ mʋ a, ꞌle ɛ -kaa amʋ ꞌꞌyi pa ꞌle a ꞌke ꞌga ꞌꞌyi tiku!
14ꞌKa-a ɛ -nɩꞌe ꞌmʋꞌa dɩ a, a san ꞌꞌyi! A -de -ziadɩ ꞌli ti! Ɩ-bɩ -ziadɩ ꞌmnɩ kɔkɔɔꞌɔ-ɔ ꞌꞌbɛtʋ ꞌꞌsrojayi -bhlaꞌa ꞌꞌpli ꞌmʋ ꞌle ꞌɔ ꞌmʋpalɩ -nɩꞌa ꞌbho ꞌɔ ku li ꞌke ꞌtɩn -nɩ ꞌle ɔ ꞌke ple -ka -zɛgɛka. A -de ꞌꞌyisrɛɛkpliꞌa nʋnʋa ꞌli ti -lrɛɛ! Ɩ-bɩ ꞌꞌyisrɛɛkpli ꞌmnɩ kɔkɔɔꞌɔ-ɔ nɛtɛ ɔ-bɔ ꞌꞌsrojayi ꞌmnɔ bhaꞌa ꞌɔ ꞌbɛtɛ ꞌꞌyi. 15ꞌLotʋꞌa ꞌꞌnynuu-a, a yaa ꞌmʋti ꞌle a ꞌke Zeziiꞌa ꞌꞌdɩzɩgɩ kpa! Ɩ-bɩ ꞌꞌdɩzɩgɩ ꞌmnɩꞌa dɩ, -pɔlʋꞌa bhlubhlua -Lagɔ-ɔ ꞌꞌnyɩꞌa ꞌɔ nyʋ a, nyʋ-ʋ ꞌye ɛꞌo. ꞌƐ lɛtu kɔɔꞌɔ-ɔ -ka -bho ꞌꞌsrojayi paꞌa ꞌɔ -bhopɩmʋpalɩ ꞌmʋ ꞌle ɔ ꞌke -na -ka -zɛgɛka. 16ꞌBho ꞌɛ lemʋ a, a de -aꞌba -Kɔyi *Zezii ꞌꞌgwli ꞌꞌkɔmʋ! ꞌƆ ꞌꞌgwlideɛ ꞌmnɛ, ꞌꞌnyinynidɩꞌa tiyayi Sataanꞌa nʋnʋdɩ vɔꞌɔ amʋ tʋ gbo, ꞌɩnnɛ nʋ ɛꞌo ꞌle ɩ -see amʋ ꞌꞌyi -pa yi. ꞌꞌGwlideɛ ꞌmnɛ kɔkɔɔꞌɔ-ɔ ꞌꞌsrojayiꞌa ꞌꞌyikalɛ ɔ ꞌbhleꞌa sʋ ꞌmʋ, ꞌle, sɩn-ɩ ꞌbhleꞌa nɛ ꞌꞌyi a, -bho ꞌɔ ꞌꞌyidedeyi ꞌꞌvuto nɛ ɔ ꞌꞌyi ꞌle ɔ-ɔ zɩ ꞌɩ -jeyi, ɩ-ɩ ꞌmʋꞌo ꞌle ꞌya tbhɔ ɔꞌo. 17ꞌLe ꞌꞌbhalrɛɛke a, ꞌlotʋꞌa ꞌꞌnynuu-a, aꞌba ꞌpʋnpʋan a ꞌyeꞌa a, a -de nɛ ꞌli ti! Ɛbɛ ꞌmnɛ kɔɔꞌɔ-ɔ ꞌꞌsrojayiꞌa nɛtɛkwloo ɔ-ɔ ꞌꞌjriꞌa ꞌꞌlru. A -gblee, -Lagɔꞌɔ wlu *ꞌɔ Lisaazuzu-u ꞌꞌnyɩꞌa amʋ a, a -de nɛ ꞌli ti -lrɛɛ! Ɛbɛ kɔɔꞌɔ-ɔ ꞌꞌsrojayiꞌa -blajrɛɛ ɔ-ɔ ꞌbhleꞌa kwa ꞌle ɔ-ɔ muꞌa ꞌɔ ꞌꞌyidedeyi ꞌꞌyi; -ka -lue ꞌmnɔ ɔ, a ꞌbhle -kaa -Lagɔꞌɔ wlu wɔn ꞌmʋ! 18ꞌƖn-ɩ ꞌtmʋʋꞌo amʋ-ɛ, ꞌle ɩ-bɩ lɩ ꞌwee ꞌmnɩ, ꞌya nʋnamʋ, a