2 Timotee

ꞌPɔlʋꞌa ꞌꞌbɔgʋꞌa ꞌsɔnnɛ ɔ poꞌa TIMOTEE -jeyi

Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.

Timotee ꞌꞌyri kpʋnꞌa ti -ɔ -ke Zeziiꞌa -dalbhoyi ꞌPɔlʋ -plɛꞌɛ -Lagɔꞌɔ lbhʋ -lue ꞌmʋ, ꞌɩnnɔ po ꞌɔ ꞌꞌbɔgʋꞌa ꞌsɔnnɛ -jeyi, -ɛkedɩmaa, ɔ yiboꞌo-o na ꞌɔ ꞌmɛwɩ ꞌꞌkɔɔꞌɔ-ɔ gbo. ꞌPɔlʋ ꞌmnɔ -nɩꞌe-e -jie ꞌmʋ -Lagɔwluꞌa dɩ. Ɛ -nɩꞌa -kaa ꞌmʋ a, ɔ-ɔ ꞌpo-o Timotee ꞌkpa ꞌꞌyi ꞌle ɔ ꞌke ꞌkpa ꞌꞌyi ku ꞌle ɔ ꞌke -Lagɔꞌɔ lbhʋ nʋ ꞌꞌkɔmʋ.

ꞌYewlu

¹Timotee, ꞌɩnmɔ ꞌPɔlʋ poꞌo -ɩnmʋ ꞌꞌbɔgʋ -jeyi. ꞌƖn ꞌꞌdu-o *Zezii *Kliisɩꞌa -dalbhoyi ꞌle -Lagɔꞌɔ ꞌgwlʋdɩ ꞌmʋ. ꞌƐ lbhʋ ꞌꞌyi ꞌɩn -nɩꞌo, ꞌꞌkɔgwlɛtinɩɛ ɔ ꞌꞌduꞌa -a-bʋ nyʋ -ke *Zezii Kliisɩ ꞌꞌsisriꞌa ꞌꞌyi wɔn ꞌmʋti, ꞌle ꞌɩn ꞌke ʋ ꞌɛ ꞌꞌkpidɩ -bodɩ ꞌmʋ-za.

²ꞌAn Dɩkmalagɔjeyiꞌa ꞌꞌyu Timotee, -aꞌba -tɩta -Lagɔ -ke -aꞌba -Kɔyi, Zezii Kliisɩ, -sie -ɩnmʋ gbo, ʋn ꞌke -ɩnmʋ -zɛgɛ ꞌꞌlrulinʋ ꞌle ʋn ꞌke -ɩnmʋ -pɔlʋꞌa bhlubhlua ꞌꞌnyɩ!

ꞌPɔlʋ-ʋ ꞌpo-o Timotee ꞌkpa ꞌꞌyi

³-Lagɔ, ꞌan ꞌꞌna ꞌꞌwe bʋbɔꞌɔ -bɛnyɩ, -ka -lue ꞌmnɔ, ꞌka-a ꞌmna-a bʋbɔ nɔꞌo ꞌtraamʋ ꞌle -pɔlʋꞌa ꞌꞌyisrɛɛɛ ꞌmʋ, ꞌɩnmɔ po ꞌɔ ꞌsɛɛ. ꞌƖn-ɩ ꞌpo -ɔ ꞌsɛɛ -aꞌa dɩ, -ɛkedɩmaa, -ka ꞌɩn-ɩ poꞌa *-Lagɔ wɔn gbo ꞌꞌkɔmʋ, ꞌka-a ꞌɩn-ɩ popoꞌo -aꞌa dɩ ꞌgwlʋti. ⁴ꞌBho ꞌɛ lemʋ -lrɛɛke a, zɔ ꞌtɩn ꞌzɔ, ꞌɩn sieꞌa ꞌbho -ɩnmʋ Efɛɛzɩ, ꞌɩn ꞌka mu a, ꞌꞌvivisʋ -ɩn ꞌꞌviꞌa a, ꞌɩn -see ꞌɛ dɩ ꞌmate keꞌa dɩ, ꞌɩn ꞌbɔꞌɔ ti ꞌɩn ꞌke -ɩnmʋ ꞌꞌyri ꞌmʋ ꞌye -lrɛɛ ꞌle ꞌbʋbʋa ꞌke ꞌɩnmʋ ꞌlbha. ⁵-Gblee, ꞌꞌgwlideɛ-ɛ -nɩꞌa pepe -aꞌa ꞌꞌnanynaakpʋ Loyiisɩ -ke -aꞌa ꞌlotʋ Eniisɩ ꞌbhleꞌa ꞌmʋ ꞌtɩn, ɛ-bɛ ꞌꞌgwlideɛ -lue ꞌmnɛ, ꞌɩnnɛ ꞌɩn ꞌyeeꞌe -ɩnmʋ ꞌmʋ li, ꞌle ꞌɩn yiboꞌo -ka ɛ -nɩꞌa -kaa ꞌmʋ -ziaka, ꞌle ꞌɩn-ɩ poꞌo -Lagɔ ꞌsɛɛ ꞌɛ dɩ. ⁶ꞌƖnnɛ ꞌbhleꞌe ꞌnynɩꞌa dɩ a, ꞌɩn deꞌa -ɩnmʋ *kwa ꞌꞌlru ti, ꞌkpɩ -Lagɔ ꞌꞌnyɩ -nɩꞌa ꞌbho -ɩnmʋ, -ɩn ꞌke ꞌɔ lbhʋ nʋ, ꞌɩn-ɩ popoꞌo -ɩnmʋ ꞌgwlʋti, ꞌꞌluo nɩ ꞌmʋ -ɩn ꞌke ɛ lbhʋ ti -nʋ -nɩ ꞌle -pɔlʋzɛgɛ ꞌmʋ! ⁷-Gblee, -aꞌa ꞌꞌnnɩ li -le! -Ɛkedɩmaa, -Zuzu -Lagɔ ꞌꞌnyɩꞌa -amʋ, ɔ-ɔ ꞌmo-o ꞌMʋtiyaazuzu, ɔ -se -Tumaazuzu -ko. Lɛ ɔbɔ-ɔ nʋꞌa -amʋ -bodɩ a, ꞌɩnnɛ ꞌmo-o, ɔ-ɔ ꞌꞌnyɩ-e -amʋ wɔnkuɛ ꞌle -a ꞌke -Lagɔꞌɔ lbhʋ nʋ. ꞌƖnnɔ ꞌꞌsiꞌe ꞌbho -ɔ poꞌo -amʋ -a -bonyunyuꞌa ꞌtʋ ꞌmʋ ꞌle -a kɩkmaꞌa -kɩkma dɩ, ꞌle ɔ-ɔ ꞌꞌnyɩꞌe -amʋ ꞌkpɩ -a ꞌbhɛɛꞌɛ -aꞌba ꞌꞌbhi wɔnyi.

⁸ꞌBho ꞌɛ lemʋ a, Timotee, po ꞌle ꞌkpɩ -ɩn ꞌke -aꞌba -Kɔyiꞌa ꞌꞌdɩzɩgɩ -za. Dɩnꞌa ꞌlbha -ɩnmʋ -le! ꞌƖnmɔ nyʋ poꞌa -jie ꞌmʋ ꞌɔ dɩ, ꞌmna-aꞌa dɩnꞌa ꞌlbha -ɩnmʋ -le -lrɛɛ! ꞌLe -mnɔɔɔ gbo a, ꞌwɔn ꞌɩn -ke -ɩn ꞌke sɩasɩaa -lue ꞌmʋꞌbhɛɛ -lrɛɛke ɩ-bɩ *Zeziiꞌa ꞌꞌdɩzɩgɩꞌa dɩ! Wɔnkuɛ -Lagɔ-ɔ ꞌꞌnyɩꞌa -ɩnmʋ a, ꞌle ɛ ꞌmʋ -nʋ -nɩ ꞌɛ lɛtu! ⁹-Ɩn ꞌye li-ɔ, -Lagɔꞌɔ ꞌꞌbhuo-o ꞌpʋʋnꞌo -amʋ ꞌle ɔ ꞌye -amʋ ꞌmʋꞌtɛ -a ꞌke ꞌɔ nyʋ ꞌꞌdu sese ke-ɔ, ꞌle ꞌkmʋ ꞌye tiyi. -Abʋ se ꞌkɩ ɛ ꞌyeka -nɩ, ꞌle ɔbɔ -bodɩ -zɛgɛ ɔ deꞌa ꞌbho ti ɔ ꞌke -amʋ -bodɩ nʋ ꞌle Zezii *Kliisɩ ꞌmʋ, ꞌɛ ꞌꞌyriꞌa ꞌbɩ ꞌwlʋ -nɩꞌo. ¹⁰ꞌTraamʋ ꞌtɔ ɔ, ꞌgɛglɛlɛɛ! ɛ-bɛ -zɛgɛ ꞌmnɛ ꞌkpa-a ꞌꞌpiemʋ, -ɛkedɩmaa, -aꞌba -Kɔyi Zezii Kliisɩ ꞌyi-e ꞌnɔɔ ꞌkmʋ ꞌmʋ. Ɔbɔ ꞌmnɔ, ꞌɩnnɔ ꞌlbhaꞌa ꞌmɛmɛɛꞌɛ ꞌmʋtikukuɛ wɔn. ꞌƖnnɔ -tɔꞌɔ -amʋ na, -bho nyɔ ꞌwɔɔn ꞌɔ ꞌꞌdɩzɩgɩ, ɔ-ɔ ꞌye-e ꞌꞌkɔgwlɛtinɩɛ.

¹¹-Gblee, ꞌle ꞌmna gbo a, -Lagɔ ꞌꞌduꞌo ꞌbho ꞌɩnmʋ-ɛ ꞌle ɔ-ɔ lbhoꞌo ꞌɩnmʋ ꞌle ꞌɩn ꞌke nyʋ ꞌꞌdɩzɩgɩ ꞌmnɩ -bodɩ ꞌmʋ-za ꞌle ꞌɩn ꞌke ꞌbho ꞌꞌsi ꞌɩn ꞌke ʋ ɩ -tɔ. ¹²ꞌkle ꞌɩn-ɩ ꞌyeꞌa ꞌnɔɔ -jie ꞌmʋ, ꞌɛ ꞌkpʋꞌa ꞌꞌbhuo moꞌo. ꞌLe ꞌmna se ꞌɛ dɩn ꞌbhle, -ɛkedɩmaa, ꞌɩn yiboꞌo-o Zezii Kliisɩ -yɔ ꞌmna deꞌa ꞌꞌgwli, ꞌle ꞌɩn yiboꞌo ꞌan -pɔlʋꞌa klɛ ti -ka ɔbɔ ꞌmnɔ ꞌbhleꞌa wɔnkuɛ, ꞌɔ ꞌꞌdɩzɩgɩꞌa lbhʋ ɔ -tbhaꞌa ꞌɩnmʋ, ɔ ꞌke ɛ ꞌꞌyriliꞌꞌdu ꞌle ɛ ꞌke ꞌɔ leyinɔɔ ꞌꞌkpi bhla.

¹³Timotee, ꞌꞌdɩzɩgɩ ꞌɩn -zaꞌa -laa -ɩnmʋ -bodɩ ꞌmʋ -ɩn ꞌwɔnꞌɔ ꞌbɔ, -zɩ ɩ -ɩn -bonyunyu -bodɩ ꞌmʋ! -Aꞌa -cɛ nɩ ꞌꞌkpi -leꞌꞌa! -Bho -ɩn -kɩ ɩ ꞌmʋ-ʋza a, -ɩn -ke Zezii Kliisɩ ꞌꞌsisriꞌe-e ꞌꞌyiꞌa dɩ, de ɔ ꞌꞌgwli ꞌle -ɩn ꞌke -Lagɔ -ke nyʋꞌa dɩkmɛɛ ꞌmʋꞌbhle ꞌle -ɩn ꞌke ꞌle ɩ ꞌmʋ ti-de. ¹⁴ꞌBho ꞌɛ ꞌꞌkpi a, Zeziiꞌa ꞌꞌdɩzɩgɩ -Lagɔ -tbhaꞌa -ɩnmʋ, ꞌꞌdu ꞌya dɩ gba ꞌmʋ, ꞌle, *-Lagɔꞌɔ Lisaazuzu -nɩꞌa -amʋ ꞌmʋ, ꞌle ꞌɔ ꞌkpɩ ꞌmʋ, nyɔ -kɩɩ ɩ ꞌꞌyida ꞌmʋ -za.

¹⁵-Mnaaaꞌa ꞌꞌbhuo yiboꞌo-o -ka Zeziiꞌa -glɩgbawɔnyiꞌa nyʋ-ʋ -nɩꞌa ꞌle Aziibhlʋkpa ꞌꞌkpi, ʋn -zaꞌa-a ꞌɩnmʋ kwa gbo. Fizɛlɩ -ke Ɛmozɛnɩ ꞌꞌsri -ʋ ꞌꞌkpi -lrɛɛ. ¹⁶ꞌLe, -yɔ ꞌma-a Onezifɔɔ ɔ, ɔbɔ-ɔ poꞌo ꞌɩnmʋ ꞌkpa ꞌꞌyi. -Ka ꞌɩn paꞌa -jie, ꞌɛ ꞌlbhaa nɔ dɩn ꞌꞌyi ꞌbho nyʋꞌa ꞌꞌyigbeyi. ꞌƐ dɩ, -aꞌba -Kɔyi -wʋnna ꞌɔ ꞌꞌbhlegbo ꞌꞌniti! ¹⁷-Gblee, -da ɔ yiꞌa ꞌnɔɔ *ꞌWlɔmʋ a, ɔ ꞌbɔ-ɔ ꞌɩnmʋ ti kplokplokplo -kpayɩ!, -da ꞌɩn -nɩꞌa, ɔ ꞌye ꞌbho ꞌye, ꞌle ꞌɩn -ke ɔ ꞌye ꞌyɩye. ¹⁸-Aꞌba -Kɔyi nʋ ɔ -zɩgɩ ꞌꞌlruli ꞌle *-lebhɔɔnɔɔ ꞌli! Ɔ-bɔ -lue ꞌmnɔ, -da ꞌɩn -nɩꞌa Efɛɛzɩ, -ka ɔ -kpaꞌa ꞌɩnmʋ tenyɩ, -mnaaaꞌa ꞌꞌbhuo yibo nɩ-oꞌo -lrɛɛke.

Nyɔ-ɔ nʋꞌa -Lagɔꞌɔ lbhʋ -ka -zɛgɛka, ɔ-ɔ ꞌnʋ -ɔ -zɛgɛ ꞌꞌlruli

¹-Ɩn ꞌye li-ɔ, Timotee, -ɩnmɔ ꞌma-a ꞌan -Lagɔjeyiꞌa ꞌꞌyu, ꞌꞌsrii *Zezii *Kliisɩ ꞌle ꞌɔ ꞌꞌbhuo ꞌke -ɩnmʋ ꞌmʋtikukuɛ ꞌꞌnyɩ ꞌle ꞌɔ ꞌlimʋꞌa wɔnnmɔɛ ꞌmʋ -ɩn ꞌke ꞌle ꞌɛ ꞌli ti-de. ²-Gblee, Zezii Kliisɩꞌa ꞌꞌdɩzɩgɩ-ɩ ꞌma-a -ziadɩ ꞌɩn-ɩ tɔꞌɔ nyʋꞌa -dadudu ꞌle ʋn ꞌye ꞌɩ ꞌwɔɔn, ʋn ꞌye ꞌɩ ꞌmʋ-za -lrɛɛ, -ɩn ꞌwɔn-ɔ ꞌya ꞌwee ꞌbɔ ꞌꞌbhalrɛɛkeꞌa dɩ, ɩbɩ ꞌmnɩ, nyʋzɩgɩ -ʋ ꞌbhɛɛꞌɛ -ʋ ꞌke ꞌɩ ʋn -bonyunyu -tɔ ɔ, mu ꞌle -ɩn ꞌke ɩ ꞌwa nyunyutu -tɔ, ꞌle -ɩn ꞌke ʋ ꞌya -tɔtɔlɩ ꞌmnɩ -tbha!