po *-Lagɔ wɔn gbo ꞌle a ꞌke ɔ ꞌla ɔ ꞌke amʋ -kpa! A po ɔ wɔn gbo ꞌꞌkɔmʋ! -Bho a -ka -kaa-a nʋ a, ꞌɔ Lisaazuzu po amʋ -jolʋ gbo! ꞌƐ dɩ a de yra, a ꞌke ꞌkpa ꞌꞌyi ku ꞌle a ꞌke Zezii *Kliisɩꞌa nyʋ ꞌweeꞌa dɩ -Lagɔ wɔn gbo po! 19Aꞌba ꞌmate ꞌmna-aꞌa dɩ ti -le -lrɛɛke! A po ɔ wɔn gbo, ꞌle, Zezii Kliisɩꞌa ꞌꞌdɩzɩgɩꞌa ꞌmʋzanamʋ, -bho ꞌɩn ꞌꞌsi ꞌbho ti a, ꞌɩn -kaa wlu ꞌꞌyiꞌkɩkle, ꞌle ꞌɔ ꞌꞌbhuo ꞌke ꞌɩnmʋ ꞌꞌyisrɛɛwlu wɔn ꞌmʋ po ꞌle ꞌɩn ꞌke ꞌꞌyrili-cɛ. ꞌLe, ɩ-bɩ ꞌɔ ꞌꞌdɩzɩgɩ-ɩ ꞌkpaꞌa ꞌꞌpiemʋ, ꞌɩn ꞌke ʋ ɩ -tɔ ʋn ꞌke ɩ yibo. 20A -gblee, *Zezii Kliisɩꞌa -dalbhoyi ꞌɩn ꞌꞌduꞌo ꞌle ꞌɩn-ɩ zaꞌa ꞌɔ ꞌꞌdɩ ꞌmnɩꞌa dɩ, ꞌɩn -po-ɛꞌɛ -jie ꞌmʋ. ꞌƐ dɩ ꞌɩn-ɩ ꞌtmʋʋꞌo amʋ, a ꞌke ꞌan dɩ -Lagɔ wɔn gbo po, -ka ɛ ꞌꞌsriꞌa ꞌɩnmʋ ꞌꞌyi ꞌɩn ꞌke nʋ ꞌꞌcɩcɩ, ꞌɩn ꞌke ꞌna ꞌꞌyrili-cɛ ꞌɩn ꞌke -wlu.
ꞌYewluꞌa ꞌꞌyigwɛnamʋ
21A ꞌye li-ɔ, -aꞌba dɩkmalotʋꞌa ꞌꞌyu Tisikɩ ꞌꞌyri kpʋnꞌa ti ꞌbho -aꞌba -Kɔyi -Lagɔꞌɔ -jeyi, -ɔ -ke ꞌɩn-ɩ nʋꞌa ꞌɔ lbhʋ, ꞌɩnnɔ ꞌye amʋ ꞌan ꞌꞌkpidɩ -bodɩ ꞌmʋ-za mʋ. 22Lɛ-ɛ ꞌbhleꞌa ꞌnynɩ -ɛ -ke dɩ ꞌɩn-ɩ lbho ꞌɔ ꞌle amʋ gbo a, ꞌɩnnɛ ꞌka-a! A -gblee, ꞌɩn-ɩ lbho -ɔꞌo, ꞌle, dɩ-ɩ -nɩꞌa ꞌnɔɔ -amʋ gbo zinamʋ, ɔ ꞌke amʋ ꞌya kuna po ꞌle ɔ ꞌke amʋ ꞌkpɩ ꞌꞌyi po -lrɛɛ.
23-Aꞌba -tɩta -Lagɔ -ke -aꞌba -Kɔyi *Zezii *Kliisɩ -nɩ ꞌsɔn ꞌꞌnyɩ ꞌlotʋꞌa ꞌꞌnynuu -pɔlʋꞌa bhlubhlua-e dɩkɩkmɛɛ -ke ꞌwa ꞌꞌgwlideɛ ꞌꞌkɔmʋ! 24Nyʋ ꞌwee -ke -pɔlʋ gbo -aꞌba -Kɔyi Zezii Kliisɩꞌa dɩkmɛɛꞌɛ ꞌwlʋꞌa ꞌꞌkɔmʋ a, -Lagɔ -wʋnna nʋ ꞌꞌniti!