³-Ɩn ꞌye li-ɔ, -bho -ɩn ꞌꞌdu Zezii Kliisɩꞌa dɩ ꞌle ꞌkleyeɛɛ ꞌke -ɩnmʋ ꞌꞌkpi bhla, kuku ꞌmʋti, -aꞌa ple -le! ꞌLe, ꞌꞌsrojayiꞌa -zɛgɛnɔ sɩasɩaa bhlaꞌa wɔn kplokplo -ɔ ꞌwlʋꞌa ꞌnynɩ, -ɩn ꞌke ꞌɔ ka -nɩ! ⁴-Gblee, -bho nyɔ pa ꞌꞌsroja ꞌle ɔ ꞌke tʋ ꞌmʋ -nɩ a, ꞌɔ dɩ se ꞌꞌpiemʋꞌa dɩ ꞌꞌkpi -nɩ ꞌle ɔ ꞌbɔꞌɔ ti ꞌɔ dɩ ꞌke ꞌɔ ꞌbhleyi ꞌtʋ nʋ. -Ka -lue ꞌmnɔ ɔ, -mnɔɔɔ -nɩ -kaa -lrɛɛ! ⁵Popo ꞌgwlʋti, -ka, nyɔ-ɔ pleꞌa, ɔ -ke ꞌɔ -bonyunyu-u mumuꞌa li ꞌle ɔ ꞌke ꞌnynɩ ꞌwlʋ a, ꞌya ꞌꞌtibheli ʋn triꞌa ti, -bho ɔ -see ɩ ꞌbho ꞌꞌdu, ꞌɔ ꞌye lɛ! -Ka -ɔ ꞌwlʋꞌa ꞌnynɩ -nɩꞌa a, -mnɔɔɔ -nɩ -kaa -lrɛɛ! ⁶-Gblee, ꞌka-a nyɔ-ɔ ꞌma-a -kpaaduyiꞌa dɩ -nɩꞌo -lrɛɛ. -Bho ɔ ꞌꞌdu ꞌɔ -yowliꞌa -kpaa ꞌle ɔ ꞌke ɛ ꞌzɔ -sɩa -nɩ kplokplo -lrɛɛ, ꞌle ɛ ꞌke zaan a, ɔbɔ ꞌmnɔ, ꞌɩnnɔ liꞌe ꞌɛ ꞌꞌyizayɔ. -Ka -lue ꞌmnɔ ɔ, po ꞌle ꞌkpɩ, -mnɔɔɔ ꞌke -kaa -nɩ! ⁷Dɩ ꞌɩn-ɩ zaꞌa -laa -ɩnmʋ -bodɩ ꞌmʋꞌa damʋ, -na nɩ -tɔɔ ti! -Bho -ɩn nʋ -kaa a, ꞌꞌlemnɩɩ -aꞌba -Kɔyi-i ꞌye-e -ɩnmʋ -naagɩ ꞌꞌnyɩ -mʋ ꞌle -ɩn ꞌke ɩ ꞌmʋtiꞌwɔn ꞌwee.

⁸ꞌƖn-ɩ ꞌtmʋʋꞌo -ɩnmʋ-ɛ, Zezii Kliisɩ ꞌma-a ꞌbhlʋkpayowli *Daviidɩꞌa ꞌꞌnayu, popo ꞌɔ dɩ ꞌgwlʋti! Ɔ ꞌmɛ-oꞌo ꞌle ɔ ꞌye glu -sɔ, ɔ ꞌye ti-nɩ -lrɛɛ. -Gblee, ꞌꞌdɩzɩgɩ-ɩ ꞌma-a -ziadɩ ꞌɩn-ɩ tɔꞌɔ nyʋ, ꞌɩnnɩ ꞌka-a! ⁹ꞌƖnnɩɩnɩ ꞌbhleꞌe ꞌnynɩꞌa dɩ ꞌɩn-ɩ sɩaꞌo ꞌle ʋn ꞌye ꞌɩnmʋ gbloko -po ꞌle -jie ꞌmʋ. Nyɔ-ɔ nʋꞌa ꞌꞌnyinynidɩ, -ka ʋn-ʋ nʋ ꞌɔ ɔ, ꞌɔ -ka ʋn nʋꞌo ꞌɩnmʋ. Kɩn, ꞌle ꞌmna gbo a, ꞌɩnmɔ ʋn poꞌo -jie ꞌmʋ. -Lagɔꞌɔ wlu -mnɛɛ ɛ, ʋn -see ɛ -jie ꞌmʋ po. Ɛbɛ-ɛ mumu-o ꞌꞌkpiti. ¹⁰ꞌKa-a ɩ -nɩꞌe ꞌmʋꞌa dɩ a, ꞌɩn ꞌwɔnꞌo ꞌɩn ꞌke ɛ wɔnyiꞌbhɛɛ. Sɩasɩaa ꞌwee ꞌɩn -nɩꞌa wɔnyenamʋ, nyʋ -Lagɔ ꞌtɛꞌɛ ꞌmʋ ɔ ꞌke -kɔ ɔ, ꞌwa dɩ moꞌo, ꞌle, nyʋ-ʋ deꞌa Zezii Kliisɩ ꞌꞌgwli ꞌle ʋn -ke ɔ-ɔ ꞌꞌsisriꞌa ꞌꞌyi, ꞌpʋnpʋan ꞌbho -Lagɔꞌɔ ꞌꞌyigbeyi, ɔ deꞌa ꞌbho ti ꞌwa dɩ, ʋ-bee -mnʋʋ ꞌke ɛ ꞌye ꞌle ɛ ꞌke ʋ ꞌmʋ ꞌꞌyi ɛ ꞌke tiꞌpɩple ꞌbho ꞌɔ ꞌꞌtroli, ꞌle ꞌɔ ꞌnynɩꞌa ꞌꞌyibhɛɛɛꞌɛ -vlavlɩ ꞌmʋ ʋn -ke Zezii ꞌke -dalue -nɩ ꞌꞌkɔgwlɛka. ¹¹ꞌBho ꞌɛ lemʋ a, ꞌbhɛɛ nɩ wɔnyi, -ɛkedɩmaa, wlu ꞌɩn-ɩ ꞌyeꞌa ꞌmʋ-za mʋ a, ɛ-ɛ ꞌmo-o -ziadɩ! ꞌƖn na:

-Bho -a -ke Kliisɩ ꞌmɛ, -a -ke ɔ -nɩꞌe ti -lrɛɛ.

¹²-Bho -a ku ꞌkpa ꞌꞌyi, -a -ke ɔ-ɔ ꞌye-e lɩ ꞌꞌkpi -nɩ -mʋ -lrɛɛ. ꞌLe, ꞌbho nyʋꞌa ꞌꞌyigbeyi, -bho -a nʋ na -a se ɔ yibo a, ꞌbho -aꞌba -tɩta -Lagɔꞌɔ ꞌꞌyigbeyi ɔ-ɔ ꞌye -amʋ ꞌꞌyidepo mʋ -lrɛɛ, ꞌle ɔ ꞌke na: ꞌƖn se ʋ yibo, nʋ.

¹³-Bho -a -see ɔ ꞌꞌgwlide, ɔbɔ -nmɔꞌɔ-ɔ ꞌꞌyiti nyɔ ꞌke ɔ ꞌꞌgwlide ꞌꞌkɔmʋ, -ɛkedɩmaa, ɔ se ꞌbhɛɛ ɔ ꞌke wlu ꞌꞌyida ꞌmʋ -za.

Kuku ꞌmʋti, -ɩn ꞌke lbhʋ nʋ ꞌle -Lagɔ ꞌke -ɩnmʋ ꞌꞌkpiꞌwɔɔn

¹⁴-Ɩn ꞌye li-ɔ, Timotee, lɩ ꞌɩn -zaꞌa -laa -ɩnmʋ -bodɩ ꞌmʋ, popo nɩ nyʋ ꞌgwlʋti, ꞌle -ɩn ꞌke ɩ ʋ ꞌtmʋʋ ꞌbho -Lagɔꞌɔ ꞌꞌyigbeyi ꞌle ʋn -kaa -nʋkpʋdɩ ꞌꞌyidepo -nɩ! ꞌYa lɩtu-u ꞌmo-o bhebhedɩ, ꞌle, nyʋ-ʋ po ꞌʋ -lokui, ɩ-ɩ nʋ ɛꞌo ꞌle ɩ-ɩ zʋ ꞌʋ -ziadɩꞌa ꞌꞌgwlideɛ -pɔlʋ ꞌzɔ. ¹⁵Po ꞌle ꞌkpɩ, nyɔ sɩasɩaalɩ bhlaꞌa wɔn, -ɔ -ke ꞌꞌgwlideɛ -seeꞌa -denɩ ꞌmʋ -sɔ, -ɔ -ke nʋnʋlbhʋ ꞌka -Lagɔ ꞌtʋ nʋ, -ɩn ꞌke ꞌɔ nyɔtu ꞌꞌdu! -Ka lbhʋnʋyi -ke lbhʋ -nmɔꞌɔ ꞌꞌyrili ꞌle ꞌɛ dɩnꞌa ꞌlbhɔ ꞌɔ ɔ, po ꞌle ꞌkpɩ -ɩn ꞌke -kaa -nɩ! ꞌƖnnɛ ꞌmo-o, -Lagɔꞌɔ ꞌꞌdɩzɩgɩ-ɩ ꞌma-a -ziadɩ, -zɩ ɩ nyʋ -bodɩ ꞌmʋ ꞌle ꞌꞌyisrɛɛɛ ꞌmʋ! -Aꞌa -zɩ ɩ ꞌꞌyida ꞌmʋ -le! ¹⁶-Yɩ ꞌma-a bhebhedɩ nyʋ-ʋ depo nɩꞌa ꞌꞌyi, -yɩꞌa nʋꞌa -Lagɔ ꞌtʋ a, -aꞌa po ɩ wɔn ꞌꞌkpi -le! -Ɛkedɩmaa, nyʋ-ʋ ꞌkpaꞌa ꞌya wlutu kli, ʋn-ʋ ꞌꞌmaa-a -Lagɔꞌɔ -ziadɩꞌa -jolʋ ꞌꞌyrili. ¹⁷-Gblee, ꞌya nyʋtuꞌa wlu-u ba-oꞌo ꞌle nyunyuꞌa ꞌꞌklumʋ ꞌle ɩ kɔɔꞌɔ -zʋnjieꞌa -cɩanyɩ gleꞌa ti ꞌle ꞌꞌjie-e ꞌbhɛɛꞌɛ ꞌꞌyigbeyi ti, ꞌle ꞌwa -klaabonyʋꞌa ꞌꞌklumʋ Iminee -ke Filɛtɩ -nɩꞌo. ¹⁸Ʋ-bʋ nyʋ ꞌmnʋ ꞌꞌtayiꞌe-e -ziadɩꞌa -jolʋ ꞌꞌyiti, ꞌle ʋn-ʋ tɔꞌɔ nyʋ bhebhelɩ, na: *Zezii *Kliisɩꞌa nyʋ-ʋ ꞌmɛꞌɛ ɛ, ꞌwa kuꞌa glusɔdɩ ʋn-ʋ ꞌꞌsiꞌa ꞌnynɩ, ɛ -see -nʋ-ɛ yi ꞌle *-lebhɔɔnɔɔ ti. ꞌLe ʋn-ʋ nʋꞌo -lrɛɛ: -Lagɔ ꞌnʋ -ɛ -amʋ ꞌꞌlruli see, ɔ -zaꞌa-a ꞌmɛmʋ glu. -Bho nyʋ ꞌꞌtayi kplisʋa ꞌꞌyiti ꞌle Zezii ꞌke ʋ tinɩɛlre ꞌꞌnyɩ, -ɩn -ke ɔ ꞌke ꞌmɛ ꞌle -ɩn -ke ɔ ꞌke glu -sɔ, ꞌɩnnɛ -ke ɛ gʋgɔꞌɔ ꞌꞌyiti. ꞌƐ ꞌꞌsɛ moꞌo. Glusɔɛ -lrɛɛ se -nɩ. ꞌWa wlu ꞌmnɩꞌa dɩ nyʋtɔlʋ ꞌꞌmaaꞌa -Lagɔꞌɔ -ziadɩ ꞌꞌyrili. ¹⁹ꞌBho ꞌmnɔ ɔ, ꞌɔ -glɩgba ɩ-bɩ -tɔtɔlɩzɩgɩ ꞌmnɩ deꞌa ꞌꞌlruti, -bho ꞌɛ nyʋ -kpʋn nɩ ꞌꞌyi, ɛ -nɩꞌe-e gege. ꞌƖnnɛ ꞌbhleꞌe ꞌnynɩꞌa dɩ a, ꞌɛ wluꞌa ꞌmʋyibolɛ ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli, ɛ na: -Aꞌba -Kɔyi yiboꞌo-o nyʋ-ʋ ꞌma-a ꞌɔ -nʋ, ꞌle ɛ na -lrɛɛ: Nyɔꞌꞌo nyɔ-ɔ paꞌa -aꞌba -Kɔyi li, ꞌɔ nyɔtu ple ꞌꞌnyinynidɩ li!

²⁰-Ɩn ꞌye li-ɔ, ꞌle ꞌgagayiꞌa -budu ꞌli ɛ -se ꞌnynɩmukɔkɔlɩꞌa ꞌꞌsɛ -nɩ ꞌle -ko. Tɔlɩ ꞌbhɛɛꞌo ɩ ꞌke ꞌpɛlʋbhlenɛtɛ ꞌꞌdu, ꞌle -lrɩɩ ꞌꞌduꞌo tu -ke mɛ. ꞌYa lɩtu se nʋnʋdɩ ꞌmʋ gʋgɔ. ²¹-Ka -lue ꞌmnɔ ꞌka-a -abʋ -nɩꞌo -lrɛɛ. -Bho nyɔ ple ꞌꞌnyinynidɩ li ꞌle ɔ ꞌke *liꞌsaa ꞌbho -Lagɔꞌɔ ꞌꞌyigbeyi, ꞌɔ nyɔtu, ɔ-ɔ po ꞌnɔ-ɔ kpɔ ꞌꞌyi ꞌle ɔ-ɔ ꞌꞌduꞌo -zɛgɛ ꞌɔ -yowli ꞌmnɔ -bodɩ. Lɛꞌꞌo lɛ-ɛ ꞌma-a -zɛgɛ, ꞌɛ -jeyi ɔ-ɔ de ꞌɔ ti.

²²ꞌLe -mnɔɔɔ gbo a, Timotee, ꞌꞌnyinyninaagɩ-ɩ ꞌꞌtuuꞌa ꞌbhʋabhʋayreetɩ ꞌle ʋn-ʋ nʋꞌa ꞌꞌnyinynidɩ a, ple ɩ li! Po ꞌle ꞌkpɩ ꞌle -aꞌa -pɔlʋ ꞌke ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi ꞌle -aꞌa -nabhʋ ꞌke ɔ ꞌtʋ nʋ, de ɔ ꞌꞌgwli ꞌꞌkɔmʋ, -kma -aꞌa -bonyunyɔꞌɔ dɩ, nyʋ-ʋ paꞌa -aꞌba -Kɔyi Zezii li, ʋn-ʋ po ꞌɔ *wɔn gbo ꞌle -pɔlʋplu ꞌmʋ, ꞌle -aꞌa ꞌlimʋ ꞌke ʋ ꞌꞌkpi wɔn-nmɔ -nɩ! ²³-Ɩn ꞌye li-ɔ, nyʋꞌa bhebhedɩ ʋn-ʋ depo nɩꞌa ꞌꞌyi a, -aꞌa po ɩ wɔn ꞌꞌkpi -le! -Gblee, ꞌbhatadɩ ꞌmnɩ, ꞌɩnnɩ yaꞌa jɛjɛɛ nyʋ -bodɩ. ²⁴Nyɔ-ɔ ꞌma-a -aꞌba -Kɔyi Zeziiꞌa lbhʋnʋyi a, ꞌɔ ꞌꞌdu -gbaatibɔyi -le! Ɔ ꞌꞌdu nyɔ -ke ꞌlimʋ -nmɔꞌɔ wɔn ꞌbho nyʋ ꞌweeꞌa ꞌꞌkpi, ꞌle ɔ ꞌke nyʋꞌa -tɔtɔɔ wɔnyiꞌbhɛɛ! Ɔ ꞌꞌdu ꞌlimʋtikuyi ꞌle ɔ ꞌke nyʋ wɔnyiꞌbhɛɛ! ²⁵Ɔ -nmɔ kpli ꞌmʋ, ꞌle, nyʋ -ke ɔ-ɔ dedeꞌa ꞌꞌyi, ɔ ꞌke ʋ -ziadɩ -tɔ! -Bho ɔ nʋ -kaa a, ʋ-bʋ nyʋ ꞌmnʋ, -Lagɔ ꞌbhɛɛꞌo ꞌkɩ ɔ ꞌke ɛ nʋ ꞌle ʋn ꞌke ꞌwa ꞌꞌnyinynidɩ ꞌꞌyiyibo ꞌnɩ-ɛ ꞌle ʋn ꞌke ɔ gbo ꞌꞌbhiti ꞌle ʋn ꞌke ꞌɔ -ziadɩ yibo. ²⁶-Bho ʋn nʋ -kaa a, ꞌꞌnyinynidɩꞌa tiyayi *Sataan -po ꞌnʋ -kpɛɛ ꞌmʋ ꞌle ʋn-ʋ ꞌꞌduꞌa ꞌbho ꞌɛ wlu, ʋn ꞌbhɛɛ ꞌko-oꞌo ʋn ꞌke ꞌɛ -gbitiɛ ꞌmʋ ꞌwlʋ ꞌle ʋn ꞌke -Lagɔꞌɔ -jolʋzɛgɛ bhlu.

ꞌLe *-lebhɔɔnɔɔ ꞌliꞌa sɩasɩaa-a ꞌyeꞌa -yi mʋ

¹ꞌƖn-ɩ ꞌtmʋʋꞌo -ɩnmʋ-ɛ -lrɛɛ, ꞌle *-lebhɔɔnɔɔ ꞌli sɩasɩaa-a ꞌye-e nyunyu -bodɩ -yi -mʋ. Ɛ-ɛ ꞌye-e ꞌꞌyi-kmu -mʋ. ²ꞌBho ꞌmnɔ ɔ, nyunyuꞌa -dedekpli ʋn ꞌyeꞌa ti-nɩ mʋ, ꞌɩnnɩ ꞌka-a: Ʋn-ʋ ꞌye-e ꞌwa ꞌꞌbhiꞌa nʋnʋdɩꞌa dɩ -zi -mʋ, ʋn ꞌke mɔniꞌa ꞌtʋ ꞌgwlʋ li ꞌbhle, ʋn ꞌke ꞌwa ꞌꞌbhi ꞌꞌyiꞌbhɛɛ ꞌle ʋn ꞌke ꞌꞌplinmʋ ꞌꞌdu. -Gblee, ꞌwa nyunyutu-u ꞌye-e -Lagɔꞌɔ da ꞌꞌduu -mʋ, ꞌle, lɛꞌꞌo lɛ-ɛ ꞌbhleꞌa -Lagɔꞌɔ ꞌnynɩ ꞌꞌkpi, ʋn ꞌke ɛ ꞌmʋꞌnyɛ. Ʋn -see ꞌwa ꞌꞌbhiꞌa ꞌꞌyiglɛnyʋ ꞌbho ꞌꞌdu yi ꞌle ʋn -see ʋn -bonyunyɔꞌɔ -zɛgɛ yibo yi -lrɛɛ. ³-Ɩn ꞌye li-ɔ, ꞌwa nyanɩ -see ꞌmʋꞌtɛ yi, ʋn -see nyʋꞌa ngaze ꞌye yi, ꞌle ʋn ꞌke ʋn -bonyunyuꞌa da ꞌmʋ-za ꞌꞌnyinynika ꞌle ʋn ꞌke ʋ dɩ ꞌꞌkpi ꞌꞌduu -lrɛɛ. Ʋn-ʋ ꞌye-e nyʋ nyanɩ ꞌmʋ -kla -mʋ ꞌle ɩ -see ʋ ka -nyna yi, ꞌle ʋn ꞌke -zɛgɛ ꞌmʋꞌnyɛ ꞌle ʋn -see ꞌwa ꞌꞌbhi wɔnyiꞌbhɛɛ yi. ⁴Ʋn-ʋ ꞌye-e nyʋ -lrʋʋ dɩ ꞌꞌyriliꞌꞌmaa -mʋ ꞌle ʋn ꞌke -nɩadɩ nʋ, ʋn ꞌke ꞌwa ꞌꞌbhi ꞌꞌyiꞌbhɛɛ ɛ ꞌke ꞌꞌkalɛ ꞌꞌyi zi ꞌle ʋn ꞌke ꞌwa ꞌꞌbhiꞌa ꞌtʋnʋdɩ gbo zi ꞌle ʋn ꞌke -Lagɔ ꞌꞌkpi-tbhɛ. ⁵ꞌBho ꞌɛ lemʋ, nyʋ -see -Lagɔꞌɔ nyʋzɩgɩ ꞌꞌdu yi ꞌle ʋn ꞌke ꞌbho ꞌɔ -jeyi -na bhebhe. Ʋ-bʋ nyʋ ꞌmnʋ -see *ꞌɔ Lisaazuzuꞌa wɔnkuɛ ꞌwɔɔn yi ꞌle ʋn ꞌke ꞌɔ nyʋzɩgɩ ꞌꞌdu -lrɛɛ ꞌle ꞌwa kpli ꞌke ꞌtɔ ɔ ꞌtʋ nʋ. Nyʋ-ʋ nʋꞌa ꞌya -kaabolɩ ꞌmnɩ, po ʋ le! ⁶-Ɩn ꞌye li-ɔ, ꞌꞌyri -ke ꞌꞌyi -a -nɩꞌa -laa, ꞌle ꞌwa nyʋtuꞌa ꞌꞌklumʋꞌa nyʋtɔlʋ-ʋ paꞌa nyʋ ꞌꞌbhlibhlegbo -fɔɔ. ꞌWa ꞌnynʋkpakpɩ -ke -naagɩ-ɩ ꞌfɩɩnꞌa ꞌmʋ, ꞌle ʋn-ʋ ꞌꞌmaa ꞌnʋ dɩ ꞌꞌyrili ꞌle ʋn-ʋ ꞌwɔɔnꞌɔ ꞌwa wlu. -Gblee, ʋ-bʋ ꞌnynʋkpakpɩ ꞌmnʋ, ꞌꞌnyinynidɩ ʋn-ʋ nʋꞌa ꞌbho -Lagɔꞌɔ ꞌꞌyigbeyiꞌa dɩ, ꞌwa -pɔlʋ -see bhlu, ꞌle ꞌꞌnyinynidɩꞌa -dadudu -ɩ ꞌma-a ʋ-bee ꞌmnʋꞌa ꞌtʋnʋdɩ, ꞌɩnnɩ ʋn-ʋ ꞌꞌtayiꞌe ꞌꞌyiti ɩ ꞌke ʋ -jolʋ gbo po ꞌle ʋn-ʋ nʋ ɩꞌo. ⁷Ʋn ꞌbɔ-ɔ ti, -ziadɩ -ke ꞌtʋ-ʋ -nɩ ꞌnʋ ꞌꞌgwli, ʋn ꞌke ɩ ꞌcɩan, ꞌle, ɩ-bɩ ꞌꞌnyinyninaagɩ ꞌmnɩ, ʋn-ʋ ꞌꞌtayi ꞌnɩ ꞌꞌyiti ɩ ꞌke ʋ -jolʋ gbo poꞌa dɩ ʋn ꞌse ꞌbhɛɛ ʋn ꞌke ɩ yibo. ⁸Nyukpasi ꞌꞌmaaꞌa ʋ-bʋ ꞌnynʋkpakpɩ -mnʋʋ -bodɩ a, -ka *Ezipʋtɩkɔmʋ ꞌsɔn Zanɛsɩ-e Zaanblɛsɩ -ke -Lagɔꞌɔ lbhʋnʋyi *Moyiizɩ dedeꞌa ꞌꞌyi -bɛnyɩ, -ka -lue ꞌmnɔ ɔ, ꞌka-a ꞌwa ꞌꞌnyinynidɩꞌa dɩ ʋn -see -Lagɔꞌɔ ꞌꞌdɩzɩgɩ ꞌwɔɔn yi. ꞌWa popo ꞌꞌyisrɛɛka ꞌgwlʋtiꞌa dɩ, ꞌwa -tɔtɔlɩ ʋn-ʋ tɔꞌɔ nyʋ -Lagɔꞌɔ damʋ ʋn-ʋ ꞌlaꞌa -ziadɩ, ɩ se ꞌkpʋ ꞌbhle. ⁹-Gblee, ꞌwa nyʋtu -see nya -mu yi, ꞌle, -ka nyʋ ꞌyeeꞌa Zaanblɛsɩ -ke Zanɛsɩ ꞌꞌyri ꞌbɩ le -bɛnyɩ, -ka ʋn -seeꞌa lɛ yibo, -ka -lue ꞌmnɔ ꞌka-a nyʋ ꞌwee ꞌke ꞌya ꞌbɩ ꞌyee -lrɛɛ.

-Tɔtɔlɩ -ɩn ꞌcɩanꞌa a, -de nɩ ꞌli ti

¹⁰-Ɩn ꞌye li-ɔ, ꞌle -mnɔɔɔ gbo a, kpli ꞌɩn -nɩꞌa ti ꞌbho -Lagɔjeyi, -ɩn yibo nɩ-oꞌo ꞌꞌpɛcɛɛ: Lɩ ꞌɩn-ɩ tɔꞌɔ nyʋ o, ꞌan kpli o, ꞌle lɛ ꞌan nʋnʋlbhʋ ꞌmnɛ-ɛ ꞌkpaꞌa ꞌꞌlru ꞌꞌyi, -ɩn yibo nɛ-oꞌo ꞌꞌpɛcɛɛ. ꞌLe, -ka ꞌɩn deꞌa -Lagɔ ꞌꞌgwli, -ka ꞌɩn -kuꞌa ꞌꞌgwli ꞌle ꞌɩn ꞌꞌsiꞌa ꞌbho ꞌɩn -kmaꞌa nyʋꞌa dɩ ꞌle ꞌɩn ꞌyeꞌa ꞌkpa ꞌꞌyi ku, ꞌle, ɛ-bɛ lbhʋ ꞌmnɛ, ꞌɩn ꞌye ꞌɛ ꞌꞌyi-kpʋn, -ɩn yiboꞌo-o ꞌna ꞌꞌpɛcɛɛ -lrɛɛ. ¹¹ꞌBho ꞌɛ lemʋ, lbhʋ ꞌmnɛ, ꞌɩn -nɩ ꞌnɛ nʋnamʋ, -ka nyʋ klaꞌa ꞌɩnmʋ nyanɩ ꞌmʋ, -ɩn yiboꞌo-o ꞌna ꞌꞌpɛcɛɛ, ꞌle, sɩasɩaa-a bhlaꞌa ꞌɩnmʋ ꞌꞌkpi ꞌle Atiɔsɩ-e Ikɔnɩ -ke Lisɩtrɩ, -ɩn yiboꞌo ꞌna ꞌꞌpɛcɛɛ -lrɛɛ. Kɩn, ꞌɩn sɩa-oꞌo. ꞌƖn -nɩꞌa -kaa ꞌɛ ꞌlimʋ, -aꞌba -Kɔyi -see ꞌɩnmʋ gboꞌmate, ꞌle daꞌꞌo -da ɔ zetieꞌe ꞌɩnmʋ-ɛ. ¹²-Ɩn ꞌye li-ɔ, nyɔꞌꞌo nyɔ-ɔ ꞌbɔꞌɔ ti ɔ -ke *Zezii *Kliisɩ ꞌke ꞌꞌyiꞌꞌsisri, ꞌle, -ka -Lagɔꞌɔ wlu ꞌlɛꞌɛ ꞌtɩn, ꞌɔ -dedekpli ꞌke -kaa -nɩ ꞌbho -Lagɔꞌɔ -jeyi a, nyʋ-ʋ ꞌkla-a ꞌɔ nyɔtu nyanɩ ꞌmʋ ꞌꞌkɔmʋ. ¹³ꞌLe, nyʋ-ʋ ꞌꞌmaaꞌa nyʋ dɩ ꞌꞌyrili -ke dɩꞌa ꞌꞌnyinynimʋ -lrʋʋ -mnʋʋ a, ꞌwa ꞌꞌnyinynidɩ-ɩ ꞌye-e ꞌꞌkpiꞌkpa -mʋ ꞌꞌkɔmʋ. -Ka ʋn-ʋ ꞌꞌmaaꞌa ʋn -bonyunyu ꞌle ꞌwa ꞌꞌbhi ꞌke -kaa ꞌꞌma.

¹⁴ꞌƖn-ɩ ꞌtmʋʋꞌo -ɩnmʋ-ɛ, Timotee, lɩ -ɩn ꞌcɩanꞌa ꞌle -aꞌa -pɔlʋ ꞌwlaꞌa ꞌꞌyiti -ka -zɛgɛka, -de nɩ ꞌmʋ ti! -Ɩn ꞌye li-ɔ, nyʋ-ʋ -tɔ ꞌnɩ -ɩnmʋ, -tɔtɔlɩzɩgɩ-ɩ ꞌbhleꞌa ꞌkpʋ, -ka ʋn-ʋ tɔ ꞌnɩ -ɩnmʋ, -ɩn yiboꞌo-o ꞌna. ¹⁵-Gblee, ꞌbho ꞌɛ lemʋ, -ɛ ꞌnyaaꞌa -aꞌa ꞌꞌdanabhla a, -ɩn yiboꞌo-o wlu-u ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli. Ɛ-bɛ wlu ꞌmnɛ, ɛ ꞌbhle-e wɔnkuɛ ɛ ꞌke nyɔ -naagɩ ꞌꞌnyɩ ꞌle ɔ ꞌke Zezii Kliisɩ ꞌꞌgwlide, ꞌle ɛ ꞌmʋ, ꞌle-e ɔ ꞌke ꞌpʋn -nɩ ꞌbho -Lagɔꞌɔ ꞌꞌyigbeyi. ¹⁶-Ɩn ꞌye li-ɔ, ɩ-bɩ wlu ꞌmnɩ ꞌwee ꞌcnɩ-ɛꞌɛ ɛ, ɩ-ɩ ꞌwlʋ-o *ꞌɔ Lisaazuzu ꞌmʋ ꞌle ɔ na nyʋ ꞌcnɩ ɩ ꞌle ꞌɔ ꞌꞌbɔgʋ ꞌli. ꞌƐ dɩ ɩ -nmɔꞌɔ ꞌꞌyrili, -ziadɩ ꞌmnɩ, nyɔ ꞌke ɩ nyʋ -tɔ. Ɩ -nmɔꞌɔ-ɔ ꞌꞌyrili -lrɛɛ, ꞌle, ꞌꞌnyinynidɩ -nɩꞌa ꞌle -aꞌba tinɩɛ ꞌmʋ, ɩ ꞌke ɩ -amʋ -tɔ ꞌle -a ꞌke ɩ ꞌꞌyiyibo, -a ꞌke -Lagɔ gbo ꞌꞌbhiti, ꞌle ɩ ꞌke -amʋ ꞌɔ ꞌꞌyisrɛɛjolʋ ꞌꞌyi le -ya, ꞌle ɩ -nmɔꞌɔ ꞌꞌyrili -lrɛɛ ɩ ꞌke -amʋ -zɩgɩ da -tɔ, ꞌle -a ꞌke ɩ nʋ. ¹⁷-Lagɔꞌɔ Lisaazuzu ꞌnʋ-o ꞌna ꞌle ɔ ꞌke ꞌɔ lbhʋnʋyi ꞌmʋ ꞌꞌyi ɔ ꞌke ꞌkpɩ ꞌmʋꞌbhle ɔ ꞌke lbhʋꞌa -zɛgɛnɛ nʋ.

¹-Gblee, Timotee, Zezii Kliisɩ -ɔ ꞌka le yi, ɔ ꞌke ꞌmɛmʋ -ke tinɩmʋ -zigle -tu ꞌle ɔ ꞌke ꞌɔ nyʋ -kɔ ɔ, ɔ -ke -Lagɔꞌɔ ꞌꞌyigbeyi ꞌɩn-ɩ ꞌtmʋʋ nɩꞌe -ɩnmʋ. ²ꞌWla -pɔlʋ ti -ɩn ꞌke ꞌɔ ꞌꞌdɩzɩgɩ ꞌmʋ-za! -Bho -ɩn -kɩ ɩ ꞌmʋ-ʋza a, ꞌle zɔ ꞌke ꞌmʋ-nmɔ o, ꞌle ɛ ꞌke ꞌmʋ-nyni o, -aꞌa kpʋn ꞌɛ lbhʋtu -kebhlele -le! ꞌꞌDu nyʋ ꞌꞌdɩ ꞌmʋ! -Yʋ -nɩꞌa dɩyikpaka, kpʋ ʋ dɩ ꞌꞌyi, ꞌle, ꞌꞌnyinynidɩ -nɩꞌa ꞌle ꞌwa tinɩɛ ꞌmʋ, -tɔ nʋ ɩ ꞌle ʋn ꞌke ɩ ꞌꞌyiyibo ʋn ꞌke -Lagɔ gbo ꞌꞌbhiti, ꞌle -ɩn ꞌke nyʋ ꞌwee ꞌkpa ꞌꞌyi po! -Ku ꞌꞌgwli ꞌꞌkɔmʋ ꞌle -ɩn ꞌke ʋ-bʋ nyʋ ꞌwee -tɔ -ka -zɛgɛka! ³-Ɩn ꞌye li-ɔ, -nɔɔ -lrɛɛ-ɛ ꞌye-e -nyni -mʋ ꞌle nyunyuꞌa -loku ꞌmʋ -ziadɩ ꞌke ꞌle bhlɛɛ, ꞌle, nyʋ-ʋ tɔꞌɔ ꞌya lɩtu, ʋn -see ʋ -lokui-po yi. -Tɔtɔlɩ -yɩ seꞌa ꞌkpʋ ꞌbhle, ꞌle ʋn ꞌke ɩ ꞌwɔɔn. -Gblee, ꞌwa -klaabotɔmʋ ꞌmnʋ-ʋ ꞌye-e ꞌkpna -mʋ ꞌle ʋn ꞌke ʋ ꞌwa ꞌtʋnʋdɩ -tɔ. ⁴Ʋn -see ꞌtɔ -ziadɩꞌa -lue komu -lokui-po yi ꞌle ʋn ꞌke ꞌle bhebhelɩ gbo ꞌꞌbhiti. ⁵ꞌLe -mnɔɔɔ gbo a, Timotee, kpʋn dɩ li ꞌle lɩ ꞌwee ꞌmʋ! -Ku ꞌꞌgwli, ꞌle, sɩasɩaalɩ yiꞌa -ɩnmʋ -bodɩ, -ɩn ꞌke ɩ wɔnyiꞌbhɛɛ! Lbhʋ -Lagɔ -tbhaꞌa -ɩnmʋ ꞌle -ɩn ꞌke ꞌɔ ꞌꞌdɩzɩgɩ kpa, kpʋn ɛ ti -ɩn ꞌke ɛ nʋ -ka -zɛgɛka ꞌꞌkɔmʋ!

⁶-Gblee, ꞌle ꞌmna gbo a, ꞌɩn ꞌtmʋʋꞌo-o -ɩnmʋ ɩ-bɩ dɩ ꞌmnɩ, -ɛkedɩmaa, ꞌɩn-ɩ ꞌye-e ꞌmɛ -mʋ Zezii Kliisɩꞌa dɩ ꞌle ꞌɛ -nɔɔ ꞌꞌkɔɔꞌɔ gbo. Nmɔ nyɔ-ɔ ꞌwlaꞌa ꞌbho *ꞌsraganmiꞌa ꞌꞌkpi ti -tanyɩ ꞌle ɔ-ɔ zɛꞌɛ ɛ, ꞌɛ -ka ꞌɩn -nɩꞌo. ⁷-Ɩn ꞌye li-ɔ, -ka pleyi -ke ꞌɔ -boplemʋ-ʋ mumuꞌa li ꞌle ɔ-ɔ kukuꞌa ꞌmʋti, ɔ-ɔ ꞌwlʋꞌa ꞌnynɩ a, ꞌka-a ꞌɩn -nɩꞌo. Lbhʋ -Lagɔ -tbhaꞌa ꞌɩnmʋ ꞌɩn ꞌke ɔ -bodɩ nʋ a, ꞌɩn nʋ -ɛꞌo kplokplokplo ꞌle -pɔlʋzɛgɛ ꞌmʋ, ꞌɩn ꞌgwɛ-ɛ ꞌꞌyi ꞌɩn ꞌye ꞌle ꞌɛ ꞌꞌlruti -ponamʋ nyni. ꞌƖn -nɩꞌa -kaa a, ꞌɩn -kpʋnꞌo-o ꞌɔ wlu ꞌꞌyi. ꞌAn ꞌꞌgwlideɛ -see -denɩ ꞌmʋ -sɔ. ⁸ꞌTraamʋ ꞌtɔ ɔ, ꞌnynɩwlʋɛɛ ꞌbho -aꞌba -Kɔyi Zeziiꞌa ꞌꞌtroli, ɔ-ɔ ꞌyeꞌa ꞌɩnmʋ ꞌꞌnyɩ mʋ, ꞌɩnnɛ ɔ-ɔ fuo nɩꞌe ꞌɩnmʋ wɔn. Ɛ-bɛ ꞌnynɩwlʋɛɛ ꞌmnɛ, nyʋ-ʋ ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, ꞌɩnnʋ ɔ ꞌke ɛ ꞌꞌnyɩ. Ɔ-bɔ -aꞌba -Kɔyi ꞌmnɔ ɔ, -nɔɔ -ke ti ɔ-ɔ ꞌyeꞌa le -yi mʋ, ꞌbho-o ɔ-ɔ ꞌye ɛ ꞌɩnmʋ ꞌꞌnyɩ -nɩ mʋ, -ɛkedɩmaa, ꞌꞌyisrɛɛka ɔ ꞌke nyʋ -zigle -tu. Ɛ -se ꞌan ꞌꞌsɛ ɔ ꞌke ɛ ꞌꞌnyɩ -ko. Nyʋ ꞌwee -nɩꞌa ꞌɔ leyiɛ ꞌmnɛ wɔnfuonamʋ ꞌle ꞌbʋbʋa ꞌmʋ, ꞌɩnnʋ ɔ-ɔ ꞌye ɛ ꞌꞌnyɩ mʋ -lrɛɛ.

ꞌPɔlʋ ꞌbɔ-ɔ ti Timotee ꞌke ꞌbho ꞌɔ ꞌꞌtroli yi

⁹-Gblee, Timotee, ꞌle ꞌan wlu ꞌke ꞌle -ɩn gbo nyni a, ꞌkpa ꞌbho -ɩn ꞌke yi -vuu! ¹⁰ꞌƖn-ɩ ꞌtmʋʋꞌo -ɩnmʋ-ɛ, Demasɩ -nɩ ꞌka ꞌnɔɔ ɔ, ꞌnɔɔgbɛ ꞌkmʋ ꞌmʋꞌa tinɩɛ-ɛ ꞌnʋ -ɔ ꞌtʋ. Ɔ ꞌwlʋ-o ꞌɩnmʋ ꞌꞌyrili ɔ ꞌye Tesalonikɩ mu. -Yɔ ꞌma-a Klesaasɩ a, ɔbɔ ꞌmu-o lbhʋ ꞌꞌkpi ꞌle Galasiibhlʋkpa ꞌꞌkpi ꞌle Tiitɩ -mnɔɔ ꞌye Dalɩmasɩ mu lbhʋdamʋ -lrɛɛ. ¹¹Luukɩ -nɩ -lue, ꞌɔ ꞌꞌsɛ -ke ꞌɩn -sieꞌe ꞌnɔɔ. -Bho -ɩn -ka yi a, -ɩn -ke Maakɩ yi! Ɔbɔ ꞌbhɛɛꞌo ɔ ꞌke ꞌɩnmʋ -kpa. ¹²Tisikɩ -mnɔɔ, ꞌɩn ꞌlbho -ɔ ꞌle Efɛɛzɩ ꞌꞌbhalrɛɛ. ¹³-Bho -ɩn -ka yi a, Timotee, ꞌan -sɩnbana ꞌɩn sieꞌa ꞌbho Trʋasɩ Kapusɩ gbo a, -sie nɛ ꞌɩnmʋ! -Yɩ ꞌma-a ꞌan ꞌnynɩbhlebɔgʋɩ, -sie nɩ ꞌɩnmʋ -lrɛɛ, ɩ -ke ꞌan ꞌꞌbɔgʋɩ -lrɩɩ!

¹⁴-Yɔ ꞌma-a nɛtɛbhlayi Alasaanɩ -mnɔɔ ɔ, ꞌɔ ꞌmʋzadɩ ꞌvɔ-ɔ ꞌɩnmʋ tʋ gbo. Lɩ ɔ nʋꞌa a, -aꞌba -Kɔyi-i ꞌye-e ꞌya ꞌꞌlru ꞌmʋ ꞌꞌpɛle -mʋ. ¹⁵ꞌꞌDu -aꞌa ꞌꞌbhuo ꞌꞌyrili ꞌbho ꞌɔ ꞌꞌkpi! Ɔ ꞌbhɛɛꞌo ɔ ꞌke -ɩnmʋ tʋ gbo -ya -lrɛɛ, -ɛkedɩmaa, -aꞌba -tɔtɔlɩ ɔ ꞌwɔnꞌɔ ꞌbɔ, ɔ ꞌvɔ -ɩ tʋ gbo.

¹⁶-Gblee, ꞌꞌyizazigle ʋn -tuꞌa ꞌɩnmʋ, nyɔ -see ꞌɩnmʋ -kpanamʋ yi. -Ka ʋn -dieꞌa ꞌmʋ, ʋn ꞌwlʋ-o ꞌɩnmʋ ꞌꞌyrili. -Lagɔꞌɔ kpʋ ʋ ꞌya dɩ ꞌꞌyi -le! ¹⁷Ɩ -nɩꞌa -kaa ꞌmʋ, -aꞌba -Kɔyi *Zezii -mnɔɔ -bodɩ a, ɔ -see ꞌɩnmʋ kwa gbo -za, ɔ ꞌpo-o ꞌɩnmʋ ꞌkpa ꞌꞌyi ꞌle ꞌɩn ꞌye ꞌɔ ꞌꞌdɩzɩgɩ -za ꞌle nyʋꞌa -dadudu-u -seꞌa-a *ꞌZuifʋ ꞌye ɩ ꞌbʋꞌwɔn. ꞌBho-o ꞌɩn ꞌꞌtaflɛ nɩꞌe ꞌmɛmɛɛ. ¹⁸ꞌꞌNyinynilɩ ꞌyeꞌa ꞌɩnmʋ ꞌꞌlruli-nʋ-ɛ mʋ a, ɔ-ɔ ꞌye-e ꞌle ꞌya ꞌmʋ ꞌɩnmʋ zetie -mʋ ꞌꞌkɔmʋ, ꞌle, nyʋ ɔ -kɔꞌɔ, -ʋ -nɩꞌa ꞌle yaku ꞌli, ꞌɩn ꞌke ꞌle ꞌwa ꞌꞌklumʋ ꞌbɩ ꞌye. Nyʋ ꞌbhɛɛ ꞌɔ ꞌnynɩ ꞌꞌyi ꞌꞌkɔmʋ -nɔɔꞌꞌo -nɔɔ ti! *Ɩ -nɩ -kaa ꞌmʋ!

-Lebhɔɔyewlu

¹⁹ꞌƖnmɔ ꞌyeꞌe *Plisilɩ -ke *Akilaa! ꞌƖnmɔ ꞌyeꞌe Onezifɔɔꞌɔ ꞌꞌbhlegboꞌa nyʋ -lrɛɛ! ²⁰ꞌLotʋꞌa ꞌꞌnynuu ꞌsɔn -yʋ -sieꞌa ꞌbho, -ɛ -ke dɩ ʋn -seeꞌa -ɩnmʋ ꞌyewlu -jeyi po a, ꞌɩnnɛ ꞌmo-o ʋn se -laa -nɩ. Elaasɩ -mnɔɔ, ɔ -sieꞌe-e Kɔlɛɛtɩgwlɔ ꞌmʋ. -Yɔ ꞌma-a Trofimʋ a, ꞌɔ ꞌꞌlru-u ꞌbhatiꞌa dɩ ꞌɩn sie ꞌɔ ꞌle Mileegwlɔ ꞌmʋ. ²¹Timotee, yi -susueyi ꞌle -ɩn ꞌke ꞌꞌguda le sie!

Ebulusɩ-e Pudɛɛn -ke Linusɩ, Klodia -ke ꞌlotʋꞌa ꞌꞌnynuu -lrʋʋ na ʋ-bʋ ꞌyeꞌe -ɩnmʋ!

²²ꞌAn ꞌꞌyu, Timotee, -aꞌba -Kɔyi -sie -ɩnmʋ gbo ꞌle ɔ ꞌke -ɩn -ke ꞌlotʋꞌa ꞌꞌnynuu ꞌwee ꞌꞌniti-wʋnna!